عيفيت منك يا شيرين (يوجد فيديو)

Post: #1
Title: عيفيت منك يا شيرين (يوجد فيديو)
Author: Safia Mohamed
Date: 12-04-2007, 09:25 AM

جرح تاني - شيرين احمد
http://www.cools4u.com/center/clips/ram/shren-jar7-tani.ram
يا جماعة رياكم شنو في الفيديو كليب دي؟؟؟؟؟؟

غايتو ممكن زول/ة ي/تجي ي/تقول لي اغنية قديمة من زمن حفروا البحر مالكم ما بتعرفوا الجديد
ممكن زول/ة ي/تجي ي/تقول شيرين دي زاتها ما سمحة اشمعنى جايباها لينا هنا ما شفتي هيقاء ولا نانسسي او شكيرة او بينوسي . ونخش في الجمال وانواعه والاحساس بيه وتذوقه و….
وي/تجي تالت/ةو وي/تقول والله الاغنية دي ماشة مع موضة الهكر اليام دي مالهم بنات ونسوان المنبر الايامم دي الحاصل عليهم شنو؟
ورابع/ة ي/تقول اووه دخلنا في الممنوع مشكلة الخيانة: خيانة الحبيب خيانة الزوج وخيانة الصديقة هي ذاتها مرتو ولا حبيبتو؟ وندخل في الخيانة وانواعها واسبابها
وتجي واحدة او واحد ت/يقول لي نحن ما عرب مالنا ومال فيديو كلابتن بالله لما تجيبوا حاجة جيبوا حاجة بتمس واقعنا السوداني نحن سودانيين وندخل في صراع الهوية …….
واخرى تقول هو في زول فاضي عشان يشوف فيديو كليب نحن ما فاضين من الجري. سماع الموسيقى ومشاهدة الفديو دي دايرة ناس فايقة ورايقة ومترفة وندخل في زمن المراة والوردية التانية التالتة الرابعة والخامسة غابتو انا مسمياهم خمس ورديات

وممكن ولا زول يقول اي حاجة!!!!!!!!!

لكن والله انا الاغنية دي عاجباني عشان……
في زول عارف ؟
غايتو هم سببين:
الأول: تعرفو الاغنية دي فيها حاجة مميزة يعني المغنية هنا بتجسد كلمات الاغنية ببراعة (بالمناسبة انا ما لياش في النقد وكمان وكتين اتكلم اتكلم في الموسيقى المهم غايتو الدايرين يواصلوا عليهم بتحملوا تبعات جهلنا في النقد الموسيقي) ، بتجسد كلمات الاغنية بصورة انسانية رائعة تبعد عن الاسفاف واثارة الغرائز صح ولا غلط رايكم يا جماعة وبكرة نواصل فيديو كليبات تانية عن شيرين ونشوف دي نهجها ولا هي بس اغنية واحدة.
والله لو ما خايفة يجو ناس يقولو لي كاني وماني كان نزلت اغاني على عكس نهج الاغنية في استخدام جسد المراة عشان نقدر نقرا الفرق كويس بيناتن.
خلاصة القول: صورة المراة في الاعلام بالتحديد المشاهد وبالتركيز على الفيديو كليبات هل بتحتاج للوقوف ام تاك اواوي اهو نشوف ونحن ماشين؟؟؟؟؟؟؟؟؟؟

خارج النص:
الثاني: لكن بيني بينكم عربيتها (اظنها لكزس ولا مو هيك زي ما بقول دريد لحام) مش تجنن، انا غايتو كان راجلي جايب لي زي عربيتها دي ان شاء الله يخونني كل يوم ما في مشكلة افرق علي روحي انا ووليداتي بالعربية. والله يا جماعة باقي لي كلامي دة ما في محلو، الخيانة حاااارة ودي برضو بتدخلنا في جدلية المحسوس اقصد المادي واللامحسوس اللا مادي في العلاقات الانسانية عموما والزوجية على وجه الخصوص.

صفية.
يا جماعة ما برلومة غلبني انزل الاغنية من كمبيوتري هل من معين غايتو ممكن انزل اللينك في النت لكن برضو وجودها مباشرة بسهل على الدايرين يشوفوها ويختصر الوقت باقي في ازمة وقت شدييدة (مناشدة للمساعدة في انزال الاغنية من الكمبيوتر).
- يا حليل المسنجر والحضور حسع كان نفع في حالة زي دي ؟
البرلومة
صفية

Post: #2
Title: Re: عيفيت منك يا شيرين (يوجد فيديو)
Author: عبد الدائم سيد أحمد
Date: 12-04-2007, 10:14 AM
Parent: #1

د/ صفية مساعد
الحمد لله انك طيبة
والحمد لله اعترفتى انك برلومة
الغناء خليهو لناس المساكن البعرفو يقعدوه كويس
شن عرف ناس لكوظ بالحاجات دى

عموما" خدمة منى ليك عشان تجينا فى الحوش الكبير
بنزل ليك الاغنية
دقيقة بس ,....

Post: #3
Title: Re: عيفيت منك يا شيرين (يوجد فيديو)
Author: Safia Mohamed
Date: 12-04-2007, 10:25 AM
Parent: #1

عبد الدائم ناس المساكن
االناس الراقية
نحن ما عارفين ناس لكوظ ديل ما بعرفو حاجة وناس متخلفين ما دايرين نقول ناس اقاليم عشان ما ينطوا لينا ناس الهامش لكن شكر ليكم يا ناس الزقازيق ياها دي المحرية فيكم بالمناسبة معزوم معانا حفلة عقد الجلاد في المسرح القومي بس انت اتصل ونحن نفتح ليك عشان تسمع باقي يا ناس الخليج انتو ما غنيانيين ما بتفرق معاكم

شكرا للمرور

صفية

Post: #4
Title: Re: عيفيت منك يا شيرين (يوجد فيديو)
Author: أبو ساندرا
Date: 12-04-2007, 10:28 AM
Parent: #1

زول/ة ت/يقول دي حركات جندرية مكتسبة بالنسب والمصاهرة من أماني الجندرية
وأذكر أن صديقنا عثمان تراث عجز في إثنائها عن الإقلاع عنها
إن شاء الله إنت تقلعي عنها

Post: #7
Title: Re: عيفيت منك يا شيرين (يوجد فيديو)
Author: Safia Mohamed
Date: 12-05-2007, 08:12 AM
Parent: #4

ابو ساندرا
ازيك
شايفاك مكتر القعدة في النت بالله خفف شوية عشان العيون

Quote: إن شاء الله إنت تقلعي عنه
ا

كدي تعال النسالك هو ليه نحن نقلع عنها ملها عيبها ليه هو نحن مهمشين طول عمرنا في اللغة والتاريخ والماضي دايرين تحرمونا من نعمة الحضور ليه

ابقى عافية
برضو ما وريتنا رايك شنو حتخش بمدخل الجمال زي ابو مهيار ولا عندك مداخل تانية

تحياتي

صفية

Post: #5
Title: Re: عيفيت منك يا شيرين (يوجد فيديو)
Author: Abomihyar
Date: 12-04-2007, 10:30 AM
Parent: #1

ازيك يا دكتورة

كيفك والعيال وأبوهم؟ طولت الغيبة..

لكن ألاغنية سمحة والعربية سمحة وشيرين ذاتا سمحة ..

أها ابن حلال فتح ليكم(باب) موضوع الجمال..

تحياتي

Post: #6
Title: Re: عيفيت منك يا شيرين (يوجد فيديو)
Author: Elkhawad
Date: 12-04-2007, 11:16 AM
Parent: #5

Post: #11
Title: Re: عيفيت منك يا شيرين (يوجد فيديو)
Author: Safia Mohamed
Date: 12-05-2007, 12:27 PM
Parent: #6

الله
يا سلام عليك ياالخواض يا احوي اسديت لي خدمة
لكن برضو عشمانين ممكن تدينا درس مجاني بدل كل مرة نضيع ليك وقتك وتنزل
رايك شنو درس مجاني يكون وين دي عاد ما عارفاها لكن ايميلي عند عبد الدائم

شكرا ليك
صفية

Post: #10
Title: Re: عيفيت منك يا شيرين (يوجد فيديو)
Author: Safia Mohamed
Date: 12-05-2007, 09:02 AM
Parent: #5

Quote: ازيك يا دكتورة

كيفك والعيال وأبوهم؟ طولت الغيبة..

لكن ألاغنية سمحة والعربية سمحة وشيرين ذاتا سمحة ..

أها ابن حلال فتح ليكم(باب) موضوع الجمال..

أووه ابو مهيار الزول الرصين
ازيك والله مشتاقين وين ما ظاهر في المسنجر

الجماعة كلهم طيبين وبسالوا منكم
تعرف ما قدرت اقدم للوتري كانت المشكلة الصور

شكرا على المرور وفعلا شيرين جميلة بجمال عكس المعاني وليس استعراض الجسد

صفية

Post: #8
Title: Re: عيفيت منك يا شيرين (يوجد فيديو)
Author: Safia Mohamed
Date: 12-05-2007, 08:18 AM
Parent: #1

Quote: دقيقة بس ,....

عبد الدائم ازيك
لكن الدقيقة ما عندك شايف الناس شغلها نضيف كيف لكن برضو شايلنك لعوزة

شكرا
صفية.

Post: #9
Title: Re: عيفيت منك يا شيرين (يوجد فيديو)
Author: عبد الدائم سيد أحمد
Date: 12-05-2007, 08:26 AM
Parent: #1

يا صفية
حبيبنا واخونا الخواض ما قصر
انا جيت ولقيتو قام بالمهمة الصعبة

وبمناسبة الخواض ده صاحب اجمل بروفايل فى المنبر
عليك الله ادخلى واقريهو
زول ظريف ودايما بذكرنى
مشينا .. مشينا
مشينا ...

خالص الود

Post: #12
Title: Re: عيفيت منك يا شيرين (يوجد فيديو)
Author: طارق جبريل
Date: 12-05-2007, 01:02 PM
Parent: #1

يا عبد الدائم هو الغناء لو ما غنوهو ناس لكوظ البغنيهو منو

صفية كيفنك

Post: #13
Title: Re: عيفيت منك يا شيرين (يوجد فيديو)
Author: Ishraga Mustafa
Date: 12-06-2007, 08:49 AM
Parent: #12

صباح الخير ياصفية

ياختى مالك بتفتحى مواضيع كبااااااااااااااااار كباااااااااااار كدى ونحنا ماشين على سفر اقصد على أرشفة!!

صورة المرأة فى الاعلام تعكس صورتها فى المجتمع وبالتالى تقول كيف المجتمع يفكر فى نصفه المهمل!!

اها فى موضوع هبشتيهو جيتنى فى اللحم الحى... {سياسة الجسد-السودان نموذجا}
وده بتدخل فيهو جنس حاجات ابداها ليك من دق الشلوفة والشلوخ كابعاد جمالية فى زمانها
والطهور/الدخلة/الرتق/ وده كلو ممكن قاريتو من خلال {مركزية الجمال}، سوى عالميا او محليا...

اها حسع ابدأ من ووين الشغلات كتييييييييييييييرة وقلتى لى {صاحب بالين كضاب} اها رايك شنو فى ام عشرة بالات...

برجع بس ماتخليهو يسافر الارشيف

شكرا ياصفية للمواضيع الواعية ورصينة

Post: #16
Title: Re: عيفيت منك يا شيرين (يوجد فيديو)
Author: Safia Mohamed
Date: 12-07-2007, 10:40 AM
Parent: #13

د. اشراقة الف مرحب بيك شرفتي الدار وعقبال ما تشرفي الحوش الكبير
Quote: ياختى مالك بتفتحى مواضيع كبااااااااااااااااار كباااااااااااار كدى ونحنا ماشين على سفر اقصد على أرشفة!!

دي غايتو تبرهن انه نحن برالمة

شكرا على الاطراء

بالمناسبة بجد كدي همومنا كتيييرة ودايرة اقلام واعية ورصينة زيك عشان نقدر اضعف الايمان لفت نظر الآخرين لوجودها اولا ثم تحليل اسباباها بغرض الوسول لحلول
يعجبني جدا اسلوبك الذي يجمع بين المنهجية والتحليل العلمي الدقيق بالاضافة للبساطة ونكهة خفة الدم مع التزام محور الموضوع
سعيدة بيك واكيد حنواصل وكان مشى الارشيف مالو نفتح تاني وتالت البركة في بكري ما حدد عدد البوستات في الدورة

اعجبني جدا ربطك بين الصورة في الاعلام وووضعنا في المجتمع ودي نقطة اساسية ، لكن برضو وبتودينا للسؤال (بتاع اكلك منين يا بطة) ياربي نبدا بشنو ونخلي شنو ياتو المهم ولا الربط؟ اكيد الجمع السياسي الاجتماعي الاقتصادي مهم لكن غالبا في راي الاقتصادي له اليد الكبرى باعتبار انه يؤثر مباشرة على المناحي الأخرى ودي ما بنفي انه هو اتى نتيجة لاوضاع سياسية اجتماعية يعني زي حكاية البيضة والجدادة كلهم افرزوا لينا وضع متشابك يحتاج تكاتف الجميع لتسليط الضوء عليه وتفكيك صواميله (دي طبعا استعرتها منك) عشان نقدر نركبه صح ، اكيد حنستفيد من مداخلاتك القيمة.

خارج النص:
Quote: اها حسع ابدأ من ووين الشغلات كتييييييييييييييرة وقلتى لى {صاحب بالين كضاب} اها رايك شنو فى ام عشرة بالات...

يا ربي بالاتك ديل فيهم بالات قماش

شكرا ليك بالله اعتبري دعوة عبد الدايم لزيارة الحوش والحفلة.
دمتي
صفية

Post: #14
Title: Re: عيفيت منك يا شيرين (يوجد فيديو)
Author: Safia Mohamed
Date: 12-06-2007, 08:52 AM
Parent: #1

Quote: يا عبد الدائم هو الغناء لو ما غنوهو ناس لكوظ البغنيهو منو

مش كدة
ابو الطروق كيفنك والله مشتاقين كل سنة وانت طيب يا ربي دي بمناسبة شنو اختار العيد العاوزو
صفية

Post: #15
Title: Re: عيفيت منك يا شيرين (يوجد فيديو)
Author: عبد الدائم سيد أحمد
Date: 12-06-2007, 11:22 AM
Parent: #1

د/ اشراقة شخصيا"
هلا هلا هلا وغلا
والله يا دكتورة السلام والكلام فى حقك لو كتبت لبكرة ما بكفى
ومن زمان دايرين نتفرد بيك بس ما لاقين فرصة معاك، وذى ما قالت د/ صفية يا حليل
الماسنجر
د/ اشراقة لو انتى موجودة فى السودان معزومة معانا حفلة عقد الجلاد يوم 11/12/07
بالمسرح القومى والكرت عند صفية
وقبل ده كلو بدعوك تشرفينا فى بوست الزقازيق اجدع ناس
حقيقة مداخلتك بتسعدنا، مع انو بوست فيهو 17 صفحة وصعب عليك تتطلعى عليهو كلو
لكن اقول ليك اى زول/ة درس/ت فى الزقازيق ما هين ..

خالص الود

Post: #17
Title: Re: عيفيت منك يا شيرين (يوجد فيديو)
Author: Safia Mohamed
Date: 12-08-2007, 02:36 PM
Parent: #1

Quote: د/ اشراقة شخصيا"
هلا هلا هلا وغلا
والله يا دكتورة السلام والكلام فى حقك لو كتبت لبكرة ما بكفى

مش كدة يا عبد الدايم شكراليك كثيييييير

في انتظار تعليقك على المواضيع اللي اثارتها الدكتورة

سفية

Post: #18
Title: Re: عيفيت منك يا شيرين (يوجد فيديو)
Author: Safia Mohamed
Date: 12-09-2007, 03:16 PM
Parent: #1

UP
FOR MORE DISCUSSION
SAFIA