Post: #1
Title: متذكره ؟؟؟ وفاكراها يا ست العيون المذهله .. يافكره فينا مأصله .. ياقمره عاوزين نوصله ..
Author: Dr. Faisal Mohamed
Date: 09-26-2007, 09:08 PM
يا ســـــــــتـــنا*
يا ســـــــــتـــنا
متذكـرة ؟؟ وفاكراها ياســت العيون المذهلة
يافكــــــــــرة فيــنــا مـأصـله
ياقمــــره عايزيــن نــوصلــه
نتشــابــــى مــا بنــحصـلـه
أشـــواقنـا ليــــك بنـرســلـه
فى غنوه أو كلمات غــزل متـواصـله
ونتمنـى قبال ما تصل، أرواحنا تـمشى تحصله
**********
نتهنى بى أجمل مـلاك وعيــون
والنونه والصـوت المثـير وحنون
مــنـك بنستـلهــم جــمـال الكــون
منك بنسترق الفرح، وبتوشح صباح الدنيا لون
**********
منــك نعــيش نرجـى الأمــــل
منك بنتناسى الحصـل... مهما حصـل
منـك (نضــوك) طعــم العســـل
**********
متذكره؟؟ يوم بـحت ليك بــى حـب عنـيف
الدنيا ذى كانت غمام...بتغنى للحب والســلام
الريد بـحــــر وأحساس لطيـف
لا ليهو ساحل ولا عنـــدو قيــف
وانا فــى خيالى سرحــت فى عــالم ظــريف
انك معاى وخــطاك ما ضلت خطاى، فى يوم خريف
لكنى فجأة سمعت فى جواى أقيف.......!!
**********
ياستنا...... يا أحـلى كلمـة بنرسـمه
لوحة جـمال على كل دار، ونقســمه
عيديه لـلأطفـال، طلت ورود متبسمـه
يارائـعة يا فتـنة و دلال ومـقسمــه
ياصافيه يا نبع الزلال، يانسمه فى عز الهـجير نـنتسـمه
يا آيه يا هيبه وجلال ... يا نفـحـه جايه مـن السـمـاء
**********
متذكره؟؟ كيفـن بكــون هائــم، بطوف حولـيك
كيفن بكون مشغول، ومهموم بيك
كيفن بكون جنبك، ومشتاق ليـك
كيفن بخاف، من لحظة الفرقه، قبل أيدى، تصل أيديك
**********
بـــخــــــاف ، لحــظــــة فــراق ووداع
أصـلو الدقائق، بيـن حبيـب الـروح تعـدى تفوت سراع
**********
متذكره؟؟ ريدى الشــديد، طفـــلا وليد
خائف عليهو وأدللــو
ضامـيه فى جوه الفؤاد
داسيهـو من عين العبـاد
وذى الغمامـه اضــللو
متذكره؟؟ يوم قلتى لى والدنيا كانت بين ايدى
ريدك دا سيبو وقـللـو
وانا كنت راجيهو الندى انعش وردنا يبللـو
**********
والفرحه ماتت فى العيون
والدنيا غطـاها السكـون
ورجعـــــت مـــــن نص الطـريق
مكسور جنـــاح فــــى الـهم غـريق
لا فرحه لا زولا صـديق
لا أيـد تساند لا رفيــق
**********
بتـقـولـى لـى ريـدك دا أنسـه وقللـو؟
وأنا كنت راجيهــو الندى أنعش وردنا يبللو
*كلمات: أخوالبنات – دبى 18/7/2003
|
Post: #2
Title: Re: متذكره ؟؟؟ وفاكراها يا ست العيون المذهله .. يافكره فينا مأصله .. ياقمره عاوزين نوصله ..
Author: Dr. Faisal Mohamed
Date: 09-26-2007, 09:28 PM
Parent: #1
شـبه (باسكال)*
شـبه(باسكال)، شن تشبه بلا العسل المدفق سال
وفى عيونه الكحل ليلا مهود طال
شبه (باسكال) وزايـده جمـال
وكـل الناس قصــاده قـلال
عيونه غــزال، دلالـه محال
وفـايـته الدنـيا بـى أميـال
**********
دوام بطـــراك ومشغـــول بال
ولى شوفتك بقـــيت أحتال
معاك سافرت فى أحلام حنان وخيال
وذى طــيرا رحـــل رحــال
كلما أرتاح، مصيرو أعاود الترحال
**********
أناالشـائل هموم الدنيا لـى همـك دوام شـيال
أناالمقتول صبابه وشوق وفى أعماقى الف سؤال
**********
منـو الأداك جـمـال أحسـاس
وروعة صوت صدى الأجراس؟
مـنو الأهداك عيـون حلوات
وللحلوات بقــت مقـياس؟
مـنو السـواك ست الناس
هايمه بعيد، و فـوق الناس؟
متين الريـد أصحيك يـوم
أطريك زول بريد حساس؟
**********
شبه (باسكال)، أقوله أنا؟؟؟؟؟
وياماقلت قـول ما أتقـال
بى نظـراتى بى لمسـاتى
بى كلماتى فى (المرسال)
شبه (باسكـال) شـن تشبه
بلا العسل المـدفق سـال
وفى عيونه الكحل ليلا مهود طال
*كلمات: ( أخو البنات) – دبى – 1/12/2003
**بالامكان تغيير باسكال بــ "تاجوج"، ولكنني تركتها بالطريقة التى كتبها الشاعر نفسه.
|
|