مولانا تيتا .. د. السراج .. والجميلة السفير ..شكراً مرة أخرى

مرة أخرى

تستقبلنا هذه العائلة الرائعة في ليلة جميلة إحتفاءاً بالدكتورة الخريجة

وكعادتها ابتسامتها لا تفارق وجهها الهادئ .. شكراً رشيدة على هذا الجمال

لكن .. تيتا طلعت برضو غتيتة ..


ووليد الفنان ..

والحضور المميز

الكرم الأصيل .. وريحة أمدرمان ..

بجيكم راجعة مع الصورة والصوت

وتفاصيل تانية

مولانا تيتا ، د.السراج والجميلة السفير ، وكالعادة العبد لله ، "الخريجة الدكتورة " المحتفى بها ، طالعة بي قد القفة .. براااااااااي برفع معنوياتي ، مش مافي زول معبرني ؟ أمانة يا تونة ما سكر عديل ، ده شنو يا بت العسل ده ؟ " الكلام هو بقروش ؟؟ "

بعيداً عن المزاح ، أتمني لو كانت الكلمات نجوم تعلق في سماء حضوركم الرائع الذي زاد اليوم حلاوة ، واضفى عليه ألق المشاركة الجميل ، لزينت بها جيد القصيدة ، وأهديتكم إياها شكراً وعرفانا ، فالشكر أولى بكم ولكم ، عبير ، اسماعيل ورانيا بابكر الذين شرفوا منزلنا في ليلة احتفال الأسرة الصغيرة بتخرجي من عنق الزجاجة إلى فضاءات تحمل كل ما هو تحدي .. تحدي لجميع القيم الإنسانية والسودانية النبيلة التي نحملها في دواخلنا ونسال الله عز وجل أن يوفقنا إلى مرضاته ، وأن يجعلنا من أسباب رحمته في الأرض ، والشكر موصول لبقية أفراد اسرتنا الكبيرة في المنبر الحر ، الذين أرادوا مشاركتنا الفرحة ، ومنعتهم الظروف ، فمن هنا ارسل لهم جميعاً تحية ود وعرفان ..

وراجين يا عبير ..

تكررت الدعوة ولم يشأ لي سابقاً (نسبةً لظرفي الخاص) التعرف
علي تلكم الروعة والكرم والبهاء إلا في تلك الليلة الخميسية
العامره بأهازيج الفرح والطرب إحتفاءً بالدكتوره الخريجة تونا
(نسأل الله لها مستقبلاً زاهر).

تعرفت علي تلك المجموعة المتناغمة أسرة د. السراج ، تونا أولاً
(عشان ما تزعل) مولانا تيتا والباسمة دوماً بفرح السفير،
فشكراً لهم وللإستقبال الذي جعلني أُحس بأنني في داري وبين أهلي

والشكر موصول للسبّاقة عبير علي البوست ونحنا في إنتظار
الملحقات، ولنا عودات.


إسماعيل حميم

خلاس جيت يا ود العمدة ؟؟ ما تسمع ليك اصلو حس عود حايم الا تجي تتشمشر ؟؟ يا سيدي الله يبارك فيك ، واتمنينا لو قدرت تشاركنا اليوم الجميل ده ، وسلامك واصل للكل باذن الله .. وشكرا ليك علي الطلة ..

سمعة الرائع ذو اللفتات اللطيفة .. التسجيل طلع قمة في الأناقة ، تسلم .. وأكيد لو فاتتك الأولى ، ما حتفوتك الجايات باذن الله ..وربنا يدوم الأفراح ..

عبير رجلينا ما ورمت واحنا واقفين في الصف ، صف في الرغيف ، وصف في الخدمة ، وصف في التسجيل للمجلس الطبي ، وصف في موبيتل ، وين انتي يا منقة ؟؟

Quote: سمعة الرائع ذو اللفتات اللطيفة .. التسجيل طلع قمة في الأناقة ، تسلم .. وأكيد لو فاتتك الأولى ، ما حتفوتك الجايات باذن الله ..وربنا يدوم الأفراح ..

أنتم من أسكن الفرح داخله
سنقترب علّ العدوي تصيبنا

الجمال ليس من التسجيل ...
بل في صوت وليد له مني التحية


لك مودتي


إسماعيل حميم

الدكتورة تونه


الف الف مبروك


وعليك الله تسلمي لي للعزيزة جدا تيته والسفير وللدكتور


وتحياتي لي يا عبير بت ابوي

الأخ الفاضل عبد الله بابكر ..سلامك واصل بإذن الله للسفير والدكتور ، بس تيتة للأسف حالياًفي الجزائر ، انشاء الله لما ترجع يوصل ليها سلامك كمان ، وتسلم ربي يبارك فيك وعقبال كل البتحبهم (ولو انو الواحد ما بيتمني للناس التعب لكن كدي خليها كدة)

تونا خلي الشفقة أنا ما قلت بجي راجعة

ياخي يمكن عايزة أجيب ليك هدية معاي ودايرة أعمل مفاجأة ما تخلينا على راحتنا وخلي الشلاقة

شفقة بت منو كده ما عارفة ...

بجيك راجعة تاني .. بعد ما أمشي للمهندس وأجي

عزيزتي اللطيفة عبير بمناسبة الشفقة وما الشفقة ، دفعتنا كلها مسمينهم كواسر شفقة ، اتخرجو الليلة ، تعالي شوفي المدافرة في صفوف التسجيل للمجلس الطبي ، لسة ما جا يوم القسم ، سمعنا منهم مجموعة مشو عرسو ، لسة ما طلعنا من باب المجلس ، سامعين اخبار الجزء الاول من التخصص ! اها قعدة ستة سنين مع ناس زي ديل ، بالله ما يسمع الواحد فيهم بي شي ، تلقاهو حارس ناس البيت زاتهم قبال ما يجو ! قامت جاتني انفلونزا الشفقة بي دربهم ، هسي ما مديت راسي كدة وسمعت الشمار ، وقفت في الباب اتاوق ، ياخوانا عبير خيري دي تعزم الناس وتقول ماشة تجيب البارد من الدكان ولي يوم الليلة ؟؟ واخش اخد لي خشم خشمين ، وامرق اتاوق تاني .. وبيني وبين نفسي ياخواني الضيوف ديل هسي يقعدو كدة وست البيت مافي ، يا شافع اجري الدكان شوف عبير دي ما يكون لم فيها واحد من ناس الدكاكين البيشبكوك اول ما تدخل "يا دكتورة انا ما عندي وجع قلب " تقرب تقول ليهو انشاء الله تموت بس تستغفر وتتحسبن ، يا عمو اديني عليك الله خليني امشي ... يا عمو الرحمة ياخي الناس راجيني .. يا عمو شغالة في جبل مرة ياخي خلينا نتفك .. في النهاية يقول ليك الحاجة دي مافي ! ولا النوع البيقعد يحكي ليك قصة حياتو ، بدل ما تجي تشيل بارد تشتري في النهاية بندول وترجع تنوم مغسة ! اها غايتو انا بمسك ليك الضيوف ديل لغاية ما تجي ، لكن وحاة الله القعدة بتغلبني ، كان لقيتيني مافي معناها مشيت جاي ولا جاي وبجي ، سمح ؟ سلمي علي عمو المهندس لغاية ما نلاقيهو انشاء الله وقول ليهو القعدة كانت ناقصاكم بشدة وكدة ..