مــــوية فول!! (قصة قصيرة )

قدرة فول يحي (سيد دكان حلتنا) بتكمل الساعة 10 صباحا !
ولو إتأخرت خمسة دقائق معناها دقست!
أو تقوم تمشي دكان (الخير).. لكن فولتو تعبانة شوية مقارنة مع(يحي)!
بس المشكلة البيني وبين (يحي) دائما هي موية الفول..!
بشتري يوميا فول بي خمسمية جنيه ..لكن للاسف الشديد مويتو قاطعة! ومافيهو ولا نقطة !
وكل يوم نفس الموال : يا يحي كب لينا في الفول ده شوية موية .. ما معقولة ياخي !..
يقوم يحي يرد: الموية شالوها (أولاد الجنوبيين)!
أقول ليهو: طيب أنا مشكلتي شنو ياخي..فول بلا موية ده أكلو ليك كيف !
يحي: والله مشكلتك بتجي متأخر كل يوم..لكن ما مشكلة بزيدك موية جبنة.
وهكذا كل يوم!
يوم قررت أجي بدري , وفعلا الســاعة 9 كنت في الدكان,
لقيت (ود جنوبيين) واقف جنب القدرة و شايل صحن مليان عيش وجايط مع يحي: كبي بوول هنا!!
ويحي يرد عليه: ولا فولة واحدة ما بكبها ! إنت دافع مية جنيه بس وعاوز يكبوا ليك فول!
يللا شتت..ا!
.. وشتت الولد.
ومن اليوم داك عرفت إنو موية فولنا (مبيوعة)!

وقعدت أردد في سري:

حليلك بتاكل فول بالجبنة..
وغيرك بياكل فتة موية فول..
تصدق في واحد بياكل سجوك..!