المرحوم (الله يرحمه) التقول كان حاسي !!!!

المرحوم (الله يرحمه) التقول كان حاسي باليوم ... عبارة تتداولها بيوت العزاء السودانية حتى صارت جزء لا يتجزأ من طقس بيوت العزاء ... ليس أقل من (الصيوان) ... ولا (الشاي السادة) ... ولا (النميمة) ... ولا (تداول الحكي الرياضي) ... فتجد أحدهم يقفز فجأة بالجملة : والله يا أخوانا والله المرحوم الله يرحمه ــ هنا فترة صمت قليلة لا بد منها لغرض التشويق , تجميع الأفكار حول كيف كان حاسي وإتاحة الفرصة لأصوات تتناغم الله يرحمه .. الله يرحمه .. إلخ ... تعرفوا أولادوا قالوا قام الصباح حضنهم واحد واحد ... وبس تاني إلا (الخبر)!!! ... ثم أصوات : لاحول ولاقوة إلا بالله ... سبحان الله سبحان الله ... ولابأس من حكاوي مشابهة لزيادة الحبكة : تعرفوا (محمد) ود ناس العزة ؟؟؟ ... نفس فترات الصمت وتكرار غير ممل للجمل فـ (محمد) مرحوم آخر : لما جاء مسافر قال عاين لأمه وبكي وبكت ... ثم نفس الحوقلات والسبحنة ...علماً بأن(محمد) هذا قد يكون سافر (9) مرات وفي كل مرة عاين لأمه وبكي وبكت ... ومرحومنا هذا قد يكون من المتعودين حضن أبناءه حين الخروج وحين الدخول ... وقصص من شاكلة (تصدق غشى الطريفي سدد دينه) لمرحوم معتاد دين ومعتاد سداد الدين ... ليس حباً في السداد ولكن حباً في الدين الجديد... لفتح صفحة دين جديدة ... والأن لو أنا تُوفيت لرحمة مولاي يجي واحد ويقول ليك (تصدق المرحوم(الله يرحمه )...إلخ والله التقول كان حاسي... تصدقوا قبل تسع سنوات كتب بوست بعنوان ...المرحوم (الله يرحمه) التقول كان حاسي !!!!

Quote: والله التقول كان حاسي... تصدقوا قبل تسع سنوات كتب بوست بعنوان ...المرحوم (الله يرحمه) التقول كان حاسي !!!!

:D :D :D :D
يازول اوعاك تكون حاسي

"تصدقوا قبل تسع سنوات كتب بوست بعنوان ...المرحوم (الله يرحمه) التقول كان حاسي !!!! "


التسعة سنين ان خايف تعملها تسعة شهور او تسعة ايام?

طبعا طوالي اتذكرت نكتة زول كان متغرب في السعودية في مناطق الشمال
عشرة سنوات مالاقى فيهن سوداني ولا رجع البلد..

قال لي كفيلو عايز حسابو راجع السودان بعد العمرة..

اثناء ما هو طائف بالكعبة..! لمح سوداني ساجد امام الحجر الأسود
لف لفاته ولسة زولك ساجد ..بعد فترة طويلة والزول لسة ساجد
قال في نفسو الزول تكون حصلتلو حاجة..

راح واقف بالقرب منه..

سمعو يقول اثناء سجودو:
- يالله تديني موت الجمعة..يالله تديني موت الجمعة..يردد ساكت.

قم قاليهو:

- الجمعة الفي وشينا دي!?

أكان صاحبك رد وهو لايزال ساجد:

- لا لا

ياخي حرجة العنوان (اللنك الموصل للموضوع ) حركة عجيبة
خلتني لافي في البوست داير ما يدور

تعرف يا افكاتو

الهكر كان قلبو حاسي بالحظر

انت المنبر دا ماله بقي زي محطة تمانية (زمان)
كل يوم شكلة وبالعدم كشة

Quote: يازول اوعاك تكون حاسي

(محجوب) تفتفتفتفتفتف
فال الله ولا فالك
يازول دي (خاطرة)
مالك داير تسويها مُـ(خاطرة)

Quote: سوداني ساجد امام الحجر الأسود لف لفاته ولسة زولك ساجد ..بعد فترة طويلة والزول لسة ساجد قال في نفسو الزول تكون حصلتلو حاجة.. راح واقف بالقرب منه.. سمعو يقول اثناء سجودو: - يالله تديني موت الجمعة..يالله تديني موت الجمعة..يردد ساكت. قم قاليهو: - الجمعة الفي وشينا دي!? أكان صاحبك رد وهو لايزال ساجد: - لا لا

والله خايفها تبقى على أخوك : يقول وا ي التسع سنوات الجاية دي أقول ليهم (لا لا) البعدها !!!

تعرف يا أبو (الساء) ...وأبو (الساء) هي محاولةتمليح لـ (أساسي) التي هي نفسها تمليح لـ (السماني) بحسب تخريج لـ(تراجي مصطفى) ... لاحظت أخوك بقى يقول كلام مُعقّد كيف !!! أها أنا لي كم يوم بقرأ كلامك ده و(أضحك) ... ما عليك على نفسي وأسألها (أعترف؟؟؟) ... لا ما أعترف ياخ إنت عندك نضالات مع ( مهمشي الترطيبة) الذين أعادوا ترتيب أولياتي العدائية كالآتي 1. مهمشي الترطيبة 2. ... لعدو قادم 3.... الإنقاذ ... وبجيك (صاد)

اليوم ( جمعة) ... يوم (نوراني) ... يوم صدق وشفافية وملائكة تتنزل بالرحمة (إذن إعترف) ...
...
...
...

الإعتراف : انا ...وأثناء كتابتي (شيطان كيبورد) تغشاني وأوحي لي بفكرة الرابط لسبب لم أعرفه
... في السيستم (تكتب وتقرأ ما كتبته) ... فقرأت ما كتبت ووجدت (الرابط) ... فتحته ... فقرات ... فوجدت الرابط ...ففتحته ... فقرأت ... ثم وجدت الرابط ... ففتحته... فــ.. فــ ... ثم حين إكتشفت خدعتي لنفسي ... ضحكت ... رجعت للموضوع وجدت القراءات (87) !!!!
...
...
...