إنتي زي فرح الأماسي ـ قصيدة جديدة

إنتي زي فرح الأماسي

إلى التي تعرف معناها دون الآخرين

شــوقــــي ليـكي مطــر حَكـَايــا
يـابـَــر ِقْ ضُـلـْـمَــة ْمِسَـايـــا
ديمــه طــــاريـــكي وأظــــّـنكْ
لسّـــه فــي الأشــواق مـعـــايـا
وديــمـــه بحـــلم بـــي خيالـك
يـــا قــمـــر نــَّــورْ سمــايـا
بــينــي بــيــنــــك لا بــداية
فيـــنــي مِـنـِّــك ولا نـــهايــه
بــس بحـــــبــــك يــــا حياتي
ولســــه حبـــك مــــا كــفـايه
ولو بشيــلــــك فــــي عيـــوني
أبـقــى لـي سَهَــرك مـِـــــرايا
وتـــبــقي لـَــىْ جـــنة مشاعــر
ألقـــى فيــهــا الـريـد برايـا
أصـلي مِنــِّـك وانــــتي مـِـنــِّي
زي بــَــردْ لـِـيـــلِـي ودفــايـا
وما خِـتـِـيـِـتـِـكْ لوْ لـِـقِـيـتـكْ
فـي زحــــــام النـــاس ورَايــا
ولسَّه من يـــوم ريدنـــا بَـقــَّـا
نِحـْــنــَـا فـــي نـــار الحِكايه
إنتــِـــي زيْ فـــرَح َالأمـــــاسي
لـَمــَّـــا يــِتــْحـَـكــَّـرْ أسَـايا
ولو مـَـشَيــت فـــي نار غــيابـِكْ
وزي لهــيــب الشـَّــوق هـَـوايـَـا
بلـْـقى بَعـْـــدَ الفـُرْ قــه ْ تاني
مـــــن طــرف طيــفـك مُـنـايَــا
لا فـُـرَاق يـمـْـنـَـعـْــنـي مِنـِّــكْ
لا و ِصَـــــالْ يـَـبقا لِــي غايــه
بــس بحـــــبــك يـــا حــيـاتي
ولِســَّـه حبـــك مـا كـــفــايــه
...............................
السعودية ـ ينبع البحر
السبت15/ ديسمبــر 2007
الموافق/6 ذي الحجة 1428

Quote: ولسَّه من يـــوم ريدنـــا بَـقــَّـا نِحـْــنــَـا فـــي نـــار الحِكايه

عزيزي د. محمد حسن

شكرا على (بيت القصيد) فكلنا نحترق
مودتي

Quote: بــينــي بــيــنــــك لا بــداية فيـــنــي مِـنـِّــك ولا نـــهايــه بــس بحـــــبــــك يــــا حياتي ولســــه حبـــك مــــا كــفـايه ولو بشيــلــــك فــــي عيـــوني أبـقــى لـي سَهَــرك مـِـــــرايا وتـــبــقي لـَــىْ جـــنة مشاعــر ألقـــى فيــهــا الـريـد برايـا أصـلي مِنــِّـك وانــــتي مـِـنــِّي زي بــَــردْ لـِـيـــلِـي ودفــايـا وما خِـتـِـيـِـتـِـكْ لوْ لـِـقِـيـتـكْ فـي زحــــــام النـــاس ورَايــا

الله على الروعة ..يسلم الاحساس ..

وتسلم مشاعرك ..

الشاعرة الرقيقة هند ... تحياتي

شكرا على إحساسك بالكلمات ففي صداه ، نعرف جدوى الكتابة
مودتي
محمد جميل

الشاعر الجميل محمد جميل كلمات بعبق الورد ونداوة الأزهار ورائحة الدعاش
يا سلام عليك ياخي إحساس عالي وكلمات ملحنة جاهزة , شكراً لهذا البوح الهادي .

الجميل جدا هاشم أحمد خلف الله .... تحياتي
في مثل شامي يقول (العالي بدو عالي) شكرا على إحساسك العالي ، ولأن شهادتي مجروحة في نصي فسأحتفظ بشهادتك ؛ لأنها ربما تضييء لي بعضا من طاقة النص التي تنعكس في تعبيرك وتمنحنى جدوى التعبير
مودتي
محمد جميل

قصيدة فيها غنائية عالية
وهى تبدو قصة او اقرب للرواية
منذ البداية حتى منتصف الحكاية الى الذروة
وهذا ما يجعل غنائيتها عالية
الى ذلك استخدم الشاعر اللغة البسيطة المباشرة
المخاطب هو الحبيبة
ونحمد له انه جعلها (هى ) ولم يذكرها بمعنى ان الخطاب كان فيه مباشرة
ولم يتوارى الشاعر خلف الذكورية لمخاطبة الانثى

ايقاع القصيدة منساب ويجعلك تحس اناقة الكلمة التى جاءت هى الاخرى رقيقة
تشى بالحالة الشعرية
شكرا لك اخى على مشاركتنا

الأخت العزيزة والكاتبة المتميزة سلمى الشيخ سلامة
شكرا على قراءتك البرقية ، والانتباه إلى النفس الغنائي في القصيدة . أنا سعيد بنفي تهمة الذكورية هذه ؛ لأنها بالفعل متغولة في الكثير من نماذج الخطاب الشعري الغنائي ، بل حتى في صميم اللغة وبنيتها ، كما في صيغة التغليب اللغوية (الأبوان = للأم والأب ، القمران للشمس والقمر ألخ)
شكرا سلمى على مرورك الجميل وعلى أناقتك في الوصف
مودتي
محمد جميل

بعد التعليقات الجميلة الفوق دي ..
وتحليل الأستاذه سلمي الرصين..
يبقي ما عندي غير اقرأ وأمتلئ إعجاب.

الأخ العزيز القاضي محمد علي طه الملك
شكرا على صمتك ، ففي الصمت كلام وفي اعجابك ما يمنح الشعر حاجته للجهر
مودتي
محمد جميل

جميل محمد جميل
سفرٌ سلس متماسك فاحش النغم

سلمت

العزيز بله محمد الفاضل

أنت الأجمل ياصديقي ؛ بإحساسك المفعم بالأناقة والتعبير
مودتي
محمد جميل

.

حبيبنا محمد جميل
كل سنة وانت بالف خير

Quote: إنتــِـــي زيْ فـــرَح َالأمـــــاسي لـَمــَّـــا يــِتــْحـَـكــَّـرْ أسَـايا ولو مـَـشَيــت فـــي نار غــيابـِكْ وزي لهــيــب الشـَّــوق هـَـوايـَـا بلـْـقى بَعـْـــدَ الفـُرْ قــه ْ تاني مـــــن طــرف طيــفـك مُـنـايَــا

احيانا مابصدق انو في واحد من كوريا مونج ممكن يكتب كلام زي ده



عليك الله اكتب ... وكل ماتلقاني جنب الفرن بتاع بشير انفحني بي بيت بيتين من الكلام الحلو ده...
بعدين ياخي انت قاعد تجيب الكلام ده من وين ....
البعرفه في مدرسة ديم برتي ماادونا ليهو .... !
ارقد عافية
هارون دياب

هههههههههههههههههههههههههههههههههها
شكرا أخي هارون دياب ، أنت تذكرني دائما بمصادر الإبداع وشقاوة الطفولة في مدرسة ديم برتي الإبتدائية وكوريا مونج ... الزمان داك ياهارون والمكان داك هما (أكسير حياة خلابة) زي ماقال شاعرنا محي الدين فارس عن أفريقيا ... وبعدين الشفتو يادوب مناظر ساكت ، وحاجة من طرف الشنطة ... صحي مدرسة ديم برتي الإبتدائية كانت عامرة بالشقاوة ولكنها أيضا كانت عامرة بالبراءة والطفولة، والبراءة والطفولة أهم مصادر الإبداع يا هارون ، وبعدين الإبداع دا ذاتو يجي من حتات كتيرة لكن أهم حتة هي موهبة ربنا سبحانه وتعالى . هي الأول ... طيب يا هارون إنتا كان قريت الرواية كنتا حتقول شنو ؟؟ الرواية دي إنتاحتكون من أكثر الناس اللي حيستمتعوا بيها ، عارف ليه ؟ لأنو أنتاحتكون عارف أكتر أبطالها معرفة حقيقية وحتكون بالنسبة ليك أحداث تعرفها بصفة خاصة كجزء من تاريخ حياتك وحياة ناس ديم كوريا وبورسودان في السبعينات الجميلة . طبعا تعرف جابر سعيد ، وبامكار ، وعمنا محمد سليمان السمد أكبر حافظ ومجود للقرآن في بورسودان وعمنا كنتيباي كل هؤلاء من أشخاص الرواية (على فكرة الرواية حتكون معروضة في معرض جدة الدولي للكتاب في جناح دار الحصاد السورية . وهي بعنوان " بر العجم " والمعرض سيبدأ في شهر يناير 2008 بجدة)
وبعدين ياهارون صحي ديم برتي ما أدتنا جنس الكلام دا ؛ لكن أدتنا مفاتيح ليهو، وهي ذاتا بعد داك بقت واحدة من مفاتيح الإبداع ... تعرف أخونا(إبراهيم جنية) إبراهيم جنية كان متكيف من إنو ديم برتي الإبتدائية على الأقل طلعت شاعر من كوريا مونج، لمن كنا في جدة
شكرا ياهارون على هذه التداعيات الحميمة .
أما فرن بشير في كوريا مونج دا براهو عاوز ليهو قصيدة لكين القصيدة حتجيب ناس كتيرة من الشخصيات التلقاها دايما قدام فرن بشير (زي الفنان إمام ، وعمر اللورد وأخونا عبد الوهاب طمبل) وناس تانية كتيرة من شخصيات ديم برتي الظريفة
وكل عام وأنت بخير
مودتي
محمد جميل