Post: #1
Title: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-01-2006, 04:42 AM
Parent: #0
.. فتأملوا !!!
............
حجتني الزلال بت ود حامد .. ( أمي أم أمي )
قالت :
حجيتكم ما بجيتكم خيراً جانا وجاكم أكل عشاكم وراح خلاكم ، قالوا .. والله يكفينا شر قلنا وقالوا .. قالوا كان في كُدُندارة إسمها ( حَمْرَه قَرقَدانه) ، أها .. حمره قرقدانه دي راجلا كان إسمو ( أحمد ) ..
يمرق أحمد من صباحات الله يلقط في رزقو .. وما يرجع إلا المغيرب ، حمره تقعد في بطن بيتا داك , تخدم خدمتها و تسوي ليهو غداهو وتقعد تنتظرو لامن يجي .
...........
يداخلني الشتاء حينها .. في ( الحوش الجوّاني ) ..
ملتصقا بها ويداها حولي زنار ( يدفع عني شر الوحشة ) ..
يداخلني الشتاء في ليلة صيف , تحت سماء الديم .. ونجوم وبدر كبير ( ما زال لا يشبهه بدر ) , و كلابٌ نابحاتٌ في البعيد ، والدوي المكتوم لطائرة في المطار القريب ( أورثني رهاب السفر إلى يومي هذا ) ، وبردٌ لذيذ .. لاسع .. لا يدفأه إلا رائحتها ( أمي الزلال ) ..
: رائحة هي خليط بين رائحة الطفل الرضيع .. وعبق الضريح الكبير طرف البلد ..
( كما حكى الطيب صالح ).
............
قالت ( أمي الزلال ) :
أها .. يوم من الأيام ( حمره قرقدانه ) إتدخنت ، وسوت غداها لي راجلها , وقالت تمرق كدي علي الجيران داب ما ( أحمد ) يرجع من شغلو ، أها .. قامت علقت غدا ( أحمد ) في المشلعيب المعلق فوق حفرة الدخان .. ومرقت .
يومو داك .. ( أحمد ) علي شقاوتو يرجع البيت بدري قبال مواعيدو .. و جيعااااااااان ، مد أيدو على المشلعيب وما ختّ بالو من حفرة الدخان الموقده تحتو .. أها المسيكين من طولو داك يقع في الحفرة بردلب .. زول جاب خبرو مافي لامن رجعت ( حمره ) من الجيران ، لقت أحمد ميت جوه الحفره ، وقالت كدي تكورك وتسكّل وتعزي .
أها في الوكت داك جَنْ طويرات زرازير .. ركّن فوق الراكوبه .. شافنها تبكي ، قالن لها ..
: مالك يا ( حمره قرقدانه ) ؟ .
قالت لهن : شِن ( حمره قرقدانه ) أم طمبرة مَلانه .. عقيرب سِلي سلي .. ( أحمد ) وقع مات .
أها قامن الطويرات من بكانن داك زعلانات بالحيل علي ( أحمد ) إتنفضن و حتن ريشن عدمنو الريشه .. قعدن جلد ساااااكت ، وفرررررر طارن بي دمعتن .....
.............
: عماد ؟
: آآآي يُمّه ..
: نمت ؟
: لأ ..
: سمح .. غتّي كريعاتك ديل .
............
أها .. الطويرات ديك منتفات نتيفن داك طارن مشن ركن فوق الشدرات آخر الحلة ، الشدرات إستغربن .. قالن للطويرات
: مالكن يا شِنقِرش بلا ريش ؟
قالن لهن : شن شنقيرش بلا ريش .. حمره قرقدانه .. أم طمبرةً ملانه ... عقيرب سلي سلي .. أحمد وقع مات .
قالن كدي الشدرات من الزعل علي ( أحمد ) حتن صفقن داك وقفن عود بس .. يابساااات .
جَن الغنيمات بعد داك يرعن تحت الشدرات ديك ، شافن الشدر واقف حطب ..
قالن لو .. : مالك يا شدرنا حيتتون ؟
قال لهن : شن شدركن حيتتون .. شِنقِرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات .
في بكانن داك .. الغنيمات مسكن لك قريناتن ديك ووقعن فيهن كع كع كع .. كسرنهن ما فضلن قرن فيهن من الزعل علي ( أحمد ) , و مشن البحر يشربن .
أها البحر شافن مكسرات قريناتن قال لهن :
: مالكن يا بنات عِسِّي بلا قرون ؟
قالن لو : شن بنات عسي بلا قرون .. شدرنا حيتتون .. شنقرش بلا ريش .. حمره قرقدانه أم طمبرةً ملانه .. عقيرب سلي سلي .. أحمد وقع مات .
البحر من الزعل علي ( أحمد ) قام شرد بقي جديول صغيرووون في النُص هنااااك ..
جات البنيه شايله برمتها واردة البحر فيشان تشيل المويه .. لقت البحر شرد مشى هنوووك غادي .. قالت لو : مالك يا بحرنا شيردون ؟
قال لها : شن بحركم شيردون بنات عسي بلا قرون .. شدرنا حيتتون .. شنقرش بلا ريش .. حمره قرقدانه أم طمبرةً ملانه .. عقيرب سلي سلي .. أحمد وقع مات .
إنتي يا البنية تشيلي برمتك ديك و من الزعل علي ( أحمد ) كششششش تكسرها ..
...........
: عماد ؟
: آآي يُمه .
: نمت ؟
: لا لأ ..
: نان مالك قاطع الحركة ؟
: ساكت بس ( .. والدفء الشتوي يدغدغني .. )
: سمح .
..............
قالت ( أمي الزلال ) :
أها .. البنيه رجعت للبيت لقاها أبوها في الدرب .. قال لها
: مالك يا بنيتنا كبيرون ؟
قالت لو : شن بنيتكم كبيرون .. برمتنا كيسرون .. بحرنا شيردون .. بنات عسي بلا قرون .. شدرنا حيتتون .. شنقرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات .
تقوم يا الراجل تشيلك حجر و تقع في سنيناتك ديك كج كج كج .. كسرن بقاهن نامه ، وقال كدي دخل علي مرتو ، المره شافت الراجل عدمان السنينه قالت لو :
: مالك يا راجلنا فليجون ؟
قال لها : - شن راجلكم فليجون بنيتنا كبيرون .. برمتنا كيسرون .. بحرنا شيردون .. بنات عسي بلا قرون .. شدرنا حيتتون .. شنقرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات . أها المره كانت قاعده تفرك في ملاح أخدر .. شالت مفراكتا ديك و .........
............
: عماد ؟ .. عماد ؟؟؟
( دفء الشتاء و .. حزن ما .. يصمتانني )
: يا حليلو وليدي , نام المسيكين ..
( ثم ضامةً راحتي يدها متجهةً إلى السماء ) : رقدنا في أمانك وفي ضمانك وركنين من أركانك .. يا رب تغتي علينا و علي وليداتنا و أمة محمد يا حافض يا حفيض , بركة اللانام لا اكل الطعام , بركة الليل الامسى و الأوكات الخمسة , بركة من صلى و قال يا الله , تصبحنا بي خير و علي خير , بي جاه نبيك يا ربي .. آية الكرسي كُرُبْ فينا .
.............
و .. أكلت ( حفرة الدخان ) تلك ..
أكلت أحمد ..
و الطير .. و الخضرة .. البهائم .. و النيل .. الرجال .. والنساء .. والأطفال ..
و .. البلد بي حالها .
و مازالت تلك ( الحفرة ) .. تقتاتنا منذ يونيو 1989 م ...
.............
الزلال .. يا بت ودحامد ..
يُمه ..
لا أعرف الطريق إلى قبرك الآن ..
سامحيني ..
|
Post: #2
Title: Re: يااااااا .. حَمْرَه قَرْقَدانَه ( حجوة قديمة )
Author: wadalzain
Date: 11-01-2006, 04:50 AM
Parent: #1
نص جميل يمتلىء روعه ودفء وايحاء ومعنى
|
Post: #3
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-01-2006, 05:05 AM
Parent: #2
ود الزين ..
نهارك حلو ..
و يديك العافية يا صاحبي ..
هي الذاكرة الشعبية العبقرية ..
الموغلة في الحكمة و البصيرة النافذة ..
شاكر كتير لمرورك
مودتي و الإحترام
|
Post: #4
Title: Re: يااااااا .. حَمْرَه قَرْقَدانَه ( حجوة قديمة )
Author: Ibrahim Algrefwi
Date: 11-01-2006, 08:57 AM
Parent: #1
....
....
يداخلني الشتاء حينها .. في ( الحوش الجوّاني ) ..
ملتصقا بها ويداها حولي زنار ( يدفع عني شر الوحشة ) ..
...
...
جميل
يا
عُمدة ...
هي الحكاية ، الحجوة تُنجز هكذا ، والحفرة ايضاً تقتاتنا هكذا ...
ردمها ياعماد مسؤلية مُلاك الحياة ، وانت تعلم ان هذه الارض لنا ، باحياءها وبالطريق الي قبورها ...
اعجبتني -كالعادة- روحك الرشيقة في الحكي وفي الحسرات المصابة بالامل،
اي اوجاع تسكنك يا ابن الناس ،الشئ الذي يمسح حُزنك وصلابتك وقدرتك علي التخيل
السردي داخل النص ، الحكاية ... هذا الكتابة ضارية ، ضارية ياعماد ...
يبدو اني ساقراءها كثيراً ...
...
...
كلمية يُمه تلك ياعماد تشجنني تسحب عيناي وروحي بحنان كثيف
|
Post: #5
Title: Re: يااااااا .. حَمْرَه قَرْقَدانَه ( حجوة قديمة )
Author: Inaam Saad
Date: 11-03-2006, 04:10 AM
Parent: #4
يمةالزلال بت ودحامد
ليت صديقي عماد عرف الطريق الي دعوة أخرى نحتاجها
تقولي لينافيها ياوليداتي
Quote: "بركة اللا نام لا اكل الطعام , بركة الليل الامسى والأوكات الخمسة , بركة من صلى و قال يا الله , تصبحنا بي خير و علي خير , بي جاه نبيك يا ربي .. آية الكرسي كُرُبْ فينا"
|
ربنا ينجيكم منها..... تلك الحفرة
Quote: "التي
أكلت أحمد .. و الطير .. و الخضرة .. البهائم .. و النيل .. الرجال .. والنساء .. والأطفال ..و .. البلد بي حالهامنذ يونيو 1989 م " |
و مازالت تقتاتكم
سامحيه يمة
عفوك ورضاك عليه...وعلينا
وشكرا ياعمدة على النص الودود
|
Post: #6
Title: Re: يااااااا .. حَمْرَه قَرْقَدانَه ( حجوة قديمة )
Author: soma
Date: 11-03-2006, 04:30 AM
Parent: #5
الاخ عماد بى قلدة محنة وسلام اهلنا
ودعوات ناس حبوباالمتل الزلال بتضمنا
بطايبك بى محنة نضميك المارق من الجوف
كنت معاك هناك فى سهلة حوشكم وضى القمره
ينغام فينا بى عفوية اهلنا القبيل
يا حليلهم يا عماد ياخوى
ويا حليلك انت الخازن الكم الهائل من الحنين وسط ضلوعك
ويا سماحتك عطرت لينا بيه غربتنا الملعونه
بهديك المحنة كلها وبهديك قصيدة حبوبا
كلمات متواضعه كتبتها فى لحظات حنين كتلك التى سردت
لنا باريحيه احدى حجوات امك الزلال
لها الرحمه الواسعه ولكل حبوباتنا اللآئى رحلن عنا..
شكرا اخى عماد
شكرا أردب محنة
**
حبوبا حبوبا...
لولايا.. لولايا..
كلام يونسنا ..
قمريه قوقايه..
حجاك يدغدغنا..
حنيه وآلايه..
لهيجك السكر ..
الحان ودوبايا ..
دميعتك الجاريه ..
فى الرايحه والجايا ..
تجبر الخاطر ..
زى غيمه مطرايا ..
حضنك الدافى ..
شجيره ضلايا ...
لقيمه تسندنا ..
فى بطينه صاصايا ..
جقيمه فى جوفنا ..
تزيل عطيشتنا ..
وتروى حرايا ..
رويحتك الحلوه ..
تناجى جوايا ..
هديمك البارد ..
يغطى بردايا ..
مسيحه من ايدك ..
تزيل لمرضايا ..
بسيمتك السمحه ..
تضوى عتمايا ..
كلامك الصادق ..
يا يمه يا ضنايا ..
عطفك الزايد ..
بحسو فى حشايا ..
دخريك فى الدنيا ..
ابريق ومصلايا ..
سبيحه من سكسك ..
ودعواتك الغاليا ..
حبوبا.. حبوبا ..
لولايا.. لولايا ..
ربى يخليكى ..
وتشوفى لهنايا ..
****
اسماء الجنيد/ مسقط
|
Post: #7
Title: Re: يااااااا .. حَمْرَه قَرْقَدانَه ( حجوة قديمة )
Author: الشفيع عوض شوشتا
Date: 11-03-2006, 05:01 AM
Parent: #6
عماد
جميل وعميق عندك الحكي
نص ممتع حد الدهشة
لك الشكر المعتق
و العافية
|
Post: #16
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-03-2006, 02:57 PM
Parent: #7
مساء الخير يا شوشتا ..
مساءٌ شتويٌ آخر .. في بلادا طيرها عجمي ..
أظنني كنت أبحث عن دفءٍ ما ..
و تذكرت شتاء ( حمرة قرقدانة ) في ربيع صوت بت ود حامد ..
و خريف الوطن ..
أشكرك يا صاحبي على كريم مرورك هنا ..
يديك العافية .
مودتي و الإحترام .
|
Post: #15
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-03-2006, 02:50 PM
Parent: #6
يمسيك بالخير يا أسما ..
أنتِ أيضاً .. !!!
أيضا تتقين ( الغول ) بها .. بحبوبة ؟؟
Quote: كلامك الصادق ..
يا يمه يا ضنايا ..
عطفك الزايد ..
بحسو فى حشايا .. |
حشايا هذه يا سوما ..
كانت بت ود حامد تدللني : يبرد حشاك يا المبروك .
أدفع عمري لأسمعها لمرة واحدة أخيرة ..
أتذكر في كلية الفنون ..
عنّّ لي أن أدندن في إحدى جلساتنا الداخلية ..
( كان الصوت نقيا طليا زمانئذٍ ) ..
و فعلت البابلية في الروح ما فعلت ..
فغزا أبوداوود حنجرتي بمزاميره ..
و تسلطن في الرويحة الكايسة سبب ..
غنيته :
بالله يا ساري الغمام ..
يا الجاي من وادي الحبيب ..
أنزل على قلبي السلام ..
( أبرد حشاي ) و أطفي اللهيب .
لا أعلم بعدها في أي شفق صعدت بي أمي الزلال ..
و لا كيف توقف النحيب .
Quote: لهيجك السكر ..
الحان ودوبايا ..
دميعتك الجاريه ..
فى الرايحه والجايا ..
تجبر الخاطر ..
زى غيمه مطرايا ..
حضنك الدافى ..
شجيره ضلايا ...
لقيمه تسندنا ..
فى بطينه صاصايا ..
جقيمه فى جوفنا ..
تزيل عطيشتنا ..
وتروى حرايا ..
رويحتك الحلوه ..
تناجى جوايا ..
هديمك البارد ..
يغطى بردايا .. |
البرد يا أسماء ..
البرد من بعدهن ..
و .. لا عزاء .
|
Post: #14
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-03-2006, 02:34 PM
Parent: #5
إنعام ..
مساء الخير يا صديقتي البعيدة , في بلاد التيه .
أظنك في شتاء بعيد هناك تستدفئين بهم ..
أهلك السمحين ..
ما بتجيك عوجة إن حاوطوك ..
و هدهدوك .. حجوك ..
مسحوا على راسك و ..
: النوم تعال يا النوم تعال ..
النوم تعال سكت الجُهال ..
أيّ سلام في تلك الأهازيج و الحُجا و الغلوتيات ؟؟
ربما هو الشوق ما يمنح السلام ..
الشوق لتلك الكوى الغائرة في الروح ..
الشوق لأمانٍ ما ..
يديك العافية يا إنعام ببركة دعا الوالدين يا رب .
|
Post: #12
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-03-2006, 02:24 PM
Parent: #4
إبراهيم يا صاحب ..
و الله ليس ضاريٍ إلا تعبيرك هذا ..
قرأته فكأنني أتذوقه للمرة الأولى ..
قرمبوز , هذا شعبٌ عبقري .. و بديع .
و ( يُمه ) هذه يا صاحبي تسيل الحجر .. لذا أخافها و أشتهي .
عارف .. قلت للأولاد مافي زول يقول لي : بابا ..
أنا الآن ( أبوي ) في آخر الجملة حين يتحدثون إليّ ..
و ( يابا ) في أولها ..
أراني الشافع المطرطش - ما أزال - و حبوبتك الزلال بت ود حامد هي فقط من كان يلجم تلك الطرطشة ..
داخل ثوبها العجيب .. مربوط بطرفه ( حلاوة كرملله ) ..
و أنا أتحسس ( مفحضتها ) ..
و هي تلملم و تحكي ..
( لماذا أبرد حين أتذكر ذلك .. و يدخلني الشتاء ؟ ) .
يا قرمبوز .. أحبك أنا ياخ .
|
Post: #8
Title: Re: يااااااا .. حَمْرَه قَرْقَدانَه ( حجوة قديمة )
Author: عبده عبدا لحميد جاد الله
Date: 11-03-2006, 07:59 AM
Parent: #1
الأخ/عمدة ... سلامات
شكرا على الذاكرة الشعبية التى اعادت الينا بسمة الطفولة ونسال الله للحبوبات العمر المديد والمغفرة والرحمة للائي رحلن عن هذه الدنيا الفانية.
قَرْقَدانَه:
تجمع قرقدان وهو ثمار احمر غامض يشبه لحدما "القضيم" تنمو اشجاره في مناطق السافنا بكثرة في غرب السودان والبطانة والنيل الأزرق ،ربما يختلف الأسم باختلاف المنطقة الجغرافيةولكن الأسم السائد في الغرب قرقدان .
|
Post: #9
Title: Re: يااااااا .. حَمْرَه قَرْقَدانَه ( حجوة قديمة )
Author: nourelhadi awad
Date: 11-03-2006, 09:00 AM
Parent: #8
يا أم أحمد دقي المحلب
.....وعندي طبق ملان نبق
وسجم الحلة النامت بدري
عوااااافي ياعمده
|
Post: #10
Title: Re: يااااااا .. حَمْرَه قَرْقَدانَه ( حجوة قديمة )
Author: محمد سنى دفع الله
Date: 11-03-2006, 12:20 PM
Parent: #9
الحجوة
كم نحتاج لها اليوم
وكم أجمل رسمها
حجوة ورسمة
ياعمدة
ورسمة
|
Post: #11
Title: Re: يااااااا .. حَمْرَه قَرْقَدانَه ( حجوة قديمة )
Author: Abu Eltayeb
Date: 11-03-2006, 01:12 PM
Parent: #10
Quote: حجتني الزلال بت ود حامد .. ( أمي أم أمي )
|
ويا حليل حبوبتى " حليمه محمد صديق " " بت كللوله " ..
أمى أم أمى , حكّايه زى حبوبتنا الزلال !! ثريات ومليانات !!
العمده الثرى المليان !!! كل عام وأنت بألف خير .
مامون
|
Post: #27
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-04-2006, 06:07 PM
Parent: #11
الرجل الجميل مأمون ..
حليمة بت كللولة ..
حتى أسماءهن فياضة بذاك الدفْ ..
و الله أنهن مليانات و ثريات .
الفقراء نحن من بعدهن ..
و أطفالنا الذين غفلنا عنهم فابتلعهم المكان الغريب و الزمان الموحش .
يديك العافية يا مامون ..
و يوسدهن الباردة أماتنا القبيل ..
و يرحمنا .
|
Post: #28
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-05-2006, 01:57 AM
Parent: #10
الموسوعة الحايمة .. محمد السني ود دفع الله ..
صباحك جميل إن شا الله .
كيف يا السني ؟؟
كيف تترسم ؟
أرسم كيفن الريحة و الطعم و الملمس ؟ ..
كيف أرسم البرد اللذيذ المخلوط بخوف غامض وطعم لاسع تحت اللسان !!
التشكيل لغة بصرية ..
و الكتابة لغة مقروءة ..
الموسيقى لغة سمعية ..
الحكايا الشعبية دي كوم براها .. لمت كل الحاجات دي في كبسولة كثيفة الحشد , و معاها ختت مواقفها الأخلاقية تجاه الوجود , و مبادئها و معارفها و إجاباتها على أسئلة الوجود الكبيرة والغامضة و مغلقة .
مافي طريقة يا السني ..
نتأدب و نصنقر في واطات ربك دي و .. نتعلم ..
من هذه الأمة العبقرية .
تحياتي ..
منتظرك .
|
Post: #26
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-04-2006, 03:09 PM
Parent: #9
يعافيك يا نور ..
و الله يكفينا شر قلنا و قالوا ..
الناس دي يا نور ياتو حضارة كانت الأدتم كل العمق ده ؟
و ياتو خيال عبقري نسج الحبكة في الأدب الشعبي ؟
الناس دي يا نور كان فتناهم فذلك الخسران العظيم ..
يديك العافية يا نور الهادي
مودة كتيرة و إحترام
|
Post: #19
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-04-2006, 04:49 AM
Parent: #8
عبده يا صديقي ..
أشكرك على إيراد المعلومة ..
مرورك هنا يعني الكثير ..
( سحارة ) الحبوبات حُبلى بالمدهش العبقري .
يديك العافية .
|
Post: #13
Title: Re: يااااااا .. حَمْرَه قَرْقَدانَه ( حجوة قديمة )
Author: lana mahdi
Date: 11-03-2006, 02:32 PM
Parent: #1
عملات تماضر:بأي غصن تكتب يا عماد عبدالله؟
|
Post: #30
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-05-2006, 05:01 PM
Parent: #13
الأخت لنا ..
الله يجبر خاطرك ..
عارفة .. بعد إنعام سعد ختت لولاية رشا شيخ الدين , و أنا ملاوز من الدخول هنا ..
و ده الما خلاني أرد عليك من أمس .
كلما أسمع الزولة دي تلولي , أتبكم .. و بس .
يديك العافية يا أميرتنا المصادمة .
مودتي و كل الإحترام .
|
Post: #17
Title: Re: يااااااا .. حَمْرَه قَرْقَدانَه ( حجوة قديمة )
Author: معتصم الطاهر
Date: 11-03-2006, 03:38 PM
Parent: #1
عماد
حتى حب آخر
لك وللزلال
وبنتها
وحفيدها
حب كثير
و ان شاء الله حفرة تندفن
وعقيرب تموت ..
|
Post: #33
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-06-2006, 05:10 AM
Parent: #17
سيد الكلام .. معتصم ..
( صباحك مالو , أحبابك جفوني و مالو .. يا ليل ).
و العقيرب سلي سلي ..
و ح تندفن حفرة ما بتشبع ..
بالكتير من الجمال ..
و كتير من الحب .. لكل شي .
و ليك ..
تسلم يا هندزة .
|
Post: #18
Title: Re: يااااااا .. حَمْرَه قَرْقَدانَه ( حجوة قديمة )
Author: Adil Osman
Date: 11-03-2006, 04:08 PM
Parent: #1
يا عماد. يا عمدة الكتابات العجيبة. الكلام ده ما بفهمه الا زول سودانى. وكفى!
|
Post: #20
Title: Re: يااااااا .. حَمْرَه قَرْقَدانَه ( حجوة قديمة )
Author: فيصل عباس
Date: 11-04-2006, 06:06 AM
Parent: #1
الجميل عماد
كلما يجافيني النوم
استصحب معي ذكراهن (حبوباتي القبيل بحجهن لجني )وأتي الي هنا علني
وانام على هذا المكان وبكامل الطمأنينه,,,
يا اجمل حجاهن
كم كانن كثيفات ياخي
وكم انت مجنون ومعجون بهن تماما وبحنينهن
لك حنيني
(دخلني النعاس فنمت)
هل تصدقني ان قلت لك انا نائم الآن؟؟
|
Post: #21
Title: Re: يااااااا .. حَمْرَه قَرْقَدانَه ( حجوة قديمة )
Author: رأفت ميلاد
Date: 11-04-2006, 07:55 AM
Parent: #20
يا عماد يامتعة
حجيتنا ما بجيتنا
واصل إبداعك وفنك
بختو أحمد المات فى حفرة دخان
يديك العافية
رأفت
|
Post: #22
Title: Re: يااااااا .. حَمْرَه قَرْقَدانَه ( حجوة قديمة )
Author: Tumadir
Date: 11-04-2006, 07:58 AM
Parent: #21
عماد عبد الله يا حسيدون يا رصيدون
ايام كنت بكتب فى رمضانيات افتش لى زول يجيب لى حجوة ..مالك ما جبت لى حمرة قردانه ..
بكيتنى يا عمدة وذكرتنى حبوبتى التاية ام امى ..الحجوة بدعواتا بى غتاها بى لبنا ...
يالجمالك وعصير الحزن الدافىء.
|
Post: #23
Title: Re: يااااااا .. حَمْرَه قَرْقَدانَه ( حجوة قديمة )
Author: Salah Musa
Date: 11-04-2006, 08:01 AM
Parent: #20
العمدة الحمانا الغمدة
ذكرتني حبوبتي أمي أم أمي نفيسة بت باشاب واصل إبداعك والصبح قرررررب
|
Post: #24
Title: Re: يااااااا .. حَمْرَه قَرْقَدانَه ( حجوة قديمة )
Author: أبوذر بابكر
Date: 11-04-2006, 08:57 AM
Parent: #1
والله يا عماد
حميمية الأشياء القاعدة جوه الكلام هنا
من شدة حلاوتها لامن تسوى العشراقه
تحس بالحاجات ماسكة وقاعدة جنب بعض
مستأنسه ومطمئنة وبريئة وسمحة
قصاد كل حرف هنا
بهدى ليك ألف وردة
كل وردة متنكرة فى هيئة أغنية
وفى أغنية ألف فراشة
كل فراشة لابسه لون
وفى كل لون ينبوع عطر
تعرف زمان إكتشفنا إنو زهرة القرقدان لو الزول ختاها تحت اللسان ونفح
بتطلع صوت عرفنا لاحقا إنه أقرب لى صوت الفلوت
|
Post: #25
Title: Re: يااااااا .. حَمْرَه قَرْقَدانَه ( حجوة قديمة )
Author: Inaam Saad
Date: 11-04-2006, 01:42 PM
Parent: #24
|
Post: #29
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-05-2006, 02:12 AM
Parent: #25
إنعام ...
ليه ؟ ..
ألا يكفي وجع يسكننا !
فتأتين بالنزف الحميم في صوت رشا !!
التبتبة ..
الهدهدة ..
اللولاية ..
الله يسامحكم إنتي و رشا ..
|
Post: #31
Title: Re: يااااااا .. حَمْرَه قَرْقَدانَه ( حجوة قديمة )
Author: فيصل عباس
Date: 11-06-2006, 01:41 AM
Parent: #1
العماد
كيف الحال والف رحمه ومغفره لكل الجدات
تعرف يا صديق كم هو جميل الحكي الشعبي والذي هو اصل فن كتابة القصه القائمه الآن (بمدارسها المختلفه)
لكن الا تتفق معي بان هذا الحكي الشعبي (الحجوه) لايفي بقرضها الآن في ظل ماهو مطروح بل مفروض من
خطاب آخر موجهه لاطفال هذا الزمان؟؟؟
ما قادني الي هذا (القول) هو انني اصطحبت معي ابنائي(موج وايمي) الي هذا المكان وابتدأنا نقراء
ونحجي بعض (كنت اتعشم في ان يمس النعاس اجفانهم) مجهتدا تماما باستجماع واستصحاب شكل الروايه (الحجوه بكل دفئها) من صوت اخر حبوبه لي جالستها في سابق الزمن (كنت امني نفسي بدهشة تلتصق باساريرهم بقية عمرهم)..
لكن وبكل اسف
لم اجد ضالتي بل كانت عيونهم بتقول (الزول ده بيقول في شنو وقاصد شنو ربما لصعوبه بعض مفردات -لتوغلها في السوداني الغير متوفر هنا- الحجوه رغم سلاستها)
تابعت لهم القراءه بصوت الجده (ولم تتوفر لديهم رغبة النوم)واثرت مهم بعض الاسئله المتوافره داخل
الحجوه (وقعت انا في الحفره) وهم كما هم بل كانت رغبتهم في الخروج من تلك الدائره اقوى...
علما بانني قد اخذت امهم الي هذا المكان ايضا وقبل ان نخلص قراءة الحجوه اتاني تثاؤبها
يشق المدى (وتحملت عناء ترحيلها الي مخدعها)
اذن يا صديق
هل اخطأنا عندما حملناهم الي هنا قبل يلتصق وعيهم بحنين موروثنا؟؟؟
ام ان الامر مرتبط باخر يعمل على اقصاء موروثنا؟؟
طيب
هل بالامكان اعادة كتابة الادب الشعبي بلغة ومفردة اخرى جاذبه لهؤلا الصغار (مع الاحتفاظ بكامل الملامح الاساسيه للنص المعاد انتاجه) وذلك حتى يبتعدوا قليلا من اسبيستون وعالم الديجتال
والمححق كونان واسبايزرمان,,,
تعبنا حقيقة يا عمده من تلك المشاوير التي لا تقود الي مشتهانا,,
خاصة وان للغربه طنين آخر اكثر ازعاجا واعمق رعبا...
افيدني ايها الجميل افيدني
|
Post: #32
Title: Re: يااااااا .. حَمْرَه قَرْقَدانَه ( حجوة قديمة )
Author: أيزابيلا
Date: 11-06-2006, 02:48 AM
Parent: #31
يا سلاااااااااااام يا عماد
من بداية النص لحدى نهايتو
وصورة كتيرة بت طه ود سراج ما بارحتنى
وانا مفرطة الشجن...فى هذا الصباح
اتفقد ما سقط منى...وما فى طريقه الى السقوط
أمامى فنجان قهوة
وشتاء يجلس القرفصاء
يا عماد يا صديقى
ستلزمنا هذه الحكاوى....
الصور والأسماء
والروائح
...........
لا تزال تشتى بعنف...حين تغمض الذاكرة جفنها
(عليك تربة امى الزلال يا عماد
لا تجعل الذاكرة تغمض طويلا )
|
Post: #34
Title: Re: يااااااا .. حَمْرَه قَرْقَدانَه ( حجوة قديمة )
Author: Emad Abdulla
Date: 11-06-2006, 08:30 AM
Parent: #32
عادل عثمان ..
رأفت
تماضر
صلاح موسى
أبوذر
فيصل عباس
إيزابيلا ..
مرعوب أنا ..
سأشكركم على عجل لعبوركم هنا ..
و .. سقوط أقنعة ( جعوليتكم ) ..
ثم .. وقوفكم قتلى ذاكرتنا.
سألوذ بما يشغلني .. و بالفرار .
رشا شيخ الدين ستمتص قدرتكم على الوقوف متماسكين ..
بهذا الأنين المهدهد في صوتها ..
أخرجوا .. أنجوا من كم الحنين الموجع هنا ..
|
Post: #35
Title: Re: يااااااا .. حَمْرَه قَرْقَدانَه ( حجوة قديمة )
Author: Ibrahim Algrefwi
Date: 11-06-2006, 10:32 AM
Parent: #1
....
....
Quote: يُمه ..
لا أعرف الطريق إلى قبرك الآن ..
سامحيني .. |
|
Post: #36
Title: Re: يااااااا .. حَمْرَه قَرْقَدانَه ( حجوة قديمة )
Author: Soumeta
Date: 11-06-2006, 09:46 PM
Parent: #1
ملاوز لي لوازة هذا المكان
ريحة حميميتو لفحتني
و دخلت....
و ابتني المرقة،،
يا عماد انا "ما بطولك"،،
لكن عندي كتابة شبيهة كان جاتني القدرة
و قوة القلب،، بتجاورن اماتنا،،
يااااااااااااااااااه منهن،،
خففن روحي لهفة مؤبدة،،
|
|