Post: #1
Title: (بورداب الخرطوم) عايز أديّنكُم 500 ألف !
Author: walid taha
Date: 11-08-2007, 01:07 PM
Parent: #0
بورداب الخرطوم سلام
لم أكن والى أمد قريب افكر ان اتنازل عن المبلغ المذكور أعلاه ولو على سبيل الدّين.
فماذا ترى دفعنى الى ذلك ؟
إبتدأ عّداد الصرف دورانه مع أول ايام الإجازة وكنت حريصاً جدا على (تصفيره) حتى أكون مًهيئاً وقريباً من ما يقوله الكثيرون عن دوامة الصرف فى السودان .
لن أحكى لكم تفصيلاً عن كيف تسربت تلك الدراهم الكثيرة حتى أصبحت قاب قوسين او ادنى من آخر ما أملك وهى ال500 الف .
بصراحة صرف خيالى فى هذه البلاد وأرقام فلكية ، حوائج الحياة اليومية تتصدر قائمة الصرف فى ظل الغلاء الطاحن . ثم تأتى الإتصالات وهى تلتهم ما فى جيبك وال pre- paid لا يرحم وبدونه يصعب كل شئ حتى صارت شركات الإتصالات تجنى المليارات وهى تجود ب (الكورلات) التى تعد نقطة فى بحر أرباحها. أنا شخصياً وبصراحة لا أحتمل ان أرى الرصيد (0) فمنذ بداية الإجازة وانا اتبع روشتة (Zain) (إسكرتشين صباح وإسكراتشين مساء) وكان لابد من (فرملة) اى (إسكراتش) عند اللزوم الشدييد حتى صار البعض يشكو من (مسكولاتي).
عموما ال 500 الف الآن أخر ما املك وحرصاً عليها قررت ان (أديّنها) لواحد من بورداب الخرطوم عضواً كان ام عضوة على ان يردها لى فى اخر خمسة ايام من نهاية الإجازة كاملة مكملة على ان يكون الشخص ذو صبر وجلد ويملك الموهبة فى الإحتفاظ بها بعيداً عن مصاريفه الشخصية وهو فى قمة الفلس والديون.
فمن هو القوى الأمين؟
|
Post: #2
Title: Re: (بورداب الخرطوم) عايز أديّنكُم 500 ألف !
Author: walid taha
Date: 11-08-2007, 07:29 PM
Parent: #1
ما زالت بحوزتى
|
Post: #3
Title: Re: (بورداب الخرطوم) عايز أديّنكُم 500 ألف !
Author: اساسي
Date: 11-08-2007, 07:43 PM
Parent: #2
ياخي والله انت صبور
اخوك عامل فيها مقددها واخد اجازة شهر قال ماشي يتجدع في السودان ومالي جيبه ورق اخدر ابو صلعة وازرق ذاء عقال مربوع
اخوك اخد ليهو عشرة يوم بس من العيد وبقي جسمه كله كاروشة
يتحكحك بي سبب وبدون
اخوك ما حريف
سوق اشاعة سريعة انه الشركة طالبني يوم السبت لامور طارئة لا تتحمل سفري
واتخارج اخوك من تلك البلدة الظالم جنيهها
وهو يضمر في جيبه خمسون ريال حق التاكسي من المطار
الان اخوك يجابد في ديونه القديمة والتي معظمها تعديات وغلاط
ولكن بالامكان هنا الحياة الكريمة بالغلاط
|
Post: #4
Title: Re: (بورداب الخرطوم) عايز أديّنكُم 500 ألف !
Author: احمد معتصم الطيب
Date: 11-08-2007, 07:51 PM
Parent: #3
أساسى الف حمدلله على سلامتك
وسلامة الخمسين ريال كويس لقيت طريقة تتخارج وفى جيبك خمسسسين ريال
دى كنت مصبنة وين يا حريف :
|
Post: #20
Title: Re: (بورداب الخرطوم) عايز أديّنكُم 500 ألف !
Author: walid taha
Date: 11-12-2007, 01:40 PM
| Quote: كويس لقيت طريقة تتخارج وفى جيبك خمسسسين ريال |
50 ريال الى هى 25 الف جنيه
25 الف دى تمن دجاجتين فى السودان
تقول لى شنو!
|
Post: #5
Title: Re: (بورداب الخرطوم) عايز أديّنكُم 500 ألف !
Author: walid taha
Date: 11-08-2007, 08:02 PM
Parent: #3
أساسي هنا؟!
ازيك كده
| Quote: اخوك اخد ليهو عشرة يوم بس من العيد وبقي جسمه كله كاروشة |
وانت قايل انا عارض الفكة دى للدين ليه 
والله الليلة ذكرتنى عشا البايتات
أرقد عافية
|
Post: #15
Title: Re: (بورداب الخرطوم) عايز أديّنكُم 500 ألف !
Author: ابو جهينة
Date: 11-10-2007, 12:11 PM
Parent: #2
وليد
سلام و شوق لرؤياك
الغريبة إنو المبلغ لا زال بحوزتك كل هذه الساعات منذ كتابة الموضوع حتى هذه المداخلة
دمتم
|
Post: #16
Title: Re: (بورداب الخرطوم) عايز أديّنكُم 500 ألف !
Author: walid taha
Date: 11-10-2007, 12:21 PM
Parent: #15
أستاذى أبوجهينة
تحية وإجلال ..منور البوست
| Quote: الغريبة إنو المبلغ لا زال بحوزتك كل هذه الساعات منذ كتابة الموضوع حتى هذه المداخلة |
مش بالله غريبة يا استاذ!
أخشى أن تذهب مع ذهاب هذا النهار فكل شئ محتمل هنا
أرقد عافية،،
|
Post: #6
Title: Re: (بورداب الخرطوم) عايز أديّنكُم 500 ألف !
Author: حمد فتح الرحمن
Date: 11-08-2007, 09:43 PM
Parent: #1
موش قتا ليك يا خينا
ياخ دي بلد ام بدا فيها اغلي من بفرلي هيلز
بلد فيها الخضار مستورد من السعودية شوف عيييني و الله ( خضار السنبلة ) تاني داير بيها شنو ؟
بلد اغلي من طوكيو و العياذ بالله
بلادك حلوا ارجع ليها
دار الغربة ما بترحم
ترارا را رار لم
تعال بس تعال
|
Post: #7
Title: Re: (بورداب الخرطوم) عايز أديّنكُم 500 ألف !
Author: walid taha
Date: 11-10-2007, 06:51 AM
Parent: #6
حمد إزيك ياخى
| Quote: شوف عيييني و الله ( خضار السنبلة ) |
خضار السنبلة براهو! ..حليب السعودية، حليب المراعي ...الخ
لكن كان راجل أهبشو
البرنجليز يا حمد راقد تراب
لو جيت عرض ال500 الف ده بيشملك
يلا،،
|
Post: #8
Title: Re: (بورداب الخرطوم) عايز أديّنكُم 500 ألف !
Author: ريهان الريح الشاذلي
Date: 11-10-2007, 07:28 AM
Parent: #7
نحن قوم ان تدينا نرجع الدين...
نوم علي كده وهات ال خمسمية
|
Post: #9
Title: Re: (بورداب الخرطوم) عايز أديّنكُم 500 ألف !
Author: walid taha
Date: 11-10-2007, 07:45 AM
Parent: #8
| Quote: نحن قوم ان تدينا نرجع الدين... |
ده كلام مًطمّن يا ريهان
كدى أصبرى شوية شايف فى مسنجر داخلى
ختى طوبة
|
Post: #10
Title: Re: (بورداب الخرطوم) عايز أديّنكُم 500 ألف !
Author: tmbis
Date: 11-10-2007, 07:58 AM
Parent: #8
يا وليد ..
امشي برج البركة فرع المغتربين ..
حوله لي ..
الايامات دي عندي فكرة بتاعت استثمار .. حول الكنجالات دي علشان استثمرة ليك لحدي ما تكمل اجازتك دي وتجي راجع بالسلامة ..
طبعا بيناتنا ميثاق شرف حق الغربة والزمالة والعيش والملح ..
بس اوعك تقول لي اكتب لي وصل امانة .. إنت زول من ما قمته كلس وشجاع وبتدي من غير حساب
|
Post: #13
Title: Re: (بورداب الخرطوم) عايز أديّنكُم 500 ألف !
Author: walid taha
Date: 11-10-2007, 11:55 AM
Parent: #10
تمبس إزيك
| Quote: حول الكنجالات دي علشان استثمرة ليك |
يا تمبس دى 500 الف يعنى 1000 ريال دى حتستثمرها لى فى طبلية ولا شنو؟
| Quote: إنت زول من ما قمته كلس وشجاع وبتدي من غير حساب |
أنـا؟!!!!
بالنسبة لوصولات الأمانة ما تخاف يا حبيب بس قوم تعال
عبرك التحية لكل بورداب الرياض
|
Post: #11
Title: Re: (بورداب الخرطوم) عايز أديّنكُم 500 ألف !
Author: انعام عبد الحفيظ
Date: 11-10-2007, 08:47 AM
Parent: #1
| Quote: فمن هو القوى الأمين؟ |
ايوااااااااا خلاص يا وليد طه خوة فرتق وما دايره معاك !!!
انت مش قلت لي انا ح اجيب ليك ال 500 الف دي غيرت رأيك يعني!!!
|
Post: #12
Title: Re: (بورداب الخرطوم) عايز أديّنكُم 500 ألف !
Author: معتصم محمد صالح
Date: 11-10-2007, 08:51 AM
Parent: #11
يا ولي .. دي خمسمية غير الاديتني ليها قبل شوية ...
|
Post: #19
Title: Re: (بورداب الخرطوم) عايز أديّنكُم 500 ألف !
Author: walid taha
Date: 11-11-2007, 07:20 AM
Parent: #12
NESTA إزيّك
| Quote: يا ولي .. دي خمسمية غير الاديتني ليها قبل شوية ... |
لا دى ما هى ديك قصتها تانية ..
لكن لازم ترجعها فى خلال المدة المذكورة
الشروط هى..هى
|
Post: #14
Title: Re: (بورداب الخرطوم) عايز أديّنكُم 500 ألف !
Author: walid taha
Date: 11-10-2007, 12:03 PM
Parent: #11
يا إنعام عبد الحفيظ انا عارفك قوية أمينة
بس دى ماالخمسمية الكنت عايز ادينك ليها دى واحدة تانية
hard luck
|
Post: #17
Title: Re: (بورداب الخرطوم) عايز أديّنكُم 500 ألف !
Author: DKEEN
Date: 11-10-2007, 01:02 PM
Parent: #1
وليد تاها..
قاعد شهر لحدي هسي ولسع باقي ليك 500 الف؟؟
انتا قاعد تأكل ناس البيت فسفس ولا شنو؟؟
بعدين سكرتشات بتاعة شنو يا كضاب ..
سمع اضاني دي انتا قتا لي قول ليهم اضربو لي...
يعلم الله مشتاقين ..بس رجاء خاص ماتحاول تبل شوقنا ده وتجي..
رزقك لايزال ينتظرك في (حامنارتي)..
| Quote: على ان يردها لى فى اخر خمسة ايام من نهاية الإجازة |
نهاية شنو ياخوي؟؟؟
You are just dreaming
|
Post: #18
Title: Re: (بورداب الخرطوم) عايز أديّنكُم 500 ألف !
Author: walid taha
Date: 11-10-2007, 01:49 PM
Parent: #17
دكين إزيك
تصدق يا زول انا عايز ازور الجماعة فى جبرة لكن حال (حق الركشة) بينى وبين وصالكم
وزى ما عارف بعد البوست ده ما بقدر اخش فى ال500 دى
انت عايز تزعل بورداب الخرطوم منى ولا شنو؟
أمشى
|
Post: #21
Title: Re: (بورداب الخرطوم) عايز أديّنكُم 500 ألف !
Author: حمد فتح الرحمن
Date: 11-17-2007, 05:52 PM
Parent: #1
وليد ياخ انتا قاطع وين يا فردة
صدق قربنا نرسل صورتك لي ناس برنامج مراسي الشوق !!!
|
|