ملك العواطلية!

دي قصة ولدين واحد مدردح وود((رُضى)) وواحد فاشل فشل شديد..

كل ما اهلو المساكين يلمو ليهم قرشين ويدوهو حق الفيزا يمشي يودر القريشات ويترمتل ويتبهدل في النهاية يكشوهو ويجي مدلدل إيدياتو وحانف وشيهو ويا عطالة جاك نفر..من ضل لي ضل ومن صحن بوش لي سخينة وكلو ملح في ملح اصلو صاحبنا بيلقي ليهو شلة عواطلية مساكين كدا جوه البلد و((يتفرعن)) عليهم وياكل حقهم وسيد الدكان عااااارف وساكت اصلو عندو وُد قديم مع ملك العطالة...

إلا واحد عكليت كدا((مفتح ومدردح وود سوق مايخش في بزنس إلا يطلع ربحان)) دا لا سيد الدكان لا صاحبنا العاطل قدرو عليهو..

تصدقو صاحبنا بيحاول يأمن مستقبله من سنة ((تلاتين)) ولي يومي ويومكم ما لاقي طريقة وكل مرة يقول ليك والله بس الحكاية شوية نحس يوم النحس دا يتفكا حاتشوفو زول تاني...والعجيب صاحبنا دا في عطالتو دي فصيح ولسانه طويل وما عاجبو((العجب)) ولا السعودي زاتو..

يقولو ليهو والله الجماعة دفعتك حصلت ليهم حاجتين يا عملوا مستقبل واسرة يا إتلحسو زمااان ...

يعني عندك الود الاحيمير دا ..حبوباتنا بيقولو ولدوهو سنة ((حيداشر)) في المسالمة وبعد داك جو إحتفلو بيهو وسموهو تاني في سنة ((سبعة وعشرين))...لكن اريتو جنا السرور ..من صغروا عيونوا مفتحاااات وسمعنا قالو ولدوهو بي سنونو ...

لانه قالو اول مرة يلاقي ليك الجنى ((الإزيرق)) دا مسكوا اداهو ليك خبتتين ومعاهم ((عضة)) هوادة كمان ومن الزمن داك بقي الجنى ((الإزيرق))..يشوف العمى ولا يشوف ((الإحيمير)) دا ..لكن بي صراحا دا كمان كترا شوية يعني تقدر تقول إتعود على بهدلة رفيقو..محل ما عينو تقع فيهو إلا يقع فيه كفيت..

ومرت الايام و((العيال كبرت)) والنجيــــــــــَض فيهم بقى كايس درب المرقة لي برة البلد..وكلم اهله..وهاك يا وصايا..خلي بالك ما يغشوك ما ياكلو قريشاتك واوعك من رفاقة السوء..

اها قام صاحبنا وجرب حظو ومشي قريــــــــــــب يعني جنب البلد...أكان ما يجينا عريس وسايق مرتو معاهو...ونحن عاد قصرنا..هجيج و((عرضة)) تمام...قام حبيبنا المسيكين داك قالو ليهو اهلو ((ها الباطل)) ياهو نديدك فرقكم كم((إنت ولدوك يوم سمايتو التانية((وزعلنا ومشينا سميناك)) (ود الاسبتالية)) وتاني سميناك اله..

أها هنا كان افلح منك ويومو المرق جابا عروس السرور..

إنت اقعد ((اترمتل)) ((حق التمباك)) ماعندك ((الله يخيبك)) وتقوم امو المسيكينة تبكي((ماعفيا ليك)) لو ما فشيت غبينتي من ((أم الاحمر))..إهي إهي إهي...صاحبنا يلملم ليهو دلاقين في شنطة ويمرق قال يداقش...

كان شويتين كدا يجي ((مظلط ومورم وحالتو بالبلاء)) قال شنو قال في واحد أحمراني كدا((حلبي)) لما فيهو خلا ريحتو طير طير..والزول الكان واقف قال ((معفن)) واظنو ماخد قروش عشان يمسكو ((للحلبي)) يدقو..

اها يعني دقوك وقلعو قريشاتك اللملمتهن؟؟

ااااااي يمة

.....النجمة التجمكم وماتلمك..((خايب الرجاء))...

يقوم صاحبنا ((الإحيمير)) تاني ياخدلو قدلة ويقوم على ناس بيتم((اها فتكم بي عافية)) امو علي وين تاني يا وليدي ما تقعد مع عروسك دي شوي كمان!!

لا يمة انا مرا واحدة ماااااابتكفيني والله محلل لي اربعة ولو ما كفن ((حرم)) من العندي اطلق واعرس تاني..

تقوم أمو تزغرد ((ايووووي يوي يوي يوووووووووووووووووي)) ودعتك الله يا امي

...ويمرق ما يغيب ليهو شويتين أكان ما تاني يجي ناقذ(( يبرم في شنبو))

ابشري يا يمة اها دي ضرة مرتي الجديدة..

عايني ليها ((لقيتيني كيف))

تضحك امو وتاني زغرودة(ايويييييييي يوي يوي يوووووووووي)) أبشري بالخير..

وتاني ما انتظر زمن أكان يجيب التالتة..

وشوية كمان الرابعة...

بقن تلااااااتة من بنات جنسو ذنجيات ((زي الكاكاو)) أدب واخلاق واصل وجمال واحدي بت قائد مشهوووووور((اسمو مانديلا)) وواحدي بس عربية حلاااتا كمان..

جابا من اغترابو في الخليج

..والاتنين الباقيات ..من قريب ما بعيد...وسمعنا تحت تحت كمان قالو ((معرس بالدس)) وما معترف بيهن((غايتو دا كلام ناس الحلة))

المهم نرجع لي رفيقو داك...سئلي الله ((بنات الحِلة ابوهو)) ومحل ما يقبل ما يلقي إلا كلمة((بري)) مالنا بناتنا بنديهم للفاشل دا..

ومرة من ذات المرات العروس جابوها ليهو في بطن البيت ابتو وقالت ((سجمي)) مادايراهو...

وقالو ليك تتاوق بالحيطة وتعاين هناك في البيت النورو مولع جنوب

..وتقول لي ابوها إنت الولد داك معرس؟؟؟

الكلام جابوهو للجنى ((الاحمر الوهاج))...برم شنبو وضحك كع كع كك كك كك....

وقال((مصيــــــــري المها على إخياتا))

والقصة اخرا لسة.

قالو المرة دي جايبا من تونس!!

صحي

وصاحبنا البليد ملك العواطلية تاااني دقوه وبوظو سمعتو!!

قدوين قال حياته معرضة للخطر!!

عاد دا كلام يا ريري.