Post: #1
Title: عــزرا ياهـــلال...لا استطيع تشجيعك اكثر من كـــدا
Author: abuguta
Date: 09-22-2007, 09:00 AM
Parent: #0
انا رجل معافى من الامراض المزمنة والحمد لله,,, سكرى و ضغط وعديم الكسترول, جسمى سليم ونحيل,,,,
تعلمت تشجيع الهلال صغيرا,,فتركت هذا الحب الذى برى جسدى سنة90 ,حين سافرت للهند ,فعدت اليه سنة 2002والسبب الاهلة والمريخاب البورداب هم الذين جلبو لى هذا الفرح وهذا القرف
وحرق الاعصاب,,,كنت رايق وفايق اترنم بالشعر وانا على دابتى البخارية فى شوارع
مهراشترا احد اقاليم الهند الغنية, سبعة سنوات ,ما بعرف شىء عن منافسة رياضية
غير دورى الكليات ومنافسات كاس العالم,,ولكن حين جئت للخيج
كما قال العباسى
وجيئت للخليج وكان زادى
انه احدى بلادى
فما بالهم قوم لهم دين
كدينى وينطق كلهم ضاد كضادى
جئت للخليج وانا عابر من الهند,, ببيزا عمرة
وكتبت رائعنى الجميلة
أخليج جئتك بالشعر نديا
وامل يلوح فى خافقيا
فقلت للنيل من بعد سلاما
وودعت هندا سرا خفيا
فصعدت نجادا ونزلت وهادا
فى مركب يعلو بصوت دويا
فاستقبلتى رياض بصدرها
الدافىء
وغنت مسقط ورقصت دبيا
الى ان قلت
فسبحان من اراد اليكم العزة
فبعث فيكم ابن قصيا...
معزرة ايها الهلال قد حرقت اعصابى ليلة امس, وما قدرت اتحمل طول الشوط الاول ومعى شلة تنتظر نهاية المبارة بتلك بالهزيمة فقلت للحضور بالحرف الواحد ان ابو الهل لا ينتصر الا ان احضر له بنتى هلالية وهى كانت تغط فى نوم عميق بعد ان تعافت من تلك العلة وسبب شفائها بعد الله سبحانه
هو دكتور سودانى اختصاصى اطفال ومريخابى متعصب كان ادارى فى مجلس نادى المريخ فالتحية له
فاحضرت تلك الصغيرة فصرت اضربها حتى تشجع لان صوتها جالب الحظ
للزعيم فمع صرختها الاولى صرخت الجماهير فكان الهدف الاول ومن بعده الثانى
فاتتصر الزعيم ونامت ام درمان على فرح ازرق
مبروك للهلال...
|
Post: #2
Title: Re: عــزرا ياهـــلال...لا استطيع تشجيعك اكثر من كـــدا
Author: ابو يسرا
Date: 09-22-2007, 09:15 AM
Parent: #1
سيد البلد
سيد البلد ...سيد البلد
وقف مشاهدك يازمن
راجع دفاترك يامحال
في السكه موج ازرق هدر
تاريخ ندر اسموالهلال
سيد البلد سيد البلد
الملعب الاخضر سكوت
ساكن الخطوط من هيبتو
كل المساطب من قديم
عرفت جلالو وعزتو
حتي المقاعد والسياج
ادو السلام لي روعته
اهوده الهلال طيبه ومثال
تاريخ عظيم في فكرته
سيد البلد سيد البلد
حيوا الفريق العالمي
حيوا الهلال رمز الفخار
فرسانو قلب بدق وفاء
واتفانو في حب الشعار
جمهوره في التشكيله بان
في كل حوبه وانتصار
شمس الرياضه الضوء ينور
عزم الصمود القلبو نار
سيد البلد سيد البلد
يابصمه الضوءفي العروق
ازرق مع ابيض بحور
يامارد افريقيا الصعب
بين العرب زاهي الشروق
كل ماتواجه وتنتصر
لي نصر تاني هيمه شوق
مااصلو قمنا علي شعار
بنقولو ديمه هلالنا فوق
ازرق هدرتاريخ ندر
ازرق هدرتاريخ ندر
اسموالهلال
_________________
|
Post: #3
Title: Re: عــزرا ياهـــلال...لا استطيع تشجيعك اكثر من كـــدا
Author: abuguta
Date: 09-22-2007, 09:21 AM
ابو يسرا
هاك دى
يا وليد .. روق وسيب الهلال فى حالو
حسدك .. بكتلك .. والقصار ما طالو
المتلك كتار .. غير الودار ما نالو
وكتين "داريو" شب وأخد شبالو
"الحضرى" انبرش .. و(ات) انبرش قبالو
اسحق "الكرنقو" ما فى قون برتالو
صاروخ انطلق قسما يمين، بشمالو
"سيدا" الأنيق .. قائد جميله خصالو
ولدنا "قودوين" ساق الدفاع بى حالو
"كلاتشى" انفرد وحظو عاند ابالو
"جاستن" يا الأواكس .. مغطى ديمه مجالو
"ود يوسف" نحل وراقى فى ارسالو
"ود جبريل" يا ملك، الحضرى (نقنق) مالو؟
الفاروق "عمر" .. النص ملاهو جلالو
"معز" .. حارس أمين ومافى مثالو
هلالنا فوق وما الذ جمالو
فى افريقا اسم الزعيم يحلالو
بطل القرن ما قدر اتصدالو
الاقوان الثلاثة بهدلت برجالو
اربعين عام مافى غلب هفالو
محللين الرياضة تغزلو فى حالو
عرب افارقة قالو مش امثالو
الشعب انتشى والفرح حالالو
الى الصبح تغلى امدر وشمالو
الولايات غنت هلا لى.. هلالو
فى الغربة كل زول لافح شالو
البورد لونو ازرق والبياض شفالو
بوستات كتبت فى الزعيم ودلالو
صحاف الصحف تغنى بدلالـو
يومين انغلب ونيتو ما تصفالو
قال ارهبناهم بفكى وكمان دجالو
الهيلتون مو سكن مريح للابطالو
الصحاف شطح والزعيم ما رتالو
تجتوج الحبيب فوقك ود بلالو *
غير جمال هلالك دموعى ما سالو
ابقوتة الراوى الطريق ضوالو
سودانا الوطن..للهموم حمالو
النجيمك ال غاب.. والبدر هلالو
|
Post: #4
Title: Re: عــزرا ياهـــلال...لا استطيع تشجيعك اكثر من كـــدا
Author: حمزاوي
Date: 09-22-2007, 10:02 AM
Parent: #1
| Quote: انا رجل معافى من الامراض المزمنة والحمد لله,,, سكرى و ضغط وعديم الكسترول, جسمى سليم ونحيل,,,, |
مادام انت بتشجع الهلال حتصاب بيهم
حماك الله
وحول للرد كاسل
وخليك ذي رجال ابوقوته
الغطوا لغاية المحيريبا بالنعيمية والتقلية
|
Post: #5
Title: Re: عــزرا ياهـــلال...لا استطيع تشجيعك اكثر من كـــدا
Author: abuguta
Date: 09-22-2007, 10:24 AM
Parent: #4
Quote: وخليك ذي رجال ابوقوته
الغطوا لغاية المحيريبا بالنعيمية والتقلية |
عمو حمزاوى
لكن دى طريقة ,,,ناس لاعبين فى ارضهم ويدخل فيهم هدف
اسى كان ممكن اقلب احمر,,,لكن ما شايف فى خيار
بكرة بجو معقبين
عموما نتمنى الفرح عم الجميع
|
Post: #6
Title: Re: عــزرا ياهـــلال...لا استطيع تشجيعك اكثر من كـــدا
Author: Dr.Saeed Zakarya Saeed
Date: 09-22-2007, 05:35 PM
Parent: #5
الاخ ابقوتة رمضان كريم وتحية هلالية بيضاء وزرقاء لابنتنا الرشاشة الصغيرة بدات المباراة الساعة ثلاثة صباحا بتوقيت هنا واتلمينا شباب عسي ولعل الart تتكرم بنقلها ولكن اه ونحن في الانتظار حتي ثلاثة وربع صباحا عسي ناس الart ينقلوا لنا المباراة ولكن واسفاي فقال لي صديقي بان ناس الart الرياضية ديل اغلبهم مصرين وتوجههم مصري يعني لو كان ففي فريق مصري لاعب لكان نقلوها وحتشوف مباراة الص... الجاية دي كان ما نقلوها وفتحنا ازاعة امدرمان لب قون دخل شباك الهلال زي الدخل فينا وفجاة سادنا صمت جميعا وتفرقنا مع نهاية الشوط الاول لانو المزيع كان يطمئنا ويغش فينا اعصابنا تعبت ماقدرنا نتخيل تعليقه في امخاخنا .......ولكن كانت المعجزة الرسائل بالكوم مبروك مبروك اعادت هدوء الاعصاب وقدرنا نتسحر بروقة.....
|
Post: #7
Title: Re: عــزرا ياهـــلال...لا استطيع تشجيعك اكثر من كـــدا
Author: طلحة عبدالله
Date: 09-22-2007, 05:42 PM
Parent: #1
ابقوتة اللذيذ
Quote:
عــزرا ياهـــلال...لا استطيع تشجيعك اكثر من كـــدا
|
عاقل والنعمة
تعال إلى حضن الأفراح والليالي الملاح ..
تعال إلى دار المريخ الفارس الجحجاح ..
|
|