بل هو الفنان محمد شبكة، لا الهاكر، ..هاتفتـُـه..و الآن جالس في لذيذ يبحث عن طبق فول..

.
لكل ملدوغ ..و خايف من جرة الحبل
و لكل صاحب كلمة ترحيب خشي عليها من مصير ميس سوركتي
أطمئنكم..أن الفنان الصديق محمد شبكة، عقد الجلاد، شمبات، إقتصاد الخرطوم..هو العضو الجديد..
بأمارة أن:
ناس المؤتمر الوطني إحتفلوا بعقد مؤتمرهم بحجز كل الفول الفي مطاعم "لذيذ"..و وجدنا الفنان شبكة و هو يبحث عن طبق فول..

مرحب تاني يا شبكة..

بيك وبيهو ألف مرحب

وبارك الله في شبكه الشبكك معانا

تحياتي لكما

عادل التجاني

.

و الله ود حلال يا عادل التجاني يا حبيب
ود حلال لمن عاوز تبقى شيخ..
هل تعلم أنا قبل ساعة أبدلت شريط العربية من الفنان أبي بكر سيد احمد إلى (حكاية السمحة)؟؟!!
و أخذت أغني معك طوال "فسحة الفطور"..و قلت لنفسي سعد الدين إبراهيم دة "ود لزينا"..هناك تشابه لحد التطابق بين فكرة (عن حبيبتي بقول لكم)..و (زي حبيبتي ح يبقى مين)..و كلتا الجنتين من تأليفه..هذا الشقي "باع" لنا غنوة واحدة مرتين..يا له من شاعر مقتدر..و الله لم ألحظ ذلك إلا قبل شوية..و طبعآ حكاية السمحة دي بعد كدة عاوزة تجديد..ألبوم تاني يعني يا صديق..

تقديري لك و للعيال..

تلفونك في الإيميل يا حبيب..الموبايل بتاعي راح..

.

إنت ذاتك منو البيضمن لينا إنك ياكا الطيب بشير.
يمكن تطلع ملاسي.

.
يعني يا شماسي دي يحلوها كيف؟
أعجبني إمتحان الواثق لشبكة..سأله من لون قميص منذأيام الجامعة فارتدّ بصيرا..
إن وجدت ملاسي قول ليهو أنا الطيب بشير بدليل أنني لا زلتُ أعاني من ذلك العجوز الذي "شحت" الزبادي من المدير و نحن في ضيافة بروتوكولية فأحرج المراسم و العلاقات العامة!

.

Quote: و الآن جالس في لذيذ يبحث عن طبق فول..

حاجة تشكك بالجد

هاكر مغترب ؟!!





سلامات ياطيب

لا ياتى من طرفك ياود شيوخى
الا كل جميل

خلاص نرحب بيه

.
مرحبتين حبيبنا أب قوتة

Quote: لا ياتى من طرفك ياود شيوخى ..الا كل جميل

و الله شبكة دة (من طرف الحبيب)..
هو أجمل من أنسبه لي
سبقه للبورد أهله..و للمجد أبوه..و لأمريكا أمـه..و للتقوى أجداده..
أما في عالم الغناوي فهو آخرهم معرفـةً للدار بعد توهـّـم ..لكنه أشهرهم الآن..
صديقي اسامة و حبيبنا عمر إبراهيم كانوا بيغنوا دكاكيني..لكن شبكة دة جابها كبيييرة..
و العشم/التوقع في تطوّره كبيييييير أيضـآ..

.

هى يا الطيب
دا هكر

انا كت مشاركة واحدة لقيتهم4

.

يا ملكة الملوك كيف حالك

Quote: سلامات ياطيب

هل هذا فرمان من جلالتكم للإطمئنان على الرعايا؟

إيه رأيك تطمئني شماسي أنني من أدعي أنني

بأمارة أن غرفة الضيافة بمكتبكم العامر راقية حد إدهاش القروي القابع بأعماقي..

و لم يغادرها منذ أن دخلتُ تفتيش سوبا نازحآ قبل أكثر من عقدين من الزمان..

تقديري

.

يا اخ لنا لم تلده امنا
يااااااااااخ منك
انت بتكتب كده كيف
برااااااااااحه
والله انت اكبر فنان

وحاتك ما لقينا غير الاومليت
والفطور حبيب الشعب قصدى الفول
نحنا دفعه واحده من الجامعه بنمشى نفطر هناك يومياً نسأل الله ان ينتهى المؤتمر عشان نقدر ناكل معاهم قصدى (الفول)

شوف الجنيات والبسوو فيهو ام حومد ود عبد العزيز من يوم تسعطاشر معان ونحن ما خابرين والله حكايه
اكان ما بوست الطيب ود الاكرمين ده ما بنزاد كنت فتحت ليك
بوست ترحيب ليهو هقله؟؟والله يا شبوكه حكايه؟؟
يلا ورينا سيرفاتك؟؟ ويا الطيب انت وين معانا والله مع الخيانه؟؟ والله مشتاقين
انور ود بتول

أظـن أن هذا هو (كـل الجمال)..
أنور ود بتول ..و شبكة..الإتنين في (طبق) واحــد؟؟
طبق فول؟؟..طبق فضائي؟..المهم..أن الله قد أتاني بهم جميعآ..
و الله إني إذن لسعيدُ..
ياخ مرحبتين حبابك.."هووووي"..
وحشة ما بتعرف رسايل يا أبا غيداء..و أنا داااايمآ معاكم..
و ان شاء الله أكيد أكيد ح نتقابل..

اها يا الطيب ن الزول ده شغله تمام ، قصرت معاك

زول بيغنى صاح


ولك ودى ، والتحية للاسرة الكريمة

أهلين طهرقة العظيم
و الله ما قصرت معانا طـب
حبابك ...و تحاياك توصـل
أبلغ عني أحفاد الملوك سلامآ و معزّة

صديقنا
الطيب بشير

تجدني فرحا بتواجدك في هذا الاثير..فتمدد بقريضك
وببوحك بما فيه من عام وخاص وما بينهما..ورطب الشجن وزمله بأفق
وبعف الكلم وجزالة المعني وصدق الرؤيا..ورحم له الاستاذة ليلي المغربي
التي كانت تهدهد الاثير في ذلك الصباح وتهدهد مشاعر أمة مكلومة..والعافية لجارتنا رجاء حسن حامد
التي هزمها "الرمد اللعين"، فجلست في منزلها بعيدا عن عشها الاول:الاذاعة..
كانت لنا ايام معك اتذكرها في استديو الجزيرة بالخرطوم وتلك الايام تم إعلان النعي عليها فتناثرنا في وهاد الدياسبور وفيافيها
المريرة وما تستطعمنا إلا النوستالجيا، قبح الله وجوه التتار الجدد والقدامي..لا يجرمنك شيئا من تناول ونقد
الدارفوريين من أهلي هنا، فصدق النقد هو الذي يعبر بنا إلى تلك المقاصد..ودارفور بلدك
كما الشكينيبة بلدي..أغرس قلمك المؤدب في محبرة الصدق وجاسر نفسك بالحق
ولطف "جوانيتك" بهم الجماعة، وستغدوا مربحا بهذا الحب..والكتابة حب ..لصلاح الناس وفرحهم، وقبل كل شئ كرامتهم
التي نحاول أن نصبوا إليها..
واصل في مد الحكي الروي وبذل من عطاء الخير، فالله يرعاك..
أفتقد صوتك الاذاعي ويا له من وطن يحارب الحنجرة المعطاءة..
أحفظ التواصل ففيه القدر من حفز نشاط القلب.
كما نهض أجنحة قلمك الذي أعرف، ففيه من الذرابة والهظول ما لا يعرفه كثيرون.
ودمتم

أخوك
صلاح شعيب
واشنطن

.

حبيبنا صـلاح شـعيب
ألف أهـلآ بك في البوســت ..
و ألف بركة بالطلـّـة..
أتابعك في (الصحافة) بانتظام..تكتب بمداد من نور..و آخر متبعاتي مقالتا بوردنا الطريد..
أسعدني كلامك اللطيف عن كتاباتي و عودتي للبورد، و أظنني بحاجة لاستشارة حول الفرح بإطرائكم و ضرورة ألا "يكبر رأسي"..و يقع عليك عـبء إعادتي لجادّة التواضـع..
دارفور بلدنا يا حبيب، أو كما قال الرائع عمر إحساس، و أنت منا ...أنا أكلت برتقال جبل مرة سنة تلاتة و تمانين..أكلتو من أمـّـو ما من السوق..و سبحت في شلال قلول و شربت من شلال ساورا..رقصـت في النقـّـارة في سـُكـّـر شـتـّـِـت..و أخذت زينتي عند كل مساجد الوادي و تكساس..و هالني جمال الطريق المسفلت (نيالا ..كاس ..زالنجي)..
علاقتي بعبقرية ذاك المكان علاقة محبة، و هي نسبُ واااااصـل، و لمثلك نعفي الدم..فما بالك بسـوء فهم مع إخوة في السايبر نعتب على أنفسنا بقدر ما نلومهم في أن كلينا انتصر لنفسه و ضحـّـى بضرورة إيجاد (الحـدّ الأدنى) للتوافق و الإلتقاء لا التناحر و الشقاق..و من مقالات و مواقف أمثالك نتلمـّـس خطى الوسطية التي تجمع و اسمح لي أن أحيي في معرض كتابي لك صدق محبة الأخ محمدين محمد إسحاق..و نسألكما أن تكونا شهيق و زفير الدعوة لوحدة صـف المتضامنين مع القضية بلا ألقاب إقصائية و بلا تضييق جهوي..
يرحم الله أيام ليلى و المغربي و ..سأقوم بزيارة "خاصة" للحبيبة رجاء حسـن حامد سفيرآ مفوضـآ من جلالتكم لتبليغ التحايا..ألا رحم الله أيام استوديو الجزيرة بالخرطوم و عوّض شبابها بلقاءات في جنـّـة السودان و نعيمها الحبيب..
تقديري أخي العزيز..
و محبتي..

.