أي بت شديدة بتحب ليها طُلبة (صبي بناي)

أي بت شديدة بتحب ليها طُلبة (صبي بناي)


12-28-2006, 12:32 PM


  » http://sudaneseonline.com/cgi-bin/sdb/2bb.cgi?seq=msg&board=134&msg=1252645705&rn=663

Post: #1
Title: أي بت شديدة بتحب ليها طُلبة (صبي بناي)
Author: طارق جبريل
Date: 12-28-2006, 12:32 PM
Parent: #0

كيتا كدي في اخو البت الغزالة الكسر صاحب ناذر داك
انا بحكيلكم قصة صحبي عوض الله يطراهو بالخير...
دحين يا الحبان ونحن في الثانوي انا وصحبي عوض دا كنا شغالين طلب
مع بناي كدي ايدو خضراْء تحلف تقول الزول دة ساقية يمين من تبدأ الاجازة ونحن مدورين
يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها
انا وعوض دا... تمانية صفايح رملة وواحد اسمنت والملطم يكون جاهز... جيب الطوب يا ولد
غربل الرملة يا ولد... الخرصانة وصلت ولا لسا... بكرة حا نعمل البيم...
المهم يا الحبان الرزق يوم قام ساقنا للعمارات عندنا فيها شغل شهر وكان الوكت آخر الاجازة
ونحن مقدمين للجامعة بعد ما امتحنا الشهادة..
عوض صحبي دا شليق شلاقة عدوكم.. قوم يوم ونحن ماشين على العمارات جاب اورنيق الجامعة معاهو
قال عايز يستاذن من المعلم عشان يكمل الاجراءات... انا الكلام حرقني خفت الارانيق دي تقوم تغتس في الاسمنت والطوب ويكون تعبنا راح شمار في مرقة...
المهم طلعنا الطابق التالت عشان نغير ونلبس لبس الشغل... عوض صاحبي مبسوط الليلة ويغني شافلو مسمار علق فيهو هدوما وبدأ يلبس في لبس الشغل.. عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب..
انا قلت ليه ياخي ما نغير لبس الشغل دا هنا في العمارات ديل ناس هاي ويمكن يتهمونا باكلة لحوم البشر... حلف ما يغيرو لكن الحكاية يبدو عندها معنى بعدين بيظهر..
المهم كلمنا صباحيتنا وقبل ما نمشي نفطر قلت ليه ياخي الارانيق دي شوفليها طوبة اهجرها بيها عشان ما تطير قال لي يا زول ما تخاف يلا نمشي نفطر... ومشينا الديم يا ابو ساندرا وضربنا الفول في سوق الديم وجينا منفوخين وكروشنا قدامنا زي الحنابيك تحلف لو ختو ليك سهم نشاب في صرتك وقالولك شيل نفسك وتاني ختو السهم يصل الصحافة من الديم من شدة ما زردناها فول...
عوض على غير عادتو يغني ساكت في الطريق... المهم لامن وصلنا لقينالكم بنيتا سمحي جنس سماح واقفة منتظرانا... جملة الايمان وجيها من شدة ما ناعم ان بقى كبولم فيهو عسل نحل ينزلق منه.. بالله البت وشها اصفر ومندي تقول منقة قلب التور... وانا وعوض صحبي وقفنا مبلمين تحلف تقول ما عمرنا اتكلمنا قبل دة.. والموقف كانت فيهو مفارقات عجيبة خلاص البت بي سماحتها دي كلها وعوض وشوا مليان اسمنت وراسه مغبر عامل زي الدرابة... المهم يا الحبان البنية قامت حلت الموقف وسألتنا منو فيكم عوض؟
انا اتشجعت وقلت ليها دا... قامت قالت ليه انت حا تدخل السنة دي كلية الصيدلة؟؟؟ قاليها ايوة..
قامت قالت ليه: ياخي انت راجل مكافح خلاص... الكلمة دي وقعتلنا في جرح... لاننا كنا بنسمعهامن اخوان عوض الكبار لمن يجوا من الجامعة ونحن منجعصين وصتهم ويقعدوا يتكلموا عن كفاح الطلبة والديفييشن وكلاما غلاد غلاد كدي نحن مانا فاهمين منه اليكتحنا....
ونواصل....
Post: #2
Title: Re: أي بت شديدة بتحب ليها طُلبة (صبي بناي)
Author: Luay Elhashimi
Date: 12-28-2006, 06:31 PM
Parent: #1

ود جبريل
النحكيلك دي مسراع. كنت شغال طلبه مع بعض اقاربي في بيت وزير في ربك ..
يا زول انحنا ندخل علي الماسورة ونجر الخرطوش من الحوش قدام جكس الوزير ولا في زول معبرنا..زي المافي..يا زول مرة قريبي ناداني بي اسمي لؤي...وحاتك الجكس دا قعد يتلفت ويتضاير..ابو الزفت..
قبلها بسنين...اخوك كان بسرح بالبهايم..غنم البيت وكده وعددهن خمسه..عندما يسالني زملاء الرعي عن اسمي اقول لهم امحمد واختصر سخريتهم علي لؤي...
واصل يا حريف...
Post: #3
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 12-28-2006, 07:49 PM
Parent: #1

لؤي كيفنك
بجيك صادي بس خلني الاكملك الحكاية...

اها يا الحبان البت بدت تسأل فينا جنس اسئلتا تقول شغالة في جهاز الامن... شي عن الوالدين وشي عن الظروف وشي عن الطموح... وعوض مبلم ومقهي تقول ماكلو أمانة... انا القصة حرقتني... ياخي نحن جايين نشتغل ولا نعمل معاينة... قمت استأذنت منها عشان نشتغل ومشينا لي اسمنتينا وطوبنا... جملة الايمان عوض من طلعنا كضم الكضمة الياها.... ونسى كلو كلو موضوع الارانيق.. انا القصة ضربتلي في راسي انت الزولة دي من وين عرفت اننا مقدمين للجامعة... قفرنا الارانيق ما لقيناهن... اتاريها طارت مع بنطلون عوض ووقعت في حوش النسوان... قلت لي عوض زي ما جبتهن تمشي تجيبن.. المهم زولكم اتشجع ومشى جابن وانا اتاوق عليه من فوق... زولكم العرق الطلع منه في جيب الارانيق دي من ما بدينا نشتغل طلب ما طلع منه عرق قدر دة... وجاني صوتو مبحوح... قال لي الزولة دي قالت انها معجبة بي كفاحنا دة... قلت ليه يا زول انسى الموضوع دا وخلينا في طوبنا دا...
تاني يوم يا الحبيبين نلقالكم البنية منتظرانا بي شاي الصباح ومعاهو كيك.... على باليمين قايلين نفسنا دخلنا الجنة عديل... واصلو الكان لي عوض قرب يقول صدق وعده دي واحدة من الحور العين... البنية اتاريها دخلها عوض في نافوخها... ومن السواق بتاعم عرفنا انه ابوها تاجر ليه ضل وعنده 3 بنات بس وعنده مزارع وجاه... سبحان الله الهيلمانة دي كلها و3 بنات بس... كان يجي يشوف ابو عوض اي مرة قابلته في الطريق عجبته عرسها وبقى يملص في الشفع زي قزقيز التسالي... بالله بيوت الحلة كلهن مافي واحد فيهن ما ختاهو حرامي الا بيت ناس عوص... لانه من كترة العناقريب الفيهو حقت البطان الحرامي ما عندو طريقة ينزل رجلينو... انا عوض دا ان بقيت دايرو في شي بعد 11 بالليل عارف عنقريبو وين بس ارفع راسي فوق الحيطة وعيني لي عوض مدلدل راسي في شناط الليل عنقريب مرخي كدة تقول حفرة دخان واديهو حجر زولكم طوالي يطلع يقابلني...
المهم يا الحبان ضربنا الكيك والشاي وطلعنا لي شغلنا... ومن طلعنا وعوض مقهي... قلت ليهو عجبتك.. قال لي دي منو المابتعجبو... قلت ليهو يا ولدنا ضمنت انك حا تسكن في العمارات بس عليك الله ما تنساني... ونسيبك القادم دة عندو مزارع وانا داخل بيطرة يعني ما تتغاتت... زولكم ضحك لامن طلعلو ضرس العقل...
المهم يا الحبيبين... بقينا نجي نلقالكم شي عصير شي كيك شي منقة جاية من المزرعة لامن سوينالنا جضيمات... المشكلة بقت في انه نحن لامن نطلع ما بنقدر ننزل والقصة دي كانت محرقة عوض في فشافيشو... قمت قلت ليه عندك حل واحد بس انت بدل تشتغل معانا فوق تقوم ترفع الرملة وبي كدة تشوف الجكس وتاخد ليك حنك حنكين... زولكم ما صدق كلم المعلم ومن تاني يوم بقى يطلع في الرملة... بس زولي انا عارفو قصة الرملة دي ما بيقدر عليها ومروتو ماها قدر دة.... لانه لامن تجي الساعة 12 وزولي يتفنس وشكله وهو مفنوس وشايل الصفيحة زي علامة الاستفهام... وشعر راسو زي بوخ السليقة...
ونواصل....
Post: #4
Title: Re: أي بت شديدة بتحب ليها طُلبة (صبي بناي)
Author: محمد عبدالله هارون
Date: 12-28-2006, 09:10 PM
Parent: #1

اخي / طارق

الهدره مزيانه بالزززززاف

واصل ، وعيدك سعيد
Post: #5
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 12-30-2006, 03:32 PM
Parent: #1

Quote: اخي / طارق

الهدره مزيانه بالزززززاف

واصل ، وعيدك سعيد



ود هارون كيفنك
وكل سنة وانت طيب

بس اكمل المرارة والشية وبجيك صادي
Post: #6
Title: Re: أي بت شديدة بتحب ليها طُلبة (صبي بناي)
Author: غزلان إدريسي
Date: 12-30-2006, 05:51 PM
Parent: #5

Quote: ... زولكم العرق الطلع منه في جيب الارانيق دي من ما بدينا نشتغل طلب ما طلع منه عرق قدر دة... وجاني صوتو مبحوح...


الا الخجل ده يا طارق لسه موجود في ايامنا الغبرا دي ؟


سلامات ..
Post: #7
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-02-2007, 02:51 PM
Parent: #1

غزلان كي دايرة
وكي خرجت دوارتكم

والله عوض صحبي دة الخجل الفيهو عند بنت مافي
Post: #8
Title: Re: أي بت شديدة بتحب ليها طُلبة (صبي بناي)
Author: Shams eldin Alsanosi
Date: 01-02-2007, 04:10 PM
Parent: #1

ود جبريل كل سنة وانت طيب والاسرة الكريمة

كده برضو يا طارق؟
مش عيب عليك تخلينا مع صحبك عوض الطلبة ملخومين مع شاي الصباح بالبسكويت وتزوغ تمشي الامتداد؟
المهم لو جيت بعد سنة تلقانا قاعدين منتظرنك

شمس الدين السنوسي
Post: #9
Title: Re: أي بت شديدة بتحب ليها طُلبة (صبي بناي)
Author: Muna Khugali
Date: 01-02-2007, 05:16 PM
Parent: #8

طارق وينك اخـوي?
منتظرين الكلام الظريف ده..

كل سنة وإنت والوليدات طـيبين..
Post: #10
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 01-02-2007, 05:30 PM
Parent: #9

بسم الله الرحمن الرحيم



عزيزي طارق..

سلام..

كل عام وانتم بخير..

قاعديين منتظريين نرجف

اكتر من عوض زاتو دايريين نعرف

الحصل شنو مع الحسناء المرتاحه دي ياذول..


حاتم هاشم.
Post: #11
Title: Re: أي بت شديدة بتحب ليها طُلبة (صبي بناي)
Author: serenader
Date: 01-02-2007, 11:30 PM
Parent: #1

الله يجازي محنك يا طارق جبريل...
قطعت مصاريني بالضحك.. ألكع لنا بي باقي القصة قبال نفطس..
أنا متابع ولساني بره..
Post: #12
Title: Re: أي بت شديدة بتحب ليها طُلبة (صبي بناي)
Author: تبارك شيخ الدين جبريل
Date: 01-03-2007, 03:30 AM
Parent: #11

الامريكان عندهم مثل، يقولولك:
Good Girls Fall For Bad Boys

يعنى ربّات الخدور بريدن الصعاليق!
Post: #13
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-03-2007, 06:42 PM
Parent: #1

Quote: ود جبريل كل سنة وانت طيب والاسرة الكريمة

كده برضو يا طارق؟
مش عيب عليك تخلينا مع صحبك عوض الطلبة ملخومين مع شاي الصباح بالبسكويت وتزوغ تمشي الامتداد؟
المهم لو جيت بعد سنة تلقانا قاعدين منتظرنك

شمس الدين السنوسي


ود شمس الدين
ياخي البركة في عوض الجابك لينا
يا زول والله مشتهنك لامن خنقانين
ارقد عافية
Post: #14
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-03-2007, 06:48 PM
Parent: #1

Quote: طارق وينك اخـوي?
منتظرين الكلام الظريف ده..

كل سنة وإنت والوليدات طـيبين..


العزيزة منى بت الخليفة شخصيا
ياخي ان كان عارف قصة عوض دا بتجيبك ينا
كان حكيتا من زمان
خليكي قريبة انا بكملك القصة
Post: #15
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-03-2007, 06:51 PM
Parent: #1

Quote: عزيزي طارق..

سلام..

كل عام وانتم بخير..

قاعديين منتظريين نرجف

اكتر من عوض زاتو دايريين نعرف

الحصل شنو مع الحسناء المرتاحه دي ياذول..


حاتم هاشم.


حاتم وليد هاشم كيفنك
يا زول عيدك مبارك وان شاء الله الشية تمام
خلك قريب بكملك
Post: #16
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-03-2007, 06:55 PM
Parent: #1

Quote: الله يجازي محنك يا طارق جبريل...
قطعت مصاريني بالضحك.. ألكع لنا بي باقي القصة قبال نفطس..
أنا متابع ولساني بره..


سرينيدر كيفنك
يا اخوي اسمك دا مالو صعب كدي
والله اصعب من جهجه عوض صحبي دا
لكن بكملك القصة قبل ما تفطس
Post: #17
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-03-2007, 07:01 PM
Parent: #1

Quote: الامريكان عندهم مثل، يقولولك:
Good Girls Fall For Bad Boys

يعنى ربّات الخدور بريدن الصعاليق!


تبارك كيفنك
ياخي نحن مانا صعاليق بس الظروف جبرتنا
نشتغل طلب وهي مهنة زي كل المهن
وان بقى اي طلبة صعلوق معناها يا اخوي
السودان دة كله صعاليق لانه السواد الاعظم
من الناس اشتغلوا طلب

وفوق دا كله يا زول شرفتنا بي طلتك
Post: #18
Title: Re: أي بت شديدة بتحب ليها طُلبة (صبي بناي)
Author: osly2
Date: 01-03-2007, 07:04 PM
Parent: #17

قريبى
كل سنه وانت طيب


اخوك طلبه سابق
زمن غزالة ناذر
Post: #19
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-03-2007, 07:11 PM
Parent: #1

اوسلي2
قريبي كيفنك
يعني عوض دا خلاكم تبحتو القديم كله وتطلعوهو
اماني زولتك دي ما كتلت في عوض جنس كتلة
Post: #20
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-03-2007, 07:41 PM
Parent: #1

اها يا الحبان... جيتكم صادي..
عوض بقى يطلع في الرملة ويتشجع لامن البنية تديهو بسمة من بعيد... جملة الايمان الزول ان بقينا قلنالوا ترفع رملة الحرطوم دي كلها هنا كان رفعها... بس مرات لامن البت تبقى ماها في وتشوفو طالع بي صفيحتو يمين لسانو ماديهو زي كلب الحر... وعيونه من التعب زي عيون ام سيسي... ولامن البنية تكلمه... يا زول جضومه تتنفخ زي العندو برنبوفي (ابوعديلات عشان ناس كردفان)... وتحلف تقول الزول دا ان بقى مات وهو في الحالة دي حا يدفنوهو وهو ضاحك لا قعر اضانو..
الايام الاولى كلها وانا اتاوق فيهو من فوق زي الزول الصابة فوقو مطرة البت تتونس معاهو وهو مبلم زي ولد الطهور ... بعد اسبوع كدة حتا لسانو اتفك... وشوف عيني بقى يقول ليها صباح الخير... عوض يقول صباح الخير.. ايوة والله... عوض الناشف داك زي عود الطلح بقى يجي ممسح وشعره مسرح.. ومريح كمان بالرغم من انه الريحة عاملة زي النفتالين... لكن اهو عوض بقى يتريح بعد ما كانت ريحتو مع العرق ترمي الصقر.. والله ان بقيت مريت بي جنبو ساكت ريحتو تخليك تدخل في غيبوبة.... يا جماعة خير زولكم اشترى ليه مراية شخصية لانه لو ختاها مع اخوانه الكتار ديك الا يوزعوها زرة زرة بيناتهم... وبقى بعد نضرب الفول في الديم يشيل باقي الزيت ويتمسح بيهو... عشان يظهر ناعم وكدة...

ونواصل..
Post: #21
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-04-2007, 07:25 PM
Parent: #1

المهم يا الزينين زولكم بقى يهضرب بالبنية والبنية مكسرة فيهو... واصلو كان لي عوض ما عايز الطابق اليلم دا كلو كلو ما يتم... عوض المسكين الغنماية تاكل عشاهو بفى يغني شيتا: اساسق بالدريب الجايي بي حداكا.... وشيتا انا دستوري نازل هناك في العمارات... ودي ما بعرفو جابها من وين... دحين انا شفت زولي اتشعلقلو جنس شعليقة يفكو منها الله ساكت..
- شوف يا عوض انت راجل رفيق العمر كله القصة شكلها ما لافقة معاك
- ياخي ليه عشان انا فقير يعني
- ما كدة يا الحبيب بس انت لسة المشوار قدامك فيهو مليون كيلومتر
- ياخي بقطعوا معاها
- يا راجل البنية دي سميحة ما قلنا حاجة بس صعب تنتظرك حا يجي اي واحد مرتاح ومتمسح ويخطفها منك وانت تبقى فاتح خشمك زي العوير...
- ياخي انت مالك عايز تكسر مقاديفي
- هي وينة مقاديفك دي انت عندك بلتون اخوان وناس ابوك راجنك تقول لي مقاديف
زولكم عين لي كويس وكبسني بنية وخلاني مرمي ومشى...
ونواصل...
Post: #22
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-05-2007, 06:57 PM
Parent: #1

جاييك يا عوض بس انتهي من الفي يدي دة
Post: #23
Title: Re: أي بت شديدة بتحب ليها طُلبة (صبي بناي)
Author: تبارك شيخ الدين جبريل
Date: 01-06-2007, 05:43 AM
Parent: #22

بنية؟
ما ليهو حق والله
لاكين برضو اسمو اتصرّف
واوع تكون البت شافتو؟
بينى وبينك، لو شافتو حتعجب بيو زيادة!





المهم....
Post: #24
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-06-2007, 02:28 PM
Parent: #1

Quote: بنية؟
ما ليهو حق والله
لاكين برضو اسمو اتصرّف
واوع تكون البت شافتو؟
بينى وبينك، لو شافتو حتعجب بيو زيادة!


بنية رسمي يا تبارك...
يا زول الراجل خلاص وكر لي حلقومو
Post: #26
Title: Re: أي بت شديدة بتحب ليها طُلبة (صبي بناي)
Author: Muna Khugali
Date: 01-06-2007, 04:05 PM
Parent: #24

حـلو شـديد كلامك.. متابعة..

مني
Post: #25
Title: Re: أي بت شديدة بتحب ليها طُلبة (صبي بناي)
Author: ناذر محمد الخليفة
Date: 01-06-2007, 04:04 PM
Parent: #1

طارق جبريل ..

يمين إنت زول مشوطن وما طبيعي
انا لمن كنبت أي بت غزالة أخوها أسد أي زول مفتكرني بضرب بنقو أها إنت مالك ؟ :

شوقو جنس الربطنة دي :

Quote: مع بناي كدي ايدو خضراْء تحلف تقول الزول دة ساقية

Quote: يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها
انا وعوض دا...

Quote: عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة)

Quote: والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب..

Quote: وكروشنا قدامنا زي الحنابيك تحلف لو ختو ليك سهم نشاب في صرتك وقالولك شيل نفسك وتاني ختو السهم يصل الصحافة من الديم من شدة ما زردناها فول...


البوست دا يا طارق كلو إستهارات مكنية وتصريحية وإستعارات كدة ما عارف زاتك إستعرتها من وين وإستعملتها كيف

سرع إنتهي لينا من القصة مع إني شامي إنو القصة أخرا حا يظهر يا اخو غزالة يا حبيب غزالة وبالعدم أبو الغزالة ظاااااطو

شنكل :

نخت دا للذكرى :

أي بــت غــزالــة اخــوها أســد !!!
Post: #27
Title: Re: أي بت شديدة بتحب ليها طُلبة (صبي بناي)
Author: serenader
Date: 01-07-2007, 03:32 AM
Parent: #1

بُنية!!!
هيع.. الأسد النتر...
....
أها؟
Post: #28
Title: Re: أي بت شديدة بتحب ليها طُلبة (صبي بناي)
Author: Nasser Mousa
Date: 01-07-2007, 03:54 AM
Parent: #27

Quote: [QUOTE]... كان يجي يشوف ابو عوض اي مرة قابلته في الطريق عجبته عرسها
Quote: وبقى يملص في الشفع زي قزقيز التسالي
... بالله بيوت الحلة كلهن مافي واحد فيهن ما ختاهو حرامي الا بيت ناس عوص... لانه من كترة العناقريب الفيهو حقت البطان الحرامي ما عندو طريقة ينزل رجلينو...

الاخ / طارق كل عام وانت والاسرة بالف خير
الحتة الفوق ده باااالغت فيها عديييييل
Post: #29
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 01-07-2007, 04:13 AM
Parent: #28

بسم الله الرحمن الرحيم


عزيزي طارق..

سلامات..

شنو ياذول مالك مشحتفنا كده

كل يوميين سطريين..

الظاهر انو حكايه عوض صاحبك ده

مذكرانا بقصصنا القديمه

واعتقد انو داخل كل سوداني عوض

متابعيين..ومنتظريين..

حاتم هاشم.
Post: #30
Title: Re: أي بت شديدة بتحب ليها طُلبة (صبي بناي)
Author: omer abdelsalam
Date: 01-07-2007, 02:15 PM
Parent: #1

Quote: المهم لامن وصلنا لقينالكم بنيتا سمحي جنس سماح واقفة منتظرانا...

الحبيب / طارق جبريل
صحابك ، عوض دا ذكرني بقصة طريفة ، حدثت في مربع 40 بالصحافة شرق ، في منتصف السبعينات وكنا وقتها طلبة في الثانوي
القصة ، ان بجاورنا سكنت عائلة لديهم صبية ( سمحي جنس سماح ) على قولتك ..
وكان في المنزل المجاور تجرى اصلاحات وترميم ، وأخونا من مواطني جنوب السودان ، منهمك ب( الكوريك ) في كوم ( مونة اسمنت )
وآخر غناء وطرب
وفجأة .. فتح باب الجيران .. وأطلت ( السمحة ) لتلقي بجردل ماء امام منزلها
وبهت اخونا الجنوبي ، وأصابته رجفة من شدة جمال البنية !
ولم يتمالك نفسه .. فقام بحركة للإرادية ، بغرس ( الكوريك ) في كوم المونة
وصرخ بأعلى صوته حتى خرج جميع الجيران :
( منقة صفار .. أحبو أنا )
فضحك الجميع من هذا المنظر الدرامي
واصبحت مقولته : منقة صفار .. احبو انا ) مثلا لروعة جمال احد الفتيات في الحي لسنوات طويلة
Post: #31
Title: Re: أي بت شديدة بتحب ليها طُلبة (صبي بناي)
Author: Abdulbagi Mohammed
Date: 01-07-2007, 02:28 PM
Parent: #30

يا اخوانا الزول ده الحقوه ما يكون البنية ودتو الاخرة قبل مايتم القصة
Post: #32
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-07-2007, 06:43 PM
Parent: #1

Quote: حـلو شـديد كلامك.. متابعة..

مني


منى كلها وزيارتين كمان
والله يا عوض يا صحبي يا مكسر
انا ان كنت عارف قصتك دي بتخلي
بت الخليفة تجينا هنا ومرتين كمان
كنت نزلتها اول بوست لي

تسلمي يا بت الامتداد
وخليكي قريبة
Post: #33
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-07-2007, 06:48 PM
Parent: #1

Quote: انا لمن كنبت أي بت غزالة أخوها أسد أي زول مفتكرني بضرب بنقو أها إنت مالك ؟ :


ناذر كيفنك
ياخي مع عوض دة البنقو يقصر
يا زول الزول دة اتوكر لي قعر اضنينو
والله لو كان بنقو ولا حتى افيون ما كنت خفت عليه كدة

وبيني وبينك كدة صابك بتاع الغزالة داك انت اتلومت فيه
ياخي ان شاء الله تحاجز ساكت
Post: #34
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-07-2007, 06:50 PM
Parent: #1

Quote: بُنية!!!
هيع.. الأسد النتر...
....
أها؟


سرينيدر كيفنك

شايقك مبسوط من البنة حقة عوض
ياخي بدل تكفر لي ولا حتى تسميني
شهيد عوض

الفيك اتعرفت
Post: #35
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-07-2007, 06:52 PM
Parent: #1

ناصر موسى كيفنك
شاكرين مرورك يا سيدي
Post: #36
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-07-2007, 06:55 PM
Parent: #1

Quote: شنو ياذول مالك مشحتفنا كده

كل يوميين سطريين..

الظاهر انو حكايه عوض صاحبك ده

مذكرانا بقصصنا القديمه

واعتقد انو داخل كل سوداني عوض


حاتم هاشم كيفنك
اتاريه عوض طلع المدكننوا كله
افو يا البنات اتاريكن مشعلقات الرجال شعلقة بطالة خلاص
اصبر يا زول بتملك القصة
Post: #37
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-07-2007, 07:00 PM
Parent: #1

Quote: وفجأة .. فتح باب الجيران .. وأطلت ( السمحة ) لتلقي بجردل ماء امام منزلها
وبهت اخونا الجنوبي ، وأصابته رجفة من شدة جمال البنية !
ولم يتمالك نفسه .. فقام بحركة للإرادية ، بغرس ( الكوريك ) في كوم المونة
وصرخ بأعلى صوته حتى خرج جميع الجيران :
( منقة صفار .. أحبو أنا )


هسا عليك النبي يا ابو انس الزول دة كورك براهو
والله انت زاتك تكون كوركتة وجوعرتة كمان
يا زول صفار المنقة دة البقدر يصبر عليهو منو
قول ساي انت الضربتة البكاء
Post: #38
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-07-2007, 07:04 PM
Parent: #1

Quote: يا اخوانا الزول ده الحقوه ما يكون البنية ودتو الاخرة قبل مايتم القصة


عبد الباقي ود محمد كيفنك
لا لا يا الجدع البنية ما ودرتني
عليي اخوك ساكي المعايش
وبجيك واتملك الحكاية كلها
Post: #39
Title: Re: أي بت شديدة بتحب ليها طُلبة (صبي بناي)
Author: serenader
Date: 01-07-2007, 11:59 PM
Parent: #1

ACTUALLY أنا ما شمتان .. حاشاك.. لكن الفكرة عجبتني..
أها.. شحتفتنا الله يشحتف أعداءك
Post: #40
Title: Re: أي بت شديدة بتحب ليها طُلبة (صبي بناي)
Author: showgi idriss
Date: 01-08-2007, 00:36 AM
Parent: #39

أنا باقي لي عوض دا "إت ظااااطك..

يازوول خليك دوغري.. وككن دايرني اتم ليك القصة
أعتقد والله أعلم " أن هذا كان شكووووشوكم الأولاني"

خليك صريح يا صحب وبطل حركات ..

عنوان البوسطي دا مفروض يكون "إعترافات مشوكش"


عوض قاااااااااااااااااااااااااااااااال !!!!!!!!!!!
Post: #41
Title: Re: أي بت شديدة بتحب ليها طُلبة (صبي بناي)
Author: ناذر محمد الخليفة
Date: 01-08-2007, 04:22 PM
Parent: #1

فوووووووووووووووق
Post: #42
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-08-2007, 04:55 PM
Parent: #1


أنا ما شمتان .. حاشاك.. لكن الفكرة عجبتني..
أها.. شحتفتنا الله يشحتف أعداءك




مقبولة منك يا سيرنيدر
وخليك قريب الليلة بديك الجزء المهم في الجرسة
Post: #43
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-08-2007, 06:12 PM
Parent: #1


أنا باقي لي عوض دا "إت ظااااطك..

ابو الشوش يا حبيبنا
ياخي انت نائب رئس المشلهتين تقوم تشكك في مصداقية الرئيس
بعدين لو عنوان البوست كان "مذكرات مشوكشة"... كيف كدة
Post: #44
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-08-2007, 06:47 PM
Parent: #1

العزيز ابو النز
شكرا على العتالة وكدة

... ونواصل:
المهم يا الحبان اخدت بنيتي ومشيت كمدتها في قلبي وكملت شغلي ومشيت للبيت...
اصبحنا الصباح وكان يوم خميس وطبعا يوم الخميس مهم جدا في حياة الطُلب لانه يوم صرف القروش... والواحد دايما بيكون قافل على كيلو باسطة وكدة..
المهم عوض جاء مبلم لا ناضمني لا ناضمتو... كل واحد فينا مشى لي شغلو...
عوض علي زعلتو مني البنية الصباح كلو كلو ما ظهرت... زولكم عيونه حمرت وعرقوا نازل يخرخر... ووشو بقى زي ملاح الويكة البايت.. تاوقت عليه من فوق لقيتو رفع فنيلتو العجيبة ديك لي نص كرشو..
اصلو زولي عندو كرش ومع رفع الفنيلة دة بقى عامل زي الزول البالع ليه (قُلة)... وعلي العليه قام رفع بنطلونه السجمان داك لي ركبتو... والرجلين تحلف تقول كُنش عصيدة...
هسا البت السجمانة دي العاجبها في الزول دة شنو ما عارف..
مشينا نفطر وزولكم حارن،،، وعوض في الاكل عندو اكل غريب خلاص وحاتكم يقع في صحن الفول دة جف جف جف جف زي الكلب لامن يكون عطشان ويشرب من صحن الطلس...
لكن زولكم شال ليهو لقمتين وقام...
بس ربكم ربك الخير مع رجعتنا ظهرت ام الحسان... كان اشوفلكم الراجل فرح وابتسم زي الزول العندو ام فريحانة...
قبضنا قريشاتنا من المعلم ومشينا لي بتاع الباسطة دغري ولهطنا باسطتنا في امان الله..
في الطريق الزول ما مبسوط وعايز يصالحني:
- انت لسا زعلان
- ازعل ليه انت حر انا حبيت بس انبهك
- تنبهني لي شنو
- لي وضعك والمشوار الطويل المنتظرك
- ياخي ما ممكن يمشا مع بعض
- ما ممكن يا عوض انت عارف انت عندك كم اخو واخت وناس ابوك قافلين عليك قدر شنو
- عارف
- لا ما عارف.... ياخي انت نسوان الحلة ينجارن عشان يحصلن بتاع اللبن قبل ما يصل بيتكم واللبن يكمل عليهن... ولا بتاع العدة النسوان كلهن يشترن
نص دستة كبابي ونص دستة صحانة انت امك تشتري دستتين ونص احتياطي عشان البلتون العندكم دة... ياخي انت بتاع العناقريب لمن يدخل بيتكم يطلع
منه بعد تلاتة يوم لامن نفسو ينقطع وهو ينجد في العناقريب تحلف تقول زول من البيت... بعد دة كله تقول لي عارف...
وصلنا بيوتنا كداري من العمارات وكل واحد فينا مشى لي بيتو...
بالله يوم الجمعة من اصبحت اشوف ليك زولي لابد جنب بتاع الدكان...
مشيت عليه وسلمت على بتاع الدكان... شويتين اكان نسمعلك جرس تليفون الدكان:
- بالله عوض جنبك.... ابو الزفت البنية السميحة على التليفون.. اتاريه مصنقر هنا من اصبحت
- الو صباح الخير (سبحان الله عوض وصباح الخير اصلهم ما بيتلموا)
وشوية انا والهادي بتاع الدكان نسمع في القرقراب والضحك تحلف تقول الولد مولود في مقاطعة سان جيمس ما في الامتداد
- والله انا ذاتي اشتقت ليك... دة الكلام
.... ونواصل
Post: #45
Title: Re: أي بت شديدة بتحب ليها طُلبة (صبي بناي)
Author: عادل فضل المولى
Date: 01-08-2007, 07:52 PM
Parent: #44

يا دكتور كل سنة وانت طيب
اها يعني ننتظر لحدي متين نهاية (المكالمة)
ياخ بالغت دي حتة توقفنا فيها ..؟
...
Post: #46
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-09-2007, 12:10 PM
Parent: #1

استاذنا عادل فضل المولى كيفنك
والله يخلي ليك الوليدات الزينين ديل

يا زول شيت التليفون دة دايرلو مزاج رايق كدي
لكن ما تخاف بجيك واتمو ليك
Post: #47
Title: Re: أي بت شديدة بتحب ليها طُلبة (صبي بناي)
Author: الصادق صديق سلمان
Date: 01-09-2007, 12:35 PM
Parent: #1

الله يديك العافية يا طارق جبريل

والله ذكرتني ايام الثانوي العالي وشغل الطلبة.
الواحد كان بحس ليك انو القروش دي حلال ولمن يضرب الباسطة دي
يحس بيها بتملأ في خلاياه حتة حتة.

نحن منتظرين النهاية يا فردة لأنو الحكاية دي زي ماقال ناذر ....

أبوفتحية
Post: #48
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-09-2007, 12:54 PM
Parent: #1

ود الصادق كيفنك
حكايات عوض لا تنتهي وفيها الكثير المضحك المبكي
خليك قريب بكملها ليك
Post: #49
Title: Re: أي بت شديدة بتحب ليها طُلبة (صبي بناي)
Author: Abdulbagi Mohammed
Date: 01-09-2007, 01:05 PM
Parent: #48

الحمدلله دخلت الشبكة ..انا قلت البنية لحقتك الزينين ,عموما من هنا ولي قدام بنعمل حراسة من ارهاب الريدة دي
Post: #50
Title: Re: أي بت شديدة بتحب ليها طُلبة (صبي بناي)
Author: ناذر محمد الخليفة
Date: 01-09-2007, 01:08 PM
Parent: #1

Quote: ياخي انت نسوان الحلة ينجارن عشان يحصلن بتاع اللبن قبل ما يصل بيتكم واللبن يكمل عليهن... ولا بتاع العدة النسوان كلهن يشترن
نص دستة كبابي ونص دستة صحانة انت امك تشتري دستتين ونص احتياطي عشان البلتون العندكم دة... ياخي انت بتاع العناقريب لمن يدخل بيتكم يطلع
منه بعد تلاتة يوم لامن نفسو ينقطع وهو ينجد في العناقريب تحلف تقول زول من البيت...
Post: #51
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-09-2007, 01:28 PM
Parent: #1


الحمدلله دخلت الشبكة ..انا قلت البنية لحقتك الزينين ,عموما من هنا ولي قدام بنعمل حراسة من ارهاب الريدة دي

ايوة بالله يا عبد الباقي خليك قريب
انا خايف بعد اتم الحكاية دي يقولوا علي عدو المرأة بالمنبر
مع اني عكس كدة والله ياخي الريدة دي براها ما بالدنيا


ابو النز يا حبيب

شكرا على المرور
واكان للامثال والاستعارات اسكت ساي جاييك بي حا جات بالكوم
Post: #52
Title: Re: أي بت شديدة بتحب ليها طُلبة (صبي بناي)
Author: ست البنات
Date: 01-09-2007, 09:27 PM
Parent: #1

الأخ طارق جبريل - سلام -

ابداع - ابداع !

حكى - وموضوع - وطرفة - وتصوير بديع للأحداث والشخوص والمواقف !

واصل -

( أتارينى فاتتنى اللمة السمحى دى ! انتو قاعدين فى البوكان أسوعتوا ?? نان ما

تكوركولى !)

لكين انجييت عوض دا مو ياهو انت ذاتك ????

بلغ التحيات للزول السمح اخوى - وابقولى عشرة عليهو بالله !

ست البنات .
Post: #53
Title: Re: أي بت شديدة بتحب ليها طُلبة (صبي بناي)
Author: ابوهريرة زين العابدين
Date: 01-10-2007, 03:23 AM
Parent: #52

الاخ طارق
الموضوع شيق ومتابعين، فالشكر لك على ايراد هذا السرد الرائع وبلغة تصويرية جميلة
مع شكري
أبوهريرة
Post: #54
Title: Re: أي بت شديدة بتحب ليها طُلبة (صبي بناي)
Author: Abdulbagi Mohammed
Date: 01-10-2007, 11:14 AM
Parent: #53

طارق يا احوي ست البنات ما ظنيتها قاطعة الكلام ده من راسها, شكلها عارفه عوض والبت الدشدشت عوض
it is true you are the one??????let us know
Post: #55
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-10-2007, 09:33 PM
Parent: #1

Quote: الأخ طارق جبريل - سلام -

ابداع - ابداع !

حكى - وموضوع - وطرفة - وتصوير بديع للأحداث والشخوص والمواقف !

واصل -

( أتارينى فاتتنى اللمة السمحى دى ! انتو قاعدين فى البوكان أسوعتوا ?? نان ما

تكوركولى !)

لكين انجييت عوض دا مو ياهو انت ذاتك ????

بلغ التحيات للزول السمح اخوى - وابقولى عشرة عليهو بالله !

ست البنات .


ست البنات كيفنك
تسلم يا بت العزاز
انا كوركتلك لامن صوتي بحا
انت نان فاضية من ناس ديل وناس ديك
ما خليتيلك حبيب من كريمة لا مساوي الا وزرتيه

والله عوض دة ولدا ظريف وسمح بالحيل علي الظروف
واقفة ضدو وانا ان كنت ياني عوض بقولها ماني خايف
من شي علي انا قصتو واجعني عشان هو زولا فنجري بالحيل

حبيبنا عبد الواحد بالف خير ونحن ما بنقصر فيه
ياهو كبيرنا هنا... حتى اخوانك فب كسلا وصوني عليه
بس انت لا تنسيه مرة مرة اقفريهو بالتليفون
اصلو باقي قعد يردك جنس ريد فابت الحد
Post: #56
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-10-2007, 09:42 PM
Parent: #1

Quote: الاخ طارق
الموضوع شيق ومتابعين، فالشكر لك على ايراد هذا السرد الرائع وبلغة تصويرية جميلة
مع شكري
أبوهريرة


عزيزنا ابو هريرة
الله يجبر بي خاطرك ياخي
اهي محاولة لتذكر ماض
كان بالتاكيد جميل جدا جدا
رغم الفقر والبؤس
لكنه كان مبهجا
Post: #57
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-10-2007, 09:49 PM
Parent: #1

Quote: طارق يا احوي ست البنات ما ظنيتها قاطعة الكلام ده من راسها, شكلها عارفه عوض والبت الدشدشت عوض
it is true you are the one??????let us know


عبد الباقي ود محمد كيفنك
انت يا اخوي في زول مسلطك علي
الشي وحات نضري عوض
وست البنات ذاتها انا شفتها في حياتي مرة
واحدة هني في الرباط اها من وين عرفت
والقصي كلها في السودان

وجودك هنا يسعدني بشكل كبير
Post: #58
Title: Re: أي بت شديدة بتحب ليها طُلبة (صبي بناي)
Author: Muna Khugali
Date: 01-10-2007, 10:00 PM
Parent: #57

Quote: وبجيك واتملك الحكاية كلها


القصة شنو ياطارق?
بتملك دي متين يعني?
Post: #59
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-10-2007, 10:09 PM
Parent: #1

Quote: القصة شنو ياطارق?
بتملك دي متين يعني?


منى بت الخليفة
جملة الايمان انا زدتلي شبرين لافوق
تلات مرات وانت ضيفة عندي
وحات جبل ود الكرسني انا فرحانبك فرح

سلمي علي آية وعريسها وقولي لي عريسها
نحن بنات الامتداد ديل ياهن عيونا دحين
ما نوصيك عليها

وبتملك القصة
Post: #60
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-10-2007, 10:38 PM
Parent: #1

نواصل...
انا والهادي بتاع الدكان سكتنا ساكت وزولكم شغال في التليفون..
- والله انا زاتي ما عارف ليه عملوا لينا الجمعة دي اجازة
الزول دة اظنو الصلاة بقى ما فاضي فيها... وشوية شوية تسمع الضحك... بالله عوض الضحكة تمرق من حلقو زي قدرة الفول الهاجرنها بي حجر.. خخيي اهييييييييي اههههه..
- الليلة شربتي شاي الصباح بدوني...
هو دة حب دة ولا صينية فطور...
- بس انا وحياتك لي هسا ما فطرتة وما اظني بقدر لانه شايك بتاع الصباح كان بيفتح نفسي...
جملة الايمان الزول دة الصينية اليقعد فوقها يلحقا امات طه.. يمين يقوم آخر زول ولو جو صورو الصحانة والصينية من بعدو بالاشعة ما يعرفوا كان فوقها شنو من شدة ما مسحها مسح...
- اها الليلة شربتي عصير المنقة ولا خلطي ليمون بس..
اول مرة اشوف لي حب في انواع الفواكه في سوق الخضار...
- تعرفي انا بتعجبني وجناتك شديد...
سبحان الله عوض كلامه كله طوب وملطم واسمنت الليلة كمان بقى يعرف الوجنات..
- لا والله ما بجاملك انا لو بجاملك معناها بغش في نفسي...
الزول دة بعد شوية حا يقول لي ما عايز اشتغل طلبة تاني..
- انت لو عايز تعرفي نفسك كويس انا بديك عيوني عشان تشوفي بيها نفسك..
شن طعم عيونك وهن عملات زي عيون الصبرا كدي ما فيهن اي تعبير..
- تعرفي يدك من شدة ما رطبة وناعمة لمن اسلم عليك شعر جسمي كله يقوم..
شعر جسمك قايم خلقة.. الزول دة بالله تقول ابو القنفد شعره كله قايم زي الابر
حتى شعر نخرينو طالع زي المسمار الداقنو معوووج في خشبة....
ربكم رب الخير جاب مصطفى اخوهو الصغير يناديهو للفطور حتى زولكم قطع المكالمة..
وقام جري للبيت... شفتو الزول النفسو مسدودة... يمين انطلق زي بيرك عربات السفراء
للفطور..
... ونواصل الاسبوع الاخير في العمارات..
Post: #61
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-11-2007, 01:54 PM
Parent: #1

جاييك يا عوض بس اصبرلي
Post: #62
Title: Re: أي بت شديدة بتحب ليها طُلبة (صبي بناي)
Author: ست البنات
Date: 01-11-2007, 03:36 PM
Parent: #1

طارق جبرين اخوى -

سلام ومرحبتين -

يا يابا يوصووك للسمح - ورب البيت يديك العافى والصحى -

نان اخوانى مالون مبيوصووك عليى عبد الواحد !

هو ماهو زولا هيين - وأجواد وحينيين - وطييب - والمخ الفيهو يوزن بلود لى حدهن !

وانبيقيت هو بيريدنى -انا بس ضوممة رويحتى دى مشنكلا فييو !

والله يديهو ويديك العافى الصحى - ويبعد عنكم كل شر - وملايكة الرحمن تغتيكون وتباريكون

ميحل ماكون ماشيين - وربى يعدل طريقكون - ويديكون المروى - ويعدلا عليكون شيقيش ما

تقبلو - وتلقولكون فى كل ختوى سلامى - ويبعد منكون ولاد الحرام وبنات الحرام - وبركة ربى

ديمى فرحانيين ومبسوطيين -

طارق اخوى الاسعلك : دحين حيبيبى دا قع ياكول شى ? ولا بيبييت القوى واا مغايسى يا يمة !

وودعتكون صاحب الوداعى وفى امان الله .

ست البنات .
Post: #63
Title: Re: أي بت شديدة بتحب ليها طُلبة (صبي بناي)
Author: Abdulbagi Mohammed
Date: 01-11-2007, 03:55 PM
Parent: #62

طارق والله ماقصرت تب مع عوض اخونا ده وصفتو وصفا لو قروه ناس FBI علي الطلاق يجوا جارينو ليك من اضانه
Post: #64
Title: Re: أي بت شديدة بتحب ليها طُلبة (صبي بناي)
Author: امير عوض الجمري
Date: 01-11-2007, 04:25 PM
Parent: #1

دكتور طارق
انت جميل جمال ودّار .. جميل جداً لكن "شحتاف"

ياخي والله انت زول فنان .. وعوض ده دايرين نعرف نهاية قصتو سريع عشان نوجه احساسنا كويس

Quote: دحين يا الحبان ونحن في الثانوي انا وصحبي عوض دا كنا شغالين طلب
مع بناي كدي ايدو خضراْء تحلف تقول الزول دة ساقية يمين من تبدأ الاجازة ونحن مدورين
يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها
انا وعوض دا... تمانية صفايح رملة وواحد اسمنت والملطم يكون جاهز... جيب الطوب يا ولد
غربل الرملة يا ولد... الخرصانة وصلت ولا لسا... بكرة حا نعمل البيم...
المهم يا الحبان الرزق يوم قام ساقنا للعمارات عندنا فيها شغل شهر وكان الوكت آخر الاجازة

بالله نحن كنا بنشتغل طلب مع ناس الاتحاد الاشتراكي في الصواني يعني لا بت تشوفه لا واحدة تشوفك وكان بالغنا كنا بنشوف مجنون الصواني داك ..

وبيني وبينك نحن ما عارفين انو العمارات بيبنو فيها طلب عاديين زينا كده كنا قايلين طلبم زيهم .. والعمارات دي كنا بنسرق منهم لبن كافوري داك بس دي كل صلتنا بيها ..

تسلم يا ابوريم وواصل في الابداع ده
Post: #65
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-12-2007, 01:09 PM
Parent: #1

Quote: طارق اخوى الاسعلك : دحين حيبيبى دا قع ياكول شى ? ولا بيبييت القوى واا مغايسى يا يمة !


ست البنات كيفنك
عبد الواحد كويس وعملو جضيمات
وانا آخر مرة مشيت كسلا في السودان
قابلت اخوانك هناك ناسا طيبين وحنينين شديد
فشان كدي وصوني علي عبد الواحد
عبد الواحد دة خسارة يكون برة السودان
لكن نقول شنو الله يجازي الكان السبب
Post: #66
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-12-2007, 01:12 PM
Parent: #1

Quote: طارق والله ماقصرت تب مع عوض اخونا ده وصفتو وصفا لو قروه ناس FBI علي الطلاق يجوا جارينو ليك من اضانه


عبد الباقي كيفنك
الزول ماهو زولي من قمنا ونحن مع بعض
انا خابرو كويس
لكن وكرة بت الزوات دي جهجهتو تب
Post: #67
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-12-2007, 01:16 PM
Parent: #1

Quote: وبيني وبينك نحن ما عارفين انو العمارات بيبنو فيها طلب عاديين زينا كده كنا قايلين طلبم زيهم .. والعمارات دي كنا بنسرق منهم لبن كافوري داك بس دي كل صلتنا بيها ..


اميرنا يا الجمري
يا زول نحن زاتنا كنا فاكرين الشغلة ماها زي حقتنا
علي لقينا الطوب ياهو الطوب والاسمنت ياهو الاسمنت كمان
بس الفرق الوحيد واحدة من بنياتهم حبت ولدنا دا
وخلتو مجهجة جهجهة عدوك...
بكملك القصة خلك قريب..

التحية لي عثمان وامه واخوانه
Post: #68
Title: Re: أي بت شديدة بتحب ليها طُلبة (صبي بناي)
Author: امير عوض الجمري
Date: 01-12-2007, 01:38 PM
Parent: #67

Quote: يا زول نحن زاتنا كنا فاكرين الشغلة ماها زي حقتنا
علي لقينا الطوب ياهو الطوب والاسمنت ياهو الاسمنت كمان
بس الفرق الوحيد واحدة من بنياتهم حبت ولدنا دا
وخلتو مجهجة جهجهة عدوك...

والله يا اخوي اتاريه الفرق ما كبير .. وما دام بناتم حبن وليداتنا .. بنياتنا طوالي يتلفحن ويمشن يحومن بي هناك وما بجن راجعات ساكت لأنهم بيني وبينك كدي يا ود جبريل ناس العمارات الوحيدين الأولادم قاعدين لسة هناك علّة الحلال التانيات وليداتم يا يابا بي صمّتم حايمين ق يبلاد الله البعيدة .. عشان كده ياخوي البنات ديل اليقومن يمشن هنوك ويخلن الشمارات والقطيعة لامن القطر يفوتن ونبقى في حي ووب ..

يللا في انتظار ابو عويض وقصتو المفرزينة
Post: #69
Title: Re: أي بت شديدة بتحب ليها طُلبة (صبي بناي)
Author: Abdulbagi Mohammed
Date: 01-12-2007, 04:51 PM
Parent: #68

يا طارق يا اخوي جهجهتنا بالمسلسل المكسيكي ده مافاضل الا تنزلك اعلانات تجارية في النص
Post: #70
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-13-2007, 01:44 PM
Parent: #1

Quote: عشان كده ياخوي البنات ديل اليقومن يمشن هنوك ويخلن الشمارات والقطيعة لامن القطر يفوتن ونبقى في حي ووب ..


اميرنا يا الجمري
ياخي بنياتنا سمحات وما عندهن عوجة خلهن في بكانن دة
ولامن الله يريد عدلن بيجيهن لاعندهن..

كن بالف خير
Post: #71
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-13-2007, 01:51 PM
Parent: #1

Quote: يا طارق يا اخوي جهجهتنا بالمسلسل المكسيكي ده مافاضل الا تنزلك اعلانات تجارية في النص


عبد الباقي ود محوماد كيفنك
انا باقيلك ان لقيتي طريقة ادخلي اعلانات هنا
كنت من زمان سويتة تعرف ليه... اصلو عندي بيت
غلبني اتمو... بعد ما كنت ببني بيوت الناس
غلبني ات حقي.. عشان كدي لو لقيت ليك طريقة اعلانات
هنا بنديك نصيبك (فيفتي.. فيفتي)

اصبر علي بكملك يا جميل
Post: #72
Title: Re: أي بت شديدة بتحب ليها طُلبة (صبي بناي)
Author: Shams eldin Alsanosi
Date: 01-13-2007, 07:16 PM
Parent: #1

غايتو جنس شحتفة..
بطريقتك دي يا طارق جبريل البونية الجاية ما حتجيك من عوض!!
وطبعا حماسي فى المتابعة جاي من انتمائي لقبيلة الطلب والبنايين وشيل شيلتك لو حصل لعوض حاجة ما كويسة فى نهاية القصة!
Post: #73
Title: Re: أي بت شديدة بتحب ليها طُلبة (صبي بناي)
Author: امير عوض الجمري
Date: 01-14-2007, 08:28 AM
Parent: #1

الغالي ود جبريل (على وزن الغالي تمر السوق)


Quote: اميرنا يا الجمري
ياخي بنياتنا سمحات وما عندهن عوجة خلهن في بكانن دة
ولامن الله يريد عدلن بيجيهن لاعندهن..

ياخي ما قلنا حاجة وبنياتنا ما فيهن كلام علّة المشكلة في وليداتنا المافيشين ديل.. وبعدين يقعدن لي متين ياخوي ينتظرن عدلن من (المعاويج) المشحططين في (بلاد برة) ديل ؟؟ خلهن آآ زول اليمشن على (اخوان حبيبة عوض) وينسدن فوقم وياخدن بي تارن من البنية الختفت منهن (طلبتم) القاعد في البلد ..

Quote: كن بالف خير

وكن كذلك .. وعوض ايضاً رغم ان الظاهر لا يوحي بأن نهاية عوض ستكون على خير والا كنا سمعنا زمان في الامتداد بـ (عوض الطلبة العرس (بت راهات) من العمارات) .


دمت يا ريّس .. ده تصريح خطير يودي التوج في حكومة الجنرال فيصل محمد خليل الامتدادية.
Post: #74
Title: Re: أي بت شديدة بتحب ليها طُلبة (صبي بناي)
Author: سيد محمد احمد سيدنا
Date: 01-14-2007, 10:57 AM
Parent: #73



اخونا العزيز ود جبريل


كل عام وانت والاسره بخير وربنا يديم ايامكم


اعياد0


شوقنا لايام الطلب ذى شوق اللياسه للمويه


بالله عوض دا مبشع بحبوا قدام خلق الله مالك


واولاد الامتداد فيهم كم عوض من الطلب وبالمناسبة


اكبر محمده لزمنا هى كلنا طلب خريجى مدرسة الامتداد


وفقك الله مع خالص تحياتــــــــى0


ســـــــــــــيد
Post: #75
Title: Re: أي بت شديدة بتحب ليها طُلبة (صبي بناي)
Author: Kamal Mahjoob
Date: 01-14-2007, 12:11 PM
Parent: #1

العزيز طارق جبريل
التحيات الطيبات لله ... كبفك
متابع بشدة ، لأنني أنتمي لجماعة الطلب ، لكن بحق نشفت ريقنا .. وأظن البنية Box الأداك ليها عوض بتنيها ليك ...
بس عارف والله منتهى الإبداع والسرد الجميل
لك مودتى
كمال محجوب
Post: #77
Title: Re: أي بت شديدة بتحب ليها طُلبة (صبي بناي)
Author: Ahmed Yousif Abu Harira
Date: 01-14-2007, 12:52 PM
Parent: #75

يا طارق سلام عليك


علي الطلاق البوست ده كل مره بشوفوا ..وأقول النصبرلو شوية

دخلتو الليلة بس والقصة عجبتني بالحيل لأنني عايشت واحده قريبة منهامع عوضاً تاني..



عيلا يا خوي شحتفت روح الناس ديل...

أسرع جيبلنا باقيها خلنا النشوف غيرها...

نسوي شنو ...الونسه بقت إياها كدي..مع الغربة السجم دي
Post: #76
Title: Re: أي بت شديدة بتحب ليها طُلبة (صبي بناي)
Author: امير عوض الجمري
Date: 01-14-2007, 12:37 PM
Parent: #1

يا طرقة

يا زول علي كيفك .. ولازم البنية الاداك ليها
عوض تخلصة في التفصيل الغير ممل لي قصة ابو
عويض ده يعني تدينا ليها بالحتة ونحن ما مستعجلين
دايرين نعرفه بي ضبانته ..
وطبعا انا متخيل صحبك بي غبشت الأسمنت ديك وضارب ليهو
موية فول مظبطة بي شوية طحينة وموية جبنة وكمية الزيت
البتكون ظاهر حولين خشمو .. ده طبعاً قبل المسوح عشان
يجي يتاوق بي فوق ..
غايتو بي منظر زي ده الا يكون عامل ليها عمل .. طبعا الزمن داك
الشيك قريبة والمعلم ده لو بحّت جيوبو كان لقيت ليك ربطة ..

تحياتي وفي انتظار التفاصيل .
Post: #78
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-14-2007, 08:01 PM
Parent: #1

Quote: غايتو جنس شحتفة..
بطريقتك دي يا طارق جبريل البونية الجاية ما حتجيك من عوض!!
وطبعا حماسي فى المتابعة جاي من انتمائي لقبيلة الطلب والبنايين وشيل شيلتك لو حصل لعوض حاجة ما كويسة فى نهاية القصة!


ود السنوسي كيفنك
القصة شكلها حا تجيب ليها بنية تاني

يا سيدي والله كان عندنا مشكلة في النيت في المغرب
بس اصبر لي شوية كدة
Post: #80
Title: Re: أي بت شديدة بتحب ليها طُلبة (صبي بناي)
Author: sudania2000
Date: 01-14-2007, 08:10 PM
Parent: #78

تعرف الطلبة الواعي نعمة كبيرة اخير من مدعي الثقافة

اكمل

وحجزنا كرسي

دائم

وروعة القصة

تجبر

ع الجلوس
Post: #79
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-14-2007, 08:05 PM
Parent: #1

Quote: بالله عوض دا مبشع بحبوا قدام خلق الله مالك


واولاد الامتداد فيهم كم عوض من الطلب وبالمناسبة


اكبر محمده لزمنا هى كلنا طلب خريجى مدرسة الامتداد



ابو السيد يا زعيمنا كيفنك
عوض ياهو صاحبي بس واجعني الحصل ليهو
Post: #81
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-14-2007, 08:10 PM
Parent: #1

Quote: العزيز طارق جبريل
التحيات الطيبات لله ... كبفك
متابع بشدة ، لأنني أنتمي لجماعة الطلب ، لكن بحق نشفت ريقنا .. وأظن البنية Box الأداك ليها عوض بتنيها ليك ...
بس عارف والله منتهى الإبداع والسرد الجميل
لك مودتى
كمال محجوب


كمال محجوب كيفنك
ياخي انت زومول عديل كدة يعني طلعنا اولاد مهنة واحد
هسا النبي فوقك بس حق الزمالة دة ما يخليك تصبر علي شويي
Post: #82
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-14-2007, 08:14 PM
Parent: #1

Quote: يا طارق سلام عليك


علي الطلاق البوست ده كل مره بشوفوا ..وأقول النصبرلو شوية

دخلتو الليلة بس والقصة عجبتني بالحيل لأنني عايشت واحده قريبة منهامع عوضاً تاني..


ود ابو حريرة
يا زول انت ما تلكعلنا قصتك هني كمان عشان
يبقى فرحنا فرحين
Post: #83
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-14-2007, 08:18 PM
Parent: #1

Quote: وطبعا انا متخيل صحبك بي غبشت الأسمنت ديك وضارب ليهو
موية فول مظبطة بي شوية طحينة وموية جبنة وكمية الزيت
البتكون ظاهر حولين خشمو .. ده طبعاً قبل المسوح عشان
يجي يتاوق بي فوق ..


اميرنا يا الجمري
والله كانك كنت معانا
عوض بعد الغباش داك كلو بقى كمان يتمسح
يا زول اصرلي ساكت انا جاييك
Post: #84
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-14-2007, 08:21 PM
Parent: #1

Quote: وحجزنا كرسي

دائم

وروعة القصة

تجبر

ع الجلوس


سودانية2000 حبابك عشرة
يا زولة اتوهطي بيناتنا علي راحتك
نحن لاقنك وين
وسلمي علي مدني شديد اصلو عندي فيها ناس عزاز بالحيل
Post: #85
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-15-2007, 04:13 PM
Parent: #1

نوصل....
مشينا يوم السبت لي شغلنا وعوض السعادة ناطة من عيونه تقول عندو غدة درقية...
يمين ونحن في الطريق ضاربين الكدر للعمارات الزول دة اي اغنية حب وجلكسات غناها...
بس الوكرة الوكر فيه انه دا آخر اسبوع ومنه نحن نخلص الشغل هنا...
لمن قلت ليهو كدا زولكم نطط عيونه ونفخ الهواْء من نخرينو زي الحصان بتاع السبق.. وكضم الكضمة البي وشيها... انا قلت اسد ليه نفسه عشان يخلي الشغلانة لانها ما حا تلفق... اتاريني بوظتها تاني لانه زولكم بقى مهموم ويعضعض في لسانه زي الكلب الماسكو السعر....
فطرنا وجينا لقينالكم البنيي السميحي في الباب ومعاها اختها كمان انا سلمت فسراع وطلعت لي طوبي واسمنتيني... وخليتو براهو... الظاهر عليها اخت البنية كانت عايزة تشوف (ألان ديلون) بتاع الامتداد دة... تاوقت عليه من فوق لقيتو يقرقر ساكت مع البنيات وبعد شوية شال صفيحتو ومشى لي رملتو.. لامن طلع فوق جاء عندي..
- انت مالك مشيت فسراع كدي
- يا زول انت سيد الشغلانية من اولها تموت موتك
- اختها قالت لي صاحبك دة مالو مسيخ كدة بس سلم ومشى...
- انا راضي بي مساختي دي يا زول والله زاتو عشان عارفني مسيخ اختارلي قراية البيطرة
- ياخي ما تكابرني انا...
- يا زول اكابرك في شنو انت جنيت...
- يمكن اختها تعجبك..
- شوف يا ابو عويض انا ماني فاضيي للحب... ووجع القلب ماني قادر عليه فشان كدي لا بقدر احب هسا ولا حاجة يا زول المشوار طويل...والبنيات ديل ما بينتظرننا... هسا يجي واحدا متمسح ومليان قروش ويعرسها ويخليك فاتح خشمك ويمشي..
- ياخي انت مالك زول متشائم كدة
- ياخي انا عارف امكانياتي... ياخي انت بس شوف في ابو البنيات دي كويس... الراجل يلمع من النعمة.. ما حسدناهو لكن ما حا يقبلبنا نحن ناس قريعتي راحت ديل... ياخي الراجل تريان وجضومه مليانة لامن مدلدلة زي معلاق اللبن... وشوف انت جضومك مكرمشة كيفن علي السعن الناشف...
- بي شناتي دي البنية حبتني...
- مبروك عليك وخليك عايش في الوهم...

كملنا اسبوعنا ورجعنا لي امتدادنا وخليت عوض ما بين بيتهم وتلفيون دكان الهادي...
وبعد اسبوع انا سافرت مصر لي بيطرتي وهو مشى جامعة الخرطوم لي صيدلتو...
الجوابات بيناتنا ما انقطع... وعوض كلامه كله عن بنيتو وحبهم وانه بتجي عندو لامن تشتاق ليه في كافتريا الجامعة... يعني شغال خلط صاح...
لمن رجعت في الاجازة لقيت ليك النيران مولعة...
... نواصل
Post: #86
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 01-15-2007, 04:46 PM
Parent: #85



بسم الله الرحمن الرحيم


عزيزي ود جبريل..

سلامات..

شنو يا ابو الشباب

نستناك اسبوع كامل و تدينا سطريين بس..

تم لينا الحكايه بلكوريك مابلمعلقه..

وبعدين نيران شنو يا زول الله يطفيها..

وخلاص ياخونا سلام .. وتحياتي لي عوض..


حاتم هاشم.
Post: #87
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-19-2007, 11:05 AM
Parent: #1

ود هاشم كيفنك
Quote: تم لينا الحكايه بلكوريك مابلمعلقه


روق لي المنقة كدي وبجيك صادي
بعدين ياخي الكوريك دة عنده معزة شديدة ماتجهجو لينا
مع الحناكيش (المعالق والشوك)
Post: #88
Title: Re: أي بت شديدة بتحب ليها طُلبة (صبي بناي)
Author: متوكل بحر
Date: 01-19-2007, 09:29 PM
Parent: #87

فووووووووووووووووووق
Post: #89
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-19-2007, 10:45 PM
Parent: #1

العزيز متوكل بحر
شكرا على العتالة
Post: #90
Title: Re: أي بت شديدة بتحب ليها طُلبة (صبي بناي)
Author: غباشي
Date: 01-20-2007, 07:17 AM
Parent: #1

الدكتور طارق جبريل
و الله قطعت مصاريني بالضحك ... تشبيهاتك دي جايبا من وين ؟؟؟ من سوق الندى و للا العشرة ؟ وللا تكون جبتها من السوق الشعبي عديل؟
تحياتي لكل الإمتداديين و بالأخص عامر تيتاوي .... و نتلاقى
Post: #91
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-22-2007, 03:11 PM
Parent: #1

بجيكم صادي
Post: #92
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 01-25-2007, 03:25 AM
Parent: #91



بسم الله الرحمن الرحيم
ودجبريل..
سلامات..
Quote: بجيكم صادي

شنؤ الحكايه ياحبيب..
...ماقال بجي مالو ماجاء...
حسع كان في داعي للجهجه دي
منتظريين ومتلهفين ..
عشان نعرف اخبار عوض..


حاتم هاشم.
Post: #253
Title: Re: أي بت شديدة بتحب ليها طُلبة (صبي بناي)
Author: Nola
Date: 07-24-2007, 11:35 AM
Parent: #91

طارق جبريل

يا ود امي

نان ما فترنا من الانتظار

يا اخوي ما تجي تتم القصة
Post: #93
Title: Re: أي بت شديدة بتحب ليها طُلبة (صبي بناي)
Author: عبد الدائم سيد أحمد
Date: 01-25-2007, 09:59 AM
Parent: #1

عليك الله مالك شايل حالو
هسه كان مشينا دكان الهادى وسألناهو
وبعدين دكان رمضان هو الوحيد الكان فيهو تلفون الزمن داك
وكمــــــــــــان
المسافة ما بين الامتداد والعمارات قريبة وما بعيدة
لكييييييييييييين انا بعرف ناس بقطعو مسافة قدرها عشرة
مرات ما بين لكوظ والمساكن لنفس الاسباب ؟؟؟؟

يا حليلك يا حاتم جبارة كاتم الاسرار .

منتظرنك كمل ..
ما شفتو عوض ياسارى الليل
Post: #94
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-26-2007, 06:45 PM
Parent: #1

Quote: الله قطعت مصاريني بالضحك ... تشبيهاتك دي جايبا من وين ؟؟؟


غباشي كيفنك
مشكلتي حياتي كلها عايشها مع الرباطاب بتاعين الصحافة
Post: #95
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-26-2007, 06:47 PM
Parent: #1

Quote: حسع كان في داعي للجهجه دي
منتظريين ومتلهفين ..
عشان نعرف اخبار عوض..


حاتم وليد هاشم كيفنك
ياخي عوص دة دايرلو مزاجا كبيرا نتمبو قصتو دي
واخوك اليومين ديل راسو ضارب
Post: #96
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-26-2007, 06:50 PM
Parent: #1

Quote: المسافة ما بين الامتداد والعمارات قريبة وما بعيدة
لكييييييييييييين انا بعرف ناس بقطعو مسافة قدرها عشرة
مرات ما بين لكوظ والمساكن لنفس الاسباب ؟؟؟؟


عبد الدائم العريس
دي تسأل منها الناس الكانوا ساكنين في لكوظ
بس انا كنت ساكن في المساكن ولمن مشيت لكوظ
ما جيت المساكن الا للاعانة
Post: #97
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-11-2007, 07:47 PM
Parent: #96

بكرة نرجع نتمها ان شاء الله
Post: #98
Title: Re: أي بت شديدة بتحب ليها طُلبة (صبي بناي)
Author: Kamal Mahjoob
Date: 02-11-2007, 07:54 PM
Parent: #97

ود جبريل
أولا طمنا على صحة الوالدة
ثانيا شوف لينا (أبو الزمل) دة وكمل الحكاية عشان نحتفل
لك كل الود
Post: #911
Title: Re: أي بت شديدة بتحب ليها طُلبة (صبي بناي)
Author: اسماعيل مرغنى
Date: 08-26-2008, 10:02 AM
Parent: #97

قصه جميله يادكتور جبريل
منتظرين الباقى
Post: #99
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-12-2007, 11:59 AM
Parent: #1


ود محجوب كيفنك
الليلة ان شاء الله نواصل
وشكرا يا عزيز الوالدة تتحسن والحمد لله
Post: #459
Title: Re: أي بت شديدة بتحب ليها طُلبة (صبي بناي)
Author: Manal Mohamed Ali
Date: 09-08-2007, 11:06 PM
Parent: #99

منتطرين عوض
ياريت ما تتأخر علينا
Post: #675
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 10-29-2007, 10:51 AM
Parent: #99

و الله بوست طارق دا محيرنى
ماعارف تمامتو وين
بوست مسكون
بشوف زول بيداخل
اخش افتشو مالقاهو
زى المابنزل عندى
حاجة غريبة
Post: #100
Title: Re: أي بت شديدة بتحب ليها طُلبة (صبي بناي)
Author: الصادق صديق سلمان
Date: 02-12-2007, 12:25 PM
Parent: #1

يا دكتور طارق سلام دائم عليك

ياخي حشيت ِأفكارنا حش المنجل للنجيلة.
تعبنا خلاص مع عوض دا ياخي.
ما تكمل لينا قصتك الجميلة وكلامك الحلو دا يا طارق يا أخي.؟!!

أبوفتحية
Post: #102
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-12-2007, 01:46 PM
Parent: #100


حبيبنا الصادق ود صديق
سامحنا ياخي كنا جارينا وراء الدنيا شوية
بس خلاص القصة قربت تكمل
انت بس خلك قريب
وسلام شديد لي فتحية
Post: #101
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-12-2007, 01:39 PM
Parent: #1


نواصل يا الحبان....
رجعت من الجامعة في مصر في الاجازة مهدود وجسمي كله قطايع وكسير... والله البيطرة دي فيها جنس جري من كفاي جداد لي مراح غنم ومن زريبة بقر لي حوش حمير.. وعلي العلي الله وقعني في مجموعة كلها سحاسيح ... شي شيراز وشي شيرين... بنات مدلعات كدة جوا يقروا بيطرة ليه ما عارف... لو في تور هاج: حصل يا طارق.. لو حمار حرن: شوفو يا طارق... المهم يا الحبيبين قلت في الاجازة دي انجمة شوية عشان اقوم اشوف البناي وين ونقوم نبدأ من جديد...
خالتنا سكينة ام عوض جات سلمت علي شديد وقالت لي: لامن ترتاح تعال لي انا عايزاك... قلت ليها ان شاء الله
حسيت انه عوض ساط ليهو سواطة شديدة لامن امه دي تجي وتقول لي عايزاك...
في المساء جاء عوض واتسالمنا ومشينا دكان الهادي نظبط البوش... شفت فيه شديد.. قام قال لي ما تعاين لي كدة عارف امي جات كلمتك... قلت ليه امك ما قالت لي حاجة بس سلامها وطريقة كلامها بتقول انك عملت ليك مصيبة ولا ناوي عليها...
ياخي انا قلت ليهم يخطبوا لي وبس..
- يخطبوا ليك وبس، انت قايل الخطوبة دي ساهلة، وبعدين ليه يعني يخطبوا ليك من هسا وانت لسة حتى ما وصلت في قرايتك للاسبرين..
- ياخي انا قلت ليهم نمش نقرأ الفاتحة وبس
- والفاتحة بيقروها ساكت كدة ما لازم بشيلوا معاهم حاجات وقولة خير وشكلاتة.... انت عارف البيت عندكم رزق اليوم باليوم... وانت ما عندك التكتحك ولا حا تديهم قزازة حامض الكبريتيك وكرتونة كلوريد الصوديوم
- ياخي ما تكسر لي مقاديفي انا والله راسي ضارب وما عارف اعمل شنو
- انت ليه عايز تخطب يعني من هسا الجديد شنو
- شوف انا بكرة حا اشوف الجكس وبعمل معاهو مواعيد عشان تسمع منها براك
الصباح عوض جاء البيت ودخل الصالون وفتح الدولاب وشال ليهو قميص من قمصاني ودخل فيهو ومشى وفي المساء لمن جاء قال لي بكرة نتقابل الساعة عشرة في كافتيرية الكلية قلت ليهو اوكي
الصباح لبست القميص بتاعي ودخلت لي في جينز ومشيت ليهم
- السلام عليكم
- اهلا د. طارق حمد لله على السلامة
- الله يسلمك دكتور شنو ياخي نحن يا دوب في مرحلة الارانب
- قميص عوض حلو في عوض بس ما حلو فيك (مع ضحكة)
- جابت ليها نبذ كمان مع انه القميص حقي بس قلت مافي داعي نشيل حال صديقنا مع انه لابس ليه قميص اصفر وبنطلون اسود عامل زي كبسولة التتراسايكلين كدة
- انت ليه رافض موضوعنا من الأول
- ياخي منو القاليك كدة
- عوض دايما بيقول لي طارق قال وقال وقال
- انا ما ضد الموضوع بس ظروف عوض بتصعب القصة كلها هسا... انت عارفة ظروفه في البيت كيف والمشوار قدامه طويل شديد ووراهو كوم لحم لانه اخوانه الكبار الحمل تقيل عليهم فهو لازم يحصل يشيل معاهم
- انا عارفة كل حاجة وهو حكي لي كل التفاصيل
- قاليك امه في البيت لابسة تموت تخلي
- قالها لي وانا عايزاهو كدة من غير كريمات (ابو الزفت الزولة شكلها واقعة لي اضنينها)
- طيب الله يوفق انا جيت اسمع ليك حسب كلام عوض وما عندي شي اقدمه ليكم سوى دعوات بالتوفيق
- لا انت ممكن تعمل حاجات كتيرة لانه عرفت من عوض انه ابوه وامه بيحبوك شديد
- ما اختلفنا بس موضوع زي دة صعب شديد اكلمهم فيهو بعدين انتو مستعجلين كدة ليه على الخطوبة دي
- لانه انا عندي مشكلة في البيت واحد من اولادي عمي اتقدم لي ومافيهو اي عيب مال وجاه وكله بس انا ما عايزة اتزوجه نهائي وابوي مصر عليه لانه ود اخوهو وانا كلمت امي بحكايتي مع عوض وقالت لي خليهو يتقدم وانا بقنع ابوك لانه عوض مستقبله مضمون
- طيب انا حا اشوف معاهم بس ما بقدر اوعدك باي حاجة لانه صعب جدا يستوعبوا الموضوع
الغايزني عوض كان بيتو نس مع اختها وآخر قرقراب ومخليني انا مع محكمة المظالم دي... النصيحة لي الله اختها ذاتها شديدة بس مافي طريقة في ظروفنا دي الحاجات دي عشم ابليس في الجنة
والله البنيات عزمونا غداء مدنكل ودفعوا القروش وكمان غمتوا لي عوض حق الرجعة كمان.... الله يسألني البت دي بتحب عوض دة جنس حب عمري ما شفت زيه
ونحن راجعين في الحاقلة سألني عوض: عرفت المشكلة وين
- عرفتها لكن حلها صعب شديد
..... ونواصل
Post: #110
Title: Re: أي بت شديدة بتحب ليها طُلبة (صبي بناي)
Author: Kamal Mahjoob
Date: 02-14-2007, 09:59 AM
Parent: #101

العزيز طارق
غير موضوع القصة وشخصياتها المثيرة جدا وانت واحد منهم ، إلا أنه قد شدني كثيرا التشبيهات الرائعة والذكية التي تدل على خيال واسع ومشروع كاتب رائع ...
أظنك كنت حبوبة قبل كدة
Quote: قميص اصفر وبنطلون اسود عامل زي كبسولة التتراسايكلين كدة
بالغت
لك التحايا
Post: #103
Title: Re: أي بت شديدة بتحب ليها طُلبة (صبي بناي)
Author: راشد جبريل
Date: 02-12-2007, 07:03 PM
Parent: #1

سلام طارق
تعليق من اخوك السنى جبريل

حول قصة عوض . لقد اطلعت على قصة عوض من الالف الى الياء الشى الزى لفت
نظرى فى القصة المقدرة الكبيرة على الوصف الدقيق والتشبية, لقد زكرتنى
بالطيب صالح ولكن الاختلاف فى اللغة لقد استعملت اللهجة السودانية بصورة
كبيرة الفكرة جميلةوالسرد فى غاية الروعة ولكن اللهجة السودانية افسدت
العمل من المفترض ان يكون العمل باللغة العربية الفصحى مع قليل من اللهجة
السودانية كما فعل الطيب صالح فى موسم الهجرة للشمال ,على كل تمتلك موهبة
فزةوكبيرة فى مجال القصة , هزة الموهبة تحتاج لصقل وقراءة كثيرة بكل امانة
لقد ارجعتنى الى مرحلة الطفولة والشباب عندما كنا نزهب الى حى العمارات
ونصطاد العصافير ونجنى التمر الهندى والمانجة لقد كان حدث كبير وبرنامج
ترفيهى لينا.
وشكرا اخوك السنى جبريل
Post: #104
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 02-12-2007, 09:31 PM
Parent: #103


بسم الله الرحمن الرحيم
عزيزي ودجبريل ...
سلامات ...
شنو الحكايه نصوم نصوم ونفطر بي بصله ...
لسه برضه مافاهمين حاجه ...
غايتو عوض صحبك ده
شكله حايطير الحنان ده منو ...
ماتجهجهنا يازول واحسم لينا موضوع عوض ده ...


وسلام.

حاتم هاشم.
Post: #105
Title: Re: أي بت شديدة بتحب ليها طُلبة (صبي بناي)
Author: celecon
Date: 02-13-2007, 05:34 AM
Parent: #1

العزيز د.طارق

Quote: لابس ليه قميص اصفر وبنطلون اسود عامل زي كبسولة التتراسايكلين


كلن دى بالغت فيها عديل كده ...............

ليك الف تحية، تعرف البوست ده شايفه لى زمن وما فكرت ادخل بس الليلة من الصباح قلت انشوف فيه شنو البوست ده وحاتك بضحك زى المجنون الناس فى المكتب كلهم بيعاينوا لى وبوسوسو مشكور جدا
Post: #106
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-13-2007, 12:05 PM
Parent: #1


العزيز السني جبريل
يا زول مالك قاطع مننا ليك زمن
آلاء وهدى إن شاء الله بخير

يا زول الطيب صالح مرة واحدة
انا عايز الف سنة عشان احصل الزول دة
انا راجل غلبان ساكت وطُلبة يعني حتى بناي ما وصلتها
Post: #107
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-13-2007, 12:07 PM
Parent: #1


حاتم وليد هاشم كيفنك
انت يا اخوي مالك مستعجل كدي على عوض دة
ياخي كل شي بيجي بالمهلة موش زي سندوتش الهامبرغر

تليشة:
ما فضل كتير عوض خلاص ماشي موتو
Post: #108
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-13-2007, 12:09 PM
Parent: #1


حبيبنا سيليكون كيفنك
يا زول شرفتنا في بيت عوض دة
واضحك لامن تقع علي قفاك
آخرها كوم تراب يا عزيزي

سعيد جدا بوجودك هنا
Post: #109
Title: Re: أي بت شديدة بتحب ليها طُلبة (صبي بناي)
Author: serenader
Date: 02-14-2007, 02:55 AM
Parent: #1

يااللخو.. عصرت علينا شديد.. كمل لينا باقي القصة بسراع عشان نضحك ضحكة واحدة طوييييييلة.. مش تقنب تقطع لينا فيها قطيع المرارة..
الكع...
Post: #111
Title: Re: أي بت شديدة بتحب ليها طُلبة (صبي بناي)
Author: Yassir7anna
Date: 02-14-2007, 10:31 AM
Parent: #1


ود جبريل

Quote: يااللخو.. عصرت علينا شديد.. كمل لينا باقي القصة بسراع عشان نضحك ضحكة واحدة طوييييييلة.. مش تقنب تقطع لينا فيها قطيع المرارة..
الكع...


شرحو




Post: #112
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-14-2007, 03:06 PM
Parent: #1


سرينيدر كيفنك
انت يا اخوي كنت شغال جزار ولا شنو
لانه نحن البياطرة الجزارين ديل عاملين معاهم زي توم وجيري

حاضر يا سيدي حا نلكع ليك القصة
Post: #119
Title: Re: أي بت شديدة بتحب ليها طُلبة (صبي بناي)
Author: serenader
Date: 02-25-2007, 03:04 AM
Parent: #112

الحقيقة أهلي كلهم جزازير، إلا أنا البقيت خايب وباريت الجرايد.. لكين "مسعلة" المرارة دي Public Domain يدخل فيها ويخرج من شاء من محبي "العضات"..
عليك الله كان تقطع الوكت دا كلو... جبتا لينا أبو الشهيق!
Post: #113
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-14-2007, 03:08 PM
Parent: #1


ياسر حنا يا اصلي
والله بالطريقة دي التشريح ذاتو ما حا ينفع
Post: #114
Title: Re: أي بت شديدة بتحب ليها طُلبة (صبي بناي)
Author: عادل فضل المولى
Date: 02-14-2007, 03:36 PM
Parent: #113

يا حبيبنا عوض - اقصد يا طارق
تحيات حيوية قابلة للتشريح
المسلسل دا بقى مكسيكي
عليك الله جر الشريط شوية
وزيد السرعة امكن نصل لي نهاية
==
ولى آه
الصيدلة 5 سنوات
يعني روحنا حتطلع على بال ما سي عوض يتخرج ويتزوج الأميرة وينتهي المسلسل
...
يا دكتور طمنا على الحاجة الوالدة لعلها بلغت تمام العافية
ولك وللعيّل الجميل وشقيقته الجميلة
وافر المحبة
Post: #115
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-14-2007, 05:34 PM
Parent: #1


عزيزنا عادل
الوالدة الحمد لله بخير تتحسن كثير
تسلم يا سيدي
بخصوص المسلسل المكسيكي دة والله بس الراس مزحوم
وكيف الزول يلقى وقت عشان يتمو


الله يخلي ليك الوليدات الحلوين ديل يا رب
Post: #116
Title: Re: أي بت شديدة بتحب ليها طُلبة (صبي بناي)
Author: ناذر محمد الخليفة
Date: 02-14-2007, 07:13 PM
Parent: #1

طارق كيفك ..

جد يا خي الشلهتة ما كانت كويسة ..

خليتنا بس نتاوق كدة من بعيد لي بعيد
Post: #117
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-14-2007, 07:29 PM
Parent: #1


أظنك كنت حبوبة قبل كدة

كمال محجوب الاسيوطي الاصيل
ياخي شغل الحبوبات دة ما كان نضيف خلاص
Post: #118
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-14-2007, 07:33 PM
Parent: #1


طارق كيفك ..
جد يا خي الشلهتة ما كانت كويسة ..

والله يا ابو النز الزمن بقى ممحوق خلاص
وحتى لو شفتني داخل هنا بكون بهابش لي في حاجات تانية كدة

تليشة:
لو تميت ليك القصة تعزمني كوارع زي ديك
Post: #120
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-05-2007, 01:53 PM
Parent: #1

قربت اتفرغ ليك يا عوض
Post: #121
Title: Re: أي بت شديدة بتحب ليها طُلبة (صبي بناي)
Author: celecon
Date: 03-05-2007, 02:51 PM
Parent: #1

سليت روحنا ياطارق ....

تلقى العوض بتاعك ده هسه عندو 9
ونحن قصتوا ماتميناها ...

تحياتى ليك وفى الانتظار ...
Post: #122
Title: Re: أي بت شديدة بتحب ليها طُلبة (صبي بناي)
Author: Yassir7anna
Date: 03-08-2007, 09:16 AM
Parent: #1


سنة يا الحيطة














كان هرشوك قول لينايعني، مافيها حاجة عااااااااادي
نحن ناس اخوانك
Post: #123
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-09-2007, 05:25 AM
Parent: #1


سيليكون وحنا خلوكم معانا.....


تاني يوم بالعصرية دخلت بيت ناس عوض لقيت حاجة سكينة بتعوس ليها في لقيمات... وانا اموت في اللقيمات.... جريت لي بنبر وقعدت جنبها... الله ينعلك يا عوض المرة من العواسة والجري في تربية اولادها وشها سود وملامحها كلها حزينة شديد... الله بيسألني بتعوس في اللقيمات بالطشت عشان تملأ جرادلها بتاعة الطلس البيضاء ديك وتمشي تقعد جنب الدكان تبيعها وتلقط مصاريف الوليدات... شكل اللقيمات في الطشت زي قلاب الخرصانة... غلبني اقول ليها اي حاجة... ادتني صحن فيهو لقيمات وجابت لي شاي بي لبن وبقيت ابلع واحكحك في راسي... نوع خالتي سكينة دة السودان مليان بيهو وان اختلفت حكاياتهم الا انه النتيجة واحدة... كوم شفع وارادة تكسر الصخر عشان الشفع ديل يكملوا قرايتهم ويبقوا ناس كويسين.. وزي ما قال حميد ناس مجروة وتجر(تدين) عيشن كمهو وديشن هانقدر..
- طارق يا ولدي قول الداير تقولو ما تحرك عويناتك زي لستك الفلكسواجن كدي..
- انت انا ما حلفتك تاني ما تسفي الصعوط دة.. مقنطرة سفتك كدة زي درج القروش بتاع الدكان كدة
- (ضحكت لامن دموعها نزلت زي الماسورة المحلوجة ومربوطة بي دبارة).. تعرف يا طارق يا ولدي انا قاعدة اريدك ليه.. عشان بكون شايلة هم الدنيا كله فوق راسي وتجي وتخليني اضحك.... نان يا ولدي انا ما اسف كيفن من الشي البيسوو فيهو ناس عوض دة... انت ما تحمد الله الما شربتلي قزازة عرقي..
- افو انا خالتي تسكر
- نان يا ولدي عمايل صحبك دي يقبلوها كيفن والله فضل لي السكر... واصلو ان بقى كشف علي دكتور يمين الا يرشوني جبخان حا يلقوني منتهيي..
- طيب العمل شنو يا خالتي صاحبي حب البنية والبنية حبتو...
- حباهو برص... انتو مشيتو تشتغلوا ولا تحبوا.. بعدين انت مالك ما حبيت؟؟
- انا قلبي ميت ماهو قلب حب..
- (رجعت تضحك تاني)... هسا انت فهمك شنو
- نمشي نخطب ليهو وبعداك هو يموت موته مع اهل البت.. ياكل نارو
- طارق يا ولييييدي نخطبلوا بي شنو؟؟ باللقيمات الانت شايفها دي ولا بي صفايح الفسيخ اللا جوة ديلك؟؟
- ياخي البت ما قالت هي ما عايزة اكتر من الفاتحة؟؟؟
- في ذمتك يا ولدي الكلام دة كدي بيبقى؟؟؟ يا ولدي انا لابسالي تموت تخلي في كرعيني... شبشب زي النسوان ما عندي وتيابي كلها مهرودة ومقدقدة؟؟؟
- بنستلفلك الشبشب والتوب كمان...
- يا وليدي ما دايرة ولدي يتعلقلوا في حبالا دايبي
- كدي قولي بسم الله والله بيسهلها
- يا ولدي الله عرفوهو بالعقل ما شافوا
- انت كدي قولي خير وانا متاكد الله بيسهلها
- صمتت للحظة وبدا الظلام يتسرب الينا... انا يا ولدي هينة الكلام عمك عبد الله ان قدرت تقنعوا عديلة عليك وعلي صاحبك..
خليت خالتي سكينة تملا في جرادلها باللقيمات عشان تحصل تبيعها... ومشيت على الديوان لقيت عم عبد الله فاتح راديهو على اذاعة لندن وخاتي الرادي في صدرو زي كورة الشراب...
.... نواصل
Post: #124
Title: Re: أي بت شديدة بتحب ليها طُلبة (صبي بناي)
Author: celecon
Date: 03-09-2007, 05:27 PM
Parent: #1

طارق ...

تحيه وحمدالله على السلامة الاتفكيت ...

اها يا اخوى ما تعلقنا كتير ...
Post: #125
Title: Re: أي بت شديدة بتحب ليها طُلبة (صبي بناي)
Author: Abdulbagi Mohammed
Date: 03-09-2007, 06:58 PM
Parent: #124

"ارق إزيك يا اخوي
و الله ماني عاصر عليك ،وياني هنا متحكر في ضل الضحي وراجيك،
تم شغلاتك وتعال كمل الحكي
و الفورة مليون
و لحدي الحلقة الفين معاك كان الله حينا
بس واصل ما ترقع ولسه سلسة وتشد المرافعين من الغزلان
Post: #126
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 03-10-2007, 01:09 AM
Parent: #125


بسم الله الرحمن الرحيم
ودجبريل...ابوالنسب
سلامات...
ذي ما انت عارف
انو انا عم هاشم
خطيب العروسه الصغيره
ولاتكونو غيرت رايها..

ياخوي الله يكضب الشينه
اناعندي احساس انوعوض ده
حايطير الحنان ده منو ساي...

تحياتي...

حاتم هاشم.
Post: #127
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-10-2007, 01:20 AM
Parent: #1

Quote: طارق ...

تحيه وحمدالله على السلامة الاتفكيت ...

اها يا اخوى ما تعلقنا كتير ...



يا سليكون ما بتتعلق
بس انت شككتني يا ربي يكون الحصل لي عوض دة حصل ليك
Post: #128
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-10-2007, 01:23 AM
Parent: #1

Quote: و لحدي الحلقة الفين معاك كان الله حينا
بس واصل ما ترقع ولسه سلسة وتشد المرافعين من الغزلان



ود عبد الباقي كيفنك
انت يا اخوي لمن كتبت الكلام دة كنت في الدندر ولا شنو
Post: #129
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-10-2007, 01:25 AM
Parent: #1

Quote: ياخوي الله يكضب الشينه
اناعندي احساس انوعوض ده
حايطير الحنان ده منو ساي...


ود هاشم كيفنك
شكلك كدي ضيعتة ليك حنان قديم كدة.... فتو يا زول سرك في بير
Post: #130
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 03-10-2007, 01:46 AM
Parent: #1

الجميل طارق جبريل
علي القسم القصة دي متابعها من قبل عضوية المنبر وصرفت ماهيتين عليها
عليك الله تمها
دمت
السموءل
Post: #131
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-10-2007, 01:53 AM
Parent: #1

Quote: الجميل طارق جبريل
علي القسم القصة دي متابعها من قبل عضوية المنبر وصرفت ماهيتين عليها
عليك الله تمها
دمت
السموءل


السموءل كيفنك
يا زول عوض طاير المهم الماهية الجاية ما تكمل

الف الف الف مرحبا بك بيننا
Post: #132
Title: Re: أي بت شديدة بتحب ليها طُلبة (صبي بناي)
Author: صلاح الأحمر
Date: 03-14-2007, 03:49 PM
Parent: #131

العزيز/طارق
يادوب عرفنا سبب غيابك عن مجامعنا، وكل مانسألك تتحجج
لينا بانك والله مشغول وساكن بعيد في الكلاكلة صنقعت(حي
الرياض) ووكتي كلو في الشغل وبين القطر وتكاسي كازا
وماعارف شنو. اتاريك يامخستك ماعندك لاشغل لامشغلة بس
قاعد مباري لي أخونا عوض وخباراتو.يااخي فضحت الراجل
وماخليت ليهو وشي مع خلق الله.وبعدين شغلك ده شغل حساده
ساكت،يعني البنية الجكسايه المرفحه دي لو كان حبتك
انت كنت حاتحكي لينا قصتك؟ عالم جبانات.
واصل هذا الحكي الجميل ونحن معاك للطيش وحتى الشحتفه
تزيد الموضوع حلاوة..وماتسمع كلام السني اخوك فاصالة
هذا السفر في عاميته الأنيقة وأسلوبك السلس الجميل
بسخريته النفاذة وبقدراتك التصويرية الرائعة مما يدل
علو كعبك في فن القص.ولا تقلل من موهبتك فأنت قاص ضل
طريقه نحو حديقة الحيوانات.لكن يبدو أن دراستك للتشريح
أفادتك كثيرا. ...ولك كل الود اباريم صاحب الطلعة..
آسف الصلعة البهية التي نافست صلعة اخينا قاسم.
Post: #133
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-14-2007, 04:16 PM
Parent: #1


Quote: قاص ضل
طريقه نحو حديقة الحيوانات.لكن يبدو أن دراستك للتشريح
أفادتك كثيرا.


يا الاحمر يا اخوي الحيوانات دي احسن لينا من بني البشر لا شايله هم حلة وكراس حق شفع
يعني لا حصة فطور ولا دفتر حضور
ونحن مع بني البشر قلنا الرووووووووب (وبما إنك جعلي: قول الروووب للجعلي انكسار)
تسلم ابا رضا
Post: #134
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 03-14-2007, 05:07 PM
Parent: #133

طارق ياجميل

شنو الحكاية والله ما فضل لي الإ أمشي الأمتداد

وأشوف عوض مالو !

وبالعدم بزور العمارات يمكن الاقي البنيه

تكون بقت حبوبه تحكي لي باقي القصه

أبوقصي
Post: #135
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-14-2007, 06:32 PM
Parent: #1

Quote: شنو الحكاية والله ما فضل لي الإ أمشي الأمتداد

وأشوف عوض مالو !

وبالعدم بزور العمارات يمكن الاقي البنيه

تكون بقت حبوبه تحكي لي باقي القصه

أبوقصي


أبا قصي كيفنك
يا اخوي الامتداد كلنا عايزين نمشيهو
نشوف عوض وجيران عوض

بعدين ياخي ما تكبرنا ساكت وتقول جكسوية عوض بقت حبوبة
Post: #136
Title: Re: أي بت شديدة بتحب ليها طُلبة (صبي بناي)
Author: Abdulbagi Mohammed
Date: 03-14-2007, 06:46 PM
Parent: #135

يا أخي الحكاية شنو ؟
لو مسلسل مكسيكي كان إنتهي
حارسينك
وهنا راجينك
Post: #137
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-14-2007, 06:59 PM
Parent: #136


والله يا عبد الباقي
الحاجة عندي في حالة غيبوبة ليها يومين
واخوك راسو ضارب في الرباط وما عارف يسوي شنو
Post: #138
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 04-05-2007, 10:50 AM
Parent: #1


عزيزي عوض حتما ساعود اليك فقط استوعب ما حدث؟؟؟؟
Post: #139
Title: Re: أي بت شديدة بتحب ليها طُلبة (صبي بناي)
Author: انعام عبد الحفيظ
Date: 04-05-2007, 03:24 PM
Parent: #138

طارق جبريل

سلامات وحمدا لله على العودة












وبجيك راجعة
Post: #140
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 04-06-2007, 02:50 PM
Parent: #1

Quote: طارق جبريل

سلامات وحمدا لله على العودة

وبجيك راجعة



انا منتظر يا انعام
Post: #141
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 04-06-2007, 05:49 PM
Parent: #1


- عم عبد الله شايفك ليك يومين ما مشيت الشغل وما سافرت
- يا ولدي منتظر لي قط بضاعة اسوقه لي بورتسودان ولي هسا ما ملوهو
- احسن ترتاح شوية
- انت ناس اذاعة لندن دي حقو يدوك وسام ياخي انا من قمت وانت تسمع ليهم
- يت ولدي ياها تسليتنا خصوصا لمن نكون سايقين القطر مافي شي غير الاذاعة ولهيب الشمس.... صاحبك مشى الجامعة.
- ايوة بكرة ان شاء الله بمشي عليه الداخلية ازوره
- دحين انت فهمك شنو في الشئ البيقول فيه دة
- انت كدي باركها والله بسهلها... بس انت قول خير
- يا ولدي دة كلام اصلو ما بيدخل العقل.. نمشي نقول للناس ديل شنو.. نقول ليهم نحن حق الملاح عندنا في تلتلة..
- يا عمي هم موافقين كدة وحا يدبروا امورهم وبعداك انت عداك العيب
- يا ولدي ما تدخلونا في ضفورنا نحن ناس علي قدر حالنا وصاحبك دة من دون اولادي فاهم الحتة
- يا حاج والله الله بيصلحها بس انت قول خير
- ياخي الولد دة من يومه وهو صغير عامل زي لوح التلج مجننا...
- يا حاج لوح التلج هسا عايز يعرس لو خليناهو كدة بيدوب
- ضاحكا بشدة.. الله يرضى عليك يا ولدي تقنعوا يخلي الموضوع دة وكمان ان بقى ما خلاهو امرنا لله...
- بس كدي انت قول خير وكله حا يتصلح..
- ربك كريم يا ولدي

اصبحت الصباح مشيت لي عوض في الداخلية لقيته بيفطر... شافني حنكو وقع زي الدلو لمن يرموهو في البئر..
- أها خير إن شاء الله..
- كدي هسا فطرني بعداك نشوف الحاصل..
- ياخي انت غتاتك دي أصلك ما بتخليها..
جابت ليها غتاتة كمان.. طيب يا زول موت موتك انا ماشي...
- يا طارق روق عليك الله ياخي انا في شنو وانت في شنو
- انت الجكس موش حا يجي هسا
- ايوة
- خلاص انا لمن يجي الجكس حا اقول ليك الحاصل
- ياخي الجكس حا تجي معاها خالتها عشان تعرف الحاصل
- خلاص لمن تجي...
نواصل...
Post: #142
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 04-06-2007, 05:51 PM
Parent: #1


- عم عبد الله شايفك ليك يومين ما مشيت الشغل وما سافرت
- يا ولدي منتظر لي قط بضاعة اسوقه لي بورتسودان ولي هسا ما ملوهو
- احسن ترتاح شوية
- انت ناس اذاعة لندن دي حقو يدوك وسام ياخي انا من قمت وانت تسمع ليهم
- يت ولدي ياها تسليتنا خصوصا لمن نكون سايقين القطر مافي شي غير الاذاعة ولهيب الشمس.... صاحبك مشى الجامعة.
- ايوة بكرة ان شاء الله بمشي عليه الداخلية ازوره
- دحين انت فهمك شنو في الشئ البيقول فيه دة
- انت كدي باركها والله بسهلها... بس انت قول خير
- يا ولدي دة كلام اصلو ما بيدخل العقل.. نمشي نقول للناس ديل شنو.. نقول ليهم نحن حق الملاح عندنا في تلتلة..
- يا عمي هم موافقين كدة وحا يدبروا امورهم وبعداك انت عداك العيب
- يا ولدي ما تدخلونا في ضفورنا نحن ناس علي قدر حالنا وصاحبك دة من دون اولادي فاهم الحتة
- يا حاج والله الله بيصلحها بس انت قول خير
- ياخي الولد دة من يومه وهو صغير عامل زي لوح التلج مجننا...
- يا حاج لوح التلج هسا عايز يعرس لو خليناهو كدة بيدوب
- ضاحكا بشدة.. الله يرضى عليك يا ولدي تقنعوا يخلي الموضوع دة وكمان ان بقى ما خلاهو امرنا لله...
- بس كدي انت قول خير وكله حا يتصلح..
- ربك كريم يا ولدي

اصبحت الصباح مشيت لي عوض في الداخلية لقيته بيفطر... شافني حنكو وقع زي الدلو لمن يرموهو في البئر..
- أها خير إن شاء الله..
- كدي هسا فطرني بعداك نشوف الحاصل..
- ياخي انت غتاتك دي أصلك ما بتخليها..
جابت ليها غتاتة كمان.. طيب يا زول موت موتك انا ماشي...
- يا طارق روق عليك الله ياخي انا في شنو وانت في شنو
- انت الجكس موش حا يجي هسا
- ايوة
- خلاص انا لمن يجي الجكس حا اقول ليك الحاصل
- ياخي الجكس حا تجي معاها خالتها عشان تعرف الحاصل
- خلاص لمن تجي...
نواصل...
Post: #143
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 04-06-2007, 06:04 PM
Parent: #142


بسم الله الرحمن الرحيم
ودجبريل
سلامات..الحمد لله علي السلامه.
اسمع يازول
عوض ده موضوعو سخن خلااااااص
جابت ليها خالات وكده
لكن الظاهر انو انت واهل عوض
دايرين تطفشو الحنان من الزول ده
غايتو الله يكضب الشينه.
تحياتي...
حاتم هاشم.
Post: #144
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 04-08-2007, 06:46 AM
Parent: #143

الحبيب د. طارق

عودا حميدا ومنتظرين

يامبدع عوض والخاله والجكس

بالله واصل لينا القصة بقت الف ليلة وليلة

لازم يومأ حلقة ونحن معك قلبا وقالبا
Post: #145
Title: Re: أي بت شديدة بتحب ليها طُلبة (صبي بناي)
Author: serenader
Date: 04-12-2007, 07:46 PM
Parent: #1

الروووووب يا ود جبريل...
Post: #146
Title: Re: أي بت شديدة بتحب ليها طُلبة (صبي بناي)
Author: serenader
Date: 04-14-2007, 12:04 PM
Parent: #1

طيب لبن قديم...
بتمها...!
Post: #147
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 05-16-2007, 05:01 PM
Parent: #1


والله يا سريندر مافي مزاج خالص
وأهو الواحد بيتعايش مع الموت
صعب جدا استيعاب أن تفقد والدتك وأخوك في شهر واحد
الحمد لله على كل حال...
لو الله كتبلنا باقي عمر بنتم ليكم القصة
Post: #148
Title: Re: أي بت شديدة بتحب ليها طُلبة (صبي بناي)
Author: Hatim Gubara
Date: 05-16-2007, 10:33 PM
Parent: #147

ماتقول لي لكين... ياتو عوض?

أمتعتني يا صديقي...
Post: #149
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 05-17-2007, 04:18 PM
Parent: #1


عزيزي د. حاتم جبارة
جزء كبير من تلك الحكاوي عايشتها معي يا صديقي
حقيقي ليتني استطيع تكملة القصة
رحم الله والدتكم (خالتنا احسان)
كانت تقول لي دائما انت واخوك دة حكاويك ما بتكمل
Post: #150
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 05-17-2007, 07:16 PM
Parent: #1


نواصل...
أها ونحن قاعدين في الكلية فجأة تطل علينا البت وخالتها وأختها كمان... جملة الإيمان خالتها اشد منهم كلهم... زولة منعمة ورايقة كدة... تقول رز بي لبن... انا في الأول قايلها ما متزوجة اتاريها فايتة الاربعين وعندها 3 أطفال كمان...
- سلام يا شباب
- عوض قام يتراشق: اهلا بالناس الحلوة... دة صحبي طارق.. ودي خالة الشباب حنان...
(ابو الزفت يا عوض الناس ديل شكلهم حا يطيروا حنانك زاتو)...
- اها فطرتو يا شباب
- والله انا فطرتة بس طارق دة لسة ما فطر
- انت عوض خلصت محاضرات ولا لسة
- خلصتة
(يمين زولكم كان عنده امتحان ملاحق كان قال كملت)
- خلاص نمشي نفطر كلنا مع بعض في اراك اوتيل
- انا دنقرت علي عوض في اضانه: ياخي شغلنا في البنا دة كله لو جمعناهو ما بفطرنا في اراك اوتيل دة اتخارج يا ولدنا انا عندي جنيهين بس حق الرجعة
- انت قاعد تقول لي صاحبك شنو
- لا ابدا
- ياخي انا عازماكم الليلة وعايزة اتعرف عليك انت بالذات كويس ممكن...
- يا ستي انا ما عندي مانع بس ليه انا بالذات يعني
- عشان انت وقفت مع الشباب ديل وقفة سمحة وبعدين انا عايزة اعرف عملت شنو مع اهل عوض عشان نفرح بيهم
- يا زولة انت مالك مكبرة القصة كدة انا حاولت اساعد صاحبي وبس رغم انه الموقف صعب جدا
- انا عارفة وحاسة كدة
..... ومشينا اراك اوتيل....
Post: #151
Title: Re: أي بت شديدة بتحب ليها طُلبة (صبي بناي)
Author: salma subhi
Date: 05-17-2007, 07:25 PM
Parent: #150

بوست لذيذ جداٍ أخ طارق

ومواصلين معاك
Post: #152
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 05-18-2007, 10:50 AM
Parent: #1


الفاضلة سلمى صبحي
وجودك بيننا اكيد سوف يسعد (عوض)
Post: #153
Title: Re: أي بت شديدة بتحب ليها طُلبة (صبي بناي)
Author: serenader
Date: 05-18-2007, 11:35 AM
Parent: #1

Quote: والله يا سريندر مافي مزاج خالص
وأهو الواحد بيتعايش مع الموت
صعب جدا استيعاب أن تفقد والدتك وأخوك في شهر واحد
الحمد لله على كل حال...
لو الله كتبلنا باقي عمر بنتم ليكم القصة


أخونا طارق جبريل
حمد لله على سلامتك أولاً.. وليست لدي أدنى فكرة عما حدث في كلامك المقتبس بعاليه.. لكن إن فهمته بشكل صحيح: فأحسن الله عزءاكم.. وتقبلهم الله بقبول حسن، والزمكم الصبر الحميل.. لله ما أعطى ولله ما أخذ.. وإنا لله وإنا إليه راجعون..
تقبل إعتذاري عن سخيف إلحاحي، وتجاوز عن إبطائي عليك بالتعزية.. فغيبتي عن هنا طالت..
تحياتي
Post: #154
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 05-18-2007, 11:39 AM
Parent: #1


العزيز سرينيدر
التحايا الكبرى
للأسف الشديد الفقد كان حقيقة (الوالدة والاخ) والحمد لله على كل حال
كن على يقين أن الحاحك الحاح صاحب حق وليس طالب صدقة

محبتي الاكيدة
Post: #155
Title: Re: أي بت شديدة بتحب ليها طُلبة (صبي بناي)
Author: غباشي
Date: 05-18-2007, 12:20 PM
Parent: #1

Quote: نواصل...

العزيز طارق جبريل
عودا حميدا................
Post: #156
Title: Re: أي بت شديدة بتحب ليها طُلبة (صبي بناي)
Author: serenader
Date: 05-18-2007, 01:39 PM
Parent: #1

Quote: العزيز سرينيدر
التحايا الكبرى
للأسف الشديد الفقد كان حقيقة (الوالدة والاخ) والحمد لله على كل حال
كن على يقين أن الحاحك الحاح صاحب حق وليس طالب صدقة

محبتي الاكيدة


لا حول ولا قوة إلا بالله أخي طارق..
جعل الله الجنة مثواهم وتغمدهم بالرحمة الواسعة، وأمطر عليهم من شآبيب مغفرته..
لك الصير الجميل والعزاء الحار...
Post: #157
Title: Re: أي بت شديدة بتحب ليها طُلبة (صبي بناي)
Author: عامر تيتاوى
Date: 05-18-2007, 05:12 PM
Parent: #156

العزيز طارق جبريل
عودا حميدا ياصديقى
هذا مما يذهب الحزن والاسى

كن بخير ياعزيزى
Post: #158
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 05-18-2007, 06:12 PM
Parent: #1


عزيزي تيتاوي
نحاول أن أن نتأقلم في غياب الاعزاء
ألهمنا الله الصبر
صدقني ارتاح جدا حين اكتب هنا بين احبابي



الجميل سرينيدر
احترامي الاكيد
Post: #159
Title: Re: أي بت شديدة بتحب ليها طُلبة (صبي بناي)
Author: Raja
Date: 05-18-2007, 06:30 PM
Parent: #158

طارق العزيز..

سلامات ومحبات..

طبعا أول مرة أعرف إني (بت شديدة) من عنوانك ده . لأني من صغيرة كنت بقول عايزة أعرًس بنُا..
بموت في الطين والطوب وريحة الأسمنت. وما حصل مرًيت في الشارع بمكان بناء إلا وشلت لي طوبة كتذكار..
منظري بيكون (أشتر) وأنا شايلة طوبة ..
..
هسع بعد ما عرفتا إن الطُلبة بيكون صيدلي أو بيطري حأمشي أراجع مشروعي النسيتو ده ..

تحياتي
Post: #160
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 05-18-2007, 08:05 PM
Parent: #1

Quote: هسع بعد ما عرفتا إن الطُلبة بيكون صيدلي أو بيطري حأمشي أراجع مشروعي النسيتو ده ..


تعرفي يا (استاذة) رجاء (طلبة بيكلم صحافية وكدة)
في ناس كتار جدا مفتكرين الطُلب ديل ناس هامشيين كدة وعايشين في حافة الحياة
والله لو الواحد عندو مزاج يكتب ليه درر خصوصا عن اوانا الشلك لأنه انا اشتغلت معاهم كتير كطلبة ولي صداقات مستمرة حتى يومنا هذا

بعدين حكاية ترجعي للماضي دي قلبتي فيها هوبة
انت برضو كنتي فاكرانة ناس كشوش


محبتي الاكيدة
Post: #161
Title: Re: أي بت شديدة بتحب ليها طُلبة (صبي بناي)
Author: Raja
Date: 05-18-2007, 08:44 PM
Parent: #160

(الأسطى) د. طارق ..

أكيد هو عالم مليان.. خاصة إنهم بيقومو ببناء شئ حقيقي بيكبر قدامهم كل يوم. وأكيد عندهم من الصبر والحكمة أكتر مننا..




تعرف المشكلة حتكون شنو؟ أقوم أمشي أنفذ المشروع يقوم يمشي يعجب بت شديدة تانية ..

دام ودنا..
Post: #162
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 05-22-2007, 05:06 PM
Parent: #161


Quote: تعرف المشكلة حتكون شنو؟ أقوم أمشي أنفذ المشروع يقوم يمشي يعجب بت شديدة تانية ..

كدة يا دوب حا تكوني عرفتي غلاوة الطُلب
Post: #163
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 05-22-2007, 11:22 PM
Parent: #162


بسم الله الرحمن الرحيم
العزيز طارق ود جبريل
سلامات...
عودا حميدا
يلا نجض لينا موضوع عوض ده
تحياتي...
حاتم هاشم.
Post: #164
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 05-23-2007, 07:58 AM
Parent: #163

د.طارق صبااااااااحاتك طلبات كل أحباب عوض!

عودا حميدا الي المباني العماراتية الشاقه!

وملاطم المونه وكماين الطوب الأحمر والحراريّ!

بحرارة شوقنا الي عوض وجكس عوض علينا العوض!

ومننا والفينا العوض!

،،،أبوقصي،،،

أن شاءالله بقية الفلم حمضتوا في شهر زاد ولا الخليج!

بسم الله يبدأ العرض!
Post: #165
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 05-29-2007, 05:23 PM
Parent: #1


حاتم ومجدي كيفنكم
والله المزاج خربان تقول بيت جالوص
بس بجيكم صادي
Post: #166
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-01-2007, 04:50 PM
Parent: #1


نواصل..
مشينا الاراك هوتيل..
- اها يا شباب تفطروا شنو انا بقترح ناخد سمك فرايد...
- شوف يا عوض قول لي الزولة دي تشوف لينا فول زيتو كتير عشان نتمسح بعد ما نكمل.. فرايد شنو
وهي زاتها فرايد دي تطلع شنو انا السمك البعرفو القرقور وكان بالغتة البلطي... انا عايز اغمس
- كدي روق يا طارق عليك الله وخلي جنك دة الزولة دي عازماك وعايزة تعرف ناس أبوي قالوا شنو
- انتو بتقولوا في شنو..
- لا مافي حاجة
ضربنا الأسماك والسلطات...
- يا شباب شاي ما بطال
- يا طارق كدي تعال اقعد جنبي
- اوكي
- اها الحصل شنو
- والله الناس ديل انا اقنعتهم بعد صعوبة لكن لي هسا
هم ما مقتنعين وشايفين القصة ما بتجي يمشوا يد قدام ويد وراء
- يعني ما حا يجوا
- لا ما كدة بس بصراحة كدة ما مقتنعين انه يمشوا مع ولد لسة بيقرأ
وكمان الحتة بتاعة إنه انتو تتكفلوا بي كل حاجة دي وهم يجوا يد قدام ويد وراء شوية مأزماهم
- انت ما شرحت ليهم
- اكيد بس هم شايفين القصة قصة كرامة... والناس ديل رغم فقرهم إلا إنه عندهم كرامة فايتة الحد
وشايفين إنهم حا يجوكم عشان خاطر ولدهم .. يعني ما برضاهم
- ممكن انا امشي اقابلهم
- بيعتمد على الشئ العايزة تقوليهو ليهم
- انا بس عايزة اشرح ليهم انه نحن النسوان بس العارفين الأمور حا تمشي كيف...
لانه رجالنا ما عارفين انه خالات البت هم الحا يشتروا كل حاجة... الدبل وامور الخطوبة كلها... حتى لبسة عوض من عندي انا
- والله أشوفهم وأرد عليك... بس حاولي إنك تفهمي نفسيتهم..
يعني لو حسوا انك بتجرحيهم حا تبوظي القصة كلها...
- هو ولد عمها دة ما حاسس إنه البت ما عايزاهو..
- حاسس بس هو مُصر
- ياخي الموضوع دة عجيب من أوله
- قالوا لي إنك معترض
- أنا ما معترض ولا حاجة ولا عندي الحق دة... بس أنا بعرف أهل عوض كويس..
ناس طيبين وفي حالهم.. ومنتظرين عوض دة ينتهي بتين عشان يساعدهم مع أخوانه
- كل شئ حا يتسهل..
الشئ الحارقني وفاقع مرارتي عوض شغال يتبسم ويكب في الجلكسات مع القرمبوز
ومرة مرة يخت يدو في خدو تقول عايزين يصوروهو في جنة الأطفال
وأخت الجكس تراقب فينا أنا وخالتها زي رئيس العمال
- انت ما شايفة إنه الموضوع غريب
- غريب... بس بتنا بتحب الولد شديد وأخير لينا تعرسوا بي رضانا وقدام عينينا من تعرسوا من ورانا
- عوض زول كويس شديد
- انا عارفة كدة كويس... عشان كدة نحن عايزين نشتري راجل... عندك اعتراض
- ابدا ابدا
- انت ما عندك مشروع زواج كمان
أها بدينا في الكلام الأعوج... كان كدي نقوم نمشي...
- لسة بدري.... المشوار طويل
- يعني ما عندك جكس
يا النبي نوح... بدينا في جرجير الكلام والبحيت
- لا على باب الله
- يعني مافي واحدة عاجباك
- حتى لو في حا يكون الموضوع سراب ساكت
- ياخي إنت ليه متشائم كدة
- ما متشائم بس تقدري تقولي عارف حدود الحاجات العندي كويس وما عايز اتشعلق في الهواء
- حتى لو في ناس انت عاجبهم شديد
أهاااااااااااااااااااااااااااااااااااااااا
يا سيدي الحسن.....
Post: #167
Title: Re: أي بت شديدة بتحب ليها طُلبة (صبي بناي)
Author: عامر تيتاوى
Date: 06-01-2007, 05:06 PM
Parent: #166

الريس طارق جبريل
Quote: يا سيدي الحسن.....


ابداع .. تسلم ياابو ريم
عوض لقاها لكين
Post: #168
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-01-2007, 05:39 PM
Parent: #1


ازيك يا ريس تيتا
والله عوض اتجدع شديد
Post: #169
Title: Re: أي بت شديدة بتحب ليها طُلبة (صبي بناي)
Author: Hatim Gubara
Date: 06-01-2007, 08:43 PM
Parent: #168

وطلع المستخبي يا مجرم...
Post: #170
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 06-01-2007, 11:11 PM
Parent: #169


بسم الله الرحمن الرحيم
طارق وليد جبريل
سلامات...
Quote: أهاااااااااااااااااااااااااااااااااااااااا
يا سيدي الحسن.....

اظهر وبان وعليك الامان
انت ماتقول كده من زمان
انو طرف السوط هابشك .
Quote: وطلع المستخبي يا مجرم...

قال عوض قال .

تحياتي...
حاتم هاشم.
Post: #171
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-04-2007, 11:27 AM
Parent: #1


حاتم ود جبارة وحاتم ود هاشم
مالكم دايرين تقلبوها علينا بعد ما كانت علي عوض
Post: #172
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 06-06-2007, 09:00 AM
Parent: #171

ياأبوريم ومحمد الطارق

شنو يازول علينا العوض ومن منو العوض نأخده لو أنت نسيت أنا مانسيت!!
Post: #174
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-06-2007, 12:47 PM
Parent: #172


والله يا ابو قصي الزمن بقى ممحوق
Post: #173
Title: Re: أي بت شديدة بتحب ليها طُلبة (صبي بناي)
Author: عبد الدائم سيد أحمد
Date: 06-06-2007, 09:20 AM
Parent: #1

ما عندك صورة لصاحبك ده
او ليكم انتو الاتنين ولو بهدوم الشغل

بعدين متين وصلت الصفحة الخامسة انت فاطي سطر
ولا بتبنى بالبلوك .
Post: #175
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-06-2007, 12:51 PM
Parent: #173


يا نضيف مالك عايز تجيب كسافتنا
يمكن نخت الصور هنا بتاعة الشغل يقوموا يسحرونا
Post: #176
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-12-2007, 05:16 PM
Parent: #1


أها يا الحبان جيناكم صادين...
يوم بالمساء اسمع صوت الحاج من الشارع مع العصرية بيكورك:
- يا طارق في جماعة عايزنك
ألقى ليك خالة البنية ومعاها واحدة تانية وعربية تقول يا ليل والله جنسها شنو ما عارف...
والله يستر الجلكيم خلى قراية الجريدة وبقى يشوف فينا
- سلام يا طارق
- وعليكم السلام
- ياخي نحن قلنا نسأل منك في الأول عشان إنت تدخلنا لي أهل عوض ودي اختي محاسن
- ما في مشكلة انتظروني دقيقة
دخلت لقيت خالة سكينة تعوس في اللقيمات ومقنطرة سفتها زي ترلة القندران
- يا خالة خليك من العواسة دي نسايب عوض جوا يشوفك
- النبي فوقك يا ولدي
- أيوة قومي شوفيهم
دخلت خالات البنية عند أم عوض ومشيت اقعد مع أخوانه
لأنه الجلكيم دة برة حا يبدأ يزرزر فيني برة عشان كدة اخير يزرزنا مع العشاء
وأصلو العشاء ياهو الفول دة مع زرزرة الجلكيم بيبقى تركين
......
شوية اسمع ليك يا طارق يا طارق
جيت جاري لقيت النسوان خلاص مارقين من جوة ويتبسمن
وأم عوض وأبوه مودعنهم لي برة.... شكلو كدة عوض خلاص اتورط
- أها يا جماعة فتناكم بي عافية ومن هنا اسبوعين تشرفونا وأنا قبليها بي كم يوم بجيكم براي
أبو الزفت الكلام دخل الحوش
- شوف يا طارق الناس ديل حا يجوا يتقدموا رسمي وانت لازم تكون معاهم
يا النبي نوح... وأنا في شنو
- ياخي إنت صاحب العريس ووجودك مهم جدا
- ام عوض: هو لو ما مشى أنا ذاتي ما بمشي ياهو ولدي التاني
- يا حاجة تاني شنو قولي ولدك العشرين
وكلهم ضحكوا لي قعر اضنيهم والنسوان ركبن عربيتن ومشن
وأنا مشيت لي زرزير أبوي
... خلاص بقينا على المشي ليهم بعد أسبوعين
... نواصل
Post: #177
Title: Re: أي بت شديدة بتحب ليها طُلبة (صبي بناي)
Author: Hatim Gubara
Date: 06-12-2007, 08:41 PM
Parent: #176

واطاتك أصبحت مع العم جبريلا...
Post: #180
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-13-2007, 10:56 AM
Parent: #177


يمين يا ود جبارة زرزروني زرزير عدوك
يمين أنا قايل القيامة قامت
Post: #178
Title: Re: أي بت شديدة بتحب ليها طُلبة (صبي بناي)
Author: امل احمد عمر
Date: 06-13-2007, 09:19 AM
Parent: #1


أستاذ طارق ..

كلامك سمح .. وشحتفتنا ..

منتظرين البقية على نار

مودتي
Post: #181
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-13-2007, 10:57 AM
Parent: #178


امل كيفنك
الشي العجلا فيهو ماها مضمونة
الشي دايرلو نار منقد ما نار غاز

عوض سعيد بوجودك هنا

محبتي
Post: #179
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 06-13-2007, 09:41 AM
Parent: #1

غايتو سيدي الحسن دي ضحكتني لحد الدموع
تسلم يامبدع
كسرة
يا دكتور ماتتجرجر معنا
Post: #182
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-13-2007, 11:01 AM
Parent: #179


السمؤل كيفنك
نان الما بخليني اقول يا سيدي الحسن شنو
القصي يا زول مولعة من بدت
اماني النسوان ديل ماهن قادرات
يا زول اصبر ساكت من الجايي
Post: #183
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 06-13-2007, 12:20 PM
Parent: #182

السفه دي المتل دقار القندران

حق عمي جبريل وخالات العروسه شافن

السفًه ولا ماشافوها في خشم الخاله

كان فرتكت اللمَه الطاعمه دي والله

كان كدي أجيب عنقريبي في درابزين

عمي جبريل تجيني زغروته طاشه تفلعني

من ناس العمارات ديل لكن حقت ناس عوض

بتعوق عديل ومع سفَه تدوخ طووووووالي

متابعين الكلام دخل الجدَ والجديد شديد.
Post: #184
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-13-2007, 03:38 PM
Parent: #1


مجدي كيفنك
خليك جاهز الربة خلاص قربت
Post: #185
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-13-2007, 03:48 PM
Parent: #1


أها يا الحبيبين مرت الاسبوعين وبقينا في الكلام الجد
شفنالنا تلات عربيات وبوكسي عشان البلتون أليل عوض دة
انا اندرعتلي في بنطلون وقميص كان عاجباتني جايبن معاي من مصر
ومشيت من دولاب الحاج اتريحت ومشيت بيت ناس عوض
أها الرجال جاهزين.. خيلانه واعمامو اتنين واخوانه الكبار علي النسوان
ما جهزن لي هسا وأبوهو ينقنق في التأخير... ونحن ما عايزنه يحرِن...
- فجأة: يا طارق... طارق تعال... اخت عوض نادتني
- شنو يا حنان مالكم ما جهزتو لي هسا
- ياخي امي قالت إلا تشيل معاها حُقة الصعوط
- يا حاجة صعوط شنو كمان التشيلي معاك في العمارات
- نان يا ولدي إن بقيت خرمت هناك أسوي شنو
- كمان عايزة في يوم خطوبة ولدك تقنطري سفتك زي الكبريتة المفتوحة
- الله يقلعك.. نان ان خرمت اسوي شنو
- عضي طرف توبك
- طيب بدل ما اعضيهو ما اختلي فيهو سفايي فرد ويحيدي
- انت قايلاها حلاوة كرملي... امرقي انا اصلي عارفك خرفتي
- هو الشي الهسا ماشين نسوي دة ما ياهو الخرف ذاته
- سمح امرقي لامن نجي بوريك الخرف كيفنهو
... ومشينا يا الحبان.... تيت تيت تيت... لامن وصلنا العمارات
... اهلا مرحب شرفتو
... اتفضلوا اتفضلوا
دخلنا لقينالكم الدنيا هايصي... والبيت مليان رجال غلاد غلاد
يمين حسين الجسمي بالنسبة ليهم ناعومي كامبل
النصايب تقول بياكلوا تِبِنْ منفخين زي شواويل الكاويق (شواويل مليانة بي ورق شجر المنقة)
... والنسوان سمحات ومتمرات عكس رجالن.. شوف عيني الواحدة فيهن تقول
للقمر قوم وأنا أقعد مكانك وباين عليهن مستلمات رجالن...
أما إن كان للقرمبوز أليلُم يمين من سماحتن
قلب الواحد ينتِل دق دق دق دق زي مروحة الطربيزة...
أماني صحبي ما وقعلو وقعتن سمحي خلاص...
أنا علي العلي مشيت أعاين في الحيط البنيناهن وبقلَنا سبب في الشي الحاصل دة
... جات جنبي خالة البنية: إنت ما عايز تنسى إنك طُلبة؟؟
- أنسى كيفن وهي كانت سبب الشي دة...
- امشي اقعد انا بعدين عايزاك
... يا سيدي الحسن تنجدني من المرة دي
شكلها كدي ناويالي علي نيي....
عوض انجعص جنب ابوهو... الحقيقة شكله اتغير بس يكتل من الضحك
لابسلو بنطلون رمادي وقميص ابيض وبابيون احمر وجكيت رمادي
انا الكاتلني من الضحك البابيون المشنط في رقبتو دة لأنه ذكرني عيد الضحية
لامن يختولك دهن الكرشة وفوقه اب دمام ويقولولك ودو للنسوان...
... اتوهطو الرجال وبدوا الكلام..
... ونواصل
Post: #186
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-14-2007, 11:54 AM
Parent: #1

بس انهي الفي دي دة واجيك يا عوض
Post: #187
Title: Re: أي بت شديدة بتحب ليها طُلبة (صبي بناي)
Author: غباشي
Date: 06-14-2007, 05:34 PM
Parent: #1

Quote: يمين حسين الجسمي بالنسبة ليهم ناعومي كامبل

دي بالغت فيها يا طارق
Post: #188
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-14-2007, 05:42 PM
Parent: #1


غباشي كيفنك
يا زول النصايب وقعين في العلايق وليهم جضوم وكروش زي ازيار المدارس
Post: #189
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 06-15-2007, 11:56 AM
Parent: #188


بسم الله الرحمن الرحيم
طارق ولد جبريل
سلامات...
Quote: يا سيدي الحسن تنجدني من المرة دي

سيدي الحسن تعبان معاك انت وعوض تعب شديد .
غايتو عوض ذولك ده خطوبه ما خطب
ونحن بي جاي ولدنا عديل كده

تحياتي...
حاتم هاشم.
Post: #190
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-15-2007, 04:47 PM
Parent: #189


Quote: ونحن بي جاي ولدنا عديل كده


حاتم وليد هاشم كيفنك
اخير انت ولدت اماني عوض ما انهرا واتبهدل بص اصبرلي شويي
Post: #191
Title: Re: أي بت شديدة بتحب ليها طُلبة (صبي بناي)
Author: الصادق صديق سلمان
Date: 06-16-2007, 09:05 AM
Parent: #1

الأستاذ طارق جبريل

يعني القصة دي حا تمها لينا بعد كم كدا؟؟؟؟

Quote: لابسلو بنطلون رمادي وقميص ابيض وبابيون احمر وجكيت رمادي
انا الكاتلني من الضحك البابيون المشنط في رقبتو دة لأنه ذكرني عيد الضحية
لامن يختولك دهن الكرشة وفوقه اب دمام ويقولولك ودو للنسوان...


كلاماً سمح والله يا استاذ طارق

أبوفتحية
Post: #193
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-18-2007, 11:34 AM
Parent: #191


ابو فتحية كيفنك

والله بتمها ليك بس اصبرلي شويي
Post: #192
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 06-16-2007, 11:07 AM
Parent: #1

غايتو لهجة الشايقية مجضمة
غايتو انا حارسك حرسة حبوبوتي لي حلة الويكي
تسلم يارائع
سموءل
Post: #194
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-18-2007, 11:35 AM
Parent: #192


السمؤل كيفنك
النبي فوقك ما تحكيلنا حكاية حبوبتك دي مع ناس الويكي
Post: #195
Title: Re: أي بت شديدة بتحب ليها طُلبة (صبي بناي)
Author: serenader
Date: 06-18-2007, 08:36 PM
Parent: #1

أها؟؟؟؟؟؟
Post: #196
Title: Re: أي بت شديدة بتحب ليها طُلبة (صبي بناي)
Author: serenader
Date: 06-18-2007, 08:44 PM
Parent: #1

Quote: انا الكاتلني من الضحك البابيون المشنط في رقبتو دة لأنه ذكرني عيد الضحية
لامن يختولك دهن الكرشة وفوقه اب دمام ويقولولك ودو للنسوان...


الله يجازي محنك يا طارق.. ضحكت لمن الفول طلع بي نخرتي..
أها؟؟؟؟
Post: #197
Title: Re: أي بت شديدة بتحب ليها طُلبة (صبي بناي)
Author: yasir Abdelgadir
Date: 06-19-2007, 06:09 AM
Parent: #196

ود جبرين سلام...
انا كنت قايل نفسي نجيض ...ركبت من محطة العمودين القبل الاخيرة ...لكن طلعت جعلي عوير ..بعد مافتحت البوست في نهاية الصغحةالتانيةوقلت اكيد خلص
Post: #199
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-19-2007, 11:07 AM
Parent: #197


ود عبد القادر كيفنك
يا زول بحت كويس
بس لا تعترلك في درابة من ألات عوض ديل
Post: #198
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-19-2007, 10:58 AM
Parent: #196


Quote: أها؟؟؟؟


سرنيدر كيفنك
جاييك بي مهلة للتقيل بس اصبرلي
Post: #200
Title: Re: أي بت شديدة بتحب ليها طُلبة (صبي بناي)
Author: Wathig Makki
Date: 06-19-2007, 07:39 PM
Parent: #198

طارق ياخوي ماااااراجينك
Post: #202
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-20-2007, 11:03 AM
Parent: #200


الواثق كيفنك
والله اخوك مزنوق زنقة عدوك عندي مجلة لازم تمشي المطبعة يوم الخميس
والمغاربة ديل مزازني فيها بس اتمها وبجيك صادي


سعيد بي وجودك هنا
Post: #201
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 06-20-2007, 10:56 AM
Parent: #1

الجميل د0طارق
حارسنك
اوعة من البوست ده يحتل
يرفع الي الصفحة الاولي الي حين حضورك
تسلم
Post: #203
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-20-2007, 11:05 AM
Parent: #201


السمؤل كيفنك
بجيك راجع بس اصبرلي
وشكرا على العتالة للبوست
يعني كان قابلناك زمان كنت انت ذاتك اشتغلت معانا طلبة
Post: #204
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 06-20-2007, 12:06 PM
Parent: #203

طارق طالبين القرب منك كيف؟

طريقك كل شوق وريد!

أخلص وتعالي شنو قصتكم مع المجلات دي ؟

ياأولاد جبريل وعلاقة الصحافة بيكم تقوموا ترحلوا كما ليها وتحيرونا.
Post: #205
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-21-2007, 10:02 AM
Parent: #204


حبيبنا مجدي
الصحافة بقت غدرنا نسوي شنو عاد
اصبرلي بجيك راجع مع عوض
Post: #206
Title: Re: أي بت شديدة بتحب ليها طُلبة (صبي بناي)
Author: AbuAla
Date: 06-21-2007, 10:11 AM
Parent: #1

Quote: سلام اخى طارق جبريل

لاول مرة اشوف سرد بالطريقة ده
ده انت بهدلتنا على الاخر
واصل بس مش بالطريقه ده خلصنا من صاحبك عوض ده وعاوزين نعرف انت وضعك حيكون كيف
مع خالص مودتى لك ولكل المتابعيين


محمد ادريس زمراوى
Post: #207
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-21-2007, 02:39 PM
Parent: #206


زمراوي كيفنك
نحن هسا في عوض انا الجابني شنو في الكلام


محبتي الاكيدة
Post: #208
Title: Re: أي بت شديدة بتحب ليها طُلبة (صبي بناي)
Author: الشيخ إبراهيم الشيخ
Date: 06-21-2007, 02:53 PM
Parent: #207

الاخ طارق جبريل

يا خي في كده نحن لو عارفين كنا فتحنا ليك ولعوض زاتو

يازول مالك علينا كرهتنا الحب زاتو اسع عوض ده كان دخل

البوست يتاعك ده وحاتك هو زاتو يروح وما يعرف راسه من رجليه

والله بصراحة صبرنا كمل خلاص وقلنا الروووووووووووووووووووووب

حن علينا وفكنا من الموضوع ده والله والواحد عوض ده بقى ليه زاوالة

عديل كده اليوم كلوا يفتش في طارق عشان يشوف عوض ... ياربي عاد لمتين

بس بقول ليك الفيك اتعرفت وخوتك طب ما بناباها.

الرووووووووووووووووووووووووووووووووووووووووووووووووووووووووووب


واصل إبداعك نحن معاك للحول

اكيد مودتي
Post: #209
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-22-2007, 02:58 PM
Parent: #208

الشيخ كيفنك

انت قايل عوض ما عارف الشي البيتكتب هنا
والله واصل لي قعر اضانو


سعيد بي وجودك هنا
وبتم ليك القصة بس اديني حبيتين وكت كدة
Post: #210
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-22-2007, 05:05 PM
Parent: #1


... سلام يا الحبان
سامحونا باقي كنت مزنوق في شغل يهد الحيل..
.... نواصل:

واحد من خيلان عوض قعد يفلعص في الكلام ويعوج فيهو...
انا في سري اقوله: ياخينا اكشح كلامك فسراع خلنا النمش نشوف بوشنا.. الفلهمة العليك شنو انت جايي ايد ورا وايد قدام
المهم الزول قعد يطول في الكلام ويعوج فيه لامن وصل حتة: يشرفنا ويسعدنا إننا نناسبكم
يمين ابو البت بس قال: مرحب بيكم وشرفتوا... النسوان فقعن الزغاريد .... ايويييييييييي يو يو يو
انا طوالي عرفت إنه الرجال ديل قاعدين دلاليك ساكت..
وووب عليك يا عوض اماني ما وقعت وما سميت... انا خايف اجي القاك مزرزر زي أبين كروش ديل لا تهش لا تنش
... مبروك مبروك ربنا يكمل على خير
... شرفتونا والله بي وجودكم
... د. عوض في عيونا إن شاء الله
سبحان الله هو عوض متين بقى دكتور وهو لليلي الاسبرين ما كملو
.. المهم يا الحبان صواني الخبايز والعصاير بقن ينطاقشن وانا اسكت ابلع واشرب
اخدنالنا صني كدي عشان الجماعة يتعارفوا وجات خالة العروس قالت الشباب لازم يلبسوا الدبل
بس يا الحبان يجن خالات العروس وبنات خالاتها وبنات عمها مقدمات العروس والدنيا هاصت تاني
النصيحة لي الله البنيي سمحة سماح يكتلو زول
قعدوها هي وعوض في كراسي ماهلات كدي
وخالة العروس طلقت البخور وجابوا الدبل والحاجات
وعوض من شدة الفرح عيونو يتحركن زي البليي الخاتنها في كوريي
لبسوا دبلم
وفجأة دخلت غنايتا غليييدي قالوا اسمها حواء قندران ولا ترلا ما عارف
الزولة دي قعدت تلعلع والشباب دة هاص وختوا عوض وخطيبتو في النص وهاك يا رقيص
خالة البنية جات جرتني من يدي ودخلتني الدائرة واختلي قلدي مع عوض شديدي والله من قلبي
وبدينا نسكسك وخالة العروس تلزني وسط البنات
وانا اقول يا ربي تمرقني سالم الليلي
وفجأة شفتلي واحدا ليه فقهة كدي زي التلكي (الخشبة البيكسروا فيها الجزارين اللحم)
زولكم منجعصلو في كرسي واللحم عليه كتير لامن مدفق من الكرسي بس تقول عجين خميرتو زايدي نازل من الماعون
الولد عيونه محمري وشكل وشه ينعل قفاهو
ونحن في الهجيج دة وسط البنيات السمحات ديل
همست في اضان خالة البنيي: انت الزول المنفخ ابو نخرة كبييري زي وحيد القرن دة منه ومالو فارز عيشتو بعيد من الناس كدي
ياخي حرام عليك... دة ما ود عمها الكان عايزها
اتاريهو يشرب في العصاير يبرد في جوفه وعيني ليهو قزازة الببسي يشرب فيها زي الماسورة المفتوحة في زير
حمدتك يا مالك روحي الما حبيت
- انت ما حبيت لكن في ناس عينها عليك
أهااا قمنا تاني... يا سيدي الحسن تمرقني لي أهلي سالم من العيلة دي...
نواصل...
Post: #211
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 06-26-2007, 10:17 AM
Parent: #1

الظاهر خالت البنية ناويالا علي نيي
تسلم
Post: #212
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-26-2007, 10:23 AM
Parent: #211


السمؤل كيفنك
يا زول اماني اخوك ما اتزرزر زرزير
بجيك صادي
Post: #213
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 06-26-2007, 10:37 AM
Parent: #1

غايتو يا دكتور من شدة الاندماج مع الرواية تخيلت الشخوص والامنكنة

والدةعوض مرة طويلة شلوخة عراض
والد عوض زو لحية دائرية صارم القسمات
عوض شاب انيق
منزل اهل عوض الامتدادغرب دارسوداتل حاليا تاني بيت من الظلط
البنية زولتن حليوي صفراء شعرها اسود ناعم تلبسة نطارة طبية
خالت البنيةطويلة جميلة مليئة الجسم
المنزل العمارات تقاطع 41 مع محمد نجيب
دطارق يشبه ولدو في الصورة

تسلم يا رائع
Post: #214
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-26-2007, 10:39 AM
Parent: #1


يمين يا السمؤل تقول كنت معانا
يا زول والله انت فكي تنزار عديل كدة
Post: #215
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 06-26-2007, 10:42 AM
Parent: #1

يعني من بكرة اعملي دوايي ؟
تسلم
Post: #216
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-26-2007, 10:48 AM
Parent: #1


يا زول انا كان عارف كدي
كان بدل يا سيدي الحسن
كان قلت يا سيدي السمؤل
Post: #217
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 06-26-2007, 10:51 AM
Parent: #1

قسما خليتني ارفس بالضحك
ربنا يخليك لينا
تسلم
Post: #218
Title: Re: أي بت شديدة بتحب ليها طُلبة (صبي بناي)
Author: خالدة البدوي
Date: 06-26-2007, 12:04 PM
Parent: #217

الله يجازي محنك طارق

الحب لا يعرف فوارق

اجتماعية ولا غيره


ما تكون عوض دهـ أنت ؟؟؟


حضور ومتابعة ..
Post: #219
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-26-2007, 12:16 PM
Parent: #218


Quote: ما تكون عوض دهـ أنت ؟؟؟



خالدة البدوي كيفنك
يا زولة مالك علينا عايزة تجيبي لينا الكتاحة في البيت
انا اقولك عوض تقولي دة انت
كان كدي يبقى لساني دة (احول)
بدل احكي عن نفسي حكيت عن عوض


سعيد بي وجودك هنا مع عوض
Post: #220
Title: Re: أي بت شديدة بتحب ليها طُلبة (صبي بناي)
Author: سيد محمد احمد سيدنا
Date: 06-26-2007, 01:20 PM
Parent: #1



الاخ العزيز طاق جبريل


اها جينا نتلاقى معاك وبنات زمان الشداد ( فى كل شىء)


الموضوع طبعا متابعوا بس من وراء الستار ودا مش خجل


وبصراحة اى واحدة ما تحب طلبة التراب يكيل خشوما لانه


فى اول لفه بعد الزواج تلفاها مطلقة وحناكيش الزمن دا


اكيد عاشوا على الجاهز بس اول ما تكتر طلبات الزوجه


يفكها عكس الهوا وكانه ما عمل حاجه وما عاوز واحد


يسالوا واذا وافق قال ليك بتتكلم مع الاولاد ويكبر فى


كوم حماشته ، واى حماشه ما شافت الشمس ما بتنضج


رجوله وقوة شكيمه واكيد سوف اوصف بعد هذه الرسالة


بالرجعية والذى منه ولك ان تقارن بين شباب الامس


واليوم وتحكم .


يا لها من ذكرى جميله فيها وفاء لكل من طرق باب (الطلبه)


تحياتــــــــــــــى


اخوك / ســـــــــــــيد
Post: #221
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-26-2007, 01:41 PM
Parent: #220


ابو السيد يا زعيمنا يا اصلي
يا زول والله زمن الطُلب داك ما بيتعوض
والله الواحد كان يجي معسم زي مرق العنقريب
بس الدنيا كانت جميلة رغم متاعبها

اسكت ارجى الراجيك يا رجعي
الحناكيش هسا بيجوك طايرين

سعيد بي طلتك
Post: #222
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-27-2007, 12:57 PM
Parent: #1


نواصل...
واصلنا سكسكتنا وسط النسوان القاهرات ديل..
.. حاجة سكينة جات مسكت ولدها وقلدتو وبكت بي حرقة شديدة خلاص
والله تقول عوض مات....
انا سبيت لي عوض ولي قلبو ولي العمارات وللفقر
... خالة البنية غمزت لي عشان انقذ الموقف
جيت مسكت حاجة سكينة من يدينها وجبتها لي وسط الجكس البيرقص
وقعدت ارقص معاها وقلتلا: انبسطي في خطوبة ولدك عشان اجيبلك سفة من أبان كروش ديل
والله قعدت ترقص وتضحك بي دموعها وطبعا الناس كلها مستغربة انا قلتلا شنو
خالة العروس جاتني: النبي فوقك نسيبتنا دي قلتلا شنو
- ياخي مالك مخصماني بالنبي الشي القلتو ليها آبيتقال.. انت موش كنت عايزها تنبسط اها انا خليتا ليكم تحتو قرض
- (ضاحكة) انت باين عليك داهية... أها مافي واحدة من الشباب ديل ملت عينك
- انا عيني مليانة مصائب وبناتكم السمحات ديل ما بقدر عليهن... انا وليد ربراب وماني زول حب
وشيت عوض دة ان بقيت سويتو ابوي بيقطع راسي... هو جيتي معى عوض دي عندو فيها كلام
- بس نسوي شنو جيتو خليتو بناتنا يهضربن
يا ود الكرسني تحلني الليلة دي من الزرزير دة
انا كان عارف القصي حا تصل لي كدي كان شفتلي بناي جالوص واشتغلت معاهو
- شايفة الزولة اللابسة احمر ديك... شايفها متابعاك كيف
يا سيدي الحسن... اقولك حاجة... تعالي نرقص انا ما مني فايدي
- يلا... بس ما بنخليك
عوض يوزع في البسمات وغاتس في بدلتو زي قلم البيگ
مشيت قعدتة بينه وبين العروسة
- والله بي طريقتي دي بتكتلي ليكي زول... ليك حق تجهجهي عوض
- بس هو الجهجهني... وعوض دة حاجة روعة
عوض يتبسم ساكت زي الماسكين جضومو بي مشبك
- انت الزول الهناك دة ياهو الاخد الشاكوش...
- ايوة هو زي اخوي
- اتاريهو يلوغد في الخبايز كدي بي حرقة....
- انا غايتو من قبيل اعاين للباب كويس قلت كان قامت شكلي اقوم فاكي البيرك
ناسكم الغلاد دي ما بقدر عليهم وصحبي عليه العوض ومنه العوض ان بقى هبدوهو
- ياخي مافي زول حا يسألكم خلاص القصة اتحسمت
- انا خايف من خالتك دي تجيبلي دقة الليلة كلما ازوق تجي تجرني وسط البنات واعمامك ديل يحمرولي
- ضاحكة يا زول ما في زول شغال بيك
- كدة كويس
عوض ضحك ضحكة خبيسي كدي
- انت والله ما قعد تشوف
يا ود الكرسني تحصلني....
نقوم نهجج

ونواصل.....
Post: #223
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-28-2007, 11:42 AM
Parent: #1


بجيكم صادي
Post: #224
Title: Re: أي بت شديدة بتحب ليها طُلبة (صبي بناي)
Author: عصام علي أحمد
Date: 06-28-2007, 06:53 PM
Parent: #1

متابعك ياجميل
والسرد الجميل
وأنت فى خطوات جورج أمادو وماركيز
وأسترجع رواية لا أحد يكاتب الكونوليل ( ماركيز )
فيها عفوية السرد
وتفاصيل المجتمع الصغير
Post: #225
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 06-29-2007, 11:12 AM
Parent: #224


عصام كيفنك
ياخي انت غاتس وين لينا زمن منك

يا سيدي اشكر لك هذا الاطراء
لكن دة كلام غلاد غلاد ما بقدر عليه

محبتي الاكيدة
Post: #226
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-02-2007, 11:41 AM
Parent: #1


بس اتم الفي يدي دة وارجعلكم
عشن البوست دة ما يحتل لي تحت
زي باقي الآبري في الجك
Post: #227
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 07-02-2007, 12:20 PM
Parent: #1

اوعة من حتلان
انت بس سرع شويي
Post: #228
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-02-2007, 12:43 PM
Parent: #227

اي بالله يا السمؤل احرسوا لامن اجيك صادي
باقي عندي خبيرات كايسلهن
Post: #229
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-20-2007, 06:22 PM
Parent: #1


خلاص يا عوض
المجلة وسلمناها المطبعة
بس اصبرلي جاييك بي مزاج كدي
Post: #230
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 07-20-2007, 09:35 PM
Parent: #229


بسم الله الرحمن الرحيم
سلام ... طارق ود جبريل
شنو يا مان مالك طولت كده المره دي
مانحن هنا راجنك انت وعوض ده
دايرين نعرف كن عندها بنات خالات وكده .
واصل يادكتور .

تحياتي...
حاتم هاشم.
Post: #231
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 07-21-2007, 06:47 AM
Parent: #230

Quote: - والله بي طريقتي دي بتكتلي ليكي زول... ليك حق تجهجهي عوض
- بس هو الجهجهني... وعوض دة حاجة روعة
عوض يتبسم ساكت زي الماسكين جضومو بي مشبك


ياد. وصف بديع جدا واصل خلي كتاحتنا تقوم!

،،،،أبوقصي،،،،
Post: #232
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 07-21-2007, 08:15 AM
Parent: #1

يا دكتور انت خلي بالك عوض اتجرس وقالك اقيف لا هني
والله شنو الحكايي
تسلم
Post: #233
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-21-2007, 03:11 PM
Parent: #1

salam hatim.majdi.samoual
i will be back soon
Post: #234
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-23-2007, 11:22 AM
Parent: #1


أها يا شباب جيتكم صادي..
نواصل....
بناتن السمحات ديل شغالات رقيص... ورجالن أبين كروش ديل جابلوم شيتن مقرطس كدي باقيلي كوكتيل شغالين يلوغدوا فيه
انا شفت ام اعوض دفرتو من يدها في الطربيزة وقلت لي عوض كدي خلني اللشوف امك دي واجيك صادي
- انت مالك دفرتي الشي دة
- يا ولدي ما فهمت فيهو شي
- انا عارفك في الزيفي دي دايرالك حرف أليل قراصي ومعاهو بصلتا خدرا تمسكيها زي المايك وتقعدي تلوغدي
- (ضاحكة) اي والله يا ولدي... الناس ديل شيتن كلو كُتُر
- انت مالك عليهم اسكتي اكلي البتعرفي والباقي ضوقيهو بس
- يا ولدي قلبي ماكلني علي ولدي ما بيقدر على الناس ديل... باين عليهم نسوانم قدرات ورجالن قاعدين طراطير
- هو وكر نفسي عندهم ... بعدين ما تخافي البنيي قاعدة تريدو شديد وباقية عليه عشرة
- أيي والله يا ولدي... باين عليها قاعدة تريدو ،سميحي صديرا زي الوزين
- انت قايلاهو متل أليلك علي المعلاق كدي
- ( ضاحكة) لامن دموعها جرن.... شكيتك علي الله يا ولدي والله الا امسكك ابوسك في جضومك ديل
- يلا سمح اكلي عشان الناس ديل عينهم عليك
... شويي كدي الفنانة الاسمها حواء قطر ولا شنو دي بدت تلعلع تاني والدنيا فارت من جديد
وقبل ما خالة البنية تصلني سوقت ام عوض وقعدت ارقص معاها وجن بناتم زي البلوم حاوطونا وهاك يا كشف
وام فستان احمر المري دي جات قاصداني عديل
قامت ام عوض قالتلي: انت يا طارق يا ولدي البنات ديل من قبيل انا شايفاهن وخالتن يحاحين فيك باقيلي دارنك لي واحدة فيهن
دحين يا ولدي ما تغتس انت ذاتك عشان الاتنين بتقدروا عليهن
- دايرة توكريني انا كمان ... والله جبيرين ان بقا سمعك علي يرصصك
- (ضاحكة) أييي ابوك صعب شديد
خالة البنية فكتني من ام عوض ومسكتني ترقص معاي
- الليلة ما عندك طريقة تزوق لازم تحسم حاجاتك
يا سيدي الحسن تنجدني
.... نواصل
Post: #235
Title: Re: أي بت شديدة بتحب ليها طُلبة (صبي بناي)
Author: معتز تروتسكى
Date: 07-23-2007, 12:30 PM
Parent: #234

Quote: أي بت شديدة بتحب ليها طُلبة (صبي بناي)


انه الاحساس الاستثنائى تجاة المؤاثرات الاستثنائيه التى تستمد صلاحيتها من الازل دون الاعتبار بالمضاعفات الموضوعية التى تكرسها النصوص وفى معظم الاحيان !!!!!!!!..

دخلة خلسة لاستمتع ولكى القي عليك بعض التحايا استاذي وصديقى..
طارق جبريل


التحايا النواضر لك وللاسرة..
Post: #236
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-23-2007, 12:55 PM
Parent: #235


يا سلام يا معتز ياخ
ياخي طلتك دي بالدنيا كلها
بس الكلام الغلاد غلاد دة نحن ما قدرو
ياخي نحن ناس طُلب ساكت

الأسرة بخير
والصغار يغرونك التحايا
Post: #239
Title: Re: أي بت شديدة بتحب ليها طُلبة (صبي بناي)
Author: anas hassan
Date: 07-23-2007, 01:31 PM
Parent: #234

سلا م اخ طارق

والله متعتنا بالقصه
بس ماتطول راجنككككككككككككككككككككككككككككككككككككككككككككككككك


انس
Post: #240
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-23-2007, 01:49 PM
Parent: #239

انس كيفنك
يا زول درب عوض دة كله متعة
بس الله يستر من آخرتها
Post: #241
Title: Re: أي بت شديدة بتحب ليها طُلبة (صبي بناي)
Author: anas hassan
Date: 07-23-2007, 01:54 PM
Parent: #240

الاخ طارق

بعد دا كلو بس اوع يكون مانستر فى اخرها

انس
Post: #242
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-23-2007, 01:55 PM
Parent: #241


اصبر ساكت وتابع
يا انس
زولك حالته تحنن
Post: #237
Title: Re: أي بت شديدة بتحب ليها طُلبة (صبي بناي)
Author: غباشي
Date: 07-23-2007, 01:03 PM
Parent: #1

الحبيب ود جبريل
و الله غايتو شديتنا شدة حليوة ....
متابعين معاك ... بنفس الحماس
تحياتي
Post: #243
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-23-2007, 01:57 PM
Parent: #237


غباشي كيفنك
بنفس الحماس دي ذكرتني دافوري الحلة


تسلم يا صحافابي
Post: #238
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 07-23-2007, 01:31 PM
Parent: #1

الجميل د طارق
نرجو اكمال المشهد دون انقطاع
يعني اثناء الرقيص كان في كلام داير بينك وخالت البنيي
تسلم وسرع شويي
Post: #244
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-23-2007, 01:59 PM
Parent: #238


السمؤل حبيبنا
ياخي انت راجل بتاع شمارات تقيلة خلاص
اصبرلي بجيك صادي
Post: #245
Title: Re: أي بت شديدة بتحب ليها طُلبة (صبي بناي)
Author: anas hassan
Date: 07-23-2007, 02:31 PM
Parent: #244

الاخ طارق

ممكن سوال معليش

صاحبك دا عرسوهو ولا اشتروهو


انس
Post: #246
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-23-2007, 02:32 PM
Parent: #245


الريدة يا انس
الريدة الكتيرة يا حنين شقاوة
الجكس راد ولدنا
دي كل الحكاية
Post: #247
Title: Re: أي بت شديدة بتحب ليها طُلبة (صبي بناي)
Author: خضر حسين خليل
Date: 07-23-2007, 03:05 PM
Parent: #1

بوست العام

بوست ظللت أحد اللصيقين بتفاصيله من الملطم للبنية الحليب
بوست ياطارق ياجبريل سمح لامييين غلط
كتر خيرك وواصل ياجميل
Post: #248
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-23-2007, 03:25 PM
Parent: #247


والله يا خضر كلامك عجبني بالحيل خلاص
انا باقي لمن جيت جديد وحاتك مافي زول هببوا لي
يمين بوست ترحيب ما عملوهوا لي
جيت داخل بي ضراعي

ودحين كلامك دة خلى عندي قيمي
Post: #249
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 07-23-2007, 03:30 PM
Parent: #1

يا دكتور والله قيمة كبيري خلاص
جنس لاحكيك ده ناسا كتار مابيقدرولو
تسلم
Post: #250
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-23-2007, 08:35 PM
Parent: #249


السمؤل يا حبيب
والله دة رفع معنويات تقيل خلاص
يعني ان بقيت داير ابنيلي سرقة ما بتترفع قدر دة
Post: #251
Title: Re: أي بت شديدة بتحب ليها طُلبة (صبي بناي)
Author: Dr. Ahmed Amin
Date: 07-24-2007, 05:27 AM
Parent: #1

دكتورنا العزيز ...



والله شكييييييت محنك ..
انت راجل قصاص بالحيييييل ...

بث .. ذي ما قالت خالدة .. انا خايف عوض ده يكون أخوي الكاشف

مليون تحية يا رايق ...
Post: #252
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-24-2007, 10:11 AM
Parent: #1


د. احمد كيفنك
انتو مالكم عايزين تصلبتوا فيني البنيي
ياخي كلامكم دة انت وخالدة بيجيب لينا الكتاحة


تسلم يا عزيزي
Post: #254
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-24-2007, 11:52 AM
Parent: #1

Quote: طارق جبريل

يا ود امي

نان ما فترنا من الانتظار

يا اخوي ما تجي تتم القصة



والله يا نولا
بهدلتيني جنس بهدلة
عشان الم في مداخلتك دي
قريت البوست كله

خليك قريبة

محبتي الاكيدة
Post: #255
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 07-24-2007, 01:05 PM
Parent: #254

د.طارق تعرف المشاهد دي حيَ علي الهواء

والواحد من شدَت البنية اللي لت عوض بعاين

في الحيطه لمن أنقلبت لي شاشة برُوجكتر وشايف

الرقيص والجكس مطعم بناس الأمتداد واليومين دي

ناصر بقادي خلي يجيب لنا صورة عوض والبنية

عشان الحكي يبقي صوت وصورة تسلم ياغالي متابعين

لمن عملنا تابعية في البوست ده تعال صَادي كفاية

سؤال كتلنا تعال.

،،،،أبوقصي،،،،
Post: #256
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-24-2007, 01:38 PM
Parent: #1


ابو قصي ايها الجميل

ليت لي من الزمن ما يكفي
حكاوي الامتداد لا توصف

لكن بتمها ليكم قصة عوض
Post: #257
Title: Re: أي بت شديدة بتحب ليها طُلبة (صبي بناي)
Author: anas hassan
Date: 07-25-2007, 10:17 AM
Parent: #256

الاخ / طروووووووووووووووووووووق

we still waiting 4 u ya man to complete awad story

قلنا بالعربى ماتميته كدى نحاول بالانجليزى يمكن تتمها

انس
Post: #259
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-25-2007, 11:33 AM
Parent: #257


انس كيفنك
والله الوقت ممحوق شديد بس ربك يبعد العوارض
لكن بجيك صادي
Post: #262
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 07-25-2007, 12:13 PM
Parent: #257

يا طارق نضم صوتنا للآخرين يا خي كمل شحتفت روحنا الحصل شنو ورينا.
شكرا طارق على مساعدتك
ولسع منتظرين النهاية
Post: #258
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 07-25-2007, 11:25 AM
Parent: #1

يا دكتور
انا عندي اختراع
نعمل ليك شيرنق اوفر تايم عشان تتفرغ لينا وتتم
حكاية عوض
وبعد عوض اكيد في حاجات تاني من بيت الكلاوي
تسلم يا رائع
Post: #260
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-25-2007, 11:35 AM
Parent: #258


حبيبنا السمؤل
يا زول الشيرنق لمن نتلاقى وتعزمني في سوق الناقة

والله يا عزيز الراس مليان حكاوي بس كيفن نلقى الوقت


تسلم يا دخرينا
Post: #261
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 07-25-2007, 12:06 PM
Parent: #1

سوق الناقة بس والله الخروف يجيك عن بيتك

تسلم والله
Post: #263
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-25-2007, 12:28 PM
Parent: #1


Quote: يا طارق نضم صوتنا للآخرين يا خي كمل شحتفت روحنا الحصل شنو ورينا.
شكرا طارق على مساعدتك
ولسع منتظرين النهاية


يا سلام ياخ
د. صفية مساعد كلها معانا هنا في عرس عوض
والله يا دكتورة الزمن بس ما بيسعف
لكن بعد دة بتحزم ليها كويس

الف الف الف مرحب بدكتورة صفية بيننا


سمؤل
والله ما قصرت تب
يمين تسلم البطن الجابتك
Post: #264
Title: Re: أي بت شديدة بتحب ليها طُلبة (صبي بناي)
Author: سامي عبد الوهاب إدريس
Date: 07-25-2007, 01:22 PM
Parent: #1

جبريلا يا حبيب..

والله الواحد ندمان ندم شديد إنو ما دخل البوست دا من زمان..
ياخي دا حكاية جميلة خلاص
Quote: - ما ممكن يا عوض انت عارف انت عندك كم اخو واخت وناس ابوك قافلين عليك قدر شنو
- عارف
- لا ما عارف.... ياخي انت نسوان الحلة ينجارن عشان يحصلن بتاع اللبن قبل ما يصل بيتكم واللبن يكمل عليهن... ولا بتاع العدة النسوان كلهن يشترن
نص دستة كبابي ونص دستة صحانة انت امك تشتري دستتين ونص احتياطي عشان البلتون العندكم دة... ياخي انت بتاع العناقريب لمن يدخل بيتكم يطلع
منه بعد تلاتة يوم لامن نفسو ينقطع وهو ينجد في العناقريب تحلف تقول زول من البيت... بعد دة كله تقول لي عارف...

Quote: - ما ممكن يا عوض انت عارف انت عندك كم اخو واخت وناس ابوك قافلين عليك قدر شنو
- عارف
- لا ما عارف.... ياخي انت نسوان الحلة ينجارن عشان يحصلن بتاع اللبن قبل ما يصل بيتكم واللبن يكمل عليهن... ولا بتاع العدة النسوان كلهن يشترن
نص دستة كبابي ونص دستة صحانة انت امك تشتري دستتين ونص احتياطي عشان البلتون العندكم دة... ياخي انت بتاع العناقريب لمن يدخل بيتكم يطلع
منه بعد تلاتة يوم لامن نفسو ينقطع وهو ينجد في العناقريب تحلف تقول زول من البيت... بعد دة كله تقول لي عارف...

Quote: عوض انجعص جنب ابوهو... الحقيقة شكله اتغير بس يكتل من الضحك
لابسلو بنطلون رمادي وقميص ابيض وبابيون احمر وجكيت رمادي
انا الكاتلني من الضحك البابيون المشنط في رقبتو دة لأنه ذكرني عيد الضحية
لامن يختولك دهن الكرشة وفوقه اب دمام ويقولولك ودو للنسوان...
... اتوهطو الرجال وبدوا الكلام..


والله دي تشبيهات ما طبيعية وكلام يموت من الضحك

الله يديك العافية..
يلا واصل
Post: #265
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 07-26-2007, 10:21 AM
Parent: #1


سامي يا سامي
كيفنك والوليدات
ان شاء الله كله تمام

بنواصل....
قريب
Post: #266
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 07-26-2007, 12:13 PM
Parent: #265

يعني شنو الحكاية يا طارق ما قلنا الليلة حنعرف نهاية القصة بالله ما تشتحتف روحنا زيادة تاني ما ترسل أي حاجة قبل ما تتم لينا قصة عوض.
Post: #267
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 07-26-2007, 11:36 PM
Parent: #266


يسم الله الرحمن الرحيم
سلام ...
ودجبريل سلامات ...
كيفك .. شنو الحكايه عملتها لينا
ذي المسلسلات المصريه ..
احسم لينا الزول ده عشان
نشوف موضوعك انت مشي كيف .

تحياتي...
حاتم هاشم.
Post: #268
Title: Re: أي بت شديدة بتحب ليها طُلبة (صبي بناي)
Author: anas hassan
Date: 07-29-2007, 11:35 AM
Parent: #265

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟
؟؟؟؟؟؟؟
؟؟؟؟؟
؟؟؟
؟؟
؟
Post: #269
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 07-30-2007, 06:17 AM
Parent: #268

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟
؟؟؟؟؟؟؟
؟؟؟؟؟
؟؟؟
؟؟
؟
العزيز طارق دي مقتبسة من أنس حسن: يوم الخميس جاء وفات ونحن لسع منتظريييييييين

صفية
Post: #270
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 07-30-2007, 06:42 AM
Parent: #269



طال الترقب د.طارق وعين أنس دي شاهده.

،،،،أبوقصي،،،،
Post: #271
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-03-2007, 10:12 AM
Parent: #1


د. صفية وحاتم وأنس ومجدي
جيتكم صادي يا الحبيبين...
والحتة دي فشان خاطر الحبيب السمؤل...

ونحن بنرقص مع غناء الخرابة الاسمها حواء دي قربت مني خالة العروس....
- أها يا طارق كيف الخطوبة بالله ماها سمحي..
- والله ما قصرتوا تب... واحسن شي خليتو الامور مغتغتة كدي
فشان اهل عوض ديل انت باقي عارفاهم ناس عندهم عزة نفس وكدي..
- يا زول عوض دربوا مرق وخلاص بقى ولدنا ومننا وفينا..
دة الكلام أماني ما وقع راجل..
- لكن لسة الدرب ماهو طويل..
- يا زول الأيام بتمشي زي البرق
- أيي ما قلنا شي بس لامن يشتغل ويكوِّن نفسه القصي دايرالا صبرا كتير
- ياخي مالك جنك حسيب كدي
- نان مو ياهو كدي ولا انتو كمان دايرين تعرسولوا..
- يا زول هوي نحن بنعرف كيفن نسويلُن شيتُن...
- أها إنت كيفن قصتك
... يا ود الكرسني.. بدينا..
- أنا لاني عندي قصي ولاني بتاع قصص.. أنا يا دوب أشوفلي كفاي أليل جداد
ولا مراح أليل غنم وأقعد أربرب جنبو... العرس والحب ديل ماني قادر عليهن..
- ياخي نحن عديل كدة عايزنك لي سحر بتنا.. وهي عينها عليك وانت باين عليك ود ناس...
... يا الوراريق يحلني الليلي..
- اقولك حاجة راجلك العامل زي فنطاز الجاز داك قاعد يشوف فينا
وإن بقا اللبع قام ماني قادر عليهو... دحين خليني اللمشي ارقص مع خالتي سكينة دي
- (ضاحكة) يا زول راجلي شباب وروحو شباب ما تقعد تزوق..
- انتو مالكم شيتكم كله كتور كدي
- (تضحك لامن دمعت) ياخي لا شيتنا كتور لا شيتين بس نحن بناتنا مربنهن على الصراحي
ونحن حسينا انها مايللاك وقلنا انت صاحب عوض وهو يشكر فيك وخالتك سكينة تشكر فيك
قلنا خلاص زيادة الخير خيرين... يا سحر تعالي جنبنا هنا..
... يا سيدي الحسن تنجدني..
البنيي جات تمشي بي مهلي... والله سمحي سماحةً تحرق في المصارين وعيونها غلاد وحواجبينا علي الهلال
وصديرها يعوم قداما زي الوزين.. وخصيرا يمين أصغر من السبلوقة.. أما إن كان لي الرجلين متمسحان زي
مِرِق العرِش أليل الأُوّض...والكفين شكلهن ناعمات بس حلاوة قطن.. والشي التاني ماني قادر أوصفه..
يمين ريقي نشف وقعدت أبلع فيهو تقول متغدي تركين ومتعشي فسيخ...
جسمي بقى يرجف زي المورود(الحمى) ورجليني بقن ينطاقشن علي ضنب الضب وعيوني اتلصقن
في نص راسي بس بقيت زي القعويي(القعونجة).. وصوف جلدي كله قام بس أبو القنفذ..
- سلام يا دكتور...
يمين غلبني أرد وأحناكي بقن يكركبن زي الهبابة ولساني تقل تقول هاجرنو بي عتلة..
أهلا.. دكتور شنو ياخي نحن يا دوب في الأرانب... كيف...
- والله تمام.. عقبالك إن شاء الله
- وعقبالك كمان... أنا لسة بعيد
- مافي حاجة بعيدة
يا ربي أنا هسا أقبل وين... يمين الغنا في حِتي وانا رقصي في حِتي.. اشتر كله كله..
- اجازتك طويلة...
- والله زي تلاتة شهور كدة..
- وحا تقضيها كيف..
- والله حا اشوف البناي وبرنامجه كيف..
- تاني حا ترجع للبنا...
أها قمنا لي حركات الحناكيش...

... ونواصل
Post: #272
Title: Re: أي بت شديدة بتحب ليها طُلبة (صبي بناي)
Author: Shams eldin Alsanosi
Date: 08-03-2007, 03:53 PM
Parent: #1

Quote: جسمي بقى يرجف زي المورود(الحمى) ورجليني بقن ينطاقشن علي ضنب الضب وعيوني اتلصقن
في نص راسي بس بقيت زي القعويي(القعونجة).. وصوف جلدي كله قام بس أبو القنفذ..
- سلام يا دكتور...
يمين غلبني أرد وأحناكي بقن يكركبن زي الهبابة ولساني تقل تقول هاجرنو بي عتلة..


ما قلتوا نوبة!!
Post: #274
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-03-2007, 05:17 PM
Parent: #272


نان يا ود السنوسي مع القنبلة دي نسوي شنو
يمين أخوك اللغللغة كلها فكت منه
بس في الاخير قدرت أزوق
الكلام علي عوض والراجيهو
Post: #273
Title: Re: أي بت شديدة بتحب ليها طُلبة (صبي بناي)
Author: Nasr
Date: 08-03-2007, 05:11 PM
Parent: #1

إنت كنت ماشي كويس لمن كنت بتحكي في قصص صاحبك، لما الدور بقي عليك الرجفي والغياب كثر مالو
علي العموم طالماإنت لافي معان في ال Golden States دي نحن عارفين نهاية القصة.
وبتجينا في لونق بيتش وبتحكي لينا القصة كدا بالحاجات الما بتقدر تقولها في النت
Post: #275
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-03-2007, 05:20 PM
Parent: #273


والله يا نصر الشي الما بيتقال كتير
بس انت مالك حاكها معاي كدي
انا هين المشكلة في عوض

اسعدني وجودك هنا
Post: #276
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 08-03-2007, 05:31 PM
Parent: #1

مبااااااااالغة
الله يبسطك ياود جبريل دنيا واخري
تسلم يا حبيب
Post: #277
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-03-2007, 05:43 PM
Parent: #1


السمؤل يا حبيب
والله دعوتك دي بالدنيا يا زول
الله يقلع الحب يمين عوض الجييهو يعلمبو الله
Post: #278
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 08-04-2007, 07:15 AM
Parent: #277

Quote: يمين ريقي نشف وقعدت أبلع فيهو تقول متغدي تركين ومتعشي فسيخ...
جسمي بقى يرجف زي المورود(الحمى) ورجليني بقن ينطاقشن علي ضنب الضب وعيوني اتلصقن


يادكتور والله أنا أخت مدماكي فوق مدماك عوض والبناي أم قش اليشعلوا فوقه النار

بس الوصف الفوق ده كتلني ضحك والله وصفك ده داير سجارة برنجي محشية حق معلمين الطلب

ديلك واصل يامبدع كلني نرتجف للنجفه العلقوها فيك دي آه من سحر عيونه من ماس عيونه

جسمك يكهرب .

،،،،أبوقصي،،،،
Post: #280
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-05-2007, 11:31 AM
Parent: #278


Quote: واصل يامبدع كلني نرتجف للنجفه العلقوها فيك دي آه من سحر عيونه من ماس عيونه

جسمك يكهرب

والله يا ابو قصي النجف يقصر
بس اخوك الله وقف معاهو ساكت
Post: #279
Title: Re: أي بت شديدة بتحب ليها طُلبة (صبي بناي)
Author: انعام عبد الحفيظ
Date: 08-04-2007, 10:25 AM
Parent: #1

Quote: طارق ياخوي ماااااراجينك
Post: #281
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-05-2007, 11:34 AM
Parent: #279



بجيك ي انعام بس اصبري لي شويي كدي
Post: #282
Title: Re: أي بت شديدة بتحب ليها طُلبة (صبي بناي)
Author: الفاتح خليل الفكي
Date: 08-05-2007, 11:46 AM
Parent: #1

الأخ / طارق
سلام واحترام ،،،
شنو يا طارق كل يوم نواصل نواصل
ونحن منتظرك قصتك دي مسلسل مكسيكي ولا شنو
ورينا الحلقة الاخيرة يوم شنو
بيني وبينك كدا القصة دي عن عوض ولا زول تاني
تقبل تحياتي واحترامي
أبو كريم
Post: #283
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-05-2007, 11:51 AM
Parent: #282


الفاتح كيفنك
والله الوقت ممحوق خلاص
والمغاربة ديل تقول اليوم عندهم (ناصل) ساعة
خلاص يا اخوي قربت تتم

بعدين زول تاني دي مالها فيها تورية كدي
Post: #284
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-09-2007, 10:16 AM
Parent: #1


جيناكم تاني يا الحبيبين:

- والله يا بت الناس أنا ماني عندي شيتا أسويهو غير البنا..
- ياخي انت راجل دكتور بُنا شنو العليك..
- ما قلنا شي علي أنا لازم اشتغل فشان أرتب حاجاتي واطلع مصاريفي وكدي..
- عجيبة.. المهم عايزين نشوفك في الاجازة دي
- إن شاء الله بنتقابل...
- خالتي سكينة: هيا طارق انت بي هني وانا افتش فيك
حمدتك يا مالك روحي... جيتي في وكتك يا خالتي.. أماني ما كنت مزرزرلي جنس زرزير..
- بعد إذنك بس أشوف الخالة عايزة شنو
... يمين البنية لوّت بوزها شبرين وكان في طريقي كانت رصصت أم عوض دي
- انت يا ابن الهرمة انا خرماني وانت اتاريك غاتس هني بين البنوت...
وتتلوى وتترقص علي الدابي..
- بنوت شنو وحاتك جيتي مرقتيني من خازوقا الله لا يوريك ليه..
- الرسول آآولدي ما تغتس مع أخوك دة.. والبنيي حلاتا..
- هسا إنت في السفي ولا في الغتسي عاملة شلاليفك زي غِتيات الكوريي كدي
- (ضاحكة).. بري بري يا ولدي شوفلي سفي
- ليه حق عم عبد الله يعرس فوقك انت مسوياها صعوط وهجيج
- إي عمك مطرطش وحا يقعد يربي في البُطان لامن يموت..
دحين شوفلي سفي وخلي كلامك المسيخ دة...
- مسيخ شنو.. بقيتي تكشفي كمان..
انطلقتي علي كُبرِك.. انت دحين قبُل دة أُمِك ما سِكرَت..
- أيي (ضاحكة).. أيي يا ولدي جدك مُحُمَد كان خاتيلو قزازي ألت شري تحت الازيار
ومعاها كم قزازيي ألت بيرة الجمل...
جن هي وعمتي ستنور قدرها كدي وقالن يضوقن الشي دة.. وكبايي وراء كبايي
لامن طشمن ورقدن خَل وانبطحن في الرملة..
قامت عمتي سألتها: انت يا الزهرة نحن وين
قامت ردت عليها: إنت نحن وين ولا نحن ذاتنا مِنِنْ (من نحن)
واللذيذ يا ولدي عمتي كان عندها شافع ترضع فيهو قامت قلبتو بي
صُلبو وعايزة ترضعوا وقالت لي أُمي: إنت الولد دة مالو شلاليفو بقن كبار كدي
- (ميتة من الضحك) الله يرحمن.. كدي قوم شوفلي سفي أنا خلاص اتكهربت
شفتلي سفي وغمتها بيها ومشيت اهجج مع عوض
وفجأة قام أبو عوض قال: يا جماعة كتر خيركم وربنا يجمعنا في ساعة خير
- شرفتو كتير والله
- جات خالة العروس: يا جماعة ما بدري
- لا والله نمشي والليلة نحن ذاتو ساهرنا
- شرفتونا والله.. حبابكم عشرة
ونحن طالعين علي عرباتنا جرتني خالة المرة من يدي:
- انت وعوض ما تقعدوا
- عوض كان داير يقعد أليقعد علي أنا أبوي بيكون هسا شايلوا
كلاشنكوف ومنتظرني.. دحين هو إن بقا داير يقعد خليهو
... عوض حمر لي واعتذرلهم..
- خلاص انت وعوض تجو تفطروا معانا يوم الجمعة الجايي
- إن شاء الله
بيني وبينكم اتلفتَ وشفت في البنيي... يمين قمرة في العمارات
الشعر أسود يقول يا ليل.. والفستان الأحمر ملصقلو في جسم
زي القمردين.. والعيون وااارمادي والتراب في خشمي أنا من العيون..
انعل ابوك يا الامتداد بس برضو بنحبك..
شفتها وشافتني...
ومشينا لي بيوتنا...

ونواصل
Post: #605
Title: Re: أي بت شديدة بتحب ليها طُلبة (صبي بناي)
Author: طرقوش
Date: 10-03-2007, 04:49 PM
Parent: #284

Quote: جيناكم تاني يا الحبيبين:

- والله يا بت الناس أنا ماني عندي شيتا أسويهو غير البنا..
- ياخي انت راجل دكتور بُنا شنو العليك..
- ما قلنا شي علي أنا لازم اشتغل فشان أرتب حاجاتي واطلع مصاريفي وكدي..
- عجيبة.. المهم عايزين نشوفك في الاجازة دي
- إن شاء الله بنتقابل...
- خالتي سكينة: هيا طارق انت بي هني وانا افتش فيك
حمدتك يا مالك روحي... جيتي في وكتك يا خالتي.. أماني ما كنت مزرزرلي جنس زرزير..
- بعد إذنك بس أشوف الخالة عايزة شنو
... يمين البنية لوّت بوزها شبرين وكان في طريقي كانت رصصت أم عوض دي
- انت يا ابن الهرمة انا خرماني وانت اتاريك غاتس هني بين البنوت...
وتتلوى وتترقص علي الدابي..
- بنوت شنو وحاتك جيتي مرقتيني من خازوقا الله لا يوريك ليه..
- الرسول آآولدي ما تغتس مع أخوك دة.. والبنيي حلاتا..
- هسا إنت في السفي ولا في الغتسي عاملة شلاليفك زي غِتيات الكوريي كدي
- (ضاحكة).. بري بري يا ولدي شوفلي سفي
- ليه حق عم عبد الله يعرس فوقك انت مسوياها صعوط وهجيج
- إي عمك مطرطش وحا يقعد يربي في البُطان لامن يموت..
دحين شوفلي سفي وخلي كلامك المسيخ دة...
- مسيخ شنو.. بقيتي تكشفي كمان..
انطلقتي علي كُبرِك.. انت دحين قبُل دة أُمِك ما سِكرَت..
- أيي (ضاحكة).. أيي يا ولدي جدك مُحُمَد كان خاتيلو قزازي ألت شري تحت الازيار
ومعاها كم قزازيي ألت بيرة الجمل...
جن هي وعمتي ستنور قدرها كدي وقالن يضوقن الشي دة.. وكبايي وراء كبايي
لامن طشمن ورقدن خَل وانبطحن في الرملة..
قامت عمتي سألتها: انت يا الزهرة نحن وين
قامت ردت عليها: إنت نحن وين ولا نحن ذاتنا مِنِنْ (من نحن)
واللذيذ يا ولدي عمتي كان عندها شافع ترضع فيهو قامت قلبتو بي
صُلبو وعايزة ترضعوا وقالت لي أُمي: إنت الولد دة مالو شلاليفو بقن كبار كدي
- (ميتة من الضحك) الله يرحمن.. كدي قوم شوفلي سفي أنا خلاص اتكهربت
شفتلي سفي وغمتها بيها ومشيت اهجج مع عوض
وفجأة قام أبو عوض قال: يا جماعة كتر خيركم وربنا يجمعنا في ساعة خير
- شرفتو كتير والله
- جات خالة العروس: يا جماعة ما بدري
- لا والله نمشي والليلة نحن ذاتو ساهرنا
- شرفتونا والله.. حبابكم عشرة
ونحن طالعين علي عرباتنا جرتني خالة المرة من يدي:
- انت وعوض ما تقعدوا
- عوض كان داير يقعد أليقعد علي أنا أبوي بيكون هسا شايلوا
كلاشنكوف ومنتظرني.. دحين هو إن بقا داير يقعد خليهو
... عوض حمر لي واعتذرلهم..
- خلاص انت وعوض تجو تفطروا معانا يوم الجمعة الجايي
- إن شاء الله
بيني وبينكم اتلفتَ وشفت في البنيي... يمين قمرة في العمارات
الشعر أسود يقول يا ليل.. والفستان الأحمر ملصقلو في جسم
زي القمردين.. والعيون وااارمادي والتراب في خشمي أنا من العيون..
انعل ابوك يا الامتداد بس برضو بنحبك..
شفتها وشافتني...
ومشينا لي بيوتنا...


دا الحد القريتو
والفطور بعد دا بيفوتنى
وانا لا اسع فى الشغل

غايتو يا أبو الطروق خلينى أفطر وأجي اتم القصة
وبعدين عندى معاك كلام كُنر
Post: #285
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-10-2007, 10:59 AM
Parent: #1

برجعلك يا عوض
Post: #286
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 08-11-2007, 09:31 AM
Parent: #285

Quote: بيني وبينكم اتلفتَ وشفت في البنيي... يمين قمرة في العمارات
الشعر أسود يقول يا ليل.. والفستان الأحمر ملصقلو في جسم
زي القمردين.. والعيون وااارمادي والتراب في خشمي أنا من العيون..
انعل ابوك يا الامتداد بس برضو بنحبك..
شفتها وشافتني...
ومشينا لي بيوتنا...

أنا لو في محلك مابرجع المعلم يجيني الصبااااااح

آه ياد. مشت فطرتوا ولا لع في أنتظار الرغيف حق العمارات من سيحه (أبوقجيجة)
المخرم داك.

،،،،أبوقصي،،،،
Post: #287
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-11-2007, 07:33 PM
Parent: #1

salam magdi
i will be back soon
ya zool fatour mohahbaz
Post: #288
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 08-13-2007, 08:48 AM
Parent: #287

د.طارق أه أنتهيت وخلصت من ترتيب العفش وختيت اللحافات

تعال صادي قوُام في رجاك قدام بيت ناس خالتي سكينة تحت

النيمة الضُل بارد ومجهز البنابر حقت الجيرتك كمان وعجاج

البخور الحلو والمر شكل القصة بتجيب ليها ضقل يكركب واصل...

،،،،أبوقصي،،،،
Post: #293
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-15-2007, 10:22 AM
Parent: #288


حبيبنا ابو قصي
يا ريت القصة انتهت كدي
عوض راجياهو محاين

تسلم يا حبيب
Post: #289
Title: Re: أي بت شديدة بتحب ليها طُلبة (صبي بناي)
Author: الصادق صديق سلمان
Date: 08-13-2007, 11:28 AM
Parent: #1

يا دكتور طارق
لك التحية يا سيدي وقصتك بتذكرني بأيام كنا شغالين طلب في مدني الجميلة
وعيونا على الجكس الحايم بي غادي جمب البيوت البنكون شغالين فيها.
الغريبة يا دكتور الجكس بتكيف لي الشباب الشغالين طلب جنس كيف عجيب
تفتكر السر شنو يا دكتور؟؟

تخريمة مهمة:
عليك الله القصة دي حا تكمله لينا متين؟؟؟

أبوفتحية
Post: #290
Title: Re: أي بت شديدة بتحب ليها طُلبة (صبي بناي)
Author: غادة عبدالعزيز خالد
Date: 08-13-2007, 12:21 PM
Parent: #289

طارق جبريل،،
والله إنتو يا النسابة صعبين
تعملوا ليكم حفلة وتمشي لتلاته صفحات
وبالله لا توروني ولا تعزموني
دي حالة دي،،
هييييه، الليله ريم خطيبة ولدي
جاها بلا


بدأنا القراءة
نتابع عن كثب

كل الود
غادة
Post: #291
Title: Re: أي بت شديدة بتحب ليها طُلبة (صبي بناي)
Author: Fadl Karrar
Date: 08-13-2007, 02:55 PM
Parent: #290

طارق جبريل
متذكر النكتة بتاعة ( روب )؟؟؟؟

طارق إنت إنكشحتا ولا شنو؟؟
Post: #292
Title: Re: أي بت شديدة بتحب ليها طُلبة (صبي بناي)
Author: مجاهد عبد الرحمن
Date: 08-14-2007, 09:47 AM
Parent: #291

جميل يا طارق
Post: #297
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-15-2007, 10:30 AM
Parent: #292


انت ذاتك جميل يا مجاهد

(دة طبعا اذا ما كنت شخصية وهمية )



محبتي الاكيدة
Post: #296
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-15-2007, 10:28 AM
Parent: #291


فضل كرار كيفنك
انت يا اخوي الروب دة عندك معاهو محاين ولا شنو
بعدين مالك عايز تكشحنا بدري كدي
Post: #295
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-15-2007, 10:27 AM
Parent: #290


النسيبة القاعدة برة (غادة)
والله اتلومنا معاك
لكن انت تجيبي اخبار الدنيا كلها إلا خبيراتنا

بالله لو شفتي طلحة سلمي عليه شديد
Post: #294
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-15-2007, 10:24 AM
Parent: #289


ابو فتحية الجميل
انا برضي مستغرب انه الجكس دة
بحب الناس الغبش ديل ليه

القصة بتمها ليك
بس افيق شويي

محبتي الاكيدة
Post: #298
Title: Re: أي بت شديدة بتحب ليها طُلبة (صبي بناي)
Author: Fadl Karrar
Date: 08-15-2007, 04:59 PM
Parent: #294

( روب ) صاحبو كان كل ما يهبش عشان يلقي نهايتو
ما يلقاها لأن (روب ) كان طويل طولا يجنن
علي قول النعام آدم الله يرحمو
يعني زي حكاية عوض جبريل دي
Post: #299
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-15-2007, 05:29 PM
Parent: #1

Quote: يعني زي حكاية عوض جبريل دي


ود كرار كيفنك
عوض دة مالك لصقتو لي زي اخوي كدة

الروب عندك لكن


محبتي الاكيدة
Post: #300
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-16-2007, 10:13 AM
Parent: #1


جيناكم تاني يا الحبيبين:

رجعنا لي بيوتنا وخيلان عوض واعمامو كل زول مشى علي بيتو...
- عوض: اسمع اقلع هدومك وتعالي نتونس برة..
- كويس كدي نشوف الجو كيفن لا جوة وبطلعلك..
دخلت لقيت جبيرين منقطر في سريرو وخالف رجلينو تقول شِعب ألات كَرِقِي (عيدان الراكوبة)
والرادي تحتو تلعلع فيهو مذيعة اسمها المدفعجي من لندن.. وانا خايف من مدافع كلامه ارمش في عيوني..
- أها مشيتو لي خطوبة الجن دي..
- أيوة.. (ماني قادر ازيد كلمي تاني يقوم يهيج فوقي لا ايدي لا كراعي.. عوض يخطب وانا اتزرزر)
- والله مسخرة وشغل نسوان وكلام فارغ وعمك عبد الله ذاته مطرطش
-......
دخلتلي في سروال وعراقي ومرقت علي عوض..
وقعدنا في الحجرين القدام البيوت... ياهم مكانا المفضل من زمن بعيد..
- هسا اليشوفك هسا ما يشوفك قبيل..
- ليه...
- قبيل مهندم وعندك قيمي شوف هسا بي بنطلونك المقطع دة لاهو لامي ردا ولاهو بنطلون
وفنيلة الحمالات المقدقدة علي سلك كفاي الجداد كدي...
- (يضحك) ياخي هسا نحن في شنو وانت في شنو..
- شنو تاني كمان خطوبة وخطبت وورطني سبعين ورطي... شنو تاني...
- هسا الجمعة الجاية كيف؟
- لا جمعة ولا خميس تموت موتك يا ابو الشباب... انا عايز اشوف البنا عشان نبدأ ندور تاني
- أها وبعداك..
- بعداك امشي اشوف قرايتي كمان..
- انت ما عايز تقعد مع سحر لي؟؟
- أها يا مرسال الشوق... شوف يا عوض انت عارف رايي كويس في الحتة دي..
انا لاني فاضي لي حب ولاني قادر علي خطوبة والأيام دي اسمع نصيحتي
إن بقيت لاقيت عمك جبيرين لا تكتر معاهو الكلام شي..
- ياخي والله البت حلوة وشكلها بتريدك والناس ديل ناس كويسين...
- (غلبني أقوله سمحة لامن تخلي الزول يتقلَّم حتت حتت).. ما قلنا شي.. انت الناس
ديل العاجبهم فينا شنو... لانا زينين متل الناس ولا اهلنا منغنغين... شي يحير..
- ياخي يضع سره في أضعف خلقه..
- إيي سر شنو إنت باقيلي بوم... هسا نحن سرنا شنو؟؟ اماتنا مقابلات الصيجان
ليلِن ونهارِن... وابهاتنا يعافروا من تصبح لامن تشرق وياهو قدح القراصي
وصحن الفول ولامن يقدحولنا بيض زي العندنا كرامي... نقرب نزغرد.. تقولي سِر...
- ياخي بي حالتنا البنيات عايزاتننا وراقدات خل... انت بس باركها وبتتعدل..
- عوض... انت باقيلي جنيت... انا جنس شيتك دا آآبسوي... يمين جبيرين علي
يطردني من البيت وانت بيتكم مافيهو محل لي إبري... وقتين داك أقبل وين انا...
- ياخي هي قالت بس نفسها تقعد معاك وتتونس معاك... لاها دايري خطوبي
لا شيتين.. وهي عارفاك سنيح وراسك دمق... دحين ياخي اجبر بي خاطرها بس
- انتو باقيلي حددتولي اعرسها متين... اتاريهو ضحكك القبيل عندو معني
وانا اقول عوض مالو يتبسم لا قعر اضانو...
- والله الكلام دة من زمان بس انت عامل اضان الحامل طرشة...
- عوض اقولك شي قوم نوم واحلم زي ماك عايز... انا خلني ماني وش نعمي..
وانت اصبر ساكت علي الراجيك...

.... ونواصل
Post: #301
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-17-2007, 10:00 AM
Parent: #1


اتم الفي يدي دة واجيك راجع يا عوض
Post: #391
Title: Re: أي بت شديدة بتحب ليها طُلبة (صبي بناي)
Author: أميرة فاروق عبد العال
Date: 09-04-2007, 10:52 AM
Parent: #301

رغم حداثة عهدي بالبورد وبوستاته.. شاء حظي أن اعتر في هذا الرائع.. واتابع بكل فرح الطفولة ومرح الصبا سرده هذا الجميل البسيط..
وحقيقة أمتعتني وأدهشتني..
هذا النوع من الكتابة الذي يجعلك تحس وكأنك انت الذي تحكي أو أن هذا الشخص كان يسير بجانبك ويحيا تفاصيل حياتك اليومية..
فهذه الذاكرة هي ذاكرتنا جميعا.. وتلك الأيام جميعنا عشنا بعضا من تفاصيلها.. وهؤلاء الأشخاص كان أحدهم والدي او عمي أو خالي أو جاري..
وتلك هي امي أو خالتي أو جارتنا :فلانة:..
حتى أن الخيال يسنرسل جاهدا محاولا تركيب هذا الحكي على تفاصيل وعاها يوما ما وعايش تفاصيلها..
واصل وسنواصل..
لك التحية والاجلال..
Post: #302
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 08-17-2007, 11:43 AM
Parent: #1

يا ود جبريل .....
زمان في حلتنا كان في واحد بوزع السنه(العرقوب) بالعجله ..يجيب لي كل واحد طلبو ..نصيص ولا قزازه ...اها مما يتاخر ..الحله كلها تنكرش ..الزول دا ما جا؟ ..الزول ده وينو؟
دحين اااخوي وينك انت ؟
خليتنا ننكرش
Post: #303
Title: Re: أي بت شديدة بتحب ليها طُلبة (صبي بناي)
Author: حيدر حسن ميرغني
Date: 08-17-2007, 12:21 PM
Parent: #302

طارق

فى الإجازات ... كنت شغال مونة وحاجات كده في سيناء

لمت فيني بدوية تبيع اللبن بعد المغرب وقالت لي مكسرة فيك ..

قلت ليها طيب لو استحميت وشقيت شعري نصين حاتنتحري يعني

رشتني باللبن
Post: #304
Title: Re: أي بت شديدة بتحب ليها طُلبة (صبي بناي)
Author: Fadl Karrar
Date: 08-18-2007, 09:47 AM
Parent: #303

ود جبريل
سلامات وصباحك باهي
أنا اليومين ديل متابع حاجتين
1- مسلسل مدبلج فى القناة المغربية التانية( الحلقة 43 يا دوووووووب )
2- وحكاية صاحبك عوض
لكن أظنو المسلسل المدبلج ح ينتهي وإنت وصاحبك دا بتكونوا لسه تتباصوا فينا
اللهم طولك يا روح
Post: #308
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-20-2007, 11:51 AM
Parent: #304


ود كرار كيفنك
يمين خليتني اتنخج من الضحك
يا زول والله انت ماك نصيح
Post: #307
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-20-2007, 11:47 AM
Parent: #303


حيدر حنين كيفنك
لكن بتاعة سيناء دي ما اظن تكون زي نجف عوض دة
Post: #306
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-20-2007, 11:46 AM
Parent: #302


الله يجازي محنك يا وليد
الانكراشي دي ما نحن الخايفين منها ذاتها
Post: #305
Title: Re: أي بت شديدة بتحب ليها طُلبة (صبي بناي)
Author: عبد الدائم سيد أحمد
Date: 08-19-2007, 07:22 AM
Parent: #1

طارق
انتو البنيتو برج البركة ونحن ماعارفين ؟
Post: #309
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 08-20-2007, 11:52 AM
Parent: #305

Quote: طارق
انتو البنيتو برج البركة ونحن ماعارفين ؟


عبدالدائم ياجميل برج بركة شنو ياخي خلي د.طارق يبني لنا أحلام عوض وبس

راجنك ياروعة واصل سرد والله قصتك دي تبقي مسلسل ماكسيكي براحة وناس العمارات

ديل مابيقلوا عنهم بشيء وعوض البطل وأنت صاحب البطل

تعال تعال يأأخي تعال لينا كمين حلقة كده مفقودة.

أنت ياطارق عوض ده أحمااااااااااااااار ولا ........

،،،،أبوقصي،،،،
Post: #311
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-20-2007, 12:02 PM
Parent: #309


ابو قصي كيفنك
والله انت زول تحير عديل كدي
ياخي انت قاعد تجيب الجمال والمحبة دي من وين
كدي ادنا منها شويي
Post: #310
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-20-2007, 11:54 AM
Parent: #305


عبد الدايم النضيف
يمين يا اخوي انا حافظ البيوت الاشتغلت فيهن
ومرة مرة اقرب ادق الباب للناس عشان اقول ليهم
بيتكم دة انا بنيتو
Post: #312
Title: Re: أي بت شديدة بتحب ليها طُلبة (صبي بناي)
Author: خالد الجبل
Date: 08-20-2007, 03:00 PM
Parent: #1

عزيزي طارق

المسلسل في قمة الروعة والسرد امتياز لكن يا دكتور باقيلك الحكاية دي مي جرت شويي

والله انا وما طالبني حليفي لكن انا خشيت المنتدي دا عشانك

عليك الله زود السرعة شوية
Post: #314
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-21-2007, 11:29 AM
Parent: #312


خالد الجبل كيفنك
يا زول والله الفين مراحب
دحين الواحد ماهو عارف يقول شي
لكن يا حبيب قسيت علي الكلام
تسلم يا حبيب
بس خليك قريب قربنا نصل للنهايي
والشي دارالا نار هادي


محبتي الاكيدة
Post: #313
Title: Re: أي بت شديدة بتحب ليها طُلبة (صبي بناي)
Author: سامي عبد الوهاب إدريس
Date: 08-20-2007, 04:51 PM
Parent: #1

يا جبريلا

مااااااااااااا طولت علينا..

ويييييييييييييين الباقي يا زول؟؟؟

أسرع.. أسرع

أبقى خاب
Post: #315
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-21-2007, 11:31 AM
Parent: #313


يا سامي يا سامي
كيفنك والوليدات ان شاء تمام
ما فضلنا شي قربنا
بس خلك قريب
Post: #316
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-21-2007, 11:36 AM
Parent: #1


أصبحت يا الحبيبين ومشيت قفرت البناي ولقيتو شغال في أركويت..
ظبطنا أمورنا وبدينا الهركي من جديد....
يوم الخميس بالمساء جاني عوض ومشينا نظبط بوشنا مع بُطان الحلة..
ضربنا زين لامن إتنْبَلنا وبقينا ندشى وجينا لي حجارنا قدام البيت..
- هسا بكرة كيف..
- يا اخوي هوي انا الاسبوع كله شغال سهرات وعضامي قايمات علي
دحين تمشي براك وتشوف نسابتك ديل... الله يسهلَك..
- يا طارق انت عارفني ما بقدر امشي براي ياخي كدي عليك الله باركها..
- مالك... مطهَر... ولا فوقك الوِرْدي (الحمى)...
- ياخي بس امشي معاي بكرة وانت معزوم وتاني ما تمشي...
-هسا يا عوض البت دي حا تعرسها متين...
- ما عارف لكن ما اكتر من خمسة ستة سنوات..
- هاالله هالله... باقيلي ابوك ود الجبل وماني عارف
- ياخي انت عارف بكرة حا يحصل شنو...
- ماني عارف بس عارف الله ما شافوا بس عرفوا بالعقل...
اقولك شي قوم نوم والله يعدلك خطوتك..
- بكرة بصحيك فجر...
مشيت علي عنقريبي لقيت ملايتو تهبهب وحاتكم صليت العشاء بس
وانبطحت عضامي يطقطقن وكلي مملخ..
.................
فجُر عوض جاني ناطي وشايل كبابي الشوب بي لبنا مقنَنْ ومعاهو اللقيمات
- بدينا في الرشاوي
- ياخي كدي قوم استحمى وباركها
ضربنا شاينا وقعدنا نتونس شويي وبيني وبينكم حنني عوض شديد..
شكله كدي ماهو قادر يمشي براهو ومهضلم تقول ماسكو الهيم (مرض يصيب الدجاج)
.. اتهندمنا وسرقنالنا ريحي من عمكم جبيرين ومشينا...
وصلنا جنب الباب وعوض قلبو يضرب تل تل تل وعرقو يخر
- انت مالك ضارب الجرسي من هسي
- يا طارق عليك الله روق وجوة لا تهضرب شي
ضربنا الجرس... ترن ترن ترن ترن
جا السواق فتحلنا الباب...
اتفضلوا اتفضلوا... دخلنا..
لقينالكم ابو البنيي قاعدلو في كرسي مهيل كدي في السِعْدي (النجيلة)
لابسلو ردا وفنيلة حمالات وكرشوا ناصلي من الفنيلة
ومدلدلة فوق الردا زي البخسة...وقاعد يقرالو في جريدي...
والخرابة تقول مزرّعلوا فتريتة في صدرو وتحت يدينو...
الشعر قايم احمر احمر في الصدر وتحت يدينو تقول قاعد يحننوا...
اخدنالنا قعدتاً جنبوا وهو يسأل في عوض وعوض مدنقر كأنه في امتحان شفوي...
جات أم البنيي... صلاتي علي محمد.. المساير يلمعِن والشبشِب تستخسر عليه
المشي في التراب... مرتاً سمحي ومهندمة... ماها طبوج...
- اهلا يا شباب اتفضلوا تعالوا لي جوة..
عوض لكزني: ياخي اتنحنح ولا صفق قبل ما تخش
- اييي نخنيح شنو اصلي داخلي مستراح... بعدين المرة قالت اتفضلوا
دخلنا علي صالة كدي ريحة البخور فيها تقول يا ليل
البت الشغالة شايلالها بطانيي تشهيك البرد
- معليش يا شباب حبوبتكم كانت راقدة هنا وقالت عندها حمى
... اريتها حمتي كان دي بطانية حبوبتنا... تعالي شوفي بطاطين ناس عوض
إن غتت رجليك ما تغتي راسك تقول ضاربها شيطان وريحة الكركار تدقشك
من خشم الباب...
... وفجأة تظهر جكسوية عوض... قادر الله.. الشعر فايت نص الضهر
... سلمت علينا بي يدين يمين زي حلاوة قطن مرطبة وناعمة...
- كيف يا شباب... اهلا يا دكتور...
- والله تمام والحمد لله
- ماما نسيتي البريل كريم حقك والأتريكس
البريل كريم عرفناهو.... علي الأتريكس دة يطرشنا....
- هي امك بتستعمل بريل كريم....
- أيوة عشان ما تجيها قشرة...
- قادر الله.... جملة الإيمان خالتي سكينة إن بقوا حكولها راسها بي منجل
القشرة تملالها كوريي...
... من العيد للعيد تقعدلها يومين في سوات الكركار
وترسل لي حسنة بت خليل عشان تمشطها... والخرابة غيليدي
تختلا تلات مخدات وتقعد فيهن وتهجر خالتي سكينة تحتها وكوريي فيها كركار
وقشر ليمون في الطربيزة وكوز الموية الكبير داك موهط
وبي سلك كدي تبعبص في راس ام عوض من تصبح لا عند المغرب
وما تخليلا مرة ما تقطع فوقها حتاً تكمل... وخالتي سكينة تسمع فيها وتقولها:
قبيل أنا أم النصر لامن مشيت عزيتها في أمها وأبت تشيل معاي الفاتحي قالت ما جيتها
في ود عمتها... أها هسا تكيل الرماد فوق راسها مافي زول بيجيها...
- لكن هي ماها طالباكي خمسين قرش في طهور مصطفى...
- برسِلن ليها مع فخرتاج... إييييي خوتها تطير...
ولامن ينتهن من مشاطن وقطيعتن.. وتشوف خالتي سكينة لافة المساير تحت أضانا
تحلف تقول سماعة كمبيوتر وشغالها بيها شات في الهوت ميل...
... سبحان الله شي شغال بريل كريم وشي كركار والدنيا كدي ماشي وكدي ماشي
وعوض يقولي يضع سره في أضعف خلقه... الأم بي بريل كريمها ويقولي سره...
... إيييي سر شنو...
... وفجأة تظهر سحر.... واااااااااااااااااااااضيقي أنا..

.... ونواصل
Post: #317
Title: Re: أي بت شديدة بتحب ليها طُلبة (صبي بناي)
Author: Fadl Karrar
Date: 08-21-2007, 02:41 PM
Parent: #316

طارق
سلام
يا خوي أنا قلت الروب
أوكي
ما عندي الحق أطالبك أكتر من إنك تحن علينا شوية
وتدينا المفيد
جيب من الآخر ياخي
لأنو زي ما قال الكحلاوي ( كمل صبري وتعبت خلاص )
فأرجوك أرجوك ياخي رسل لي الخلاصة فى المسنجر
يعني فيما لا يتجاوز 100 كلمة وريني خلاصة القصة
وكان بقي فيني باقي مروة بكمل التفاصيل هنا مع الحبايب
المشتحف
ود كرار
Post: #320
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-22-2007, 10:14 AM
Parent: #317


ود كرار كيفنك
يا اخوي انت حكاية عوض باين عليها هبشتلها حِتِي صعبة خلاص
دحين لا تضيق
Post: #318
Title: Re: أي بت شديدة بتحب ليها طُلبة (صبي بناي)
Author: شول اشوانق دينق
Date: 08-21-2007, 03:27 PM
Parent: #1

طارق جبريل
كيف الحال يا رائع؟
Quote: شعر جسمك قايم خلقة.. الزول دة بالله تقول ابو القنفد شعره كله قايم زي الابر
حتى شعر نخرينو طالع زي المسمار الداقنو معوووج في خشبة....

بالغت مع صحبك شديد!!!

المهم صاحبك عوض لو ما عرس البنية يكون بالغ ويكون المخرج (إنت) بالغ عديل كده.

فيلم هندي ولا ناكل باسطة؟؟؟!!!

عاطر التحايا

شول اشوانق

* بعدين يا طارق كرهتنا عديل في القصة الما عايز تكمله ده.
Post: #321
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-22-2007, 10:16 AM
Parent: #318


شول بي جلالة قدرو عندنا هنا في حوش عوض
جملة الايمان انا مبسوطلي انبساطي فايتي علي القوانين

عوض الله يستر عليه من الجاييهو


محبتي الاكيدة
Post: #319
Title: Re: أي بت شديدة بتحب ليها طُلبة (صبي بناي)
Author: ياسر الامير ابوجكة
Date: 08-21-2007, 06:01 PM
Parent: #1

الزميل ورفيق الدرب الاخضر والمعاناة / طارق جبريل

قصة عوض جميلة ،،، لكن جننته جن ،، وداقرتو مداقره ،،،
( مشوارك طويل ،،، اخوانك كتار ،،، أمك منتظراك ،،،البت دي بيجيها واحد جاهز )
بس أنا خايف عوض اذا فشل يحملك الفشل ويقول انت نحستو ،،،لكن بكمل القصة الواقعية الجميلة دي ،،،زمان في واحد من اولاد الجديدة
ساكن العمارات قال لي انت ساكن وين قلت ليه القوز قال لي القوز دي وين (ضحكت ضحك )،،، عشان تعرف اولاد المصارين البيض ،،،
لو كان سكيته كان جكست حسناء من العمارات زي صاحبي عوض
حتى جديد اللقاء

خالص تحياتي
ياسر الامير ابوجكة
Post: #322
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-22-2007, 10:19 AM
Parent: #319


ود ابو جكة زميل الزمن الجميل كيفنك
يا زول هن مصارين بيض ساكت يمين مغسلات بي تيد
Post: #323
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-22-2007, 10:23 AM
Parent: #1


يمين يا الحبيبين البت سمحة سماحتا تخلي الزول بي ريالتو يلغلغ...
حاجبين زي البسطونة لامن يتنوها... العيون... نان هن عيون نصاح...
الجفون ليهن تنيي كدي ونعسانة موش زي ألاتي مدلدلات علي لِبدة الحمار كدي أكرمكم الله..
الرموش بالله زي جريد التَمْرة لامن تبقى رويانة... هسا دي رموش وألات عوض المتل شرا القندول ديل رموش؟؟
الشفايف مبسَمِن يمين تقيسو بالمل... وين لي شفايف خالتي سكينة زي الطُباقة من سف التُنباك..
ولا شلاليف عوض علي البزِديق (الدُلقان البيمسحوبوا الصاج)...
البنيي النخرة تقول شاحداها.. والفتحات ألاتها يمين البينسة يا دوب تدخل فيهن...
شفت فيها وفي نخرين عوض والصوف مارق منهن علي حفرة الدخان وعيدان الطلح مارقات منها...
استغفرتك يا مالك روحي... البت دي العاجبها في الزول دة شنو...
الرقبة تحلف يمين تقول مواسنها زي الحيطة لامن تتبيض....
يمين عِرقا ظاهر فيها مافي... موش زي ألت عوض عروقها ناطات تقول ضاربنه بي مقشاشة..
الصدير قدامها زي الوزين... والخصر يمين قرب يكون مافي كله كله...
أنا لامن وصلت لي رجلينا تحت... ريقي نشف وشلاليفي انشققن زي شقيق البرد داك...
وبقيت أبلع في ريقي... وارطب في شلاليفي بي لساني....
يمين اصابع رجلينها تقول مواسنهن بي قرقارة الأسود ديك...
وعاملالها هلال أبيض بالمنكير في راس ضفرينها بس هلال رمضان... إن شفتو في ضُلمي تقوم تصوم طوالي...
شايلالها صينيي ألت قزاز وفيها كبايتين ألات عصير منقة... يمين الكبابي مبعجات من هِني وهِني
وعاملات زي جنيفير لوبيز في حفل الأوسكار....
أما إن كان للأصابع الشايلة الصينيي... يمين منفخات زي القرقوش لامن يَخَمّر قبل ما يدخلوهو الفُرُن....
يمين أصابعينا دي إن قمعوها بي حِنيي تحلف تقول أم راس (البلح لامن يبدأ ينجض من راسو)...
- سلام يا شباب...
- اتفضل يا دكتور...
الدكترة تطير إن شاء الله...
... أنا هسا أبكي..
... ولا أكورك...
... ولا أعوعي رسمي...
وااااااااااا ضيقي.... وااااااااااا ضيقي.... وااااااااااا ضيقي....
يا سيدي الحسن تنجدني....
.... ونواصل
Post: #324
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 08-22-2007, 11:17 AM
Parent: #1

المساير يلمعِن
غايتو دي زاتا يطرشني من سمعتبا

قمة التجلي
وصلنا الدقداق
شايفك ختيت بالك لي خالت البنية
يعني جيتك مع عوض راقدلك فوق راي
تسلم وسرع شوي
Post: #326
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-23-2007, 11:07 AM
Parent: #324


حبيبنا السمؤل
ياخي المساير ألت النسوان ديل من الله خلقني ما شفت زيها
اصبرلي جاييك
Post: #325
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 08-22-2007, 11:17 AM
Parent: #1

Quote: وتشوف خالتي سكينة لافة المساير تحت أضاناتحلف تقول سماعة كمبيوتر وشغالها بيها شات في الهوت ميل


Quote: يمين الكبابي مبعجات من هِني وهِني وعاملات زي جنيفير لوبيز في حفل الأوسكار....


تعرف يا د. طارق القصة لذيذية والموضوع شيق واللغة الدارجية جميلة واسترجاعهافيه نوع من المتعة ولكن الاروع التشبيهات دي يعني قلبت فيها الهوبة يعني ربط فيه مزج جميل ما بين لغة تتحدث حول احداث في زمان ومكان يختلفان تماما وهنا تتجلى قمة الروعة بالله كثر ونحن بالنا طويل لو بقى مسلسل مكسيكي او غيره ما ورانا حاجة في الانتظار.
صفية
Post: #327
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-23-2007, 11:17 AM
Parent: #325


د، صفية كيفنك
وجودك هنا يسعدني
والاكيد ان ما اكتبه هنا له قيمة على المستوى الشخصي
الفقر كان حافذا كبيرا وحاسما لنا
احاول أن انقل أشياء عايشتها بتفاصيلها المملة
واتمنى ان تسعفني الذاكرة لسرد المزيد


محبتي الاكيدة
Post: #328
Title: Re: أي بت شديدة بتحب ليها طُلبة (صبي بناي)
Author: asmhan hashim
Date: 08-23-2007, 11:23 AM
Parent: #325

الجميل د.طارق


يعنى ختيتنا فى حتة ضيقة خلاص..
عاوزين القصة تنهتهى ونعرف عوض عمل شنو
وفى نفس الوقت ما عايزينها تنتهي عشان نستمتع بالوصف المبالغة وطريقة السرد الجميلة

واصل يادكتور
Post: #331
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2007, 10:01 AM
Parent: #328


اسمهان كيفنك...
عوض ذاته ختاني في حتة ضيقة خلاص
بس انت تابعي
Post: #329
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 08-23-2007, 02:39 PM
Parent: #1

ود جبرين كيفك؟

والله أنا صراحة ما عارف الكان عاميني من البوست ده شنو؟ لكن من شفته وانا في الشغل ما جريت لي قلم ولا كيبورد .. والله يستر.

Quote: واللذيذ يا ولدي عمتي كان عندها شافع ترضع فيهو قامت قلبتو بي
صُلبو وعايزة ترضعوا وقالت لي أُمي: إنت الولد دة مالو شلاليفو بقن كبار كدي

غايت ... لاتعليق.

تعرف الطيب صالح من ما كتب موسم الهجرة ولي هسة كل ما يسألوهو بينفي إنو هو مصطفى سعيد ...

أنا غايتو جريت لي بنبر وقعدت في البوست دا ....... و
سلم لي على عوض
Post: #332
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2007, 10:13 AM
Parent: #329


ود أبو العزائم كيفنك
هسا عليك الله نحن في عوض المبهدل المبشتن
ولا مصطفى سعيد استاذ الاقتصاد الوسيم

يا سيدي الفاضل ان تربط بين عوض ومصطفى سعيد
لعمري إن هذا قدرا كبيرا دونه النجوم....

تعرف مرة الطيب صالح كان مشتهي ليهو قُراصة وحينها كانت والدتي رحمها الله معي بالرباط
فبعد ما ضرب القراريص وقعدوا هو والوالد يحكوا عن الشمالية والتمر.... و....
قمت سألتو:
- شيخ الطيب عليك الله إنت مصطفى سعيد
- يا طارق يا ولدي مصطفى سعيد يطير كدي خلني في الونسة السمحي دي مع ابوك
لكن أنا يا ولدي أقرب للزين من مصطفى سعيد


محبتي الأكيدة
Post: #330
Title: Re: أي بت شديدة بتحب ليها طُلبة (صبي بناي)
Author: Amiral
Date: 08-23-2007, 03:01 PM
Parent: #1

سلامات يا طارق

متابعين معاكم لحدي الحلقة الاخيرة... بس زيد السرعة شوية
Post: #333
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2007, 10:16 AM
Parent: #330

الاميرال كيفنك
ياخي السرعة ان بقت زدناها بنحرق
لانه سايقلنا كومر قديم


محبتي الاكيدة
Post: #334
Title: Re: أي بت شديدة بتحب ليها طُلبة (صبي بناي)
Author: ماجدة عوض خوجلى
Date: 08-24-2007, 01:57 PM
Parent: #1

Quote: وااااااااااا ضيقي.... وااااااااااا ضيقي.... وااااااااااا ضيقي....
يا سيدي الحسن تنجدني....
.... ونواصل

يلحقك وينجدنا انشالله ياطارق قول امين لكن ما الضيق الواصل لنهاية السطر ده انا شايفة
لانك محتاج لزيادة نجدة تحياتى ليك ياطارق وسلامى لكل المعاك
Post: #337
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-27-2007, 10:28 AM
Parent: #334


يا سلام ياخي
بنت الخليفة كلها معانا
بنت الامتداد الزينة ماجدة في حوش عوض
عوض الله ينجدو من الجاييهو


محبتي الاكيدة
Post: #335
Title: Re: أي بت شديدة بتحب ليها طُلبة (صبي بناي)
Author: Nasr
Date: 08-24-2007, 05:00 PM
Parent: #1

خلينا من عوض
إنت حصل ليك شنو؟؟؟؟
Post: #338
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-27-2007, 10:32 AM
Parent: #335


يا نصر كيفنك
ياخي انت مالك حاكيها كدة
بعدين انت قايل عوض قصتو انتهت
الراجيهو الله لا يوريك ليهو

محبتي
Post: #336
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 08-24-2007, 05:04 PM
Parent: #1

شايلالها صينيي ألت قزاز وفيها كبايتين ألات عصير منقة... يمين الكبابي مبعجات من هِني وهِني
وعاملات زي جنيفير لوبيز في حفل الأوسكار....


شكيتك علي الله يا ود جبريل
Post: #339
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-27-2007, 10:33 AM
Parent: #336


وليد كيفنك
الجايي كتير... بس اكرب بطنك كويس من الضحك
Post: #340
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 08-27-2007, 11:37 AM
Parent: #339

يادكتور الله يديم عليك نعمتوا بزيادة قول آآآآمين

والله لوخلصة قصة عوض دي ما عارفين نقبل وين تاني مع

أنوالواحد مستمتع جدا بالوصف الذي تمتلك ناصية الكلمة

وتفرش جماله زي رملة الموٌنة حقت البياض يديك ألف عافية

وتحيات لأم العيال ولريم ومحمد كمان واصل الواحد من الضحك

أنشق ذي حيطة الجالوص في بيت عوض ده.

،،،،أبوقصي،،،،
Post: #343
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-27-2007, 05:07 PM
Parent: #340


حبيبنا ابو قصي
ياخي الكلام الكبار وغلاد دة انا ما بقدر عليهو
نحن ناس طُلب ساكت
Post: #341
Title: Re: أي بت شديدة بتحب ليها طُلبة (صبي بناي)
Author: osman righeem
Date: 08-27-2007, 12:04 PM
Parent: #1

العزيز طارق

منذ وقت وانا احاول ان امر علي هذا الطلبة
لسبب مهم وهو بقبني ان البياطرة ربنا مديهم طاقة (فتحة)فهم خاصة
وبصيرة تساعدهم في فهم احتياجات مرضاهم
لكن ما قايل ان هذه المنحة الالهية ممكن بستفاد منها في متابعة احوال البشر

و هذا الوصف الرائع
لا يخرج الا من رائع
امتعك الله بالصحة و العافية

ولك مودتي
Post: #344
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-27-2007, 05:10 PM
Parent: #341


عثمان رغيم كله بي هنا في حوض عوض
جملة الايمان الواحد ما يعرف يقبل وين الليلة
تعرف يا عثمان موش عشان انا بيطري
لكن حتى ايام الدراسة البياطرة كان عندهم تعليقات تخلي الزول يقع من الضحك
ولي هسا انا ما عارف السر شنو
كدي أسأل سجيمان

محبتي الأكيدة
ايها الجميل
Post: #342
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 08-27-2007, 04:03 PM
Parent: #1

طارق جبريل
ازيك دي دفرة ساكت في زول طالب يقرا البوست وما عارف يلقاه وين
اها ودعتك الله
صفية
Post: #345
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-27-2007, 05:12 PM
Parent: #342


د. صفية
تشكري علي الدفرات
إن شاء يوم دفر عربيتك البتحلمي بيها ديك ما يجي
Post: #346
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-29-2007, 10:18 AM
Parent: #1


اها يا الزينين...
سحر قدمتلنا المنقي.. وسلمت علينا في يدينا...
جملة الايمان أنا لامن دقشت ايدي ايدها زي الضربني ماس...
عوض وبنيتو ابتسمولم ابتسامتا خبيثي كدي... والبنيي جات اتوهططلها في كرسي جنبي...
يمين زي الأبكم... الربريب كله طارلي في راسي.... وجسمي سخن وبقيت كلي ماشي مويي..
شويتين جات الام ومعاها الحبُوبَة... يمين الحبُوبَة باست عوض في جضومه العلي السعِن الناشف داك...
- كيفنكم يا الحبيبين..
- الحمد لله بخير...
- ناس امك كيفنهن يا عوض
- الحمد لله يا حاجة كويسين ما عندهم عوجة
- مالك ما جبتهم معاك
- والله مشغولين شويي... ايي مشغولين شنو... البلتون داك الداير يشيلو يجيبو شنو...
جكس عوض لابسالها فستاناً بصلي كدي فيهو خطوط حمراء خفيفة كدي
والشعر يلمع لاماهو لي وراء بي شيتا احمر كدي فيهو ورود... اذا كانت الام بتستعمل بريل كريم...
لازم البنيات بيستعملن شيتاً عمرنا ما سمعناهو...
الاضافرين راسن اخضر والباقي احمر علي البتيخي لامن يشقوها لي اتنين...
بيني وبينكم انا بقيت قاعد زي المعْسَم وعندي قطيعي لاني قادر اتلفت اشوف في سحر
ولاني قادر اشوف في عوض وبنيتو... يمين العوارة الفي الدنيا كلها جاتني في الوكت داك..
عاينت للصالة القدامنا ملياني زهريات وشِدَرا غريب غريب.. وواحدا ماشي مع الحيوط..
أنا من ولدوني غير النيم وصباح الخير والتَمُر والبرسيم آآبعرفلي شِدَر تاني...
دنقرت سرقتلي شوفي في رجلين سحر...
صلاتي علي محمد بالله جرحايي بالغلط ماها في والسفنجة حقتهم ذاتها مختلفي
يمين عاملي زي حلاوة لَكُوم...
-عوض بي خباثي: طارق انت نسيت لسانك في الامتداد ولا شنو...
- عوض اخطاني انا ان بقيت انفتحت تاني آآبسكت..
-سحر: أُخد راحتك يا دكتور....
- ياخي انت مالك شابكاني دكتور دكتور... نحن يا دوب في الأرانب...
- شنو يا دكتور التواضع دة كله...
- ابدا...
اتشجعت ولفيت واختلي شوفي في وجيها زي القمر في عز الصيف...
يمين عيوني قربن يقعاً في حجري من شدة البنيي دي...
خصلة من شعرها نازلة بين عيونها يمين زي الصبيطي مختوتة في مرتبة ألت قطن منجدي جديدي
وأصلو إن كان لي قلبي يمين قرب يمرق عندها عديل...
الله لا تكسبك يا عوض... انا ماني قادر على الجهجهة دي.... شكيتك علي الله..
- بديت برنامجك يا دكتور..
- والله الحمد لله شغالين في أركويت الأيام دي
- لكن غايتو ناس عجيبين خلاص... طلبة جامعيين وشغالين طُلب...
- ما تخافي ما قاعدين ناكل الناس...
البت دي ضحكت لامن دموعها نزلن... يمين السنون مرصوصات وبُيُض علي غتيات أقلام الشيني..
ولامن ختت يدينها في وشها وصديرها طلع لااافوق... يمين اتشحتفتلي جنس شحتفتا بس زي الغرقان...
اليدين مليانات ومنديات بس تقول لقِيمَات ...
من الله خلقني ما شفتلي كيعان (جمع كوع) ناعمات وملس زي ديل... موش زي ألاتي مسودات ومقشرات
زي البُلطي قبُل ما ينضفوهو...
- بالغتة يا دكترة ما للدرجة دي...
ربكم رب الخير دخلت خالة البنيي ومعاها ويحيدتا مغتغتي من صوف راسها لي كرعينها... أسود في أسود
مافي شيتا فيها ظاهر غير عيونها علي التمساح لامن يكون مطلع عيونه فوق المويي... ومنزلالا قماشاً
أسود كدي من راسها لي عند كتفينا علي الشملي ألت الدخان... يا سيدي الحسن.... إييي دة شنو دة...
خالة البنيي سلمت علينا وقعدت...
- الزولة المغتغتة: معليش يا جماعة أنا لا أُصافح الرجال...
- منو القالك نحن رجال
- يمين الناس ديل بقو يزحوا من الضحك..
- دة كلام شنو يا دكتور
- ياخي نحن بُطان مانا رُجال....
.... ونواصل
Post: #347
Title: Re: أي بت شديدة بتحب ليها طُلبة (صبي بناي)
Author: osman righeem
Date: 08-29-2007, 10:59 AM
Parent: #346

وينك
هروب وجاي اليوم الاربعائ تشتغل سهرة
عشان تقبض مع الناس بكرة !

وصفك الرائع ذكرني روائع خالدة

المكوكب عودها
ما نجرنو فارات ( فارة النجار مش الكيبورد)
و الموقه نهيده
جبنة بل وقايات
يا خيل مروي للعرضه شارفات
يتقلب الحظ و نلقي الجنيهات
ومستجد النعمة دايما تلقاه غلاط

وقواسيب مودتي + قواسيب مودة العريس جمال ابوالحسين
ذاكرة الشعر الشايقي
الاصيل

و سلام
Post: #351
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-29-2007, 05:21 PM
Parent: #347


ود رغيم كيفنك
يا اخوي وصفك دة حق رباطاب ما حق شوايقة
غايتو الله قال بي قول البيقع قدامك

ياخي ابو الحسين دة لسة غاتس في العسل
الله يطراهو بالخير


محبتي الاكيدة
Post: #348
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 08-29-2007, 11:51 AM
Parent: #1

غايتو أنا لما اكتشفت البوست ده، زي الإكتشفت كنز، وقعدت أقرا بدون توقف .. (الشغل طاير)

لكن هسة بقيت زي الباقيين أقرا قدر البيطلع من (نقاط الزير بتاع طارق جبريل ده). يعني بقيت مشحتف زي البقية ..

Quote: ونواصل....


ومنتظرين ....
Post: #349
Title: Re: أي بت شديدة بتحب ليها طُلبة (صبي بناي)
Author: segtaweel
Date: 08-29-2007, 03:25 PM
Parent: #348

الزوول السمح سمااااحة فووق حد الوصف
طاارق

عاارف انا نفسى انو البوست اصلو ما ينتهى لانو كل التفاصيل دى بترجعنا لزمن مابيرجع تاانى وبشحتنفناشحتفة الطلبة لى يوم

الخميس وهو وواقف قداام الاسطة عيونو تدور زى عيون بت ام لعااب وريااالتو تقرب تكب وهو فى ذهنو طلب الباسطة الماشى يضربو

اماانة علييك اكاان ما شحتفتهم وااحد وواحد خليهم يعرفو قيمة الطلبة امانة فى رقبتك من زمييل شاال القدح لمن ترقوتو لحقت

القصةالبيعالجوها للحمير بى حجارة البطارية
Post: #350
Title: Re: أي بت شديدة بتحب ليها طُلبة (صبي بناي)
Author: segtaweel
Date: 08-29-2007, 03:25 PM
Parent: #348

الزوول السمح سمااااحة فووق حد الوصف
طاارق

عاارف انا نفسى انو البوست اصلو ما ينتهى لانو كل التفاصيل دى بترجعنا لزمن مابيرجع تاانى وبشحتنفناشحتفة الطلبة لى يوم

الخميس وهو وواقف قداام الاسطة عيونو تدور زى عيون بت ام لعااب وريااالتو تقرب تكب وهو فى ذهنو طلب الباسطة الماشى يضربو

اماانة علييك اكاان ما شحتفتهم وااحد وواحد خليهم يعرفو قيمة الطلبة امانة فى رقبتك من زمييل شاال القدح لمن ترقوتو لحقت

القصةالبيعالجوها للحمير بى حجارة البطارية
Post: #353
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-29-2007, 05:27 PM
Parent: #350


segtaweel
ابو الزومول كيفنك
يا اخوي قبل كل شي انت اسمك دة مالو صعب كدي
يا زول والله نحن الشينين المبهدلين ديل خلينالك الجكس دة يرقد ارشي كله كله
بس اصبرلي لا قدام
Post: #352
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-29-2007, 05:24 PM
Parent: #348


ود ابو العزائم كيفنك
والله يا حبيب الوقت في المغرب دي تقول ناصلو ساعتين
ياخي ممحوق خلاص

واتمنى إنه الذاكرة ما تخون الواحد عشان يردح هنيي
ونقاط الزير بنخليهو نفاج عديل


ودي الاكيد
Post: #354
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 08-29-2007, 09:22 PM
Parent: #1

الجميل د طارق
مباااالغة والله
لكن باقيلي في الشايفو ده انت غرقت لي اطنيك انا خوفي الزيارات الجايات
انت حا تحنس عوض بعدهو ماكان مكسر التلج في الاول
تسلم
Post: #355
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-30-2007, 10:19 AM
Parent: #354


السمؤل يا حبيبنا
ياخي اخوك كسير التلج دة ما بيقدر عليه
وبيني وبينك انا اتزرزرتلي جنس زرزير
وقاومتلي جنس مقاومة لامن الله نجدني
Post: #356
Title: Re: أي بت شديدة بتحب ليها طُلبة (صبي بناي)
Author: Ashraf El Bagir
Date: 08-30-2007, 10:37 AM
Parent: #355

ليالى الحلمية شنو!
والله يا طارق مسلسلك ده داير ليهو سيناريست ممتاز ومخرج انشاء الله خريج
والممثلين ما مشكلة



انزل



















تبيع؟
Post: #357
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-31-2007, 10:09 AM
Parent: #1


أشرف يا حبيبنا
ياخي مالك عازني احلم واصدق وافتكر نفسي اسامة انور عكاشة
Post: #358
Title: Re: أي بت شديدة بتحب ليها طُلبة (صبي بناي)
Author: Amiral
Date: 08-31-2007, 12:24 PM
Parent: #1

سلامات يا طارق

متابعين بس زيد السرعة شوي... يعني عايزين النهاية قبل رمضان..
Post: #359
Title: Re: أي بت شديدة بتحب ليها طُلبة (صبي بناي)
Author: عامر تيتاوى
Date: 08-31-2007, 09:59 PM
Parent: #358

Quote: حاجبين زي البسطونة لامن يتنوها... العيون... نان هن عيون نصاح...
الجفون ليهن تنيي كدي ونعسانة موش زي ألاتي مدلدلات علي لِبدة الحمار كدي أكرمكم الله..
الرموش بالله زي جريد التَمْرة لامن تبقى رويانة... هسا دي رموش وألات عوض المتل شرا القندول ديل رموش؟؟
الشفايف مبسَمِن يمين تقيسو بالمل... وين لي شفايف خالتي سكينة زي الطُباقة من سف التُنباك..
ولا شلاليف عوض علي البزِديق (الدُلقان البيمسحوبوا الصاج)...
البنيي النخرة تقول شاحداها.. والفتحات ألاتها يمين البينسة يا دوب تدخل فيهن...


ده شنو يازول .. شغل نضيف
ياريس انتا ما عملتا طبلية
فى اجازات الابتدائى
Post: #360
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 09-01-2007, 12:27 PM
Parent: #359

Quote: وأصلو إن كان لي قلبي يمين قرب يمرق عندها عديل...
الله لا تكسبك يا عوض... انا ماني قادر على الجهجهة دي.... شكيتك علي الله..


يادكتور والله وصفك ده يقابل شعراء الحقيبه ذمان كان كتبوا أنجيل عديل كده

واصل يادوب نحن في مربع 4 مرقنه من مربعكم وراجنك تصل عندنا في 14 ماعوض ده حق

الأمتداد كلوا وبعدين ناس البورد من الصحافة ال ..... الجنينة وبقية أقاليم السودان

،،،،أبوقصي،،،،
Post: #364
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-02-2007, 00:05 AM
Parent: #360

الجميل ابو قصي
ياخي ناس زمان ديل كانوا ريادين شديد
نحن ما بنقدر عليهم


دمت يا عزيز
Post: #393
Title: Re: أي بت شديدة بتحب ليها طُلبة (صبي بناي)
Author: أميرة فاروق عبد العال
Date: 09-04-2007, 12:06 PM
Parent: #364

رغم حداثة عهدي بالبورد وبوستاته.. شاء حظي أن اعتر في هذا الرائع.. واتابع بكل فرح الطفولة ومرح الصبا سرده هذا الجميل البسيط..
وحقيقة أمتعتني وأدهشتني..
هذا النوع من الكتابة الذي يجعلك تحس وكأنك انت الذي تحكي أو أن هذا الشخص كان يسير بجانبك ويحيا تفاصيل حياتك اليومية..
فهذه الذاكرة هي ذاكرتنا جميعا.. وتلك الأيام جميعنا عشنا بعضا من تفاصيلها.. وهؤلاء الأشخاص كان أحدهم والدي او عمي أو خالي أو جاري..
وتلك هي امي أو خالتي أو جارتنا :فلانة:..
حتى أن الخيال يسنرسل جاهدا محاولا تركيب هذا الحكي على تفاصيل وعاها يوما ما وعايش تفاصيلها..
واصل وسنواصل..
لك التحية والاجلال..
Post: #363
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-02-2007, 00:01 AM
Parent: #359

تيتا يا رائع
القصة جابت ليها طبالي
Post: #362
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-01-2007, 11:53 PM
Parent: #358

اميرالنا الجميل
والله حكاية السرعة دي عايايزالها دفرة


تسلم يا جميل
Post: #361
Title: Re: أي بت شديدة بتحب ليها طُلبة (صبي بناي)
Author: قرشـــو
Date: 09-01-2007, 02:40 PM
Parent: #1




الحبيب طارق جبرين


لك التحية

Quote: البنيي جات تمشي بي مهلي... والله سمحي سماحةً تحرق في المصارين وعيونها غلاد وحواجبينا علي الهلال
وصديرها يعوم قداما زي الوزين.. وخصيرا يمين أصغر من السبلوقة.. أما إن كان لي الرجلين متمسحان زي
مِرِق العرِش أليل الأُوّض...والكفين شكلهن ناعمات بس حلاوة قطن.. والشي التاني ماني قادر أوصفه..
يمين ريقي نشف وقعدت أبلع فيهو تقول متغدي تركين ومتعشي فسيخ...
جسمي بقى يرجف زي المورود(الحمى) ورجليني بقن ينطاقشن علي ضنب الضب وعيوني اتلصقن
في نص راسي بس بقيت زي القعويي(القعونجة).. وصوف جلدي كله قام بس أبو القنفذ..


سعدت أى ما سعادة وانا استمتع بسردك الجميل لحكاية عوض وللمفارقات بين هنا وهنالك وبين ناس وناس وفعلا الطبقات بينها فرق شاسع الا فى المشاعر والعلاقات الانسانية فعندها تتلاقى كل القلوب ...
سعدت باللهجة الشايقية المحببة التى اضفتها للسرد فزادته جمالا على جماله وبحق القصة أكثر من رائعة وقد قضيت اياما اقرا فيها واعود لاكمل ...

لك التحية على هذا الابداع وواصل يا سيدى فنحن حضور ننتظر حكاية عوض الوقع وما سمى وانت ايضا فى طريقك لذلك الامتلاك الخفى وولوج امبراطورية النساء الجميلة ......

مع مودتى
Post: #365
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-02-2007, 00:11 AM
Parent: #1

يا سلام ياخي
قرشو كله في حوش عوض
جملة الايمان انا الليلي انزار رسمي

تعرف يا حبيب
الفروق بين الهنا والهناك دي
ازمة بلد بي حالها
اسعدني وجودك هنا
خليك قريب
Post: #366
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-02-2007, 00:50 AM
Parent: #1


الزينين كيفنكم...
ماني عارف... بس أنا باقيلي الناس ديل شايفننا أرقوزات...
اتونست معانا خالة البنية ودخلت لا جوة...
انا فشان اتفكى من الزرزير وقعتلي الخرابة المغتغتة دي في جرح...
وبيني وبينكم أنا عايز احاججها لامن الفطور يطلع ونمرق سالمين من هِني...
- هسا إنت شايفة سلامك لينا حرام...
- يعني غير مستحب...
- شوفي أنا ماني الشعراوي... بس أفشوا السلام بينكم...
- دة حديث في غير موضعه...
- إييي موضع شنو... سلام عليكم وحق الله بق الله دايرة تدخلك جهنم..
- ياخي انت بتبسط الأشياء بشكل غريب ومن غير أسانيد...
- ياخي ما تقعدي تحوقصي شي... وتمرقيلنا في الكلام الغلاد دة..
دحين سلامك علينا لاهو داير يغنينا ولاهو بيدخلك مع أبو لهب...
- شوف الجمعة الجاية إن شاء الله نخصصها للنقاش دة...
- يا سيدي الحسن هي فيها جمعة جاييي... أخير زرزيرنا...
جملة الإيمان عوض دة فقعلو ضحكة سنيني زي طير السُقدِي لامن صنا أضاني...
- يا طارق ياخي انت ما عندك منطق...
- إييي منطق شنو... يا سحر عليك الله هَوِّينا وعوض صاحبي دة إن بقى جاع شديد
يمين بطنو تقعد تكورك واغ ويغ بس الشافع الماسكلو حنبوكة يبعبص فيها...
دحين أمك دي شايفلي نسوان منفخات كدي دخلن معاها لي جوة لا يبقى حَتَّلَن اللحم الفي الحلة كله...
- (ضاحكة بشدة) يا دكتور ما تخاف إنت بس تأمر وكل العايزو بنعملوا ليك...
إنتو نظامكم كيف في الفطور... يعني سلطة أول وبعداك المين دش...
- المين دش... قادر الله... شوفي يا بت الحلال هِن أصلهن صنفين مافي غيرِن..
إما قراصي وحولينا بصلا أخدر... وتسمعي في القَرَشي: كُرُم كُرُم... قرَش قرَش علي عجلات القطر
لامن السكة تكون ملياني رملة والعجلات يضرُسن فيها...
وكمان إن بقى فول بي زيتو تسمعي في الجلَق جُلُغ جلَق جُلُغ بس متل الدلو لامن يقع في البير....
تقومي تقوليلي المين دش...
والله يا الحبان البت دي ضحكتلها جنس ضحكا يمين دموعها جرن... والله بسألني
الدمعايي تنقط زي عسل خشم القربة لامن يصفوهو... موش زي دموع عوض زي اللبخة
لامن تقطعلك منها وَرَقي...
- خلاص يا دكترة نستعجل الفطور وبعدين نتونس...
- أنا الونسة دي ياها ذاتا الخايف منها...
- كيف...
- لا مافي شي، بس شوفيلنا الفطور دة...
اخدنالنا حنكين مع جكس عوض ونادونا للصُفرة....
عوض جكسيهو ساقو من يده وقدمو وانا خالة البنيي جات مسكتني من يدي:
- إنت البنات ديل كنت بتقولهن في شنو لامن جن يضحكن كدي
- والله ونسة عادية...
دخلنا يا الحبات على الصفرة ... قادر الله... دة الكلام... الطربيزة ملياني...
في الأطراف كدي صحانة صغار كدي علي صفق المنقة فيهن زيتون أسود وشيتا
أبيض ملولو كدي علي عِمَمْ سواقين اللواري قالوا اسمه الجبنة المضفرة... وبيناتن
صحانة فيهن سلطة خضراء وفي الاطراف سُباتة فيهن العيش... وفي النص لحمة
مكبورة وتلاتة سراويس مليانات شيي من الله خلقني ما شفت زيها... لحما مدخلنوا
في عيدات ألات خشب كدي وزانقنه في بعضو بي بصل كدي بس رُكاب قطر كريمة
في الدرجة التالتة وشنط المنقة والبلح بيناتم... صلاتي علي محمد... المهم شي سلطة أسود
وحاجات تاني لي هسا ماني عارفها شنو...
أول ما قعدنا عشان ناكل عوض شال ليهو زيتونة وعاين لي وضحك... خالة البنيي حلفت
إلا تعرف عوض ضحك ليه... قام قالها خلي طارق يحكيلك...
- شكيتك علي الله... أنا عارف نفسي جيت معاك أرقوز... شوفوا يا الحبان
عندي عمة لي اسمها أم الخير كان عندها ولد بيحضر برة لمن جاء جاب معاهو زيتون...
قامت عمتي قالتلو: مُحومد إنت دة شنو المُر دة...
- يمة دة الزيتون أكل أهل الجنة...
- نان بعدين واااحناضلنا...
كأنها ضمنت الجنة خلاص...
.... ونواصل
Post: #367
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 09-02-2007, 06:14 AM
Parent: #366

أبو ريم الله يبسطك دنيا وآخره قول آآآآآآآمين

ويخليك لوليداتك واصل ياأخوي متابعيين ومابنبطل

قرقره والجكس ماأظن ضحك تاني بعدك حتي اليوم.

،،،،أبوقصي،،،،
Post: #368
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-02-2007, 12:41 PM
Parent: #366


ابو قصي يا جميل
ياخي دعواتك دي بالدنيا
محتاجنك هناك في حوش الامتداد
عشن اختنا نسرين
Post: #370
Title: Re: أي بت شديدة بتحب ليها طُلبة (صبي بناي)
Author: Ishraga Mustafa
Date: 09-02-2007, 12:51 PM
Parent: #368

طارق ازيك

جيت اشوف حكاية الصبى البنأى دى

غايتو بعقد شوية وبمشى انطف باقى الكمونية
Post: #371
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-02-2007, 01:04 PM
Parent: #370


يا سلام يا عوض ياخي
جبت لينا اشراقة مصطفى كلها
يا البت الناس افرزي شنو البعقد هنا
Post: #369
Title: Re: أي بت شديدة بتحب ليها طُلبة (صبي بناي)
Author: osman righeem
Date: 09-02-2007, 12:50 PM
Parent: #1

يا ود جبرين ما شفت عوض
اكل الليقمات فات لي قدام
انت خايف من شنو
خش طوالي
محل رهيفي تتقطع
و العمر عن سيدو

و اذا في زول هس خايف منو
قوليهو ده ما حجي ساكت
خيالات
اوهام

سلام كتير يا رائع
Post: #372
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-02-2007, 01:14 PM
Parent: #369


ود رغيم كيفنك
وحاتك ماهو الخوف
بس كيمان اللحم الكانت ورانا
والاهل كانوا منتظرين مننا الكتير
Post: #373
Title: Re: أي بت شديدة بتحب ليها طُلبة (صبي بناي)
Author: Ishraga Mustafa
Date: 09-02-2007, 01:37 PM
Parent: #372

Quote: يا البت الناس افرزي شنو البعقد هنا


انا قاصدة اقعد وبتكون وقعت ليك
لكن شفت كيف ممكن الاتصال والتواصل بين الناس تحصل فيهو تشويش بسبب اللغة
ده ذاتو اى التشويش الغطس حجر بلد بحالها، من الاستقلال بنحفر عشان نخلق لغة مشتركة


اها كدى بخرب ليكم العزف ده، حسع مالى ومال السياسة

ازيك ياطارق
Post: #374
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-02-2007, 01:47 PM
Parent: #373


اشراقة كيفنك
انت غتستي وين من زمن الكمونية ديك
تعرفي حب عوض دة داخلة فيهو السياسة من بدايتو
بس انت اقري بين السطور

بديت احكي هنا وسوف اواصل ان شاء الله
عن قصة عايشت تفاصيلها وبدقة
اتمنى ان لا تخونني الذاكرة

لا ادري ان كانت لهجتي الشايقية توصل
هذه الذكريات بشكل جيد
لكن وجدت نفسي اكتب بها بمتعة كبيرة

خليك قريبة
Post: #375
Title: Re: أي بت شديدة بتحب ليها طُلبة (صبي بناي)
Author: Fadl Karrar
Date: 09-02-2007, 02:07 PM
Parent: #373

غيب وتعال تلقانا نحنا يا نحنا
بس أنا رفعت الراية البيضاء
لا بدروك ولا بحمل بلاك
اسوي شنو؟؟؟؟؟
قلنا ليك رسل الخلاصة فى المسنجر
قلت لي اصبر النهاية قربت
تكون قاصد نهايتنا نحنا؟؟؟؟
شوف نهاية القصة أنا خليتها
لكن بس قول وحات الله ووحات الله إنك ما عوض
Post: #376
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-02-2007, 11:09 PM
Parent: #375


ود كرار كيفنك
جابتلها حليفي كمان
انا قلتلك زمان: انت شيت عوض دة
باقيلي هبشك في العضام

دحين يا حبيب الوكت ممحوق
بس ان الله مد في الايام بجيك صادي
Post: #377
Title: Re: أي بت شديدة بتحب ليها طُلبة (صبي بناي)
Author: ياسر الامير ابوجكة
Date: 09-02-2007, 11:18 PM
Parent: #1




يادكتور أنا منتظرك في بوست الجديدة ،،،، عوض دا ما ترحمو شوية ،،،، الناس دي شايلة حسرتو ومنتظراك ،،،، بعدين لمن قلت لي مشيت لدكتور طارق في ابن سيناء الاجازة المضت قلت الزول دا خلاص

مليان بذكريات الجديدة وقابل ناس حسن ناصر ،،،اتعشمت فيك تجيني بغادي القاك رافع بوست عوض دا فوق وخالي قلعة العلم والشموخ ،،، وبكرة عوض بزعل منك ،،،إلا يكون قلبه ميت داير الشهرة



في انتظارك

ود الامير
Post: #378
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-02-2007, 11:35 PM
Parent: #377


ياسر الامير يا حبيبنا
والله يا حبيب الذكريات بالكوم
بس الوقت الممحوق دة ما عارف نعمل فيهو شنو
بجيك بي هناك بس اصبر علي


محبتي الاكيدة
Post: #379
Title: Re: أي بت شديدة بتحب ليها طُلبة (صبي بناي)
Author: anas hassan
Date: 09-03-2007, 02:10 PM
Parent: #378

سلامـــــــــــــــــــــــــات

بصراحه بقراء لى يوم كامل
وما عارف ارد ليك اقول شنو
لانو موش القصه عسل وبس

العسل انك بتحكيها بطريقه احلى من العسل

دومــــــــــــــــــــــــا يارائع
Post: #384
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-03-2007, 11:39 PM
Parent: #379


انس حسن كيفنك
تعرف كلمة رائع من زمن حب عوض ما سمعنها تاني
لانه في الاخير قعد يغني في اغنية: يا رائع جفيتي وانا ضائع
بتاعة احمد المصطفى..
لكن غناها ليه ما بقول ليك هسا
Post: #380
Title: Re: أي بت شديدة بتحب ليها طُلبة (صبي بناي)
Author: شول اشوانق دينق
Date: 09-03-2007, 02:45 PM
Parent: #1

Quote: دخلنا يا الحبات على الصفرة ... قادر الله... دة الكلام... الطربيزة ملياني...
في الأطراف كدي صحانة صغار كدي علي صفق المنقة فيهن زيتون أسود وشيتا
أبيض ملولو كدي علي عِمَمْ سواقين اللواري قالوا اسمه الجبنة المضفرة... وبيناتن
صحانة فيهن سلطة خضراء وفي الاطراف سُباتة فيهن العيش... وفي النص لحمة
مكبورة وتلاتة سراويس مليانات شيي من الله خلقني ما شفت زيها... لحما مدخلنوا
في عيدات ألات خشب كدي وزانقنه في بعضو بي بصل كدي بس رُكاب قطر كريمة
في الدرجة التالتة وشنط المنقة والبلح بيناتم... صلاتي علي محمد... المهم شي سلطة أسود
وحاجات تاني لي هسا ماني عارفها شنو...

طارق جبريل
اما إنت مجنون بشكل!!!
يا اخي شنو تحكي الحكاية بالطريقة المجنونة دي؟
طريقتك جميلة جداً جداً مع إنه طولت علينا القصة ودايرين نعرف عوض صحبك ده عرس البنية ولا لا...
شنو يا اخي ما تختصر؟؟؟

شول اشوانق
Post: #381
Title: Re: أي بت شديدة بتحب ليها طُلبة (صبي بناي)
Author: Dr. Moiz Bakhiet
Date: 09-03-2007, 05:34 PM
Parent: #380

التحية ليك يا طارق على هذا السرد الرائع

حقيقي أول يوم اقرأ هذا البوست الجميل

واستمتعت بالقصة حد الثمالة

ولم أضحك هكذا منذ زمن بعيد..

وفي انتظارك...

..

غايتو بالغت مع الأرانب..
Post: #386
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-04-2007, 00:11 AM
Parent: #381


البروف معز كله بي هنا
ياخي والله دي زيارة دسمة خلاص
الله يبسطك دنيا وآخرة زي ما بسطني الليلي
بي زيارتك دي...


الأرانب حالن ساهل.. المصيبة في عوض


محبتي الاكيدة
Post: #385
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-04-2007, 00:03 AM
Parent: #380


شول كيفنك
انت قايلني انا نصيح
انا ما زمان جنيت من شوفتي للبنيي السمحي دي
Post: #382
Title: Re: أي بت شديدة بتحب ليها طُلبة (صبي بناي)
Author: serenader
Date: 09-03-2007, 08:15 PM
Parent: #1

ياطارق يا خوي..
الله يجازي محنك.. عملت لي صداع يمشي ويجي مع الضحك زي كهربة الثورات..
تعرف، قصتك دي عابرة للقارات، أنا متابعها في تلاتة (أي والله تلاتة) قارات.. بديتها في الإمارات (آسيا)، وسكيتها في السودان (أفريقيا) وهسع من قبيل أضحك واتنخج في نص لندن (أوروبا) والخواجات يتضايرو مني بعيد بعيد، ويوسوسوا لي بعض: (He is definietly insane, certifiable)..
غايتو شوف: أكان تميتها بسرعة، خير وبركة، وإلا بركب أجيك محل ما إنت قاعد واتمها من عندك.. (باقي انا غليد زي اهل جكس عوض ديك، لكن روحي محرقاني زي ناس الامتداد)..
اها أنذرتك وحذرتك..
Post: #387
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-04-2007, 00:20 AM
Parent: #382


سرينيدر كيفنك
النبي فوقك في سؤال محرقني
انت ما لقيت غير الاسم الصعب دة
يعني خلاص الاسامي كملن من الدنيي

يا سيدي تبرا من الصداع
والله والله انا اصبعيني ذاتن حارقاتني
وعايز اتملكم القصي يمين بقن زي هزاز الموبايل...
علي والله الايام دي مزنوقلي زنقة في الشغل بس الله يفكني منها
وانت عارف شغل الجرائد اليومية والمغاربة ديل مدروعين في رقبتي
وعندنا جريدة جديدة وشغالين في تهييئ ماكيتاتها
دحين يا الحبيب اصبرلي
وان بقيت جيت المغرب والرباط اسال اي زول في الشارع
بيجيبك لي عندي اصلنا قليلين هني وباينين زي لامن تختلك
بعرة في كورية لبن
Post: #383
Title: Re: أي بت شديدة بتحب ليها طُلبة (صبي بناي)
Author: serenader
Date: 09-03-2007, 08:32 PM
Parent: #1

بعدين الذمة في رقبتك
تخنقك وتطوطحك..
القصة دي جد، ولا قاطعها من راسك؟
في كلتا الحالتين.. جمييييييييييييييييل!
Post: #388
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-04-2007, 00:25 AM
Parent: #383


Quote: بعدين الذمة في رقبتك
تخنقك وتطوطحك..
القصة دي جد، ولا قاطعها من راسك؟
في كلتا الحالتين.. جمييييييييييييييييل!


سرنيدر
انت باقيلك شنو
يعني الاحداث والوصف دة كله نجرتو من راسي
Post: #389
Title: Re: أي بت شديدة بتحب ليها طُلبة (صبي بناي)
Author: HAYDER GASIM
Date: 09-04-2007, 03:55 AM
Parent: #388

ود جبرين ... كيفنك

جئتكم متأخرا ... لكن ما دفعت التمن على دائرة الملين ,
فعشان أحصلكم لي يومين بقرا فى مكتوبكم الشيق هذا ,
لهذا عاهدت الله أن أقيم هنا ... وحدها إحدي المنتهيين
... فإما حسن ... أو الإرشيف .

ربما فاتتني لحظة العرض الطازج لما سلف من الموضوعة ,
حيث تكون الأحاسيس بكرا كذلك ... لكن هذا لم يمنعني
من الإستمتاع بتلك القصة وبالسرد الدرامي الخلوب ,
بالكلمة وهي تنسل من صميم تراثنا الريفي المبين ,
بالعبارة الجزلة وهي توسع المعنى جمالا وتشبعه
جزالة وإستغراقا فى تلافيف مخليتنا الإجتماعية ,
... وهناك الكثير الذي سأقوله فى مقبل الأيام .

فغير فرحي بطارق جبرين وهو الصديق الإمتدادي
اللدود لصحافتنا الغراء ... فقد إستهوني حكيه الذي
إستحضر بئية إجتماعية كنا جزءا منها بحكم الجغرافيا
وبحكم المعاشرة وبحكم التواصل المتين بين الإمتداد
والصحافة ... لهذا عايشت مناولته وكأني جزءا منها ,
كما إستحضرت تفاصيله الضاربة فى أعماقنا ولما
جمعتنا شقاوات الحياة على تلك الأعمال الشاقة في
ميعة صبانا , كما جمعتنا شجون التحدي الذي فرضته
علينا حياة الفقر وتحمل المسئولية المبكر , فيما أعيننا
كانت ترابط على أفق المسقبل الأفضل وعبر التعليم
دون سواه ... مناخ مشبع بالتحدي ... فكانت الدعابة
سبيلا لتخفيف غلوائه وكانت البساطة مشرعنا الذي
لا بد وأن عليه نقيم , فيما كان التكافل الإجتماعي هو
خط دفاعنا الأخير ... لهذا كانت حياة شقية وجميلة فى
آن ... نطراها بحن ونسترجعها بإلفة ... وأنا شخصيا
لا أتورع من أمنحها صفة الأفضلية على حياتنا الراهنة .

سعدت لطارق ... وهو يعلن عن كونه مبدعا من طراز
فخيم , فهو ينسج من متبعثرات حياتنا الإجتماعية حلة
إبداعية زاهية , كما إمتلك من الحضور ومن كثافة
الإحساس بعمق اللحظة الإجتماعية ما جعله يقدم عرضا
تصويرا شيقا وطروبا ... لا تملك حياله مشاعرنا أن
تهتز طربا وأن تنفرج فرحا ... وأن تضحك من الأعماق .

شعرت أن كثيرين يبتغون الوصول إلى نهاية القصة , ومع
أن عنصر الإثارة الدرامية يجعلهم يتوقون لذلك ... أما أنا
... فلا ... أود أن تطول وتتعرج منحنياتها وتتقاطع طيوف
شخوصها وتتراكب إحداثياتها ... لأن هنا يبدع الكاتب ولان
هنا يقيم الجمال ... فيما تحط القصة على مدارات إجتماعية
أوسع فتصيب حظا أغلبا فى كفاية مزاج القارئ .

شكرا طارق ... ولا قدام
Post: #400
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-05-2007, 06:06 PM
Parent: #389


حيدر وليد قاسم كيفنك
صدقني شرحتني شريح
قلت كل الذي اود ان اقوله من خلال قصة عوض
الفقر كان يسيطر في أحيائنا وبشكل مقيت
التعليم كان هو المنفذ الوحيد امامنا
لا زالت صورة امي رحمها الله وهي تنتظرني
تحت شجرة النيم امام بيتنا (يوم النتائج)
وكيف كانت فرحتها تملأ المكان حين تعلم
أنني تفوقت وبطريقة لا شعورية تضع (قرشين)
في يدي وكان ذلك قمة الفرح والألم معا
الفرح كان أن تري وجهها تغمره البهجة
والألم هو المكافأة التي كانت تنبئ عن الحال
بعد سنين طويلة حين كانت تقيم معي في المغرب
كنت أسألها عن تلك الأيام...
كانت لا تزيدعن: الله لا يعيدها أيام يا وليدي
لكن يا ولدي والله اخير من ايامكم دي كل واحدا في بلد
وبالنسبة لي جملتها الاخيرة كانت تلخص مأساة وطن...

حيدر لن اجاري كلماتك لكن اعدك انني سأكتب ما عايشته
وبتفاصيله المملة جدا....
كن بخير يا صديقي
Post: #390
Title: Re: أي بت شديدة بتحب ليها طُلبة (صبي بناي)
Author: osman righeem
Date: 09-04-2007, 07:53 AM
Parent: #1

الاخ د. طارق

لم نحس الصراع الطبقي كما تصوره الادبيات الفكرية
كانت دائما قصة الاميرة و ابن الحطاب
يكون فيها ابن الحطاب مهدد ومطارد لانه تجرا وحلم ان يكون فقط
في ذاكرة الاميرة

هنا ابن الحطاب السوداني مطلوب من الاميرة واهل الاميرة وطبقة الاميرة
واهله الحطابون يوافقون علي مضض

وابن الحطاب الثاني بحسبها بالعقل يريد ان يواصل كفاحه من الارانب حتي يتخرج مع الافيال
ويحصل علي الوظيف و يرد جميل اهله و ينتقل بالتدرج الطبيعي للحراك المجتمعي الي
تخوم المنطقة الوسطي ......................
ولكن حساب عقل ابن الحطاب الثاني
حساب سوداني بحت لن يتكرر في بقعة اخري
اذا كان توفير مجهود المرور بكل مملكة الحيوان يمكن اختزاله
بخطوبة أو حتي موافقة علي الخطوبة يكون مقبول في كل مكان
الا
عندنا
نحن لا نحل مواضيعنا بالنظرة لها من خلال
حسابات الربح و الخسارة علي المستوي الشخصي



اشكرك يارائع

مزيان بزاف

( شبا و عسوم خبارن لاتجيبو
وطريت البركل البنقر دليبه)
Post: #401
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-05-2007, 06:23 PM
Parent: #390


تعرف يا ود رغيم
فاطنة السمحة دي يمكن حبوبتي حكتها لي مليار مرة كدة
ما عارف ليه كنت مأثور بقصة الحطاب وطموحه وحبه للبنيي

يا صديقي كانت امامنا خيارات قليلة جدا
وكانت العائلة هي الخط الأول في أي قرار
حينها كان صعب جدا اتخاذ قرار الارتباط في وضع عائلي
مشحون بالمحبة والحاجة في آن واحد....
آثرنا العائلة لأشياء عديدة يصعب شرحها


محبتي الاكيدة
Post: #392
Title: Re: أي بت شديدة بتحب ليها طُلبة (صبي بناي)
Author: محي الدين الريس
Date: 09-04-2007, 11:41 AM
Parent: #1

التحية والتقديرليك على هذا السرد الجميل يا د. طارق .. وإستمتعنا وإندمجنا والآن والواحد بدون ما يشعر لابس وجاهز للسيره
Post: #403
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-05-2007, 06:32 PM
Parent: #392


محي الدين الريس
يا زول انت ضامن القصة حا تصل للسيرة


خليك قريب
محبتي الاكيدة
Post: #394
Title: Re: أي بت شديدة بتحب ليها طُلبة (صبي بناي)
Author: serenader
Date: 09-04-2007, 03:44 PM
Parent: #1

عزيزي "الحكاي شديييد" طارق
بالنسبة للاسم، اخترتو زماااان وغلبني أغيرو.. وبحنس في بكري يغيرو لي.. لي، مثلاً، المُرّ!
بالنسبة لي أصابعينك، بلّهن قبل ما تهبش الكيبورد عشان ما ينشفن وتشلهتنا بي باقي القصة..
لكين موضوع النجر بلحيل صعب.. لأنو قصة زي دي، بي وصف زي ده، إلا تكون لافيها بي كرتين (حاشاكم)..
عاد باقيلي ناس المغرب ديل يستاهلو جنس وصفك ده.. حرم معانا واحدة من شدة ما سمحه توقف الحركة.. أول ما تجي المكان كلو بولع.. لكين عاد أخوك ختري، عامل نايم.. علي جنس وصفك ده بسخن المرارة..
الكع...
Post: #404
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-05-2007, 06:37 PM
Parent: #394


سرينيدر كيفنك
جابتلها لفان كمان

يا سيدي تعال المغرب الأيام دي عشان تشوف العجب
Post: #395
Title: Re: أي بت شديدة بتحب ليها طُلبة (صبي بناي)
Author: ناصر جبريل
Date: 09-04-2007, 05:28 PM
Parent: #1

......... التقيت عوض في اجازتي الاخيرة للسودان


قال ليك والله بس ترجع السودان ولا بكري يديهو عضوية

ح "ينكت" ليك حاجات بتحيرك (احسن ليك) وبالصور كمان!!!!!!!!!


لك مودتي
Post: #405
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-05-2007, 06:42 PM
Parent: #395


ناصر كيفنك والبنيات

حاولت اتصل عليه اليوم بس رقمه ما بيجمع

يا سيدي قول ليهو جيب صورك وتعال
وبنكلم ليه بكري كمان


تليشة:
انا غاتس وين
Post: #415
Title: Re: أي بت شديدة بتحب ليها طُلبة (صبي بناي)
Author: Abutalib Elgorashi
Date: 09-06-2007, 01:15 PM
Parent: #405

الجميل الرائع د. طارق
كنت ما بعرفك ولا كان زمني من زمنك
لكن هسه حاسي اني كنت عايش معاكم كل التفاصيل من روعة السرد وجمال البناء في القصة والعمارات
لك التحية ومتابعين من قريب وبعيد
Post: #423
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-07-2007, 03:34 PM
Parent: #415


ود القرشي كيفنك
دحين يا الحبيب اتعارفنا عند عوض
يديك الصحة انت وعوض


محبتي الاكيدة
Post: #396
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-05-2007, 01:06 AM
Parent: #1


Quote: رغم حداثة عهدي بالبورد وبوستاته.. شاء حظي أن اعتر في هذا الرائع.. واتابع بكل فرح الطفولة ومرح الصبا سرده هذا الجميل البسيط..
وحقيقة أمتعتني وأدهشتني..
هذا النوع من الكتابة الذي يجعلك تحس وكأنك انت الذي تحكي أو أن هذا الشخص كان يسير بجانبك ويحيا تفاصيل حياتك اليومية..
فهذه الذاكرة هي ذاكرتنا جميعا.. وتلك الأيام جميعنا عشنا بعضا من تفاصيلها.. وهؤلاء الأشخاص كان أحدهم والدي او عمي أو خالي أو جاري..
وتلك هي امي أو خالتي أو جارتنا :فلانة:..
حتى أن الخيال يسنرسل جاهدا محاولا تركيب هذا الحكي على تفاصيل وعاها يوما ما وعايش تفاصيلها..
واصل وسنواصل..
لك التحية والاجلال..


استاذتنا اميرة فاروق
حقيقي انا آسف جدا جدا لم انتبه لمداخلتك
لانه دايما الواحد بيشوف المداخلات الاخيرة وبيرد عليها
عموما اكرر اعتذاري الشديد
شاكرا لك هذا الاطراء الذي لا استحقه حقيقة
كل ما فعلت انني حاولت ان اكتب عن فترة جميلة جدا
وعن احداث عايشتها شخصيا...
لا زلت احسب انها اجمل لحظات حياتي على الاطلاق
احاول جاهدا ان امد الجسور بين عالم كان رائعا
وبين واقع مميت...
اسعدني مرورك...
Post: #397
Title: Re: أي بت شديدة بتحب ليها طُلبة (صبي بناي)
Author: HAYDER GASIM
Date: 09-05-2007, 02:52 AM
Parent: #396

Quote: التقيت عوض في اجازتي الاخيرة للسودان

وهل عرف إنو هو البطل ... والخائن الله يخونو
Post: #398
Title: Re: أي بت شديدة بتحب ليها طُلبة (صبي بناي)
Author: خالد الجبل
Date: 09-05-2007, 10:30 AM
Parent: #1

يا طارق
واااااااا حناضلناااااااااااااا (مبالغة)


انا يوميا استقبل مكالمات بخصوص المقال دا كانه الكاتبه انا (الشباب بقي ما عندهم موضوع غير طارق وعوض)
ما تحاول تختم الموضوع دا في رمضان يعني زود المعدل شوية
كمان عشان تنافس في اكثر المواضيع اثارة وشويق لعام 2007

مع خالص تحياتي
Post: #406
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-05-2007, 06:54 PM
Parent: #398


ود الجبل كيفنك
الله يجبر بي خاطرك ياخي
ياخي عوض دة ما نافس مع المهضلمين
يقوم ينافس كمان مع الفطاحلة الهنا


محبتي الاكيدة
Post: #399
Title: Re: أي بت شديدة بتحب ليها طُلبة (صبي بناي)
Author: ناصر جبريل
Date: 09-05-2007, 04:10 PM
Parent: #1

Quote:

وهل عرف إنو هو البطل ... والخائن الله يخونو



الجميل حيدر ... تتصور عارف ومتابع ... وفي تفاصيل كثيرة بس خلي طارق

يحكي.....طبعا انا كنت متابع القصة من زمان لكن كانو بيهرشونا لمن يقعدو بالليل يحكو عن الـ"جكس"

،،،، الليل كلوا .. قالت لي وقالت ليك و...... نصائح عاطفية وحنك

.... اسع انا ما عاوز احرق ليكم القصة ساي بعد العرس

بديكم " الشمار"
Post: #402
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 09-05-2007, 06:27 PM
Parent: #399

Quote:
،،،، الليل كلوا .. قالت لي وقالت ليك و...... نصائح عاطفية وحنك

.... اسع انا ما عاوز احرق ليكم القصة ساي بعد العرس

بديكم " الشمار"

هاهاهاهاهاهاهاهاهاهاهاااااااااااااااااااااااااااي

يعني القصه فيها عرس و كده؟ شكرا
Post: #407
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-05-2007, 06:57 PM
Parent: #402



وليد كيفنك

اقعد باري لي كلام ناصر دة
لامن يوديك التوج
الزول دة من ولدوهو اشتر
Post: #408
Title: Re: أي بت شديدة بتحب ليها طُلبة (صبي بناي)
Author: ناصر جبريل
Date: 09-06-2007, 08:45 AM
Parent: #1

Quote:


وليد كيفنك

اقعد باري لي كلام ناصر دة
لامن يوديك التوج
الزول دة من ولدوهو اشت



خلاص ما ح نطلع الشمار!!!!!!!!
Post: #409
Title: Re: أي بت شديدة بتحب ليها طُلبة (صبي بناي)
Author: Amiral
Date: 09-06-2007, 11:23 AM
Parent: #1

Quote: .... اسع انا ما عاوز احرق ليكم القصة ساي بعد العرس

بديكم " الشمار"




سلامات يا طارق ... من زمان بنقول ليك زيد السرعة عامل فيها تقيل.... الظاهر اخوك ناصر جاب الموضوع من الآخر... يعني صحبك عوض في النهاية عرس البت... بس بي طريقتك دي صحبك عوض زاتو حيأخذ عضوية في المنبر ويجي يمكل القصة براه...زيد السرعة يا طارق وحاول كمل الموضوع قبل بداية رمضان... انا غايتو من اسع بطالب بحصول صحبك عوض على العضوية في البورد... في حد يثني معاي

يا ناصر سلامات

في شمار تاني بعد دا ما خلاص عرفنا الزول عرس...
Post: #410
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-06-2007, 12:22 PM
Parent: #409


تعرف يا اميرال اقوليك حاجة
والله ناصر دة بيتكلم في حتة
وانت فهمت حتة تانية خالص
موش ناصر دة يكون قاصد انا العرست ما عوض
Post: #412
Title: Re: أي بت شديدة بتحب ليها طُلبة (صبي بناي)
Author: osman righeem
Date: 09-06-2007, 12:34 PM
Parent: #410

طارق
قول بسم الله
انت العرست!!!!!
وعرست من
سحر؟
ولله الجكس ديال عوض ؟

بطل لولوة

عايزين نخش رمضان مع تلفزيون دبي
لانو بعد التراويح

وناصر قريب
و ما بخذلنا
Post: #413
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-06-2007, 12:58 PM
Parent: #412


ود رغيم
الله يجازي محنك
خليك مع التراويح احسنلك
ان بقيت باريت ناصر تبقى غبيان


بس انت تابع
قربنا
Post: #411
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-06-2007, 12:31 PM
Parent: #1


حباب الزينين...
ضربنا يا الحبان الوليمي الزيني دي...
رجعنا تاني للاوضة الكنا قاعدين فيها...
وجابوا الشاي وريحة القرفة والهبهان ما تديك الدرب...
عوض قالهم طارق ما قاعد يشرب شاي... جابولي كبايي ألت عصير منقي..
راس الكبايي فيهو شيتا محَترَب كدي وملون علي الصنفرة... وأنا بشرب في العصير
أختلي منه ضُوقي فيه.. لقيتو سكر... قادر الله... ودة ضرضروهو في زيق الكُبايي دي كيفن ماني عارف..
- خالة البنيي: يا طارق البنات ديل قالن انتو اكلكم مختلف عن حقنا...
- إييي أكل شنو... هو نحن عايشين.... نحن مانا في كله كله.... جملة الإيمان نحن مانا عايشين... النبي فوقك خليني ساكت
- كيف ياخي انا مشيت شفت بيوتكم وعيشتكم والله زي العجب...
- نحمد الله... نحن نقدر نقول شي غير نحمد الله...
الغايزني وفاقع مرارتي عوض قاعد يتونس تحت تحت مع جكسيهو... ومرة مرة تضربو في يدو
الزول الدُمق دة قاعد يقولها في شنو ولا العاجبها فيهو شنو... شئ يعلم به الله...
شويي جات داخلة الخرابة المغتغتي ديك... والله يا الحبان عندها أكل غريب خلاص
تشيل اللُقمي وتدخلها من تحت (الشملي) الدارعاها فوق راسها وتاكل... يمين بس فيل...
- السلام عليكم
- أنا ما برد على النسوان....
النسوَّان ديل انفقعن ضحك...
- ياخي أنا قلت ليك الجمعة الجاية بنتناقش..
- يا زولة هوووي أنا ماني فاضي لي جنس حديثك دة وحاجة واحدة العارفها... الدين يسر وبس..
أم البنيي اتوهططلها في كرسي مطرف بعيد كدي وتشوف فينا... باقيلي عندها فهم
ولا كمان مستغربة في بتها البتحب الطُلبة دة...
شويتين الحريم شربن شاين وبدن ينزرقن لا جوة واحدة وراء التانية...
جكس عوض قامت وقالت لي عوض تعال عايزاك ودخلوا لا جوة...
- خالة البني: عن اذنك يا دكتور عندي قطيعة مع اختي دي... اتونس مع سحر دي بجيكم هسا...
- سمح.... يا ود الكرسني...
البنيي صنقرتلها في كرسي قدامي وما خلتلي طريقي لا أتلفت هني لا هني... وحاتكم بقيت زي البتفرجلي في
كورة تنس عيوني يمشن لي قعر الأوضة من اليمين ويرجعن تاني للشمال ووقتين اقابل عيونها في النص لامن أتنهد..
- شنو يا دكترة إنت حا تسكت كدة كتير..
- ياخي هي ونستي شن طعمها.... أنا كل البعرفه الطوب والأسمنت والرملة وهسا كمان الأرانب والجداد والبقر..
- ممكن أسألك سؤال؟؟؟
- أتفضلي...
- إنت مرتبط...
يا ود حسونة تفكني الليلي...
- طيب خليني اعكس السؤال إنت مرتبطة؟؟؟
- لا... ليه؟؟؟
- يمين أولاد أهلك ديل الكتاحة في خشمهم...
- ليه يعني؟؟؟
- يعني أنت زولة سمحة وفيك كل المواصفات الممكن يتمناها أي راجل وأولاد أهلك ديل ما شاء الله مرتاحين
يعني ما ناقصهم إلا يفاتحوك... و...
- يعني إنت ما مهم عندك أنا أكون عايزة واحد من أولاد أهلي ولا لا....
- لا طبعا دة حقك... بس الله عرفوهو بالعقل..
- ياخي أنا من حقي اختار الزول الانا عايزة اعيش معاهو حياتي ولا شنو
- أكيد .. أكيد...
- بس أنت ما جاوبتني..
- والله أنا ما مرتبط... في حالتنا دي الارتباط صعب جدا...
- ليه يعني إنت فرقك من عوض شنو؟؟؟
- مافي أي فرق.. الظروف ياها نفسها... بس عوض مقامر شوية...
- يعني إنت ما مقتنع بالخطوة العملها ولا شنو...
- شوفي عوض بيحب أختك شديد.. وشايف إنه حياته كلها متوقفة على قصة نجاح حبهم
وهو اتصرف على هذا الأساس... بس أنا شايف الطريق طويل وظروف عوض تختلف تماما
عن ظروفكم هنا... ياخي نحن عندنا حِلِم واحد من ولدونا... نقرأ ونتخرج ونشتغل عشان نشيل أهلنا...
- ما ممكن تعملوا الاتنين مع بعض...
- صعب... صعب شديد...
يمين يا الحبان البت دي عيونها فيها كمية من الحزن تحير عديل...
- يعني انت ما عندك عزيمة عوض
- أنا اختلافي مع عوض... انا بشوف الواقع وببني عليهو حاجاتي..
والله يا الزينين بقيت كلي ماشي موية رغم انه صوت المكيف مالي الدنيا...
والبنيي القدامي دي وحات الله الما يريدها يبقى غبيان... علي العقل
بيقول الريدي دي محكوم عليها بالموت... ماني عايز اتشعلق زي صاحبي...
- دقيقة وبرجع ليك..
البت جات شايلالي منديلا سمح كدي ومطرز: من زمان كان نفسي أديك المنديل... وما تسألني ليه..
والله يا الحبان وقفت علي طولي وشلت المنديل منها وعيوني جن في عيونها...
وحاتكم كنت عايز اكورك باعلى صوت عندي: وووووووب ... وووووووب... ووووووووبين علي...
.... ونواصل
Post: #414
Title: Re: أي بت شديدة بتحب ليها طُلبة (صبي بناي)
Author: حسن الجيلى سعيد
Date: 09-06-2007, 01:00 PM
Parent: #1

عزيزى.طارق جبريل ,

واصل حكايتك إنت وعوض وأهلنا الطيبين المرتاح فيهم والأغبش ناس سمحين بالحيل ,عارف ياطارق قصتك دى كلاسكية وعادية لكن الروعة فى طريقة سردك وسلاسة خطابك ,عارف بوستك دا بقى موضوعنا ومتابعنو زى مسلسل الساعة سبعة....
واصل يامبدع

مودتى
Post: #424
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-07-2007, 03:42 PM
Parent: #414


ود الجيلي ود سعيد كيفنك
يا زول الكلام الغلاد دة ماني قادر عليهو
دحين انا راجل طلبة ساكت
حبيت اقول للناس هني:
نحن الطلب ديل برضو بيريدونا
غبش اي نعم لكن حبيباتنا منعمات


محبتي الاكيدة
Post: #416
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 09-06-2007, 01:34 PM
Parent: #1

عوض اقصد د. طارق ازيك
كيفنك والوليدات

تعرف انا قاعدة مصاقرة الشي دة عشان اكون اول زول يعلق برضو لقيت في زول سبقني. لكن التانية التانية اخير من الطيش.

تاني بالله لما تكون داير تنزل في البوست اضافة "مسنجر" لي عشان اخد السبق الصحفي.

رمضان قرب زيد السرعة شوية

مودتي و سلامي

صفية
Post: #425
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-07-2007, 03:59 PM
Parent: #416


د. صفية كيفنك
رمضان كريم مسبقا
يا ستي والله قصرنا معاك
بعد دة بنمسج ليك طوالي
تحياتي للصغار وابوهم
Post: #417
Title: Re: أي بت شديدة بتحب ليها طُلبة (صبي بناي)
Author: ناصر جبريل
Date: 09-06-2007, 04:05 PM
Parent: #1

Quote:

يا ناصر سلامات

في شمار تاني بعد دا ما خلاص عرفنا الزول عرس..


تعرف زمان كان عوض وطارق بيدونا باسطة عشان ما نتكلم!!!!

اسع بس خلي الحكاية تتمت واحاتك لو ادوني مصنع ح اتكلم واطلع الشمار

اهه لقيتني كيف
Post: #418
Title: Re: أي بت شديدة بتحب ليها طُلبة (صبي بناي)
Author: Raja
Date: 09-06-2007, 04:15 PM
Parent: #417

الليلة يا طارق ناصر ظهر..

ألف حمد لله على السلامة..
طبعا أنا إتخيل لي من يوم ما لخبطتا في التهنئة بتاعة البنوتة وهو مختفي.. ولغاية هسع حاسة بالذنب..

يا ناصر لك العتبى حتى ترضى

ويا طارق مليون سلام وتحية وشوق
Post: #419
Title: Re: أي بت شديدة بتحب ليها طُلبة (صبي بناي)
Author: Rawia
Date: 09-06-2007, 05:55 PM
Parent: #418

طارق ازيك

انا حا ابدا اكسر ليك تلج
Post: #420
Title: Re: أي بت شديدة بتحب ليها طُلبة (صبي بناي)
Author: Raja
Date: 09-06-2007, 06:18 PM
Parent: #419

يا جماعة لازم أحكي فضيحتي العملتها..

يوم ما جابو "ميادة" لناصر.. دخلتا تووووش. وشايلة معاي أكبر بوكيه ورد.. وطبعا عارفة الماما إسمها "سلافة" فما كان علي إلا كتابة: الأحباب طارق وسلافة.. مبروك البنية وتتربي في عزكم.. قام جا عماد محمود، الله يطراه بالخير، يا جماعة إنتو عماد وين..؟ قام قال لي يا رجاء الوكت لسة صباح إنتي شربتي شنو.. البابا هو ناصر ما طارق ..

طبعا عملتا التعديل وزي عشرين إعتذار تاني.. لكن من اليوم داك ما شفتا ناصر ده حايم في بوست..
والزولة الخفتا جد جد تزعل كانت أم ريم، زوجة طارق.. الفجأة لقت راجلها معرًس وجايبين ليهو بت كمان ..

سماح يا شباب..

يا راوية.. طبعا طارق ده عامل فيها بيحكي حكاية عوض صاحبه ومن "day one" كلنا نقشنا الحكاية..
مرات مرات قاعد يمضى بإسم "الطلبة طارق"

غايتو يا طارق الحكاية دي لو ما إنتهت بالسلامة، أم ريم حتكون خلًصت ليك كل الفرص بتاعت حسن النية (الأولى ميادة والتانية بت العمارات) ..

الشباب الفوق كلهم.. معليش للتخريمة الطويلة.. الليلة الخميس وما صدقتا لقيت روحي قادرة أكتب..

ودي للكل
Post: #428
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-07-2007, 04:16 PM
Parent: #420


Quote: يا راوية.. طبعا طارق ده عامل فيها بيحكي حكاية عوض صاحبه ومن "day one" كلنا نقشنا الحكاية..
مرات مرات قاعد يمضى بإسم "الطلبة طارق"

غايتو يا طارق الحكاية دي لو ما إنتهت بالسلامة، أم ريم حتكون خلًصت ليك كل الفرص بتاعت حسن النية (الأولى ميادة والتانية بت العمارات) ..


يا رجاء كدي صلي علي النبي وقولي بسم الله
انت شربت شنو في امريكا علي قول حبيبنا عماد محمود
مالك عايزة تجيبيلنا الكتاحي
بعدين الله بيسألك هسي طارق وعوض بيتشابهن

ام ريم قاعدة تقرأ في الكلام دة بس انت روقي في علبك

اظهري ما تغتسي تاني
Post: #421
Title: Re: أي بت شديدة بتحب ليها طُلبة (صبي بناي)
Author: Hatim Gubara
Date: 09-06-2007, 06:28 PM
Parent: #419

يا ناصر ماتخلي عقلك صغير وأقدر علي خشمك...
خللي الوله جبريلا يحكي ساي..
باسطتك عندي... بس أعقل...
Post: #422
Title: Re: أي بت شديدة بتحب ليها طُلبة (صبي بناي)
Author: Rawia
Date: 09-06-2007, 07:08 PM
Parent: #421

انا بديت اقرا الاول ولقيتو بهدل صاحبوا بهدلة غايتو ذكرني (الكسيحة)
يارجا

اما كسير التلج سببو براااااهو
مستعدة بالبوح في الخاص فقط
Post: #430
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-07-2007, 04:25 PM
Parent: #422


راوية كيفنك

Quote: اما كسير التلج سببو براااااهو
مستعدة بالبوح في الخاص فقط


يا بت الناس نحن بنجيبلك مصنع التلج
كله لااااا عندك قصرنا معاك


محبتي الاكيدة
Post: #429
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-07-2007, 04:21 PM
Parent: #421


ود جبارة انت حي
ياخي بليلة دة (ناصر) انا عارف شتارتو
خليك منه...
صحبك عوض قال حا يطالب بكري بالعضوية
وحا يجيب معاهو الصور....


سلم على البنيات وامهن
Post: #427
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-07-2007, 04:08 PM
Parent: #419


راوية كيفنك

Quote: انا حا ابدا اكسر ليك تلج


ياخي نجيب ليك مصنع التلج لحدي عندك
Post: #426
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-07-2007, 04:04 PM
Parent: #418


يا سلام يا عوض ياخي
رجاء العباسي كلها هنا
وخلي بالك يا عوض رجاء مغرمة جدا
باصحابنا الطلب وجنها طوب


حمدلله على السلامة
مالك ما غشيتينا في المغرب
Post: #431
Title: Re: أي بت شديدة بتحب ليها طُلبة (صبي بناي)
Author: سامي عبد الوهاب إدريس
Date: 09-07-2007, 05:04 PM
Parent: #1

يا جبريلا

يلا أسرع..

ما بنقدر على الشحتفة دي..

تحياتي ليك والأسرة الكريمة
Post: #439
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 12:16 PM
Parent: #431


سامي كيفنك
بنسرعلك الحكايي بس انت خللك قريب

تحياتي للوليدات
Post: #432
Title: Re: أي بت شديدة بتحب ليها طُلبة (صبي بناي)
Author: Raja
Date: 09-07-2007, 08:10 PM
Parent: #1

طارق يا حبيب..

سلامات وأشواقات..

سفرتي كانت قصيرة ومتعبة للغاية.. 10 ايام لمدينتين وإجتماعات متواصلة، إضافة إلى سفر 3 أيام.. وترانزيت في لندن (طبعا كانت أجمل حاجة أقابل هدى أختي).. ورجوع لعمل.. وبالمناسبة الساعة البيولوجية بتاعتي ما إتظبطت لغاية هسع.. يعني ممكن أفضل صاحية لغاية 4 صباحا وأنوم وأقوم للشغل الساعة 8، وفجأة الساعة 4 ضهر تلاقيني بقيت زي "توم بتاع توم وجيري" لما النعاس كتله وعمل العمايل عشان يبقى صاحي ..

خلينا مع عوض.. طبعا ولا ح أكضب عليك وأقول ليك أنا صدقتا إنو في زول إسمه عوض ..

تحياتي لريم ومامتها.. وقول ليهم زيارة المغرب دي عايزة ترتيب بمزااااااج.. وأكيد حتحصل
ولغاية ما تحصل نقدم ليكم دعوة للأردن.. بجد بلد جميل

تحياتي يا عوض.. أوبس يا طارق
Post: #433
Title: Re: أي بت شديدة بتحب ليها طُلبة (صبي بناي)
Author: HAYDER GASIM
Date: 09-07-2007, 11:20 PM
Parent: #432

أظن بالطريقة ده حا نصوم على عوض ... ونفطر فى العمارات

مودتي
Post: #434
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 09-08-2007, 01:00 AM
Parent: #433


بسم الله الرحمن الرحيم
ودجبريل سلامات ...
تسجيل حضور ومتابعه .
بس انت شكلك يا مان حاتطير الحنان ده منك ساي .
تحياتي لي عوض


حاتم هاشم .
Post: #435
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 09-08-2007, 07:09 AM
Parent: #434

حبيبنا طارق

والله أنا عافي من عوض جاب بنات العباسي للحوش تاني

وحتي ناصر التقول عوض ده ماجاروا جاي بكارو من السودان

يادوب وصل سلام وتحية رمضانية للعرسان ولكل معلمين الطلب

والطلب وحضور من معجبي الطلب وزماله المونه وحتي بيوت الجالوص.

،،،،أبوقصي،،،،
Post: #443
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 12:28 PM
Parent: #435


حبيبنا ابو قصي كيفنك
نان بنات العباسي وكتين جن عندنا في الامتداد واتفاءلنا خير
جاء ود سري طيرِن لينا من هناك شكيتو علي الله
Post: #442
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 12:24 PM
Parent: #434


حاتم وليد هاشم كيفنك
الحنان طار من زمان بس ربك رب الخير جاب لينا حنان احسن منه

محبتي الاكيدة
Post: #441
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 12:23 PM
Parent: #433

Quote: أظن بالطريقة ده حا نصوم على عوض ... ونفطر فى العمارات


حيدر وليد قاسم كيفنك
يا زول من هسي رمضانك كريم في حوش عوض
لكن حكاية تفطر في العمارات دي ما بضمنها ليك
Post: #440
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 12:20 PM
Parent: #432


رجاء كيفنك
Quote: خلينا مع عوض.. طبعا ولا ح أكضب عليك وأقول ليك أنا صدقتا إنو في زول إسمه عوض ..

يا بت الناس مالك عايزة تجيبي لينا الكتاحة

Quote: تحياتي لريم ومامتها.. وقول ليهم زيارة المغرب دي عايزة ترتيب بمزااااااج.. وأكيد حتحصل
ولغاية ما تحصل نقدم ليكم دعوة للأردن.. بجد بلد جميل


يا ستي ريم وامها في انتظاركم انت بس انوي
والله المغرب ذاته بلد جميل خالص خالص
وما ممكن تصوري ممتع قدر شنو

أها خليناك على خير يا (توم) اقصد يا رجاء
Post: #436
Title: Re: أي بت شديدة بتحب ليها طُلبة (صبي بناي)
Author: ناصر جبريل
Date: 09-08-2007, 07:47 AM
Parent: #1

....... رجاء

Quote:
طبعا عملتا التعديل وزي عشرين إعتذار تاني.. لكن من اليوم داك ما شفتا ناصر ده حايم في بوست..
والزولة الخفتا جد جد تزعل كانت أم ريم، زوجة طارق.. الفجأة لقت راجلها معرًس وجايبين ليهو بت كمان ..


.......قلت اجي مع عرس عوض!!!!
Post: #437
Title: Re: أي بت شديدة بتحب ليها طُلبة (صبي بناي)
Author: wadah beshier
Date: 09-08-2007, 08:30 AM
Parent: #436

العزيز صاحب القلم الرشيق - طارق جبريل

بكل صدق صرت كلما افتح هذا المنبر.ابحث في بادي الامر عن هذا البوست

عساي اجدك اضفت جديدا في هذه القصة.التي اصبحت بالنسبة لي كالمسلسل انتظر

الحلقة الاخيرة منه.

لذا اناشدك بان تكون نهاية هذه السلسلة السلسة الرائعة بروعة كاتبها

خلال شهر رمضان المعظم.

كل عام وانت بخير ورمضان كريم.

عاطر تحياتي - وضاح
Post: #444
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 12:30 PM
Parent: #437


العزيز wadah beshier كيفنك
يا سيدي ننهيها ليك مع رمضان ولا يهمك
وجودك هنا اسعدني وعوض

محبتي الاكيدة
Post: #438
Title: Re: أي بت شديدة بتحب ليها طُلبة (صبي بناي)
Author: شول اشوانق دينق
Date: 09-08-2007, 10:34 AM
Parent: #1

ود جبريل طلعت عيننا عديل كده وراجين نهاية القصة يا شكسبير


Quote: - يعني أنت زولة سمحة وفيك كل المواصفات الممكن يتمناها أي راجل وأولاد أهلك ديل ما شاء الله مرتاحين
يعني ما ناقصهم إلا يفاتحوك... و...

ده كسير تلج يا زول...
إعترف

Quote: البت جات شايلالي منديلا سمح كدي ومطرز: من زمان كان نفسي أديك المنديل... وما تسألني ليه..والله يا الحبان وقفت علي طولي وشلت المنديل منها وعيوني جن في عيونها...
وحاتكم كنت عايز اكورك باعلى صوت عندي: وووووووب ... وووووووب... ووووووووبين علي...


الليلة!!!

الفلم سخن كده.

واصل يا زول نعمل شنو ... رضينا بفتات قصتك البتكتب منه مقطع كل خمسة يوم...

تسلم يا رائع

شول اشوانق

اوعك تفكر تعملوا مسلسل عشان حيكون اطول من ليالي الحلمية
Post: #445
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 12:35 PM
Parent: #438


شول كيفنك
Quote: ده كسير تلج يا زول...
إعترف

ياخي المغرب دة بارد ما محتاج للتلج

Quote: اوعك تفكر تعملوا مسلسل عشان حيكون اطول من ليالي الحلمية

ياخي اسامة انور عكاشة دة ما بنقدر عليه


محبتي الاكيدة
Post: #446
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 12:48 PM
Parent: #1


حبابكم يا الزينين...
يمين يا الحبان مسكت المنديل دة بين يديني وكضمت الكضمي الياها....
- دكتور مالك ساكت كدة...
- لا أبدا...
وحاتكم الكلام أبى يطلع كله كله بس زي معجون أبو صفقة داك لامن يكمل
وتقعد تعصر فيه فشان تتسوك وأصابعينك لامن يورَمِن
وما تقدر تطلع منو حِتايي وفي النهايي تحك الفرشي في الصابوني البيضة بتاعة الغسيل ديك وتتم سويكك..
جاء عوض داخل يتبسم ومعاهو جكسويتو... وتبعتم خالة البنيي...
- دنقرت علي عوض: قوماك نطلع من هِنيي...
-ليه مالك...
- ياخي قوماك وخلاص أنا إن بقيت زدتلي دقيقي هني حا أخطُب رسمي... دحين أمرقني من هِني...
ابن الهرمة عوض فقعلو ضحكي... بس خالة البنيي ما صدقت وجاتني وفي قعر أضاني:
- وصلت لااااا وييييييين يا دكتور....
- أنا لا وصلت ولاني عايش ولاني داير أعيش أنا داير أمشي لي أهلي وإن بقيت مُتة أخير...
- ضاحكة: كدي قول بسم الله مالك
- انتو بس خلوني أمرق من هِني وأنا ببقى كويس...
عوض قام علي حيلو وقالهم: يا جماعة الصلاة قربت ونحن يا دوب نصل عشان نصلي الجمعة
- سحر: ياخي السواق بيوصلكم ليه مستعجلين...
عوض ضحك وعاين لي لقاني مبَلِم وعرقي يخر وماسك المنديل وهاجرو في يديني
ومنطط عيوني علي حبوبة المطر (حشرة تظهر وقت الأمطار) وقالهم معليش نحن نمشي وبنجيكم تاني
أنا في سري قلتلو ما أظن لأنه إن بقيت جيت تاني هِني قدام سحر دي بمشي قاصد أبوي جبيرين رسمي....
- خالة البنيي: كدي دقيقة اختي عايزاك يا عوض...
أم البنيي جات شايلالا شيتا مغتغت كدي ومقصطر وقالت لي عوض دة شوية كعك وديهو لي ناس أمك...
قادر الله حتى كعكم ماهو ياهو... أليلنا يغتسوهو قبل العيد في جرادل طلس كدي والسكر مضرضر
فوقه علي الكوكايين ويرفعوهو فوق الفضية وبعد شهرين من العيد تلقاهو معتت ووكتين تاكل منه إن ما بقيت جريت فسراع
للمستراح يمين الإسهال يصل لي ركبتك زي الدكوة العاصرنلهم فيها ليموني ويكبسك الضبان الاخضر
داك وينوني فيك بس البقدونس في صحن سلطة الحُمص...
ودعناهم مع السلامة مع السلامة.... أنا لامن وصلت عند سحر غلبني النضمي كله كله...
وحاتكم ناقصاني الرِيالي رسمي... مديتلها يدي وسلمت عليها ولامن عيني جات في عيونها
كنت عايز اقولها: واااااااااااااااامغستي أنا... التراب في خشمي...
- طيب يا سحر مع السلامة وشكرا على الفطرة الحلوة دي
- طيب يا دكتور شرفتونا.... ممكن نشوفك تاني
- إن شاء الله...
- ضروري جدا خصوصا إجازتك قصيرة... بزعل لو ما شفناك تاني...
إنت تزعلي... أمال أنا أسوي شنو.... أنبطح في نص الظلط فشان يخفجني لوري...
ودعناهم وعوض أخدلو حنكين جنب الباب مع الجكس وأنا وقفت بعيد ولمحت سحر
في باب الصالة أشرت لي تودع فيني بي يدها وأنا هزيتلها راسي ورفعتلا يدي الشايلة
المنديل.... وعيني لي أبوها بي كرشو الغليدي ديك واقف جنب مرتو... يمين جِقِر
معرس فارة أم سيسي... لله في خلقه شؤؤن... حكم يعلم بها الله...
لامن وصلنا الظلط عوض شافني ماشي طوالي...
- ياخي الشمس مولعة إنت عايز تمشي كداري ولا شنو خلينا نركب ياخي
- شوف يا عوض لو عايز تركب أركب أنا ماني راكب
ختيت المنديل فوق راسي ومشيت ومن وراي عوض...
.... ونواصل
Post: #447
Title: Re: أي بت شديدة بتحب ليها طُلبة (صبي بناي)
Author: ناهد علي
Date: 09-08-2007, 01:31 PM
Parent: #1

طارق
الله يرضاء عليك
تمها انا ماشة مامورية
بالي كلة عن عوض مابغطة قرض في ماموريتي دة دحين
تمه لي انشاء الله براي
Post: #448
Title: Re: أي بت شديدة بتحب ليها طُلبة (صبي بناي)
Author: Rawia
Date: 09-08-2007, 01:51 PM
Parent: #447

لا يهل الله محمد رسول الله








زمان حبوبتنا بت الحسين(الله يرحمها) كانت بتقول كدا لما تندهش


هي دهشة نصاح لكن
Post: #451
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 04:10 PM
Parent: #448


يا راوية كيفنك

حبوبتك دي كانت بتكسر تلج برضو
Post: #458
Title: Re: أي بت شديدة بتحب ليها طُلبة (صبي بناي)
Author: Rawia
Date: 09-08-2007, 08:50 PM
Parent: #451

Quote:
حبوبتك دي كانت بتكسر تلج برضو


تلج؟

حبوبتي كان شافت الشفته كانت تتشهد للان(فاغرة فاهها)

وتاني
لا اله الا الله محمد رسول الله
Post: #450
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 04:09 PM
Parent: #447


ناهد كيفنك
كدي قولي بسم الله وادينا الايميل بنتمها ليك


محبتي الاكيدة
Post: #449
Title: Re: أي بت شديدة بتحب ليها طُلبة (صبي بناي)
Author: شول اشوانق دينق
Date: 09-08-2007, 02:43 PM
Parent: #1

ود جبريل
شايفك سرعت النسق حبتين ... كويس يا زول الظاهر الضغط جاب حقو...

Quote: ويرفعوهو فوق الفضية وبعد شهرين من العيد تلقاهو معتت ووكتين تاكل منه إن ما بقيت جريت فسراع
للمستراح يمين الإسهال يصل لي ركبتك زي الدكوة العاصرنلهم فيها ليموني ويكبسك الضبان الاخضر
داك وينوني فيك بس البقدونس في صحن سلطة الحُمص...

ايه الفظاعة ده يا اخي؟؟؟
خربت القصة كلو كلو بكلام الفوق ده يا زول.

Quote: ودعناهم مع السلامة مع السلامة.... أنا لامن وصلت عند سحر غلبني النضمي كله كله...
وحاتكم ناقصاني الرِيالي رسمي... مديتلها يدي وسلمت عليها ولامن عيني جات في عيونها
كنت عايز اقولها: واااااااااااااااامغستي أنا... التراب في خشمي...
- طيب يا سحر مع السلامة وشكرا على الفطرة الحلوة دي
- طيب يا دكتور شرفتونا.... ممكن نشوفك تاني
- إن شاء الله...
- ضروري جدا خصوصا إجازتك قصيرة... بزعل لو ما شفناك تاني...

تعرف لو جيت وتميت باقي القصة وطلع ما رجعت لي ناس سحر ومشيت ليهم تاني زيارة يمين إلا نجيك في المغرب بتاعك الداسي فوقه ده والزمن داك تستاهل ليك دقه وما دايرين حجازين ... دواس بس.

لسه بجيك

شول اشوانق
Post: #452
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 04:12 PM
Parent: #449


شول كيفنك
جابت ليها دق كمان
انت يا اخوي محروق كدي مالك القصي هابشاك في واحدة شديدة من زمان ولا شنو
Post: #453
Title: Re: أي بت شديدة بتحب ليها طُلبة (صبي بناي)
Author: ياسر الامير ابوجكة
Date: 09-08-2007, 05:17 PM
Parent: #1

ياود جبريل ،،، كيف حالك

طيب و صبي النجار ،،، في البوست القادم (قصة حقيقية ) ،،، عاش نفس الفيلم
حارسل ليك القصة دي على الايميل لانو سلاسة الحكي عندك ... رايك شنو


ود الامير
Post: #455
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 05:40 PM
Parent: #453


حبيبنا ود ابو جكة
يا زول الكع لينا القصة وبنعملها سيناريو كويس
بس كدي دخلنا في الموضوع
Post: #454
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 09-08-2007, 05:28 PM
Parent: #1

Quote: وحاتكم الكلام أبى يطلع كله كله بس زي معجون أبو صفقة داك لامن يكمل
وتقعد تعصر فيه فشان تتسوك وأصابعينك لامن يورَمِن
وما تقدر تطلع منو حِتايي وفي النهايي تحك الفرشي في الصابوني البيضة بتاعة الغسيل ديك وتتم سويكك.

و ممكن تشرط الالمونيوم و تدخل الفرشه ...عسى ان ينوبك من ال بالجمبات نصيب.



Quote: ودعناهم مع السلامة مع السلامة.... أنا لامن وصلت عند سحر غلبني النضمي كله كله...
وحاتكم ناقصاني الرِيالي رسمي... مديتلها يدي وسلمت عليها ولامن عيني جات في عيونها
كنت عايز اقولها: واااااااااااااااامغستي أنا... التراب في خشمي...


انا يا طارق والله كنت معروف اني بكاااااااااااااااااااي ..
لكن جنس حقك ده...نبرا و نستبرا يا يابا....
Post: #456
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2007, 05:42 PM
Parent: #454


والله يا وليد طلعت خبير
في معاجين الاسنان


لكن ان بقيت كنت محلي كان عوعيت عديل
Post: #457
Title: Re: أي بت شديدة بتحب ليها طُلبة (صبي بناي)
Author: Raja
Date: 09-08-2007, 08:23 PM
Parent: #456

العزيز عوض.. آآآخ طارق ..
سلامات ومحبات..

الحكاية بقت مولًعة بجد.. عليك الله بطًل الشحتفة وأعمل لينا الـ Happy ending قبل رمضان عشان نعمل العرس في العيد ..





الغالي أبوقصي..

رمضان كريم وكل يوم وإنت وأسرتك بخير..

تسأل منك العافية.. ودايما إنتو في البال..

ودي الوافر
Post: #465
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-09-2007, 03:47 PM
Parent: #457


رجاء كيفنك
نحن عايزنها تولع مخصوص مع رمضان
كسير التلج شغال بي هناك
Post: #461
Title: Re: أي بت شديدة بتحب ليها طُلبة (صبي بناي)
Author: anas hassan
Date: 09-09-2007, 11:51 AM
Parent: #456

طـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــارق

اووووووووووووووووووووووووووووووووووووووووووووووووووووووووب منك

ما كفــــــــــــــــــــــــــــــــــــــــــــــــــــــــــا يه شحتفــــــــــــــــــــــــــــــه
Post: #466
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-09-2007, 03:48 PM
Parent: #461


انس حسن كيفنك
يا زول اركز وقول بسم الله
رمضان لسة ما بدا

ما فضل كتير
Post: #460
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 09-09-2007, 08:13 AM
Parent: #1

الصديق العزيز طارق


تشكر يا سيدي على الايميل

نخلي الجماعة على كدة عشان كل شوية زول يرسل يسالني من نهاية القصة


طبعا الدفع مقدما

سلام

صفية
المتعهد الرسمي لاعمال د. طارق في البورد
Post: #462
Title: Re: أي بت شديدة بتحب ليها طُلبة (صبي بناي)
Author: osman righeem
Date: 09-09-2007, 01:03 PM
Parent: #460

بمناسبة الايميل
عندي تلفون عوض

مين يحب يستثمر

د. طارق ممكن تقدم عرضك برضك
عارف قصة اليهودي
بتاعت صكوك الغفران !!
اعمل زيها
Post: #468
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-09-2007, 03:53 PM
Parent: #462


ود رغيم
انت باقيلي شغال جاسوس
Post: #467
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-09-2007, 03:50 PM
Parent: #460


د. صفية كيفنك والوليدات
ايوة بالله سخني الشغل
عايز اشتري لي بيت جالوص في السودان
Post: #463
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 09-09-2007, 01:56 PM
Parent: #1

من البداية تابعنا عوض ........
هسة شكلو كدة مسألتو ظابطة ومنتهية ....
لكن الطلع لينا بي مناديل .. وجرسة .. و ......... وااااااااا ضيقو ده تكون نهايتو شنو؟

قال مونة وطوب قال.

زول حنانو وراهو بيلطُم ..... يقوم يمشي (للملطم)؟
Post: #464
Title: Re: أي بت شديدة بتحب ليها طُلبة (صبي بناي)
Author: GamarBoBa
Date: 09-09-2007, 02:39 PM
Parent: #463

ود جبريل
من بديت اقرأ قصتك دي وانا يوميا بتلفت شمال ويمين وانا ماشي بشارع محمد نجيب العمارات..بسأل ياتو عمارة في ديل طلعت منها القصة دي....الليلة قمت نشنت علي عمارة كدة (بي مزاجي انا) لانو برضو طلعت من جنبها آفة بتخلي القلب يهضرب ...جنبها صيدلية ؟؟؟ بس هي ذاتها معناه
نحن ماناس كتابة كتير لكن قصتك قريناها وعجبتنا ...واصل فيها ...بس ارجع الامتداد شوي....
Post: #473
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 10:21 AM
Parent: #464


القمر بوبا كيفنك
الآفة الشفتها دي عاينلها من بعيد
عشان ما يبقى عليك البقى علي عوض


اسعدني وجودك هنا
وخليك متابع
Post: #470
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-09-2007, 07:27 PM
Parent: #463


ود ابو العزائم(مصطفى سعيد) كيفنك

انت منو القالك عوض قصتو ظبطت؟؟؟؟
بعدين يا اخوي الملطم اخيرلنا من اللطمي بعدين

بس انت تابع وشوف منو فينا الصرب السكلي
Post: #469
Title: Re: أي بت شديدة بتحب ليها طُلبة (صبي بناي)
Author: ناصر جبريل
Date: 09-09-2007, 03:58 PM
Parent: #1

Quote: بمناسبة الايميل
عندي تلفون عوض

مين يحب يستثمر


طيب وحات النبي انا كنت مع عوض قبل 20 يوم

.......يا طارق واصل ياخي....! عارف زحمة الانتخابات ومعسكر العمل .. تصدق الواحد حاسدك على الجو دا!!!!! ( خارج النص) حنين الى المغرب!!!!
Post: #474
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 10:22 AM
Parent: #469


والله يا ناصر مزنوقين مع انتخابات المغاربة دي
زنقة عدوك بس الله يدي طولة العمر

البنيات وصلوك ولا لسة
Post: #471
Title: Re: أي بت شديدة بتحب ليها طُلبة (صبي بناي)
Author: Husam Bashir
Date: 09-09-2007, 10:02 PM
Parent: #1

العزيز طارق

تعرف قطيعتك الكتيرة دى فى عوض وناس العمارات بتوديك النار والدنيا قبايل رمضان. أحسن تجينا عند ياسر أبوجكة فى الجديدة.

مع التحايا الحارة
Post: #472
Title: Re: أي بت شديدة بتحب ليها طُلبة (صبي بناي)
Author: Abutalib Elgorashi
Date: 09-09-2007, 11:05 PM
Parent: #471

اللذيذ د. طارق
تعرف انا قاعد الملم في القصة في مستند واحد ولغاية هسي وصلت لغاية صفحة 36 وبالبنط الصغير..
عموما قدامك ثلاثة خيارين (زي ما بقولو العساكر)
يا تكملا يا تكملا

تخريمة
ناصر ادينا المفيد
Post: #476
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 10:27 AM
Parent: #472


ود القرشي كيفنك
اللمليم أليلك دي ذكرني لقيط التمُر
دحين يا اخوي ما فضلك كتير ونتملك باقي اللمة
محبتي الاكيدة
Post: #475
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 10:25 AM
Parent: #471


ود بشير كيفنك
ورمضان كريم
يا زول هو المنبر دة كله قطايع
وجاييكم بي هناك عندي قصص كتيري عن الجديدة


محبتي الاكيدة
Post: #478
Title: Re: أي بت شديدة بتحب ليها طُلبة (صبي بناي)
Author: osman righeem
Date: 09-10-2007, 10:41 AM
Parent: #475

طارق
كل سنة وانت طيب و الاولاد والاهل جميعا

انت ما مصدق عندي التلفون


الرقم الخامس من الشمال 9

احلفلك بي شنو
وحات سوق التلاته و وحات الجدول الضكر

الحق نفسك
Post: #479
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 10:45 AM
Parent: #478


ود رغيم كيفنك
صحبك عوض قال عايز العضوية عشان يجي يفتو هنا
Post: #477
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 10:33 AM
Parent: #1


الزينين كيفنكم...
صلينا الجمعة في الطريق... ومن طلعت من هناك أصلي ما نطقتلي بي حرف...
أبيت أمشي للبيت دخلت مع عوض في بيتهم وفي برندة مطرفة كدي لقيتلي عنقريب
فيهو مخدة انبطحت فيهو وغتيت وشي بالمنديل ونمت....
صحيت علي صوت خالتي سكينة يصحي فيني: طارق قوم يا ولدي تتغدى
- خالتي سكينة النبي فوقك أنا لاني عايز اتغدى لاني عايز اتسمم خليني
- انتو اصلهن النسوان ديل عمللكن شنو لامن جيتو مقهومين كدي انت وصحبك
- ياخي موش تبيخك دة الفيهو لحمايي في نص الصحن علي قلب الدينمو... ماني دايرو
- (تضحك) الله لا تكسبك انت وصحبك... أمك (الله يرحمها) من قبيل بي راس الحيطة تسأل منك
ياخي أُكلَك لُقمي مع الناس... إنت العنقريب دة مالك ما جدعتلك فيهو لحاف شوف شرط ضهرك دة كيفن...
- خالتي خليني أنا عارف حُبال العنقريب خلت ضهري علي بسكويت العيد كله مشرط.. دحين خليني
أقولك شي.. إنتو لامن الناس كانوا بيلموا ويسوا في القروش ناس أبوي وعم عبد الله ديل كانوا وين؟؟
- (ميتة من الضحك) كانوا مبارين العِرِس والضلَلَة وكبابي الشاي والمريسي والعرقي..
والعجب لامن يكون في شي أليل حكومي تسمعُن: عاش أبو هاشم عاش أبو هاشم...
ومن الله خلقني ماني عارفي أبو هاشم والمريسي ديل يتلَمَن كيفن...
- يعني عوض ما جابوا من بعيد ياهو أليل أبوهو
- إنت باقيلي مشيت وِكِرتَ ذاتك
- وحاتك يا خالتي أنا الليلي هضربتلي جنس هضريب...
يمين البنيي علي وش اللبن ناعمي وتقولها في كلاما يدقشك في قلبك لامن يفقهو نصين...
- إيييي كان كدي خلني اللجر البَنبَر وأقعد جنبك
- إييي بَنبَر شنو... نان أنا أحكيلك ياتو ولا أخليلك ياتو...
- النبي يا ولدي خلاص ناوي تغتس مع أخوك...
- النيي في.. علي أنا ماني عوض... أنا إن بقيت غرقت وجاء واحدا لفحها مني بجن رسمي
- يا ولدي أصبرلي الشي دة دايرلو سَفِي من صعوط المحسي اليكهرب داك
- إنت لليلي في جنك دة ما دايري تخلي... أنا أقولك البنيي علي وش اللبن تقوليلي أشوفلي سَفِي..
- شوف الشناط الجنبك دة أصلي أنا مغزغزة أكياس الصعوط هِني وهِني علي
بيوت الزرازير فشان تكون قريبي مني وكتين أخدَر ألقاها جنبي...
- أديتها التمباك.... أنا يا خالتي البنيي نفيستي فيها لكن آبقدر على شيت عوض دة
دحين وحاتك جيت كداري من هناك أقلب فيهو بي هِني وهِني لقيتو ماهو لافق معاي
- إييي ديل نسوان قادرات إن بقيت نويت بيحصلنك زي أخوك
- ما بيبقى يمين جبيرين أقولو كدي علي يقع من طولو وأصلوا إن بقى لي أمي (رحمة الله عليها)
إن سمعت بالشي بتكضم كله كله.... والله ماني عارف أقبل وين...
- أييي يا ولدي أمك تقولها روحك وين تقولي عند طارق ما ياكا الحتالي...
والله يا ولدي طممت بطني بي شيتك دة أنا ذاتي الغداء ماني دايراهو
- هو غداك شنو طعمو... أنا غايتو ووااااااااااااااامغستي
.... ونواصل
Post: #480
Title: Re: أي بت شديدة بتحب ليها طُلبة (صبي بناي)
Author: osman righeem
Date: 09-10-2007, 10:59 AM
Parent: #477

سهر الجداد و لا نومه

طيب

نعال البقر جيابه
Post: #486
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 04:22 PM
Parent: #480


ود رغيم انت كنت بيطري ولا شنو يا اخوي
الامثال حقة بياطرة عديل
Post: #481
Title: Re: أي بت شديدة بتحب ليها طُلبة (صبي بناي)
Author: أميرة فاروق عبد العال
Date: 09-10-2007, 11:13 AM
Parent: #477

المبدع..
الممتع..
الاستاذ طارق جبريل
لك التحية وانت مازلت تواصل امتعانا..
انا ماعارفة البشرية دي ضايقي للنهاية ليه؟
ياخ حلاوة المسلسل في استمراره..
وصدقوني يومه الينتهي حانقول ياريتو ما انتهى..
Post: #487
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 04:27 PM
Parent: #481


أميرة الأميرة كيفنك
ياخي كلمة أستاذ دي كتيرة علي وما لافقة
كان قلت طارق الطُلبة بتكون لافقة
انا برضو ما مستعجل لانه في تفاصيل كتيرة
الواحد بيحك راسو حك عشان يتذكرها
وانا حقيقي عايز اكتب كل التفاصل هنا
لية... والله ما عارف
Post: #485
Title: Re: أي بت شديدة بتحب ليها طُلبة (صبي بناي)
Author: anas hassan
Date: 09-10-2007, 12:10 PM
Parent: #477

الاستاذ / طارق

بقترح انو مسلسل عوض دا يخلص اليومين دول عشان رمضان على الابواب

وتلحق تنزل لينا المسلسل الجديد اول يوم فى رمضان زى كل القنوات
ولا ماعندك
ههههههههههههههههههههههههههههههههههههههههههههههههههههه

سليت روحنا ما تخلص
شكلها كدا لمن تنتهى القصه دى نحن نكون خلاص انتهينا


وشكرا للسرد الرائع للقصه
ممكن تطبعها وانا بساهم فى الطبع للقصه

بتصل بوكيل اعمالك لمزيد من التفاصيل ( صفيه)

دوما
Post: #488
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 04:35 PM
Parent: #485


انس يا حبيب
خلاص يا سيدي اديناك حق الطباعة
بس انا خايف القراء يرموك بالبيض الفاسد
Post: #482
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 09-10-2007, 11:27 AM
Parent: #1

Quote: وغتيت وشي بالمنديل ونمت....


أتاريييييك ....

يعني العمايل العملوها في المنديل كلها شميتا وضربت ليك نافوخك!!
Post: #489
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 04:39 PM
Parent: #482


ود ابو العزائم (مصطفى سعيد)
نان هو جنس شمشيم
Post: #483
Title: Re: أي بت شديدة بتحب ليها طُلبة (صبي بناي)
Author: ناصر جبريل
Date: 09-10-2007, 11:31 AM
Parent: #1

Quote: والله يا ناصر مزنوقين مع انتخابات المغاربة دي
زنقة عدوك بس الله يدي طولة العمر

البنيات وصلوك ولا لسة


... تعرف الزنقة دي اجمل شئ والله اسع انحنا هنا معسكر عمل طول السنة لكن من غير طعم

.....البنايات لسع ( ح يجو مع سهام انشاء الله - مراجعة الطبيب)

تخريمة

......بالله بلغ سلامي لناس حسان..... وغلطان انا الخليت المغرب!!!!!!!!!
Post: #490
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 05:12 PM
Parent: #483


ناصر...
ناس حسان يغرونك التحايا
Post: #484
Title: Re: أي بت شديدة بتحب ليها طُلبة (صبي بناي)
Author: شول اشوانق دينق
Date: 09-10-2007, 12:04 PM
Parent: #1

Quote: انت يا اخوي محروق كدي مالك القصي هابشاك في واحدة شديدة من زمان ولا شنو

دوبي إتحرقت من قصتكم البقي يدوه لبقية ناس بالإيميل وما ادراك ما الإيميل، اصلوا نحن لسه شغالين بالبريد العادي يعني البريد والبرق (الله يسامحكم)...

سرع وخلص وبطل حركات يا ود جبريل.


اكيد شكري وتقديري يا طلبة (صبي بناي) هاهاهاهاهاها... ماشالله الله.

شول اشوانق
Post: #491
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-10-2007, 05:14 PM
Parent: #484


شول كيفنك
شوف مع د. صفية يمكن تلقى ليك ايميل ايميلين
Post: #492
Title: Re: أي بت شديدة بتحب ليها طُلبة (صبي بناي)
Author: HAYDER GASIM
Date: 09-10-2007, 08:13 PM
Parent: #491

ود جبيرين ... تسلم

أها يا أخوي تتمها ... ول بكري إغتس حجرا فى الإرشيف ,
شايفو رفعلنا كرت أصفر .
Post: #497
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-11-2007, 11:38 AM
Parent: #492


حيدر وليد قاسم كيفنك
والله القصي دايرالا قعدي فشان تتم
علي طلبنا من بكري يشيلا لينا لا قدام
ومان ان بقى ما شالا بنجيبها تاني نختها من جديد
Post: #493
Title: Re: أي بت شديدة بتحب ليها طُلبة (صبي بناي)
Author: محمد غلامابي
Date: 09-10-2007, 08:30 PM
Parent: #1

الطلبة الجميل طارق

سلام بالكوم والردوم

الغريبة من سجلت في البورد دا أمر ساكت في البوست بتاعك دا..

الليلة ....آي

تصدق دفعت تمن الاهمال ..

ياخي أنا متابع من شهر واحد

وأسع نحنا في شهر تسعة..

مافي زول في الجريدة(السوداني) الا الغفير

وسي عوض بتاعك دا..

الساعة دلوقت في البلد 11 مساء

الله يجازي محنك

......

الذاكرة ماشاء الله عليها

بعد القصة ماتخلص..

وعد بتشريحها معك وكل المتابعين

فهي عندي حوت قيم كثيرة..

سأعود اليها
دم بخير
Post: #498
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-11-2007, 11:44 AM
Parent: #493


محمد غلامابي كيفنك
يا زول والله زيارتك زينة بالحيل
بعد بالله سلملي علي كل زول في (السوداني)
وليك علي امشي السفارة واشيل السوداني واعمل ليها ماكيت جديد (قصرنا معاكم)

ويا ريت تجي تشرح لينا عوض دة وحنانو


محبتي الاكيدة
Post: #494
Title: Re: أي بت شديدة بتحب ليها طُلبة (صبي بناي)
Author: Kamal Karrar
Date: 09-10-2007, 10:00 PM
Parent: #1

أبو ريم..

صدقني كل مرة أتاوق من بعيد لبعيد لعنوان البوست.. الليلة جازفت .. بس جملة الإيمان مجازفتي كانت أحلى من مجازفة عوض قبل ما نعرف نهاية قصته.. أنا ماني شايقي.. لكن أسير لهجة الشايقية الآسرة.. البسيطة الحنينة.. وللصدفة كثير من أصدقائي هم شوايقة أقحاح.. بشم في ريحة حكاويك..لكنة أهالي قرية شيبا.. حتى أسمك كأنه من منطقة شبا.. وشبا هي موطن صديقي العزيز عبد العظيم أبودية.... وشكله كده قريبك أو قريب عوض..

أنا لا يهمني إن كنت أنت عوض أم لا ولكني أستمتع بكل حرف في القصة...وقرأت ما بين السطور.. وهضمته.. ولكن هناك مواقف فعلا مؤثرة لعل ما ورد في تعيقبك على المتداخلين ووصفك لأمك وهي تنتظرك تحت النيمة يوم النتائج.. رأيت فيها أمي ..نفس الملامح .. نفس الإنتظار القلق.. لله درك فقد أصبت مني مقتلا وكدت أذرف دمعة...

وقد أستوقفني أنك تكتب في ظروف فقدت فيها عزيزين غاليين.. وأنا أترحم معك عليهما.. يشدني ذلك الصبر النبيل الذي تحليت به..

مودتي.. ومعاك من المغرب لغاية شبا أو البرصة أو الآراك ذاتها..
Post: #499
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-11-2007, 12:55 PM
Parent: #494


كمال كرار كيفنك ياخي
يا سيدي الفاضل شبا فرحانة بي وجودك
عبد العظيم ابو دية في أبو ظبي هو خالي تماما
أمي رحمها الله ( عائشة أبو دية) كانت تعني لي الكثير
ليس بالمعنى التقليدي للكلمة لكن منذ أن بدأت أعي ما يدور حولي وجدتها أمامي
في الوقت الذي كان فيه إخوتي الكبار غادروا المنزل إما للدراسة في الخارج أو للزواج
فجأة تجد نفسك أمام إمرأة فعلت المستحيل لكي نتعلم
رحمها الله يمكنك أن تسأل عنها صديقك عبد العظيم أبو دية
والرابط دة فيه عزاء كبير لي
وداعا حاجة عشة (الشايقية)
لك مني الود كله
Post: #495
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 09-11-2007, 10:19 AM
Parent: #1

Quote: المبدع..
الممتع..
الاستاذ طارق جبريل
لك التحية وانت مازلت تواصل امتعانا..
انا ماعارفة البشرية دي ضايقي للنهاية ليه؟
ياخ حلاوة المسلسل في استمراره..
وصدقوني يومه الينتهي حانقول ياريتو ما انتهى..


دة الكلام

عزيزي طارق تحياتنا بالله قول لناس الايميلات عليكم بالعناوين والتفاصيل تجيكم بس الدفع بتحويل رصيد زي ما شرح يوسف جبر الله والما عندو مكنة ياجر واحدةز
سلام

صفية
Post: #502
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-11-2007, 06:20 PM
Parent: #495


د. صفية بالله سخني القضية
الواحد عايز يلم ليه قروش قبل ما يسخن
ما تخافي ففتي ففتي
Post: #496
Title: Re: أي بت شديدة بتحب ليها طُلبة (صبي بناي)
Author: Amiral
Date: 09-11-2007, 11:32 AM
Parent: #1

سلامات يا ابو ريم
متابعين ....بس عليك الله حاول كمل القصة بسرعة قبل الأرشفة...


Quote: ......بالله بلغ سلامي لناس حسان..... وغلطان انا الخليت المغرب!!!!!!!!!




يا ناصر ما براك سويتها في نفسك وطلعت من الجنة.... يا حليل ايام حسان واللوسيو والعكاري... والله توحشناك بزااااااااااااااف
Post: #503
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-11-2007, 06:26 PM
Parent: #496


الاميرال
كي داير توحشناك بالزاف آآآآصاحبي

اتفقوا يا اميرال وانا معاكم نتمها هسا ولا في رمضان
Post: #543
Title: Re: أي بت شديدة بتحب ليها طُلبة (صبي بناي)
Author: ناهد علي
Date: 09-17-2007, 10:59 AM
Parent: #503

الاخ/ طارق جبريل
رمضان كريم
ماقلت ليك لو سافرت وجيت بكون تاني صعب علي اجمع واهو بقيت خارج الشبكة
وماقادرة اتابع اخر مرة لما النيرات قامت حاول ساعدني عشان احصل الركب ابداء من وين اوعه عوض يكون حصل لية مكروة .
Post: #500
Title: Re: أي بت شديدة بتحب ليها طُلبة (صبي بناي)
Author: Kamal Karrar
Date: 09-11-2007, 02:50 PM
Parent: #1

يا سبحان الله يا طارق... ياسلام على الصدفة الغريبة دي.. والله إحساسي كان صادق.. وما كنت عارفك ود عشةأبودية.. يا أخي نحن ما طلعنا أهل.. يعني ناس سعد وعبد الهادي وعبد القادر تميم أولاد خالتك.. ياسلام يا طارق.. أنا حسيت فيك النفس بتاع الناس ديل والله..الخالة بت لقمان رحمها الله حبوبتك..
يا أخي الناس ديل في فترة من الفترات كنت بقضي معاهم وقت أكثر مما بقضيه في بيتنا.. ديل اهلك ناس سمحين نفس وطيبين طيبة (أم عوض).. أنا وعبد العظيم في السبيعينات مشينا بورتسودان.. رحلة وزرنا خالتك الموجودة في بورتسودان... أما خالتك زينب مع معرفتي السابقة بيها تجاورنا في الدمام.. فترة طويلة.. يا أخي أنتو ناس طيبين طيبة ما إعتيادية
جملة الإيمان بقدر ما حزنت لوفاة والدتكم عشة أبودية..رجعتني سنين لوراء أيام قضيناها في ديوان جدك أبودية كلنا بسلامتنا.. الوحيد الماشايقي أنا.. عشان كده لهجتك والنفس الفيها ما غريب عليّ أبدا.. رحم الله الوالدة عائشة وأحسن إليها.. ومعاك في قصة عوض للنهاية...
Post: #501
Title: Re: أي بت شديدة بتحب ليها طُلبة (صبي بناي)
Author: Kamal Karrar
Date: 09-11-2007, 05:38 PM
Parent: #1

عزيزي طارق بعد أن قرأت رابط العزاء أسمح لي أن أعزيك في وفاة والدتك وأنا الذي خبرت فقد الأم وما زلت زغبا أبن 15 عاما..رحمها الله رحمة واسعة.. صادق مواساتي لكل آل أبو دية اللذين تربطني بهم أجمل الأواصر..
Post: #504
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-11-2007, 06:38 PM
Parent: #1


كمال كرار كيفنك
يا سيدي الله يديم المعرفة البيت الانت ذكرته دة تقريبا انا كنت ما بطلع منه نهائي
رغم انه انا اتربيت في الامتداد إلا إن كنت بمشي باستمرار ناس جدي
تحياتي للخال عبد العظيم لو بتشوفو
وأولاد تميم أولاد خالتي ستنور رحمها الله

الدنيا صغيرة يا شيخ كمال
رحمة الله على الجميع
محبتي الأكيدة
Post: #507
Title: Re: أي بت شديدة بتحب ليها طُلبة (صبي بناي)
Author: anas hassan
Date: 09-12-2007, 09:51 AM
Parent: #504

الاستاذ طارق

صباحات شوقنا

اظن او اعتقد الليله الحلقه الاخيره
ولا قصة عوض دى زى المسلسلات المكسيكى ( مثل روزاليندا 100 ودقداق حلقه )
لانو بكره رمضان والمسلسل الجديد

دوما يارائع
Post: #508
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-12-2007, 10:23 AM
Parent: #507


انس كيفنك
ورمضان كريم
قلنالكم اتفقوا عايزنها تنتهي هسي ننهيها
عايزين كمان تفاصيل التفاصيل نحن جاهزين برضو
خلونا نكون ديمقراطيين
Post: #505
Title: Re: أي بت شديدة بتحب ليها طُلبة (صبي بناي)
Author: محمد غلامابي
Date: 09-11-2007, 07:16 PM
Parent: #1

الطلبة طارق جبريل

شنو قلبت القصة سلامات وتعارف

مع كامل الود للأصدقاء الذين تلقاهم هنا.. هو كان معاكم طلبة برضو؟؟

تعرف إنو كل أبناء الريف عملوا في الخرطوم طلبة، أو في غيرها من مدن السودان،

وقد فعلت مع الصديق حاتم ود الجِرّق بمدينة المناقل، وقد كان البنا أخوه حيدر،

......

واصل القصة حتي أفي بوعدي بالتشريح لهذه القصة الملئية بالمعاني، والقيم السودانية

الخالصة..

وهاك عميق ودي...

.............

شايفك بتبّرد في موضوع الحنان بتاعك، مع سمر خوفاً من الغارات والصواريخ الارض جو

التي تخافها، لكن الشهادة لله عندك جنس قدرة علي تحييد الجماعة بتاعنك، ولو هرشوك

ووروك العين الحمرا ورينا، مافيها شي عادي، الجماعة كلهم قاعدين يدوهم العين دي،

وإجو المنبر هنا يعملو لينا فيها أسود..

.....

كن واضح ياجميل..

غلامابي
Post: #506
Title: Re: أي بت شديدة بتحب ليها طُلبة (صبي بناي)
Author: مروة احمد مكى
Date: 09-11-2007, 09:32 PM
Parent: #505

الاخ طارق تحياتى
متابعه وبشغف من بداية القصه . . و خليتكم فى حفلة الخطوبه
وكل ما القى فرقه واطل على البورد اقول ياربى عوض حصل ليه شنو
بس الزمن ما بسعفنى افتش عليه . . الليله عترت فيه بالصدفه ولقيت الحفله انتهت والعرس قرب (خمسه سته سنه ) . .

واصل ومتابعين السرد الممتع و البحكى معاناة كل الشباب تقريبا فى ظل الظروف الصعبه .
Post: #510
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-12-2007, 10:27 AM
Parent: #506


مروة كيفنك ورمضان كريم

إنت متأكدة إنه عوض حا يعرس

خليك قريبة

محبتي الأكيدة
Post: #509
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-12-2007, 10:25 AM
Parent: #505


ود غلامابي رمضانك كريم
يا زول الخرطوم دي معظمها اشتغلوا طلب

بعدين ياخي مالك داير تجيبلنا الكتاحي
Post: #511
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-12-2007, 10:32 AM
Parent: #1


أها يا الزينين ...
مشيت علي بيتنا لقيت الدنيي صاني...
الاتغدى اتغدى والاخدلو تكيي اتكى..
دخلت علي الصالون وفتحت الدولاب ماني عارف محل اخت المنديل وين...
غتستو وسط العراريق وبي كدي ضمان مافي زول حا يجي يلفحو...
لأنه القمصان بيتلفحِن... أخير العراريق مافي زول شغالبهن...
اخدتلي حمام ومشيت علي أمي (رحمها الله) في التُكُل لقيتها تحسب في قروش الختي (الصندوق)...
- كدي جيبلك ورقي وقلم تعال سجلي النسوان الدفعن من الما دفعن...
- والله يمة جننتينا بي ختتك دي....
- يا ولد أنا أصلي علمتك لي شنو...
- هسا انا قرايتي كلها لي ختتك دي... كان كدي القراييي تطير...
- (تضحك) عليك الله يا ولدي ما تكتر الحِجي... وخلي اللّت والعجِن دة..
- سمح...
- اكتب: أم النصر (رحمها الله) دفعت
حسنة مرت علي دفعت
خادم الله قالت بتجيبن بكرة باقي الأيام دي مزنوقي في عرس ولدها
بت حاج طه قالت لي دفعت وانا قلتلا لا كدي خلها لا بعدين لامن نحسب القروش
حاجة مدينة دفعت
- دي مالك ما نقنقتي فيها عشان صاحبتك
- أقولك شي أكتب وقوم شوف أصحابك علي برة ما تغلِبني..
- أها....
- اكتب: فطين (رحمها الله) يا ربي جابتن... أيي رسلتن قبيل مع البعيو
رقية بت أبنعوف دفعت
حواء بت الطريف دفعت
نفيسة السمحة قالت عندها أوضة زنكيها يكُب دايري تصلها لكن بتجيبن باكر
فاطنة الجعليي....
- هسا يمة إنت كان قريتي ما كان ريحتينا...
- يا ولدي الله لا تجعلها ندمِي أمي الله يرحمها حمتني... يمين إن كان قريت أبوك مافاضي فيهو...
- إيييي كيفن الكلام دة..
- أبوك وصل الوسطى مجننا... يمين إن كان قريت سلام الله ما أديهو ليهو....
- أريتك يمة كان قريتي... كان الليلي نجدتيني...
- مالك آآآوليدي... أوع تقولي عايز تغبا غبا عوض...
- لاني عايز أغبا لا شيتين.... أنا قلبي من بعد صلاة الجمعة حشيتو بي منجل...
- يا ولد إنت مالك وشك دة ما ياهو.... الفي شنو...
- يمة مافي شي... إنت يمة عرستي أبوي دة كيفن...
- إنت الليلي مالك ماك نصيح...
- عليك الله قولي... خصمتك بالنبي...
- يا ولدي كيفن تخصمني بالنبي... أبوك كان صاحب أخوي محمد (رحمه الله)
جاء قال عايزني... كلموني... بعد شهرين عقدولنا ومشيت قعدت معاهو عند ناس جدك
- يعني لا حب لا شيتين...
- إييي حباك برص حب شنو... في شهرين حق الله بق الله لقيت نفسي متزوجي...
- والله يمة سوري ليك يعني لكن حياتك ضايعي...
- هي ضاعت من هسي ياولدي... الله يغتيكم ويحفظكم شي تاني آآآبعرفوا...
- يا ولد إنت نضميك مالو كُتور... باقيلي حبيت عند نسابت عوض...
........
كضاب إن قلتلك لا... كضاب إن قلتلك البنيي ما بتتراد....
وحاتك يمة المغسي كاتلاني والعبرِي واقفالي في حلقي...
أنا عايز أعوعي رسمي...
ما بعرف ليه اتذكرت حبوبتي نفيسي بت بُغداد (رحمها الله)... كان العايزة تسوي... تسوي...
يوم في البركل نزلتها من فوق وقعدت وسط الرجال أندادها وقالتلي جيبلي سجاري
وأملالي الحُقي دي من دكان العوضابي... صعوطو سمح...
لامن جيت لقيت عم عوض السيد (الله يرحمه) ميت من الضحك: قُلتي كيفن آآنفيسي الله لا تكسبك
- قلتلك جيت مندَلي لا تحت ماشي أجيبلي برسيم للنعاج لقيت ود عمكم نازل سلمت عليهو وقلتلو:
إنت مرتك ماتت ليها سني بقيت تحد متل النسوان كمان...
ضحك قالي عندك لي عروس...
قلتلو: أنا مالي ماك شايفني ما بتعرَس (تضحك)...
- الله لا تكسبك... أها (يضحك).
- قالي تعرسيني يا نفيسي...
- قلتلو الكلام لا يبقى ضُراط... هسا بمشي أكلم أبوي بس بعدين لا تنط...
- الله يقلعك يا الخرابة... أها...
- قالي كلميهو... مشيت لقيت أبوي يحفرلو تحت تمرايي وقتلو:
يابة ود ناس الطيب قال دايرني دحين نجض معاهو الكلام بعد صلاة العشا وحديثك لا يبقى ني...
ضحك وقالي سمح... وأنا طالعي قابلت ود عمكم وقلتلو الكلام لا يبقى فسو ساكت أبوي كلمته..
- الخرابة أتاريك قاهري....
- والله يا عوض السيد أتاوق لي جية أبوي والعشي بقالي طويل خلاص... لامن جاء سألتو
قالي: الكلام طلع صِح أها شن قولك
وحاتك فقعتلي زغروتي لامن حسي إنقرش وعرستو ومليتلو البيت بُطان...
- الله يقلعك... قهرتيهو لامن مات....
- إيييي موتو أجلو... العرس ما قاعد يكتلو زول...
رحمة عليك يا نفيسي... هسا أنا إن بقيت سويت زيك كدي مالووووووو؟؟؟؟؟
.... ونواصل
Post: #512
Title: Re: أي بت شديدة بتحب ليها طُلبة (صبي بناي)
Author: osman righeem
Date: 09-12-2007, 10:37 AM
Parent: #1

د. طارق
سلام رسمي
انت عارف ود الكرسني
جدي ..... مش !!!!!!

خلاص رضينا بس النص الاول من رمضان

واسمع الحليفة دي
........ البندهوك في المالح المر
..................
بجيب عوض زيارة هنا
وبعدين الحشاش يملي شبكتو
وطبعا انت خبرتك طوب و ملطم
ماب تقدر علي كيدين السعده
Post: #516
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-12-2007, 04:42 PM
Parent: #512


ود رغيم
باقيلي إنت من شبا وأنا ماني عارف

ومنتظر تليفونك انت وعوض
Post: #513
Title: Re: أي بت شديدة بتحب ليها طُلبة (صبي بناي)
Author: ماجدة عوض خوجلى
Date: 09-12-2007, 10:49 AM
Parent: #1

Quote: كدي جيبلك ورقي وقلم تعال سجلي النسوان الدفعن من الما دفعن...
- والله يمة جننتينا بي ختتك دي....
- يا ولد أنا أصلي علمتك لي شنو...
- هسا انا قرايتي كلها لي ختتك دي... كان كدي القراييي تطير...

كلامه صح الف رحمه ونور عليها التعليم شن الفايدة فيه كان ماكان يحسب قروش الخته ويكتبلها الاسامى
تسلم طارق ورمضان كريم وربنا يحقق امنيات البت والطلبه !!!
Post: #517
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-12-2007, 04:45 PM
Parent: #513


بت الخليفة (ماجدة)
رمضانك كريم
أريتها كانت شالت من عمري وصامت معانا
رحمه الله وغفر الله واسكنها فسيح جناته

البت والطُلبة كلنا متمنين عرسهم
Post: #514
Title: Re: أي بت شديدة بتحب ليها طُلبة (صبي بناي)
Author: Husam Bashir
Date: 09-12-2007, 12:16 PM
Parent: #1

لسانك طويل ساكت. هسع المتجرس إنت ولا عوض.

ما منتظرنك فى الجديدة شنو الحكاية.

باللة سريع.
Post: #528
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-13-2007, 04:11 PM
Parent: #514


حسام ود بشير كيفنك
القصي جابتلها جرسي كمان

وحات نضري جاييكم بي هناك عند ود أبوجكة
Post: #515
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 09-12-2007, 01:59 PM
Parent: #1

Quote: عايزين كمان تفاصيل التفاصيل نحن جاهزين برضو


يا زول خليك في تفاصيل تفاصيل التفاصيل ..

أمانه نضمك سمح سماحتاً
Post: #520
Title: Re: أي بت شديدة بتحب ليها طُلبة (صبي بناي)
Author: Rawia
Date: 09-12-2007, 06:04 PM
Parent: #515

كل سنة وانتو طيبين وتصوموا وتفطروا على خير

ويا ابو قصي كل سنة وانت بخيرواسرتك بخير









وياعوض الموضوع ماشغال
Post: #521
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-13-2007, 10:25 AM
Parent: #520


راوية كل سنة وانت طيبة
عرفتي كيفن إنه موضوع عوض ما شغال
رميتي ليك ودع ولا شنو
Post: #522
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-13-2007, 10:37 AM
Parent: #515


ود ابو العزائم كيفنك
ماشي يا سيدي دحين مع رمضان دة
ما بنرفضلك طلب
بس شوفلي انس دة
مستعجل بالحيل
Post: #518
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 09-12-2007, 05:57 PM
Parent: #1

Quote: Quote: عايزين كمان تفاصيل التفاصيل نحن جاهزين برضو



يا زول خليك في تفاصيل تفاصيل التفاصيل ..

أمانه نضمك سمح سماحتاً



;والله يا ابو العزائم شلتها من خشمي
طارق ااااااااخوي ما مستعجلين اخد راحتك للاخر


كل الود
Post: #519
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 09-12-2007, 06:03 PM
Parent: #1

Quote: أريتها كانت شالت من عمري وصامت معانا
رحمه الله وغفر الله واسكنها فسيح جناته



الف الف رحمه عليها
Quote:

البت والطُلبة كلنا متمنين عرسهم



انتو شنو حكايتكم يا اولاد جبريل؟


ناصر يقول في عرس و انت بتقول كنت بتتمنى ....الله الله الله
Post: #523
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-13-2007, 10:39 AM
Parent: #519


وليد يا وليد كيفنك
ما قلتوا نوبة
أها خلي ناصر ينفعك
Post: #524
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-13-2007, 10:40 AM
Parent: #1


أحباب عوض كيفنكم
رمضانكم كريم
وكل سنة وانتو طيبين
Post: #525
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 09-13-2007, 10:44 AM
Parent: #1

د. طارق وعوض واحبابهم كل سنة وانتو طيبين - رمضان كريم
يعني انا اخدت حتة دين مقلب يا دكتور لكن برضو كانت فرصة نحيي اهل عوض واصحابه ونبارك ليهم رمضان لكن كتار الحيتمقلبوا زيي يكون فاكرنك نزلت حلقة جيدية
سلام
سفية
Post: #529
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-13-2007, 05:41 PM
Parent: #525


د. صفية كيفنك
دة اسمه مقلب اول يوم في رمضان
تصومي وتفطري على خير
ايتها الجميلة
Post: #526
Title: Re: أي بت شديدة بتحب ليها طُلبة (صبي بناي)
Author: Mubarak Eltayeb
Date: 09-13-2007, 02:07 PM
Parent: #1

قمة الإبداع في الحكي ،، كل التفاصيل الممتعة .... شوقنا يزداد لمعرفة النهاية
Post: #530
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-13-2007, 05:42 PM
Parent: #526


مبارك الطيب كيفنك
وجودك هنا ايضا ابداع ومتعة

خليك قريب
محبتي الاكيدة
Post: #527
Title: Re: أي بت شديدة بتحب ليها طُلبة (صبي بناي)
Author: خالد الجبل
Date: 09-13-2007, 02:26 PM
Parent: #1

أسال الله الواحد الاحد الا يحرمك من سبعة:
رزقه وتوفيقه ومغفرته ورحمته ورضوانه وجنته وصحبة نبيه .
اللهم آميييييييييييييييين...
(((مبارك عليكم الشهر)))
Post: #531
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-13-2007, 05:53 PM
Parent: #527


ود الجبل كيفنك
رمضانك كريم
ربنا يرزقك الصحة والعافية والزوجة الصالحة والابناء النجباء
وجنة عرضها السماوات والأرض وعتق من النار


محبتي الاكيدة
Post: #532
Title: Re: أي بت شديدة بتحب ليها طُلبة (صبي بناي)
Author: Husam Bashir
Date: 09-13-2007, 11:21 PM
Parent: #1

يادكتور الجماعة ديل ماعزموكم مرة كدة فطور رمضان؟
Post: #534
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-14-2007, 10:23 AM
Parent: #532


ود بشير كيفنك
هو دة حب ولا مشروع تسمين
Post: #533
Title: Re: أي بت شديدة بتحب ليها طُلبة (صبي بناي)
Author: Nasr
Date: 09-14-2007, 00:09 AM
Parent: #1

رمضان كريم للجميع
ومعزوم فطور رمضان في لوس أنجلس
لوجه الله وما عاوزين نسمع باقي القصة
Post: #538
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-17-2007, 10:30 AM
Parent: #533


نصر كيفنك
رمضان كريم
يا اخوي عزومة المراكبية دي خليها
هسا باقيلك الامريكان ديل بيدونا تأشيرة عشان فطورك دة

خليك قريب بس ارد علي الناس التحت ديل وانزلكم حلقة جديدة
Post: #535
Title: Re: أي بت شديدة بتحب ليها طُلبة (صبي بناي)
Author: osman righeem
Date: 09-17-2007, 07:25 AM
Parent: #1

د. طارق
رمضان كريم
وتقبل الله الصيام والقيام

انت عارف
الشحتفه و حراق الروح
و الشر وخلف المواعيد
من مبطلات الصيام
اليوم الخامس من رمضان
لا حس لاخبر

ونحن منتظرين عشان خاتر الروعة والجمال

بس
Post: #536
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 09-17-2007, 08:44 AM
Parent: #535

د.طارق

رمضان كريم ياسيدي

ونترحم علي الوالده ألف رحمة ونور علي قبرها ونجتمع بها عند المصطفي (ص)

في الدرجات العلي من الفراديس ومن باب الريان دخولها أن شاءالله .

الحته دي مهمه جدا التفاصيل الصغيره دي البرواز اللي قصة عوض والنضًم سمح

بالحيل وأريت القصة تطول وتطول وطول معاها قصور آمال عوض وصحبه والبناية

الجابت المعجونه بعسل دي ووصَف ذي ده عمري مالاقيتو يديك العافية والصحة

وتشوف جديد ريم يالحبيب واصل والمتعه في النضَم الجميل من الجميل طارق ود

جبريل والتحية الرمضانية نرسلها لكل المتداخلين ونخص بها أختنا راوية العباسي

وبت الخليفة ماجدة ورقيم أبوعفان والأحباب كلهم ومنتظرين جديدك ياأبوعويض.

،،،،أبوقصي،،،،
Post: #537
Title: Re: أي بت شديدة بتحب ليها طُلبة (صبي بناي)
Author: Amiral
Date: 09-17-2007, 10:20 AM
Parent: #536

الأخ طارق رمضان كريم ومبارك العواشر

لينا ثلاثة ايام منتظرينك عشان تكمل الحكي

الظاهر رمضان دخل في العضم....بس حسب ما اعلم الجو بارد في المغرب

على العموم اضرب ليك زلافتين حريرة وشباكية وتعال كمل الحكي

مودتي
Post: #541
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-17-2007, 10:39 AM
Parent: #537


اميرالنا يا حبيب كيفنك
والله زنقة شغل يا اميرال تودي التوج
بس خلاص الليلي بنزلكم حلقة
بس انت خلك قريب
Post: #540
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-17-2007, 10:36 AM
Parent: #536


حبيبنا الجميل مجدي كيفنك
قصي وامه ان شاد الله بخير
وحاتك بت عوض سماحتا فايتي الحد
وزاد كمان سماحي وكتين جابتكم هني
Post: #539
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-17-2007, 10:33 AM
Parent: #535


ود رغيم وحاتك ما شحتفة
علي اخوك مزنوق في الشغل لامن غالبني النوم
الليلة في حلقة جاهزي وفيها قطر كريمة كمان

تسلم يا حبيب
Post: #542
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-17-2007, 10:50 AM
Parent: #1


يا الزينين كيفنكم ...
اصبحت الدنيي ورجعنا لي بُنانا والقلب إن بقينا باريناهو بيودينا الآخري...
اسبوعين كدي ونحن شغالين ملاطم هني وعرش هناك في هجيرتا لا تخليك تحب لا تخليك تفكر فيهو...
كل جمعة عوض يحنس فيني فشان أمشي معاهو... أسويلو الكلام شمار في مرقة...
- يا طارق ياخي بتبالغ والله...
- ليه...
- ياخي والله والله العمارات كلها منتظرة جيتك...
- مالي وزير التخطيط...
- ياخي عليك الله بطل مساخة... والله والله يا طارق أنا ما شفت لي زول هايم ومشتاق زي سحر...
- هي تهيم فوق شنو أنا لا قلتلا بريدك ولا هي قالتلي... دحين الهيمان في شنو...
- ياخي والله البت حالتها صعبة خلاص...
- يا زول إنت موش قلت يوم الأحد ماشي الشمالية لي عرس ود خالتك... أمشي قشة ما تعتر ليك..
- شنو إنت موش مواعدني تمشي معانا نطيت ولا شنو..
- ياخي دي قصة حا تجر شديد...
- ياخي أبوي حجز لينا عربية درجة تالتة كاملة وبعداك أنا وإنت نرجع معاهو بعد العرس طوالي..
- وكلمت البلوم ولا لا...
- كلمته وأنا الليلة ماشي أودعها عشان يوم الأحد حا نسافر...
- الله يعدل خطوتك... أنا خلني...
- أصلك مجنون من يومك....
.............
يوم السبت بالليل عم عبد الله كلم لي أبوي عشان ما يحرن وقالو: القطر الراجع بجيبو ليك في يدي...
دخلت لقيت خالتي سكينة وأخواتها شغالين يسوا في الزوادي...
شي بيض مسلوق وشي طعميي وقراصة متمري... تقول القيامي دايرة تقوم..
أصبحت الدنيي ولملمنا شنطنا وملينا البكاسي بي أهل عوض ومشينا علي المحطة...
لقينا عم عبد الله جهز التصاريح وقالنا شوي كدي و(صعلوق المحطة-راس القطر البيلملم العربات في المحطة)
يكمل القطر ونشوف العربيي الحاجزنها...
المهم يا الزينين جهزت العربيي ودخلنا الشنط والزوادات... غايتو ناسا بسيطين خلاص...
اللابسلو تموت تخلي والداخلو في سفنجي رابطها بي دباري...
وأتاري خالو المفلهم داك جايبلو معاهو فنان أليل طنبور...
يمين الناس ديل بس وهطوا عفشهم والفنان والجنى المعاهو بدوا ينقرشوا في الطنبور والطبلي..
بالله العربيي دي فارت والصفيق باقيلي وصل للقصر الجمهوري... وتسمع في أبشروا بالخير..
والزغاريت ما تديك الدرب... المحطة كلها تتفرج فوقنا وأهل عوض يرقصوا في عربيتهم ما هاميهم زول...
وجملة الأيمان الفنان لامن بدأ يغني: آه يا خلايا فجولي الأشوفا..
يمين خالات عوض ظبطا مسايرِن وفكا مشاطٍ وبقَن يرقُصَن من أول العربيي لامن يصلن آخرها والرجال يصفقوا
وينططوا معاهن... وأنا عيني لي خالتي سكينة لليلي ما اتكهربت شالتلها سفي وغمتتها تحت لسانها فشان ما يشوفها زول...
طلعت فوق الزير الفي آخر العربيي فشان أشوف كويس... وحاتكم لامن الفنان بدأ يغني:
الله إن جابك يا عشاي
جيبلي راس سكر وتمنة شاي
نصه للبنوت المعاي
نصه لي أمي حبيبة قساي
بلالي متين يجي آآآيمة
*****
الرسول يا ود عمتي
إن دُرتَ راحتي
إن دُر جمتي
رسل التسريح اللجي
بلالي متين يجي آآآيمة
يمين خالتي سكينة دي تقول ضربتها كهربة... شاتت سفنجها قربت تجيبها في وشي..
وبدت ترقص وتترتر من أول العربيي لي آخرها وتاني تقلب تجي صادي زي اللوري الوحلانلو في طين... يمين تترتر في رجلينا زي هبار الشرك... انهردتلها جنس انهرادي.. والفنان شغال:
نركب البيسابق الريح
نمشي في الخرطوم نستريح
الخدامة تسوي التبيخ
وكل جمعة نزور الضريح
بلالي متين يجي آآآيمة
*****
الرسول يمة البدايي
قولوا لامي ماني جايي
كنا نشرب لبن السعايي
بقينا نشرب لبن الشرايي
الميي بالماسورة جايي
تبيخنا في الحلة أم غتايي
بلالي متين يجي آآآيمة
الدنيا دي كلها هاصت وأمة محمد الفي المحطة دي كلها تشوف فينا....
وفجأة كان أشوفلك جكس عوض ومعاها سحر نزلهم السواق...
يا ود الكرسني...
.... ونواصل
Post: #544
Title: Re: أي بت شديدة بتحب ليها طُلبة (صبي بناي)
Author: osman righeem
Date: 09-17-2007, 11:04 AM
Parent: #1

ود جبرين
جنس الكلام ده ماب يقولوه في رمضان و بالنهار كمان

جاب لي كركب في البيت غبار
وجاب لي توب ازهري في المطار
وقالي قولي بسم الله البسي .

تاني رجعتنا الي مروي الثانوية
وعبد العظيم الساعوري وعبدالله تمساح و وراق المجذوب و باشاب واسامة القاضي
وناس تهراقا و المعيلق و يا سلام

و الغزال الفوق في السلم
و المحبة تزيل الالم

الله يجازيك خير

و رمضان كريم
Post: #546
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-17-2007, 11:11 AM
Parent: #544

تعرف يا ود رغيم
ذكرتني حبوبتي نفيسي بت بُغداد
مشت الحج وكتين جات قام طلحة اخوي قالها ما سلمتي علي النبي
قالتلو لا
قالها ايي كان كدي حجك ضايع وكان مشى معاها عمي حسن
نادتو انت يا الحسن كيفن ما بتخليني اسلم علي النبي
ضيعتلي قريشات في الحج الله لا تكسبك كان سوينابن كرقي للبُطان
Post: #545
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-17-2007, 11:07 AM
Parent: #1

ا
Quote: الاخ/ طارق جبريل
رمضان كريم
ماقلت ليك لو سافرت وجيت بكون تاني صعب علي اجمع واهو بقيت خارج الشبكة
وماقادرة اتابع اخر مرة لما النيرات قامت حاول ساعدني عشان احصل الركب ابداء من وين اوعه عوض يكون حصل لية مكروة .


يا ناهد كيفنك
ياخي بسيطة شديد
شوفي إنت وصلتي وين وبعداك حا تلقي محل وقفت
عموما ما فاتك كتير كلها يمكن حلقتين في نفس الصفحة دي
وتاني لامن تعملي مداخلة خصمتك بالنبي تستعملي (إضافة رد) الاخيرة
فشان ما افتش علي مداخلتك زي السايقلي ركشي لاني اعرف امش لي قدام ولا لي وراء
محبتي الاكيدة
Post: #547
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 09-17-2007, 11:59 AM
Parent: #1

ود جبرين ....

رمضانك كريم وتصوموا وتفطروا على خير

وربنا يجمعنا في ساعة خير مع رمضانا الماخمج وسط بركاوينا وتمودينا وقنديلتنا ..

أها كان بقى خالتك نفيسي وولدها عوض خلوا فيك باقي راس .. أدينا خبر البلوم جا المحطة يسوي شنو؟
Post: #548
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-17-2007, 02:33 PM
Parent: #547


ود ابو العزائم كيفنك
رمضان كريم
اصبرلي بحكيلك البنات جن لي شنو
بس ادني صني كدي
Post: #549
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-17-2007, 03:14 PM
Parent: #1


احباب عوض كيفنكم

حقيقي اجد نفسي عاجز عن شكر الاخوين:
محي الدين جبريل
مذيع اخبار ومقدم برامج بتلفزيون السودان

والاخ اسعد جابر من السعودية
من اولاد الصحافة

لاستفساراتهم ومواكبتهم للحكاية
رغم انهم ليسو اعضاء في المنبر
Post: #550
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-17-2007, 03:14 PM
Parent: #1


احباب عوض كيفنكم

حقيقي اجد نفسي عاجز عن شكر الاخوين:
محي الدين جبريل
مذيع اخبار ومقدم برامج بتلفزيون السودان

والاخ اسعد جابر من السعودية
من اولاد الصحافة

لاستفساراتهم ومواكبتهم للحكاية
رغم انهم ليسو اعضاء في المنبر
Post: #551
Title: Re: أي بت شديدة بتحب ليها طُلبة (صبي بناي)
Author: محمد غلامابي
Date: 09-17-2007, 07:23 PM
Parent: #1




...........


يجازي محنك..

...

تحفظ الغنا؟

وسف الحبوبة؟

ونعلات الناس؟؟


....

ياخي ماشاء الله عليك


...

أهو لابدين ليك

...

تمشي وين؟؟

غلامابي
Post: #552
Title: Re: أي بت شديدة بتحب ليها طُلبة (صبي بناي)
Author: الزبير صالح الزبير
Date: 09-18-2007, 00:15 AM
Parent: #551

Quote: أها كان بقى خالتك نفيسي وولدها عوض خلوا فيك باقي راس .. أدينا خبر البلوم جا المحطة يسوي شنو؟

والله البلوم دة الظاهر لي جاي مكابر اهل عوض (وجيران اهل عوض) وما هو مندلي من عربية القطر دي الا في كريمة
Post: #556
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-18-2007, 10:47 AM
Parent: #552


الزبير ود صالح كيفنك
يا زول انت كنت معانا في القطر ولا شنو
محبتي الأكيدة
Post: #555
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-18-2007, 10:44 AM
Parent: #551


غلامابي كيفنك
خليك لابد كدة
هو انا افوتكم امشي وين
Post: #553
Title: Re: أي بت شديدة بتحب ليها طُلبة (صبي بناي)
Author: Husam Bashir
Date: 09-18-2007, 00:28 AM
Parent: #1

باللة ياطارق دة محل تقلب فية الصفحة. ترشقطت علينا الحفلة.
Post: #554
Title: Re: أي بت شديدة بتحب ليها طُلبة (صبي بناي)
Author: زرياب كنيش
Date: 09-18-2007, 09:49 AM
Parent: #553

يـاخـينا

القصة دي الظاهر عليها حطول

عارف بالصدفة قابلته عوض في التلفون

قال لي ( قالوا خالك شايل حالي في الانترنت)

قلتا ليهوا دة انتهي منك رسمي..
Post: #558
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-18-2007, 10:52 AM
Parent: #554


زرياب
انت يا زول عايش مالك قاطع الخبر
امبارح اتصلت عليهو لكن تليفونه ما بيجمع يمكن يكون غيره
كدي رسل لي التليفون
بعدين انا ما جبت حاجة من عندي الشئ العملو متبته هنا
Post: #557
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-18-2007, 10:49 AM
Parent: #553


حسام كيفنك
انت الحفلة دي كنت ناوي تجكس فيها ولا شنو
Post: #559
Title: Re: أي بت شديدة بتحب ليها طُلبة (صبي بناي)
Author: Raja
Date: 09-18-2007, 10:52 AM
Parent: #1

يااااااه كل الغنا والرقيص والـ (ترترة ) وإحنا ما جايبين خبر..؟

الله ينعل الجهل وسنينه.. كنت لي في دوشمان كااارب اليومين الفاتو .

طارق وضيوفه.. رمضانكم كريم..
Post: #563
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-18-2007, 02:59 PM
Parent: #559


رجاء بنت ناس العباسي كيفنك
رايحة ليك (كشفة) ولا شنو
بعدين مدورة دشمان وين: عضلات تبش
Post: #560
Title: Re: أي بت شديدة بتحب ليها طُلبة (صبي بناي)
Author: محي الدين الريس
Date: 09-18-2007, 11:52 AM
Parent: #1

د. طارق
لا فضّ فوك
دحين عوض عرسو تانية العيد أو أجلتوه...
Post: #561
Title: Re: أي بت شديدة بتحب ليها طُلبة (صبي بناي)
Author: Ishraga Mustafa
Date: 09-18-2007, 12:19 PM
Parent: #560

شىء عجيب!!

رمضان كريم ياطارق
Post: #562
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 09-18-2007, 12:38 PM
Parent: #561

ياد.طارق الله يديك العافية

Quote: بلالي متين يجي آآآيمة
الدنيا دي كلها هاصت وأمة محمد الفي المحطة دي كلها تشوف فينا....
وفجأة كان أشوفلك جكس عوض ومعاها سحر نزلهم السواق...
يا ود الكرسني...


الحته دي بدخلنا العشرة بتاعت اللحم الحي عشان في الآخر في كسير عظام

وكده واصل الوصفة عشان نفطر بمزاج في القطر بتاع كريمة.

،،،،أبوقصي،،،،
Post: #566
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-19-2007, 12:17 PM
Parent: #562


ابو قصي كيفنك
بنفطرك مع عوض في القطر بس اصبرلي انتهي من المجلة الفقر دي
Post: #565
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-19-2007, 12:16 PM
Parent: #561


اشراقة رمضان كريم
العجيب شنو رمضان ولا عوض
Post: #564
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-18-2007, 03:00 PM
Parent: #560


محي الدين ود الريس كيفنك
شوف الوكت اليناسبك ونحن نسوي فيهو العرس
Post: #567
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 09-19-2007, 03:56 PM
Parent: #1

Quote: وفجأة كان أشوفلك جكس عوض ومعاها سحر نزلهم السواق...
يا ود الكرسني...



ود الكرسني بحلك؟
Post: #570
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-20-2007, 11:53 AM
Parent: #567


وليد كيفنك
ود الكرسني بحلني بس انت باركها
Post: #568
Title: Re: أي بت شديدة بتحب ليها طُلبة (صبي بناي)
Author: Nasr
Date: 09-19-2007, 07:40 PM
Parent: #1

ولمن وصلت حتة "وفجأة كان أشوفلك جكس عوض ومعاها سحر نزلهم السواق...
يا ود الكرسني..."
أنا ذاتي قلت يا ود الكرسني
مع إني أعرف من أولاد الكرسني إبراهيم وعوض السيد، ناس زينين بس ما درجة ينجدوك من حالتك دي.
يبدو أن ندمنا علي ما لم نفعل أكبر أحيانا من ندمنا علي ما فعلنا.
Post: #572
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-20-2007, 12:56 PM
Parent: #568


نصر كيفنك
يا زول انت اولاد عمي ديل عرفتهم من وين
انت من شبا ولا من البركل
Quote: يبدو أن ندمنا علي ما لم نفعل أكبر أحيانا من ندمنا علي ما فعلنا.



دي دايرالا شرح
Post: #569
Title: Re: أي بت شديدة بتحب ليها طُلبة (صبي بناي)
Author: أميرة فاروق عبد العال
Date: 09-20-2007, 11:23 AM
Parent: #1

كاد قلبي أن يتوقف عندما لم (نعثر) على البوست..
وخفنا الأرشفة تكون بدأت..
لكن بحمد الله تم العثور عليه سالما..
يلا ياد. طارق حاول ارفعه بحلقة كده ان شاء الله خفيفة..
Post: #574
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-20-2007, 12:58 PM
Parent: #569


أميرة الأميرة كيفنك
والله انا ذاتي قلبي اكلني علي عوض
تصدقي امبارح اتكلمت معاهو
وهو بخير والحمد لله
Post: #571
Title: Re: أي بت شديدة بتحب ليها طُلبة (صبي بناي)
Author: أبوالزفت
Date: 09-20-2007, 11:55 AM
Parent: #1


طارقويل جابريلا

استا لا فستا
اميقو
تكيلا (اللهم انى صائم)


يا زول كلام الناس مسلسل مكسيكي طلع صاح
فتحت البوست ده اول مره امبارح 19/9/2007
تميتو اليوم 20/9/2007 وانت فاتحو من السنة الفاتت
يديك العافية شكلك كده حتمو بعد الارشفة السابعة
انا فرحان قلت الناس كلها فتحت البوست ده والانتظار طلع زيتهم
انا اقراهو دفعة واحدة ولكن خاب ظنى
وشكلو كة الباقى اطول من الاتحكى
اها كان عوض عزم خطيبتو للعرس وسافرت هي وسحر معاكم
حيكون ده الف بوست وبوست
اسوه بى الف ليلة وليلة

يا زول حكيك حلو
وكلامك بيدخل فى النخاشيش
عندك كلام الناس بتضحك منو
لكن باطنو مر شديد
ان شاء الله ربنا يصلح الحال
عجبنى شديد انك بتستخدم قول الدهشة أبوالزفت
وان صغير كانت لازمتى فى الكلام علشان كده
لقبت بابو الزفت

واصل يازول واحنا فى الانتظار المر
لك مودتى
Post: #576
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-20-2007, 01:09 PM
Parent: #571


(أبو الزفت) أبو الزفت كله هنا
يمين الحوش دة بقى كبير خلاص
يا زول المسلسل المكسيكي دة انا حاولت انحت راسي عشان ما أنسى حاجة فيهو عايز اتذكره ساعة ساعة
التفاصيل دي مهمة شديد في نظري
وزي ما قلت الكلام في ظاهره مضحك بس في جوهره مبكي
لكن تعرف رغم ذلك الضنك إلا إنه كانت ايام جميلة شديد

محبتي الأكيدة
Post: #573
Title: Re: أي بت شديدة بتحب ليها طُلبة (صبي بناي)
Author: امير عوض الجمري
Date: 09-20-2007, 12:56 PM
Parent: #1

طارق جبريل
رمضان كريم وكل سنة وانت طيب

مشتاق ليكم شديد انت وعوض والكوريك والطورية
والاسمنت والرملة والخرصانة وفجخيبة المونة وريحة الموية في الطوبة
وريحة سام سارا في الجكس .
Post: #577
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-20-2007, 07:10 PM
Parent: #573


يا سلام ياخي ود الجمري كله هنا
جملة الإيمان الليلي عوض ينزار رسمي
أماني ما فرحتني يا الامير

رمضان كريم وكل سنة وانت طيب
Post: #575
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 09-20-2007, 12:59 PM
Parent: #1

Quote: طارقويل جابريلا


but Gabriela is a name of a girl

The key board preventing me from more elboration but I will be back
Safia
Post: #578
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-20-2007, 07:12 PM
Parent: #575


د. صفية كيفنك والوليدات
منتظرنك
Post: #579
Title: Re: أي بت شديدة بتحب ليها طُلبة (صبي بناي)
Author: Nasr
Date: 09-20-2007, 08:59 PM
Parent: #1

أولاد كرسني ديل لاقيناهم في الجامعة
والكلام التحت بشرحوا ليك لمن تتم المسلسل
يعني ننتظر لحدي ما تجوا من البلد ؟؟؟؟
Post: #581
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-21-2007, 02:33 PM
Parent: #579


يا نصر كيفنك
كدي اشرح بعدين انا بتملك

والله مزنوق في مجلة بس انتهي منها وبرجعلكم
Post: #580
Title: Re: أي بت شديدة بتحب ليها طُلبة (صبي بناي)
Author: عزيز عيسى
Date: 09-20-2007, 09:16 PM
Parent: #1

طارق ودجبرين

رمضان كريم

يا سلام عليك يا طارق حكي جميل ومنتهى الروعة والظرافة
مع المواقف المضحكة والزرزرة العجيبة..
أكيد الكلام الجميل دا من فول محطة سبعة في الإمتداد..
تصدق لي ثلاثة أيام متابع قصتك مع عوض ومتشحتف مع خلق الله
ومنتظر مع الباقين عشان نعرف النهاية..
ذكرتنني بمسلسل(قطار الهم) لهاشم صديق.

بدون شك أولاد الأمتداد كلهم متابعين..

يازول الله يديك الصحة والعافية أمتعتنا وعوضتنا عن
مسلسلات رمضان.
Post: #582
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-21-2007, 02:40 PM
Parent: #580


عزيز ود عيسى كيفنك
رمضانك كريم
تصوم وتفطر على خير
محطة سبعة هسة بقت خرابة
يا زول الناس دي كسرت الحاجات الحلوة كلها

محبتي الاكيدة
Post: #583
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-22-2007, 06:06 PM
Parent: #1

Quote: الاخ العزيز

طارق ود عم جبريل

رمضان كريم ،، تصوم وتفطر على خير ،،،

وربناء يعينك على الصيام والقيام ،،

حقيق انا من المتابعين من الشباك لموضوع اخونا عوض ،،، والله غالب ،،،

تعرف أنا ما عضو في المنتدى ،،، لكن ممكن تقول بشرب بيه شاي الصباح ،،،بس في رمضان كده مافي طريقة لشاي لكن بصبح بيه ،،

حقيقي موضوع عوض ده بيخلي الزول في حته تانيه ،،، عندك مقدره على الوصف والتشبيه ،،، بطريقة تخلى الزول ينكرش ،،،

اقول ليك قوله تعرف في ناس انا بعرفهم بيحبو القصص والحكايات ،،، وما ليهم علاقة مع الانترنت من يوم ما وريتم طريقك انت عوض ،،،

طوالى لصقوا في النت بي غراء ،،

بعدين موضوع عوض ده عاملين لينا ،،، قصة مع المدام ،،، كل يوم اول سؤال لمن ارجع البيت اه طارق ما كتب ،،، اه عوض حصل ليه شنو ،،

تاني عندي ناس بطبع ليهم القصة وبرسلها ليهم تعرف كل يوم اه طارق ما كتب جديد ،،، لمن فكرت انو ،،، اعملها كتاب وابيعها تجى نقسم بالنص ،،،

تعرف ما بقدر اقول ليك غير دعاء حبوبتي الله يخضر ضراع ،،، ويديك لمن يغنيك ويعليك فوق المابيك ،،،

اخوك

الصادق أبو احمد
الدوحة ـ قطر


يا سلام عليك يا الصادق
سلامي لكل الاحباب المعاك
ربنا يحفظكم ويغتيكم
بس اتم المجلة الفي ايدي دي وراجعلكم
Post: #584
Title: Re: أي بت شديدة بتحب ليها طُلبة (صبي بناي)
Author: osman righeem
Date: 09-24-2007, 07:25 AM
Parent: #1

الاخ العزيز د. طارق

سلام و رمضان كريم

ربنا يحفظلك عيالك
ويفرحك بيهم
البت خطبناها والولد ماعندي بنات

بعد كلوا الحقنا وخلي القطر يصل اخر محطة
Post: #588
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-26-2007, 03:14 PM
Parent: #584


ود رغيم كيفنك
يا زول مبروك عليكم البنية بس ادونا حق القرايي
والله مزنوقلي جنس زنقي في الشغل

لكن الليلة بنزلكم حلقة

محبتي الاكيدة
Post: #585
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 09-24-2007, 07:33 AM
Parent: #1

Quote: أكيد الكلام الجميل دا من فول محطة سبعة في الإمتداد..


يا زول طارق وعوض ديل أنا قايل شايفهم في (بابكير)

د. طارق ...

ياخي شابكنا نواصل .... نواصل .. نواصل
وما حنقدر نقول غير: منتظرين .... منتظرين ... منتظرين
Post: #589
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-26-2007, 03:22 PM
Parent: #585


ود ابو العزائم كيفنك
والله يا حبيب زتقة شغل ما عادية

بعدين ممشي وىاي جواسيس ولا شنو
بابكيى دي لقطها من وين
Post: #586
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 09-24-2007, 09:49 AM
Parent: #1

Quote: ياخي شابكنا نواصل .... نواصل .. نواصل
وما حنقدر نقول غير: منتظرين .... منتظرين ... منتظرين



ود جبرين

صفية بت مساعد ود
Post: #587
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 09-24-2007, 10:40 AM
Parent: #586

كنت فاكر نفسي آخر واحد دخل البوست ده

ولذلك كنت بقرأ فيه "بهواده" وما مستعجل - أكتر من عشرة أيام

وكنت واثق من أني عندما اصل نهاية البوست تكون القصة كاملة - دون ان يصيبني هلع ونفاذ صبر القراء الآخرين

وها أنا اليوم أصل لآخر حرف بالبوست - وسرد العوض لم يخلص

لا أقول لك اسرع واكمل القصة ... ولكن أقول لك ...

خذ وقتك أيها الرائع ... خذ وقتك طالما هناك هذا الفيض من الفن البديع والوصف البسيط الممتع

أمتعتنا ... ادهشتنا ... اضحكتنا ... وكم ابكيتنا عندما تحرك فينا الشجون حتي بذكريات صباع المعجون "ابو وردة" ... ولهفة الوالدة المنتظرة بالهجير او تحت الشجرة باتظار نتيجة الأولاد ... صور الجيران والحلة ... وووو

واصل وانا هنا "مصنقر" ما ماشي

لك كل الود والتحايا ورمضان كريم للجميع ...
Post: #591
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-26-2007, 03:45 PM
Parent: #587


يا سلام ياخي ود نجيلة الزقازيقي الامتدادي كله هنا
والله يا عوض اماني ما اتجدعت
ود نجيلة زيارتو سمحي بالحيل
تعرف يا ياسر لو نحت راسك شوية ممكن تت\كر عوض دة
ولو جمعت الخيوط ممكن تعرف نحن كنا بنغتس وين
ياخي حكاوي الامتداد لا تخلص
سوف احكي هنا يا ياسر عن امهاتنا وعن كل الحلوين ال\ين كانوا هناك

محبتي الاكيدة
Post: #590
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-26-2007, 03:26 PM
Parent: #586


د. صفية كيفنك
روقي جاييك بي مزاج
وبطلي حركات البياطرة دي
Post: #592
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-26-2007, 04:01 PM
Parent: #1


يا الزينين كيفنكم ...
البنيات جن يفتشن علي العربيي ألت العرس...
عوض بعد ما كان يصفق مع الناس جرى فِرِد جريي علي باب العربيي لاقاهن وسلم عليهن...
- يا طارق.. طارق..
خالتي سكينة ضحكت وجات عندي وقالتلي قوم شوف الراجيك تحت..
- شفتو.. يحلني الله..
خليتها تضحك لا قعر اضانها وتقطع فيني مع أختها ونزلت...
- سلام يا شباب...
- يا دكترة كيفك..
- والله بخير لله الحمد...
- جكس عوض: شنو يا دكتور انت مخاصمنا مالك...
- أبدا والله بس مع الشغل...
- كدي نسلم علي الجماعة فوق وننزل نشوفك مالك ما عايز تجينا...
رفعت راسي لقيت اهل عوض كلهم مادين روسينهم من الشبابيك.. بس فلسطينيين في سجن إسرائيلي..
البنات سلمن ونزلن... عوض قال: كدي نتمشى لي قدام اصلو القطر متأخر...
- شفتو قطر كريمة عامل زي شيّتكم ديك...
- سحر (ضاحكة) ياخي انت عندك تشبيهات عجيبة خلاص
- الناس ياهم اللحم والطرود ياهو البصل المغزغز بينات اللحم... مو ياهو كدي...
والبطاطين أُمات كركار ديك الفي الكنبات ياهن الكتشب...
- عوض: إنت جنك دة أصلك ما بتخلي...
- أها سكتنا...
بعد عربيتين كدي لقينالكم جعليات لابسات ابيض ومحزمات في نصهن علي صفرجية الملك فاروق وشايلاتلهن
سيوف كدي وينقزن: يا سيد الحواشة... وكلاما كدي ماهو واضح...
قمت أنا قلت: إنتو القطر دة كله عرس ولا شنو.. لكن النسوان ديل مالهم رجالهم أبين شُنُبة محمرة زي سلك العدة
وكتين يصدي داك... مالهم ما قاعدين يبشروا... وشكلهم زعلانين كدي..
- عوض: طارق روق دة بكى ما عرس والنسوان ديل قاعدات يمنِحَن...
- إيه أنا والله قايلو عرس... ياخي دة بكى غريب خلاص...
يعني القطر دة إن بقيت داير تهجج فيهو تهيص.. وكمان إن بقيت محروقلك علي واحدا من أهلك تمشي كمان تفش مغستك
شويتين كان أشوفلك عوض وجكسيهو خابين مننا... يعني نحن حاقننهم...
مشيتلي علي عجلات قطر كدي جنب ماسورة وقعدت...
- سحر: شنو يا دكتور فتران ولا شنو... ممكن نقعد جنبك...
يا ود حسونة تمرقنا الليلي....
- وحات أمي مقلَّم رسمي بس عوض وخالتي سكينة ماهُن دايرين يخلوني...
- ياخي ما مجاملة وبتنتهي... على الأقل هم عندهم معزة عندك... موش زينا...
- ليه الغلط...
- ياخي أنا موش قلتليك عايزة أشوفك وبزعل لو ما شفتك.. يعني ما هببتو لي... عايزني أزعل موش كدة..
... تزعلي إنت... إنت تبري من الزعل... أنا الأزعل وأجوعِر كمان....
- أبدا ما كدة... بس أنا حا أجي بي صفتي شنو... يعني عوض عنده سبب أهو خاطب أختك
لكن أنا يا بنت الناس ما عندي سبب يجيبني وجيتي شكلها كدة ما ظريفة...
- ولا عشان خاطري أنا...
... يا سيدي الحسن...
- خاطرك أنت عارفاهو كبير عندي بس يا بت الناس هسا أبوك دة يقول شنو...
- أقول ليك حاجة بابا بيسأل منك حتى أسأل عوض...
... بابا.. البو اليشقني أنا..
- ياخي بس بيجامل في عوض ساكت...
- أنا بعرف بابا لو ما عايز حاجة ما بيسأل منها... أنت حا تسافر متين
- يعني أسبوعين تلاتة كدة
- يعني ما حا أشوفك ولا شنو...
- إنت شوفتي توديها وين... واحد طُلبة ورجلينو مشققات وحالو يحنن المسكين...
- ياخي مشتهية أتونس معاك.. بعدين إنت شايف نفسك زول طُلبة وما عارف شنو... إنت ما سألت نفسك نحن شايفنك كيف..
... يا ود الكرسني...
شويتين جاء راجل قدام الماسورة... أنا لي هسا ماني عارف مواسير محطات القطر دي مالها مصنقعة لااافوق..
المهم... الراجل أبو وشا كله قشور وحبوب دة علي المرة اللاتخالها لخوخة ونشفت في جضومها قعد يلقي وشو للماسورة
ويتنخم ويتفتف ويتمخت...
واحدة شابكاني بابا... ودة يقشقش في مخاخيتو كررررر ميييييييييط عييييط زي الزول البيشرطلو في دمُوريي... ياخي دة عالم شنو دة..
- قوماكي من هنا دة زول ما عندو زوق...
شويتين رجع عوض وجكسيهو ومشينا علي العربية ألتُم...
- سحر: حا تقعدوا كتير في الشمالية
- لا.. أنا غايتو حا أجي قالب في القطر الجايي
- جكس عوض: انت يا عوض حا تقعد ولا شنو...
- أقعد.. البقعدني شنو...
أبو الزفت يمين الزول إن بقى العرس ما كمل ياهو الراجع...
- سحر: طارق دقيقة عايزاك...
مشينا علي ضهرية العربية البت طلعتلها كيسا سمح كدة وأدتني ليهو...
- دة شنو...
- حبيت أجيب ليك حاجات حلوة شكلك بتحبها... اعتبرها زوادة مزورة...
- ياخي انت جمايلك دي كترت خلاص... ممكن أعرف فيها شنو...
- شوية جبنة مضفرة والباقي اكتشفوا براك...
- يا بت الناس جبنة مضفرة في قطر كريمي... دي ما لافقة كله كله... زي الواحد لمن يشتري مرسيدس ويكون لابس تموت تخلي...
تعرفي القطر دة مليان شنو... قراصة متمرة وطعمية وبيض مسلوق... يعني لو جعت وخبتوك بي حرف أليل قُراصي يمين إمساك جاهز...
من الله خلقني ما شفتلي زول في قطر كريمي جاهو إسهال...
البنيي يا الحبان يمين قعدت تضحك لامن دمعت وأول مرة أشوف إنه عندها فلجي سمحي خلاص واللسان ظاهر منها يمين بس جريدتين
وبيناتن سبيطي ألت مشرق ولا مطوطي (الرُطب)... يا سيدي الحسن هوووووووووووووي انجدني...
- تعرف إنت أجمل حاجة فيك شنو...
- شُفتي ليك طُلبة فيهو حاجة سمحة... وعلي العلي كمان بقرأ في بيطرة...
- ياخي عفويتك دي مبالغة...
.... ونواصل
Post: #593
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-26-2007, 04:22 PM
Parent: #1

Quote: سلام المبدع طارق
كيفك عساك طيب
والله انا متابعة البوست بتاع اي بت شديدة بتحب ليها طلبة
اول حاجة لفتتني في القصة سردك ليها باللهجة الشايقية والعفوية في السرد
الله يديك ألف صحة وعافية ومزيد من الابدااااع
ونحن منتظرين باقي القصة
ومعليش انا دخلت باميل الامتداد لانو ما عندي اميلك

مع سلامي

نسرين جمال
Post: #594
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-27-2007, 11:34 AM
Parent: #1

i will be back soon awad
Post: #595
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 09-27-2007, 12:21 PM
Parent: #1

د. طارق

أخيرا كفشتك (يعني دخلت أول زول بعدك)

لكن بالغت 3 حلقات في عربية القطر يا ربي العرس يطلع كم حلقة

في الانتظار وخلينا نعيد في العيد

صفية
Post: #596
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-28-2007, 06:24 PM
Parent: #1


د. صفية كيفنك
والله بس الوقت ممحوق لكن معظم الحلقات جاهزة
بس كيفن اتوهط جنب الكمبيوتر


محبتي الاكيدة
Post: #597
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-03-2007, 10:08 AM
Parent: #1


يا الزينين كيفنكم ...
ودعنا البنات يا الحبيبين ورجعنا لي نقزينا وترترتنا...
شوف عيني جكس عوض ماها دايري تمشي كله كله...
سحر لبستلها نضاري سميحي كدي ودخلت العربية وأشرت لينا...
عوض بقى ملصق راسو في الشباك ويودع فيهن يمين بس راس نيفة معلق...
العربيي ألت القطر هاصت تاني والفنان نقر طنبورو:
عينينك يا أعز الناس...
عينيك فيها أخطر ماس...
عينيك قوة ما بتنقاس...
أنا المغسة كاتلاني يمين نطيت في نص العربية وقامت معاي خالتي
سكينة وبقينا ننقز أنا وهي ونترتر والزغاريد انفقعن... ايووووووووووووووووووووي
والصفاقين يقدمونا لي راس العربيي وياخدولم نطيتي ونحن تاني نرجعهم لي أول العربيي
يمين الأمة دي رقصتلها جنس رقيص كأنهم كانوا في سجن....
القطر لامن فات الجيلي كان عضامي انهرّن وتعبت...
قلت لي عوض أطلعاك نسطح فوق راس القطر شويي ونشوف الكيس دة فيهو شنو...
بالله مديت راسي لي سطح عربات القطر لقيتو مليان وكل واحد لافيلو عمي فوق راسو
يمين من بعيد عاملين زي سنابل القطن في مشروع الجزيرة....
طلعنا واتوهطنالنا في ضهر عربيي وفتحنا كيسنا وبقينا ناكل...
شي جبنة مضفرة وشي قراقير كدي فيهن جبني وزيتون... وحاجات تانيي ما عرفناها شنو..
- هسا يا طارق عليك الله سحر دي ما بتتراد...
- والله تتراد لكن الله غالب...
- ياخي انت وضعك شوية احسن مننا يعني ممكن تجازف
- عوض انا ماني عايز اتشعلقلي في حبال دايبي... البت سميحي لكن ما بتنتظرني...
- يمين يا طارق قالت بس يديني ريق حلو علي احارب الدنيا كلها فشانو...
- هي قالتلك كدة ولا الكلام نجرتو من راسك...
- والله من لسانها لي قعر أضاني....
- إن بقى في نصيب بنعرسها.... انزلاكا علي النقزي...
....
وصلنا الشماليي وصت الزغاريت والهيصي...
وأهل العروس وأهل عوض في البلد لاقونا علي القطر لامن وصلنا الطريف مكان العرس...
تاني يوم بدت مراسم العرس ونشوفلك في السُعون ألات التيران مليانات مويي..
والنسوان مكفيات علي الصيجان... والافران تطلع في العيش والخرفان انضبحن...
والتبايخ تتخابت... وبراريد الشاي ما تديك الدرب وتسمع في: كِبَلي آآجنا أنا لليلي ما طبَق (ما شربت كاسي التاني)..
الناس عقدوا في الجامع بعد صلاة العصر والقريي كلها فرحاني وتزغرد... وانا عوض بالنا هناك في العمارات...
وكتين امسى الليل... شغلوا مواتر الكهرباء والرتاين بقن...
والطنبور اشتغل تاني:
آآآآهههه يا خلايا فجولي اللشوفا...
خالتي سكينة كدي حنستلها وحيدتن من البلد باين عليها رقاصي شديد...
يمين يا الحبان المرة وكتين نزلت البلد دي كلها وقفت تشوف فيها...
بالله الساعة التديها جريي وترفع ايدينا في الرقيص يمين بس طيارة الكونكورد وكتين تعمل تيك أوف..
ووكتين تاني ترجع والصفاقين من وراها بس سمكة القرش والسمك الصغار داك اللاصق فيها...
ووكتين تقيف في نص الداري وترقص بي راسها بس الحمام الرقاص داك....
.....
تمينا عرسنا ورجعنا للخرطوم وأنا بديت في اجراءات السفر المسيخي ديك...
شي علاقات ثقافية وشي وزارة الداخليي وشي تحويل بنكي... وكلاما يزهج كدي...
وكتين فضلي خمس يوم جاني عوض ناطي في العصر كدي..
- ياخي الجماعة ديل دايرين يودعوك...
- ودعتهم الله والرسول...
- طارق روق الناس ديل عازمننا في ايسكريم 41 في العمارات يوم الخميس المغرب...
- مو ياها الداندورمي دي.... ياخي نضربلهم تليفون من دكان الهادي ونودعهم وخلاص...
- انا غايتو ان بقيت مت ممغوس انت السبب...
- ياخي ما تجوط بمش بس بي شرط..
- الونسي تبقى عامة وما تسوق بنيتك وتخليني وكران براي...
- (ضاحك) سمح اتفقنا
.... ونواصل
Post: #598
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 10-03-2007, 10:27 AM
Parent: #597

Quote: يا الزينين كيفنكم ...


Quote: طارق روق الناس ديل عازمننا في ايسكريم 41 في العمارات يوم الخميس المغرب...
- مو ياها الداندورمي دي.... ياخي نضربلهم تليفون من دكان الهادي ونودعهم وخلاص...
- انا غايتو ان بقيت مت ممغوس انت السبب...


ونحن متنا من الضحك .... متعك الله ...

Quote: .... ونواصل
Post: #600
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 10-03-2007, 11:20 AM
Parent: #598

ياد.طارق والله مستمتعين والضحك يجيب الطاش والماوس من القرقره يهتز براهوا

ذي الجوال في وضع الصامت فوق تربيزة قزاز والله ياطارق التوثيق ده والتصوير

البلاغي باللهجة الشايقية دي تشقق بنايات العمارات كلها من الضحك متعك الله

ياأخوي ويخلك وليداتك واصل بقينا مانفرق بين سحر والسحور نداقش ساي ونساسق

بالدريب الجاي من حداك أنا ماعارف مالي بس ماداير النهاية بعد ده كلوا تكون

مافي صالح عوض أنت دربك مرقك في المغرب باقيلنا عشاء عوض نصليهوا كم ركع ياربي

منتظرين الحلقة الجديدة في ميدان الوحدة وعيني علي قندراني عم جبريل وفي القطرة

عيال عيسي بيتجاروا فتك بعافية ياصاحبي.

،،،،أبوقصي،،،،
Post: #603
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-03-2007, 02:52 PM
Parent: #600


ابو قصي كيفنك
وكيف قصي وأمه إن شاء الله سلمين وتامين
ميدان الوحدة جاييك فيهو لامن تزهج
ويا حليل قندران عمك جبيرين


ارقد عافية
Post: #602
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-03-2007, 02:51 PM
Parent: #598


ود نجيلة كيفنك
يا زول الدنيي دي شن فيها غير الضحك
اخرها كوم تراب
عوض أماني ما جاياهو أيام
بس خلك قريب


محبتي الاكيدة
Post: #599
Title: Re: أي بت شديدة بتحب ليها طُلبة (صبي بناي)
Author: osman righeem
Date: 10-03-2007, 11:10 AM
Parent: #1

Quote: آآآآهههه يا خلايا فجولي اللشوفا...

اه با خلايا فجولي اللشوفا
مسخت عوم البترطن في جروفا
فيها طبع الامه تفهم بالكروفا
طافره من الحركة وادي الشوف علوفا

سلامات ابو النسب
حنرسل ليكم حاجات رمضان
Post: #604
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-03-2007, 02:54 PM
Parent: #599


ود رغيم كيفنك
مع حاجات رمضان النبي إن كان ما رسلتلي شريط أليل محمد كرم الله
وكمان حق قراية البنييي
Post: #601
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 10-03-2007, 11:33 AM
Parent: #1

يا حبيب

Quote: وأول مرة أشوف إنه عندها فلجي سمحي خلاص واللسان ظاهر منها يمين بس جريدتين
وبيناتن سبيطي ألت مشرق ولا مطوطي (الرُطب)...


اللهم إني صايم ..... يا زول كلامك ده ما ودر صيامنا شمار في مرقة

Quote: عينينك يا أعز الناس...
عينيك فيها أخطر ماس...
عينيك قوة ما بتنقاس...


أيوه ... الفنان قال: عينيك فيها علم الطب ... عينيك علمنّي أحب. ما سمعت فنان قال المونة والمسطرين علمنّو الحب بس إنت وعوض جبتوهو أشتر.

هسة كدي قول ..... قبل العيد بنتخارج والا يفتح الله؟
Post: #607
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-04-2007, 10:22 AM
Parent: #601


Quote: اللهم إني صايم ..... يا زول كلامك ده ما ودر صيامنا شمار في مرقة


ود ابو العزائم كيفنك
هو فضل فيها صيام ولا حج من الشفناهو أنا وعوض

كدي نشوف لبسات العيد للبطان وبعداك نشوف كيفن نتمها ليكم
Post: #606
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-04-2007, 10:15 AM
Parent: #1

Quote: دا الحد القريتو
والفطور بعد دا بيفوتنى
وانا لا اسع فى الشغل

غايتو يا أبو الطروق خلينى أفطر وأجي اتم القصة
وبعدين عندى معاك كلام كُنر



طرقوش كيفنك
يمين بهدلتني جنس بهدلة عشان القى مداخلتك دي
يا زول دة شغل رمشان ولا شنو
انا منتظرك في حوش عوض دة
بس النبي فوقك تضيف مداخلاتك في الآخر عشان ما تخليني أساسق بين الصفحاتD
محبتي الاكيدة:
Post: #608
Title: Re: أي بت شديدة بتحب ليها طُلبة (صبي بناي)
Author: Abutalib Elgorashi
Date: 10-04-2007, 12:23 PM
Parent: #606

لسه تاني ح ننتظر؟؟؟
تعرف انا ما صدقت انشغلت في رمضان دا وخالص ما دخلت البوست حقك..
جيت اليوم ومبسوط قلت القى الحكاية خلصت ونتمها بمزااااااااااااااج وخصوصا اليوم الخميس ومفضي نفسي للاخر..
مش كفاية علينا لغاية كدا والدنيا رمضان!!!!

ود القرشي
Post: #609
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-05-2007, 10:00 AM
Parent: #608


ود القرشي كيفنك
انت يا اخوي مالك عايز تكوجنا سريع كدة
الراجل قعد يحب في البت سنين وانت عايز تطفشه في يومين
بنتمها بس خليك قريب

محبتي الاكيدة
Post: #610
Title: Re: أي بت شديدة بتحب ليها طُلبة (صبي بناي)
Author: طرقوش
Date: 10-05-2007, 11:21 PM
Parent: #609

شنو يا أبو الطروق


ما منتظرين وكدا

فسراعاك تم القصة
Post: #615
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2007, 10:03 AM
Parent: #610


طرقوش كيفنك
معليش كنا ساكين المعايش

بتمها تب
Post: #611
Title: Re: أي بت شديدة بتحب ليها طُلبة (صبي بناي)
Author: اشرف السر
Date: 10-07-2007, 10:47 AM
Parent: #1

طارق جبريل

محبتي.. دقاق ودراش.. وملطم صاح

ياخي ما بالغت أشد الانبلاغة.
اسه اكان بتبني في برج من 12 طابق كان خلصت!!!
شنو!!!
بديت يوم 28-12-2006
واليوم 07/10/2007
بالغت وشذيت
وعوض دا اكان طلبه .. كان اترقى اسه وبقى معلم بناي كبير

طبعا لي شهوووور متابع موضوع عوض دا.. وعامل فيها الود غتيت وطُلبه من سنة دو.. ،، وبتابع من تحت لتحت
لكن خلاص يا طارف فاض بي رسميي وشعبي..

طبعا الشباب حرقو لي ورقي وكسرو طوبه في راسي وما خللو حته ما شكروها...
انا غايتو بهددك وبصلك في مغربك دا وبقبقبك اذا ما في خلال اسبوع خلصت موضوع عوض..
وما تنسى موضوع سحر كمان..
Post: #616
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2007, 10:05 AM
Parent: #611


اشرف السر كيفنك
تعالي ياخي المغرب وانا بتمها ليك فيس تو فيس
قصرنا معاك


محبتي الاكيدة
Post: #612
Title: Re: أي بت شديدة بتحب ليها طُلبة (صبي بناي)
Author: اشرف السر
Date: 10-07-2007, 11:26 AM
Parent: #1

طارق جبريل
اسمع

اخوك زول ديامي!!!
فاهم دي؟؟

يعني حركاتك البتعملها للناس ديل ما بتخارج معاي

استنى شويه،، والنت قطع،،، وبكملها قريب................الخ

المكن دا بقسّم في الجكس بس..

عشان كدا جيبها من قاصرها وتمها سرييييع
فاهم!
ياخي 10 شهور شاري الناس
عاجبك الحال دا يعني؟؟
مرة ما عارف اليوم في المغرب 23 ساعة ومرات 22 ساعة
ان شاء الله فِرِد ساعة
اكتب بقية القصة ياخي
الله يهديك..
Post: #617
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2007, 10:07 AM
Parent: #612


اشوف ود السر كيفنك
Quote: المكن دا بقسّم في الجكس بس..



حليل الجكس
هو وينو الجكس
Post: #613
Title: Re: أي بت شديدة بتحب ليها طُلبة (صبي بناي)
Author: طرقوش
Date: 10-08-2007, 03:42 PM
Parent: #1

وينك يا أبو الطروق
Post: #618
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2007, 10:07 AM
Parent: #613


جاييك يا طرقوش
Post: #614
Title: Re: أي بت شديدة بتحب ليها طُلبة (صبي بناي)
Author: اشرف السر
Date: 10-09-2007, 09:55 AM
Parent: #1

طارق

كل سنة وعوض بخير

(صورة زول صاري وشو واحمر زي الشطه)
Post: #620
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2007, 10:09 AM
Parent: #614


اشرف السر كيفنك
كل عام وعوض واحبابه بالف خير
كل عام وناس العمارات والامتداد بالف خير
(وش ضاحك وواحد تاني بيغمز)
Post: #619
Title: Re: أي بت شديدة بتحب ليها طُلبة (صبي بناي)
Author: الصادق صديق سلمان
Date: 10-10-2007, 10:08 AM
Parent: #1

شكلها قصة استاذ طارق يا اشرف السر كدا انو عوض في النهاية
حا يطلع من المولد بدون حمص وعمك طارق حا يخش في الدامة
الجارية وراهو دي.

وينك يا استاذ طارق ياخي

أبوفتحية
Post: #621
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2007, 10:11 AM
Parent: #619


ابو فتحية كيفنك
انت كنت شغال معانا اسطى بياض ولا شنو

وحاتك ساكي المعايش
ويا دوب اشترينا هدوم العيد ألت البُطان
Post: #622
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2007, 10:18 AM
Parent: #1


يا الزينين كيفنكم ...
سامحونا باقي كنا مشغولين مع لبس العيد أليل البُطان..
........
جاء الخميس يا الحبان وانا ماني راضي المشي وعوض شغال تحانيس...
دخلت عندهم سلمت علي خالتي سكينة وجريتلي بنبر جنبها وقعدت ممحن...
- مالك مبلم كدي....
- ياخي ولدك دة داير يوكرني وانا ماني قادر علي الشي دة...
- قالي عازمنكم الليلي في العمارات...
- أيي داندورمي...
- هي الداندورمي دايرالا عزومي...
- تقولي شنو نسوان مخهن ضارب...
- إييي الشي ماهو الداندورمي ديل دايرات يجيبن رجليك مع أخوك... نسوان قادرات...
- وإنت طبعا مبسوطي... تضحكي لي قعر أضانك...
- (ضاحكة) أييي يا ولدي عايزاك تتوكر مع أخوك... علي خايفي من أبوك... أمك ساهلي بقدر عليها.. علي أبوك صعب خلاص..
- يمين تقوليلو كدي علي يرصصك...
- بري يا يابا إنت بقيت علي الشي دة برسلو عمك عبد الله... قوم يا ولدي أمشي مع أخوك وبعدين لامن تجوا نتم حديثنا..
مشيت اخدتلي دُش وانجعصتلي في بنطلون وقميص وسرقتلي ريحي من عمكم جبيرين... ومشينا...
لامن وصلنا شارع 41 وحاتكم قلبي دة ينتل نتلي تقول ممتحن شفوي... واللغليغ كلو راح مني...
شويتين نشوفلكم البنيات معاهن خالتن ووواحدة من بنات خالن قدام المحل... شباب زي الألموظ...
سحر لابسالا بلوزي خضراء مع اسكيرت اخضر غامغ كدي علي السعدي (النجيلة)... والضفور في راسن برضو اخضر
وعاملالا أحمر شلاليف كبدي كدي وفوقه زيقا دهبي غامغ بس زي إعلان البرامج في قناة الجزيرة...
(والله ناس امي ضايعات أهلن دقولن شلاليفن بالأسود علي قعر الصاج وطلقوهن)...
والجفون مضرضرالا فيهن شيتن اخضر كدي وكتين تغمض يلمع زي الفوسفور الفي الشوارع السفرية (هاي وييز)
والرموش الليلي بقن طوال كدي علي قرون الاستشعار ألت الصراصير... والله يا الحبان وكتين تغمض وتفتح
العيون أكبر من الريال... انا نفسي يتخمة ضُمة ضُمة... واتشحتفلي شحتيفتا تقول صايم والآذان فضلو خمس دقائق..
- (خالت البنيات) أهلا بالشباب...
- سلام عليكم...
- تقعدوا برة ولا جوة
- والله كله كويس
- خلو طارق يختار نحن الليلة محتفلين بيهو...
- والله جوة أحسن...
- الحبشية ظبطت لينا طربيزة واتوهطنا في الكراسي....
- خلاص يا دكتور قربت...
- والله يومين كدة واسافر...
- حا تفرق معانا والله... اتعودنا نشوفك مع عوض...
- سحر: انا زعلانة منك...
- ليه ياخي....
- انا ما قلت ليك عايزة اشوفك قبل ما تسافر
- ما ياني هسا معاكم قبل ما اسافر...
- كتير علينا نشوفك براك
- والله انت شفت الظروف كيف... موضوع الشماليي لخبط الدنيي علينا
- عنوانك شنو في مصر...
- ساهل جدا مصر الزقازيق كلية الطب البيطري
- بس كدة ساهل... حا ترد علي لو رسلت ليك
- اكيد ياخي نحن ما بنصدق يجيك جواب من السودان...
- ممكن برضو نجي مصر اجازة راس السنة لو جينا بجيك...
يا ود الكرسني...
جات الحبشي تشيل الطلبات...
- اها يا شباب تاخدوا شنو
- سحر: اختار ليك على زوقي انا...
- جميل
- جكس عوض: انا غايتو بختار لي عوض...
الحبشيي مشت وجات جابتلها كبابي طوال كدة علي السنبريي وفيهن داندورمي كدي مدورة زي كورة التنس
شي احمر وشي اصفر وشي اخضر... وفوقن شيتن ابيض كدي ملولو وفوقه نقط حمراء زي لامن تكون مجروح
في أصبعك الكبير والشاش منقطة فيهو صبغة اليود...
سبحان الله حتى داندورمتم مختلفي.. نحن ألتنا في أكياس ممصرنة كدي يا قنقليز يا كركدي يا عرديب
ويقعد الواحد يمصمص فيه لامن يفضل التلج ويقعد يقرقش فيهو..
بقينا نبلع في الداندورمي دي والونسة شغالة... مالت علي خالة البنيات: ياخي بتنا دي ما جننتها جن ياخي انطق
قول ايي حاجة خليها تستريح... انت ما عايز تتحبة ولا شنو..
انا شبه حب... إن شاء الله بالمغسة التحش مصاريني وتقدقدِن...
- صعب أوعد بي حاجة أنا ما قادر أوفي بيها.... صعب شديد
- ياخي كله بيتسهل بس انت ارحم البنية دي والله بشتنتها بشتنة حرام عليك
- والله انا زعلان عشانها... ما بتستاهل... أيي شي فيها سمح... بس أنا ما عايز ابني حاجات في الهواء
- طيب دي حتة كويسة... يعني جواك في تجاوب بس انت خايف من المستقبل... ودي ساهلة بنحلها
تعرف أنا لو قلت ليها الكلام القلتو دة الليلة ما حا تنوم كله كله... أما لو قلتو انت ليها يمين تخلي ابوها يسفرها ليك هناك..
هي ما تنوم... انا عيوني اليتقدقدن...
- لا تعليق...
كملنا داندورمتنا واتونسنا ونسة عامة كدة ولمن وقفنا سحر زحت بي بعيد شوية كدة بي طريقة لا شعورية
- انا حا اراسلك عليك الله ما تتجاهلني
- ياخي انت بيتجاهلوك... ما ممكن يحصل
- وعد
- وعد
ودعت خالة البنات وبت خالهم ومشيت علي جكس عوض وودعتها لمن رجعت لي سحر تاني
وحاتكم قربت اغنيلا: كتير بتناسى ايديا واسيبا عنية فوق ايدك....
وسافرت...
.... ونواصل
Post: #623
Title: Re: أي بت شديدة بتحب ليها طُلبة (صبي بناي)
Author: osman righeem
Date: 10-10-2007, 10:53 AM
Parent: #622

Quote: وسافرت...


ود جبرين بالغت
اوع يكون حننتظر الاجازة الجاية

ورأس السنة بتاع الجكس ده بيجي شهر كم ؟
Post: #624
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 10-10-2007, 11:27 AM
Parent: #623

Quote: اغنيلا: كتير بتناسى ايديا واسيبا عنية فوق ايدك....


ونحن ذاطوووووووو بنغني ليك!!



مع تحياتي للعيال د.طارق

،،،،أبوقصي،،،،
Post: #625
Title: Re: أي بت شديدة بتحب ليها طُلبة (صبي بناي)
Author: طرقوش
Date: 10-10-2007, 12:38 PM
Parent: #624

شكرا يا أبو الطروق ولا عدمناك
والعيد علينا وعليكم يتبارك


ـــــــــــــــــــــــــــــ

(1)
كيتا كدي في اخو البت الغزالة الكسر صاحب ناذر داك
انا بحكيلكم قصة صحبي عوض الله يطراهو بالخير...
دحين يا الحبان ونحن في الثانوي انا وصحبي عوض دا كنا شغالين طلب
مع بناي كدي ايدو خضراْء تحلف تقول الزول دة ساقية يمين من تبدأ الاجازة ونحن مدورين
يوم في الصحافة ومرة اركويت وساعات في الامتداد.. المهم الخرطوم دي تحلف تقول بنيناها
انا وعوض دا... تمانية صفايح رملة وواحد اسمنت والملطم يكون جاهز... جيب الطوب يا ولد
غربل الرملة يا ولد... الخرصانة وصلت ولا لسا... بكرة حا نعمل البيم...
المهم يا الحبان الرزق يوم قام ساقنا للعمارات عندنا فيها شغل شهر وكان الوكت آخر الاجازة
ونحن مقدمين للجامعة بعد ما امتحنا الشهادة..
عوض صحبي دا شليق شلاقة عدوكم.. قوم يوم ونحن ماشين على العمارات جاب اورنيق الجامعة معاهو
قال عايز يستاذن من المعلم عشان يكمل الاجراءات... انا الكلام حرقني خفت الارانيق دي تقوم تغتس في الاسمنت والطوب ويكون تعبنا راح شمار في مرقة...
المهم طلعنا الطابق التالت عشان نغير ونلبس لبس الشغل... عوض صاحبي مبسوط الليلة ويغني شافلو مسمار علق فيهو هدوما وبدأ يلبس في لبس الشغل.. عندو فنيلة تحلف تقول الفطيرة البيخلوها في آخر الصاج ديك وبيسموها (القنقروشة) يمين ان بقا ما بلاها ما تتلبس... والعرق الفيها لو كبوهو في بطارية عربية نازلة تولع...اما بنطلون الشغل بالله تقول ضربوا لغم كله مقدقد تقول غربال دراب..
انا قلت ليه ياخي ما نغير لبس الشغل دا هنا في العمارات ديل ناس هاي ويمكن يتهمونا باكلة لحوم البشر... حلف ما يغيرو لكن الحكاية يبدو عندها معنى بعدين بيظهر..
المهم كلمنا صباحيتنا وقبل ما نمشي نفطر قلت ليه ياخي الارانيق دي شوفليها طوبة اهجرها بيها عشان ما تطير قال لي يا زول ما تخاف يلا نمشي نفطر... ومشينا الديم يا ابو ساندرا وضربنا الفول في سوق الديم وجينا منفوخين وكروشنا قدامنا زي الحنابيك تحلف لو ختو ليك سهم نشاب في صرتك وقالولك شيل نفسك وتاني ختو السهم يصل الصحافة من الديم من شدة ما زردناها فول...
عوض على غير عادتو يغني ساكت في الطريق... المهم لامن وصلنا لقينالكم بنيتا سمحي جنس سماح واقفة منتظرانا... جملة الايمان وجيها من شدة ما ناعم ان بقى كبولم فيهو عسل نحل ينزلق منه.. بالله البت وشها اصفر ومندي تقول منقة قلب التور... وانا وعوض صحبي وقفنا مبلمين تحلف تقول ما عمرنا اتكلمنا قبل دة.. والموقف كانت فيهو مفارقات عجيبة خلاص البت بي سماحتها دي كلها وعوض وشوا مليان اسمنت وراسه مغبر عامل زي الدرابة... المهم يا الحبان البنية قامت حلت الموقف وسألتنا منو فيكم عوض؟
انا اتشجعت وقلت ليها دا... قامت قالت ليه انت حا تدخل السنة دي كلية الصيدلة؟؟؟ قاليها ايوة..
قامت قالت ليه: ياخي انت راجل مكافح خلاص... الكلمة دي وقعتلنا في جرح... لاننا كنا بنسمعهامن اخوان عوض الكبار لمن يجوا من الجامعة ونحن منجعصين وصتهم ويقعدوا يتكلموا عن كفاح الطلبة والديفييشن وكلاما غلاد غلاد كدي نحن مانا فاهمين منه اليكتحنا....
ونواصل....
(2)
اها يا الحبان البت بدت تسأل فينا جنس اسئلتا تقول شغالة في جهاز الامن... شي عن الوالدين وشي عن الظروف وشي عن الطموح... وعوض مبلم ومقهي تقول ماكلو أمانة... انا القصة حرقتني... ياخي نحن جايين نشتغل ولا نعمل معاينة... قمت استأذنت منها عشان نشتغل ومشينا لي اسمنتينا وطوبنا... جملة الايمان عوض من طلعنا كضم الكضمة الياها.... ونسى كلو كلو موضوع الارانيق.. انا القصة ضربتلي في راسي انت الزولة دي من وين عرفت اننا مقدمين للجامعة... قفرنا الارانيق ما لقيناهن... اتاريها طارت مع بنطلون عوض ووقعت في حوش النسوان... قلت لي عوض زي ما جبتهن تمشي تجيبن.. المهم زولكم اتشجع ومشى جابن وانا اتاوق عليه من فوق... زولكم العرق الطلع منه في جيب الارانيق دي من ما بدينا نشتغل طلب ما طلع منه عرق قدر دة... وجاني صوتو مبحوح... قال لي الزولة دي قالت انها معجبة بي كفاحنا دة... قلت ليه يا زول انسى الموضوع دا وخلينا في طوبنا دا...
تاني يوم يا الحبيبين نلقالكم البنية منتظرانا بي شاي الصباح ومعاهو كيك.... على باليمين قايلين نفسنا دخلنا الجنة عديل... واصلو الكان لي عوض قرب يقول صدق وعده دي واحدة من الحور العين... البنية اتاريها دخلها عوض في نافوخها... ومن السواق بتاعم عرفنا انه ابوها تاجر ليه ضل وعنده 3 بنات بس وعنده مزارع وجاه... سبحان الله الهيلمانة دي كلها و3 بنات بس... كان يجي يشوف ابو عوض اي مرة قابلته في الطريق عجبته عرسها وبقى يملص في الشفع زي قزقيز التسالي... بالله بيوت الحلة كلهن مافي واحد فيهن ما ختاهو حرامي الا بيت ناس عوص... لانه من كترة العناقريب الفيهو حقت البطان الحرامي ما عندو طريقة ينزل رجلينو... انا عوض دا ان بقيت دايرو في شي بعد 11 بالليل عارف عنقريبو وين بس ارفع راسي فوق الحيطة وعيني لي عوض مدلدل راسي في شناط الليل عنقريب مرخي كدة تقول حفرة دخان واديهو حجر زولكم طوالي يطلع يقابلني...
المهم يا الحبان ضربنا الكيك والشاي وطلعنا لي شغلنا... ومن طلعنا وعوض مقهي... قلت ليهو عجبتك.. قال لي دي منو المابتعجبو... قلت ليهو يا ولدنا ضمنت انك حا تسكن في العمارات بس عليك الله ما تنساني... ونسيبك القادم دة عندو مزارع وانا داخل بيطرة يعني ما تتغاتت... زولكم ضحك لامن طلعلو ضرس العقل...
المهم يا الحبيبين... بقينا نجي نلقالكم شي عصير شي كيك شي منقة جاية من المزرعة لامن سوينالنا جضيمات... المشكلة بقت في انه نحن لامن نطلع ما بنقدر ننزل والقصة دي كانت محرقة عوض في فشافيشو... قمت قلت ليه عندك حل واحد بس انت بدل تشتغل معانا فوق تقوم ترفع الرملة وبي كدة تشوف الجكس وتاخد ليك حنك حنكين... زولكم ما صدق كلم المعلم ومن تاني يوم بقى يطلع في الرملة... بس زولي انا عارفو قصة الرملة دي ما بيقدر عليها ومروتو ماها قدر دة.... لانه لامن تجي الساعة 12 وزولي يتفنس وشكله وهو مفنوس وشايل الصفيحة زي علامة الاستفهام... وشعر راسو زي بوخ السليقة...

(3)
عوض بقى يطلع في الرملة ويتشجع لامن البنية تديهو بسمة من بعيد... جملة الايمان الزول ان بقينا قلنالوا ترفع رملة الحرطوم دي كلها هنا كان رفعها... بس مرات لامن البت تبقى ماها في وتشوفو طالع بي صفيحتو يمين لسانو ماديهو زي كلب الحر... وعيونه من التعب زي عيون ام سيسي... ولامن البنية تكلمه... يا زول جضومه تتنفخ زي العندو برنبوفي (ابوعديلات عشان ناس كردفان)... وتحلف تقول الزول دا ان بقى مات وهو في الحالة دي حا يدفنوهو وهو ضاحك لا قعر اضانو..
الايام الاولى كلها وانا اتاوق فيهو من فوق زي الزول الصابة فوقو مطرة البت تتونس معاهو وهو مبلم زي ولد الطهور ... بعد اسبوع كدة حتا لسانو اتفك... وشوف عيني بقى يقول ليها صباح الخير... عوض يقول صباح الخير.. ايوة والله... عوض الناشف داك زي عود الطلح بقى يجي ممسح وشعره مسرح.. ومريح كمان بالرغم من انه الريحة عاملة زي النفتالين... لكن اهو عوض بقى يتريح بعد ما كانت ريحتو مع العرق ترمي الصقر.. والله ان بقيت مريت بي جنبو ساكت ريحتو تخليك تدخل في غيبوبة.... يا جماعة خير زولكم اشترى ليه مراية شخصية لانه لو ختاها مع اخوانه الكتار ديك الا يوزعوها زرة زرة بيناتهم... وبقى بعد نضرب الفول في الديم يشيل باقي الزيت ويتمسح بيهو... عشان يظهر ناعم وكدة...

(4)
المهم يا الزينين زولكم بقى يهضرب بالبنية والبنية مكسرة فيهو... واصلو كان لي عوض ما عايز الطابق اليلم دا كلو كلو ما يتم... عوض المسكين الغنماية تاكل عشاهو بفى يغني شيتا: اساسق بالدريب الجايي بي حداكا.... وشيتا انا دستوري نازل هناك في العمارات... ودي ما بعرفو جابها من وين... دحين انا شفت زولي اتشعلقلو جنس شعليقة يفكو منها الله ساكت..
- شوف يا عوض انت راجل رفيق العمر كله القصة شكلها ما لافقة معاك
- ياخي ليه عشان انا فقير يعني
- ما كدة يا الحبيب بس انت لسة المشوار قدامك فيهو مليون كيلومتر
- ياخي بقطعوا معاها
- يا راجل البنية دي سميحة ما قلنا حاجة بس صعب تنتظرك حا يجي اي واحد مرتاح ومتمسح ويخطفها منك وانت تبقى فاتح خشمك زي العوير...
- ياخي انت مالك عايز تكسر مقاديفي
- هي وينة مقاديفك دي انت عندك بلتون اخوان وناس ابوك راجنك تقول لي مقاديف
زولكم عين لي كويس وكبسني بنية وخلاني مرمي ومشى...

(5)
المهم يا الحبان اخدت بنيتي ومشيت كمدتها في قلبي وكملت شغلي ومشيت للبيت...
اصبحنا الصباح وكان يوم خميس وطبعا يوم الخميس مهم جدا في حياة الطُلب لانه يوم صرف القروش... والواحد دايما بيكون قافل على كيلو باسطة وكدة..
المهم عوض جاء مبلم لا ناضمني لا ناضمتو... كل واحد فينا مشى لي شغلو...
عوض علي زعلتو مني البنية الصباح كلو كلو ما ظهرت... زولكم عيونه حمرت وعرقوا نازل يخرخر... ووشو بقى زي ملاح الويكة البايت.. تاوقت عليه من فوق لقيتو رفع فنيلتو العجيبة ديك لي نص كرشو..
اصلو زولي عندو كرش ومع رفع الفنيلة دة بقى عامل زي الزول البالع ليه (قُلة)... وعلي العليه قام رفع بنطلونه السجمان داك لي ركبتو... والرجلين تحلف تقول كُنش عصيدة...
هسا البت السجمانة دي العاجبها في الزول دة شنو ما عارف..
مشينا نفطر وزولكم حارن،،، وعوض في الاكل عندو اكل غريب خلاص وحاتكم يقع في صحن الفول دة جف جف جف جف زي الكلب لامن يكون عطشان ويشرب من صحن الطلس...
لكن زولكم شال ليهو لقمتين وقام...
بس ربكم ربك الخير مع رجعتنا ظهرت ام الحسان... كان اشوفلكم الراجل فرح وابتسم زي الزول العندو ام فريحانة...
قبضنا قريشاتنا من المعلم ومشينا لي بتاع الباسطة دغري ولهطنا باسطتنا في امان الله..
في الطريق الزول ما مبسوط وعايز يصالحني:
- انت لسا زعلان
- ازعل ليه انت حر انا حبيت بس انبهك
- تنبهني لي شنو
- لي وضعك والمشوار الطويل المنتظرك
- ياخي ما ممكن يمشا مع بعض
- ما ممكن يا عوض انت عارف انت عندك كم اخو واخت وناس ابوك قافلين عليك قدر شنو
- عارف
- لا ما عارف.... ياخي انت نسوان الحلة ينجارن عشان يحصلن بتاع اللبن قبل ما يصل بيتكم واللبن يكمل عليهن... ولا بتاع العدة النسوان كلهن يشترن
نص دستة كبابي ونص دستة صحانة انت امك تشتري دستتين ونص احتياطي عشان البلتون العندكم دة... ياخي انت بتاع العناقريب لمن يدخل بيتكم يطلع
منه بعد تلاتة يوم لامن نفسو ينقطع وهو ينجد في العناقريب تحلف تقول زول من البيت... بعد دة كله تقول لي عارف...
وصلنا بيوتنا كداري من العمارات وكل واحد فينا مشى لي بيتو...
بالله يوم الجمعة من اصبحت اشوف ليك زولي لابد جنب بتاع الدكان...
مشيت عليه وسلمت على بتاع الدكان... شويتين اكان نسمعلك جرس تليفون الدكان:
- بالله عوض جنبك.... ابو الزفت البنية السميحة على التليفون.. اتاريه مصنقر هنا من اصبحت
- الو صباح الخير (سبحان الله عوض وصباح الخير اصلهم ما بيتلموا)
وشوية انا والهادي بتاع الدكان نسمع في القرقراب والضحك تحلف تقول الولد مولود في مقاطعة سان جيمس ما في الامتداد
- والله انا ذاتي اشتقت ليك... دة الكلام

(6)
انا والهادي بتاع الدكان سكتنا ساكت وزولكم شغال في التليفون..
- والله انا زاتي ما عارف ليه عملوا لينا الجمعة دي اجازة
الزول دة اظنو الصلاة بقى ما فاضي فيها... وشوية شوية تسمع الضحك... بالله عوض الضحكة تمرق من حلقو زي قدرة الفول الهاجرنها بي حجر.. خخيي اهييييييييي اههههه..
- الليلة شربتي شاي الصباح بدوني...
هو دة حب دة ولا صينية فطور...
- بس انا وحياتك لي هسا ما فطرتة وما اظني بقدر لانه شايك بتاع الصباح كان بيفتح نفسي...
جملة الايمان الزول دة الصينية اليقعد فوقها يلحقا امات طه.. يمين يقوم آخر زول ولو جو صورو الصحانة والصينية من بعدو بالاشعة ما يعرفوا كان فوقها شنو من شدة ما مسحها مسح...
- اها الليلة شربتي عصير المنقة ولا خلطي ليمون بس..
اول مرة اشوف لي حب في انواع الفواكه في سوق الخضار...
- تعرفي انا بتعجبني وجناتك شديد...
سبحان الله عوض كلامه كله طوب وملطم واسمنت الليلة كمان بقى يعرف الوجنات..
- لا والله ما بجاملك انا لو بجاملك معناها بغش في نفسي...
الزول دة بعد شوية حا يقول لي ما عايز اشتغل طلبة تاني..
- انت لو عايز تعرفي نفسك كويس انا بديك عيوني عشان تشوفي بيها نفسك..
شن طعم عيونك وهن عملات زي عيون الصبرا كدي ما فيهن اي تعبير..
- تعرفي يدك من شدة ما رطبة وناعمة لمن اسلم عليك شعر جسمي كله يقوم..
شعر جسمك قايم خلقة.. الزول دة بالله تقول ابو القنفد شعره كله قايم زي الابر
حتى شعر نخرينو طالع زي المسمار الداقنو معوووج في خشبة....
ربكم رب الخير جاب مصطفى اخوهو الصغير يناديهو للفطور حتى زولكم قطع المكالمة..
وقام جري للبيت... شفتو الزول النفسو مسدودة... يمين انطلق زي بيرك عربات السفراء
للفطور..

(7)
مشينا يوم السبت لي شغلنا وعوض السعادة ناطة من عيونه تقول عندو غدة درقية...
يمين ونحن في الطريق ضاربين الكدر للعمارات الزول دة اي اغنية حب وجلكسات غناها...
بس الوكرة الوكر فيه انه دا آخر اسبوع ومنه نحن نخلص الشغل هنا...
لمن قلت ليهو كدا زولكم نطط عيونه ونفخ الهواْء من نخرينو زي الحصان بتاع السبق.. وكضم الكضمة البي وشيها... انا قلت اسد ليه نفسه عشان يخلي الشغلانة لانها ما حا تلفق... اتاريني بوظتها تاني لانه زولكم بقى مهموم ويعضعض في لسانه زي الكلب الماسكو السعر....
فطرنا وجينا لقينالكم البنيي السميحي في الباب ومعاها اختها كمان انا سلمت فسراع وطلعت لي طوبي واسمنتيني... وخليتو براهو... الظاهر عليها اخت البنية كانت عايزة تشوف (ألان ديلون) بتاع الامتداد دة... تاوقت عليه من فوق لقيتو يقرقر ساكت مع البنيات وبعد شوية شال صفيحتو ومشى لي رملتو.. لامن طلع فوق جاء عندي..
- انت مالك مشيت فسراع كدي
- يا زول انت سيد الشغلانية من اولها تموت موتك
- اختها قالت لي صاحبك دة مالو مسيخ كدة بس سلم ومشى...
- انا راضي بي مساختي دي يا زول والله زاتو عشان عارفني مسيخ اختارلي قراية البيطرة
- ياخي ما تكابرني انا...
- يا زول اكابرك في شنو انت جنيت...
- يمكن اختها تعجبك..
- شوف يا ابو عويض انا ماني فاضيي للحب... ووجع القلب ماني قادر عليه فشان كدي لا بقدر احب هسا ولا حاجة يا زول المشوار طويل...والبنيات ديل ما بينتظرننا... هسا يجي واحدا متمسح ومليان قروش ويعرسها ويخليك فاتح خشمك ويمشي..
- ياخي انت مالك زول متشائم كدة
- ياخي انا عارف امكانياتي... ياخي انت بس شوف في ابو البنيات دي كويس... الراجل يلمع من النعمة.. ما حسدناهو لكن ما حا يقبلبنا نحن ناس قريعتي راحت ديل... ياخي الراجل تريان وجضومه مليانة لامن مدلدلة زي معلاق اللبن... وشوف انت جضومك مكرمشة كيفن علي السعن الناشف...
- بي شناتي دي البنية حبتني...
- مبروك عليك وخليك عايش في الوهم...

كملنا اسبوعنا ورجعنا لي امتدادنا وخليت عوض ما بين بيتهم وتلفيون دكان الهادي...
وبعد اسبوع انا سافرت مصر لي بيطرتي وهو مشى جامعة الخرطوم لي صيدلتو...
الجوابات بيناتنا ما انقطع... وعوض كلامه كله عن بنيتو وحبهم وانه بتجي عندو لامن تشتاق ليه في كافتريا الجامعة... يعني شغال خلط صاح...
لمن رجعت في الاجازة لقيت ليك النيران مولعة...

(8)
رجعت من الجامعة في مصر في الاجازة مهدود وجسمي كله قطايع وكسير... والله البيطرة دي فيها جنس جري من كفاي جداد لي مراح غنم ومن زريبة بقر لي حوش حمير.. وعلي العلي الله وقعني في مجموعة كلها سحاسيح ... شي شيراز وشي شيرين... بنات مدلعات كدة جوا يقروا بيطرة ليه ما عارف... لو في تور هاج: حصل يا طارق.. لو حمار حرن: شوفو يا طارق... المهم يا الحبيبين قلت في الاجازة دي انجمة شوية عشان اقوم اشوف البناي وين ونقوم نبدأ من جديد...
خالتنا سكينة ام عوض جات سلمت علي شديد وقالت لي: لامن ترتاح تعال لي انا عايزاك... قلت ليها ان شاء الله
حسيت انه عوض ساط ليهو سواطة شديدة لامن امه دي تجي وتقول لي عايزاك...
في المساء جاء عوض واتسالمنا ومشينا دكان الهادي نظبط البوش... شفت فيه شديد.. قام قال لي ما تعاين لي كدة عارف امي جات كلمتك... قلت ليه امك ما قالت لي حاجة بس سلامها وطريقة كلامها بتقول انك عملت ليك مصيبة ولا ناوي عليها...
ياخي انا قلت ليهم يخطبوا لي وبس..
- يخطبوا ليك وبس، انت قايل الخطوبة دي ساهلة، وبعدين ليه يعني يخطبوا ليك من هسا وانت لسة حتى ما وصلت في قرايتك للاسبرين..
- ياخي انا قلت ليهم نمش نقرأ الفاتحة وبس
- والفاتحة بيقروها ساكت كدة ما لازم بشيلوا معاهم حاجات وقولة خير وشكلاتة.... انت عارف البيت عندكم رزق اليوم باليوم... وانت ما عندك التكتحك ولا حا تديهم قزازة حامض الكبريتيك وكرتونة كلوريد الصوديوم
- ياخي ما تكسر لي مقاديفي انا والله راسي ضارب وما عارف اعمل شنو
- انت ليه عايز تخطب يعني من هسا الجديد شنو
- شوف انا بكرة حا اشوف الجكس وبعمل معاهو مواعيد عشان تسمع منها براك
الصباح عوض جاء البيت ودخل الصالون وفتح الدولاب وشال ليهو قميص من قمصاني ودخل فيهو ومشى وفي المساء لمن جاء قال لي بكرة نتقابل الساعة عشرة في كافتيرية الكلية قلت ليهو اوكي
الصباح لبست القميص بتاعي ودخلت لي في جينز ومشيت ليهم
- السلام عليكم
- اهلا د. طارق حمد لله على السلامة
- الله يسلمك دكتور شنو ياخي نحن يا دوب في مرحلة الارانب
- قميص عوض حلو في عوض بس ما حلو فيك (مع ضحكة)
- جابت ليها نبذ كمان مع انه القميص حقي بس قلت مافي داعي نشيل حال صديقنا مع انه لابس ليه قميص اصفر وبنطلون اسود عامل زي كبسولة التتراسايكلين كدة
- انت ليه رافض موضوعنا من الأول
- ياخي منو القاليك كدة
- عوض دايما بيقول لي طارق قال وقال وقال
- انا ما ضد الموضوع بس ظروف عوض بتصعب القصة كلها هسا... انت عارفة ظروفه في البيت كيف والمشوار قدامه طويل شديد ووراهو كوم لحم لانه اخوانه الكبار الحمل تقيل عليهم فهو لازم يحصل يشيل معاهم
- انا عارفة كل حاجة وهو حكي لي كل التفاصيل
- قاليك امه في البيت لابسة تموت تخلي
- قالها لي وانا عايزاهو كدة من غير كريمات (ابو الزفت الزولة شكلها واقعة لي اضنينها)
- طيب الله يوفق انا جيت اسمع ليك حسب كلام عوض وما عندي شي اقدمه ليكم سوى دعوات بالتوفيق
- لا انت ممكن تعمل حاجات كتيرة لانه عرفت من عوض انه ابوه وامه بيحبوك شديد
- ما اختلفنا بس موضوع زي دة صعب شديد اكلمهم فيهو بعدين انتو مستعجلين كدة ليه على الخطوبة دي
- لانه انا عندي مشكلة في البيت واحد من اولادي عمي اتقدم لي ومافيهو اي عيب مال وجاه وكله بس انا ما عايزة اتزوجه نهائي وابوي مصر عليه لانه ود اخوهو وانا كلمت امي بحكايتي مع عوض وقالت لي خليهو يتقدم وانا بقنع ابوك لانه عوض مستقبله مضمون
- طيب انا حا اشوف معاهم بس ما بقدر اوعدك باي حاجة لانه صعب جدا يستوعبوا الموضوع
الغايزني عوض كان بيتو نس مع اختها وآخر قرقراب ومخليني انا مع محكمة المظالم دي... النصيحة لي الله اختها ذاتها شديدة بس مافي طريقة في ظروفنا دي الحاجات دي عشم ابليس في الجنة
والله البنيات عزمونا غداء مدنكل ودفعوا القروش وكمان غمتوا لي عوض حق الرجعة كمان.... الله يسألني البت دي بتحب عوض دة جنس حب عمري ما شفت زيه
ونحن راجعين في الحاقلة سألني عوض: عرفت المشكلة وين
- عرفتها لكن حلها صعب شديد

(9)
تاني يوم بالعصرية دخلت بيت ناس عوض لقيت حاجة سكينة بتعوس ليها في لقيمات... وانا اموت في اللقيمات.... جريت لي بنبر وقعدت جنبها... الله ينعلك يا عوض المرة من العواسة والجري في تربية اولادها وشها سود وملامحها كلها حزينة شديد... الله بيسألني بتعوس في اللقيمات بالطشت عشان تملأ جرادلها بتاعة الطلس البيضاء ديك وتمشي تقعد جنب الدكان تبيعها وتلقط مصاريف الوليدات... شكل اللقيمات في الطشت زي قلاب الخرصانة... غلبني اقول ليها اي حاجة... ادتني صحن فيهو لقيمات وجابت لي شاي بي لبن وبقيت ابلع واحكحك في راسي... نوع خالتي سكينة دة السودان مليان بيهو وان اختلفت حكاياتهم الا انه النتيجة واحدة... كوم شفع وارادة تكسر الصخر عشان الشفع ديل يكملوا قرايتهم ويبقوا ناس كويسين.. وزي ما قال حميد ناس مجروة وتجر(تدين) عيشن كمهو وديشن هانقدر..
- طارق يا ولدي قول الداير تقولو ما تحرك عويناتك زي لستك الفلكسواجن كدي..
- انت انا ما حلفتك تاني ما تسفي الصعوط دة.. مقنطرة سفتك كدة زي درج القروش بتاع الدكان كدة
- (ضحكت لامن دموعها نزلت زي الماسورة المحلوجة ومربوطة بي دبارة).. تعرف يا طارق يا ولدي انا قاعدة اريدك ليه.. عشان بكون شايلة هم الدنيا كله فوق راسي وتجي وتخليني اضحك.... نان يا ولدي انا ما اسف كيفن من الشي البيسوو فيهو ناس عوض دة... انت ما تحمد الله الما شربتلي قزازة عرقي..
- افو انا خالتي تسكر
- نان يا ولدي عمايل صحبك دي يقبلوها كيفن والله فضل لي السكر... واصلو ان بقى كشف علي دكتور يمين الا يرشوني جبخان حا يلقوني منتهيي..
- طيب العمل شنو يا خالتي صاحبي حب البنية والبنية حبتو...
- حباهو برص... انتو مشيتو تشتغلوا ولا تحبوا.. بعدين انت مالك ما حبيت؟؟
- انا قلبي ميت ماهو قلب حب..
- (رجعت تضحك تاني)... هسا انت فهمك شنو
- نمشي نخطب ليهو وبعداك هو يموت موته مع اهل البت.. ياكل نارو
- طارق يا ولييييدي نخطبلوا بي شنو؟؟ باللقيمات الانت شايفها دي ولا بي صفايح الفسيخ اللا جوة ديلك؟؟
- ياخي البت ما قالت هي ما عايزة اكتر من الفاتحة؟؟؟
- في ذمتك يا ولدي الكلام دة كدي بيبقى؟؟؟ يا ولدي انا لابسالي تموت تخلي في كرعيني... شبشب زي النسوان ما عندي وتيابي كلها مهرودة ومقدقدة؟؟؟
- بنستلفلك الشبشب والتوب كمان...
- يا وليدي ما دايرة ولدي يتعلقلوا في حبالا دايبي
- كدي قولي بسم الله والله بيسهلها
- يا ولدي الله عرفوهو بالعقل ما شافوا
- انت كدي قولي خير وانا متاكد الله بيسهلها
- صمتت للحظة وبدا الظلام يتسرب الينا... انا يا ولدي هينة الكلام عمك عبد الله ان قدرت تقنعوا عديلة عليك وعلي صاحبك..
خليت خالتي سكينة تملا في جرادلها باللقيمات عشان تحصل تبيعها... ومشيت على الديوان لقيت عم عبد الله فاتح راديهو على اذاعة لندن وخاتي الرادي في صدرو زي كورة الشراب...
(10)
عم عبد الله شايفك ليك يومين ما مشيت الشغل وما سافرت
- يا ولدي منتظر لي قط بضاعة اسوقه لي بورتسودان ولي هسا ما ملوهو
- احسن ترتاح شوية
- انت ناس اذاعة لندن دي حقو يدوك وسام ياخي انا من قمت وانت تسمع ليهم
- يت ولدي ياها تسليتنا خصوصا لمن نكون سايقين القطر مافي شي غير الاذاعة ولهيب الشمس.... صاحبك مشى الجامعة.
- ايوة بكرة ان شاء الله بمشي عليه الداخلية ازوره
- دحين انت فهمك شنو في الشئ البيقول فيه دة
- انت كدي باركها والله بسهلها... بس انت قول خير
- يا ولدي دة كلام اصلو ما بيدخل العقل.. نمشي نقول للناس ديل شنو.. نقول ليهم نحن حق الملاح عندنا في تلتلة..
- يا عمي هم موافقين كدة وحا يدبروا امورهم وبعداك انت عداك العيب
- يا ولدي ما تدخلونا في ضفورنا نحن ناس علي قدر حالنا وصاحبك دة من دون اولادي فاهم الحتة
- يا حاج والله الله بيصلحها بس انت قول خير
- ياخي الولد دة من يومه وهو صغير عامل زي لوح التلج مجننا...
- يا حاج لوح التلج هسا عايز يعرس لو خليناهو كدة بيدوب
- ضاحكا بشدة.. الله يرضى عليك يا ولدي تقنعوا يخلي الموضوع دة وكمان ان بقى ما خلاهو امرنا لله...
- بس كدي انت قول خير وكله حا يتصلح..
- ربك كريم يا ولدي

اصبحت الصباح مشيت لي عوض في الداخلية لقيته بيفطر... شافني حنكو وقع زي الدلو لمن يرموهو في البئر..
- أها خير إن شاء الله..
- كدي هسا فطرني بعداك نشوف الحاصل..
- ياخي انت غتاتك دي أصلك ما بتخليها..
جابت ليها غتاتة كمان.. طيب يا زول موت موتك انا ماشي...
- يا طارق روق عليك الله ياخي انا في شنو وانت في شنو
- انت الجكس موش حا يجي هسا
- ايوة
- خلاص انا لمن يجي الجكس حا اقول ليك الحاصل
- ياخي الجكس حا تجي معاها خالتها عشان تعرف الحاصل
- خلاص لمن تجي...

(11)
أها ونحن قاعدين في الكلية فجأة تطل علينا البت وخالتها وأختها كمان... جملة الإيمان خالتها اشد منهم كلهم... زولة منعمة ورايقة كدة... تقول رز بي لبن... انا في الأول قايلها ما متزوجة اتاريها فايتة الاربعين وعندها 3 أطفال كمان...
- سلام يا شباب
- عوض قام يتراشق: اهلا بالناس الحلوة... دة صحبي طارق.. ودي خالة الشباب حنان...
(ابو الزفت يا عوض الناس ديل شكلهم حا يطيروا حنانك زاتو)...
- اها فطرتو يا شباب
- والله انا فطرتة بس طارق دة لسة ما فطر
- انت عوض خلصت محاضرات ولا لسة
- خلصتة
(يمين زولكم كان عنده امتحان ملاحق كان قال كملت)
- خلاص نمشي نفطر كلنا مع بعض في اراك اوتيل
- انا دنقرت علي عوض في اضانه: ياخي شغلنا في البنا دة كله لو جمعناهو ما بفطرنا في اراك اوتيل دة اتخارج يا ولدنا انا عندي جنيهين بس حق الرجعة
- انت قاعد تقول لي صاحبك شنو
- لا ابدا
- ياخي انا عازماكم الليلة وعايزة اتعرف عليك انت بالذات كويس ممكن...
- يا ستي انا ما عندي مانع بس ليه انا بالذات يعني
- عشان انت وقفت مع الشباب ديل وقفة سمحة وبعدين انا عايزة اعرف عملت شنو مع اهل عوض عشان نفرح بيهم
- يا زولة انت مالك مكبرة القصة كدة انا حاولت اساعد صاحبي وبس رغم انه الموقف صعب جدا
- انا عارفة وحاسة كدة
..... ومشينا اراك اوتيل....
(12)
مشينا الاراك هوتيل..
- اها يا شباب تفطروا شنو انا بقترح ناخد سمك فرايد...
- شوف يا عوض قول لي الزولة دي تشوف لينا فول زيتو كتير عشان نتمسح بعد ما نكمل.. فرايد شنو
وهي زاتها فرايد دي تطلع شنو انا السمك البعرفو القرقور وكان بالغتة البلطي... انا عايز اغمس
- كدي روق يا طارق عليك الله وخلي جنك دة الزولة دي عازماك وعايزة تعرف ناس أبوي قالوا شنو
- انتو بتقولوا في شنو..
- لا مافي حاجة
ضربنا الأسماك والسلطات...
- يا شباب شاي ما بطال
- يا طارق كدي تعال اقعد جنبي
- اوكي
- اها الحصل شنو
- والله الناس ديل انا اقنعتهم بعد صعوبة لكن لي هسا
هم ما مقتنعين وشايفين القصة ما بتجي يمشوا يد قدام ويد وراء
- يعني ما حا يجوا
- لا ما كدة بس بصراحة كدة ما مقتنعين انه يمشوا مع ولد لسة بيقرأ
وكمان الحتة بتاعة إنه انتو تتكفلوا بي كل حاجة دي وهم يجوا يد قدام ويد وراء شوية مأزماهم
- انت ما شرحت ليهم
- اكيد بس هم شايفين القصة قصة كرامة... والناس ديل رغم فقرهم إلا إنه عندهم كرامة فايتة الحد
وشايفين إنهم حا يجوكم عشان خاطر ولدهم .. يعني ما برضاهم
- ممكن انا امشي اقابلهم
- بيعتمد على الشئ العايزة تقوليهو ليهم
- انا بس عايزة اشرح ليهم انه نحن النسوان بس العارفين الأمور حا تمشي كيف...
لانه رجالنا ما عارفين انه خالات البت هم الحا يشتروا كل حاجة... الدبل وامور الخطوبة كلها... حتى لبسة عوض من عندي انا
- والله أشوفهم وأرد عليك... بس حاولي إنك تفهمي نفسيتهم..
يعني لو حسوا انك بتجرحيهم حا تبوظي القصة كلها...
- هو ولد عمها دة ما حاسس إنه البت ما عايزاهو..
- حاسس بس هو مُصر
- ياخي الموضوع دة عجيب من أوله
- قالوا لي إنك معترض
- أنا ما معترض ولا حاجة ولا عندي الحق دة... بس أنا بعرف أهل عوض كويس..
ناس طيبين وفي حالهم.. ومنتظرين عوض دة ينتهي بتين عشان يساعدهم مع أخوانه
- كل شئ حا يتسهل..
الشئ الحارقني وفاقع مرارتي عوض شغال يتبسم ويكب في الجلكسات مع القرمبوز
ومرة مرة يخت يدو في خدو تقول عايزين يصوروهو في جنة الأطفال
وأخت الجكس تراقب فينا أنا وخالتها زي رئيس العمال
- انت ما شايفة إنه الموضوع غريب
- غريب... بس بتنا بتحب الولد شديد وأخير لينا تعرسوا بي رضانا وقدام عينينا من تعرسوا من ورانا
- عوض زول كويس شديد
- انا عارفة كدة كويس... عشان كدة نحن عايزين نشتري راجل... عندك اعتراض
- ابدا ابدا
- انت ما عندك مشروع زواج كمان
أها بدينا في الكلام الأعوج... كان كدي نقوم نمشي...
- لسة بدري.... المشوار طويل
- يعني ما عندك جكس
يا النبي نوح... بدينا في جرجير الكلام والبحيت
- لا على باب الله
- يعني مافي واحدة عاجباك
- حتى لو في حا يكون الموضوع سراب ساكت
- ياخي إنت ليه متشائم كدة
- ما متشائم بس تقدري تقولي عارف حدود الحاجات العندي كويس وما عايز اتشعلق في الهواء
- حتى لو في ناس انت عاجبهم شديد
أهاااااااااااااااااااااااااااااااااااااااا
يا سيدي الحسن.....
(13)
يوم بالمساء اسمع صوت الحاج من الشارع مع العصرية بيكورك:
- يا طارق في جماعة عايزنك
ألقى ليك خالة البنية ومعاها واحدة تانية وعربية تقول يا ليل والله جنسها شنو ما عارف...
والله يستر الجلكيم خلى قراية الجريدة وبقى يشوف فينا
- سلام يا طارق
- وعليكم السلام
- ياخي نحن قلنا نسأل منك في الأول عشان إنت تدخلنا لي أهل عوض ودي اختي محاسن
- ما في مشكلة انتظروني دقيقة
دخلت لقيت خالة سكينة تعوس في اللقيمات ومقنطرة سفتها زي ترلة القندران
- يا خالة خليك من العواسة دي نسايب عوض جوا يشوفك
- النبي فوقك يا ولدي
- أيوة قومي شوفيهم
دخلت خالات البنية عند أم عوض ومشيت اقعد مع أخوانه
لأنه الجلكيم دة برة حا يبدأ يزرزر فيني برة عشان كدة اخير يزرزنا مع العشاء
وأصلو العشاء ياهو الفول دة مع زرزرة الجلكيم بيبقى تركين
......
شوية اسمع ليك يا طارق يا طارق
جيت جاري لقيت النسوان خلاص مارقين من جوة ويتبسمن
وأم عوض وأبوه مودعنهم لي برة.... شكلو كدة عوض خلاص اتورط
- أها يا جماعة فتناكم بي عافية ومن هنا اسبوعين تشرفونا وأنا قبليها بي كم يوم بجيكم براي
أبو الزفت الكلام دخل الحوش
- شوف يا طارق الناس ديل حا يجوا يتقدموا رسمي وانت لازم تكون معاهم
يا النبي نوح... وأنا في شنو
- ياخي إنت صاحب العريس ووجودك مهم جدا
- ام عوض: هو لو ما مشى أنا ذاتي ما بمشي ياهو ولدي التاني
- يا حاجة تاني شنو قولي ولدك العشرين
وكلهم ضحكوا لي قعر اضنيهم والنسوان ركبن عربيتن ومشن
وأنا مشيت لي زرزير أبوي
... خلاص بقينا على المشي ليهم بعد أسبوعين

(14)
أها يا الحبيبين مرت الاسبوعين وبقينا في الكلام الجد
شفنالنا تلات عربيات وبوكسي عشان البلتون أليل عوض دة
انا اندرعتلي في بنطلون وقميص كان عاجباتني جايبن معاي من مصر
ومشيت من دولاب الحاج اتريحت ومشيت بيت ناس عوض
أها الرجال جاهزين.. خيلانه واعمامو اتنين واخوانه الكبار علي النسوان
ما جهزن لي هسا وأبوهو ينقنق في التأخير... ونحن ما عايزنه يحرِن...
- فجأة: يا طارق... طارق تعال... اخت عوض نادتني
- شنو يا حنان مالكم ما جهزتو لي هسا
- ياخي امي قالت إلا تشيل معاها حُقة الصعوط
- يا حاجة صعوط شنو كمان التشيلي معاك في العمارات
- نان يا ولدي إن بقيت خرمت هناك أسوي شنو
- كمان عايزة في يوم خطوبة ولدك تقنطري سفتك زي الكبريتة المفتوحة
- الله يقلعك.. نان ان خرمت اسوي شنو
- عضي طرف توبك
- طيب بدل ما اعضيهو ما اختلي فيهو سفايي فرد ويحيدي
- انت قايلاها حلاوة كرملي... امرقي انا اصلي عارفك خرفتي
- هو الشي الهسا ماشين نسوي دة ما ياهو الخرف ذاته
- سمح امرقي لامن نجي بوريك الخرف كيفنهو
... ومشينا يا الحبان.... تيت تيت تيت... لامن وصلنا العمارات
... اهلا مرحب شرفتو
... اتفضلوا اتفضلوا
دخلنا لقينالكم الدنيا هايصي... والبيت مليان رجال غلاد غلاد
يمين حسين الجسمي بالنسبة ليهم ناعومي كامبل
النصايب تقول بياكلوا تِبِنْ منفخين زي شواويل الكاويق (شواويل مليانة بي ورق شجر المنقة)
... والنسوان سمحات ومتمرات عكس رجالن.. شوف عيني الواحدة فيهن تقول
للقمر قوم وأنا أقعد مكانك وباين عليهن مستلمات رجالن...
أما إن كان للقرمبوز أليلُم يمين من سماحتن
قلب الواحد ينتِل دق دق دق دق زي مروحة الطربيزة...
أماني صحبي ما وقعلو وقعتن سمحي خلاص...
أنا علي العلي مشيت أعاين في الحيط البنيناهن وبقلَنا سبب في الشي الحاصل دة
... جات جنبي خالة البنية: إنت ما عايز تنسى إنك طُلبة؟؟
- أنسى كيفن وهي كانت سبب الشي دة...
- امشي اقعد انا بعدين عايزاك
... يا سيدي الحسن تنجدني من المرة دي
شكلها كدي ناويالي علي نيي....
عوض انجعص جنب ابوهو... الحقيقة شكله اتغير بس يكتل من الضحك
لابسلو بنطلون رمادي وقميص ابيض وبابيون احمر وجكيت رمادي
انا الكاتلني من الضحك البابيون المشنط في رقبتو دة لأنه ذكرني عيد الضحية
لامن يختولك دهن الكرشة وفوقه اب دمام ويقولولك ودو للنسوان...
... اتوهطو الرجال وبدوا الكلام..

(15)
واحد من خيلان عوض قعد يفلعص في الكلام ويعوج فيهو...
انا في سري اقوله: ياخينا اكشح كلامك فسراع خلنا النمش نشوف بوشنا.. الفلهمة العليك شنو انت جايي ايد ورا وايد قدام
المهم الزول قعد يطول في الكلام ويعوج فيه لامن وصل حتة: يشرفنا ويسعدنا إننا نناسبكم
يمين ابو البت بس قال: مرحب بيكم وشرفتوا... النسوان فقعن الزغاريد .... ايويييييييييي يو يو يو
انا طوالي عرفت إنه الرجال ديل قاعدين دلاليك ساكت..
وووب عليك يا عوض اماني ما وقعت وما سميت... انا خايف اجي القاك مزرزر زي أبين كروش ديل لا تهش لا تنش
... مبروك مبروك ربنا يكمل على خير
... شرفتونا والله بي وجودكم
... د. عوض في عيونا إن شاء الله
سبحان الله هو عوض متين بقى دكتور وهو لليلي الاسبرين ما كملو
.. المهم يا الحبان صواني الخبايز والعصاير بقن ينطاقشن وانا اسكت ابلع واشرب
اخدنالنا صني كدي عشان الجماعة يتعارفوا وجات خالة العروس قالت الشباب لازم يلبسوا الدبل
بس يا الحبان يجن خالات العروس وبنات خالاتها وبنات عمها مقدمات العروس والدنيا هاصت تاني
النصيحة لي الله البنيي سمحة سماح يكتلو زول
قعدوها هي وعوض في كراسي ماهلات كدي
وخالة العروس طلقت البخور وجابوا الدبل والحاجات
وعوض من شدة الفرح عيونو يتحركن زي البليي الخاتنها في كوريي
لبسوا دبلم
وفجأة دخلت غنايتا غليييدي قالوا اسمها حواء قندران ولا ترلا ما عارف
الزولة دي قعدت تلعلع والشباب دة هاص وختوا عوض وخطيبتو في النص وهاك يا رقيص
خالة البنية جات جرتني من يدي ودخلتني الدائرة واختلي قلدي مع عوض شديدي والله من قلبي
وبدينا نسكسك وخالة العروس تلزني وسط البنات
وانا اقول يا ربي تمرقني سالم الليلي
وفجأة شفتلي واحدا ليه فقهة كدي زي التلكي (الخشبة البيكسروا فيها الجزارين اللحم)
زولكم منجعصلو في كرسي واللحم عليه كتير لامن مدفق من الكرسي بس تقول عجين خميرتو زايدي نازل من الماعون
الولد عيونه محمري وشكل وشه ينعل قفاهو
ونحن في الهجيج دة وسط البنيات السمحات ديل
همست في اضان خالة البنيي: انت الزول المنفخ ابو نخرة كبييري زي وحيد القرن دة منه ومالو فارز عيشتو بعيد من الناس كدي
ياخي حرام عليك... دة ما ود عمها الكان عايزها
اتاريهو يشرب في العصاير يبرد في جوفه وعيني ليهو قزازة الببسي يشرب فيها زي الماسورة المفتوحة في زير
حمدتك يا مالك روحي الما حبيت
- انت ما حبيت لكن في ناس عينها عليك
أهااا قمنا تاني... يا سيدي الحسن تمرقني لي أهلي سالم من العيلة دي...

(16)
واصلنا سكسكتنا وسط النسوان القاهرات ديل..
.. حاجة سكينة جات مسكت ولدها وقلدتو وبكت بي حرقة شديدة خلاص
والله تقول عوض مات....
انا سبيت لي عوض ولي قلبو ولي العمارات وللفقر
... خالة البنية غمزت لي عشان انقذ الموقف
جيت مسكت حاجة سكينة من يدينها وجبتها لي وسط الجكس البيرقص
وقعدت ارقص معاها وقلتلا: انبسطي في خطوبة ولدك عشان اجيبلك سفة من أبان كروش ديل
والله قعدت ترقص وتضحك بي دموعها وطبعا الناس كلها مستغربة انا قلتلا شنو
خالة العروس جاتني: النبي فوقك نسيبتنا دي قلتلا شنو
- ياخي مالك مخصماني بالنبي الشي القلتو ليها آبيتقال.. انت موش كنت عايزها تنبسط اها انا خليتا ليكم تحتو قرض
- (ضاحكة) انت باين عليك داهية... أها مافي واحدة من الشباب ديل ملت عينك
- انا عيني مليانة مصائب وبناتكم السمحات ديل ما بقدر عليهن... انا وليد ربراب وماني زول حب
وشيت عوض دة ان بقيت سويتو ابوي بيقطع راسي... هو جيتي معى عوض دي عندو فيها كلام
- بس نسوي شنو جيتو خليتو بناتنا يهضربن
يا ود الكرسني تحلني الليلة دي من الزرزير دة
انا كان عارف القصي حا تصل لي كدي كان شفتلي بناي جالوص واشتغلت معاهو
- شايفة الزولة اللابسة احمر ديك... شايفها متابعاك كيف
يا سيدي الحسن... اقولك حاجة... تعالي نرقص انا ما مني فايدي
- يلا... بس ما بنخليك
عوض يوزع في البسمات وغاتس في بدلتو زي قلم البيگ
مشيت قعدتة بينه وبين العروسة
- والله بي طريقتي دي بتكتلي ليكي زول... ليك حق تجهجهي عوض
- بس هو الجهجهني... وعوض دة حاجة روعة
عوض يتبسم ساكت زي الماسكين جضومو بي مشبك
- انت الزول الهناك دة ياهو الاخد الشاكوش...
- ايوة هو زي اخوي
- اتاريهو يلوغد في الخبايز كدي بي حرقة....
- انا غايتو من قبيل اعاين للباب كويس قلت كان قامت شكلي اقوم فاكي البيرك
ناسكم الغلاد دي ما بقدر عليهم وصحبي عليه العوض ومنه العوض ان بقى هبدوهو
- ياخي مافي زول حا يسألكم خلاص القصة اتحسمت
- انا خايف من خالتك دي تجيبلي دقة الليلة كلما ازوق تجي تجرني وسط البنات واعمامك ديل يحمرولي
- ضاحكة يا زول ما في زول شغال بيك
- كدة كويس
عوض ضحك ضحكة خبيسي كدي
- انت والله ما قعد تشوف
يا ود الكرسني تحصلني....
نقوم نهجج

(17)
بناتن السمحات ديل شغالات رقيص... ورجالن أبين كروش ديل جابلوم شيتن مقرطس كدي باقيلي كوكتيل شغالين يلوغدوا فيه
انا شفت ام اعوض دفرتو من يدها في الطربيزة وقلت لي عوض كدي خلني اللشوف امك دي واجيك صادي
- انت مالك دفرتي الشي دة
- يا ولدي ما فهمت فيهو شي
- انا عارفك في الزيفي دي دايرالك حرف أليل قراصي ومعاهو بصلتا خدرا تمسكيها زي المايك وتقعدي تلوغدي
- (ضاحكة) اي والله يا ولدي... الناس ديل شيتن كلو كُتُر
- انت مالك عليهم اسكتي اكلي البتعرفي والباقي ضوقيهو بس
- يا ولدي قلبي ماكلني علي ولدي ما بيقدر على الناس ديل... باين عليهم نسوانم قدرات ورجالن قاعدين طراطير
- هو وكر نفسي عندهم ... بعدين ما تخافي البنيي قاعدة تريدو شديد وباقية عليه عشرة
- أيي والله يا ولدي... باين عليها قاعدة تريدو ،سميحي صديرا زي الوزين
- انت قايلاهو متل أليلك علي المعلاق كدي
- ( ضاحكة) لامن دموعها جرن.... شكيتك علي الله يا ولدي والله الا امسكك ابوسك في جضومك ديل
- يلا سمح اكلي عشان الناس ديل عينهم عليك
... شويي كدي الفنانة الاسمها حواء قطر ولا شنو دي بدت تلعلع تاني والدنيا فارت من جديد
وقبل ما خالة البنية تصلني سوقت ام عوض وقعدت ارقص معاها وجن بناتم زي البلوم حاوطونا وهاك يا كشف
وام فستان احمر المري دي جات قاصداني عديل
قامت ام عوض قالتلي: انت يا طارق يا ولدي البنات ديل من قبيل انا شايفاهن وخالتن يحاحين فيك باقيلي دارنك لي واحدة فيهن
دحين يا ولدي ما تغتس انت ذاتك عشان الاتنين بتقدروا عليهن
- دايرة توكريني انا كمان ... والله جبيرين ان بقا سمعك علي يرصصك
- (ضاحكة) أييي ابوك صعب شديد
خالة البنية فكتني من ام عوض ومسكتني ترقص معاي
- الليلة ما عندك طريقة تزوق لازم تحسم حاجاتك
يا سيدي الحسن تنجدني
(18)
ونحن بنرقص مع غناء الخرابة الاسمها حواء دي قربت مني خالة العروس....
- أها يا طارق كيف الخطوبة بالله ماها سمحي..
- والله ما قصرتوا تب... واحسن شي خليتو الامور مغتغتة كدي
فشان اهل عوض ديل انت باقي عارفاهم ناس عندهم عزة نفس وكدي..
- يا زول عوض دربوا مرق وخلاص بقى ولدنا ومننا وفينا..
دة الكلام أماني ما وقع راجل..
- لكن لسة الدرب ماهو طويل..
- يا زول الأيام بتمشي زي البرق
- أيي ما قلنا شي بس لامن يشتغل ويكوِّن نفسه القصي دايرالا صبرا كتير
- ياخي مالك جنك حسيب كدي
- نان مو ياهو كدي ولا انتو كمان دايرين تعرسولوا..
- يا زول هوي نحن بنعرف كيفن نسويلُن شيتُن...
- أها إنت كيفن قصتك
... يا ود الكرسني.. بدينا..
- أنا لاني عندي قصي ولاني بتاع قصص.. أنا يا دوب أشوفلي كفاي أليل جداد
ولا مراح أليل غنم وأقعد أربرب جنبو... العرس والحب ديل ماني قادر عليهن..
- ياخي نحن عديل كدة عايزنك لي سحر بتنا.. وهي عينها عليك وانت باين عليك ود ناس...
... يا الوراريق يحلني الليلي..
- اقولك حاجة راجلك العامل زي فنطاز الجاز داك قاعد يشوف فينا
وإن بقا اللبع قام ماني قادر عليهو... دحين خليني اللمشي ارقص مع خالتي سكينة دي
- (ضاحكة) يا زول راجلي شباب وروحو شباب ما تقعد تزوق..
- انتو مالكم شيتكم كله كتور كدي
- (تضحك لامن دمعت) ياخي لا شيتنا كتور لا شيتين بس نحن بناتنا مربنهن على الصراحي
ونحن حسينا انها مايللاك وقلنا انت صاحب عوض وهو يشكر فيك وخالتك سكينة تشكر فيك
قلنا خلاص زيادة الخير خيرين... يا سحر تعالي جنبنا هنا..
... يا سيدي الحسن تنجدني..
البنيي جات تمشي بي مهلي... والله سمحي سماحةً تحرق في المصارين وعيونها غلاد وحواجبينا علي الهلال
وصديرها يعوم قداما زي الوزين.. وخصيرا يمين أصغر من السبلوقة.. أما إن كان لي الرجلين متمسحان زي
مِرِق العرِش أليل الأُوّض...والكفين شكلهن ناعمات بس حلاوة قطن.. والشي التاني ماني قادر أوصفه..
يمين ريقي نشف وقعدت أبلع فيهو تقول متغدي تركين ومتعشي فسيخ...
جسمي بقى يرجف زي المورود(الحمى) ورجليني بقن ينطاقشن علي ضنب الضب وعيوني اتلصقن
في نص راسي بس بقيت زي القعويي(القعونجة).. وصوف جلدي كله قام بس أبو القنفذ..
- سلام يا دكتور...
يمين غلبني أرد وأحناكي بقن يكركبن زي الهبابة ولساني تقل تقول هاجرنو بي عتلة..
أهلا.. دكتور شنو ياخي نحن يا دوب في الأرانب... كيف...
- والله تمام.. عقبالك إن شاء الله
- وعقبالك كمان... أنا لسة بعيد
- مافي حاجة بعيدة
يا ربي أنا هسا أقبل وين... يمين الغنا في حِتي وانا رقصي في حِتي.. اشتر كله كله..
- اجازتك طويلة...
- والله زي تلاتة شهور كدة..
- وحا تقضيها كيف..
- والله حا اشوف البناي وبرنامجه كيف..
- تاني حا ترجع للبنا...
أها قمنا لي حركات الحناكيش...

(19)
والله يا بت الناس أنا ماني عندي شيتا أسويهو غير البنا..
- ياخي انت راجل دكتور بُنا شنو العليك..
- ما قلنا شي علي أنا لازم اشتغل فشان أرتب حاجاتي واطلع مصاريفي وكدي..
- عجيبة.. المهم عايزين نشوفك في الاجازة دي
- إن شاء الله بنتقابل...
- خالتي سكينة: هيا طارق انت بي هني وانا افتش فيك
حمدتك يا مالك روحي... جيتي في وكتك يا خالتي.. أماني ما كنت مزرزرلي جنس زرزير..
- بعد إذنك بس أشوف الخالة عايزة شنو
... يمين البنية لوّت بوزها شبرين وكان في طريقي كانت رصصت أم عوض دي
- انت يا ابن الهرمة انا خرماني وانت اتاريك غاتس هني بين البنوت...
وتتلوى وتترقص علي الدابي..
- بنوت شنو وحاتك جيتي مرقتيني من خازوقا الله لا يوريك ليه..
- الرسول آآولدي ما تغتس مع أخوك دة.. والبنيي حلاتا..
- هسا إنت في السفي ولا في الغتسي عاملة شلاليفك زي غِتيات الكوريي كدي
- (ضاحكة).. بري بري يا ولدي شوفلي سفي
- ليه حق عم عبد الله يعرس فوقك انت مسوياها صعوط وهجيج
- إي عمك مطرطش وحا يقعد يربي في البُطان لامن يموت..
دحين شوفلي سفي وخلي كلامك المسيخ دة...
- مسيخ شنو.. بقيتي تكشفي كمان..
انطلقتي علي كُبرِك.. انت دحين قبُل دة أُمِك ما سِكرَت..
- أيي (ضاحكة).. أيي يا ولدي جدك مُحُمَد كان خاتيلو قزازي ألت شري تحت الازيار
ومعاها كم قزازيي ألت بيرة الجمل...
جن هي وعمتي ستنور قدرها كدي وقالن يضوقن الشي دة.. وكبايي وراء كبايي
لامن طشمن ورقدن خَل وانبطحن في الرملة..
قامت عمتي سألتها: انت يا الزهرة نحن وين
قامت ردت عليها: إنت نحن وين ولا نحن ذاتنا مِنِنْ (من نحن)
واللذيذ يا ولدي عمتي كان عندها شافع ترضع فيهو قامت قلبتو بي
صُلبو وعايزة ترضعوا وقالت لي أُمي: إنت الولد دة مالو شلاليفو بقن كبار كدي
- (ميتة من الضحك) الله يرحمن.. كدي قوم شوفلي سفي أنا خلاص اتكهربت
شفتلي سفي وغمتها بيها ومشيت اهجج مع عوض
وفجأة قام أبو عوض قال: يا جماعة كتر خيركم وربنا يجمعنا في ساعة خير
- شرفتو كتير والله
- جات خالة العروس: يا جماعة ما بدري
- لا والله نمشي والليلة نحن ذاتو ساهرنا
- شرفتونا والله.. حبابكم عشرة
ونحن طالعين علي عرباتنا جرتني خالة المرة من يدي:
- انت وعوض ما تقعدوا
- عوض كان داير يقعد أليقعد علي أنا أبوي بيكون هسا شايلوا
كلاشنكوف ومنتظرني.. دحين هو إن بقا داير يقعد خليهو
... عوض حمر لي واعتذرلهم..
- خلاص انت وعوض تجو تفطروا معانا يوم الجمعة الجايي
- إن شاء الله
بيني وبينكم اتلفتَ وشفت في البنيي... يمين قمرة في العمارات
الشعر أسود يقول يا ليل.. والفستان الأحمر ملصقلو في جسم
زي القمردين.. والعيون وااارمادي والتراب في خشمي أنا من العيون..
انعل ابوك يا الامتداد بس برضو بنحبك..
شفتها وشافتني...
ومشينا لي بيوتنا...

(20)
رجعنا لي بيوتنا وخيلان عوض واعمامو كل زول مشى علي بيتو...
- عوض: اسمع اقلع هدومك وتعالي نتونس برة..
- كويس كدي نشوف الجو كيفن لا جوة وبطلعلك..
دخلت لقيت جبيرين منقطر في سريرو وخالف رجلينو تقول شِعب ألات كَرِقِي (عيدان الراكوبة)
والرادي تحتو تلعلع فيهو مذيعة اسمها المدفعجي من لندن.. وانا خايف من مدافع كلامه ارمش في عيوني..
- أها مشيتو لي خطوبة الجن دي..
- أيوة.. (ماني قادر ازيد كلمي تاني يقوم يهيج فوقي لا ايدي لا كراعي.. عوض يخطب وانا اتزرزر)
- والله مسخرة وشغل نسوان وكلام فارغ وعمك عبد الله ذاته مطرطش
-......
دخلتلي في سروال وعراقي ومرقت علي عوض..
وقعدنا في الحجرين القدام البيوت... ياهم مكانا المفضل من زمن بعيد..
- هسا اليشوفك هسا ما يشوفك قبيل..
- ليه...
- قبيل مهندم وعندك قيمي شوف هسا بي بنطلونك المقطع دة لاهو لامي ردا ولاهو بنطلون
وفنيلة الحمالات المقدقدة علي سلك كفاي الجداد كدي...
- (يضحك) ياخي هسا نحن في شنو وانت في شنو..
- شنو تاني كمان خطوبة وخطبت وورطني سبعين ورطي... شنو تاني...
- هسا الجمعة الجاية كيف؟
- لا جمعة ولا خميس تموت موتك يا ابو الشباب... انا عايز اشوف البنا عشان نبدأ ندور تاني
- أها وبعداك..
- بعداك امشي اشوف قرايتي كمان..
- انت ما عايز تقعد مع سحر لي؟؟
- أها يا مرسال الشوق... شوف يا عوض انت عارف رايي كويس في الحتة دي..
انا لاني فاضي لي حب ولاني قادر علي خطوبة والأيام دي اسمع نصيحتي
إن بقيت لاقيت عمك جبيرين لا تكتر معاهو الكلام شي..
- ياخي والله البت حلوة وشكلها بتريدك والناس ديل ناس كويسين...
- (غلبني أقوله سمحة لامن تخلي الزول يتقلَّم حتت حتت).. ما قلنا شي.. انت الناس
ديل العاجبهم فينا شنو... لانا زينين متل الناس ولا اهلنا منغنغين... شي يحير..
- ياخي يضع سره في أضعف خلقه..
- إيي سر شنو إنت باقيلي بوم... هسا نحن سرنا شنو؟؟ اماتنا مقابلات الصيجان
ليلِن ونهارِن... وابهاتنا يعافروا من تصبح لامن تشرق وياهو قدح القراصي
وصحن الفول ولامن يقدحولنا بيض زي العندنا كرامي... نقرب نزغرد.. تقولي سِر...
- ياخي بي حالتنا البنيات عايزاتننا وراقدات خل... انت بس باركها وبتتعدل..
- عوض... انت باقيلي جنيت... انا جنس شيتك دا آآبسوي... يمين جبيرين علي
يطردني من البيت وانت بيتكم مافيهو محل لي إبري... وقتين داك أقبل وين انا...
- ياخي هي قالت بس نفسها تقعد معاك وتتونس معاك... لاها دايري خطوبي
لا شيتين.. وهي عارفاك سنيح وراسك دمق... دحين ياخي اجبر بي خاطرها بس
- انتو باقيلي حددتولي اعرسها متين... اتاريهو ضحكك القبيل عندو معني
وانا اقول عوض مالو يتبسم لا قعر اضانو...
- والله الكلام دة من زمان بس انت عامل اضان الحامل طرشة...
- عوض اقولك شي قوم نوم واحلم زي ماك عايز... انا خلني ماني وش نعمي..
وانت اصبر ساكت علي الراجيك...

(21)
أصبحت يا الحبيبين ومشيت قفرت البناي ولقيتو شغال في أركويت..
ظبطنا أمورنا وبدينا الهركي من جديد....
يوم الخميس بالمساء جاني عوض ومشينا نظبط بوشنا مع بُطان الحلة..
ضربنا زين لامن إتنْبَلنا وبقينا ندشى وجينا لي حجارنا قدام البيت..
- هسا بكرة كيف..
- يا اخوي هوي انا الاسبوع كله شغال سهرات وعضامي قايمات علي
دحين تمشي براك وتشوف نسابتك ديل... الله يسهلَك..
- يا طارق انت عارفني ما بقدر امشي براي ياخي كدي عليك الله باركها..
- مالك... مطهَر... ولا فوقك الوِرْدي (الحمى)...
- ياخي بس امشي معاي بكرة وانت معزوم وتاني ما تمشي...
-هسا يا عوض البت دي حا تعرسها متين...
- ما عارف لكن ما اكتر من خمسة ستة سنوات..
- هاالله هالله... باقيلي ابوك ود الجبل وماني عارف
- ياخي انت عارف بكرة حا يحصل شنو...
- ماني عارف بس عارف الله ما شافوا بس عرفوا بالعقل...
اقولك شي قوم نوم والله يعدلك خطوتك..
- بكرة بصحيك فجر...
مشيت علي عنقريبي لقيت ملايتو تهبهب وحاتكم صليت العشاء بس
وانبطحت عضامي يطقطقن وكلي مملخ..
.................
فجُر عوض جاني ناطي وشايل كبابي الشوب بي لبنا مقنَنْ ومعاهو اللقيمات
- بدينا في الرشاوي
- ياخي كدي قوم استحمى وباركها
ضربنا شاينا وقعدنا نتونس شويي وبيني وبينكم حنني عوض شديد..
شكله كدي ماهو قادر يمشي براهو ومهضلم تقول ماسكو الهيم (مرض يصيب الدجاج)
.. اتهندمنا وسرقنالنا ريحي من عمكم جبيرين ومشينا...
وصلنا جنب الباب وعوض قلبو يضرب تل تل تل وعرقو يخر
- انت مالك ضارب الجرسي من هسي
- يا طارق عليك الله روق وجوة لا تهضرب شي
ضربنا الجرس... ترن ترن ترن ترن
جا السواق فتحلنا الباب...
اتفضلوا اتفضلوا... دخلنا..
لقينالكم ابو البنيي قاعدلو في كرسي مهيل كدي في السِعْدي (النجيلة)
لابسلو ردا وفنيلة حمالات وكرشوا ناصلي من الفنيلة
ومدلدلة فوق الردا زي البخسة...وقاعد يقرالو في جريدي...
والخرابة تقول مزرّعلوا فتريتة في صدرو وتحت يدينو...
الشعر قايم احمر احمر في الصدر وتحت يدينو تقول قاعد يحننوا...
اخدنالنا قعدتاً جنبوا وهو يسأل في عوض وعوض مدنقر كأنه في امتحان شفوي...
جات أم البنيي... صلاتي علي محمد.. المساير يلمعِن والشبشِب تستخسر عليه
المشي في التراب... مرتاً سمحي ومهندمة... ماها طبوج...
- اهلا يا شباب اتفضلوا تعالوا لي جوة..
عوض لكزني: ياخي اتنحنح ولا صفق قبل ما تخش
- اييي نخنيح شنو اصلي داخلي مستراح... بعدين المرة قالت اتفضلوا
دخلنا علي صالة كدي ريحة البخور فيها تقول يا ليل
البت الشغالة شايلالها بطانيي تشهيك البرد
- معليش يا شباب حبوبتكم كانت راقدة هنا وقالت عندها حمى
... اريتها حمتي كان دي بطانية حبوبتنا... تعالي شوفي بطاطين ناس عوض
إن غتت رجليك ما تغتي راسك تقول ضاربها شيطان وريحة الكركار تدقشك
من خشم الباب...
... وفجأة تظهر جكسوية عوض... قادر الله.. الشعر فايت نص الضهر
... سلمت علينا بي يدين يمين زي حلاوة قطن مرطبة وناعمة...
- كيف يا شباب... اهلا يا دكتور...
- والله تمام والحمد لله
- ماما نسيتي البريل كريم حقك والأتريكس
البريل كريم عرفناهو.... علي الأتريكس دة يطرشنا....
- هي امك بتستعمل بريل كريم....
- أيوة عشان ما تجيها قشرة...
- قادر الله.... جملة الإيمان خالتي سكينة إن بقوا حكولها راسها بي منجل
القشرة تملالها كوريي...
... من العيد للعيد تقعدلها يومين في سوات الكركار
وترسل لي حسنة بت خليل عشان تمشطها... والخرابة غيليدي
تختلا تلات مخدات وتقعد فيهن وتهجر خالتي سكينة تحتها وكوريي فيها كركار
وقشر ليمون في الطربيزة وكوز الموية الكبير داك موهط
وبي سلك كدي تبعبص في راس ام عوض من تصبح لا عند المغرب
وما تخليلا مرة ما تقطع فوقها حتاً تكمل... وخالتي سكينة تسمع فيها وتقولها:
قبيل أنا أم النصر لامن مشيت عزيتها في أمها وأبت تشيل معاي الفاتحي قالت ما جيتها
في ود عمتها... أها هسا تكيل الرماد فوق راسها مافي زول بيجيها...
- لكن هي ماها طالباكي خمسين قرش في طهور مصطفى...
- برسِلن ليها مع فخرتاج... إييييي خوتها تطير...
ولامن ينتهن من مشاطن وقطيعتن.. وتشوف خالتي سكينة لافة المساير تحت أضانا
تحلف تقول سماعة كمبيوتر وشغالها بيها شات في الهوت ميل...
... سبحان الله شي شغال بريل كريم وشي كركار والدنيا كدي ماشي وكدي ماشي
وعوض يقولي يضع سره في أضعف خلقه... الأم بي بريل كريمها ويقولي سره...
... إيييي سر شنو...
... وفجأة تظهر سحر.... واااااااااااااااااااااضيقي أنا..

(22)
يمين يا الحبيبين البت سمحة سماحتا تخلي الزول بي ريالتو يلغلغ...
حاجبين زي البسطونة لامن يتنوها... العيون... نان هن عيون نصاح...
الجفون ليهن تنيي كدي ونعسانة موش زي ألاتي مدلدلات علي لِبدة الحمار كدي أكرمكم الله..
الرموش بالله زي جريد التَمْرة لامن تبقى رويانة... هسا دي رموش وألات عوض المتل شرا القندول ديل رموش؟؟
الشفايف مبسَمِن يمين تقيسو بالمل... وين لي شفايف خالتي سكينة زي الطُباقة من سف التُنباك..
ولا شلاليف عوض علي البزِديق (الدُلقان البيمسحوبوا الصاج)...
البنيي النخرة تقول شاحداها.. والفتحات ألاتها يمين البينسة يا دوب تدخل فيهن...
شفت فيها وفي نخرين عوض والصوف مارق منهن علي حفرة الدخان وعيدان الطلح مارقات منها...
استغفرتك يا مالك روحي... البت دي العاجبها في الزول دة شنو...
الرقبة تحلف يمين تقول مواسنها زي الحيطة لامن تتبيض....
يمين عِرقا ظاهر فيها مافي... موش زي ألت عوض عروقها ناطات تقول ضاربنه بي مقشاشة..
الصدير قدامها زي الوزين... والخصر يمين قرب يكون مافي كله كله...
أنا لامن وصلت لي رجلينا تحت... ريقي نشف وشلاليفي انشققن زي شقيق البرد داك...
وبقيت أبلع في ريقي... وارطب في شلاليفي بي لساني....
يمين اصابع رجلينها تقول مواسنهن بي قرقارة الأسود ديك...
وعاملالها هلال أبيض بالمنكير في راس ضفرينها بس هلال رمضان... إن شفتو في ضُلمي تقوم تصوم طوالي...
شايلالها صينيي ألت قزاز وفيها كبايتين ألات عصير منقة... يمين الكبابي مبعجات من هِني وهِني
وعاملات زي جنيفير لوبيز في حفل الأوسكار....
أما إن كان للأصابع الشايلة الصينيي... يمين منفخات زي القرقوش لامن يَخَمّر قبل ما يدخلوهو الفُرُن....
يمين أصابعينا دي إن قمعوها بي حِنيي تحلف تقول أم راس (البلح لامن يبدأ ينجض من راسو)...
- سلام يا شباب...
- اتفضل يا دكتور...
الدكترة تطير إن شاء الله...
... أنا هسا أبكي..
... ولا أكورك...
... ولا أعوعي رسمي...
وااااااااااا ضيقي.... وااااااااااا ضيقي.... وااااااااااا ضيقي....
يا سيدي الحسن تنجدني....

(23)
سحر قدمتلنا المنقي.. وسلمت علينا في يدينا...
جملة الايمان أنا لامن دقشت ايدي ايدها زي الضربني ماس...
عوض وبنيتو ابتسمولم ابتسامتا خبيثي كدي... والبنيي جات اتوهططلها في كرسي جنبي...
يمين زي الأبكم... الربريب كله طارلي في راسي.... وجسمي سخن وبقيت كلي ماشي مويي..
شويتين جات الام ومعاها الحبُوبَة... يمين الحبُوبَة باست عوض في جضومه العلي السعِن الناشف داك...
- كيفنكم يا الحبيبين..
- الحمد لله بخير...
- ناس امك كيفنهن يا عوض
- الحمد لله يا حاجة كويسين ما عندهم عوجة
- مالك ما جبتهم معاك
- والله مشغولين شويي... ايي مشغولين شنو... البلتون داك الداير يشيلو يجيبو شنو...
جكس عوض لابسالها فستاناً بصلي كدي فيهو خطوط حمراء خفيفة كدي
والشعر يلمع لاماهو لي وراء بي شيتا احمر كدي فيهو ورود... اذا كانت الام بتستعمل بريل كريم...
لازم البنيات بيستعملن شيتاً عمرنا ما سمعناهو...
الاضافرين راسن اخضر والباقي احمر علي البتيخي لامن يشقوها لي اتنين...
بيني وبينكم انا بقيت قاعد زي المعْسَم وعندي قطيعي لاني قادر اتلفت اشوف في سحر
ولاني قادر اشوف في عوض وبنيتو... يمين العوارة الفي الدنيا كلها جاتني في الوكت داك..
عاينت للصالة القدامنا ملياني زهريات وشِدَرا غريب غريب.. وواحدا ماشي مع الحيوط..
أنا من ولدوني غير النيم وصباح الخير والتَمُر والبرسيم آآبعرفلي شِدَر تاني...
دنقرت سرقتلي شوفي في رجلين سحر...
صلاتي علي محمد بالله جرحايي بالغلط ماها في والسفنجة حقتهم ذاتها مختلفي
يمين عاملي زي حلاوة لَكُوم...
-عوض بي خباثي: طارق انت نسيت لسانك في الامتداد ولا شنو...
- عوض اخطاني انا ان بقيت انفتحت تاني آآبسكت..
-سحر: أُخد راحتك يا دكتور....
- ياخي انت مالك شابكاني دكتور دكتور... نحن يا دوب في الأرانب...
- شنو يا دكتور التواضع دة كله...
- ابدا...
اتشجعت ولفيت واختلي شوفي في وجيها زي القمر في عز الصيف...
يمين عيوني قربن يقعاً في حجري من شدة البنيي دي...
خصلة من شعرها نازلة بين عيونها يمين زي الصبيطي مختوتة في مرتبة ألت قطن منجدي جديدي
وأصلو إن كان لي قلبي يمين قرب يمرق عندها عديل...
الله لا تكسبك يا عوض... انا ماني قادر على الجهجهة دي.... شكيتك علي الله..
- بديت برنامجك يا دكتور..
- والله الحمد لله شغالين في أركويت الأيام دي
- لكن غايتو ناس عجيبين خلاص... طلبة جامعيين وشغالين طُلب...
- ما تخافي ما قاعدين ناكل الناس...
البت دي ضحكت لامن دموعها نزلن... يمين السنون مرصوصات وبُيُض علي غتيات أقلام الشيني..
ولامن ختت يدينها في وشها وصديرها طلع لااافوق... يمين اتشحتفتلي جنس شحتفتا بس زي الغرقان...
اليدين مليانات ومنديات بس تقول لقِيمَات ...
من الله خلقني ما شفتلي كيعان (جمع كوع) ناعمات وملس زي ديل... موش زي ألاتي مسودات ومقشرات
زي البُلطي قبُل ما ينضفوهو...
- بالغتة يا دكترة ما للدرجة دي...
ربكم رب الخير دخلت خالة البنيي ومعاها ويحيدتا مغتغتي من صوف راسها لي كرعينها... أسود في أسود
مافي شيتا فيها ظاهر غير عيونها علي التمساح لامن يكون مطلع عيونه فوق المويي... ومنزلالا قماشاً
أسود كدي من راسها لي عند كتفينا علي الشملي ألت الدخان... يا سيدي الحسن.... إييي دة شنو دة...
خالة البنيي سلمت علينا وقعدت...
- الزولة المغتغتة: معليش يا جماعة أنا لا أُصافح الرجال...
- منو القالك نحن رجال
- يمين الناس ديل بقو يزحوا من الضحك..
- دة كلام شنو يا دكتور
- ياخي نحن بُطان مانا رُجال....

(24)
ماني عارف... بس أنا باقيلي الناس ديل شايفننا أرقوزات...
اتونست معانا خالة البنية ودخلت لا جوة...
انا فشان اتفكى من الزرزير وقعتلي الخرابة المغتغتة دي في جرح...
وبيني وبينكم أنا عايز احاججها لامن الفطور يطلع ونمرق سالمين من هِني...
- هسا إنت شايفة سلامك لينا حرام...
- يعني غير مستحب...
- شوفي أنا ماني الشعراوي... بس أفشوا السلام بينكم...
- دة حديث في غير موضعه...
- إييي موضع شنو... سلام عليكم وحق الله بق الله دايرة تدخلك جهنم..
- ياخي انت بتبسط الأشياء بشكل غريب ومن غير أسانيد...
- ياخي ما تقعدي تحوقصي شي... وتمرقيلنا في الكلام الغلاد دة..
دحين سلامك علينا لاهو داير يغنينا ولاهو بيدخلك مع أبو لهب...
- شوف الجمعة الجاية إن شاء الله نخصصها للنقاش دة...
- يا سيدي الحسن هي فيها جمعة جاييي... أخير زرزيرنا...
جملة الإيمان عوض دة فقعلو ضحكة سنيني زي طير السُقدِي لامن صنا أضاني...
- يا طارق ياخي انت ما عندك منطق...
- إييي منطق شنو... يا سحر عليك الله هَوِّينا وعوض صاحبي دة إن بقى جاع شديد
يمين بطنو تقعد تكورك واغ ويغ بس الشافع الماسكلو حنبوكة يبعبص فيها...
دحين أمك دي شايفلي نسوان منفخات كدي دخلن معاها لي جوة لا يبقى حَتَّلَن اللحم الفي الحلة كله...
- (ضاحكة بشدة) يا دكتور ما تخاف إنت بس تأمر وكل العايزو بنعملوا ليك...
إنتو نظامكم كيف في الفطور... يعني سلطة أول وبعداك المين دش...
- المين دش... قادر الله... شوفي يا بت الحلال هِن أصلهن صنفين مافي غيرِن..
إما قراصي وحولينا بصلا أخدر... وتسمعي في القَرَشي: كُرُم كُرُم... قرَش قرَش علي عجلات القطر
لامن السكة تكون ملياني رملة والعجلات يضرُسن فيها...
وكمان إن بقى فول بي زيتو تسمعي في الجلَق جُلُغ جلَق جُلُغ بس متل الدلو لامن يقع في البير....
تقومي تقوليلي المين دش...
والله يا الحبان البت دي ضحكتلها جنس ضحكا يمين دموعها جرن... والله بسألني
الدمعايي تنقط زي عسل خشم القربة لامن يصفوهو... موش زي دموع عوض زي اللبخة
لامن تقطعلك منها وَرَقي...
- خلاص يا دكترة نستعجل الفطور وبعدين نتونس...
- أنا الونسة دي ياها ذاتا الخايف منها...
- كيف...
- لا مافي شي، بس شوفيلنا الفطور دة...
اخدنالنا حنكين مع جكس عوض ونادونا للصُفرة....
عوض جكسيهو ساقو من يده وقدمو وانا خالة البنيي جات مسكتني من يدي:
- إنت البنات ديل كنت بتقولهن في شنو لامن جن يضحكن كدي
- والله ونسة عادية...
دخلنا يا الحبات على الصفرة ... قادر الله... دة الكلام... الطربيزة ملياني...
في الأطراف كدي صحانة صغار كدي علي صفق المنقة فيهن زيتون أسود وشيتا
أبيض ملولو كدي علي عِمَمْ سواقين اللواري قالوا اسمه الجبنة المضفرة... وبيناتن
صحانة فيهن سلطة خضراء وفي الاطراف سُباتة فيهن العيش... وفي النص لحمة
مكبورة وتلاتة سراويس مليانات شيي من الله خلقني ما شفت زيها... لحما مدخلنوا
في عيدات ألات خشب كدي وزانقنه في بعضو بي بصل كدي بس رُكاب قطر كريمة
في الدرجة التالتة وشنط المنقة والبلح بيناتم... صلاتي علي محمد... المهم شي سلطة أسود
وحاجات تاني لي هسا ماني عارفها شنو...
أول ما قعدنا عشان ناكل عوض شال ليهو زيتونة وعاين لي وضحك... خالة البنيي حلفت
إلا تعرف عوض ضحك ليه... قام قالها خلي طارق يحكيلك...
- شكيتك علي الله... أنا عارف نفسي جيت معاك أرقوز... شوفوا يا الحبان
عندي عمة لي اسمها أم الخير كان عندها ولد بيحضر برة لمن جاء جاب معاهو زيتون...
قامت عمتي قالتلو: مُحومد إنت دة شنو المُر دة...
- يمة دة الزيتون أكل أهل الجنة...
- نان بعدين واااحناضلنا...
كأنها ضمنت الجنة خلاص...

(25)
ضربنا يا الحبان الوليمي الزيني دي...
رجعنا تاني للاوضة الكنا قاعدين فيها...
وجابوا الشاي وريحة القرفة والهبهان ما تديك الدرب...
عوض قالهم طارق ما قاعد يشرب شاي... جابولي كبايي ألت عصير منقي..
راس الكبايي فيهو شيتا محَترَب كدي وملون علي الصنفرة... وأنا بشرب في العصير
أختلي منه ضُوقي فيه.. لقيتو سكر... قادر الله... ودة ضرضروهو في زيق الكُبايي دي كيفن ماني عارف..
- خالة البنيي: يا طارق البنات ديل قالن انتو اكلكم مختلف عن حقنا...
- إييي أكل شنو... هو نحن عايشين.... نحن مانا في كله كله.... جملة الإيمان نحن مانا عايشين... النبي فوقك خليني ساكت
- كيف ياخي انا مشيت شفت بيوتكم وعيشتكم والله زي العجب...
- نحمد الله... نحن نقدر نقول شي غير نحمد الله...
الغايزني وفاقع مرارتي عوض قاعد يتونس تحت تحت مع جكسيهو... ومرة مرة تضربو في يدو
الزول الدُمق دة قاعد يقولها في شنو ولا العاجبها فيهو شنو... شئ يعلم به الله...
شويي جات داخلة الخرابة المغتغتي ديك... والله يا الحبان عندها أكل غريب خلاص
تشيل اللُقمي وتدخلها من تحت (الشملي) الدارعاها فوق راسها وتاكل... يمين بس فيل...
- السلام عليكم
- أنا ما برد على النسوان....
النسوَّان ديل انفقعن ضحك...
- ياخي أنا قلت ليك الجمعة الجاية بنتناقش..
- يا زولة هوووي أنا ماني فاضي لي جنس حديثك دة وحاجة واحدة العارفها... الدين يسر وبس..
أم البنيي اتوهططلها في كرسي مطرف بعيد كدي وتشوف فينا... باقيلي عندها فهم
ولا كمان مستغربة في بتها البتحب الطُلبة دة...
شويتين الحريم شربن شاين وبدن ينزرقن لا جوة واحدة وراء التانية...
جكس عوض قامت وقالت لي عوض تعال عايزاك ودخلوا لا جوة...
- خالة البني: عن اذنك يا دكتور عندي قطيعة مع اختي دي... اتونس مع سحر دي بجيكم هسا...
- سمح.... يا ود الكرسني...
البنيي صنقرتلها في كرسي قدامي وما خلتلي طريقي لا أتلفت هني لا هني... وحاتكم بقيت زي البتفرجلي في
كورة تنس عيوني يمشن لي قعر الأوضة من اليمين ويرجعن تاني للشمال ووقتين اقابل عيونها في النص لامن أتنهد..
- شنو يا دكترة إنت حا تسكت كدة كتير..
- ياخي هي ونستي شن طعمها.... أنا كل البعرفه الطوب والأسمنت والرملة وهسا كمان الأرانب والجداد والبقر..
- ممكن أسألك سؤال؟؟؟
- أتفضلي...
- إنت مرتبط...
يا ود حسونة تفكني الليلي...
- طيب خليني اعكس السؤال إنت مرتبطة؟؟؟
- لا... ليه؟؟؟
- يمين أولاد أهلك ديل الكتاحة في خشمهم...
- ليه يعني؟؟؟
- يعني أنت زولة سمحة وفيك كل المواصفات الممكن يتمناها أي راجل وأولاد أهلك ديل ما شاء الله مرتاحين
يعني ما ناقصهم إلا يفاتحوك... و...
- يعني إنت ما مهم عندك أنا أكون عايزة واحد من أولاد أهلي ولا لا....
- لا طبعا دة حقك... بس الله عرفوهو بالعقل..
- ياخي أنا من حقي اختار الزول الانا عايزة اعيش معاهو حياتي ولا شنو
- أكيد .. أكيد...
- بس أنت ما جاوبتني..
- والله أنا ما مرتبط... في حالتنا دي الارتباط صعب جدا...
- ليه يعني إنت فرقك من عوض شنو؟؟؟
- مافي أي فرق.. الظروف ياها نفسها... بس عوض مقامر شوية...
- يعني إنت ما مقتنع بالخطوة العملها ولا شنو...
- شوفي عوض بيحب أختك شديد.. وشايف إنه حياته كلها متوقفة على قصة نجاح حبهم
وهو اتصرف على هذا الأساس... بس أنا شايف الطريق طويل وظروف عوض تختلف تماما
عن ظروفكم هنا... ياخي نحن عندنا حِلِم واحد من ولدونا... نقرأ ونتخرج ونشتغل عشان نشيل أهلنا...
- ما ممكن تعملوا الاتنين مع بعض...
- صعب... صعب شديد...
يمين يا الحبان البت دي عيونها فيها كمية من الحزن تحير عديل...
- يعني انت ما عندك عزيمة عوض
- أنا اختلافي مع عوض... انا بشوف الواقع وببني عليهو حاجاتي..
والله يا الزينين بقيت كلي ماشي موية رغم انه صوت المكيف مالي الدنيا...
والبنيي القدامي دي وحات الله الما يريدها يبقى غبيان... علي العقل
بيقول الريدي دي محكوم عليها بالموت... ماني عايز اتشعلق زي صاحبي...
- دقيقة وبرجع ليك..
البت جات شايلالي منديلا سمح كدي ومطرز: من زمان كان نفسي أديك المنديل... وما تسألني ليه..
والله يا الحبان وقفت علي طولي وشلت المنديل منها وعيوني جن في عيونها...
وحاتكم كنت عايز اكورك باعلى صوت عندي: وووووووب ... وووووووب... ووووووووبين علي...
(26)
حبابكم يا الزينين...
يمين يا الحبان مسكت المنديل دة بين يديني وكضمت الكضمي الياها....
- دكتور مالك ساكت كدة...
- لا أبدا...
وحاتكم الكلام أبى يطلع كله كله بس زي معجون أبو صفقة داك لامن يكمل
وتقعد تعصر فيه فشان تتسوك وأصابعينك لامن يورَمِن
وما تقدر تطلع منو حِتايي وفي النهايي تحك الفرشي في الصابوني البيضة بتاعة الغسيل ديك وتتم سويكك..
جاء عوض داخل يتبسم ومعاهو جكسويتو... وتبعتم خالة البنيي...
- دنقرت علي عوض: قوماك نطلع من هِنيي...
-ليه مالك...
- ياخي قوماك وخلاص أنا إن بقيت زدتلي دقيقي هني حا أخطُب رسمي... دحين أمرقني من هِني...
ابن الهرمة عوض فقعلو ضحكي... بس خالة البنيي ما صدقت وجاتني وفي قعر أضاني:
- وصلت لااااا وييييييين يا دكتور....
- أنا لا وصلت ولاني عايش ولاني داير أعيش أنا داير أمشي لي أهلي وإن بقيت مُتة أخير...
- ضاحكة: كدي قول بسم الله مالك
- انتو بس خلوني أمرق من هِني وأنا ببقى كويس...
عوض قام علي حيلو وقالهم: يا جماعة الصلاة قربت ونحن يا دوب نصل عشان نصلي الجمعة
- سحر: ياخي السواق بيوصلكم ليه مستعجلين...
عوض ضحك وعاين لي لقاني مبَلِم وعرقي يخر وماسك المنديل وهاجرو في يديني
ومنطط عيوني علي حبوبة المطر (حشرة تظهر وقت الأمطار) وقالهم معليش نحن نمشي وبنجيكم تاني
أنا في سري قلتلو ما أظن لأنه إن بقيت جيت تاني هِني قدام سحر دي بمشي قاصد أبوي جبيرين رسمي....
- خالة البنيي: كدي دقيقة اختي عايزاك يا عوض...
أم البنيي جات شايلالا شيتا مغتغت كدي ومقصطر وقالت لي عوض دة شوية كعك وديهو لي ناس أمك...
قادر الله حتى كعكم ماهو ياهو... أليلنا يغتسوهو قبل العيد في جرادل طلس كدي والسكر مضرضر
فوقه علي الكوكايين ويرفعوهو فوق الفضية وبعد شهرين من العيد تلقاهو معتت ووكتين تاكل منه إن ما بقيت جريت فسراع
للمستراح يمين الإسهال يصل لي ركبتك زي الدكوة العاصرنلهم فيها ليموني ويكبسك الضبان الاخضر
داك وينوني فيك بس البقدونس في صحن سلطة الحُمص...
ودعناهم مع السلامة مع السلامة.... أنا لامن وصلت عند سحر غلبني النضمي كله كله...
وحاتكم ناقصاني الرِيالي رسمي... مديتلها يدي وسلمت عليها ولامن عيني جات في عيونها
كنت عايز اقولها: واااااااااااااااامغستي أنا... التراب في خشمي...
- طيب يا سحر مع السلامة وشكرا على الفطرة الحلوة دي
- طيب يا دكتور شرفتونا.... ممكن نشوفك تاني
- إن شاء الله...
- ضروري جدا خصوصا إجازتك قصيرة... بزعل لو ما شفناك تاني...
إنت تزعلي... أمال أنا أسوي شنو.... أنبطح في نص الظلط فشان يخفجني لوري...
ودعناهم وعوض أخدلو حنكين جنب الباب مع الجكس وأنا وقفت بعيد ولمحت سحر
في باب الصالة أشرت لي تودع فيني بي يدها وأنا هزيتلها راسي ورفعتلا يدي الشايلة
المنديل.... وعيني لي أبوها بي كرشو الغليدي ديك واقف جنب مرتو... يمين جِقِر
معرس فارة أم سيسي... لله في خلقه شؤؤن... حكم يعلم بها الله...
لامن وصلنا الظلط عوض شافني ماشي طوالي...
- ياخي الشمس مولعة إنت عايز تمشي كداري ولا شنو خلينا نركب ياخي
- شوف يا عوض لو عايز تركب أركب أنا ماني راكب
ختيت المنديل فوق راسي ومشيت ومن وراي عوض...

(27)
الزينين كيفنكم...
صلينا الجمعة في الطريق... ومن طلعت من هناك أصلي ما نطقتلي بي حرف...
أبيت أمشي للبيت دخلت مع عوض في بيتهم وفي برندة مطرفة كدي لقيتلي عنقريب
فيهو مخدة انبطحت فيهو وغتيت وشي بالمنديل ونمت....
صحيت علي صوت خالتي سكينة يصحي فيني: طارق قوم يا ولدي تتغدى
- خالتي سكينة النبي فوقك أنا لاني عايز اتغدى لاني عايز اتسمم خليني
- انتو اصلهن النسوان ديل عمللكن شنو لامن جيتو مقهومين كدي انت وصحبك
- ياخي موش تبيخك دة الفيهو لحمايي في نص الصحن علي قلب الدينمو... ماني دايرو
- (تضحك) الله لا تكسبك انت وصحبك... أمك (الله يرحمها) من قبيل بي راس الحيطة تسأل منك
ياخي أُكلَك لُقمي مع الناس... إنت العنقريب دة مالك ما جدعتلك فيهو لحاف شوف شرط ضهرك دة كيفن...
- خالتي خليني أنا عارف حُبال العنقريب خلت ضهري علي بسكويت العيد كله مشرط.. دحين خليني
أقولك شي.. إنتو لامن الناس كانوا بيلموا ويسوا في القروش ناس أبوي وعم عبد الله ديل كانوا وين؟؟
- (ميتة من الضحك) كانوا مبارين العِرِس والضلَلَة وكبابي الشاي والمريسي والعرقي..
والعجب لامن يكون في شي أليل حكومي تسمعُن: عاش أبو هاشم عاش أبو هاشم...
ومن الله خلقني ماني عارفي أبو هاشم والمريسي ديل يتلَمَن كيفن...
- يعني عوض ما جابوا من بعيد ياهو أليل أبوهو
- إنت باقيلي مشيت وِكِرتَ ذاتك
- وحاتك يا خالتي أنا الليلي هضربتلي جنس هضريب...
يمين البنيي علي وش اللبن ناعمي وتقولها في كلاما يدقشك في قلبك لامن يفقهو نصين...
- إيييي كان كدي خلني اللجر البَنبَر وأقعد جنبك
- إييي بَنبَر شنو... نان أنا أحكيلك ياتو ولا أخليلك ياتو...
- النبي يا ولدي خلاص ناوي تغتس مع أخوك...
- النيي في.. علي أنا ماني عوض... أنا إن بقيت غرقت وجاء واحدا لفحها مني بجن رسمي
- يا ولدي أصبرلي الشي دة دايرلو سَفِي من صعوط المحسي اليكهرب داك
- إنت لليلي في جنك دة ما دايري تخلي... أنا أقولك البنيي علي وش اللبن تقوليلي أشوفلي سَفِي..
- شوف الشناط الجنبك دة أصلي أنا مغزغزة أكياس الصعوط هِني وهِني علي
بيوت الزرازير فشان تكون قريبي مني وكتين أخدَر ألقاها جنبي...
- أديتها التمباك.... أنا يا خالتي البنيي نفيستي فيها لكن آبقدر على شيت عوض دة
دحين وحاتك جيت كداري من هناك أقلب فيهو بي هِني وهِني لقيتو ماهو لافق معاي
- إييي ديل نسوان قادرات إن بقيت نويت بيحصلنك زي أخوك
- ما بيبقى يمين جبيرين أقولو كدي علي يقع من طولو وأصلوا إن بقى لي أمي (رحمة الله عليها)
إن سمعت بالشي بتكضم كله كله.... والله ماني عارف أقبل وين...
- أييي يا ولدي أمك تقولها روحك وين تقولي عند طارق ما ياكا الحتالي...
والله يا ولدي طممت بطني بي شيتك دة أنا ذاتي الغداء ماني دايراهو
- هو غداك شنو طعمو... أنا غايتو ووااااااااااااااامغستي

(28)
أها يا الزينين ...
مشيت علي بيتنا لقيت الدنيي صاني...
الاتغدى اتغدى والاخدلو تكيي اتكى..
دخلت علي الصالون وفتحت الدولاب ماني عارف محل اخت المنديل وين...
غتستو وسط العراريق وبي كدي ضمان مافي زول حا يجي يلفحو...
لأنه القمصان بيتلفحِن... أخير العراريق مافي زول شغالبهن...
اخدتلي حمام ومشيت علي أمي (رحمها الله) في التُكُل لقيتها تحسب في قروش الختي (الصندوق)...
- كدي جيبلك ورقي وقلم تعال سجلي النسوان الدفعن من الما دفعن...
- والله يمة جننتينا بي ختتك دي....
- يا ولد أنا أصلي علمتك لي شنو...
- هسا انا قرايتي كلها لي ختتك دي... كان كدي القراييي تطير...
- (تضحك) عليك الله يا ولدي ما تكتر الحِجي... وخلي اللّت والعجِن دة..
- سمح...
- اكتب: أم النصر (رحمها الله) دفعت
حسنة مرت علي دفعت
خادم الله قالت بتجيبن بكرة باقي الأيام دي مزنوقي في عرس ولدها
بت حاج طه قالت لي دفعت وانا قلتلا لا كدي خلها لا بعدين لامن نحسب القروش
حاجة مدينة دفعت
- دي مالك ما نقنقتي فيها عشان صاحبتك
- أقولك شي أكتب وقوم شوف أصحابك علي برة ما تغلِبني..
- أها....
- اكتب: فطين (رحمها الله) يا ربي جابتن... أيي رسلتن قبيل مع البعيو
رقية بت أبنعوف دفعت
حواء بت الطريف دفعت
نفيسة السمحة قالت عندها أوضة زنكيها يكُب دايري تصلها لكن بتجيبن باكر
فاطنة الجعليي....
- هسا يمة إنت كان قريتي ما كان ريحتينا...
- يا ولدي الله لا تجعلها ندمِي أمي الله يرحمها حمتني... يمين إن كان قريت أبوك مافاضي فيهو...
- إيييي كيفن الكلام دة..
- أبوك وصل الوسطى مجننا... يمين إن كان قريت سلام الله ما أديهو ليهو....
- أريتك يمة كان قريتي... كان الليلي نجدتيني...
- مالك آآآوليدي... أوع تقولي عايز تغبا غبا عوض...
- لاني عايز أغبا لا شيتين.... أنا قلبي من بعد صلاة الجمعة حشيتو بي منجل...
- يا ولد إنت مالك وشك دة ما ياهو.... الفي شنو...
- يمة مافي شي... إنت يمة عرستي أبوي دة كيفن...
- إنت الليلي مالك ماك نصيح...
- عليك الله قولي... خصمتك بالنبي...
- يا ولدي كيفن تخصمني بالنبي... أبوك كان صاحب أخوي محمد (رحمه الله)
جاء قال عايزني... كلموني... بعد شهرين عقدولنا ومشيت قعدت معاهو عند ناس جدك
- يعني لا حب لا شيتين...
- إييي حباك برص حب شنو... في شهرين حق الله بق الله لقيت نفسي متزوجي...
- والله يمة سوري ليك يعني لكن حياتك ضايعي...
- هي ضاعت من هسي ياولدي... الله يغتيكم ويحفظكم شي تاني آآآبعرفوا...
- يا ولد إنت نضميك مالو كُتور... باقيلي حبيت عند نسابت عوض...
........
كضاب إن قلتلك لا... كضاب إن قلتلك البنيي ما بتتراد....
وحاتك يمة المغسي كاتلاني والعبرِي واقفالي في حلقي...
أنا عايز أعوعي رسمي...
ما بعرف ليه اتذكرت حبوبتي نفيسي بت بُغداد (رحمها الله)... كان العايزة تسوي... تسوي...
يوم في البركل نزلتها من فوق وقعدت وسط الرجال أندادها وقالتلي جيبلي سجاري
وأملالي الحُقي دي من دكان العوضابي... صعوطو سمح...
لامن جيت لقيت عم عوض السيد (الله يرحمه) ميت من الضحك: قُلتي كيفن آآنفيسي الله لا تكسبك
- قلتلك جيت مندَلي لا تحت ماشي أجيبلي برسيم للنعاج لقيت ود عمكم نازل سلمت عليهو وقلتلو:
إنت مرتك ماتت ليها سني بقيت تحد متل النسوان كمان...
ضحك قالي عندك لي عروس...
قلتلو: أنا مالي ماك شايفني ما بتعرَس (تضحك)...
- الله لا تكسبك... أها (يضحك).
- قالي تعرسيني يا نفيسي...
- قلتلو الكلام لا يبقى ضُراط... هسا بمشي أكلم أبوي بس بعدين لا تنط...
- الله يقلعك يا الخرابة... أها...
- قالي كلميهو... مشيت لقيت أبوي يحفرلو تحت تمرايي وقتلو:
يابة ود ناس الطيب قال دايرني دحين نجض معاهو الكلام بعد صلاة العشا وحديثك لا يبقى ني...
ضحك وقالي سمح... وأنا طالعي قابلت ود عمكم وقلتلو الكلام لا يبقى فسو ساكت أبوي كلمته..
- الخرابة أتاريك قاهري....
- والله يا عوض السيد أتاوق لي جية أبوي والعشي بقالي طويل خلاص... لامن جاء سألتو
قالي: الكلام طلع صِح أها شن قولك
وحاتك فقعتلي زغروتي لامن حسي إنقرش وعرستو ومليتلو البيت بُطان...
- الله يقلعك... قهرتيهو لامن مات....
- إيييي موتو أجلو... العرس ما قاعد يكتلو زول...
رحمة عليك يا نفيسي... هسا أنا إن بقيت سويت زيك كدي مالووووووو؟؟؟؟؟

(29)
يا الزينين كيفنكم ...
اصبحت الدنيي ورجعنا لي بُنانا والقلب إن بقينا باريناهو بيودينا الآخري...
اسبوعين كدي ونحن شغالين ملاطم هني وعرش هناك في هجيرتا لا تخليك تحب لا تخليك تفكر فيهو...
كل جمعة عوض يحنس فيني فشان أمشي معاهو... أسويلو الكلام شمار في مرقة...
- يا طارق ياخي بتبالغ والله...
- ليه...
- ياخي والله والله العمارات كلها منتظرة جيتك...
- مالي وزير التخطيط...
- ياخي عليك الله بطل مساخة... والله والله يا طارق أنا ما شفت لي زول هايم ومشتاق زي سحر...
- هي تهيم فوق شنو أنا لا قلتلا بريدك ولا هي قالتلي... دحين الهيمان في شنو...
- ياخي والله البت حالتها صعبة خلاص...
- يا زول إنت موش قلت يوم الأحد ماشي الشمالية لي عرس ود خالتك... أمشي قشة ما تعتر ليك..
- شنو إنت موش مواعدني تمشي معانا نطيت ولا شنو..
- ياخي دي قصة حا تجر شديد...
- ياخي أبوي حجز لينا عربية درجة تالتة كاملة وبعداك أنا وإنت نرجع معاهو بعد العرس طوالي..
- وكلمت البلوم ولا لا...
- كلمته وأنا الليلة ماشي أودعها عشان يوم الأحد حا نسافر...
- الله يعدل خطوتك... أنا خلني...
- أصلك مجنون من يومك....
.............
يوم السبت بالليل عم عبد الله كلم لي أبوي عشان ما يحرن وقالو: القطر الراجع بجيبو ليك في يدي...
دخلت لقيت خالتي سكينة وأخواتها شغالين يسوا في الزوادي...
شي بيض مسلوق وشي طعميي وقراصة متمري... تقول القيامي دايرة تقوم..
أصبحت الدنيي ولملمنا شنطنا وملينا البكاسي بي أهل عوض ومشينا علي المحطة...
لقينا عم عبد الله جهز التصاريح وقالنا شوي كدي و(صعلوق المحطة-راس القطر البيلملم العربات في المحطة)
يكمل القطر ونشوف العربيي الحاجزنها...
المهم يا الزينين جهزت العربيي ودخلنا الشنط والزوادات... غايتو ناسا بسيطين خلاص...
اللابسلو تموت تخلي والداخلو في سفنجي رابطها بي دباري...
وأتاري خالو المفلهم داك جايبلو معاهو فنان أليل طنبور...
يمين الناس ديل بس وهطوا عفشهم والفنان والجنى المعاهو بدوا ينقرشوا في الطنبور والطبلي..
بالله العربيي دي فارت والصفيق باقيلي وصل للقصر الجمهوري... وتسمع في أبشروا بالخير..
والزغاريت ما تديك الدرب... المحطة كلها تتفرج فوقنا وأهل عوض يرقصوا في عربيتهم ما هاميهم زول...
وجملة الأيمان الفنان لامن بدأ يغني: آه يا خلايا فجولي الأشوفا..
يمين خالات عوض ظبطا مسايرِن وفكا مشاطٍ وبقَن يرقُصَن من أول العربيي لامن يصلن آخرها والرجال يصفقوا
وينططوا معاهن... وأنا عيني لي خالتي سكينة لليلي ما اتكهربت شالتلها سفي وغمتتها تحت لسانها فشان ما يشوفها زول...
طلعت فوق الزير الفي آخر العربيي فشان أشوف كويس... وحاتكم لامن الفنان بدأ يغني:
الله إن جابك يا عشاي
جيبلي راس سكر وتمنة شاي
نصه للبنوت المعاي
نصه لي أمي حبيبة قساي
بلالي متين يجي آآآيمة
*****
الرسول يا ود عمتي
إن دُرتَ راحتي
إن دُر جمتي
رسل التسريح اللجي
بلالي متين يجي آآآيمة
يمين خالتي سكينة دي تقول ضربتها كهربة... شاتت سفنجها قربت تجيبها في وشي..
وبدت ترقص وتترتر من أول العربيي لي آخرها وتاني تقلب تجي صادي زي اللوري الوحلانلو في طين... يمين تترتر في رجلينا زي هبار الشرك... انهردتلها جنس انهرادي.. والفنان شغال:
نركب البيسابق الريح
نمشي في الخرطوم نستريح
الخدامة تسوي التبيخ
وكل جمعة نزور الضريح
بلالي متين يجي آآآيمة
*****
الرسول يمة البدايي
قولوا لامي ماني جايي
كنا نشرب لبن السعايي
بقينا نشرب لبن الشرايي
الميي بالماسورة جايي
تبيخنا في الحلة أم غتايي
بلالي متين يجي آآآيمة
الدنيا دي كلها هاصت وأمة محمد الفي المحطة دي كلها تشوف فينا....
وفجأة كان أشوفلك جكس عوض ومعاها سحر نزلهم السواق...
يا ود الكرسني...

(30)
يا الزينين كيفنكم ...
البنيات جن يفتشن علي العربيي ألت العرس...
عوض بعد ما كان يصفق مع الناس جرى فِرِد جريي علي باب العربيي لاقاهن وسلم عليهن...
- يا طارق.. طارق..
خالتي سكينة ضحكت وجات عندي وقالتلي قوم شوف الراجيك تحت..
- شفتو.. يحلني الله..
خليتها تضحك لا قعر اضانها وتقطع فيني مع أختها ونزلت...
- سلام يا شباب...
- يا دكترة كيفك..
- والله بخير لله الحمد...
- جكس عوض: شنو يا دكتور انت مخاصمنا مالك...
- أبدا والله بس مع الشغل...
- كدي نسلم علي الجماعة فوق وننزل نشوفك مالك ما عايز تجينا...
رفعت راسي لقيت اهل عوض كلهم مادين روسينهم من الشبابيك.. بس فلسطينيين في سجن إسرائيلي..
البنات سلمن ونزلن... عوض قال: كدي نتمشى لي قدام اصلو القطر متأخر...
- شفتو قطر كريمة عامل زي شيّتكم ديك...
- سحر (ضاحكة) ياخي انت عندك تشبيهات عجيبة خلاص
- الناس ياهم اللحم والطرود ياهو البصل المغزغز بينات اللحم... مو ياهو كدي...
والبطاطين أُمات كركار ديك الفي الكنبات ياهن الكتشب...
- عوض: إنت جنك دة أصلك ما بتخلي...
- أها سكتنا...
بعد عربيتين كدي لقينالكم جعليات لابسات ابيض ومحزمات في نصهن علي صفرجية الملك فاروق وشايلاتلهن
سيوف كدي وينقزن: يا سيد الحواشة... وكلاما كدي ماهو واضح...
قمت أنا قلت: إنتو القطر دة كله عرس ولا شنو.. لكن النسوان ديل مالهم رجالهم أبين شُنُبة محمرة زي سلك العدة
وكتين يصدي داك... مالهم ما قاعدين يبشروا... وشكلهم زعلانين كدي..
- عوض: طارق روق دة بكى ما عرس والنسوان ديل قاعدات يمنِحَن...
- إيه أنا والله قايلو عرس... ياخي دة بكى غريب خلاص...
يعني القطر دة إن بقيت داير تهجج فيهو تهيص.. وكمان إن بقيت محروقلك علي واحدا من أهلك تمشي كمان تفش مغستك
شويتين كان أشوفلك عوض وجكسيهو خابين مننا... يعني نحن حاقننهم...
مشيتلي علي عجلات قطر كدي جنب ماسورة وقعدت...
- سحر: شنو يا دكتور فتران ولا شنو... ممكن نقعد جنبك...
يا ود حسونة تمرقنا الليلي....
- وحات أمي مقلَّم رسمي بس عوض وخالتي سكينة ماهُن دايرين يخلوني...
- ياخي ما مجاملة وبتنتهي... على الأقل هم عندهم معزة عندك... موش زينا...
- ليه الغلط...
- ياخي أنا موش قلتليك عايزة أشوفك وبزعل لو ما شفتك.. يعني ما هببتو لي... عايزني أزعل موش كدة..
... تزعلي إنت... إنت تبري من الزعل... أنا الأزعل وأجوعِر كمان....
- أبدا ما كدة... بس أنا حا أجي بي صفتي شنو... يعني عوض عنده سبب أهو خاطب أختك
لكن أنا يا بنت الناس ما عندي سبب يجيبني وجيتي شكلها كدة ما ظريفة...
- ولا عشان خاطري أنا...
... يا سيدي الحسن...
- خاطرك أنت عارفاهو كبير عندي بس يا بت الناس هسا أبوك دة يقول شنو...
- أقول ليك حاجة بابا بيسأل منك حتى أسأل عوض...
... بابا.. البو اليشقني أنا..
- ياخي بس بيجامل في عوض ساكت...
- أنا بعرف بابا لو ما عايز حاجة ما بيسأل منها... أنت حا تسافر متين
- يعني أسبوعين تلاتة كدة
- يعني ما حا أشوفك ولا شنو...
- إنت شوفتي توديها وين... واحد طُلبة ورجلينو مشققات وحالو يحنن المسكين...
- ياخي مشتهية أتونس معاك.. بعدين إنت شايف نفسك زول طُلبة وما عارف شنو... إنت ما سألت نفسك نحن شايفنك كيف..
... يا ود الكرسني...
شويتين جاء راجل قدام الماسورة... أنا لي هسا ماني عارف مواسير محطات القطر دي مالها مصنقعة لااافوق..
المهم... الراجل أبو وشا كله قشور وحبوب دة علي المرة اللاتخالها لخوخة ونشفت في جضومها قعد يلقي وشو للماسورة
ويتنخم ويتفتف ويتمخت...
واحدة شابكاني بابا... ودة يقشقش في مخاخيتو كررررر ميييييييييط عييييط زي الزول البيشرطلو في دمُوريي... ياخي دة عالم شنو دة..
- قوماكي من هنا دة زول ما عندو زوق...
شويتين رجع عوض وجكسيهو ومشينا علي العربية ألتُم...
- سحر: حا تقعدوا كتير في الشمالية
- لا.. أنا غايتو حا أجي قالب في القطر الجايي
- جكس عوض: انت يا عوض حا تقعد ولا شنو...
- أقعد.. البقعدني شنو...
أبو الزفت يمين الزول إن بقى العرس ما كمل ياهو الراجع...
- سحر: طارق دقيقة عايزاك...
مشينا علي ضهرية العربية البت طلعتلها كيسا سمح كدة وأدتني ليهو...
- دة شنو...
- حبيت أجيب ليك حاجات حلوة شكلك بتحبها... اعتبرها زوادة مزورة...
- ياخي انت جمايلك دي كترت خلاص... ممكن أعرف فيها شنو...
- شوية جبنة مضفرة والباقي اكتشفوا براك...
- يا بت الناس جبنة مضفرة في قطر كريمي... دي ما لافقة كله كله... زي الواحد لمن يشتري مرسيدس ويكون لابس تموت تخلي...
تعرفي القطر دة مليان شنو... قراصة متمرة وطعمية وبيض مسلوق... يعني لو جعت وخبتوك بي حرف أليل قُراصي يمين إمساك جاهز...
من الله خلقني ما شفتلي زول في قطر كريمي جاهو إسهال...
البنيي يا الحبان يمين قعدت تضحك لامن دمعت وأول مرة أشوف إنه عندها فلجي سمحي خلاص واللسان ظاهر منها يمين بس جريدتين
وبيناتن سبيطي ألت مشرق ولا مطوطي (الرُطب)... يا سيدي الحسن هوووووووووووووي انجدني...
- تعرف إنت أجمل حاجة فيك شنو...
- شُفتي ليك طُلبة فيهو حاجة سمحة... وعلي العلي كمان بقرأ في بيطرة...
- ياخي عفويتك دي مبالغة...

(31)
يا الزينين كيفنكم ...
ودعنا البنات يا الحبيبين ورجعنا لي نقزينا وترترتنا...
شوف عيني جكس عوض ماها دايري تمشي كله كله...
سحر لبستلها نضاري سميحي كدي ودخلت العربية وأشرت لينا...
عوض بقى ملصق راسو في الشباك ويودع فيهن يمين بس راس نيفة معلق...
العربيي ألت القطر هاصت تاني والفنان نقر طنبورو:
عينينك يا أعز الناس...
عينيك فيها أخطر ماس...
عينيك قوة ما بتنقاس...
أنا المغسة كاتلاني يمين نطيت في نص العربية وقامت معاي خالتي
سكينة وبقينا ننقز أنا وهي ونترتر والزغاريد انفقعن... ايووووووووووووووووووووي
والصفاقين يقدمونا لي راس العربيي وياخدولم نطيتي ونحن تاني نرجعهم لي أول العربيي
يمين الأمة دي رقصتلها جنس رقيص كأنهم كانوا في سجن....
القطر لامن فات الجيلي كان عضامي انهرّن وتعبت...
قلت لي عوض أطلعاك نسطح فوق راس القطر شويي ونشوف الكيس دة فيهو شنو...
بالله مديت راسي لي سطح عربات القطر لقيتو مليان وكل واحد لافيلو عمي فوق راسو
يمين من بعيد عاملين زي سنابل القطن في مشروع الجزيرة....
طلعنا واتوهطنالنا في ضهر عربيي وفتحنا كيسنا وبقينا ناكل...
شي جبنة مضفرة وشي قراقير كدي فيهن جبني وزيتون... وحاجات تانيي ما عرفناها شنو..
- هسا يا طارق عليك الله سحر دي ما بتتراد...
- والله تتراد لكن الله غالب...
- ياخي انت وضعك شوية احسن مننا يعني ممكن تجازف
- عوض انا ماني عايز اتشعلقلي في حبال دايبي... البت سميحي لكن ما بتنتظرني...
- يمين يا طارق قالت بس يديني ريق حلو علي احارب الدنيا كلها فشانو...
- هي قالتلك كدة ولا الكلام نجرتو من راسك...
- والله من لسانها لي قعر أضاني....
- إن بقى في نصيب بنعرسها.... انزلاكا علي النقزي...
....
وصلنا الشماليي وصت الزغاريت والهيصي...
وأهل العروس وأهل عوض في البلد لاقونا علي القطر لامن وصلنا الطريف مكان العرس...
تاني يوم بدت مراسم العرس ونشوفلك في السُعون ألات التيران مليانات مويي..
والنسوان مكفيات علي الصيجان... والافران تطلع في العيش والخرفان انضبحن...
والتبايخ تتخابت... وبراريد الشاي ما تديك الدرب وتسمع في: كِبَلي آآجنا أنا لليلي ما طبَق (ما شربت كاسي التاني)..
الناس عقدوا في الجامع بعد صلاة العصر والقريي كلها فرحاني وتزغرد... وانا عوض بالنا هناك في العمارات...
وكتين امسى الليل... شغلوا مواتر الكهرباء والرتاين بقن...
والطنبور اشتغل تاني:
آآآآهههه يا خلايا فجولي اللشوفا...
خالتي سكينة كدي حنستلها وحيدتن من البلد باين عليها رقاصي شديد...
يمين يا الحبان المرة وكتين نزلت البلد دي كلها وقفت تشوف فيها...
بالله الساعة التديها جريي وترفع ايدينا في الرقيص يمين بس طيارة الكونكورد وكتين تعمل تيك أوف..
ووكتين تاني ترجع والصفاقين من وراها بس سمكة القرش والسمك الصغار داك اللاصق فيها...
ووكتين تقيف في نص الداري وترقص بي راسها بس الحمام الرقاص داك....
.....
تمينا عرسنا ورجعنا للخرطوم وأنا بديت في اجراءات السفر المسيخي ديك...
شي علاقات ثقافية وشي وزارة الداخليي وشي تحويل بنكي... وكلاما يزهج كدي...
وكتين فضلي خمس يوم جاني عوض ناطي في العصر كدي..
- ياخي الجماعة ديل دايرين يودعوك...
- ودعتهم الله والرسول...
- طارق روق الناس ديل عازمننا في ايسكريم 41 في العمارات يوم الخميس المغرب...
- مو ياها الداندورمي دي.... ياخي نضربلهم تليفون من دكان الهادي ونودعهم وخلاص...
- انا غايتو ان بقيت مت ممغوس انت السبب...
- ياخي ما تجوط بمش بس بي شرط..
- الونسي تبقى عامة وما تسوق بنيتك وتخليني وكران براي...
- (ضاحك) سمح اتفقنا
(32)
يا الزينين كيفنكم ...
سامحونا باقي كنا مشغولين مع لبس العيد أليل البُطان..
........
جاء الخميس يا الحبان وانا ماني راضي المشي وعوض شغال تحانيس...
دخلت عندهم سلمت علي خالتي سكينة وجريتلي بنبر جنبها وقعدت ممحن...
- مالك مبلم كدي....
- ياخي ولدك دة داير يوكرني وانا ماني قادر علي الشي دة...
- قالي عازمنكم الليلي في العمارات...
- أيي داندورمي...
- هي الداندورمي دايرالا عزومي...
- تقولي شنو نسوان مخهن ضارب...
- إييي الشي ماهو الداندورمي ديل دايرات يجيبن رجليك مع أخوك... نسوان قادرات...
- وإنت طبعا مبسوطي... تضحكي لي قعر أضانك...
- (ضاحكة) أييي يا ولدي عايزاك تتوكر مع أخوك... علي خايفي من أبوك... أمك ساهلي بقدر عليها.. علي أبوك صعب خلاص..
- يمين تقوليلو كدي علي يرصصك...
- بري يا يابا إنت بقيت علي الشي دة برسلو عمك عبد الله... قوم يا ولدي أمشي مع أخوك وبعدين لامن تجوا نتم حديثنا..
مشيت اخدتلي دُش وانجعصتلي في بنطلون وقميص وسرقتلي ريحي من عمكم جبيرين... ومشينا...
لامن وصلنا شارع 41 وحاتكم قلبي دة ينتل نتلي تقول ممتحن شفوي... واللغليغ كلو راح مني...
شويتين نشوفلكم البنيات معاهن خالتن ووواحدة من بنات خالن قدام المحل... شباب زي الألموظ...
سحر لابسالا بلوزي خضراء مع اسكيرت اخضر غامغ كدي علي السعدي (النجيلة)... والضفور في راسن برضو اخضر
وعاملالا أحمر شلاليف كبدي كدي وفوقه زيقا دهبي غامغ بس زي إعلان البرامج في قناة الجزيرة...
(والله ناس امي ضايعات أهلن دقولن شلاليفن بالأسود علي قعر الصاج وطلقوهن)...
والجفون مضرضرالا فيهن شيتن اخضر كدي وكتين تغمض يلمع زي الفوسفور الفي الشوارع السفرية (هاي وييز)
والرموش الليلي بقن طوال كدي علي قرون الاستشعار ألت الصراصير... والله يا الحبان وكتين تغمض وتفتح
العيون أكبر من الريال... انا نفسي يتخمة ضُمة ضُمة... واتشحتفلي شحتيفتا تقول صايم والآذان فضلو خمس دقائق..
- (خالت البنيات) أهلا بالشباب...
- سلام عليكم...
- تقعدوا برة ولا جوة
- والله كله كويس
- خلو طارق يختار نحن الليلة محتفلين بيهو...
- والله جوة أحسن...
- الحبشية ظبطت لينا طربيزة واتوهطنا في الكراسي....
- خلاص يا دكتور قربت...
- والله يومين كدة واسافر...
- حا تفرق معانا والله... اتعودنا نشوفك مع عوض...
- سحر: انا زعلانة منك...
- ليه ياخي....
- انا ما قلت ليك عايزة اشوفك قبل ما تسافر
- ما ياني هسا معاكم قبل ما اسافر...
- كتير علينا نشوفك براك
- والله انت شفت الظروف كيف... موضوع الشماليي لخبط الدنيي علينا
- عنوانك شنو في مصر...
- ساهل جدا مصر الزقازيق كلية الطب البيطري
- بس كدة ساهل... حا ترد علي لو رسلت ليك
- اكيد ياخي نحن ما بنصدق يجيك جواب من السودان...
- ممكن برضو نجي مصر اجازة راس السنة لو جينا بجيك...
يا ود الكرسني...
جات الحبشي تشيل الطلبات...
- اها يا شباب تاخدوا شنو
- سحر: اختار ليك على زوقي انا...
- جميل
- جكس عوض: انا غايتو بختار لي عوض...
الحبشيي مشت وجات جابتلها كبابي طوال كدة علي السنبريي وفيهن داندورمي كدي مدورة زي كورة التنس
شي احمر وشي اصفر وشي اخضر... وفوقن شيتن ابيض كدي ملولو وفوقه نقط حمراء زي لامن تكون مجروح
في أصبعك الكبير والشاش منقطة فيهو صبغة اليود...
سبحان الله حتى داندورمتم مختلفي.. نحن ألتنا في أكياس ممصرنة كدي يا قنقليز يا كركدي يا عرديب
ويقعد الواحد يمصمص فيه لامن يفضل التلج ويقعد يقرقش فيهو..
بقينا نبلع في الداندورمي دي والونسة شغالة... مالت علي خالة البنيات: ياخي بتنا دي ما جننتها جن ياخي انطق
قول ايي حاجة خليها تستريح... انت ما عايز تتحبة ولا شنو..
انا شبه حب... إن شاء الله بالمغسة التحش مصاريني وتقدقدِن...
- صعب أوعد بي حاجة أنا ما قادر أوفي بيها.... صعب شديد
- ياخي كله بيتسهل بس انت ارحم البنية دي والله بشتنتها بشتنة حرام عليك
- والله انا زعلان عشانها... ما بتستاهل... أيي شي فيها سمح... بس أنا ما عايز ابني حاجات في الهواء
- طيب دي حتة كويسة... يعني جواك في تجاوب بس انت خايف من المستقبل... ودي ساهلة بنحلها
تعرف أنا لو قلت ليها الكلام القلتو دة الليلة ما حا تنوم كله كله... أما لو قلتو انت ليها يمين تخلي ابوها يسفرها ليك هناك..
هي ما تنوم... انا عيوني اليتقدقدن...
- لا تعليق...
كملنا داندورمتنا واتونسنا ونسة عامة كدة ولمن وقفنا سحر زحت بي بعيد شوية كدة بي طريقة لا شعورية
- انا حا اراسلك عليك الله ما تتجاهلني
- ياخي انت بيتجاهلوك... ما ممكن يحصل
- وعد
- وعد
ودعت خالة البنات وبت خالهم ومشيت علي جكس عوض وودعتها لمن رجعت لي سحر تاني
وحاتكم قربت اغنيلا: كتير بتناسى ايديا واسيبا عنية فوق ايدك....
وسافرت...
.... ونواصل
Post: #630
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-11-2007, 11:42 PM
Parent: #625


طرقوش كيفنك
والله يا ابو الطراقيش بالغتة رسمي
باين عليها دي عيدية
جملة الايمان انا ماها عندي مجموعة كدي
يديك العافية ياخي


محبتي الاكيدة
Post: #627
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2007, 03:18 PM
Parent: #624


ابو قصي كيفنك والوليدات
كل شنة وانتم طيبين
وحاتك القصي خلاص وصلت لي نهايتها
Post: #626
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2007, 02:51 PM
Parent: #623


ود رغيم لا تتخلع شي
خلاص القصي حكت في الركاب
Post: #628
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 10-10-2007, 05:37 PM
Parent: #626


بسم الله الرحمن الرحيم
سلام ...

ودجبريل .. حياك الله .
علي سبيل التحيه ..
وكل عام وانت والاسره الكريمه بخير .

تحياتي ...
حاتم هاشم .
Post: #631
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-11-2007, 11:56 PM
Parent: #628


حاتم وليد هاشم كيفنك
كل سنة وانت والاسرة بالف خير
تعود الايام بالهناء والسعادة


محبتي الاكيدة
Post: #629
Title: Re: أي بت شديدة بتحب ليها طُلبة (صبي بناي)
Author: showgi idriss
Date: 10-10-2007, 06:02 PM
Parent: #1

ودجبين
جيت غاشيك لقيتك مسافر

لما ترد بالسلامة اصلنا

حيطتنا اليستوها وقعت

والسقف الخريف خربو

راجين كارو عم سلمان يجيب لينا السيتقة

كل سنة وفايز في مباراة هدوم العيد

قضيتن يالممحوق ولا لسع


انا البنية الصغيرة نشفت لي ريقي

قال ايه قالت دايرة ليها جنز بمبي...

ما خابرو لي في لفك الفسوق؟؟؟؟؟

أبوالشوش
Post: #632
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-12-2007, 00:00 AM
Parent: #629


ابو الشوش يا حبيبنا كيفنك
البنيي جيبلها الهي عايزاهو لا تبقى فسل شي
كل سنو وانت والاسرة بالف خير
الحيطي ساهلي بنرجع نليسها ليك
الكلام في الاسمنت لا يبقى مغشوش
Post: #633
Title: Re: أي بت شديدة بتحب ليها طُلبة (صبي بناي)
Author: Muna Khugali
Date: 10-12-2007, 00:09 AM
Parent: #632

كل سنه انت وعوض..وباقي الطلبه ومواد البناء بألف خير..
Post: #634
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-12-2007, 08:11 PM
Parent: #633

منى بت الخليفة
كل سنة وانت وآية بالف خير
كل سنة واسرتك الصغيرة في الامتداد بخير
كل سنة وانت نضرة كما تعودناك
كل سنة واحباب عوض بالف خير
Post: #635
Title: Re: أي بت شديدة بتحب ليها طُلبة (صبي بناي)
Author: أبوالزفت
Date: 10-14-2007, 08:03 AM
Parent: #1

طارق

كل سنة وانت طيب
Post: #639
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-15-2007, 01:17 PM
Parent: #635


ابو الزفت كيفن
كل سنة وانت بالف باخير
Post: #636
Title: Re: أي بت شديدة بتحب ليها طُلبة (صبي بناي)
Author: ماجدة عوض خوجلى
Date: 10-14-2007, 12:35 PM
Parent: #1

كل وانت بخير والبت البتحب الطلبة بخير وعوض زاتو بخير
تتحقق امانيك ياطارق ويديك الفى مرادك كلو والسنه الجايه
انت وناس الامتداد كلهم كلكم بدون فرز سالمين ولامين وماتشوفو شر ابدا يارب


دى علشان لزوم الفنجطة فى العيد وكدة
Post: #637
Title: Re: أي بت شديدة بتحب ليها طُلبة (صبي بناي)
Author: mohanad haimoura
Date: 10-14-2007, 01:10 PM
Parent: #636

استاذي العزيز : طارق
كل سنه وانت طيب وربنا يحقق جميع امنياتك
سنه حلو علي قلبك وربنا يحقق كل الممكن وبعض المستحيل
عليك الله كفانا تشويق
ياخي يعني انا منتظر القصه تخلص عشان اكتب ليك
لكن حلفت
وبقا بوست ادمان واول ما تدخل نت تفتش البوست ده حتي تبدا يومك
الله يديك العافيه
سريييييييييييييعععععععععععع شووووووووووووووووويه

كل الود
مهند حيموره
Post: #638
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 10-15-2007, 10:44 AM
Parent: #637

العزيز طارق جبريل ...

كل سنة وانت والأهل بخير وعافية ...

Quote: سحر لابسالا بلوزي خضراء مع اسكيرت اخضر غامغ كدي علي السعدي (النجيلة)...

... عافي منها سحر ...
Post: #642
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-15-2007, 02:00 PM
Parent: #638


ود نجيلة
باقيلي عجبتك قصة السِعْدِي دي
Post: #641
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-15-2007, 01:59 PM
Parent: #637


مهند كيفنك
يعني بعد دة الواحد لو عمل البوست دة زي حقة الصعوط
جيبو حا يتقل القراية الواحد بخمس آلاف
إيه رأيك نسويها

والله يا مهند اخوك ساكي المعايش
والوقت ممحوق والراس فاير عديل كدة
انا ذاتي عايز انتهي منها وغالبني
Post: #640
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-15-2007, 01:20 PM
Parent: #636


والله يا ماجدة انا عافي منك وراضي عليك
نان انا فنجطلي جنس فنجيك

يديك العافية وانت وبنات الخليفة كاملين
والشهداء الله يرحمهم

كوني بخير
Post: #643
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-16-2007, 10:10 AM
Parent: #1


أها يا الحبان جيتكم صادي
عيدكم مبارك وإن شاء الله تحققوا الفي مرادكم...
معليش إتأخرنا عليكم بي سبب العيد وكمان الواحد كان مدبرس شديد...
أول مرة من ولدوني ما أقدر أقول لي أمي كل عام وانت بخير يا حاجة
السنة الجاية في عرفات... رحمها الله...
.....
رجعت لي قرايتي والهركي بين كفايات الجداد ومراح البهائم وزرايب البقر...
قرايتا تقصر العمر الوكرني فيها شنو آبعرف... السنة كلها أنت تساسق بين المحاضرات والزرايب...
بعد اسبوعين كدة بدت تجيني الرسائل...
عوض شغال يكب في الجلكسات ومقضي ايامه بين العمارات والكلية والامتداد...
في يوم كدي استلمتلي جواب كدي ماهو ياهو...
خليتو لامن وأنا طالع من المعامل تسعة بالليل بديت أقرأ فيهو:

دكتور طارق ازيك
دة خطابي الأول ليك
نفسي كان أرسل ليك معاهو شريط لي محمد ميرغني وفيه أغنية اشتقت ليك
من سافرت وأنا بسمع الأغنية دي كتير... ما تسألني ليه؟؟؟؟
وكمان عوض قال لي إنك بتحب الجابري شديد خصوصا أغنية بدون رسائل:
مافي حتة رسالة واحدة بيها أتصبر شوية
والوعد بيناتنا إنك كل يوم تكتب إليّ
لم آخر مرة شفتك قبل ما أودع و أغادر
كنت حاسس إني خايف إني متردد وحائر
داير أتصبر أمامك داير أضحك وماني قادر
حفظت الأغنية حرف حرف وبشغلها في اليوم ألف مرة وبتذكر كل كلمة كنت بتقولها
وبتذكر كمان ضحكك مع خالتي وتشبيهاتك اللذيذة ديك..
في حاجات كتيرة كان مفروض نقولها مع بعض...
كنت عايزة أقوليك كلام كتير وعايزة أسمع منك كلام كتير تقوله لي أنا ما لي خالتي
عوض بيقول إنك متشائم جدا عشان كدة ما بتحب تتكلم في أي شئ عن المستقبل
بس أنا عندي ليك سؤال: يا ربي في إنسان في الدنيا دي بيرهن عواطفه للزمن؟؟؟؟؟
جاوبني بصراحة وما تسألني هسا ليه أنا سألتك كدة بعد ما تجاوبني بوريك ليه
أنا طرحت عليك السؤال دة...
خالتي سكينة بتقول عنك كلام سمح شديد وباين عليها بتحبك شديد وأقول ليك حاجة
أنا شفت أمك (الله يرحمها) عند ناس عوض... بتشبهك شديد ومن غير ما اشعر سلمت
عليها شديد ما عارفة ليه وهي ذاتها سلمت علي شديد... يدينها طبق الأصل من يدينك
فيك حاجات كتيرة منها... قالت لي عوض: صحبك أمبارح رسلي جواب بعدين تعال فشان
تكتبلي ليهو جواب عشان يرسلي حبوب المصران من هناك باقي قايم علي...
قربت أقول ليها أنا بكتبوا ليك... لكن خجلت... بس حسيت بيها زولة كدة نقية شديد
فيها كمية من الحنية ظاهرة في عيونها... عرفت من عوض إنك الحتالة وبينك وبين
أخوانك الأولاد تلاتة بنات متزجات اتنين وواحدة في الجامعة...
عوض الأيام دي راسو مقطوع وعدم وجودك فارق معاهو....
بابا سألوا سؤالي عادي خلاهو يجقلب وقال لو طارق هنا كان فكر معاي...
وأنا شايفة السؤال عادي جدا: إنت متوقع تتزوج متين...
بس هو عمل منه حبة وقبة... وخلى جكسيهو متوتر ساكت...
عشان ما تقول أنا برايا ما حا أطول عليك...
متوقعة منك رد في السريع العاجل....
خلي بالك من نفسك شديد كان ما عشانا عشان أمك العسل ديك....
وجاوبني على الحاجات السألتك منها كلها...
في أمان الله...
سحر...

وحاتكم يا الحبان حسيت بالبرد دخل في عضامي وبقيت أرجف
وقمت لبست البالطو بالمقلوب وشكلي بقى زي مرضان في مستشفى المجانين
وكان سألني زول كنت بتعمل في المعمل شنو الليلة.. ماني عارف...
برايا... أبريني أنا وكسريني وتاني أبريني لامن أكمل كله كله وأدشدش....
والنشارة البتطلع مني ضرضريها في العمارات شارع شارع...
ولا أقولك ووقدي فيني النار ورمديني...
أنا واااااامغستي..... وااااااااضيقي....... التراااااب في خشمي...
عوض إن شاء الله يطير هو ونسيبو... شكيتم الاتنين علي الله...
.... ونواصل
Post: #644
Title: Re: أي بت شديدة بتحب ليها طُلبة (صبي بناي)
Author: طرقوش
Date: 10-16-2007, 12:02 PM
Parent: #643

العزيز د. طارق

لك التحية وكل عام وأنت والأسرةالكريمة بألف خير
وتعود الأيام بالصحة والهناء ان شاء الله

عزيزى:
لسنا فى عجلة من امرنا..فقط عُد رويدا الى الزمن الجميل واسترجع
شريط الأحداث التى لن تغيب عن الخاطر والذاكرة طالما انها نقية
ثم أتحفنا بما تجود به ذاكرتك المتشربة من هذا الزمن الخرافى
ولك الود مرة اخرى

طارق
Post: #645
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-17-2007, 10:21 AM
Parent: #644


ابو الطراقيش كيفنك
كل سنة وانت بألف خير
سأعود وسأكتب هنا لحظات جميلة عايشتها

كن بخير يا صديقي
Post: #667
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 10-24-2007, 12:35 PM
Parent: #643

العزيز د طارق
بعيدا عن عوض
اترحم علي الوالدة العزيزة
اللهم مثواها الي الجنة
تسلم
Post: #646
Title: Re: أي بت شديدة بتحب ليها طُلبة (صبي بناي)
Author: osman righeem
Date: 10-17-2007, 10:56 AM
Parent: #1

الاخ د.طارق ابو النسب
كل العام وانت بخير


ويا اخي هذا حال الدنيا
( مر العيد وفات لا شوف لا تهاني )


نسأل الله لها المغفرة والقبول والنزول مع الصديقين و الشهداء
ولها عندك الدعاء في السجود


وتحياتي للاسرة
Post: #649
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-18-2007, 10:27 AM
Parent: #646


العزيز ود رغيم كيفنك
تعرف العام دة عام الحزن بامتياز شديد
والدتنا
اخوي متوكل
ابن عمي محمد كرسني (شقيق د. ابراهيم كرسني)
يعني كمية من الألم كدة مدفقة
رحم الله الجميع
وتقبلهم قبولا حسنا


محبتي الاكيدة
Post: #647
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 10-17-2007, 12:44 PM
Parent: #1

الحبيب طارق

ليك والله يا راجل وحشه و معليش رمضان شويه كده دسانا ...

على العموم كل سنه وانت بخير و عوض وسحر وكل لون من الوان لوحتك الجميله.
Post: #650
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-18-2007, 10:28 AM
Parent: #647


حبيبنا وليد
ياخي معقولة بس رمضان يدسك مننا كدة
يا سيدي كل سنة وانت والاسرة بالف الف خير



مودتي
Post: #648
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 10-17-2007, 01:38 PM
Parent: #1

العزيز المبدع طارق جبريل

Quote: أول مرة من ولدوني ما أقدر أقول لي أمي كل عام وانت بخير يا حاجة
السنة الجاية في عرفات... رحمها الله...


الله يرحمها ويرحم أمهاتنا جميعاً .. أحياء وأموات.

ياخي إنت زول ما عادي .... تشيل كل الألم والحزن ده وتوزع علينا الفرح والسعادة.

كل عام وإنت وأولادك وجميع الأهل بخير.

صادق الود والمحبة
Post: #651
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-18-2007, 10:33 AM
Parent: #648


ود أبو العزائم كيفنك
تعرف يا حبيب أنا بديت اكتب في الحكاية دي وانا قرفان جدا جدا
لانه الوالدة الله يرحمها كانت مريضة وزي ما عارف لمن انت تكون بعيد
بتكون القصة صعبة شوية ويبدو إنه أنا بديت أكتب دون وعي مني
في محاولة لربط الجسور بين عالم عايشته بكل تفاصيله المملة
وعالم أعيشه الآن... وحتى بعد الوفاة حرصت على أن أكتب إحياء لذكراها
لأنها عايشت كل التفاصيل المبعثرة هنا في هذا البوست....
رحمها الله كانت جبلا بقرب جبل البركل....


محبتي الأكيدة
Post: #652
Title: Re: أي بت شديدة بتحب ليها طُلبة (صبي بناي)
Author: Nasr
Date: 10-19-2007, 08:08 AM
Parent: #1

قلت أقول مساء الخير
وإن شاء الله حفلة مونتري كانت ظريفة
عموما
نحن في الإنتظار
Post: #658
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-23-2007, 05:30 PM
Parent: #652


نصر كيفنك
Quote: وإن شاء الله حفلة مونتري كانت ظريفة

دي ما عرفتها يا اخوي
Post: #653
Title: Re: أي بت شديدة بتحب ليها طُلبة (صبي بناي)
Author: عزيز عيسى
Date: 10-19-2007, 04:29 PM
Parent: #1

سلام يا طارق،

Quote: حبوبتي نفيسي بت بُغداد
مشت الحج وكتين جات قام طلحة اخوي قالها ما سلمتي علي النبي
قالتلو لا
قالها ايي كان كدي حجك ضايع وكان مشى معاها عمي حسن
نادتو انت يا الحسن كيفن ما بتخليني اسلم علي النبي
ضيعتلي قريشات في الحج الله لا تكسبك كان سوينابن كرقي للبُطان

غايتو يا طارق اللي ما بمر على البوست دا بيكون ضائع وسط الزحام.

سؤال:
الجكس المعنيات في الحكي متابعات الكلام دا؟

متحكرين ومتابعين..
Post: #654
Title: Re: أي بت شديدة بتحب ليها طُلبة (صبي بناي)
Author: Rawia
Date: 10-19-2007, 05:19 PM
Parent: #653

عوض كل سنة وانتو طيبين
Post: #655
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 10-22-2007, 09:02 AM
Parent: #654

... المرة دي دخلت البوست ... لزوم العتاله ساي ...

طبعا انت والعوض عتالتكم زمان كانت مقابل القروش ...

بس نحناعتالتنا هسع مقابلها ...

متعة ... وامتاع ... واستمتاع

... واصل يالحبيب هذا الفيض من السرد الفني البسيط الممتع ...
Post: #656
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 10-22-2007, 01:03 PM
Parent: #655

الحبيب طارق

اللهم نسألك المغفرة والرحمة للحاجة أم طارق (عشة الشايقية)

ونسألك أن ترطب لساننا بالدعاء لها ولكل موتنا ونسال الله أن

يجمعنا بهم في جنة عرضها السماؤات والأرض أعدت للمتقين ولك الود

ياصديقي ولك وللأسرة التحية والأحترام وعيد سعيد علي ريم ومحمد

وأمهم وكل الأسرة الجميلة بأمتداد آل جبريل أين ما وجدوا ونخص

سحر وعوض وجكس عوض بتهنئة عريضه بالعيد وكل عام والجميع بخير

وخطاب سحر بداية لنهاية كم نتمني أن لا تنتهي بدرامات العشق المجنون

فتك بعافية حتي الملتقي أن شاءالله .

،،،،أبوقصي،،،،
Post: #657
Title: Re: أي بت شديدة بتحب ليها طُلبة (صبي بناي)
Author: segtaweel
Date: 10-22-2007, 03:32 PM
Parent: #656

العزيز الزول السمح د ..طاارق

انا من المتابعين - بجنوون- لهذا البوست الرائع - وكل يوم بفتش المنبر دا زى المودر لىهو - سخله بعاااامية -

عاارف احتماال لانو رجعتنا لى زمن محاال يرجع تاانى -


بس مجرد سؤاال ساااكت - ياربى لييه البنيات زمااان بمووتن فى - الطلب-( دا مجرد سؤال من طلبه سابق )

عاارف والله نفسى فى يوميه كاااربه- لكننا ما عدنا نقوى على الرجوع-

مع خالص حبى وتحياتى
Post: #663
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-23-2007, 05:43 PM
Parent: #657


segtaweel كيفنك

Quote: ياربى لييه البنيات زمااان بمووتن فى - الطلب-( دا مجرد سؤال من طلبه سابق )

وحاتك انا لليلي ماني عارف السر شنو
Post: #662
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-23-2007, 05:41 PM
Parent: #656


ابو قضي
الله يديك الفي مرادك
ويرجعك لي امتدادك سالم وغانم يا رب

كل سنة وانت طيب
Post: #661
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-23-2007, 05:40 PM
Parent: #655


ود نجيلة كيفنك
نان العتالي دي باقيلك هسا بنقدر عليها
كبرنا والعضم كبر خلاص
Post: #660
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-23-2007, 05:39 PM
Parent: #654


راوية كيفنك
انت وين غاتسة
لسة شغالة كثير تلج
كل سنة وانت طيبة
Post: #659
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-23-2007, 05:37 PM
Parent: #653


Quote: غايتو يا طارق اللي ما بمر على البوست دا بيكون ضائع وسط الزحام.

عزي ود عيسى كيفنك
والله يا سيدي انا سعيدي بي وجودك هني في حوش عوض

Quote: الجكس المعنيات في الحكي متابعات الكلام دا؟


والله يخربني آآبعرفن
Post: #664
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-23-2007, 05:45 PM
Parent: #1


الحبايب كيفنكم
وحاتكم قافلة معاي من العيد ابت تفك كله كله
ما خليتلها بخور
ما خليتلي شبايي
ابت تفك كلو كلو
Post: #666
Title: Re: أي بت شديدة بتحب ليها طُلبة (صبي بناي)
Author: طرقوش
Date: 10-24-2007, 12:24 PM
Parent: #664

Quote: الحبايب كيفنكم
وحاتكم قافلة معاي من العيد ابت تفك كله كله
ما خليتلها بخور
ما خليتلي شبايي
ابت تفك كلو كلو


والله الحالة شلش يا ولدنا
ربنا يعين الجميع

تحياتى
Post: #671
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-29-2007, 10:40 AM
Parent: #666


ابو الطراقيش كيفنك
يا حبيب فكت شوية
مشيت لي منبر النصري بالصدفة لقيت عوض هناك
Post: #665
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 10-23-2007, 06:02 PM
Parent: #1

Quote: ابت تفك كلو كلو




عليك ب ام فتفت... و كان ما فكتا ليك لومني
Post: #672
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-29-2007, 10:43 AM
Parent: #665


وليد كيفنك
معقول ياخي ام فتفت
انت عايز توديني التوج
Post: #668
Title: Re: أي بت شديدة بتحب ليها طُلبة (صبي بناي)
Author: ناجي عز الدين الصديق
Date: 10-24-2007, 01:37 PM
Parent: #1

أخي أبا ريم
عيد سعيد وكل عام وانتم بالف خير وعافية
أعاده الله علينا وعليكم بالخير واليمن والبركات
وسلامي للاسرة الكريمة
وإلى الملتقى يا صديقي
Post: #669
Title: Re: أي بت شديدة بتحب ليها طُلبة (صبي بناي)
Author: طرقوش
Date: 10-26-2007, 05:41 PM
Parent: #668

up
Post: #670
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 10-29-2007, 10:30 AM
Parent: #669

... يعني حنفضل نعتل كده كتير يا طارق ....

ما انت براك عارف الصحة كيف ؟؟؟

Quote: ود نجيلة كيفنك
نان العتالي دي باقيلك هسا بنقدر عليها
كبرنا والعضم كبر خلاص
Post: #674
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-29-2007, 10:46 AM
Parent: #670


ود نجيلة كيفنك
والله يا ياسر كانت قافلة معاي شديد
Post: #673
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-29-2007, 10:44 AM
Parent: #668


ابو النج كيفنك
وكيف الشناقيط معاك
Post: #676
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-29-2007, 10:51 AM
Parent: #1


الحبيبين كيفنكم...
غايتو الواحد وكتين يكون قرفان الله لا وراكم ليه...
يا دوبة فكت مني...
......
الجوابات بقت نازلة فيني زي المطر من الجهتين...
عوض يكب في الجلكسات ومخلوع من أسئلة نسيبو:

والله يا طارق الراجل دة الأيام دي متلحني ما بعرفه مالو..
شابكني حا تعرس متين وحا تسكن وين ناوي تشتغل بالصيدلة ولا عندك مشروع تاني...
يعني هو ما عارف البير وغتاهو...
وبيني وبينك أنا قلبي ماكلني الراجل أبو جضوم دة ماني مرتاحلو...
وبقيت مهموم كله كله.... والله وكتين ازورهم أقول يا ربي يبقى ماهو في... والجكس
يطمن فيني وأنا حاسس في شي ماهو ياهو والأيام دي اعمامهم بيجوهم كتير خلاص
انا غايتو قلبي في يدي.. البت دي إن بقت فاتتني ياني الانتهيت...
...

عوض هممني في روحي دي وانا عارفه وكتين يكون الجن راكبو ويبخ في الهم
ويعقِد حواجبينو علي الفريني فوق عيونه... ويحقب يدينه وراء رقبتو علي الخروف
الموهطنو للضبح... ويلبس ويقلع في سفنجتو زي بساتم العربيي... وتسمع في بطنو
تكورك وتسوي في الغوووووغغغ غوووووغغ زي اللستك وكتين يكون نازل ويجربو فيهو
في برميل الموية عند اصحاب البناشر... والعجب لامن يكون مقنطر في الحجر قدام
باب البيت علي الجدادة الراكضي في البيض...
أنا حاسسبو فاقدني وماهو قادر يكُب همو لي زولا تاني..
رسلتلو قلتلو فضلي شهر وبجيك ناطي ونشوف الحكايي شنها... لانه شفته كتر في الجوابات...
وباقيلي القصي سخنت بهناك...
عوض مهموم وبنت الناس دي ودرت قروشها كلها في البوسطة...
تشيل وترسلي في الخطابات وأنا لاني قادرها أبرد حشاها وحشاي
ولاني قادر كمان أصبر... زي الزول لامن تكون عندو عوارة وخلاص قربت تبرا
وتقعد تاكل فيهو.. لا يقدر يحكها ولاهو قادر يصبر عليها...
يمين أحلم بي عويناتها بالليل أقوم مخنوق وماسكاني الوردي كله كله
وأسكت أبلع في المويي وعصاير القصب عند المصريين ديل...
اوكات أقوم من ليلي أصنقر في نص السرير في الشقق العلي المقابر دي
على الأقل في السودان إن بقيت صنقرت في عنقريبك تناضم السماء والنجوم
ويناضمِنَك... لكن هني الصنقير ذاتو يزيد العليك...
وحاتكم أصنقر وأتذكر في يدينها الناعمات ديك والصدير لامن يجيك دافر من بعيد
علي الهودج في الجمل... ولا فديع اليدين وجدعتن ديك... ومشيت الرجلين بالمهلي...
نفسي يضيق... وأناجي في ربي يشوفلي حل للكربة الوقعت فيها دي...
أرُدلا في رسايلا وألمحلها من بعيد كدي زي الغرقان وشافلو خشبي مطفحي...
وحاتكم وأنا بكتب في الحروف أصابعيني يرجفن زي زنبلك الساعة...
وأطلع وأنزل في السطور زي أولاد الكُتاب...
الله لا تكسبك يا عوض إن كان نجضتني معاك....
.... ونواصل
Post: #677
Title: Re: أي بت شديدة بتحب ليها طُلبة (صبي بناي)
Author: عامر تيتاوى
Date: 10-29-2007, 11:04 AM
Parent: #676

ود جبرين
Quote: غايتو الواحد وكتين يكون قرفان الله لا وراكم ليه...
يا دوبة فكت مني...

الحمد لله واصل ياجميل
Post: #679
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-29-2007, 04:06 PM
Parent: #677


تيتا يا حبيبنا كيفنك
ما قلت لي عملت شنو مع الصينيين
والله يا تيتا جنس قفبة هي نان كانت
Post: #678
Title: Re: أي بت شديدة بتحب ليها طُلبة (صبي بناي)
Author: نسرين جمال
Date: 10-29-2007, 11:47 AM
Parent: #1

حمد لله علي السلامة يا دكتور

ومنتظرين باقي الابداع


احترامي
Post: #680
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-30-2007, 10:39 AM
Parent: #678


نسرين كيفنك
إن الله كتبلنا عمر ياني البتمها


محبتي الاكيدة
Post: #681
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 11-01-2007, 09:34 AM
Parent: #680

سلامات يادكتور

كل سنة و انت طيب

من حظى انى مااتشحتفت زى الباقيين
امبارح كريتا كلها فى يوم واحد

شغلى كان خفيف
لكن اتبهدلت
انا ماواعى لروحى
مكتبى قزاز
و الناس بى برا شايفنى بضحك

طريقة سردك رائعة و القصة اسرة

غايتو عوض دا اكان لى هسع ماعرس
و الامور نجضت
انا متبرع بندى القلعة
عشان تجى تغنيلو

يسلم لى عوض الليلة

تحياتى
Post: #682
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-02-2007, 06:13 PM
Parent: #1


ابوبكر كيفنك

عوض قاليك خلي ندى القلعة للسماية


محبتي الاكيدة
Post: #683
Title: Re: أي بت شديدة بتحب ليها طُلبة (صبي بناي)
Author: موسى الحسين سيد أحمد
Date: 11-03-2007, 10:18 AM
Parent: #682

الأخ د/ طارق

استمتعت بالسرد الرائع
.
متعكم الله بالصحة والعافية وكل الأحباب .

ولا يزال في النفس شوق جارف إلى قطر كريمة وعربات الأعراس .
Post: #684
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 11-04-2007, 11:56 AM
Parent: #683

القراء الاعزاء
احباب عوض

كيتا كدى فى ود جبريل المابى يتم القصة
انا بتمها ليكم

ياغرق ياجيت حازما

طارق انا عازرو القصة وصلت منعطف حساس

اها
ياعوض و ياطارق
ارجو الراجيكم

يامسهل
Post: #685
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 11-04-2007, 12:07 PM
Parent: #684

-
Post: #686
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 11-05-2007, 10:20 AM
Parent: #685

-
Post: #688
Title: Re: أي بت شديدة بتحب ليها طُلبة (صبي بناي)
Author: anas hassan
Date: 11-05-2007, 01:18 PM
Parent: #686

سلام

100%
Post: #691
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-05-2007, 06:36 PM
Parent: #688


انس كيفنك
سلام 10000000000000000000000?
Post: #690
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-05-2007, 06:35 PM
Parent: #686


ابوبكر كيفنك
والله عافي منك

يا سيدي والله الوقت ممحوق خلاص وشغال من تصبح لامن تمسي

بس هانت ان شاء الله بنجيكم
Post: #689
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-05-2007, 06:33 PM
Parent: #683


العزيز موسى الحسين كيفنك
قطر كريمة لو الواحد اتفرغ ليه والله يملأ ليكم البوست دة


محبتي الاكيدة
Post: #687
Title: Re: أي بت شديدة بتحب ليها طُلبة (صبي بناي)
Author: osman righeem
Date: 11-05-2007, 12:32 PM
Parent: #1

الاخ ابو النسب
ارجو ان تكون بخير طولت منك لكن كل يوم بتاوق شابف اخونا ابوبكر دخل بصورة عملية
قايتو ان شالله يلحقا نيفاشا عافي منه عشان الشحتفه اللشحتفتنا ياها .
زمان كان عندني راجل حكاي جدا مشهور في كل المناسبات و مع ذلك يحب الاكل السمح ودايما تلقاه حاجز مكان في بيوت البكيات
وغيرها من المناسبات مكان مابتجي الصواني الكاربات .
وكان مشهور عنه انه يحكي قصة سيدنا يوسف واخوانه بطريقة جذابة جدا وتجعلها مطلوبة في كل مناسبة وحصل في مناسبة كان هذها الرجل
مشغول بشأن خاص و وصل مكان المناسبة متأخر جدا و مع اخر صينية وعند جلوسه للاكل طلب منه احد الضيوف ان يحكي له قصة سيدنا يوسف
فطلب من الرجل ان ينتظره حتي يكمل الغداء فقال له الضيف انا مستعجل ولاحق المركبة فما كان من عمنا الا ان يحسم الموضوع
فقال له قصة شنو راجل عنده ولد راح و لقاه ما اكتر من كده حصل مركبك خليني اللتغدي .

دحين يا طارق كان مشقول كتير قولينا طلبه حب بت وما عرسها
خلاص افقنا
Post: #692
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 11-06-2007, 07:50 AM
Parent: #687

-
Post: #693
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 11-06-2007, 08:02 AM
Parent: #692

سلامات يادكتور

غايتو لو مالفيت قصتك دى سريع
بلحقا ليك امات طه

لكن بينى و بينك عجبتنى شديد

لكن قطعا الاروع طريقتك فى السرد

انا حبيت استفزك انك تكملا

الناس اتشحتفو

تحياتى
Post: #702
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-12-2007, 02:07 PM
Parent: #693


والله يا ابو بكر عافي منك ما قصرت تب
Post: #701
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-12-2007, 01:54 PM
Parent: #687


ود رغيم كيفنك
ان شاد الله كله تمام
يا اخوي راجلك الحكاي دة بقى اخير مني
وحاتك مزنوقلي جني زنقة في الشغل
ولادي رسمي
Post: #694
Title: Re: أي بت شديدة بتحب ليها طُلبة (صبي بناي)
Author: أميرة فاروق عبد العال
Date: 11-06-2007, 08:33 AM
Parent: #1

استاذ/ طــــــــــــــارق
سلام وتحايا وشوق عاطر..
قلنا (أبو بكر) يستفزك عشان تكمل أو على الأقل تحتج.. لكن الظاهر عليك شايل تقيل الله يعينك..
(ابو بكر) غايتو كتر خيرك ماقصرت في الرفع والعتالة.. لكن صاحبك الظاهر عليه مشغول شديد أو يمكن غير رأيه..
اقتراح: شيل مداخلاتك دي نفتح بيها بوست تاني ونضرب بيه ناس عوض وسحر.. رأيك شنو؟
Post: #703
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-12-2007, 02:09 PM
Parent: #694


استاذتنا اميرة كيفنك
ادوني خلو رجل وانا بكسح من هنا
والله زنقة شغل كدة تهد الروح بس بعد دة خلاص بجيكم صادي
Post: #695
Title: Re: أي بت شديدة بتحب ليها طُلبة (صبي بناي)
Author: celecon
Date: 11-06-2007, 09:09 AM
Parent: #1

دكتورنا العزيز ...

Quote: 28-12-2006, 11:32 ص
عيدالميلاد قرب .. ونحن لسه معلقين ...!!!
Post: #696
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 11-06-2007, 09:39 AM
Parent: #695

سلامات اميرة

انا معندى مشكلة
انا داير اقترح عليهو انو يعمل لى خلو رجل
باقى انا عندى دولارات كتيرة و محرقانى

و ممكن زى ما اقترحتى نفتح بوست تانى
نسميهو عوض الطلبة الاصلى
يعنى بتاع دكتور طارق يكون مضروب

تحياتى
Post: #697
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 11-07-2007, 08:12 AM
Parent: #696

سلامات
يادكتور انا حارسك
غايتو لو اتاخرت كتير
الناس ديل انا حالف الا اعقد لهم
Post: #705
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-12-2007, 02:14 PM
Parent: #697


ابوبكر جاييك بي مزاج
بس ادني صني كدي
Post: #704
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-12-2007, 02:12 PM
Parent: #695


سليكون كيفنك
وحاتك خلاص حكت في الركب والقصي دخلت الزون
بس اصبرلي يومين كدي
Post: #698
Title: Re: أي بت شديدة بتحب ليها طُلبة (صبي بناي)
Author: نسرين جمال
Date: 11-07-2007, 11:50 AM
Parent: #1

الاخ العزيز الدكتور طارق

نحن لسة منتظرنك

احترامي
Post: #699
Title: Re: أي بت شديدة بتحب ليها طُلبة (صبي بناي)
Author: mohanad haimoura
Date: 11-07-2007, 01:27 PM
Parent: #698

يا استاذي
ما طولت مننا والله
منتظريييييييييييييييييييييييييييييييييييييين



كل الود والاحترام
Post: #700
Title: Re: أي بت شديدة بتحب ليها طُلبة (صبي بناي)
Author: انعام عبد الحفيظ
Date: 11-11-2007, 11:55 AM
Parent: #699

طارق جبريل

ما تجي تواصل ياخ
Post: #708
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-12-2007, 02:19 PM
Parent: #700


انعام بت عبد الحفيظ كيفنك
انا يمين كان عارف انه عدم جيتي بتجيبك لينا هنا
وحاتك كان خليتو رسمي البوست دة
هانت يومين بس واجي اتحكرلكم هني
Post: #707
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-12-2007, 02:17 PM
Parent: #699


مهند حيمورة كيفنك
بجيك لحدي الصحافة كان عايز
Post: #706
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-12-2007, 02:16 PM
Parent: #698


نسرين بت الامتداد كيفنك
جاييكم اصبرولي
Post: #709
Title: Re: أي بت شديدة بتحب ليها طُلبة (صبي بناي)
Author: Safia Mohamed
Date: 11-12-2007, 02:45 PM
Parent: #1

Quote: جاييكم اصبرولي

ود جبريل ازيك وكل سنة وانت طيب
صبرنا نفذ مع حاجات كتيرة الفضل انت قضيت عليه لمتين ياخي
صفية
Post: #710
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-13-2007, 10:13 AM
Parent: #1


د. صفية كيفنك والوليدات
خليك متابعة معانا
ـــــــــــــــــ
الحبيبين كيفنكم...
كملت يا الحبان امتحاناتي وحمدت الله وسافرت لي أهلي...
لمن وصلت لقيت أبوي يعافر في النيمي القدام البيت...
قالدني زين وقالدتو... سبحان الله أبوي دة رغم الصعوبيي المالية وشو دي...
علي وكتين واحد من بطانو يكون مريض ولا مسافر يبقى مسكين خلاص لامن يحنن...
دخلت قالدتة ناس أمي (رحمها الله) وأخواني ودخلت اخدتلي دش كارب بي صابونة لوكس
لامن بقيت اراري.. قلنا نستفيد من نورة مصر وناخدلنا حوامة في الحلي قبل ما نغبش...
وطلعت مشيت ناس خالتي سكينة.. جريت سلك الباب ودخلت قحيت وعيني للتُكل مقنطرة فيهو
خالتي سكينة... والله يا الحبان قالدتني تقول ولدها بالجد...
- والله يا ولدي أنا وكتين تسافر.. بيتكم والحلي كلها قاعدة تمسخ لي... وحاتك إن ما أمك ما بمشي عندكم...
- إنت وكتين قاعدة تريديني قدر دة ما قلتلك الصعوط دة خلي مالك آآبتسمعي كلامي...
- يا ولدي التمباك قاعد ينسيني هم البُطان ديل... بقينا نزرق فيهم واحد وراء التاني.. وهسا غلبنا نربيهم...
- إييي بيتربوا زي الباقين وبعدين لامن دربك يمرق بتتذكري كلامي دة.... وين عوض...
- بهناك في الصالون قارصاهو نحلي في وشو كله مورم... بس يا ولدي الأيام دي شكلو مهموم كدي مانا عارفاهو مالو...
مشيت الصالون لقيت عوض لابسلو رداء بس ومشتح كرعينو الشينات ديك في شناط العنقريب وحاتكم بس البرجل ألليل
علبة الهندسة داك... ووشوا من القرصة ألت النحل متختخ ومورم عِلِي اللخوخة...
شلتلي كوز موية دلقتو في وشو لامن قام مخلوع ولامن شافني نطة علي حيلو في العنقريب وقالدني زييييييين...
اخد حمامو وطلعنا لي حجارنا في خشم الباب...
- أها يا دنجوان العمارات أخبارك...
- والله يا طارق الدنيي ضايقابي والمشكلة غيرك ما بعرف افتو مع زول تاني...
- يا ساتر الحاصل شنو... مالك جكسيك ومعاك.... وما عندك أي ملفات ضيقة...
- ياخي الراجل الغليد دة الأيام دي متلحني: حا تعرس متين وحا تسكن وين وناوي تشتغل شنو...
- ياخي دي ما أسئلة عادية أي أبو ممكن يسألها وبعدين ما تنسى إنه قصتك دي كلها غريبة من
الأول والراجل عايز يطمئن على بنتو ياخي...
- لا أسئلتو ما بالشكل الإنت قاعد تقولو دة.. يعني أنا قريت صيدلة حا أشتغل شنو يعني،، طُلبة..
أنا حاسي فيها غتاتة كدة وقدر ما أقول للجكس كدة تقول لي ياخي إنت بتكبر الموضوع ساكت...
مرة كلمت خالتها اتهربت مني وما ردت علي رد مقنع..
المهم بكرة أنا ماشي عليهم بس ما في البيت حا أقابلها جنب النادي السوري ونتمشى في الشوارع الهادئة ديك
وبتكون معاها سحر ونناقش الموضوع معاهم...
- شنو نناقش دي... إنت تناقش براك أنا كمان فوق شنو....
- ياخي إنت ما عايز تشوف سحر والله البت بتحسب في الأيام لي جيتك...
- شوف يا عوض عليك الله ما توكرني البت انا كانت مزازاني في نومي هناك.. دحين ياخي أنا خلني..
- إنت حا تزوق كدة لي متين سيك سيك معلق فيك...
- لا يا أخوي أنا ماني زيك أنا لي هسا لا قلت بريدك ولا إحساسي بيك حارقني في جوفي...
- (يضحك) المشكلة كلامك البين السطور كله واضح أنا قريتو...
- النبي فوقك كلامي فيهو شي يمسكوني منو..
- (يضحك لامن اتشرق) والله يا طارق أنا لو كنت جكس ما حا أفهم من كلامك إلا الريدة..
- كان كدي التراب في خشمي... ياخي الخرابة دي ذاتها تقول كانت شغالة في البوستة
ياخي كل تلاتة يوم جواب لامن بقيت اهضرب براي... لكن شيتكم دة أنا ماني قادر عليهو
ياخي أنا وش أبوي شفتو بعد دخلت الجامعة... أمشي أقولو داير أعرس.. يمين علي ينحرني شخخخخ..
- عاد شيل شيلتك بكرة حا اشوفك حا تسوي شنو...
- ياخي انا من هسي رجليني بقن ينطاقشن زي العندي شلل أطفال...
- كدي قوماك علي البوش ولي بكرة ربك كريم
.... ونواصل
Post: #711
Title: Re: أي بت شديدة بتحب ليها طُلبة (صبي بناي)
Author: Fadl Karrar
Date: 11-13-2007, 10:39 AM
Parent: #710

طارق / عوض جبريل
سلامات ومشتاقين
إذا دار محور سؤالكم عني فقد
Quote: كملت يا الحبان امتحاناتي وحمدت الله وسافرت لي أهلي...

ورجعت بالسلامة ومسلسلي المكسيكي كمل زماااااااااااان
وإنت لسه
ولسه
ولسه
ربنا يتمم ليك بالسلامة

إقتراح بسيط
بعدتخلص - إنشاء الله -
ياريت لو تنزل الحلقات مشفي علي قول المصريين
وخالي عضم علي قول السودانيين
أو خالي مداخلات علي قزل البورداب
تسلم
Post: #715
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-14-2007, 10:39 AM
Parent: #711


ود كرار كيفنك
والله طلبك علي العين والراس
نديك ليهو خالي عضم
بس هي كيفن تتم
Post: #712
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 11-13-2007, 12:05 PM
Parent: #1

د. طارق وحبان عوض ... سلام
والله أتاريني غبت كتير خلاص .....

بس لسة يا طارق الحكاية شكلها ممكن تستمر وتبقى (ليالي الحلمية) يعني أجزاء

يديك العافية و .... واصل


ملحوظة:
يديك العافية حقتنا مش حقة المغربة
Post: #713
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 11-13-2007, 12:17 PM
Parent: #712

Quote: - كان كدي التراب في خشمي... ياخي الخرابة دي ذاتها تقول كانت شغالة في البوستة
ياخي كل تلاتة يوم جواب لامن بقيت اهضرب براي...


أهضرب براي دي حلوه يادوووك أصحي أدينا الحلقة البعد الهضربه دي في الصحيان البعد

النومه الطولت دي وسلام لحاجة سكينة وعوضه وكمان تحت تحت كده علي السحرك جمال ويديها

البضاض ديلاك الذي حلاوة لقُوم ديل.

،،،،أبوقصى،،،،
Post: #717
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-14-2007, 10:43 AM
Parent: #713


ابو قصي كيفنك
اسكت ساكت من الحلقة الجاية اخوك اندرش جنس اندراشة
Post: #716
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-14-2007, 10:41 AM
Parent: #712


ود ابو العزائم كيفنك
سزلت منك زرياب كنيش ود اختي الايام دي معاي بي هنا في المغرب
وطمني عليك

بعدين العافية بتاعة المغاربة دي الله يسترنا منها
Post: #714
Title: Re: أي بت شديدة بتحب ليها طُلبة (صبي بناي)
Author: أبوالزفت
Date: 11-13-2007, 12:57 PM
Parent: #1

متابعين
بس زيد الجرعة شوية
وقلل الفترة الزمنية
Post: #718
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-14-2007, 10:45 AM
Parent: #714


ابو الزفوت با حبيب
ياخي انا راجل كومر قديم لو زدنا السرعة مكنتنا بتسيح
الله يدينا الوكت بس
Post: #719
Title: Re: أي بت شديدة بتحب ليها طُلبة (صبي بناي)
Author: نسرين جمال
Date: 11-15-2007, 08:04 AM
Parent: #1

سلام دكتور

شنو يعني تشحتف الناس كدا

زيد الجرعة حبة
Post: #720
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-16-2007, 10:09 AM
Parent: #719


نسرين كيفنك
جاييكم بي مهلة بس انتهي من الفي ايدي دة
Post: #721
Title: Re: أي بت شديدة بتحب ليها طُلبة (صبي بناي)
Author: أميرة فاروق عبد العال
Date: 11-20-2007, 10:30 AM
Parent: #1

(يا عايش في دنيا من أوهام خيالك..)
الكلام ماليك يادكتور..
بس هو مقطع من الأغنية ادندن به كلما فاض بي الحنين..
واعتذر لاقحام هذا الاحساس الخاص في بوست (عوض)..
لكن ربما لما لقصتك الشيقة من دور في تحريك الشجون الكامنة..
فالمشاعر والأحاسيس الانسانية لاتموت وإن مرت عليها أزمان..
وبقدرة القادر قد تتحور لتصبح طاقات محفزة لأشياء حالية أو مستقبلية..
هي فقط تنتظر الحدث الذي يفلح في تحريكها..
كنا نتابع بشغف.. ثم تحول الشغف الى تأملات..
ثم (وكما سطرت أعلاه) تحول الى تداعيات..
في الانتظار..
ودمت..
مودتي..
Post: #722
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-20-2007, 10:40 AM
Parent: #1


استاذتنا اميرة
اقدر لك احساسك وشاكرا لك مرورك من هنا
ـــــــــــــــــــــــــــــــــــــــــــــــــ
الحبيبين كيفنكم...
جاء العصر وقشرنا ومشينا على الظلط واتشعلقنالنا في حافلة زي الضبابين في الباب..
وصلنا قبل المواعيد ووقفنالنا في ركن جنب النادي السوري...
- هسا يا عوض عليك النبي جايبنا بدري كدي لي شنو
- ياخي احسن من نجي متأخرين بعدين ياخي أنا مقلق شديد ما عارف ليه
- ياخي انت موش الجكس طمنك وبعدين انت خاطب رسمي ما لعب يعني
- بس ياخي ابوها الأيام دي مركب ليه وش وشكلو كدة حا يدق لي جرس
- ياخي انت بتكبر الأمور براك..
ظهرن البنيات من بعيد كدة ماشيات يتفدعن... وحات الله سمحاتلهن جنس سماح
أنا أصلي كان لي.. بقيت ارجف كلي وخشمي بقى مر خلاص بس تقول عندي ملاريا
وجاني هبوط رسمي وجسمي بقى ماهو قادر يشيلني.. واحناكي بقن يكركبن زي حديدة التلغراف.. كككك كجك كككك
وعوض يبلع في ريقو....زي البقرة وكتين تتوهط وتقعد تجتر في البرسيم...
وحات الله حنيت عليهو... البنيي دي إن بقت طارت منو أنا حا أعوعي قبلو..
- جكس عوض: يا سلام ياخي الدكتور كله معانا حمد لله على السلامة..
- الله يسلمك مشتاقين والله
- حمد لله على السلامة يا دكتور
وحاتكم يا الحبيبين البت دي وكتين مدت لي إيدها اتلبشت رسمي بس فضلي
يدقولي الزار... يمين مسكت ايدها وغلبني افكها كله كله... وجسمي كله مشى موية
البنيي ندياني ولابسالا قميصاً بني طويل كدي وتحتو بنطلون جينز والرجلين موهطات
في شبشب ليهو سيور كدي أليل جلد... والله بيسألني الاصبع أليلا الكبير زي الزلابيايي
وأصلي من غير وعي كنكشت في ايدها زي الاسمنت وكتين ييبس في الكوريق...
.. عوض فقعلو ضحكة لمن خلعني: يا دكتور انت حا تمسك يد سحر دي كتير...
الله لا تكسبك يا عوض شقيش تقبل.. .
وإن شاء الله الراجل الغيلد دة يحميك ليها...
إن كان أزيتني... أنا لاني قدر على الشي دة لاني حملو...
- كيفك سحر إن شاء الله بخير
- والله بخير بس فاقدنك
انت فاقداني أنا... وأنا فقدتة كله كله..
- تفقدك السعادة إن شاء الله
- عوض: يا طارق حا نتمشى شوية في شوارع العمارات
- أيي أحسن أصلها شوارعن ماها متل حقاتنا.. هاديي وحتي طيرم يغني ماهو زي ود أبرق أليلنا
اليوم كله مباري عمدات النور يلقط في الجندب وما خلالو زنكي ما بنالو فيهو عش..
لكن شوف طيرم هنا من شجرة منقي لي جوافي لي تمر هندي ..
حتى إن بقت صبت مطرة ما تسمع حسها في بيوتم المسقوفي صبي دي..
موش زي زنكينا... والله لا تعرفها مطرة ولا معركة ألت طالبان... طق طرق ططق..
ولا جالوص ناس عوض وكتين المطرة تخرتو بي زبالتو وترميهو جنب البيت والعجب وكتين يخمر
تاني يوم... يمين العفني تسد نخرينك لا تعرف نفسك في الحوش ولا في المستراح تزوزي فوقك الضبابين...
- سحر (تضحك): والله يا دكتور انت بتبالغ
- جكس عوض: عشان كدي خالتي كانت عايزة تجي معانا.. نفسها تضحك معاك لكن سحر
قالت ليها ياخي حا تأخرينا...
سحر... سحر... نان هي سحر نصاح... والله المثل بيقول تختها في الجرح يبرى... دي يختوها
في دبرة تبرى... يمين كسر مقلم كله كله يجبر... وااامغستي أنا...
عوض طبق جكسيهو من يدها ومشوا لي قدام يتهامسوا وأنا وسحر من وراهم...
وحاتكم يا الحبيبين أخدتلي شوفي في وشها... وحات الله قمرة رسمي والعجب الخصلة النازلي
من شعرها وسط عيونها وتتمايل من الرموش دي لي دي زي زمبلك ساعة الصالون السمحي ديك... وانا قلبي ينطط معاها...
- كيف يا دكتور كانت السنة دي
- والله يا سحر عادية والبيطرة دي الله لا تكسبها كلها جري
- يا الله ياخي اول مرة تقول لي سحر كدة من غير القاب
يا ربي أنا هسي أقبل وين من وجنات البنيي دي...
نان أنا أسوي كيفن مع جبيرين وكشيرة وشو ديك وجبهتو وكتين يكرفسها زي شارع الدقداق...
وحات الله ان ماني خايف منو كان قلتلو الليلي يحصلني عوض...
- ياخي انا ما عارف اقولك شنو بس جواباتك خففت علي كتير في مصر..
- انا كنت بكتبها ليك لانه دي رغبتي... كنت بحس انه عايزة اتكلم معاك.. ما تسألني ليه
- يعني أنا ما كنت عايز اتكلم معاك
- انت عندك قدرة عجيبة إنك تدس حاجاتك وأنا ما عارفة بس حاسة إنه ضايقتك
- أبدا والله... ما تقولي كدة ... لكن... والله ما عارف أقوليك شنو... ياخي الدنيا دي ماشة بالمقوب
- كيف يعني...
- يعني في حاجات تكون نفسك تسويها... وجنبك بس ما قادر تطولها... الظروف تجبرك إنك تتخلى
عنها مرغم ما بي خاطرك يعني... أنا وعوض ما اخترنا ظروفنا.. لكن لقيناها واقع قدامنا...
- بس العواطف صعب جدا الواحد يكتمها جواهو...
- العواطف دي لو ما مشت حسب الشي المرسوم ليها بتكون نتائجها كارثية
- ياخي الظروف ممكن نطوعها لو حاجاتنا كانت صادقة من جوة
- تعرفي يا سحر أنا أحيان كثيرة بحس إنه إنت أكبر من سنك كتير وحاجاتك مرتبة كدة
وعندك إحساس عميق بالناس حوليك....
- دي شهادة يا دكتور اعتز بيها... بس يا ريت أقدر اعمل كل الحاجات الفي نفسي... حاسة انه ما حا أقدر
- ياخي إنت الدنيا قدامك لسة وأوضاعكم الاجتماعية حا تخليك تحققي حاجاتك...
- تعرف أنا بديت أكره إنه نحن أغنياء... من موضوع عوض مع اختي والحاجات الحصلت فيهو كرهت القروش
- ليه ياخي في زول بيرفض النعمة
- ياخي القروش لمن تكون سبب تعاسة لي اختي الله ينعلها
- كيف... على فكرة من كلام عوض أنا حاسس إنه في كارسة جاية... ما عارف ليه
- أقول ليك شنو... بس أنا ما مطمئنة.. اعمامي كتروا من جايتم لي ابوي ودي ما عادتهم...
.... ونواصل
Post: #723
Title: Re: أي بت شديدة بتحب ليها طُلبة (صبي بناي)
Author: عبد الدائم سيد أحمد
Date: 11-20-2007, 11:30 AM
Parent: #1

Quote: ياخي انا ما عارف اقولك شنو بس جواباتك خففت علي كتير في مصر

اتاريك كل يوم جااااي دار الاتحاد تقلب فى البريد
Post: #727
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-21-2007, 02:05 PM
Parent: #723


النضيف كيفنك
عشان يعرفوك بتاع جاكات نحن جواباتنا كانت بتجي علي بيطرة موش الاتحاد
Post: #724
Title: Re: أي بت شديدة بتحب ليها طُلبة (صبي بناي)
Author: osman righeem
Date: 11-20-2007, 11:32 AM
Parent: #1

Quote: أقول ليك شنو... بس أنا ما مطمئنة.. اعمامي كتروا من جايتم لي ابوي ودي ما عادتهم...



وتاني قام جاب سيرةالبحر

خروج عوض
ونشوف الطلبة سحر الجداد و لانومو
Post: #725
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 11-20-2007, 12:58 PM
Parent: #724

أخي الحبيب طارق ...

والله ياأخوي قصتك دي مع سحر دايره بوست معلم ماطلبه

والريدة في حروفك ناطه لبره ذي المدماك حق الطوب الأعوج

كان ياأخي دوش ترمي الدرابه للحاج جبريل وذي ماتجي تمشي

ياأخونا الريدة دي صعبه خلاص ودروبه كلها مطباط كسير عديل كدي

برضو نقول ذي حبوباتنا مابيقولوا مواعيينه ديل البيغطيهم منو

كان كلو واحد بشوف ماعون غيرو نضيَف وعايز ياكل منو حتي لو تمرت

فؤاد تبل الروح وكدي والله جنس تساقط أقنعه وظهور أبطال الكتابه

ده سيناريو جاهزة أنا لوفي محل محمد السني دفع الله بكره بنجضوا

علي المسرح أن شاء الله خشبوا يبق فوقوا النار عديل ولعت القصة ياطارق

بس أم ريم ماتسمع الكسير ده مع تحياتي لسحر الساحرة وفي الدرب تلاقين

كيمان كيمان مونه جاهزة ياطلبه أجهر كوراكك ساي أقصد( كوريكك) وقلب علي

مهلتك طارق والواقف فوق السيقالة منتظر تجدع ليهوا فوق طالوشوا المونه

الفائحة محلبيتها حنة عرس عديل يازول واصلــــــ .........

،،،،أبوقصى،،،،
Post: #728
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-21-2007, 05:40 PM
Parent: #724

ود رغيم كيفنك
البحر باين عليه غريق خلاص
Post: #726
Title: Re: أي بت شديدة بتحب ليها طُلبة (صبي بناي)
Author: الزبير صالح الزبير
Date: 11-20-2007, 01:37 PM
Parent: #1

طارق يالحبيب
يا اخوي والله ما عارف اقول ليك شنو بس تشحتف في روحناساكت الله يديك العافية بس بالله سرع شوية
(كبر خطوتك)
Post: #729
Title: Re: أي بت شديدة بتحب ليها طُلبة (صبي بناي)
Author: Abutalib Elgorashi
Date: 11-22-2007, 02:19 AM
Parent: #726

شكلك عايز تاكلنا حنك ساي في حفلة العرس حقت عوض ما طارق بعد ما صبرنا عليك الزمن دا كلو
كدي ما كويس يا دكتور!!!!!!!!!!!!
Post: #730
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 11-22-2007, 09:21 AM
Parent: #729

Quote: حتى إن بقت صبت مطرة ما تسمع حسها في بيوتم المسقوفي صبي دي..
موش زي زنكينا... والله لا تعرفها مطرة ولا معركة ألت طالبان... طق طرق ططق..


طالبان دي خليها في سرك - خرجين 1988

واصل الإبداع يا الحبيب

بس انا كمان كنت بشوفك بدور على الجوابات في الإتحاد - النضيف عندو حق
Post: #735
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 12-06-2007, 10:18 AM
Parent: #730


ود نجيلة كيفنك
ياخي نحن البيجيبنا من لكوظ للاتحاد بس الحفلات
الجوابات دي كانت واصلانا لحدي عندنا

وخليك من عبد الدائم دة اظنه خرف
Post: #733
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 12-04-2007, 04:17 PM
Parent: #729


ود القرشي كيفنك
انت خلاص عرست ليهو
Post: #731
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 11-25-2007, 11:47 PM
Parent: #726

الزبير ود صالح كيفنك

هو نحن قادرين علي الفشيق لامن نكبر الخطوة

محبتي الاكيدة
Post: #732
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 12-04-2007, 11:19 AM
Parent: #1


الحبيبين كيفنكم...
واصلنا ونستنا مع البنيات لامن وصلنا اسكريم 41..
وعزمننا الداندورمي... عوض يسكت يتمطق في الداندورمي ويتبسم ويكب في الجلكسات...
انا نسيت داندورمتي وسرحت في الدنيي الماهلي دي...
يعني هسا لو الواحد ظروف اهلو كانت احسن من كدة موش كان ساهل جدا انه الواحد يقول
للبت دي الشي الكاتمو في نفسي وشغال يهري فيهو ليل نهار...
الغريب في الموضوع انه امي (رحمها الله) حاسابي ودايما تقولي: يا ولدي الدنيي دي شن طعمها
ما تسوالا شي والله دة كريم قاعد يدي الجني دحين انت تم قرايتك والله بيديك الفي مرادك...
وحاتكم يا الزينين اتلفت شفت في وش البنيي... البت دي لامن تحدر عينها وتشوف فيني من تحت تحت
وبياض عيونها يبقى اكبر من السواد زي ملاح النعيميي المضرضرلهم فيهو فلفل اسود في طرفو
احس بي روحي دي عايزة تمرق ضُمة ضُمة... ونفسي يتخمة...
والعجب وكتين تعضعض في شفايفها بي سنونها البيض ديك بس طرف قراصي متمري بين
صحنين ألات صيني بُيُض... اصلو قلبي ينتلو في جنس نتلي علي المتري (طرمبة الموية)...
والعجب وكتين تضحك ويظهر لسانها ولهاتا... يمين بالله خُشافايي في كورية جلي...
المغسي تركبني من راسي لي رجلي وقلبي يقولي امسكها من ايدها واعوعي وقلها وحات الله بريدك...
- دكتور طارق مشيت وين...
- ابدا والله بس بفكر في الدنيا العجيبة دي..
- ليه عجيبة...
- الصدفة العرفنة فيها بعض كانت كلها عجيبة مع انه نحن تلاتة يوم شغالين عندكم وما شفناكم
يعني كان ما شلاقة عوض ما كنا عرفناكم ولا هسا قاعدين معاكم... ولا حتى نحلم بي كدة...
- ندمان انك عرفتنا ولا شنو...
- عيب عليك ياخي تقولي كدة... بس انتو ممكن تكونوا ندمانيين... نحن لا
- منو القاليك... عليك الله شوف في عيون جكس عوض دة وهي بتتكلم معاهو...
موش بتحس بانها كأنو الدنيا دي كلها حقتها هي براها...
- تعرفي أنا دايما بسأل عوض إنه اختك دي شايفة شنو سمح فيهو... يعني نحن ناس على باب الله...
- انت بتقيس الحاجات بالقروش بس... يعني حتى المشاعر بقت عندها تمن..
- لا انا ما قصدت كدة لكن انا صراحة ما شايف حاجة بتميزنا عن باقي الشباب ويمكن نكون ما عندنا
مؤهلات في مجتمعكم دة كله كله... يعني لو في ميزة صغيرة إننا ضاربين الهم بالفرح ودي الدنيا كلها عندها...
- بس يا سيدي قلب اختي انا من الدنيا دي كلها ما حب غير عوض الانت شايفوا دة
- هو قاعد يقول يضع سره في أضعف خلقه... وانا ما شايفلي سر عندو
- انت في حاجات كتيرة ما شايفها... متشائم بي شكل غريب خلاص
- ما عندي حل غير اتشاءم... وانا لي هسة ما مقتنع انه عوض ممكن يتزوج اختك وشايف انه مشوارو طويل جدا
وما اظن اهلك حا يقدروا يصبروا عليه خصوصا ود عمك كان جاهز تقريبا وما ناقصوا حاجة.
- المهم انه اختي عايزاهو ودة حقها...
- اقول ليك حاجة عوض ما حا يتزوج اختك دي موش لانه ما عايزها... بالعكس هو بموت فيها بس الظروف كلها شغالة
ضده... وضعوا في البيت وحاجة اهلو ليهو وحكاية اعمامك دي ما مطمنة...
- والله يا دكتو طارق انا برضو ما مطمئنة وحاسة انه في حاجة شغالة من ورانا كلنا بين بابا واعمامي وخالتي يوم
قالت لي الله يستر... لانه راجلها قال ليها بابا اتكلم معاهو في الموضوع دة وشكله عايز يتحجج علي عوض بالوقت
مع انه راجل خالتي رايه انه عوض زول كويس والبت عايزاهو لكن انا عندي اعمام صعبين شديد ومسيطرين علي بابا
- يعني عوض تخوفه في محله
- اكيد بس انا قدام اختي ما قاعدة اقول كدة لانه خايفة عليها شديد... وماما مقلقة شديد من الموضوع دة
ونحن طالعين قبيل بابا قال لي اختي كلمي عوض انا عايز اشوفو ضروري يوم الجمعة يجي بدري شوية
وطبعا اختي مفتكراهو موضوع عادي بس انا من لهجة كلامو ما مرتاحة... لكن اقول ليك حاجة... انا خايفة
خوف شديد خلاص...
- بعد دة كله ما عايزاني اتشاءم...
- العايز ليه حاجة بيسعى عشانها ولا شنو يا دكتور...
- دة كلام صاح... بس لمن تكون متأكد إنه الحاجة دي ما حا تصلها... مقاديفك كلها بتقيف...
- انت حاول وبتصل...
حسيت البنية بتدردق فيني عديل كدة وعايزاني اقع بي لساني... لكن وين... مافي طريقة...
اهضرب كدة جواي واتحرق اخير من بعدين اقعد اعوعي قدام الناس واقعد افتفت وانبرش...
- جكس عوض: يا دكترة شنو ياخي قاطع مننا ياخي ادينا حنك حنكين...
اديك حنك انا... هي اختك دي خلت فيني حنك ما وقع من زمان.... ان شاء الله انقصة انا..
- يا ستي انت فاضية من عوض عشان تسمعي حنكنا...
ساقتني من يدي ومشينا قدام سحر وعوض وسبقناهم...
- ياخي انت عايز تنطق متين ياخي حرام عليك
- انطق اقول شنو وانا مبلم كدي...
- طارق جبريل انا قريت جواباتك كلها... يمين بالله اي زول يفهم منها انك بتريد سحر
- اقول ليك شنو... اها انا لو قلت ليها بريدك وما حصل نصيب اقبل وين...
اقع البحر... ولا اقول لي ابوي اطلع فيني بالقندران دة فجخني...
- (تضحك) ما للدرجة دي يا دكترة... بس انت قح ونحن بنكمل الباقي...
- اقح وين... هو انا صدري فضل فيهو هواء...
- (تضحك) مليان شنو يا ربي....
- يا زولة هووووي خطيبك ياهو داك امشي عليه انت المسلطك علي منو..
- خلاص بننتظرك مع عوض يوم الجمعة اوكي...
- ربك يسهل
ودعنا البنيات ومشينا علي امتدادنا نشوانين...
ومن غبانا نسينا انه بعد شارع 61 مفروض نمشي بالجهة التانية من الشارع عشان كتيبة الجيش...
وبس نصلكم جنب باب الكتيبة ونسمعلكم: ثاااااااااااااااااااااااااااااااااااااااااااااااااااابت
عوض من الخلعة انبطح في الواطة كله كله... وانا عيوني بقن يشوفن يمين بس زي الزول العنده قطيعة...
ورجليني يرجفن علي ملاية العنقريب وكتين يكون ضاربها الهنبريب...
وبي شوية صوت مبحوح كدي قلت لي عوض: خلاص رشانا... لحقنا أمات طه...
.... ونواصل
Post: #734
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 12-05-2007, 08:40 AM
Parent: #732

والله يادكترة جنس كسيَر بس بالداخل الترمسة حقتك بطنها غريقة خالص بس كانت أيام لها إيقاعه عوض والراجيهوا الله يستر لكن
Quote: ورجليني يرجفن علي ملاية العنقريب وكتين يكون ضاربها الهنبريب...
وبي شوية صوت مبحوح كدي قلت لي عوض: خلاص رشانا... لحقنا أمات طه...


القلوب لحقن بس الباقي علي الشايل القلب مستمتعين واصلــــــ ....

نحن هنا

،،،،أبوقصى،،،،
Post: #737
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 12-07-2007, 05:31 PM
Parent: #734


ابو قصي الجميل
وحاتك الشايق القلب ذاتو يتوجع
Post: #736
Title: Re: أي بت شديدة بتحب ليها طُلبة (صبي بناي)
Author: Sahar Yousif
Date: 12-06-2007, 02:03 PM
Parent: #1

مبالغـــــــــــــــــــــــــــــــــــــــــــة عديل كدة
انا ما قدرت اوقف نفسي لغايت ما قريت كل البوست ما شلهتنا و جنتنا بس جن لذيذ و بالجد دايرة اعرف ما بعد ذلك يا طاروق ...
زيدنا .... سريع و ما تقيف
Post: #739
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 12-10-2007, 10:14 AM
Parent: #736


الفاضلة سحر كيفنك
والله الكبر حصل ولوزدنا السرعة بندقش عديل كدة

محبتي الاكيدة
Post: #738
Title: Re: أي بت شديدة بتحب ليها طُلبة (صبي بناي)
Author: نسرين جمال
Date: 12-08-2007, 11:00 AM
Parent: #1

يادكتور كيف حالك

منتظرين الباقي قبل الارشيف

يعني قبل يوم 21/12 تكون واصلت لينا
Post: #740
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 12-17-2007, 06:22 AM
Parent: #738

دخلنا للمعايده ... وكمان للعتاله

وكل عام وانتم بخير
Post: #741
Title: Re: أي بت شديدة بتحب ليها طُلبة (صبي بناي)
Author: خالد الجبل
Date: 12-17-2007, 06:33 PM
Parent: #1

طارق
كل سنة وانت طيب ,دا العيدالكم للمسلسل بتاعك دا
شوف يا حبة يا تكمل يا بناكلك خروف
Post: #742
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 12-19-2007, 12:40 PM
Parent: #1

كل عام واحباب عوض بالف خير


......
ود نجيلة شكرا على العتالة

ود الجبل
خروف شنو مع الحمى النزفية دي
Post: #743
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 12-26-2007, 02:46 PM
Parent: #742

وين ياراجل خليتني ما بين نجم سماء وجميلة أرض أحفظي ما عليكي



،،،،أبوقصى ،،،،
Post: #744
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 12-30-2007, 08:37 AM
Parent: #743

يا ود جبريل ...

مافي داعي تشكرني كل مرة على العتاله ....
Post: #747
Title: Re: أي بت شديدة بتحب ليها طُلبة (صبي بناي)
Author: anas hassan
Date: 12-31-2007, 10:54 AM
Parent: #743

رهيييييييييييييييييييييييييييييييييييييبه

طارق الجكس كان زى دى ولا ........................؟
Post: #745
Title: Re: أي بت شديدة بتحب ليها طُلبة (صبي بناي)
Author: أميرة فاروق عبد العال
Date: 12-30-2007, 10:37 AM
Parent: #1

استاذ/ ياسر..
والله المرة دي الشكر مننا ليك..
ذكرتنا الموضوع ده بعد نسيناه..
ياربي طارق جبريل ده قصده شنو؟؟؟
لابد فوق رأي ولا ساي؟؟؟
Post: #746
Title: Re: أي بت شديدة بتحب ليها طُلبة (صبي بناي)
Author: emad altaib
Date: 12-30-2007, 11:08 AM
Parent: #1

دكتور / طارق جبريل ياجميل

كل عام وانت بالف خير

كنا بنصفق من بره

الان منتظرين عوض

ودمت بود
Post: #748
Title: Re: أي بت شديدة بتحب ليها طُلبة (صبي بناي)
Author: Abutalib Elgorashi
Date: 01-05-2008, 11:06 PM
Parent: #746

تم شهر والدكتور ما ظهر
معقولة دي
حتى اخر تعليق كان من السنة الفاتت
شنو الحكاية؟؟؟؟؟؟؟؟؟
Post: #749
Title: Re: أي بت شديدة بتحب ليها طُلبة (صبي بناي)
Author: زرياب كنيش
Date: 01-06-2008, 11:09 AM
Parent: #748

يا خينا
لما مشيت السودان صورته ليك عوض مخصوص لي البوست دة
حانزل الصورة لما الموضوع يخلص..
.
.
( كيف تمارة وأقدال )..
Post: #750
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 01-17-2008, 10:21 AM
Parent: #749

Quote: ذكرتنا الموضوع ده بعد نسيناه..
ياربي طارق جبريل ده قصده شنو؟؟؟
لابد فوق رأي ولا ساي؟؟؟






جاي تواصل ياطارق ولا نشوف غيرك ....
Post: #751
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 01-20-2008, 08:01 AM
Parent: #1

دكتورنا الجميل
ما تتم النصيبي دي اصلوا باقي لي صاحبك قطروا صفر
تسلم
Post: #752
Title: Re: أي بت شديدة بتحب ليها طُلبة (صبي بناي)
Author: mohanad haimoura
Date: 01-29-2008, 09:13 PM
Parent: #751

الجميل طارق جبريل

يازول انت البوست ده نسيتو ولا شنو


كل الود
Post: #753
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-29-2008, 11:06 PM
Parent: #1


الاحباب نسرين - ياسر نجيلة - ابو قصي- انس - اميرة فاروق - ود الجبل – عماد الطيب- ود القرشي- زرياب-السمؤل- مهند ود حيمورة
وحاتكم كنت مزنوق زنقي شديدي خلاص في الشغل وكلما القالي فرقة اتاوق علي المنبر القاهو مليان شكل ارجع صادي لي شغلي
دحين ود نجيلة ما قصر تب وبقى حارس البوست والله يقدرنا علي جزاهو هو وابو قصي...
سامحونا

..............................
الحبيبين كيفنكم
يمين من الخلعة الدخلت فينا ما قدرنا ننطقلنا حرف
- شنو يا شباب ما عارفين الاقتراب ممنوع هنا
- ايي الشيب اليملأ راسك كان طيرتنا شوية الريدي في الراسنا
- (يضحك) ريدة شنو يا زول وانتو جايين من وين ذاتكم
- ياخي نحن حابلنا بنات وجايين مفرهدين ونتخوجج علي جيت
انت بي كواريكك دي حشيت قلوبنا حش بالخوف الله لا تكسبك
- (ميت من الضحك) يا زول هوي دة كلام شنو دة
- ايي شنيني ام قرينات شوف صاحبي دة رقدتو خل كيفن وجسمو كله جاري موية
والله يستر علي البنطلون لا يبقى سوالو فيهو شي..
- خلاص امشو يا شباب بس تاني ما تقربو من هنا
وصلت البيت اخدتلي دش وجريتلي وصلي ألت كهربة وجبتلي مسجلا محسكن كدي
باب ما فيهو ووكنين تطلع منه الشريط يجيك ناطي زي بزقة السفة كدي
وختيت محمد كرم الله:
وكت السمحة في هيبات تتجلى
تراني حلفت بي الله
تشيل خطواتها في ايقاع وحلات ايدينها تدلى
تودي صديرها قدامها تخلي سبيبها يتدلى
تخلي الدارة فوق نيرانها تتقلى
طبيعي غزير لا باروكة لا تلا
كانه حرير وكاسيهو السواد حلى
......
قليبي انا اباها مشغول ديمة يا خلا
اقولو خلاص نخليها يقولي هي نان بتتخلى
اقولو كفاك تبل الشوق وهو شوق الجن بتبلى
تعال يا بدر عاين بدرك الهلا
..........
مغستني يا محمد كرم الله هريتني هري الله لا تكسبك..
غناك أماني ماهو سمح..
ـــــــــ
- امي (رحمها الله) يا ود انت مالك ماجيت داخل اكلتلك شي
- يمة ماني دايرلي اكل شبعان
- قوم ان بقيت ماك داير الفول ولا الشعيريي اقدحلك بيض
- يمة بيض شنو في الليل دة
- انت اصلك كنت وين
- مع عوض
- انا مشيك مع عوض دة ماهو عاجبني وكلما تمشي معاهو تجي ملبش
ماني عارفي قاعد يوديك وين...
- يمة وحاتي عندك مافي شي بس فتران وداير انوم
- الداير ينوم بيشغل محمد كرم الله
-(ضاحك) يمة انت مالك مزازاني بناتك لا جوة امشي اتونسي معاهن
-والله يا ابن الهرمة ما بخليك واوعك تخت في بالك شيت عوض دة
صحبك مجنون وامه مجنونة اكتر منو.
- ما ياها صاحبتك
- خرفت علي كبرها اسويلا شنو...

امي دخلت لي بناتها لااااجوة وخلتني مع محمد كرم الله يدودر فيني
السماء صافي والنجوم تلعلع فوقها والقمر نورو باقي....
يا ربي هسي انا اقبل وين....
البنييي دي وحات الله سماحتا تخلي الزول يغبي وفوق دة ودة رايداني
وامي تقولي خلك من شيت عوض دة...
عوض ان بقا ما عرس البت دي تراهو حاول وبلى شوقو من ريدها..
الباقي علي انا زي المشتهيلو مديدة تمُر ومنتظر اخواتو ينفَسِن...
لا نفسَن لا لميت في المديدي....
....
عوض جرا سلك الباب وجاني انتنى معاي في السرير...
- طارق باقيلك الزول دة دايرني في شنو وعايزني اجي بدري..
- انا شن عرفني بيه الشي الغليد علي شجر شارع النيل دة
- ياخي والله انا راسي ضارب خلاص
- اصبر لامن تمش وتسمع كلامو وبعداك شوف الحاصل شنو واتصرف على أساسو
- أنا باقيلي عايز يودرني وشايف القصي بعيدي علي بتو تنتظرني
- انت كدي ما تسبق الاحداث انتظر وشوف بعد بكرة حا يحصل شنو
- ياخي كدي فكر معاي...
- اييي افكر معاك شنو.... انا غرقان لي روحي دي وماني عارف نفسي ماشي علي وين
- (ضاحكا بشدة) باقيلي وِكِر لي سبيب راسك
- اييي خلني.. انا شيتي ما بيتعدل ضُمة ضُمة.... الكلام انت
- كيف الكلام دة
- خالتك عشة جات هسي وقالتلي كلام زي حناضل القيزان والشي الشايفو انا
اكمد حاجاتي في صدري واموتبها... اقلك شي جُر العنقريب داك وارملك فيهو
مرتبة وشوف في سماء الله ولا يوم الجمعة بتتحلا...
ونواصل
Post: #754
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-31-2008, 10:06 AM
Parent: #1

جاييك يا عوض
Post: #755
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 01-31-2008, 10:30 AM
Parent: #1

يجازي محنك داير تجبيلنا الهوا مالك
انت عارف القصيدي حقت منو؟
تسلم
Post: #756
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 01-31-2008, 10:31 AM
Parent: #1

يجازيك
انت عارف القصيدي دي حقت منو؟
تعال يابدر تعال شوف بدرك الهلا
Post: #757
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 01-31-2008, 05:25 PM
Parent: #756


السمؤل كيفنك
يا راجل وين اراضيك

النبي فوقك ان ما قلتلنا كتب النضمي السمح دة منو
Post: #758
Title: Re: أي بت شديدة بتحب ليها طُلبة (صبي بناي)
Author: mohanad haimoura
Date: 01-31-2008, 05:50 PM
Parent: #757

الجميل / طارق جبريل
والله الزول طول ما ضحك من قلبو كده


تسلم يا راقي



مهند حيموره
Post: #759
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-01-2008, 10:20 AM
Parent: #758


الاعز مهند ود حيمورة كيفنك
يا زول اضحك لامن الله يغفرلك
هي الدنيا دي فيها شنو
كوم تراب آخرها


محبتي الاكيدة
Post: #761
Title: Re: أي بت شديدة بتحب ليها طُلبة (صبي بناي)
Author: صلاح الأحمر
Date: 02-01-2008, 03:55 PM
Parent: #759

الحبيب طارق
كل مره أغيب لي كم شهر كده وارجع عشان اشوف
حكاية عوض وصلت وين وفي النهايه ظهر استهبالك
بالمكشوف ، طيب ماكان من الأول تقول لينا
اسمهاحكاية طارق وسحر وبلاش لف ودوران وتريقه
على عوض المسيكين.
متعة لاحدود لها.
تشبيهاتك فيها ابداع مجنون.
الله يديك العافية
مع صادق مودتي. أبو رضا
Post: #762
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-01-2008, 05:31 PM
Parent: #761


ابو رضا
مالك عايز تجيب لينا الهواء
يعني تاني الواحد ما يفتو معاك

انا ناس الحاج عبد الله ديل
بخاف من حركات الصواني بتاعة الطعمية حقتهم
Post: #760
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 02-01-2008, 03:29 PM
Parent: #1

حبيبنا دطارق
القصيدي كتبها الشاعر الكبير عبد الله محمد خير
لكن المعني بالاسم تعال يابدري هو.....
اووول انت با علي قول عادل امام
تسلم
Post: #763
Title: Re: أي بت شديدة بتحب ليها طُلبة (صبي بناي)
Author: HAYDER GASIM
Date: 02-01-2008, 10:39 PM
Parent: #760

Quote: بس لسة يا طارق الحكاية شكلها ممكن تستمر وتبقى (ليالي الحلمية)


أي والله ... حيرتني يا طارق ... فكيف تستولد كل
هذه الأخلية؟ أو ... من أين تستعيرها؟ عموما ...
أهنئك ... فأنت ذو موهبة ... وماني مستعجل, بس
خذ فى بالك لازم نشوف الشغل ده فى شكل رواية...
وقريبا ... ما أمكن ... والمقدمة علي.

مع بازخ مودتي
Post: #765
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-02-2008, 11:52 AM
Parent: #763


حيدر وليد قاسم كيفنك
يا زول رواية عدييل كدة
ياخي دة شي كبير خلاص وانا لا ارقى لهذا المستوى
كل ما في الامر انني عايشت حكاوي وقصص ما بين الامتداد والبركل
واعتقدت انها يجب ان تروى هنا لطرافتها ومأساتها في الآن نفسه
لكن تبقى مجرد حكاوي على طريقة الحبوبات لا اكثر

الله يجبر بي خاطرك ياخي

محبتي الاكيدة
Post: #764
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-02-2008, 11:41 AM
Parent: #760


السمؤل كيفنك
تعال يا بدر شوف بدرك الهلاااا
Post: #766
Title: Re: أي بت شديدة بتحب ليها طُلبة (صبي بناي)
Author: السنجك
Date: 02-02-2008, 04:15 PM
Parent: #764

طارق جبريل


هذاابداع ....قصه واقعيه لشباب متعلم ومكافح لتغيير ظروف لم يكن لديه يد فى تشكيلها...داست هذه الظروف على هذه القلوب الشابه ولكن طارق حول هذا الالم الى حروف وكلمات تنطق وابداع يشدك ويجعلك لاتغادر كرسيك ...وصدقنى ياطارق لقد منعتنى (وانا اتابعك) لاذهب لاشرب جرعة ماء وانا عطشان

والقصه تعبر عنا جميعا نحن ابنء الناس التعابه الذين لم نستسلم لظروفنا التى وجدناها امامنا من فقر... واباء وامهات يدقون على الصخر ليوفروا لنا لقمة العيش

وتمردنا على هذا الواقع وتعلمنا واقتحمنا الجامعات بتفوق وكاى بشر وقعنا فى الحب ..فنحن بلا قروش ولكن ليس بلا قلوب

وقد صورت ياطارق حالنا بمهارة ..حالة ابناء الناس التحت ماديا(وفوق اخلاقيا)حالتناحالةمن تقف الماده سدا منيعا بينه وبين قلب من يحب حالة من يسحق بلدوزر الفرق الفرق الطبقى قلبه سحقا ليصبح رمادا

نحن ياطارق نحاسب على ظروف لم نخلقها وليس لنا يد فيها ...ظروف هى ظروف اهلنا ولم نمنح الفرصه الكامله لنخلق ظروفنا بايدينا وبعد ذلك يحكم علينا ...فنحن يحكم علينا حتى قبل ان نمنح الفرصه لنثبت وجودنا مع ان الفرصه التى وجدناها (التعليم ) تفوقنا فيها ,....... وكان هذا الحكم سيكون عادلا اذا اتيحت لنا الفرصه ...اما الاحكام المسبقه فهى غير عادله ..الحكم بسحق القلوب الغضه بجريرة الفقر فهذا ظلموجور على هذه القلوب فى اول تفتحها على الحياه

وقد تفوقت على الابداع نفسه عندما عرفتنا وادخلتنا فى هذه البيوت الشريفه بيوت ناس حاجه سكينه والوالده (رحمها الله ) واصبحنا جزء منها ونحن اساسا منهم واليهم

وحتى لم تبخل علينا بكم زياره للناس الفوق ناس سحر والناس ابان كروش الناس البلا قلوب
بس عندى طلب واحد ياطارق (ماتردد حكاية اعذرونى للسرد الممل) فسردك ياطارق ممتع وجميل (وماتتخيل صحيت فينا شنو) وتمنى ان تواصل فى التفصيل حتى حوار عوض مع بنته وحوارك مع سحر واحاسيسك وانت تتنقل بين الناس الفوق والتحت

وكم هى جميله المفردات الشايقيه التى تكتب بها وكم هى طاعمه وجعلتنى اشم فيها ريحة البلد





السنجك
Post: #767
Title: Re: أي بت شديدة بتحب ليها طُلبة (صبي بناي)
Author: emad altaib
Date: 02-02-2008, 05:12 PM
Parent: #766

ـــــــــــــ
شكرا يا دكتور
مقدير ظروف العمل .. لكن برضو ما طول الغيبه!!
ولك كل الود الحار
Post: #771
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-04-2008, 10:55 AM
Parent: #767


عماد ود الطيب كيفنك
تسلم يا حبيب

محبتي الاكيدة
Post: #768
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-03-2008, 10:44 AM
Parent: #766


السنجك كيفنك
كلامك سمح بالحيل
الفقر يا عزيزي كان دافعا قويا لنا
مجانية التعليم حينها كانت النافذة الوحيدة لنا لكي نخرج من النفق
نعم لم نختر ظروفنا ولكنا كافحنا للخروج منها

صدقني انا هنا انقل ما عايشته وبصدق كبير ودون حقد
احاول ان انقل حياة عشتها بتفاصيلها المملة
لا انشد عبر او نصائح لاحد
فقط اود ان اعكس جانب من حياة الخرطوم بشقيها (التحت والفوق)


لم استطع مجاراة كلماتك لعمقها

محبتي الاكيدة
Post: #769
Title: Re: أي بت شديدة بتحب ليها طُلبة (صبي بناي)
Author: osman righeem
Date: 02-03-2008, 04:51 PM
Parent: #1

Quote: وكت السمحة في هيبات تتجلى
تراني حلفت بي الله
تشيل خطواتها في ايقاع وحلات ايدينها تدلى
تودي صديرها قدامها تخلي سبيبها يتدلى
تخلي الدارة فوق نيرانها تتقلى
طبيعي غزير لا باروكة لا تلا
كانه حرير وكاسيهو السواد حلى
......
قليبي انا اباها مشغول ديمة يا خلا
اقولو خلاص نخليها يقولي هي نان بتتخلى
اقولو كفاك تبل الشوق وهو شوق الجن بتبلى
تعال يا بدر عاين بدرك الهلا


طارق يا غالي
والله من غير ما تقول الروووووووووب
ان مسامحك وعافيلك
الشلهته السويتا فينا

ما شفت عوض!!!!!!
Post: #770
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 02-04-2008, 08:52 AM
Parent: #769

.... وانا قاعد مصنقر راجيك
.... وتأكد انو منديلي ماجف من دموع الضحك ودموع ذكريات "كده" بتحركها فينا كلماتك البتفكها فينا بعفويه دي ,,,


Quote: وجبتلي مسجلا محسكن كدي
باب ما فيهو ووكنين تطلع منه الشريط يجيك ناطي زي بزقة السفة كدي


... راجيك ... حتي تضاء الأنوار ,,, والقط قزاز الببسي ... (سنما كلـ.... ـيوم)
Post: #777
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-05-2008, 11:04 AM
Parent: #770


ود نجيلة كيفنك
يا حبيب والله الشوق هردبيس
وحاتك يا ياسر
انا بقى فكوني في المنبر دة علي اخليكم تزحوا من الضحك
بس كيفن القى الوكت
Post: #776
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-05-2008, 11:00 AM
Parent: #769


ود رغيم كيفنك
وحاتك اخوك مزنوقلو جنس زنقي
يمين زي العندي الف حوض أليل برسيم من لبقة لي لبقي
والروووووووووووب قلتها من زمان

محبتي الاكيدة
Post: #772
Title: Re: أي بت شديدة بتحب ليها طُلبة (صبي بناي)
Author: شول اشوانق دينق
Date: 02-04-2008, 11:41 AM
Parent: #1

إنت لسه يا اللخو؟

شول اشوانق
Post: #778
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-05-2008, 11:07 AM
Parent: #772


كيفنك
يا زول دي شنو القنبلة الخاتيها في برفايلك دي
يل زول المغرب دي ما فيها مصانع تلج عشان نكسرو
Post: #773
Title: Re: أي بت شديدة بتحب ليها طُلبة (صبي بناي)
Author: نسرين جمال
Date: 02-04-2008, 11:51 AM
Parent: #1

الاخ طارق كيفك

وينك ياخي

منتظرين باقي القصة
Post: #779
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-05-2008, 11:13 AM
Parent: #773

نسرين كيفنك
حاضر يا ستي حا نكمل بس اطلع من زنقة الشغل دي
Post: #774
Title: Re: أي بت شديدة بتحب ليها طُلبة (صبي بناي)
Author: سامي عبد الوهاب إدريس
Date: 02-04-2008, 12:12 PM
Parent: #1

إزيك يا جبريلا

مشتاقين والله

تحياتي لك والأسرة

ومنتظرين باقي الإبداع دا
Post: #775
Title: Re: أي بت شديدة بتحب ليها طُلبة (صبي بناي)
Author: بابكر التوم
Date: 02-04-2008, 04:31 PM
Parent: #774

ود جبريل
ماتراك شديد ونصيح الحمد لله شفقتنا يا أخى
باقى ليك اخير تتم النصيبى دى الناس خلاص ما
فترت . لك مودتى ياريس طولت الغيبة بهنى و
وبهناك يا زول انشاء زنقة الشغل فكت شوية
وصابرين برضوا
Post: #782
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-09-2008, 00:53 AM
Parent: #775

ود التوم كيفنك
وحاتك ساكين المعايش
بس قربت تتفكة الزنقي
Post: #780
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-06-2008, 10:19 AM
Parent: #774


سامي كيفنك
حمد لله على السلامة
والله حسدتك علي قعدة المطعم الجنب المطار ديك
Post: #781
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 02-06-2008, 10:44 AM
Parent: #1

يا جماعة إنتو شنو شابكين الراجل: يا طارق كمل الحكاية يا طارق كمل الحكـ .....

وبعد ما يكملا نمشي وين؟
نحن ما خلاس أدمنّا ..

يا زول إنت بس إستمر .. وحكاية تكمل دي ما تديها أضان.

تحياتي لعوض والجيكس
Post: #786
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-13-2008, 06:33 PM
Parent: #781


حبيبنا ابو العزائم
كيفنك
يا زول شايفك متخوجج مع بورداب الخرطوم
وحاتك حسدتك عديييييييييييييييييييل


تسلم يا حبيب
Post: #783
Title: Re: أي بت شديدة بتحب ليها طُلبة (صبي بناي)
Author: امنة عبد الكريم
Date: 02-09-2008, 11:26 AM
Parent: #1

د.طارق كيفنك

ابقي واصل


قمة الامتاع هو ما تفعله

ارجو الا تنتهي هذه القصة



لك الود..
Post: #784
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 02-11-2008, 10:46 AM
Parent: #783

... كلما يمشي بعيد لزم علينا نرجعوا للصفحات الاولي

اصلوا عندي تعاقد مع القراء عشان مايزهجو من البحث
Post: #787
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-14-2008, 10:27 AM
Parent: #784


ود نجيلة
يا يابة نعتلك في سمح الوليدات
باقي اخوك مزنوق وسط المغاربة ديل
عامل زي الزيتونايي في سلطة الحمص
Post: #785
Title: Re: أي بت شديدة بتحب ليها طُلبة (صبي بناي)
Author: امنة عبد الكريم
Date: 02-11-2008, 09:36 PM
Parent: #1

د.طارق كيفنك

ما عارفة لكن بيني وبينك كده
بدون حريق للتفاصيل الممتعة دي

وطريقة السرد الجمبلة

العلاقة شنو بين القصة وشركة رحمة للادوية

وخليها في سرك

لك الود..
Post: #788
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 02-14-2008, 10:28 AM
Parent: #785


انت يا بت عبد الكريم
مالو شمارك يكتح
Post: #791
Title: Re: أي بت شديدة بتحب ليها طُلبة (صبي بناي)
Author: امنة عبد الكريم
Date: 02-15-2008, 10:17 PM
Parent: #788

Quote: انت يا بت عبد الكريم
مالو شمارك يكتح


خليها في سرك يا دكتور

سمعتها بي قصة الشيخ ابو جريوة

بس...خليك كدا

ملحوظة :توقيعك الجديد جميل


ود خاص...
Post: #789
Title: Re: أي بت شديدة بتحب ليها طُلبة (صبي بناي)
Author: serenader
Date: 02-14-2008, 01:20 PM
Parent: #1

يا طارق..
سليت روحنا، قصتك دي بقت زي "حجوة أم ضبيبنة"... الكع بسراعك ياللخو
Post: #800
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 10:23 AM
Parent: #789


يا serenader
هي نحن حجوة ام ضبيبينة لاقنها وين
Post: #790
Title: Re: أي بت شديدة بتحب ليها طُلبة (صبي بناي)
Author: singawi
Date: 02-14-2008, 03:12 PM
Parent: #1

الحبيب طارق ود جبيريل

القومة ليك ياخي

ابداع وشحتفة روح ياخي
وطريقتك في الوصف تشهي في فاكهة الجنة الله يوعدنا قول آمين
حاجتين اتورطت فيهن ( مسلسل 24 الليل جاك باور ، ومسلسلك دا ) مع اني حريف وجدي أحرف مني وصاني وقال لي كان طلعت في الشجرة دي ، شيل نعلاتك معاك يمكن سكة المخارجة تكون بي فوق . أها يا عشاي اشتعبطت في شجرتك دي وراح لي الدرب في الموية .. الله يديك الصحة وتكملها بي عرق العافية قول آمين .
تحياتي معطونة في إعجابي
Post: #792
Title: Re: أي بت شديدة بتحب ليها طُلبة (صبي بناي)
Author: wadah beshier
Date: 02-16-2008, 08:41 AM
Parent: #790

Quote: العلاقة شنو بين القصة وشركة رحمة للادوية




Quote: خليها في سرك يا دكتور




مافي طريقة عايزين نعرف الشمار


Quote: منتظرين باقي القصة
Post: #804
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 10:30 AM
Parent: #792


حاضر يا وضاح
Post: #801
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 10:25 AM
Parent: #790


السنجاوي
وحاتك الوكت بقى ممحوق
لاني قادر اكملها لاني قادر اقيف
بس بنحاول نتمها
Post: #793
Title: Re: أي بت شديدة بتحب ليها طُلبة (صبي بناي)
Author: نسرين جمال
Date: 02-16-2008, 10:58 AM
Parent: #1

يا دكتور وينك

منتظريييييييييييييييييينك


تحياتي
Post: #794
Title: Re: أي بت شديدة بتحب ليها طُلبة (صبي بناي)
Author: mohanad haimoura
Date: 02-17-2008, 09:53 PM
Parent: #793

Quote:
... كلما يمشي بعيد لزم علينا نرجعوا للصفحات الاولي

اصلوا عندي تعاقد مع القراء عشان مايزهجو من البحث




كل الود
Post: #795
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 02-26-2008, 10:40 AM
Parent: #794

Quote: حاجتين اتورطت فيهن ( مسلسل 24 الليل جاك باور ، ومسلسلك دا )


... وانا كمان

اتورط في مسلسل "الجوارح" حتي الآن لم اشاهد الحلقة الأخيرة ... زي البوست ده
Post: #806
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 10:31 AM
Parent: #795


ود نجيلة
شن لمة الجوارح مع سحر
Post: #803
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 10:28 AM
Parent: #794


مهند كيفنك
طيب يا يابا
Post: #802
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 10:27 AM
Parent: #793


ثمح يا نسرين
Post: #796
Title: Re: أي بت شديدة بتحب ليها طُلبة (صبي بناي)
Author: دباش
Date: 02-27-2008, 10:41 PM
Parent: #1

العزيز ود جبرين

انشاء الله ربنا يعدلها عليك محل ما تقبل

بس عليك الله تعال تم لينا قصة عوض الملولوة دى

سؤال بسيط : انت البياطره ديل ليه دائما عندهم

سلوك عريانه؟ ( مثال: إنت + سيجيمان )
Post: #797
Title: Re: أي بت شديدة بتحب ليها طُلبة (صبي بناي)
Author: السنجك
Date: 02-28-2008, 02:51 AM
Parent: #796

يااستاذ طارق نحن مصنقرين لينا كم يوم راجينك



ومانفايتين الا تجى تكمل لينا الكلام الحلو دا


وهو دا كلام بتفات


انا نسيت داندورمتي وسرحت في الدنيي الماهلي دي...
يعني هسا لو الواحد ظروف اهلو كانت احسن من كدة موش كان ساهل جدا انه الواحد يقول
للبت دي الشي الكاتمو في نفسي وشغال يهري فيهو ليل نهار...
الغريب في الموضوع انه امي (رحمها الله) حاسابي ودايما تقولي: يا ولدي الدنيي دي شن طعمها
ما تسوالا شي والله دة كريم قاعد يدي الجني دحين انت تم قرايتك والله بيديك الفي مرادك...
وحاتكم يا الزينين اتلفت شفت في وش البنيي... البت دي لامن تحدر عينها وتشوف فيني من تحت تحت
وبياض عيونها يبقى اكبر من السواد زي ملاح النعيميي المضرضرلهم فيهو فلفل اسود في طرفو
احس بي روحي دي عايزة تمرق ضُمة ضُمة... ونفسي يتخمة...
والعجب وكتين تعضعض في شفايفها بي سنونها البيض ديك بس طرف قراصي متمري بين
صحنين ألات صيني بُيُض... اصلو قلبي ينتلو في جنس نتلي علي المتري (طرمبة الموية)...
والعجب وكتين تضحك ويظهر لسانها ولهاتا... يمين بالله خُشافايي في كورية جلي...
المغسي تركبني من راسي لي رجلي وقلبي يقولي امسكها من ايدها واعوعي وقلها وحات الله بريدك...
- دكتور طارق مشيت وين...


يااخوانا جنس الكلام دا نفوتوا نقع وين

ناس طارق وعوض ديل ماياهم نحن بس ماقادرين نعبر بكلام سمح زى دا




السنجك
Post: #808
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 10:34 AM
Parent: #797


السنجك الله يجبر بي خاطرك يا الزين
Post: #807
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 10:33 AM
Parent: #796


دباش كيفنك
والله البياطرة ديل ناس حلوين بس انت ما فاهمنهم
Post: #798
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-01-2008, 02:35 AM
Parent: #1


الحبيبين كيفنكم
بجي راجع اردلكم واحد واحد دحين خلوني اللشوف عوض:

يوم الخميس بالعصريي دخلت عند ناس عوض لقيتو راقد فوق عنقريب
وحالو مايل كدي ومدلقن علي الحلاوة البيمعطوبا الشعر وكتين يكتروبا
المعطي وتبقي نايصي كدي...
- يا خرابة مالك ما مرقت لااابرة نتمرن ولا نشوف في الكورة
- ياخي والله هامي من مشوار بكرة دة
- انت لليلي تهضرب ياخي امشي عادي وربك بيعدلها
- شنو امشي عادي دي انت ما ماشي معاي
- انا فوق شنو
- خالتي سكينة: النبي يا طارق بكرة تكابرو وتمشي معاهو
- ام سفي بكلملك جبيرين
- بري مالك علي... لكن امشي معاهو
- هسا انت جايبي بخور تيمانك ومخبرك دة لي شنو
- يا ولدي دايري ابخرو حالو ماهو عاجبني
- انت باقيلي جنيتي ما ياهو دة كويس وسوالو جضوم
- قول هو الله احد منك
- كدي خلك من جني باكر امش مع اخوك لا تخليهو وحدو
- سمح لي باكر يحيوا ناس ويموتوا ناس
ّ....................

قمنا الصباح اخدنا دشنا واتمرنا ومشينا علي العمارات
دقينا جرسنا الحبشيي فتحتلنا الباب ودخلنا..
ابو البنيات قاعدلو مع راجلا كدي شعر راسو ممعط علي
حوض البرسيم العارت فيهو حماري وليه شنبا افراق افراق كدي
علي المكشاشي الناصل منها خيط الدبارة..
السلام عليكم
عليكم السلام اهلا يا دكاترة...
دنقرت علي عوض: انت السلام الليلي مالو ماهو ياهو كدي...رسمي
- طارق روق
- دة عم ناس سحر بتكونوا شفتوهو يوم الخطوبة
يا ود حسونة
اتفضلوا
شويتين جات ام البنات: اهلا بالشباب
وعليكم السلام
مرتا ماهلي كدي وحديثها طاعم ودايما تلمع...
في غبار في كتاحة هي دايما وشها زي الرخامي يلعلع
اتفضلوا لي جووة
دخلنا لقينا خالة البنات حنان ومعاها شافع كدي سلمنا عليها واتحكرنا
- كيف يا شباب وكف ناس الامتداد
- ما عندهم عوجة تراهم عايشين
- د.طارق حا تبدأ (تضحك)
- لا لا ها سكتة
- تعرف الليلة سحر مصرة انه الفطور يكون قراصة عشان انت بتحبها
وااااضيقي انا بدينا
- معليش شوية ملخومين عشان سندس بت اختي حاملة وشكلها حا تلد الليلة
- اخدو راحتكم وربنا يحلها بالسلامة
- لا هي كويسة متابعة عند تادرس
دنقرت علي عوض: تادرس دة شنو يا صيدلي كبسولات استروجين جديدة ولا شنو
- طارق عليك الله روق تادرس دة اخصائي نساء وولادة
- (تتبسم) قاعد تقول شنو يا دكتور
- لا مافي شي... والداية جبتوها
- داية شنو ياخي حا تلد في الراهبات
ابيت اسأل من الراهبات دي شنو بس خمنت كدة انها عيادة ألت ولادي
- اي كان كدي نص عمرك ضايع
- كيف
- اصلك ما حضرتي ولادة في البيوت
- لا لا
- ولا شفتي ولادة الحبل
- سجمي حبل شنو كمان
- عوض قوماك من هني ديل ماهن عارفين ولادة الحبل عرس شنو العليك
- عوض ميت من الضحك: طارق بطل الجن البتسوي فيهو دة
- كدي احكي لي ولادة الامتداد كيف
تعرفي اسماء اخت عوض وشافعها خالد
- كيف ياخي
انا بحكيلك ولادتو كيفنها:
يوم ونحن صغار حريم الجيران الكبار اتلمن في بيت ناس عوض يغنن ويسفن في التمباك
ونادو زينب الداية وهي زاتها تسف معاهن وجات شايلالا شنطتا ألت نيكل كدي عاملي زي
كلوة الخروف مقوسي كدي وفيها مقصات وشيتا كدي مانا كنا فارزنو...
المهم الرجال قاعدين برة في النيمي ونحن ندخل ونمرق... أكان نشوفلك اسماء دي
تكورك والنسوان يقولن ليها اتمشي وهي تغزغز في يدينا في ضهرها:
يا الله لي
يا الله لي
ومرة مرة تمسك في حبال الغسيل وتتلف بي الملايي
واي يمة
وووب علي
يا الله لي
ومرة مرة تعضعض في الهديمات المنشورات
والداية تجي تقولها كلاما كدي ماهو مفروز
وتمشي تاني تغني مع النسوان الكبار:
بكريلو بالوليد
يا السمحة ام نهيد
يا السمحة حد الريد
وفجأة تسمع اسماء كواريكا يجيبن الفي الخلا
والداية تقولهن دخلوها لاااجوة خلاص وحصلوني بي الموية السخنة
وفجأة تشوف حرم دخلت عليهن شايلالا حلة بوخا طالع
ويقفلو باب الاوضة وشبابيك الخشب
وبين الهرجي أليل النسوان تضيع كواريك اسماء
وفجأة تسمع صوت الشافع يكورك وضلفة الشباك الاخضر الفوق
تتفتح وتسمع صوت رقيي: يا طارق اجر علي محمد وقوله جابولك ولد
وانا اطير علي الرجال في النيميي واقولهم اسماء جابت ولد
يقوموا يباركوا لي محمد ويديني شلن (خمسة قروش)
وارجع القاهم بيوزعوا في الحلاوة
واريتا حلاوة عدوك يمين تتلصق بين فكينك وتبقى تناتل فيها فشان تمرق
تقول عاجننها بي صباع امير... يمين حنكك وكتين تنتهي منها لامن يقع
من شدة المناتقة...
- ميتة من الضحك معقول الكلام دة... يا سحر... سحر تعالي
وامغستنا مالك علي مناداها من هسي

.... ونواصل
Post: #799
Title: Re: أي بت شديدة بتحب ليها طُلبة (صبي بناي)
Author: Nasr
Date: 03-01-2008, 09:14 AM
Parent: #1

آمنت برب الشوايقة......!
يا زول ما تبطل الإستهبال وتتم القصة
Post: #805
Title: Re: أي بت شديدة بتحب ليها طُلبة (صبي بناي)
Author: مجدي عبدالرحيم فضل
Date: 03-02-2008, 10:30 AM
Parent: #799

طارق وينكا
Post: #810
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 10:36 AM
Parent: #805


ابو قصي
قااااااااعد
Post: #809
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 10:35 AM
Parent: #799


نصر كيفنك
هو الشوايقة ديل عندهم رب براهم ولا شنو
Post: #811
Title: Re: أي بت شديدة بتحب ليها طُلبة (صبي بناي)
Author: أميرة فاروق عبد العال
Date: 03-02-2008, 10:50 AM
Parent: #809

غايتو لكين لقيتك قديم قدم ياطارق..
عليك الله الحكاوي دي حضرتها ولا حكوها ليك!!







--------------------
الشوق بحور..
Post: #814
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-02-2008, 06:44 PM
Parent: #811

قلت كدي اي بت فاروق


ثمح
Post: #812
Title: Re: أي بت شديدة بتحب ليها طُلبة (صبي بناي)
Author: عبدالله كع
Date: 03-02-2008, 10:51 AM
Parent: #1

تحياتي يادكتور

انا ما قريت 1=2=3-4-5-6

والله جيت في الزمن الضايع... لكن بحصل انشالله

زكرتني امي لمن تقعد مع خالتي واختي الكبير (باكسر الراء)

لنا عودة بعد مااستمتع مع صبي البناي
Post: #819
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-03-2008, 03:29 PM
Parent: #812


ود كع كيفنك
Post: #813
Title: Re: أي بت شديدة بتحب ليها طُلبة (صبي بناي)
Author: نسرين جمال
Date: 03-02-2008, 12:04 PM
Parent: #1

الشايقي

شنو الشحتفة دي تم لينا القصة دي

خلينا نشوف البعديها


سلامي
Post: #820
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-03-2008, 03:31 PM
Parent: #813


ثمح يا نسرين
Post: #815
Title: Re: أي بت شديدة بتحب ليها طُلبة (صبي بناي)
Author: Nasr
Date: 03-02-2008, 07:30 PM
Parent: #1

الكلام البقولو ليك جادي
إسمع
السودان أتملا محطات تلفزيون وماعندهم مادة يقدموها، والناس زهجت من المسلسلات المصرية كلها أكل شعيرية.
المهم
نحول القصة دي لمسلسل
إنت قول خير وأخطف كراعك علي لوس أنجلس. عندنا مخرجين (ناس سمعة وآخرين) وناس دارسين سينما، والأستديوهات ما تديك الدرب.
ووحاتك يا ود جبرين، القصة حلوة ومشوقة والناس بتحب الحاجات دي

تتذكر قصة الطيب صالح القصيرة جدا..شئ ما
"قالت له غني، الناس تحب أغاني الحب الحزينة..."
ولانك بتحبو شديد عارفك عارف نهاية القصة.
المهم
قلت شنو؟؟؟؟؟
Post: #821
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-04-2008, 10:31 AM
Parent: #815


نصر كيفنك
يا زول مع جوازنا الاخضر علي ملاح السبروق دة اولاد بوش ديل ما بيدونا تاشيرة
دحين يا الحبيب وكلناك فشان تمضي علي المسلسل بدلي
ونسبتك محفوظة

الطيب صالح يا الحبيب عشق من الزمن الجميل
اقوليك حاجة... مرة قاعد معاهو في اصيلة سمعت ليه موسم الهجرة إلى الشمال
قال لي: والله يا ولدي انت ماك نصيح
دحين شوفلنا موضوع المسلسل دة فشان الواحد يبقى عنده قيمي
Post: #816
Title: Re: أي بت شديدة بتحب ليها طُلبة (صبي بناي)
Author: أميرة فاروق عبد العال
Date: 03-03-2008, 09:23 AM
Parent: #1

نصر..
صباحك زين..
ود جبريل ده هسه كان اقتنع بكلامك ده وجرى على لوس انجلوس بدون مايتم القصة هنا ده يبقى موقفنا شنو ياخ!!

كدي أديها صنة نشوف آخرتها..
Post: #822
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-04-2008, 10:34 AM
Parent: #816


بت فاروق القصي بنتمها
فشان بقى فيها دولارات
دحين لا تضيقي
Post: #817
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 03-03-2008, 09:36 AM
Parent: #1

يا دكترة ..
Quote: يا زول شايفك متخوجج مع بورداب الخرطوم
وحاتك حسدتك عديييييييييييييييييييل


يا زول بورداب الخرطوم ديل عسل عديييل كدة
إنت ما تحسدني .. تعال بس إجازة وشوفهم.

أها الحكاية جابت ولادة كمان؟ يا زول إنت كان ما ولدتنا نحن كمان ما بترتاح

و....
واصل
Post: #818
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 03-03-2008, 11:00 AM
Parent: #817

د. طارق تحياتى
عدنا بعد غيبة طويلة للمتابعة الرائعة
ضحكت لامن الناس قالو لى مالك
فى الزول البيرجى مديدة التمر


اميرة فاروق ياريت لو سمعت اقتراحك داك
و سحبنا مداخلاتنا و ضربنا طارق جبريل ببوست تانى

طارق جبريل سردك رائع و سلس
Post: #823
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-04-2008, 10:35 AM
Parent: #817


ود ابو العزائم
وحاتك القصي ولدتني انا ذاتي

بورداب الخرطوم انا عارفهم سمحين بالحيل
ما بيقصروا والله
Post: #824
Title: Re: أي بت شديدة بتحب ليها طُلبة (صبي بناي)
Author: محي الدين جبريل
Date: 03-04-2008, 10:45 AM
Parent: #823



ياودجبريل


يا أخى سليت روحنا ، أنا عندى تلاتة ( أسعلة ) عوض ده وين هسى ، وعرس البنيى ولالا ، وإنت الكانت خالا بالا ليك الزمن عاس عليها شنو و هسع وين .

وبعد الإجابة ح تريحنا من الشحتفة دى ، وتانى فى ( سوعال ) .. ولا اقول ليك ده ناجلو شويى .



محي الدين جبريل
Post: #825
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 03-04-2008, 02:10 PM
Parent: #824

يادكتور طارق قبال الليلة انا قربت اتمها
عليك الله الكع بسراع
انهر شوية


اخونا محىالدين جبريل
سلامات
غايتو كلما تجى فى التلفزيون بقولهم محىالدين دا قرا معاى





no one but ourselves can free our minds - bob marley
Post: #826
Title: Re: أي بت شديدة بتحب ليها طُلبة (صبي بناي)
Author: mohanad haimoura
Date: 03-10-2008, 06:15 PM
Parent: #825

العزيز طارق جبريل
Quote: الطيب صالح يا الحبيب عشق من الزمن الجميل
اقوليك حاجة... مرة قاعد معاهو في اصيلة سمعت ليه موسم الهجرة إلى الشمال
قال لي: والله يا ولدي انت ماك نصيح
دحين شوفلنا موضوع المسلسل دة فشان الواحد يبقى عنده قيمي


جد ماك نصيح
والله سليت روحنا
ما تم النصيبه دي



تسلم ياسيدي
Post: #839
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-24-2008, 05:17 PM
Parent: #826


هو يا مهند انا كان نصيح
كنت حضرت الحاجات دي كلها
ومرقت سالم
Post: #836
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-23-2008, 08:48 PM
Parent: #825

ود علي كيفنك
يا اخوي لا تضييق شي انا بساسق واجيكم راجع
Post: #833
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-23-2008, 02:09 PM
Parent: #824

محي الدين اخوي كيفنك
لكن لقيتك شمارك كتير خلاص
بجاوبك علي اسئلتك لمن اجي في صالونك وآكل القراصة
زي بتاعة بقال ديك
Post: #827
Title: Re: أي بت شديدة بتحب ليها طُلبة (صبي بناي)
Author: Nasr
Date: 03-11-2008, 06:20 AM
Parent: #1

الزول دا في زيارتو الأخيرة للوس أنجلس وعد بأن يتم القصة
فأبقوا قراب وأرخو أضانكم
ما دي الحلقة الأخيرة وكدا
(علي وزن ما بالسمنة وكدا)
Post: #828
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 03-16-2008, 11:17 AM
Parent: #827

.... جري بعيد ... مشينا جبناهو تاني ...



اتعودنا على كده يا ود جبريل ...
Post: #844
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-25-2008, 10:54 PM
Parent: #828



والله والله يا ود نجيلة ما قصرت
يا زول انت قايلني طارق بتاع الزقازيق داك
انا جلكمت شديد وحاتك يا دوب اجي اكتبلي كلمتين
وامش انوم
Post: #840
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-24-2008, 05:20 PM
Parent: #827


نصر كيفنك
Quote: (علي وزن ما بالسمنة وكدا)



دي ذكرتني عطبرة وقطر كريمة

يا زول انا موش اديتك توكيل عشان القصة دي تبقى مسلسل
Post: #829
Title: Re: أي بت شديدة بتحب ليها طُلبة (صبي بناي)
Author: اشرف السر
Date: 03-21-2008, 03:34 PM
Parent: #1

طارق جبريل

علك طيب يا اخوي

مسكني ضغط
وشلت المرارة
وينك يا زول؟؟
Post: #845
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-25-2008, 11:03 PM
Parent: #829


ود السر كيفنك

وحاتك نساسق في رزق الوليدات
بقينا زي الكومر القديم مكتوب فيه من اجل ابنائي
Post: #830
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-22-2008, 11:20 PM
Parent: #1



الحبيبين كيفنكم
بجي راجع اردلكم واحد واحد
.............

البنيات جن داخلات ونايرات والايدين مفدعات لي وراء
صلاتي علي محمد..
جكس عوض: اهلا بالشباب
- يا مرحب كيفكم
- سحر: كيف عووضة هلا يا دكتور
- اهلا سحر
وحاتكم ايدي وكتين طقشت ايدينا يبست ضُُمة ضُمة
الشعر الليلي ضافرنوا ضنب حصان ويتمرجح من الكتف دة لي دة
وانا ازوزي معاهو بس درويش في حلقة ذكر
عوض بنيتو قعدت جنبو وسحر جرتلها كرسي قاصدتني
اخدتلي عيينيي لقيت الفستان حدو الركبة
يمين الرجلين علي عود الابنوس يرارين
- خالة البنات:هسا خالد دة ولدوهو في بيت ناس عوض
- ايي واللذيذي حبوبة عوض كانت نايمي وقامت مخلوعي
لمن سمعت الكواريك قامت مهجومي: انتو الفي شنو
- اسماء عايزة تلد
- الله يقلعها هجمتني هي وكتين ماها قادري علي الولادي
يوما داك ما تشوفلها اوضتا تاني تمشي عليها
خالة البنات بقت تزح من الضحك
جكس عوض ميتة من الضحك ختت وشها في كتف عوض: صحبك دة مجنون
- عوض: انا قلتلكم ماهو نصيح
سحر خجلت وختت يدينها في وشها ودنقرت علي ركبتها
الضفيري جات واقعي علي صدرها
يمين الرقبة علي برطمان المربة البيختو فيهو الكركار داك
تلمع ومتواسي وناعمي... شفت فيها وعاينت علي رقبة عوض
عضامها كلها ناطي علي تروس الجربكس... والعجب وكتين رجعت تاني
علي ضهر الكرسي والصدير قام معاها...
انا اصلي بقيت آآآبشوف غبيت كله كله
وصوف جلدي كله قام وما لقيتلي ريقا ابلعه
الله يقلعك يا عوض كان هريتني معاك
- خالة البنيات: لكن يا دكتور والله عندكم حاجات عجيبة خلاص
- ايي نحمد الله ما عندنا شي غير القرقراب...
نضحك ونصوتلنا سخيني ولا حرف أليل قراصي نلوغده ونتمه كوز مويي من الزير ...
مافي شي تاني... لانا عارفين الدنيي حاصل فيه شنو ولانا مدنها خبر...
نتلابس في الهدوم والشباطة.. والدنيي ماشي... بي هني ماشي وبي عندنا كمان ماشي...
راضين بي قسمة الله ومتيقنين...
- سحر: لكن يا دكتور حياتكم حلوة ما فيها عقد
- نان نعقدها اكتر من ماها معقدي نوصلها وين عاد
- انا قصدي انكم ماخدين الحياة بي بساطة وما عندكم برتكولات لا شي
- اييي برتكول شنو.. هو نحن وكتين ندخل علي بعض
بالله تجر سلك الباب وتلقى نفسك في وسط ناس البيت
- ام البنات: يلا يا شباب علي الفطور ان شاء الله يعجبكم
دخلن علي الصفري اكان القالكم السراويس ألت القراصي من الصيني ومغتية بي شيتا شفافا كدي
قالوا فشان تبقى سخني ما تبرد...
ماهن عارفين هناك بالله نقع لغفي في صحن الطلس حتى ان بقت مولعي علي جهنم..
والعجب البصل اللخدر والقرشي أليلو ومعاهو شطي خدرة... ومخاخيتك تتسايل
كملنا فطورنا ورجعنا لي اوضتنا عاينت بالشباك اشوف في شغلنا
البلاط نضيف والنجيلي خدراء.. قبلت علي عوض
- انت يا جنى هسي بنيتك دي ان بقوا دايرين يدخنوها يدخنوها وين
ماني شايفلي حفري بايني في حوشم دة ووشها علي قعر الصاج
والدلكي ان بقوا دايرين يكفوها وين يلقولم حفر مع البلاط دة
ترا الضفر بينضفوه في التكل علي وين يكسرولم طلح مع البلاط دة
وناسك ديل ماهن ناس كركار شي... نحن بالله ألاتنا بعد الساعة تمانية
تلقاهن منجعصات في الشملي والدخاخين قايمي ونور الحيشان مطفي
وبرطمان الكركار جنبهن وتسمع في: يا محاسن اتمسحي الطلح بيشقق جسمك
... والله يا زينب عضامي كانن ينتحن بعد اختلي كبي انجميت... كيفن
آبتنجمي يا بت امي وكمان طلح محمد العربي دة سمح خلاص... ايي ما ضارباهو
المطري وبيولع سريع...
- عوض هسا انا في شنو وانت في شنو
- مالك الصايدك شنو
- شفت عم البت دة مصنقر الليلي من اصبحت وقلبي ماكلني
- يا زول خت اليقين في قلبك آبيحصل شي
شويتين دخلت سحر صينية الشاي وتبعنها الخالة والأم وجكس عوض
- خالة البنت: انا سمعت كلامك يا طارق وكتين نبقى علي الطلح بنعرف نسوي شنو
- سجم خشم امي (رحمها الله) انت سمعتيني
- ايوة سمعتك وانا واختي ضحكنا... شكلك كدة ما ساهل
- ان ما متنا شقينا الترب
- جكس عوض: عوض بعد تشرب شايك بابا قاليك مر عليه في الصالون
يا ربي تستر
... ونواصل
Post: #870
Title: Re: أي بت شديدة بتحب ليها طُلبة (صبي بناي)
Author: ابراهيم قناوي
Date: 08-04-2008, 09:51 PM
Parent: #830

Quote: - جكس عوض: عوض بعد تشرب شايك
بابا قاليك مر عليه في الصالون



سلامات يا دكتور

والله عوض ده قبل ما يمشي الصالون مفروض يكون خلص

ليهو عشرين سيرمس شاي

وجردلين حمضرمد

ياخي طولت علينا شديد

الرحمة حلوة برضو يعني

عشان ما نحرد

ولا نجر هوا

يديك العافية
Post: #831
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 03-23-2008, 08:15 AM
Parent: #1

Quote: يمين الرقبة علي برطمان المربة البيختو فيهو الكركار داك


هي سجم الرماد دي مادام عارفا بتاعة مربة ... خاربها بالكركار مالك؟


و ....

واصل
Post: #832
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 03-23-2008, 12:35 PM
Parent: #831

Quote: وانا ازوزي معاهو بس درويش في حلقة ذكر








تسلم كتير يادكتور
Post: #847
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-26-2008, 05:31 PM
Parent: #832


ود علي كيفنك
Post: #846
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-26-2008, 05:29 PM
Parent: #831


عاد يا ود ابو العزائم نفوت قديمنا كمان
البرطمان عندنا للكركار
ياهو الشي البنعرفو
Post: #834
Title: Re: أي بت شديدة بتحب ليها طُلبة (صبي بناي)
Author: الزبير صالح الزبير
Date: 03-23-2008, 05:48 PM
Parent: #1

Quote: انا سمعت كلامك يا طارق وكتين نبقى علي الطلح بنعرف نسوي شنو


عليك الله يا طارق ما قالت ليك تحت تحت كدة بيتصرفو كيفن؟
Post: #835
Title: Re: أي بت شديدة بتحب ليها طُلبة (صبي بناي)
Author: azhary awad elkareem
Date: 03-23-2008, 08:34 PM
Parent: #834

دكتور طارق
سلامات
إنت يا خوى بتغتس وين وتجينا قالع..

لك الحب بقدر لهفة إنتظارنا لحلقاتك..
Post: #837
Title: Re: أي بت شديدة بتحب ليها طُلبة (صبي بناي)
Author: حاتم هاشم
Date: 03-23-2008, 11:40 PM
Parent: #835


بسم الله الرحمن الرحيم

ودجبريل ... كيفك .

شنو الحكايه لسه ما انتهينا
من عوض تقوم تعمل لينا حبكانه تانيه ...
متابعين و منتظرين .

تحياتي يا دكتور .

ـــ
ابوهاشم .
Post: #850
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-27-2008, 11:54 PM
Parent: #837

حاتم وليد هاشم
نان عوض المسنوح داك حبة
انا الما بيخليني احب شنو
Post: #849
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-26-2008, 05:36 PM
Parent: #835


ود عوض الكريم كيفنك
وحاتك نسناسق في الرزق
مرة يغلبنا ومرات نغلبو
Post: #848
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 03-26-2008, 05:33 PM
Parent: #834


ايي يا ود صالح
المشكلي نحن ما اديناهن فرصي فشان يتصرفوا
Post: #838
Title: Re: أي بت شديدة بتحب ليها طُلبة (صبي بناي)
Author: ناهد بشير الطيب
Date: 03-24-2008, 00:22 AM
Parent: #1

طارق ود عمى جبريل


كيفنك ياخوى ......

انا وعدتك..... ولى شلاقتى انى اخش البوست ده فى نفس اليوم
هل تصدق انى بقرا فيه تلاته ايام بلياليهن

القوز داك خليته ....اديته الصى ......

قصة عوض مذهله ....والمذهل انت فى السرد

والمذهل اكتر ......عاملا لينا انت زى مسلسل (لوست)
و(بريزون بريك) ...نشوفها شهرين وتقطع سته شهور

اسمعنى...... القصه دى لازم تنزلها فيلم ولا مسلسل .....وبسراعك


تحياتى للاسره





اللهم صلى وسلم وبارك على سيدنا محمد وعلى اله وصحبه وسلم
Post: #876
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:14 AM
Parent: #838

ناهد بت عمي كيفنك
الشي كله هضريب في هضريب
ووحاتك غلبني اتمها
Post: #841
Title: Re: أي بت شديدة بتحب ليها طُلبة (صبي بناي)
Author: محمد الطيب يوسف
Date: 03-24-2008, 07:14 PM
Parent: #1

ود جبرين


جملة الايمان بطريقتك دي بتكتل ليك زول


يازول أكان عوض ده شوكشو كلمنا ساكت

وأنت زاتك تستاهل تتشوكش في جنس حركاتك دي

وأنا موصي ليك سيدي الحسن والكرسني

لايلحقوك لا ينجدوك



قال قصة عملا ماراثون


ومتابعين
Post: #842
Title: Re: أي بت شديدة بتحب ليها طُلبة (صبي بناي)
Author: emad altaib
Date: 03-24-2008, 08:09 PM
Parent: #841

ــــــــــ
د.طارق


تحياتي


متابعنك



يعني مافي



طريقه


الي النهايه


امنياتي لك
Post: #878
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:18 AM
Parent: #842

عماد كيفنك آآآآيابا نصيح
النهايي قربت
Post: #877
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:17 AM
Parent: #841

ود الطيب ياخي مالك علي
انت الشواكيش ديل قالن ساهلات
ياخي الراس كله عواوير
Post: #843
Title: Re: أي بت شديدة بتحب ليها طُلبة (صبي بناي)
Author: صديق الموج
Date: 03-24-2008, 10:37 PM
Parent: #1

ود جبرين ..سلام كتير..ومشتاقين.. مرات.. مرات
انت عارف انا بقرأومستمتع لى سنه وشويه واعرف ان مداخلاتى
قد تفسد بديع نظمك ،لكن المرة دى الكلام الحايص لى من
مده حا اقوله..
انا عندى قناعة انو الشاقيه ديل معجونين بطين
ابداع خرافى..ومافى زول وصاف زيهم..
جيراننا شاقيه وعندهم حبوبتهم بتجيهم سنوى...
وعندى اختى قاعده تسرح لى بتها فى شعرها ،وهى عينة البنات
الما بدورن التسريح ديك..
تلقى امها هاجراها تحت كرعيها والشافعة تكورك ..
حبوبه بخيته الشاقيه دى قالت ليها:
يا امنى يا بنيتى: مالو مشاطكم زى عشار السرتويى...
طبعا سالتها عن معنى كلامها..
فشرحت لى ..لاننا نسمى السرتويه الحديه....
او الحدأة كما يقول المتحذلقه.
وحاتك ضحكت مل شدقى كما لم اضحك من قبل واعجبنى حسن وصفها..
يا طارق كان هذا قبل اعوام كثيرة ولكن كلما
جلست امنه اختى لتسريح شعر ابنتها كانت حبوبه بخيته بتكون حضور
بمثلها الذى اطلقته على حال اختى وهى تصفف شعر بنتها..
والى الان كلما جلست احداهن للتسريح وكانت الصغيرة تبكى..
يقولو ليها زى ماقالت بخيته بت كباشه الله يرحمها....
ربنا يرحم الحاجه بخيته بت كباشه كما يطلقون عليها..
والله يخليك انت وترانا كلنا اذن صاغيه،،،
Post: #851
Title: Re: أي بت شديدة بتحب ليها طُلبة (صبي بناي)
Author: ابوبكر على
Date: 04-13-2008, 08:24 PM
Parent: #843
Post: #880
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:22 AM
Parent: #851

ابو بكر كيفنك
Post: #879
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:21 AM
Parent: #843

Quote: انا عندى قناعة انو الشاقيه ديل معجونين بطين
ابداع خرافى..ومافى زول وصاف زيهم..

ود الموج كيفنك
هسي يا حبيبنا الشوايقة بقوا ملطشة
اي مغبون من الحكومة يجي يفش غبانتو فينا
شكينا عوض الجاز وعلي عثمان لي الله
Post: #852
Title: Re: أي بت شديدة بتحب ليها طُلبة (صبي بناي)
Author: صديق الموج
Date: 04-29-2008, 01:31 AM
Parent: #1

كدى النديه عتله لى فوق نشوف ببان ليه سيد والا لا؟
Post: #881
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:24 AM
Parent: #852

تسلم يا ود الموووج
نردلك العتالي في بوستات تتويجك جميل المنبر البي هناك ديك
Post: #853
Title: Re: أي بت شديدة بتحب ليها طُلبة (صبي بناي)
Author: دباش
Date: 05-15-2008, 10:18 PM
Parent: #1

!
!!
!!!
!!!!
Post: #882
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:25 AM
Parent: #853

دباش كيفنك
كنت قرفان وحاتك
Post: #854
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 05-26-2008, 01:27 PM
Parent: #1

يا طارق .... عوووووووك

غايتو أنا البوست ده عتلتو جنس عتالة .... من الصفحة كم كدة ما عارف.

أديناك مهَلَة لامن مسخت

يالا تعال أدينا خبر عوض والجيكس ... كفانا
Post: #883
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:26 AM
Parent: #854

ود ابو العزائم
الله بيسألني مشتهيك ومشتهي مناقرتك
Post: #855
Title: Re: أي بت شديدة بتحب ليها طُلبة (صبي بناي)
Author: MOHAMMED ELSHEIKH
Date: 05-28-2008, 06:30 PM
Parent: #1

النصيبي دي غاتسي غتاس. باالله ويامين مرقتها
أسرع يا طارق انا باقي وصلت الحلقة 39 في "سينما قدارف"
Post: #856
Title: Re: أي بت شديدة بتحب ليها طُلبة (صبي بناي)
Author: wadah beshier
Date: 05-31-2008, 10:58 AM
Parent: #855

يااااادكتووووووور تعال كمل القصة
أو رجع لينا قروشنا , وإلا.......
حنكسر الكراسي.
Post: #885
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:29 AM
Parent: #856

وضاح كيفنك
انتو دحين دفعتولي في الاول فشان اردلكم فلوسكم
Post: #884
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:28 AM
Parent: #855

انت يا محمد الشيخ ناس القضارف ديل ما سمعوا بي حق الملكية الفكرية
والله هسي اطلبكم بي مليون دولار رد اعتبار لي عوض صحبي دة
Post: #857
Title: Re: أي بت شديدة بتحب ليها طُلبة (صبي بناي)
Author: الزبير صالح الزبير
Date: 05-31-2008, 02:15 PM
Parent: #1

- جكس عوض: عوض بعد تشرب شايك بابا قاليك مر عليه في الصالون


الظاهر لي يا جماعة انو عوض دة لليلي ما كمل شراب الشاي ( يمكن الشاي دة سخن شوية)
Post: #858
Title: Re: أي بت شديدة بتحب ليها طُلبة (صبي بناي)
Author: موسى الحسين سيد أحمد
Date: 05-31-2008, 03:11 PM
Parent: #857

شيخ طارق



يا زول جماعتك ديل هريتهم هري
وانا معاهم
الناس متهمننا بالغتاتة لكن طولة زي دي من وين جبتها؟

الله غالب .
Post: #887
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:32 AM
Parent: #858

ود الحسين كيفنك
نحن يا يابا كدي مبهدلين وكدي مبهدلين
نسوي شنو عاد من عوض الجاز وعلي عثمان
Post: #886
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:31 AM
Parent: #857

ود الزبير كيفنك
الله بيسألني شاي النصاح دة كان حا يجيب كثافة عوض
Post: #859
Title: Re: أي بت شديدة بتحب ليها طُلبة (صبي بناي)
Author: Khalid Osman Jaafar
Date: 06-01-2008, 00:33 AM
Parent: #1



طارق سلام

ياخ ما بالغت شويّة؟

ليك شهرين من آخر حاجة كتبتها

كرهتنا المسلسل ياخ
Post: #860
Title: Re: أي بت شديدة بتحب ليها طُلبة (صبي بناي)
Author: mohanad haimoura
Date: 06-28-2008, 08:48 PM
Parent: #859

يا دكتور يا جميل



عليك النبي كان ما تميت لينا الشي دي
Post: #889
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:36 AM
Parent: #860

سمح يا مهند ود حيورة
مع اني زعلان منك ما جيست سلمت علي
انعام طلعت اجدع منك
Post: #888
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:35 AM
Parent: #859

خالد كيفنك ياخي
انا ذاتي كنت مباري مسلسل سنوات الضياع
ياخي يحيى دة تقول من اولاد الامتداد
Post: #861
Title: Re: أي بت شديدة بتحب ليها طُلبة (صبي بناي)
Author: Hala Hassan
Date: 07-01-2008, 11:53 AM
Parent: #1

طارق جبريل، لكن ما بالغت،
إنت لسه مشحتف الناس دى معاك؟
تصدق بوستيك دة واحد من الأسباب الـ خلتنى أطلب عضوية المنبر، عشان أدخل و أتداخل مع الناس،

حسا، بينى و بينك، أنا مبسوطة، إنو ظهر تانى و ح أواصل معاكم(إنشاء الله)...



بس بينى و بينك، كان إتعمل مسلسل،لازم نرصد ليه كل الإمكانيات عشان يفوت "نـــــور"..................
Post: #891
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:41 AM
Parent: #861

هالة كيفنك
ومرحب بيك في نصايب عوض صاحبي دة
بس انا عايز المسلسل زي سنوات الضياع
يحيى راجل كدي بي شنباتو وعنده قيمي
موش زي مهند عامل علي حلاوة لكوم كدي
Post: #862
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 07-01-2008, 12:31 PM
Parent: #1

غايتو يا هالة الزول لوما اخاف الكضب يكون اليوم في الخرطوم
وبعدين بالغصب بيتمها
ومشتاقين يا دكتور
Post: #863
Title: Re: أي بت شديدة بتحب ليها طُلبة (صبي بناي)
Author: عمر صديق
Date: 07-01-2008, 11:32 PM
Parent: #862

دكتور طارق
يا رائع
كنت متابع من زمن الارانيك الشالن الهواءوبقن سبب لكل المغس والهموم والسهر والبشتنة و واستمريت مع حكايتكالحلوة دي لاعند سفرك الي مصر و دخولك بيطرة الزقازيق وانتظارك للبوستة وانت تتوقع ان تاتيك الخطابات وهذا احساس يعرفه كل طلاب مصر وكل الذين اغتربو عن اوطانهم في اوقات كانت الخطابات هي الوسيلة الاكثر اتساعا ومتاحة للتواصل مع الاهل والاحباب قبل ثورة المعلومات التي نعيشها الان واجبني ذكر القمصان الجبتهن_ من العتبة ولا صيدناوي ولا عمر افندي ولا بورسعيد_ لي صاحبك عوض وبعد فترة اتمغست زين لانني اعتبرت ان القصة انتهت دون تمكني من متابعتها
لكن الحمد لله قسمتي قوية
وحااكملمعاك متابعة هذا السرد
الممتع لدرجة الجنون
Post: #893
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:45 AM
Parent: #863

عمر صديق ازيك ياخي
يا حليل مصر وايامها
Post: #892
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:43 AM
Parent: #862

السمؤل يا حبيبنا
الله بسألني مشتهي ونستك وقرقرابنا داك في الدرابزين
البُطان ان شاء الله نصيحين بي امهم
Post: #864
Title: Re: أي بت شديدة بتحب ليها طُلبة (صبي بناي)
Author: Hala Hassan
Date: 07-02-2008, 07:00 AM
Parent: #1

Quote: غايتو يا هالة الزول لوما اخاف الكضب يكون اليوم في الخرطوم



يا ربى، بتمها من الخرتوم؟؟؟

و لا أقول ليك حاجة يا السموأل، إنت بس لمنا فيه، و إحنا ح نعرف نتصرف كيف...

razz2:
Post: #865
Title: Re: أي بت شديدة بتحب ليها طُلبة (صبي بناي)
Author: Nasr
Date: 07-04-2008, 02:24 AM
Parent: #1

الظاهر أنو الزول دا فكانا عكس الهوا
غايتو أنا لو عرفت محلو وين برفع عليه قضية"شحتفة روح"
Post: #894
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:47 AM
Parent: #865

نصر كيفنك
القصي داري تجيبلي سجن على كُبري كمان
Post: #866
Title: Re: أي بت شديدة بتحب ليها طُلبة (صبي بناي)
Author: Rawia
Date: 08-03-2008, 10:40 PM
Parent: #1

سعدنا برؤية عوض















_______________________
هي شوية من عمر الزمان
Post: #867
Title: Re: أي بت شديدة بتحب ليها طُلبة (صبي بناي)
Author: wadah beshier
Date: 08-04-2008, 03:30 AM
Parent: #866

الصبـر كمل..الحقنـا..يادكتــور


وكمـان لـو غـلبتـك..كلمنـا.. عـلشـان
نجـد ليـك..العـذر..
Post: #896
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 11:00 AM
Parent: #867

وضاح كيفنك
عليمك الله غلبتني وكنت قرفان شديد
Post: #895
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:50 AM
Parent: #866

راوية نصيحي ان شاء الله
الله يعلم اسدني لقاءنا في ضهاري القاهرة
Post: #868
Title: Re: أي بت شديدة بتحب ليها طُلبة (صبي بناي)
Author: خالد الجبل
Date: 08-04-2008, 11:17 AM
Parent: #1

يا دكتور , حمدالله ع السلامة

يا أخوي مسلسل نور قربت تنتهي وانت لسة

حتواصل ولا نشوف مهند..؟؟
Post: #897
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 11:02 AM
Parent: #868

يا خالد ياخي مسلسل نور دة انا مكجنو
مالو سنوات الضياع
Post: #869
Title: Re: أي بت شديدة بتحب ليها طُلبة (صبي بناي)
Author: Mohammed Elhaj
Date: 08-04-2008, 11:49 AM
Parent: #1

Quote: اقوليك حاجة... مرة قاعد معاهو في اصيلة سمعت ليه موسم الهجرة إلى الشمال
قال لي: والله يا ولدي انت ماك نصيح

أكيد سمعتها ليهو
يا طارق جبريل تعرف، في ناس بي ربع موهبتك دي عملوا روائيين
شكلك ما ماخد موضوع الكتابة بي جدية برغم الموهبة البتفوح من سردك
Post: #898
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 11:04 AM
Parent: #869

محمد الحاج كيفنك
يا زول موهبة شنو
انا بجي اهضرب هني مع المهضربين وارجع لي وليداتي
رواية دة شي كبير خلاص


الله يجبر لي خاطرك ياخي
Post: #871
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 08-05-2008, 10:13 AM
Parent: #1

up



توقيعاتكم لاجل اتمام النصيبه دي...


الزول ده خلانا معلقين بين السماء و الواطه

يا تعال تم القصه ولا رجعنا محل ما كنا..




ود جبريل انشالله ات بخير؟
Post: #899
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 11:05 AM
Parent: #871

خلاص يا وضاح جيناكم
Post: #872
Title: Re: أي بت شديدة بتحب ليها طُلبة (صبي بناي)
Author: خالد الجبل
Date: 08-06-2008, 07:27 AM
Parent: #1

up
خالد الجبل
Post: #900
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 11:06 AM
Parent: #872

تسلم يا خالد
Post: #873
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 08-06-2008, 07:52 AM
Parent: #1

بعد ده الاجازة خلصت واصل
مع سعادتنا برؤيتك يا عزيز
اجازة كلها قضاها شواشو وقعاد في الدرابزين
Post: #901
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 11:09 AM
Parent: #873

عليمك الله يا السمؤل من بين اهم حاجاتي في الاجازي دي
اتشوفنا وبلينا الشوق
الله يجمعني بيك تاني
وحات الله يا ناس المنبر السمؤل دة
الما يصاحبو ماهو نصيح
سمح سماحة ودار الله يغتيهو ووليداتو
Post: #874
Title: Re: أي بت شديدة بتحب ليها طُلبة (صبي بناي)
Author: waleed dawash
Date: 08-06-2008, 10:43 PM
Parent: #1

فوق عشان الدكتور يتذكرنا
Post: #875
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 10:11 AM
Parent: #1

كدي النرد علي الناس الحلوة الفوق وبعداك نجي ننزلكم الحلقات
Post: #890
Title: Re: أي بت شديدة بتحب ليها طُلبة (صبي بناي)
Author: عبدالله كع
Date: 08-24-2008, 10:40 AM
Parent: #1

Quote: كدي النرد علي الناس الحلوة الفوق وبعداك نجي ننزلكم الحلقات


شنو يا دكتور ..

الرد ده ام تخلي بعد الحلقه الاخيرة

او في المؤتمر الصحفي ياخي ..
Post: #902
Title: Re: أي بت شديدة بتحب ليها طُلبة (صبي بناي)
Author: tayseer alnworani
Date: 08-24-2008, 11:15 AM
Parent: #890





معقول بس يا طارق تختفى وتشحتفنا كدى هسى انا قلبى



على عوض وهو ماشى على الصالون
Post: #905
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 04:37 PM
Parent: #902

تيسير كيفنك
عوض عاد الراجيهو يعلمبو الله
Post: #904
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 11:28 AM
Parent: #890

انت يا كع صبرا يبل الآبري مافي
Post: #903
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-24-2008, 11:16 AM
Parent: #1


الحبيبن كيفنكم
والله من وصلت الحتة دي غلبتني الكتابي كله كله... لي شنو آآآبعرف..
ــــــــــــــــــــــــــــــــ
عوض كمل شايو ومشى علي محكمة المظالم ديك... والله وحده العارف الراجيهو شنو بي هناك...
- سحر: يا دكترة انت طبعا ما بتشرب شاي عشان كدة انا جهزت ليك عصير المنقة البتحبو....
- جكس عوض: بختك الناس ماخدة بالها منك..
- سحر زولة حلوة ياخي وانا بحب الزول البيهتم بالتفاصايل دة
- لكن يا دكتور انت ما حصل سألت نفسك الزولة دي ليه مهتمة بالتفاصيل حقتك
- هيييي انت جكسيك مشى علي ابوك وجيتي تهريني بي هني
- (ضاحكة) ياخي كدي خليني أسألك بي طريقة مباشرة: أنت عندك حاجة ما عاجباك في سحر ولا عندك ارتباط تاني وما قادر تقوله لينا
- لا دة ولا دة أها شن قولك
- طيب ممكن اعرف انت ليه متحفظ... تعرف انا بشوف نظراتك ليها من بعيد والله يا طارق نظرات زول ريااااااااااااااااااد شديد ومكتول عديل هههههههه.... بس حيرتنا معاك
خفت يا الحباني لساني يغلبني وأقولها والله رايدها لامن واقع علي قفاي... واصلو ان بقى لي قلبي وحات الله يبق بق بي اسمها ليله ونهاره....
ووكتين اشوفها ولا اسمع صوتها حيلي يموت ضُمة ضُمة... والعجيب وكتين تغمد عيونها وتفتحن تاني والبياض الفيهن يبقى اكتر من السواد..
اصلي بس اقعد اعضعض في لساني وألولو فيه علي سمكة القرقور في السناري وكتين يطلعوها من المويي...
والعجب وكتين تكون هاجرة نصها بي حزاما عريض كدي والشي التحت الحزام يتمايل مع مشيها من هني لا هني... وانا زاتي أزوزي معاهو متل البومة الشايفالا فار ورويسها يزازي معاهو....
- يا بت الناس انا ماني قاعد اشوف تحت رجليني... انا بشوفي لي بعيد.. واختك دي ان بقيت قلتها بريدك...
ياني الاتورطت والله قال بي قولي... انا ماني قاعد اريد الخنقي... حتى ان بقى ماتلنا زول انا تلقاني آخر واحد ابكي واطمن نِفيستِي إنه لسة عايش...
دحين اختك الله بيسألني الما يريدها ماهو نصيح... بس علي قول خالتي سكينة الناس وكتين كانت تلملم في القروش نحن ابهاتنا كانو مزازين الانادي والمريسي...
وهسي واقفين علينا... ومستننا نشيلم ونربي باقي البُطان الصغار.... دحين باقيلك في الدوامي دي عندنا حلا لي حب ولا مستقبلا خاص...
هاااا زولا هاااا قصتنا ماها بايظي من الليلي ولا من امبارح... وإن بقى علي القلب تراهو ممكون وصابر وأنا آآآبقدر اورطلي زول معاي في ظروفا متل دي... دحين ناري باكلها براي...
- لكن يا دكترة دي تضحية فوق التحمل... وانتو ممكن تمشوا الحاجتين مع بعض لو عزيمتكم قوية... ياخي الحب دة ما ممكن يكون دافع يخليكم تمشوا لي قدام...
- شوفي يا بت الناس... انت بتقولي كدي عشان في حاجات ماكي شايفاهن... هناك الدنيي ماها متل دنيتكم دي... الحياة واقفي وماها ماشي لي قدام كل شي بالصف...
وكتين تكون طالع لازم تشوف برامج باقي اخوانك كيفن عشان ما تنطاقشوا في البناطلين والقمصان والشباشب...
يعني الواحد فينا وكتين يكون عنده مشوار لازم يشاور باقي البيت في اللبس... ووكتين كنا في المدارس..
وحاتك ردا واحد وقميص ويحيد ومشيحيد تقومبو وتقعدبو والرجلين اصلهن بس تحشرن في «تموت تخلي»..
تمشي العشش يفصلوهو ليك من لساتك العربيات القدام وتدخله في رجلك الدخلي الياها... يمين لامن سيورو تنطبع في قدميك...
ووكتين تطلع رجليك بس فطيسي رسمي... أها دحين كان ما كانت القرايي مجان وحات الله يانا المدعوكين في البناء دة لامن تقوم قيامتنا...
أها ناسنا ديل كبروا وراجننا نشيل باقي العتَّاب المكوم في بيوتنا داك... فشان كدي حرام تظلملك زولا معاك وتحشرو في جهنم ألتنا دي....
خصوصا ان بقى زولا تريدو وعندو عندك مكاني كبيري....
- بس يا طارق كلامك دة هسي ما اعتراف صريح بالحاجات الجواك... حرام ياخي الشي الحلو دة كله يموت في ضلوعك انت براك...
- ياخي ما تجرجريني في الكلام... انا فضفضتة معاكي انت لانه غلبني اشيل الشي الجواي دة براي... انت وخالتي سكينة بس القلتلم الشي الماني قادر اقوله لي سحر....
- يا الله ياخي بس كدة ما كويس ياخي... قول ليها كلامك دة وريحها وخليها هي تقرر حاجاتها... يعني ما ممكن الحاجة تكون حقتكم الاتنين وانت تاخد فيها قرار براك.... كدة ما عدل..
- يا زولة أنا اصلي ما وعدتها بي شي... وأصلي ماني عندي شيتا اوعدها بيهو ولا شيتا اقدمو ليها...
وان كان للألم أصلو ياهو أليلي تب.. قادر عليهو... لكن الماني قادر عليهو ...
اخليلي زولا زين بالحيل متل سحر يتألم فشاني.. الدنيي دي مانا حارِلنا فيها شيتا نعيم.. وإن الله من كرمو لطف بنا كمان القسمي ألتو راضين بيها...
- طيب ياخي انت ليه ما داير تقول ليها الحاجة الجواك دي...
- موش أحسن من اعيشها في حلم مستحيل... واسببلها ألم وجرح..
في اللحظة دي دخلت علينا سحر شايلالها صيني فيها جك أليل منقي وكبابي..
وكتين ختت الصيني في الطربيزة ومالت فشات تقعد... شفت رُكْبينَها... الله بسألني تقول ما فيهن عضم...
يشبهن المخدة وكتين يكونوا يا دوب منجدنها... وين لي ألات عوض عاملات علي رأس الكُنش كدي...
عليمكم الله يا جماعة عندها وجنتين علي زبادي «الدانيت» البجيبو اعلانه في الام بي سي داك... تسكت تمطق وانت تشوف فيهو..
جكس عوض دخلت لاااجوة.. وسحر جرت الكرسي وقربت مني...
وانا شلتلي مخدي من السرير وختيتها في رجليني وهجرتها علي صدري... فشان ادس النتلي أليل قلبي..
- عجبتك المنقة يا دكتور
- تسلم يديك ياخي... حلوة شديد
- عوض ما جاء
- والله ما ظهر... خير ان شاء الله مافي عوجة
- ما عارفة بس انا مقلقة وعمي دة بالذات ما قاعدة اريده
- ياخي موش يمكن تكوني ظالماهو
- لا لا لا اصلو من يجي ويقعد مع ابوي كدة براهم بعرف انه في حاجة في راسو قاعد يقنع ابوي بيها...
ودايما بتكون مصيبة... وهسي حكاية ينادوا عوض دي براهم الله يستر فيها...
- ما اظن في حاجة تخوف..
- الله يستر... عشان كدة انت ما عايز تقول حاجاتك...
- وكتين تكون حاجاتك جواك وماك قادر تقرر فيها... او يكون قرارها عند ناس تانين او في علم الغيب... شن فايدتها..
- ياخي انت ليه متشائم كدة... اعمل اي حاجة.. قول اي حاجة..
- القول عندي يا بت الناس التزام... وانا ماني قادر علي التزام ماني قادر اوفيهو....
- طارق (الله بيسألني لمن نطقت اسمي دة زي الكبوا فيني موية مسخنة اضنيني حسيتبهن تقال ومسخنات... وحيلي مات):
ياخي انا عايزة اعرف حاجاتي ماشة وين... انا لا قادرة أطمئن وأخطط.. ولا قادرة ارمي القصة كلها وراي وامشي...
بعد تمت كلامها ده شالت يدينها وغتت وشها... وحسيتبها متوتري ودايري تبكي...
والله يا الزينين لا عرفت اقولها بريدك... ولا اقوم اضمها لي صدري واعوعي...
ولا اقعد تحت رجلينها واخت يديني في ركبتها ووشي فيهن ولساني براهو ينطق: بحببببببببببببببببببببببك..

.... ونواصل
Post: #906
Title: Re: أي بت شديدة بتحب ليها طُلبة (صبي بناي)
Author: Nasr
Date: 08-24-2008, 06:06 PM
Parent: #1

قادرين نفهم الحاصل دا ليه
معليش يا بطل
يا في الحبس مظاليم
Post: #907
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-25-2008, 09:11 AM
Parent: #906

نصر كيفنك
قلت كدي
Post: #908
Title: Re: أي بت شديدة بتحب ليها طُلبة (صبي بناي)
Author: tayseer alnworani
Date: 08-25-2008, 09:26 AM
Parent: #907

Quote: ولا اقعد تحت رجلينها واخت يديني في ركبتها ووشي فيهن ولساني براهو ينطق: بحببببببببببببببببببببببك..




غايتو جنس غايتو (زى ما قال ود الصايم )

شعورك وجهجهتك واضحة بالله شجاعة مافى ما تعترف وتخلى الباقى على الله ؟؟؟؟؟؟؟
Post: #909
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-26-2008, 09:10 AM
Parent: #908

بت النوراني كيفنك
عاد الجهجهة بتندار
Post: #910
Title: Re: أي بت شديدة بتحب ليها طُلبة (صبي بناي)
Author: صلاح أبودية
Date: 08-26-2008, 10:01 AM
Parent: #909

Quote: - عجبتك المنقة يا دكتور


ياتو منقة فيهن العجبتك يادكتور؟
Post: #913
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-27-2008, 10:19 AM
Parent: #910

Quote: ياتو منقة فيهن العجبتك يادكتور؟


ود خالتي كيفنك
المنقة ألت الشراب هيني وراقدي في بلدنا
بس المنقي التاني إني آمنت بالله
Post: #912
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-26-2008, 10:40 AM
Parent: #1

Quote: قصه جميله يادكتور جبريل
منتظرين الباقى

اسماعيل كيفنك
ياخي تعبتني تعب عشان القى مداخلتك دي
ههههههههههههههههه
تسلم يا حبيب
Post: #914
Title: Re: أي بت شديدة بتحب ليها طُلبة (صبي بناي)
Author: محمد أبوالعزائم أبوالريش
Date: 08-28-2008, 11:21 PM
Parent: #1

Quote: والشي التحت الحزام يتمايل مع مشيها من هني لا هني


أصبح جلياً أن هناك ما يستدعي إكمال الحكاية قبل دخول رمضان.

_____________
يا دكترة ... حمد الله على السلامة
Post: #915
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 08-29-2008, 09:45 AM
Parent: #1

Quote: أصبح جلياً أن هناك ما يستدعي إكمال الحكاية قبل دخول رمضان.


ود ابو العزائم كيفنك
يا زول الشئ الباقي علي بعد الفطور
ما دايرين نجهجه صيامنا
Post: #916
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 08-29-2008, 09:57 AM
Parent: #1

حبيبنا
ياخي بي حكيك ده نحنت زاتنا جهجهتنا معاك
الصبر غلاب
Post: #917
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-05-2008, 10:08 AM
Parent: #1


السمؤل يا حبيبنا رمضان كريم ياخي
والحاجة ان شاء الله تمام التماك
ــــــــــــــــــــــ

(42)
اها يا الحبان جيناكم..
البنيي سكتت ودنقرت... وانا الكلام كمل في حلقي... طبقت يديني بين رُكَبي واتمحنت..
الله بيسألني العرق نازل من يديني زي نقاع الزير.. هسي يا ربي انا اسوي شنو...
يا رب انت من صفاتك العدل... دحين حلني... يا مالك روحي حل عقدة لساني... ولا كمان حلني وخلني امشي لي أهلي...
ربكم رب الخير عوض جاء داخل... ووشو مقلوب ينعل قفاهو وعيونه محمري..
وينفخ في جضيماتو العلي السعن ديلك... انا زولي عارفو.. وكتين يكون ممكون ياها دي حالتو...
- طارق نمشي
- سحر: ياخي مالك مستعجل يا دوبها حداشر ولسة بدري علي الصلاة.
- عوض: ياخي يا دوب نمشي نستحمة وانتو ذاتكم تمشوا تشوفوا بت خالتكم...
- جكس عوض: شنو البسمع فيهو دة.. ماشين وين ياخي.. بعدين انا موش قلت ليك عايزاك..
- ايوة بس الوكت اتأخر شوية
- كدي تعال انا عايزاك
جكس عوض ساقت عوض ومشت لاااجوة.. وسحر قبلت علي:
- صحبك مالو
- والله ما عارف.. بس هو لمن يكون زعلان ما بيحب يتكلم، وشكله كدة في حاجة ما مرتاح ليها..
- انا ما قلت ليك.. عمي دة غير المصائب ما بتجي من وراهو حاجة
- كان علينا نحن متعودين يا سحر.. الحزن دة بقى ساكن رسمي في بيوتنا، حتى ان بقى مشى بنستغرب موش بنفرح...
- ياخي انا ما بحب نبرة اليأس العندك دي
- دي ما نبرة يا بت الناس، دة واقع نحن بنعيشه بشكل يومي... اقدار ربنا صعب نهرب منها... عشان كدة انا كنت رافض الموضوع دة من اصله..
- يعني انت برضو عايز تكتل مشاعر الناس ديل زي اعمامي
- انا لو علي عايزهم يتزوجوا من بكرة... يا بت الناس انا بقول كدة لانه بشوف الشئ الحوليني كويس..
الحب من غير قراءة للواقع بيبقى حلم صعب تحقيقه وألمه حا يكون أكبر بكثير من لذته...
- يا طارق أنا لمن قابلناكم حسيت انه الواحد لمن يكون عايز حاجة بيصل ليها.. انتو كنتو بالنسبة لينا أمل كبير خلاص...
ممكن تقول قدوة عدييييل.. طلبة جامعيين وشغالين طُلب عشان يحققوا حاجاتهم.. ودة الشي الخلا اختي تحب عوض..
هنا أي نعم كل شئ متوفر بمقاييس القروش... لكن في حاجات كتيرة ناقصانا أقلها كيف نختار حياتنا بنفسنا...
عشان كدة لمن اختي اصرت علي عوض ووقفت قدام البيت كله حسيت اننا ممكن نعمل حاجة..
ممكن لأول مرة نقول لي ابوي واعمامي نحن من حقنا نختار... انا ما عايزة يزوجوني زي بنات عمي ياخي...
- يا الله ياخي... هنا وهناك نفس الشئ.. الألم سيد الموقف مع اختلاف اسباب هنا وهناك...
تعرفي انا بعجبني جدا الونسة معاك بحس كأنه بتكلم مع زول بعرفه من سنين طويلة شديد...
زول كدة لمن تقعد جنبه تنسى الكون... لكن.... ياخي نادي عوض خلينا نمشي
- دة اعتبره نوع من الهروب
- يا سحر... يا بت العمارات... انا ما عندي حاجة اهرب منها... انا بحاول اهرب من جواي...
بحاول ابعد عن نفسي عشان اقدر اعيش، الجواي كتير وما عايز اجري وراهو عشان احققه... لانه ما بيتحقق..
- أول مرة احس بالمرارة الجواك دي... كنت دايما بحس انك مقبل على الحياة بتضحك من جواك...
- بضحك من جواي يا بت الناس عشان ما اطرشق... عندي احلام كتيرة ما قادر احققها...
والحياة اهي ماشة.. والمسافة من الامتداد لي مقابر الصحافة ما بعيدة...
عشان كدة لازم اضحك واقرقر... انت زولة كويسة يا سحر...
وجواك كمية من الحلم والأمل ممكن لو بذلتي مجهود بسيط انا متأكد بتصلي... ما زينا نحن..
- اصل بدون مقاديف... واصل لي منو؟؟؟؟
- المهم انك ما ترجعي وراء... انسي الامتداد.. فوتيهو وحا تصلي
- حتى لو كان الامتداد دة المحطة الانا عايزاها
وحاتكم لمن قالت كدة... جسمي خدر... واتذكرت انه دي السنة الاخيرة لي في الجامعة... وطريت اغنية حميد:
حان الامتحان من وكتو بس فاضل شهر
وما اظني من جور الزمان انجح واجيب ليكم نمر
زينوبة كر من حالي كر قاعدلي في قيزان جمر

وقفت علي حيلي وجيت ماشي مسكتني من يدي زي الضربتني كهرباء:
- طارق ما عارفة بس عليك الله ما تسافر قبل ما اشوفك
- إن شاء الله قولي يا رب... نادي لي عوض
عوض جكسويتو جات ماسكة في يده وبتنقنقلو تحت اضنينو... بس هو سارح.. القصي باين عليها كبيري...
ودعناهن ومشينا علي أهلنا كداري لا ناضمني لا ناضمتو...
استحميت ومشيت الصلاة لقيت عوض خاتي مصلايتو وكتين شافني قلبها وقعدت جنبو وطبقنا سفنجاتنا بي ورانا..
والواطة حر وسمومها لافح... وبدأت الخطبة... الله يرحمك يا العباسي امام الامتداد..
كانت الخطبة عن عذاب القبر... قربت امشي اقوله ياخي عذاب القبر دة خلو ترانا ماشينلو ماشينلو... كدة خلنا في عذاب الدني دي...
كملنا صلاتنا عوض قام قبل ما يسبح وخلالي المصلاية ومشى...
مشيت البيت اختلي غمدي واتغديت وصليت العصر ومشيت علي بيت ناس عوض...
لقيت خالتي سكينة في مصلايتها تصلي جريتلي بنبر وقعدت جنبها.. بس مع السلام عليكم السلام عليكم قالتلي:
- طارق ناولني حُقتي
- انت اصلك لا تسبحي لا شيتين طوالي علي الصعوط
- أي كدي أدني اللسف ياخي هو الله دة الماهو عارفه شنو فشان يوروهو ليهو
- انت باقيلي جنيتي
- أييي جنيت وكتين سمعت كلامك ومشيت خطبت لي صحبك
- هو وينو ماني شايفو
- ابى يتغدى وبس ساكت لبس سفنجتو ومرق.. يا ولدي انا قلبي ماكلني عليهو يا وليدي امشي شوفه وين...
- ما تهمي شي انا عارف بلقاهو وين...
... ونواصل
Post: #918
Title: Re: أي بت شديدة بتحب ليها طُلبة (صبي بناي)
Author: Abutalib Elgorashi
Date: 09-05-2008, 02:57 PM
Parent: #1

يا دكتور سلامات
بس سؤال بسيط..
علاقة البوست دا شنو برمضان؟!!!
يختفي ويظهر في رمضان
Post: #920
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-06-2008, 05:42 PM
Parent: #918

ود القرشي كيفنك ياخي
ورمضان كريم
الله بيسألني ماني عارف العلاقي شنو
بس باقيلي عشان رمضان فيهو شوية وكت زايد
Post: #919
Title: Re: أي بت شديدة بتحب ليها طُلبة (صبي بناي)
Author: السمؤال بدرالدين
Date: 09-05-2008, 03:14 PM
Parent: #1

حبينا
رمضان كريم
سلامي للعيال
يالله خلص النصيبي دي
لاني داير اعرف عوض بكانو وين
Post: #921
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-08-2008, 10:45 AM
Parent: #919

وحاتك يا السمؤل النصيبي دي ابت تتم
Post: #922
Title: Re: أي بت شديدة بتحب ليها طُلبة (صبي بناي)
Author: Kabar
Date: 09-12-2008, 05:00 AM
Parent: #1


طارق جبيرين..حبابك يا صديق

طولت ما قريت لي كتابة مستمرة..غريبة ، اليوم بس ، بديت اقرا القصة دي (المحبين العظماء في الأرض..او قول اولاد الزمن المُر .. او قول اولاد اللعنة الأبدية) في منتدى الراكوبة..على بالحلال يا طارق مما جيت البلد الشينة دي (تقريبا تسع سنين) ما قعدت لي وكت خصوصي لحق خمس ساعات .. ساعة في ضنب ساعة..الإ اليوم مع القصة دي..

ياخي جنس مزازة.. عمك قوقل يشيل و يجيب ليك.. لمن براي قلت ليهو يا قوقل ياخي نحن فايتنك شوية..

قريت تعضرك في منتدى الراكوبة..اها يا اخوي انا بقرا (بدعي اني بقري كويس).. كتابتك دي واصلة تب..عليك الله تاني ما تتعضر ساكت كده في السهلة..و لمن تفرغ منها بنقول ليك فهمنا فيها..

احييك على فكرة القطارة (طبعا انت قاعد تقول ما بتحب الكلام الغلاد غلاد..عشان كده مفاهيم الإثارة و خلق علاقة توتر مستمرة مع القارء/ة المتفاعل/ة دي نخليها لي بعدين)..

على بالحلال يا طارق يا اخوي فكرة المناحة البي السيوف دي كن دخلتها في مسابقة كتير الناس البتسقط فيها..و المفردات..و الصور.. وضبط ايقاع نبرة السرد (ياخي دي ما عندنا ليها مقابل بكلامنا التحتاني الواحد داك.. عشان كده مشيها لينا)..و القطر يا طارق.. ياخي القطر ده اكبر بطل في عالم الأدب لكن ساقط في حساب الذاكرة الأدبية السودانية .ز اللهم الإ كن يتيمة ود المكي (قطار الغرب)..و بعد داك الغنا.. لكن الرواية غايب فيها تماما..
طبعا ح تواصل من غير ما نطلب منك.. لكن تأكد انك بتكتب كتابة مختلفة شديد.. و ليها وضعها الخاص..
و دمت..

كبر
Post: #923
Title: Re: أي بت شديدة بتحب ليها طُلبة (صبي بناي)
Author: خالد الجبل
Date: 09-12-2008, 09:08 AM
Parent: #922

Quote: الحب من غير قراءة للواقع بيبقى حلم صعب تحقيقه وألمه حا يكون أكبر بكثير من لذته


دا كلام كبير يا دكترة .. بس الحب البيعرف قراءة ولا واقع

ولا بيعرف إستئذان بيجي براه داخل تووووش .. ووحاتك يا طارق تاني ما بينقدر
Post: #926
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2008, 10:29 AM
Parent: #923

Quote: دا كلام كبير يا دكترة .. بس الحب البيعرف قراءة ولا واقع

ولا بيعرف إستئذان بيجي براه داخل تووووش .. ووحاتك يا طارق تاني ما بينقدر



ود الجبل كيفنك
ما الخوف من الدخلة التوووووووووش دي
بتودي التوج
Post: #924
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 09-29-2008, 08:09 PM
Parent: #922

حبيبنا Kabar
ياخي والله انت كلامك دة غلااااااااااااااااد بالحيل
وانا راجل ضهبان ساكت ماني قادر علي الحمل دة كله
احاول ان انقل هنا شئ من ما عايشته في احياء الحياة
احياء ملح الارض.. الناس الكادحة بمعناها الحقيقي
يا سيدي لو انتبهنا فقط لتلك الاحياء وما يدور فيها
معارك حياتية لاخرجنا الكثير من الدرر الادبية هنا
لكن للاسف لا املك ملكة الحكي والسرد ولا كنت قد اخرجت لكم
هنا الكثير من الجواهر..
الله غالب... غايتو اقبلوا حكينا على علاته..

محبتي الاكيدة
سوف احاول ان انزل بقية الحلقات هنا
مع بداية اجازة العيد ان شاء الله
Post: #925
Title: Re: أي بت شديدة بتحب ليها طُلبة (صبي بناي)
Author: عبدالحليم حامد النعيم
Date: 09-30-2008, 09:43 AM
Parent: #1

..

الرائع الدكتور طارق كل سنة وانت والعائلة بخير ...

يعني الا نحاحيك من رمضان لي رمضان ..

يا زول يا اخي ما تنزل لينا الحمل الشايلو دة مرة واحدة وتريح رقبتك ...

انا بس خايف عليك من التعب وكدة ...


خالص المودة
Post: #927
Title: Re: أي بت شديدة بتحب ليها طُلبة (صبي بناي)
Author: طارق جبريل
Date: 10-10-2008, 10:31 AM
Parent: #925

حبيبنا عبد الحليم كيفنك ياخي

والله يا سيدي القصة قصة وقت بس
يمين بالله مدروش في الشغل درشة عدوك
يا دوب ادخل ارد لي رد ردين واتخارج
لكن شيت عوض دة داير ليه مزاج
وكفتيرة شاي
Post: #928
Title: Re: أي بت شديدة بتحب ليها طُلبة (صبي بناي)
Author: حسين نوباتيا
Date: 10-25-2008, 09:26 AM
Parent: #927

طارق جبريل ...

امتاع لحد الدهشة...

ياخي انا كل ما اتذكر حكاية الدكوة باليمون بضحك لمن تقرب تحصل لي

صدقني انت موهوب و لكنك لا تدري...

كن بخير
Post: #929
Title: Re: أي بت شديدة بتحب ليها طُلبة (صبي بناي)
Author: sami Alzubair
Date: 10-30-2008, 05:54 PM
Parent: #1

باقي شهرين ونقفل السنة التانية
..
يحلنا ود الراسي
Post: #930
Title: Re: أي بت شديدة بتحب ليها طُلبة (صبي بناي)
Author: Salahaldeen Nadir
Date: 10-30-2008, 06:06 PM
Parent: #929

ياخ يا سامي

انا شفت البوست اترفع قلت الحلقة الاخيرة جات

غايتو الله يدينا خير الشوايقة ديل
Post: #931
Title: Re: أي بت شديدة بتحب ليها طُلبة (صبي بناي)
Author: ياسر نجيلة
Date: 11-05-2008, 05:21 AM
Parent: #930

ريقنا نشف ...
حرم ... قسم .... قصة عوض لازم تنتم
حولا مضي فوقو كمان شهور وزيادة كم
طارق حلف يعلق قلوبنا بشقف الحبيب المتيم
طولت الغياب لقصص الاحباب منتظرين القول والنم
حاسب اوعك القولنا قبيل في مدحك هسع بنقلب لى ذم


اسرح بسردك ساي يازوووول ...بس الغيبة طالت .... و الريق نشف ... انا عارف نهايتو ضرب وللركب يسيل الدم

انت قايل المغرب دي بعيده ...
Post: #932
Title: Re: أي بت شديدة بتحب ليها طُلبة (صبي بناي)
Author: خالد الجبل
Date: 12-01-2008, 09:19 AM
Parent: #1

يا د.طارق

ما تخليني أتمها ليك ؟؟؟