Post: #1
Title: وبعد ضحكة قصيرة واصل جبريل
Author: ShiningStar
Date: 06-16-2005, 12:41 PM
حلفت -الدنيا- بدينها و ايمانها ما توريني غير مؤخرتها... و كلو مرة تلقي احد السابله يقول ليك "الفرج قريب"..
آآي فرج يتحدثون عنه؟؟
و قريب بي عمر السلحفاه ولا قريب بي عمر ذبابة المستنقاعات؟؟؟
استياء حتي الابنص.... لم يعد آي شي هما... فكل شي يبدو مثل قعونجه ذات قبعه من ريش الطأووس...
مثل حوت ميت -في الصيف -علي احد الشواطئ المهجوره...
لا اعرف الكتابه ... فكيف هي و في رأسي مكنسة احتجاج...
عذرا....
شيلي الصينيه دي ..اشيلك شيطان ... دا وكت سخينه دا
|
Post: #2
Title: Re: وبعد ضحكة قصيرة واصل جبريل
Author: ShiningStar
Date: 06-16-2005, 02:30 PM
Parent: #1
لا ينبغي لي ان اكون حيث يوجد الصيف....
|
Post: #3
Title: Re: وبعد ضحكة قصيرة واصل جبريل
Author: ShiningStar
Date: 06-16-2005, 03:08 PM
Parent: #1
سألته حاجه ام حقين فلته ليها
- رأيك شنو في الحب؟؟
- حب شنو؟؟ بتيخ؟؟
-لا لا يا حاجه الله يهديك.. انا قصدي ليك الشجن .. احساس كدا... ذي المطر الذي نغسل فيه أنفسنا ...هو المكان الذي نبني فيه مدننا ونغرس فيه شجر حياتنا وهو الكتاب الذي نتصفحه كل يوم بأعماقنا ..
يا حاجه ياخي دا ذي لمن تكوني عطشانه و تروي..خرمانه تسفي..
- بسسسسس... مسخرة.. -قالتها بتصرف-
-يا بتي انالمن ابو شوق اجي داخل علي بحسس بي الواطه اتلافت من تحت كرعي... كن دخل علي بي كيس برتكان بفرح.. و كن دخل علي بي احفظ مالك بفرح.. و كن دخل علي بي يديهو العشره -اظنها قصدت يدينو الاتنين- بفرح بي صحتو و عافيتو.. و يا بتي ان هو رقد ميروود انا بوورد معاو....
- حولاااا... اصلو شنو هو ياخي...
- الممسوخه دي... ابو شوق دا سيد الرجال لي حدوم و حسو دا بمله علي البيت.. و ساعةالمغارب اسوي ليهو الشاي بلبن المقنن.. اقول لي اقعدي حداي .. اناغمو و اناغمني... احجيهو بي -قملة ابكار الحاله الاشعار ,الملك صفار طار حرق وقع في النار- القه بالو طويييل و بسمع لي ... و قبل ما اقوم لي صلاة العشا.. اميل علي .. -مالت علي بكتفها و غيرت صوتها مقلده ابو شوق- ست الريد قومي دخلي الجدادات الكرو و خلي نومك خفيف...
ابتسمت ام حقين بعد جملتها الاخيره و درجت مهمهمه... ابو شوق هنا في حشاااااي - و اشارت الي منطقة اعلي البطن - ...
ننوه لي سيادتكم انو ام حقين و ابو شوق متزوجين ليهم خرتوميت سنه و عندهم كن تلاتشر كن اربعتاشر-دا غير ما دافقته ام حقين- شافع اكبرهم شوق...
الاحساس اعلاه ممكن تسموهو ملتقي النيلين, قعده جنب القيف, مراكب الشوق , حكم حبي ارعى نجم الليل يا دمعة الشوق هبي... محطة قطر حنينه في مكان ما...ااااي شي قريب و عندو مكانه خاصه في نفس احدكم....
بس ما الحاء المضمومه و الباء...
_______________________________________
انا ماشه انوم ... زول اجي اقول جبريل وين ولا دخلو شنو مافي...
عفااااف جيبي الناموسيه اجيبك بلا اخمك...
|
Post: #4
Title: Re: وبعد ضحكة قصيرة واصل جبريل
Author: رقم صفر
Date: 06-16-2005, 03:42 PM
Parent: #3
لك الشوق
واصلى انا متابع
|
Post: #6
Title: Re: وبعد ضحكة قصيرة واصل جبريل
Author: ShiningStar
Date: 06-17-2005, 09:18 AM
Parent: #4
رقم صفر...
شكرا ..ممتدة من هنا الى حدود السماااااء ..
اتمني ان اكون عند حسن ظن متابعتك... فبوستي ماهو الا..
فوضى في المخيلة !
أرتباكٌ في الذاكرة !
أنفصامٌ في الأصابع !
آنقلاب في الذهن !
زهج وبعض استياء !
|
Post: #15
Title: Re: وبعد ضحكة قصيرة واصل جبريل
Author: Frankly
Date: 06-17-2005, 01:06 PM
Parent: #3
النجم الساطع
ألف تحية ومودة
Quote: - بسسسسس... مسخرة.. -قالتها بتصرف-
-يا بتي انالمن ابو شوق اجي داخل علي بحسس بي الواطه اتلافت من تحت كرعي... كن دخل علي بي كيس برتكان بفرح.. و كن دخل علي بي احفظ مالك بفرح.. و كن دخل علي بي يديهو العشره -اظنها قصدت يدينو الاتنين- بفرح بي صحتو و عافيتو.. و يا بتي ان هو رقد ميروود انا بوورد معاو....
- حولاااا... اصلو شنو هو ياخي...
- الممسوخه دي... ابو شوق دا سيد الرجال لي حدوم و حسو دا بمله علي البيت.. و ساعةالمغارب اسوي ليهو الشاي بلبن المقنن.. اقول لي اقعدي حداي .. اناغمو و اناغمني... احجيهو بي -قملة ابكار الحاله الاشعار ,الملك صفار طار حرق وقع في النار- القه بالو طويييل و بسمع لي ... و قبل ما اقوم لي صلاة العشا.. اميل علي .. -مالت علي بكتفها و غيرت صوتها مقلده ابو شوق- ست الريد قومي دخلي الجدادات الكرو و خلي نومك خفيف...
ابتسمت ام حقين بعد جملتها الاخيره و درجت مهمهمه... ابو شوق هنا في حشاااااي - و اشارت الي منطقة اعلي البطن - ... |
لا ال جُ ب ولا بلاش
الباقي كلو بسسسسس... مسخرة..
بس الضحك منو وجبريل واصل في شنو؟
فرانكلي
|
Post: #17
Title: Re: وبعد ضحكة قصيرة واصل جبريل
Author: خدر
Date: 06-18-2005, 00:30 AM
Parent: #3
|
Post: #140
Title: Re: وبعد ضحكة قصيرة واصل جبريل
Author: Kamal Mahjoob
Date: 11-15-2006, 01:46 PM
Parent: #3
وأنا واصلت الضحك حتى اللحظة .... هل أنت بكامل فواك العقلية بعد كتابة هذا النص ... على الطلاق إبداع ما بعدو إبداع ...
|
Post: #5
Title: Re: وبعد ضحكة قصيرة واصل جبريل
Author: bushra suleiman
Date: 06-17-2005, 06:42 AM
Parent: #1
جبريل وينو؟؟
|
Post: #7
Title: Re: وبعد ضحكة قصيرة واصل جبريل
Author: ShiningStar
Date: 06-17-2005, 09:19 AM
Parent: #1
 بشري سليمان...
انت مش بتشتري صابون أبو فيل وشاي أبو غزالتين وموس أبو تمساح وزيت أبو نخلة...؟! أمشي شوف واحد من التجار قبل كده أدّالك مع الصابون "فيل" ومع الشاي "غزالتين" ومع الكبريت "تمساح" ومع الزيت "نخلة".. وتعال لي بعد داك عشان أديك مع البوست دا جبريل...
شكرا لمرورك الكريم .. 
|
Post: #8
Title: Re: وبعد ضحكة قصيرة واصل جبريل
Author: humida
Date: 06-17-2005, 09:32 AM
Parent: #7
كتب أحدهم ذات شجن ..
Quote: تكتبين كثيرا يا امرأه !!
اديبة متميزه وفارس مخضرم ..
في زمن أصبح فيه الرجل بدينار .. وقبلتك بمائه ..!!
تخضرمي و لا تبالي ...!!
تركضين بين حشود الشعراء على باب الخليفه !
و تحجبين الحجـّـاب عن القصيده وتقولين : هي لمولاي لا لكم !!
تعملين خارج مواعيد العمل الرسمي للكتابه ..
وضعوا لك طاوله وكرسي وكذبوا عليك منصب " كاتبه بعد الظهر " ..
و في الليل يتعلق المعجبون بأطراف ثوبك السواريه ..
كلما صادفوك وانتي تدخلين علبة التاريخ ..
يوم ان اصبح التاريخ علبة من علب الليل ....!!
أوتكتبين ..؟!
أكتبي لا تبالي ...!
و تتركين الأولاد في المنزل ..
حيث ثمة رجل يصفر و ينقف أنفه ..
يحلم بإمراة تستيقظ في السابعه صباحا لتذهب بالاولاد الى المدرسه
امراه ترضعهم ... وتعجن العجين ..وتخبز!!
هي ذاتها التي ينتظر و هو يدندن بأغنية الإياب ..:
" ماما زمانها جايه جايه بعد شويه جايبه معاها شنطه والشنطه فيها بطه ..." !!!
فهل اكلتي بطة الخليفه يا سيدتي ؟!
تكتبين كثيرا يا امرأه !!
يختلط الماء بالماء ...
فمن يفصل الماء عن الماء يا (xxx) ؟!!
وكلما رقصت أنثى الماء ..
رقص الدغلوب.. .رقصة التكوين .. !!
ثمة من يشرب من هذا النهر ...فلا يموت !
شخصا ً هو وحده الذي يعلم " من أين يؤكل النهر ؟ "
وربما كان جني الفانوس السحري ..
الذي اضاعه سندباد ... عندما ضلله رفاقه من الجن !
فجاءك فأضللتيه ..
تضعين له كرسيا الى جنب كرسيك ...
وتدوزنين له الشمس كي يتشمس كلما تعرى ..!!
على ضفاف توقيعك الأرستقراطي !
وقلبك الكبير ....!
ثم إستفاق لترقصي واياه رقصة الطاووس ..
وقد اختلط الماء بالماء ..!!
فمن يفصل الماء عن الماء يا (xxx) ؟!!
|
تحية تشبهك والسلام
|
Post: #11
Title: Re: وبعد ضحكة قصيرة واصل جبريل
Author: ShiningStar
Date: 06-17-2005, 12:34 PM
Parent: #8
انت تدري يا حميده انا دوما اتسكع-دون رتم معين - ممتطيه سفنجاتي متمسكه بتلك الطرحه الساكوبيس انشد شئ من الراحة المبهمه و التمييز المباح و الحضور الانساني ... هذا البوست احدي حالات الجنون اللحظي و التوهان العقلي المرير ...
سرني مرورك مشكور علي النص و التحيه...
_________________________________
|
Post: #9
Title: Re: وبعد ضحكة قصيرة واصل جبريل
Author: طيفور
Date: 06-17-2005, 11:11 AM
Parent: #1
النجمة أم ضنب.. 
انا جيت بس عشان اشيل باقي التلج دا..
نانو ناس نفيسة بت جاد الكريم عندهم رحمتات
ياسيييين.. يا ياسييييين بلااااي ارميني معاك طرف الشارع
|
Post: #12
Title: Re: وبعد ضحكة قصيرة واصل جبريل
Author: ShiningStar
Date: 06-17-2005, 12:36 PM
Parent: #9
عصفوووووووور.... سلم علي بت جاد الكريم و ما تنسو ترسلو لي حبة لوبه و ليقمات مع ياسين ...
وكان لقيت نفيسه قول ليها -تاكلي و تقشي خشمك يا بتي... ما بتعزمينا سد الخشم لييي شنو؟؟ -
|
Post: #10
Title: Re: وبعد ضحكة قصيرة واصل جبريل
Author: noha_g
Date: 06-17-2005, 11:46 AM
Parent: #1
ShiningStar
خليط من الاستياء و لعبة السخرية بالكلمات
تحياتي لك و جبريل وينه صحي؟
|
Post: #13
Title: Re: وبعد ضحكة قصيرة واصل جبريل
Author: ShiningStar
Date: 06-17-2005, 12:51 PM
Parent: #1
نهي... بيني ما بينك كدا القصه - برمتها - لا تعدو ان تكون لعب بلحروف ..وهرطقة مسطوله... لا تخلو من استياء ابنصي... 
زمان كدا كان عندي صحبتي اسمها نهي.. ذكرتيني ليها والله فيها شبه منك ... كانت تسكن الدناقله بحري على مرمى حجر من حلة خوجلي ..
شكرا لمرورك الكريم ..
اما بعد...
نرجو مراجعة ردنا لي بشري بخصوص جبريل... اخر ما بلغنا عنه انا انو لقه ليهو جماعه همباته كدا - اكلوهو اضنينو-...و الله يعلم
|
Post: #14
Title: Re: وبعد ضحكة قصيرة واصل جبريل
Author: ShiningStar
Date: 06-17-2005, 01:00 PM
Parent: #1
.... كم اتمني ان امتطي اول قطار سريع لا يتوقف ...اسافر ليس لآجل العوده.. اغير لون ركايز راكوبتي كل مساء انتقاما من الرتابه...
رتابه ما بعدها رتابه... حتي ساعة الحائط -المشهوره برتابتها و صوتها الكريه- المعلقه علي احدي ركايز راكوبتي.. تخر ج من رتابتها عندما تتوقف لتعلن عن -احتجاجها- و حاجتها لعدد واحد بطارية -AA-....
الي ان اعلنت حربي عليها و قطعت مداد حياتها فاصبحت ذيها و ذي اى - Made in China - ...
حريقه في الساعه و في الوقت..
اصبح هو الاخر لا يعني شئ...
و الزارعنا غير المولي يجي يقلعنا... هل سيتخلص الوقت مني لأني لا اعترف بلساعات و المطريات و المركبات الفضائيه؟؟ هل سيبعد النبض عني لاني اختلف بداخلي ؟؟ لا و اللف لا
الوقت.. الزمن.. ما هو الا كائن هلامي ...
بمجرد ان تتصور أنك قبضت عليه .. يتسرب من بين الثواني ..يلتفت اليك .. يضع يديه جانب اذنيه ... يحرك اصابعه
ويسخر منك في حركة بهلوانية مخرجا لسانه ليغيظك ...
لكن من الان و صاعدا..الواحده بلواحده....
تفوو ووووو عليك يا وقت... وهاك  يا زمن...
_____________________________
يهون دا جبريل....
الله لىىىىىىىىىىىىىى النقوم النلحق باظ ابو شرا ده
|
Post: #16
Title: Re: وبعد ضحكة قصيرة واصل جبريل
Author: bushra suleiman
Date: 06-17-2005, 01:53 PM
Parent: #1
اريتها فى راسى السطلة دى  بس برجاكى لمان الباظ يصل أخر محطة
|
Post: #18
Title: Re: وبعد ضحكة قصيرة واصل جبريل
Author: خدر
Date: 06-18-2005, 00:31 AM
Parent: #16
سكينه
البوست ده مفتوح !
اكتب بي راحتي يعني !
ملحوظة
اليومين ديل انا ضد المراة و الحب
اها
اكتب ولا اطلع بره !؟
|
Post: #19
Title: Re: وبعد ضحكة قصيرة واصل جبريل
Author: خدر
Date: 06-18-2005, 00:39 AM
Parent: #18
سكينة
كل زهجه وانت طيبه
تعرفي انا بحب كتاباتكـ ليه ! بتريحني ياخ
بتجهجه ليكـ ( ازمة النص - تداعياتو - العقدة ) و مااليه من عولاق
النص ,, يتحس بس
ان كانت ام حقين حية ترزق لها مني كل التجلة و الاحترام و انا مُدين لها
بتفتيح بصيرتي علي الحُب
الماعندو محبه .. ماعندو الحبه
يا بت الحب ده اعظم الاختراعات
,,
اما بصدد طيب الذكر جبريل فلا شأن لي به فاليذهب هو و عواطفه الي الجحيم
شوفي (ريتشارد جير) الحب بخليهو يتعاوز كيف !
|
Post: #20
Title: Re: وبعد ضحكة قصيرة واصل جبريل
Author: خدر
Date: 06-18-2005, 00:51 AM
Parent: #19
|
Post: #21
Title: Re: وبعد ضحكة قصيرة واصل جبريل
Author: Hussein Mallasi
Date: 06-18-2005, 01:27 AM
Parent: #20
Quote: زمان كدا كان عندي صحبتي اسمها نهي.. ذكرتيني ليها والله فيها شبه منك ...
كانت تسكن الدناقله بحري على مرمى حجر من حلة خوجلي .. |
أها؛ كمان قولي لي انها درست في بحري القديمة بنات !!
|
Post: #22
Title: Re: وبعد ضحكة قصيرة واصل جبريل
Author: ناصر جامع
Date: 06-18-2005, 01:46 AM
Parent: #20
| Quote: شيلي الصينيه دي ..اشيلك شيطان ... دا وكت سخينه دا |
| Quote: الله لىىىىىىىىىىىىىى النقوم النلحق باظ ابو شرا ده |
| Quote: تسجيل اخطائي اليومية في دفتري الازرق..كاستراق النظر و شتم بائع البنزين و صاحب المحل والمديرة ذات الوجه الشاحب المخفج |
| Quote: و الزارعنا غير المولي يجي يقلعنا |
تسلمى والله يا ستار ضحكت كما لم اضحك من قبل...فى واحد صحبي ضرب تلفون لي واحد صحبوا...صحبوا ما رد عليهوا لكن لقي مسج Message و فجأة قعد يضحك ... قلتا ليهوا مالك...اداني التلفون و قال لي هاك اسمع...سمعت الكلام المسجل و هو كلآتي ....الزارعنا غير ربنا يجي يقلعنا Please leave a message
| Quote: قياس المسافه بين قارة اسيا و الغزالة جاوزت |
سمعت قصة الود الحنكوش يا ستار؟؟...الود قالوا حياتوا كلها قضاها ما بين الخرطوم اتنين و جامعة الخرطوم حيث تخرج من كلية الطب...و في كشف النقليات جاتوا نقليه للغزالة جاوزت ...فواحد من زملاءه قاليهوا نقلوك الغزالة جاوزت...بإندهاش شديد قاليهوا ...قلتا الغزاله عملت شنوا؟...قاليهوا جاوزت ...قاليهوا و الله كم جاوزت و للا ما جاوزت انا من الخرطوم دي ما طالع شبر
تشكري علي الفرح الجميل
ناصر
|
Post: #23
Title: Re: وبعد ضحكة قصيرة واصل جبريل
Author: Tumadir
Date: 06-18-2005, 02:40 AM
Parent: #22
فى قصة عنك لا زم احكيها ليك طالما زهجانة لى حد الابنص:
تتذكرى مرة اتلاقينا فى عرس فى ولايتكم وانا جيت كتبت عنك وقلت قابلت شايننق ستارز وهى بت جميلة؟؟
قام فى واحد اظنو داير يعمل معاك حبكانا من ناس البورد الخلو البورد ..ضرب لى بيسأل من الحكاية دى وهو زول لذيذ شديد..قال لى يعنى البت دى كتابتها حلوة وانا داير اعرفها وانتى قلتى جميلة ..
جميلة دى كيف يعنى؟؟ جميلة جميلة ولا جمالك بتاع حقوق الانسان داك البتقوليهو ..اى زول جميل؟؟
هههههههههههههه
حالاقيك تانى فى عرس اخت العروس الفاتت يوم 3 شهر سبعه اوعى تجى بالسفنجة وتوب الجارات الجيتى بيهم المرة الفاتت سامعه؟؟
|
Post: #24
Title: Re: وبعد ضحكة قصيرة واصل جبريل
Author: Hussein Mallasi
Date: 06-18-2005, 03:06 AM
Parent: #23
Quote: جميلة دى كيف يعنى؟؟ جميلة جميلة ولا جمالك بتاع
حقوق الانسان داك البتقوليهو ..اى زول جميل؟؟ |
| Quote: من ناس البورد الخلو البورد |
دي ما كانت شوفا يا استار ياخي.
|
Post: #25
Title: Re: وبعد ضحكة قصيرة واصل جبريل
Author: shiry
Date: 06-18-2005, 03:58 AM
Parent: #24
| Quote: عفااااف جيبي الناموسيه اجيبك بلا اخمك... |
النجم الساطع
جميلة الجميلات
سلام مربع
لا احد يملأني فرحا وبهجة في كل هذا العالم
غيرك ..
..
احبك اوي اوي
وحتى انتي طفشااااانة وزهقانة
ذكرتيني صديق عزيز ، يكتب في احدى المنتديات
الغير سودانية ... يضع في خانة التعريف
زنجبيل زهجان من رائحته ..
|
Post: #26
Title: Re: وبعد ضحكة قصيرة واصل جبريل
Author: Osman M Salih
Date: 06-18-2005, 04:01 AM
Parent: #1
بلغت الاحقاد بقلوبهم الحناجر
|
Post: #27
Title: Re: وبعد ضحكة قصيرة واصل جبريل
Author: banadieha
Date: 06-18-2005, 08:45 AM
Parent: #26
Quote: دي ما كانت شوفا يا استار ياخي.
|
حبيبة عمري ياشايننق ستار يام فيونكة.
|
Post: #28
Title: Re: وبعد ضحكة قصيرة واصل جبريل
Author: PLAYER
Date: 06-18-2005, 10:06 AM
Parent: #27
الخبر
| Quote: لا اعرف الكتابه ... فكيف هي و في رأسي مكنسة احتجاج... |
التعليق
اكتبي بالمكنسة الراسية...فالاحتجاج هو أبداع الكتابة
................................................
I WILL BE MISSING YOU
|
Post: #29
Title: Re: وبعد ضحكة قصيرة واصل جبريل
Author: خدر
Date: 06-18-2005, 10:32 AM
Parent: #28
Quote: ابتسمت ام حقين بعد جملتها الاخيره و درجت مهمهمه... ابو شوق
هنا في حشاااااي - و اشارت الي منطقة اعلي البطن - ... |
نلفت نظر عنايه الساده المتابعين للبوست ان هذا النوع من النساء ( ام حقين ) قد انقرض قبل
بداية الالفيه التالتة
لم يتبقي لنا الان الا ام حق واحد بس
وهذه في العاده لا تفرط في حقها ابدا
|
Post: #30
Title: Re: وبعد ضحكة قصيرة واصل جبريل
Author: shatat
Date: 06-18-2005, 11:11 AM
Parent: #1
العزيزه..SHINING STAR
صباح الُفل ..ومسا الياسمين
..لو الزهج بيخلي الواحد يكتب كده..اريتها حالي.
تقديري..وتحياتي للجميع.
.........................SHATAT
|
Post: #31
Title: Re: وبعد ضحكة قصيرة واصل جبريل
Author: الجندرية
Date: 06-19-2005, 04:27 AM
Parent: #1
***
|
Post: #32
Title: Re: وبعد ضحكة قصيرة واصل جبريل
Author: خدر
Date: 06-19-2005, 08:52 AM
Parent: #31
|
Post: #33
Title: Re: وبعد ضحكة قصيرة واصل جبريل
Author: خدر
Date: 06-20-2005, 06:46 AM
Parent: #32
عندما سمعت امرأة العزيز بما تتناقله نساء الطبقة العليا عنها، قررت
أن تعد مأدبة كبيرة في القصر. وأعدت الوسائد حتى يتكئ عليها المدعوات.
واختارت ألوان الطعام والشراب وأمرت أن توضع السكاكين الحادة إلى جوار
الطعام المقدم. ووجهت الدعوة لكل من تحدثت عنها. وبينما هن منشغلات
بتقطيع اللحم أو تقشير الفاكهة، فاجأتهن بيوسف: وَقَالَتِ اخْرُجْ عَلَيْهِنَّ فَلَمَّا
رَأَيْنَهُ بهتن لطلعته، ودهشن. وجرحن أيديهن بالسكاكين للدهشة المفاجئة.
(وَقُلْنَ حَاشَ لله)
|
Post: #34
Title: Re: وبعد ضحكة قصيرة واصل جبريل
Author: معتز تروتسكى
Date: 06-20-2005, 07:15 AM
Parent: #33
البت المشرقه
جارو وانا جارو
صباح الخير سيدتي
أمد سبابة العين
المس وجهك المنسوج
في عمقى00
أمد سبابة الحرف
اخط رؤايا بالسحر00
لهيب النار سيدتي
تمدد في أعماق خارطتى00
جمالك العبقر حيرني
أصاب الدهشة في ذاتى00
صرت اهرب منك سيدتي
فصباح الخير لاتجدى00
وصرت ابغض هذا الصبح
سيدتى00
فقد اخذ لبى والباقي
من عمرى00
وهلا الشفق بالسعد
وفر العمر من بدنى00
فايتيكم مداد الغروب من اقصى شرقى هذا يتخل الاندهاش مكانه فى دواخلنا نحو تراجيدا لفواصل اخرى فى فى مسيرتنا نحو ال لا شى 00منابركم منها المطر وكلنا ناتى فى ذره رزاز يمكن يختلف المصير؟!
سؤال وتعجب واجابه على الاهذا بعض ما نحمله نحو قبور قادمه مليئه بالورد وشى من التعب لو كُتب لنا الموت 000
مقطع الثالث عشر:
خبر الدنيا الكانت بينا في الأحلام
خبر مرسوم بلوحة عشق
مشروره في قلب السراب والطين00
وبداية الروح مابين زمن شريان
يكافح ضيق الريده
والصبح لوحه
في قلب السما السابع والدين00
والحرف الكان قبال أدم
بتخيل ملامح الكلمة بين
رمش العين ونبض الضو
وبقى انسان00
دخل جواي بالجملة
بالدهشة البره
وفر صباحو هويه لي ضلي
المسكون بالعتمة
وناداني
جيت مشحون
إحساس وخيال
وكلى حنان0
لحشودك جواى مكانه00
حضور وزمانه00
|
Post: #44
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 11:40 AM
Parent: #34
معتز...
ابت علي زهجتي ان ارد علي كلام سمح ذي دا... لكن كدي خليني - احتسي - مشروب ذو فقاقيع.. عسي و لعل واحده من االفقاعات تصل بؤرة الشعور... بجي صاده...
اكيد...
|
Post: #35
Title: Re: وبعد ضحكة قصيرة واصل جبريل
Author: singawi
Date: 06-20-2005, 08:25 AM
Parent: #1
| Quote: انت مش بتشتري صابون أبو فيل وشاي أبو غزالتين وموس أبو تمساح وزيت أبو نخلة...؟! أمشي شوف واحد من التجار قبل كده أدّالك مع الصابون "فيل" ومع الشاي "غزالتين" ومع الكبريت "تمساح" ومع الزيت "نخلة".. وتعال لي بعد داك عشان أديك مع البوست دا جبريل |
أحييييييييييي يا مصاريني
أم فيونكة
كيف حالك .. الله يسلمك ، الله يعافيك ، الله يبارك فيك ، طيبة؟ ، يطيب عملك ، يطيب خاطرك ، تطيب أيامك ويييييييييين . مشتاقييييين ، عشة كشكوش بتسلم عليك .. وقالت ليك الودك وصل سايح وبهدل المقاشيش لكن شكراً على كل حال والفكي الوصفتيهو ليها ، كااااارب وسرو باتع ، محايتو بي هنا ، والهناء بي هناوالمعنى واضح . أما أنا فبقول ليك
ليك مدة ما بنتي
يا أم فيونكة
وين انتي
|
Post: #46
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 11:45 AM
Parent: #35
سنجاوي يا حته...
| Quote: شكراً على كل حال والفكي الوصفتيهو ليها ، كااااارب وسرو باتع ، محايتو بي هنا ، والهناء بي هناوالمعنى ... |
... سمعته بي بخيته الفي حق الناس نشيطه و في حقها بتمسكهاالخبيته...دي انا دي
الفكي بلخراب....
والله مشتاقين...
سعاد يا سعاااااااد.... جيبي الابيريق اجيبوك للضبح قولي امين
|
Post: #36
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 11:13 AM
Parent: #1
Quote: فرانكلي الغالي....
لا ال جُ ب ولا بلاش
الباقي كلو بسسسسس... مسخرة..
بس الضحك منو وجبريل واصل في شنو؟ |
فرانكلي
البين ام حقين و ابوالشوق اصلو ما ممكن اكون حب ... ياخي دا شي كدا ياتيك من حيث يأتيك الشجن....
حب ناس الزمن دا اصبح هما كبيرا مثل خبز الفقراء...
رخيص و احمق....هو الآخر اصبح لايعني شئ.....
"وجود الحاء المضمومه مع حرف الباء ليس الا بدعه... فلأصل في المشاعر الحنان و من بلغ الحنان, بلغ ضمنا ما فوق الصبر و العشق و الايمان" ( المرحوم)
شكرا للطله... سرتنا....
|
Post: #37
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 11:14 AM
Parent: #1
| Quote: اريتها فى راسى السطلة دى بس برجاكى لمان الباظ يصل أخر محطة |
آذن هو الكجو مورو ....
|
Post: #38
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 11:19 AM
Parent: #1
Quote: خدر لوبيز....
اكتب بي راحتي يعني ! |
Quote: تعرفي انا بحب كتاباتكـ ليه ! بتريحني ياخ
بتجهجه ليكـ ( ازمة النص - تداعياتو - العقدة ) و مااليه من عولاق
النص ,, يتحس بس |
Quote: نلفت نظر عنايه الساده المتابعين للبوست ان هذا النوع من النساء ( ام حقين ) قد انقرض قبل
بداية الالفيه التالتة |
- اتفضلي
-خدر موجود؟
- خدر سافر الصعيد
- متين
- قبل اربعه ايام
- مشي لي غرض يعني؟
- والله هو سافر الا ما قال لينا غرضو شنو
- ما قال بجي متين؟
- كن ما جا الليله بجيي باكر يختي.. انت مغروضه فيهو؟
- ممكن اخلي وصيه؟ بلقي عندك ورقه وقلم...
(نهضت سلوي باروكه مدهوشه و بحثت عن ورقه و قلم... جائتني بورقه فلسكاب رسم عليها زيت سندوتش الفول خريطة العالم الجديد قسمت منها النص وكتبت عليها....
________________
عجورة.. تحياتي وودي... لماذا هذا الغياب؟
وصلتنا برقيتك... و هاك ردي... اكتب اكتب بي راحتك... لا تكترث للنص ولا للعولاق الذي يصحبه... لو يوم كتبت كلام وحبيت تهذبو بتكون افسدت اى شيى...اول انطباع هو اصدق انطباع...
او كما قال - خال شوق -
اما بخصوص ام حقين... فهي مثل - ذبابة مايو - تعيش لتهب كل ما لديها و تتلحس... اما ذوات الحق الواحد فهن كثر... لا بيموتو لا بيفوتو فقط يتواجدون بكثره.. فهم يا صديقي مثل مكروبات الزمن الاول (اول الخلق).. كانت تلك المكروبات عندما تبلغ مرحله معينه لا تصاب بلشيخوخه ولا بموتو و انما ينقسمون الي نصفين (كل نصف في عمر الطفوله) ثم اربعه ثم سته ثم تمنيه وهكذا..
بوجودك يكتمل الفرح ...
|
Post: #40
Title: Re: وبعد ضحكة قصيرة واصل جبريل
Author: خالد عويس
Date: 06-20-2005, 11:25 AM
Parent: #38
فقط، أردت أن أسجل اعجابي بهذه "الهرطقة المسطولة".. الرائعة!!
تحياتي لأم حقين
|
Post: #47
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 12:12 PM
Parent: #40
خالد عويس...
Quote: فقط، أردت أن أسجل اعجابي بهذه "الهرطقة المسطولة".. الرائعة!!
تحياتي لأم حقين ... |
كلما جن ليلي ... ازداد هلواسي...
شكرا بقدر ما للزرازير من فضاء...
ام حقين تقرؤكم السلام و بتقول ليك.. تعجبك البخاته و السعاده..
|
Post: #39
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 11:24 AM
Parent: #1
ملاسي الساهر.. شكرا علي الطله البهيه...
اما بعد ..
| Quote: أها؛ كمان قولي لي انها درست في بحري القديمة بنات !! |
]
شفته اول ما تخش بالباب حتلقي حاجتين علي يدك الشمال.. الاولي عم البرير الغفير.. تمشي منو لي قدام شويه تلقه (تالته نسيبه) .. تطلع في البرنده كدا و اول شباك (الشباك نحت (بضم النون) عليه بي -بينسه"ليس من الخير ان نبلي سراويلنا علي مقاعد الدراسه") علي يدك الشمال حتلقاني قاعده فيهو... و نهي كانت بتقعد قدام جنب زهور فقد كانت من المقربات لست انعام....
يا سلام لو الزمن يرجع ... كن جكسته - اب شنب - الوجيه صاحب السوزوكي...
ملحوظه... في صوره شفتها بغادي فيها بروفايلك اليمين... و قد ثبتت الرؤيه... قطع شك وجيه.. (عباراه خاليه من الغزل و المجامله)... 
| Quote: دي ما كانت شوفا يا استار ياخي. |
زولك شتت ... الله واحد... 
|
Post: #41
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 11:26 AM
Parent: #1
ناصر...
| Quote: ضحكت كما لم اضحك من قبل.. |
ان شاءالله دايما ضاحك... و في شان ضحكك دا علي بلييمين نذيد الزهج زهجه...
الزارعنا غير الله يجي يقلعنا  ...
| Quote: قاليهوا و الله كم جاوزت و للا ما جاوزت انا من الخرطوم دي ما طالع شبر |
والله عندو حق... جنن تعرفو خير من غزاله متجاوزه..
|
Post: #42
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 11:30 AM
Parent: #1
تماضر...
| Quote: ولا جمالك بتاع حقوق الانسان داك البتقوليهو ..اى زول جميل؟؟ |
كن تقولي ليهو الكلام علي الخلاق يا سجم الرماد... السماحه تطير..
لكن بيني ما بينك كدا... انت بتكوني قلتي الكلام اعلاه و الزول شتت... 
حكم الايام دي قالو البت الجميله يجب ان يكون فيها شبه من ...
شاكيرا...
نانسي عقرم...
و اخيرا هيفاء وهبي...
و نحن يا تماضر الغاليه لم تنطبق علينا المقاييس اعلاه .. لذا لن نصلح... (كتاب ما يصلح ولا يصلح ص 101)
اما بخصوص عرس حلتنا انا من المغرب هناك.. توب ابقجيجه غسلتو و ظهرتو تلات مرات... بس فضل لي النعلات و فستان الكرمبلين و صباع روج... ..
نتلاقي يا غاليه....
|
Post: #43
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 11:37 AM
Parent: #1
ست الريد... شيري..
لك القيام و لك الجلوس..
لك الغداء.. لك العشاء.. و ما تبقي من فتات..
ما طالباني حليفه لكن وحات ابو حواجب انا ذاتي بريدك...
بناديها... يا ضحكه في ريحة دعاش ... و الله منور
شتات يا راقي...
تبدأ فيكم الآف المرايا بالكلام... و عندكم ينتهي الكلام...
و العندي دا ان شاءالله لا لي عدو لا حبيب ولا حتي عسمان محمدصالح ... شفته كيف
لك المطر...
بلي ير....
| Quote: اكتبي بالمكنسة الراسية...فالاحتجاج هو أبداع الكتابة |
تراني شايله مكشاشتي و حايمه... سرني مرورك.. شكرا كتيير..
الجندريه... قايتو يا بتي مشكوره عليهن النجمات الا مالك مابيه النضم...
|
Post: #45
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 11:41 AM
Parent: #1
عثمان...
| Quote: بلغت الاحقاد بقلوبهم الحناجر |
آالمسيخ دا ....
|
Post: #48
Title: Re: وبعد ضحكة قصيرة واصل جبريل
Author: ShiningStar
Date: 06-20-2005, 02:01 PM
Parent: #1
في عقولنا أثقال, و اجسادنا حميرها.
مره رأيت صاحب كارو (مكتوب عليهو - الكونكورد -) يثقل العربه شوال يتلو الشوال...حتي انهار الكونكورد و انهار الحمار ...
و كان يريد ان يقتصد في العوده الي الشحن...
انها خطوة.. لكن من يستطيع ان يخطوها...
كل يتخيل امامه هاويه وهميه... نسقط قبل ان نخطو...
يا لطيف... يا لطيف...
قالت ليهو...
"كيف تسافر هكذا وحيد دون ان تأخذ معك شيئا من روحي وبعض انفاسي لتبعث في القلب بعض من الحنين ؟
قال ليها : كدا دا ... و اداها عجاج كرعيو
قالت ليهو: انا و انت
و بعض حبات المطر
على اطراف فنجان اسير لقهوة عربية
و بعض الزنجبيل
في انتظار خروجنا من بعضنا
قال ليها: انت عويره ولا شنو.. بي وراءك دا.. الفنجان اشيل منو و اخلي منو.. كفتيرة شاي ما تحلك.. قومي ناوليني السفه دي..
|
Post: #49
Title: Re: وبعد ضحكة قصيرة واصل جبريل
Author: عبدالماجد فرح يوسف
Date: 06-20-2005, 02:06 PM
Parent: #1
الأخت شاينينق ستار
البوست جميل جدا وخواطرك معبرة وتترك بصماتها بقوة
تحياتي ومزيد من الإبداع
|
Post: #50
Title: Re: وبعد ضحكة قصيرة واصل جبريل
Author: NASERELDIN SALAH
Date: 06-20-2005, 06:08 PM
Parent: #49
تعرفي يا شاييننغ ستار
زمان زمن زين
كانت العشش ( عشش فلاته ) في الخرطوم قريبه من العمارات يعني بالواضح كده كان عاليها سافلها
ناس من تحت و ناس من فوق و الزمن مايو اجارك الله
مشهد اول
واحد من اطفال العشش هايم علي وحهه لافي في الحله و بما ان الدروب شقاقه وجد
نفسه في سارع من شوارع العمارات يمكن 49 ولا كم و خمسين ما عارف
لمن عاين كده يمين شمال البيئه و الناس شكل غير الذي يألفة
وعندما نظر الي شكله تأكد من ذلك
لابس شورت ( لباس ) احمر بتاع الكوره الزمان داك الفيهو خطين ابيضين في
الجنبتين اليمن و الشمال و فنيله خضراء ذات مقاس اكبر منه مرتين مما جعل
الاكمام تبدو ذي الكم الطويل و القصير في نفس الوقت
ما لابس اي حاجه في كرعينو ( حفيان ) و
باقي الجسم اغغغبببباش و مخرخر
تبدو العينين كثقبين في جلد ميت
وكانت هناك محاولات من الطفل للتخلص من ذلك السائل الذي
ينزل من منخريه في اتجاه شفته العليا بأن يعترض طريق ذلك السائل
بظهر كفيه مره لذات اليمين و مره لذات الشمال مما ترك اثار سالبه
علي خديه وصولا الي حدود الاذنين
وه هكذا يتلفت ذي اليس في بلاد العجائب مامصدق ان بلاد العجائب قريبه للعشش للدرجه دي
انا لمن سمعت بيه عرفت التسميه بتاعت الغبش و اولاد الارض دي ما جات من فراغ
( ما عارف يا شاينيق ليييه الطفل ده بالذات متخيلوا جبريل بتاعك )
المهم نمشي المشهد التاني
اعلي العماره التي تمترس تحتها ( جبريل )
سوسن و ابنها حماده من علي شرفه البلكونه في الطابق الثاني (ضاربين الجو )
عربيه الايسكريم تمر من تحت العماره و تتوقف لبعض اطفال العمارات
حماده ذو الست سنوات يصر علي ماما ( سوسن ) ان تدعه يذهب لشراء ابس كريم
و يحصل علي ذلك ....... و يهرول حماده الي الاسفل لشراء اليسكريم
منذ ان وقعت عينا ( جبريل ) علي حماده و هو متوجه الي عربه الايسكربم قرر ان
ايسكريم حماده هو ايسكريمه مهما كانت النتائج
لبد ( جبريل ) وراء العمود منتظر حماده يرجع و في يديه اليسكريم
اول من ظهر حماده سعيدا متوجه للعماره و معاه الايكريم
تحرك ( جبريل ) منطلقا بسرعه 1000 من مكمنه و خطف اليسكريم متوجها للعشش بنفس السرعه التي تحرك بها 1000
تاركا حماده في ذهول تام يبكي عندما وصل الي ماما (سوسن)
سوسن : حمودي ماللك
حمودي: اهي اهي اهي اهييي يا ماما
سوسن: كلمني يا حمودي انت وقعت يا حبيبي ولا مالك
حماده : اسكرييمي
سوسن: مالو الايسكريم وقع منك
حماده : لا لا لا ماوقع مني ....... الغنمايه ختفتو مني
---------------------
اها كان ده جبريل ياشاينق ستار
الترابه في خشمك
|
Post: #51
Title: Re: وبعد ضحكة قصيرة واصل جبريل
Author: المسافر
Date: 06-21-2005, 04:44 AM
Parent: #50
| Quote: اول انطباع هو اصدق انطباع |
وأقرب مكان يبعد سنين
آ جنا أقرع الغنم ... اقرع اقرع .. قرعك الجن
|
Post: #55
Title: Re: وبعد ضحكة قصيرة واصل جبريل
Author: ShiningStar
Date: 06-22-2005, 07:58 AM
Parent: #51
المسافر...
| Quote: وأقرب مكان يبعد سنين |
المسافات ... عقارب الساعه....مؤشرات سفر تقف دوما تمام التواصل و تسلم على المرور ...
امحمد امحمد... دايرين لنا قوون ....
آجنا... ساعيلك فوقو... ساعيلك فوقو
( جماعه بلعبوكورة)
|
Post: #52
Title: Re: وبعد ضحكة قصيرة واصل جبريل
Author: ShiningStar
Date: 06-22-2005, 07:39 AM
Parent: #1
معتز يا تروتى.........ذات أشواق جلس أبو شوق قبالة أم حقين....... كانت هى تحاول دعك (حلتها) الأثيره لنفسها وهى جالسه أمام طشت الغسيل- كانت دوما ترجى غسلها فى النهايه حتى ( تجلّيها) بمزاج
وكان أبو شوق يحدّق فى ذبابه عالقه بكتفها ولأن المقام كان يبدو قد طاب لها على براح الكتف فلم تبدى اى رغبه فى الارتحال..
كان أبو شوق يحدق بها شذرا وقد بانت أنيابه الفضيه فبدت تماثل حلتها التى تنام على كفيها.....
هنا ضمت ام حقين حلتها على صدرها مرسلة آهه لم تفلح فى إخفائهاوهو لا زال صامتا ينظر شذرا للذبابه.....
أبو شوق... اشرب الشاى؟؟؟
.... وهو صامت لاينبت بحرف........
هوووووووى يا أبو شوق مالك ؟؟؟
حين عاودت النظر اليه مجددا ونظرت الى الذبابه فى كتفها ادركت...... إنها الغيره إذا.........
اله لىىىىىىىىىىى أها يامعتز كلامك السمح ده بس ذكرنى ليهو................
|
Post: #53
Title: Re: وبعد ضحكة قصيرة واصل جبريل
Author: ShiningStar
Date: 06-22-2005, 07:49 AM
Parent: #1
Quote: الأخت شاينينق ستار
البوست جميل جدا وخواطرك معبرة وتترك بصماتها بقوة
تحياتي ومزيد من الإبداع... |
تسلم ياماجد....
هى خواطر او ان شئت انفلات فى ازمان الحضور المجدول للمكاتب وأن نعيش نصف العمر فى انتظار (شيك) ماحايق....
|
Post: #54
Title: Re: وبعد ضحكة قصيرة واصل جبريل
Author: ShiningStar
Date: 06-22-2005, 07:56 AM
Parent: #1
عارف يانصر... كلامك ده زكرنى (حمريطى) زهاء الطاهر.... ياخ دى بلد عجيبه ...لونك ابيض مصيبه وكان بقى اسود مشكله.... خوصا لو كنت بتتكلم بلكنه فى الحالتين......... حسى ده يقولو عليهو شنو ده؟؟؟
Quote: انا لمن سمعت بيه عرفت التسميه بتاعت الغبش و اولاد الارض دي ما جات من فراغ
( ما عارف يا شاينيق ليييه الطفل ده بالذات متخيلوا جبريل بتاعك ) |
فقط ننوه ان جبريل هو ايضا منسى فى تلك المنظومه سوى ان خروجه دخول فى دوائر الرحا حين تسحنه شموس العمر وتغتاله أمطار الشرود......... ينام صاحيا وهو يتوسد حلم عش يأوى اليه مغارب العمر وصباحات العشق تملأه أم شوق ضجيجا وبخور....
| Quote: حماده : لا لا لا ماوقع مني ....... الغنمايه ختفتو مني |
معقوله ياحماده؟ غنمايه!
|
Post: #56
Title: Re: وبعد ضحكة قصيرة واصل جبريل
Author: ملكة سبأ
Date: 06-22-2005, 08:10 AM
Parent: #1
تسجيل حضور ..
من باب إذ أحب احدكم اخاه فاليخبره
وانا حبيتك يازولة ها
وحيبت الحتة دي
|
Post: #58
Title: Re: وبعد ضحكة قصيرة واصل جبريل
Author: ShiningStar
Date: 06-22-2005, 10:16 AM
Parent: #56
ملكةسبا....
Quote: من باب إذ أحب احدكم اخاه فاليخبره
وانا حبيتك يازولة ها
وحيبت الحتة دي |
من نفس الباب... انا برضو بريدك... تواجدك و تعليقك جميل...
حبابك 1000.....
|
Post: #57
Title: Re: وبعد ضحكة قصيرة واصل جبريل
Author: ShiningStar
Date: 06-22-2005, 10:13 AM
Parent: #1
قالو... هم.... 
هو.... 
- عباره عن... فوهات براكين وسلاسل جبال وسهول مناطق معتمة وصدوع وقبب ووديان ضيقة ....
- اذن هم مشو عليه!!!
- يبلغ قطره حوالي (3480) كيلومترا...
- اذن هم مشو عليه.. كثيرا !!!
- يبدو لأعيننا لامعا دائما، إلا أنه لا يعكس في الفضاء إلا نسبة 7% من الضوء الواقع عليه...
- اذن هو مظلم في ذاته... !!!
- وتتفاوت درجات الحرارة على سطحه تفاوتا كبيرا ما بين الارتفاع والانخفاض حيث تبلغ درجة الحرارة في الظهيرة أقصاها فتصل إلى
(127ْ) مئوية بينما تبلغ أدنى معدل لها ألا وهو (-137ْ) مئوية قبيل الفجر
-
اذن هو متقلب !!!
كم كنت احسب ال 29 يوما و12 ساعة و44 دقيقة و2,8 ثانية .. لأراه ..غير مباليه بما قالته حاجه بخيته ... قالت..."ان الاحزان تغزونا متسلله مع خيوط القمر" ... و كل ما تمددت تحت السماء و داعبها وجهه الباهي المستدر اشاحت وجهها خوفا من هجرة الاحزان اليها دون تدري....
حريقه في المعرفه... و في كل من سولت له نفسه انو نحنا (انا) دايرين نعرف ... الان بقه ذيو و ذي اي كشافه ... مسخ...
المعرفه حزن يا جماعه...المعرفة حزن حين تكون حدقة عين تتسع باتساع المعرفة لتلم في محاجرها قذى الحقيقة المؤلم .. المعرفة مأساة حين نرى الحياة كما هي ..لا كما نريدها ..
|
Post: #59
Title: Re: وبعد ضحكة قصيرة واصل جبريل
Author: المسافر
Date: 06-23-2005, 07:12 AM
Parent: #57
دار القمر وإدلى تالا الريف
وحوحى الهمبريب لجلاجه هادي ظريف
طريت القنجرت ما بان لي منها طريف
حل المهلة ان كنت في وقافي أقيف
الليلة القمر من شوفة الجميل متواري
من زولن ظهر باهر عيونه تراري
فرعاً طويل مبين حكمة الباري
لفتاته التقول علماً بهز في صواري
قمر السبعتين في التمـام كيف وقفـو
بدرا مكمل شوفتو ما بتحيجك وصفـو
تمر الجناين والف ريحانو مارق عصفو
راقت بعد العكـار سلسبيـلا يصفـو
المعرفة كنز
وان فاقت الوصف كنوز
آوليد بندورلنا موية
الموية في البير آجنا
نان الدلو ينو
البير الاغادي فوقها دلو
(حوار مسافرين)
|
Post: #60
Title: Re: وبعد ضحكة قصيرة واصل جبريل
Author: ShiningStar
Date: 06-28-2005, 12:56 PM
Parent: #1
....نهاية المطاف....
علويه (ساي) حواجب سابقا.... لازالت علي ما هي عليه.. و كذلك الدنيا... علويه امنت انو الله حق و انو الدنيا - برمتها- عبارة عن مؤخره فقط... و قصة ان هناك واجهه حسنه للدنيا عباره عن وهم او ذوق شخصي (فهناك من يحبونها هكذا)...
لذا ننوه لسيادتكم... بعد اكتشاف علويه ساي - للوهم- الكبير... قررت ان لا تصرخ كبائعة اكياس لزجاجة حلم تكسرت بين يديها!!!
فقط ستعود الي البيت (وليس الراكوبه الظليله) لتبلل شعرها بلملح وتمسح المرايا بفروة الحريق... فليس بوسعها ان تقد قميص الصبر امام اهل المنابر المحترمين و غيرهم من المجعجعين....
- ستجلس علي تلك النافذه... تسخر من العاشق الذي يتقمص صورة المهرج في حفلة تنكريه و المرأة التي تكره الحناء و النقش في الذاكرة....
- ستجلس لتري ان جاراتها ما هن الا اهل فرنجه, حمارطه... نسوان -لحم - لابسين ارديه و فساتين حمراء عارية الصدر و مشقوقة الجوانب (كم تكره الصيف)... ليس بينهم سعديه شباشب, سعاد بنزين, سلوي باروكه , عفاف, ولا حتي علويه حواجب نفسها...
- ستجلس لتري ان في ناصية الشارع (الحنين سابقا)... لا وجود لترتار _ لوري _ .. دفن نصفه في الارض و النصف الاعلي كان مجلس ل_بخيته بائعة الملوخيه نهارا.. مقر و مجلس ونسه لصبية الحي بما فيهم موسي العجلاتي.. ليلا .... و انما هو محل _11-7_ بترخيص من شركة موبيل العالميه لبيع البانزين بمبلغ قدره 2.29$ الجالون...
- بائع البانزين ما هو الا (شيبا) الهندي... لا وجود لمنصور اللئيم..
- حتي ذلك القرار الصعب .. (باب بيت _الفيحاء _ يفتح علي المقابر ولا الكنيسه؟؟؟!! ) اصبح وهما... فليس هناك لا فيحاء لا مقابر ولا كنيسه .. فقط باب.... باب غرفتها (والاخير لا يحتاج لقرار) فهو يفتح علي الجهه الغربيه مواهجها غرفة الوالد و الوالده امد الله في عمرهم (ليتهم حضرو عالم السينما في تلك الليله التعيسه)...
-قرار اين تكون اشجارالبقومفليا (الجهنميه) سابقا... و الورد الانقليذي و شجرة الليمون .. سيكون لأم انيسه... فليس لعلويه الا ان تقراء الاقفاص علي صغار الدجاج...
- ذلك الفانوس الذي كانت تضيئه في الليالي _ الغير قمريه_ و هي تسامر القمر... ماهو الا شمعة ماركة _Glade_ صناعه طوكيه...
- كانت عندما تتعب ... تمشي جنب القيف... تردد....
"اعاين في البحر مهموم الاقي وجيهو شاقي النيل
في ساعة التعب و الخوف اشيل خطواتي و امشي عديل"
قيف شنو و نيل شنو.. هو فقط الاطلنطي... الذي عندما يجود يجود بهركينات و سونامي ممكن في اي لحظه اخموها اجيبو اجلها.. و مؤخرا (والكلام دا ما بعيد) قالو القصه بقه فيها سمك قرش.. جعل احدي ذوات -اللحم- لحم مفري...
... ليس بوسعهم اعلاه ان يكونو حقيقه ولا بوسعها ان تكون خيال..... آذن يا ساده... القصه لا تعدو ان تكون نافذه في غرفه بابها مفتوح علي غرفه تانيه في بيت (ليس بكبير) يطل علي شارع في ناصيته دكان _11-7_ وعلي بعد 16 دقيقه يقطن المحيط... دا كلوو في مدينه متعبه بفعل حركة بشريه سليطه و زحمه مفتعله.. كل من فيها يمارس دوره بأتقان في المشهد الثابت من نفس المسرحيه...و الجدير بلذكر ان سكان هذه المدينه كلهم شغالين في شركه واحده اكبر منتوجاتها حبه صغيره زرقاء(كانت مصدر ضجه في العالم) تساعد علي كسير العناقريب ,... اسفخس علي كدا...
[ لو فقط يعلمو ان المشكلة هي احساسهم الداخلي بلاستياء من كترة اللحم المجدع... هي السبب في حالتهم الشلش دي...]
عل كل حال...
ستعود علويه ساي الي دورها في المشهد(اكيد ما فاتته حاجه)... و بين الفينه و الآخري ستجدها تدندن مع المسجل ..
كلميني يا مرآيه ..
شايفك طربانه
حكوا ليك حكايه ولا كنتي معانه
ولا شفتي الصورة الشايلاها عيوني
ولا كنتي بتقرئي
( يا ساحرة )
في ظنوني...
عسي و لعل ينزل المطر في غرفتها تلك ...الفقيره...
اخيرا...
شكرا لكل من تابع هذا البوست البائس .... كم كان جميل احساسي بوجودكم -هنا- في ركن من اركان القلب تمارسون شغب التفتيش في كلماتي..
لكم المطر... حتي انت يا عثمان محمد صالح...
- عفاااااااف....
- هوووووي جايه جايه
- امشي نادي سعاد و جيبي لي بقجتي من تحت العنقريب و السفنجه من النمليه.. امشي تمش بطنك... بتعايني لي كدي فييي شنو...
- ما اعاين كن عاينته ... (قالت كلامها و هي موليه تكورك بأعلي حسها) سعاااد تعالي بندهوك..
-
- شوفو يا بنات انا ماشه اغترب... جاتني فرصة عمل في انداية رقم اتنين و تمنين.. دحين ابقن عشره علي الجدادات و الغنامايه ما تدوها عوجه... خلن التمسح الكتير و خلن الكواسه و الزمبعه بلحله... و انت يا عفاف رجعي الشباشب لي سعديه....
و ما تنسو الما ملك يصاحب الملوك... عشان ما تبقي عليكم حالة الصاحب الجريوات ..بهدلنو... و الصاحب الطويرات طارن خلنو..
ودعتكم الله...
الله لي ي ي ي ي ي ي ....
|
Post: #61
Title: Re: وبعد ضحكة قصيرة واصل جبريل
Author: معتصم دفع الله
Date: 06-28-2005, 02:10 PM
Parent: #60
تعجبني مثل هذه الفوضى يا شايننغ ..
حضرت ..
وإستمتعت ..
ستجديني هنا دائماً ..
ودي ..
|
Post: #62
Title: Re: وبعد ضحكة قصيرة واصل جبريل
Author: Tabaldina
Date: 06-29-2005, 02:52 AM
Parent: #60
..
.
شكرا لكل من تابع هذا البوست البائس ....
كم كان جميل احساسي بوجودكم -هنا- في ركن من اركان القلب تمارسون شغب التفتيش في كلماتي..لكم المطر...حتي انت يا عثمان محمد صالح...
فوضــاكِ رائعــة..!!
فظلي هكــذا ..
فأنا أحبــك فى غموضكِ..
فى وضــوحكِ ..
في ظـهــوركِ ..
فى إخــتفـائكِ ..
فى تجليك الجميل..
وفى حضارتك الفــريدة..
… نهاية المطاف …!!؟؟
هل حقاً أنها النهاية !؟؟
لكم سبحنا فى فى تيار هذه الفوضي ..الفلسفة..التراث
والأخيلية الرائعة ..
ونتلصص خلف الطاقات والمنافذ لنرتوي بقليل زاد مما تسكبين ..
أستودعك الذي لا تضيع ودائعة
وسنظل نترقب أن ينزل عليكِ ( الوحي ) .. لتمطرينا رزازاً
يفوق طاقتنا للأستيعاب والإستمتاع ..
ونترقبك دوماً لتعودين أكثر هطــولاً ..
دوماً وأنت المطـــر ،،
تفاصيل خفــيّة :-
"اعاين في البحر مهموم الاقي وجيهو شاقي النيل
في ساعة التعب والخوف اشيل خطواتي وامشي عديل"
و..أحس الجوه جوه الجوه زغرد فيها صوت الناي..
.JPG)
لا ســراب الصــحراء موية ،،
لا حجار سلوم موائد ،،،
يا وطن عز الشــدائد ،،،
منو!!؟؟
منو البدور يساهر الليل يسافر؟
فوق جناح الشوق يكوس نجما بعيد ضواى..!
وداً،،،
|
Post: #63
Title: Re: وبعد ضحكة قصيرة واصل جبريل
Author: فرح
Date: 06-29-2005, 07:55 AM
Parent: #62
يارايييييييييع
ركشه بس من شمبات لى سعد قشره بتريحك
كدى جربى
|
Post: #64
Title: Re: وبعد ضحكة قصيرة واصل جبريل
Author: singawi
Date: 06-30-2005, 01:59 AM
Parent: #1
الاول :أمشي شوفو.. كان لقيتو في .. تعال خليهو.. كان لقيتو مافي سوقو جيبو
بعد عشرة دقائق
الآخر : مشيت لقيتو مافي .. سقتو جبتو .. في الطريق شرد مني .. رجعت لقيتو في .. سيبتو وجيت
اتنين مساطيل عايزين يسرقو خروف جارهم
صاحبة العظمة شايننق ستار
ام فيونكة
منقا
ماأحلى الفضفضة، والهترشة، وفتح البلوف ، وهمس الولوف .
الأمر أشبه بمطيرة بشرق النيل الازرق بسنجة - وااااشوقي - ويجينا الهبمريب بالغرب شايل ريحة الدعاش المنعش .. أو عيزومة عند الجيران وتصلك ريحة الشية لتحرك خيالك فيتمثل لك صحن الشطة بالليمون بالدكوة فيجري ريقك - زي حالي الآن - أو شجرة طلح في عز نداها .. عارفة بكرة يجيها يووووم .
المهم البوست دا لسة في عمر الزهور .. كفاية انو بل شوقنا لهترشتك وشايفك كدا زي الاتفشيتي وضغط الزهجة اتنفس ونفس فهو نفساء ولميتي كشاكيشك وسفنجاتك ونويتي الغربة . والخوف ياغالي .. تسرح طوالي . هذا ومن ناحية أخرى .. أشواقنا لا توصف .. وشوارعنا لا ترصف .. والدقداق طلع صليبنا
|
Post: #65
Title: Re: وبعد ضحكة قصيرة واصل جبريل
Author: خدر
Date: 07-12-2005, 02:12 AM
Parent: #64
اها فكت ولا ... !؟
|
Post: #66
Title: Re: وبعد ضحكة قصيرة واصل جبريل
Author: waleed500
Date: 10-14-2005, 03:39 AM
Parent: #65
لزولة دى عندها هترشة قبل كده تب ما شفتها
كدى النرفع البوست ده فوق واستعدل فى قعدتى
بوست بسيط
ومجنون
وبينطط براه
زولة مجنونة ان شاء الله تجني وتزيدي في الجن وتكتبي كدا
|
Post: #67
Title: Re: وبعد ضحكة قصيرة واصل جبريل
Author: القلب النابض
Date: 10-14-2005, 07:20 AM
Parent: #66
| Quote: اها فكت ولا ... !؟ |
ليه يا خدر دايرة تفك
خليها تكتب
وتكتب
لاننا نحتاج لمن يكتب ما لانستطيع ان نكتبة
امطري.......
اتجنني.......
شخبطي.............
لخبطي....................
تمردي............................
ومارسي الفوضى والجمال...........
فنحن بانتظارك....
وبنتظار كل شخصياتك ... الرائعة....
|
Post: #68
Title: Re: وبعد ضحكة قصيرة واصل جبريل
Author: smilewomen
Date: 10-14-2005, 12:04 PM
Parent: #1
بوست مبالغه
أرشحه لنيل جائزه على مستوى المنبر
ولو كتبتى كتاب بنفس الاسلوب أرشحه لنيل جائزه أدبيه.
وأحجزى لى نسخه من هسى.
يا بت ما تستهونى بنفسك ومقدراتك الادبيه
لما يقولوا ليك يا رائعه ما تتواضعى وتقولى دا كلام زول زهجان
أنا لو مكانك أنفش ريشى
وانفشى فستانك بتاع الكلوش داك زاتو
أنا أراك كاتبه بارعه ومبدعه
ولو منك العايز ينادينى لو ما قال لى الاديبه علويه(حواجب) أو الاديبه علويه(ساى) ولا بتلفت أعاين ليهو.
تحياتى لك وللجميع بهذا البوست الفريد
|
Post: #69
Title: Re: وبعد ضحكة قصيرة واصل جبريل
Author: DKEEN
Date: 10-14-2005, 12:50 PM
Parent: #1
ياسلام يا بت يا شايننق..
تظلي متفردة في الاحتفاظ بذاكرةٍ جميلةٍ في ظروفٍ استثنائية .. تظلي في تعلقٍ غريب بكل ما هو غريب..
انتي يكفيك فقط ان تقولى ذلك شي جميل لتنجري كل كلام جميل ..
دي ميزة لا يمتاز بها إلا من رحم ربي وكان من الاصفياء .. تلك صفة لبشرٍ غابو في رحمِ الارض و كانو من الانبياء ..
ان ُتظن خيراً فيمن رايت ومن لم ترى ..ذلك امر جميل ..
بيد ان ذلك ليس من المنطق في شي.. وهو ليس امراً حكيماً باي حال ..
وانما هي محض سماحةٍ وحسن ظن..
اظل دهشاً مستغرباً كيف صمد ت كل تلك الاحجيات والذكرى بخيالٍ جميلٍ في صقعٍ باردٍ غير حميم..
كما واظل دهشا من كل هذا الالق المتعلقُ باهدابِ خياله الجميل ..
اولا تخشون عاقبة الخيال؟؟
حدثني ابي عن عمتي عن جدي عن جده خيري فقال:
إن جدك كان يخشى عاقبة الخيال الجميل والظن السي ..فكلاهما يحيقان باهله..
ومن شابه اباه ثم جدة فما ظلم ..
البوست زي الكتبتيهو وانتي قاعدة في ضحوية ورا تكل ناس علوية .. وبالرغم من انك بعيدة عن كل هذا الخمج فانك تنسجين خمجا لا ينسجه المقيم بين ظهرانينا ..
التحية ليكي يا السودانيتك ما خمج..
اليك جزءا من كتاب :
(...وكما انه من الصعبِ ان ُيبدع الادمي شيئاً جميلاً من ذاكرِة تراكْمت عليها سنواتُ البردِ والصقيعْ فانه من الصعبِ على الادميِ ان يظلَ يتحدثُ الى مالا نهاية عن جميلٍ ما ُقدر له ان يطْلع على بهيِ وجههِ وترتيب عوده .. وسكناته حين يكون النيل ووساع خطواتِ قدميه ..إذ كيف تسير ما تبقى من حياتك مع شخصٍ لا تدري مدي اتساع خطوات قدميه .. وعليه فمن قال بغير ذلك فقد كذب وداهن .. وظل في حضرة اللاعبين باللفظ المقيمين في نفاقِ الكلام ..وكان خواناً لاماناته، غير امينٍ ، ومتهمٌ في فطرتهِ السليمة .. ولا يعلمُ اي منقلبٍ سينقلب...)
دكين ضحوي مقتطفٌ من كتابه
(مزيداً من الدنيا بقليلٍ من الخطوات)
|
Post: #71
Title: Re: وبعد ضحكة قصيرة واصل جبريل
Author: DKEEN
Date: 10-14-2005, 05:22 PM
Parent: #69
انتي جبريل وين في الهلمة دي بالجد؟؟
|
Post: #77
Title: Re: وبعد ضحكة قصيرة واصل جبريل
Author: Tabaldina
Date: 10-20-2005, 06:06 AM
Parent: #71
..
.
التاريخ يعبر من بوابة عبدالقيوم ..
تري المراكب تمخر وتسمع صوت دوى المدافع
فى الطابية المقابلة النيل .. استرق السمع ..
فهل تخال نفسك معنياً هاهنا ..!!؟
فلا تسل عن اشياء ان تبدو لك تسؤك ..
ولا اظن الصاع يكفينى فأنا صاعي بصاعين ..
فأبتهل فى الشهر الكريم..ليتقبل الدعاء
ولنحتفل بعيده لنرى ضمائر الإنسانية ..
ونمد الخطي ..
مرقود .. عشية .. فلم عربي ..
كلمات مبعثرة ..
ليس الا ..
|
Post: #70
Title: Re: وبعد ضحكة قصيرة واصل جبريل
Author: ShiningStar
Date: 10-14-2005, 04:03 PM
Parent: #1
تحية بنكهة ابري احمر متلج...
رمضان كريم يعود علينا و عليكم بليمن والبركه...
اما بعد...
فتحت زاوية ردودكم.....
قرأتها...
اعدت البصر كرتين...
ابتسمت....
ثم احترت... قلته حسي الجماعه ديل نفشو البوست دا من وين....
.
.
.
.
حسي انا اقول شنو امام كل هذه الورود و الاريج؟
هل يكفي ان اقول شكرا؟
كم تبدو هافته و متهافته امام هكذا ...هطول...
لقد غمرتوني بلطف عباراتكم و غمرتو تراهات قلمي اعلاه.. سيئة الصنعه.. سوداء الفكرة... بأحتفاء خاص لا قبل لي به ولا انا بمجارياهو... و انتم الذين طالمااينعتم سماوات هذا المنبر ناثرين في زقاقاته كل النجوم و الشموس و الهدايا و ازهار الجهنمية وبعض الورد الانقليذي...
عميق امتناني...
اما بعد تاني...
بخصوص الزهج... لسه زهجانه اكثر مما يتخيل اي زول عادي و هو في امتع سياحات الخيال... لكن يومته سألته امي.. قلته ليها يمه انا من زمان كدا ولا هل من جديد اتانا من حيث لا ندري...؟
قالت لي... اه (بتصرف) من يومك متلفحه بي عبد القادر و جنك تشيلي الكفتيره و تحومي بيها في الحوش..
قلته ليها : يا امي الله يهديك عبد القادر شنو و الكفتيره الدخلها شنو في الموضوع...
ما ردت علي... وا واصلت ونستها في التلفون عادي... تسأل من عرس حسن ود اخوها... وكيييف العروس تقول دايرة شزلونق في اوضة النوم....
عليه... والله ما عارفه اقول ليكم شنو... لكن حتما سأعود ان عاودني الشجن... فلن استطيع الكتابه حتي ولو عن الزهج المرير الا اذا عاودني الامل... وها انا في الانتظار...
مع ان خلف الباب باب
وخلف الباب سور
وخلف السور طريق طويل ...!
يبقى الانتظار أخر الأمال الممكنة
لطارق لايزال منذ ..مايزيد عن الف مفتاح خيال ..
يمارس الحزن نفسه / طق طق طق طق طق .........طق..!!
(جنات)...
__________________
|
Post: #72
Title: Re: وبعد ضحكة قصيرة واصل جبريل
Author: المسافر
Date: 10-15-2005, 00:53 AM
Parent: #70
من يومك متلفحه بي عبد القادر و جنك تشيلي الكفتيره و تحومي بيها في الحوش..
رمضان كريم
وأجمل سلام متعدد الزوايا
للأحباب من جميع البقاع المسافرين والطافرين
خميتو من نفسي هينين تلاتة
وبرضكم مصرين إنو الشارع حقكم
وإنو الجيران يجب أن يشملهم التخطيط
وعلى المتضرر أن يلجأ إلى ساحات البكاء
|
Post: #73
Title: Re: وبعد ضحكة قصيرة واصل جبريل
Author: Ali Alhalawi
Date: 10-15-2005, 06:09 AM
Parent: #72
البت دى مجنونة و مطرطشــة!!!
الجن و الطرطشة يأتيان بعد الهترشة بما مقداره ألف هلوسة
|
Post: #74
Title: Re: وبعد ضحكة قصيرة واصل جبريل
Author: DKEEN
Date: 10-15-2005, 11:30 AM
Parent: #1
Quote: تسأل من عرس حسن ود اخوها... وكيييف العروس تقول دايرة شزلونق في اوضة النوم....
|
بلاي قالت دايرة شيزلونق ؟؟
البت اظنو حسن جاب ليها نفسيات ...
|
Post: #75
Title: Re: وبعد ضحكة قصيرة واصل جبريل
Author: Outcast
Date: 10-17-2005, 11:01 PM
Parent: #74
العزيزة شايننق استار,,
قرأت لك فى المنبر الانجليزى هنا بالامس و انبهرت باللغة الراقية...
أما بخصوص جبريل و الزهجة .. عندنا زول زميلنا كان بقول" أنا طول عمرى كنت قايلة الدنيا مديانى ضهرها .. لكن اتضح لى حسى انه داك كان وشها" ...
عشان كدة ... ُEnjoy what you have while it lasts
و الدنيا دى ما بتستاهل ....
ما سمعتى الاغنية الطالعة اليومين ديل "Live Like you are dying"
لو كان عندى مقدرات كمبيوترية متقدمة .. و لاحتى كان عندى ليها روح .. كان نزلتها ليك هنا....
سلمتى
|
Post: #97
Title: Re: وبعد ضحكة قصيرة واصل جبريل
Author: محمد عوض إبراهيم
Date: 11-14-2005, 10:27 AM
Parent: #74
مررتُ متأخرا من هنا .. وكان عزائي أني وجدتُ المتعة
حبيسة دارك .. لم تفُتْتـي ، فتكرّعـتُ فيها حتي الرواء
لك تحاياي أينما كنت .
.
|
Post: #76
Title: Re: وبعد ضحكة قصيرة واصل جبريل
Author: Ahmed Mohammed Osman
Date: 10-19-2005, 03:52 AM
Parent: #1
جنون وخستكة جميلة جدا
فووووووووووووق
|
Post: #78
Title: Re: وبعد ضحكة قصيرة واصل جبريل
Author: waleed500
Date: 10-20-2005, 06:19 AM
Parent: #76
ما عارف كل ما اجد نفسى زهجان بدخل هنا وبطلع فرحان ومبسوط الغريب فى الامر انو صاحبة البوست كتبتو وهى زهجانة...ازهجى ياخى وفرحى غيرك
|
Post: #79
Title: Re: وبعد ضحكة قصيرة واصل جبريل
Author: ShiningStar
Date: 10-21-2005, 03:44 PM
Parent: #1
اينما وليت,
ثمة وجه للزهج...
و دعوة لزهج اكبر منو...
لما اغتربت غارب الاغتراب.... و أنأتني المتربه عن الاحباب... و مازالت تطوح بي غوائل الزمن, في ضفاف و تلاع الساحل الشرقي.. علي مرمي حجر من نيويورك و مرمي اكثرمن قلب عن الاحباب....
لمبة الشارع مازالت تغض مضجعي كل ليل.... الانفلات الامني مازال يعاودني كل فجر...و أنني اخشي علي -لمبة الشارع-
من مغبة تلك المشاعرغير المهذبه والتي تذداد في شناتها و عدم تهذيبها كل ما اوغل الليل و اقترب الفجر..
اقوم اقعد في نص العنقريب ... استغفر... اردد ماوجب ترديده من آيات و صلوات....
لكن....
لابد من ما ليس منه بد.... البارح القريب... قمت بفنها بحجر ..لم يصبهالكن اصابها التالت...ابتسمت... وانا علي يقين انها ستعاود عملها الطبيعي في انارة الشارع وغض مضجعي مساء اليوم ...و الشكر موصول لبلدية نيو لندن ...
رانجيف بائع البنزين مازال مشغولا في فارغ القول و الفحشاء في مواقف السيارات... مرتديا بنطلون مارينز و كاب ظننا منه ان هذا ما يجعله من اصحاب البلد و المقام الرفيع , ناسيا تماما النقطه الحمراء اعلي جبهته!!!
.............
توماس غارسيا جارنا(او علوبه هكذا اناديه).. مازال يرتدي قميص و يرسل الآخر للمكوجي و يقعد ينتظره.... الا ان المكوجي كان يهمله بسبب انشغاله في كي أكوام الملابس التي تأتيه من كل بيت في الحي....بدا علوبه (توماس غارسيا) يعتقد... بما انو التجاهل بتاع المكوجي كان عموميا, ان وراء التجاهل نوع من العمد و انه يتعرض للتضييق و الملاحقه... (ذي زولنا بتاع التوابيت)...
ليت علوبه يعلم... انو القصه ما قصة مكوجي تجاهل قميص كن مفروض امشي بيهو الشغل... انما هي قصة مدينة بل قارة كامله تجاهلته بعد ان استدعته فاتحا ذراعيها..
لو كان قعد قبلو في البرازيل يتجدع في مزارع البن لكان ابرك له و اكرم ....
..............
روزليندا ... النصرانية ... كما هي .. متمرده بشده علي اعوامهاالفوق التمانين...متمسكه بكل ما للشباب و الصبا من صله... ايام السبت تترددعلي مصفف الشعر و ست المانكير و البوديكير... الاحد تراجع اهل الكنايس ..
الاتنين للخميس.. تجلس علي عتبات منزلها مستمتعه بمشاغلةالسابله و المعاينه في مؤخراتهم و بلخصوص -مايكل- ساعي البريد الذي لا ينجو من قرصه اوضربه عابره ...
لقد اخبرت الاخيره علوية ... بأن علي الواحد ان يعيش و يراقب ماشاء......شرط أن يحرص علي بقاء مسافة بينه و بين الواقع... مسافة يأمن معها ان لا ينكسر قلبه...
و علوية لن تنسي هذه الوصيه لانها شأنها شأن الوصايا التي لا تنسي... قيلت في وقتها تماما...لم يقلل من قيمتها أن قلبها انكسر فعلا..... فعلويه تكره أنصاف القلوب ..
إما حب..
وإما انتهاء ...!
اوووووف... ايوه جايه جايه....
هكذا هم دوماياجماعه...ماان يلمس الهواء البارد جلد انفي و افش غبينتي ..الا و اطيروها ليك في صليبك... كأن الدنيا حتقيف عن الدوران لو ما طلعنا الكوشه!!!
________________________________________
عفااااااف.... يا كرووور... تعالي...تجيك المن الله...
بلغي سعديه عنا السلام و قول ليها الشباشب في الحفظ و الصون و قول لي ياسين شد حيلك و خلي المسخره البتسوي فيها دي الناس بدت تتكلم... قول لي علويه اقطعي علاقتك مع ناس البوليس و الاشلاق -الايام دي-...
ادي سعاد مبلغ و قيمته اربعه دولار -حق اللبن- و قول ليها العرس ملحوق البركه في الوليد
(بكسر الياء)...
وكن لقيتي طريقااغشي حجه بتول باركي ليها الحجه (مع انو الحج لسه) لكن قولي ليهاما مشكله السوقتيها وصلت و الاعمال بلنيات..
شكرا من القلب لكل من تابع هذه المنظومه....
حترب شوق....
|
Post: #80
Title: Re: وبعد ضحكة قصيرة واصل جبريل
Author: mutwakil toum
Date: 10-21-2005, 04:08 PM
Parent: #79
النجمة .
رمضانك كريم .
البوست بتاعك مقلب اكل مني ساعتين زمن ..
تسلمي علي السياحة الرمضانية دي ..
|
Post: #81
Title: Re: وبعد ضحكة قصيرة واصل جبريل
Author: ShiningStar
Date: 10-26-2005, 09:45 AM
Parent: #1
"الاطلنطي, ۲۲ اكتوبر ۲۰۰۵ ..كنبة عامه.. خضراء بدون مظله"
يا كرور...
اردت ان اراك....
من بلاهة هذ المحيط الهائج الذي يضيع خلفه الافراد كما تضيع فيه القطرات ... لا يمكنني ان اراك كما احب....
الوسيله البدائيه العاجزه لحد البله...
وسيلتنا المكتوبه.... استعملها لأراك....
اكتب لك...
كيف نتناول الحكمه و المنطقيه لنضمد هذ الجرح؟؟
النيل ...الخرطوم.... غرفتي... الكتب .... الاغاني .... ورود الجهنمية .... القمر ...المطر ...تغريد جبره.. الكمنجه.. انا و انت في ساعه طويله من زمن لا يعرف الساعات....
الساحل الشرقي رطب فارغ لا يثير مخزون قاع الاشياء...
تزدحم الاشياء...
تتراكم فوق بعضها و تستلم للنعاس..
و تموت الدوامه في صمت...
كيف العوده الي الديار من جديد يا هذا...؟؟
الذين في يدهم امر العوده قتلوها بلتجاهل المستبد...
أصحو يا سادة الكون الغريق.... (كلام موجه للمذكورين اعلاه)
تمردت علي العمل أمس....
لم أذهب الي الجامعه اليوم...
جلست في مواجهة الاطلنطي ... نظرت من كل الزوايا.. لأراك...
انت يا مرض.. كيف تعيش؟؟
كيف تلعب لعبة الاستمرار؟؟؟
كيف تتناول قراصتك ؟؟؟؟
في مأواك اراك...
في اضطجاعك اراك...
في الساعات المتلاحقه اراك...
تنكب علي الاشياء المزروعه بين دفتي التحفه و عيون اماني تيري..و ما بينهما من اطراف فساتين....
ياهوووووي...
واصل اثارتي ليخرج مخزون تراكمات السنين...
لو لم تكن انت ما كنت قد جئت الي الاطلنطي و الكنبه الخضراء بدون المظله في يوم ممطر و جلست اكتب لك...
قلت ان الدنيا تتحرك عندكم...
و لكم منها جوانب غير مؤخرتها...
كن بديل عيني و قل لي..
ما دورنا فيها؟؟؟
بلمناسبة...
اليوم رأيت امين عام عموم النسايم.. بحواجبها الفاتنه...
(علويه قايله الحواجب قسموهين ليها براها... حوا والده)
اليوم تذكرت (و بدون مناسبة).. في نهاية حفلة العرس التي تخلفت عنها الغالية تماضر في اوائل يوليو الماضي... و نحنا طالعين... واحده ماشة قدامي و جنبها زوجها... راجل طويل عريض جهامه بس... لابس جلابية سكروته و بكورك في الجماعه قدامهم... عامل زوبعه... و كل الناس الطالعه تعاين ليهو...
جات عربية طالعه من الباركنغ... فيها العرسان... قام الزول قعد اكورك بي اعلي صوتو... يااا فلان... قصدو العريس.. زولتك دي صغيرة و جاهله ما تخلعها من أول يوم.. ها هاهاهاها...
الغريبه انو كان الوحيد البضحك و واصل .. النسوان كلو واحده لمت توبها عليها و بعض الرجال عملو انهم بتكلمو عن الفنان و طبقات صوتو و التوزيع الموسيقي...عاينت بطرف عيني لقيت مرتو ماشه بعيـــــــــــــــــــد منو...
لم تقل لي... متي أحضر لتناول الشاي بلبن المقنن من يد ام انيسه؟؟
هل سيحدث مرة ان تحرك غيبوبتك؟؟
تركب الطيارة... تنزل الساحل الشرقي.. تذهب الي الاطلنطي... تسأل عن عنواني ثم تكف...
و تعود من حيث اتيت بذكريات ايام قضيتها و لم أراك...
كنت انتظر بلهفه كميات كثيرة من نفسك..عبر الفاكس...او اي شي..
أقرأ بشكل مرعب...
عدت الي أرسين لوبين..
الشياطين التلاتاشر..
اطواق الياسمين...
الرغيف...
آخر ما قرأت قصيدة الحرمان....
هذا الوغد يثيرني لأبحث عنك.. عندما يقول...
انا يا حبيب قلبي سائل دوام عنك
الحرموني شوفتك انا في قلبي صورتك
كل ما جابو سيرتك تزداد بي شجوني
يجفو النوم عيوني و يزحم قلبي حبك
هل تعرف طريقه لأيصال السلام لرحاب هريمي و ميرغني حمزه؟؟؟
لقد رحلو و لم يتركو عنوانهم... أحس بلذنب لأنني لم ارسل لهم السلام و الشوق الكتييير...
رسائلك الآخيرة...المكتوب منها و غير المكتوب... عملت شيئا غريبا
(تناولت الرسائل القادمه لي من كل مكان...جمعتها كوما... و فقدتها الي الابد...)
كم من الزمن تظن سنكتب في هذا المنبر؟؟
كيف حال أسرتك؟؟
مشكلة تحويل الزمن...مرعبة....
اكتفي هنا....
الي اللقاء...
قائدة الفيلق الرابع و ناظرة البحرية....
_______________________
يا الله هوووووووووي... تعبته من عيشة التراب...
|
Post: #82
Title: Re: وبعد ضحكة قصيرة واصل جبريل
Author: طيفور
Date: 10-26-2005, 07:17 PM
Parent: #81
شوشو..
كل سنة واتي طيبة يمة
غايتو اطلطني السجم دا اكان لحقتو...
علا اردمو ليكي طوب نمان يآمن.. ود الكلب
والزارعا الله في الحجر بتقوم
___________________
بت يا نفيسة..! نفوس..؟ ياسجم الآذان اذن.. قومي ناوليني الحقة ديك
|
Post: #83
Title: Re: وبعد ضحكة قصيرة واصل جبريل
Author: Ali Alhalawi
Date: 10-27-2005, 01:53 AM
Parent: #82
| Quote: بت يا نفيسة..! نفوس..؟ ياسجم الآذان اذن.. قومي ناوليني الحقة ديك |
لووووووووووول .. رمضاااااان بااااااارد السنة دى .. ما إتجرسنا و لا حااااااااجة!
|
Post: #84
Title: Re: وبعد ضحكة قصيرة واصل جبريل
Author: DKEEN
Date: 10-28-2005, 07:12 AM
Parent: #1
Quote: الوسيله البدائيه العاجزه لحد البله...
وسيلتنا المكتوبه.... استعملها لأراك....
اكتب لك... |
كيف تصلح الرؤية عبر ما لا تصح منه الرؤيةاصلا ..
ان التوصل الى شي عبر مالاُيصح منه التوصل الى الشي فهو خلب ولايعول عليه..
انت ما رايت حين ظنت انك رايت ..
انما رايت انعكاس خيالك الجميل الموغل في الياسمين والجهنميات ..يا جميل ..
Quote: كيف العوده الي الديار من جديد يا هذا...؟؟
الذين في يدهم امر العوده قتلوها بلتجاهل المستبد... |
ليس ثمة من ديار في الجوار يا عزيزتي ...
ليس كما كانت قبل اعوام خلت ..
ليست كمالخرطوم في اوائل الثلانيات ..
بدايات و ايام زراعة الجهنميات يا شايننق ..
ايام الانجيلية ..وبيوت الطوب الاحمر والنملي ..بيوت لاتطن بها مكيفات ولاتعاني من الانسجام..
برندات السكه حديد وكبر يبحري القديم ..
حي الوابورات والاملاك واحياء المسلمية وابروف ..
كرومة وود البنا والخليل..
ليست مثلما قال احمد عبد العال:
(في ليلها تنساب الاغاني مع نهر النيل الذي يجري حتى يوم الناس هذا..
تلك دنيا امتلكت ناصية الحلم ..)
(لو ينفع المحذور مالي ومال هواه الضامر المخدور )
الاغاريق الذين كانو يسعون في دروبها عند المغيب..
من ظلو يواظبون على الجلوس في ناصيات شوراع الخرطوم شرق ..
حيث اللبخات والمهوقني المستجلب من اقاصي الدنيا..
الان لا شي سوى صور في ذاكرة تتداعى ..
تماما زي ريدتك الخيالية دي ..
ليس من حقيقة فيها سوى انها خيال..
اليكِ ايضا مقتطف من كتاب:
( تلك بلاد اعتلاها غبارٌ كثيف وداهم اهلها هلعٌ في الزرقِ فطفقوا يركضون من فجرها وحتى مقتبلِ فجرها الجديد..
يثبون على كل شي وثباً.. يثبون على النيل والفوضى ..يثبون على الميتة وثبا..
وفي الفوضى تضيع الارزاق ..
تلك بلادٌ يركض العنقالةُ فيها دونما نهاية ..
يركضون ُزمراً ُزمرا ..يركضون الى حيثمالانهايةٍ تلوح ..
ليس ثمة من براحٍ لنا او مساحة.. قد ابتنا البلاد فابيناها.. ولم تاؤنا فخرجنا منها..
كنا فيها كضيفٍ حل على عجل ..وارتحل بليل ..
انما البلاد كالدنيا يا مروان ..لاامان لها ..
وانما جنة الاماكن هنا.. هنا حيث تدار شؤون الحنين والذكريات والنيل..(واشار الى قلبه وسكت)..)
(دكين ضحوي الحسن- كتاب الواثبون الى مالانهاية )
Quote: تركب الطيارة... تنزل الساحل الشرقي.. تذهب الي الاطلنطي... تسأل عن عنواني ثم تكف...
و تعود من حيث اتيت بذكريات ايام قضيتها و لم أراك... |
هل يشتاق الانسان الى الانسان ام يشتاق الانسان الى معرفة اشتياق الانسان اليه في كتابات الانسان..
هل تشتاقين اليه ام تبحثين عن صورة شوقه اليك فيمايكتب عن اشواق ..
من حقه ان يعرف .. اتشتاقون ان ُيشتاق اليكم ان تشاقون ان يراكُم الـُمشـتاق..
الم اقل لك ان في الامر شبهة افتقاد..
لشوق يبحث عن صورة شوق ..
Quote: انا يا حبيب قلبي سائل دوام عنك
الحرموني شوفتك انا في قلبي صورتك
كل ما جابو سيرتك تزداد بي شجوني
يجفو النوم عيوني و يزحم قلبي حبك |
ان حشر كلمات الحقيبة في متن حوار نفسي جميل ..
دليل بلاغةٍ ..ودليلُ صدقٍ متسلسلٍ لحالِ النفس..
ان ما كتبته في اخر مداخلة ليس كمثلة شي..
|
Post: #85
Title: Re: وبعد ضحكة قصيرة واصل جبريل
Author: DKEEN
Date: 10-28-2005, 05:46 PM
Parent: #1
تخيلي قريت مداخلتك الاخيرة دي تاني اربعة خمسة مرات..
بالجد ليس كمثله شي ..
التحية لما كتبته يا بنية...
ومزيدا من التدفق ..
مساعد الطباخ في الفيلق الرابع - دكين
|
Post: #86
Title: Re: وبعد ضحكة قصيرة واصل جبريل
Author: اساسي
Date: 10-28-2005, 06:32 PM
Parent: #85
Quote: لم تقل لي... متي أحضر لتناول الشاي بلبن المقنن من يد ام انيسه؟؟
هل سيحدث مرة ان تحرك غيبوبتك؟؟
تركب الطيارة... تنزل الساحل الشرقي.. تذهب الي الاطلنطي... تسأل عن عنواني ثم تكف...
و تعود من حيث اتيت بذكريات ايام قضيتها و لم أراك...
كنت انتظر بلهفه كميات كثيرة من نفسك..عبر الفاكس...او اي شي..
آخر ما قرأت قصيدة الحرمان....
هذا الوغد يثيرني لأبحث عنك.. عندما يقول...
انا يا حبيب قلبي سائل دوام عنك
الحرموني شوفتك انا في قلبي صورتك
كل ما جابو سيرتك تزداد بي شجوني
يجفو النوم عيوني و يزحم قلبي حبك
|
احي انا لكن..
صديقي (الجنينة) قال ذات مرة أنه يريد امراة تحبه وحده ..
امراة مريضة عجوزاً.. اي امراة.. لكن فقط له وحده!!
صديقي هذا متزوج بالمناسبة.
لا اصدقه وربما لن افعل
في الحقيقة لا اريد تصديق اي احد
بكل اسف فاتتني فضيلة الشماتة فيه
او بمعني ادق لم استطع الاستمتاع بموقفه هذا!
فقد زرته في داره مرة واظني يومها تواجدت في المكان الخطأ
لا اريد ان اقتنع
صديقي هذا مخلوق اهبل
او هكذا يبدو لي
ومن لا يصدقني فليذهب ويزوره .!!
لا يمكن باي حال ان تكون حياته مملة
رغم ان احدي امنياته التي اسرني بها انه كان يتمني ان يصبح سائق ركشة
وتحقيق حلمه هذا كفيل بطرد اي ملل في حياته..
حتى في الفضاء خلف الاطلنطي نفسه.. هناك فرح ولكنه لم يعبر عن هذا لنفس أسباب صديقي الوغد..
وكل الأشياء تقاس بهذه الطريقة .. الامر لا ينطبق فقط على الحب و الحنان..
كل شيء له مقياسه الخاص به .. حتى وجهة نظر ذلك الجهامة الذي نكرته زوجته وابتعدت عنه وهو يصرخ علي الملا بما يُسَر به خفوتا!
وانا حتي الان لا اريد ان اصدق ..
والذي لا يعرف الصقر يشويه
|
Post: #87
Title: Re: وبعد ضحكة قصيرة واصل جبريل
Author: salamat
Date: 10-28-2005, 07:21 PM
Parent: #1
النجمه الساطعه
أنت وهذا الدكين والرومانسي درر قيمه. سلمتم يا
مهمشين
|
Post: #88
Title: Re: وبعد ضحكة قصيرة واصل جبريل
Author: اساسي
Date: 10-28-2005, 07:56 PM
Parent: #87
salamat .. سلامات
كتب دكين:
Quote: ( تلك بلاد اعتلاها غبارٌ كثيف وداهم اهلها هلعٌ في الزرقِ فطفقوا يركضون من فجرها وحتى مقتبلِ فجرها الجديد..
يثبون على كل شي وثباً.. يثبون على النيل والفوضى ..يثبون على الميتة وثبا..
وفي الفوضى تضيع الارزاق ..
تلك بلادٌ يركض العنقالةُ فيها دونما نهاية ..
يركضون ُزمراً ُزمرا ..يركضون الى حيثمالانهايةٍ تلوح ..
ليس ثمة من براحٍ لنا او مساحة.. قد ابتنا البلاد فابيناها.. ولم تاؤنا فخرجنا منها..
كنا فيها كضيفٍ حل على عجل ..وارتحل بليل ..
انما البلاد كالدنيا يا مروان ..لاامان لها ..
وانما جنة الاماكن هنا.. هنا حيث تدار شؤون الحنين والذكريات والنيل..(واشار الى قلبه وسكت)..)
(دكين ضحوي الحسن- كتاب الواثبون الى مالانهاية )
|
قبل ايام كانت تراودني الرغبة في الاحتفال باي شئ ..
فكرت في الاحتفال برأس السنة .. فكرت في الاحتفال بعيد الاستقلال
شدتني الفكرة في الاحتفال بيوم استقلالنا
فكرت في الاحتفال عن نفسي قبل التاريخ ولكني اعود واتمنع
نفسي الامارة بالسؤ هي من دلتني للاحتفال ومنعتني
فكرت في هؤلاء الواثابون او كما تسميهم
استكثرت الاحتفال بالاستقلال وترك الاحتفال بهم
هذه الارض لهم وليس عليها ما يستحق الوثب من اجله ولكنهم يثبون
كل الذي حدث اني حينما رحلت عنهم نسيتني هناك معهم
لذا قررت الاحتفال بهم
بالوثابون كما تسميهم او الراجلون كما اسميهم
يا صاحبي الامر ابسط مما نتخيل
وكل ما فيه انني ولدت هناك
لذا تشدني هناك كثيرا
كلما تذكرت احدهم وسالت عنه وجدته خارج من معركة مع الفلس مهزوما مدحورا
كما حالي هنا
كيف لا اتذكرهم وانا معهم هناك وهنا
اذن فلأحتفل بهم
وليكن شعار احتفالنا
هؤلاء تخلصوا من فكرة انهم مركز الكون
فالكون بلا مركز
لذا يثبون وهم راجلون
ولكن مهلا.. هلا يصلح لك ان تحتفل معي..؟
الان كل المشكلة اني التقيتك هنا
واحساسي بانك هنا ينسيني بانك هناك
لذا اظن انك لا تصلح للاحتفال معي
عذرا صديقي لم اقصد الفوضي
ولكن
المشيئة كانت اكبر من ارادتك وهذه ليست مشكلتك
المشكلة اني علي سفر يا صديقي
ولكني لم اغلق الباب تماما
المهم الان ان تكون هناك.. وثاب
وسنحتفل يومها
ولكن حق لك ان تعرف اني اكره الانتظار في محاولة غبية لاستعادة شخص تلاشي
|
Post: #89
Title: Re: وبعد ضحكة قصيرة واصل جبريل
Author: اساسي
Date: 10-30-2005, 01:35 PM
Parent: #88
اسبوع تافه
ليس به الا قليل من النوايا الحسنة
احب احيانا ان اكون حكيما فلسفتي في تفاهة الايام هي
ان كل كل لحظة نشعر فيها بالفراغ تتحول بعد ثواني قليلة إلى لحظة تافهة ..
نسمح من خلالها للفراغ ولكل الكائنات التي تمارسه أن تهاجمنا وتختار لنا أقدار تلك اللحظة ..
التفاهة هي الباب الذي ندخل منه الي الفضاء السايبيري
بعض الذين يدخلون عبر نفس الفضاء يومنون ان الفراغ عملا شريفا
انهم يجدون انفسهم في هذا بل اكثر من ذلك انهم يتقنون ما يقومن به عن اقتناع
احيانا ادهش عندما اجد بعضهم يمتهنون هذا الفراغ .
اسوأ ما قد يحدث لهم ان يجدوا من يضحك وسط حفل تابين اسابيع فراغهم التي يقيمونها
ومهنتي هي الضحك وسط تلك الحفلات
ولكن تواجهني المشكلة العصية الدائمة
من اين لي بضحك يكفي كل تلك الاسابيع المفتوحة؟
|
Post: #90
Title: Re: وبعد ضحكة قصيرة واصل جبريل
Author: DKEEN
Date: 10-30-2005, 06:09 PM
Parent: #1
Outcast
وين الغيبة دي كلها.. عساكي طيبة؟
|
Post: #91
Title: Re: وبعد ضحكة قصيرة واصل جبريل
Author: نادر
Date: 10-31-2005, 03:36 AM
Parent: #1
|
Post: #92
Title: Re: وبعد ضحكة قصيرة واصل جبريل
Author: DKEEN
Date: 10-31-2005, 07:19 AM
Parent: #1
قد طال غيابك يا قمر ..
|
Post: #93
Title: Re: وبعد ضحكة قصيرة واصل جبريل
Author: DKEEN
Date: 10-31-2005, 07:21 AM
Parent: #1
شايننق ..
شنوالغيبة ..دي .. نقفل البوست على كده؟؟
|
Post: #94
Title: Re: وبعد ضحكة قصيرة واصل جبريل
Author: ShiningStar
Date: 10-31-2005, 03:17 PM
Parent: #1
"عندما يخنقني الصوت ... وتخونني الكلمات ... لا تستغربو ففي ثنايا الروح شئ أكبر من ما توقعت ..."(...)
__________
وليد۵۰۰ ..
لك المطر....
و القمر....
و ما بينهما...
و بركه في الزهجة الجابتك لينا ....
القلب النابض..
تحيات بحجم فوضة المخيله.. و الله و ما طالباني حليفه... أشفق على من يشاركني الخيال أحيانا...
لكنني لا أستطيع أن أتخلى عن جنوني ...
دمتي انت و النبض معا...
Smilewomen...
اديبة شنو و كلوش شنو الله يهديكي بس... فأنا مازلت في الصفحه خمستاشر من كتاب (نظرية العقل) و لي حسي ما فهمته فيهو شي لا هو لا كلام اساسي....
تسلمي يا غاليه...
DKEEN
عذراً .. فإني ما ازداد اندهاشي من نص .. إلا وشلت لغتي حتى عن الثرثرة الجوفاء أمامه ....
... شكرا لمرورك الكريم... و شكرا لمداخلات دسمه..
لكن يا اخي... ولا اقول ليك خليني اجيك راجعه.... بلمناسبة جبريل ضاع في الهلمه....
سلمت يمينك ...
تبلدينا
اسعدنا مرورك...
المسافر...
ياخي والله بتقول ليك كلام مج نون لا يجيده الا العقلاء... لك الاشواق يا رجل...
علي الحلاوي...
شكرا للمرور يا علي... و برضو ما طالبني حليفه... كن ما الطرطشه الانا فيها دي... كن لحقته سكينة بتاعت الجامع الكبير...
Out Cast...
شكرا يا راقيه للمجاملة الرقيقه...
و كلامك صح....
I should enjoy what I have while it last....
but the question remain.... what is it that I have
???
| Quote: ما سمعتى الاغنية الطالعة اليومين ديل "Live Like you are dying" |
يا طويلة العمر... انا مسجلي لا يخرج منه الا اصوات تغريد جبرة صديق الكحلاوي و الكابلي و في الفترة الاخير صلاح بن الباديه...
لكن صبحان الله يومته ماشه في السوق سمعته غنية بتقول...
Why I am I trying to live.... when I am just living to die....
قلته يا لطيف يا منجي...و انقلبت عنها موليه... لكن الصدي لم يبارح... اللهم احفظنا...
شكر تاني يا ذوق...
احمد محمد عثمان...
شكرا للمرور... لكن انت لييه مقبل في الصوره؟؟
متوكل التوم...
متوكل... ياخي انا ضيعته عشرة سنين سنة تنطح سنة في بلد ما فيها شاي بلبن مقنن.... ولاشجر جهنمية...
الساعتين اعوضك فيهن صاحب العوض..
بعدين انت اساسا ضيعته ساعتين في شنو؟؟ البوست برمته ما مفروض ياخد في يدك ربع ساعة... لكن شكلك سرحته في ما وراء عيون هيفاء وهبي....
شكرا للطلة...
طيفوووووووووووور...
النبي عاد كن ما ردمتو...
اساسي...
...نصوصكِ تشي بي كثيرا ، تجعلني مرتبكه قليلا ،
فلهذا أقرأكِ على حذر ...!دوما كعهدي بك... تقول كلام دراب دراب... معاني كبيرة و كثير هو ما بين السطور... لكن و لا اخفيك قولا... كل مرة بقرا كلامك دا بكون لسه صايمه و ريقي ناشف ... لكن حتما سأعود في وقت ما بعد المغارب ....عسي و لعل....
منور والله...
Salamat...
سلامات يا سلامات... شكرا لحديث قدح انا لا قدرو لا شيتين... لكن والله اهنيك علي اختيارك لبعض الدرر... دكين و الرومانسي قطع شك في المقدمه...
ممتنه لهكذا مجامله...
نادر...
نزيدك من البيوت بيتين....
ايام كنا نقطف ازهار الخريف...
و نطارح البلابل في الظل الوريف..
مازال قليبي يهفو...
علي كل زهرة يطفو...
ولهان يروح و يغدو...
و ينهي المقطع بي...
كان كل المرام نعيش احباب كرام...
لكن... لكن... فرقتنا الايام...
الايام..... يا حبيبي.... الايام
_______________________
اما بعد...
يا اصحاب الكيبوردات الرقيقه... اسعدتم سماء جهازي الفقير بطلتكم البهية هذه...
شكلكم كدا رايقين و الدنيا لافه معاكم... وايامكم موغلة في الساكوبيس ....
( اللهم ادمها نعمه و امنعها من الزوال) فلولا ايامكم و كلامكم الباهي دا لما نزل المطر....
تواجدكم يجعل مني زولة عادية تتفرج علي مطر-غير عادي- عبر مدخل زجاجي
.. واعود لموقعي فور ان انتهي من ذلك...
ربما لانكم تعنون شيئا.....
الالــــــــــــــــــــــــــــــــــوان...
|
Post: #95
Title: Re: وبعد ضحكة قصيرة واصل جبريل
Author: EL fahal Abdelatif
Date: 11-01-2005, 01:17 AM
Parent: #1
الونسة ليها طعم هنا....
ما ا نا مزازى.........
والونسة بتجيب الونسة...
حجيتكن... ما بجيتك..ن
,,,,,,,,,,,,
يا ولد... يا ولد..... ياولد....
شنووووووووو....
تقول لى شنو كمان شنينة فى راسك
,,,,,
يا ولد ..يا ولد ..يا ولد....
اهههههههها....
هنهانا فى راسك ما بتسمع..
اها جيت..
,,,,,,,
يا ولد... ياولد..ياولد
عمتى بتول ..قول هوى آجنا
هوووى......
هواية فى راسك
,,,,,,,,,,
تانى هوى دى... ما داير اسمع هو دى تانى.
.لكين اقول شنو ؟؟؟
ما..الناس كلهم بقولوها...
ما لك ومال الناس ات..
,,,,,,,,,,,,,,,,,,
ياولد.. ياولد..ياولد..
آىىىىىىىىىىىىىى
لواية فى بطنك...ما فى غير اااى ولا اااهها
,,,,,,,,,,,,,,,,,,,
ياولد .....ياولد... ياولد...
ايوة (مع احساس بفلهمة)..ايواااا....
لواية فى راسك
,,,,,,,,,,,,,,,,,,,,
سنة اولى ابتدائى..كل احلامى من المدرسة ...ان تكون مبررا لانقطع الى الابد عن الخلوة..
اول يوم ....
البسمع اسمه ..يقول فندى...
فلان الفلانى....
فننننننننننندى.
انتهى اليوم الاول
,,,,,, ,,,,,
يا ولد ...ياولد...ياولد..
شنوووو...........
شنينة فى راسك..ما قت ليك ما تقول شنو دى..المدرسة دى ما ماعلموك فيها..
علمونى...
علموك شنو؟
عربى ودين ..
وتانى ...
حاجات كتيرة ......
زى شنو؟
حاجات كتيرة يعنى...
(احسن اقول حاجات كتيرة ولا اقول ما اتعلمت حاجة عشان ما يودونى الخلوة )
,,,,,,,,,,,,,,,,,,,,,
اليوم التانى فى المدرسة......
مدرس ...
فلان الفلانى....
ايوة...
ما تقول ايوة...فى المدرسة تقول نعم ..ولا فندى..
مرة تانى..
البسمع اسمه يقيف على حيله ويقول نعم..
فلان الفلانى...
نعم..
اقعد..
انتهى اليوم التانى..
الليلة انا اتعلمت....
,,,,,,,,,,,,,,,,,,,,
ياولد...ياولد...ياولد..
نعم...
نعامة تزازى بيك....
نعامة تزازى بى يعنى كان قاصد نعامة تسكنى..وعشان ما فى طريقة اسأل اقول تزازى بى يعنى شنو
فهمتها بطريقتى براى.. انه نعامة تفسحنى..... نعامة انط فوق ليها وتقعد تزازى بى ...دى حلوة وعجبتنى..
يعنى المدرسة استفدت منها...وبقيت افهم براى بطريقتى ..وانشا الله النعامة دى تودينى سقط لقط..
لكين باقى لى حاجتين اتنين داير اعرفن...الحكومة .. والله..ولمن سالت قالو لى انتظر لمن تكبر واناكنت عايز اعرفن قبل ما اكبر..
لكن برضه لغاية الزمن داك الحواشات احسن بتمسكنى من الخلوة ..والمدرسة احسن بتمسكنى من الحواشات...
,,,,,,,,,,,,,,,,,,,,,,,,,
ومشيت افتش لنعامة..وبعد تعب لقيتا جارية..سكيتا ..لحقتها وغلبنى انط فوقا...
ورجعت اعمل ..بروفة ...............
ورجعت للنعامة..ولقيتا جارية...وانا جارى نطيت.....وديك يا مزازا ... النعامة بمزاجا هى جارية ....
وانا ما فاضى ليها اوقفا ..راسى فيه ..شنينة..وهواية ..وهنهانة..ولواية وهنهينة..والله..والحكومة..وما قادر اعرف ياتا من ياتا....
والنعامة..تزازى بى...
......ودتنى سقط لقط....... وفى سقط لقط اتفقنا انه المرة دى بمزاجى انا...ما هى فترت....
ورجعت لكتح لفح...لقيت البلد....
خلوة ما فى ......لكين المدرسة بقت خلوة.......... .والحيكومة بقت خلوة...والجامع بقى خلوة.. والتلفزيون خلوة...
يعنى اعمل شنو ..ارجع الحواشات.... تانىىىىىىىىىىىىى...
ولا احسن اشوف لى نعامة تانىىى..........
انقطعت فى................................
تحياتى لكم اجمعييييييييييييييين.....
عبد اللطيف
|
Post: #96
Title: Re: وبعد ضحكة قصيرة واصل جبريل
Author: DKEEN
Date: 11-12-2005, 03:39 PM
Parent: #1
كم مضى منك وانت موغل في غيابك يا قمر ؟!
|
Post: #98
Title: Re: وبعد ضحكة قصيرة واصل جبريل
Author: ShiningStar
Date: 11-15-2005, 04:17 PM
Parent: #1
| Quote: كيف تصلح الرؤية عبر ما لا تصح منه الرؤيةاصلا .. |
ترعبني شهيتك لأدانتي بلخياليه و عدم المنطقيه....
Quote: ليس ثمة من ديار في الجوار يا عزيزتي ...
ليس كما كانت قبل اعوام خلت ..
ليست كمالخرطوم في اوائل الثلانيات ..
بدايات و ايام زراعة الجهنميات يا شايننق ..
ايام الانجيلية ..وبيوت الطوب الاحمر والنملي ..بيوت لاتطن بها مكيفات ولاتعاني من الانسجام..
برندات السكه حديد وكبر يبحري القديم ..
حي الوابورات والاملاك واحياء المسلمية وابروف ..
كرومة وود البنا والخليل.. |
ترعبني ايضا كلماتك المتأهبه ابدا للانطلاق فوق بؤبؤ خيالي الذي يرمقه -هو- بحب عصفور طار الف عام وسط الريح و العواصف حتي يجد وطنه في صدره...
بعدين ياخي زمن التلاتينات... زمن ليس لنا فيهو لا يد لا كراع لا شامة...
جدي-في الزمن داك- كان لسه في حالة مناوراة مع حبوبتي عشان تخلي نومها خفيف و يسعو في قصة جيبة ابوي... يعني ابوي كان لسه مااتجدع في مدني وحدائق ام بارونه و لم يرا طرف فستان امي و لم يخطر بباله انو سيتزوج احدي حسان مدينة بحري...
القصة ما معقده كما تعتقد...
... فقط ابحث عن احساس جميل يعاودني كما الشجن..
لمن اجي مارة بمنحني حلة حمد وما وراء قصر الصداقه و كبري بحري و قبة الشيخ خوجلي....
قليل من اشجار الجهنميه..
ينعش ذاكرة الشجن...
قليل من الشاي بلبن المقنن...
ينعش قلب الشجن...
Quote: تماما زي ريدتك الخيالية دي ..
ليس من حقيقة فيها سوى انها خيال.. |
اعيب عليك اتهام ريدتي بما ليس فيها...
لا تقل لي ذات عقلانيه و ذات حقيقه.. ليس ثمة ما يدعي بهذا...
فلبهاء الذي عشته مع القمر -ذات خيال- يعادل عمرا مستقبليا ضوئيا في كوكب آخر ... يعادل الماضي الاذلي لكوكب الارض بأكمله...
هو امتزاج الازمنه...
فكيف انسي و اتقاضي عن ذكرياتي الآتيه معه؟؟
لمن يقولها؟؟
و هل هناك فعلا من يستحقها؟
لا اريد ديك و حمار الحكيم...
لا اريد بومة يوليوس قيصر ..
لا اريدشجرة أليس التي تقود إلى بلاد العجائب...
فقط اريد ظلا.....
يا ساده....
هل تعني لكم شيئا هذه اللغه...
ام تراكم مثله...
ستقرأونها دون ان تقرأوني....
تاني شي....
شكرا علي الغنيه ... فكم هي جميلة...
ففي حضور الكابلي.... وحضور الانتشاء..
يصبح لـ المطر... معه...هَوَس آخر !!
انا ماشيت....
|
Post: #99
Title: Re: وبعد ضحكة قصيرة واصل جبريل
Author: المسافر
Date: 11-17-2005, 02:54 AM
Parent: #98
Quote: ... فقط ابحث عن احساس جميل يعاودني كما الشجن..
|
ومازال البحث جاريا...
والأضابير المغبرة من يفتح صفحاتها..
فقد أبعدها التقادم من أجنحة التحلق في المحاكم وإشغال بال القضاة وحضرات المستشارين..
ما عدا قبرتي الجميلة التي تعودت نكث البذور التي أخفتها الأعاصير لزمن ممطر في إحدى سهولي فإن السكنات ترتاح لإنقطاع رجل عابر أو ساري يعاقر وعثاء السفر
من لها تلك الحزم الأوراق يا إسمي المشار 1ليه بالخطوط الحمراء من تحت السطور
من يقضي لي بالبراءة الناجزة..
أو يحفظ القضية لعدم كفاية أو قل (إنبلاج) الأدلة..
دع البحث يجري...
|
Post: #100
Title: Re: وبعد ضحكة قصيرة واصل جبريل
Author: DKEEN
Date: 12-09-2005, 03:08 PM
Parent: #1
اذا كوني بديل عيني وقولي لي كيف بدت لك الظلال على النيل الازرق
|
Post: #101
Title: Re: وبعد ضحكة قصيرة واصل جبريل
Author: DKEEN
Date: 12-10-2005, 11:13 AM
Parent: #1
كوني بديل عيني حينها وقولي لي كيف بدت ازهارها في بدايات الشتاء
وكم طال الزمن وماالتقينا...
|
Post: #102
Title: Re: وبعد ضحكة قصيرة واصل جبريل
Author: DKEEN
Date: 12-11-2005, 06:44 AM
Parent: #1
| Quote: كم من الزمن تظن سنكتب في هذا المنبر؟؟ |
كم ياترى ؟؟
قد طال الزمن وما التقينا !!
اذا كنا سنظل صديقين طوال النهار وحبيبين في الليل .. فمتى سنتزوج ؟؟
( دكين الحسن - من كتابه حد الريد)
|
Post: #114
Title: Re: وبعد ضحكة قصيرة واصل جبريل
Author: DKEEN
Date: 03-15-2006, 03:44 PM
Parent: #102
رجل في مكان لايدوم وامراة في مكان دائم..لا الرجل في مكانه الآجل يرى، ولا المراة في دوام مكانها ترى..
ليس ثمة من راى .. انما القلوب شواهد...
شواهد رات عبر اشواق نسجت بين المسافات ..
مسافات طالت فلما عز المزار رات الاشواق ما لايمكن للمحبوب ان يرى ..
ان العوالم لا ُتصنع من اناشيد اشواقٍ تنسج عبر المسافات بخيالاتٍ وطيوف..
وان للدنيا وملماتها جبراتٌُ تحيط بنا فتجعل السهل صعبا ..
ليس ثمة ما ُيقال ..
انما قد ضيعتنا الغربة والجغرافيا .. ومعايش العَـقـاب ..ومالا ُيرى
عميق معزتي ..
|
Post: #104
Title: Re: وبعد ضحكة قصيرة واصل جبريل
Author: DKEEN
Date: 12-22-2005, 07:15 AM
Parent: #1
اللنك الاول التقديم فيهو انتهى يا فردة ..
اللنك التاني ما بوديك حي ..واحسن تبعد منو ..
من واقع خبراتك يا ظريف ناس اللفت هانزا كيف؟؟؟
|
Post: #105
Title: Re: وبعد ضحكة قصيرة واصل جبريل
Author: Tabaldina
Date: 12-22-2005, 07:30 AM
Parent: #104
..
.
سلام ..
طبعاً قريت اسمك فى الردود قلت يا ربي
حيقول شنو ؟؟
ما علينا توقع لم يصب وباك تو زى سبجكت
اللينك الاولى انتهى حكومياً ولكن الوكالات لا زالت..
وللاسف ضربة الحظ تاتى مره وقد اتتك وضاعت .. وبالمثل فعلت معى ذات مره
من المرات..
قالوا الطمع ودر ما جمع ما تقدم مرتين .. سمح
اللينك التانى أنت لو وقعت يمكن تقع فى النيل الأزرق
وتتم الباقي كدف دف أو فراشة.. الدناقلة عواميين ولن يخذلك الإزرق الهادر..
أماأنا فقد قاطعت المسافات القمرية والسفريات السماوية وكذا الآحلام الوردية
ناس اللفت هانزا ابعد منهم .. ود لادن والزرقاوي
حايمين فى الأجواء ..
أحى فيك روحك الظريفة ..
سلاموز
|
Post: #106
Title: Re: وبعد ضحكة قصيرة واصل جبريل
Author: DKEEN
Date: 12-22-2005, 08:03 AM
Parent: #1
| Quote: الدناقلة عواميين ولن يخذلك الإزرق الهادر |
انا ود جزاير.. لكن عايز اموت فيهو برضو ...
كما وابشرك ياظريف خالص..
روحي الرياضية في الحاجات دي سلبة .. وما عندها حد ..اقدل ساي بس ..
|
Post: #108
Title: Re: وبعد ضحكة قصيرة واصل جبريل
Author: Tabaldina
Date: 12-22-2005, 08:31 AM
Parent: #106
..
.
الظريف الجهنمي ..
ولها تفسيران ..
كم تمتعنى ردودك يا فتي..
| Quote: انا ود جزاير.. لكن عايز اموت فيهو برضو ... |
كنت فاكرك ود بحر .. طلعت من الجزائر ..
أيهما الازرق ام الهادر!!؟
اى ول قف يو اهنت :
وما حب الديار شغلن قلبي
ولكن حب من سكن البحارا
أى حد حد القيف ام حد الريد !!؟
وأخيراً
قدلة يا ابا الحاج حافى حالق !!؟
من فيتح للمزالق ..
أخراً..
انت زعلت يا دكتوووور!!؟
هل سمعت اغنية البنات ..
دور بينا الولد دا ..
احرق الجازولين يا الوابورات ...جاز
مش قلنا
No hard feeling
TC of ur heart
am outtttttt Cu
|
Post: #107
Title: Re: وبعد ضحكة قصيرة واصل جبريل
Author: DKEEN
Date: 12-22-2005, 08:09 AM
Parent: #1
Quote: ناس اللفت هانزا ابعد منهم .. ود لادن والزرقاوي
حايمين فى الأجواء ..
|
احرام علينا اللفت هانذا حلال علي ناس بن لادن ؟؟
احييييييييييييييييييينا ..
|
Post: #109
Title: Re: وبعد ضحكة قصيرة واصل جبريل
Author: خدر
Date: 01-02-2006, 04:31 AM
Parent: #107
Quote: كم ياترى ؟؟
قد طال الزمن وما التقينا !!
اذا كنا سنظل صديقين طوال النهار وحبيبين في الليل .. فمتى سنتزوج ؟؟
( دكين الحسن - من كتابه حد الريد) |
دكين
تاباها ممعوطة .. تاكلها بي صوفها
كل سنة وانت طيب ياخي
|
Post: #110
Title: Re: وبعد ضحكة قصيرة واصل جبريل
Author: خدر
Date: 01-02-2006, 04:32 AM
Parent: #109
سكينة
كل سنة وانت طيبة
وايضا من اجل رفع بوست جميل
|
Post: #111
Title: Re: وبعد ضحكة قصيرة واصل جبريل
Author: Mohammed Elhaj
Date: 01-18-2006, 10:09 AM
Parent: #1
*
|
Post: #112
Title: Re: وبعد ضحكة قصيرة واصل جبريل
Author: Tabaldina
Date: 01-22-2006, 09:13 AM
Parent: #1
..
.
مقاطع ... منك واليك ..
عصفت ريح .. والموج إتهدم
ولاحت آفاقي غيوم ..
محجوب سراج
×××
وقال لي لا بعدي عرفت ولا قربي عرفت ولا وصفي كما وصفي عرفت.
وقال لي أنا القريب لا كقرب الشيء وأنا البعيد لا كبعد الشيء من الشيء.
وقال لي قربك لا هو بعدك وبعدك لا هو قربك، وأنا القريب البعيد قرباً هو البعد وبعدا هو القرب.
وقال لي القرب الذي تعرفه مسافة، والبعد الذي تعرفه مسافة، وأنا القريب البعيد بلا مسافة.
وقال لي أنا أقرب اللسان من نطقة إذا نطق، فمن شهدني لم يذكر ومن ذكرني لم يشهد.
وقال لي الشاهد الذاكر إن لم يكن حقيقة ما شهده حجبه ما ذكر.
وقال لي ما كل ذاكر شاهد وكل شاهد ذاكر.
وقال لي تعرفت إليك وما عرفتني ذلك هو البعد، رآني قلبك وما رآني ذلك هو البعد.
وقال لي لن تجدني ولا تجدني ذلك هو البعد، تصفني ولا تدركني ذلك هو البعد، تسمع خطابي لك من قلبك وهو مني ذلك هو البعد، تراك وأنا أقرب إليك من رؤيتك ذلك هو البعد.
فرحات..
×××
على أن قرب الدار خير من البعد ..
شاعر..
×××
لاتستكين .. تواري وواصل الهروب
صوت مجهول عبر ذبذبات متقدة..
×××
مخـ عائد ــرج
عندما تتحقق الرؤيا .. تتلاشئ العبارات..
وواصل الوحي مسيرته..
ليتوارى أيضاً خلف ضجيج السيارات ..
|
Post: #113
Title: Re: وبعد ضحكة قصيرة واصل جبريل
Author: ShiningStar
Date: 03-14-2006, 06:50 PM
Parent: #1
الملح لا يزهر ابد....
بعد اليوم.... بعد الآن...
لا جدوي من ان أمر علي الشواطئ...
المواجهه من هنا, افضل, لقد تأكد... ما كان لابد التأكد منه...
بلسيارة الخاصه...بلحافله العامه... بلمرور علي الشواطئ راجله و اخيرا بلذهاب و المجئ ... بالمجئ و الذهاب...
من الان و صاعدا...
الموقع هنا... من هنا...
نعم يا... انا هنا و انت هناك...
لا..
هنا ايضا يواجه احدنا الاخر... بل ينظر كلانا في المرآة...
لابد أنهم اتصلو جميعهم ... الاصحاب.. و وديان... هاتفوني اولا.... راسلوني ثانيا...ثم تسألو فيما بينهم ثالثا...
متغيبه عن العالم...
ما الفائده من الاصغاءالي صوت الموج اذا كنا في خضم الهدير ولا بد من الجلوس عنده بدل الجلوس اليه...
كم تبقي لنا من الزمن؟؟؟
لعبة التوازن معروفه.. ذيد من الجفا... تزداد المسافه اتساعا... لاهوخيار ولا هو فقوس... عاشقه في كفه ومعشوق في شواطئ آخري.. رجل في مكان ما وأمرأه في المسيسبي ...
هل اخبرتك بما قالته حجه سعاد (مرة لا تهذب آي شئ يخرج من مخارجها)..
كانت الموية تقطع كثيرا ... فقالت... أسمعو... أقسم بلله العلي العظيم... وحات سيدي الحسن...
الموية دي ما بتقطع ساي كده... اكيد في سبب...
واصلت ...
منو فيكم في الزمن دا... ولا حياء في الدين .. برقد مع مرتو مرتين في الليله؟
منو منكم ما عندو ملف عند دكتور في عياده خاصه او عامه او مستشفي.... الخواجات ديل ما هينين .. كل عرق فيكم موصل للبنتاغون بواسطة خزانات المويه....
بعدها التفتت لنجاة .. (مرأه خمسينيه...ما متزوجه...فردة حلقها_اكسسوار_ راح منها)...
نجاة سيد (بحدة).. ما تمدي فينا قدومك دا... ك ... ام الحلق ... و حريقه في الريالات و الدولارات .. امشي اشتري ليك حلق دهب عديييل.....
قومي يا نهال شغلي لينا شريط .. يا رايع جفيتني و انا ضايع...
اندهشنا انا و نجاة و ضحك الآخرين...
هل تعلم ان كل مره يهم احدنا ان يقول شيئا... يشعر الآخر.. بأن لا ضرورة لذلك.... ما الفائده من تبين اصوات الاصوات .. اذا كانت كلها تحمل الي نفوسنا معني واحد...
قال احدهم ..
نظره.. فأبتسامه.. فكلام.. فموعد.. فلقاء...
و بيننا لم يكن الا هو.. الكلام... ففي الكلام كان الدفء أدفأ.. الامتلاء اوفر.. الطمأنينه أوكد... الانسياب ايسر اجمل.. كلما تواصل الانحدار في الذوبان و الفناء حصل التعويض...
بعزة و قوة الكلام اعلاه كنت اسكن فيه... فينتشلني من الوحشه و ينسيني وجعها... كان الاحساس _وقتها_ قوي.. بل راسخ بأن الشعور متبادل... كلما تم التسامي عظم الشعور بأن المستوي واحد...
لكن... لم يدري العاشق ان المعشوق اختبر توالدية و مدارية النون... و سعة افق الظاء و قوة حرارتها...و رنينية الراء و سرعة تردي الصدي فيها... فأصبحت النظرة التي قد لا تتعدي لحظات قصارا.... الفصل ....
بين جناح و جناح هناك طيران...
اظنني حلمت قليلا اكثر... اكثر من الحلم..
مااسم حبيبتك؟؟
كيف كانت عيناها؟؟
امازالتا جميليتين؟
ممن آخذ حكمة اليوم؟؟
هل حط عصفور السعاده علي حافة شرفتكم؟؟
هل تعتقد ان العصفور اعلاه سيحط علي الكتف و يغني لك و لي ولجار النبي كما نتخيل؟؟؟
انا شخصيا لا اثق كثيرا في السعاده.. انها آتيه هاربه منفلته كلما اردنا القبض عليها...
نعم...
هي هكذا...لا تحط علي الكتف و تغرد.. انها تظل علي حافة الشرفه.. هنيئا لك و لكل من لهم شرفات.. فانا لحظي الاسود الهباب لا احتكم الا علي شباكين التاني مقفول حداشر شهر...
ما علينا...
لا احد يأتي بعد ان يجئ الاخير....
مازال المسجل يصدح بي...
قال لي كيف اصبر و انا جمري ذايد....
كيف انسي الغصن المن طبعو مايل...
اذن الوداع قلبي و حبيبي...
اهلك براي الحير طبيبي ...
طار قلبي منـــــــــــــــــي...
فارقني حبي ارتاح يا رقيبي..
يانجوم سعدي اتلاشي غيبي..
طار قلبي مني و قال ماهو عايـــــــــــــــــد...
ناظرة البحريه سابقا...
س.ع.ع
|
Post: #115
Title: Re: وبعد ضحكة قصيرة واصل جبريل
Author: ShiningStar
Date: 03-30-2006, 05:50 PM
Parent: #1
حديقه عامه...
نهاية مارس ۲۰۰٦...
عشق ما لا يمكن ان يكون...
للشواطئ مساؤها صيفا... من محاسنها ان لا نكون فيها...
ليست هذه المرة الاولي التي ازور فيها الحديقه العامه.. في مدينتي الصغيره... اجيئها زائره من حين الي حين... لكن هذه الحزه اريد ان اقيم فيها الصيف...
سمعت من يقول انها شفافه مثل كأس البلور....
رنانه....
جبل لكل صوت...
كنت ادري ان شأنها شأن حدائق هذه البلاد... نجيله ســـــــــاي...
لكن... هي اكرم و اقرب الي الحشا من شواطئ هذه البلاد صيفا... لا تجد فيها لحم مجدع اكوام اكوام ايما التفت... رجال علي نسوان...لحم و شحم.. و شحم و شحم...
قال البيكيني قال ...
عرفت من جاء للشواطئ صيفا ليكتب شعرا.. فلم يتعلم حتي لغة الاندايات... و من جاء ليرسم فلم يعرف حتي كيف يمزج الاوان...
اهل هذا الساحل.. يترددون علي الشواطئ ليخسرو كل شئ من أجل ان يكسبو لا شئ... يراهنون بأسفلهم علي اعلاهم الهش...
حضورهم في العري... المريسه....و البنقو... فوضي...
ترتعش اياديهم ان امتدت الي كأس... و يتساقط رماد سجائرهم دون ان ينفضوه... رائحة صباحاتهم تشي برائحة لياليهم... (حاشاكم)تفوح منهم رائحهالخنازير اول ما يبللها المطر...
يغامرون من اجل ان يملكو او لا يملكو... لم يعد لديهم ما يخسرونه...
يتضألون كل يوم....
اجاركم الله ...يتوزعون بين من يعرفونهم و من لا يعرفونهم...
و في الصباح لا يصحون الا ليمارسو بلادتهم... لا يذكرون شيئا الا نبض افرشتهم...
عليه الحديقه العامه هي خير السبيل....
كتبت ما مزقته في يأس
كنت اكتشف لأول مرة المادة الاولي في قانون الحياة...
"ان مصير الانسان انما هو خلاصة تسلسلات غبيه... لا غير.."
عاد هو الي الذاكره... و رحت اتسأل فجأة... اين يمكن ان يكون هذه الايام....
في اي شارع يمشي؟؟
هل مازال يأكل سلطة خدرا طماطمها مقطعه علي شكل قلوب؟؟
دنيا....
لسبب او لآخر ..كلما احببناشخصا... نعجب به و نريد ان نشبهه.. فنكثر من الجلوس اليه.. الخروج برفقته ... الظهور معه... كأننا نعتقد في اعماقنا ان الجمال و الجنون و الموهبه و كل الصفات التي تبهرنا فيه قد تكون قابله للعدوي و الانتقال الينا عن طريق القرب....
سفسطه غبيه...
أدري...
ما أجمل ما كان بيننا...
قال احدهم ... لا تبحث عن الجمال... لأنك عندما تجده.. تكون قد شوهت نفسك...
عليه.
بحري... مدرسة الاميريه بنات...تالته عام...
اواخر العام الدراسي... امتحانات ... فرقه (بضم الفاء)..
كنا كلنا يعلم ان المجاميع و رجل في مكتب قبول ما سيفرق بعضنا عن بعض... عليه قرر البعض منا (من محبي الدفاتر و كلمات الذكري) ان يبتاع دفاتر اللملم فيها ما يستطيع تلميمه من ذكريات تلاته سنين خلت....
كان دفتري _البمبمي_ اكثر جمالا (او هكذا ظننت) من خط يدها...رشا... صديقه عزيزه ومن اوئل الكاتبين في الدفتر... بعد ان رأيت ما كتبت من كلمات جميله قررت ان اقطع الصفحه بأكملها... و اعيد كتابة ما كتبته هي بخط اقل بقليل في شناته من خطها...
يوم يومين مرو... و اديت نفس الدفتر اعلاه لصديقه اخري....
كدا كدا الدفتر وقع في يد رشا مرة اخري....
قلبت صفحاته... لم تجد صفحتها... فقط صدي كلماتها...
كانت الصديقه الوحيده التي لم تكن المجاميع و مكتب القبول سبب فرقتنا... وانما صفحه في دفتر بمبي... مكتوبه بي خط عادي... و غباء كان و مازال....
ليت الزمان يعود...
فما هكذا تقاس الاشياء... فلخط الجميل ليس هو كل ما تمتلكه الدفاتر....
ما أجمل الذي لم يكن...
قال لها.... يا علويه .. لدي كلام طويل.. تمنع ظروفي من قوله...
ملأت علويه الدنيا بأبتسامتها و تمتمت....
ويحك... المرأه تقرأ كل ما في قلب الرجل... فما حاجتها لسماعه...
سأنتظرك...
و واصلت احتساء كباية شاي لبتون مع قطع الخيار....
غباء من نوع آخر...
ما أجمل الذي لن يكون..
و ضعت القلم جانبا... و قلبت الرساله نفسها في يدي...
كنت اشعر انها تحمل شيئا قد يفاجئني... و قد يعكر مزاجي و يشرع الباب للعواصف المتأخره عن مواسمها...
فتحتها...
فلا داعي لمذيد من العذاب ...
و هكذا كانت ... فقد قرر الكاتب ... قتل المابين حسب الاصول...
بجراة كي بورد متتاليه... و دعس send
كم من مرة قرأتها... بأحاسيس جديده كل مرة...
اكثر من سؤال ظل معلقا في الحلق...
اين ينتهي الخيال... واين يبدأالواقع...
اين يقع الحدالفاصل بين الرمز و الحقيقه...
هاهو كل شئ ينتهي كما جاء من خارج الزمان... و انا بين الصحوة و اليقظه...
جالسه بذهول في كنبة... في حديقه عامه... اتسأل... هل راسلني حقا في ذلك الصباح ام اني حلمت....
لن اعودللعمل يوم الاتنين... ولا الصباحات التي تليه... تلفنت و راسلت مديرتي بأن تسجل استقالتي... بدون تبرير... فلتبرير ليس من اختصاصي... فأنا لم اعد اجيد ممارسة الاتيكيت و نظرية "ان كان عندك عند الكلب حاجه .." فوق دا و دا... اكره المجاملات الغبيه و قصص الصيف...و افلام الوسترن و الشوينغوم....
حريقه فيهم من هنا للبنتغون....
و بين كل قطار و قطار.... قطار...
و بين كل ريده و ريده... مريود...
و ان نظل اغبياء.. بعد ان ورد اسمنا في قائمة الاغبياء بلا حدود...غباء متواصل....
الي متي سنكتب هنا؟؟؟
اليوم !!
س.ع.ع
|
Post: #116
Title: Re: وبعد ضحكة قصيرة واصل جبريل
Author: طيفور
Date: 03-30-2006, 10:49 PM
Parent: #115
العزيزة عشة كشكوش (سولي)
كل ثنة وانتي بالف خير..
متاخر ثتة يوم...؟؟
أرجو ان تغفر لي آخر لوحاتي
(نذور) 17 فبراير 2006
مواد متعددة على كنفاس
اهديها اليك مع تمنياتي القلبية
بطول العمر والعافية
حمدان ابو ضراع (هيثم)
|
Post: #125
Title: Re: وبعد ضحكة قصيرة واصل جبريل
Author: ShiningStar
Date: 11-11-2006, 11:57 AM
Parent: #116
طيفووووووووووور ....
الشوق فوق الوصف ....
وكونك تتذكر يومي ... دا ان دل انما يدل علي انك فته حدود الروعه ....
شكرا يا رااااايع ....
نفيسه بت عوض الجيد قت ليك ما تنسي ترسل القروش ... و برمودتين للخزين ....
|
Post: #117
Title: Re: وبعد ضحكة قصيرة واصل جبريل
Author: alin
Date: 03-31-2006, 05:21 PM
Parent: #115
Shining Star
البت شجر الصندل
"ازيك يا عسل"
جملة بتضحكنى رغم سخافتا..بتذكرنى كمسارى الدفار وهو بيحاول يلفت انتباه صاحبتى السمحة ام عيون ملونة, اظنو افتكرا مصرية وهى تصرصر وشاها وتتلفت لى " انا تانى اباريك ولاامشى معاك حتة!!!" وانا بين عيون الكمسارى و محاولاتو المستمبتة لى تسميع كل الكلمات المصرية والاجنبية السمعا فى حياتو و بين منظرها وهى كاشة....بكون متا من الضحك..
ماعلينا.
مش اتفقنا فى بوست "عشرة سنين" انى لما تكتر الهموم ماامشى انوم...اها الحسرة و وشوفة مساؤى الشواطئ بس بدون غزل فى البلور وجواب الاستقالة تسميو شنو..
يا حبيبة ..مافى كلام ببرد حشا الجوف..خطاوى ولازم نمشيها...اكتبى وااااضحكى على قدر ما الزمن المكلوج دا يضحك, وماتنسى تودعى النهايات
كدى ارجعى الشاطئ تانى, ادى ناس الساحل فرصة تانية..ايمكن they charm youالمرة الجاية فى كتابات /ذكريات عايزة مساحة اكبر....ووقت اقل (لزوم الدفن واستقبال بدايات جديدة)
كملى بي ايمان انو الخير فيما اختاره اللة,التاءخير والتطويل والارتطام ما بيخدش فرح الوصول.
فى غنية او قصيدة كنتا شابكة فيها لما زمنى كان فى حتة بتشبه زمن اخر مارس بتاعك.
علاء سنهوري يصدح شعرا .. البت اشجار الصندل
|
Post: #126
Title: Re: وبعد ضحكة قصيرة واصل جبريل
Author: ShiningStar
Date: 11-11-2006, 12:03 PM
Parent: #117
كم في الدنيا من اشياء تتحدي ناموس الانسان....
Alin...
ويين يا غاليه... القابله كدا علي حسب ما تدوري.... قولي امين ...
"و ما تنسي تودعي النهايات" ... (Alin)
اقول ليك النصيحه ولا اكضب عليك... حكمتو شريفه... لمن النهايات تجي انا قطع شك بكون في الحمام او نايمه ولا شايلاني حوبه...
I always seem to miss it....
بقيت علي ايمان كامل انو ذي ما الدنيا عباره عن مؤخره .. الاشياء عندي عبارة عن اشياء معلقه لا بداية ولا نهايه لها....
"كدي ارجعي الشاطئ تاني,ادي ناس الساحل فرصة تانية".. (alin)
اديهم الكوووووت ديل.. الله يهديكي بس...
المهم..
عادت بوادر الشتاء... عليه سأعود للشواطئ قريبا...لأعاود البحث عن ما تبقي من الفطره و بكارة القلب....
كدي ورينا اخبارك شنو و الشواطئ كيف نواحيكم...
عايني... سلمي علي البت ام عيون ملونه و اسأليها لي عن اخر الخلطات و التساريح و كدا...
____________________________
|
Post: #118
Title: Re: وبعد ضحكة قصيرة واصل جبريل
Author: DKEEN
Date: 06-29-2006, 01:24 PM
Parent: #1
تم دور وادور
عم نوره شال
فات الحلة نور
زي بدر التمام
الحسود يتضور
ناره ماكلة لسانة
كله زور ومزور
زي بدرالتمام
هز شوقي وتور
يانديمي اذاى
جرحي المخفي غور
زي بدرالنمام
يا قليب اتجبر
قوم ورينا كيف
الكرام تتصبر
زي بدر التمام
نحن ما بنتعبر
النفوس ان حبت
تستحي وتتكبر
زي بدر التمام
ماك خبير اتخبر
في الزمان الفات
والجديد إدبر
زي بدر التمام
اوعى لا تتشبر
هل رايت لك عاشق
بالغرام اتنبر
زي بدر التمام
نحن ما بنطفر
ما بنهاب سفيه
إلا ما بنتزفر
زي بدر التمام
قولو لي البتنفر
ماشالن قناع
المعاك تتوفر
زي بدر التمام
يا زميل اتشطر
شن بتشوف حداك
إلا الحور مبطر
زي بدر التمام
يبقى يومنا مطر
ماله الكون دهين
والفريق معطر
زي بدر التمام
النحر مغمر
والسباتة حارة
والمجال مضمر
زي بدر التمام
الشعر مخمر
يرشح كله ند
عردب المجمر
زي بدر التمام
قام محمد بشر
هز فوق تيجانن
سل سيفه وكشر
زي بدر التمام
قول معاي واتفشر
نحن سياج عروضن
نحن يوم المحشر
زي بدر التمام
ياحسن اتذكر
طيب ليلتنا ديك
والصباح السكر
زي بدر التمام
المدام ما اتنكر
لامن ديكنا صاح
فوق رؤوسنا اتحكر
زي بدر التمام
كل شي مفسر
مافي شي غريب
والعسير ميسر
زي بدر التمام
مافي عين تتحسر
دام فرحنا داك
والحسود اتحسر
الى علوية كوشك كوشك في غيابها المبرر..
حين يغنيها الكابلي فانها تمطر ..
|
Post: #119
Title: Re: وبعد ضحكة قصيرة واصل جبريل
Author: ajaj
Date: 06-29-2006, 04:07 PM
Parent: #118
اخيرا واصل جبريل ضحكته
(وش فرحان)
مليون مرحب برجعتك وتاني ما طولي الغيبة
ممكن نتعرف واسجل اعجاب بجمال كتابتك
اسمي بت عجاج يعني فيميل
|
Post: #120
Title: Re: وبعد ضحكة قصيرة واصل جبريل
Author: wedzayneb
Date: 06-29-2006, 08:01 PM
Parent: #119
Shiningstar
أو
سكينة:
سلام!
أتابعك منذ كنت تكتبين باللغة الانجليزيّة في منتدي: sudan.net للنقاش.
انت كتّّابة بالحييييل.
و في دواخلك مشروع قاصّة كبيرة.
تعرفي يا سكينة، دارجتنا السودانيّة فيها جماليّات تفوق الوصف. الطيّب صالح كان أوّل من قدّم
لغتنا الدارجة العربيّة السودانيّة في اطارها الأدبي الي مصاف عالميّة و عربيّّة. و قد انبهر النقّاد
العرب و غير الغرب الذين اطّلعوا علي أعمال القاص السوداني: الطيب صالح ببلاغة دارجتنا العربيّة
السودانيّة و ما تشتمل عليه من أوصاف مجنّحة. استعمالك و تمكّنك من الدارجة العربية السودانية،
أحيانابصورة أفضل مما يكتب الطيّب صالح نفسه، يدّل علي موهبة أدبية فريدة ينتظر بزوغها
القارئ العربي علي أحرّ من الجمر. و بمناسبة الاسم المحوري المستعمل في قصّتك- بسودانيّته
الصميمة: أم حقّين، أنا خالتي- حفظها الله- اسمهاالشائع: أم حقّين، و اسمهاغير الشائع: ليلي. و
هي لمّا تجاوز بعد الخامسة والخمسين من العمر.، والدها، جدّي من جهة أمّي، حفظه الله، حينما سئل:
لماذا سميت ابنتك: أم حقّين؟ أجاب:أنّ شيخ الطريقةالصوفية دفع الله العركي رزق بابنة وحيدة تعلٌّق
بها قلبه. و كان الشيخ دفع الله ميسور الحال، فخشي أن تظلم ابنته تلك في الورثة حينما يفارق
دنياناالفانية هذه. فقيل أنّه كتب وصيته في ذلك الحين و أوصي أن يكون نصيبهاتورثه من مال
مساويا لنصيب أولاده الذكور. القراّن يقول: " للذكر مثل حظّ الأنثيين " أها البنت دي بدل ما يكون
حقّها في ورثة أبيها سهما واحدا صارت تعامل كاخوتها و ستمنح بموجب وصيّة أبيها سهمين، أو "
حقّين " من ورثة أبيها. و قا م الخليفة دفع الله العركي من حينها بتسمية وحيدته: " أم حقّين " .
دحين وقع ليك مدلول هذا الاسم السوداني الجميل: " أم حقّين " ؟. و بالمناسبة، جدّي لأبي، أدام الله
عافيته، لا يزال " حوارا " للشيخ دفع الله العركي و من يخلفه علي سجّادته بحي الشيخ دفع الله بام درمان. أنا طبعا من الأجيال الجديدة, و لست " حوارا " لأحد.
طارق الفزاري
ود زينب
|
Post: #121
Title: Re: وبعد ضحكة قصيرة واصل جبريل
Author: خدر
Date: 07-24-2006, 02:28 AM
Parent: #120
سكينة
الاكل برد .. وين انتي
|
Post: #122
Title: Re: وبعد ضحكة قصيرة واصل جبريل
Author: المسافر
Date: 07-24-2006, 03:12 AM
Parent: #121
خدوري
تعرف من أيام وأنا كنت عايز أسألك
عن البنية سكينة
سكينة سكينة
وكنت عارف في ناس كتيرة مستنية تقرأ تلك الكلمات
أيوة في حتة من الكلمات
بتظهر في مخيلتي القعود عندما يزهج من من البركة
ويقوم فازع مع صيحة والعقال في إحد الساقين الأماميات
تلك القوة تتلبسها السطور
وتنتشر كأنها رنين مغناطيسي
لكن أحيانا تحجرني الأوصاف عند القيف
تحجرني المساحات عند السطر
تترقرق الأحرف كانها مرسلة من الشمس فتلقفتها السعفات
فما فضل منها لا يسمح إلا بذكرى مرور الوقت وميول نحو الغياب
البنية سكينة
سكينة سكينة
بعد أن اتخذت لها موقعا في حافلات الشعبية لا ندري أي محطة قد افسحت لخطواتها بالنزول
أو الركون في إحدى المحطات
لكن لن يطول الجلوس
فهناك عدد لا يحصى من الحافلات
ذهاب وغياب
وكثير من الحصى على حافتي الطريق
يمكن لوقع الخطى حظ يشغل البال شئ من فكر
أو قل أقرب للجروف وأخضر من اللوبيا أو جهنميات حلة حمد
|
Post: #130
Title: Re: وبعد ضحكة قصيرة واصل جبريل
Author: ShiningStar
Date: 11-11-2006, 12:29 PM
Parent: #120
طارق الفزاري ..... ود زينب ...
كل عام و انت بخير و القابله علي امانيك.... و انشاالله ربنا انورها عليك شقيش ما تقبل ... قول آمين...
اولا ...شكرا علي تجوالك و تصفحك لهرطقات طال بها و بي المطاف ...و نحن ابعد ما نكون عن الوصول الي قمم انت ختيتنا فيها....
دا شعرا ما عندنا ليهو رقبه .....
انا يا فزاري ...
في رحله من سته و تسعين لي حسي فقدت المنطق و بكارة القلب ... و علي قدر ما الشوق امد مديت ... و لم يبق لي الا السفسطه و تلاليف المنطق و علوم الكلام و نصايح حبوبتي زوزو الله يرحمها...
"تعرفي يا سكينة، دارجتنا السودانيّة فيها جماليّات تفوق الوصف..."
وحات المغرب دا ... كلامك دا مافي اصحا منو ... دارجتنا في النبذ لا تخلو من محنه ...
و لا تخلو من الاشياء الصغيرة العظيمة في معناها ... لا ادري ان كان الجفاف الجوي و جفاف حياتنا له دخل في كونيتها الحنينه دي ....
و بعد...
شكرا لتوضيح قصة اسم _ام حقين_ ... لكن اقول لك قول... بعد بت الشيخ دفع الله العركي و خالتك طيبة الذكر ليلي مافي وحده بتستاهل حقين.... هن الحق الواااااااحد دا مبعذقاتنو و مودراتنو كريمات و خلطات ....وحقن بووتوكس ..و غيرها من حماقات ... فما بالك ان ادوهن حقين ...
اخيرا ....
شكرا علي كلماتك الجميلات و حضورك الاجمل ...
|
Post: #129
Title: Re: وبعد ضحكة قصيرة واصل جبريل
Author: ShiningStar
Date: 11-11-2006, 12:21 PM
Parent: #119
بت عجاج....
عن سريره في صفاء الينابيع اعلنت كلماتك اعلاه....
تسلمي يا رايقه ....
"وتاني ما طولي الغيبة"(ajaj)
وحات اب حواجب ما بيدي ... بيني ما بينك كدا كنت عايشه لي حالة عوم فوق سطح المدينه ... مسحورة بلغموض الكامن خلف سذاجة الاشياء.. محتاره اتسأل... البحر دا متين حفرو؟؟ و ترابو وييين ودو؟؟ البيضه الاول ولا الجداده؟؟ لييه سموهو احمر شفايف ؟؟ ليه ما بمبي؟؟؟ هل مازالت الذبابةالرملية تضيف للديكور الخارجي للبشريه السودانيه كل يوم اضافات جديده؟؟ هل الحنين و عكه صحية؟؟
المهم يا زوله ... الجميل في الموضوع انك كتبتي كلامك السمح دا و انو سرانا جدا .... ما تنقطعي .. اكتبي لينا عن اي شي يجي في بالك...
الدنيادي ما تشوفيها كدا .. زايله و لئيمه ...
_______________________
|
Post: #128
Title: Re: وبعد ضحكة قصيرة واصل جبريل
Author: ShiningStar
Date: 11-11-2006, 12:17 PM
Parent: #118
من علويه كوشك كوشك الي عشي البايتات....
كل سنة و انت كما انت... زي بدرالتمام و الحسود اتضور ....
كيف الجماعه ..العلوم... و البرتكان ...
ان سألت عنا... نحنا علي ما يرام... كل سته في حته ... من البيت للشغل و من الشغل لزوغان الشارع ... و من الشارع لشطأن البحر و من الشطأن الي المنازل و من المنازل الي احلام التعويض ...
الحياة ما خزلتنا...
مواظبه في دورانها ذي ساقية جحا الشايلة من بحر عشمنا وكابة في بحر عشمنا بلا محصلة ....
عشر الزمن في العمل و عشر في هاي وي يربط نيو لندن بمدنية تاني علي بعد سبعه و اربعين ميل ... و التمنيه اعشار الباقيه ... تبدد .. ثرثرة ... شاي ... تلفزيون ...اكل ... نوم ... و حماقات آخري ....
و بعد ...
مشينا عيدنا علي ناس سعاد مرة الدكتور عبد الحميد... مرة جميلة الملامح جات من السودان قريب ..اتغدينا عندها غدا جميل ... سعاد ما ولدت و عبد الحميد ما عرس فيها... تحس بيها شايله الجميل ده لي عبد الحميد رغم انو ما معروف السبب من منو ... لكن هي مقتنعه انو السبب منها هي .... ما اصلو العقر _عندنا_ من النسوان... الراجل ما بقطع لامن يموت ...
و بعد مرة آخري...
لقد رمو طوباتهم و رميت ... لكن المحيط لم يتردم ....
سلوي باروكه رسلت مرسول لي حسن بقاله... قالت...
لا يهم ان نلتقي او لا نلتقي ... المهم أننا تحدثنا بحرارة اذابت حاجز الغربه ... الاسماء تنسي لكن ما دار بيننا من حوار فلا ينسي ....
الدنيا حلم ....
سماح بت الباش مهندس ... خلاس حددو عرسها يوم سبعتاشر تموز الفين وسبعه...
دا شمارنا ... كن عندك شمار ادينا...
و بعد مرة اخيره ...
الكابلي جميل و صوتو لا يخلو من شجون .... لكن في الأونه الاخيره .... مسجلنا بقا يصدح بي ...
حتيهو حتيهو الشره ... اقلبيهو قلبو البلا ...
سفيهو راجل المرة ... افكيهو عكس الهوا....
و ينتقل الي ...
عمك حسبو الشتت قصبو ... و دق الباب و جانا و مشيت ليهو حفيانه...
دمتم....
علويه ...
_____________________
|
Post: #123
Title: Re: وبعد ضحكة قصيرة واصل جبريل
Author: DKEEN
Date: 11-02-2006, 09:26 AM
Parent: #1
البنية السكرية دي
اما آن لها ان تطل تاني وتملا المكان اشواق؟؟
|
Post: #124
Title: Re: وبعد ضحكة قصيرة واصل جبريل
Author: ShiningStar
Date: 11-11-2006, 11:49 AM
Parent: #1
السلام عليكم ورحمة الله تعالى وبركاته..
كل عام و انتم تيبين تيبين ... لكم ولكل من في الجوار.. والقابله قاعدين علي اعتاب امانيكم...
و بعد...
شكرا لكل من جا و مشا... و من شخبت لينا في خشم الباب و مشا برضو..
معليش علي التأخير ...
لكن في الأونه الاخيره بقيت لا احسن التفكير كما ينبغي ... لخبته غريبه في الأشياء ... الشغل الجديد اظرط من القديم ... المدير الجديد قصير و ملتوت... ان سألته اضانك وين يؤشر علي يد الكرسي الدوار القاعد فوقو و كرشه تهتز...
وحات حواجبيني دي.. القبب الحايمه في البلد دي ما تحتها قعونجه خلي بشر...
الساعات محل ما تقبل تك تك... دق دق... تك تك ..دق دق.. دفعت بي _باقي_ المخيله في الهاوية... المحيط ذاد اتساعا ... الشوطئ و الحدائق العامه لسه فيها بواقي رفراف لا يرون ابعد من افخاذهم ...
آيييييييه ....
و ذي ما انتوعارفين .. الحريه وحدها ليست كافيه للسير في خط مستقيم...و المنفي هو السير علي خط آخر للحفاظ علي التوازن...
لماذاهذه الغربه اللعينه ؟؟
"ما الا الغربة تخلي ديار وتمشي ديار...
ماهو الليل...
والعشم المسروق ...
وزاد الشجون البنبحت ونفتش ليهو في بطن بيت النمل" ...(تبلدي)...
يا الله هوووووووووووي ...
|
Post: #127
Title: Re: وبعد ضحكة قصيرة واصل جبريل
Author: ajaj
Date: 11-11-2006, 12:07 PM
Parent: #124
يانجمة هوي كل سنة وانت طيبة
ومديرك كرشتو ارهل
والحيشان مكنوسة
والراكوبة مرشوشة
----------------
دحين جبريل ناوي يكمل ضحكتو ولا نسمع بيك في الاحلام
|
Post: #131
Title: Re: وبعد ضحكة قصيرة واصل جبريل
Author: ShiningStar
Date: 11-11-2006, 12:37 PM
Parent: #1
خدر ...
الآكل براهو البرد؟؟
البرد كتيييير يا فرده و السقط جا و الزيفه شارفت علي الوصول ...
بلمناسبه ... سكينه في مكتوبها الاخير لي عجورة قالت ...
العزيز عجورة ...
تحية عطرة و اشواق اكبر من الوصف ....
انشا الله طيب ...
و بعد ...
اولاد حميده بت اخت جار النبي شدو رحالهم الي شيكاغو ... انتشرو في اسواقها و تكاسيها... يبيعون و يشترون... بعد سنة من وصولهم ادو حصيلة عملهم لشخص قابلوه بلقرب من مطار اوهير... قال ليهم انه سيحضر لهم جوازات سفر امريكيه بعد اسبوع !!!
ام الحسن لا احد يعرف مكانها ... لكن واحده قالت انها رسلت وصيه مع الناير ود سعاد تقول فيها لزوجها حمد ود علوبه انها ستعود مثلما عادت عواطف نمرة و ستحضر له التلفزيون و جهاز ال DVD ...
اما ان سألت عني فأنا كما انا ... لم اصل بعد الي وجهتي النهائيه ... دايما علي أهبة سفر ...جالسة علي بقجتي في انتظار قطار لا ادري متي يأتي ...
و انا في انتظار الدائم اعلاه .. مازلت اعمل في نفس العمل و احتسي شاي ليبتون كل صباح مع قطع الخيار ... و بلليل امسح شعري بزيت فول الصويا المستورد من الصين....
وبعد ....
اخر المقولات التي سمعتها مؤخرا .... " لا تهئ افراحك "....
و من آخر الاغاني ... الفارقت ما لقيتها ....
اسعار البنزين في انخفاض ... الهاي وي مازال علي ما هو عليه..لا ذادوهو ولا نقصوهو خط ... الشجر خلاص عدم الصفقه.. اجارك الله تقول ضاربو مرمندي....
ما تنقطع ...
دمتم....
س.ع.ع
|
Post: #132
Title: Re: وبعد ضحكة قصيرة واصل جبريل
Author: ShiningStar
Date: 11-11-2006, 12:40 PM
Parent: #1
المسافر ...
كلماتك اعلاه كانت بمثابةالحجر الذي بددشكل سطح بحيرتنا... و صارت الدواخل تنداح دوائر من الابتسام....
و بين كل حافله و حافله ... حافله ضلت الطريق...
و بين كل طريق وطريق ... علامة تقول "مازال في الطريق بقية "
و السكك الحديدية خلت من فلنكات للأتكاء...
ملحوظه:
دايما بحس بيك رايييق و ايامك موغله في الساكوبيس ...
(ادامها الله نعمة)...
|
Post: #133
Title: Re: وبعد ضحكة قصيرة واصل جبريل
Author: ShiningStar
Date: 11-11-2006, 12:56 PM
Parent: #1
عندي احساس متعاظم انو مداخلاتي الاخيره فيها عدم نظام ملحوظ ...
اعذروني ...
_____________
لو فزته بي ال *Power ball ... اول شي حااشتري لي كي بورد عربي و قلمين ماركة عالمية... والباقي حأشتري بيهو طوب ...
*power ball = about $100 million's
*power ball = توتو كوره
|
Post: #134
Title: Re: وبعد ضحكة قصيرة واصل جبريل
Author: رشا سالم
Date: 11-11-2006, 07:03 PM
Parent: #133
العزيزة شايننغ استار..
ما تغيبي..
الحنين والمحنة والشوق مرات بيكتلوا الناس..
وفي ناس لما يموتوا بيجيبوا لناس تانيين احساس بالفقد ..
والحنين والمحنة والشوق ليهم..وبعد شوية بتذيد دائرة التاثير..
خلاصة الكلام : ما تغيبي !
| Quote: والباقي حأشتري بيهو طوب |
وانا حاردمه ليك ..! بس ما تغيبي..
|
Post: #135
Title: Re: وبعد ضحكة قصيرة واصل جبريل
Author: ShiningStar
Date: 11-11-2006, 11:42 PM
Parent: #1
سلامات يا رشا ....
تصدقي يامؤمنه انا لي اربعه سنين بحاحي هنا... كل يوم بجي,اتكئ وابحث عن شئ و كلام وناس طال شوقي لهم... بعرف احوال الناس الهنا اكتر من ما بعرف احوال يمني بت عمتي اصلاح.... الاربعميه و كمين مشاركه ديل كتبتهن علي كي بورد مسطح علي شاشة كمبيوتر صنع في الصين ... بعد سلة روح... لكن عن طيب خاطر ...
عليه
الغياب مبرر... الفرنجه ما بخلو للزول فرقه.... و المنفي استراحه نراجع فيها حسابات الزمن ...البحث عن سبب الاغتراب مازال جاري ...
كلماتك و كلمات كل من كتب.. وسودانيزاون لاين عموما... هي الشعاع الوحيد و الاخير الذي ينير ضلمة سواحل ساحره _ملانه تف_ بشر تعساء.......
عارفه احلي شي في ردك انك عرفتي انا دايره بلطوب شنو... و الاحلي مرورك الجميل ...
ما تنقطعي و اعتبري البكان بكانك ...كن جاتك زهجه فرحه و ما بينهما و غلبك التسويهو تعالي هنا طوالي... الراكوبه عامره و الحوش بت عجاج مواظبه علي رشو... اول عنقريب علي يدك اليمين حقي.. و السفنجات الخدر اللاتي برضو.. و احذر من انذر...
دمتم....
|
Post: #136
Title: Re: وبعد ضحكة قصيرة واصل جبريل
Author: المسافر
Date: 11-12-2006, 00:49 AM
Parent: #135
Quote: ليس ثمة من راى .. انما القلوب شواهد...
شواهد رات عبر اشواق نسجت بين المسافات ..
مسافات طالت فلما عز المزار رات الاشواق ما لايمكن للمحبوب ان يرى ..
ان العوالم لا ُتصنع من اناشيد اشواقٍ تنسج عبر المسافات بخيالاتٍ وطيوف..
وان للدنيا وملماتها جبراتٌُ تحيط بنا فتجعل السهل صعبا ..
ليس ثمة ما ُيقال ..
انما قد ضيعتنا الغربة والجغرافيا .. ومعايش العَـقـاب ..ومالا ُيرى
|
زينوبة
كما لا يمكن للمحبوب أن يرى
فيمكن له أن تنسكب أحرف ندائه إسما في مثل حروف هذا الإسم
وحتى تستمر الخيالات والطيوف أناشيد تعلو فوق كل صعب
أظل أنا أفتح كل الكتب
وأقف عند أول سطر
|
Post: #137
Title: Re: وبعد ضحكة قصيرة واصل جبريل
Author: DKEEN
Date: 11-13-2006, 09:06 AM
Parent: #1
المجتمِعون في المنتدى..
المأخوذون بملامِِِحك الحاسمة..
وصوتِك الصخرِي..
لايعلمون ان حديقةً ينبضً فيها الرذاذ
كفيلةُ ُ بِقتلِك!
من قصيدة لمريد البرغوثي-انت خُـلقت للبهجة..
|
Post: #138
Title: Re: وبعد ضحكة قصيرة واصل جبريل
Author: شادية الطيب
Date: 11-15-2006, 06:41 AM
Parent: #1
النجمة البتلمع كلامك سمح بالحيل يا بنية كتري لينا منه
وسيرة بحري القديمة بنات دي بمناسبة شنو ؟ عشان انا زاتي من بنات بحري القديمة
|
Post: #139
Title: Re: وبعد ضحكة قصيرة واصل جبريل
Author: الصادق صديق سلمان
Date: 11-15-2006, 07:34 AM
Parent: #1
Quote: النجمة البتلمع كلامك سمح بالحيل يا بنية كتري لينا منه
|
أبوفتحية
|
Post: #141
Title: Re: وبعد ضحكة قصيرة واصل جبريل
Author: Tabaldina
Date: 12-06-2006, 05:38 AM
Parent: #1
..
.
من حوش لحوش يابكرة ياريت غنواتنا طٌعم
والعالم خيط والقابض كان ذات مرة حلم
والرامي إنسان ما اتيقن شان الدنيا زمان قالتلو ابيت
وياعالم كون بالود مسكون .. كون حُرمة بيت
..
!!
|
Post: #142
Title: Re: وبعد ضحكة قصيرة واصل جبريل
Author: wedzayneb
Date: 12-07-2006, 09:22 AM
Parent: #141
Quote: طارق الفزاري ..... ود زينب ...
كل عام و انت بخير و القابله علي امانيك.... و انشاالله ربنا انورها عليك شقيش ما تقبل ... قول آمين...
اولا ...شكرا علي تجوالك و تصفحك لهرطقات طال بها و بي المطاف ...و نحن ابعد ما نكون عن الوصول الي قمم انت ختيتنا فيها....
دا شعرا ما عندنا ليهو رقبه .....
انا يا فزاري ...
في رحله من سته و تسعين لي حسي فقدت المنطق و بكارة القلب ... و علي قدر ما الشوق امد مديت ... و لم يبق لي الا السفسطه و تلاليف المنطق و علوم الكلام و نصايح حبوبتي زوزو الله يرحمها...
"تعرفي يا سكينة، دارجتنا السودانيّة فيها جماليّات تفوق الوصف..."
وحات المغرب دا ... كلامك دا مافي اصحا منو ... دارجتنا في النبذ لا تخلو من محنه ...
و لا تخلو من الاشياء الصغيرة العظيمة في معناها ... لا ادري ان كان الجفاف الجوي و جفاف حياتنا له دخل في كونيتها الحنينه دي ....
و بعد...
شكرا لتوضيح قصة اسم _ام حقين_ ... لكن اقول لك قول... بعد بت الشيخ دفع الله العركي و خالتك طيبة الذكر ليلي مافي وحده بتستاهل حقين.... هن الحق الواااااااحد دا مبعذقاتنو و مودراتنو كريمات و خلطات ....وحقن بووتوكس ..و غيرها من حماقات ... فما بالك ان ادوهن حقين ...
اخيرا ....
شكرا علي كلماتك الجميلات و حضورك الاجمل ... |
الأخت الجميلة: سكينة:
أعتذر في البدء علي تأخّري في الرد عليك. لم أطالع ردّك أعلاه سوي خمس دقائق خلت من الاّن.
دعواتك الجميلة بلهجتنا الدراجة العربيّة السودانيّة فتحت نفسي " made my day " و أعادتني للأيّام
الجميلة التي قضيتها بين الأهل و الأصدقاء بقريتي أم دوم، و السودان بأسره.
و الشيئ البقولي عليه هرطقات دا نحن عاجبنا بالحيل و عايزين منّه جرعات إضافيّة متواصلة و مركّزة.
و ذي ما قلت ليك، الأدباء المبدعين كحالك شيمتهم التواضع. و أنت ، بالفعل تملكين موهبة رفيعة و متميّزة في الكتابة الأدبيّة. اّمل أن تواصلي عطائك. و الإقبال الكبير علي بوستك هذا دليل مادّي صاذق لما أعني.
و تعليقك علي القصّة التي أوردتها عن الشيخ دفع الله العركي و إبنته: أم حقّين أضحكني كثيرا. هو بالله السودانيات بيعرفن و بيستعملن البوتكس؟ كل شيئ و لا البوتيكس دا. في تقديري أن المداومة علي إستعماله قد تؤدّي لشلل دائم في عضلات الوجه عند منظفة الحقن بالبكتيريا المخفّّفة المفعول.
طارق الفزاري
ود زينب
|
Post: #143
Title: Re: وبعد ضحكة قصيرة واصل جبريل
Author: waleed500
Date: 12-22-2006, 00:34 AM
Parent: #142
ياهاااااااااا سكينة ماذالت حيه....لا اقصد افعى بالطبع(عايشه)
ليك وحشة يا زوله ولى كلامك المدنكل واصلى البث
|
Post: #144
Title: Re: وبعد ضحكة قصيرة واصل جبريل
Author: sudania2000
Date: 01-18-2007, 09:50 PM
Parent: #143
تصدقي يا نجمتي الساطعة
بفتش حاجة اقراءها وانوم عليها
نكشت من صفحة 1 ووصلت الصفحة 12
ووجدتك
ولم اصدق ان البوست 2005
لم يتأرشف
وفرحت بيك
وهترشتك اجمل من كل ابداع
وشيري وبناديها وشتات
ايه الهناء دا
كل سنة وانتي طيبة
وسعيدة بيك
ولنا منك الرحيق والشذي
تسلمي يا معتقة البهاء
سودانية2000
الخميس 18-1-2007
الساعة عشرة مساء
|
Post: #145
Title: Re: وبعد ضحكة قصيرة واصل جبريل
Author: DKEEN
Date: 01-19-2007, 02:15 PM
Parent: #1
ان القائلين بان هذا المعبر جلب من الهند وسمك في ذاك المكان، قاصري النظر لامحالة..
باستقراء الحنين ودلالات الاغاني في شمال بحري والنهر عند المنحى..
فإنه من جهات الحنين جُـلب ..وفي غروب النيل الازرق تم سمكه ..
وحين اشتاق الناس الى جميلات حلة حمد وشمبات والميرغينة وعمومِ بحري مُـد اليهم ..
فوضع بين دفتيه..
فكان اول ماكان هكذا..
كما في صورته بالاعلى..
مغموسما في شفق المغارب..
لاتكاد- من شجون الناظر اليه- تتبين هيكله من سناء الشمس ومنسوب النيل و ظلال الاشجار على ضفتيه..
ظل الناس عليه يعبرون منذ زمانِ المحباتِ التي مضت بما مضت والى يوم الناس هذا..
عبره الغالبية من سكان الخرطوم بحري رقيقي الحاشية
مات المحبين ومؤلفي الاغنيات الخالدة والحان الاذاعة الاولى..
مضـوا واستقر بعضهم في حلة حمد والبكري وحمد النيل..
وانت قادم الضريح عند منحى النهرفي حلة حمد تراه وتتمنى ان لو كان العبور شيئا لاينتهي فلا تبرحه..
قال محمد محي الدين
(النسوة يدخلن تباعا
والضريح انفتحت منه الشبابيك يلملمن الزواراتِ
والاف من الطير الصباحي على بوابة النيل تحيي
حمد النيل..)
بشير عباس لايزال حيا امد الله في الحان عمره
الكابلي هو قائمقام شوقي الى كل شي..
بحري بها كل شي واليها المرجع وبها المقر...
اغنية عثمان حسين: انا مالي والهوى
ياربيعي ودنيا وازهاري ..
كيف تفلتت..
الحمد لله فكل شي لازال في كمالِ ترتيبه ومحباته..
الشوق دائمُ ُ مادامت الدمومة والمحبات بلا حدود
وكبري الحديد وحده ُيسيطر على حالات الحب والشجن..
|
Post: #146
Title: Re: وبعد ضحكة قصيرة واصل جبريل
Author: soghayroon
Date: 03-06-2007, 08:28 PM
Parent: #1
بوست بالروعه دى لازم يكون فووووووووق.
|
Post: #147
Title: Re: وبعد ضحكة قصيرة واصل جبريل
Author: celecon
Date: 03-07-2007, 08:30 AM
Parent: #1
وين ست البيت ؟؟
|
|