هل يفتي الشيخ جمال الوالي بإفطار لاعبي المريخ ودفع الكفّارة عنهم؟

Post: #1
Title: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: عمر الفاروق
Date: 09-30-2007, 09:04 AM

نتوقع أن تظهر فتوى جديدة بطلها الشيخ الجليل جمال بن الوالي شيخ الأزهر السابق ورئيس المريخ الحالي مضمونها جواز إفطار لاعبي المريخ في رمضان والسبب مباراتهم مع دولفين النيجيري التي ستقام إن شاء الله الساعة الواحدة بتوقيت نيجيريا ..
الوالي سيعتمد على أمواله (كالعادة) لإجازة هذه الفتوى واعداً جميع اللاعبين والطاقم التدريبي بدفع الكفارة عنهم وإطعام ستّين مسكيناً ولمدة شهرين ليس من قوت البلد فحسب بل من ما لذّ وطاب من خيرات البلاد من دجاج الحاتّي المشوي ووجبات أمواج وفطائر مصرية وعصائر "كابي" وباسطة "شريف"..
وفي أروقة النادي فقد إقترح المدرب أتوفيستر إقتراحاً وجد القبول عند بعض الإداريين وهو الدفع باللاعبين المحترفين جميعه بإفتراض إنهم او معظمهم (جالدين) رمضان ..
ونتوقع الدفع بأبالو وباولينو وإليجا تانا وإيفوسا وإيداهو وجيمي ناتالي (ديل كم؟)
مازدا كان له رأي اخر يتحايل به على القوانين الإلهية ومستفيداً من الرخص الرمضانية وإقترح على جمال الوالي تأجير طائرة خاصة تقلع من مطار الخرطوم بعد أذان الفجر مباشرة وحينها يكون اللاعبون على سفر ويجوز لهم الإفطار دون كفارة ودون القضاء ويصلو هناك نايرين ومفرهدين واللياقة فوووووووووووق..
اللاعبون أبدو إرتياحهم لفتوى وإقتراح جمال الوالي بدفع الكفارة عنهم وإطعام ستين مسكين فيما أصر اللاعب مجاهد على اللعب وهو صائم بينما إكتفى القائد فيصل العجب بالصيام لحدّي الساعة (12 ظهر)..
إدارة المريخ تحاول جاهدة الإتصال بالشيخ محمد حسن لإيجاد فتوى شرعية مأملين أن يكون رد الشيخ :
" يا ولادي الليلي إنتو في شان ماشين من أجل الوطن دحين لو فطرتو ما فوكّا حاجة الكورة عمل والعمل عبادة قال رسول الله صلّى الله عليه وسلم علّموا أولادكم السباحة والرماية وركوب الخيل..
يا ولادي ربنا ما أمر بالهلاك وإنما الأعمال بالنيات ..ويا فيصل يا ولدي إنتو أشربو العصائر وأكلو الموز وأبعدو من القدو قدو والأقاشي في نيجيريا "

بينما وجدت الفتوى التي أصدرها الشيخ عبد الحي يسوف إستهجان الأوساط المريخية :
" بسم الله الرحمن الرحيم ..والصلاة والسلام على أشرف المرسلين ..سيدنا محمد وعلى اله وصحبه وسلم تسليما..
أما بعد :
فإن الإفطار في رمضان عمداً ودون عذراً شرعياً فهو حراااااااااااام شرعاً ويدخل صاحبه النار وربما يكون في الدرك الأسفل من النار ,,وكان سلفنا الصالح والصحابة رضوان الله عليهم يسافرون بالدواب ويحاربون وهم صائمون والصوم هو العمل الذي قال فيه الله تعالى كل العمل لإبن ادم إلا الصوم فهو لي وانا أجز به ..وعليه إخوة الإسلام ليس هناك عذراً شرعياً للاعبي الكرة بالإفطار فكرة القدم بدعة والبدعة ضلالة وكل ضلالة في النار..
هذا والله أعلم "..

Post: #2
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: حمزاوي
Date: 09-30-2007, 09:27 AM
Parent: #1

الاخ عمر الفاروق
مسكاقمي
حكم الصيام للمسافر معروف
فالمسافر له ثلاث رخص
1 ـ تقصير وجمع الصلاة
2 ـ المسح على الخف والجوارب لمدة ثلاثة ايام
3 ـ الافطار في شهر الصيام
وهذا واضح ولا يحتاج لشيخ كي يفتي
والله اعلم
فياريت لو الاخ احمد الريح لو اوضح لينا اكثر

Post: #3
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: فيصل نوبي
Date: 09-30-2007, 09:27 AM
Parent: #1

Quote: ..ويا فيصل يا ولدي إنتو أشربو العصائر وأكلو الموز وأبعدو من القدو قدو والأقاشي في نيجيريا "

اللهم إني صائم
رمضان كريم يا حبيبنا

Post: #4
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: abuguta
Date: 09-30-2007, 09:45 AM
Parent: #3

Quote: ويا فيصل يا ولدي إنتو أشربو العصائر وأكلو الموز وأبعدو من القدو قدو والأقاشي في نيجيريا "

اها مزمل رايو شنو..دحين دى مش فتوة كروية

على لعيبة المريخ احضار الكاس جوا
باى طريقة حتى يتباها به جمهورهم
وبعدين الله كريم,,

Post: #5
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: سامى عبد الوهاب مكى
Date: 09-30-2007, 09:54 AM
Parent: #1

عمر الفاروق

رمضان كريم!!

هل نعتبرها فتوة شرعية من الشيخ الفنان عمر الفاروق؟؟

المهم دعك من الوالي يا عمر!!

هذا ما كتبته انا في منتدى المريخ.

Quote: رأيي بصراحة في موضوع إفطار اللاعبين من أجل مباراة دولفين!!

لا أفتي وأنا أعلم أني ليس مؤهل لذلك!!

ولكن قلبي دليلي!!

والتاريخ فيه من العبر الكثير!!

كان صحابة رسول الله يجاهدون في سبيل الله ويقضون نهارهم في قتال لا رحمة فيه ضرب وطعن وكر وفر ولا يفكر أحدهم في أن يفطر..لا بل ابعد من ذلك يأتي عليهم وقت الإفطار فلا يجد الواحد منهم غير تمرة يتقاسمها مع أخوه ويواصل طعنه وضربه للعدو!!

بسم الله الرحمن الرحيم

يا أيها الذين امنوا إن تنصروا الله ينصركم ويثبت أقدامكم

صدق الله العظيم.

محمد (آية:7):

نصرة الله عز وجل هي أن تنصره في نفسك بتجنب نواهيه وأن تنصاع بالكامل لأوامره.

أفضل أن ينتصر لعيبه المريخ لدينهم قبل أن ينتصروا في مباراة..ولا أظن أن الجمع بين الاثنين مستحيل!!

نصر عزيز مصاحب للطاعة أفضل.

أين أنتم من صحابه حياتهم شظف وخشونة لا فنادق يستجموا فيها ولا طعام شهي ولا نثريات ولا هبات!!

بل جهاد لا مقارنة له بهذه الدعة.

أسأل الله العلي القدير أن يوفقكم ويسدد خطاكم يا فرسان الزعيم!!

ملحوظة:

هم أكثر إصرارا كما علمت على الصوم

Post: #6
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: عمر الفاروق
Date: 09-30-2007, 10:26 AM
Parent: #1

عمنا حمزاوي:
Quote: فالمسافر له ثلاث رخص

حسب علمي المسافر ده بيفطر يوم السفر بس ..
لكن ما اعتقد الصوم زي الصلاة والإطار بيكون بس يوم السفر لكن تفطر تلاتة يوم دي ماااااا أظن
تحياتي ..

Post: #7
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: عمر الفاروق
Date: 09-30-2007, 10:32 AM
Parent: #1

فيصل نوبي..
تصوم وتفطر على خير ..
طبعاً دي فتوة لي فيصل عجب لكن إنت بتنفع معاك فتوى طلاب الجامعة الأهلية لمن البت والولد إشترو إيسكريم حليب بالفانيليا ووالبت قالت ليهو :
يا مولانا انا وفيصل كنا ماشي مع بعض وومتماسكين هو يلحس من الإسكريم لحسة ويديني ألحس من الايسكريم لحسة ..
أها الحكم شنو يا شيخنا ؟
قال ليها طالما الإيسكريم ده باللبن فإنتو أخوان في الرضاعة ..

أها دي فتوتك يا فيصل نوبي أصلو انا عارفك من يوم شيخ الأزهر داك خرمج وإنت ما كويس

Post: #8
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: عمر الفاروق
Date: 09-30-2007, 10:37 AM
Parent: #1

Quote: اها مزمل رايو شنو..دحين دى مش فتوة كروية

مزمل جاب صورة للتقويم الهجري تم طباعتها في السعودية بتوقيت أم القرى قبل عام وطابق بين تاريخ رمضان الموجود في تقويم أم القرى وبين تاريخ رمضان الحالي وإكتشف تزوير من المجمع العربي للإرصاد وتحري الرؤية حيث أنه من المفروض أن يكون رمضان حسب توقيت أم القرى بعد مباراة المريخ بإسبوع في حين تم التخطيط ليلعب المريخ في نص رمضان ...

Post: #9
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: إيهاب محمد مصطفى
Date: 09-30-2007, 10:45 AM
Parent: #1

يا جماعة

أكتبوا لينا حاجة عن الهلال ... والله قربنا ننساهو عديييل كده .. إشتقنا ليهو عدييل

إن شاء الله عيدوا لينا أقوان الإهلي المصري

أوتوقعات عن مباراة اليوم مع المجد.. ولا إن شاء الله تحليل مباراة الخرطوم3

أي حاجة كده نتذكر بيها (أبو الهل)

ياخي أكان كدي المريخ ده (سيد البلد) صحي .. يكتبوا عنه الكل( ضلالاب ومريخاب)

وما يكتبه (الضلالاب) عن جمال الوالي لم تكتبه المعارضة في (حكومة الإنقاذ)

معقول الوجع ده ؟؟

Post: #11
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: abuguta
Date: 09-30-2007, 10:54 AM
Parent: #9

Quote: ايهاب محمد مصطفى

تاريخ التسجيل: 06-12-2005
مجموع المشاركات: 40

انتو ياجماعة الناس الجداد دى جات من وين

اخرجكم نصر المريخ على الرفاع البحرينى

ياخى مرت علينا شهور وايام وساعات البورد كله ازرق
الليلة جائى تقول لينا نحن نسينا الهلال
انت ناسى نفسك وناسى البورد
شوف مشاركاتك من سنتين عددها كم
بتوحى انك غائب تماما عن البور مثل محمد ابراهيم
القال بتكلم باسم مشجعى الهلال
تحن عاوزين الكلام دا يجى من ناس قدام
عشان ننزل ليهم الارشيف كله
خليك متابع ياتوابع
ودمت

Post: #10
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: عمر الفاروق
Date: 09-30-2007, 10:52 AM
Parent: #1

سامي الخصال:
والله جملتك دي بي البوست كلو :
Quote: أفضل أن ينتصر لعيبه المريخ لدينهم قبل أن ينتصروا في مباراة..

دخلاتني في مضافريني

Post: #21
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: إدريس البدري
Date: 09-30-2007, 11:34 AM
Parent: #10

Quote: يا جماعة

أكتبوا لينا حاجة عن الهلال ... والله قربنا ننساهو عديييل كده .. إشتقنا ليهو عدييل

إن شاء الله عيدوا لينا أقوان الإهلي المصري

الفاروق
مالو يا زول رمضان خلا خطك كدة قريب لي خط تجتوج؟

Post: #12
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: إيهاب محمد مصطفى
Date: 09-30-2007, 11:00 AM
Parent: #1

أبو قوته

لو عاوزني أكتب زي كلامك ده

قطعاً مشاركاتي ح تكون (ضعف) مشاركاتك

وحق المشاركة ده شئ بخصني أنا.. مش إنت

ورمضان كريم

Post: #14
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: abuguta
Date: 09-30-2007, 11:12 AM
Parent: #12

Quote: ياخي أكان كدي المريخ ده (سيد البلد) صحي .. يكتبوا عنه الكل( ضلالاب ومريخاب)

وما يكتبه (الضلالاب) عن جمال الوالي لم تكتبه المعارضة في (حكومة الإنقاذ)

معقول الوجع ده ؟؟

اسى انت كلامك دا بفرق شنو من كلام تاج السر القاعد تتاذى منه

شوف كلمة
Quote: (الضلالاب)
وكمان جايب معها سيد بلد

مش يحق عليك اطلاق المثل القائل( تبخر فى الناس وهى تفسى)
عشان كدا اكتب اى شىء,, لتبرهن انك موجود؟؟؟
ودا المطلوب,,,عندنا فى البورد...
ياخى اكثر صحفى مريخابى مشهور هو مزمل ,,اجد صحفى رياضى محايد احسن منه
لانو مطلوب فى الكاتب الصحفى الحيادية وعدم التعصب لفريق بعينه . والا صار مشجع
وتسلم
ابو لدن
صحفى رياضى

Post: #15
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: Elawad Eltayeb
Date: 09-30-2007, 11:16 AM
Parent: #12

Quote: ونتوقع الدفع بأبالو وباولينو وإليجا تانا وإيفوسا وإيداهو وجيمي ناتالي (ديل كم؟)

الجماعة ضحكوني قالوا في البطولات العربية لما لاعبي المريخ يجيبو قون ويمشوا يحييوا الجماهير
الجمهور العربي بيغني

الشعب العربي فين

مع أننا هلالاب لكن فريق المريخ استحق النصر وكان ممكن لو لعب أكثر جدية يحقق نصر تاريخي.

نتمنى على المريخاب أن يؤازروا الهلال اليوم.

Post: #22
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: اسامه هاشم
Date: 09-30-2007, 11:34 AM
Parent: #12

ابقوتة
عفيت منك دا الكلام قلت لي الجماعة

ديل اولاد مزمل ابوالقاسم ما بيعرف

شئى سيد البلد اللي انجب منزول وجكسا

ودودو قاقرين السد العالي وامين ذكي

وعباقرة الكرة السودانية الذين كتبوا

اسم السودان والهلال بمداد من نور على

مر التاريخ.... الهلال يا ابناء مزمل ليس

صنوكم ولا ندكم بل هو الكل هو الاصل هو ابونا

ادم ابو البشرية واللي ما عاجبو ينضم الى قبيلة

البهائم

Post: #13
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: عمر الفاروق
Date: 09-30-2007, 11:06 AM
Parent: #1

يا إيهاب:
Quote: إن شاء الله عيدوا لينا أقوان الإهلي المصري

دي كمان بتتنسي عشان تتعاد ؟
دي في ذاكرتك وذاكرتي وذاكرة الأطفال والشيوخ والنساء ..
دي محفورة جواك وانت ذات نفسك ما قادر تنساها..
كوووووورنقو ..كوووووووورنقو ..كرونقووووووووووووووووووووووو..
وقوووووووووووووووووووووووووووووووووووووووووووووووووووووووووون..
عليك الله شعر جسم ما قام ؟

Post: #16
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: إيهاب محمد مصطفى
Date: 09-30-2007, 11:19 AM
Parent: #1

عمر الفاروق

أيوه كده .. شفت إنت لما تكتب عن الهلال بتكون مرتاح كيف

وحتى القون تجيبو بي ضبانتو .. في إذاعة خارجية علي الهواء مباشرة

(ياخي هدف كرنقو ده مفروض يدرسوه في الكلية الحربية يوم ضرب النار)

غايتو دي لو كانت (شبكتكم) كان الكورة كتلت ليها عسكري وراء القون

النصحية نحن بنمرقة ... لكن إنتو بتبلعوها

ورمضان كريم

بالمناسبة (كلامك في الوالي ده ... بضيع ليك حسنات صيامك)

Post: #17
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: إيهاب محمد مصطفى
Date: 09-30-2007, 11:24 AM
Parent: #1

أبقوتة:

أبو لدن

وصحفي رياضي

والله لكن .. فرصة سعيدة ياخي !!!

Post: #20
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: abuguta
Date: 09-30-2007, 11:30 AM
Parent: #17

Quote: أبو لدن

وصحفي رياضي

والله لكن .. فرصة سعيدة ياخي !!!

دا كله سببة انك غير مواكب
وغائب عن البورد
اسال اقرب مريخى جنبك شاهد على البورد
عشان تخش الشبكة
ياخى لقيتنا فترانين خلاص,, من المناكفة
قنا ما فضل زول عندو لسان طويل
فجاءة ظهرت انت,,
ارجع الارشيف الارباع لسنة 2007
بس اطلع وتعال
اخيرا نقولك رمضان كريم

رمضان كريم

Post: #18
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: حمد فتح الرحمن
Date: 09-30-2007, 11:26 AM
Parent: #1

عمر و زواره الكرام

صوت للهلال كافضل نادي عربي لشهر سبتمبر على هذا الرابط

Post: #19
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: segtaweel
Date: 09-30-2007, 11:29 AM
Parent: #1

حسب علمى البسيط انو معظم اللاعبين محترفين ودا شغلهم البياكلو منو عيش يعنى اذا اتعارض اكل عيشهم ورزقهم مع الصيام ربنا اجاز ليهم الرخصة وبعدين يقضوا او يطعمو وبعدين الدين واسع ولن يشاد الدين احدا الا غلبه والله اعلم

Post: #23
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: Sayed Bekab
Date: 09-30-2007, 11:42 AM
Parent: #1

لا يحتاج نجوم المريخ ان يفطرو للفوز علي الدولفين فى هذه المباراة بالعزيمة و بركات الشهر الكريم و طاعه الله في شهره الفضيل يتحقق الفوز إن شاء الله.

و يوجد في المريخ سته لاعبين غير مسلمين و مجاهد مصر يصوم و يلعب بالاضافة لحارس المرمي بهاء الدين اها يعني العدد كده ٨ لاعبين الباقي يتمو مويه وخلاص احسن كده ولا غضب ربنا وجمال الوالي لا يحق له الافتاء بافطار لاعبيه و القضاء عنهم طيب ما كان يصوم ليهم اصلو الحكاية كان كده .

هوي ياالمريخاب بنقيف معاكم لكن ما ترفعو لينا ضغطنا بفتوايكم ..... براهو رمضان دخل العضم

غايتو بنصح اتوفيستر يلعب عبدالحميد السعودي لانه خفيف حتي لو كان صائم و فاولين من باولينو و يرجع ٦ لخط النص و قول يا رحمن يارحيم علي الدولفين و الفيك اتعرفت يا نيجيريا

Post: #24
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: إيهاب محمد مصطفى
Date: 09-30-2007, 11:45 AM
Parent: #1

أبو قوتة

أبو قوته

مادام قلت لساني طويل .. إبقى ما تلومني

نناكفك شوية

عاوزني أفتش الإرشيف طيب (قول بوردابي رياضي .. مش صحفي رياضي)

بعدين ما بالضرورة إني أكون مشارك في البورد حتى أعرف الحاصل

كتير بكون متابع .. وبفضل عدم المشاركة

عيب زاتو الواحد يشارك في بوستات زي بوستات (تاج السر)

لكن زي بوستات (عمر الفاروق) دي فيها أدب مناكفة وعكننة .. مرات بتكون دسمة

Post: #26
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: abuguta
Date: 09-30-2007, 12:11 PM
Parent: #24

Quote: عاوزني أفتش الإرشيف طيب (قول بوردابي رياضي .. مش صحفي رياضي)

طيب يايهاب

نحن وصلنا لاتفاق او الزبدة على قول الاخوة العرب الزبدة

هنالك ناس كتر قدونا بكلمة انا صحفى رياضى وكلامهم كله خارم بارم,,,او كلام الحوتة فى سوف ابقوتة...انا لقيت نفسى بكتب احسن منهم لغويا واحداثا,,طيب قلت انا ليش مضيع حقى
لان عندى اشتراك فى الجزيرة الرياضية وقناة الart وقاعد احضر احمد شوبير على دريم
وكثيرا بحضر مصطفى الاغا و اخبار ابو ظبى الرياضية,,ومعترف متميز لقوقل على فكرة قوقل دا
عاوز معترفين وفى ناس بكتبو خبرتهم فى cv حقتهم ,,لازم تكتب الخبرة حتى لو كان دخول الخيط فى الابرة,,,ناسك الصحفين ديل 10 منهم مريخين وواحد هلالابى,,واصدق وافيد هولاء احمد الريح
وهو ليس من ضمنهم لانه رجل تستفيد منه الصحف الرياضية كلها,,
لذا انا كتبت توقيعى
ابولدن
صجفى رياضى,,,
مافى زول سالنى فى اى صحيفة وتخرجت من وين وعملت وين وما قابلتنا فى جمعية الصحفين الرياض
لى عام كامل وانا صحفى رياضى ,,,اها الليلة انت يايهاب عاوز تشيل منى هذا اللقب الجميل
الذى اصبحت اتشرف به اكثر من مهنتى الاساسية وهى غفير سيرفر فى شركة مرموقة تبع الاتصالات
دا سبب التوقيع ياقريبى
اسف ما دام انت مواكب وما قاعد تكتب للمشاغل او عدم الدخول فى بوستات تفتقد للموضوعية
هنا وصلنا لتفاق,,,
الاتفاق هو عبارتك دى رردوها الاخوة الهلالاب لاخوتهم المريخاب على راسهم الصحفى الكبير مزمل
وهو عضو معنا للشرف فقط لان كتابة المنديات تفرق عن الصحف الاولى عاوزة حراسة وردود وتفهم للمتحاور,,والحصف تقول كلامك وتمشى مافى زول عشامن فيه بقرب, لكن بنعكس المردود على المبيعات
وهروب الكتاب المحايدين من الصحيفة الى منافسات غيرها,,,لانها الكتبة بضاعة مجلوبة فى السوق

اخيرا اسف لو جرحتك بكلمة او كدا

ابو لدن
صحفى رياضى

توقيع حلو مش
تسلم

Post: #25
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: Sadig Sati
Date: 09-30-2007, 11:56 AM
Parent: #1

قال تعالي (ومن كان منكم مريضا أو علي سفر فعدة من أيام أخر) صدق الله العظيم
فهي رخصة لكل مسلم إن شاء عمل بها وأفطر.
وكان فقه الصحابة رضوان الله عليهم في هذه الحالة(أن لا يعيب مفطر علي صائم ولا صائم علي مفطر) وكلهم سواء في عبادة الله.
وللأخ عمر الفاروق : أخطر ما يلقي الإنسان في المهالك هو إستهزاءه بدين الله بغرض إضحاك الآخرين , فكن حذرا أخي من مهالك لا ثمار لك فيها!
وقد عرف عن العصاة من أهل السودان قولهم (تكلنا علي أبو فاطمة) ولم يعرف عنهم الإستهتار والإستهزاء بدين الله.

Post: #27
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: نادر محمد الراضي
Date: 09-30-2007, 12:20 PM
Parent: #25

Quote: نتوقع أن تظهر فتوى جديدة بطلها الشيخ الجليل جمال بن الوالي شيخ الأزهر السابق ورئيس المريخ الحالي مضمونها جواز إفطار لاعبي المريخ في رمضان والسبب مباراتهم مع دولفين النيجيري التي ستقام إن شاء الله الساعة الواحدة بتوقيت نيجيريا ..

يا ود الفاروق ما تخاف الله ...

المغرب لسا ماااا أذن ....

تتوقع شنو ؟!!! .. شايف الكلمة دي

فضحت ليك البوست دا كلللو

وطلعتو فشوووش .. يعني بدون دليل ...

Post: #28
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: إيهاب محمد مصطفى
Date: 09-30-2007, 12:23 PM
Parent: #1

أبو لدن

الله يخلي ليك لدن

طيب ياخي إنت ظالم نفسك بي (صحفي رياضي)

مفروض تكتب (موسوعة رياضية) أو (رياضي شريف) وهكذا

تلصق بنفسك أسواء قناة (للتعاطي الرياضي الكتابي) ... في السودان خصوصاً

ياخي ديل ماعندهم زمم ولا وطنية .. عدا القليل جداً

كعبد المجيد عبدالرازق .. وياريت تكون التاني إنت

كثير أسفي لكلمة (الضلالاب) فقصدي المزاح والعكننة لاغير

وأشكر لك سعة صدرك ... ودي غريبة علي الهلالاب

شكلك مريخابي زعلان وحردان ... صاح

ورمضان كريم

Post: #29
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: تاج السر حسن
Date: 09-30-2007, 12:28 PM
Parent: #1

يا عمر - سلامات
الناس ديل فى زول عمل مؤامرة .. وقال ليهم قبال ده المرحوم الطيب عبدالله لعب التوانسه الساعه 2 بعد الظهر، قاموا رجعوا الزمن ساعه لى وراء؟؟
الشئ السمعتو النيجيريين ديل ممكن يلعبوا الساعه 12 ظهر ... ويصوموا 3 يوم!!
خاصة لو كان فى غمام .. ما بعرفوا كلام زى ده لازم الهلال يظهر!!

Post: #30
Title: Re: هل يفتي الشيخ جمال الوالي بإفطار لاعبي المريخ ودفع الكفّارة عنهم؟
Author: Muhammad Elamin
Date: 09-30-2007, 01:06 PM
Parent: #29

وَلاَ تَقْفُ مَا لَيْسَ لَكَ بِهِ عِلْمٌ إِنَّ السَّمْعَ وَالْبَصَرَ وَالْفُؤَادَ كُلُّ أُولئِكَ كَانَ عَنْهُ مَسْؤُولاً {الإسراء:36}

ما معقول وراء مجرد مباريات كروية هدفها الأساسي الترويح والإمتاع والرياضة وخلق الروح الجماعية تدخلوا في مناطق ما في داعي ليها وإفتاء بغير علم وإستهزاء بغير وعي

كنت أظن أن الهوس الكروي عندنا في بريطانيا وتحديداً إنجلترا

لكن يبدو أن الهوس الكروي السوداني مثل الهوس السياسي السوداني

هدام غير بناء
ومعاكس للهدف الأساسي للمنشط الذي حوله تدور هذه المعارك الوهمية

لذلك لا أري نهضة رياضية في البلاد أصلاً

اللهم إني صائم !