يا الحبان كيفنكم كلما اسويلي بوست وفيهو كلام أليل شوايقة يجيني واحد مبنقر من ناس الشهادة العربيي يقولي دي شنو دي ما فهمتها دحين يا الحبان داير اسويلي دكشنري أليل شوايقة باقي عندهم كلاما معوج ومجوبق ماهو معروف كدي ساعدوني انا ذاتي شايقي أليل خرطوم سااااااااااكت
ابراهيم كيفنك فعلا كثير من الاسامي هي متطابقة لدى الدناقلة والمحس والسكوت والشوايقة ياخي يا ريت نقدر نعمل قاموس للهجات المحلية لكل قبيلة دة تراث ما مفروض يندثر نهائي
هبتروك : قبضة الذرة (هين من الذرة) ـ تيلان : السقايي التالتي للنبات ـ فاريق : الشي البيزرعوه في الجروف جنب النيل. ـ اركج : الولد البيساعد في الزراعة ـ أروتي : الولد البيقعد فوق الساقية وهي شغالة
جيت اسلم والوم نفسي والله الوم الشبكة ماعارف قدر ما حاولت الخرابة ده اصلو ابي يقول ترن علي العموم انت عارف المعزة علي شبكتي طشت ونفيستي علي قولك ما جرتني علي الخرابة الاسمو النيت ده علي تحياتي لي سيد الحولي واخياتو
Quote: فاريق : الشي البيزرعوه في الجروف جنب النيل.
الفاريق جاى من فرق ,, اى فرق بين شيئين وهو نبات الدخن الذى يزرع على الحدود بين الجروف ليصبح علامة فارقة بين جرف وجرف.
Quote: أهن تعال اتوهط و اتنبرلها و اشرح آالبخيت
الأديب حمور الزول ده ماهو شايقى ده من اندينا بدليل انه عرف نفسه على انه من ام هبج وذكر الدلوكة والبل(الإبل) وان شاءت الأخت سنقوم بالترجمة على الشريط على ان يحفظ لنا ود جبرين الحقوق الأدبية. ود جبرين ترجم: جاتنى صدمة (بضم الصاد) وقليت لى قرض فوق قلشوب. جرحتنى الساسوية فوق الكدمبس.
المحيرني ياابا ريم الكلام ده يطرشني ، نزلت البلد كم مرة كمان قبل مايلدوك عمرى ماسمعت بيهو معارف الشايقية بتاعين { البرصة } باين عليهو شايقية نص كم طلعوني مسطح شديد ،،، الله يديهم العافية
Quote: المحيرني ياابا ريم الكلام ده يطرشني ، نزلت البلد كم مرة كمان قبل مايلدوك عمرى ماسمعت بيهو معارف الشايقية بتاعين { البرصة } باين عليهو شايقية نص كم طلعوني مسطح شديد ،،، الله يديهم العافية
هيي سووووووود علي يا عمر نان واااخجلتكم في البرصة انت باقيلي راقد كداد متل ناس الشهادة العربيي
اللهم ارحمه واغفر له واجعله من اصحاب اليمين اللهم ابدله دارا خيرا من داره اللهم ان كان مسيئا فتجاوز اللهم عن سيئاته اللهم ان كان محسنا فزد ياربنا فى احسنه اللهم خفف المصاب على اهله واصدقائه اللهم بارك فى عقبه ووفقه الى البر اليه واجعلهم صدقة جارية له يارب العالمين.
اللهم ارحمه واغفر له واجعله من اصحاب اليمين اللهم ابدله دارا خيرا من داره اللهم ان كان مسيئا فتجاوز اللهم عن سيئاته اللهم ان كان محسنا فزد ياربنا فى احسنه اللهم خفف المصاب على اهله واصدقائه اللهم بارك فى عقبه ووفقه الى البر
اليه واجعلهم صدقة جارية له يارب العالمين.
Post: #30 Title: Re: دكشنري شوايقة Author: الرفاعي عبدالعاطي حجر Date: 02-03-2010, 08:23 AM Parent: #29
الانسان ابن الارض وهى التى تشكله ومنها غصبا عنه تخرج افكاره وثقافته وتخرج افراحه واحزانه وحين يقول وطنى فانما يقصد هذه الارض بكل ما فيها من اشياء .
وعندما يقول شاعرنا حميد فى قصيدة عم عبدالرحيم
تقرع بالقمر تزرع بالنجوم
فأنه يعبر ب ( تقرع ) عن فعل من افعال الزراعة الذى يمارسه المزارعين والتربالة هناك وهو حبس الماء والسقاية .
وعندما يقول : ( لكن الزمن آبدوم ) بلهجة الشايقية المحببة يقصد ما بدوم ، وبالطبع ان حميد لأنه ابن البيئة وابن هذه الارض المعطاء فانه يستخدم ثقافته وبيئته جيدا فى شعره
يقول : ( أمونه الصباح قالتلو النعال .. والطِرق إنهرن ) الطرق هى قطعة القماش أو الثوب
انظر معى اللهجة المحببة ( بس يا أم الحسن .. طقهن آبفيد .. طقن آبزيد ) آ بفيد : مابفيد آبزيد : مابزيد
ايضا انظر معى لكلمة أشهر يقولها بهذه اللهجة المحببة ( ياريت التمر ياريت لو يشيل كل تلات اشر )
بهذه المقدمة اقول انه فى هذه المنطقة اختلط العرب القادمين بالنوبة فصاروا شايقية وبديرية ولذلك تحمل لهجة الشايقية كثيرا من مفردات النوبة هذا عدا عن لهجتهم وطريقتهم فى الكلام ونطق الكلمات ، كذلك فى هذه المنطقة يسكن معهم وغير بعيد عنهم يسكن الهواوير والحسانية فخالطوهم ايضا وصارالشايقية يقولون :
الديناب : لحجرة الجلوس الكبيرة
الدانقة : للصالة
الدونكا : للمطبخ
الهبود : الرماد
ألارنيق : الامينة تنتصب فى منتصف الحجرة تسند المرق
الكبد : الباب
الكشر : مفتاح الباب
الكتاريق : البيوت المهدمة القديمة
الباريق : الزقاق الضيق
ألارتيق : ظل الجدار الشرقى فى صباح الصيف
التكيقة : شمس الجدار الغربى فى صباح الشتاء
الكرقة : الراكوبة
الكادق : البخسة يحفظ فيها اللبن
الكشمير : مثلث الارجل تعلق منه القربة فيها الماء والسعن فيه الماء او اللبن يخض فتخرج منه الفرصة والروب
البشنتيق : قطع البرش القديم
الكفريق : فصوص القصب الجاف
الدفيق : اول اطوار التمر يكون اخضر ثم يصفر او يحمر فيكون رطبا ثم يصير ام رأس اى يبدأ النضج من رأسه واخيرا يصير تمرا
ألشهيق : ليف النخلة
الكروق : مابقى على جزع النخلة من اصول الجريد بعد قطعه
التمساح أبكروق ، واذا قيل للرجل ابكروق فقد مدحوه
الكركتى : طمى النيل يجف ويتشقق فيصير الواحا صغيرة
ومن ادوات المزارع الواسوق والاربل والكارديق
ومن ادوات المطبخ ، المسديق وهى المعراكة أى الدلق الذى تعرك به الدوكة مع الطايوق .
Quote: الفاريق جاى من فرق ,, اى فرق بين شيئين وهو نبات الدخن الذى يزرع على الحدود بين الجروف ليصبح علامة فارقة بين جرف وجرف.
الفاضلابي لكن بالغت فى دي
ياخي فى أستاذ لغة عربية أو تربية اسلامية درسنا فى مدرسة عطبرة الحكومية القديمة ومن البديهي ان يلفت انتباهنا لغته العربية الرصينة (وحقيقة ما عارف هل كان بالفعل رصيناً أم اننا لم نكن نجيد العربية كما نحن اليوم)
المهم أصل كلمة الفاريق هي بالنوبية فريق بدون الألف بعد الفاء أما الألف والياء دي من عنديكم اكيد لزوم التعريب وأعتقد أن المعنى المقتبس أعلاهـ فى مداخلتكم مجرد مصادفة فى التسمية وجدت مقابلها للتعليل لهذهـ الكلمة الغريبة لديكم
لكن أكثر شئ خلاني فاتح خشمي واقعد استخدامكم لكلمة: الهبود : الرماد , اها ودي معناها انكم عندكم برضو تلى شكيم toli shakeem دي ما عندها مقابلها بالعربي اللهم إلا نقول زي الصعوط يستخدمنها عجائز النساء وفى رواية أخرى فإن اجود انواع الهبود هو هبود الأرجون
Quote: وحقيقة ما عارف هل كان بالفعل رصيناً أم اننا لم نكن نجيد العربية كما نحن اليوم
سلام ياشلبى الفاضلاب الذين درسوا اللغة العربية فى عطبرة الحكومية انذاك هم: الأستاذ عمر يوسف الأستاذ الطاهر محمد على الأستاذ عبدالقادر محمد على الأستاذ عباس محمدعثمان ودرس الأستاذ عبدالغفار التربية الرياضية وفى الحقيقة كلهم ملكوا ناصية بت عدنان.
Quote: المهم أصل كلمة الفاريق هي بالنوبية فريق بدون الألف بعد الفاء أما الألف والياء دي من عنديكم اكيد لزوم التعريب
الحقيقة يا شلبى لا استطيع الجزم بعدم صحة تفسيرك لمعنى كلمة فاريق واصلها النوبى وارجو ان تحدثنا قليلا عن معناها فى اللغة النوبية وهذا هو الشئ الجميل فى هذا المنتدى. تبادل الثقافات والأفكار .ومعلوم ان تباين الفكر يثرى الفكر فلك الشكر على الإضافة.
Quote: لكن أكثر شئ خلاني فاتح خشمي واقعد استخدامكم لكلمة: الهبود : الرماد , اها ودي معناها انكم عندكم برضو تلى شكيم toli shakeem دي ما عندها مقابلها بالعربي اللهم إلا نقول زي الصعوط يستخدمنها عجائز النساء وفى رواية أخرى فإن اجود انواع الهبود هو هبود الأرجون
ود شلبي لي قدام باقيلي بتطلعنا من عندكم عدييييييييل
Quote: الأديب حمور الزول ده ماهو شايقى ده من اندينا بدليل انه عرف نفسه على انه من ام هبج وذكر الدلوكة والبل(الإبل) وان شاءت الأخت سنقوم بالترجمة على الشريط على ان يحفظ لنا ود جبرين الحقوق الأدبية. ود جبرين ترجم: جاتنى صدمة (بضم الصاد) وقليت لى قرض فوق قلشوب. جرحتنى الساسوية فوق الكدمبس.
الفاضلابي كيفنك النبي تجي تترجملنا كلام الزول أليلكم دة
قاموسك دة حيتشربك مع كلمات نوبية كتيرة ( خصوصا كلمات شايقية البركل و نوري )
مثال : كوركتي و كيم ديل كلمات نوبية عميقة جدا و مستعملة للآن في صلب القاموس النوبي واصل دمتم
حبينا ابو جهينة كيفنك ابوي ياخي اللهجات في المنطقة من ابو حمد لحدي حتة المحس افتكر انها تداخلت بشكل كبير عشان كدة بتلقى كلمات متشابهة كتير المهم نحاول نوثق للهجات دي قبل ما تندثر تسلم يا سيدي
Quote: جيت اسلم والوم نفسي والله الوم الشبكة ماعارف قدر ما حاولت الخرابة ده اصلو ابي يقول ترن علي العموم انت عارف المعزة علي شبكتي طشت ونفيستي علي قولك ما جرتني علي الخرابة الاسمو النيت ده علي تحياتي لي سيد الحولي واخياتو
يا حبيب الله يعلم سئلين منك ومن بنياتك ياخي وين الحي بيك والحجي مبروكي عليك وربنا يتقبلها ان شاء الله كدي اجدعلي موبايلك في الماسنجر
الكون شبر: قفة يستعملها المزارعين في شيل التراب العُمْرِة: الطبق البيختوا فوقه الكسرة النُطع: البرش المقدود في نصه وبيختوه فوق حفرة الدخان (دي غايتو حا يعجب ود الموج وود شيقوق) الدحلوب: نصف زير تماما (يعني زي الزير القاموا قطعوهو من نصه "الكشق أو الكشيق": هو باقي البلح "المكرن / المتبقي " بين جريد التمرة
تعلم جيّدا مدى اهتمامي بما تكتب وكذلك افتناني بكل ما ينتسب الى شايق.
أخبرني بعضهم أن "القفّة الصغيرة التي تكفي لحمل كوم تمر مقدار شبر واحد " هي "كوم شبر" و ليست كون شبر. ترى هل هي "كوم" أم "كون" كما تغنى بهاالراحل المقيم الاستاذ مصطفى سيد أحمد ؟
محمد الطيب شايقي تايوان (القضارف) إلاّ أن أصولي تعود الى "أوسلي" و "الكنيسة. أغدو شاكرا إن تكرمت علينا باضافة المزيد من أشعار بني شايق وطنابيرهم.
تعلم جيّدا مدى اهتمامي بما تكتب وكذلك افتناني بكل ما ينتسب الى شايق.
أخبرني بعضهم أن "القفّة الصغيرة التي تكفي لحمل كوم تمر مقدار شبر واحد " هي "كوم شبر" و ليست كون شبر. ترى هل هي "كوم" أم "كون" كما تغنى بهاالراحل المقيم الاستاذ مصطفى سيد أحمد ؟
محمد الطيب شايقي تايوان (القضارف) إلاّ أن أصولي تعود الى "أوسلي" و "الكنيسة. أغدو شاكرا إن تكرمت علينا باضافة المزيد من أشعار بني شايق وطنابيرهم.
حبيبنا ود الطيب كيفنك ابوي عاد يا الحبيب صعبتها علي شديد باقي انا شايقي أليل خرطوم ساكت عاد علي يجي واحد من الجهابزة حقننا ويصلحها لينا فشان ما يطلع دكشنري هبوب انا غايتو سامعها كون شبر كدي خلنا ننتظر الجهابزة
Post: #69 Title: Re: دكشنري شوايقة Author: nazar hussien Date: 02-07-2010, 10:14 AM Parent: #44
يا طارق...لاحظت ان معظم كلماتكم دي عندنا في ديار الجعلين مع فرق بسيط أحيانا في تغيير مواقع الحروف...
الكرارة: انتو هنا اشرتو الي صوتها من كر كر كر...صوت حركة ما بين الصاج والوسيلة البنكروا بيها... نحن بنسميها مباشرة: السعفة لأنها غالبا مصنوعة من سعف الدوم وبعض الناس بسموها الكرارة زيكم...
الكركتي: بنقول ليه الكركي بدون تاء... ففي الغالب تم اضافة التاء عند الشايقية لزوم الحنية الزائدة.. الكركعوب: نفس الشي لكن نطلقها لنواة الدوم بعد ما يكدوها ويجدعوها..
يتكن: ياها زاتا يمتق: نحن عندنا يلبن بضم الباء...
الخوصة: يا ها زاتا...جاتنا من زمن حليل موسي اللي الرجال خوصة بس نحن بننطقها بالسين : خوسة
Quote: يا جنى هيي في (الكونيي) في جر جاو انتقو ارمو
جر ياها عندنا بمعني زير...جنا برضو ياها يا ولد... الكوني دي (فرنسية) ...جاو دا عندكم بس...انتقو...عندنا بمعني اتناولو يقول ليك عليك الله انتق لي معاك الفرع داك...وهي تقال للشي البعيد... من متناول اليد...(مش بمعني جيب...)
Quote: يا طارق...لاحظت ان معظم كلماتكم دي عندنا في ديار الجعلين مع فرق بسيط أحيانا في تغيير مواقع الحروف...
نزار كيفنك زي ما قلت في مداخلة سابقة عندي شبه يقين ان كل القبائل على النيل من الخرطوم وانت ماشي عندها كلمات متشابهة واعتقد ان أصل الكلمات نوبية وحورت حسب كل قبيلة ياخي الشي اليبلمنا اكتر من البيفرقنا
عاد لكن لقيت نفسي شايقية اسم وليس فعل .. ده كلام شنو ده ؟ عاد اصلى ما مارقه من هنا .. صحي شايقية خرتوووووم ساي ...
زمان ياطارق عندنا جيرانا شوايقه 100%.. عندهم ولد نجااااض يوم اختي لمت فيهو فهمتو حاجه .. اها امه جات من هناك وتقول : محمد يايمه قدر شنو؟ ؟ محمد حبيبت الكرم كرم وسط الجرم .. ممكن تشرح لينا ما تحته خط .. مع اني عارفه الجرم هو التسالي الصغيروني ..
عاد لكن لقيت نفسي شايقية اسم وليس فعل .. ده كلام شنو ده ؟ عاد اصلى ما مارقه من هنا .. صحي شايقية خرتوووووم ساي ...
زمان ياطارق عندنا جيرانا شوايقه 100%.. عندهم ولد نجااااض يوم اختي لمت فيهو فهمتو حاجه .. اها امه جات من هناك وتقول : محمد يايمه قدر شنو؟ ؟ محمد حبيبت الكرم كرم وسط الجرم .. ممكن تشرح لينا ما تحته خط .. مع اني عارفه الجرم هو التسالي الصغيروني ..
لكن يا بت الصادق لقيتك شهادة عربية كدي براك كدي تعالي فرزي كل كلمة براها والله براك تصلي للحل والشرح
الكبنقرى: الكبنقرى ضارب او فلان لقى الكبنقرى ضارب او ضربنا الكبنقرى وجرينا النومة .ودة معناهو الهواء العليل المتوسط بين الحار والبارد ويميل الى البرودة قليلا مع استمراريته .
النسام: النسام أو النسمه هى موجة هواء ايضاً بين الحار والبارد وتميل الى البرودة قليلا ولكنها لفترة محدوده او بسيطة ومن بعدها تنقطع وتعاود بعد فترة مرة ثانية .
تليشة: شكرا للحبيب ضمرة بغداد ود عمي من شبا فهو المرجع الاساسي بالنسبة لي وكذلك الحبيب عبد الرحمن يوسف ود البركل الزين
Post: #79 Title: Re: دكشنري شوايقة Author: صلاح أبودية Date: 02-09-2010, 09:52 AM Parent: #78
ود خالتى ما تفك الشغلانى مره واحدى دّكنلنا شئ للأيام باقى البورد ده متقولب ! ــــ أنا محيرنى الرطّانة ( الدناقلة والمحس والحلفاويين) ... الواحد تسألو : بترطن ؟ يقولك لا لكن بفهم الرطانة !!
طارق :مساك وصبحك الله بالخير ياود العم. لدى طرفه حول هذه اللغه. عتد اول يوم جامعي قبل عدة سنسين قابلت ود عما لي جاى من الشماليه للتو ....سالني بتدرسي هني؟ ردت بالايجاب...قال لي مالها عاملي زى اللبقي المتدى . بالله اشرح هذا المعني او ساوافيك بالمقصود. ودمتم يا صاحب الفضل الكبير .
الفلق :بكسر الفاء وهو ساق النخلة بعد اقتلاعه ويوضع في نص العرش حق الغرفة ( المفرده المتداولة المرق) الكود : بضم الواو وهو نهاية قعر الجريدة ورق النخيل التنقير: بكسر التاء وهو الطريق الذى يتخلل الزراعه ويطلق عليه ايضا كراع تربال الكشونبه :وهو اخر حوض تصل اليه الماء الكونشبر : وليس كما قال أحد المتداخلين كوم شبر هي قفه صغيره يستخدمها التربال لحمل التراب لردم الكسور اثناء القراعه القراعه: بكسر القاف هى عملية ري الزرع التربال هو المزارع الرهبانه:هي ثلاثه اعواد تربط من الاعلي ويعلق عليها السعن لخش الروب خش الروب: هو تحريك اللبن الرايب الي الامام والخلف وهو داخل السعن والسعن هو القربة حتي تنفصل الزبده عن اللبن
النوريق ( عملية تتم بعد الحصاد ) وهي عباره عن مجموعه من الدواب ( الحمير ) تربط مع بعضها البعض للقيام بعملية دق المحصول من القندول يعني بالعربي كده يختو ليها القناديل وتمشي فيها عشان تمرق العيش من القندول الكوشّيق : بتشديد الشين وهو باقي التمر بعد ما يتحشا
الارتيق الظل ياود جبريل باقى لى الباب فيهو كلبة ولا تقولى التقنت واللبقة والجرف والحاحاية والهدام والدفيق واللشميق ماك خابرن
Post: #85 Title: Re: دكشنري شوايقة Author: عمر ادريس محمد Date: 02-09-2010, 05:44 PM Parent: #84
عوافى يا طارق تعرف مع مساسقتى هنى ومتعتى بالدكشنرى اتمنيت دخول اخونا شرووم .... الزول (حجى) متلك فى كلام القوم ..لكن على العموم وبلا إذنو - ومتوكل عليك يالله - بضيف مساهمتو الجليلة فى موقع الحجير حول (ديشكنرينا) وحقو تجتهدوا ومعاكم الاخوات واالاخوان لاصدار كتاب توثيقى للهجة الشايقية الحية وملانة حنية وخالده زى ناسها . وسلام مطبوق
نان هو ان بقى ما حنكوش يكتب مع ناس عكس الريح وحاتك انا مشيت بهناك علي دكتور معز لقيت الحنكشي فايتي الحد لقيت نفسي زي لامن تغمسلك كعك في ملوحة (تركين) طبعا انا الملوحة
Quote: طارق :مساك وصبحك الله بالخير ياود العم. لدى طرفه حول هذه اللغه. عتد اول يوم جامعي قبل عدة سنسين قابلت ود عما لي جاى من الشماليه للتو ....سالني بتدرسي هني؟ ردت بالايجاب...قال لي مالها عاملي زى اللبقي المتدى . بالله اشرح هذا المعني او ساوافيك بالمقصود. ودمتم يا صاحب الفضل الكبير .
محاسن بت الاراك قريبتي كيفنك ياخي ما تجي تتوهطي في البوست دة وتحكيلنا كلام أهلنا الزينين دة
الترمة: القليل من الأكل تقول (داير لي ترمة ) ويصغروها أحيانا لتصبح تريمة وتنطق على وزن العمرة السنسني : قطعة واحدة من الكسرة وتنطق بفتح السين الأولى والثانية وسكون النون الأولى وكسر الثانية. طرقة : قطعة واحدة من الكسرة أو الفطير فنقول طرقة كسرة وطرقة فطير تنطق بالفتح. الحرف: حرف القراصة يعني القطعة الواحدة من القراصة (4 بوصة) تنطق بفتح الحاء وكسر الراء وسكون الفاء. التكل : وتعني المطبخ ،، وتنطق بضم التاء والكاف القاطوع : المطبخ أو التكل وتنطق بفتح القاف وتخفيفها وضم الطاء. اللدايات : الأدايات ثلاثة حجارة بحجم حبة الشمام تقريبا توضع فوقها الحلة أو الصاج وتوقد تحتها النار. المعراكة : إناء صغير توضع فيه أدوات العواسة من قطعة القماش وعلبة الصلصة والقرقريبة وغيرها وتنطق بضم الميم وفتح الراء والكاف على وزن المفراكة. البزيديك / البزيديق: قطعة من القماش لمسح الصاج بعد دهنه بالزيت وبين طرقات الكسرة. العمرة : طبق كبير و عميق توضع فيه الكسرة أو القراصة بعد العواسة وتنطق بضم العين وفتح الراء. المرحاكة : حجر كبير مسطح وشبه مجوف على شكل نصف قرعة مقطوعة بالطول يسحن عليه القمح والذرة وتنطق بضم الميم وفتح الحاء والكاف على وزن المفراكة. الخوسة : السكين وتنطق بضم الخاء وفتح السين. الهبود: الرماد
Post: #94 Title: Re: دكشنري شوايقة Author: عبد اللطيف بكري أحمد Date: 02-10-2010, 09:32 AM Parent: #88
ود الخالة سلام،،
فتشت في الدكشنري دي عن كلمة (إعتذار) مالقيتها!!
وفتشت عن قبولها ما لقيتها،،
الشوايقة حنان ،،
انت جايب القسوة دي من وين؟؟
عامل بوستك دا عللي الإنقايي!!! (ما نحنا برضو هووا) فاكرننا غرابة صرررررر؟؟
Post: #95 Title: Re: دكشنري شوايقة Author: Mohamed E. Seliaman Date: 02-10-2010, 10:02 AM Parent: #94
الأخ طارق تحياتي
أتفق مع الإخوة النوبيين معظم المفردات السودانية في الشمال والوسط المتعلقة بالزراعة والري مفردات نوبية محضة ومعظم المفردات المتعلقة بالرعي والبادية والأنعام في الشمال والشرق والوسط والغرب هي في الأصل مفردات عربية
Quote: أتفق مع الإخوة النوبيين معظم المفردات السودانية في الشمال والوسط المتعلقة بالزراعة والري مفردات نوبية محضة ومعظم المفردات المتعلقة بالرعي والبادية والأنعام في الشمال والشرق والوسط والغرب هي في الأصل مفردات عربية
هناك تشابه كبير إلى درجة التماهي في بعض الأحيان لكل قبائل شمال السودان نوبية كانت ام عربية
Quote: لا خصوصية للحجيراب بهذه المفردات بل ليس للشايقية تفرد باستخدامها كلها بل تشاركهم قبائل أخرى
لا خلاف يا حبيب بيننا العرف فقط من نسب الكلمات للشايقية والحجير جزء من الشايقية حتى أنني حتى هذه اللحظة لم أجد إختلاف يذكر بين الشايقية والبديرية في جميع نواحي الحياة ومن ضمنها اللهجة
ربما تعني الكرارة القرقريبة أنا لست متخصصا في اللهجات فقط أحاول أن أنقل ما عايشته شفاهة من أهلي في منطقة البركل ويا ريت البوست يكون نواة للتوثيق للهجات سودانية جزء كبير منها في طريقه للانقراض
عامل بوستك دا عللي الإنقايي!!! (ما نحنا برضو هووا) فاكرننا غرابة صرررررر؟؟
ود خالتي كيفنك انت عاد غرفت من الاتنين شي غرابي وشي شايقي
الاعتذار كان عند أهلك: الرسول تعفالي
Post: #98 Title: Re: دكشنري شوايقة Author: Mohamed E. Seliaman Date: 02-10-2010, 10:41 AM Parent: #97
شكرا يا أخ طارق
Quote: ربما تعني الكرارة القرقريبة
يا زول الكرارة دي أكل عديل روب وبصل ودقيق مالك دار تجوعنا برانا جعانين الحاجة القاصدها إنت اسمها القرقريبة كر العجين دا حاجة مختلفة خالص عن عملية العواسة بالمناسبة العواسة في الأصل كلمة عربية زي قراعة الموية
Quote: زول الكرارة دي أكل عديل روب وبصل ودقيق مالك دار تجوعنا برانا جعانين
يا محمد والله شوية الشايقي الواحد عارفه شكلك كدة حا تطيره ليه في الراس
Post: #100 Title: Re: دكشنري شوايقة Author: عبد اللطيف بكري أحمد Date: 02-10-2010, 10:56 AM Parent: #99
Quote: الاعتذار كان عند أهلك: الرسول تعفالي
وعاد أوما عفيتلي وامغيستي ،
وياني الراحل تلوت الليل لي فاس!!
Post: #102 Title: Re: دكشنري شوايقة Author: حسن محمود Date: 02-10-2010, 12:00 PM Parent: #100
اخ/ طارق جبريل خالص التحايا.. بوست موفق..يسهم في تبادل المعرفة بلهجات وثقافات بعضنا البعض.. . هناك كلمات كثيرة تحمل عند المسيرية نفس المعنى مثل السلبه واللدايات (او اللدايا ) وهم ويشتركون معكم في اماله او كسر الحرف الاخير من الكلمات( مثل غنمايي ، حماري) مع اختلاف طفيف .. اورد احد المتداخلين كلمة الجُغُب وهي تعني عند اهلنا المسيرية المكان الضيق او المستخبي وايضا يطلق عليه الكركور .. واعتقد انه قصد نفس المعنى.. هناك كلمات اخرى لم اعرفها ولم يخطر معناها على بالي..ربما لارتباطها بالبيئة او رجوع اصلها للنوبيه..
اعجبني شرح كلمة الكركعوب ( حصي الدوم) ويادوب عرفت اصل ومعنى عبارة (عربية كركعوبة) .. واديك العافية.
Quote: اخ/ طارق جبريل خالص التحايا.. بوست موفق..يسهم في تبادل المعرفة بلهجات وثقافات بعضنا البعض.. . هناك كلمات كثيرة تحمل عند المسيرية نفس المعنى مثل السلبه واللدايات (او اللدايا ) وهم ويشتركون معكم في اماله او كسر الحرف الاخير من الكلمات( مثل غنمايي ، حماري) مع اختلاف طفيف .. اورد احد المتداخلين كلمة الجُغُب وهي تعني عند اهلنا المسيرية المكان الضيق او المستخبي وايضا يطلق عليه الكركور .. واعتقد انه قصد نفس المعنى.. هناك كلمات اخرى لم اعرفها ولم يخطر معناها على بالي..ربما لارتباطها بالبيئة او رجوع اصلها للنوبيه..
اعجبني شرح كلمة الكركعوب ( حصي الدوم) ويادوب عرفت اصل ومعنى عبارة (عربية كركعوبة) .. واديك العافية.
حسن كيفنك تعرف من خلال الجامعة واللقاءات مع مجموعة من السودانيين من مناطق مختلفة اكتشفت انه في كتير من الكلمات تكاد تكون متطابقة فقط الاختلاف في طريقة النطق من منطة لي اخرى..نحن غايتو ناس جرجير كلام يا حبيب يدك معانا نوثق لي لهجاتنا دي قبل ما تضيع مع الرندوك دة
Post: #101 Title: Re: دكشنري شوايقة Author: ليلي عثمان عبيد Date: 02-10-2010, 11:59 AM Parent: #1
ود جبرين نعلك طيب اخوي في البلد ديك اصلو قالو فيها هيد يصن الاضنين الله يستر عليكم منو. غايتو نحن كل ما يكتر الصقت معاانا كويس قالو التمر جبد خلاص بقي علي القفوزه. وشكرا علي فكرة البوست دا اهو الواحد لقالو نفاج بي جاي يجي يتفشي فيهو . كل ما انضم لي كلمتين فوق بعض لازم اسمع تعليق زماان زمن الجامعه مشينا رحلة البحر واحد من وليدات الخرتوم المابنقدرو ديل توش طمس في المويي وبعد شوي بقي يغتس ويطلع زول لحقو مافي علا معانا شايقي من الزومة قال كدي جبد الولد مرقو. بعد اخدت هجمتي سمح قعدت اتوهطت قتلهم هوي يا عوين وااله انا تاني لا باب الجامعه ما ابرالي واحد علا يكون كادن الجدول وقلب اللبقة وقرن الفجرواي الناس صاقعلي قولي بسم الله بترطني مالك . ولي عوده تقبل مودتي
الواحد دخل لقاك عملت لينا الكرارة قرقريبة يمكن إنت قاصد الكرارة بفتح الكاف بس برضو كر العجين غير ! طيب حسب حروف المعجم حقك دا نبدأ بالتاء دايرين معاني الكلمات التالية : تقاة تو تندة تربيقة (طربيقة ) تميمة تقنت _________ التعديل بسبب الجوع الله يسامح الكفيل بتاعي
Post: #104 Title: Re: دكشنري شوايقة Author: الشفيع وراق عبد الرحمن Date: 02-11-2010, 04:05 PM Parent: #103
Quote: القرقريبة
اتفق معاك يا ودسليمان
وحالياً في الغربة وبعض المدن بقو يستخدموا كروت الاسكراتش
Post: #105 Title: Re: دكشنري شوايقة Author: الشفيع وراق عبد الرحمن Date: 02-11-2010, 04:19 PM Parent: #103
Quote: تقاة
ما عرفتها
Quote: تو
برضو
Quote: تندة
هي قمة الشيء زي مقدمة الباص وكدهـ
Quote: تربيقة (طربيقة )
حليب ملايقنه بي ويكة ويؤكل باللقمة او الكسرة
Quote: تميمة
يا حجاب ، يا رباط الغنم اتلخبطت
Quote: تقنت
الفواصل المرتفعة بين الحيضان (الزراعة)
4من 6 أظنه باص يا ود سليمان وفي انتظار راعي الدكشنري للتصحيح
