يا هلالاب... أعفوا عن المريخاب عشان يدفنوا الجنازة دي

لما يتوفي زول
أهلوا بدفعوا ديونه أول بي أول
وسمعنا قصص كتيرة عن الجنائز البتدفن بعد ما أهلها يدفعوا الديون العليها
جماعتنا المريخاب ديل بعد مباريات المجد السوري والنجم الساحلي
إتلموا فينا لوم شديد خلاص وغلطوا فى الهلالاب كتير
وبقت لينا عليهم ديون واجبة السداد
لكنهم ما ثبتوا وبقوا يفلتوا وكمان جابتهم ليها شتائم زي ناس ( طظ )
ولأننا أولاد ناس وأسياد بلد وبنعرف إنو إكرام الميت دفنوا
فأنا - علي الأقل - عافي ليهم لي وجه الله ( وكان أولهم طلحة عبدالله أمبارح لما إتزاوغ من : اللهم لا شماتة)
فيا أخواني معشر الهلالاب ولأننا مقتدرين فلنعفوا عنهم والعفو عند المقدرة
وهم مكفيهم العليهم

كسرة
شايف حسن بسبوسة لحدي الآن غائب عن جريدة الصدي ،،، بس ما يكون فى العناية المركزة

وبعد الدفن ممكن نجئ فى الفراش
ونكمل معاهم
لأن علي الاقل العاقلين منهم ممكن يتفاهموا ويفهموا
مش زي بتاع ( (.........) ) الحتي ما عارف معناها
جهل مركب

Quote: وكان أولهم طلحة عبدالله أمبارح لما إتزاوغ من : اللهم لا شماتة

يا فضل متين إتزاوغت ياخ ..؟
انت ظنيت فينى الظنون وجيت فندت ليك إستنتاجاتك ووضحت ليك المقصود وانتهي الكلام في هذا الخصوص وإنتقلنا لنقطة تانية .
إتزاوغت دى إلا تكون عندك ليها معني تاني غير المعني العارفو أي زول ياخوي .
بعدين ياخ انتو الهلالاب ديل قايمين وقاعدين وفرحانين كدا فوق كم ..
ليكم سبعين سنة ولا حتى حديدة صدئة ما لامين فيها ولسة ساقيتكم تنين وح تفضل تنين ..

طلحة ،، أحي فيكم روح الإصرار والتشبث بالحياة
ما قدرت يا عزيزي توريني شعورك شنو لو زول قال ليك في زي حالتكم دي
( اللهم لا شماتة ) وبعد عصر شديد قلت بكون مغتاظ
يعني إنت كنت دائر تغظينا
وتيييييييييييييب الشمتان بكون دائر شنو غير الإغاظة
أها ،، إنشاء الله بعد دا يكون وضح ليك المعني الخفي ل ( اللهم لا شماتة )

نحن ما فرحانيين لهزيمة المريخ بقدر ما فرحنا وإبتهجنا لكسر عين مشجعي المريخ
ونعتبر دا أداء واجب سبقتونا عليه


كسرة
الراجل ما هو البدين ( بكسر الباء وفتح الدال ÷
الراجل هو البسدد

ونحن هسع بنسدد ،،، وممكن نعفي

طيب يافضل عشان أختصر ليك الطريق نحو هدفك ..
قبيل أنا زى ما قلت ليك ما شمتان لكن اسي شمتان وبتمني انو الهلال دا الكاسات الخارجية دي ما يشمها حتى قدحة ..

راكوبة
رحم الله مهدي الفكي
ذلك الجيل النادر
إداريين زي مهدي الفكي وشاخور وأبو العائلة
وإعلاميين زي أحمد محمد الحسن وعبد المجيد عبد الرازق
طاهري اليد عفيفي اللسان
لكن تعال قولوا لي رايك شنو فى الجيل الحالي دا
بالذات الإعلاميين - إلا من رحم ربي -
ياخي ديل من شدة ما أبطرهم النصر علي الحمام الميت لمن راسهم لفا

لله والرسول

شكراً ياملكة

بقينا إتنين

يا هلالاب من كريم الأخلاق أن تعفو عمن ظلمك

فضل يا عمك
كلامك سمح بالحيل
لكن قول عفينا و قاموا ستروا الجنازة دي
الناس ديل عندهم جنازتين تلاتة قدام باقي الشهر دا
طبعا حايتعولقو و يتلطشو
ويجو لي للفراش
نبقى تاني في أعفوا و ما تعفوا
خلينا مرة واحدة نخلس القديم والجديد
وبعد يوم 29 إن شاء الله ما بنطول اسبوعين تلاتة بالكتير و بنعفي

و الله عافين عنهم ... و ما درناه للمريخ ... و لكن الحق يقال هو ان المريخ ما ان بدأ في مقابلة الفرق الشمال افريقية ... راح في شربة مويه.

يافضل
مساء الخير
نحنا اكان عندنا جنازة بنبدله بي العدة القديمة ودواليبنا ملالالالالالالالالالالالالالالالالالالالالانة تب ...!
الا انتوا
جنازاتكم كترن ... الطيارة التونسية
والهوبا السورية ...دفنتوهم ولالسة
باقي لي ريحتم مرقت في الزريبة.
وبرضو المحلي داخل عطبرة .