تعجب شويفع الخواجات من اكل الويكة السودانية!

بالامس شاطرنا الافطار الرمضاني صديق ابني احمد وهو ابن الجيران(شويفع انجلوساكسوني شويطين وخبار ولاحاظ) وفي نصف المائدة توهط السيد العظيم صحن العصيدة بملاح( قلة الادب بالويكة) اي ملاح (الشرموط) وتوهطت في نصفه عصيدة (ام احمد) كجبل الرجاف وهي ترتجف وجلا من جياع سيجعلونها بعد لحظات فضاء صفصفا! وقد كانت الويكة سودانية مائة بالمائة يمكن لاثبات لزوجتها وجودتها ان نضعها في طريق( سوسيو) حتما سيحتاج الي ( صاجات) لعبورها!
كعادتنا السودانية العصيدة وحدها من دون الاطباق الاخري حتى بعد هجرتنا وهي التي لا نقسمهافي اطباق صغيرة ونوزعها علي الضيوف كبقية الاطباق الاخرى وهذه جزئية عندي فيها راي ينبغي ان تخضع العصيدة مثل باقي صنوف الطعام للتقسيم العادل بين الضيوف والا سنسمع بثورة الضيوف المهمشين والضيوف المظلومين بسبب البلاعين الجلابة!!..حيث الاكل في صحن واحد شيء جميل ولكنه ايضالا يخضع لضوابط عدلية..فهنالك بشر خلقهم الله عشاقا للعصيدة( يدرشونها درشا) وهي ساخنة وهنا لا ينافسهم فيها ( الحناكيش) وبالتالي يقع الظلم علي الحناكيش... وايضا هنالك صنف ( الانجقاديون)وهم من اصحاب(اللقم) العجيبة وسريعي الضربات وهنا لن يجاريهم في هذا المضمار الطيبون المحتشمون والمؤدبون رغم انهم يحبون ايضا العصيدة.. وهنا تقع المظلمة.... ولذلك انادي واطالب بتغيير صحن العصيدة الي صحن فيدرالي يوزع بالتساوي بين الاكلين تراعي فيه عدالة التوزيع بين كل ضيوف المائدة!
لنرجع الي مائدة ( ام احمد) والي صحن العصيدة العجيب...فبعد ان وزعنا اصنافا من بقية الطعام الي ضيفنا الصغير...وطلبنا منه ان يشاطرنا العصيدة علي طريقتنا الظالمة
اذا اراد....فوافق محتشما وهو ينظر بعينه الزرقاوين الي هذا الجبل العجيب وعلي قمته
يسيل( ملاح قلة الادب الجميل) بشكل يبدو انه لم يرق لهذا( الشويفع الحليو الشويطين)
وهويرمق الصحن بنظرات اتهام حتى اشفقت علي انفسنا منها فربما سيبلغ بعد لحظات
( الشويفع) الرقم العجيب(911) ولنجد انفسنا بعد لحظات في غوانتانامو بسبب هذا الملاح قليل الادب الجميل!
وكعادتي افتتحت اللعبة بدخولي(توووووش) الي صحن العصيدة( ودخاخينو تلوي)وحملت اللقمة الساخنةالي الهواء لتبريدها وايضا كعادتنا السودانية اعطيتها بسبب شدة لزوجة ويكتها خمسة لفات في الهواء لاقطع (دابر) الويكة اللزجة الجيدة حيث بقي خيط التواصل بينها وبين الصحن قويا ومطاطيا احتاج مني الي تلويحتين اخريين وانا في هذه اللحظةاشبه برامي القرص في مضمار رياضي واخيرا نجحت بعد ان قطعت الوصل بينها وبين الصحن المسكين وفي اللحظة التي كنت اهم بازدراد اللقمة وهي في طريقها الي فمي العجيب رايت ( الشويفع الخواجة) فاغرا فاهه من فرط الدهشة وهو يصيح مندهشا (WAW) فقلت له في نفسي ساخرا( والله الليلة مشت لو قلت (واو) والله لو قلت جوبا ورمبيك وسلفاكير والسودان الجديد ياني البالعها وظامطها..ات شويفع عوير دي ويكة حاجة امنة ويكة جديدة علي الحرام حالة ما لزجة وقوية والله لو ختيناها بين الجنوب والشمال علي الحرررام الجنوب ما اقدر انفصل الا اهنق حمار الوادي!))!
رمضان كريم وكل عام وانتم بخير

WAW

مرة صديق أردني تناول معنا طعام الإفطار

قال عاوز (حامض)

خلانا نفتش قاموس اللهجات

وكان يقصد ليمون

معقولة يا حيدوري العصيدة عندكم حنكشتوها بالشكل ده...في قالب ((عبدالكريم كرم الله)والله دي مسخرة شديدة,,,,ارفقوا بالعصيدة ويا حليل (البني كربو بملاح الكجيك)!

والله يا حيدوري مشتاق لي ملاح ورق بالفجل يعني فحل فجل كده قدر صلاح قوووش!

وعليه اطالب بتغيير اسم (ملاح الشرموط) باعتباره اسما خادشا للحياء ولا يتسق مع اعرافنا واخلاقنا الاسلامية واقترح تسميته بملاح( ذات النطاقين) تيمنا بتلك الوجبات الرسالية والتي كانت تجلبها السيدةاسماء بنت ابي بكر للنبي (ص) وابيها ابو بكر في الغار واعتقد غالبا ما هو( ملاح شرموط) او (شرموط بيرغر)!
واطالب مراعاة لعدالة التوزيع ومحاربة للكائنات العصيدية الشرهة بان تخضع العصيدة السودانية للتوزيع العادل في المائدة في عدة اطباق مع الحفاظ علي شكلها التقليدي!
وايضا ان( تعاس) الكسرة السودانية بلا ( طايوق) لاننا شعب من كثرة اكله الكسرة بطواييق
التيوس والخرفان صرنا في الفهم اقرب الي هذه الكائنات لا نحس ولا نشعر بالاخطار ودوما نمد رقابنا للذبح بكل خضوع واستلاب!

غايتو يا هباني
كتلتني بالضحك الله يسامحك:

Quote: وايضا ان( تعاس) الكسرة السودانية بلا ( طايوق) لاننا شعب من كثرة اكله الكسرة بطواييق التيوس والخرفان صرنا في الفهم اقرب الي هذه الكائنات لا نحس ولا نشعر بالاخطار ودوما نمد رقابنا للذبح بكل خضوع واستلاب!

العزيزة تراجي

وما دام لا زلنا شعبا ناكل الكسرة (معيوسةبالطايوق) فحتما سنظل امة في فهم
هذه المخلوقات الداجنة والحامدة والشاكرة ذابحها!

Quote: اذا اراد....فوافق محتشما وهو ينظر بعينه الزرقاوين الي هذا الجبل العجيب وعلي قمته يسيل( ملاح قلة الادب الجميل) بشكل يبدو انه لم يرق لهذا( الشويفع الحليو الشويطين) وهويرمق الصحن بنظرات اتهام حتى اشفقت علي انفسنا منها فربما سيبلغ بعد لحظات ( الشويفع) الرقم العجيب(911) ولنجد انفسنا بعد لحظات في غوانتانامو بسبب هذا الملاح قليل الادب الجميل!

هشام ، رمضانك بدون وجع راس

الملاح قليل الادب ده كم هو جميل وزى ما قالوا( كل ممنوع مرغوب )، وزى دخلت فى نفس الموقف مع
صاحب إبنى علا لكن كان شافع حربى جدا درش جنس درش

ترهاقا ازيك


ملاح ( الشرموط) بدون مؤاخذة! من الذ الوجبات الي وكانت جدتي بت عسمة
اطال الله عمرها ومتعها بالصحة من افضل نساء اهلي في طبخ هذا الطعام الشعبي اللذيذ
واذكر عندما كنا صغارا عندما(يشرمط) اللحم ويعلق في الحبل لتجفيفه كنا ناكله نيئا
غير مطبوخ فما بالك عندما يطبخ بالتوابل والبهار والعصايد الكاربة والشطوط القبانيت!
اللهم اني صائم.

.....

الاخ هشام رمضان كريم يا اخوي.... عليك الله وقت بتكتب في البوست ده اكنت صائم ولى ... او جعيان شديد.


تحياتي اليك

الامين

الاخ هشام هباني

اضحك الله سنك.. وكتر ليك من ملاح قلة الادب دا..
ضحكتني شديد. وريالتي سالت في نهار الخرطوم الختري دا

وبوستك دا WAW وسين وصاد كمان.

يوم الجمعة معزومين عند صديق وفطر معانا فلبيني مسيحي ضرب ليك الحلو مر لمن خفنا على الجك.

Quote: العصيدة عندكم حنكشتوها بالشكل ده

مش كده وبس

مرات بنأكلها بالشوكة والسكين

رفقا بالرجفة حقتها



....................
مرة معانا واحد وغد امو رسلت ليهو كعك العيد

واحد حنكوش بعد اكل منها واحدة قال ليهو كعكم ده قوي خالص

وغدنا الشين قال ليهو ده كعك رجال

...

.....

...

...

....

الاخ هشام waw
والله بوستك دا جا معى تمام لانو انا الليله عازمه صحباتى واحده مغربيه وواحده هولنديه ومن حسى فى الشغل دا بفكر ياربى اخت صحن العصيده ولا لا
وانا محتره جدا وبديت افكر اعمل عصيدات صغار وادى كل واحده وحده
يعنى فكرتك بتاعت التقسيم دا انا بتفق معك
كمان برضو لو وحده ريلت تريل فى صحنها sorry for this
شكرا للفكره الجهنميه
تخريمه ;
امبارح فى الفطور انا وابو مهند ختينا صحنيين عصيده ودا كل بسب ظلم الاخر لانو زى ما هو قال على بال ما تتحنكشى انا اكون جبت الدور التانى من الملاح
يعنى حقوقنا نحن النسوان مهضومه حتى فى الاكل دا
تحياتى ورمضان كريم

اختنا العزيزة حليمة التانية

سلامات

Quote: والله بوستك دا جا معى تمام لانو انا الليله عازمه صحباتى واحده مغربيه وواحده هولنديه ومن حسى فى الشغل دا بفكر ياربى اخت صحن العصيده ولا لا وانا محتره جدا وبديت افكر اعمل عصيدات صغار وادى كل واحده وحده يعنى فكرتك بتاعت التقسيم دا انا بتفق معك كمان برضو لو وحده ريلت تريل فى صحنها sorry for this شكرا للفكره الجهنميه تخريمه ; امبارح فى الفطور انا وابو مهند ختينا صحنيين عصيده ودا كل بسب ظلم الاخر لانو زى ما هو قال على بال ما تتحنكشى انا اكون جبت الدور التانى من الملاح يعنى حقوقنا نحن النسوان مهضومه حتى فى الاكل دا

شفت يا حليمة لازم حكاية العصيدة دي تتقسم زي قصة السلطة في السودان
عشان ما تنظلم ناس تحت الدواس بالايدي الخشنة التي تتحدى الدقداق والحرايق وخاصة حينظلموااخواناالمتحنكشين البياكلوها بالملعقة وعايزين ابردوها ليهم بالمروحة!

......

>>>

....

....

هشام إزيك،

واحد صاحبنا هنا معانا في هيوستن
ولدو صغير مصاحب ليهو شافع خواجات جارهم
قال لشافع الخواجات لو ماصمت رمضان
معاي تاني لا أنا صاحبك ولا تجي بيتنا ظااااتو..
تصدق الشافع علشان ما يخسر صحبتو إضطر إنه يصوم.
وقبل ما رمضان يخلص أكيد حيعرض عليه
يأكل ملاح الويكة بالعصيدة.
وشويه شويه حيخليهو يسلم.

العزيز عزيز

Quote: واحد صاحبنا هنا معانا في هيوستن ولدو صغير مصاحب ليهو شافع خواجات جارهم قال لشافع الخواجات لو ماصمت رمضان معاي تاني لا أنا صاحبك ولا تجي بيتنا ظااااتو.. تصدق الشافع علشان ما يخسر صحبتو إضطر إنه يصوم. وقبل ما رمضان يخلص أكيد حيعرض عليه يأكل ملاح الويكة بالعصيدة. وشويه شويه حيخليهو يسلم.

شوف شفع الخواجات ديل ما بعرفوا الكضب كان اقتنع بكلام صديقو
السوداني وعشان بحبو وبعزو ممكن بسهولة اسلم...بس المصيبة لو فكر ومشي السودان مع صاحبو وشااااف الحاصل هناااك قطع شك برجع عن دينو وبرتد!

...