Post: #1 Title: رسالة بليغة من اهل العوض مخسووووسة Author: ملكة سبأ Date: 09-30-2007, 12:35 PM
عجبتوني لمن اتمنين اكون من اهل العوض والله
Post: #2 Title: Re: رسالة بليغة من اهل العوض مخسووووسة Author: Muna Khugali Date: 09-30-2007, 12:49 PM Parent: #1
الزول الأعور ماتقول ليه انت أعور..
تقول ليه
عندك عين واحده بايظه
ذكرتيني سفريتنا المهببه ديك!
Post: #3 Title: Re: رسالة بليغة من اهل العوض مخسووووسة Author: ملكة سبأ Date: 09-30-2007, 12:59 PM Parent: #2
Quote: ذكرتيني سفريتنا المهببه ديك!
انت ليه مصرة تكتليني يوم بضحكة ؟!
والزول الشحّاد تقول ليه
جيوبك الإتنين بايظات
النبي يامنوية اسمعيها .. لو ماقلتي انا من اهل العوض لوميني
Post: #4 Title: Re: رسالة بليغة من اهل العوض مخسووووسة Author: abuguta Date: 09-30-2007, 01:07 PM Parent: #3
صاحبة اليوست الملكة
تحية رمضانية
لقد سمعت ود الشوتلى فى قصيدته انصاف اهل العوض وهو رجل مبدع من شعراء البطانة
وموضوع القصيدة نكة اخونا محمد موسى ومحمد نفسو من داخل اهل العوض من النيل الابيض لكن يريد ان يعمم نكاته على كافة اهل السودان لذا بداء باهله اهل العوض
عموما معالجة ود الشوتلى للموضوع جميلة ولنا عودة
Post: #7 Title: Re: رسالة بليغة من اهل العوض مخسووووسة Author: ملكة سبأ Date: 10-01-2007, 11:08 AM Parent: #4
اهلين ابقوتة قنبلةالحب الموقوتة
لو زعلت من سيد البلد تعال اتفشى عندك اهلك هنا
وماتقول الكلام لماهو ! غايتو
Quote: أول غلطة كان تنيتهـــــــــــــا بنعـل خاشـــك
رد ود الشوبلي اول مرة اسمعه وحقيقي عجبني جدا وزي ماقال ختّ الشعر في معاني
رد على كم نكتة جات في شريطة محمد موسى 1/ (الفنيلة الفسي الوسخ مدسوسة) ورد قاطع ومكّرب ونحن نفوسنا في بحور العفاف مغموســــة ميّـة غمسة لا عار لا دنس لا ســــــوســـة
Post: #5 Title: Re: رسالة بليغة من اهل العوض مخسووووسة Author: ماجدة عوض خوجلى Date: 09-30-2007, 01:38 PM Parent: #1
انا زاتى برضو ماعارفه من حسن حظى ولامحاسن الصدف الخلتنى اشوف البوست المخسس للرسالة البليغة لااهل العوض ملكة تحياتى وننتظر لغايه مانسمع تانى وتالت بعدين نقرر انتى تقولى منهم ولا تمسكى خشمك عليك .
Post: #6 Title: Re: رسالة بليغة من اهل العوض مخسووووسة Author: سمية الحسن طلحة Date: 09-30-2007, 04:35 PM Parent: #5
سلام ياملكة سبأ نحنا ايانا أهل العوض حبابك عشرة كان بقي دايرة تلمي علينا وإنتن يابنات الخليفة أهل عوض نحبكم وتحبوننا
رسالة بليغة من أهل العوض مخصوصة للأبن الظريف ود المدن ود موســــــــــــى بدور رد السؤال لو باللغة المهموســــــــــة فينا نقيصة ولا الصورة جات معكوســــــة
ماجبت الفتنة تعلن حرب بى جاســــــــوسا والسبب الفنيلة القت في الوسخ مدسوســـــة ونحن نفوسنا في بحور العفاف مغموســــة ميّـة غمسة لا عار لا دنس لا ســــــوســـة
نحن حقيقة أهل العوض والعزّة مابنكوســا أصحاب سمتة واصحاب فرســــة ً مو######## نحن أنعامنـا بتعــاف تـرتـــع المعـفـوســـة ونحن جـدودنا عادي بطيِّـعو الجاموســــــــة
ونحن أهل العوض لاطغـيـنـا لا اتـبدلـنـــــا واثـبيـن كالأســـود من واجـبـة مااتماهـلـنـا في البـر والبحـر تـلقانـا ويـن ما كنــــــــا في قمم الرجــــال كـذبــوا البمسّو حُـصُنـّـا
رد عن أهل العوض ( ودالشوبلي ) (2) نحن أهل العوض في الحالي والفات كـنّا قج شرك الكلام في سيرنا ما بعطلنــــــــا بس بوعّيـك أكان دقس في أصولنا متجاهـلنا بنحســـب في الجدود ستين ومن غـيـر إنّ
نحن ربّونا الشـــياب فوق ماما مااتعجــنـّا حافظيــــن لســــان حافظيـن كرامـة أهـلنا أشــــبال من أسُـــــود في ضبعة مااتهجنّــا سايرين سير كرام لامن نلاقي أجلنـــــــــا
ماراعيت شـــعور الناس شـــعـورك فـاتـرة بتسيىء للعزاز أهل الســـيـوف الباتــــــــرة أمانــــة تبخرك شـــطة ودمعـتـــــك قاطـرة ماســـــــــــمع الولادة أتخصصولا دكاتــرة
نحن والله عرب واولاد عرب لينا الشرف والعز بنسرح بالرزق نحلب ونصـُــر ونجـــــــز ويوم الحارّة والعركــــــــــة السلاحا بـــرز ثابتيــــــن كالجبال الشـــــامخة مابـنـفــــــــــز
المخســــــــــوفة والمرقوعــــة إياها لباسـنـا المجلوبــــــــــــة والمقنيّــــــة من ميراثــــــنـا الجار والعشيـــــــــر من الكتف لى راســـنا وفي المال والعروض تخشى الملوك من باسنا
ليه ياودموسى بتـزم الرجال بالعايـــــــــــــلة مابعشـّــــــــو الضيوف تحت السحابة الشايلة ماســــــــمع في أم همج كاكـوم عقيد الزايـلة ماســـــــمع بالنمر حرق الخديـــــوي القايـلة
رد عن أهل العوض ( ودالشوبلي ) (3) لكن لسانك فك ّ ياابني أصلـو مابـتســــــتأمن تشـــــحن في النفوس من الغبينـــــــة مـُدامـا ً ديل سمـــات المن مثالك في البحار اترامــا ً العربــــــــــي إن رقص ألبـل قرونن قامـــن
دحين ياخي رغم الغطرسة بالتمثيل وحبّة كاشـك تلقى أســـــــــفارنا أكبر من مســاحة داشـــك شبعانيــــــــــــــن طحين من الفطير ودراشـك اخير تبعد بخاف من شوكنا يخرب شـاشــك
ومهما زعمت من عزّة ونفخ فشـــــــفاشـــك أعلم طينـّـــا أنصــــح من تراب خشـــخاشك شــــــوف ناســــا ً رخاص تاخد عليهم فاشـك أول غلطة كان تنيتهـــــــــــــا بنعـل خاشـــك
دحين ياخي العرب والغير عرب كلهم أخوانك أحذر وانتبــــــــه شـــــكـّل غوافـي لســـــانك والرمي الفوق الجماعة الفي التعابيـــر خانـك نص البحـــــــــر بتدور تقــــــج صيوانــــــك
وكان كلمنا بنـقــــول الكـلام حـقــّـــــــــاني وكـان غنـّينـــا بنخت الشـــِّــعر فـي معانــــي عزيـزيــــــن في النـّســـب من ذلـّة مابنعـانـي بنحســب في الجدود ستيـت ومن غير عاني
دحين يابوي دي الكبرياء المن المعالم حاجب أحذر منــّو ولا ينسـيـــــك تـقــــــوم بالواجب ومن أمثـــــال طرازنا الفي العرف والواجــب ومهمـــــا العيـن تطول مابتعلى فـوق الحاجب
وعشان مانغلط معاك ونشيل النــّقط من شينك أوع تعضعض الناس البوضــّــــــــحو شــــينك حســــــــع وقعت في الحلــّة ووجـب تكشـيـنك شـــن ودّاك لى شــــعـراء البطانـــــــة تشيـنك
دحين ياخي الطامع في كثيرة الغير قليلتو تضيع وســــيد بيت القزاز ماببــــــدأ بالجُـدّيــــــــــــع ديـــل فولاذ الحديــــــد القاســـي في القطـّيـــع العربــــــي إن حرن وسط المحاص مابطيــــع
نحـن والله لابنخــــــاف ولابنعــــاف ولابنتـــهدد ولا بنكـّـل ولابنمـــــــــــــــــل ولا بنتــــــــردد كمــــان للزول البخــــــون عُشــــرتـنا مابنتودد نبقالــــــــــــو البـلاء فــي كل فـجــّــة ممدد
Post: #9 Title: Re: رسالة بليغة من اهل العوض مخسووووسة Author: ملكة سبأ Date: 10-01-2007, 11:54 AM Parent: #6