أليس فيكم ايها السودانيون (المتعوربون ) من يقول :كان جدي بلال بن رباح؟؟!!

ألم يكن الصحابي الجليل بلال بن رباح الحبشي السوداني اول مؤذن في الاسلام شريفا من جملة الاشراف الذي كرمهم رب العالمين بهذه الصفة كاول افريقي يهديه الله الى دين الاسلام؟؟!
وألم يكن شريفا حتى نعلن بكل فخر انتسابنا اليه وهو الاقرب الينا من بني العباس وبني الزبير بن العوام.. ولماذا ظل هذا البلال مهمشا من قبلنا ولا احد فينا الى الان يتجرأ ويفاخر بنسبه انه من بني بلال او البلالاب... افتونا ايها الاشراف السودانيون؟؟!!

هشام هباني

الاخ هبانى
غايتو انا جدودنا ترهاقا وبعانخي .. وبعدين حصلت شوية " لخبطة " مع جيش عبدالله بن ابي سرح والتجار العرب ... " شى زواج " و " شي بقط " ... و هكذا...!!

الطاهر ساتي

سلامات

عرفنا نحن احفاد بعانخي وترهاقا وزي ما قلت حصلت شوية ( لخبطة) مع بن ابي السرح واتفاقية ( البقط) ما لها وما عليها...وطيب مع البقط دي نحن اهل عريس ولا عروس...يعني نحن اللي عرسنا العرب ولا العكس صحيح؟!!

سندة: يعني لو حددت الاجابة علي السؤال ده حنعرف البقط دي كانت عادلة ولا ظالمة!!

هباني

العزيز هشام
مساء الخير امريكا
ان حبوبتي هاجر عليها السلام

وولد حبوبتي هاجر هو اسماعيل ابو اليمنيين
ونسيبنا ابراهيم عليه السلام ابو العراقيين

Quote: سندة: يعني لو حددت الاجابة علي السؤال ده حنعرف البقط دي كانت عادلة ولا ظالمة!!

انت بجدك ...؟؟
معقول اتفاقية يتبادلوا فيها البشر مقابل السلام تكون اتفاقية عادلة ...؟؟
ظالمة ... ظالمة ... ظالمة ....
و فيها اساءة للاسلام و المسلمين ..!!
يعنى عشان زول مسالم ما قادر يدافع عن نفسو يدفعوه اخوه او امه او شقيقته عشان هو يعيش في امان .. وكمان في بلدو ....!!

كثير من اهل السودان واثيوبيا او ما كان يطلق عليه "اثيوبيا واحيانا النوبة " لهم علاقة ببلال بن رباح وهنالك في كتاب الجاحظ "فضل السودان علي البيضان " وكتاب استاذي جمال محمد احمد " وجدان افريقيا " والذي اشرت اليهما في سجال بيني وبين عبدالله الشلقيني في سودانيز اونلاين مطلع العام ما يزيدنا فخرا بان نكون من نسل بلال او من كثير من اهل السودان الصحابة وغيرهم ممن كان لهم شان كبير قبل وبعد الاسلام .. وياليت ارواحهم تقبل بنا من نسلهم ...

هو نحن لاقين ظفر بلال بن رباح

العزيز الطاهر

ما قصدته ...ليس كما ذهبت بك بعيدا الظنون
ما قصدته هل التزاوج بين العرب والنوبة كان متكافئا بعد الاتفاقية والتي ما كانت اتفاقية بين هازم ومهزوم!!
ولكني ادرك ان الاسلام لا يبيح زواج المسلمة من غير المسلم..فهل ياتري قبل العرب المسلمون بتزويج بناتهم من ملوك النوبة المسيحيين لضرورات صون الاتفاق ودعوة الاسلام؟؟
ام حصل العكس فقد تزوج العرب من نوبيات زيجات شرعية وليست عبر الاسترقاق وان دل انما يدل علي تسامح ملوك النوبة وحرصهم علي الاتفاق.. ام حصل تبادل زيجات منا وزيجات منكم كشرط في الاتفاق!

العزيز عادل امين

سلامات

كمان السيدة هاجر المصرية ظااااااها ( اتلبطتوا) فيها.. لا حول ولا قوة الا بالله عالم لبط بشكل!!

العزيز ابو بكر

نعم ان كلمة (سودان) العربية اي السود تعادل ذات المعني الذي اطلقه( هيرودوتس) علي منطقتنا وسماها( اثيوبيا) بمعني ذوى الوجوه المحروقة اي السوداء.. وعليه بلال مواطن سوداني قح وما علينا الا ان نعلن ذلك علي الملا ونتفاخر به أليس كذلك ؟؟

Quote: هو نحن لاقين ظفر بلال بن رباح

القلب النابض

سلام

عشان ما لاقين ظفر بلال .... اول حاجة نعترف بيهو انو جدنا عديل
ونحن اولاد بلال.. وكان الله اداني السلطة حاسمي السودان الدولة البلالية!!
بس المحيرني انو اهلنا من زمان كانوا بقولوا ( القطينة جنة بلال).. قد يكون جدنا بلال من القطينةظاااطها!!

هباني

عزيزي هباني
ادناه ما كتبت الي صديق في نهاية العام الماضي ووضعته في مدونتي الشخصية
بتاريخ 26 يناير 2006

http://sidahmed.blogspot.com
ودمتم :
_______________________________________
فخر السودان علي البيضان ووجدان افريقيا

*فخر السودان علي البيضان ووجدان افريقيا* * لو عرف اهل اليمن فخر وفضل السودان علي البيضان( العربان من قححطان وعدنان واهل فارس ) كما عرفه الجاحظ وابن خلدون لما تجراؤا علي الاستاذ بابكر الزين .... وهم يتشدقون بانهم اصل العربان فكيف لم يقراؤا او يسمعوا بفخر السودان عليهم جميعا وهاك ما قاله الجاحظ في مقدته عن فخر السودان علي البيضان :-* * " وهو –اي الجاحظ- يعدد اولا الرجال العظام الذين انجبهم السودان منهم لقمان الحكيم وسعيد بن جبير المحدث الذي عاش في العصر الاموي وقتله الحجاج في السنة التي مات فيها ومنهم بلال الحبشي مؤذن الرسول ومنهم المقداد الذي عاش في عصر الرسول ووحشي الذي قتل مسيلمة الكذاب ومنهم مكحول الفقيه المتوفي سنه 112 ه ومنهم الحيقطان الشاعر و الخطيب الذي عاش في العصر الاموي ومنهم جلبيب الفارس الذي عاش في عصر الرسول ومنهم عكيم الحبشي الشاعر . ويذكر- الجاحظ- اسماء السودان الذين اشتهروا بالفروسية امثال خفاف بن ندبة وعباس بن مرداس وعنترة بن شداد وسيلك بن السلكة وعمير بن الحباب والحجاف بن حكيم وعامر بن فهيرة والفداف ومريح الاشرم والمغلول وافلح ... ثم يذكر خصال السودان واهمها السخاء الذي يغلب عليهم ولا تنافسهم فيها امة اخري ومن خصالهم الرقص الموقع الموزون فهم اطيع الناس علي الايقاع والضرب والطبل ومن خصالهم خفة لغتهم وذرابة السنتهم وخلوهم من الفافاة والعي وهم اخطب الشعوب يقف الخطيب طوال النهار يتكلم دون تعب . ومن خصال السودان قوة الابدان حتي ليستطيع الواحد منهم رفع الاثقال التي يعجز عنها جماعة الاعراب . ومن خصالهم دماثة الخلق وطيب النفس وحسن الظن والنأي عن الاذي واجادة الطبخ والامانة في الاعمال المصرفية.* *_ويري الزنج وهم عرق من السودان انهم كانوا اكفأ العرب في الجاهلية ولذا اكثرو من التزوج منهم "_* * * *عزيزي الفاتح ولشيخي النوبي السودان المرحوم جمال محمد في رائعته وجدان افريقيا كلام نقراؤه معا كما يلي : * * "كائنا من كان هذا الذي نقل عنه الجاحظ انا زعيم لك بانه كان يعرف ان الافريقيين اتخذوا مع الزمان مكانا في مقدمة القادة في كل حقل وبعيد الا تكون اصداء قولة عامر بن الطفيل قد بقيت في الاذهان وهو يتحدث عن حراس الهة قريش والاسلام **غض يحبوعلى مهل يحاذريدعوللإله الواحد، عوض اللات والعزى ومناة وأساف ونائلة الأخرى. رأى عامر حراس مذه الآلهة في وجه الإسلام القادم فاطمأن قلبه على دمن قريش من هذا البدع ، وقال قولته الشهيرة عن : «ولد عبد المطلب العشرة السادة يطوفون حول اللات والعزى وغيرهما من الأرباب ، كأنهم جمال جون _« وكانت أسرة أبي طالب في الذي يروي الجاحظ "سود وأدم ودلم » وابو طالب حامي النبي الذي نكد عيشه حين إضطرليختاربين كبريائه والحق الذي كان يدعوله محمد وهوفي حماه . كان اهله سود _وأدم ودلم وكانت عين محمد على عشيرته هذه السود والدلم وعلى الذي يلقي غيرهم من لأي وعنت ، لايحرسهم بيت كبير كبيت ابي طالب ، قال حين ضاق : «لافضل لإبن بيضاء على إبن سو داء، لا فضل لمتحدث بالعربية على غيره مما لايتحدث . الفضل بالتقوى...» ولن نضيع وقتنا إن نقلنا هنا عن الأقدمين بعض مظاهر هذا المبدا في اعمال كثيرة صدرت عن محمد وحمل عبرتها المسلمون الأولون حيث راحوا،فيسر لهم أن ينتشر الدين ، كما سترى حين تنتقل بالحديث لغرب القارة بعد حين . ماكان يصدر عن هوى حين افصح محمد عن ذاته يقول : «جعلناكم شعوبأ وقبائل » أية أريد بها عمل لإعادة خلق المجتمع . لنقف إذن قليلأ عند رجال ومواقف وازمان تفسر لنا سر الذي يقول الباحثون الأوربيون عن القربى بين الثقافتين والحضارتين الإسلاميتين والإفريقيتين . ماكانت الفوضي ولاكانت الإباحية كما وهم القس ستير. قامت المثل الإسلامية والتارمخ الإسلامي، في مجتمع عرف الإفريقيين وألامهم في وسط عربي كان مزهوا بنفسه يختال ، يحول دونه وتوقير الآخرمن ، ثراء عريض ولسان مبين ثم ادرك .* *كان عتبة بن حذيقة عبدأ لآل عتبة ، وحين فك اسره بعد الإسلام ، لم يجد العاتقون ابأ له يعرفونه ويعرفه ، فأضفوا عليه إسمهم ، وتزوج من بعد فاطمة بنت الوليد بن عتبة ابن اخ سيده قبل عتقه ، وعاش عمره عالمأ، اثار يده على علوم عدة يعرفها القارئون سير الصحابة والتابعين ، وبلغ من علمه ومكانه في قلوب الناس مبلفا قال معه عمر: «لوكان سالم حيا لاخترته خليفة للمسلمين من بعدي» وماكان عمر ممن يلغون يهذرون . كان يعرف للعالمين مكانهم الآنبل .كان رجل دولة . هو الذي إختار صهيبأ بن سنان ليؤم الناس في الصلاة حتى يختار القادة خليفته وهوعلى فراش موته . وما كان يجهل عجمة صهيب في الحديث ولكنه كان يقصد لأشياء لوعاش لحمل الناس عليها. اشياء تعرفها حين تقف عند وصيته للستة الأخيار الذين عهد إليهم ان يختاروا الخليفة بعده .... نصح عليا الأ يؤثربني هاشم على غيرهم إن اختيرهوللإمامة والقيادة . ورجا سعدأ ألا يكون اهله موضع الرعاية بين الناس وغيرهم موضع الرقابة ، اوصاهم جميعا ألأ يؤثروا اهلهم على غيرهم من الناس «إنهضوا حثيثا وليقع إختياركم على الأوفق ،وليقم الصلاة صهيب »."* * * *عزيزي الفاتح ..لست عروبيا التمس خيرا من زادهم وهم اليوم علي درب جاهلية اتية لا محال ولكن اغاظني جهل عربانا يعيشون نوستالجيا لماضي لا علم لهم به وحاضر غيبته اغصان شجر الجن القات ...* *و اصابني سوء حالنا نحن " السودان" اليوم نلتمس ود واعتراف من كانو يوما علي ابوابنا هائمون ... وددت لو للسودان جمال حمدان كجمال حمدان مصر الذي عشق مصر وسخر علمه وعقله وعمره وهو الاستاذ الجامعي الالمعي لعبقرية مكان حبيبته مصر حتي كاد وهو استاذ الجغرافيا النابغة ان يقنع العالم ان النيل منبعه مصر ومصبه مصر ( كتاب شخصية مصر - جمال حمدان ) ونحن لدينا من النيل ثلاث وانهار عدة يموت عند جرفها خيرنا وزاد اطفالنا وعبقرية سوداننا ... وكفي* *ودمتم
ابوبكر
ديسمبر 2005*

Quote: كمان السيدة هاجر المصرية ظااااااها ( اتلبطتوا) فيها.. لا حول ولا قوة الا بالله عالم لبط بشكل!!

هشام هبانى الامريكي
سلام تاني
هاجر نوبية يا ورل
امشي اقرا التاريخ كويس...كانت جارية اسرها فرعون في حروبه مع النوبة

وبرضو حبوبة طرزان في الدويم جات وركوب العجلات
بعدين ما كان هناك دولة اسمها مصر او السودان وفقا للحدود الجغرافية المعاصرة كانت الحضارة ممتدة من النقعة المصورات لحدت الاقصر

Quote: العزيز الطاهر ما قصدته ...ليس كما ذهبت بك بعيدا الظنون ما قصدته هل التزاوج بين العرب والنوبة كان متكافئا بعد الاتفاقية والتي ما كانت اتفاقية بين هازم ومهزوم!! ولكني ادرك ان الاسلام لا يبيح زواج المسلمة من غير المسلم..فهل ياتري قبل العرب المسلمون بتزويج بناتهم من ملوك النوبة المسيحيين لضرورات صون الاتفاق ودعوة الاسلام؟؟ ام حصل العكس فقد تزوج العرب من نوبيات زيجات شرعية وليست عبر الاسترقاق وان دل انما يدل علي تسامح ملوك النوبة وحرصهم علي الاتفاق.. ام حصل تبادل زيجات منا وزيجات منكم كشرط في الاتفاق!

سلامات 000 هشام
اولا الاتفاقية كانت خلاصة صراع بين طرفين 000 و لو ماكان في صراع ما كان حيكون في اتفاقية اصلا 00
ثانيا 00 الزواج بين العرب والنوبة لم يكن متكافئا 00 و ليس متكافئا حتى الان 00 دى حقيقة مرة لازم نعترف بيها 00
العرب كانوا يتزوجون من النوبة كيفما اتفق - شرعا و استرقاقا - و لكن النوبة لم يكن لهم ذات التكافؤ 00
و بالمناسبة شنو كلامك ده " زيجات منا " و " زيجات منكم " 000 انت حفيد ابن ابي السرح ولا شنو ؟ انت ذاتك ناتج من " اللخبطة " القلتها دى 000!

Quote: اولا الاتفاقية كانت خلاصة صراع بين طرفين 000 و لو ماكان في صراع ما كان حيكون في اتفاقية اصلا 00 ثانيا 00 الزواج بين العرب والنوبة لم يكن متكافئا 00 و ليس متكافئا حتى الان 00 دى حقيقة مرة لازم نعترف بيها 00 العرب كانوا يتزوجون من النوبة كيفما اتفق - شرعا و استرقاقا - و لكن النوبة لم يكن لهم ذات التكافؤ 00 و بالمناسبة شنو كلامك ده " زيجات منا " و " زيجات منكم " 000 انت حفيد ابن ابي السرح ولا شنو ؟ انت ذاتك ناتج من " اللخبطة " القلتها دى 000!

ــــــــــــــــــــ
الطاهر

حسب معلوماتي ان الاتفاقية لم تكن بين هازم ومهزوم ولذلك لم يفتح السودان فتحا
كما حصل في بقية البلدان....اذن من اين كان الاستعلاء حتى يسترق العرب نساء النوبة وهم لم يكونوا هازمين للنوبة...الهذا الحد كان اهلنا النوبة يرتخصون انفسهم ويرضون باسترقاق نسائهم وهم اهل ملك وقاوموا حملة الفتح الاسلامي؟؟

العزيز عادل

سلام تاني

Quote: امشي اقرا التاريخ كويس...كانت جارية اسرها فرعون في حروبه مع النوبة

يعني من كلامك ده العرب العدنانيين اولاد سماعين ( حبوبتهم)سودانية نوبية
كدي يا الاخو ورينا وين المرجع ده.. عشان نبشر اخونا بشاشا وده الكلام البفرح اخونا بشاشا ظااطو!!

محبتي واحترامي

هباني

Quote: الطاهر حسب معلوماتي ان الاتفاقية لم تكن بين هازم ومهزوم ولذلك لم يفتح السودان فتحا كما حصل في بقية البلدان....اذن من اين كان الاستعلاء حتى يسترق العرب نساء النوبة وهم لم يكونوا هازمين للنوبة...الهذا الحد كان اهلنا النوبة يرتخصون انفسهم ويرضون باسترقاق نسائهم وهم اهل ملك وقاوموا حملة الفتح الاسلامي؟؟

يا عزيزى هبانى

الاتفاقية كانت بين هازم ومهزوم ، لو ما في هزيمة ما كان قبلوا بالاتفاقية دى اصلا ، نحن ما نقعد نلف وندور حول حقائق تاريخية ، و الاتفاقية الظالمة كانت لحقن دماء النوبة ، و الاتفاقية ذاتها مبنية على الاسترقاق و الاستعلاء
و حقيقة اهلنا النوبة كانوا عندهم القابلية للرق ، ما عارف ليه ؟؟؟
و العرب استغلوا المسألة دى استغلال سئ ،
دى حقائق تاريخية ، نتجاوزها ، لان الجهل كان سيد الموقف انذاك
الله يدينا خيرك

وليه هو ذاتو جدودنا لازمن يكونو مستوردين من ما وراء البحر الأحمر؟؟؟
المحلي مالو؟
ولو عن الدين جدودنا أول من فكر في التوحيد, ثم أنهم أمنوا بالمسيحية ومن ثم إنتقلوا للإسلام (جميعهم تقريبا) ودا كلو بدون حروب وبدون سيف و لا مدفع. ديل مش يستحقوا التفاخر ؟؟؟؟

سلامات نصر

Quote: وليه هو ذاتو جدودنا لازمن يكونو مستوردين من ما وراء البحر الأحمر؟؟؟ المحلي مالو؟

جدودكم منو ...؟؟

يوسف عثمان محمد (بلال)

سامحونا ..

إن تبوَّلنا على كلّ التماثيل التي تملأُ ساحاتِ المدينَهْ ...

وعلى كلِّ التصاوير التي ألصقها البوليسُ ـ بالغَصْب ـ

على كلِّ حوانيت المدينَهْ ..

وعلى كلِّ الشعارات التي يقذفُها بالطوبِ .. أطفالُ المدينَهْ .

سامحُونا ..

إن تجمَّعنا كأغنامٍ على ظهر السفينَهْ ..

وتشرّدنا على كل المحيطات سنيناً .. وسنينا ..

لم نجد ما بين تُجَّار العَرَبْ ..

تاجراً يقبلُ أن يعلفَنا .. أو يشترينا ..

لم نجدْ بين جميلات العَرَبْ ..

مَرْأَةً تقبلُ أن تعشقَنا .. أو تَفتَدينا

لم نَجدْ ما بين ثُوَّار العَرَبْ

ثائراً .. لم يُغْمِدِ السِكّينَ فينا ...

كانو يسمونهم الكوشيين زمانا ثم المرويين ثم النوبة والزنج والزغاوة ثم الأثيوبين ثم الفونج والفور والمسبعات وتقلي والسناريين وأحيانا البرييين "أو البرابرة" ثم صاروا إلي تسميتهم بالسودانيين

استاذنا كيف حالك واحوالك

Quote: يوسف عثمان محمد (بلال)

ان شاء الله ده يكون بلال القاصدو هبانى !!
عشان يقتنع ويريحنا

بلال سيدنا

Quote: يوسف عثمان محمد (بلال)

عارف يا استاذ موصلي لو من الليلة ثبتناها وقلنا الفنان (يوسف بلال) وشلنا حكاية موصلي دي بعد انتسابك لجدناالشريف بلال بهذا الدليل سيهمس كثير من السودانيين وهم اقولوها سرا(يا زول شفت موصليك الزمن ده كلو عامل لينااسمو موصلي موصلي زولا حر تراهو طلع فـــــــــرخ عديل من حكاية اسم جدو بلال دي!!

محبتي واحترامي

هباني

المسافر


سلامات

Quote: بلال سيدنا

ده كلام جرايد ساكت...(بلال سيدنا) بلال نحن الهمشناهو بعد ما ربنا رفعو وكرمو وعديل عينك عينك نحن الزرق دايما لاصقين في الاشراف ال البيت من سلالة الرسول ( ص) واهله من العباس طول لحدي ستي مريم وكمان تيس ستي مريم ما تيس شريف!! ..ولمن ننزره برضو بنقع في الزبير بن العوام لكن لي هسع ما في زول قال جدو بلال الا يوسف الموصلي والتحية لموصلي!!

العم هشام

والله الكيمان عندنا اتلخبطت تب ، كدي ياللخو ورينا انت قصدك شنو لانو اصبحت الشغلانية كلها متداخلة لانو هنالك قبائل عربية اصبحت تتحدث اللغة النوبية بحكم استقرارها في المنطقة منذ امد بعيد . والان اصبحت لدينا قبيله كاملة تحمل اسم النوبة وتختلف في الموقع الجغرافي علشان كدي ا فرز الكيمان لانو في ناس انا متاكد اتلخبطت في حكاية نوبيين دي .

سندة :

(عرضو) دي شنو ؟

قال فرخ قال هو في حاجه اسمها فرخ الناس ديل
رايحه ليهم فراخ ساكت !!!

ياخوي انا فخور بالموصلي

وكمان فخور باسم بلال وهو اسم العائله هنا في اميركا دي

يخيل لي كده

Quote: قال فرخ قال هو في حاجه اسمها فرخ الناس ديل رايحه ليهم فراخ ساكت !!!

استاذي /يوسف بلال

بمناسبة( فرخ ) وهي كلمة عنصرية شائعة في ثقافتنا.. من وين ليهم السودانيين ربطوا المصطلح ده بمفهوم العبودية يعني فرخ معناها عبد.... وزي ما قلت الناس رايحة ليها عضة فراخ ساكت...ديل ناس ولا ثعالب؟!!

احترامي

هباني

الاخ هباني.

أحييك على هذا البوست.
كلعادة أنت دائما تطرح مواضيع تتحدى بهاالثقافة والسياسة السودانية.
واصل كفاحك.

الاخوة الكرام.

اخونا هباني ده قصدو واضح جدا.
هل نحن كسودانين مستعدين للأعتراف بأصولنا ومستعدين للتفاخر بها؟

دينق.

الحبيب جمال هباني


سلامات

الله يرحم( حبوبتنا عرضو بت كايدين) والى ان ماتت لم تتباهي الا بابيها( كايدين) وهو سوداني قح اسود من السودان اي بلاد السود... ولم تمارس حالة( السلبطة) حول الانتساب الى الزبير بن العوام التي نمارسها نحن..ودم بخير مع تنياتي للاسرة الكريمة وعموم ام سعين بالمملكة!!
هشام
سندة: غايتو اتوقع ان يكون اسم مولودك القادم باذن الله (ادم او ادومة او بلال او عجب سيدو) ولو بنية سميها ( الراكز الله او قسم الله او كريم مهال او المستعين بالله او عرضو )علي اسم حبوبتك وزوج جدك الناظر عبد القادر هباني وحق السماية وكل اللوازم علي عمك!!

نعم الجد بلال رضي الله عنه يا حبيب وهو شرف لا يضاهيه شرف ان يكون بلال جد للسودانيين
...
وبرضو نرجع نقول نحن سودانيين ليس عربا ولا افارقة فالسودان اكبر من ان يحصر
في الافرقة والعربنه .
تحياتي

العزيز دينق

هذه اسئلة صعبة جدا علينا نحن السودانيين وهي مستفزة وتهز قناعات جامدة لدينا في عداد المسلمات والمقدسات ولو تمت الاجابة عليها بشيء من الشفافية والشجاعة والتجرد لقطعنا نصف المشوار في حل الازمة السودانية اي فيما يتعلق بسؤال الهوية.. محبتي.

هباني

سندة: يا خي نحن اسمنا السودانيين اي السود لكن بنزوغ من حكاية سود دي ومصرين نقول علي روحنا زرق او خدر زي خدرة الليمون.... تخيل زول لونو اخدر زي الليمونة... ده ما حربوية عديل مش زول!!

العزيز/ هباني

لعلك تتفق معي يا هباني و تقول ان الهوية امر اصبح متحرك الآن ,,, و لم يعد امرا ساكن كما كان في السابق ... فالعروبة في السودان ستصبح في مهب الريح ... كما ان الزنوجة ستصبح هي الاخري في مهب الريح ... لذلك سيخسر الذين ينادون بعروبة السودان فقط و لو كان بينهم ابو سفيان بن حرب... مش العرب المشلخين او العرب السادة... و سيخسر الذين ينادون بزنوجة السودان فقط او نوبيته ...الخ لو كان بينهم بعانخي العظيم .

الآن صار السودانيون امريكان و بريطانيون و فرنسيون و هولنديون و اسبانيون... و ما زال الكفاح التزاوجي مستمر.

اما حكاية اعتراف العرب المشلخين او غير المشلخين بنسبهم الي بلال بن رباح مولي امية بن خلف ... فلن تحدث ابدا ... فالناس ديل لن يرضوا بغير العباس ... حتي ان تبرأ منهم العباس ... و الله العظيم لو عرف العباس و ابو سفيان بلبط السودانيين/ات لأعلنها حرب لا هوادة فيها.

لكن الجماعة ديل وجدوا الناس ما موجودة و تلبطوا فيهم.

و يا هباني يا اخوي عروبة السودانيين اتضحت بعد هجراتهم من اجل الكلا و العيش و الخبيز الي بلدان تقول عن نفسها عربية مية المية ... الم ترفضهم تلك البلدان ... الم تقل لهم يا عبيد و يا عبيدات ؟

الزمن كفيل يا هباني يا اخوي لعلاج تلك الازمة ... ازمة الاعتزاز بالنفس دون الجري وراء (الانساب الكريمة)!!

Quote: أليس فيكم ايها السودانيون (المتعوربون ) من يقول :كان جدي بلال بن رباح؟؟!!

ود هبانى اخوى ...
الناس دايره ( تتحرر !!! ) فى حمزه و العباس ...
عبدالماجد

العزيزان برير وعبد الماجد


سلامات

كدي شوفوا الحديث الشريف ده وادونا رايكم فيهو:

Quote: ثلاثة فى السودان من اهل الجنة الحكيم والنجاشى وبلال المؤذن—والجنة لايدخلها حاسد ولا حاقد ولا نمام –

اها شفتو الشرف ده في شرف اكتر من حديث الرسول (ص) ده عديل اول مرة اسمع باسم السودان في حديث نبوي شريف واقول علي بلال والنجاشي ولقمان الحكيم انهم سودانيين!!

ود هبانى
سلامات
هذه القضية لها أبعاد أخرى
أحاديث لا نعلم مدى صحتها:

" الإمامة فى قريش"
"الناس تُبع لقريش فى هذا الشأن"

وقول الحنقية:
(القرشية لا يتزوجها إلا قرشى) برغم زواج بلال من زينب بنت عم الرسول(ص).
إستخدام الدين الإسلامى من قبل بعض العرب ليجعلوا من أنفسهم (master race) جعل كثير من الناس يدعى النسب العربى.

الاخ هشام هباني
السلام عليكم
اذا قسنا مسألة العروبه بي الدم( ودا المقياس الصاح في راي ) بنلقا انو في قبائل سودانيه اختلطت فيها الدماء الافريقيه مع دماء عربيه في زمن ما..
لكن اذا نظرنا للامر من ناحية الثقافه .. فالسودان استقبل الثقافه العربيه كما استقبل غيرها من الثقافات من قبل ..
ويكفى ان نذكر من اثر هذه الثقافه والذي نحس بالامتنان تجاه من اتو لنا بها .. اللغه العربيه..والكثيرين يحسون بهذه النعمه عندما يجلس احدهم في المسجد ويمسك المصحف ويقرأ بكل سهوله ويسر ويتواصل مع كلام ربنا .. وبكون قاعد جمبو واحد آسيوي يتلفت جاي وجاي .. ومايقدر يمسك المصحف ويقرأ .. واذا وجد مصحف مترجم وقرأ فاكيد ان الترجمه ليست هي كلام الله وانما هي ترجمة لمعنى كلامه .. وبالتالي ( وكما اعتقد ) سيفقد التواصل المباشر مع هذه المعاني.. واكيد انت لاحظت هذه المعاناة للمسلمين من اصول امريكيه..
الاثر الاعظم للهجرات العربيه والاسلاميه هو الاسلام .. والذي هو نعمة كبرى ولا تقدر بنعمة اخرى في الدنيا ...
اذن غير مسألة الدم ... لنا قواسم ثقافيه مع هؤلاء العرب ..
المشكله انو البدعو( للافريقانية)
دعوتهم قايمه على التطرف وهو الغاء اي اثر للثقافه العربيه في السودان..
ودي نضالات انتهي زمنها..
وهي دعوه كانها جايه من اعماق التاريخ وكان اصحابها يعيشون في غير هذا العصر الذي نعيشه..عصر العولمه ..العصر المافيهو مكان للانغلاق او الانسحاب الى هويات عرقيه ضيقه .. وبقوم على التداخل بين الثقافات والانفتاح على الآخر ( بي رضانا او غصب عننا)..

ولكن تبيّن أنهم ما أتوا لرأي ولا لحوار ولا لنقاش بل أتوا لأجندات أخرى

1-التجاهل
2- التجاهل
3- التجاهل

for all posts written by ingaz gang
members in this board

for all who are supporting the ingaz gang mafia islamaist theives
dr mustafa mahm

يا هشام ياولد أخوي كيف حالك مع التاكسي أوع تطلع لي زي سواق تاكسي الغرام بتاع الفيلم المصري

Quote: بس المحيرني انو اهلنا من زمان كانوا بقولوا ( القطينة جنة بلال).. قد يكون جدنا بلال من القطينةظاااطها!!

دي عاوزة فهم يا هشام أهلنا قاصدين بلال علي عوض الله.... حلوة دي مش كدا... طبعا القراء الكرام ما حيعرفوا بلال علي عوض الله دا منو إلا أنا وإنت وإبننا جمال هباني
ولا مش كدا.

العوج راي والعديل راي

عمك كباشي الصافي عربي من جهينة ولا علاقة له ببلال بالمرة إلا الإسلام

ولكن تبيّن أنهم ما أتوا لرأي ولا لحوار ولا لنقاش بل أتوا لأجندات أخرى

1-التجاهل
2- التجاهل
3- التجاهل

for all posts written by ingaz gang
members in this board

for all who are supporting the ingaz gang mafia islamaist theives
dr mustafa mahm