Post: #1
Title: ورجع عمنا ( ود كسار) مرة اخرى بعد عشرين عاما لشراب المريسة بعد فتوى الترابي؟؟
Author: هشام هباني
Date: 04-12-2006, 01:43 PM
Parent: #0
عمنا ( ود كسار) كان احد ظرفاء القرية وسمارها وانشط الندامى في اندايتها الوحيدة التي تبعد خطوات من مسجد القرية الوحيد..وكان مشهودا له بدعاباته الجميلة وهو في تلكم الحالة اي حالة ( الشعشعة) وهو يحتسي المريسة والتي ابدا في مجتمعاتناالريفية لم ترق لمستوى (ام الكبائر) كما عرفها الشرع..فالمريسة او البقنية و العسلية الشربوت والنبيت هي من المشروبات الفرحية التي ترتبط دوما بالفرح السوداني ويتعاطاها الجميع تقاة وغير تقاة لاعطاء الفرح بعدا اخر من الانسجام والنشوة...تعبيرا عن الفرح والحب والوئام...
ولكن بعد ان جاءت اللوثة الكبرى ( قوانين بدرية) 1983 كان عمنا ود كسار اول من طبق فيه حد الجلد في المنطقة في محكمتها امام جمع من محبيه واصدقائه بعد ان قبض عليه بواسطة بوليس المنطقة بعد ان وشى فيه احد الغلاة واعوان النظام.. وضبط وهو في حالة نشوته العادية المسالمة والتي لم ترق لمرتبة(ام الكبائر) بل كان منتشيا وفرحا يفرح الاخرين باعثا فيهم البهجة والفرح... وبعد ذلك اليوم اللئيم قسم عمنا( ود كسار) ان لا يتناول(ولا جقمة) من تلكم المريسة التي يعشقها طالما شربها جلب له الاهانة امام اهله واحبابه......
ولكن بالامس عندما هاتفت الاهل كان اول خبر زفوه الي ان العم ( ود كسار) شوهد في منتصف ساحة سوق القرية وهو في قمة نشوته صائحا( الله اديك العافية يا شيخ حسن يا شيخي...حلال المريسة) وعندما اقترب منه الناس اشتموا فيه رائحة المريسة وهنا صاح فيه( ود عتمان)
( هوي يا ود كسار الكشة جاتك) فاجابه عمنا ود كسار( ات يا زول غبيان...هو سيد الكشة ظااااطو هدانا لشراب المريسة...وانا من الليلة شيخ حسن شيخي وسميتو( حلال المريسة واكل الفطيسة)...التحية لعمنا ( ود كسار) ولا والف لا لاغتيال شيخ حسن الترابي هذا الصحابي الجليل طالما لا زال ( ملخبطا العجين)؟؟
هباني ظاااطو
|
Post: #2
Title: Re: ورجع عمنا ( ود كسار) مرة اخرى بعد عشرين عاما لشراب المريسة بعد فتوى الترابي؟؟
Author: محى الدين ابكر سليمان
Date: 04-12-2006, 01:58 PM
Parent: #1
عندنا قريبة الله يرحمها كنت بجيب ليها المريسة بالبستلة, قاموا اهلنا الانصار خوفوها من يوم القيامة, المسكينة تابت رغم اصرارها انها ما حرام هسى ماتت, يعنى كان لازم يتاخر فى الفتوى دى ويفوت على المساكين ديل الغبيشة الحلوة دى.
غايتو انا مباريك فى الموضوع واكده لى صورة وصوت, لو ما نزلت ليك بيرق اندايات النيل الابيض كلها يكون الترابى ما شيخى.
|
Post: #3
Title: Re: ورجع عمنا ( ود كسار) مرة اخرى بعد عشرين عاما لشراب المريسة بعد فتوى الترابي؟؟
Author: هشام هباني
Date: 04-12-2006, 07:05 PM
Parent: #2
محيي الدين الانصاري الشعوعي
شكيتك علي الله (الجزيرة ابا) ظاااطها فيها مريسة وكمان بالبستلة....ياخي الجزيرة ابا التدخين كان ممنوع فيها........تقول محطة بنزين...والله لو سمعوك اهلي الانصار ناس ود العجيل والله انط ليك من الشاشةبتاعة كمبيوترك ظااااطو لو كنت في الواغ واغ اعمل حسابك
محبتي واحترامي
هباني
|
Post: #4
Title: Re: ورجع عمنا ( ود كسار) مرة اخرى بعد عشرين عاما لشراب المريسة بعد فتوى الترابي؟؟
Author: محى الدين ابكر سليمان
Date: 04-13-2006, 02:07 PM
Parent: #3
لا يا خوى المريسة من ربك, بالمناسبة كان فى خرافة فى الجزيرة ابا ان ربك حيطلع منها الدجال, عشان كدة اعمامنا ما بخلو الشمس تطلع عليهم فى ربك, برجعو ولو كدارى نص الليل, لكن الجزيرة ابا ظااااتها حصانتها فكت من ما عملو "الدانكوج" وجاء كمبو عسلاية.
سجاير شنو يازول ممنوع, على النعمة العرقى كان ببيعوهو تامنو موية, والتمباك فى سوق الجزيرة ابا قاااااعد( زى الكورنفلكس الفاره, راقد فى سوق الدبة" من قصيدة لمحجوب شريف").
النرجع لى شيخنا...
الزول دة من زمان اخوك متوسم فيهو الصلاح, وهسى مما سهلها علينا, تب ما بنخليهو يكتلوهو بحد الردة, يازول دة حيدخل الناس فى دين الله افواجا, بعد ما طلعو منو.
اقعد عافية
|
Post: #5
Title: Re: ورجع عمنا ( ود كسار) مرة اخرى بعد عشرين عاما لشراب المريسة بعد فتوى الترابي؟؟
Author: ABDELMAGID ABDELMAGID
Date: 04-13-2006, 10:24 PM
Parent: #4
ود هبانى اخوى
مساك الله بالخير
المعنى يعنى صاحبك ود كسار ده رجع تانى ( اقيل !! ) فى المريسه و ( اكسر بالحسوه !!! ) و افك ( بالشربوت !!! ) و احلى ( بام فتفت !! و العتى !!! ) ؟؟؟؟ دحين العبار بى كم و كمان بالجنيه ام بالدينار  ؟؟؟ الله اجازيك يا شيخ حسن طيب زمان بتكتل و بتجلد و بتقطع فى الناس مالك ؟؟؟ شيتا عداله ناجزه و اخرى طوارىء و ثالثه شروع فى الزنا !!!! و الحمد لله لقد عشنا و شفنا فيك و اللهم لا شماتة  ......
كسره :
قالوا سوق ( المشك !!! ) رجع و العندو خرفان احسن ( ادوعلا !!! ) من هسع للضحية القادمة !!!!
عبدالماجد
|
Post: #6
Title: Re: ورجع عمنا ( ود كسار) مرة اخرى بعد عشرين عاما لشراب المريسة بعد فتوى الترابي؟؟
Author: ABDELMAGID ABDELMAGID
Date: 04-16-2006, 10:07 PM
Parent: #5
ود هبانى اخوى
انت حكم شارب ( الدقه !!! ) و ( العسليه !!! ) ده غير ( الشربوت !!! ) و ( الحسوه !!! و ( أبيض ضميرك !!! ) شنو فى شريعة الترابى ؟؟؟؟
كسره :
كلما يذهب العقل فهو مسكر ... و لا كمان شيخنا نسا مقولة ( ما كثيره مسكر فقليله حرام !!! ) ... هنا فى أمريكا ( الكافرة !!! ) يتم قياس درجة السكر بمستوى درجة نسبة الكحول فى الدم بصرف النظر عن نوع المشروب الذى تناولته .. و لكل ولاية معاييرها ... فاذا تجاوزتها و أنت تقود مثلا سياره ( DUI ) أو تقوم باداء مهنة تتطلب منك أن تكون على درجنة معينة من الإدراك فانت متهم بحكم القانون !!! بصرف النظر عن مهنتك أو وضعك الإجتماعى حتى لو كنت جورج دبليو بوش ...القانون قانون ( LAW IS A LAW (...
كسرة :
هل يطبق قانون السكر فى السودان بمنتهى الشفافية ؟؟؟ أجيب أنا ... بلا !!! لأنه لو طبق لكفانا الله شر العديد من الإنقلابات العسكرية و سطوة أئمة الكذب و الدجل !!!
عبدالماجد
|
Post: #7
Title: Re: ورجع عمنا ( ود كسار) مرة اخرى بعد عشرين عاما لشراب المريسة بعد فتوى الترابي؟؟
Author: هشام هباني
Date: 04-16-2006, 10:26 PM
Parent: #6
عبد الماجد اخوي
ات يا زول ما سمعت اليومين ديل قالوا ليك سعر المريسة والعسلية في السودان ارتفع بشكل جنوني بعد فتاوي الشيخ حيث ارتفع الطلب عليهما....جالون البقنية في المجلد فات سعر جالون البنزين في الرنك................ وقزازة عرقي ( الشيخ) ارخص انواع العرقي في السودان من الفتريتة البسيطة وهي يقال لها بت عم المريسة...........يعني ابليس ظااااطو قالوا محتار اليومين ديل ما لاقي زول اوسوس ليهو عشان اخلي شراب البقنية والعسلية؟؟؟؟
|
Post: #9
Title: Re: ورجع عمنا ( ود كسار) مرة اخرى بعد عشرين عاما لشراب المريسة بعد فتوى الترابي؟؟
Author: ABDELMAGID ABDELMAGID
Date: 04-16-2006, 11:56 PM
Parent: #7
| Quote: ....جالون البقنية في المجلد فات سعر جالون البنزين في الرنك |
ود هبانى اخوى
انت كمان ناس المجلد و هجليج ديل عوض الجاز ما بجيبو ليم ويسكى خواجات عديل كدى لناس موبيل و شل ... ما خمره بلديه و كشه كمان ...
كسره :
شل شل كب لى جالون ... عوض الجاز فى حديثو شجون ...
سنه سنه يا الترابى ليه باريتلك انقلابى ؟؟؟
عبدالماجد
|
Post: #8
Title: Re: ورجع عمنا ( ود كسار) مرة اخرى بعد عشرين عاما لشراب المريسة بعد فتوى الترابي؟؟
Author: abas
Date: 04-16-2006, 11:39 PM
Parent: #1
ود هباني
اها يا حبيب ورينا تاني افتي بصحة شنو
اصلنا عاوزين نعرف الحللو تاني شنو انا منتظر لي حاجه تانية غير المريسه
|
|