مــــــطــر مــــطــر مــــطـــر

الدوحـة الليلـة تسـتحم من مطر الشــاء ، تغسل ذكرياتها القديمة، وتستقبل مباهج العام الجدبد بندى المطر ....
الليلة الدنيا عندنا مطر وأنا بموت في المطر من ضغير بعشق مدني ما عشان اتولدت فيها .عشان خريفه والمطر البنهمر بي سبب وبدون سبب . من انا صغير وانا بحب المطر كل انواع المطر . النقناقه والشكشاكه والتقيله والخفبفةوالطرفة البكايه ومطر الليل والبتجي الدغش مع سيد اللبن ، ما عارف سيد اللبن ده بصل كيف ؟؟ هو حمارو ،،لابسين باتا ولاشنو ؟ ماعارف!!
بحب الطرفة البكاية تبكي طول الليل وفي الصباح تقش دموعه على الشجر وتفتح عيون سحابه ابيض زي اللبن أصلو السحاب الوحيد البببكي وعيونو ما بتحمر !!السحابة تلقاهاسود وبنية ومحمرة وبعد تبكي كل االمطره تنزل لألوان على الأرض افضل السما ماسك ليه في كم سحابه ممصوره وخفبفه
تلعب بيها الريح ,, ناس الخرطوم بخافوا المطر يوم السحاب اتلمه واعمل مظاهرة صغيره اتحوقلوا وانططوا لي فوق اهبوا الهوا عشان مظاهرة السحاب تتفرتق ، اقولو ليك المطر ببوظ لينا البلد ،ويوماالمطرة تنزل اكسروا ركبة والزموا بيوتهم وابطلو الشغل واقولوا ليك الجو جو فول ،ما عارف ليه بحب المطر ؟؟اجمل وقت بكتب فيهو المطر نازل وقطراتو بترقص
مع الأرض وترسم تيجان بنية والشجر برقص مع الريح والبيوت فرحانه من النضافه بحب المطر
مطرة واحده والناس تابى الطلعه والدخله ويابو الشغل ما عارف علاقة المطر بالشغل شنو،
عندي اصحابي مشو اليابان لي شغلة مهمة ولمن وصلو لقو المطرة شغاله المرافق قال ليهم
ارتاحو وبعد ساعة اركبو البص رقم كدة اوصلكم لينا وبعد ساعه جماعتك طلعو لقو المطر منهمر كأنو السحاب عايز افرغ موية السما كلها طوالي رجعوا لي ورا وقالو بعد المطره تقيف بنلقى الناس طلعت للشغل وكسرو ركبه في الغرفه نص ساعه والمرافق كان عندهم وبعتذر لانو ماوراهم محل المظلات . طلع من الدولاب شمسيتين واتحرك على الباب اصحابي قالوا ليه بصوت واحد يازول وينك مارق المطرة!!! دي مطرة نصاح !! انا بحب المطر وأجمل اعمالي عملتها ومعاي المطر ومن صغير كنت بلعب تحت المطر وبغني مع اصحابي ( يامطيرة صبي لينا في عينينا)وبمشي الشغل في المطر ولحدي الأن امارس جنوني برقص تحت المطر والأن اتيتكم بعد ان صاحت في زوجتي انت مجنون شنو ممشيك في المطرة ، قلت ليها انا برقص برقص ـ انت مجنون ادخل من المطر ، طبعا لم اسمع كلامه
بل واصلت الرقص تحت المطر .. ما عارف ليه بحب المطر ؟؟؟[/purple]

سلامات
وعوافي
والله يا السني المطر عذاب عديل كدا ..
ممكن يكون احساسنا بيهو واحد ..
انا من صغير بحب المطر حب شديد ..
الجو النضيف وريحتو .. شكل الناس .. لون العالم ..
ياخي دا عذاب العذاب ..
قلت في "لو..":-
.
.
لو تخرجين للمطر..
لترقص زخاته علي خديك..
.
.
لو اكون انا المطر ..

ونجري في الشارع ونغني يا مطيرة صبي لينا في عينينا .. ونحن ندور كالفراشات الحرة ..

ونبني بيوت وقطاطي من الرمال ..

لكن مع الزلط الملا البلد ماف تاني شفع بيلعبوا في الطين ..

ندور زي الفراشات
انت زاتك ما فراشة
والفراش ما بحلى ليهو الرقيص مع الورود والزهر
الا والدنيا لابسا المطرتوب
شفع الليلة ما لاقين فسحة ولاساحة العبوا فيها
تقولي شارع الزلط كل حتة بنوها ووزوعوها للسكن والأسواق
الشفع الا اطلعو الخلاعشان العبوا مع المطر
مودتي القلب النابض..[/purple]

مرحب يا سني وودرملية واسعد انا معكم الان في كرنفال المطر الجميل
الذي هطل اليوم ولازال يرسل رزازه في شكل موجات مياه تعيدني انا بالتحديد
الي زمان جميل ومكان اجمل...
في تلكم البقاع التي يكون للمطر معني حقيقي وتشتاق اليه الارض والزرع
ومطر الدوحة المدهش الذي استمر طيلة هذا اليوم يمارس فينا السفر
الي بقاع الصعيد وتكاد تشتم رائحة النوار وطين الارض وان رخيت
اذنك لسمعت صوت (جرار) اوقل تركتر اتي من من القيط البعيد
حتي يشتري صاحبة(علبة سيجارة برنجي) او يعرج علي (بلية)
لتمتلي باغة (بشي ابيض يشبه الماء) ياخذه معه الي الغيط ليفرح
الاصدقاء ويحتسونه بكل مرح في ذلك الليل ...
وكل مطرة دوحية والاشواق دوما مسافرة صوب الوطن...

كـــــيـكــــــي
ياريت لو سميت البوست ده
كرنفال المطر
المطر في عند الغبش هناك أجمل داك مطر عندوا بدايةونهاية
مطر بنذرك وبحذرك وبقول ليك هييييييي بي صوت الهوا في الأول بعدين ابرق ليك وبعد سحابواتلملم احمر ليك وبعد الزعل الشديد في شنو غير اطرشق واسيل من السمااغرق الأرض بللانوبعد انشف تشقق الأرض من الشبع ونجي نمشي فيها حفاية وصوت الأرض تحتنا اقول ــ
كرووم كرووم وننتشي بدون منتشه وتحفظ الأرض خطاوينا ومقاس اقدامنا عشان تلبسنا كل خريف
صوت ها كرووووم كروووم
مودتي

كـــــيـكــــــي
ياريت لو سميت البوست ده
كرنفال المطر
المطر في عند الغبش هناك أجمل داك مطر عندوا بدايةونهاية
مطر بنذرك وبحذرك وبقول ليك هييييييي بي صوت الهوا في الأول بعدين ابرق ليك وبعد سحابواتلملم احمر ليك وبعد الزعل الشديد في شنو غير اطرشق واسيل من السمااغرق الأرض بللانوبعد انشف تشقق الأرض من الشبع ونجي نمشي فيها حفاية وصوت الأرض تحتنا اقول ــ
كرووم كرووم وننتشي بدون منتشه وتحفظ الأرض خطاوينا ومقاس اقدامنا عشان تلبسنا كل خريف
صوت ها كرووووم كروووم
مودتي

ود رملية
صديقي الغريب
الغريب الذي لم يعد ينتمي للبكاء
الأليف،ولالاحتمال الوقوف
على شاردات المعاني
إنه يشرب الحزن في قطرات المطر
الشاعر .. عيسى الشيخ حسن
مودتي

الاخ الـحـبيـب الـحـبــوب،
مـحـمـد ســنـي،
تـحـيـة الـود والاعـــزاز،

ويـنـك وويـن اراضـيك???. ماتظـهـر الا والـمنبـر خـلاص بقفـل حـسـاباتو وبودع النصـف التانـي مـن الـ.." السـمسـتـر"!!!.

ســررت لـطلتك واخـر مـرة كتبت انت فـي المنبـر كـان حـول مرور 100 سـنة علـي تاسـيـس مـدينة عـطبـرة!!!. وبعـدهـا ماشفـناك!!!.
بـمناسـبة نـحـنا هـنا منتظــريـن هـطــول الـجـليـد،وياحليـل زمانات الـمطـر والزذاذ والـهـمبـريـب.

لـك ولكـل الاخــوان بـطـرفكـم اجـمل الامنيات.

بكري الصايغ
النصف الثاني من المنبر والله لوما المطرة دي ما كان تشوفني قريب
إحباط للطيش لكن اه من المطر ، بعدين عطبر كاسره فيني ضلعةوانت سيد العارفين لكن
مادام جات السيرة اسالك ياخوي نحن زمان لمن نجي عطبره نمشى السودنه وتهبنا روائح الياسمين والفل والورد الإنقليزي هسه النوذج اتغير من كبار المسؤلين بدل الياسمين تجيك ريحة البرسيم اصلو المسؤل بربي بهائم . الله اكون في عونكم لمن تصب مطرة تهبكم ريحة الروث
حلوة الروث دي!!ربنا استجيب لي دعاكم وانزل عليكم الدعاش والمطر التقيل والشكشاكه وبعد داك اجيبكم الهمبريب افتح شيابييكم وشبابيك الحبيب ..
مودتي

بكري الصايغ
النصف الثاني من المنبر والله لوما المطرة دي ما كان تشوفني قريب
إحباط للطيش لكن اه من المطر ، بعدين عطبر كاسره فيني ضلعةوانت سيد العارفين لكن
مادام جات السيرة اسالك ياخوي نحن زمان لمن نجي عطبره نمشى السودنه وتهبنا روائح الياسمين والفل والورد الإنقليزي هسه النوذج اتغير من كبار المسؤلين بدل الياسمين تجيك ريحة البرسيم اصلو المسؤل بربي بهائم . الله اكون في عونكم لمن تصب مطرة تهبكم ريحة الروث
حلوة الروث دي!!ربنا استجيب لي دعاكم وانزل عليكم الدعاش والمطر التقيل والشكشاكه وبعد داك اجيبكم الهمبريب افتح شيابييكم وشبابيك الحبيب ..
مودتي

مجازا ... السني الرائع شاكر السياب

يامطر كبي ....
وياهبوب هبي ( كلام هناك )

دائما تطل علينا كما المطر
الان فقط أدركت سر هذي الأريحية
كم كنت أتمنى أن أمرح .. وأنطط حتى الإنزلاق
قاتل الله الشقق
بعيدة مهوى الطين

مبروك عليك المطر ( كلام هنا )


نورالهادي

Quote: بحب الطرفة البكاية تبكي طول الليل وفي الصباح تقش دموعه على الشجر وتفتح عيون سحابه ابيض زي اللبن أصلو السحاب الوحيد البببكي وعيونو ما بتحمر !!السحابة تلقاهاسودا وبنية ومحمرة وبعد تبكي كل االمطره تنزل الألوان على الأرض افضل السما ماسك ليه في كم سحابه ممصوره وخفبفه

.. تنزل كل الألوان على الأرض ..
و يفضل السما ماسك كم سحابة ممصورة ..

تمصر السما كل أحزان الخلوق يا صاحب ..
الأحزان الأترفعت شكاية و بكاية للخالق ..
و وقفت قدام بابه ..
ألوان الحزن السودا و بنية و حمرا ..
يكون يا سني ده هو قوس القزح ؟؟ يكون أحزان الناس في باب الله ؟؟
تبقى سحاب ..
ملون ..
السما تنفخ فبهو و تدفر ..
السما جضومها منفوخة .. بالريح ..
و تنفخ ..
و الحزن يتمصر ..
الحزن قماشة .. منسوجة سحاب ..
يتمصر على الناس بالتساوي ..
يكون يا سني ؟؟
السما تغسل غسيلها .. و تنشروا حزن ..
في حبل الروح منشور , مغسول ..
زمان بكاني السياب في ( أنشودة المطر ) ..
هسه الدمع يبس .. و فضل الحزن الغريب .
يدق الحزن بابك و معاهو وليداتو .. ولابسين مطر .

عارف ..
عندي وهم إنه السما بتغسل الدنيا و هي زعلانة ..
أمنا السما ..
و تطنطن وهي بتغسل ..
تطنطن رعد ..
تهرج في محبة لذيذة ..
تهرج زي عاتبة ..
تهرج برق ..
و برضو تغسلنا ..
نزعل نحنا من وساختنا ..
و نحزن ليها السما ..
و نمرق باكر في حال الدنيا..
نتوسخ تاني .. و نرجع ..
تهرج هي تاني .. و تطنطن تاني ..
و تغسلنا .. برضو تاني .

شفت الله ده جميل كيف ؟؟

يا نضيف يا السني ..
أنوم كيف هسه ؟؟

ياعماد اخوي
منو النام
حتى المطر كان صاحي
****
ســأموت
اذا مر ســرب الذكريات
ولــم انـحـن
وأســـدد
لأصــطادها مونة
لشــتاء صـمـوت
*
ســــأموت
إذا أنكسرت جرة من غناء
على حزني المستباح
ولم انتم
*
للبلاد التي تستحم بأشواقنا
في مســاء يفوت
وليس يفوت
*
أه .......أمــوت ....
عيسى الشيخ ..[/purple]

ايها الرسام الفنان
يا أخوي لون الحايط القدامك بي لون السحاب
وخلي مطر الفرح انزل
قاتل الله الشقق والقفله بدون سبب
يازول أطلع لي بره
أرقص مع المطره
وسوق معاك محمد ومجتبى ولمن اقوليك يازول
جنيت !! قول ليهم بلعب الشفع
جنبق في المويه وواتزحلقوا على الطين
وتعال راجع ما تسأل في زول
اتمدد بي طينك وفرهد شجرة

فى رونق "السنى" البديع

أو

فى غابات حرفك ساعة السحر وكل الشرفات حين ينأى عنها القمر

"مع الإعتذار لإبن "جيكور" شيخنا السياب، عشان بعزقنا ليهو "أنشودة المطر"

المطر ده يا السنى هو "حبر الآلهة" البتكتب بيهو عناوين وتفاصيل الحياة الفوق الواطا دى كلها

ما اسمع لى زول يقول إنه بريد المطر أكتر منى

أنا هنا فى المنبر يا السنى ولفترة طويلة جدا، كنت مسمى نفسى المطر THE RAIN قبل ما أغيره، وبقى متلصق فينى وأنا متلصق فيهو، لدرجة إنه مذيعين النشرة الجوية لما يجيبو سيرته بفتكر إنهم بقطعو فينى

هسه تجى إنت ومعاك ناس الدوحة، "عاملين لمعتكن دى" وتاكلونا حنك ساى

تصدق يا زول يا سمح

أنا أول شى قلت يا ربى الجاب إسمى ده هنا منو

وفرحت لما لقيت إنه ده إنت، وقلت خلى بالك السنى ده "وانطس تو بوليش مى"

وبينى وبينك اصله الواحد فينا بقى لما يطول من السودان أو يكون قرب يمشى، بكون معجعج ومكندك بى غبار الوجع وتراب البعاد

الزول يكون أغبش من جوه وبره زى "حبة فول الحاجات" إلا تدعكه بين إيديك حتى تعرف هو مين

مرة قلت لمتوكل التوم

زمان فى خريف مدنى ونحن صغار، كنت بفتكر إنه المطر بجى من "التجارب" أو الأبحاث الزراعية

السبب شنو، لى هسه ما عارف والله يا السنى، المهم كلما يجى المطر طوالى بتخيل إنه جانا من جيهة التجارب

المهم

أحبك وأحبك المطر

بالمناسبة

ناسكم ناس الدوحة أمس عملو حفل إفتتاح اسطورى عديل كده

حاجة ما حصلت

السنى

سلام

انتو ما شفتو مطر الرجال؟؟؟؟

فى الطقوس الهندية القديمة
( المطر يتدفق )...
عادة المطر بنزل نزول يعنى بين النقطة والاخرى هنالك مسافة.. ولكن شوف عينى دى..المطر فى الهند بكب كب..لو عاوز تقطع الشارع مسافة مترين بس..اقنع من ملابسك...ومرات المطرة بتنزل يومين او ثلاثة اكلنا فيها عدس وموية سخنة وقرقوش....
شباب سودانين جاو الى جنوب الهند ودرسو فى كلية الصيدلة...الشهر الاول مشو كويس اول يوم نزلت فيه مطرة .انتظروها سكتت ومشو الكلية...تانى يوم نزلت واحدة اخرى انتظروها 15 يوم وهى صابة..الى ان جاءهم خطاب الانذار بالفصل من الكلية.. مرة المطر تاخر من موعده مشينا صلينا ليه فى ميدان..وصلاة مش خمج...حارسننا كتيبة عساكر ونحن فى الركعة الاخيرة السماء تلبدت..والسحابة زرقندت والبرق شلع ..ونحن سجود..بعدها دعينا بالهلاك على الكفار الحارسسنا ديل..تصورو..وترانى ماشى على غرفتى...وشايل مصلايتى..كانى الشيخ على ود بساطى...اسمع الهندوسى صاحب البقالة..ينادينى احمد باى احمد ياى...قلت ليه ( بولو)..تكلم..قال لى خلاص صليتو ودى مطرة دى ,تحوق فى منو..خلو قامتى يجى وشوف المطر المو خمج..._قامتى الاهـ المطر عتد الهندوس...هى عشرة ايام تسمى اعياد الدوالى يعملون له تمثال وتعزف الموسيقى وتردد الاهازيج والاغانى ووتوقدالانوار والشموع...ولكن مطر تتحقق فيه مقولتهم الشهيرة يتدفق يتدفق, يتدفق..حتى توقف السكة حديد..التى يعاد اصليحها قبل صفارة القطر القادم بعد 10 دقائق..

تحياتى للمطر البوردى...

ابوقووتا
اقوليك شنو زمان كان لمن نسافر لي ابوقوتا في الإجازة كنانمنى النفس بمتعة لانهاية لها
من صيد الطيور والتجول في الحواشات والراحة تحت ظلال الأشجار ياخي اسمك ذكرنى ايام الطفولة والناس الحنان ..
ومطر الرجال اول مرة نسمع بيه لكن مطر الظاهر عليه خترى بالتا ،، وتعال الهنود ديل حاجاتم كلها مشاترة حتى مطرهم قصة طويلة
انت جاي من بلاد المطر الخمج والطين اللكه
ليك المودة[/PURPLE]

THE RAIN MAN
في رونق رقتك
خليتنا انا والصباح نتضاير
واقفين سوانعاين للشجر
المغسول بالمطر
وانت واقف تحتو
تبعزق للشعراء
في أشعارهم
منو القاليك
في زول بحب المطر اكتر منك في البسيطة دي
ياخوي نحن اتخرتنا عديل كده
لابنحبو لاحاجه
اهو داك المطرأرعى فيهو ماتخلي ليك سحابه
راكه في السما
لقطهم كلهم لقيط القطن
وانفش لينا ريشك وقول انت سيد السحاب
شوف فينا لواحد ولو بالغلط
اسعى ليهو مرتبه
من هوا ولامويه
أرقد قفى والعب مع السحاب واتذكرنا
مع المطر ..[/PURPLE]

صديقي وأستاذي السني
مشتاقييييييييييين يا رجل

أنا كنت بريد الهبوب البتجي بالليل عشان أقوم بدرييييييييييي أمش الجزارة والقى القروش الراحت من اصحابها زمان وظهرت بفعل الهبوب

أما المطرة بحبها لأن الراعي ما بسرح بالغنم في اليوم داك وأهلنا بقولوا لينا اسرحوا بالغنم ونشيل معانا كسرة وطماطم وشطة وملح (في كبيريتة) ونشيل السنارات عشان نشرِّك للسمك
ياااااااااااااه

عليك الله يا السني شوف ابوذر بابكر دا ماطر كيف؟؟؟

بدرالدين الما شين
الحلو ود الحلاوين
العسل الروب الموية وبمشي على سطح الموية
ازيك وكيفنك يعنى الدور الأسيوية ما جابتك تاني البيجيبك شنو ؟؟
ياخي المطر بذكرنا ايام الطفولة المابتتنسي
ما قلت لي بعد داك بتجو راجعين والمطرة ساكاكم واتو زي جداد الخلا مبلولين ورجفة خفيفة الة برد
لكن الكانون والجمر واللهب الدافئ واللقيمات وقراصة العشاء وادخل الشبع جوه العروق والورده وتلمس الدفا في العصب ومع حكاية من حبوبة وصوته الحنين وصوت المطر عامل موسيقى تصويرية وتنام
مــش ؟؟؟[/PURPLE]

السحاب مرابط فوق الحله
والشجر متشابي
راجي المطر
شكرا ود العباسيه
ششكري ومحبتي
خليت لي البوست طعم تاني

فنانا الجميل محمد السني
ونحن في عروس الخليج دبي من البارح نستحم بالمطر
وانا اكتب اليك الان تتناهي الى معقدي عبر النافذة المفتوحة
بعض زخات من نثيثه الهتون .
ومن حظنا ان اليوم عندنا اجازة .

تحياتي لكل الاصدقاء بالدوحة
والى حين لقاء .

يا مطيره صبى لينا فى عينينا

كيل يا ميكاييل بالربع التقيل خلى البوادى تسيل

ونمرق فى المطره .. نجرى ونتبل ونشعر ببروده لذيذه تزيدنا حماس
ونلعب .. ونلعب .. ونلعب والمطره صابه بى كرم وحنية
كرم الخلقنا وما بنسانا

وتقيف المطره .. ونمشى نفتش حبوبة المطر الحشرة الصغيرة المخملية
ونبنى بيوت من الرمله .. ونسكن فيها حبوبة المطر ...

الله انا على شاى اللبن المقنن واللقيمات الحاره فى جو المطره ده
الله على الفول ولا البوش بى زيت السمسم والشمار الاصلى والجبنه

لو القى روحى سحابه وتدفرنى الريح على بلدى .. وانزل مطره هناك والله كان ارتحت ..

يا سلام عليك يا قطر وعلى مطرتك الرجعتنا لى ريحة الدعاش ولون الركامى وبرق القبلى

انا بحب قطر...

رنده قريبتي القطانية
عرفنا انو اللقيمات والشاي المقنن الفول والبوش الجابن شنو ؟
انت دحين ما دفعة95
قالت شنو فول وبوش البوش ده ما جا جديد
زمان المطرة لمن تصب ومعاها تبكي البيوت من سباليق السقوف
ووالجو اصفى والهواابقى همبريب إتمر البيوت
وخليها نضيفة وارشها زي ماقلتي بي بروده لذيذه
اها هنا بجى وقت تجمعنا للقراصة واللقيمات المنفخة زي كضم الجاهل
المزغطط بالعسل واللبن
ياه خليني اقوم اكلم احلام تعمل لي لقيمات
بعزمك معاي
يلا شرفوا[/purple]

عجب الفيا
المحبة والمودة
قدمت عرض في الشارقة وكنت امنىالنفس بي شوفتك
المرة الجايه ووصل سلامك الى كل الحبايب وبكره بوصل سلامك لبشرى الفاضل الدكتور الرائع
معانا هذه الأيام .
لكن ما تقول لي كلمة ( نثيثه ـ الهتون)
بقيت اهضربيها مع المطر لي الصباح
نثيثه
ادتني احساس انو مطرة امبارح دي لجنة ولثغة
محبتي

الاخ محمد السنى

لعل مدنى الوريقه تناجيك الان وتقول


خوفي صديق العمر ان طال السفر


خوفي اذا جاء المساء وما اتيت مع القمر


خوفي اذا جاء الخريف وما رجعت مع المطر


وكل خريف وانت بخير
وكل خريف وانت فى مدنى

ياالسنى ..

والله لكن قصة ..الدوحة الايام (تشهى) فى الغربة ..
امبارح غلبنا البنسويهو فى المطر دا ..قمنارجعنا
لحنين الشيشه القديم وبرضو مالفق مع الجو ..
بالمناسبة شايفك (جالداك ) المطرة ومعاك مجموعة ممثلين
خليجيين فى لوحة اعلانية قرب المول ..وبالجد من كترة
المطرة ماعرفت تاريخ العرض متين ..افيدنا بالتاريخ ..ولو
فى امكانية للدخول (ملح) الحقنا بيها ..

ودى

محمد عبدالرحمن
مودة
المطرة بتاعة اليوم داك تنسيك كل شئ
المسرحية يوم الثلاثاء والأيام التالية
والدخول بالملابس الرسمية والتذاكر الرسمية جدا
اسمع الكلام وخلينا من المطرة
سمعت

يوسف الولي
شكرا لكلماتك الرقيقة رقة مشاعرك النبيلة
ومدني دائما في البال وعلى الخاطر
التحية لكل الشوارع التي تعرفنا ونعرفها
التحية لمدني الجمال

يا ميطيرة ..صبي لينا .. في عينينا..
الاطفال بيفرحوا بالمطرة دون مبرر مع العلم بي أنهم الاكثر خوفاً من الحمام ..
في السودان عموماً ترتبط لي المطرة وبعد ان تبدأ في الوقوف وتبقى الرزاز ودون سابق إنذار ولا مواعيد تجدنا كلنا شباب الحلة اتجمعنا في دكان العربي عشان نظبط فول سادة بالزيت والشمار والجبنة ..
ما عارف سرها شنو لكن بقت عادة ثاااااااابتة عندنا..
الكورة برضو من غير مواعيد كل الناس تلبس الكدارات وتجي الميدان ..
عندنا في امردامن بعد المطرة تقيف كل البيت بيطلع الشارع رجال ونسوان وتسمع الاصولت :
اها يا نفيسة نعلو بيتكم ما صبّ ..؟؟
ترد نفيسة : والله البرندة الورانية صبّت والصالون نقط حبة بس احمد طلع راس البيت كب فيهو ريقيطة ..
الرجال تلقاهم عايشين الدور وبيفتحوا في المجاري وبما ان معظم سكان العاصمة من الاقاليم فيعوادهم الحنين للزراعة والحواشات فيجد في الخيران وتفتيحها البيئة المناسبة لإعادة شريط الزكريات ..

ذكرتنى يا عمر الفاروق وانت بتحكى عن عمايل المطره فى البيوت بى قصه حصلت لينا ..

عندى خالتى ربنا يرحمها كانت حافظه المصحف واغلب كلامها باللغه العربية الفصحى ... مره المطره صبت تقيله واغلب البيوت فى القطينة اتضررت منها ... قامت جاره لينا جات ماره تتفقد الناس ودخلت على بيت محاسن خالتى دى .. المهم من بره الحوش تكورك (محاسن هوى يا محاسن) قامت خالتى مرقت ليها اها ديك سالتها (هى يا يمة نعلها المطره دى ما خربت ليكم البيت) ردت عليها محاسن خالتى (والله يا صلحه لقد تسرب الماء الى داخل الفناء فانهار الجدار) ردت عليها صلحه (سجمى اوع تكون حيطتكم وقعت)..

رنده
التحية والمعزة
ضحكت لمن الكمبيوتر اتشرق
ما أجمل خالتك محاسن وهي تغزل اللغة على نول الظرافة بالنهار
وما أجمل براءة الخالة صلحة الحنينة
الناس ديل في المطرة بكونوا ظريفين كيف وخاصة بعد الرملة تشرب موية المطر والجو ابقى اوربي واجيبو الشاي المقنن واللقيمات وبعدها القهوة وقراصة العشا وبعدها القراصه الحلوة بالعسل ولا بالزيت والسكر
قوموا اتعشوا

[purple ] عمر الفاروووووق
عامل كيف مع المطر
عيني الشافتك في الرياض بتقول عنك شفت ومقدده وبتاع حي لل عرفتها دي بتاع حيللل ن قال شنو بمشي مع اولاد الحلة اعملو صحن فول مدنكل تلقاك انت البتخوفهم
وتهرشهم وتاكل ملح يا بتاع الملح انت ..
المطرة طارت لينا في راسنا من عمايل ناسنا الباعوا لاعبنا الفنان هيثم طمبل ولاشايفك جايب خبر للمصيبة النزلت فينا زي مطر الليل .
المطر ليه بقى بتبعو الفول عايز اجابة صريحة ؟؟؟
مودتي[/purple]

مطرة الله
كبى ويللا

مطرة سيدى
كبى وزيدى

عزيزى السني
تحياتي
نعم مطرتو....لكنها مطر بلا دعاش..مدن الملح والزفت لاتعبق دعاشا
شهدت امطار في القارات الخمس...ولكن لااحس بروح المطر (الا هنا)..
فى أى بقعة (من هنا)..رغم المثل البقول(ماتشكر لى مدنى في الخريف)
لكنى احبها فى الخريف ..ما عارف عشان الطين اللكه..ما دى الخصوبه ذاته

مبروك عليك المطرة يا المبيريك ود البركة.أكشف راسك تحتها و ادعو لك و لنا بالبركة..
أهل الصحارى يهيمون بها وأهل الشمال جدا تجعلهم حزانى!!
للموقع المناخي لأي بقعة في الأرض تأثير علي أمزجة ساكنيه من البشر.
بل أن تنوع الثقافات ألأنسانية هو وليد تحايل بشري للألتفاف حول معطيات المكان.


مطر مطر........وفي العراق جوع؟

بدر شاكر الثياب


يا السني المسرح مجرم....سرق شكسبير من الشعر.....الوداك للمسرح شنو؟ ببركة المطرة الله رجعك شاعر زي ما ولدتك أمك.....خليك تحت المطر و الحلفاوية أصلها بتخاف من المطر....

إنهمر كيف شاء لك الدلال

Quote: مره المطره صبت تقيله واغلب البيوت فى القطينة اتضررت منها ...

زكرياتي الخريفية جميلة جداً في القطينة فقد زرتها في الخريف مع سينيري في الجامعة وصديقي العجوز والزول الحلو (صدّيق بابكر) والمقيم حالياً في البحرين ..إن شاء الله بتعرفيهو يا رندة ..
القطينة ناسا طيبين وحلوين قضيت فيها تلاتة ايام حاجة مبالغة وما خليت لي سيرمس شاي ما شربت بيها ..
كل الجيران جابو شاي اللبن في الديوان لي ضيف صدّيق وانا اشيل واشرب...
القطينة حاجة جميلة..

تخريمة :
الخلاة ماااااا عندكم
يحكى أن الأستاذ قال لي الطلاب :
تاني ما عايز زول يتكلم لي في الحصة بي الدارجي مفهوم ؟؟
طالب قال لي الأستاذ اثناء المحاضرة:
يا استاذ إن قلمي قد وقع(بتفخيم القاف وملأها)...
الاستاذ قال ليهو :
ضنقر شيلو ... (دنقر شيلو)

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

هل تصدق انو زمان احساسي بالحب العذري بزيد لما المطر يجي والسحاب يشيل

ومعظم الحاني اتعملت في الجو ده

ودايما تظهر لي حبيبه خياليه وسط السحب

بس الرعد ببوظ لي الموضوع
وبكرهو موت

المطر فى الدوحة.. اين الشجر؟ يا سنى؟

السنى ازيك
بتتذكرمطرة دمشق




ـــــــــــــــــــــــــــــــــــــــــ___ــ
مرسل ليك صورة هدية انت وصاحبك ( ابق قليلا 2 )

عذرا ايها المطر

ساقف تحتك لاغسل احزاني
واترك ما تبقي من وسخي
ليتغير احساسهم بك
كي استاثر بك وحدي

لكني
اخاف البرد المصاحب
لي هطولك

ورغما عنه وعنكــ
ساقف عاريا وسط القبيله
لاتنظف بك

ساتدثر ببرقك
واعلن بوحي

لا تزعجني بصوت رعدك

فانا استمتع بالغسل
الهادئ ...
في ظل بوحي
وظلك يا مــــــــــــــــــــــــطر ..


امطر
وليمطرنا السني بك ةكل المحتفين بكرنفالك ..

كيفك يا ود أبوي ..
الشوق مطر ..
مين فينا لا يحب المطر ..
يأتي في لحظات نسعد فيها كثيراً ونفرح ..


تحياتي ..

الحبيب سني محمد دفع اللة
اهة شن قولك لامن المطرة تفرتك حفلة العرس الرابة دحين ما بيكون العريس اكل في الحلة..... ها ها ها .....بحبك موت

مطر ..
مطر.
مطر

تتظاهر الغيوم تملأ السماء...تلك الفرحة اليوم حد التنازل عن زرقتها
لصالح الوان المطر
لصالح لون ثوب جديد للارض
انني هنا تحت هرولة المطر..
تحت السماء
بتوقيت الهطول..
ذلك اللذي يفاجيء كل الساعات...لتدور بمعدل سرعة هطول حبات المطر حتى لتتداخل الاوقات ذلك التداخل الأخاذ.....
المطر
اللذي يخرج الأطفال من اسرتهم ...
والعشاق من مخابئهم...
ويخرج الدنيا من غبارها وكآبتها ولونها الكالح ويسلمها لبراحات للفرح والركض
كم هي راقصة تلك النسائم الآتية مع الفنان المطر
تتفاوض واوراق الشجر وتسريحات الشعر الأنيقة
والتنانير القصيرة...
فوضى المطر الجميلة..
موسيقاها
ونقراتها على الأسطح الزجاجية للنوافذ
للسيارات
لواجهات المحال
المطر والابتلال....
تبتل اعيننا.. فنرى الدنيا اكثر قربا لنا
تقترب الطبيعة من ارواحنا
تكاد تآخيها
تبتل القلوب...نغتسل ربما!!!
انها البهجة تواري عبوس الروح وسأمها وكل الضجر
نبتل...
تخترقنا قطرات المطر
انها تشاركنا فرحتها في الهطول
تلتحم باجسادنا
ونتجلى لها ببشاشة
....
..
.


تحت المطر
ابحث عن مظلته الدافئة
عن يديه
عن طبيعة اخرى
كما هطول المطر....

والله يا محمد السنى مقالك جميل جدا وخليتنا نحب المطر ومع انه المطره فى البلد العايشين فيها دى بتتقلب الى جليد وبتعكر مزاجنا .. لكن المطر يدل على الخير .. وبالمناسبة انت محمد السنى دفع الله الممثل الشهير ولا اسم على اسم لانى شايف نادر السودانى بيخاطبك باسم السنى محمد دفع الله ولخبط راسنا

الصديق الوفي السني


كل الود والمحبة

والشوق مطر وبحر وما الى ذلك

العشق للمطر يكاد أن يكون مشترك

وكل أمطار الشتاء وأنت بخير 00


مع مودتي 000

السنى المطير , الممتطى طيات السحاب ,
هل تعلم أنى مبتكر عبارة الشوق مطر !!
لما كنت بكتبها لى حبيبتى وأنا مغترب
بره السودان قبل تلاتين سنه ! ولى أهلى
وأصدقائى ! والكلام ده موثق بالتواريخ
فى الخطابات ! كان ما عارف أعرف ...
الشوق مطر . ولمن أكتب لك وداعاً قلبى
ينزف فى الدوايه !!!
مامون

ليلية عقاب مطر،
ضلماية عقاب شهر،
طالع فى راس الجبل،
بشوف النمل تبر . . . تبر،
بعزل الانتايه من الضكر،
**********************

هاشن قولك ياأستاذى السنى

[purple]أغنية للمسافر





ـ الغريب الذي شدّ أنشوطةً في دمي

لاحتمال اللقاء

ـ الغريب الذي رفّ في دهشتي وارتمى

في مساء الحجاز

كلّما شفّ من شاي صاحبه

غاب في "هفهفات" العصاري على

حنطة ٍ يانعة

ثم ذاب على فتية في الشمال

ثمّ فكّر في طفلةٍ ترتدي حزنه

قامةً ....قامة ً

سوف تقرأ أيامه في الأكفّ التي

لامست وجه عرّافةٍ

وتراه يحطّ على راحتيها ، يفتّشُ

بين الخطوط ِ

عن الماء واللحظة الضائعة

ستقول :

"بأنّّ الولد

عائدٌ يابنتي ..

في يديه " البرازق"للزائرينَ

على شفتيه ابتساماته الوادعة "

ــ الغريب الذي لم يعد ينتمي للبكاءِ

الأليفِ ، ولا لاحتمال الوقوفِ

على شاردات المعاني

إنّه يشرب الحزن في قطرات المطر

هو لن يتّقي هطلها

بالهروب إلى ساحةٍ نائمة

فالغيوم التي صادفته وحيداً

يجوس خطاياه

ينأى عن الضالعين بـتأويل أوجاعه

ويبحث عن وجهه في مرايا الشجر

الغيوم التي لم تكن تنحني كي يراه له

صبية العاصمة

حملت حزنه لشمالٍ بعيدٍ .... بعيد

الغيوم ُ مكاتيبه

ربّما وصلتهم قبيل المسا..

دمعة ً ...دمعة ً

في الدموع التي لامست شالها

في الدموع التي لامست وجهها

في الدموع التي لامست دمعها

كلماتٌ تقول لها :

"إنّه عائد ٌ

في يديه "البرازق " للزائرين

والفناجين للبيت

والبسمة الحالمة "

وهو يدرك أن القطارات قد غادرت

كي يردّد في صبوات الشوارع ِ

كلّ الأغاني التي حلّقت ثمّ حطّت

على ذكريات الطفولة والآخرين

ولأنّ التذاكر في جيبه فتّتتها الأصابع

سيعدّ علينا احتراقاته مشهداً ..مشهدأً

لانديم .... ولاكأس ..... لاذكريات

آه ِ .... لا وردةٌ تمنح المشهد الأسئلة

ولأمّي التي يستريح ُ على راحتيها التعب

كلّ هذا البنفسج

كلّ البخور الذي يهتدي للجهات

السلام على حزنك المستطيل

السلام على غصص الراحلين

السلام على دمعهم

في متاهات أيامنا يعبرون

السلام على النافذة

حين تغلق كلّ الحقول على طيرها

في ارتباكٍ نبيل[/purple]

////////////////////////////////
عيسى الشيخ حسن

المبدع الأستاذ السني دفع الله
دوحتنا في الدوحة من هجير الغربة


شغلك نضيـــــف
والله دخلت بوست المطر الرهيب ده

لمن طلعت لم شريت ملابسي في الراكوبة من موية المطره

خالص التحايا



نورالدين
ودالبدري

استاذ السني اعطيك الف العافية ، انا مثلك أحب المطر ولي معه حكايات جميلة ، ما ان ارى المطر والسحاب شيل الا واخرج اركض بالشوارع اغني واجري واقول كلام جميل لو كتبته كان صار شئ ، الان اكتب اليك ويبللني المطر ، حتى مسقط من امس غرقانة مطر ، وليتك كنت جارنا لنرقص على ايقاع المطر ،مطر مطر مطر .. ويا مطيرة صبي لينا في عينينا وكيل يا مكايل وقوطر قوطر ويا ابو فاطنة جيب المطر ..

استاذنا الجميل محمد السني

لك التحية واشواقنا مطططططططططططططر

نحن كما ن الأيام دي بي جاي مطر شديد وجو بس

فاقد السودان ،،،،

لك التحية والود وللاسرة

أمنيتي أمشي ساعات تحت المطر وعلى النيل ،،،

بتلمن باقيليك ،،،

مودتي ،،،

فليتواصل هذا الجمال
الفنان الراقى
محمد السنى
لينتقل هذا البوست بكل هذه الروعة
الى العام القادم..وهو يحمل
رذاذا ينعش الروح
عندما كان كل منا ينتقى امضاء له
ويزينه ببوستاته قبل ان تلغى هذه المنحة
كان السياب حاضرا معى دائما

عيناك غابتا نخيل ساعة السحر
او شرفتان راح يناى عنهما القمر

الجميل محمد السني:

Quote: من ضغير بعشق مدني ما عشان اتولدت فيها

قول لي .... إنت برضو كنت صغير؟؟

شايفك شاني هجوم على ناس الخرطوم. وعايز أقول ليك إنو هجوم غير مؤسس.

قبل الخريف .. وفي بري ضاحية الخرطوم، ينفر الشباب، متسلحين (بالطواري) والسواعد لفتح المجاري والقنوات التي إنهال عليها التراب طوال العام لتصريف مياه الأمطار القادمة. تستعد بيوت الطين (بالتزبيل). تهطل الأمطار غزيرة وخفيفة، ويخرج الصبية بعد توقفها بأهازيجهم .. يا مطيرة .. صبي لينا .. في عينينا. و .. مطرة سيدي .. كُبّي وزيدي .. مطرة ألله .. كُبّي ويالاّ. ثم يتنافسوا في تشييد قصور الرمال (إسم الدلع بتاع "القُبب") ويملأوا خياشيمهم بالدُعاش. لكن والله الشئ المحيرني في أنواع من الحشرات تظهر مع أول مطرة في الخريف .. بيجوا من وين ما عارف، وكانوا لابدين وين؟ أهم الأنواع هو (أبوالمطر) وهي حشرة أشبه بطيارة الرش.

بس مطر الشتا ده شئ كُتُر .. غير الشئ الإتعودنا عليه. بدليل إنو هسه بعد المطرة تشهد الدوحة موجة برد تكاد تنسينا إننا في الخليج أبو حر ورطوبة.

يامطر عز الحريق
يامصابيح الطريق
السنى ياعسل
أمطرت سماء الشارقة بالعرض الرائع
الذى قدمته وكان كالمطر
لك التحية والتجله

السني هووي
البرد نفخ يافوخنا
والمطر سدر وما نزل
ورجب ماحتى النبق
السني ياخوي ... النصيحة واللا الجنبها؟
المطر مامطر لو ماشميت زيفتو
واكان ما اتكدندكت وجريت يافكيك درب البيت
وكان ماسحابو ربط قبلي ومربط عجيل
وكان ما فتحتو المجاري وسمعتو صوت السيل
وكان ماغنت ضفاضعو
وساهرت جنادبو الليل
وشن بتقول
في القبلي وعشم عشمان

وكل مطر وانت بخير

نورالهادي

السني المطر

تحية وسلام مليان دعاشات ومندي بالرزاز

والله المطر لو سمع كلامك السمح ده ما يبطل هطول

يسعدنا ويغسل احزاننا زي ما بتعمل انت يا عزيزنا

ويا سلام على المطره لمن تعمل ليك قلق بالليل ،، نكون نايمين في الحيشان

تنزل المطره ندخل جوة البيوت ،، تقيف المطره نطلع للحيشان

زي كأنها بتلعب معانا الحقني والحقك ،، يا سلام لمايجي الصباح والشمس تكون خجلانة

من البيوت النديانة وتابا تطلع ،، تتلبد مره ورا السحابة ومره تسرق النظر

يا سلام على المطره في السودان لمن يكتحو شوية بخور تيمان مع شوية جاولي في نار الصباح

يا سلام عليك يا السني يا مطر

العزيز السني:

وكتب بشرى الفاضل في البنت التي طارت عصافيرها


(سلام الله يا مطر عليها وليس عليك يا مطر السلام)

كناية عن حسد صديقه مطر على محبوبته.. وضحكنا ساعتئذ ..

وأجمل مطر جاء في مقطع لأغنية ل عثمان حسين يقول شاعرها

( وأجتمعنا والفراش حوالينا

و أفترقنا والمطر بصب علينا)

أما مطرية السياب فلقد شاعت حتى أن البعض جعلها معلقة ثامنة

(عيناك غابتا نخيل ساعة السحر

أو شرفتان راح ينأى عنهما القمر

عيناك حين تبسمان يورق الكروم

وترقص الأضواء في غوريهما النجوم

مطر مطر مطر)

وكتب حسن نجيلة في سفره(ذكرياتي في البادية)

(كان حينما يهطل المطر بديار الكبابيش أن أخرج من خيمتي وأقف فاغرآ
فمى مسقبلآ ماءه بجوفي..)


وأخطر مسرحية قدمت في الثمانينات عن جماعة السديم(مطر الليل)

و أخطر مطرة تلقتها الخرطوم كانت في مساء الخميس 20/8/1988 بدأت

في الساعة الثامنة مساء وأستمرت حتى التاسعة من صباح اليوم التالى

بدون توقف و كانت 105ml وأبطلت جميح حفلات الزفاف والحياة في الخرطوم

وكنت محبوسا في ذلك اليوم مع إبن خالتي العريس في كوافير بالعمارات

لإحضار العروس وكانت معنا 8 حرائر من العرائس و معهن صويحباتهن و بنات

أهلهن إنحبسن معنا ولم يستطع عرسانهم التمكن من الوصول إليهن إلا في اليوم

التالى حيث كان علينا تطييب خاطرهن وهن يندبن حظهن بالدمع لأختيار

ذلك اليوم لزفافهن.. وسط الظلام الدامس إلا من بعض الشموع التى كانت

في الكوافير وبعض ممن أحضرته شبائن الزفاف وسط الجوع والعطش حيث صدف

أن كنا نحمل معنا(تورتة زفاف إبن خالتى معي والتى أسعفت الجميع من

براثن الجوع... مطر مطر مطر وسلام عليك يا سني وعلى الدوحة السلام..

المعذرة لنتوقف قليلا
وليهطل المطر من دمعنا
ليبكي زين الشباب
مــجــديى النــــور مــــحــمد
لكم حســـــن العزاء
ولنــا الصبر الجميل

أخي العزيز كوموندان الكوميديا السودانية السني


صباحك ممطر بالدولار والدينار إن شاء الله ، ، ،،


في أوربا والدول المتقدمة عاد كيفن بيعملوا مع الامطار ذي الكان في الدوحة دي ؟ وشوقنا ليك مطر أكثر من مطر قطر ، وسـلام .

إنا لله وانا إليه راجعون

اللهم ارحمه واغفر له واحسن نزله ووسع مدخله

اللهم اجعل قبره روضة من رياض الجنة

اللهم الهم آله وزويه الصبر وحسن العزاء

لا حول ولا قوة الا بالله

تبكي السحب الأن معنا
مـــــجــــــدي الــــنــــور