حقوق الملكية

Post: #1
Title: حقوق الملكية
Author: Emad Abdulla
Date: 08-24-2007, 08:44 PM

[

QUOTE]حقوق الملكية: سودانيز أون لاين دوت كوم لا تمتلك ما يكتبه الاعضاء هنا، ولا تمتلك حق التصرف به سوى بحذفه أو تعديله هنا في هذا المنبر فقط. أما أن تنشر ما يطرحه الكاتب هنا في وسط غير سودانيز أون لاين دوت كوم، كان هذا النشر بتصرف أو بدون تصرف، أو أن تمنع كاتب المحتوى من أن يتصرف بما كتبه هنا كأن ينشره في وسط آخر غير سودانيز أون لاين دوت كوم كماهو أو بعد تغييره، فهو حق لا يعود لها، بل يعود لكاتب المحتوى فقط، وهو وحده من له حق التصرف به كاملاً. ينتفي هذا الإقرار إذا كان هناك اتفاق مابين الكاتب SudaneseOnline.com يفيد بغير ذلك

ممكن أخونا بكري أو أي واحد قانوني يشرح لينا الكوت ده !!!
معليش .. انا مجلي في الرياضيات و القانون ..
يدكم معانا بالله .

Post: #2
Title: Re: حقوق الملكية
Author: Emad Abdulla
Date: 08-24-2007, 08:46 PM
Parent: #1

ممكن أخونا بكري أو أي واحد قانوني يشرح لينا الكوت ده !!!
معليش .. انا مجلي في الرياضيات و القانون ..
يدكم معانا بالله .

Post: #3
Title: Re: حقوق الملكية
Author: شمس الدين خواجات
Date: 08-24-2007, 09:03 PM
Parent: #2

عمدة ازيك ,,

Post: #4
Title: Re: حقوق الملكية
Author: Emad Abdulla
Date: 08-24-2007, 09:05 PM
Parent: #1

Quote: ولا تمتلك حق التصرف به سوى بحذفه أو تعديله هنا في هذا المنبر فقط
حذفه فهمناها ..
تعديله دي شنو ؟؟؟؟ ..
و كيف يتم تعديله و هي - أي سودانيزأونلاين - " لا تمتلك حق التصرف به " .. ؟؟؟؟

Post: #5
Title: Re: حقوق الملكية
Author: Emad Abdulla
Date: 08-24-2007, 09:14 PM
Parent: #4

شمس إزيك ياخ ..

أنا متحير في الجملة دي .. و كايس زول يشرحا لي ..
Quote: سودانيز أون لاين دوت كوم لا تمتلك ما يكتبه الاعضاء هنا، ولا تمتلك حق التصرف به سوى بحذفه أو تعديله هنا في هذا المنبر فقط.

هل المفردة أداة الإستثناء ( سوى ) مقصودة هنا ؟؟
و إن كانت كذلك فيجوز لسودانيزأونلاين حينئذٍ حقين :
1- حق الحذف .
2- حق التعديل .
و التاني ده هو البيجيب الكلام ... !!!!!!
أو يكون المقصود ليس المفردة ( سوى ) و لكن ( سواء ) .. لتصير الجملة :
Quote: سودانيز أون لاين دوت كوم لا تمتلك ما يكتبه الاعضاء هنا، ولا تمتلك حق التصرف به سواءً بحذفه أو تعديله هنا في هذا المنبر فقط.

و برضها ما ظابطة ..

إنت رايك شنو يا صاحب ؟؟؟؟

Post: #6
Title: Re: حقوق الملكية
Author: الشفيع عوض شوشتا
Date: 08-24-2007, 09:22 PM
Parent: #5

يا عمدة ..
ازيك ...

تعرف من صباح الرحمن ومجرد ما فتحت المنبر لاحظت الكلام المكتوب ..
وزيك كدا قاعد في كوم سؤال ..

...
الا اذا كان قاصد التعديل والحذف في حالة وجود ما يخالف اللائحة ..

Quote: و برضها ما ظابطة ..

Post: #9
Title: Re: حقوق الملكية
Author: Emad Abdulla
Date: 08-24-2007, 09:30 PM
Parent: #6

.
يا صاحب .. سلام ..

كلامك صاح فيما يختص باللائحة ( و هي أصلاً غير نشطة .. بدليل كم الخروقات لها من كل إتجاه ) ..
اللائحة تجيز الحذف .. نعم ..
لكن ان يتم التعديل في مادة ترجع حقوق ملكيتها الفكرية لكاتبها ..
و دون الرجوع للكاتب لتعديلها بنفسه أو الإتفاق معه على إجراء تعديل محدود بما يتلاءم و اللائحة .. , فده شيء غريب شوية و ما مفهوم ..

ننتظر ناس القانون .. يمكن يفتونا .

شكرا يا شوشتا .

..

Post: #7
Title: Re: حقوق الملكية
Author: شمس الدين خواجات
Date: 08-24-2007, 09:26 PM
Parent: #5

عارف ياعمدة ,,
الجملة دى مؤهلة للتفكير فى مخلوقات الله ,,
باقى الليل ده ,,
والله يامان بكل الجهات ,,
ابت تظبط معاى ,,

Post: #11
Title: Re: حقوق الملكية
Author: Emad Abdulla
Date: 08-24-2007, 09:46 PM
Parent: #7

.

Quote: الجملة دى مؤهلة للتفكير فى مخلوقات الله ,,
و نعم بالله يا شمس ..
الله غالب ..

..

Post: #8
Title: Re: حقوق الملكية
Author: احمد معتصم الطيب
Date: 08-24-2007, 09:27 PM
Parent: #5

شوفو ياناس هوى نحنا أسياد سودانيز أون لاين دوت كوم فى يدنامافى حاجة
ولا بنقدر نملك قلم زول ولا فى قدردنا نتصرف فيهو.بس قدرتنا فى مسح وتعديل الكلام الاعوج ,. ده الفى قدرتنا,, ''''''''''

الله أعلم

أو بقصد وأحد+وأحد بساوى اتنين الله أعلم

صباح الخير
عماد

Post: #10
Title: Re: حقوق الملكية
Author: خدر
Date: 08-24-2007, 09:40 PM
Parent: #8

شكرا لصاحب فكره (تجديد الصفحة) فلولاه لتكرر هذا البوست
مرتين في يوم واحد
مرة عماد و مرة خدر

انت يا عماد برضو شفتا الكوت بتاع الملكيه الليله برضو ولا انا دايما بشوف الطيش ؟
انا شفتو قبل شوية

Post: #13
Title: Re: حقوق الملكية
Author: Emad Abdulla
Date: 08-24-2007, 09:55 PM
Parent: #10

.
مولانا خدر ..
الشهير بود التوم ..
مساءاتك يا صاحب ..

مرحى مرحى ..
يعني بقينا إتنين بيش في الحساب .. !!!
فرحنا , قلنا تجي تجضم لينا الشغل ده , و تورينا راسنا من رجلينا ..
أنا برضو شفتو قبل شوية .. كبير و ماكن كده و مقعد تحت متقل الصفحة .

كل سنة و إنت طيب ..
أقيف في الصف .

..

Post: #12
Title: Re: حقوق الملكية
Author: Emad Abdulla
Date: 08-24-2007, 09:50 PM
Parent: #8

.
صباح النور يا بوحميد ..
إنت المصحيك لغاية هسع شنو ؟؟؟

( الله أعلم ) ..
إجابة صحيحة يا أحمد ..
تمشي تستلم جائزة هبابة ماركة محترمة جدا ..
و تنتظر تعليمات كيفية الإستعمال .

..