هيئة المتلشين والمشلهتين العليا

سلام عليكم يا جماعة الخير جيتكم صادي تاني اصلو اللياقة (من لايوق) دي طبع ما بقدر اخليه
دحين الزول الفنجري بالحيل شوقي ادريس (ابو الشوش) ناضمني بالحيل وقال لي لازم نكبر كومنا نحن ضهبانين وغلابة المنبر لانو لقينا نفسنا مشلهتين ومتليشين ومفليسين كمان ومافي زولا في المنبر ساعل مننا، والتلش ذاتو خشم بيوت والشلهيت برضو خشم بيوت، المهم مسعولين من الخير قررنا نكونلنا هيئة وسميناها موقتا كدي (هيئة المتلشين والمشلهتين العليا) والعايز ينضمالنا لازم تكون فيه التلاتة خصال ديل:
-التليش: والتلش ممكن يكون في أيي شي، المتلشلو في بنيتا عاجباهو ولا مشتهيلو شيتا دربو براهو وكدي يعني.
- الشلهتة: ودي ماها دايرالا شرح والمشلهت دايما شعارو (وا ضيييييييييقي).
- الفلس: والبند دا بدي صاحبو الاولوية في دخول الهيئة ألتنا دي حسب توصية أخونا ابو الشوش، يعني الواحد مننا لامن يكون أباطو والنجم وجيوبه ريالتن نازلي وعنده كيمان لحم وراهو وقدامو، دا بكون عضو زي المنقة، منقة شنو، دا والله جك أليل آبري بارد ومتلج كمان.
أها قولكم شنو؟ إن بقينا برانا أنا وأبو الشوش أخوي دا، يوما بمغسو ويوما هو يلحقني الكاشف، وإن كمان جيتونا نقرر الساعة ديك نعمل شنو.



تليشة:
انا الشلهوت انا التلشي
انا الفلسان العدمان الشي

يا طارق جبريل يا ود عمِتي

السترة والفضيحي متباريات , دحين آخوي ما تتشلهت شديد وما تتلش شديد خير الشلهيت أوسطه وخير التليش أوسطه , ركز على الفلس لانه ليس له توسط.

رسلت ليك ملاح سبروق بي قراصة في البوست السابق وان شاء الله عجبك.
نص ناس المنبر ديل ما يعرفو ليك ملاح السبروق دا.

لك تحياتي

بت خالي الفنجرية القلب النابض
والله سبروقك وصل وزاد علي الريالة وبقيت ماشي واريل في قميصي وبعدين رفيق دربي ابو الشوش اكد علي على حتة التليش دي وما اظنه فيه وسط, التليش والشلهتة والفلس متلازمات يعني ان بقيت متلشلك في بنيتا سمحة ولا قراصتا ملعلعة وجيبك فاضي حا تعمل شنو غير الشلهيت وان بقا للفضيحة يا بت امي نحن ما انفضحنا من زمان من ما نطحني خروف في الكلية وسط المصريات قهرتهن بالقاهر
اقولك شي انت ما تجي للمغرب وتسويلنا السبروق دا عشان شلهتتنا دي تمر على خير

بعيداً عن رغبتي في الإنضمام إلى جماعتكم الموقرة أو جمعيتكم لا فرق فإنه واجب علينا تصويب بعضاً مما جاء في تعريفكم الإستهبالي لكلمة المتلش ، فاصل الكلمة أصلحني الله وإياكم هي تلش يتلش تتليشاً وهو متلش وأشتقت منها التلالايش حالة كونها هي أحد أهم عناصر التتليش ، فالذي وشهو بغير تتلاليش كبار لا يتستطيع أن يتلش تتليشاً كبيرا (وهذا البيت الشعري هو سرقة أدبية بينة لكنني أحاول أن أرى كل الوجود شيئاً جميلا).
الذي يناظر أو يعاين في حسناء أو بنيتاً عاجباهو كما تفضلتم لا يمكن أن يكون متلشاً بل يجب أن يكون مقهياً ويكتمل جمال الصورة إذا كانت تلك البنية عارفه أنها معنية بالتقهية تلك لكنها عاملة نايمة وهو ما يعرف في لغة التجكيس بالتقل بشرط أن توازن ولا تكون تقيل أكثر من اللازم حتى لا تطير الطيور بأرزاقها.

عن الشلهتة فلم يعد شعارها أخي واااا ضيقي ، فقد قال شيخ المشلهتين جناح شولهتي أنه كان يتمثل بالحكمة القائلة ضاقت ولما إستحكمت حلقاتها ، إلا أنه قال على الطلاق ضاقت زيادة ، وهذا قسم لو تعلمون عظيم.

أما عن الفلس فلا تسأل وسل عن قرينه فكل سوداني في عصرنا هذا مفلس إلا الذين .... ولا بلاش

طارق كي داير يا العزيز

واحشنا بزاف وكي داير المغرب؟

مازال انت مع الحزق يا صحبي؟

يا صحبي شوفلك شي شارف وسالي معاها وربي كبير

والا خاصك شي حاجه اخرى اهدر مع طلحة يسفطهالك

غد نولي ومازال كاين شي حوايج غد نقولهملك

الله يعاون وبالسلامه

عبدالله ولد فاس سابقا

الأخ طارق جبريل

تحية مشلهته تليق بالموضوع المفلس

سيدى لو اننى قدمت "عرضحال" بمؤهلاتى فيقينى انك ستعيننى الرئيس والسكرتير التنفيذى وامين الخزينة (لانها خاوية ولا خوف عليها ) ومقرر مجلس الادارة وكل حاجة ..
كما قالت اختنا القلب النابض وكما قال قبلها المدعو "على الحاج" خلوها مستورة ومع طلب السترة التى تفوقت عليها الفضيحة خاصة لدى ناس البنوك وبطاقات الائتمان وناس الهاتف والكهرباء الذين لا يعرفون سترة ابدا بل شعارهم افضح كل عميل يتخياذل عن الدفع فى هذا العصر سيدى برضو بطلب السترة واقول ليك بالتى هى احسن انا رئيس لهذه الجمعية بلا منازع ..

شن قولك ؟؟؟؟

أفتو ؟؟؟؟؟؟

ولا مافى داعى ؟؟؟؟؟

لك تحياتى وحبى

أخي قرشو
تقول أم النصر وهو قطعاً أم لأى نصر غير النصر الإماراتي أو السعودي أو العماني أو الأنصار اللبناني لكرة القدم ، تقول فض فوها حتى يصبح فاغراً أن الفضيحة والسترة متباريات والتباري هنا كما تعلم أخي قرشو أصلحك الله ليس المنازلة كما في دوري السلة الأمريكي للمحترفين NBA ولما كان التباري في ما قلته أم النصر هو المشي جنباً إلى جنب أو أن تتقدم الفضيحة على السترة أحياناً أو العكس يكون حقاً عليك أن تقول في هذه الحالة يا لطيف بدلاً من يا ساتر على إعتبار أنك أو من يكن قد فارق السترة ولو كانت واقية من الرصاص وطالما أن هذا هو برنامجك الإنتخابي فإنني أرشحك لرئاسة الجمعية بشرط أن يكون رمزك الإنتخابي المخدة حتى يتماشي الرمز مع تشجيع الهتيفة أمثالي "مين يتحدى الرمزو مخده"

فردتي شلهوت
وكل المتلشين الذين مروا من هنا

لكم كل تلاليشي الحارة
اراكم قد تشحططتم على المناصب ولما نشلت نحن المؤسسين لهذه الهيئة منفستونا أو معجم تلاليشنا لتعريف مصطلحات الشلهتة والتليش.. أما وقد اتفقتم جميعاً على تعريف الفلس فأستميحكم عزراً بأننى سأرتقي هذا المنصب ..منصب المشلهت الفلسي.. حتى يتبين لنا أن هنالك من ينافسني.. هذا الموقع..ولا للديموقراطية ونعم للعداله
سيدي رئيس الهيئة شلهوت لك كل التلاليش الازمة..وقع وأختم على هذه الوظيفة قبل أن يأتي أصحاب الظهر والكرش.. البقريين..

شلهيتة:
يافردتى وولهي
يا شلهتي وتلشي
انقذ جيبي الولهي
من التلشت الفلشي

أبوالشوش

التلشي المنظراتي almulaomar
شايفك زحيت في البوست واخدت راحتك كدي مع انك دخلت من غير ما يزكيك الحبيب ابو الشوش لكن نحن برضو قليبنا كبير وراضين بي مناقرتك دي ، طبعا انت منطلق من معجم البعلبكي ولاروس في تفسير التلش ووفقا لمعجم ابو جاموس الفلكي أليلنا القهيية آخر مراحل التلش يعني بالعربي كدي الوله بي لغة ناس الحناكيش وان بقيت راضيبنا مرحبابك ويمكن نعينك مثقفاتي للهيئة ألتنا دي وان بقيت كايس الناس السمحين وأبان جيوب متمسحة كمان الله يعدل الخطوة باقي نحن ناس دمقراطيين شديد

عبدالله وداعه الامين
الرسام السمح بالحيل كيفنك
ياخي نحن الحزق (للذين لا يفقهون الدارجة المغربية الحزق هو الفلس) نمشي منو وين ماهو مكتوب علينا وانا ان اترفحت بتشوفني تاني عندكم هني كان زمان مشيت اتخوجج في الخرتوم زي ناس صلاح ادريس واسامة داوود
انت وين غاتس اوعك تكون في دواية ألت ألوان

قرشـــو
والله حالتك تزكيك عضو مصنفر عندنا علا الرئاسة دي دايرالا مشاورة مع ابو الشوش اصلو نحن الاتنين ما اظن في زول في المنبر دا وصل مرحلة تلشنا وفليسنا اما من عندي انا اديتك امين المال ان بقا في مال

فردتي التلشي ابو الشوش
مدام اديتني الرئاسة وجات من عندك خلاس يا سيدي ختمناها تب
بس كمان أنا بديك الرئيس المؤسس والملهم الاول لي هيئتنا دي
شايف الناس بعد ما كانو خايفين مننا زي الجربانين بقو يوقعوا فوقنا زي الذباب في العسل.

تليشة:
انا السبروق
انا المعجون في زيت طايووق
انا المشلهت دايما وعايشلي في خازوق
المقهي ديما ومصنقع فوق

Quote: عبدالله وداعه الامين الرسام السمح بالحيل كيفنك ياخي نحن الحزق (للذين لا يفقهون الدارجة المغربية الحزق هو الفلس) نمشي منو وين ماهو مكتوب علينا وانا ان اترفحت بتشوفني تاني عندكم هني كان زمان مشيت اتخوجج في الخرتوم زي ناس صلاح ادريس واسامة داوود انت وين غاتس اوعك تكون في دواية ألت ألوان

الحبيب طارق

نهارك فل وياسمين

شكرا ليك حبيبنا ويديك الف عافيه

طبعا لما قلتا الرسام كنت تقصد عبدالله ميرغني ود شندي فهو فعلا موجود بانجلاند بيرمنجهام اما انا عبدالله تاني درست في فاس
لك الود وكل المحبهة وشكرا على البوست

عبدالله

آه ما اقسي الشلهتا و التتليش
عندما ينهض في وجه التهليش ...
إيها المهلشون والمتلشون والمشلهتون في الشبكة
تحــــــــــــــــــــياتي
واعتقد ان ما ذهبتم إليه في تكوينكم هذا هو عين الصواب في التتليش والتهليش حيث ان ذلك احفظ للحقوق افيد للمقامات .. عموما اذا ذهبنا إلي تصرف وتعريف التتليش والتهليش نجد أن هنالك عدة رويات :-
فلنأخذ واحدة منها وهي روية القاموس الجكين في لغة المتلشين
التتليش اصلها تلاليش والتلاليش لغة هي الشلاليف الكباااااااااااار , واصطلاحا هي ان تحدق في الشيئ بنوع من الاستغراب الغريب مع عدم المراعاة لمن حولك خصوصا لو حاجة ما شفتها في بيت امك ( والمابتشفو في بيت امك بخلعك )... وبالتعريف ده انا بكون اجتزتا الشرط الاول ..
نرجع للشلهتة واصلها في اللغة شلهت يشلهت شلهتة ولغة الشلهتة هي ضرب من ضروب الجهجهة وعدم التوفيق واصطلاحا كما قالت خالتنا الرزينة بت وزينا وتردد دائما الشلهتا ورقاد ا########## .... واسواء انواع الشلهتا هي الشلهت العاطفية في الحياة الرومانسية خصوصا إنها متلازمة الفلس حيث انك لا تجد حق الركشة والفطور والبارد وهلم جراااا دا إذا ما شلهتتك بي ظروفها
والنوع الاخر من الشلهتا شلهتت الامتحانات وشلهتت المواصلات وشلهتت الكهرباء وشلهتت الدنيا سمحة كعبة شلهتت الاخرة اصلو هناك الفرص ضيقة في خيارين بس جنة نار
وبالطريقة دي انا بكون اجتزت الشرط الثاني
أمـــــــــــــــــــــــا الثالث ده
انا بجتازو ليكم مغمض لأني متسلف حق دخول النت اليوم لانو الشهر لسه ما كمل
فهل قبلتوني عضوا
تزويغة بريئة
هل تختلف التشلهت التهليش والتتليش الالكتروني عن غيره من التتليش والشلهتا....؟
ولكم خالص شلهتتي وانا متلش في هذا البورد
ود زبيدة

منتصر حسن محمد
يا زول عضويتك مقبولة واختة الباص وانا كنت خايفك تقد عربي علا طلعت نجيض وتريان ولسان حالك كلو فلس وشلهيت حبابك عشرة بلا كشرة

السيد كبير الشلاهيت.. ...... المتلش،،،،
التلشة شلهوت:- شاهق شلهيت على وزن( طارق جبريل)
سيدي الرئيس الشلهوتى .. يمكنك أن تشلت من يروق لك في هذا البوست.. فقد شلتنا من قبل لشلهتتنا ..
ولكن الشلهوتة ( الشلهت شاهت) على وزن القلب النابض.. لم ترسل لي (شوية سبروقة) مع معجم ابلة نظيرة لأكلات الشرموط وطبيخ المعجنات..(القراصة). وعلية فارسل لي كتلوج السبروقة في الخاص.. ويجب ان لا يتعدى مكوناته (دربهمات) لآن أخوك00 النجم حيث هوى.. واباطه والقمراذا انزوى..
أما ذكرك صلاح ادريس فهو من فصيلتنا .. يحتاج الى درب ناقل لفيروس الفلس.. حتى يأخذ مناعة.. حيث سيدق الدلجة وهو يسير خلف الاستثمار في الاخوان.. والخلان.. وكورة السودان.
أما العضو تلشو..على وزن قرشو.. مذكى 100% مع تقديم اوراقه الثبوتية الفلسية في غضون 10 بقرات عجاف
أخوي عبدالله أنت رسام ولو ما رسام برضو رسام دا قرار شاهوتي لا رجعة فيه (نو ديموقراطية) مشش؟؟؟... almulaomar
المنظراتى التلشـــي... ما هذا اللقب الملوكي.. تستاهل لقد نزع عليك شلهوت عقداً ثميناً ..راجع مراجع الشلاهيت والالقاب الفلسية .. الصادر من بعلبك..يوم الفلس الأكبر عام الغراب.

تلاليش كروية:
شلهوت دعم الكفر التلشى
الهلال اتحفز ضفر...اتدرشي
جيب المتلش وصل( الختر) الشرتي (مفردة من شرتيت)
كيف يا تلشة على وزن فردة. دي من معجم المراسلات الحبية من كتاب القرد المهاجر طبعة ابوجا 2200م

أبو الشوش التلوش

رئيسنا المؤسس المتشلهت الكبير ابو الشوش
دا الكلام على باليمين خليتني اقهي من تفسيراتك ايي بالله وريهم الشغل التمام اصلو ناس المنبر ديل حاقرينبنا شديد عليك امان الله خليتني اتخوجج في المنبر دا زي الطاووس انعل ابو الكمونية ذاتها وعلى ذكر الكمونية لي الليلي ما وصلتني وصفات السبروق والقراريص لمن تجي برسلها ليك بي تليشتا في dhl سمح يا زول.

تليشة:
أنا ان هجوت فان هجوي ناشف ينمو بجلدك مثل حب البرجم
وان مدحت فان مدحي طاعم كلبان ماكس في خشيمك فافهمي

عبد الله ود فاس سامحنا ياخي باقي الكبر دخل والامور جاطت في الراس شديد وبرد المغاربة ديل يوديك التوج والخرف باين عليه دخل الحوش عشان كدي العفو عند الله والرسول (ص)

أخي طارق جبريل
وما دخولي في بوستكم هذا وزحيحي دون وحيح بين أو خفي أو عوان بين ذلك أي in between كما يقول الفرنجة وكما تفضلتم وأفضتم أخي طارق إلا ضرب من ضروب التطفل و التنحيل أو قل عشقي الأزلي للملح بالرغم من بعد المسافة بين مسقط رأسي والبحر الأحمر من ناحية وبين ذات الرأس وحلة الملاح من الناحية الشمالية الشرقية لحوش بيتنا وشارع بيتنا ، فلقد كنت من ثلة إحترفت في خوالي الأيام القشرات على علاتها وتواضعها بالرغم من محاولاتنا الحثيثية في متابعة الـ Fashion فكنا خير من ينحل تنحيلا في الحفلات والأفراح دون كرت دعوة أو معرفة بأهل العروسين زادنا في ذلك سراويل الجينز المتسخة والمهترئة لكثرة إستخدامنا لها وقلة حيلتنا في مواجهة صابون فونا من ناحية ومن ناحية أخرى فليظن الناس أننا راستا أو معتزلة حتى وكانت فلسفتنا إن كان ذلك كذلك أننا قوم نصاب بالحمى فنهزئ ولا نعي ما نفعل أو نقول وأن أسباب تلك الحمى هو الموسيقى أياً كانت سلالمها أو عتباتها ولا نعر المطرب أذن صاغية في تلك الحفلات على إعتبار أن صاحب بالين كداب فما بالكم والأمر يتعلق بأشياء كثيرة فما أن ينفخ في المايكرفون حتى نهرول إلى الصيوان سراعاً وإذا نفخ فيه نفخة أخرى تجدنا وسط الدائرة نرقص ونفرفر والفرقة الموسيقية تحاول جاهدة ضبط إيقاع آلاتها فيطغى صوت البيزجيتار على الساكسفون لتنتفض الكمنجة مغردة يتبعها الطبل وبقية العقد الفريد.
أشكر لكم ديمقراطيتكم أياً كان لونها وأشكر لكم أخي طارق تفهمكم لدخولي توش كالأنعام وأشكر لكم قبول عضويتي أو رفضها في شلهتتكم الأزلية وأشركم أخيراً لأنكم قوم متلشون مشلهتون تحاولون جاهدين تأسيس كياني للمشلهتين في الأرض والبحر ودمتم.
محبكم الملا بن عمر بن جونسون بن هرري والبن الأخيرة بالضم

الملا بن عمر

على باليمين انت ضايع ساكت وسط الزحمة والكلام الغولاد القلتو دا يخلي الزول يهضرب بيك عديل كدي ياخي ولعتا(بدل نورتا) هيئتنا دي كتير ويديك العافية

زعيمنا .. الملا عمر
لقد أثبت أبها المتلش.. استحقاقك لما خلع عليك من لقب.. وقد اضيف عليك بمنحة ملوكية اخرى فانت من شلة الشلهته الأشعبية.. وهذه الطائفة اشتهرت بحسها المرتفع لحضور أي حفلة كانت رايقة وجاطت أو في الكلاكلة أو بانت.. في حظر تجوال أم عندما الأمور هانت..
مرحباً بشلهوت الأشعبي سيد بيت ومقيم بيننا

تتليشات محتفله على انغام الجاز:
كل الرائعات متلشات
لديهن معجبين مشلهتين
لم المشلهتون
يصروون على حب اما تلاليش
رغم الشواكيش؟؟؟بنظرة معها لوي تلوش صغير

أبوالشوش

ابو الشوش ,, التلوش
ود جبريل اب تلوشا طويل
تحلية متلاشية مشلهتة سااااكت
انا داير اوريك نحن ما برانا المتلشين ومشلهتين ,, في ذينا كتار ..انشاءالله تليشا او شلهيتا لمدة ساعة ما فارقة المهم يكون مشلهت ومتلش زينا..
نوريك الليلة الاتشلهت منو ...
الأستاذة المبدعة اللبنانية بت عمك عجرم الاسمها نانسي والله قال ليك عندها حفلة خيرية في مركز شباب الجزيرة لصالح مستشفي ابو الريش اه يازول هي بتجهز للحفلة تقوم تجيها ليك رسالة من جماعات .... تهددها ليك بي انهم ح يطلقو عليها الرصاص والشلهتة بدت والتليش بدا اول حاجة اشلهتت لمن غلط بعدين تلشت في مدير اعمالها لمن ريالتها سالت وبعد اضطرت تلبس واقي ضدد الرصاص تحت فستانها الاسود وقال حالة الشلهتة الاصابتها لمن غيرت ملامح صورتها وخلتها ليك متلشة في الجمهور وطبعا التشديرة والشرتيتة ( العداد بتاع الحفلة كلو اشترو بهو الواقي ضد الرصاص ) شفت الناس دي حياتها غالية كيف ,, وما كمان كدة بس عشان الحفلة تقوم وعشاء الفنانين ما يبوظ ساااكت جابو ليك اربعة عربات من الامن المركزي طوقت المركز واربعة من البودي قارد النوع البعجبك داك ,, وبعد الحماية دي كلها هي لسه مشلهتا ومتلشة في الجمهور ..
تهليش وتتليشة
الواقي الجابو ليها ده مع اللبس بتاعها ده بتلبسو كيف يا ود جبريل ,,, غايتو الا يكون جابو ليها كريم مسوح واقي لانو مافي حل اظن غير كده ولو في حل وروني
ود زبيدة

منتصر حسن محمد

(الواقي الجابو ليها ده مع اللبس بتاعها ده بتلبسو كيف يا ود جبريل)

انت في بتلبسو كيف ولا حا تلبسو تحت ياتو حتة في جسمها هي فستانها كلو ربع متر ومجوبق فيها الله يدينا خيرها

الرئس المؤسس ابو الشوش
تحية مبشتنة ومشلهتة

تليشة:
هيا السيجنال
تفوت وعلينا ما تسأل
خلاس يا انت خليناك
نحن اصلنا ما بنسواك
ونحن شبهنا للمسواك
ونحن شبهنا للتباك

المتلش ود جبريـــن ما لام

Quote: ونحن شبهنا للمسواك ونحن شبهنا للتباك

التمباك والمسواك والذي منو من الحاجات المتلشة دي غيرها البزرع الفرح جوانا وشلهتنا شنو ... اسي عليك الله الواحد لو ما لقي سفة ما بتشلهت عديييل كدة وتلقاهو متلش في نص القاعة ذي الزارنو في قوالة
ولك حبي وجملة سؤالاتي عن احوالك
تليشة صغيرة
منو الفي عز تلاوتي بحسو بين الغنة والاخفي
منو الزيك يخت الدينا في كفة ويرجح ريدو بي كفة
وبريدك ريدة مختلفة وبحبك انتي يالسفة
ود زبيدة

الشيد الرئيش شلهت شلهيت
صباح جمعة مشلهت للجميع
ان منتصر حسن محمد جمع بين السفة وبين نانسي.. هذا رجل متلش.. يجب ان نخلع عليه لقباً يليق بهذه الشلهتة اللبنوتمباكية...
ماعندى مقترح معيت شخشياً ولكن فللننظر بأمر شلوته..

تتليشه..شامية:
يا عجرومة ..تلوشتي
يمين بالله ..تشبهي شي
بعد 100 سنة تقهي..
اتاري الكولا ما شبهي
لما نفتح الفلا..
تكون شبهك
ولما تكوني ما لا بسي
عديل بتشبهي الببسي

رئيسنا المؤسس المتشلهت الكبير ابو الشوش
تحية شحمانة ومتمسحة وماخدة راحتها
لازم نعمل لينا قسم للهيئة العليا وبصفتي الزعيم اترك لك صيغة القسم


تليشة:
نطي يا فولة نطي
انت لسع ما نجضتي

دفعت ليك في البكسي
عشان ما تنوقي او تنسي

منتصر حسن محمد

المشلهت المنظراتي الكبير
لكن السفة ما عندك والله ان بقوا سمعوك ناس (لو ما فاطر ما تخاتر) كان عملو ليك نصب تذكاري

أخي شوقي إدريس
كيف هان عليك أخي أن تخلع علي لقب المتشلهت الأشعبي خلعتك كلبة من كلاب الإشلاق وهي تذود عن جرائها ظناً منها أنك لص من لصوص الكلاب في بلاد أصبح فيها المواطن ينبح والكلب يترقب بحذر.
عن تطفلنا أخي وتمليحنا في تلكم الحفلات أقول لكم ، نحن قوم نتمثل بكلمات ترباس (عزة نفسي مابيه على) فلا تغرينا العزائم ولا الكوكتيل ولا الهوت دوغ أو Bull Dog ، نأتي إلى الحفلة من أجل الرقص والفرفرة ولا بأس أن نجكس ما أستطعنا إلى ذلك سبيلا ، أما حكاية الأكل فلا وألف لا ، لأسباب كثيرة أذكر منها على سبيل المثال الناحية الصحية فمعدتنا أو أمعائنا إعتادت على موية الفول وبالضرورة هي تلفظ كل شئ دون ذلك وهذا ما يجعلنا نتمسك بطعام واحد وإن كان ذلك ينفي تفضيلنا الأدني بما هو أفضل شأن بني إسرائيل في خوالي الأيام.
أكتفي أخي بلقب المتشلهت وأترك الفرصة أو قل اللقب الثاني لشخص آخر يريد أن ينخلع عليه اللقب فيصبح أشعبي أو شعيباً أو شعبي فأنا أكره الجمع بين أكثر من لقب فلن أكون في يوم من الأيام الدكتور المهندس أو الأستاذ الدكتور أو الفريق الركن أو العقيد البليد أو العميد الشهيد فإما عمادة وإما شهادة حتى لو كانت شهادة سكن.
لقد قلتم قولاً جامعاً كل المعاني أخي شوقي
مرحباً بشلهوت الأشعبي سيد بيت ومقيم بيننا
فإن كانت الإقامة تعني هذا المنتدى فأنا قديم قديم التاريخ فيه وإن كانت الإقامة بالهيئة العامة للمشلهتين والمتلشين فهي ما زالت تراوح مكانها ولم يتم تأسيسها أو قل الترخيص لها ككيان له ما له من تتليش وعليه ما عليه من تلطيش وبذلك أصبح غصباً عني وغصباً عنك سيد بيت وبيت ناصيه كمان ومقيم إقامة جبرية فيه.
أما عن قصيدتكم المتلشة التي إختتمتم بها مقالكم الضافي فهي من الشعر التلشي بحر بلطيم وهو ضرب من ضروب الشعر عادة ما تكون قافيته شرود.
لك الشكر أخي شوقي ولكم التقدير والأمنيات الطيبة
وإن عدتم عدنا
أخوكم في البورد الملا عمر

أخي الملاعمر
أولاً أيها الشلهوت.. أقول لك أننى رجل طورابوري.. أي من الذين يجيدون العزف على البوري بعد أكل ألمفليفلة وهذه أكلة مشتقة من الفول.. لقد دعيت علي دعواتك وأنا أخاف دعاء شيخ مشلهت أن تصيبني بواحد وعشرون حقنة في بطنى وأسأل أخى شلهوت مشلهيت رئيس الهيئة وسيعلمك كيف هي مؤلمة..
ولكنك لم تذق طعم رفسة الجمل. فسوف ادعو عليك برفسة جمل الهجان ونقدة جدادة الأمباشي.. ولحسة من حصان صول السواري في أم رأسك.. حتى تذوق طعم الشلاطيم..
التطفل على الرقص صفة جميلة أذا وجدت مت تتلش فيك وهي جالسة في الكراسي الخلفية حتى تتدلى تلاليشها وتريل أليس هذا النوع من التشلهت الأشعبي .. والقاسم المشترك الريالة في الاثنتين..
أما أن الدار دارك لا شك في ذلك أيها السنير.. فنحن برلوم.. يجب أن تذاكروا لنا والا قدينا.. وربتنا..
أما أذا عدتم عدنا فخذ الاجابة
تتليشة..:

أنا أبدردوق
ارقى التلال بي فوق
عشان أعرس القمرا
وفي الوغى
البس دروع السلاحف
وجلود الأصل لي خف
امتطي ظهر السحالي
أكجم عض طهارة البنات
واذا طارت عجات السنان
انزوي وألف ذيلي الفأري
تحت أقدام الكماة وارعوي

شكراً أخي شوقي بدري وإليك هذه الهجمة المرتدة والتي لا تستوجب بالضرورة إقامة الحد عليها لإرتدادها حالة كونها غير خارجة عن الملة وأن هناك فرق بين الردة والعيش أب ردة والهجمة المرتدة تماماً مثل مقدار الفرق بين الملة والملا... لا عليك أخي
لقد ذكرت أخي أنك رجل طورابوري وأحسب أنك عنيت تورابوري نسبة إلى المكان توربورا كأن تكون نوباوي نسبة إلى النوبة أو شهينابي نسبة إلى شهين أو موردابي نسبة إلى الموردة منطقة كانت أم فريق كرة قدم لا فرق. أما حالة كونك طورابوري فأنت هنا في مرحلة أو طور ويمكن أن يكون البوري هذا مرحلة متقدمة في علم النفس أو علم الفلك ووصولك لهذه المرحلة أو الطور يجعلنا بل يجعلني شخصياً أقيف وسط البوست أو البورد وأقول بصوت الفنان زيدان في إحدى حفلاته الشهيرة بحي بانت "جيت أقول مبروك عليك ، جيت أقول مبروك عليك"
أعيد وأزيد على ما ختمتم به مقالكم هذا بأن ما نثرتموه من درر تمثل في قصيدتكم العصماء هو في الواقع شعر شارد القافية ويبدو أن بحر بلطيم قد هاج وماج وقد تمثل ذلك جلياً في إمتطائيكم لظهور السحالي وإرتدائكم للمخالي.
أما عن رفس الجمال أو لحس الخيول أو نقد الجداد فأقول مستعيناً بالله أن الجمال ما عادت ترفس بعد أن تم تصديرها إلى دول الجوار وأصبح سيد الجردقة والحرجل يمتطى حمار ، أما خيول السواري فقد بلعت لسانها من شدة جوعها بعد أن سرق العسس قوتها من برسيم وأمباز وهلم وأطعموه للماعز بمنازلهم فأصبحت عنزة الإشلاق تناطح بقر كافوري وأمبده بل حتى تور بقر الجواميس فتصرعه أما جدادكم فما عاد ينقد أو يتقبل النقد فقد جن جنونه بعد أن أصيب بحالة أنفلونزا حادة جعلته يمشي الهوينا كما يمشي الوجي الوحل

المشلهت المنظراتي الكبير
لكن السفة ما عندك والله ان بقوا سمعوك ناس (لو ما فاطر ما تخاتر) كان عملو ليك نصب تذكاري

النصب التذكاري هين كعب يعملو للواحد نصب وإحتيال ياشوقي ولاشنوووووو

يحق لي أولاً أن أشكر كل المشلتين في هذا البوست والمشلهتين والمتلشين دون فرز
وأحب أسأل على أخونا صاحب البوست
الريش شلهت شلهيت أين هو.. لقد رأيته متلش في سلك الباب هذا الصباح.. وأخاف أن يكون قد انتقل الى القاطة أو الترباس.. فمن يعرف له مكاناً فليرشه بشوية موية حتى يفيق من تتليشته أو سنفقد هذا المتلش الى الأبد .. ويضيع بوسته وسط الكرعين..
أما المنظراتى الملا بن عمر.. لم لم تتحفنا بارىئك فنحن بانتظار إجازة هذه الهيئه المخيضة أو سحب البوست لتذهب الهيئة مع رفيقاتها من الهيئات التى أخدت التوج.. وفى وقت سابق طلب رئيسنا أن نؤلف قسماً للهيئة وأرى أن شيخنا المشلهت هو أكثرنا قدرة على ذلك..
تتليشة
بحلف ليك
يمين يالنبقة بحلف ليك
شمال يالنبقة بحلف ليك
عشان تتليشتي تبقى عليك
أعاين ليك
تقبلي جاي
اعاين ليك
تقبلي ..غاد
أصنقع فيك
أكورك ليك
ما سامعة
- أنا؟؟
- أيوا إنت يا نبقه..
- دا ما اسمي ..إسمي التاية بت خرتيت
هوي يا ود فتح لي عيونك ديل
أبوي هون داك بنادىهو
أرجع بي درب ما جيت
- ما إنتى الوراك بي هتاك
- دي الحيطة!!!
- .... بدون تكليف

أبوالشوش التلوش

ابو الريش
منتصر
انشاء الله طيبين
اخوكم كان متلش في قفة الخدار وكوم اللحم عشان كدي العفو
ابو الشوش
اين قسم الهيئة العليا انا موش كلفتك بيه ودا امر تنظيمي نفذ

تليشة:
يا الله لي
جاني الزمان البحكو بي
جني القديم قام فار علي

وأنا أعيد قراءة هذا البوست لأنني فاضي والفاضي يعمل قاضي والقاضي يحتاج إلى هيئة دفاع وإتهام وقاعة محكمة وشجر نيم أمامها وست شاي يتحلق حولها أناس ما عندهم شغلة شأنهم شأني في هذه الحياة الدنيا. المهم الخاطرة أو السؤال إن شئتم أو شاء لكم الدلال هو:
هل هناك أى علاقة بين التليش واللطيش؟ بمعني هل المتلش لابد أن يكون ملطش وهل الشلهتة ضرب من ضروب البؤس م هي نوع من أنواع الكسل والتواكل أم هي دبرسة مصحوبة بيأس لا فكاك منه.
ولهيئتكم العليا كل الإحترام
ودمتم متلشين إلى يوم الدين

اخونا وزولنا السمح الملا عمر
التليش والطليش لدينا في الهيئة وجهان لعملة واحدة وما كانت فيه الصفات يتم ترقيته لدينا الى درجة مشير مشلهت وهذا لعمري قمة الرقي.

تليشة:
الحب كاروشة في القلب لا يمكن حكها

يا صاحب الهيئة لك الشكر أجزله والشكر موصول للخيل جقلبت أم لم تجقلب ولحماد في معيتها لإرتباطه الوثيق بها فالشكر لك لردك الضافي وإضاءتك لتساؤلي بمصباح سحري يكاد يضئ ولو لم تمسسه نار ، أنا يا سيدي ما زلت أذكر حيرةً وما أكثر حيرتي وقلة حيلتي حتى أصبحت من الحيارى والمحتارين فطبيعة العلاقة بين الملطشة والتتليش بشلاليف غلاد تحاكي شلاليف جد جدود قبيلة الشمبانزي وهو يتأهب لتف السفة من الشلوفة السفلى هي في الواقع علاقة سببية فالتليش لا يكون إلا في وجود شئ من الملطشة والتلطيش وتكون مد التلابيش وجزرها متناسب ومتناغم مع حالة الملطشة وبإرتفاع ستة درجات على مقياس ريختر.
وقد أفتي بعض العلماء في أصول التتليش بجواز التتليش في حالة الفرح إنطلاقاً من قاعدة حاول يخفي نفسو ، وهو نوع من أنواع التمويه المكروه في العلاقات التتليشية على إعتبار أن العرس للعريس والفرح للمطاميس.
توقفت كثيراً عند خاتمة تتليشتكم بما فيها من بلاغة وروعة فكاروشة القلب التي كان يصعب حكها في عصور قد خلت هي في الواقع أصبحت ممكنة في زماننا هذا ، فقد حككت كاروشة في قلبي بواسطة جهاز موبايل تصادف رنينه وهو يقبع في جيب جلابيتي الفوقاني من الناحية الشمالية أو تلك الناحية التي يفترض أن يتواجد فيها القلب إن كان لي قلب أصلاً ، وكان هذا الموبايل لكراهة في النغمات قد تم تحويله إلى هزاز وكان بفعل تلك الهزات أن زال أثر الكاروشة في قلبي وبقي الحب رغم كل شئ.
أشكركم أخي وإذا كنت في دولة عربية أو شرق أوسطية وكان يوم الجمعة من الأيام المقدسة فيها أى أنه يوم عطلة رسمية أقول لك have a nice week end وحق لي أن أضع لمقالي هذا end

كبير اباطرة التتليش الملا عمر
تحية من شلوفة مقهية ونشفانة
بما انني اعيش في المغرب ويوم الجمعة هو يوم عمل تجدني مقهيا في بوست هيئتي العليا هذه فلك الامنيات الكبار في جمعتك اين كنت. وهزاز الموبايل لا يزيد الكاروشة الا هياجا كما يفعل الواحد منا حين تكون لديه (عوارة) وحين يحكها تزداد صديدا. حمانا الله واياك من الكاروشة و(العواوير)

تليشة:
حنكوشة وين ألقاكي
في ومبي ام كنتاكي
خلفت وعدت شردتي
سبيتيني اعوعي اكاكي

بما انني اعيش في المغرب ويوم الجمعة هو يوم عمل تجدني مقهيا في بوست هيئتي العليا هذه فلك الامنيات الكبار في جمعتك اين كنت. وهزاز الموبايل لا يزيد الكاروشة الا هياجا كما يفعل الواحد منا حين تكون لديه (عوارة) وحين يحكها تزداد صديدا. حمانا الله واياك من الكاروشة و(العواوير)

الجمعة عندكم ما اليوم ولا شنو يا ود جبريل أب تلوشا طويل
شوقي لكم أكتر من حروف شوقي ضيف
البقية المتلشة
إين انتم ..؟
UP
إلي الامام
ود زبيدة

ود زبيدة

انت الزعيم ابو الشوش غتس وين لي منو سنين كدي ماني عارفوا لابد وين
دحين ان بقا طارينا اليدخل
لك كل الود متمسح

يا أصحاب الهيئة المبجلة
أسأل الله أن ينطرح وشكم وتنزم – من زووم إن – شلاليفكم ولا يريكم مكروها في عزيز لديكم في العام الجديد 2006
فالتليش في الوجوه بالنسبة للمتلش أو المتلش له يمثل للأول معني البؤس واليأس وللثاني عدم الترحاب فإياكم وصرة الوش ومد التلاليش والقه هي لأن الذي يقهي لا يدري فيصبح خشمه مفتوحاً على مصراعية وفي رواية أخرى فاغر الأمر الذي يجعل أى ضبانه طنانه قادرة على الدخول والخروج دون عنت ونحن مقبلون على موسم أضحية سوف تنحر فيه الذبائح من خراف وكباش وتيوس كان لابد أن يتكاثر عدد الضبان وكان لابد لأصحاب الهيئة أن يتفضلوا مشكورين بتوزيع أقنعة أو سلك نملي للسادة الأعضاء لوضعه على خشومهم الأمر الذي يسمح بدخول وخروج الهواء أياً كانت درجة نقاءه وتحجب عن الدخول الضبابين.
أما الشلهتة كما وردت في كتاب المفلسين المعدمين المعوذين صحاب الدين ومحترفي السلف فهم قوم يتعمتعون بحركة دؤوبة ولا يهدأ لهم بال دائما ما يتحينون الفرص والتي نادرا ما تأتي وقد لا تأتي ومن فسلفتهم الراسخة أن يلبسوا طاقية دا في رأس دا وهكذا دواليك
التليش في تقديري المتواضع مظهر من مظاهر البلادة والعباطة وكسل حتى وإن كان صاحبه صاحب إحتراع أو عالم نال جائزة نوبل في أي من فروعها

المتلش العمرى..
سنة متلشه.. وعام مشلهت.. وكل أهضاء الهيئة سعداء..
في هذا العام سيغنى جميع المتلشين.. وهذا مارأيته لكم في فنجالم ملئ بملاح مشلهت من ملاحات شلهوتة الويكيية ..حتة طماطم مع قليل من الروب .. ورشة فلفل.. عليهو رشة ويكة من أنامل رقيقة أخذت منها الاسم الجميل(أم رقيقة).. ولا تجنو على المشلهتين فهم اناس جار عليهم زمانهم.. ولكنهم من عفتهم لا يرقون على اكتاف الغلابى ..
تذكرت بوست رئيسنا الذي يقول فيه أن بعضاً من قياداتنا (يبرطعون) وعجبت لأمر من زعلوا وبرطموا حد التتليش.. لقد نسوا أن(الخيل معقود بنواصيها الخير) وأن من يبرطعون أمر جلل.. فقد سجل لهم السيد شلهت شلهيت ووثق لهم عزتهم وكرامتهم.. ولكن ذنقوهو في خانة اليك..ونسوا أنه متلش .. يلبس ثوباً من أم رقرقة .. يتملص من المصائد .. كما القرقور في الشوربة الحارة..
شكراً شلهت شلهيت .. فسبب تأخرى هو الكشته خلف (خروف العيد).. ولوازم (الغيارات) وان صعب الوضع فحبة من مرق .. وقليل كيلوات من لحمة طازجة .. سابقة الذبح .. تسكت العيال..

لكم ودي وتلاليشي...

تتليشة (مريلة)
يافولايا
يا باميايا
يا وييكة يا عز يا هنا
تعالوا اجمعوا بي هنا
يا ويكة بديكي الضلف
ويا بامية ما ليكي الضلع
ويا فوله يا مسترجلة
صبرك علي
ليك القلب
وجوة مصراني الغليد هاكي الكلى

شوقي ادريس
رئيسنا المؤسس الكبير

انا افتش عليك سلقط ملقط انت اتاريك غاتس مع الخرفان وغرقان في ام رقيقة والله قشة ما تعتر ليك...
قلتلك عازلنا قسم للهيئة ألتنا دي دحين أنا كلفتك بيه من الليلة قبل ما تدخل في الشيات وام رقايق..
كل عام وجميع المشلهتين مبسوطين وتريانين...

تليشة:

انا المنتوف
وعيوني الصغار مابيات الشوف
انا المفلس وعدمان حق الخروف

كل سنة وكل أعضاء الهيئة المشلهتين والمتلشين بخير.. وضيوفها



تتليشة
احذر.. لا تترك خروفك مطلوقاً
.. عشي خروفك عشاءً خفيفاً..
.. اشتري خروفك ليلة العيد أو صباحاً
أوعه يهرب!!
أو يزوغ..!!
أو ينقرض.. أو يتلحس
وتبق في حق خروف تاني..
وأباطك النجم إذا
هرب!!
أو اتسرق
ديك ا لحبل

ابو الشوش
انا افتش ليك صلقت ملقط انت اتاريك غاتس مع الخروف...
كل سنة وكل اعضاء المنبر بخير..
بالله قبل ما تدخل في الشواشو وام رقايق شوف لينا موضوع قسم الهيئة..

تليشة:
انا ريحة الشية عاملالي شقيقة
انا المكتول فيك يا ام رقيقة

كـــــــــ عام وأنتم بالف خير ــــــــــــــــــل
كل المتلشين والمتلشات
والمشلهتين والمشلهتات
الأحياء منهم والرياضيات
المهاجرون منهم والمهاجرات ( مهاجر لموزين)
والباقون منهم والباقيات ( الباقيات الصالحات )
عام جديد إنشاء الله يكون ختري عليكم
يديم البهجة في عينيكم يبسط الخير في إيديكم تدخل الناس بخرافها عليكم
تلقوا السعادة بين إيديكم
ويدينا ويديكم
آمــــــــــــــيــــــــــن
الإعزاء جدا في الهيئة ( الهيئة القومية لإستئصال شلل الأطفال )
نفيدكم بأن السيد خروفنا الموقر المحترم قد فلت من بين يدي كما تفلت كباية الشاي من يدك في رجل الأستاذ وانت قاصد عموما فلت وهرب إلي غير رجعة مما ترتب عليه إصابة كل من أعضاء الداخلية عفوا بيتنا ( ذي الداخلية) يصاب ويعبر عن إصابته بطريقته الخاصة
فمثلا أبي تجده يحوم بالشارع مثل رجل الخط ليعود ويسأل ( الخروف جاء ) يجي براهو ياحاج انت هضربت ولا شنو ...؟
أبي : انت مش قلت صاحبك أبوالشوش التلوش قدم ليك نصايح
العبد لله : أيوه ياحاج بس كلمتك وانت عملت فيها ميت عشان تحنك صرفة الصندوق بتاعت الحاجة
أبي : يا ولد خلاص اسكت سكت حسك ...
العبد لله : والله يابا الخروف ده ذاتو أنا من شوفتو شكلو زايق زايق ..أصلوا بشبه زول كدي ( إنت عارفوا ياطارق جبريل كان نسيت أسال ابو الشوش)
أبي : أنا سيدو قال لي أصلو هو الخروف ده كان المفترض يمشي مع الصادر لكن كان ساكي ليهو نعجة وزاغ من التصدير ...
العبد لله : يعني خروف ده متعود يزوغ .. أسي تلقي متلش ليهو مع نعجة ذي تليشة ود جبريل في البوستات بتاعة (........)
المهم في الموضوع أننا لم نجد ذلك الخروف في تلك الليلة الحالكة السواد التي جعلت خشمونا ملح ملح والعيد ذاتو مسخ (شفتو الخروف أقصد شوفتو البلية الوقنا فيها ) ..
نفير من أولاد الحلة طلعوا حملة بتاعت تفتيش معنا خبراء التفتيش الدولين للبحث عن (المفاعلات النووية واسلحة الدمار الشامل ) السيد الخروف والسبب وراء إختفاءوه .. وكل يدلي بدلوه( نحن في بير) ويسأل من الأسئلة ما يجعلك تحسد الخروف علي الأهمية وتتمني لو أصبحت خروفا هارب من الضحية .........
هل الخروف كان مربوطا أم مطلوق سااااكت في الحوش ..؟
هل الخروف شرد أم سرق أم قضي نحبه ..؟
هل الخروف شرد من تلقاء نفسه ..؟ أم هناك أيدي خفية ترتب للهروب لتحقق مكاسب مادية من وراء ذلك ..؟
هل ..؟
هل ..؟
هل ..؟
أخ ياجماعة النتيجة واحدة خروفي راح في حق الله )
وبعد اللت والعجن والإجابات الإفتراضية جاء التشريع والتحليل التي بكل تأكيد لم ولن يصلوا إلي أي نتائج فيها
منهم من قال إنه تم إختطافه من قبل جزار القاعدة ومنهم من قال إنه ذهب ليؤدي الفاتحة في ملك الغابة المجاورة ولكنه وجد الفؤاد ملكوه غيروا وشتت بي وشوا ومنهم من قال إنه ذهب إلي الإحتماء بحديقة مجاورة لحلتنا من قهر بني البشر .... وهنا خر أبي أرضا وقال ( خلاص بكون لحق أمات طـه ) الإبادة جماعية بالكوم ولحمة كيري ما بتفرز خروفك لو بقيت أحرف جزار .
الهم تقبل خروفنا كضحية لأنو النية واصلة و أنت أعلم يا إلهي
نحن لحمة السنة دي ما دايرين عددددددددديل كده ( ذاتا بتعمل قاوود)
ونعلنها داوية للملأ ( ما الملا عمر ) نحن من اليوم نباتيين
تليشة :
الناس صلت وجرت علي خرفانا
واناخروفي ضربوه بالجبخانا
شربوتي داك خمر ملي الجركانة
نهضم شنووالمعدة من اللحم جعانة
مقصة بس قستمو الحاجة لي جيرانا
ولكم حبي
كل اعضاء الهيئة ضحية مقبولة لكم وكل عام والجميع بخير والشاف خروفنا يكلمني وله جائزة قيمة عبار عن الجلد والضلافين التي سيحرم منهم السيد الجزار المتأمر مبدئيا مع الخروف لحين إثبات التهمة ...؟
ود زبيدة

ود ذبيدة.. قتلتني من الضحك... يجازي سنينك..

يخلفكم الله في خروفكم...

وأن يججمعهو ليكم الى عشرة خرفان( فالحسنة بعشرة أمثالها).. أوعك تقول لي خروفي ضكر حيذيد كيف.. أسأل طارق جبريل ... هل ممكن خرووف يستنسخ والا لا..أنا غايتو خروفي بيلد..كل زوول حر في خروفو..

تتليشة
خروفي الفروو... فرو الفار
كاسي صوفو كلو وقار
متوشح قرنو زي فرار
خروفي البشبه الدفار
كان قام صوف
أصلو ما بندار
أأأخ خروفي ما ودرتو ودار!!!

ابو الشوش التلوش

تحياتي ..
وعميق حزني علي خروفنا..إذ أنعي فيه دماثة الأخلاق لأنه لم يتعرض لنعجة قط ولم يكن كثير المسكولات للجكس إذ أقر صاحبه إنه كانت لا تأتي له رسائل فاضحة علي الإطلاق وكان لا يحب الكسح علي الإطلاق وكان نعم الخرف إذ كان وااااااااااافر اللحم والشحم مكتظ بالوبر ( الوبر دي يعني الصوف ده لزوم نعي ساكت ) ولم يتعرض لشله تفقع مرارته لذا كان سالم المرارة وذو كبدة رطبة لأن أخي قال أدوهم حديث في المدرسة (في كل كبدة رطبة أجر ) أملح العينين طويل المنكبين كليع الكلكعين مشرئب ... ينتمي في نسبه إلي خرففه بن خراف آل خروفان المتحومل ودي طبعا جاية من حمل وديع وكذلك كان في صباه...

الهم من نعم بي خرفنا تصيبه ملاريا خبيثة حمتها يهبشوها بالعود وكل يوم الدكتور يقول أخير أمبارح ...
الهم أحرمه خير الدنيا ونعيم الأخرة
الهم سلط عليهو [الموج ] يدقشو بي باخرة
الهم ابليه بي واحد [سجيمااااان] يخلي خانتو في الدنيا شاغرة
الهم الهم حرش له [أبو الشوش] يجيب خبره والناس تجيهم كاسرة
الهم سخر [ود جبريل] ليهجوهم بقصيدة عصماء تأتيه في لحظة عابرة
الهم كسحه وفصله وكسره و أظلمه كما ظلمت [هيدان] ومازالت حايرة

فلك الشكر عزيزي ابو الشوش في مواساتنا الألم في مصابنا الجلل و لا يريكم الله مكروها في خروفا أو عنبلوكا أو تيزا أو نعجة أو أي نوع من الأنواع المكاره في أنعامكم ( ما إنعام الطهروها ماتت )

* ملحوظة : يا ابو الشوش
الكشف بي غادي وراء البوست ...
ما شايفو هداك أبوشوش بطل حركات شنو عزيت و إتغديت وداير تزوغ من الكشف
( يعني الكشف ده نحن نختو مع الغسالة ولا شنو ..؟ ولا نغطي بيه الصنية كان ما دفعت ما تاكل ..؟)
ما تخلونا نشيل حالكم سااااكت أدفع بالتي هي احسن
أيوه صاحبك وأي حاجة لكن ده خروفنا والدنيا عيد ...
بالمناسبة صاحبك طارق ما عزاني .. والملا .. وقرشو .. والقلب النابض ,,وكمية أنا دافنا ليهم ..

تليشه :
الخروف خروفك ...
أهدي لي من فضلك
فخده من رجلين
أنا يالسمين في كرشك
في العيد نكون لفولنا داك ماكلين
ما نحن يا ابو الشوش أصلنا ما ضابحين ...
انا يالكريم في لحمتك

ولكم حبي
ود زبيده

Quote: الكشف بي غادي وراء البوست ... ما شايفو هداك أبوشوش بطل حركات شنو عزيت و إتغديت وداير تزوغ من الكشف ( يعني الكشف ده نحن نختو مع الغسالة ولا شنو ..؟ ولا نغطي بيه الصنية كان ما دفعت ما تاكل ..؟) ما تخلونا نشيل حالكم سااااكت أدفع بالتي هي احسن أيوه صاحبك وأي حاجة لكن ده خروفنا والدنيا عيد ... بالمناسبة صاحبك طارق ما عزاني .. والملا .. وقرشو .. والقلب النابض ,,وكمية أنا دافنا ليهم ..

أخوي ود ذبيدة
لك كل تتلاليشي الحارة بفقدكم خروفكم الميمون.. ود الشيوخ.. وارد فشلا وأريحيا..
الاخوان كبو الزوغة من الكشف... لكن القلب النابض ستحضر لك ملاح سبروقة ... كل وأنت تريل حتى تشبع.. وما تنسى تشبع الوليدات..
سأتبرع لك بكل مصاريني..( حقت الخروف).. ومعها ربع فخذ.. أكثر من الدعاء لخروفي حتى لا يقوم طائر.. ونبقى معاكم فى صحن السبروقه.. والبشوفنا اتخامشنا ما كضب.. أما ود جبريل فمشكلتو محلولة.. أي خروف من العيادة .. ويسلم صاحبو ورقه مكتوب فيها( نفق خروفك رغم الاجتهاد) حركات الدكاترة دي انا عارفها كويس.. زي الكمساري لو ما حدرت ليهو ما بديك الباقي..

تتليشة..
يا ضيقي
وا ضيق جيبي المرهوف
من وين لي
كبف ادبر المصروف
بس قولي من وين لي..
خروف..
هل ممكن اجيب حلوووف؟؟
أصلو الظرف معروف!!

ابو الشوش التلوش
انت قاعد مبروش وانا خروف قد الحوش
لك التحية
مصارينك دي ما دايرينها لآنو د.طارق قال انا قطعت مصارينك بالضحك
ولو قلت حقت الخروف إنت شكلك مضحي بي حلوف ربنا يستررررررررر
قول لي د. طارق ما بنقبل غير إيراد يوم كامل في العيادة الخارجية ويكون اليوم ده يوم نموذجي ( اليوم البكون صبحان رمضان ناس الكشف بكونو كتااااااااااار ) ده بإعتباره يوم نموذجي غير كده ما راضيين
القلب النابض
إزييك يا بتي
نحن نباتيين وملاح السبروق ما بناباهو لكن الفيك إتعرفت من أسي ( سبروق يوم العيد)

تليشة:
سرقوك يا حبي العلوج
نهبوك قبال ما تروق
قبال تهبش موية الملح
قبال تتمتع في العلوق
شمتنا فينا ابو الشوش
لمصرانه تب حالفين نضوق
قليبك أصلو نابض وعارفنك
تأكلنا سبروق الخلوق

ولكم حبي
ود زبيدة

ٍٍٍٍٍٍٍٍٍٍسسسسسسســـــــــلالالالالالالالالالالالالالامممممممم
فقط لكل الذين عزوني
لو العزاء هنا ما جاب حقو ...حنفرش في بوست تاني
وسينتقل العزاء هناك فقط تابعونا بي صواني الغداء وكده

ولكم الشوق
وختي ذلك الحين أتمني أن نسمع أخبار عن خروفنا أو خاطفيه
ومارق أفتش الخروف لأنو أبو فتر خلالالالالاص
ولكم خبي هي أخبي شنو ..؟ لكم حبي معليش

ود عزيزة
وود زبيدة
عندي ثلاثة أمين مش مخير في أماتي

سلام شباب

تفيد أخر الأنباءالواردة مساء اليوم أن

السيد طارق جبريل دخل المنتدي ولم يواسيني

القلب النابض اسي حايمة بي جاي ولم تقم بواجب العزاء

وصرح مشؤؤؤؤؤؤؤؤؤؤؤؤل في الهيئة أن الخروف مازال مجهول

المكان ( حتي ست الودع والفكي وقارئة الفنجان .... المنجمون وكل الناس العامله فيها تفاتيح ومعاهم الجان ) لم يدلوا ويصرحوا بما يفيد ابوي الغلبان

الفكي قال لي أبوي
اضبح ليك ديك لون زينب ... هو غير زينب الفتح الباب للخروف منو ..؟
البن لازم يكون برازيلي ... خروفنا راح في إستاد ...
الودع مَُحمدك ياطارق بي خروف السنة الجاية رايح رايح
نجمة نجمة الليل نعدوا .... لو الخروف بجي راجع

وإلي تفاصيل أوفي تابعونا

أبوي في حالة صعبة خلاص ( المعاش والصرفة الراحت بلاش )

ولكم حبي

خالك يا إيمان

كل سنة وانتو طيبين

تسلموا ياناس قلوبهم عامرة طيبة ونقاء

منصر ود زبيدة

أها جيت اعزي في الخروف

ما جمع لسة

عليك الله كان جمع تعمل لينا مؤتمر صحفي لي هيئة المتلشين كلهم

وتجيب الجزيرة والعربية والبي بي سي" ديل علي انا"

وجيب قناة النيل لاني بريدة وما شفتها في حياتي الا ما يزودنا به تمبس.

وكلم ناس السي ان ان

يارب تلقاه

وكان على ملاح السبروق والله اجيب ليك سبانخ طازج من اجعص حتة هنا

" ذكرتني نان انت قايل ملاح السبروق ما دايرلوا لحم"

خلاس من قروش الكشف جيب لك شوية لحمة بس

وما بنسى دا حقى في الكشف يا ناصر يا وليدي ما تشيل حلى بالحلي

كنت صارهن في طريف توبي .

مع اني جيت للعزاء

لكن شايفة في ناس في الفراش سمحين ومنورين ومركبين صور جديدة لزوم العيد."ندوية"

ولا اراكم الله مكروهاً في خروفٍ لديكم

ودام تضامن هيئة المتلشين العليا

ياطارق يا ود عمتي

كل سنة وانت طيب.

أخوي ود ذبيدة هاك مذكرات خروف العيد في حلقات
الحلقة الأولى
كان وادعا يجري خلف امه يقفز هنا وهناك على التلال والروابى ،يأكل من العشب الهش ويرضع حتى يشبع ويسيل اللبن مع لعابه عندما يلهث من الجري خلف القطيع. لايذكر متى عرف طعم الماء لانه لم يحتاج إليه مطلقا فقد كان يقف بعيدا عندما تشرب أمه من البركة وهي تزاحم البقية ، لقد إرتبط بأمه كثيرا وعشقها حتى الثماله وكان يخاف أن يضيع منها وذلك لحرصها الدائم غليه وبحثها عنه إذا ما إبتعد عنها قليلا. وكان صوتها الدافئ يجذبه إليها ويحدد له مكانها وسط القطيع الذي تتشابه فيه كل الأمهات مثل أرتال المشاة الصينين،كما أنه أدمن رائحة أمه ورائحة ضرعها المعطاء.
وعندما كبر قليلا بدأ فحل القطيع يمازحه ويتودد الى أمه وعندها فقط عرف أبوه . وبدأ يجرى خلفه, ولكن هذا الوالد كان يقسو عليه يوما بعد يوم حتى أبعده من حضن أمه . وجاء يوما ليرضع فرفسته أمه وعندها أدرك بأنه كبر ولم يعد (حملا)وبدأ يهتم بنفسه ويغصبها على أكل الحشيش وشرب ماء البركة القذرة.
وعندما إنقضى الخريف بدأ يتودد الى (حميله) بنت خالته الجميلة الودودة والتى كبرت معه ولعبت لعلها تملأ فراغ أمه. ولكنه وجد منافسة قوية من أنداده فقد كان يضرب وينطح ممن هم أكبر منه ويصارع هو من هم دونه ليثبت لها جدارته بحبها.
كان يمتعض من هذه الحياه والتى لا تستوي الا بالصراع اليومي ( يا ضارب يا مضروب) ولا أم قريبة أو أب يشتكى له ويطلب مناصرته . ولكنه بدأ يكبر ويعتاد على هذه الحياة كلما قوي ساعده. وبدا يمارس أسلوب البطش وفرد العضلات ، ويحقق الإنتصار تلو الإنتصار بين أنداده،لا بل بعض من هم أكبر منه.
وعندما جاء الخريف كان من أقوى فحول القطيع وأجملهم ،وبدأ الإناث يتوددن له حتى أنه نسي همومه وصار يستمتع بيومه ناهيك من مسئوليته عن جزء كبير من القطيع .
والبقية تأتى

أبوالشوش

تحياتي شباب

Quote: كل سنة وانتو طيبين تسلموا ياناس قلوبهم عامرة طيبة ونقاء

والله يا بت عثمان ده ما بيعفيك من الكشف
نحن شبعنا كلام حلو
ولا الكلمة الطيبة صدقة .... ههههههه
عموما قبلناها لو الخروف عاد سالما غانما .. لكن كان لي باكر ما جاء
ياكي الدافعة في الكشف دافعة
وكل سنة وانتي طيبة ياااارب



القلب النابض

ما عندك مشكلة يا فردة ح نعمل مؤتمر جامع إن الله خروفنا يجمع

Quote: لكن شايفة في ناس في الفراش سمحين ومنورين ومركبين صور جديدة لزوم العيد."ندوية"

الله يجازي محنك ................ وبدون تعليق ....

شايف اسمك في كراس الكشف
تسلمي
خليك جاهزة للمؤتمر


ابو الشوش التلوش


الظاهر الخروف ده جاءك وحكي ليك
وانا شدة ما تشبه قصة خروفنا المختطف انا قلت هو ذاتو
كدي تم القصة .... ويا جامع تجمع ( ويا عالم .....)

ولكم حبي
ود زبيدة

ود زبيدة

انا مشيت اكوس للخروف أليلي اجي القى حقك رايح..
دحين هسا مشيت قمعتة اصبعي بي حني مع واحدا صاحبي كدي لكن لازم امشي هسي اقمع اصبع في رجلي عشان الفراش لانه النسوان قالوا بقوا يرسموا حنة في ضهر الرجل سموها حنة العزاء انا كمان ألمشي اقمع اصبع الرجل عشان ان بقا الواحد اتوهط في صيوانك دا وسط الرجل وطلع مركوبو تكون قميعتو ملعلعة رسمي..

بعدين انت الكشف دا ما شرط يكون نقدي اقبل باي شي انشاء الله ضلفين مرفعين تسويبن ام رقيقة لانه البوش في العيد فال سئ خلاص يخلي سنتك مبوشة رسمي وشعبي..

حبيبنا ابو الشوش
انا شايفك تغتس وتطلع ودحين ود زبيدة مسكك تب من اليد البتوجع ياخي انت الكشف دا ماهو باين حتى ود زبيدة خاتيلو جنبو علم وضلفين من العيد الفات ياخي انشاء الله تديهو دهنايي من بيت الكلاوي لانه الخوف المصارين ديل تكون فيهن دودة شريطية انا اصلي من حظي المبوز ايي خروف شفتو ايامي الفي السلخانة لقيت مصارينو مهريات ومرارتو مفقوعة وكبدتو مصفرة..


القلب النابض
بت ابو دية النبي فوقك ان ما جيتي عيدتي معانا في المغرب والمغاربة ديل حاجاتم كلها كوتور حتى عيدم لي يوم الاربعاء دحين شفتي جن زي دا.. وابقي طيبة...

نادية عثمان
البركة الزورتينا في الكريقا ألتنا دي انا عارفك مثقفاتية ملهلبة وخريفا زي خريفنا دا ما بيعجبك


الاحباب اعضاء الهيئة
تاكلوا مرارتكم بخير

تليشة:
انا العيوني حمرة وشرارة
انا البجوعر وافنجط وماسكاني العوارة
انا الضهبان ومكتول فيك يا المرارة

أخوي الضهبان تالش تتليش

وين أراضيك .. شكلك ضايع زي خروف قريب ناس أبو ود ذبيدة الودران في حق القش

كل عيد وتلاليشك مريله ..
انشاءالله تكون ضربت أم فتفت.. وكرعت من كاسات الشربوت الناعم المنغم بحبات الزنجبيل الزمخشرية.. البتفتح مسارات الأكسجين من الجهتين.. في ناس بالهم راح شمال وجنوب.. وتانين شرق وغرب.. بس ود جبريل وحده يعلم أين تقع الجهتين التى أحدهما يمرر الأكسجين ولالآخر يمرر الأكسجين بعد هلكته.. وفوزنته مع بقايا أم فتفت الحيوانية كيميائياُ مع أم فتفتنا نحن...
لكم كل عيد مشلهت.. ومتلش كعيد الغربة والخروف الودران المالفى سيدو..

لكم الحلقة الثانية وتنفعكم..
صحي (خريف) فجر يوم على هرج ومرج في القطيع كانما ذئب قد هجم على نعاجه أو أن أمطار الخريف ورعده القوي قد بدأ، لوهلة لم يدرى صاحبنا ما يجرى حوله ، حاول أن يتماسك كعادته عند نزول الهوائل على امته حيث يكون من أول المدافعين . لكنه راى كل القطيع يجرى يمينا وشمالا. اخيرا ادرك أن الوضع عادي لانه راى أبناء ادم في مقاطعتهم ، وهم عادة لا يؤذون بل دائما على مقدمهم البشر والخير.
لكن هؤلاء الآدميون مختلفون تماما عن اولئك اللذين يعرفهم ، هؤلاء يلبسون ملابس بيضاء ونظيفة ليست مثل ثياب راعيهم والذي يلبس مثلهم تقريبا الا إختلاف الخامة، هؤلاء لا رائحة لهم مثل صاحبهم هؤلاء لا رائحة لهم. أجسامهم ضخمة. ويحملون عصيا كبيرة ومزركشة.
إنهم يجولون وسط القطيع يلمسون ظهورنا ، ماذا جرى للآدميين أراهم يتحسسوننا . وفجأة وجد نفسه في قبضة أحدهم، لقد أطبق على عنقه ورفع رأسه الى أعلى ، إنه يقبض بمناخيرى ، لفد أمسك بشفتى السفلى ، يعد أسنانى ،وعندما أطلقنى إندفعت الى آخر القطيع.ذيلي بين أرجلى من الخوف.
لن تنتهى هذه المهزلة يجب أن ادافع عن إناثي ،سأنطح كل من يقترب منا .
نفش (خريف) شعره ليدافع عن قطيعه لكن هنالك من أطبق عليه ورماه أرضا. ثم شعر بشئ يحترق ،( إنها أي ي ي ي ي إنه آيآي )، لقد وسم باذنه وشعر بحرارة وألم لم يشعر بهما من قبل. ثم اطلق سراحه وجرى الى أبعد من القطيع حتى أتاه راعيه وطبطب على ظهره.جتى ذهب عنه الخوف والألم وشعر بسائل يسيل حارا غخده الأيمن لونه أحمر ورائحه لم يشم مثلها من قبل.
لقد بدأ منذ ذلك اليوم يرهب ويخاف الآدميين، حتى الراعي الذي قاسمهم المرعى والبيت صار يجرى ويرتعب عند رؤيته. كما أن الكوابيس والأحلام المزعجة صارت تنتابه وتهجم عليه في اليقظة والمنام.وشيئا فشيئا بدا خريف يعاود اخذ زمام الأمور وبدأ يستشعر أهميته ومهامه في حماية إناثه وقطيعه. وبدأت تنتابه حمى العدائية نحو بني آدم المغرورون، حتى أنه نطح الراعى يوما وهو يحاول الإمساك به.
لقد إستعاد وضعه في القطيع وكذلك ثقته بنفسه. الى أن جاء يوم راى أولئك الآدميون الذين كووا اذنه قادمون من بعيد. عندها شعر بنرفزه وبدأت خياشيمه تسحب الهواء بشدة من غير عادتها إلا فى حالات النشوة الغامرة التى تحدوه في بعض الأيام عندما يتمرد أحد الحملان عليه ويغازل إناثه. أو بعض الكوابيس التى تأتيه في شاكلة بنى آدم يريد الإنقضاض عليه وكوي اذنه. لقد إقترب اولئك الأوغاد ويجب عليه الدفاع عن قطيعه ، هذا ما أضمره في نفسسه وتهيأ للقتال.

والبقية تأتي
تتليشة
أم فتفت سعت وقفت فت
غلبني النوم سهرت الليل
والبطن اتلت
قسمت البطن تلتين
تلت للظت
وتلت للفت
وتلت للت..

زعيمنا المؤسس ابو الشوش
والله ايامك ساكوبيس غاتسلي في ام فتفت انا والله ان بقيت اكلت ام فتفت قدام المغاربة ديل علي يكتبولي خروج نهائي غايتو مقطعا في حشاي وصابر..
منتظرنك تكملنا حكاية الكبش أليلك دا..
انت ود زبيدة باين عليه لقا خروفو وغاتس في الشواشو من يوم الوقفة تاني ما ظهر تب.


تليشة:
انا كل من حالي كر
قاعدلي في بلدا ناسا كوتور
لا مرارة لا شية جمر

تليشة:
انا واضييقي وا وجع قلبي
انا الهموم علي ديمة منكبي
انا المسكني اسهال وما قدرت اضوقك يا (الكبدي)

تتليشة حرة
اتصور!!
أكل اللحمة
نفخ
مصراني الأعور
نفخ نافوخي اتكور
كوز شربوت
عشان الشحنه تتحول
عصير حرجل
عشان أرجل واتصبر
قشر نعناع
عشان الكرشة تتدشه تتدور
قرش ليمون
حتى..
العادم اتفور
تتصور؟؟؟

ابو الشوش العزيز كيفنك لي الليلي غاتسلي في الشربوت؟؟؟

تليشي شحماني:
وحاتك انت يا الشربوت
وحات ام رقيقة والشرموط
ناكل لحمنا لو مليان دود
ولو كرشينا بقت زي بالونة البرشوت
وقالولنا ان زدتو ياهو الموت
هو نحن ان ما متنا وين بفوت

نحن المشلهتين
الناس دفيانة ونحن بردانين
لا بطانيتا سمحي لا جلسرين
شقوق ايدينا زي صنفرة الدرابزين
وجضومنا تحلف تقول كبلهن جمكسين
ممغوسن وصابرين مقطعنو في المصارين

تحية نضالة للمشلهتين اينما كانوا