وكان جاك خريف الوجعة.. سويلك بيوت في داخلي أبني وعشعشي .. وأديني إحساس .. إني شي

بت من ورق*

هوي يا الحبيب
أحسَن عيونك فتحن
ونفض غبار الجامعات الكتحن
عبرات هواي لو سدسدن حلقك
تحن لي زول سواي ما تنحنحن
وأنا أصلي عارفك ما بتحن
ليه العوينات البريدنك
تخونن وتجرحن
ليه بالدموع والنوح
مع الناس تفضحن
وأنا ديمه بسأل ربي
إنو الطالبات يسمحن
******
الطالبات
يسمحن ويفرحن
******
وبالخير تملي يصبحن
ولو في مشيهن لكلكة
يصلحن
بس لو ظهر كاشف رقم
لا يصافحن
لا ينجحن
******
هو شنو الفضل في الدنيا
شان الناس تذاكر وتمتحن
بس نبرى من عيشة الفقر
وسمح السكات
الفي خشم سيده
وكمان سمح الصبر
مادام في مدرسة مدرسة
وأساتذة خصيصين نجاح
وحصص صباح ودرس عصر
حنسوي إيه
حندق جرس آخر فصل
أو ننفصل نتلم نشوف باقي العمر
ماواضحة زي عين الشمس
واضحة كان هسه وأمس
******
وأصلي مارق ياضنى
من غنوتي الأنا مدمنة
من بلوتي وسلواي أنا
من قصة لا بتكلنا عيش
لا تفر جبين هذا العنا
من شدة فاردة الإرتخا
ومتمكنة
من ممكنة وما ممكنة
وإيه لزوم يعني القصيد
وكتين تموت العاطفة
وكتين نعتم فكرتو
وحروفو ذاتا نلونا
وكتين نغتغت مهجتو
وندس عيونو وندفنا
ايه لزوم يعني الشعر
الماعرف معانهو
ولا شيتا عنا
******
أبقى مارق ياجنى
كان من هناك
أو من هنا
كان منهم
أو مننا
من مزامير التوجس والغناء
من صباحات الهواجس
ومن طوابير المدارس
ومن مروق الروح
وأمرق من متاهات النفس
ماواضحة زي عين الشمس
******
واضحة في كل الجرايد
والقصايد والمعابد
والمصانع والشوارع
لما دون نشعر نحس
ولما دون خاطر يمر
واضحة إنو سكاتو مقدود من دبر
وكلامو مقدود من دبر
وضميرو مقدود من دبر
وقميصو مقدود من دبر
لكن منو البشهد عليك
يابت مادام كلك عذر
يابت مدام عرفوك جد
بتخافي من ضل الضحى
ومن بشرة الناس السمر
ويؤسفنا جدا إننا
يؤسفنا أسود مننا
ومحنية ضهرو من الكبر
وعرفوك جد بتخافي من ضل الضحى
ومن ضحكة الناس السمر
عرفوك
بس هم ماأظن فهمو العيون السمحة فيك كانت شتر
ويسلم ضراع الطين
يسلم ضراع الطين
وقدح المونة
جيت أمونة
حر الواط ة وادة صحونها
للولد البشيل طوريتو
سباق الفجر
******
وتضيع سنين العمر ليه في المدرسة
المدرسة المابتجبر الخاطر إذن
المدرسة المابتستر الحال بكرة
مابتملالنا فد شوال تمر
ياخ ايه لزوم يعني الدفاتر والمحابر
والشنط والأردية
والدق ودرس اليوم
وحلق الراس وقليم الضفر
ايييييييه
يا سنين المدرسة
فدتينا إيه يامدرسة
دي الجامعة لسع فيها ناس بتحب بعض
وتلبس بعض
وتاكل بعض
وتقوم بعض
وتقعد بعض
وت........
منو العوض وليهو العوض
******
وفي ناس كمان
تجمع ورق فاضي وتمر
تنجح فشل
تسرق حصاد غيرها وتمر
وكتيييييييير في ناس بتفط سطر
******
ياشعبي أصحى كفاك شقى
وكفاك خطاك علىي الجمر
لمتين حنحلم بالغناء
لمتين نعدي من الضياع
والفرقة والحرقة ونمر
وسمح السكات الفي خشم سيده
وكمان
سمح الصبر
والدنيامازالت بخير
والدنيا مازال فقر
******
وأنا زي دراويش العشق
ماسقت خطوات الرحيل
لكن مشيتا وبالجبر
لكن مشيتا وفوق جمر
وحبيبتي قالت لي تعال
تعال
ومرقت من جلدي القديم
ودرعت توب الصبينة
ومشيتلها وأنا منتهي
سنتين
ولا قعدت عيوني مع عيونا اتونست
لا في الخيال لاقيتا
لالاقتني هي
سنتين ولا بنبدالنا سكة
ولا خطانا بتنتهي
سنتين ورغم الابتعاد
والعشنا من خوف وارتعاد
لسع سعاد
هي بتستحي
وأنا بشتهي
وأنا بستحي
وهي بتشتهي
ومابين نعم واللقيا كان حرفين نهي
وأنا خاطري من كتر الهموم
الساعة خمسة نسى وسهي
وفي الهم غرق
وبالشوق حرق
وحبيبتي قالت لي تعال
خافت
وكت قتليها شيخ
مسكينة
ماعارفة الفرق بين الدراويش والشيوخ
بين الصفيقات والعِرق
بين الغرق والماغرق
تاريها زينا يا خلق
طينة
ومطينة بالعشق
ومقتولة لي حد السكات
ومتيمة
بس كنت ديمه بعلما
انو الحزن زاد الفرح
والفرحة نفسها مؤلمة
والعافية أسمح منها
لوحتى كانت بلسما
والشمس في توب من حلال
والقمرة أكبر مجرمة
وكضابة مابْتَحَلِبْ لبن
القمرة
مابْتَحَلِبْ لبن
ومليانة زيف ومهَضْلِمة
وممسوخة
مهما اتبرجت
مازي مصابيح السما
والقدرة مابتنفات شبر
القدرة
مابتنفات شبر
والسترة ميها الكمكمة
والناس سواسية كالمِشِط
والحرة
دينا ملجما
والحلوة مي حلوة طعم
والمرة ربنا قاسما
والقسمة ما بالإيد كمان
الإيد هي زاتا مقسمة
أصبع صغير
وأصبع كبير
وأصبع وسط
وأصبع نضم
وأصبع بدخل خاتما
وتفرق بداية الشوق
كتير
وكتين تصل للخاتمة
ماالريدة بتشوف بي تحت
والحب موشح بالعمى
ومابفهم النور
إلا زول عاش في دياجر مظلمة
النجمة مابتعني الوضوح
العتمة ميها الهضلمة
الوشمة مانزف الجروح
والبسمة عز البفهما
ماالنسمة في الصيف لو تفوح
تَحَرِق حشا البتنسما
والوجعة بااااااااردة
علي الببوح
وتسل رويحة البكتما
والروح بتمرق مابتموت
الروح بتمرق مابتموت
والجتة بتقيم مأتما
ونحن انعكاسات للنجوم
والواط ـا ضل راميا السما
وأنا ما رميت إذا رميت
وأي عاشق مارمى
وضحك المشيب برأسه فبكى
ونادى سلما
وسمت بغاة الطير حين كبا حزينا مرغما
ووريتا معنى القارعة
وعقروا
وربك دمدمَ
حفظتها الناس
والفلق
والحمدُ
والإخلاص
وطه
ولم يكن
والعاديات
وكأنما ماكان في شي
وبعد ده كلو بتنتشي
ولابتستحي ولابتختشي
وقرمت كرعيا بالمشي
وكلمتها
قلت ليها أوعي تدقشي
الطيبة مافي كل شي
ومابتهبشي
الجوه خليو جوه فيك
والمايخش ماتخششي
ودمع الظنون البيني بينك قشقشي
ماتدقشي
الطيبة مافي كل شي
وماتهبشي
الجوه خليو جوه فيك
والمابخش ماتخششي
ودمع الظنون البيني بينك قشقشي
والشوق علي باب البريدك وشوشي
ونار النضال جمب الشمش
ماتمشي بي راحتك عليها روحي هوي
بتشمشي
وكان جاك خريف الوجعة
سويلك بيوت في داخلي أبني وعشعشي
وأديني إحساس
إني شي
وقرمت كرعيا بالمشي
وكلمتها
خلي بالك يابنية
العمارات البناطحن
والمعاني القرمزية
أوع تسرق من ملامحك
أو تغير فيك شوية
ماني شايل هم قرايتك
انتي قراية وذكية
أبقي جد ياحلوة فاهمة
وأبقي واعية
وكوني حية
أصلو في الجامعة العريضة
وفي بيوت الداخلية
في الحبايب وفي القرايب
وفي البقاسموك الأسية
إلا برضو خلي بالك
هي المصايب مي شوية
العقارب والكهارب
والدبايب والمصايب
وألف سوسة وألف حية
وانت سمحة
انت قمحة
ولسة نَية
ولو دقستي
أسأليني أنا الدقست
وأكلوني السمسمية
في زمنا
بدفنوك يازولة حية
أبقي واظبي علي صلاتك
قومي كل مانادى حي
وخلي بالك في الشوارع
والمسافات القصية
وفي مشاوير العصاري
وانت ساعة المغربية
وفي الحدايق والكباري
والملاهي الأجنبية
والوليدات الأخير لك من تصاحبيهم بنية
والبنيات البزلطن وش
والبتعمل فيها شيخة
أو تقول بتشوفلا طية
وفي القراية سجم رمادن
أبقي مارقة وناغمي ليا
مرة تلقى الضمة شدة
ومرة تلقى الشدة مدة
وعادي تلقى الخمسة مية
وأسمع أسمع
وياما تسمع في البغنن
الله ليا
وكر عليا
وجيبوا ليا
و...
ونحن ياحليلنا الغلابة
بلعبنبنا كوعلية
ودايرة بيرقرودايرة شية
ودايرة طرحة
وتيكو ملحة
ودايرة just
وميج ومسحة
وخصلة تايهة
وشنطة بطة
وعمو أسرع
انقبضت
وزولي نط
ودي المحطة
وهنا لقطة
وهنا ..!
وهييي ياانت وتاني هييي
وهيي وهيي
عندكم كلب ولا أجي بالدرب
أطفر ولابتدفر
الماف شنو
أبوك لاراضي لاراضي
كيسك فاضي ولانمشي القاضي
أشخت شخيت و ....
وفي النهاية القصة فك
في النهاية
القصة فكََ
دي الحضارة الدينا فكََ
ولاحقة حبوبة أمي مكة
وعاملة فيها رشيقة حية
ومهما نصرخ هي هي
وفي البتنسى أبوها يقدح
في ضنى أيامو الشقية
شان هي تقرا وبكرة تنجح
وتحيا مستورة ورضية
وهن حليل أماتن يبكن
بي وراهن
ووب وحي
إلا هن سجم المحنة
حليل زمنكن ياالرضية
لافؤادن مرة حن
لاطرن بالمرة جية
الشفايف مي شفايف
والشعر سوََنْلو كيه
وبدن الاسكيرت شرطة
وتاني فوق الركبة طية
وبمرقن ...
أحسن أسكت
أحسن أسكت
وشدي حيلك يابنية
شدي حيلك يابنية

*القصيدة لطالب في جامعة الجزيرة. الرجاء من يعرف اسمه افادتنا به.

Quote: ياشعبي أصحى كفاك شقى وكفاك خطاك علىي الجمر لمتين حنحلم بالغناء لمتين نعدي من الضياع والفرقة والحرقة ونمر وسمح السكات الفي خشم سيده وكمان سمح الصبر والدنيا مازالت بخير والدنيا مازال فقر

Quote: ومابفهم النور إلا زول عاش في دياجر مظلمة النجمة مابتعني الوضوح العتمة ميها الهضلمة الوشمة مانزف الجروح والبسمة عز البفهما ماالنسمة في الصيف لو تفوح تَحَرِق حشا البتنسما والوجعة بااااااااردة علي الببوح

Quote: خلي بالك يابنية العمارات البناطحن والمعاني القرمزية أوع تسرق من ملامحك أو تغير فيك شوية ماني شايل هم قرايتك انتي قراية وذكية أبقي جد ياحلوة فاهمة وأبقي واعية وكوني حية أصلو في الجامعة العريضة وفي بيوت الداخلية في الحبايب وفي القرايب وفي البقاسموك الأسية إلا برضو خلي بالك

سلام د.فيصل

والله الطالب كاتب القصيدة دى كان يسمع وصية لوالدة مغربية توصى ابنتها وهى مسافرة تدرس الجامعة بالمغرب
...كان انتحر...

دمت ودامت روائعك

سلامات سماح ومشكورة على المرور الانيق.

قصيدة بت من ورق قصيدة رائعة ومؤثرة وهي انعكاس للظواهر الاجتماعية الى يمر بها المجتمع والجامعات السودانية في الوقت الراهن.

Quote: والله الطالب كاتب القصيدة دى كان يسمع وصية لوالدة مغربية توصى ابنتها وهى مسافرة تدرس الجامعة بالمغرب ...كان انتحر...

ياريت تجبي لينا قصيدة وصية الوالدة المغربية لبنتها.

مع خالص الود والتقدير ،،،

Quote: بس كنت ديمه بعلما انو الحزن زاد الفرح والفرحة نفسها مؤلمة والعافية أسمح منها لوحتى كانت بلسما والشمس في توب من حلال والقمرة أكبر مجرمة وكضابة مابْتَحَلِبْ لبن القمرة مابْتَحَلِبْ لبن ومليانة زيف ومهَضْلِمة وممسوخة مهما اتبرجت مازي مصابيح السما والقدرة مابتنفات شبر القدرة مابتنفات شبر والسترة ميها الكمكمة والناس سواسية كالمِشِط والحرة دينا ملجما والحلوة مي حلوة طعم والمرة ربنا قاسما والقسمة ما بالإيد كمان الإيد هي زاتا مقسمة أصبع صغير وأصبع كبير وأصبع وسط وأصبع نضم وأصبع بدخل خاتما وتفرق بداية الشوق كتير وكتين تصل للخاتمة ماالريدة بتشوف بي تحت والحب موشح بالعمى

Quote: وفي النهاية القصة فك في النهاية القصة فكََ دي الحضارة الدينا فكََ ولاحقة حبوبة أمي مكة وعاملة فيها رشيقة حية ومهما نصرخ هي هي وفي البتنسى أبوها يقدح في ضنى أيامو الشقية شان هي تقرا وبكرة تنجح وتحيا مستورة ورضية وهن حليل أماتن يبكن بي وراهن ووب وحي إلا هن سجم المحنة حليل زمنكن ياالرضية لافؤادن مرة حن لاطرن بالمرة جية الشفايف مي شفايف والشعر سوََنْلو كيه وبدن الاسكيرت شرطة وتاني فوق الركبة طية وبمرقن ... أحسن أسكت أحسن أسكت وشدي حيلك يابنية شدي حيلك يابنية

دى قصيدة - مسرح - يادكتور فيصل ، بتدخل بيك من مشهد لى مشهد.. وتشدك حتى النهاية .
وبعتقد انها عبارة عن اسكتشات مترابطة ، وممكن تكون مجموعة قصايد.
التحية والود

Quote: دى قصيدة - مسرح - يادكتور فيصل ، بتدخل بيك من مشهد لى مشهد.. وتشدك حتى النهاية . وبعتقد انها عبارة عن اسكتشات مترابطة ، وممكن تكون مجموعة قصايد.

سلامات بشرى سليمان ومشكور على مرورك الكريم والاشادة بهذه القصيدة ذات الاسكتشات المترابطة، وكذلك فيها نصائح هادئة وعميقة لحد الطرافة لاخواتنا الطالبات في هذا الزمن الصعب.
شوف جنس الكلام ده.

Quote: ومابفهم النور إلا زول عاش في دياجر مظلمة النجمة مابتعني الوضوح العتمة ميها الهضلمة الوشمة مانزف الجروح والبسمة عز البفهما ماالنسمة في الصيف لو تفوح تَحَرِق حشا البتنسما والوجعة بااااااااردة علي الببوح وتسل رويحة البكتما والروح بتمرق مابتموت الروح بتمرق مابتموت والجتة بتقيم مأتما ونحن انعكاسات للنجوم والواط ـا ضل راميا السما

مع خالص ودي وتقديري ،،،