الاخوات والاخوة الاعزاء رمضان كريم وببركة هذا الشهر الكريم أسال الله أن يدخل جميع الأمهات جنات عدن مع الأنبياء والصديقين والشهداء.
عافية منك وراضية عنك سو رضايا كلمات: علاء الدين عبدالرحيم غناء: عبد الرحيم أرقي
عافيه منك وراضية عنك سو رضايا وما بخيب الرضا والدتو يا جنايــا ****** أنت من يادوب صغير من زمان دايما معايا انت ديمه امامى ساير ما بخليك بى قفايا مابتغيب من عينى لحظه ولا حصل سبتك ورايا لا من الله يشيل امانتو انا ببقى خاصاك بالرعاية ****** لى يرعاك البيرعى لي بيك يبرد حشايا أصلك انت هديه منو والله بيك أجزل عطايا جيتنى واحد مالو تانى رحمه فى اخر صبايا قبل ماافقد قدرتى وقبل ماتنهار قوايا جيتنى زى بدرا منور وفجأة طليت فى سمايا ****** أنت لما خلاص كبرت داير تسيبنى اعيش برايا داير تفارقنى وتهاجر والحزن يصبح جزايا كيف يهون لك تحزن أمك شان تحقق ليك غايا كان مسافر عشان علاجى بلقى فى شوفتك دوايا وكان عشان تسقينا مالك نحن بى حنك روايا كان عشان كرعينا راحل نحن بى بعدك حفايا كان مهاجر عشان تعرس خير أبوك مالى التكايا وخيرو وافر ابوك يحمدو مراحو مليان بالسعايا وبالقروش الجيب مجكن ولسع برضو الجايا جايا ****** برضو منك ما بقصر بحفر أديك المعايا كان ده كلو كمان شوي بتلقى فى دهبى الكفايه اصلى من سويتو ناذره يبقى لى ايام قسايا خاتا للزمن البعاند لى سعاتك يا عشايا أنت من شبيت صغير راسي ما بتحتاج وصايا ما حصل خيبتا ظني ولا فشل فيك زين غنايا لاتسيب أمك تهاجر يمه محتاجي الحمايا ****** لاتسيبنى وراك ترحل انت ياك ضلى وضرايا أنت فوق الحوبة مقنع انت للمكشوف غطايا دايري منك تبقى جنبي . جنبي فى فرحى وفى بلايا دايري كان قحيت اتبنك ارفع اقسملك غتايا أنت ساعة تبقي جنبي تبقي ضلي وتوب قفايا وما بخاف ظلم الليالي وأنت ياك عكاز عمايا ****** دايري أقضى عميري جنبك أصلو قارب للنهايا خايفي كان سافرتا ترجع تلقي فاضي البيت بلايا حينا ما بتنفع قروشك وما تجيب لك أم سوايا ماني عارفي سبب رحيلك يا وليدي شنو الحكاية الا تبقي براك شايف في فراق الوالدة غايه ما بعاتبك وما بلومك لو رحلت بلقي في الأمثال عذايا علي حجر دايما قليبك وقليبي كله عليك جنايا ***
يوم فى الغربة ماشي براى وشاقي الحّـى لقيت وحيدة زى أمي ترضع فى وليدها صبّي ويعصر فى ضريعها شديد .. يناتل فوقه يصرخ وّى وجيتها قريب ..لقيتو ضريعها ضرع أمي داري غزير أظنو لبّي *** وقفت شوية وأتملت فوقها كتير لقيت فى وشيشها أغرب شئ !! عيــون أمي وقت ما تغوص جفون الليل .. تفتش لي وفى حدقاتو تلقاني .أحفظ فيهو أشعاري ويدمدم بقصيدة لّي وأشــوف فى قمره وش أمي *** وأشوف دمعاتها فى شلاخها جاريات لي بقيت كن شفتو بادي هلال .. تجرى الدمعة فى عيني وأتذكر دمـوع أمي يقالدوني يوادعوني يشابن لي وتنقص دمعة من شلاخها ..ترقد لي فوق خدّي *** مافي أحن من أمي أجيها صغير .. أجيها كبير تفلينى ،، وتقردن لي تحجينى وتوسوس لى : تكبر لى يا ولـدي ,اشوفك ضاوي مثل الضّي تحجيني وتشيل كبري واشوف اولادك يفرحوا بّي احجيهم الوليهم ينوموا العافية فوق إيدّي *** يوم أسمع كلامك داك يوم اسمع كلامك داك أحس العبرة تخنقني وتحسي جوابي فى عينّي واقع فوق حضنك الدافئ .. وأسلم ليكِ فوق رأسك وأضمكِ إنت بين إيدي وأحقق ليك أمنيتك مهما تقسي تصعب لي أوديك مكــة .. ألفين مره ..كن الألف يبقي شوي *** وكن كــبرك!!؟ أساهر الليل اشيلك بين أيدي وتكبر لي ..تحضري عروسي واولادي ويفخروا بيك ..متل ما كنت تفخري بي ولو ما الدنيا فوقها شويه اكاما ما الدنيا فوقها شوية متل أمي أكان القمري يبقي حدّي ويعيش الناس ضلام فى ضلام يفتشـوا شمعة بس للضّي *** شمعة بتفني زى أمي عشان نورها يفضل حي أكان ماجيتها من بطنك ! أكان ما جيتها من بطنك أكان الدنيا حتى الأخرة ضاقت بّي عشانك إنتِ يا أمي وعشان بأبوك متسمي وأبوك العارفو ما زول نّي عشانك أنتِ قلبي كبير وضيو كتير وماخد من شمعتك ضي *** بـنــده الله إنتِ تعيشي يا أمي وكل الباقي خلي علّي عشانك إنتِ وعشان ما إنتِ نور عيني تشيخي تعيشي بيناتنا وأشوفك غيمة ماشه علّي غيمة بتقصد المحتاج ..وفضلة خيرك يبقي هو حيّ وخيرك يغشي كل الناس .. من الماشي بالعكــاز لى عند البيحبي حبّي *** وأشوفك فى عيون الناس عبيراً صافي جاي نقّي أحس نسامه فى جوفي ،، تخش بسهولة فى رئتيي شعري القلتو يمه حزين شعري القلتو يمه حزين وكله مآسـي مرت بّي *** إلا غناك يا أمي زفرة ونبضه نبضه وزفره زفره ونبضه.. فى دمي وبسمه عريضه فى شفتي
أمى .. الله يسلمك ويديكى لى طول العمر.. وفى الدنيا يوم ما يألمك .. امى .. الله يسلمك .. ****** أمى يا دار السلام يا حصنى لو جار الزمان ختيتى فى قلبى اليقين يا مطمنانى .. بطمنك أمى .. الله يسلمك ****** خيرك على بالحيل كتير يا مرضعانى الطيبة بالصبر الجميل يا سعد أيامى وهناى لو درتى قلبى ، أسلمك أمى .. الله يسلمك ****** أنا مهما أفصح عن مشاعرى برضو بيخونى الكلام وقولة ( بحبك ) ما بتكفى وكل كلمات الغرام يا منتهى الريد ومبتداه .. يا الليا .. الله يسلمك .. ويديكى لى طول العمر وفى الدنيا يوم ما يألمك .. أمى .. الله يسلمك ..
Post: #4 Title: Re: عافيه منك وراضه عنك سو رضايا ومابخيب الرضا والدتو يا جنايــا Author: Dr. Faisal Mohamed Date: 09-16-2007, 00:16 AM Parent: #1
نورة الشاعر: محمد الحسن سالم حميد غناء : محمد جبارة
هي .. أقيفن .. نورة فيكن نورة نقاحة الجروف نورة حلابة اللبيني .. للصغيرين والضيوف نورة ساعة الحر يولع .. تنقلب نسمة وتطوف تدي للجيعان لقيمة وتدي للعطشان جغيمة والمخلي الحال مصنقر في تقاة الليل تندقر .. تدي لي باكر بسيمة تكسي للماشين عرايا وفوقا إنقطع هديما ما عرفتن نورة إنتن .. قولن إنتن شن عرفتن نورة بت ا##########* أخيتي .. نورة اخت كل الغلابة نورة حاحاية الشقاوة .. نورة هداية الضهابة الاراضي الياما أدت .. نورة بقت من ترابا وماشي في الأعماق سحابا مشتهنها .. والله جابا للجنوب طبلاً يهدهد .. لي مشاعر ناس تعابة وللشمال طنبور يسكت .. دمعة الميتين كآبة ما عرفتن نورة إنتن .. قولن إنتن شن عرفتن نورة عايز تقرأ قالت فوقا حيطة الدنيا مالت ختت الكراس وشالت منجلاً صالت به جالت لامن إنجرحت به شالت للتراب فوق إيدا كالت ومرة يوم في الدونكا لدغت جاء الفقير بالليل حواها ويوم ملاها الهم قطايع .. جاء البصير بالنار كواها ونورة ما قدرت تمانع .. تقنع الناس المعاها ومرة شافت في رؤاها طيرة تاكل في جناها حيطة تنمغى وتفلع .. في قفا الزول البناها في جنينة سيدي سمعت .. تمرة تصقع للوراها الأرض لابد ترجع للتعب فوقا ورعاها شافت النيل موجو لاها الخليقة بقت إلاها الشمس طبقت ضحاها نار عقاب إنساب مكسر .. فوق تكليات متاهة وضو من الله .. رهاب مكتف في وتيد الليل معاها بين حضر بلدا وخلاها فسرت للناس رؤاها وقالوا جنت ومو براها ونورة زادت فوق شقاها وصدت الأيام تخش تبني لي عصفورة عش في السواقي تشوف عزاها لما شوقا يسوي .. وش تسقي تزرع تسعى تصنع للنهار في الليل تخش عرفت الشقا والشقاوة إلا ما عرفت تغش شايلة طولة البال من الله .. ومن أراضينا الإثارة وماشي تكدح طول نهارا وترجى لما الليل يفلل .. تسرق ألمي عشان خدارا عشان صغارا ولما ترجع لي ديارا تنزف أحلام الفقارى من عويناتا الحيارى لي غبار الحال تقش فوقو للآمال ترش نورة تقعد صاحي تحلم .. بي بيوت بي نور ودش وبالمحبة تشق دروبا .. ولي قلوب الكل تخش نورة تحلم بي وجود ما مشت بينو القيود أفضل أفضل بي كتير .. بي وطن من غير حدود نورة تحلم بي عوالم زي رؤى الأطفال حوالم لا درادر .. لا عساكر .. لا مظاليم لا مظالم نورة تحلم .. ولما تحلم نورة ترجف ولما ترجف نورة تحلم ولما ريح الواقع المر .. لي عشيش أحلاما ينسف نورة تنزف ولما تنزف بالا يهتف .. يوم حا تنصف يوم حا تنصف وتبدأ تحلم .. ولما تحلم نورة ترجف ولما ترجف نورة تحلم صاحي تحلم .. وصاح بتحلم صاح بتحلم ***
Post: #5 Title: Re: عافيه منك وراضه عنك سو رضايا ومابخيب الرضا والدتو يا جنايــا Author: Dr. Faisal Mohamed Date: 09-16-2007, 00:32 AM Parent: #1
Quote: نورة تقعد صاحي تحلم .. بي بيوت بي نور ودش وبالمحبة تشق دروبا .. ولي قلوب الكل تخش نورة تحلم بي وجود ما مشت بينو القيود أفضل أفضل بي كتير .. بي وطن من غير حدود نورة تحلم بي عوالم زي رؤى الأطفال حوالم لا درادر .. لا عساكر .. لا مظاليم لا مظالم نورة تحلم .. ولما تحلم نورة ترجف ولما ترجف نورة تحلم ولما ريح الواقع المر .. لي عشيش أحلاما ينسف نورة تنزف ولما تنزف بالا يهتف .. يوم حا تنصف يوم حا تنصف وتبدأ تحلم .. ولما تحلم نورة ترجف ولما ترجف نورة تحلم صاحي تحلم .. وصاح بتحلم صاح بتحلم
آه يانورة آه ونحن كمان نحلم معك بي وجود ما مشت بينو القيود أفضل أفضل بي كتير .. بي وطن من غير حدود نحلم بي عوالم زي رؤى الأطفال حوالم لا درادر .. لا عساكر .. لا مظاليم لا مظالم
تخريمة: اتمنى ان ينص في قانون الانتخابات على ان يحفظ المرشحين لرئاسة الجمهورية مثل هذه الروائع ويجلسوا لامتحان حفظ، والساقط في الامتحان يسجن لمدة 18-20 سنة. لــول.....
Post: #6 Title: Re: عافيه منك وراضه عنك سو رضايا ومابخيب الرضا والدتو يا جنايــا Author: Tragie Mustafa Date: 09-16-2007, 00:37 AM Parent: #5
رمضان كريم يا د.فيصل وكل عام وانت و الوالده جميعكم بخير.
Post: #7 Title: Re: عافيه منك وراضه عنك سو رضايا ومابخيب الرضا والدتو يا جنايــا Author: Dr. Faisal Mohamed Date: 09-16-2007, 00:54 AM Parent: #1
سلامات الأخت تراجي ورمضان كريم عليكم وتصوموا وتفطروا على خير.
وكل عام وكل الامهات بخير وصحة وعافية.
Post: #8 Title: Re: عافيه منك وراضه عنك سو رضايا ومابخيب الرضا والدتو يا جنايــا Author: سلمى الشيخ سلامة Date: 09-16-2007, 03:44 AM Parent: #7
رحم الله امى كانت كلما هاتفتها تقول لى عافية منك وراضية عليك
اول مرة كنت اسمع فيها هذه الاغنية حدث انى كنت قاعدة فى الصالة وبكتب والشريط كان شغال اول مرة اسمع الاغنية دى بكيت لمن بتى جات قايلانى سمعت خبر ياامى مالك فى شنو ؟ قلت ليها مافى حاجة بس كنت بسمع فى الاغنية دى قالت لى ـ انتو لمن ما بتقدرو على الغربة ماتلموا اهاليكم لكن الغربة ما كان ليها اى دخل بالحالة الدخلنى ليها عبد الرحيم ارقى حالة من الشجن الجميل والاليم فى نفس الوكت ربنا يديك الصحة والعافية ويخلى ليك امك ويرحم امى كل سنه وانت طيب وتصوم وتفطر على حب الام
الأخ دكتور فيصل ، والله قلت الروب عديل كدة وشوق للأمهات ما ليهو حدود وأنا والله يا فيصل الام دي حاجة تانية والبيني وبين أمي لا يعلم بيهو إلا الله وخصوصا هي مرة حنينة ومابتاعة مشاكل وعايزة تعيش في سلام كدة والله يخلي الامهات لأولادن ويخلي أولادن ليهن وتجو كدة بالسلامة لأماتكم والأمهاتهم ماتوا أها الدعوات بتفيد وماشة لي قدام وخصوصا الدنيا رمضان ...
طبعا كل ما المعارك تبدأ في المنبر لازم ناس حزب الجمال والبهجة يعملوا تمام. وبما انني عضو في هذا الحزب لازم اقدم شي ليثبت للقراء بان المنبر ايضا فيه اشياء جميلة.
تسلمي على المرور والكلام الجميل وذكريتك السعيدة مع الوالدة.
عارف سنة 1999م كنت في لندن وكنت بمشي من داخلية الجامعة لمنزل ود خالة اخونا وعزيزنا عضو المنبر الشاعر عبدالله وداعة الامين وكانت مجموعة جميلة من دكاترة ومهندسين وشعراء وطلاب ماجستير، المهم كانت الاغنية دي بتكون شغالة 24 ساعة. وكنت بقول ليهم الخواجات جيرانكم ديل حفظوا الاغنية ويوم ما تشغلوها بجي واحد من الخواجات ويسألكم عنها “ِCome on guys, Where is 3fia mink today?”
والجماعة طبعا بما فيهم شقيقي د. عبدالحفيظ،، والذي كان يحضر لامتحان زمالة الكلية الملكية البريطانية للباطنية، كانوا خايفين من:
Quote: دايري أقضى عميري جنبك أصلو قارب للنهايا خايفي كان سافرتا ترجع تلقي فاضي البيت بلايا حينا ما بتنفع قروشك وما تجيب لك أم سوايا ماني عارفي سبب رحيلك يا وليدي شنو الحكاية
تسلم عزيزي على المرور وربنا يخلي ليك الوالدة وتحياتي لها.
Post: #15 Title: Re: عافيه منك وراضه عنك سو رضايا ومابخيب الرضا والدتو يا جنايــا Author: Dr. Faisal Mohamed Date: 09-17-2007, 02:02 AM Parent: #1
رسالة الى مريم محمود محجوب شريف
ياوالدة يا مريم ... يا عامرة حنية أنا عندي زيك كم ... يا طيبة النية بشتاق وما بندم ... اتصبري شوية يا والدة يا مريم ما ني الوليد العاق ... لا خنتّ لا سراق والعسكري الفراق ... بين قلبك الساساق وبيني هو البندم ... والدايرو ما بنتم يا والدة يا مريم عارف حنانك ليّ راجيك تلوليني دايماً تقيليني وفى العين تشيليني ألقاه عز الليل قلبك يدفيني ضلك عليَّ مشرور قيلت فى سنيني أنا لو تعرفيني لو تعرفي الفيني أنا كم بحبك كم والعسكري الفراق بين قلبك الساساق وبيني هو البندم ... والدايرو ما بنتم يا والدة يا مريم طول النهار والليل فى عيني شايلك شيل لكني شادّي الحيل لا خوف عليَّ لا هم هاك قلبي ليك منديل الدمعة لما تسيل قشيها يا مريم والعسكري الفراق بين قلبك الساساق وبيني هو البندم ... والدايرو ما بنتم يا والدة يا مريم ما بركب السرجين وما ني زولاً شين يا والدة دينك كم دين الوطن كمين ما شفتي ود الزين الكان وحيد أمه ماليلا كان العين قالولو ناسك كم ورينا ناسك وين .. ورينا شان تسلم العودو خاتي الشق ما قال وحاتك طق تب ما وقف بين بين لى موتو اتقدم قال أنا ما بجيب الشين أنا ما بجيب الشين أنا لو سقوني الدم والعسكري الفراق بين قلبك الساساق وبيني هو البندم ... والدايرو ما بنتم يا والدة يا مريم كم من حبيباً ليَّ كان مالي بينا دروب ما ودع الحبان ما وسدوه الطوب حي قولي ما حي ووب حي قولي ما حي ووب ما خلى ساعة الموت يمه السرج مقلوب اتشتت الرصاص فى جسمو واتقسم لاقاهو يتبسم والحولو حيله وكان ريحة صباه تتشم زي التقول يومداك يوم العرس يادوب قال أنا ما بجيب الشين أنا لو سقوني الدم والعسكري الفراق بين قلبك الساساق وبيني هو البندم ... والدايرو ما بنتم يا والدة يا مريم يمه السجن مليان رجالة ما بتنداس الختو قبلي الساس والشالو هم الناس والفات وليدن ليهو ما مسكو الكراس ما سمعو يتكلم ما نحن عود الفاس فرسان حمى وحراس فى الحارة نتحزم عشم القدر ما كاس ما لاقى بيت يتلم عشم الطواه الجوع المتعب المعدم والعسكري الفراق بين قلبك الساساق وبيني هو البندم ... والدايرو ما بنتم يا والدة يا مريم ما تقولي شن سويت ما تبكي شن سويت غير البطمن ناس بى همهم حسيت فارس مع الفرسان حارس بلدنا البيت أخواني علو السور أنا طوبة ما ختيت ديل من زمن تاتيت لامن كتبتَّ قريت عرقنا ياما يدر يمه اللبن والزيت الكسرة والكراس لى قشة الكبريت تقولي جيداً جيت راجع مع الفرسان فايت الحدود واسيت وتغني يا مريم لينا وتجري النم والعسكري الفراق بين قلبك الساساق وبيني هو البندم ... والدايرو ما بنتم يا والدة يا مريم
التحية للشاعر الانسان المبدع دوما محجوب شريف
Post: #16 Title: Re: عافيه منك وراضه عنك سو رضايا ومابخيب الرضا والدتو يا جنايــا Author: Dr. Faisal Mohamed Date: 09-17-2007, 02:09 AM Parent: #1
الشوق مداهو الشوق الشاعر: عبدالله وداعة الامين
الشوق مداهو الشوق جوة الحلق مربوط منضوم مجرتق ريد اتخاتفنوا خيوت من الطبيعة تشيل حس صوتك المكبوت يا امي كيف الحال اشتقتا لي البنوت لي اللمة جوة البيت الصفقة و الزغروت لي شارع الحلة لي الما بنوها بيوت لي الناموا تحت الضل ما عرفوا شدر التوت لي الباتو جيعانين و القاسموا الكتكوت في حبة القمحة وسابوا الرزق مختوت في مخزن السلطان و الداروا في الملكوت انا شوقي لي القاعدين لي البي السهر ممعوط و الشالوا صبرم توب ما لبسو ورق التوت لي الشبعوا ما ماكلين لي الاكلوا حس الصوط فوق الحشى المغلوب بالمرة عدموا الصوت تموها موية حق والحق سطر مفطوط من دفتر الاحساس الفينا كان مفروط و الليلة كيف النيل؟ يا امي كيف النيل؟ دا الكان زمان مبسوط ما شفتو كشّر يوم لا في مراكبوا بجوط يا امي مشتاق ليك شوق الحشى المزلوط مشتاق لي ريحة الطين للبورة و المحروت قوليلي اوصل كيف باقي الدرب عكنوت يا امي مشتاقين ليك التحية تفوت طيبين وجد سائلين عنك بنسال يوت و ان كان سؤالك لي كيفن نهارنا بفوت بنقولوا مستورين وتوب الستر مبهوت كيفن سترت الحال ان كان عرقنا زيوت ان كان بناكل ذل كيفن نجيب القوت؟ نتوضى نار الشوق والشوق حلف ما يموت و ان كان يصلح الحال و الله نحنا نموت وتكوني انتي وشاح جوة الفرح منحوت بس سيدي سيد الهم حكّم علينا الموت و ان قلنا ما بنموت بدينا بطن الحوت نكتب علي الصلصال مشوار املنا شخوت نرسم جبين الخوف خطين علي المسكوت و السم يبل الجوف و الجوف مكجنه موت يتمدّا في الكرعين يدي الكرش شلوت وياخد من المألوف يبقالنا برضو سكوت وان مرة قام اضحك ببقى الضحك مخفوت
كل عام وانتو بخير وصحة وعافية. ولكم أغنية "عافيه منك وراضه عنك سو رضايا ومابخيب الرضا والدتو يا جنايــا" وبقية البوست عيدية بمناسبة عيد الفطر المبارك اعاده الله علينا وعليكم باليمن والبركات.
دايري أقضى عميري جنبك دايري أقضى عميري جنبك دايري أقضى عميري جنبك دايري أقضى عميري جنبك أصلو قارب للنهايا خايفي كان سافرتا ترجع تلقي فاضي البيت بلايا حينا ما بتنفع قروشك وما تجيب لك أم سوايا ماني عارفي سبب رحيلك يا وليدي شنو الحكاية الا تبقي براك شايف في فراق الوالدة غايه ما بعاتبك وما بلومك لو رحلت بلقي في الأمثال عذايا علي حجر دايما قليبك وقليبي كله عليك جنايا