Post: #1
Title: عبدالله داش .. اتدلا
Author: د.محمد حسن
Date: 10-27-2007, 01:41 PM
Parent: #0
واتجلا
في الكلام الزى شعاع القمرة ده
إنحــــياز
إدّلـي..
كلفّت القمر ينزل معاك
مستني شمسك
لما يتهاوي المغيب منـحاً جميلاً
عندما يزهو الربيع مُــتْجلي
والندي يعـتلي ثغـر الصباح
إدّلـي..
شاخت اُمسـيات الليل شخير
يا ملكه هشــيتي النحل
في السِـكه تاورني الغبار
تاوقني حُــلمك
وإنبهار الشوق طمح ريحة الكمأ
ياســوده!!
يا تتدّلي يا خليني أصعد ليك سما
ما النسمه تختصر التوقع
لما يستبرق سحاب الغيم هما
كيفن تعداك السؤال ؟
محتاج تجادلني الشكوك!!
جيت أستخيرك
شُـري ضيمك في هواي
أصلي محتاجك توجـع وأستشيرك
عن محطات الجدل
تكرار طـيوفك
سر غُـموضك
وإنسلاخ الضو خزق طرف العمر
كسبان رهانك بالحضور الإشتهاك
لمحْـتي للضل شبّهِك
صهينتي ما تناديني لو غرق البحر
غـريـّتِي لــيه ؟
كشمْــتِي عارفك إسـتفزاك الِضحك
قرقرتي فكرِة تلحـقك روحي وتجيك
سوده ومميزه بانحياز ,,,
كيفــن تغالطي الإرتباك ؟
أنا جيت أبادلك إسـتراق الشوف جموح
أهديك ما أملك فداك
أهديك عـقديني المعاك
أو باقةٌ من كل ما ينضح عبير
سندياناتي سوامق شامخات
لا الريح تثــنيها
ولا يُجـدي البكاء
لا الحزنُ يمـتهن الفرح والأُمنيات
( يا سوده هل لك إشتهاء ؟ )
الفيزياءُ تفاعـلت سِـراً
يرتجـع البصـر
كان سـوده تتِــلون
يا بنيه لما الليل سجـعّ
شُـوفي النجوم في المويا
في شطك ودِعْ واقـع
إذا أحصوه ما تعدا
وشكلك فيني عالم تاني
منتظرك خطاوي تكرفس المُــده
أنا منك وريدك كل شراينك أريدك
أنا منك
قِليـبِك كيف يصادر مني
ما سـويتي بي إيـدك ؟
هرجــلة الكلام
والليل يطشش إحتمالات الكسوف
والضـلام كومة عويش الخوف
فِكّي عضامي ودري فيني
حاجات تعرِفا العرافه جارتنا
رتقــتّي الفضل
الشــروخ بعد المسافه
غــنيتي طار مني النعاس
جــلْجــلْتي
آآآه منك
بريدك يا مجندل بالأرق يا مُحـتمل
غيرتي زمن الصوت صدي
شريتي دمع الريده
غنيتك نشيدك
شن تستني إتلافيّنِي
آآآه منك
ما تعايني المرق بالسرقه من الشوف
إلي مرسي هبوب الريح
مراكبيه وبحر
والقصه في ترحال قنيص اللحظه
غيمه ومستحيل
جيتك أصابق إنتظاري الجاي
من عمر المسافه وسكتك
ما تفسري الليل
الضلمه العُــتمه
كبسولة نعاس مخزونه
في ضهر الصبح إشراق ؟
إحتمال أمسح دموع القمره
بي منديل عقاب الليل
خيوطك ناسيه تسليط التوهج فيك
ما تتدلي حلفتك صباحك وين ؟
ولونك فيكِ ممتميز
وآآآه منك
وأنا منك..
|
Post: #2
Title: Re: عبدالله داش .. اتدلا
Author: Siham Elmugammar
Date: 10-27-2007, 01:47 PM
Parent: #1
عبدالله داش ما تدلى
خلى الدكتور يكتب لسه
|
Post: #3
Title: Re: عبدالله داش .. اتدلا
Author: د.محمد حسن
Date: 10-27-2007, 01:54 PM
Parent: #2
الاخت الاكريمة سهام المجمر
طبعا الكلام الجميل ده كلام عبدالله داش ووانا اخطأت ما عملته في شكل اقتباس
يا ريت لو الدكتور بقدر يكتب زي ده
شكرا ليك كتير
|
Post: #4
Title: Re: عبدالله داش .. اتدلا
Author: ادريس خليفة علم الهدي
Date: 10-27-2007, 02:08 PM
Parent: #3
| Quote: يا ريت لو الدكتور بقدر يكتب زي ده |
بكتب اجمل من كدا بس ساعدا بي عرديب 
والتحية للمبدع داش
|
Post: #5
Title: Re: عبدالله داش .. اتدلا
Author: علاء الدين حيموره
Date: 10-27-2007, 05:05 PM
Parent: #4
Quote: الضلمه العُــتمه
كبسولة نعاس مخزونه
في ضهر الصبح إشراق ؟
إحتمال أمسح دموع القمره
بي منديل عقاب الليل
خيوطك ناسيه تسليط التوهج فيك
|
حقيقة تجلت صورة الابداع في الوصف ..
تسلم اخوي عبد الله داش ..
يديك الف عافية دكتور محمد
تخريمة :
تعرف يا دكتو ر عبد الله داش ده شكلو ما زول عصيرعرديب ده كلام زول عرديبو أخضر ..
|
Post: #10
Title: Re: عبدالله داش .. اتدلا
Author: عبدالله داش
Date: 10-27-2007, 10:17 PM
Parent: #5
علاء الدين
الاحمــر
دى على وزن الشيخ ( عبدالله الاحمــر )
عشان ما يبقى الخيال واسع
يااااخ والله ضحكت لمن بقيت مجنون
( عرديبكم الاخدر
كان شفتو بخدر )
مع احترامى المؤكد لاستاذناالجميل عمر احساس
والله يا علاء
دا عرديب اخدر دا
فى دروس العصر ماادونا ليهو
والا... خدران بالفرح بى جيتك
|
Post: #9
Title: Re: عبدالله داش .. اتدلا
Author: عبدالله داش
Date: 10-27-2007, 09:44 PM
Parent: #4
ادريس
يا نكهة الليمون
قلت لى عرديب ( كويس والله )
والليون دا مالو ...
ما طاعم
ولا شنوو يا دكتور
تحيات وموده
|
Post: #8
Title: Re: عبدالله داش .. اتدلا
Author: عبدالله داش
Date: 10-27-2007, 09:17 PM
Parent: #3
بتكتب
وانت عطشان
بتكتب جمال مؤكد
لا يحتاج لشهاده من شخصى الضعيف
لك الاعجاب
لك الموده
|
Post: #7
Title: Re: عبدالله داش .. اتدلا
Author: عبدالله داش
Date: 10-27-2007, 08:06 PM
Parent: #2
بت المجمر
ما تتدلى حلفتك
صباحك وين ؟
ولونك فيك متميز
ليك العافيه
مفروشه ليك الروح
تعالى نقدمك ...
|
Post: #14
Title: Re: عبدالله داش .. اتدلا
Author: Siham Elmugammar
Date: 10-28-2007, 07:29 AM
Parent: #7
صباحى فى بلدا يعانى الويل
من نومك تقوم مهدود الحيل
مستنياك تقدمنى!!
|
Post: #18
Title: Re: عبدالله داش .. اتدلا
Author: عبدالله داش
Date: 10-28-2007, 01:24 PM
Parent: #14
بت المجمر
تعرفى انا بحترمك جداً
لانو معلمتى
( حبوبتى بت المجمر ) الله يرحمها
كنت بحبها حد الطيش
كانت دنيا تمشى على رجلين أتنين
ما بقدر أوصفها ليك
لأن الأوصاف قاصره تماما بإيفاء الغرض
بس
تعالى نقدمك للروح
وقربان للمواسم
للعكر .. للنيل
قبل تفضحنا
أشواق الرهافه
ونفهمك من قولك
اللهب
السنا
القنديل
بقيت منك مسافه
شيمه بتودر عذابات السفر
واللقيا
فى شرف البحر
وما تخافى
تعالى نقدمك قربان
إحترامى المؤكد
|
Post: #6
Title: Re: عبدالله داش .. اتدلا
Author: عبدالله داش
Date: 10-27-2007, 07:47 PM
Parent: #1
بوحميد
يا زول يا ريل
اتدلا كيف ؟
ياصاحبى قالبنى الكلام
وانا برتجف
والنسمه هيف
وكل المراحل
بادرت ليك بالسلام
يا زول وريف
حد الرهافه
وياســـــلام
د/ محمد حسن
والله غالبنى الكلام
انت تعرف اعترافى بالهزيمه عندما تعلن مواسمك النضار
لك النبض فى القلب
لك الحب
|
Post: #11
Title: Re: عبدالله داش .. اتدلا
Author: د.محمد حسن
Date: 10-28-2007, 07:08 AM
Parent: #6
والقاك قمر
ينثر شعاعاته
ويغسل للحزن
والدنيا صيف
|
Post: #12
Title: Re: عبدالله داش .. اتدلا
Author: الفاتح الجنيد
Date: 10-28-2007, 07:16 AM
Parent: #11
عبد الله داش ،،، إندلق ياخوى
جزم كلام دشَّ جوووو مسام الروح ،،،
دكتورناالعزيز ،،، عرفت تغوص وتقلِّع باللؤلؤ ،،،
|
Post: #13
Title: Re: عبدالله داش .. اتدلا
Author: ابو جهينة
Date: 10-28-2007, 07:25 AM
Parent: #12
Quote: وشكلك فيني عالم تاني
منتظرك خطاوي تكرفس المُــده
أنا منك وريدك كل شراينك أريدك |
و كيف يتدلا و قد تربع فوق القمر و مد رجليه على الكواكب ؟
|
Post: #15
Title: Re: عبدالله داش .. اتدلا
Author: عادل جبارة
Date: 10-28-2007, 08:01 AM
Parent: #12
عبد الله داش
شاعر دلف إلى رواق بورداب الرياض بهدوء ولطف ... ثم ما لبث أن اقتحم قلوبهم وسلب عقولهم ... تلاقحت أبيات القصيد لديه ما بين العامية والفصحى فأنتج لنا مزيجاً سلسبيلا نرتوي منه لحظات ويأخذنا العطش إليه طويلا .... شخصياً أرى أن هذا الأديب الهادئ المتواري حياءً وأدباً يختزن الكثير وسيكون له شأن لا يستهان به في عالم الشعر ..
وأكشف لك أخي دكتور محمد حسن مزيداً من أسرار هذا الإنسان الشفيف .. وأقولها بملء فمي : هو أيضاً فنان يتغنى بالألحان الكردفانية الرائعة بصوت أروع ..
وعليكم بتجهيز الأورغن في المرة القادمة يابورداب الرياض إن أردتم المتعة ( بدون عرديب )
|
Post: #16
Title: Re: عبدالله داش .. اتدلا
Author: وصال عالم
Date: 10-28-2007, 09:53 AM
Parent: #15
د. محمد حسن
عبدالله داش
كل سنة وانتم أجمل
من فراشات تحلق فى وردة
احلى من الأحلام!!
أحببت محبتكم !!
وصال عالم
|
Post: #17
Title: Re: عبدالله داش .. اتدلا
Author: حيدر حسن ميرغني
Date: 10-28-2007, 09:59 AM
Parent: #16
تحية لناظم الكلام الحسن ... عبد الله داش
وشكرا يا دكتور على الاحتفاء بحسن الكلم
|
Post: #26
Title: Re: عبدالله داش .. اتدلا
Author: د.محمد حسن
Date: 10-31-2007, 06:37 AM
Parent: #12
الفاتح
يا زول يا سمح
يا احلى من طعم القمح
طولنا ماشفنا انلاقك
والا انت
عايزنا ليك نجري
ونزح
|
Post: #19
Title: Re: عبدالله داش .. اتدلا
Author: عبدالله داش
Date: 10-28-2007, 01:43 PM
Parent: #11
بوحميد
يا خوى انا إدْ ليت
سدرت على الخلا اللا فوق
تعال وهط ضيوفك ديل
وإستلم منى مهمه
أنا أقصر من يطولها
تعال يا صاحب
|
Post: #20
Title: Re: عبدالله داش .. اتدلا
Author: مجدي عبدالرحيم فضل
Date: 10-28-2007, 02:12 PM
Parent: #19
ياســـــــــلام القمر تدلا
عبدالله داش مجسم للأبـــداع
د.محمد حسن هو من أخذ القمر
بين يدية:
وقد بهرنا بنورة وكفي.
،،،،أبوقصى،،،،
|
Post: #25
Title: Re: عبدالله داش .. اتدلا
Author: د.محمد حسن
Date: 10-30-2007, 02:13 PM
Parent: #6
Quote: والله غالبنى الكلام
|
ما انت يغلبك الكلام
نحن نعمل شنو
نسكت بس
لكن
ليك علي
كلهم ارد عليهم
|
Post: #21
Title: Re: عبدالله داش .. اتدلا
Author: معتصم دفع الله
Date: 10-28-2007, 04:03 PM
Parent: #1
اتدلا يا عبدالله ..
وأفتح مداخل الروح ..
خليها ترتوي ..
بعد ظمأ ..
لك ولدكتور محمد حسن كل التحايا ..
|
Post: #22
Title: Re: عبدالله داش .. اتدلا
Author: هند محمد
Date: 10-28-2007, 05:33 PM
Parent: #1
Quote: يا ملكه هشــيتي النحل
في السِـكه تاورني الغبار
تاوقني حُــلمك
وإنبهار الشوق طمح ريحة الكمأ
ياســوده!!
يا تتدّلي يا خليني أصعد ليك سما
ما النسمه تختصر التوقع
لما يستبرق سحاب الغيم هما
كيفن تعداك السؤال ؟
محتاج تجادلني الشكوك!!
جيت أستخيرك
شُـري ضيمك في هواي
|
روعه ياداش ..
تسلم دكتورمحمد ..
|
Post: #23
Title: Re: عبدالله داش .. اتدلا
Author: mohmed khalail
Date: 10-29-2007, 00:10 AM
Parent: #22
ما راهنا عليهو من زمااااان!!!
وما خيب الظنون..
شكر د. محمد حسن
داش الجميل
جاييك بغادي برتب في حاجاتي..اتخيل بس كبسة مشاغل سرقت يومي عطلتي(السبت والاحد)
ان شاء الله الرسالة وصلتك؟؟
|
Post: #24
Title: Re: عبدالله داش .. اتدلا
Author: المسافر
Date: 10-29-2007, 04:59 AM
Parent: #23
والله لكن...
جنس نضم..
يا عبد الله..
يلا..
حسك ما يدسك..
وعين الناس ما توسك..
تسلم..
|
|