كلام الليل "حمى خبيثة"

أنا اهضرب اذن انا محموم ... بداية نبدا بتعريف الحمى وهي ثلاثة انواع حمى ملاريا وحمى مصحوبة بالالام في المشاعر اما الثالثة فهي حمى الشاكوش والعياذ بالله ... أما النوع الرابع فهو الحمي الشوكية حمانا الله واياكم .. ففي قديم الزمان يحكى ان احد افراد قبيلة بني "تجلب" وهي على وزن "تغلب" القبيلة العربية المعروفة والتي اشتركت في حرب البسوس مع بني عمومتهم قبيلة بكر .. (ما علينا) المهم الزول ده ماشى من الحلة لي محل انترنت لاقته واحدة في الشارع زي ما تقول بس حورية ... شديدة شدة الحرامى ... صاحبنا اتكسر من قولة تيت وخش شمال "من يوم ما رايتك داق قلبي السعادة" واختنا صدقت الوهمة والحكاية جرت "حبيبي اكتب لي وانا أكتب ليك" يعني القصة وصلت لمرحلة الهيام (بالمناسبة ما هيام المغربي الله يرحمها واحدة تانية) .. "والليل ما بنومه لاني بعد نجومه" لغاية ما جاته في يوم وقالت ليه سجمي ود عمي جا من السفر وقالوا العرس بعد اسبوع صاحبنا جاته ما يعرف بالحمى الشاكوشية الخبيثة على غرار الجمرة الخبيثة ... فكلم ناس الحلة اللي قاموا عملوا غارة على قبيلة البت واسرو منهم ما أسرو وقتلوا ما قتلوا ومن ضمن الضحايا العريس الجديد ... القصة العايزين نحكيها جاطت والفكرة اتشربكت مع الزحمة بتاعة الناس ديل .. لكن المرة الجاية بوريكم كيف استطاع صاحبنا بطل القصة انو يخترق جدار الخلية ويصل للسيتوبلازم "المادة الحية".

رؤية: ود محي الدين