Post: #1
Title: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-02-2007, 07:09 AM
جميل أن يجد أحدنا موطنا بديلا يتوفر فيه الأمن والأمان ..
موطن .. هو مهبط لوحي من نوع آخر لم يوحى به إلى من حيث أتيت.
ومهد لرسالات جديدة .. لم أكن قد دعيت إلى الإيمان بها قبلا ..
وأنبياء جدد يحملون معجزات نبوءاتهم في دهشة مدهشة.
هنا حيث الإنسان هو محور الخلائق .. وكذلك الحيوان ..
هنا حيث نسائم الحرية التي تنعش الحياة فتحيلها إلى جنات خلد أخرى..
هنا عطر الإنسانية التى تفوح عبقا يضوع كل الأرجاء جمالا وحبا..
هنا دنيا جديدة غير التي عرفتها وألفتها وعشت من أجلها..
هنا المحبة والتسامح وقبول الآخر المتفق والآخر المختلف..
هنا الماء والخضرة والوجه الحسن ..
هنا الحياة..
هذه بعض من أرباح جنيناها.. وما يزال الجرد جاريا..
|
Post: #2
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: Muhammad Elamin
Date: 10-02-2007, 09:18 AM
Parent: #1
كدي خلينا من النضمي الكتير دا وكلام الدكاترة والمنظراتية
أهم سعال !
لقيت محل ببيع الفول باللحمة ولا لا ؟؟؟؟؟؟؟
ولا نسيت ؟
|
Post: #5
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-03-2007, 03:39 AM
Parent: #2
دكتور/ محمد .. حبينا القديم .. الجديد لنج في المنبر .. سلامات
| Quote: لقيت محل ببيع الفول باللحمة ولا لا ؟؟؟؟؟؟؟ |
فول باللحمة الشوية ده ؟.. هنا تلقى "كأنه بالخارج ظاااااااااااااتو".
يا زول هنا تشيل هم أي حاجة تانية إلا العضة ..
الشعب الأمريكي شعب عضاض جدا، وغصبا عنك تبقى معضض أول ما تدخل السستم..
والعضة ظاااااااااتها على الرغم من أهميتها تلقى ليها وقت بالجلالة..
المهم في الأمر أنه الفول بتلقى .. لكن لا مويته ولا موية الجبنة ولا موية زيت السمسم..
بناكل لينا في فول زي الحصحاص ، يجوز به الوضوء لا لون ولا طعم ولا رائحة له.
دي من الخسارات الإتوصلنا ليها في الجرد السنوي ..
خليك قريب عشان تحضر الحسابات الختامية..
تحياتنا لدود الخلا القرقار يا دكتره
|
Post: #3
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: omar altom
Date: 10-02-2007, 07:14 PM
Parent: #1
| Quote: الثاني من أكتوبر .. عام كامل في أمريكا |
يادوووووب........
ابشر بطول (اقامة) يااحمد
رمضان كريم ياخ
|
Post: #4
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: othman mohmmadien
Date: 10-02-2007, 07:32 PM
Parent: #3
أحمد محمد نور
الله يوفقك ...
والله المغصة شاقانا
بنقدم للوتري لغاية ما عجزنا...
وبرضوا ما دايره تنفرج معانا..
المهم الحمد لله.
الجواز ما تفرط فيه ...
بعني الأمريكي ...
===============
بدور اسألك عن البورتغيز .. قالواناس تمام وما برضو الحقارة؟ الكلام ده صحيح ...
وقيل بأنهم سلالة هندية ... سودانية ... أسبانية؟
شان كده فايتين الرجالة بغادي...
لك مودتي
|
Post: #10
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-03-2007, 08:46 AM
Parent: #4
عثمان محمدين .. إزيك يا اللخو .. رمضان كريم.
Quote: والله المغصة شاقانا
بنقدم للوتري لغاية ما عجزنا...
وبرضوا ما دايره تنفرج معانا..
المهم الحمد لله.
الجواز ما تفرط فيه ...
بعني الأمريكي ... |
يا اخوي نصيحة لوجه الله ..
إن بقيت جاي لي قراية نتفع بيها نفسك وأهلك وبلدك بعدين.. حبابك ألف .. ده محل العلم والثقافة ..
وإن بقت معاك شهادة كيسة متينة الأمريكان حيستفيدوا منها .. برضو حبابك.. الجماعة حيعضوا عليك بالنواجز ..
وإن بقيت جاي عشان الطيبات من الرزق والسقطيبة واللحم األأبيض .. وتنسى الوراك وتعيش لروحك وتبسطها فيما تبقى من عمرك .. برضو حبابك..
لكن .. ركز معاي في لكن دي سمممممممممممح .. إن بقيت جاي عشان تسوي قروش هنا .. أنسى الموضوع .. شوف لك طبلية في برندات السوق العربي وخليك مع أهلك..
طبعا الكلام ده ما هظار .. أنا جادي فيه جدا .. إن بقيت دايره شيله .. وإن بقيت ما دايروا أدي البحر..
كل زول وليه تجربته .. لكن البقولوا ليك ده الحال العام.
هسع عليك الله يا محمدين .. زول نصيح كدي قرا ردي لعمر التوم ده يقوم يجي أمريكا..؟
يا زول الله يديك العافية ويخدر ضراعك محل قاعد..
|
Post: #8
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-03-2007, 05:01 AM
Parent: #3
عمر التوم .. سلامات يا أخانا في المنفى الإجباري..
Quote: يادوووووب........
ابشر بطول (اقامة) يااحمد |
يا اخوي إنت ما بتطمن كله كله..
هسع عليك الله بدل تطبطب علي وتقول لي اصبر .. وهانت .. جاي تشمت فيني؟ .. ماليك حق والله يا عمر..
إنت عارف أخوك أول ما استلم الـ Social Security والـ Work Permit في نفس هذا الوقت من السنة الغابره ..
وقبض أجر أول أسبوع .. دولار أخضرررررر .. ناصع الخضرة .. كاش نقدا .. لادين لا بعدين ..
قمت طبعا ضربت ليك القيمة بكل العملات الأفريقية الأنا بعرفها .. يا زوووووول طلعت قروش كتيره خلاص..
أها بالتضريبات الفعلية والمتعقلة لقيت إنه الواحد في سنة ممكن يشلت أمريكا دي زي الترتيب ..
طبعا التضريبات بتقول في سنة بتكون اشتريت ا########## وسورتها وبنيت فيها 3 عوض وصالون ومنافع بالمونة الحره طبعا ..
وتكون اشتريت الشيلة .. وسديت المال .. وسويت العرس الما خمج .. وكمان تكون جيت فيه ناس أغاني وأغاني .. بي السر قدروهم ظااااااتو ..
وفوق لكده تكون بسط ناس البيت خلال السنة دي ..
تكون حججت الجلاكين حجة من عندك غير حقاتهم القديمات ديلك..
والعجب الأخوات تكون لبستهم الدهب للكوعين والمرفقين ..
والإخوان تكون بسطهم لمن آمنوا ..
والخير بيكون وصل زمان الخالات والعمات وجارات الحاجة كمان ..
---------------
أها أخوك بحكم أنه في يوم تاريحي مشهود ..
ويشكل معلم بارز في تاريخ سيادتنا السياسي والإجتماعي والسياسي ..
ومنعطف خطير في سبيل حياتنا المعاصرة ..
قام أخوك راجع نهار اليوم العظيم حق الليلة ده ..
بنك CHASE الذي أتعامل معه ..
وشركة الـ CREDIT CARD
وكل الديون والإلتزامات المادية والأخلاقية اللي على الناس ..
فإذا بالنتيجة .....
ياخي إنت ما عارفه براك .. مالك داير تقلب لي المواجع .. أصلو الفضيحة والستره متباريات ..
المهم يا حبيب ما في ألذ من يا مولاي كما خلقتني .
وأبدأ أحلم بعام آخر سيحل قريبا .
|
Post: #6
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: Gaafar Ismail
Date: 10-03-2007, 04:19 AM
Parent: #1
أخي الحبيب محمد نور أحمد
تحية طيبة وبعد
متابعين معاك أسلوبك الشيق الجميل.
إن شاء الله نهاية الجرد يكون ربح وموش خســارة .
عاطر مودتي وفائق احترامي
|
Post: #7
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: غادة عبدالعزيز خالد
Date: 10-03-2007, 04:32 AM
Parent: #6
الأخ العزيز
محمد
نمشي نجيب دفاترنا ونحضر معاك الجرد ولا شنو؟
مودتي يا صديق
غادة
|
Post: #12
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-03-2007, 09:21 AM
Parent: #7
صاحبتي غادة .. إزيك يا رائعة..
| Quote: نمشي نجيب دفاترنا ونحضر معاك الجرد ولا شنو؟ |
جرد شنو يا غاده .. الجرد خلص زمان وأعلنها الحسابات الختامية .. وعملنا فايل للبنك ربسي.
علا دفاترك خليها لكشف الحريم .. مش مفروض يساهمن في الحالات الإنسانية المستعصية الزي دي؟
زمان الحريم ما بدفعوا كشف .. لكن دحين لزوم الجندره والمساواه وكدي.
أحكي ليك قصة ظريفة..
وأنا برلوم جديد في جامعة السودان .. جيت لقيت الجماعة فاتوني .. الشلة نصها جكس ، جكس نضيف نضافة مبالغ فيها .. مستحمي ومتمسح..
أها الكاشف أخوك قبليها كان بقرا في جامعة أفريقيا العالمية، كلها أفارقة وآسويين، اليوم النشوف لينا طرحة حايمة(أقصد خمار لأنه ما عندنا طرح) في حيكون عندنا موضوع تاني في اليوم ده غير الطرحة الشفناها من على بعد 3 أميال دي. أها ربك رب الخير فتحها علي وجيت جامعة السودان.. لقيت الأولاد يقالعوا البتات في الشيرينع للفطور، والحكاية دي في ثقافتي أنا أخير تقتلك زول مما تاخد قروش من مره بغض النظر عن الأسباب، حتى ونحنا صغار تسأل أبوك لكن ما تسأل أمك. أها في ظل الظروف كنت ممتعض جدا من الموضوع ، أحيانا كثيره بفطر الشلة كلها على حسابي،ولمن تكون المصاريف مقطوعة الواحد بتزاوغ، وده كله تفاديا لأني آخد قروش من بت. عليمك الله بعد 4 شهور من أول يوم لي في الجامعة بقن البنات يجني في نص المحاضره قبل الفطور تقول بساعة يقولن لي "عليك الله ما تفضحني الليلة أنا ما شايلة قروش .. مصاريفي كملت".
أها ركزي لينا عليك الله على كشف الحروم..
|
Post: #11
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-03-2007, 08:59 AM
Parent: #6
عم جعفر .. إزيك يا راجل يا طيب ..
Quote: متابعين معاك أسلوبك الشيق الجميل.
إن شاء الله نهاية الجرد يكون ربح وموش خســارة . |
شكلها خسرانه يا عمك ..
خليك قريب .. إحتمال نبقى على كشف الجال..
أمانة ما ده جيكون كشف دولي ده .. شئ دولار أمريكي وكندي وشئ ين ياباني وشئ مارك ألماني..
ناس الداخل ديل عافنهم من الكشف .. أصلهم حالهم مكشوف ..
شايف في كشف تاني شغال لصالح دكين العظيم .. أول ما يخلص الدور على
خليك قريب يا عم جعفر..
|
Post: #9
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: يوسف الولى
Date: 10-03-2007, 05:24 AM
Parent: #1
الاخ محمد
نوريك اللعبه وين
اضرب الحديد وهو سخن.... الشغل راااقد لكن الدفع خشم بيوت
ابقى حريف اوعمل زى صاحبنا ديينق خشه جوه مغاره كلها دولارات
او غمض عينك وخش البحر والسكا قريبه منك ... هناك الدولار راااقد فى نص المويه
ودى نصصيحه لوجهه الله .. وما تدقس زينا ... اربعه سنين وزات الشجون واشوفك بكره فى الوعد كمان
و
تحياتى
|
Post: #13
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-03-2007, 09:33 AM
Parent: #9
يوسف الولي .. أخانا في عالم البؤس والشقاء .. إزيك يا حبيب.
| Quote: ابقى حريف اوعمل زى صاحبنا ديينق خشه جوه مغاره كلها دولارات |
أها قول صاحبت دينق ودخلني المغاره .. البحلني من محمد حامد جمعة ووليد الشفت شنو؟
ياخوي حنكا سنين يأكلني عيش مع الجماعة ديل زي حق دينق ده ما عندي ..
لكن نشوف نصيحتك إن بقت ما في خيارات تانية..
| Quote: او غمض عينك وخش البحر والسكا قريبه منك ... هناك الدولار راااقد فى نص المويه |
والله يا يوسف يا اخوي كلام البحر ده بلحيل بدوره وسمعتوا قبل كده وفايت أضاني ..
إلا مروه للسقط ما عندي.. جني وجن السقط .. ما شايفني قاعد في تكساس..
| Quote: وما تدقس زينا ... اربعه سنين وزات الشجون واشوفك بكره فى الوعد كمان |
والله يا اخوانا البيشوف بلوة غيره تهون عليه مصيبته..
أها يا اخوي ودعتك الله والرسول .. إن بقيت شايف لك شيتا سمح زي حق دينق قل لنا عوووك.
الله يعدلها عليك وعلينا يا يوسف ..
|
Post: #14
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: tmbis
Date: 10-03-2007, 10:24 AM
Parent: #13
يــا محمد نــور ..
بلاي اجرد لينــا معاك كل ما يتعلق (بالسمك) ..
يعني بي وضوح .. سمك أمريكــا كيف..؟
نحن ناس بنحب السمك .. وبندخل معاهو في حتات ضيقة جدا ..
والحاجة التانية..:
(البرد) كيف..؟
قال ليك احذروا البرد فإنه قتل اخاكم ابا ذر ..
انا مستغرب الناس دي قاعده تعيش كيف في مكان فيها بررر برررد ..
طالما دي اول سنة يا محمد نور .. اجرد علي مهلتك .. والله نحن هنا من كترت (الجرد) ..
الواحد قرب يبقى (جردل) عديل كدا ..
..
.
اقامة طيبة يا محمد نور وبالتوفيق
|
Post: #15
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-03-2007, 11:00 AM
Parent: #14
حبيبنا تمبس .. وين يا حبه
Quote: بلاي اجرد لينــا معاك كل ما يتعلق (بالسمك) ..
يعني بي وضوح .. سمك أمريكــا كيف..؟
نحن ناس بنحب السمك .. وبندخل معاهو في حتات ضيقة جدا .. |
هو نحنا المصبرنا شنو في البلد الكج دي غير السمك الأمريكي..
يازوووووووول ألذ وأطعم سمك ممكن تتذوقه على الإطلاق..
إن بقيت زول حيتان ناس قرش وسالمون .. إرتحت تب,,
وإن بقيت زول بلطي وأسماك زينة بتتجهجه.
أما الصير والأسماك الصفيره كالقرمبوز فإياك ثم إياك ثم إياك.. ده بجيب خبرك في البلد .. تسممات ساي.
Quote: (البرد) كيف..؟
قال ليك احذروا البرد فإنه قتل اخاكم ابا ذر ..
انا مستغرب الناس دي قاعده تعيش كيف في مكان فيها بررر برررد |
أما البرد ده كمان موضوعه براه .. شكله حيلحقنا أبا ذر..
أنا شغال معاه بنظرية إبن بطوطة .. بس محل هو يقبل يلقاني رحلت زمان ..
وعلى بال ما يجيب عياله بخصلني بكون أنا شتت لي قدام ..
أها يوم الليلة ده من الأيام العصيبة في مسيرة الطقس الأمريكي..
في ولايتناحيعلنوا رسميا بكره إنتهاء الصيف و بداية السقط .. والسقط جا وأنا ما برجا..
يا اخوي أنا زول مسكين ساكت .. صغير وجاهل .. بطانية زي الناس ما عندي .. أقعد أرجى السقط لمن يجيني..
والله يا تمبس عندنا سقط الله لا وراك ليه .. الخالة نحنا أحسن من غيرنا.. زي الناس في الولايات الشمالية..
وأسخن حته في البلد دي .. حلة ناس عمك/بكري سيد الحوش .. يا زول أم درمان السوق الشعبي الساعة 3 ظ
Quote: طالما دي اول سنة يا محمد نور .. اجرد علي مهلتك .. والله نحن هنا من كترت (الجرد) ..
الواحد قرب يبقى (جردل) عديل كدا .. |
غايتو نلوك الصبر ساكت .. عاد نسوي شنو؟
بالتوفيق .. وسبحان الذي لا ينسانا ولا ينساكم,
_____________________________________________________________
أبوبكر وممكونة والزول لو لموا فيك حايم بجاي بيجيبوا خبرك
يا شالوا الكاميرا الفي يدك دي يا شالوك إنت ظااااااتك يا شالوكم إنت وكاميرتك. كلمتك أنا,
|
Post: #16
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: Sayed Bekab
Date: 10-03-2007, 11:55 AM
Parent: #1
محمد نور أحمد
رمضان كريم
سنة اولي سعيدة
في زول قال لي اول يوم وصلت فيهو بلاد الجرد اسمع يا زول اول خمسة سنوات فى امريكا اجر و عافية و فسح سااااااااااااااي و قراية بالليل سمعت كلامه لكن نطيت منو بعد اسبوع .... عليك بالقراية الماخمج استثمر لك مابين ٢ الي ٤ سنوات و بعدين القروش بتسكك سك و بكون عندك كمان زول بجرد ليك بدل ما تقعد تجرد براك ... ابدا جرد الحصص من هسي و سجل شهر ١ ما بعيد بالتوفيق إن شاء الله .
|
Post: #17
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: doma
Date: 10-03-2007, 12:14 PM
Parent: #16
اعسل منك ما شفنا
|
Post: #18
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: Raja
Date: 10-03-2007, 04:01 PM
Parent: #17
الجلابي القادم بقوة 8 ريختر محمد نور.. طبعا جبت ليك الهوا ..
سلام ومحبة..
كل يوم وانت بخير.. طبعا سنوات الزمن ده بقت زي أيام الزمن الزين.. هسع إتلفتنا كده لقينا اكتوبر جا..
كل التمنيات بإقامة طيبة ومثمرة على كل المستويات
ودي
|
Post: #26
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-04-2007, 03:27 AM
Parent: #18
صاحبتي رجاء .. إزيك.
Quote: الجلابي القادم بقوة 8 ريختر محمد نور.. طبعا جبت ليك الهوا ..
سلام ومحبة..
كل يوم وانت بخير.. طبعا سنوات الزمن ده بقت زي أيام الزمن الزين.. هسع إتلفتنا كده لقينا اكتوبر جا..
كل التمنيات بإقامة طيبة ومثمرة على كل المستويات
ودي |
مالك دايرا تجيبي لي الهوا مع مهمشين المنبر وناس السودان الجديد ..
أنا غاينو حتى الآن ماسكة العصاية من النص ..
جلامش .. حاجة كده بين الجلابي والمهمش ..
صدقت والله السنة بقت زي يوم من أيام الزمن السمح السامعين بيه داك..
شكرا يا رجوية على الأمنيات الصادقات .. ولك مثلها.
الجلامش بقوة 8 ريختر/ محمد نور أحمد
|
Post: #40
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-10-2007, 02:42 AM
Parent: #17
شكرا يا ماما .. ما بيجي شئ جنب عسل نحلك
|
Post: #28
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-04-2007, 03:44 AM
Parent: #16
أخونا سيد ييكاب ..
مرحب بيك في دكان ود البصير الخسران.
| Quote: في زول قال لي اول يوم وصلت فيهو بلاد الجرد اسمع يا زول اول خمسة سنوات فى امريكا اجر و عافية و فسح سااااااااااااااي و قراية بالليل سمعت كلامه لكن نطيت منو بعد اسبوع .... عليك بالقراية الماخمج استثمر لك مابين ٢ الي ٤ سنوات و بعدين القروش بتسكك سك و بكون عندك كمان زول بجرد ليك بدل ما تقعد تجرد براك ... ابدا جرد الحصص من هسي و سجل شهر ١ ما بعيد بالتوفيق إن شاء الله |
شكلها كده مافي حل إلا الخطة المقترحة منك دي.
القر اية كان ما حلت الواجد مافي شيتا تاني بيحله..
لكن القراية ظاااااااااتها لمن تسمع القروش الدايرنه لمن يغمي عليك ..
تخيل كم جامعة كدي عندي معاها اتصالات أقل واجدة دايره 60.000$ (ستون ألف دولار أمريكي لا غير) عشان أحضر فيها PHD
عليك الله أنا هسع كان عندي المبلغ أقعد عزابي ساكت السقط يسوي فيني عمايله دي..
مشكلة القروش ممكن تتحل بالـ LOAN لكن ما داير أدخل نفسي في مشاكل القعاد في أمريكا للأبد..
دعواتك في رمضان العظيم ده ربنا يفرجها.
|
Post: #19
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: الطاهر ساتي
Date: 10-03-2007, 04:37 PM
Parent: #1
لحد هسة الارباح اكتر يامحمد ...
بطل حسادة مابنجى نزاحمك ............
رمضان كريم وتصوم وتفطر على خير
|
Post: #20
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: Nesta
Date: 10-03-2007, 05:07 PM
Parent: #19
وانا أقول الزول ده مشى وين ؟
أبو نون ......
|
Post: #21
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: الطاهر ساتي
Date: 10-03-2007, 05:26 PM
Parent: #20
شايفك معنون تكساس في بوست اخوان بلاحدود ...
وبما انو البلد دى ماشي لى حتة ضيقة
شكلى كدة زى البجر ليك سلك تدعمنا بشوية حصين ومسدساتكم الطويلة دى
الجماعة ديل مابينفع معاهم الا شغل الكابويات .....
|
Post: #22
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: Nesta
Date: 10-03-2007, 05:40 PM
Parent: #21
الطاهر الطاهر ..
اظنك زيي فاطر في المكتب .. لآنو انا بكتب لمحمد نور والمغرب باذن ..
|
Post: #23
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: الطاهر ساتي
Date: 10-03-2007, 05:50 PM
Parent: #22
ايوة والله Nesta ...
الله يكون في عونا ساى ... وربنا يتقبل منك
محمد نور بيخم في الدولارات ونحن نفطر في المكتب ونرفع ليهو البوستات
شفت التهميش كيف ..؟؟
|
Post: #24
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: Nesta
Date: 10-03-2007, 05:55 PM
Parent: #23
| Quote: شفت التهميش كيف ..؟؟ |
جلابة مهمشين ..........
|
Post: #25
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: الطاهر ساتي
Date: 10-03-2007, 06:02 PM
Parent: #24
ارجع للموضوع الاساسي بتاع البوست يازول ..
مفردات التهميش والجلابة بتتشم من بعيد
مايقوم يشمها بشاشا ويجى يغطس حجر البوست ده
وتعب محمد نور يروح شمار في مرقة ... بلاذنب ..
|
Post: #30
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-04-2007, 03:57 AM
Parent: #21
ساتي يا جميل..
Quote: شكلى كدة زى البجر ليك سلك تدعمنا بشوية حصين ومسدساتكم الطويلة دى
الجماعة ديل مابينفع معاهم الا شغل الكابويات ..... |
أها يا اخوي .. ديل هينات برسلهم ليك ..
حأرسل ليك حصين ومسدسات وكام كاوبوي كدي من عينة ديجانقو..
لكن الشئ البعرفه جماعتك ديل ما بينفع معاهم إلا راجمات ومدرعات..
غايتو مؤقتا كدي خليك مجرب البتسوي فيه هسع ده لكم سنة تانية ونشوف النتبجة.
تسلم يت أسناذ..
|
Post: #29
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-04-2007, 03:48 AM
Parent: #20
نستا.. الزول الجميل ..
| Quote: وانا أقول الزول ده مشى وين ؟ |
شنو يا اخوي إنت وصحبك قايلني مشيت قندهار ولا شنو؟
يا اخوي أنا قريب هنا في الأراضي المقدسة الأمريكية..
حيث يحكم العالم ويتجهجه.
شكرا على المتاوقتة يا نستا..
|
Post: #27
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-04-2007, 03:33 AM
Parent: #19
أخونا الطاهر ساتي شخصيا .. زارتنا البركة والله.
Quote: لحد هسة الارباح اكتر يامحمد ...
بطل حسادة مابنجى نزاحمك ............
رمضان كريم وتصوم وتفطر على خير |
والله خسرانة يا الصادق .. إنت زول كيس داير تطبطب على وتصبرني ساي
غايتو إن بقيت جاي بحاول أعقلك..
لكن إن أصريت حبابك ألف ..
لكن بتبقى عاطل هنا..
فسادا يكتبوا فيه مافي ..
الا كان تكتب عن الحسناوات في منبت السؤء..
ولا تكتب عن الخضرة والماء والوجه الحسن..
حبابك يا الطاهر .. سعيد بمرورك ..وكل سنة وإنت طيب.
|
Post: #31
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: الزوول
Date: 10-04-2007, 04:20 AM
Parent: #1
السلام عليكم
محمد نور أحمد
رمضان كريم مرة أخرى
والله من زمان كنت عايز أطرح الموضوع ده على الناس الهنا ديل
ونمسكها دولة دولة
ناس أمريكا ، كندا ، استراليا ، الصين ، اليابان ، الخايج ....الخ
ونشوف جردة حساباتهم
بس أهم حاجة تكون الصدق ..
بدون تلميع
ولازم كشف الحساب يكون من كله
أدق السلبيات تتقال ... أدق الإيجابيات تتقال
تأثير الغربة ... مش المادي بس
العاطفي ... الأحساس بالوطن الأم
الأسرة ... الأطفال
وأهم حاجة الصدق مع النفس
يا ريت البوست ده يكون نواة لما فكرت فيه
أو اذا ما كنت فاتحه عشان كده ... كلمني أفتح واحد بالخصوص ده
بس أهم حاجة تكون مشارك رئيسي فيهو
................
نسيت أكلمك
أنا بحبك عديل كده يا مان
................
وما الناس إلا هالك وأبن هالك *** وذو نسب في الهالكين عريق
|
Post: #32
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-04-2007, 09:23 AM
Parent: #31
السلام عليكم
الزول
رمضان كريم .. وكل سنة وإنت بخير
شكرا على الإشادة بالبوست ..
الأمانة تقتضي ان أقول لك أنني لم أفكر في البوست ينفس هذه الطريقة الجميلة التي فكرت فيها أنت
أنا الحقيقة عندي 3 بوستات جادات جدا جدا وقلت أفتح البوست ده أعالج فيه موضوع الغربة يشكل فكاهي .. وأتونس فيه مع الحبايب عن مآسي الغربة وضغوطاتها..
كنت حأكون سعيد جدا لتغيير مسار هذا البوست ليكون متناولا للفكرة التي طرحتها أنت وأتطوع لعرض تجريتي كأنموذج..
لكن عشان أنا تجربتي في أمريكا حتى الآن فقط سنة واحدة .. شايف أن التقييم ما بيكون عادل ولا منطقي .. تجربة ما ناضجة (تقول تجربة عاطفية).
وعليه اقترح إنك تقتح بوست منفصل وأنا حأكون مرابط فيه 24/7 ونستضيف فيه ناس مغتربين من مناطق مختلفة في العالم ..
وأقترح أن تكون بوست منفصل لكل دولة أو لكل تجربة ..
مثلا نفتح بوست لتقييم تجربة الغربة في السعودية ونستضيف فيها تمبس، أبو جهينة، غريبة.. الخ
ومن كندا نستضيف تراجي، حيدر قاسم، الباقر موسى..
ومن اليابان نستضبف حيدر ميرغني، عم جعفر، الفاتح ميرغني..
ومن أميركا كوستاوي، صلاح شعيب، بكري أبوبكر،سيد بيكاب..
ومن ألمانياعصام حبرالله، أدروب، ..
ومن ماليزيا د.بيان (لمن تجي)، د. شهاب ..
وكذا بقية الدول..
بمكن إستضافة عدد من الناس في البوست الواحد من دولة واحدة .. وكل زول يحكي تجربته في مجال معين بحيث يتكاملوا في النهاية..
أو كمان يقتصر البوست على شخص واحد فقط وبالتالي عليه تغطية كل الجوانب بمفرده..
في كل الأحوال أقترح بعد عرض الشخص او المجموعة للتجربة نفتح الباب للأسئلة في الجوانب التي لم يتطرق إليها صاجب التجربة أو أصحاب التجربة لتستكمل الصورة.. ومن حق المقيمين في الدولة المغينة من الأعضاء التعقيب أو التصحيح ..
يمكن نخت إيميل في البوست للمشاركين من غير أعضاء المنبر ..
عموما دي أفكار أولية في إتجاه تطوير الفكرة .. وأنا معاك يا الزول قلبا وقالبا ومقلوبا ظاااااااااااتو..
شكرا يا الزول على المشاعر الجميلة والنبيلة تجاه شخصي الما ضعيف ..
و أقسم بالله أني أبادلك الحب بأحسن منه.. وأحبك الله الذي أحببتني فيه يا رجل..
عاشت المحبة .. ولا نامت أعين الجبناء من غير الحبيبين.
---------------------------------------
مالكم الليلة يا ناس (ما أحلى اللقاء) طاقكيم فيروس الحب؟ .. شايفكم صارفين كمية من الحبكانيات لو وزعت على أهل المنبر لكفتهم
بعدل .. بوستيني وأنا حر فيه ...
|
Post: #33
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: الطاهر عثمان
Date: 10-04-2007, 10:10 AM
Parent: #1
محمد نور تحياتي
اسه نحنا بنفتش في طريقة التقديم للوتري تجي تقول اخير دكان ماعارف وين
يازول باذن الله جايين جايين
زمان قبل ما اجي السعودية قبل 9 سنين سمعنا الكلام ده برضو من الناس الفيها
كلام فارغ - السعودية انتهت زمان- وجع قلب ونوع الكلام ده
وجينا وفعلا كلام فارغ ووجع قلب لكن الحمد لله عايشين ومستورين
----------
فكرة الزول حلوة ومفيدة ياريت لو يفتح بيها بوست كما تفضلت
لك التحية
|
Post: #34
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: الطاهر عثمان
Date: 10-04-2007, 10:12 AM
Parent: #33
اخ نسيت حاجه
الطاهر ساتي شايفك متابع وشفته محمد نور داخل بوست اخوان بلاحدود وانته دخلته
ياخي قولينا السلام عليكم بس ماعايزين حاجه
|
Post: #35
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-05-2007, 05:54 AM
Parent: #33
الطاهر عثمان .. كيف حالك يا اللخو ..
Quote: اسه نحنا بنفتش في طريقة التقديم للوتري تجي تقول اخير دكان ماعارف وين
يازول باذن الله جايين جايين |
يا اخوي إن بعد كلامي الفوق ده مصر تجي حبابك ألف .. مرحب بيك في قبيلة اللوتراب ..
Quote: زمان قبل ما اجي السعودية قبل 9 سنين سمعنا الكلام ده برضو من الناس الفيها
كلام فارغ - السعودية انتهت زمان- وجع قلب ونوع الكلام ده
وجينا وفعلا كلام فارغ ووجع قلب لكن الحمد لله عايشين ومستورين |
عايشين ومستورين دي بتقول فيها بالراحة كدي مالك يا زول
أها في السعودية بتحمدالله على العيشة والستر ..
لكن هنا علي بالطلاق مش تحمد وتشكر ..
إن لقيت وكت للمواد الإجبارية الليلت الحيكومة من صيام وصلاة تكون ما قصرت تب ..
| Quote: فكرة الزول حلوة ومفيدة ياريت لو يفتح بيها بوست كما تفضلت |
كدي فكرة الزول خلها ..
دحين المشروع الليلك .. السجلت فوقو أسامينا ما جاب له قريشات ؟؟
غايتو إن بقى في شيتا كيس قلنا عوك .. باقي مسجل إسمي قبل خلائق الله جت.
ما تنسى يا الطاهر .. ثمح.؟
|
Post: #36
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: Sayed Bekab
Date: 10-05-2007, 09:47 AM
Parent: #1
محمد نور
سلامات انا مجهز كلامي للمقابلة تلفزيون المغتربين عوامل النجاح فى اغتراب امريكا هي
القراية ........... اول حاجة و اهم حاجة
احترام الدولار يعني الدولار المفروض يكون عندك بساوي ٥ دولار و تكون حريف فى جدول الضرب يعني ٥ فى ١٠ ب٥٠ دولار لكنها فى الاصل ٥ دولار ما تنسي الحقيقية دي توهتك مش سمح شيل الصبر معاي
عمل الساعات الكتيره ناس بشتغلو ميه ساعة في الاسبوع دي عواره لازم تشتغل ١٢٠ ساعة فى الاسبوع لكن لاحظ انو مجرد ما تتخرج الساعات دي بتقسم علي ٣ و الدخل اكبر توهتك مش شيل الصبر
كرووووووووووووووت التلفونات و النقه الماعندها لازمه ..... ياخي ديل من شده عوارتنا كل يوم مطلعين ليهم كرت تلفون للسودان و الدول المجاورة لمن ال ٢ دولار بقت بتكلمك ٦٠ دقيقة و ناس الكروت ديل ناس شمار عديل كده بقولو ليك للحصول علي ال ٦٠ دقيقة المكالمة لازم تكون واحدة بدون انقطاع عليك الله دي حالة .... قاصدين يضيعو وقتنا
الكشوفات الضروري منها و ما وجب .... معقوله بس الواحد يعملوه ليهو كشف شان غنمايتم ماتت فى الحلة..ولازم الزول قريب الغنماية يسافر يتقبل مراسم العزاء وشيل عندك كشف شراء غنمايه و حفل تابين و تذكرة سفر و مصاريف المسافر يييييييييييييك ...
الصندوق ابو 1000$ فى الشهر و الصرفه ٤٠٠٠٠ الف ممتاز جدا لكن الصبر يجيبوه من وين... وناس السودان البصبرم منو ال ٤٠ شهر فلان ماشي الحج فلان جاي الخرطوم ... فلان ماشي
واخيرا حساب بنكي بدون كرت البنك تضع فيهو ما زاد عن حاجتك يعني لو محتاج القروش ايلا تمشي البنك و و دي فكره دائما ما كانت ناجحه معي و انت عارف نحنا ناس نحب الترطيب و صفوف البنك انا بكجنه بتذكرني طوالي صف العدس فى الداخلية
الله يجازي محنك يا اخي انا ما بديت الجرد عديل
|
Post: #38
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-07-2007, 06:02 AM
Parent: #36
العزيز/ سيد بيكاب..
Quote: سلامات انا مجهز كلامي للمقابلة تلفزيون المغتربين عوامل النجاح فى اغتراب امريكا هي
القراية ........... اول حاجة و اهم حاجة
احترام الدولار يعني الدولار المفروض يكون عندك بساوي ٥ دولار و تكون حريف فى جدول الضرب يعني ٥ فى ١٠ ب٥٠ دولار لكنها فى الاصل ٥ دولار ما تنسي الحقيقية دي توهتك مش سمح شيل الصبر معاي
عمل الساعات الكتيره ناس بشتغلو ميه ساعة في الاسبوع دي عواره لازم تشتغل ١٢٠ ساعة فى الاسبوع لكن لاحظ انو مجرد ما تتخرج الساعات دي بتقسم علي ٣ و الدخل اكبر توهتك مش شيل الصبر
كرووووووووووووووت التلفونات و النقه الماعندها لازمه ..... ياخي ديل من شده عوارتنا كل يوم مطلعين ليهم كرت تلفون للسودان و الدول المجاورة لمن ال ٢ دولار بقت بتكلمك ٦٠ دقيقة و ناس الكروت ديل ناس شمار عديل كده بقولو ليك للحصول علي ال ٦٠ دقيقة المكالمة لازم تكون واحدة بدون انقطاع عليك الله دي حالة .... قاصدين يضيعو وقتنا
الكشوفات الضروري منها و ما وجب .... معقوله بس الواحد يعملوه ليهو كشف شان غنمايتم ماتت فى الحلة..ولازم الزول قريب الغنماية يسافر يتقبل مراسم العزاء وشيل عندك كشف شراء غنمايه و حفل تابين و تذكرة سفر و مصاريف المسافر يييييييييييييك ...
الصندوق ابو 1000$ فى الشهر و الصرفه ٤٠٠٠٠ الف ممتاز جدا لكن الصبر يجيبوه من وين... وناس السودان البصبرم منو ال ٤٠ شهر فلان ماشي الحج فلان جاي الخرطوم ... فلان ماشي
واخيرا حساب بنكي بدون كرت البنك تضع فيهو ما زاد عن حاجتك يعني لو محتاج القروش ايلا تمشي البنك و و دي فكره دائما ما كانت ناجحه معي و انت عارف نحنا ناس نحب الترطيب و صفوف البنك انا بكجنه بتذكرني طوالي صف العدس فى الداخلية |
أنا أقترح عليك يا سيد تنزل بوست بعنوان: وصايا بيكاب في محن الإغتراب..
ولا تكتب كتاب بعنوان: التمام في قضايا مغتربي بلاد العم سام.
صدقني حتفيد ناس كتار بتجاربك الثرة.
---------------------------------
إنت زول جميل يا بيكاب .. سعدت بالحديث إليك.
|
Post: #37
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: ابوالقاسم ابراهيم الحاج
Date: 10-05-2007, 12:54 PM
Parent: #1
والله يا محمد نور.
ذكرتنى بصديقي محمد أدروب إبن سنكات بولايات المتحدة وعبدالله النور(بيقر) إبن كوستى.
وعدانى بنزول الأخضر مدرارا على سماء القاهرة وينقلب البؤس والشقاء نعيما سعيدا وشقة فى المقطم بعيدا عن الغلب ومنظره بأحياء مصر القديمة ; الخليفة والسيدة عائشة والباطنية والغورية والظاهر والسبتية والبولاق!!.
بعد ثلاثة شهور من وصولهما قالو شنو?! (الحالة صعبة شديد خلاص)??!!.
تخيل !!!.
خلاص أرجعوا تانى!!!!!.
غايتو إحنا ناس قراية ساى وراجعين لاهلنا أم بكرة!!.
|
Post: #39
Title: Re: الثاني من أكتوبر .. عام كامل في أمريكا .. حسابات الربح والخساره ..!!!
Author: محمد نور أحمد
Date: 10-07-2007, 10:14 AM
Parent: #37
أبوالقاسم يا حبيب
| Quote: غايتو إحنا ناس قراية ساى وراجعين لاهلنا |
أمسك في دي قوي وعض عليها بالنواجز يا اخوي
|
|