ساخر سبيل : سنه حلوة يا جميل !

أجاز مجلس الوزراء مؤخراً فى إجتماعه أول أمس مشروع الموازنة العامة للعام 2008م والقوانين المصاحبة وقرر إحالتها للهيئة التشريعية القومية المكونة من المجلس الوطنى ومجلس الولايات لإجازتها بصورتها النهائية وبهذا أعزائى القراء تكون الحكومة قد أعلنت ميزانية العام الجديد , و غنّت للمواطن كعادتها " سنة حلوة يا جميل " !
بالفعل هو مواطن (جميل) بل هو أجمل مواطن عرفته (الأوطان) منذ أن خلق الله الأرض وما عليها فهو أى المواطن من (جمالو) فهو لا يتعب نفسه بمعرفة أن كانت هنالك (ميزانية) من أصلو .. بل ويعتقد جازما (من شدة سذاجته) أن الحكومة شغالة بدون (ميزانية) بل بدون (أقلام ودفاتر) وإنو المسالة ماشة ساااااكت بدليل مئات الملايين – خارج الميزانية- التى يتبرع بها كبار المسئولين (على الهواء مباشرة) فى لحظات (تجلى) وهم يخاطبون (الحشود) ، علاوة على الرسوم و(الزيادات) فى اسعار (السلع الضرورية) التى تفرض خلال العام والتى لا ترد إصلا فى الميزانية (المزعومة) وكذلك والمرتبات التى يتأخر إستلام مستحقيها شهوراً وشهور وكأنها لم تكن ضمن ما (تضمنته) الميزانية .
سنة حلوة يا جميل ... سنه حلوة يا مواطن .. فالموازنة العامة تشير إلى أن معدلات (النمو الإقتصادى) فى إزدياد .. ليس بالضرورة أن يظهر لك ذلك على تفاصيل حياتك المعيشية وإن كنت تظن أن معدلات النمو الإقتصادى من الضرورة أن تظهر على مستوى حياتك فأنت لا محالة (جاهل) لا تعلم قوانين الإقتصاد فمعدلات النمو الإقتصادى (يا جميل) حسب قوانين (مندل) لا تظهر إلا بعد الجيل السادس على أقل تقدير ، إذن فمسألة إزدياد معدلات النمو هذه الغرض منها إنك تكون فى الصورة وتطمئن على أنو المسألة (ماشة كويس) وأنو (حفيدك) السادس عشر سوف تظهر عليه علامات الثراء (غير المفاجئ) حينها .
سنة حلوة يا جميل .. فقد بلغ إجمالى إيرادات الميزانية حوالى (21) مليار جنيه فيما قدرت المصروفات بـ (26) مليار جنيه أى هنالك عجز مقداره (5) مليارات سوف تقوم الحكومة (يا عينى) بسد هذا العجز .. شئ إستدانه وشئ قروض وشئ شنو ما عارف وأنت يا (جميل) قاعد متهنى ومستريح ولا عليك والحكومة مشلهته تستدين من هنا وتخش فى (صناديق) من هناك وتتعب علشان تسد عجزك وعجز اللى خلفوك !!
سنة حلوة ياجميل ... فقد ركزت الميزانية (كعادتها) فى الصرف على الأمن والدفاع على حساب الصحة والتعليم .. تعليم بتاع أيه؟ وصحة بتاعت أيه؟ أفرض إنك بقيت (عالم ذرات) وصحتك ذى (الحصان) أيه يعنى لو ما (الحكومة) ضمنت ليك و(ليها) إستتباب الأمن ووفرت ليك (آليات) الدفاع عنك يا جميل ضد أى (غزو) خارجى عن طريق (الطائرات) التى تكتشف لاحقاً أنها لم تكن إلا صواريخ (كروز) .
سنة حلوة يا جميل .. فقد ضمنت لك الموازنة الجديدة بأن راتبك سوف ينفذ من يوم خمسة فى الشهر بعد أن جاء فيها عدم وجود أى زياده فى مرتبات للعاملين بالمؤسسات الحكومية .. سنة حلوة يا جميل سوف تستمر أنت خلالها فى دفع (حق الطباشير) و(حق فطور المدرسين) و(حق الكهرباء) و(حق طباعة الإمتحانات) لكن لا عليك يا جميل فالميزانية أقرت زيادة ضريبة القيمة المضافة Valued Added Tax من (12%) إلى (15%) وهى ضريبة استهلاك يدفعها المستهلك النهائىUltimate Consumer (اللى هو إنت بى سلامتك) !! كما إحتوت الميزانية (يا جميل)على تخفيض فى ضرائب (أرباح الأعمال) و(العقارات)
وده طبعا ما مقصود بيهو إنت لأنك لا عندك (أعمال إستثمارية) ولا (عقارات مؤجره) يعنى التخفيض ده (للناس المرطبين) مش ذى (حلاتك) يعنى خفضو ليهم (الضرائب) ورفعوا ليك يا (جميل) القيمة المضافة علشان يرفعوا عنك (المعاناة) !!
عموما يا (جميل) ما تسألنى تقول ليا وأنا دخلى فى (الشغلانية) دى أيه ؟ أكيد أكيد (الناس العملو الميزانية) دى عارفين أكتر منى ومنك إنو المسألة دى حى تصب فى النهايه فى مسألة إزدياد (معدلات النمو) والتى سوف (تصب) فى النهاية فى مصلحتك ومصلحة أحفاد أهلك يا جميل !!
يا جميل حقو تحمد الله وتبوس إيدك وش وضهر علشان (حكومتك) مش حكومة (إليكترونية) وإنها حكومة من (لحم ودم) وفى منتهى الإنسانية ولا زالت تتمتع بعاطفة جياشه نحوك وهى تقدم لك هذه الميزانية (الخالية من الكحول) وتبتسم لك قائلة .. سنة حلوة يا جميل !!

لك التحية يادكتور

و برضو سنة حلوة يا جميل !!

واصل الإبداع يا دكتور

أمير

صباح الخير أمير
شكراً على المرور الجميل !

الأستاذ الفاتح...
يسعد صباحك يا جميل ...


قرأت المقال بنفس واحد ،،،
(بدور) على ضرائب المغتربين سو عليها شنو ...

الحمد الله يبدو سقط سهواً و سنة حلوة يا جميييييل ...



ش

Quote: الحمد الله يبدو سقط سهواً

ديل يا شكرى ياخوى ما بتسقط عندهم حاجه سهواً إلا (العمارات) !!

وكمان سنة حلوة يا جميل
وينك؟؟؟

سنة حلوة ياجميل ... فقد ركزت الميزانية (كعادتها) فى الصرف على الأمن والدفاع على حساب الصحة والتعليم .. تعليم بتاع أيه؟ وصحة بتاعت أيه؟ أفرض إنك بقيت (عالم ذرات) وصحتك ذى (الحصان) أيه يعنى لو ما (الحكومة) ضمنت ليك و(ليها) إستتباب الأمن ووفرت ليك (آليات) الدفاع عنك يا جميل ضد أى (غزو)

أستاذى الفاتح
يراودنى إحساس أننا ( نتحدث بلا صوت و نكتب بحبر عديم اللون و بلغة منقرضة)
نحن لا نفقه و هم يفقهون
نحن لا نفهم و هم يفهمون
نحن لا نعرف و هم يعرفون
نحن لا ندرك و هم يدركون

لذا يجب أن نموت ل (يحيون)

Quote: وكمان سنة حلوة يا جميل وينك؟؟؟

والله مشتاقين يا هشام .. شنو من ديك وعييييك ! عمك ما قاعد يكلمك ؟ تحـــــــــيـاتى

Quote: ( نتحدث بلا صوت و نكتب بحبر عديم اللون و بلغة منقرضة)

عزيزى الشفيف أسعد :
مرات كثيرة ينتابنى هذا الإحساس المحبط فأقوم ألعن (الشيطان) وتانى ........................... أكتب !

Quote: مرات كثيرة ينتابنى هذا الإحساس المحبط فأقوم ألعن (الشيطان) وتانى ........................... أكتب !

و الغريبة دى مسألة كان يمارسها والدنا يرحمه الله فقد كان يقول:
ضاقت .. و لما أستحكمت حلقاتها ..............ضاقت تانى !

أسعد :
تعرف برجع تانى أكتب ليه؟ لأنو بفتكر إنو (الشيطان) ده ما براهو مرسلنو ليا (الجماعة) !!!

.

والله يا استاذ جبرا ضحكتني ضحكة انستني هموم الاغتراب وتمنين اترك الغربة واعود لهذا البلد الجميل ببدعه البتقولوا فيها دى .

وذكرتني قصة عمك المعاشاتي الجميل عندما كان مارا في العصرية الى بقالة مجاورة لمنزله وفي الطريق وجد طالب بيطلع في كتاب استعدادا لامتحان الشهادة السودانية وراح واقف جنب الطالب وساله ( يا ولدى بتقرأ في شنو ؟ الطلب قال ليهو انا يا جدو ممتحن ( بفتح التاء والحاء) الشهادة السودانية . عمك لولح راسه وقال للولد خير يا ابني لكن في تقديري يا جميل لو امتحنت احد امرين :
اما دخلت الجامعة او جبت ليك شهادة ساااااااااااى
اكان دخلت الجامعة حقك راح واكان جبت شهادة احد امرين
اما اشتغلت في الخدمة المدنية او الجيش
كان عملت في الخدمة المدنية حقك راح وكان عملت في الجيش احد امرين
اما شغلوك في سلاح المدرعات او الطيران
اكان شغلوك في المدرعات حقك راح لكن اكان شغلوك يا جميل في الطيران احد امرين
اما متّ في الهواء او متّ الارض
اكان مت في الارض حقك راح اما لو مت في الهواء احد امرين
اما تحولت نيتروجين او تحولت ثاني اكسيد الكربون
لو تحولت نتروجين حقك راح اما لو تحولت ثاني اكسيد الكربون احد امرين
اما صنعوك كرتون او صنعوك تشوز (مناديل ورق)
اكان صنعوك كرتون حقك راح اما لو صنعوك تشوز احد امرين
اما استعملوك النسوان او استعملوك اتلرجال
لو استعملوك الرجال حقك راح
اما لو استعملنك النسوان احد امرين
..

بالامانات ( عندك ايميل؟)

العزيز الأخ ودشيقوق
مشتاقون لدرجه ... وين إنت ياخى؟ زمان كنا بنتقابل فى البورد ده لكن ما عارف الشهور الأخيرة دى الحصل شنو؟ إفتقدت أنا شخصيا مؤخراً ناس كتار جميلين ورائعين كنت بقابلهم هنا .. دى ياربى تكون مشغوليات وإلا شنو؟ عموما مشتاقين جداً وأهو ده أيميلى [email protected] وأنا فى إنتظارك !! قلت ليا التيشوز حصل ليها شنو؟

ود جبرا كيفنك

ومشتاقون

Quote: زمان كنا بنتقابل فى البورد ده لكن ما عارف الشهور الأخيرة دى الحصل شنو؟

صحيح يا الحبيب بس زمان

كنا بنشيل الود
وندي الود
وفي عينينا كان يكبر
حنانا زاد وفات الحد

وهسع رحنا نتوجع
نعيش بالحسرة نتاسف
علي الماضي اللي ما برجع

احبك

لا الزمن حولني عن حبك
ولا الحسرة

وخوفي عليك يمنعني
وطول الالفة والعشرة
وشوقي الليك طول
ولي بكرة لسة معاي

شكرا يا عظيم على الايميل وسنتواصل لنحكي ونحن بعاد

تخريمة

قصة المعاشاتي كملتها ليك على الايميل الخاص بك
بس عليك ربك حافظ على حق المؤلف

معزتي