والله مما شفت الاسم ده وجيت جاري جري عليك الله بعد الجكه دي كلها اتحفنا بيها
Post: #8 Title: Re: **** الـوعــ ضنيـين ــــد **** Author: هاشم أحمد خلف الله Date: 11-19-2007, 08:42 PM Parent: #6
الجميل جداً حسام الدين مشكور علي بث الجمال واذكر اننا إستضفنا الشاعر الكبير صديق مدثر في دارنا دار رابطة أبناء الصحافة بالرياض وكان يوماً حافلاً وقد تحدث الأستاذ الشاعر صديق مدثر عن هذه الأغنية وكيف لحنها الفنان عبدالكريم الكابلي وإنشاء الله أقدم معك مشاركة لذلك المنتدي , فقط يلزمني بعض الوقت وكيفية تحويل شريط الفيديو إلي ذاكرة الكمبيوتر ومن ثم اقدمها لكم كاملة إنشاء الله .
لا تدري كم الأحاسيس التي تنتابني عندما استمع لهذه الأغنية بقوة أداء الكابلي فيها أو أترنم بكلماتها ولحنها المتفرد!
زاد من عشقي لهذه الكلمات عندما حدثني صديق مدثر - الذي ألتقيته في مدينة الرياض عام 87 على ما أذكر - عن السبب وراء كتاباتها! القصيدة الأصلية تعدت أبياتها 46 بيتاً ، إنتقى من الحصيف الكابلي هذه الأبيات ليلحنها ويشدو بها لتدخل القلوب في هدوء وسكينة فتريحنا وتشجينا وتدمعنا وتطربنا!
Quote: ربما سماع هذه الأغنية يهدئ من روع الأعاصير الهائجة هذه الأيام ..
(البحث عن الذات ) كتاب (أُلِّف) لأنور السادات.
Quote: لو بتعرف عازف الباص في الأغنية دي وريني أسمه بس! ياخ دا ما طبيعي أبداً .. أدى الأغنية أبعاد غريبة
أمير إنت ما نصيح .. والله والله أنا أعدت سماع الأغنية عدة مرات عشان الباس جيتار قبل أن أقرأ تعليقك ، بالله كدي (شوف) الحركه في المساحه الزمنيه بين( أهديتك حبي) ومباشرة قبل (من فؤاد يبعث الحب نديا). والله يا أمير (الحته) قبل ..وأبث الليل أسرار الهوى الأولى.. جن عديل كده. أمير بتبالغ .. ياخ أي لزمه فيها باص يكتل. لكن رغم ذلك فإن الساكس يدمرني ويعيد تركيبي ، كدي (شوف) المصاحب لومضة عشت على إشراقها وانقضت عجلى .. يا أمير دا ساكس أخطر من أي مفاعل حكى عنه البرادعي. الله ما يشفيك يا حسام من السماحه دي.
عارف يا محمد ... نفس شعورك دا في حتة (ومضة) مع الساكس طلعت روحي عدييييييييل! الساكس دا آله غريبة فعلاً بتعرف تحرك فينا الأحساس بسهولة وحاجة غريبة كمان ما أظن يكون قابلك لحدي الليلة عازف ساكس (سَكَة) أحساسهم دايماً عالي جدا. طيب أرجع أسمع الأغنية تاني ولاحظ الأنسيابية العالية في تسليم الساكس لكابلي ولاحظ إستلام الكابلي بنفس نظام الساكس (من همس لعالي) بتحس دخول كابلي كأنه أستمرار للحن.
لكن الزول الإشتغل ال(Bass) في التسجيل دا مبالغة بمعنى كلمة مبالغة ... ياخ دا قلب هوبة في باقي المازورة بعد لزمة (أهديتك حبي) وقبل (من فؤادٍ). تاني حاجة لاحظ لحاجة غريبة في الأغنية دي في المقطع التالت ...لاحظ الإيقاع بحافظ على شكلو الأساسي(رومبا) لكن الشكل العام للملوديا متجه (للسامبا التقيلة)! ياخ الليلة دي شكلو ما في نوم:D
Post: #14 Title: Re: **** الـوعــ ضنيـين ــــد **** Author: مامون أحمد إبراهيم Date: 11-19-2007, 11:12 PM Parent: #13
العزيز حســـام سلامات .. ضنين الوعد + ماخلاص نسيتنا وخليتناوخليناك كمــان + طائر الهوى .. تعرف ديل اول اغنيات خلقو لي علاقة مباشرة مع الكابلي .. وخلوني ادمــن استماعو في وقت كنت ما بطيق اسمع فيها مجرد اسمو .. ( الكلام دا زمان طبعا ما حسع دي ).. لما اسمع ضنين الوعد قاعد اسال نفسي .. هل ممكن يتكتب شعر تاني بالطريقة دي ..؟ واللا في طريقة تاني لي اللحــان زي دي .. ؟ واللا روعة الاداء للاستاذ .. اختيار خطير يا حسام يا فنان..
Post: #18 Title: Re: **** الـوعــ ضنيـين ــــد **** Author: محمد المرتضى حامد Date: 11-20-2007, 10:49 AM Parent: #17
Quote: عارف يا محمد ... نفس شعورك دا في حتة (ومضة) مع الساكس طلعت روحي عدييييييييل! الساكس دا آله غريبة فعلاً بتعرف تحرك فينا الأحساس بسهولة وحاجة غريبة كمان ما أظن يكون قابلك لحدي الليلة عازف ساكس (سَكَة) أحساسهم دايماً عالي جدا. طيب أرجع أسمع الأغنية تاني ولاحظ الأنسيابية العالية في تسليم الساكس لكابلي ولاحظ إستلام الكابلي بنفس نظام الساكس (من همس لعالي) بتحس دخول كابلي كأنه أستمرار للحن.
الأمير الفنان ، حقيقه يا أمير ممكن تلاقي عازف عود تعبان وكمنجه هلكان وكيبورد مِودِّر لكن الساكس دا ما لاقاني زول بيعزفو بيهذِّر بيهو. شوف ، أحبابنا في أثيوبيا عندهم واحد اسمو ياريد تفاري دا لو سمعت ليهو معزوفة زي (المانسونا) حاتشعر إنو هدومك من الحرير الطبيعي حتى لو كنت لابس خيش لكن برضو ممكن تشرِّطا. وبالطبع كيني جي وفوستو بابيتي ما عايزين كلام فارغ من جانبي وكذا الخواجه اللي عزف مع رشا شيخ الدين عذارى الحي وأما عبدالله دينق ده واحد كنا بنسمعو ونحن أطفال وكان ( بيضقل ) بالساكس وهو الذي حبب إلىَّ تلك الآلة وكان قائدا لفرقة تسمى فرقة جاز المدرعات في السبعينيات وبالطبع لاننسى المبدع حسن الشايقي لكن أرجع أقول ليك عبدالله دينق دا لما كان يعمل صولو قسما بالله شعرة جلدك تكلِّب. لكن برضو عازف الباس ساهر بي يا أمير عشان كده حا أعمل بوست خاص بحيث لا أغير موضوع البوست ألحقني هناك مع Getachew Mekuria .
Post: #19 Title: Re: **** الـوعــ ضنيـين ــــد **** Author: سوسن عبد الله Date: 11-20-2007, 11:12 AM Parent: #18
ســـــلام
جيت أسجل حضور مع معجبي هذه الأغنية بالجد أغنية إبداع.
ومضة .. عشت على إشراقها وانقضت عجلا .. وما أصغت إليا
ياسلام على الانسان لمن يكون انسان بحق ، مابيجى منو الا كل شى جميل ... شكرا كتير ليك على كابلى وعلى صديق مدثر ، اختيار موفق شديد فرحتنا الله يفرحك يارب ... تسلم انشالله
مش يا امير في ناس سمحين كدا كلما تقعد معاهم أطول تكتشف فيهم جديد يخلي سماحتم زايده؟ الغنيه دي والساكس والباص والكابلي ديل مرات ... غايتو. كدي بالله شوف الآله دي جميله كيف
Quote: ياسلام على الانسان لمن يكون انسان بحق ، مابيجى منو الا كل شى جميل ... شكرا كتير ليك على كابلى وعلى صديق مدثر ، اختيار موفق شديد فرحتنا الله يفرحك يارب ...
و فرحتنا جيتك أكتر ..
تسلمي ..
Post: #25 Title: Re: **** الـوعــ ضنيـين ــــد **** Author: محمد عثمان Date: 11-20-2007, 09:15 PM Parent: #1
الصحاافة... شغل نضيف يقال ان الفنان وردى غار وبشدة من هذه الاغنية فما كان منه الا ان طلب من الشاعر صديق مدثر ان يكتب له اغنية مماثلة بالفصحى فكانت اغنية عاد الحبيب... اتمنى ان يمر الاخ عصمت العاالم على هذا البوست فهو خير من يكتب عن قصة هذه الاغنية بين حى بانت و مدرسة ام درمان الاهلية للبنات...
Post: #28 Title: Re: **** الـوعــ ضنيـين ــــد **** Author: Amir Omer Date: 11-21-2007, 00:31 AM Parent: #27
الراجل الفنان العزيز حسام
Quote: يا ريت تحكيها لنا ..
ما عارف غايتو من حقي أحكيها في منبر عام زي دا ولا لا؟ منبركم دا ياخوي يخوف الكلمة فيه بحساب غايتو ح أدي خطوط عريضة على مسئوليتك لحدي هاشم خلف الله ما يجيب الفيديو .. وزي ما بقولوا "حلو الغنا في خشم سيدو"
على العموم هي قصة حصلت لصديق مدثر أثناء وجوده في سوريا والزولة المكتوبة فيهاالقصيدة جاء ذكر أسمها في القصيدة (صدفة) ... والأستاذ صديق ما أنتبه للحتة دي (حسب قوله) إلا عندما تم نشر القصيدة في الصحف! شفت ليك تجلي زي دا عليك الله؟ غايتو دا المختصر لحدي ما يظهر الشريط أو يجينا عمنا عصمت العالم
المسنجر ما شغال يا حسام كنت وريتك أسمها
___ محمد المرتضى: ما تحندقني عليك الله أمشي نزل البوست خلينا نشوف أخرتها شنو
Post: #36 Title: Re: **** الـوعــ ضنيـين ــــد **** Author: معتصم دفع الله Date: 11-22-2007, 12:11 PM Parent: #1
ضنين الوعد يا ضنين الوعد أهديتك حبي .. من فؤادٍ يبعث الحب ندياً .. ان يكن حسنك مجهول المدى .. فخيال الشعر يرتاد الثريا .. كلما أخفيته في القلب .. تنبي عنه عيناك ولا يخفي عليا .. أنا إن شئت فمن أعماق قلبي .. أرسل الألحان شلالاً رويا .. وأبث الليل أسرار الهوى .. وأصوغ الصبح ذوباً بابليا .. لا تقل اني بعيد في الثرى .. فخيال الشعر يرتاد الثريا .. *** كان بالأمس لقانا عابراً .. كان وهماً كان رمزاً عبقريا .. كان لولا أنني أبصرته .. وتبينت ارتعاشاً في يديا .. بعض أحلامي التي أنسجها .. في خيالي وأناجيها مليا .. ومضة عشت على اشراقها .. وانقضت عجلى وما أصغت إليّ .. *** كلمة خبأتها في خافقي .. وتدفقت بها براً حفيا .. من دمي غذيتها حتى غدت .. ذات جرس يأسر الأذن شجيا .. إن تكن أنت جميلاً .. فأنا شاعر يستنطق الصخر العصيا .. وإن تكن أنت بعيداً عن يدي .. فخيالي يدرك النائي القصيا .. لا تقل اني بعيد في الثرى .. فخيال الشعر يرتاد الثريا ..
تحياتي يا حسام .. عارف الأغنية دي عندي ليها ذكريات خاصة وكثيراً ما أدندن بها .. عندي قريبي الله يطراه بالخير من كتر ما بنرددها مع بعض حفظناها عن ظهر قلب بلحنها الجميل دا .. وعلى لسان شاعرها الأستاذ صديق مدثر إنو الأغنية دي عنده ليها ذكريات كتيرة ومن ضمنها .. أنو أحد طلاب العقاد إستاذنه في قراءة هذه القصيدة وحين إنتهى منها قال العقاد لا يزال الشعر العربي بخير طالما هناك شاعر في جنوب الوادي يستنطق الصخر العصيا .. وقد لحنها الكابلي وأداها بطريقة رائعة أصبحت بعدها من الإغنيات السودانية الخالدة .. متعهما الله بالصحة والعافية ..
ياسلام ياسليم القصة جايطة والجماعة ما عارفين معزتم وخيال الشعر يرتاد الصحافة ثم يذهب بنا الكابلى إلى عالم الشاعر الرقيق صديق مدثر ويختار له قصيدة رائعة الاستهلال : يا ضنين الوعد أهديتك حبي .... من فؤاد يبعث الحب نديا
Quote: زاد من عشقي لهذه الكلمات عندما حدثني صديق مدثر - الذي ألتقيته في مدينة الرياض عام 87 على ما أذكر - عن السبب وراء كتاباتها! القصيدة الأصلية تعدت أبياتها 46 بيتاً ، إنتقى من الحصيف الكابلي هذه الأبيات ليلحنها ويشدو بها لتدخل القلوب في هدوء وسكينة فتريحنا وتشجينا وتدمعنا وتطربنا!
فصة الأغنية دى حقيقية وأنا شفت صاحبة القصيدة . هى زميلة الشاعر وكان بينهم وعد بالزواج بدلته ببعثة تعليمية كان من المفترض التنازل منها بإتفاق بينهما . ولكنها وافقت عليها بدون إعلامه وكان بمثابة فض للإتفاق . كلاهما كانا إساتذة مدارس ثانوية . وهذا تفسير للحتة بتاعة
Quote: فصة الأغنية دى حقيقية وأنا شفت صاحبة القصيدة . هى زميلة الشاعر وكان بينهم وعد بالزواج بدلته ببعثة تعليمية كان من المفترض التنازل منها بإتفاق بينهما . ولكنها وافقت عليها بدون إعلامه وكان بمثابة فض للإتفاق . كلاهما كانا إساتذة مدارس ثانوية .
موقف صعب و قاسي جداً .. لكن لولا تلك المواقف لما خرجت لنا مثل هذه الروائـع ..
Quote: إن تكن أنت جميلاً .. فأنا شاعر يستنطق الصخر العصيا .. وإن تكن أنت بعيداً عن يدي .. فخيالي يدرك النائي القصيا .. لا تقل اني بعيد في الثرى .. فخيال الشعر يرتاد الثريا
..
شعر
ثم
خيال
ثم
خيال الشعر
ما أجمل التواجد فى حضرة صديق مدثر و كابلى و عروستهم ضنين الوعد
Quote: فصة الأغنية دى حقيقية وأنا شفت صاحبة القصيدة . هى زميلة الشاعر وكان بينهم وعد بالزواج بدلته ببعثة تعليمية كان من المفترض التنازل منها بإتفاق بينهما . ولكنها وافقت عليها بدون إعلامه وكان بمثابة فض للإتفاق . كلاهما كانا إساتذة مدارس ثانوية . وهذا تفسير للحتة بتاعة
نعم حقيقية وأنا أعرف ابنة اختها أيضا المعنية بالقصيدة فخورة جدا بها
لكن بينى وبينكم مش البركة فى عملتها الخلتو يطلع دا كلو زى مابقولو دائما
الحزن يولد الإبداع ودى حقييييييييقة بس ما مية المية عشان كان بقينا مبدعين هاهاها
