Post: #1 Title: وحات الله انا كِتِل.. Author: طارق جبريل Date: 11-04-2010, 00:24 AM Parent: #0
يا حنينين القصي ماها بلدا سمحي وخُضرة ووجه حسن القصي ريحة لبيني مقنني ولا شليل وين راح في ضو قمرة ملجلِجي ولا كمان ونسي طاعمي عند جدول المويي مع بنياتنا والعجب ان لقيتن ينشِلن في الميي من البير وبقيت تنشلهن وتاخدلك كلمي كلمتين وان بقت الريدي دخلتلك في العضم تمشي علي ود القروني في خور السواعير في البركل وهو ينقرش في الطنبور في الرملي الناعمي وانت تغني في: مسخت عوم البترطن في جروفها القصي يا الاحباب دفيقات تاكلن وريقك ينقط في العراقي ويندبغ فيهو لون الدفيق القصي في تمرا مقفذ و((حائض)) راجنو ((يحمل)) بالتمر القصي في منقايات مدلدلات في فرع أليل كوشتنير في القيفي تقطعلك منهن منقايي منقايتين وتغتسن في القيفي فشان يبردن ولا كمان تشوفلك أربل تكارن في الخبوب من الحيضان قبُل القراعي وان خلاص فاضبك تمشي علي الشبكة الشريتها من امبارح في النيل ويبقى ربنا يرزقك ان شاء الله بي ((شلبايي)) والعجب ان بقى قالولك الفطور جابوهوا تجر البرِش وترش ((التُرمي)) بالويكي وتفقشلَك بصلايي وتغسلك طماطمايي من الحوض ومعاها عجورايي في الجدول الكبير وتقعد تلوغد وتحمد ربك وتاخدلك تكيي وبعدها تشربلك كبايي ألت شاي وتطبُقها وتقوم تاني علي الحيضان تفتح المويي فيهن.. وتجيك ريحة الطين مع ((بعر)) الغنم زي النعجي ((الشايعي)) وجاها الفحل للعشير.. وتتكل ضهرك في عود الطوريي.. وتشوف في غابات التمُر وفي ضهروا البيوت هناك في الرواكيب قاعدات امات خدور يتمسَحِن بالكركار ويتهامسن والطرحة وكتين تقع من كتيفن والصدير يجيك طامح علي الوزين في الجزيري والرقبي منديي من سموم النهار علي البسبوسة الزادولا العسل والعجب وكتين يسيل العرق بين النهود زي ((مياه توتيل)) والاصابعين اليسرحن في المساير طريات متل ضهر ((البياض)) و((الاوراك)) نصهن في البنبر والنص التاني مدلدل زي عجين اللقيمات وكتين يخمر شديد ويدفق من الحلة.. اصلك براك تاخدلك شهقة وتمشي تغتس في النيل.. وتجي في ضهر تمرايي تتكل راسك وخيالك يمشي لي بعيد.. تطرا الحبان والاهل.. الطفش فات.. والقاعد ميقن لليلي يحلم بالفرح والدخل في ((ود اللحد)) وسابها وخلانا لانا لامين في بلد ولانا كمان شفنالنا جيهتا تاني يا ناس هوووووووووووي وحات ربي انا كِتِل ضُمة ضُمة
Post: #2 Title: Re: وحات الله انا كِتِل.. Author: معاوية عبيد الصائم Date: 11-04-2010, 00:26 AM Parent: #1
كدى النسلم بالتبادى ؟
كتلك هين؟
المهم السنجك سيد الاسم
(بالمرصاد؟)
Post: #3 Title: Re: وحات الله انا كِتِل.. Author: سيف الدولة كامل Date: 11-04-2010, 00:27 AM Parent: #2
سلامتك يا حبيب ,,كيفينك وكيف حال وليداتك.
Post: #5 Title: Re: وحات الله انا كِتِل.. Author: طارق جبريل Date: 11-04-2010, 00:35 AM Parent: #3
Quote: سلامتك يا حبيب ,,كيفينك وكيف حال وليداتك.
حبيبنا واستاذنا سيف كيفنك ياخي
تراني يا الحبيب قاعد وسطن وممحن لاني عارف اسوقن وامشي لاني كمان ميقن وقاعد القصي اتجوبقت شديد يعلم الله
Post: #4 Title: Re: وحات الله انا كِتِل.. Author: طارق جبريل Date: 11-04-2010, 00:33 AM Parent: #2
Quote: كدى النسلم بالتبادى ؟
كتلك هين؟
المهم السنجك سيد الاسم
(بالمرصاد؟)
يا حبيب باقيلك القصي دي لا وين لا بلدا دايري تتعدل لانا كمان قادرين علي الصبر
تليشة: السنجك تراهو يرمي في تيرابو
Post: #6 Title: Re: وحات الله انا كِتِل.. Author: معاوية عبيد الصائم Date: 11-04-2010, 00:36 AM Parent: #4
همك التيراب ؟
من حقك يا ود جبرين
التيراب ....بقى..... اممى
يجازى محنك
Post: #8 Title: Re: وحات الله انا كِتِل.. Author: طارق جبريل Date: 11-04-2010, 00:40 AM Parent: #6
Quote: همك التيراب ؟
هوبلا التيراب دة المخلي صنفور عطبرة يشتغل شنو
Post: #7 Title: Re: وحات الله انا كِتِل.. Author: Hafiz Bakhit Date: 11-04-2010, 00:38 AM Parent: #4
بنرمي التحايا ....ياودجبريل عابر طريق ..جديد
Post: #9 Title: Re: وحات الله انا كِتِل.. Author: طارق جبريل Date: 11-04-2010, 00:42 AM Parent: #7
Quote: بنرمي التحايا ....ياودجبريل عابر طريق ..جديد
حباب حافظ مرحب بيك يا حبيب
Post: #10 Title: Re: وحات الله انا كِتِل.. Author: معاوية عبيد الصائم Date: 11-04-2010, 00:44 AM Parent: #7
كلامك ده...واضح
فعلا سيد البيت من عطبرة(اتبرا)
الله ينعل ابو الخوووووه.. ياخ
عندك فكرة يا ود جبريل؟
Post: #11 Title: Re: وحات الله انا كِتِل.. Author: طارق جبريل Date: 11-04-2010, 00:52 AM Parent: #10
ود الصايم اختاني في الليل دة هسي الشيطان اللخدر ذاته واقف فوقي ما تخليني افتو
Post: #12 Title: Re: وحات الله انا كِتِل.. Author: خالد المحرب Date: 11-04-2010, 00:55 AM Parent: #11
Quote: راني يا الحبيب قاعد وسطن وممحن لاني عارف اسوقن وامشي لاني كمان ميقن وقاعد القصي اتجوبقت شديد يعلم الله
مخير الله
Post: #13 Title: Re: وحات الله انا كِتِل.. Author: طارق جبريل Date: 11-04-2010, 00:58 AM Parent: #12
Quote: مخير الله
شيخ المحرب كيفنك ابوي باقيلك القصي دي حدها وين
Post: #14 Title: Re: وحات الله انا كِتِل.. Author: خالد المحرب Date: 11-04-2010, 01:10 AM Parent: #13
طارق والله الاغنيه غنوها نا س كتار لكن انا عاجبنى من النعام
Post: #15 Title: Re: وحات الله انا كِتِل.. Author: طارق جبريل Date: 11-04-2010, 01:13 AM Parent: #14
الله الله على النعام يا شيخ المحرب
Post: #16 Title: Re: وحات الله انا كِتِل.. Author: طارق جبريل Date: 11-04-2010, 01:16 AM Parent: #15
Post: #17 Title: Re: وحات الله انا كِتِل.. Author: محسن عبدالقادر Date: 11-04-2010, 02:10 AM Parent: #16
الحبيب طارق جبريل الله يقويك .. والله يجيب العواقب سليمة ..
Post: #18 Title: Re: وحات الله انا كِتِل.. Author: محمد عبدالرحمن محمد Date: 11-04-2010, 02:49 AM Parent: #17
يا جنا جبرين، وكت ماك جاي تخلينا في حالنا، أها النطبنجا ليك ولي الفضل من رويحتي..!
Post: #19 Title: Re: وحات الله انا كِتِل.. Author: عادل عوض بلال Date: 11-04-2010, 09:23 AM Parent: #18
باقيلك كلامك القلتو ده كلو ..... بتمشي تلقاهو متل أول؟
أنا قايل الناس زاتا ما تلقاها متل أول
الهم بقى همين .. والبلد بلدين .. والوجع وجعين.
أهلك أولاد الريف (المصريين) قالوا على لسان أم كلثوم:
عايزنا نرجع زي زمان قول للزمان أرجع يا زمان وهات لي قلب لا داب ولا حبّ ولا انجرح ولا شاف حرمان.
يا ود ابو العزائم ترانا عايشين علي الماضي حتى وكتين نمشي للبلد بنتغابى العرفي في المجتمع الجديد دة ونحلم بالقديم انا باقيلي نحن الوحيدين الفي خلق الله عايشين علي الشي القديم الله لا كسب الكان السبب
انت كيفنك يا الحبيب ووليداتك ان شاء الله طيبين في عضمكم