عفوا ان قاطعت سردكما الموجع فمالي حرف جبار كالذي عندكما ولكنكما افصحتما عما في نفسي و ربما نفوس ملايين من ملح الارض السودانية ...فلتغشاكما سحابة افراح للعيد ينسجها اهلنا التعابة من امل في باكر بخروف او بدون خروف...
مودتي ابوبكر سيداحمد
Post: #5 Title: Re: ذبح الخروف مســــعود Author: محمد سنى دفع الله Date: 12-18-2007, 05:34 PM Parent: #4
نعوم وتوسي اسعد صباحكم وعيدكم مبارك تفرقنا المسافات والقلوب صاحية بالذكرى عيدكم مبارك احبكم
لمتين يدوم الحال والعين بقت زالََّّة بلدا كما المشلول لاشايلة لاخالَّة جسما عضامو هديك من الجلد طالَّة اتحكم الطاغوت والشرزمة الضالة
Post: #8 Title: Re: ذبح الخروف مســــعود Author: محمد مختار جعفر Date: 12-18-2007, 06:24 PM Parent: #7
والليله جانا العيد .. من بعد تعب وشقـا عنـيد .. مع الضل الوقف ياعيد والكل لملم وفات ياعيد .. لى أهلو يضحى وللذكرى والحنيه يعيد وحليلكم يا طافشين فى الغربه بعيد هل من عوده هل يا عيـــد ..
تهنئات كتار بالعيد يا منعم ويا خطاب وحنتلاقي، منتصرين أكيد بس خاطر الزمن لو طاب بناكل لحم صحي وبنشرب الشربوت وبنكتب بالفحم علي الباب جينا ولقيناكم وما لقينا أعداكم بس لازم نلف علي شلة الأصحاب أصحاب بعدد أشخاص الوطن ووطن مشرع الأبواب
اهايا منعم ياخوي خليك كدة في السليم .. خبر مهم : قبل شوية وفي احدي الفضائيات السودانية اياها جلس اربعة منهم بروفات وواحد منهم كان المهم الاهم وافتي في امر الضحية بان الامر بسيط ولا يحتاج الي هلولة ولا طبيب بيطري ولا يحزنون بس كل واحد يعمل كشف علي الخروف ولو شاف انو مزكوم وانفو جاري يقوم جاري و يحاول الي ان يجد الما مزكوم ولا انفو جاري .. اها يانعام يابتي ياكي الماشة الزريبة دغش ومعاكي كرتونة كلينكس ... اهم حاجةشخصية في هذه الكارثة النزفية والضحية انو انا واسرتي الصغيرة اها تاثرنا باجناس حولنا كتيرة وبقينا فيجيي vegie من زمان ..ولا نزفية ولا انفلونزا طيور بتهمنا .. ولينا كدة عقود من الزمان ما حضرنا عيد في السودان لكننا والله قلوبنا معكم (اضعف الايمان)
ياحليلو مسعود المسكين قهرهو قهر السنين وناس الدقون ركروا على سياسة التمكين عشرة فى المية كبرت كروشهم والباقى مهمشين فى مشاكل الدنيا العويصة تايهين والثورة ابت تطلع مالناس جعانين النيل جارى فى بلادهم وهم عطشانين قوتهم كملت وبقوا مشلهتين ياحليلنا وحليل مسعود المسكين
وكل سنة ياعبدالمنعم واسرتك وضيفوك وكل آل مسعود بخير
يا منعم الجزار الليلة بات مهموم ما جهز السكين فلسان جفاه النوم لا نفخة فى بمبار لا شم ريحة التوم ما شاف عطية عيد ما ادوهو منها كوم لا باع جلد فى السوق جلد الضحية هدوم يا شلة الأنقاذ و الله عيب الشوم
يا سلام يا عبدالمنعم يا خي نعم ضبح الخروف ابودقن الملوث بالنزقية مسعود..!! حتي الخراف في زمن الفجيعة جعلت لجسدها الذي كان فداء جعلت له مكانا للنزقية في زمن الطفابيع وحكم الكروش ... عيد سعيد وعام جديد ومسعود يحلم بوطن بلا سلطة ذات كرش ولا خروف به نزقية
Post: #23 Title: Re: ذبح الخروف مســــعود Author: Osman Musa Date: 12-19-2007, 00:02 AM Parent: #20
_ كان اللحم بالطش وفتيل فلير للرش والحالة كانت تش دهب المطامير داك بينور الشباك يوم عمتك تلقاك العيد بخيت وسعيد انشاء الله يابه عريس و يجى جردل الشربوت كبنلو يا البنوت .. كان البلد شبعان قبال يجو الكيزان والجيب فرح مليان .. باكر يعود مسعود بنشده وتر العود يرجع بلد للجود بلدا كبير ورحيم شبعنا اكل النيم .. .. كل عام والشعب السودانى الجميل الى حد الا موت بخير وعافيه وامان ..
زمن الرغبف شمسى و الفسحة فى التكسى زمن الخبيز مرصوص و الكفته و المحشى زمن الحلو المخلوط بالسكر المحروق و الدكوه و الطرشى ناكل لحم كيمان و نهضمو بالببسى زمن الغنى و مستور زمن الفقير مكسى زمن الحيط نفاج و البنبر الكرسى توب الزراق و فراد و ( الجيبة) و ( الماكسى) فى ( البورمان) السيرة و الشلة فى ( البوكسى) الحفلة بى ترباس يوم مرقة الجكسى .........
عثمان اخوى ياحليل زمن البلد طيبة زمن الدين سمح فى الحضرة والغـَيْبـَة وزمن الشيخ لهُ بين البشر هيبة شوف الشيوخ اليوم ماتحوشك الخـَيـْبـَة
Post: #28 Title: Re: ذبح الخروف مســــعود Author: Osman Musa Date: 12-19-2007, 02:54 AM Parent: #27
تاج الملك يرسم .. لون مدخل الخرطوم زمن الزمان كان زين .. قبال دخول الشوم زمن الكباب بريال والبامية بالشوال والجر ملان بارد والكسرة فى البرتال والمادح المداح مسح الدموع بالشال مسعود بعود يا تاج وبنلبس الشوتال خرطوم سلام وسلام بيحلها الحلال وبحلها الحلال .. يا جماعه العيد مبارك عليكم والعفو
..عيد بأي حال عدت (من) عيد بما مضى أم بخراف لذبح المساعيد؟ . .يا جماعه مسعود ده من ام بارح ..!! ..هنا وقال الكلام ..الفوق ده.. .لاكين اي زول عندو ..قافيه طاشه ..طلعا..فى العيد ده.. . .فمسعود معانا . .ولا شنو يا عمى مسعود .. . !! .غايتو . .
ياحليل زمان الناس والدين سلوك عادى فى البيت وجوة البص فى السوق وفى النادى فى المدرسة التعليم فتنا الخلق غادى وبى سلوكنا العام يترنم الشادى لا السينما كانت عيب لابنقفل الرادى لاقلنا داك كافر نادولو جهَّـادى لاقلنا داك فاسق لامفسدا بادى رغم الجراح فى الجوف كان البلد هادى وكان الامل فى الايد نيلا سقى ولادى ربـَّى الامل جنحات وفرَّ لى غادى وبقت البلد سجنا مساحتو حدادى واتحكم الطاغوت والمجرم السادى عسكر بنى لادن استعمروا الوادى
Post: #40 Title: Re: ذبح الخروف مســــعود Author: Osman Musa Date: 12-20-2007, 03:42 PM Parent: #39
شايف الخروف برجف خايف من البطرى يمكن يكون عارف انو المرض خطرى دى هى حمة نزفية اكعب من الجدرى ومعاو كمان اسهال بيسبب الفترى