الرجال السائبون في بلاد الغربة ..

بتذكّر عاماً أول لمن كانت الدراسة حدّها الوسطى والبيقرا الإعدادية بيتخرج أستاذ واكن التعليم محصور على فئة محددة من أبناء الموظفين والفرص محدودة في مدرسة خور طقّت وخور أبو عنجة وخور عمر وخور بكري وخور مرزوق بتذكّر لمن عمّي جا لي جدّي وقال ليهو ياأبوي انا ماشي الخرتوم في شان التعليم فرفض جدّي وقال ليهو :
يا ولد سيب الإنطلاقة وسحسحة البندر دي (جدّي لكن ما بااااالغت في سحسحة دي) وخلّيك في زراعتك دي..
خدّر الحواشات دي بي ضراعك وشق أب عشرين وأب ستة شيل السلّوكة دي وهنوووك الطورية وداااااك المنجل ..
عمّي حرد القراية وقعد في البيت وأذكر جيداً كيف كان بيقعد في ركن بعيد في راكوبة القصب حيران وسرحان لمّن ضعف ووشو بقا شاحب ..
قعد بي حالتو دي لحدي ما بقا عمرو 18 سنة وحبوبتنا في النهاية خطبت ليهو بت خالتو من غير علمو ..
الغريبة انا الوقت داك ما ولدوني لكن بتذكّر الكلام ده كيف ما عارف !!
أسعلوني تاني؟

اسرد هذه القصة الحزينة لتوضيح كيف كان يعامل الرجل وكيف كان ينظر أجدادنا لسفر اولاد القرى للمدن من أجل التعليم ..
البندر فيهو القهاوي وفيهو السينمات تمشي امدرمان تتعلم لي الصرمحة والقعاد في قهوة جورج مشرقي وتمشي الخرتوم تعملا لي سينما كلوزيوم وما أدراك ما النيل الأزرق ..
هوووووووي يا ولد إنقرع وأرعى بي قيدك وشوف زراعتك دي ...
عايز تمشي تقرا في البندر عشان تلبس لي البنطلون متل الأفندية وتستحمّ لي كل يوم ؟؟؟
هووووووي يا جنا شد حيلك ..
تحت هذا الضغط فكّر معظم الشباب الزمن داك في السفر ولو من دون علم الوالد ..
بتذكّر كيف لمن جانا صديق النعمنو متعللاً بي إنو عايز يقلع ضرس وتكّل معانا في البيت قرابة الشهرين طلّع الباظبورت والجنسية وشتات السعودية جاك راعي...
أما النعيم ود الدّاية فكان حنكو مغايير وتعلل بي جاي يشيل ليهو بضاعة وراجع بعد يومين واليومين بقو شهرين والشهرين بقو سنة لحدي ما طلّع الباظبورط والجنسية وهيييييييييع ليبيا نفر..
يسافر الرجال لبلاد الغربة وكل واحد منهم يأمل في حياة رغدة ووظيفة مريحة وسكن راقي وعربية اخر موديل وحسناء الفريق يتزوج بها بعد أول سنة إجازة ..
مساكين هم الشباب يبعهم تجار الفيزا الوهم ويسلبون منهم أموالهم التي جنوها وأفنو من أجلها زهرة شبابهم بين بائع في سوق العدّة وساقي في موقف الشهداء وفارش جوار القبة الخضراء ..
وكل حاااااااااجة بي ميّة ..
أي حاااااااااجة بي ميّة ..
البنطلون ..بي ميييييييية ..
البلوزة . بي مييييييية..
ال..... بي ميييييييييية ..
كلو كلو بي ميييييييييييية ..
يصل الشاب لبلاد الغربة فيصطدم بواقع مرير فلا الكفيل موجود ولا الوظيفة موجودة ولا الشقة متوفرة لتتطاقش التلفونات للسودان :
عليك الله يا خالة رسلي لي رقم عاطف ولدك ..مش هو في الرياض ؟؟ لالالا عاطف في جدة ..
الو ..الو ..عمتي محاسن كيفكم ..والله مقصر معاكم ولمن سافرت ما كلمتكم عشان السفر كان فجأة ..كدي بحكي ليكم التفاصيل بعدين بس لو حافظة تلفون سمية بتك مليني ليهو سريع عشان الخط حا يقطع ..
وما بين نحت الراس وتقليب النوتة والأوراق المليئة بالأرقام ترسى ليك على بر ..
محمد ده كان صحبي شديد في السودان وما بيقصر معاي ..
عفواً هذا الرقم موقوف من الخدمة مؤقتاً ..
تنقضي فترة التلاتة شهور ولا كفيل ولا يحزنون وتنتهي فترة الإقامة وتبدأ رحلة التزوير ..
مساكين هم الشباب فها هم يضحّون بشرفهم ويغلظون في الحلف إنهم من قوم لوط وأن عجوز الغابرين هي حبوبتهم وأن بلادهم تمنعهم شرف الإنتماء لهذا القوم وعندما سمعنا أن لدينا أجداد وأباء وأخوان هنا عندكم أتينا نبحث عنهم فهل من مرحب ..؟؟
لتجد فيهم الفتيات من بنات العم سام ضالّتهم وتستدرج الواحدة منهم هذا المسكين ليشاركها السكن ويدفع عنها فواتير الهاتف ويشاركها السرير والدولاب والحمام ..
وقليلاً قليلاً يسقط الشاب المسكين في فخ الجينزي ..
والجينزي ما جينزي.. وووووووب انا تعال لي ..
اللابسو مارينزي ..وووووووووووب انا تعال لي ..
وتقنعه بأن لبس البرمودة لهو أشرف له من الجلّابية البيضا مكوية وحماده بيسرحوك لييييية ..
وحبيبي خصّمتك حلّفتك ..
حبيبي حلّفتك خصّمتك ..
وأوعاكا تنسى الوصيّة ..
أب برمودة بيسحروك لييية ..

وقليلاً قليلاً يسقط الشاب المسكين في فخ الجينزي ..
والجينزي ما جينزي.. وووووووب انا تعال لي ..
اللابسو مارينزي ..وووووووووووب انا تعال لي ..

شويتين الموضوع يجيب ليهو بكيني وما أدراك ما نادي العراة ويسقط هذا الشاب العفيف الطاهر في فخ الغربة ويدخل في باب الرجل السائب ..
وهذا ما حدى بالشيخ شوازنجر والي ولاية كلفورنيا حفظه الله ومدّ في أيامه بإرسال تعميم لجميع المخالفين بمغادرة هذه الولاية والبحث عن ولاية أخرى تقبلهم وذلك خلال شهرين من تارخه وإلا فالغرامة 100 الف دولار مع توزيع البيتزا لكلاب السكان هناك لمدة سنة ..
هي دعوة لكم أيها الرجال السائبون بلادكم تنظركم فلا تصدقوا من باعوكم الوهم فعدوا لبلادكم وكما قال الشاعر الجاهلي :
بلادك حلوة أرجع ليها ..دار الغربة ما بترحم ..
وعلى حكومتنا الرشيدة في السودان التشديد على عدم سفر الشباب لوحدهم دون ولي فربما يكون هناك شاب سيقوم بإجراء عملية (البروستاتة) دون علم ذويه ..

Quote: وأن عجوز الغابرين هي حبوبتهم

شكيتك علي الله

ما بااااااااااااااالغت يا عمورتي

ابو حميد:

Quote: شكيتك علي الله

دي ياها زااااااااتا الشكيّة اللي اب يدّاً قويّة ..

الله يسترهم من ضيف إبراهيم ..

Quote: ما بااااااااااااااالغت يا عمورتي

بالغ الزمن يا فيصولي..

تخريمة :
فيصولي دي زي أبحث عن فضولي مش؟

الفاروق ....

شايف من بعييييد (واللهم أجعله خير)... البوست ده بعد شوية .. ح يكون في طريقه الى الخور ..

-

صباحاتك خير .
-

Quote: خدّر الحواشات دي بي ضراعك وشق أب عشرين وأب ستة شيل السلّوكة دي وهنوووك الطورية وداااااك المنجل

عمر

الكلام دا حق اهل العوض,,

Quote: فيصولي دي زي أبحث عن فضولي مش؟

عجبتني جنس عجبنة

Quote: فيصولي دي زي أبحث عن فضولي مش؟

وانا ريحتنى فى حنانى
اصلى قاعد اشوف فى نوبى دا عشره عشره الايام دى

عموووووري !!!!!!!!
دعكـ من السبهلل و الانصرافيين امثال سامي الحاقد
طبعا موضوع حيوي و يناقش قضايا العصر بطريقة حية وواقعية ,,,
و هذه الكلمات التي ليست كالكلمات ,,,
كما قال شاعرنا العظيم نزار قباني وأبدعت ماجدة الرومي في أدائها غناء ,,,
و اطالب معك اليكومة بارسال خطابات إعتذار لكل من كانت سبب في سائبيتهم ,,,
و الرجوع الي صكوك الفضيلة ومكارم الأخلاق , ونتمنى ان يشمل الاعتذار العام البقية الباقية
من الهوامل والسوائم ومن يأكلون من برموداتهم ,,,
ولا ننسي خطاب شكر ليكـ يا عموووووووووووري عشان طرحكـ للقضية العظيمة و الخمير أعلاه.

أخونا حاتم :

Quote: شايف من بعييييد (واللهم أجعله خير)... البوست ده بعد شوية .. ح يكون في طريقه الى الخور ..

حدّد نوع الخور ..هل هو خور طقّت أم خور عمر أم خور أبعنجة أم خور مرزوق أم خور بكري..
راجع الخيران المذكورة في الموضوع

الفاروق

Quote: لتجد فيهم الفتيات من بنات العم سام ضالّتهم وتستدرج الواحدة منهم هذا المسكين ليشاركها السكن ويدفع عنها فواتير الهاتف ويشاركها السرير والدولاب والحمام ..

السودانيون أجدع ناس في الإلتفاف حول معوقات الإغتراب ..

فهم بالفعل ( منسابون و سائبون ) الآن في كل أصقاع المعمورة ..

وجدت سوداني في جزر البهامز يعمل في فندق يدير صالات القمار فقط ..
يعمل جرسوناً و متزوج من مكسيكية تعمل معه في نفس الفندق ..
قال لي : كنت في هيوستن ثم ذهبت للمكسيك ثم أتيت إلى هنا
قلت له : و بعدين ؟
قال بعد أن هز كتفيه محتاراً : العلم عند الله ...

( منتهى التوكل .. و لكن دون تخطيط ) ...

في سوق شبربوش في أطراف لندن في الثمانينات .. كان السودانيون يبيعون و يشترون العملة ( أيام الجنيه أبو عمة ) و كأنهم في برندات السوق العربي.

الله غالب

ابقوتة:

Quote: الكلام دا حق اهل العوض,,

أخوك ما كان الباقة حقّت العسل زوووووووووووتا ..

نوبي

في الحالة دي نقدر نقول حرقو يا حكم!!

يا سامي:

Quote: في الحالة دي نقدر نقول حرقو يا حكم!!

انا حرقو ؟ ولّا مين حرقو ..هذا حرقو ..
تخريمة :
اها ما وريتنا رايك في الرجال السائبون وانت رجل مشهود لك بكثير الترحال والتسفار (تسفار دي زي التقول حكم أثيوبي مش؟)

سامي انت يدلعوكـ يقولو ليكـ شنو
يا سيما

_
عمر تبيع البوست ده

Quote: اها ما وريتنا رايك في الرجال السائبون وانت رجل مشهود لك بكثير الترحال والتسفار

من نوع زي ديل واااا ((تسفاي))

عملو لينا زحمة

أنا شخصياً مع الراي داك

الريس أبو جهينة :

Quote: وجدت سوداني في جزر البهامز يعمل في فندق يدير صالات القمار فقط ..

انا ما مخلوع في السوداني ده لكن مخلوع فيك إنت ..الودّاك هناك شنو ؟

ظاهرة إغتراب الرجال حول كل بقاع العالم هل هي حصرية على السودانيين فقط ؟
زملائي المصريين في العمل لديهم نفس الفهم وبيقولوا المصريين ديل في أي حتة ..
تخريمة :
كيفني واحد جا يخطب قريبتنا طلع مغترب في البرازيل

عمر

Quote: انا ما مخلوع في السوداني ده لكن مخلوع فيك إنت ..الودّاك هناك شنو ؟

مشيت مع زولنا ( أب زرد ) صاحب العمل و الكفيل ...
السوداني ال لاقيتو هناك دة وراني بيت من خشب على شاطي المحيط و قال لي : دة البيت الكان خاتين فيهو شاه إيران قبل ما يودوه مصر و يموت هناك.. طبعا شاه إيران إعتبر بيت الخشب دة إهانة .. لكن حرم لو أدوني ياهو في أبو آدم بعتبر نفسي من أصحاب الملك الحر.

Quote: تخريمة : كيفني واحد جا يخطب قريبتنا طلع مغترب في البرازيل