Post: #1 Title: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-07-2007, 11:07 AM
هذه تحية لذكرى الراحل المقيم الدكتور قرنق من الشاعر والسكرتير الثقافي للحركة الشعبية في الخرطوم والسكرتير الثقافي للجالية السودانية بمحافظة اسوان...جلال الدين خلف الله ادم موسي..من مواليد كوري مركز مروي 1961 ...واستهلال لديوان شعر ..ان شاء الله ستروه قريبا...وهذه مساهمة بسيطة ونحن في المهجر الحبيب ،مصر المؤمنة ونهديه لكل الوحدويين والديموقراطيين السودانيين في اركان العالم الاربعة
ضاع الأمل .. وماتت قضية .. وبكت الرحيل الحمامات والآبنوس والبندقية .. وليه يا فرح ما تتم ؟ كان مناك يا مبيور لى شتات الناس تلم.. سكان الريف اهل العشش الناس الغبش شافو فيك الحلم .. ديل سرقو بسمتنا .. فى الاماتونج كانت فجيعتنا.. لكن عزانا رسمنا لينا طريق .. وكنت كبش الفداء وجزاك كان الحريق .. معاك ضاع حلم الغلابة .. وزرعو الشقاق بين الباباى والسحابة وتركو الحزن فى الريق .. صحوها وهيا نايمة .. ما نحن بنجمع بينا الفرح والحزن بالفريق ونحنا اصحاب فى الطريق ولية يا فرح ماتتم؟ .........
6\8\2005
Post: #2 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: Adil Osman Date: 08-07-2007, 01:25 PM Parent: #1
الزعيم الراحل د. جون قرنق قبل ساعات من رحيله..
Post: #3 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-08-2007, 09:49 AM Parent: #2
الاهداء الى روح السلطان بحر الدين وروح صديقي ناصر مصطفى النفار...والى الحاجة "عجينة" وابو الجو وايمليس..وكل اهل اردمتا الطيبين ووادي كجا
بيت السلطان
كونا .. كونا .. زغاوة مساليت العرب والفور.. يلا نمشى نعمر الديار البور .. نسوى جودية نلم قروش نجيب بابور .. مجاعة دا نخلي يغور .. افى طيبين .. اهلى الزينين .. الديمة لله ذاكرين .. أيه الجاكم من يومين.. سمعنا كلاما والله شين .. دار مساليت الناس المسالمين .. بقو ما امنين .. و في نقعه ستين .. قدل المرفعين .. حزنا عشانكم .. ونتمنى الله يرعاكم .. قولوا امين .. نار التقابة ولعوها .. وسيبوا الدواس .. ودقوا النحاس .. ولمو الناس .. اعملو نفير جيبوا طاريا .. لمو حصير .. ابنو كرانك سوو حفير.. انسو الفات مدو ايديكم صفو النية والضمير.. اقعدو عافيا .. مشاكل ما فيا .. وفى قصر السلطان .. اعملو الصيوان .. للفرح ادعوهم يجو الفرقان .. الفور والمساليت زغاوة وعربان .. ........... ونشكر المخرج عادل عثمان على ابداعه في تزيين هذا البوست بالصور والموسيقى لو امكن اسوان 020123569827
Post: #4 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: Adil Osman Date: 08-08-2007, 01:32 PM Parent: #1
شكرآ يا عادل امين على وصفى بالمخرج. هى محاولات فقط للاستفادة من المؤثرات البصرية والسمعية. لاحظ ان الوسيط الذى نتخاطب من خلاله هو شاشة الكمبيوتر. فى هذا الفيديو المغنى ايمانويل كيمبى فى مرثية للراحل الزعيم د. جون قرنق
Post: #5 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-11-2007, 09:36 AM Parent: #4
شكرا عادل عثمان وارجو ان تكون هذه الاحتفالية تليق بمقام الراحل الذى جلى بصائرنابمقولته الشهيرة(ما تسالوني عايز احرر السودان من منو ولكن اسالوني عايز تحرر السودان من شنو"
........ مات اناس وما ماتت مآثرهم وعاش اناس وهو بين الناس اموات
Post: #6 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-11-2007, 09:49 AM Parent: #5
الاهداء الي روح الراحل الفقيد عبداالباقي عوض الجيد النعمة
الشمس المالت
كلمات إتقالت.. بتحكى للشمس المالت .. ودمعات الوادى السالت .. وليل الغربة على العصفور والوحشة الطالت .. وعينين بتذكر لى وصية وهمس القمرة فى اذان الليل .. وحكاية بين اثنين أتعاهد على قولة الحق رغم الحناجر البحت... والحقيقة الطشت .. وخلتنا ماشين نتلفت.. و طشاش فى عيون النيل.. وصبحنا هايمين نبحث لى حق الناس الماتعشت .. ولكن ابدا ما غشت .. وباتو القوى مع الصابرين .. بشوف هناك من قبلى علامات للمطر الرشت .. كلمات إ تقالت بتحكى للشمس المالت ..
Post: #7 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-11-2007, 09:56 AM Parent: #6
الاهداء لكل الاحباب والرفاق والاخوان
حقنا المشروع
حليلك يا وطن الذكريات .. ياما ولادك ادوك كم طعنات .. قليبك ينبض ولسة مامات .. وهناك باعوك بالكلمات .. فى بلاد العجم والخواجات .. ووزعو الكيكة والضحكات .. ولكن شعبنا ما باع لى كرامتو رغم عيشة الفتات .. خلوالبلد مجروح من الاغاثات يقتات بقيتا تقبل عيشة الفرجة والسكات .. ونحن الزمان بنلعب حرينا والفات الفات وبنعشق الحرية ومابنتنازل عن حقنا المشروع .. والليلة البلد قسموه كم مربوع .. ووضعو الخطة والمشروع .. نحن مابنعرف زمان عيشة الخنوع وكم غيرنا كم ظالم واجبرناه للركوع وانت يا بلدى بالكرم مطبوع كم حررت لى ارادتك وبتخلي الطاغية دوام مفزوع
Post: #8 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-11-2007, 09:58 AM Parent: #7
الاهداء الى الرفاق في مكتب الحركة الشعبية مقاطعة الخرطوم
لا بيت لا وطن
بخاف نقعد نفتش للاسم .. ويضيع فى الليل ملامح الرسم .. وتبقى لا بيت لا وطن .. يعم اليباب ديار العجمى البدوى الفطن.. ويسيل دم العصافير بلا قضية .. بدل هديل الحمام نسمع صوت البندقية .. ويبقى حال البلد واقف ذى زولا سايقلو مهرا حرن .. علامات كتيرة للشر يبشرن.. الرجوع للقبيلة فى وقت المحن.. وكدا نبقى جهزنا للوطن الكفن ..
Post: #9 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-11-2007, 10:57 AM Parent: #8
الى روح الجدة كسبة عبدالرحيم صاحبة المقولة"الما بسوى نفسو زول مافي زول بسوي "
السرييقة
سريقة جنب النيل .. مبنيه من الطين.. بتشكى للايام.. قسوة الصحراء والهدام .. ايدا فوق قليبا.. لما تشوف برق يشلع.. و تخاف السر القبيل كاتما من الناس يقوم يطلع.. نادت الجيران والحيران.. البتجمع بينم والاحزان.. الخوف من المطرة .. وقبلما تكمل كانت الخايفا.. وذابت السريقة يا حسرة .. وبقت جزومن تاريخنا وا########## ..
Post: #10 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-11-2007, 11:05 AM Parent: #9
الى المتسكعين والباعة المتجولين والجالسين مع ستات الشاي و الهائمين من غير هدف في السوق العربي
مالو النحلم
ليه تقو لى يا مجروح لا نحلم النحلم بى وطن فسيح وجميل وبعد الشتات نتلم كفانا حديث كفانا نضم بتين تتوحد دواخلنا ونتلاقى ونسيب عيشة الفاقة
ما نحن من سدينا للنفاج والطاقة بانت فى جسم الوطن حمى سهراجا بقينا نتوق للزمن القبيل وروحنا ليهو تواقة ما نحن زمان بجمعنا الفرح والهم ولى كل حاجة نتقسم والكل فى دياره يتبسم والالفة البيناتنا هى البلسم بدور احلم ولا تقولى يا مجروح لا تحلم
Post: #13 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-11-2007, 11:22 AM Parent: #10
الاهداء لكل المهمشين في اركان السودان الاربعة
تربال ومهاجرية
في حوش من طين
..وبيت وزبال
..عند النيل سكن التربال
بينو وبين الجرف
..حنين ووصال
كلام النيل دوام ليه
..شد حيلك
..واقيف طولك
..وساوي البنيان
..بتجيك عصافير من كل البلدان
..تهوى نيلك
..والكنار بديك كلام
..وقمرية بتنقد في حبوب الريد
..من ايداً ماسكة طورية
..والجبين مزدان بعرق وعلامة سر
..زولاً شال مصلايتة فجرية
..ما عاين لنفسو
..ولا خاف الفقر
..لمن العندو كمل
..وعارف العندالله ما بكمل
..يلاا يا حورية لمي الشمل
..مع النسمات بجوك مهاجرية
..وريهم سر الشوق
..والعشق السكن فينا قبلية
..ووزعي سلامى لكل تربال ومهاجرية
Post: #11 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: دوت مجاك Date: 08-11-2007, 11:15 AM Parent: #1
عادل امين شكرا للموضوع ولنكرم روحه بحق دعونا نعمل على تحقيق احلامه بوطن واحد وطن ممتد من حلفا لنمولى وطن فيها عدالة ومساولة وطن للحب وطن نبنيها معا ونعيش فيها معا
Post: #12 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: Dr. Moiz Bakhiet Date: 08-11-2007, 11:20 AM Parent: #11
دوت مجاك
Quote: عادل امين شكرا للموضوع ولنكرم روحه بحق دعونا نعمل على تحقيق احلامه بوطن واحد وطن ممتد من حلفا لنمولى وطن فيه عدالة ومساولة وطن للحب وطن نبنيه معا ونعيش فيه معا
سلام يا عادل وتحية ليك
ولكل الرائعين باسوان..
Post: #14 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-11-2007, 11:54 AM Parent: #1
هتاف هتاف بنرددو .. وطن واحد .. وطن واحد.. هتاف بنرددو وطن جامع .. متى يصبح حلم واقع .. نبنى صوامع .. ونبنى جوامع اديرة وبيع .. وطنا واسع يسع الجميع .. يا ريت نوقف المدافع والنجيع .. لى زممنا لا نشرى لا نبيع .. ندارى جراحاتنا قبل الصريع .. نهدى الحليب للطفل الرضيع .. ندارى كهولنا من الحر الصقيع .. ونزرع الحب بكل وادى وكل ريع .. من اراضينا نزيل اللغم ونرفع اسمك يا بلدى بين الامم .. نتمناك تبقى اعلى قمة للهرم ..
Post: #15 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-12-2007, 09:50 AM Parent: #1
الاهداء الي الشاعر/ المعز عمر بخيت المسيرة
هيلا.. هيلا قيرا.. قيرا يا مطيرة صبي لينا. في حضرنا وبوادينا. مافي سد ما في عارض يوقف المسيرة. اطفالنا في المدارس يقروا يدرسوا. بناتنا في المنازل للقيم النبيلة يغرسوا. نسوانا في الحواري..المدائن يسوو كسرة..قراصة والعصيدة. شبابنا ..رجالنا في حقولنا..الصحارى والمصانع ..المزارع كلنا يعمل في شمس الظهيرة عشانك يا بنية عشان عزة...مهيرة. ..................... هيلا... هيلا قيرا ...قيرا ما توقفو المسيرة. الكل في مكانو. يعمل مع اخوانو. حزمة واحدة درقة محارب نبقى سد دميرة. نوقف البنادق..المدافع. نعمل عرس جامع. تحية لوطنا بالحنة ...الضريرة بالزين ....العديلة. أي واحد متخازل. او حتى بس متكاسل نزيلو من طريقنا نكمل المسيرة نكمل المسيرة. اعرفوا انو التاريخ ما بيرحم..اتعلمنا من جدودنا نصون عرضنا ...حدودنا. بالروح ...بالدم شيمتنا الامانة...الكرامة ما بنرضى الاهانة. للطغيان دوما نكافح عشان تتواصل المسيرة. اعرفو ما وصلنا لكل ما نريدو الا انو....الكل كان مشمر..متأهب ....معمر للموت يمشي دغري في همة...عزيمة. للوطن عنده الف غيرة. هيلا...هيلا قيرا...قيرا لما شفنا ليل الظلم طول في المدينة. والهم اصبح حقيقة. ما اتوانينا لحظة الكل في مكانوا. يشد للسواعد يلم في صفوفوا. الطالب بالكتابة. العامل بالعصيان والصلابة. الفنان بالكمنجة....والربابة. الجندي جاهز تب للحرابة. بناتنا بالاماني. كهولنا بالدعاء. شبابنا في ايدو مفتاح القضية. سيرو ا في دروبنا الواحد بيغلب مية. مهما زادو القهر فينا. اتكالبو علينا. سد المنافذ وين مارجعنا وين ما جينا. عشمنا في شبابنا. العبرة من طلابنا. بهدوا ليل الظالم بالتوحد..التوكل. يعيدوا امجدانا نكمل المسيرة نكمل المعالم. نهدم المظالم. ما نحن شعب ملهم طيب ومسالم. نحفظ الامانة نمشي في طريقنا. نحقق المسيرة في ليلة او الف ليلة. المهم الياس ما يدب الينا. ........... هيلا..هيلا. قيرا...قيرا. نتمنى يوم يجينا. نزيل ما علينا. يبقى ذكرى فينا. نغنى في المسارح الالحان الحنينة. تطرب فاطمة مع رجينا وادروب مع المحينة يصفق هيثم مع ضوينا. نكون عايشين في سلام ومحبة لا دواس ....ولا حرابة....لا دغينة. كلنا نغني نفرح نهنيء. اطفالنا في المدارس يلعبو يقولوا قيرا...قيرا. هيلا...هيلا. يا مطيرة..صبي لينا في حضرنا وبوادينا تتواصل المسيرة ... تتواصل المسيرة.
Post: #16 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-12-2007, 09:59 AM Parent: #1
جلست يوما جوار ست شاي كانت بنتهاالصغيرة تلعب عن كثب فسالتها ما اسم ابنتك ،قالت نيفاشا..وحلفت ان اكتب هذه القصيدة من اجل الطفلة الجنوبية نيفاشا
الاهداء للاخ الزائر دوت ماجاك
نيفاشا
حبيبتي نيفاشا. بتلعب حنينة وفرفاشة. مالية المكان من غصن الي غصن ذى الفراشة. حاملة رحيق. سالت عليها قالو اسما نيفاشا. بهرتني الوداعة ولي قلبي وناسة. تلعب مع الزمن عمرها ما شالت قلم ولا كراسة. لكن الامل الفي عيونا يساوي الدنيا بي ناسا.
Post: #17 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-13-2007, 09:02 AM Parent: #1
محيط الدائرة
رسمت مربع فى محيط الدايرة .. فشان اجيبب الكلمة الضايعة .. حذفت الحرف الزائد ومكانو وضعت .. وتانى حذفتة .. ولما احترت وقفت.. اتمنيت كلام الناس القالت حق .. كلام معنى ودبيت كلام الناس المزجت الفال بلا مل وجرتقت خاطر الزمن بالسوميت .. واهدتو قلادة للناس الصابرين وضاقت طعم الجوع بتفتش لى ايجار البيت .. حق الخبز وحق الزيت مشيت ناديت .. بى بصوت مسموع ناس القبلةاخوان الملة واتباع يسوع .. شفت فى عيون الناس كلام مسموع .. قمت رسمت مربع تانى .. لا لقيت لى الكلمة الضاعت ولا وجدت معانى .. وما عرفت السر .. ثانى رسمت مربع .. فى محيط الدائرة .. عشان اجيت .. الكلمة الضايعة ولسة بفتش فى الكلمة الضايعة ..
Post: #18 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-13-2007, 09:03 AM Parent: #17
أطفال الحواري
الشمس يا دابا من طاقة التكل .. تسرق للنظر .. واطفال الحوارى الغبش الفى عويناتنم فرح ما شالتوالاحزان.. لمو الكراسات الكتب .. جابو القلم .. وقفوا قدامو.. دايرين حق الفطور.. مدو ايدينم فى عشم .. ما لقو غيربسمة الوالد العطوف .. شالو الشنط ما ا تضجرو .. مع رفاقم لعبوا وجرو.. فى ذاك اليوم كان فطورم دعوات وحبات من تمر.. فاتو خلوه يدندن يكتب ويسطر سطر.. للصبح القريب وايام استناها كم صباح وكم عصر.. هى ساعات عصيبة بتمر .. بس دايرة حبه صبر ..
Post: #19 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-13-2007, 09:05 AM Parent: #18
درب القافلة
اخترنا طريقنا وقلنا بسم الله .. نوينا مسيرنا لى درب الله .. ما نحن أخوان فى الهدف الغاية والملة .. حقيقة النار بتزيد الذهب لمعان وتخليهو يتجلى .. اتو كلنا على الرحمن بى رعايتو يشملنا .. نحقق المقصود والداير الشرما بيوصلنا .. رمينا الساس والداير يحصلنا .. ما بنوقف قطار وحدتنا .. واحلاما تغازلنا .. وما فى حد ابدا يعطلنا .. بى كل مشروع نحقق اهدافنا .. البختار الصعاب يركب الجافلة .. ما بنسبب الفرض ونمش للنافلة .. وكلنا نحرس القافلة وتحكمنا القيم وتكون بيناتنا هي الفاصلة
Post: #20 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-13-2007, 09:06 AM Parent: #19
دموع الهشاب
الفرحة علت الوجوه .. على عيون الرايح والغادى .. وعم السرور كل البوادى .. فرح النيل بإعلان المبادئ.. هتفت الحناجر صفقت الايادى.. غنى القمرى قوقا لى بلادى .. فرحان شايل الأمل ينادى .. لاوطنى لا اشتراكي لا أمة لا اتحادى .. يلا نشابك الايادى .. ونفوت الفرصةعلى الاعادى .. مال النيل وانحنى .. ومن حقك تفرح يا جنى .. ردد مع الصباح الغنى .. الابنوس فرحه وانثنى .. والكروان ترنم فى هنا .. والصباح لبس وشاح .. والعصفو ترك النواح .. ومد ايدو صافح للتبلدى وحض بشوق التمر هندى والهشاب سالت دموعو.. قال هاك كل ما عندى .. انا قبلان انجرح فى سبيل بلدى .. اشرقت شمس بيوتنا فى عزة وسماح .. الطيورعلى الغصون نشوة طريانة .. وعاد الاخضرار لى مدنا وقرانا .. الاخ الصديق بى تحية هنانة .. والغزلان تتهادى ماشية والحمام وزع كروت الدعاوى .. وجاب الحلوى والبركاوى .. من خيرات بلادى .. وامتدت الأفراح .. الشرق والغرب الشمال والجنوب .. وزعنا الباباى والشخلوب .. الانقارا و الالوب لى شباب بلادى .. ملوال 0محمد 0كوة وادروب .. ورسالة لى خاطر .. لا تشيل فى خاطرك .. بدل القنابل تقوم السنابل .. خلاص ما فى دواس ما فى حروب .. اشرقت شمس الحرية وايام الخوف مالت للغروب .. جيبو النقارة كمنجا وعود .. نغنى لبلادنا اللحن الطروب .. نغنى كلنا عرب وزنوج .. ويعم الفرح شمالنا شرقنا غربنا والجنوب ..
Post: #21 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-14-2007, 10:24 AM Parent: #20
الاخوة الزوار هذه كانت احتفالية شاعر العامية جلال ابوكروق من ارض الكنانة مصر بذكرى رحيل الدكتور قرنق نتمنى ان نرى جلال في قبيلتنا الاسفيرية سودانيز اون لاين بدعمكم
Post: #22 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-19-2007, 08:53 AM Parent: #1
ولا زلنا في انتظار بكري ابوبكر اني يجعل الشاعر جلال ابوكروق عضو في البورد
Post: #23 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: adil amin Date: 08-20-2007, 10:32 AM Parent: #22
او يجعل هذا البوست عنوان رئيس
Post: #24 Title: Re: احتفالية بذكرى الراحل د.قرنق...حزن الابنوس...الشاعر جلال الدين ابو كروق Author: جلال ابو كروق Date: 08-29-2007, 08:53 AM Parent: #1
الشكر للاخ بكري ابو بكر للاستضافة في هذا الفضاء الرحب
