ده منو الزول ده يا جماعة واناشايفو وين!!

لا لا
دي ايام وعدت

انا كنت مفتكرو ظلامي....لكن الزول البشوش ده والله ابدا شكلو ما بقول انو كان ظلامي!
بس انا زول عندي فراسةالزول ده كويس شديد وكمان حقاني عديل يا معتصم اخوي!

عشان كده الله اوفقو واديهو الصحة!

اهلا بيك صديقنا وحبيبنا الكلس الحقاني الطاهر ساتي وحمدا لله انك اعلنت اليوم خروجك من الظلامية الي الهواء الطلق بالصورة والصوت والالوان ومرحب بالطلة ووداعا ياظلام الهم علي ابوابنا ما تعتب ومرحب يا صباح الحب تعال ما تبتعد!

بس الدقينة الصغيرة دي شعرة معاوية دي لو نتفتها مرة واحدة يا الطاهر تكون تمام التمام!!

وكمان كريجة شيخ حسن دي شيلها مرة واحدة لانها دي من اثار الماضي الظليم ولو تعودت عليها بتجيب ليك الهواء وبقولوا عليك الناس وبالرجل لا زالت هنالك ظلامية !

والحمد لله الحكاية السوداء الفي نص الجبهة القومية بتاعتك من اثر السجود ما في
ما عارف انك كنت ظلامي كيفن وادوك العضوية كيفن اذا ماربيت الدويرية الزرقاء الفي نص الجبهة الاسلامية ديك لزوم النصب والاحتيال ودي براها بتوري انك زول نضيف وما منافق ولا جردل زي بقية الجرادل اللابدين لي هسع ومربين دويريات قطرعشرة بوصة xباي نق تربيع!!

هشام هباني ..

إنت ضهبان ساي ..

دا ما الطاهر ساتي ... إنت ما بتعرف الطاهر ساتي ؟!!
أمش خش موقع صحيفة الصحافة وهناك بتلقى صورة الطاهر ساتي ..

الطاهر زول كبير وعريض راسو عندو صلعة وخشمو فيهو فلجة

ناذر الخليفة
يعني الطاهر ده مقلبنا و لسع ظلامي...بعد ما صدقت انا ولقيت الصورة دي في البروفايل بتاعو وجيت ناطي بيها وفرحان....وتراهو لسع لابد ليهو ورا صورة ما حقتو....يا زول امكن دي تكون صورتو زمان قبل مايو اتولد!!

ود هباني الجاب ليك الصورة دي منو من ناس الرياض؟؟؟

السنجك خش بروفايل الطاهر ساتي تلقي الطاهر معلق الصورة دي هناك!

الذي كان طفلا حديث الولادة على مهد أمه في ليلة الانقاذ الاولي صار اليوم شابا في المرحلة الجامعية ، وبالطبع لا يذكر على الاقل تفاصيل سنوات الانقاذ الخمس الاولى ، قد يكون له أب احيل الي صالح التمكين الخاص فترسخ في ذهنه ليالي الحرمان و دموع الظلم ، أوقد يكون له أخ هرب بجلده من جحيم التطهير الحزبي فاحتفظ بملامحه في ذاكرته .. هذا من كان في المهد طفلا في تلك الليلة .. أما من كان شابا في الجامعة في الليلة ذاتها ، فإنه اليوم اما امتلأ رأسه شيبا من هول سياسة التحرير المباغتة ، أو انحنى ظهره و توكأ على العصا من أهوال أخرى سردها قد يزحف بمساحة عمودنا الي مساحات الاعمدة المجاورة لها هنا .. و في المكتبات ..!!
** باختصار .. عمر الانقاذ و مؤتمرها الوطني يساوي بالتمام و الكمال عمر ابن ادم ناضج عاقل سوي، له حق استخراج كل أوراقه التي تثبت شخصيته المستقلة و له أيضا حق اختيار شريكة حياته بمحض ارادته ، وما ضره الا توافق اسرته أو أسرتها .. سلطة بهذا العمر المديد لم تثر سنوات حكمها انتباهتى الا بفعل تحديقي في حزمة القرارات التي خرجت بها الحركة الشعبية من اجتماعات مجلسها الانتقالي بياى .. قرارات حكيمة وجريئة و أهمها قرار تقوية مفوضية الفساد والمراجع العام والبرلمان و الصحافة الحرة، ثم أهمية اجراء تعديلات وزارية على خلفية مراجعة اداء القيادات على مستوى السلطة الاتحادية و الولائية والتنظيمية بالحركة ..!!
** الحركة الشعبية عمرها في دهاليز السلطة و الثروة لم يتجاوز العامين ، لم تتحول تحولا كليا الي حركة سياسية ، تعاني من الام التحول و مخاض الميلاد السياسي ، تصطلي بين مطرقة المطالب التنموية في الجنوب و سندان تنفيذ الاتفاقية في الخرطوم ، ومع ذلك استجابت لصيحات الصحافة ثم مطالب قواعدها ، فعقدت مؤتمرا تحت سمع وبصر الاعلام في هواء ياى الطلق وقالت للناس هؤلاء يجب تغييرهم لضعف الاداء وعدم التجانس، وهؤلاء تجب محاسبتهم و التحقيق معهم حول اتهامات الفساد .. ثم شكرت الصحافة وطالبتها بالمزيد من الحرية والتعمق في أوكار الفساد و كشفها ..!!
** تلك هي علاقة الحركة الشعبية بقواعدها و رد فعلها تجاه أقلام السلطة الرابعة ، و تلك هي استجابتها السريعة لمعالجة الاخطاء ، وهي التي لم تتهنأ بالسلطة بعد ولم تتذوق عسلها بالكامل .. قارن تلك العلاقة و تلك الاستجابة بعلاقة شريكها الاستراتيجي واستجابته لمطالب قواعده ثم رد فعله تجاه أقلام السلطة الرابعة .. ( أهل بدر ) الذين جاءوا ليحكموا الناس بما انزل الله، التعديلات عندهم منذ عقدين الا قليلا هى ( لعبة كراسي ) .. من لا يصلح واليا يأتي وزيرا ، ومن لايصلح وزيرا يذهب واليا ، ومن لايصلح في هذا أو ذاك يبقى برلمانيا أو الي وزير بالدولة اذا استطاع اليها سبيلا ، منذ ثمانية عشر عاما ثمانية عشر قياديا يتبادلون مناصب الدولة و الحزب والاتحادات .. مع الاعتذار لبلدياتى فتحى خليل على ( حق الملكية ) ...!!
** لم يخطئ أحدهم فذهب، فهم لا يخطئون ، ولم يضعف آداء احدهم فأقيل فهم لا يضعفون ، ولم تكتب الصحف عن تجاوز أحدهم للوائح المالية فتم التحقيق معه جهرا فهم لا يتجاوزون ، ثمانية عشر عاما هكذا ، و ليس مدهشا أن تجد أحدهم ممسكا بزمام مناصب تنفيذية واخرى تشريعية و عضوية مجالس ادارات شركات و بنوك و جامعات و هيئات في آن واحد لانه - بفقه التشبث - على كل شئ قدير ..!!
** على كل .. اشادتنا مطلقة بقرارات الحركة الشعبية الاخيرة و مقررات مؤتمرها ، فالقيادى مهما كان وزنه - و صلاحه - يجب أن ينتابه احساس انه لن يبقى طويلا في منصبه ، و الفاروق عمر بن الخطاب لم يكن شيوعيا ، ولو كان كذلك لما خاف الفتنة بعزل خالد بن الوليد من امارة جيش اليرموك رغم انتصاراته ..!!

دى صورة دكين...

ماشفت بوست التبريكات...دكين لاول مرة يمشى البطحاء
ويتصور فى استديو الهنود..وعملو ليه بعض الرتوشات
عشان يقدر يقنع البنات...
انا طبعا لم اقابل دكين تلفزوينا ..لكن قابلتو اذاعيا
اخر مرة كان امس ..على تلفون المحل الجديد..
طبعا هو فتح ليه محل للكريمات وتركيب العطور..
بس الدقينة الصغيرة ..دى من المصور..

ود هباني أخوي ..

مالك داير تقلب لينا المواجع و تذكرنا بايام جهالتنا ..؟؟
الحبيب الفى البروفايل ده واحد من ضحايانا ..
ود عز .. ومتربي في اسرة عزيزة .. اسرة من عامة الناس ، الاب معاشي والام ست بيت والاخوان غبش
زيو وزى اي واحد كان عندو طموح واسع ورغبة صادقة في خدمة بلدو افنى سنواتو بالجد والاجتهاد و اتخرج في جامعة الخرطوم و عندو شهادة قدر الليلة وباكر ..
لكن للاسف ..
ولدنا ده ود ناس .. وعلى قدر حالو .. عشان كدة لقى كل الدروب قدامو مقفلة
الوظائف العامة والخاصة مسكوها اولاد الذوات واصحاب البطاقات و الوسطاء و ذوى القربى و الحزب
هو مابيعرف درب الحاجات دى .. مش قلت ليك ود ناس ..؟؟
أها .. لمن ما لقى موطئ رزق في بلدو ، قام ودع اهلو وطبق شهاداتو و فارق النيل والجروف ولسان حالو يردد ( ان كان ذا وطنا ويمنعنى الهواء .. لم الوطن ..؟؟)

الحبيب ده انا بشوف فيهو جيل كامل .. جيل غريب في بلدو .. ولاجئ وسط اهلو .. جيل يتلفت يمين شمال بيلقى طموحاتو محاصرة بشروط ضد عقيدتو و قناعاتو .. عشان ياكل عيش لازم ياكل في خاطرو شوية .. وعشان يلبس اللبس لازم يقلع لباس ضميرو .. !!


أها هشام ..
جيل زى ده مابيستحق انو يتختا في البروفايل و حيطة الصالون ..؟؟
جيل يضحي بتخصصاتو ومؤهلاتو ويضرب بيها عرض الحائط عشان مايضحي بضميرو وعزة نفسو ..؟؟

الدنيا دى ضل ضحى ....
لكن في ناس هنا مفتكرين نفسم عبرو الصراط باستقامة واستقرو في عدن ..
ماخاتين في بالم انو في دنيا مااااااااااااهلة راجياهم بهناك ..
يكتل زى ماعايز ..
يسجن زى ماعايز ..
يفصل زى ماعايز ..
يقسم خلق الله كيمان كيمان .. ويصنف فيهم يمين يسار ..
ربنا الهم بيتكلمو باسم دينو ما كان بيغلبو يرزق المسلمين أو ( الاخوان المسلمين ) و يجوع الكفار والعلمانيين ويقطع رزقم ..
يعنى ربنا كان ممكن ينزل سورة خاصة باسم ( الصالح العام ) و يطبقا بحذافيرا في الشيوعيين و الانصار و الختمية و البعثيين و كل من يختلف مع ( الحركات الاسلامية )...
لكن حاشا لله
يرزق من يشاء بغير حساب .. ومن حيث لا يحتسب ..

غايتو ...
الله يغفر لينا

ودعناك الله ...

لو قابلت هذا الشخص على الطبيعة
نفس البسمة ومعها ضحكات صارخة
تتمنى دوما تكون بجوارة
لان البسمة لن تفارق شفتيك طالما
انت بجوارة

حبيبنا له الف تحية
ولك ايضا ياهبانى

حبيبنا الطاهرساتي

سلامات

Quote: الحبيب الفى البروفايل ده واحد من ضحايانا .. ود عز .. ومتربي في اسرة عزيزة .. اسرة من عامة الناس ، الاب معاشي والام ست بيت والاخوان غبش زيو وزى اي واحد كان عندو طموح واسع ورغبة صادقة في خدمة بلدو افنى سنواتو بالجد والاجتهاد و اتخرج في جامعة الخرطوم و عندو شهادة قدر الليلة وباكر .. لكن للاسف .. ولدنا ده ود ناس .. وعلى قدر حالو .. عشان كدة لقى كل الدروب قدامو مقفلة الوظائف العامة والخاصة مسكوها اولاد الذوات واصحاب البطاقات و الوسطاء و ذوى القربى و الحزب هو مابيعرف درب الحاجات دى .. مش قلت ليك ود ناس ..؟؟ أها .. لمن ما لقى موطئ رزق في بلدو ، قام ودع اهلو وطبق شهاداتو و فارق النيل والجروف ولسان حالو يردد ( ان كان ذا وطنا ويمنعنى الهواء .. لم الوطن ..؟؟) الحبيب ده انا بشوف فيهو جيل كامل .. جيل غريب في بلدو .. ولاجئ وسط اهلو .. جيل يتلفت يمين شمال بيلقى طموحاتو محاصرة بشروط ضد عقيدتو و قناعاتو .. عشان ياكل عيش لازم ياكل في خاطرو شوية .. وعشان يلبس اللبس لازم يقلع لباس ضميرو .. !! أها هشام .. جيل زى ده مابيستحق انو يتختا في البروفايل و حيطة الصالون ..؟؟ جيل يضحي بتخصصاتو ومؤهلاتو ويضرب بيها عرض الحائط عشان مايضحي بضميرو وعزة نفسو ..؟؟ الدنيا دى ضل ضحى .... لكن في ناس هنا مفتكرين نفسم عبرو الصراط باستقامة واستقرو في عدن .. ماخاتين في بالم انو في دنيا مااااااااااااهلة راجياهم بهناك .. يكتل زى ماعايز .. يسجن زى ماعايز .. يفصل زى ماعايز .. يقسم خلق الله كيمان كيمان .. ويصنف فيهم يمين يسار .. ربنا الهم بيتكلمو باسم دينو ما كان بيغلبو يرزق المسلمين أو ( الاخوان المسلمين ) و يجوع الكفار والعلمانيين ويقطع رزقم .. يعنى ربنا كان ممكن ينزل سورة خاصة باسم ( الصالح العام ) و يطبقا بحذافيرا في الشيوعيين و الانصار و الختمية و البعثيين و كل من يختلف مع ( الحركات الاسلامية )... لكن حاشا لله يرزق من يشاء بغير حساب .. ومن حيث لا يحتسب .. غايتو ... الله يغفر لينا ودعناك الله ...

ده انا شخصيااطلع بالطول والعرض واوقف التاكسي بتاعي في نص اكبر(هاي وي) في دالاس
في عصرية يوم الجمعة الامريكية ساعة الرش الجد الجدواوقف المرور وكل الحركة وافكفكوا الامريكان... للعب العاتى في البلد الضيقة امريكا القفل الهاي وي وهو ييمم وجهه شطر السودان العظيم
وينحني اجلالا ويقول لكما انت وصديقك الباسم الواثق احبكما يا ابناء بلدي ايها الجيل الضائع الهائم المشرد والذي افتقد كل شيءالا كرامته وهذه البسمة الواثقة في الغد القادم وفي صدق موقفك الرافض الظلم ايها الطاهر الطاهر النبيل ولا املك الا حبي له تقديرا لموقفه الاخلاقي الاصيل ولك انت ايهاالشجاع النبيل وانت تصدع بالحق من داخل الحريق في وجه الجلاد وبطانة العهر الاثيم.

هباني

هشام هباني ..

أقرا الكلام الجميل دا من صاحب الصورة لي الطاهر ساتي شخصياً ..

Quote: الطاهر ساتي ساتي ابوه ساتي ساتي .. من النوبيين الذين التحقو بفرق الهجانة بالجيش المصري.. عاد بعد حرب اسرائيل فاستقر في اقاصي الشمال عند اهله.. كان اكثر اهل الحي ودا واريحية ولازال.. واكثرهم على الاطلاق صلة للرحم والدم.. بسيطا هينا باشاً . دوما يلتحف شالا على راسة كعادة اهل الشمال.. وكعادة النوبيين في الكلاكلات والحاج يوسف ..في كل بيت يقطنونه لابد من شتلة نخلةٍ وشتلة ليمون.. ولايكاد يخلو بيت نوبي من الشجرتين.. كان يردد ايامها في الكلاكلة ..البيت المافيهو نخلة زي الخلا.. ويستعيذ بالله من شرِ بيتٍ بلا نخل.. جده لابيه الفقير اسماعيل.. كان - رحمه الله - رجل واسع التقوى .. ذوكرامات.. معروف عند اهل قرى شمال دنقلا في الشمال بي الفقير اسماعيل(الولي) .. بيت الفقير الان تهدم وبقيت اطلاله.. ولكن يمكنك ان تترك مقتنياتك اسابيع عددا بين تلك الاطلال لاتخشى عليها من سطوة شي.. يقول الاباء ان من اخذ شيئا ليس له من دار الفقير اسماعيل فانه لاينام ابدا.. فكان كل من لم يجد مكانا آمنا والى يوم الناس هذا يترك مقتـنياته بتلك الدار.. (فقير اسماعيل كانجرو) حمى بيت الفقير اسماعيل الطاهر ساتي امه شريفة بت احمد تور.. احمد تور كان رجلا ذا سطوة وصاحب مكرمات وهيبة في عموم قرى شمال دنقلا .. من شجاعته اخذ لقب تور .. ورثت شريفة عن ابيها بلاغةالحديث وقوته.. إمراة بتلاتين رجلاً.. ذات هيبة واسم.. واضحةالملامح واضحةالراي والقسمات .. تنبيك بما فيك من سلامك الاول ومشيتك الاولى .. وبتختها ليك عديل إن كان في عموم احوالك تقصير.. اورثتها نشاتها في بيت عز ابيهااحمد تور شجاعة وحسن تقدير للامور وللاحوال وقراءة الحياة.. فكانت تدير جميع مناسبات الاهل بحسن تصرفها.. فاذا ماكانت شريفة اطمان الاهل الى كل شي .. الطاهر نشأمثقفا يحب الاطلاع .. كوز ..ام مؤتمرجي ام حزب امة ام زول ساي ام هندي احمر.. ذلك لا يُهم.. فانا ادافع عن حريته كونه ادمي ولدته شريفة بت احمد تور حرا بلا اي قيد.. وكان في قريتنا حرا وبلا قيد وحق له ان يكون في الخرطوم حرا وبلا قيد .. فالمذنبون في الخرطوم على قفا من يشيل.. واللصوص في الخرطوم ضاقت بهم احاديث الصوالين... ومنتهكي الدستور في الخرطوم ينتهكون كل شي بلا احمٍ ولا دستور.. والرصاص في الخرطوم علا شانه وتجلت حكمته.. والرزق في الخرطوم ضاق فماتجلى شيُ ُ بعده ولا قبل.. وفي الخرطوم تعجز بوردابية عن بلوغ الكلاكلة لختم القران في بيت غادة نوري والعودة الى دارها بعد الخامسة مساءا.. معللة ذلك بالكركبة.. وفي الخرطوم اربعين جهةٍ مسلحة ..كل يوم جهةُ ُ منها في شأن.. وفي الخرطوم يؤخذ المرء من بيت ابيه وامه فُيذبح في خلا قريب.. وفي الخرطوم ُقتل 5 من العسس المسلحين فقط لان السلاح بيد كل من قويت شوكته.. وفي الخرطوم يكتب الطاهر ساتي عن الفساد في الجامعات فؤخذ الى الزنزانة.. اخر من يفكر في العنف من اولادالحلة كان الطاهر ساتي.. اكتر زول كان في حالو الطاهر ساتي.. اخذ يصعد كصحفي جيد لانه كان يكتب بصدق نيته..(بغض النظر عن اختلافنا مع شكلها) ليس لي توجه سياسي محدد لاقول : رغم اختلافي السياسي والفكري مع الاخ الطاهر ساتي فان الموقف الاخلاقي والانساني يتطلب مني اعلان ...الخ ولكن تضامني التام معه لحين اطلاق سراحة او توجيه اتهام وفق الضوابط المتعارف عليها ومن ثم النظر في امره في محكمة نزيهة..في زمان الناس غير النزيه هذا.. تبًا كيف يحيا الناس في بلادٍٍ لا تبرر السلطة فيها افعالها!! كيف تخلو الى نفسك في بلادٍ تأخذك ليلا من فراشك..

كدا كيف ؟!!

ناذر الخليفة

عارفني انا زول مصاب بداء الحقانية (حد قلة الادب والتهتك والابتذال) وهو امر اقره وهواخطر حالات مرض الحقانية والدغرية ان تكون مبتذلا في السعي اليها معرضا نفسك لكل المخاشنات والاساءات والتهديدات التي قد تطال حياتك ذبحا من الوريد الي الوريد وهي حالتي المزمنة والتي لم تفلح امي الحاجة امنة بت ابراهيم ودهباني في مداواتها بكل انواع البخرات والمحايات والعزايم واوراد الفقرا حتى اليوم وانا حزين علي صبر امي ومعاناتها وهي تثنيني عن جادة هذا الطريق المخيف وانا اقول لها( يمة يمة.. الزارعة الله في الحجر بتقوم والصقر ان وقع كترت البتابت عيب)!
ولذلك لا اتردد ان انحني اجلالا لهذا القول الشجاع النبيل من اخ نبيل مؤازرا صديقه النبيل الشجاع في وجه الطاغية الجلاد وهو موقف اخلاقي قيمي عظيم يدلل علي ان الرجلين ينتزعان احترامي بقوة الموقف الاخلاقي الشفيف!
اها نحن كده.................وانتو كيف!؟

هباني ..

Quote: اها نحن كده.................وانتو كيف!؟

نحن كدة برضو يا هشام !!