Post: #1
Title: سجيمان ... ده انت ولا زولا كتر ؟؟؟؟
Author: قرشـــو
Date: 10-25-2007, 10:17 AM
Parent: #0
سلام يا دكتور
تعرف وانا بتسكع فى حوارى الانترنيت لانه ضائع منى بلوغ وقعت فى بلوغ عجيب جدا وفى الحقيقة جميل جدا وبقراءة احد المواضيع وجدته مزيلا باسم سجيمان اضافة الى اسم الكاتب فما عرفت سيجيمان ده ياهو حقنا ولا واحد كتر مسجم ؟؟؟؟
واسم البلوغ ورابطه هو http://ashmaig.blogspot.com/2007_10_01_archive.html
Quote: تلفزيون السودان" الكبر بجهلو..وا .. شقاوة اهلو"
الحمد لله الذي لا يحمد على مكروه سواه......اصبت برطوبة اقعدتني بعض ايام وشردت النوم من عيني....وبقيت اقوم نص الليل وانا ماسك المخروقة...واحوم في الحوش... يمكن الكراع تسكت واقدر اخد لي غميدة....بقيت اشغل نفسي بان اتفرج على التلفزيون واقصد القناة التلفزيونية القومية الارضية الفضائية" ارض-جو"...ولكن اكتشفت ان الرطوبة ووجع الكراع ارحم بكتير من الفرجة فيها....وما تقدمه من برامج سهرة عشان تسلي زول عيان وتنسيهو اوجاعو والامو....وينسى الامو وشجنو.... ينسى حرمانو وعذابو....لكن لقيت انها تزيد من الالاام والشجون.... شاهدت سهرة برنامج من المفترض يكون برنامج منوعات..خفيف لطيف....... شكيت يا ربي دي قناة المنار التابعة لحزب الله واللا قناة الدمار التابعة لينا...؟؟؟؟....كانت تتمتدح غفي حزب الله والمقاومة اللبنانية ثم نشيد الشعب العربي وين..... ثم بعد ذلك الفكسات كالعادة...والايميلات... وناس الشكينيبة والعزاز....من سعد الله بشنب البعوضة الي الزوجة ام حقين بمناسبة الوضوع والوليّد الجابتو ميت وربنا يجعلو سلف نافع...كما يهدي تحياتو للوالد والوالدة واللخوان والخالات لاحظو كلهن ام فلان ختو ام برا القوس كابداع في الاخراج وقمة في خفة الدم في التقديم ام( الحسن+الحسين+النصر+ هاني+ تكشو)...ووصلنا فاكس من صديغ البرنامج الضو ود جار عودو..هيع .....الضو ود جار عودو دا من اهلنا.. تب...طالما جاري عودو.. الصديغ الضو يشيد بالبرنامج ومقدم البرنامج وشداعتو...ويشيد بحزب الله وبالمغاومة اللبنانية ويشيد بالفنانة ندى القلعة وبالقلع عبد الحفيظ وبكل القلاليع الفي البلد...ثم يضحك المذيع ويدنقر ويدي الكميرا نص قنقونو...ونتفرج نحن في قنقون المذيع .. ونحمدالله الواهب المنان ان وهبنا مذيعين بهذه القناقين الفاضية...ثم فقرة من خارج الاستديو .. مذيع يرفع في بنطلونو و مسيكين قايل الكميرا ما شغالة لكن معليش اهو بنتحملها المذيع ولدنا والبنطلون بنطلونا.. لكن علي اليمين لو كان مذيع لبناني كانت الحرب الضروس...يقف امام طفلة صغيرة تبدو عليها ملامح البراءة وهي ما عارفة الراجياها....راكبة في طوطحانية..... ثم يبدا المذيع ذي البنطال الناصل....ويسعلها " ازييييييييك.... " ازيك دي بعد ما يفك يدو من بنطلونو ويقرصها في اضانها....تسرخ بنيت الناس ويوقفو التصوير ولحدي ما توعى من الخلعة الدخلتها من قرصة المذيع... ويكونو دايرين يدوها حلاوة يسكتوها بيها ما يلقو حلاوة يجيبو ليها مررو ...بمئة جنية وتحرد الشافعة وتقول علا يجيبو ليها ايس كريم وسجارة برنجي... عشان ابوها ....ثم يبدا التصوير من اول جديد....ثم يضع المذيع يدو في نص راس الشافع وتسرخ الشافعة تاني مرة ويوقفو التصوير ... ويكتشفو انو الشافعة عندها جرحة في نص الراس محل ما ختا المذيع يدو...ثم يجيبو مررو تاني وسجارة برنجي ... وتسكت الشافعة....ثم يبدا التصوير وتحذير شديد من المخرج المبدع للمذيع ما يخت يدو فوق الشافعة... ثم يضع المذيع يدو يتكي بكل قوتو فوق الطوطحانية وتتقطع الطوطحانية وتقع البنية وتندرش علي وشيها وتظلط نخرتها ..ويوقفو التصوير...وتاني يجيبو المررو والبرنجي..ثم يبدأ التصوير من اول جديد المذيع شايل البنية في صفحتو....ومربوطة علي بطن المذيع بحزام الامان....وعلى النخرة لصقة جروح....ثم نرجع الي الاستوديو...ثم فاكس من صديغ البرنامج عاشميق ود تور الخلا يطلب في الفاكس الاستماع لغنية حسن نصر الله العطبراوي ..نسانا حبيبنا...والله يا عشميق .. الغنية قدر ما قلبنا مكتبة تلفزيون الجن دا ما لقينها... لكن نوعدك في الحلقة الجاية نكوسها ليك ونسمعك ليها... نحن عندنا كم عاشميق؟؟..........ثم تبتعد الكميرا رويدا رويدا عن المذيع ورفقيتو المذيعة التي يخربا ما قالت شي..... ويضع كل منهما يده فوق جضمو متمحننا ومنتظرا نهاية البرنامج.....
سيجيمان
الكاتب/ محمد صالح عشميق
|
دحين انت ياكا عاشميق مع انى اعرف انه اسمك عادل ولا الزول ده نهب اسمك وفى الحالة دى من حقك تقاضيه والله
|
Post: #2
Title: Re: سجيمان ... ده انت ولا زولا كتر ؟؟؟؟
Author: سجيمان
Date: 10-25-2007, 02:53 PM
Parent: #1
سلا م قرشو
الموضوع دا حقي فعلا
لكن انا لا عشميق ولا حاجة
ولا بعرف الموقع دا ولا حصل مشيت ليهو
|
Post: #3
Title: Re: سجيمان ... ده انت ولا زولا كتر ؟؟؟؟
Author: سجيمان
Date: 10-27-2007, 10:28 PM
*
|
Post: #4
Title: Re: سجيمان ... ده انت ولا زولا كتر ؟؟؟؟
Author: قرشـــو
Date: 10-28-2007, 11:39 AM
Parent: #1
Quote: سلا م قرشو
الموضوع دا حقي فعلا
لكن انا لا عشميق ولا حاجة
ولا بعرف الموقع دا ولا حصل مشيت ليهو |
الدكتور عادل
شكرا للرد يا سيدى والان انا وريتك انه حقوقك الادبية سلبت عيانا بيانا يا الماعاشميق
لكن عاشميق شيطان جدا فهو فى نهاية الموضوع كتب اسمك ثم اضاف الكاتب / عاشميق مما يوهم القارىء بان عاشميق هو كاتب الموضوع بينما وضع خط رجعة ودفاع لو الحكاية جابت ليها عكلته ودفع عن الحقوق الادبية بانه كاتب اسم سيجيمان ...
عموما شكرا ولكنك حرمتنا من موضوع جميل مثل هذا وكنا نحن الاولى بالرعاية والقراية ياخى ولا مش كده؟؟
يديك العافية واللقمة الدافية
|
Post: #5
Title: Re: سجيمان ... ده انت ولا زولا كتر ؟؟؟؟
Author: سجيمان
Date: 10-28-2007, 10:11 PM
Parent: #4
قرشو
تسلم يا حبيب علي اللقمة
الموضوع نزل زمان في سودانيزونلاين وسودانت اعتقد
|
Post: #6
Title: Re: سجيمان ... ده انت ولا زولا كتر ؟؟؟؟
Author: سلمى الشيخ سلامة
Date: 10-29-2007, 03:23 AM
Parent: #5
ويشيد بحزب الله وبالمغاومة اللبنانية
دا اهون من الامام البقرا سورة فى القران وسمع اضانى
(انا انزلناه فى ليلة الغدر )
لاحول ولاقوة الا بالله العلى العظيم
ومنقولة فى الرادى
هسى جنس الناس ديل بنسمع ليهم كيف ؟
دا (ذنب) راسو عديل
ولا كان سمعت مدح الرسول صلى الله عليه وسلم وتفريعات الغين المقصود بيها القاف ؟
ولا الغنا البقول ليك
مشى امرك ياغدر
ونحنا نسمع ونتفلق انشا الله
والعجب لمن الواحد يكون مفلهم وعامل فيها سيد اللغة ويكون مدرس فى جامعة القران الكريم ويقول ليك بطول حسو (غال رسول الله صلى الله عليه وسلم )
كيف يعنى ؟
وما تعرف تقفل الرادى ولا تسمع ولا تعمل زى عمنا محمد صالح فهمى مع عمر الجزلى لمن قال مقولته المشهورة
ـ الولد دا ما يدخل الاذاعة طول ماانا هنا
وقد حدث ان الجزلى الذى كان ذنبه انه نصب الفاعل لم يدخل الاذاعة الا بعد ان غادرها شيخنا محمد صالح فهمى الذى كانت ردة فعله ان ضرب الراديو بالحائط لحظة سماعه ما اورده الجزلى
ترى هل يستمع اهل التلفزيون والاذاعة لقراء النشرات ومقدمى البرامج ؟
لاحظ هذه الايام ما تورده الاذاعة من خلال مراسلها فى سرت (تدى ربك العجب ) من جهات (غال الناطغ الرسمى ، وغال سيادته ، وغد زكر ، وكان الرئيس الغائد معمر الغزافى ) وحاجات توجع (الغلب )
|
Post: #7
Title: Re: سجيمان ... ده انت ولا زولا كتر ؟؟؟؟
Author: عواطف ادريس اسماعيل
Date: 10-29-2007, 05:57 AM
Parent: #6
قرشو !!!
يسعد صباحك ,,,
رأيك شنو في كابتن الطيارة السودانية القال نرجو من المسافرين البغاء في أمكانهم !!!!!!!
|
Post: #8
Title: Re: سجيمان ... ده انت ولا زولا كتر ؟؟؟؟
Author: معاذ حسن
Date: 10-29-2007, 09:03 AM
Parent: #7
| Quote: رأيك شنو في كابتن الطيارة السودانية القال نرجو من المسافرين البغاء في أمكانهم !!!!!!! |
الرحلة دي كانت ماشة تايلاند!
|
Post: #12
Title: Re: سجيمان ... ده انت ولا زولا كتر ؟؟؟؟
Author: قرشـــو
Date: 10-29-2007, 10:19 AM
Parent: #8
| Quote: الرحلة دي كانت ماشة تايلاند! |
قرقر قرقر قرقر قرقر
|
Post: #10
Title: Re: سجيمان ... ده انت ولا زولا كتر ؟؟؟؟
Author: قرشـــو
Date: 10-29-2007, 10:14 AM
Parent: #7
Quote: قرشو !!!
يسعد صباحك ,,,
رأيك شنو في كابتن الطيارة السودانية القال نرجو من المسافرين البغاء في أمكانهم !!!!!!! |
العزيزة عواطف
لك التحية والتقدير
تعرفى احد السوريين هنا حكى لنا فى تريقة واضحة من نطقنا للحروف قائلا : قبض احد رجال الشرطة على سودانى وحينما ساله الى أين انت ذاهب ؟ رد السودانى : أريد البغاء فى مكة المكرمة ...
معقول بغاء فى مكة يا مسلمين ؟؟؟
طبعا لولا ان ذلك السورى يبلغ من العمر عتيا ولعله اوشك على الثمانون لكان لى حديث آخر معه ولكن احتراما للسن بلعتها ومعها مرارات جمة ... ولكن حقيقة من يتابع تخريج الحروف من بعضنا يجد مرارات أكثر ... وامثال ذلك الكابتن كثر ...
اين العلة يا ترى ؟؟؟؟
لك مودتى ....
|
Post: #13
Title: Re: سجيمان ... ده انت ولا زولا كتر ؟؟؟؟
Author: سجيمان
Date: 10-29-2007, 06:05 PM
Parent: #7
عواطف ادريس
| Quote: رأيك شنو في كابتن الطيارة السودانية القال نرجو من المسافرين البغاء في أمكانهم !!!!!!! |
اووووووعى يكون سمعو نضمو؟؟؟؟؟؟؟ وسوو بي شورتو؟
والله دي تكون جنس هيصة ما يعلم بها علا الله
|
Post: #11
Title: Re: سجيمان ... ده انت ولا زولا كتر ؟؟؟؟
Author: قرشـــو
Date: 10-29-2007, 10:18 AM
Parent: #6
Quote: ـ الولد دا ما يدخل الاذاعة طول ماانا هنا
|
الاستاذة سلمى الشيخ
لك التحية
وشكرى الجزيل على المرور واثراء الموضوع بصورة حية عن حال الاذاعة سابقا والقائمين على امرها ..
الان فعلا الحال اصبح محزنا فحينما تستمعين الى المذيعين فانك ترين العجب اضافة الى خفة الدم التى لا تتسق والمقام فهذا التلفزيون كاد ان يكون بثا خاصا يتاح من خلاله المزاح والتهريج بين المذيعين والمذيعات وهم يحسبون انهم يحسنون صنعا ...
لك ان تشاهدى مذيعى النشرة ومحاولة تخفيف دمهم مع بعض ليصيبك ضغط دم عاجل ...
شكرا عزيزتى وليتنا - لا سيما من يخاطبون الجماهير - ننتبه لمخارج الحروف اثناء حديثنا وصحتها وعدم الخلط واكل الكلمات وعدم اهمال القواعد الاملائية البسيطة ....
مع مودتى
|
Post: #9
Title: Re: سجيمان ... ده انت ولا زولا كتر ؟؟؟؟
Author: قرشـــو
Date: 10-29-2007, 10:09 AM
Parent: #5
Quote:
قرشو
تسلم يا حبيب علي اللقمة
الموضوع نزل زمان في سودانيزونلاين وسودانت اعتقد |
حبيبنا سجيمان
يبدو ان ذلك حدث وانا خارج الاسوار حينما غدر بى الجهاز واضاع الباسوورد
عموما المقال يستحق ان يقرأه من لم يقرأه قبلا وانا اولهم ..
مع شكرى وتقديرى
|
|