بكائية في حضرة بت بخيت

بعضٌ من نشيج في حضرة والدة الزميل والصديق عبد المنعم إبراهيم الحاج
المرحومة فاطمة بت بخيت:

فايتانا وين مستعجلة
فايتانا وين يا أمنا
يا حضن مليان بالأمان
طول عمرو كان بيضمنا
يا مرفا للحب والحنان
ما مل يوم من لمنا
فايتانا وين يا نيمة
يا ضل يا رهين يا ضلنا
يا عنقريب هبابي
في راكوبة
لي زول قراع سهرة
وعندو خدار وداهو السوق
وجاي مكحل عينو النوم
يا نبقة في طرف الخور
والخور سوميت
والشفع تحتك
تلعب ومرة تشتر بالحجار
وإنتي كما زي عادتك
لابتنهري زول
لابتابي ترمي ثمار
يا لمة ناس
وحفلة دكاكينية
ورقصة عرضة وصقرية
وطمبارة تردد في حسرة:
يا عيون ابكي دمع الدم
الزمان بي عذابي حكم
وصبي يتلح في سوطو
ورجال تركز
لا بتتزحزح لا بتفز
ويا ها الفيهم محرية
ما كان تستعجلي تمرقي
شان منعم جاي يطهر أولادو
وسمية قسم دايراكي تسوي الكركار
والطاهر محتار
بين يفطم ولدو هناك في عطبرة
ولا معاك في حضنك يختار
والتومة وخاصة لسع زعلانات
شان كانن دايراتنك تمشي معاهن
لي عرس الزينة بنية صالح
وإنتي مرقتي ولا قلتيلن
ماشة بلاكن
ولا معاكن
يا خاتية اللوم من أصلو
وما فقدوك الناس في يوم
كان في أفراحن ولا اتراحن
ولا اية ياك من شئ
فقدك الليلة سيدنا
في درس الخلوة بعد ما الحيران
شالو الغلبة معاهن
وخلولكن ضل العصر الرامي
وانتي تمسكي اللوح
عينك فيهو وتقري من الفي راسك
ماكان تستعجلي يا يمة
يا أم الناس من جم
وتخلي المطرة بلا عينة
وتكسري خاطر العيد
ويصبح طعم (الحلو مر)
عزانا معاك إنك فوق
بين إيدين الرحمة
عالم تاني
سامي ورباني
محفوف بالنور
وملايكة تدور
والجنة أنهار وقصور
تحت أقدامك
تحت أقدامك
تحت أقدامك

Quote: فايتانا وين مستعجلة فايتانا وين يا أمنا يا حضن مليان بالأمان طول عمرو كان بيضمنا

لا فض فوك




جميل


رحم الله فاطنة بت بخيت

العزيز Samer Osman

بت بخيت يا صديقي مثال للامهات
ركازة ا##########
الهدن حيل الوجع الساكن فيهن وفينا
لامن طاطا
الخلن غول فاطنة السمحة
يرجع باطا
النسجن من مافي
سلام وعوافي
ونعلتن الواقع
الكان واقع وحافي
...
..
.
ديل الأمهات اللي بدن إحساس بي إنهن
كلهن أمك
لحمك ودمك
تدخل فيهن ما يهمك
تلقى احضانك فاتحة تضمك
تخلف رجلك وتجبد نمك
...
..
.
ليها الرحمة ولينا ... وعيشة السوق

وتظل بت بخيت مثال للأمهات:
الفاتن قطر التعليم
وحصل لاقاهن في سندة عرفة
وشوف ما ديرلو طبشيرة ولا كراس
ولا تلقين يحشوبو الراس
عارفات البيهن والليهن
وناعلات الوسواس
وفاهمات الدنيا مساحة خير
وضحكة بريئة تقابل الغير
وفرقة صغيرة تشيل الناس
وطلة تدخلك دون تجميل
ما أصلو الزول القلبو جميل
وشوفو جميل
واحساسو تجاه الناس من أصلو جميل
ما دير تجميل
يا هن ديل
أماتنا
وباقي ثباتنا
عشان ما نميل
ونفضل نحلم بي يوم بكرة
وبكرة جميل
وبكرة جميل
جميل

شن خليتي وراك يا يمة؟
غير الوَغَشْ، الدّبَشْ، الضّلْمة
واحساس مجروح
وفرح بالعيد ما تمَّ
وعيون بتفش للغايب
لسع ما جانا ولمّ
وشفع من غير ضحكة
وقعدة ونسة بدون نمَّة
شن خليتي وراك يا يمة؟
...
..
.

جانا العيد يمشي ويعرج
فيشان خاطرو المكسور
ما لقالو جبيرة
وجاتنا الفرحة مبلمة ساكت
ما فيها ضريرة
وبكانك فاضي في حلقة قعدتنا
وجلسات القهوة وونستنا
يا سمحة سيرة
بالله عليك ما تتاخري
شان باقي عيونا
معلقة في باب البيت
ومعاها الحيرة
...
..
.

)جانا العيد يمشي ويعرج
فيشان خاطرو المكسور
ما لقالو جبيرة
وجاتنا الفرحة مبلمة ساكت
ما فيها ضريرة
وبكانك فاضي في حلقة قعدتنا
وجلسات القهوة وونستنا
يا سمحة سيرة
بالله عليك ما تتاخري
شان باقي عيونا
معلقة في باب البيت
ومعاها الحيرة)


ود العجبل الله برحم بت بخيت وامي بتول بت نورالدينانت تصف حالي واخوتي معكم فقد فقدناها قبل رمضان ...وصدقني(جانا العيد يمشي ويعرج
فيشان خاطرو المكسور
ما لقالو جبيرة)....
لهن الرحمة

العزيز Ahmed El Gasim

Quote: ود العجبل الله برحم بت بخيت وامي بتول بت نورالدينانت تصف حالي واخوتي معكم فقد فقدناها قبل رمضان

بالجد ماداير أجدد ليك الأحزان والدنيا قبايل عيد
وكمان ما داير أخلي أي زول عاش اللحظة دي قبال كدة
يعيشه تاني
ربنا يتقبل بت بخيت وبت نور الدين
آآمييييييييييين

اتنخجت غيمة

ودندح في شريان
الكون احزان ..

خليتينا
وراك والصي لافحنا
هجير ..

لا ركازة تسند الدنيا المايلة

لا ضل نيمة

يلم الناس

في عشرة ونسة

وفنجان بن..

بس نان كيفن

في لمحة غياب

يتوهدب حالنا ..

وانا كت جاييكي
عشان تتبلّ

حصاية الشوق
بالشوفة..

لكن الزايلة عبوس..

صرت وشّها يوم خلتني

اسيبك صامدة قصاد
طاحون البلد القاسي

اتحزمتي تضايري المايل
ونومك بي فد عين..

ما هاميكي ابار

التعب الوخزن
جفن الشمس
الصاحية..

وقلتي :

- الضل ماخربش رمل السكة..

الا وحاتك هسة
وجيه الدنيا مخربش!

Quote: اتنخجت غيمة ودندح في شريان الكون احزان .. خليتينا وراك والصي لافحنا هجير .. لا ركازة تسند الدنيا المايلة لا ضل نيمة يلم الناس في عشرة ونسة وفنجان بن.. بس نان كيفن في لمحة غياب يتوهدب حالنا .. وانا كت جاييكي عشان تتبلّ حصاية الشوق بالشوفة.. لكن الزايلة عبوس.. صرت وشّها يوم خلتني اسيبك صامدة قصاد طاحون البلد القاسي اتحزمتي تضايري المايل ونومك بي فد عين.. ما هاميكي ابار التعب الوخزن جفن الشمس الصاحية.. وقلتي : - الضل ماخربش رمل السكة.. الا وحاتك هسة وجيه الدنيا مخربش!

... أجمل الأمهات....

الا وحاتك هسة
وجيه الدنيا مخربش!

ومجروحة شهادة
الناس العزت
فيك ..

آخر مرة سمعتك
فيها علي التلفون

وانا اتبين حالتك
بين لثغات الصوت,
جاني عفووك الواضح..

متل اكّنك قاعدة
معاي..

اتلكلكت معاك
في الونسة ,

كيت هزّرت وحمدك
واصل..

قمتي ضحكتي
وزي حسّيتك كنتي
مرتّبة خالص خالص..

وكان في بالي أقولك
كل الكان جواي..

منعني اصرارك
تسمعي حس
اطفالي الماشفتيهن..

تاريك كنت تودعي
فينابدون ما ندري..!

وآه يايمة

وداعك قاسي علينا..

في داك اليوم
يايمة ..

طيفك مشروح في رؤية
مبصر لاح..

كانت غفوة علي لالوبة حالي


شفتك متلفحة
توب مربوب
من انقي سحابة

وفاطرك براق بي تلك البسمة
الجذابة..

وزي مطرة وراكي محل ما تهمي
تبتّق زهرة ضو

كنتي تناضمي بكل سرور
صحباتن ليك..

والحق يتقال ,

من بينن كانت "نورة"
بنيت صبري..

حدقت بعيد ,

في عمق المشهد بعد
المطرة النازلة

شايفلي قطاطي تبلج
زي نجمات السعد..

وبي حرجك داك لما تحسي بشر
قدملك خير,
قلتيلي:

- "والله ناس الحلي ديك زي كرمن ده
أصلو قبل كده ماشفتو..أكّلونا ..وشّربونا
وهسّعيتي جينا نكلمكن ..عشان حلفوا علينا نبيت معاهن"

من داك الوكت
عرفتك ..يمّة

خلاص نادوكي..

كان" سعدين "

ربان الشاحنة المرت
فوووو..

حنسني جنس تحنيس
شان اركب ..

والحتة مزاورة ..
مرة تعلّي ومرة
تجلّي..


من تالا الدومة
العند الحد..
جفلت نعجة
عثمان
بّدة..

ربكت باقي الرؤيا

وفجاة صحيت..

حمد الله سريحي آ ست النفر آخيتي
باقي الناس قالولي كانت جارحاكي سلامة
ونحمدو تاني علي جيتك لينا
بي ألف سلامة
ما باكيتك أكنك عارفي كل البينا
وعارفي الدنيا وأوهامه
فقدنا واحد من دون شك
وأصلاً ما بيناتنا ملامه
...
..
.

العزيز كودي:
أسأل ربي ما تشوف مكروه
في زولاً ليك
ولا يغشاك الهم فد يوم
لا ينزل مطر الحزن علي واديك
...
..
.

وينك ياخي
يا منعمنا
يا ونستنا ويا قهوتنا
وباقي نضمنا؟؟
...
..
.

يا عبدو سريحة الحزن
انغرزت جوة حليقي

تنقمش عبرة حالي..

لا ..زارني هجود

من ساعة شك

الخبر المفجع

طبلة اذني

وصنّ الكون

زي صور الآخرة
قدر مخيالك

يسرح..

الا رثاك منقاش
الشوكة الريّح

بالي..

خلّاني افك
ناعورة

ساقية صوتي..

قالدت طيوف
اخواتي ..

جعرت شديد..

لامن ود عيني
اتفشّ..

واتخيلت بقيعك

يمّة ..

محروسة قدر ماقلبك
حبّ الناس

من جم ..

تاوقت هناك في
ضلّ الشدرة
الحتّه صفار
اوراقو..

طالعت مراثي أولادك
ياسر , صديق ودرحمة

ونور الدين ..

وباقي اصحابي..

الهم اصحابك قبل يكونوا
اولادك..

كان فقدك أعزّ نفيس
في الدنيا
يغادر ..

متزود عبق الطيبة محبة..

شكرا يا أم خلدتي
وراكي السيرة..

ارتاحي قدر دعوات الناس
العزت وفاض..
يااجمل أم