محمود عبدالعزيز ( بعد ايه ) يغنى لى وردي ،،،

رائكم يا شباب ،،،

جميل يا ولدنا ..
ده ألبوم جديد ولا شنو ؟؟

هلا بى الصحافة كلها ،،،،

ابدا يا مان ما البوم ولا شئ ،،،

دي حاجة دكاكينيه كدا ،،،،

مية مية..
محمود دة زول فنان بس عليهوا المحافظة علي موهوبتوا دي..
لو أمكن يا ودالعباسية الاغنيات التانية ورابط الحفظ..

اخونا عثمان،،،

تحياتى ،،


بس يا حبيب دي حاجة خاصه كدا ،،

تفضل اللنك ،،


Save @ PC

شكرا جميلاااااا على منتهى هذه الروعة !

روعة يا عباسية يا فنان

اهلين بى ود القريش ،،،

الراجل صاحب العدسة الرهيبة ،،

محمود عبد العزيز
الصوت الذى ينقلك الى افاق السماء معبدا طريقك بالاداء الذى لايدانى
عرفته من خلال صوته
فانبلج صوته داخلى كسرمد
لم انتمى لمغن كما انتميت لهذا الفنان
وحين سمعته الان يغنى لوردى ايقنت انه فنان كبير
لم يفارقه الحدس فى كل ما اختار من اغنيات لغيره او اغنياته الخاصة
نفس الوجد الذى يضفيه عليك
كنت اقول للذين لم يدخلوا باحة صوته
انه لو غنى (نشرة الاخبار فسيكون لها طعم مغاير)
محمود عبد العزيز متعك الله بالصحة والعافية
وشكرا لك اخى ود العباسية

استاذه سلمى ،،

تحياتى ،،

وشكرا للمداخلة عن حوووووته ،،

شاعرتنا الرقيقة نادية ،،

تشكري على حضورك الانيق ،،

من فترة طويلة ما شفت محمود بغني (بضمير) زي الغنية دي
شكراً ود العباسية

ود العباسيه
تحية واحترام لك وللقامه محمود عبد العزيز...
استعمت له في رائعة الراحل المقيم فينا مصطفي سيد أحمد ( الحزن النبيل ) سأترك لك تخيل كم الروعه وزحمة التطريب , وعن هذا الفتي
كنت قد شاركت بمداخلة في بوست سابق أرجو أن تسمح لي ينقلها هنا:

لو يزور طيفك خيالي....... يبقي وعد اللقيا قرب .......أصلي مغرم بي عيونك ........قلبي في بعدك معذب


رايع لأنك اخترت الحديث عن شاب رائع ......كفنان , عندما بدأ محمود يعانق جيد المفردة , كان صغيرا في عمره
فأستحت العبارة من هذا العناق الباكر , لقد بدأ محمود مشوار حبه الأول مع المموسقة , بطريقة عكسية لم تكن مألوفة
فكثير من أبناء جيله بدأ يستجدي وسائط الأعلام المرئية والمقرؤة والمسموعة , ودفعو كثيرا وقدمو تنازلات أكثر ,
فلم يشفع لهم ذلك فقد تقاصرت قاماتهم أمام هذا العملاق , لم يكن في خاطره أن يسأل الأعلام عطفا , حتي وأن وسائل
الأعلام لم تتجاهله فقط بل أنها شنت عليه حربا مدروسة لابتزازه لأسباب وبأسباب معروفة, الا انها وبعد أن أكتمل
بدرا وشاع نورا ونضج فنا , أصبحت تتمني نظرته.

بدأ يغني ويرسل سحب أبداع حبلي بمطر سقي شواطئ النفوس الظمأ , وتغلغل الي مكامن في النفوس استعصي علي الكثيرون
أن يلامسوها , فقد كان الفتي خبيرا , بل جراحا , يستطيع أن يطوع النغم ليحتك بعضلة داخل القلب , عجزت مشارط الجراحين
الوصول اليها , فوصلها هو دون كثير عناء , لأنه ببساطه ولد ليعيش داخل القلوب فلم يعييه طول الطريق للوصول الي أبعد
مسافة في بطين وأذين التون , عرف كيف أن شريان الحب يقطع المسافة بين العقل والروح , فزرع المساحة اخضرارا ,
همس للعصافير لأنه عاشق للتحليق بعيدا , همس للبنفسج لأنه أذن لمراكبها بالرحيل خفية .

هو لا يغني ولكن يناجي روحه , هو لا يعني لأحد فهو في لحظه جذب روحي عجيب ينفصل عن مكانه وزمانه , تحسبه
ضايعا عندما يغني , وهو بحق كذلك لآنه يتوه في نغمة ساحرة وشمعة ساهرة , يعانق النجوم في دعه وحزن , حتي أدمن
عشاقه الحزن , آوي الي جبل يعصمه من لهيب الشوق , وغرد هو ليسكت الرباب.

معك كل الحق في تساؤلك !!!! وأقول لك انه ما عاد كما كان .......... ولو ظل علي حاله كما بدأ كنت سأشفق عليه ......لقد تربع
وما زال علي عرش الامبراطورية منذ أواسط الثمانيات أو حتي قبل ذلك , كنت سأحسبه من الملائكة لو لم يفعل , وأحمد الله انه
لم يكن منهم فالملائكة لا تعاشر جنون الابداع.

فليسترح قليلا , هو كما هو .........فهو يعرف دروب قلب كل بشر فقد عاش فيها وسيظل ومتي ما شد عصا ترحاله من بعد هجعة
سيعرف أي درب في قلوب العاشقين سيسلك.
شكر لك ود العباسية علي التحفة وشكر خاص علس رابط الحفظ.
أتمني أن يتحفنا أحد ( الحزن النبيل ) حتي تكتمل الروعه أكثر.


محمد عبد المطلب

ود العباسية

سلامات ..

رأي مخالف..

مع احترامي لمحمود كصوت مميز وراجل فنان مافي شك لكنه ابدا لم يوفق في هذه الاغنية!!!!

اكثر من المط والجر في غير مكانه ..كما ان حفظه كان ركيكا وكأنه يقرأ من ورقه والخط ما واضح..

قال في هذا المقطع

اعتذارك ما بفيدك ودموعك ما بتفيدك والصحيح ما بتعيدك

ثم حاول اصلاح ما دمره كالاتي

اعتذارك ما بإيدك ودموعك ما بتفيدك يعني صلح التانية وطبز الاولى

وتاني قال ربي يعدل ليك طريقك والصحيح سبيلك

كمان انه كان يتأخر في الدخول حتي يذكره عازف العود الماهر جدا بلزمات وتنبيهات موسيقية

غايتو لو في شئ جميل في العمل ده فهو عازف العود ثم اجتهادك لاسماع اعضاء المنبر غناء جميل

شكرا يا ذوق

مودتي

حقاً فنان صديقي الرائع محمود عبد العزيز تعرفنا علي محمود عبد العزيز من قرب فهو انسان طيب المعشر

ود العباسيه
الربط بتاع الاغنيه ماشغال عندي
ممكن تعديل
مع تحياتي للمبدع محمود عبد العزيز

الاخ محمد عبدالمطلب ،،

تشكر على المداخله الجميلة ،،،

وان شالله نجيب ليك الحزن النبيل بصوت محمود قريب ،،

الاخ اشرف ،،

فعلا محمود بغنى هنا بى مزاج زي ما بقولو ،،،

Quote: مع احترامي لمحمود كصوت مميز وراجل فنان مافي شك لكنه ابدا لم يوفق في هذه الاغنية!!!! اكثر من المط والجر في غير مكانه ..كما ان حفظه كان ركيكا وكأنه يقرأ من ورقه والخط ما واضح..

لاسف هذا ما درج عليه المؤدين الشباب الايام دى
اغانى العمالقه ديل صعبه جدا ... ومافى زول بيقدر عليها الا اسيادها
ما حصل سمعنا زول بيقلد او حتى غنيه واحده لابن الباديه
حتى العمالقه لما يتغنو بغناء العمالقه التانين نجدان اداءهم اقل من المتوقع منهم.... ازكر حيينما غنى محمد الامين اغانى وردى يوم تكريمه
لذا يلجاء شباب اليوم لتغير اللحن والهروله بالغنيه حتى تواكب الالات المسيقيه الجديده منل الاورغ
لو كانت الاله المصاحبه لمحمود فى الغنيه هى الاورغ كان القصه بقت احلى واجمل
لكن كده برضو حلوه
زكرتنا غنيه لا زالت تهز وجداننا بعنف .. ومحمود فنان زو صوت وامكانيات نجد نفسنا نحترمها ( وان كان تلك الموهبه قد اهدرت وضلت طريقها )
والاحلى هو امتاعنا ... وتهيئه مكان نستريح فيه بعد جوله فى المنبر لم نجد فيها سوى الافلاس

ود العباسية

اتحفتنا والله يعدل ليك طريقك

هل من مزيد؟

مع مودتي

<


الأخ ودالعباسية نأسف على التحشر

ولكن وجدت أغنية الحزن النبيل لمحمود عبد العزبز ولكن الصوت ماواضح

لو في حاجة قول لينا عوووك عشان نمسحها ........