بعضٌ من نشيج في حضرة والدة الزميل والصديق عبد المنعم إبراهيم الحاج المرحومة فاطمة بت بخيت:
فايتانا وين مستعجلة فايتانا وين يا أمنا يا حضن مليان بالأمان طول عمرو كان بيضمنا يا مرفا للحب والحنان ما مل يوم من لمنا فايتانا وين يا نيمة يا ضل يا رهين يا ضلنا يا عنقريب هبابي في راكوبة لي زول قراع سهرة وعندو خدار وداهو السوق وجاي مكحل عينو النوم يا نبقة في طرف الخور والخور سوميت والشفع تحتك تلعب ومرة تشتر بالحجار وإنتي كما زي عادتك لابتنهري زول لابتابي ترمي ثمار يا لمة ناس وحفلة دكاكينية ورقصة عرضة وصقرية وطمبارة تردد في حسرة: يا عيون ابكي دمع الدم الزمان بي عذابي حكم وصبي يتلح في سوطو ورجال تركز لا بتتزحزح لا بتفز ويا ها الفيهم محرية ما كان تستعجلي تمرقي شان منعم جاي يطهر أولادو وسمية قسم دايراكي تسوي الكركار والطاهر محتار بين يفطم ولدو هناك في عطبرة ولا معاك في حضنك يختار والتومة وخاصة لسع زعلانات شان كانن دايراتنك تمشي معاهن لي عرس الزينة بنية صالح وإنتي مرقتي ولا قلتيلن ماشة بلاكن ولا معاكن يا خاتية اللوم من أصلو وما فقدوك الناس في يوم كان في أفراحن ولا اتراحن ولا اية ياك من شئ فقدك الليلة سيدنا في درس الخلوة بعد ما الحيران شالو الغلبة معاهن وخلولكن ضل العصر الرامي وانتي تمسكي اللوح عينك فيهو وتقري من الفي راسك ماكان تستعجلي يا يمة يا أم الناس من جم وتخلي المطرة بلا عينة وتكسري خاطر العيد ويصبح طعم (الحلو مر) عزانا معاك إنك فوق بين إيدين الرحمة عالم تاني سامي ورباني محفوف بالنور وملايكة تدور والجنة أنهار وقصور تحت أقدامك تحت أقدامك تحت أقدامك
10-09-2007, 02:43 PM
Samer Osman Samer Osman
تاريخ التسجيل: 02-22-2005
مجموع المشاركات: 1247
وتظل بت بخيت مثال للأمهات: الفاتن قطر التعليم وحصل لاقاهن في سندة عرفة وشوف ما ديرلو طبشيرة ولا كراس ولا تلقين يحشوبو الراس عارفات البيهن والليهن وناعلات الوسواس وفاهمات الدنيا مساحة خير وضحكة بريئة تقابل الغير وفرقة صغيرة تشيل الناس وطلة تدخلك دون تجميل ما أصلو الزول القلبو جميل وشوفو جميل واحساسو تجاه الناس من أصلو جميل ما دير تجميل يا هن ديل أماتنا وباقي ثباتنا عشان ما نميل ونفضل نحلم بي يوم بكرة وبكرة جميل وبكرة جميل جميل
10-10-2007, 10:05 AM
عبدالبارى العجيل عبدالبارى العجيل
تاريخ التسجيل: 03-02-2005
مجموع المشاركات: 268
شن خليتي وراك يا يمة؟ غير الوَغَشْ، الدّبَشْ، الضّلْمة واحساس مجروح وفرح بالعيد ما تمَّ وعيون بتفش للغايب لسع ما جانا ولمّ وشفع من غير ضحكة وقعدة ونسة بدون نمَّة شن خليتي وراك يا يمة؟ ... .. .
10-11-2007, 07:33 AM
عبدالبارى العجيل عبدالبارى العجيل
تاريخ التسجيل: 03-02-2005
مجموع المشاركات: 268
جانا العيد يمشي ويعرج فيشان خاطرو المكسور ما لقالو جبيرة وجاتنا الفرحة مبلمة ساكت ما فيها ضريرة وبكانك فاضي في حلقة قعدتنا وجلسات القهوة وونستنا يا سمحة سيرة بالله عليك ما تتاخري شان باقي عيونا معلقة في باب البيت ومعاها الحيرة ... .. .
10-11-2007, 09:11 AM
Ahmed El Gasim Ahmed El Gasim
تاريخ التسجيل: 10-25-2005
مجموع المشاركات: 677
)جانا العيد يمشي ويعرج فيشان خاطرو المكسور ما لقالو جبيرة وجاتنا الفرحة مبلمة ساكت ما فيها ضريرة وبكانك فاضي في حلقة قعدتنا وجلسات القهوة وونستنا يا سمحة سيرة بالله عليك ما تتاخري شان باقي عيونا معلقة في باب البيت ومعاها الحيرة)
ود العجبل الله برحم بت بخيت وامي بتول بت نورالدينانت تصف حالي واخوتي معكم فقد فقدناها قبل رمضان ...وصدقني(جانا العيد يمشي ويعرج فيشان خاطرو المكسور ما لقالو جبيرة).... لهن الرحمة
10-11-2007, 08:22 PM
عبدالبارى العجيل عبدالبارى العجيل
تاريخ التسجيل: 03-02-2005
مجموع المشاركات: 268
Quote: ود العجبل الله برحم بت بخيت وامي بتول بت نورالدينانت تصف حالي واخوتي معكم فقد فقدناها قبل رمضان
بالجد ماداير أجدد ليك الأحزان والدنيا قبايل عيد وكمان ما داير أخلي أي زول عاش اللحظة دي قبال كدة يعيشه تاني ربنا يتقبل بت بخيت وبت نور الدين آآمييييييييييين
10-16-2007, 04:59 AM
عبد المنعم ابراهيم الحاج عبد المنعم ابراهيم الحاج
تاريخ التسجيل: 03-22-2005
مجموع المشاركات: 5691
حمد الله سريحي آ ست النفر آخيتي باقي الناس قالولي كانت جارحاكي سلامة ونحمدو تاني علي جيتك لينا بي ألف سلامة ما باكيتك أكنك عارفي كل البينا وعارفي الدنيا وأوهامه فقدنا واحد من دون شك وأصلاً ما بيناتنا ملامه ... .. .
العزيز كودي: أسأل ربي ما تشوف مكروه في زولاً ليك ولا يغشاك الهم فد يوم لا ينزل مطر الحزن علي واديك ... .. .
وينك ياخي يا منعمنا يا ونستنا ويا قهوتنا وباقي نضمنا؟؟ ... .. .
10-26-2007, 10:52 PM
عبد المنعم ابراهيم الحاج عبد المنعم ابراهيم الحاج
تاريخ التسجيل: 03-22-2005
مجموع المشاركات: 5691
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالبارى العجيل
Samer Osman
Ahmed El Gasim
Khalid Kodi
فيس بوك
تويتر
انستقرام
يوتيوب
بنتيريست