Post: #1
Title: ملكة سبأ ( الله والنبي لكلام راجل اسمعا )
Author: ابراهيم بقال سراج
Date: 09-26-2007, 08:33 PM
Parent: #0
والله الاغنية التراثية الدارفورية دي عاجباني شديد خلاص
وكان عندي شريط مسجل ولكن للاسف اديتها لزول قام ضيعها
لي
ملكة سبأ بما انك متخصصة في الاغاني التراثية الدارفورية
اطلب منك
** جيب لي اغنية الله والني لكلام راجل اسمعا وياريت لو
نزلت لي لينك للحفظ المباشر في الجهاز
** وجيب معاك اي اغنية تراثية دارفورية
مع خالص ودي وتقديري
في انتظارك يا ملكة ؟؟؟؟؟؟؟؟
بنيتي حسابك
الله والنبي لـ كلام راجل تسمعا
بنيتي حسابك لـ كلام راجل أسمعا
حسابك يا بنيتي كلامي لا تابا
كلامي كم أبيتيه تكوسيه ما تلقا
* * *
هي لا تخليه ينقنق لـ كلامو تسفها
لا تقوّي راسك ، بكرة يقولوا طلقا
فجر كم ولا عندو لـ عشيّا أمهلا
بلا إذنو لا تمشي لـ محل ما جرا
***
وراجل كم ما ناداك لا تمشي تلحقا
وكم غبّت منك نادي أسألا
قشي بيتك بدري وعيشك أطحنا
الما وساخة ، في خشم بيت لا تكشحا
***
وكم عاطت فوقك لا تدقيه تفلعا
إنتي أشكيه لـ الله لـ حقك يخلسا
انتي بنيتي كم لـ كلامي تسمعا
الله والنبي لـ كلام راجل تسمعا
الله والنبي لـ كلام راجل أسمعا
***
حتّي عجاج بيتك ، عنقريبو فرشيه
وكورة أم قعر تحت سريرو جيبيه ختّيه
توبك المجنقر دا ب إبرة أمسكيه
رجلينك المشقق دا أدرشيه حننيه
***
وشعرك المشمبل دا لميه مشطيه
المدونكت من قعارو فرتقيه
أوطوي أوقاي لـ ألمي أردي جيبيه
عجينة كم تعوسيه لـ دوكي أتّقيه
***
وكسرة كم تلت عقابو لميه شريه
ب طلحاي ب دروتاي حفرتك ولعيه
جيبي مخبرك لـ بطن بيتك بخريه
كم كملتي خدمتك لـ نارك أكتليه
***
كم فتّي بطن حلّه ، لـ بيتك طليه شيفيه
كلام كم تخاف لو من بيت لا تمرقيه
وقالوا وقلنا في لسانك لا تجيبيه
جارتك المهوهوة دا لا بيتك بخرجيه
***
نصيحتي كم سمعتيه لـ بيتك أمسكيه
الله والنبي لـ كلام راجل تسمعا
___________________________
(نصائح غالية)
ياريت تستفيدوا منها
|
Post: #2
Title: Re: ملكة سبأ ( الله والنبي لكلام راجل اسمعا )
Author: Al-Shaygi
Date: 09-26-2007, 08:38 PM
Parent: #1
Quote: حتّي عجاج بيتك ، عنقريبو فرشيه
وكورة أم قعر تحت سريرو جيبيه ختّيه
توبك المجنقر دا ب إبرة أمسكيه
رجلينك المشقق دا أدرشيه حننيه |
عاد يقولولك شنو!!!!
لقيتها يا بقولي!!!
باضت ليك في القفص....
الشايقي
|
Post: #3
Title: Re: ملكة سبأ ( الله والنبي لكلام راجل اسمعا )
Author: ابراهيم بقال سراج
Date: 09-26-2007, 08:43 PM
Parent: #2
الله والنبي كم لكلامي تسمعا يا ملكة سباجيب لي الاغنية
هنا في البوست دا وجيب معاك لينك للحفظ المباشر
|
Post: #4
Title: Re: ملكة سبأ ( الله والنبي لكلام راجل اسمعا )
Author: ابراهيم بقال سراج
Date: 09-26-2007, 08:46 PM
Parent: #2
Quote: عاد يقولولك شنو!!!!
لقيتها يا بقولي!!! |
الشايقي
والله الاغنية دي سمحة جنس سماحة وكلها نصائح وهي نصائح غالية
من ام دارفورية لبنتها العروسة
|
Post: #16
Title: Re: ملكة سبأ ( الله والنبي لكلام راجل اسمعا )
Author: ملكة سبأ
Date: 09-27-2007, 12:06 PM
Parent: #2
الشايقي مالك تبلع في ريقك ؟ 
اتفضل جاي فطور وعشيّ
|
Post: #5
Title: Re: ملكة سبأ ( الله والنبي لكلام راجل اسمعا )
Author: دوت مجاك
Date: 09-26-2007, 08:46 PM
Parent: #1
ابراهيم
تعرف الاغنية دى اول مرة اسمعها كانت قبل ايام بس ما متذكر وين بالضبط
حقيقة معانيها حلوة
والتعابير رغم بساطتها الا انها تتناول نصائح قيمة
تسلم ومنتظرين معاك اللينك
|
Post: #6
Title: Re: ملكة سبأ ( الله والنبي لكلام راجل اسمعا )
Author: ابراهيم بقال سراج
Date: 09-26-2007, 08:47 PM
Parent: #5
الله والنبي كم لكلامي تسمعا يا ملكة سبا جيب لي الاغنية
هنا في البوست دا وجيب معاك لينك للحفظ المباشر
|
Post: #7
Title: Re: ملكة سبأ ( الله والنبي لكلام راجل اسمعا )
Author: ابراهيم بقال سراج
Date: 09-26-2007, 08:54 PM
Parent: #5
دوت
لك التحية والاحترام
صدقني ما لقيت البوست بتاع ملكة سبأ الا الله وبالصدفة لمن كنت
ببحث في الارشيف
والاغنية عجبتني شديد خالص , حاولت رفع البوست ولكن مافي امكانية
رفعها لانها في الارشيف فقررت فتح هذا البوست مجدداً
طالباً من الاخت ملكة سبا لينك للاغنية لاحفظها في جهاز الكمبيوتر
الخاص بي
|
Post: #14
Title: Re: ملكة سبأ ( الله والنبي لكلام راجل اسمعا )
Author: ملكة سبأ
Date: 09-27-2007, 11:51 AM
Parent: #5
اهلييين دوت مجوك
اللنك ان شاء الله حايجي
وفوق ليهو (2) هدية مخصوص ليك
(1)
|
Post: #9
Title: Re: ملكة سبأ ( الله والنبي لكلام راجل اسمعا )
Author: Masoud
Date: 09-26-2007, 11:14 PM
Parent: #1
يا بقال تحياتي:
بمناسبة موسيقى دار فور : في ملحق كتاب التونسي الشهير " تشحيذ الأذهان .............و السودان " توجد نوتة موسيقية لأغاني البلاط السلطاني في الفاشر ، حررها أستاذ فرنسي من استماعه للتونسي يغنيها في مصر بعد عودته من دار فور بحثاً عن أبيه . طُبع الكتاب بالفرنسية في باريس قبل العربية و فيه النوتة الشهيرة والتي ربما تكون أول تدوين لموسيقى من السودان و أفريقيا القديمة كلها. أعطيتُ النوتة للسني دفع الله في الدوحة و قام بدوره بتسليمها للموسيقار المنصوري وقد أخبرني أن المنصوري قام بعزفها على الة السكسفون. وكان للسني محاولة لمسرحة نوادر البلاط الفاشري كما حكاها التونسي بمصاحبة المنصوري عازفاً للنوتة الفرنسية لأغاني دار فور قبل قرنين من الزمان !!!
الأمر مطروح لأهل الموسيقى و التاريخ و احفاد البلاط الفاشري و أحفاد التونسي السودانيين وهمو كُثْرُ!!!!
|
Post: #10
Title: Re: ملكة سبأ ( الله والنبي لكلام راجل اسمعا )
Author: ابراهيم بقال سراج
Date: 09-27-2007, 08:23 AM
Parent: #9
*
|
Post: #20
Title: Re: ملكة سبأ ( الله والنبي لكلام راجل اسمعا )
Author: ابراهيم بقال سراج
Date: 09-27-2007, 02:27 PM
Parent: #9
الاخ/ مسعود
شكراً علي المشاركة الهادفة والمعلومات القيمة
ياريت لو في امكانية للحصول علي الكتاب ( باللغة العربية ))
|
Post: #11
Title: Re: ملكة سبأ ( الله والنبي لكلام راجل اسمعا )
Author: ملكة سبأ
Date: 09-27-2007, 10:54 AM
Parent: #1
أووووه بقال شخصيا !
وبوست بأسمنا كمان ؟!
إيه السعادة دي
أولا انا ما متخصصة في الاغاني الدافورية كما ذكرت
فقط قلت انها تستهويني .. ويعجبني جدا ملامستها للواقع والحكم التي تذخر بها
بالإضافة للبساطة وجزالة التعبير حسب رأيي المتواضع يعني
والله يابقال لو مسكتو في كلام اهلكم دا قوي الحبة مابتجيكم ...
انا احسن منك يابقال
عارف ليه ؟ لأني سودانية الهوى ، وبعترف بكل الثقافات المشكلة للهوية السودانية
صحيح بحكم النشأة والإنتساب لمنطقة معينة بحب أغاني الشايقية جدا وبتمنى انها تصل للجميع وأحاول اقدمها بقدر ما اعرف .. واي زول معجب بثقافتو يابقال
وكونك مابتعرف حاجة عن ثقافة الشايقية وفنهم مابديك الحق انك تبخسهم اشائهم
كتبت :
Quote: كلامه شين هو قال معجب بشعراء الشوايقة وانا ما معجب
بأي شاعر شايقي ولا معترف بثقافة الشوايقة اصلاً |
ادينا فرصة نعرفك بيها يابقال لانها حاجة مكملة ليك كسوداني أصيل
والمعلم احسن منك يابقال :
| Quote: هذا نقاش مثمر ومفيد يعكس وجه المناطق الجميلة المشرقة على ضفاف النيل الخالد / ولا ادرى شئ عن هذه المناطق الجميلة على نهر النيل - ونتمنى ان نزور هذا البلد الجميل حسنارتى ونتعارف على سكانها الطيبين المسالمين - وكل اهل شمالية حنينين وطيبين وجميلين - ونحن باسم معجبى الفنان المبدع محمد نصرى نتمنى ان نمد جسر تواصل بين الشمال الحنين ودارفور الصابرة - وسوف نكون رابطة باسم معجبين محمد نصرى فى دارفور |
خسارة ليك انك ماتكون الشخص دا !
لكن ممكن تعوض الفرصة دي بانك تتبني فكرتو وتعال نخلي البوست بتاعي رابطة معجبي الشايقية باغانيكم والبوست بتاعك دا رابطة معجبي الغرابة بأغاني الشمال !
قول خير وصدقني مابتندم
|
Post: #12
Title: Re: ملكة سبأ ( الله والنبي لكلام راجل اسمعا )
Author: ملكة سبأ
Date: 09-27-2007, 11:05 AM
Parent: #1
|
Post: #21
Title: Re: ملكة سبأ ( الله والنبي لكلام راجل اسمعا )
Author: ابراهيم بقال سراج
Date: 09-27-2007, 02:32 PM
Parent: #12
ملكة سبا
تحية طيبة مع الشكر والتقدير
وشكراً ايضاً علي الاهداءات الجميلة والاغاني الهادفة
نرجو انزال المذيد وياريت لو جبت لينا اغاني
الادروب واغاني الجنوبين ايضاً
|
Post: #13
Title: Re: ملكة سبأ ( الله والنبي لكلام راجل اسمعا )
Author: osman righeem
Date: 09-27-2007, 11:24 AM
Parent: #1
سلام
الولد ده عنده اهل هس بيجوك ناطين
ويقولو ليك استهبال جلابة واستلاب فكري
خلي ود الناس
شوفي ليه الاغنية
و كان الله يحبهم وانت منهم - المحسنين
وبعدين مدير ادارة الاعلام يطرشوا ماسمع شعر الشوايقة
ولا يعترف ليهم بأي شي
نقطة نظام  كدي شوفي لي الاعلام الهمزة وين ما نكون ظالمين الولد ساكت ... يمكن بقزز بوارك )
والعوجة يكون صدق !!!!!!
لانه قال الشريط كان عنده
يعني عارف يجيبو من وين !!!!!!!
مش لم تعرف اول معني الحب ايه - علي رأي محمد سعد
وهم
سبلام يا بلقيس و ربنا يكون في عونك
|
Post: #15
Title: Re: ملكة سبأ ( الله والنبي لكلام راجل اسمعا )
Author: محمد عثمان
Date: 09-27-2007, 11:53 AM
Parent: #1
بنيتى حساابك
|
Post: #17
Title: Re: ملكة سبأ ( الله والنبي لكلام راجل اسمعا )
Author: ملكة سبأ
Date: 09-27-2007, 12:11 PM
Parent: #15
يابقال انت مش باضت ليك في القفص ياعملات الشايقي
دي حضنتو ليك عديل
وفقس اظنو
تسلم ياود عثمان ياخي
وشكرا بالإنابة عن المعلم بقال
ومرحب بيك في رابطة معجبي اغاني الغرابة
صنو رابطة معجبي اغاني النصري والشايقية عموم بدارفور
|
Post: #22
Title: Re: ملكة سبأ ( الله والنبي لكلام راجل اسمعا )
Author: ابراهيم بقال سراج
Date: 09-27-2007, 02:36 PM
Parent: #15
الاخ/ محمد عثمان
لك التحية والتقدير
والف شكراً لك يأخي علي ازال الاغنية ورابط الاغنية للحفظ
والحمد لله قمت بحفظ الاغنية والان يستطيع الجميع حفظ الاغنية
|
Post: #18
Title: Re: ملكة سبأ ( الله والنبي لكلام راجل اسمعا )
Author: فدوى الشريف
Date: 09-27-2007, 12:14 PM
Parent: #1
يا ملكة سبأ بت عمي خشيتي في التخصص دا متين.
بتخصصي من ورانا؟
هوي بقال
|
Post: #19
Title: Re: ملكة سبأ ( الله والنبي لكلام راجل اسمعا )
Author: ود العجمى
Date: 09-27-2007, 12:37 PM
Parent: #1
| Quote: والله الاغنية التراثية الدارفورية دي عاجباني شديد خلاص |
بقال سلامات
حسب علمى أنو الاغنية دى أغنية حديثة يعنى عمرها على ما أعتقد لا يتجاوز السنة سنتين
لو ما أكون مخطى هى ليست من أغانى التراث الدارفورى . ولكن طبعا فيها ريحة التراث ظاهرة ويبدو أن كاتبها قد
استدعى القيم (الدارفورية) الراقية جدا فيما يخص الأسرة
أرجو التصحيح إن كنت مخطا
|
Post: #23
Title: Re: ملكة سبأ ( الله والنبي لكلام راجل اسمعا )
Author: ابراهيم بقال سراج
Date: 09-27-2007, 02:43 PM
Parent: #19
العجمي
لك التحية والتقدير والشكر
تحليلك قريب للصحيح نعم الاغنية حديثة وهي اغنية او تراث
دارفور , كلمات , لحن , غناء كلها دارفورية
** كل كلمات الاغنية عبارة عن نصائح ام لبنتها وهي
عروسة ماشة لبيتها
|
|