Post: #1
Title: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 04:28 AM
Parent: #0
فى اول لقاء صحفى ومؤتمر صحافى يعقده - الان - الدكتور الشيخ حسن الترابى الامين العام للمؤتمر الشعبى ذهب فريق من المركز السودانى للخدمات الصحافية (SMC) لتغطية المؤتمر الصحفى الا ان الفريق فؤجى لدى استقبال مقر حزب المؤتمر الشعبى بتعليمات مشددة وواضحة بمنع الــ(SMC) من الدخول ولدى استفسار القائمين على الامر من موظفى الدار ابلغ الفريق ان تلك هى تعليمات الامين العام شخصيا واوامر الشيخ الترابى شخصيا فعاد الفريق الصحفى ادراجه ....
|
Post: #2
Title: Re: د.الترابى يطالب باخراج فريق تغطية SMC من مؤتمره الصحفى !!
Author: salah elamin
Date: 07-03-2005, 04:36 AM
Parent: #1
اذا اختلف (اللصان) ظهر (السودان)
|
Post: #3
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 04:38 AM
Parent: #2
salah elamin
اذا اختلف (اللصان) ظهر (السودان)
البركة فى الشوفة
|
Post: #4
Title: Re: د.الترابى يطالب باخراج فريق تغطية SMC من مؤتمره الصحفى !!
Author: هاشم نوريت
Date: 07-03-2005, 04:41 AM
Parent: #3
محمدجمعة
دبايوا
العبوا غيرها.
|
Post: #6
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 04:43 AM
Parent: #4
هاشم نوريت
دبايوا
|
Post: #5
Title: Re: د.الترابى يطالب باخراج فريق تغطية SMC من مؤتمره الصحفى !!
Author: A.Razek Althalib
Date: 07-03-2005, 04:43 AM
Parent: #2
محمد حامد جمعة..
يا خبر...
أبيض..
بقروش..
بكرة ببلاش...
وين الكلام ده.. من حرية الرأي والرأي الآخر..
| Quote: فعاد الفريق الصحفى ادراجه .... |
عموماً..
ولا تزعلوا روحكم..
و..
عوداً حميداً...
والعود أحمد...
ويبقي العود ما بقي اللحاء..
برضو حرية الإعتراض....
وديمقراطية رفض الآخر..
وسعو صدركم..
شوية..
وشدو نفس...
ما إنتو الحكومة...
أكبر برضو..
والعظمة لله..
طالما..
الجايات أكتر..
من الرايحات..
|
Post: #7
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 04:47 AM
Parent: #5
ابو رزقة :
وسعو صدركم..
شوية..
وشدو نفس...
نحن ساهلين لكن المشكلة فى الكبار وكت SMC دى بتخليهم يفقدو المنطق كدا يعملو شنو بعد شوية لمن ليبيا تفتح ...... !
|
Post: #10
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 04:51 AM
Parent: #7
لكن يا جماعة بصراحة كدا شيخ الترابى دا ما بيكون غلطان غلطانة الــSMC الشيخ ما بيغلط ! يغلط كيف ما اى دستور ما كتبو هو دستور وهم وما فيهو حاجة من الدين واى شهيد ما استشهد وكت هو الكبير والقرن فطيس والبشير عسكرى سااااااااااى وفاشسيتى دا بس لانو قلب التربيزة بعد 1999 لكن زمان وكت المسالة ماشية طراوة مع الشيخ الشيخ زاتو قال البشير دا هبة الله للانقاذ عشان كدا لمن يزعل مننا نحنا المعولقين ديل عادى بيكون صاااااااااح ... غلطانين نحن ؟ لانو الشيخ اكيد شوفو غير شوف الناس
|
Post: #9
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Kostawi
Date: 07-03-2005, 04:50 AM
Parent: #2
| Quote: اذا اختلف (اللصان) ظهر (السودان) |
That was very good Salah
lol
طبعا أخونا العميد روحيا ينتمي لفريق الشيخ; و مصلحيا للعسكر.
العسكر معصور و مزنوق و الكورة مابياهم
و الرجوع للقواعد واجب اليوم
و الشيخ لازم يلعب و يتقل بالكورة شوية كمان
و ما بدور المكابسة في باب رجوع المرتدين
لحين......
|
Post: #11
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 04:54 AM
Parent: #9
طبعا أخونا العميد روحيا ينتمي لفريق الشيخ
كوستاوى
انا هين المشكلة فى روحية السيد الصادق المهدى .... لوووووووووووووول ... مش بتقولو كدا لمن الزول يتكيف !
|
Post: #8
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Frankly
Date: 07-03-2005, 04:48 AM
Parent: #1
هذا الحدث يؤكد شيئين
1- أنّ الترابي يعرف علاقة SMC بالنظام وعدم حيادها الإعلامي
2- أنّ الترابي يمارس مع SMC لعبة الممنوع مرغوب حتى تسعى SMC للحصول على معلومات عن هذا المؤتمر من طرق اخرى وهو أمر ليس بالصعب على الصحافة والصحفيين
وكلي ثقة بأن هذا المؤتمر الصحفي لن يأتي بجديد
وإنّ غداً لناظره لقريب
تحياتي محمد حامد جمعة
فرانكلي
|
Post: #12
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 04:57 AM
Parent: #8
هذا الحدث يؤكد شيئين
1- أنّ الترابي يعرف علاقة SMC بالنظام وعدم حيادها الإعلامي
فرانكلى
يعمل حنعمل شنو نخت محل صوتو كلام غير الحيقولو ( الدستور جاهلى وباطل والشمولية مستمرة ) مع ملاحظة ان المؤتمر منقول ومباشر ومفتوح وكل الفيهو حيصل اى زول عاوزو وما عاوزو !
|
Post: #17
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Frankly
Date: 07-03-2005, 05:09 AM
Parent: #12
محمد حامد جمعة
| Quote: يعمل حنعمل شنو نخت محل صوتو كلام غير الحيقولو ( الدستور جاهلى وباطل والشمولية مستمرة ) مع ملاحظة ان المؤتمر منقول ومباشر ومفتوح وكل الفيهو حيصل اى زول عاوزو وما عاوزو ! |
ليس هذا ما أرمي إليه فقد قلت في مداخلتي
| Quote: حتى تسعى SMC للحصول على معلومات عن هذا المؤتمر من طرق اخرى وهو أمر ليس بالصعب على الصحافة والصحفيين |
ولكن ما أرمي إيه هو معرفته بخط المركز العام وتقديمه للأخبار ولتحليلاته الصحفية
تحياتي
فرانكلي
|
Post: #13
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Kostawi
Date: 07-03-2005, 04:59 AM
Parent: #8
الكيزن2
الكيزان1
و كيدهم في شنو....
نحن بس ح نتفرج ...
و نشجع اللعبة الحلوة
|
Post: #14
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 05:02 AM
Parent: #13
كوستاوى
انتو لسه ما فترتو من مقعد الفراجة دا ... 16 سنة ! ولسه بتقول حتقعد تشجع اللعبة الحلوة
|
Post: #15
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 05:06 AM
Parent: #14
نتفاهم بجدية شوية يا جماعة
الا تعتقدون دام فضلكم ان من يقدم على مسلك كهذا غض النظر عن تبريراته فانما يشير من طرف خفى الى ضيقه بخصومه ولو كانوا من الاعلام وانه بمثلما يضيق من كاميرا وقلم وصحفى ومصور فانه قد يضيق ذات يوم بمن هم اكبر حضورا فى ساحة الجدل والاختلاف الديمقراطى - وقد ضاق الشيخ يوما وتعلمون ما حدث -
|
Post: #37
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Yasir Elsharif
Date: 07-03-2005, 08:47 AM
نقلت المداخلة إلى تحت حتى تكون ظاهرة..
ولك مني السلام يا محمد..
|
Post: #19
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Kostawi
Date: 07-03-2005, 05:11 AM
Parent: #13
| Quote: انا هين المشكلة فى روحية السيد الصادق المهدى |
ما دي الحلاوة زاتها....
و مال الشيخ جاب قوة العين من وين?
في سيرباك بدون باكات?
راس حربتكم محاصر
جون من خلفه وتراصاد أمامه...الونق اليمين ميرغني و شماله نقدي
أفتحولي الباب....
|
Post: #16
Title: معقول يا محمد حامد جمعة!!!!!!
Author: هشام المجمر
Date: 07-03-2005, 05:07 AM
Parent: #1
| Quote: حسن (صاقعة النجم ) |
| Quote: البشير قاعد ... و جاكم (الحريف ) خمو وصرو |
| Quote: لكن يا جماعة بصراحة كدا شيخ الترابى دا ما بيكون غلطان غلطانة الــSMC الشيخ ما بيغلط ! يغلط كيف ما اى دستور ما كتبو هو دستور وهم وما فيهو حاجة من الدين واى شهيد ما استشهد وكت هو الكبير والقرن فطيس والبشير عسكرى سااااااااااى وفاشسيتى دا بس لانو قلب التربيزة بعد 1999 لكن زمان وكت المسالة ماشية طراوة مع الشيخ الشيخ زاتو قال البشير دا هبة الله للانقاذ عشان كدا لمن يزعل مننا نحنا المعولقين ديل عادى بيكون صاااااااااح ... غلطانين نحن ؟ لانو الشيخ اكيد شوفو غير شوف الناس |
معقول يا محمد حامد جمعة!!!!!!
|
Post: #18
Title: Re: معقول يا محمد حامد جمعة!!!!!!
Author: محمد حامد جمعه
Date: 07-03-2005, 05:11 AM
Parent: #16
المجمر :
انا ما شايف تناقض الشيخ حسن ( صاقعة نجم ) مافى كلام ورمز كبير ولكن قطعا فان هذا لا يعنى ان لا نحاسبه على الفقرات (لكن يا جماعة بصراحة كدا شيخ الترابى دا ما بيكون غلطان غلطانة الــSMC الشيخ ما بيغلط ! يغلط كيف ما اى دستور ما كتبو هو دستور وهم وما فيهو حاجة من الدين واى شهيد ما استشهد وكت هو الكبير والقرن فطيس والبشير عسكرى سااااااااااى وفاشسيتى دا بس لانو قلب التربيزة بعد 1999 لكن زمان وكت المسالة ماشية طراوة مع الشيخ الشيخ زاتو قال البشير دا هبة الله للانقاذ ) الفقرات ما تحتها خط تبقى اقوال اتت من الشيخ حسن ظلت من مظان الحيرة فى تفكيرنا ورؤيتنا له لكن قطعا فان الرجل زول كبير وان اتى فعلا غريبا اليوم
|
Post: #20
Title: Re: معقول يا محمد حامد جمعة!!!!!!
Author: عصام دهب
Date: 07-03-2005, 05:11 AM
Parent: #16
طبع الدنيا زي الموج
|
Post: #21
Title: Re: معقول يا محمد حامد جمعة!!!!!!
Author: محمد حامد جمعه
Date: 07-03-2005, 05:13 AM
Parent: #20
عصام دهب
تخريمة بره البوست مرة واحدة
يا زول مبروك ويتربى فى عزكم
|
Post: #22
Title: Re: معقول يا محمد حامد جمعة!!!!!!
Author: محمد حامد جمعه
Date: 07-03-2005, 05:21 AM
Parent: #21
ترى هل كان لهذا البيان علاقة بموقف الشيخ الترابى من الــSMC
لم أعد عضواً في حزب المؤتمر الشعبي
الأربعاء 22 ديسمبر 2004
الحمد لله رب العاملين والصلاة والسلام على نبي الرحمة والهدى محمد صلي الله عليه وسلم
من بعد الاستخارة والتوكل على الله سبحانه وتعالى كان لابد من النظر إلى التحديات إلى تواجه الإسلام والمسلمين وبخاصة السودان حيث وقفنا ومازلنا على خندق الدفاع عن العقيدة والوطن حتى تكللت هامتنا جميعاً بنصر الله وولدت دولة الإنقاذ فكانت براكين ثورات التعليم والتصنيع والاقتصاد والاعتماد على الذات والهجرة إلى الله توجهاً وجهاداً واستشهادا، ثم جرت علينا سنن الله في كونه فاختلف أهل الإنقاذ فأضاع ذلك الخلاف النموذج الإسلامي المرتجى قطرياً وإقليمياً وعالمياً وان استمراره سيضيع علينا السودان الذي تتربص به الدوائر والعاديات وبما أن ديدننا في الحركة الإسلامية أنه في سبيل الله كان القيام ولم نعمل من أجل دنيا نطلبها أو حزب نعشقه أو فرد نقدسه وإنما نسعى جميعاً لمرضاة الله ومجد هذا الدين.
أثرت ان أتخلى عن حزب المؤتمر الشعبي لأسباب أو جزها في الآتي:
1. عجز الحزب عن تكوين جسم حقيقي لإدارة أزمة الخلاف فضاع الأمر بين أشواق القواعد وقرارات القيادة وتردد اللجان ومبادرات الأفراد.
2. سعى الحزب لخدمة قضايا السودان خلف الأحزاب المهترئة المتكلسة والتي لم تعد قادرة على العطاء ولا تقدم غير الخلافات والقيادات الفاشلة وتعقيد مشاكل السودان وتدمن الرغي والحكي.
3. انعدم جهة المساءلة والمحاسبة فأصبحت قلة الطاعة وضعف التنفيذ وتأرجح الالتزام وتفلت العضوية سمات لا تخطئها العين داخل الحزب.
4. عدم اتخاذ الحزب لقرارات واضحة حيال ما تشهده ساحات المجتمع والعدالة فيما يختص بالمحاولة الانقلابية الأولى والحركة الانقلابية الثانية حيث ان الأمر يستوجب وقفة شجاعة للعلاج والمعالجة.
5. قلة اكتراث واهتمام الحزب بالمخاطر المحدقة بحركة الإسلام والدولة في السودان مما يلزم بالتضحيات الجسام.
وعليه فأني أعلن وقوفي في صف المؤتمر الوطني منافحاً عن الحق والحقيقة مهما وحيثما كانت ساعياً لجمع القلوب على المحبة والمودة والإخلاص في الله متعاهداً على نصرة الشريعة سائلاً الله ان يهدي السبيل ويقدر لنا الخير حيث كان، وان يميتنا على الشهادة في سبيله.
التجاني أحمد سنين
عضو هيئة شوري المؤتمر الشعبي سابقاً
الجمعة 22 رمضان 1425هـ
5/11/2004م
المصدر : http://smcsudannet.winstemp.com/ar/artopic.asp?artID=86&aCK=AEA
|
Post: #25
Title: Re: معقول يا محمد حامد جمعة!!!!!!
Author: محمد حامد جمعه
Date: 07-03-2005, 05:32 AM
Parent: #23
كوستاوى
والله ممكن بس يكون خبر فيهو وثائق واثباتات عشان ما انشر بكره الفريق شرطة دا يبقى فى رقبتى وللاقدمية احكام يا ....ملكى
|
Post: #39
Title: Re: معقول يا محمد حامد جمعة!!!!!!
Author: فخرالدين عوض حسن
Date: 07-03-2005, 09:11 AM
Parent: #22
دبايوا محمد حامد
تكوين الشعبي " استخارة" والهام شيخ حسن
قرارات رمضان" استخارة" والهام شيخ البشير
التحفظ علي " اتفاقية الميرغني - قرنق" " استخارة" والهام الامام الصادق
تسفير الاتحاديين بالطائرات الي القناطر حيث الولاء في " المرجعيات" " استخارة" مرشد الختمية الحسيب النسيب " الميرغني"
وحتي زجاجة العطر التي اهداها ازرق طيبة للاستاذة فاطمة عبدالمحمود " الهام " الهي و " خيرة"
ياجماعة شنو قصة " الاستخارة" والالهام .. وسفر الولاء والشيوخ دي
وبعدين استخير يا ود جمعة يمكن تترك س م سي لصحيفة " الميدان" مثلا
|
Post: #24
Title: Re: د.الترابى يطالب باخراج فريق تغطية SMC من مؤتمره الصحفى !!
Author: من الله
Date: 07-03-2005, 05:30 AM
Parent: #1
امشى يا مطروض
|
Post: #26
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 05:33 AM
Parent: #24
امشى يا مطروض
ما جيت هنا يا من الله
|
Post: #27
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Zoal Wahid
Date: 07-03-2005, 05:38 AM
Parent: #1
الترابي قال في مؤتمره الصحفي انو ( شهامة) قامت خلال مؤخرا بعمليات عسكرية وقال للصحفيين انتو سامعين لكن ما قادرين تكتبوا
ممكن يا سعادتو تدينا الكلام الاكيد .. الشيخ بيكذب ولا انتو مش عايزين الناس تعرف الحاصل؟؟؟؟؟
|
Post: #28
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 05:46 AM
Parent: #27
الترابي قال في مؤتمره الصحفي انو ( شهامة) قامت خلال مؤخرا بعمليات عسكرية وقال للصحفيين انتو سامعين لكن ما قادرين تكتبوا
غايتو انا ما سمعت .
|
Post: #33
Title: Re: د.الترابى يطالب باخراج فريق تغطية SMC من مؤتمره الصحفى !!
Author: ABU QUSAI
Date: 07-03-2005, 05:56 AM
Parent: #27
( أبو القدح بيعرف وين يعضي أخوه )
|
Post: #34
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Elawad Eltayeb
Date: 07-03-2005, 06:00 AM
Parent: #27
كدي عاين لي ورا شويييييييييييييية كده
وستفهم ما يريد بكم الثعلب
دبسكم فيها
وبقى معارضة
لكن أنا المستغرب ليهو كيف أقنع الصادق... قبل ما يمرق من السجن!!
والله ياربي تكون
الديمقراطية زاتا كانت ملعوبة
|
Post: #29
Title: Re: د.الترابى يطالب باخراج فريق تغطية SMC من مؤتمره الصحفى !!
Author: هشام مدنى
Date: 07-03-2005, 05:47 AM
Parent: #1
الاخ محمدحامد
تصرف طبيعى ما تزعلوا
ومن حقهم يخافوا منكم
مش امكن توصلوا.....
لكن ما قلت لى
سئلتك من قبل عن smc
حكومة ولا قطاع خاص.....
وخافوا منكم ليه؟
وســـع صدرك
الديمقراطية حاره جد
بتتعودوا عليها شوية وشوية....
|
Post: #31
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-03-2005, 05:49 AM
Parent: #29
مش امكن توصلوا.....
يا هشام مدنى صدقنى كلو بيصل لكن المشكلة انو الموصل الجيد دا مش الصحافيين .... وقرض على كدا ما تجيب لينا الهوا
|
Post: #30
Title: Re: د.الترابى يطالب باخراج فريق تغطية SMC من مؤتمره الصحفى !!
Author: من الله
Date: 07-03-2005, 05:48 AM
Parent: #1
smc
|
Post: #36
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Abureesh
Date: 07-03-2005, 06:46 AM
Parent: #32
و جاكم (الحريف ) خمو وصرو
حسن (صاقعة النجم )
Mohamed Hamed Jumaa
Beware of the lightening
don't be the tallest object when you walk in the street
I never thought you were talking about yourself
|
Post: #38
Title: Re: د.الترابى يطالب باخراج فريق تغطية SMC من مؤتمره الصحفى !!
Author: banadieha
Date: 07-03-2005, 09:00 AM
Parent: #32
الرجل دستوري بالتخصص..ومهموم بالحريات..ومعتاد على الحبس..وبعد دا جيبو ليهو زيدان.
|
Post: #40
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Yasir Elsharif
Date: 07-03-2005, 09:28 AM
Parent: #1
الأخ محمد حامد جمعة،
تحية طيبة
قولك:
| Quote: الا تعتقدون دام فضلكم ان من يقدم على مسلك كهذا غض النظر عن تبريراته فانما يشير من طرف خفى الى ضيقه بخصومه ولو كانوا من الاعلام وانه بمثلما يضيق من كاميرا وقلم وصحفى ومصور فانه قد يضيق ذات يوم بمن هم اكبر حضورا فى ساحة الجدل والاختلاف الديمقراطى - وقد ضاق الشيخ يوما وتعلمون ما حدث - |
كما قلت أنت المؤتمر مفتوح ومباشر وقد شاهدت طرفا منه في قناة الجزيرة.. وطبعا الدكتور الترابي يعرف أن الإس إم سي ستتحصل على ما تريد، ولكنه أراد أن يقول بانها إعلام تابع للخصوم الذين وضعوه في السجن ظلما..
أما الخوف من الإعلام والكاميرات فهو أمر مشترك بين كل الدكتاتوريين والمتسلطين، لا فرق بين الترابي والبشير في هذا، والأمل هو أن يتغير هذا بعد الدخول في المرحلة الجديدة..
لو استطاعت الحكومة أن تتخلص من من الترابي لفعلت، وهو أمر مارسه الترابي نفسه ضد خصومه.. وقد كان هو المدبر الرئيسي لتشويه صورة الأستاذ محمود منذ الستينات، وقد كان هو وآخرين وراء التآمر على حياة الأستاذ.. أرجو أن تقرأ مداخلتي في بوست أحمد الشايقي..
http://minbaralfikr.org/viewtopic.php?t=13&start=30&sid...bc0918dd6ceeb51413ea
وشكرا
ياسر
منقول من فوق.. سأمسح التكرار فوق
|
Post: #41
Title: Re: د.الترابى يطالب باخراج فريق تغطية SMC من مؤتمره الصحفى !!
Author: خالد العبيد
Date: 07-03-2005, 04:03 PM
Parent: #1
الحدث يؤكد معرفة الترابي التامة لكافة الاذرع الامنية
التي يديرها علي عثمان
وكفاية لعب دقون يا سعاتو
|
Post: #42
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Abureesh
Date: 07-03-2005, 04:23 PM
Parent: #41
محمـد حامد جمعـة،
أرى سيفك (قلمك) مع معاوية (البشير/على عثمان) وقلبك مع الشيـخ.
عادى ولا يهمك..
|
Post: #43
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Kostawi
Date: 07-03-2005, 08:21 PM
Parent: #42
أبو الريش
الظاهر سعاتو وصل لينا الرسالة بتاعتو و عرفنا الشفرة و قد قلت عنه في هذا البوست نفس كلامك...
| Quote: طبعا أخونا العميد روحيا ينتمي لفريق الشيخ; و مصلحيا للعسكر |
|
Post: #44
Title: Re: د.الترابى يطالب باخراج فريق تغطية SMC من مؤتمره الصحفى !!
Author: tasneem
Date: 07-03-2005, 11:48 PM
Parent: #43
الاخ محمد حامد
سلام
يا اخوي ذيتكم في بيتكم
شن دخل الناس بين البصلة وقشرتة
الراجل شيخكم وكبيركم
احترامي
|
Post: #45
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-04-2005, 00:59 AM
Parent: #44
بسم الله الرحمن الرحيم
بيان صحافي
المركز السوداني للخدمات الصحافية
يقول الله تعالي في محكم تنزيله:
(يأيها الذين آمنوا لم تقولون مالا تفعلون، كبر مقتاً عند الله أن تقولوا ما لا تفعلون)
صدق الله العظيم
المواطنون الكرام ...
الإخوة الزملاء حملة الأقلام وحماة الكلمة .
جرياً على واجب المركز السوداني للخدمات الصحافية في ملاحقة الأحداث وإحاطة الرأي السوداني العام الناضج المستنير بمادة هامة من مظان الثقة والمصداقية ومن موقع وواقع الحدث، وبعد استبشارنا كغيرنا بإطلاق سراح كافة المعتقلين السياسيين ومن بينهم الدكتور حسن عبد الله الترابي زعيم حزب المؤتمر الشعبي، ولدي علمنا بتنظيم الحزب لمؤتمر صحافي، أرسلنا أحد محررينا الأكفاء وبرفقته مصوّر بمعداته لموقع الحدث لنقله وتوثيقه كما يقتضي الواجب المهني. غير أن أننا فوجئنا وصدمنا في مسلك الدكتور الترابي وهو يطرد مندوبي المركز من موقع المؤتمر دون احترام وتقدير لحرمات الإعلام والإعلاميين وواجبهم المقدس.. وصدمتنا كانت عظيمة لأسباب رئيسية ثلاث:-
أولها .. أن الحادثة هي الأولى التي يتعرض لها المركز منذ بداية نشاطه، وربما أنها الأولى التي يتعرض لها وسيط إعلامي سوداني من أحد القادة والسياسيين بالبلاد.
ثانيها.. أن المركز ظل ومنذ مولده يغطى الأحداث بالكفاءة والحياد والموضوعية، ونقل عشرات التصريحات والتعليقات عن قيادات بارزة بحزب المؤتمر الشعبي وغيره من الأحزاب والتنظيمات.
ثالثها.. أن الطرد جاء من زعيم حزب سياسي ظل يرفع شعارات الديمقراطية وينادي بالحرية ويؤكد إيمانه بها، وتكفى شاهدة في هذا الصدد تصريحاته في الزميلة الصحافة التي جاء فيها بالحرف الواحد أنه "دعا إلى نبذ العنف في الحياة السياسية وإعلاء قيم الحوار والجدل"..
الإخوة زملاء المهنة..
كيف نفهم دعوة زعيم المؤتمر الشعبي لنبذ العنف وتعظيم قيمة الحرية والديمقراطية وهو يطرد الإعلاميين من مؤتمر صحافي معلن ؟ .. وأي "قيم للحوار والجدل" يمكن أن يتبناها من يطرد الإعلاميين من قاعة مؤتمر صحافي مفتوح مهما كانت الدواعي والأسباب؟
المواطنون الأفاضل .. الإخوة زملاء المهنة..
إن شعارات الديمقراطية والحرية والشفافية تبدو مهددة بالخطر حتى من الذين يدعون لها قولاً ويخاصمونها فعلا ً.. وإننا إذ نراجع د. الترابي فيما اقترف في حق المركز إنما نطالبه بالاعتذار علناً.. ونؤكد للجميع أن المركز السوداني للخدمات الصحافية (smc) سيبقى وعاء مهنيا يتحرى الصدق والموضوعية ويسهم بقوة في بناء صرح الوطن الشامخ المتصالح الذي يسع الجميع..
والله المستعان وهو الهادى إلى سواء السبيل ،،،
مهندس/ عبدالرحمن إبراهيم عبدالله
المدير العام للمركز السوداني للخدمات الصحافية
الخرطوم 3/7/2005م
|
Post: #46
Title: Re: د.الترابى يطالب باخراج فريق تغطية SMC من مؤتمره الصحفى !!
Author: nadus2000
Date: 07-04-2005, 07:59 AM
Parent: #45
Quote: كيف نفهم دعوة زعيم المؤتمر الشعبي لنبذ العنف وتعظيم قيمة الحرية والديمقراطية وهو يطرد الإعلاميين من مؤتمر صحافي معلن ؟ .. وأي "قيم للحوار والجدل" يمكن أن يتبناها من يطرد الإعلاميين من قاعة مؤتمر صحافي مفتوح مهما كانت الدواعي والأسباب؟
|
سؤالين مهمين، بس يا ريت تجاوبهم لينا نيابة عن فريقكم؟
|
Post: #47
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-04-2005, 09:06 AM
Parent: #46
كيف نفهم دعوة زعيم المؤتمر الشعبي لنبذ العنف وتعظيم قيمة الحرية والديمقراطية وهو يطرد الإعلاميين من مؤتمر صحافي معلن ؟ .. وأي "قيم للحوار والجدل" يمكن أن يتبناها من يطرد الإعلاميين من قاعة مؤتمر صحافي مفتوح مهما كانت الدواعي والأسباب؟
|
Post: #48
Title: Re: د.الترابى يطالب باخراج فريق تغطية SMC من مؤتمره الصحفى !!
Author: خضر عطا المنان
Date: 07-04-2005, 09:52 AM
Parent: #47
الحبيب : محمد جمعة :
عفوا .. فلتعذرني أن قلت لك : دعك من كل هذا ياصديقي ..
فماذا يعني أن يطردكم تاجر الدين وبائع الاسلام في ( سوق الله أكبر )
ان كان هو من طرد الملايين من دفء الوطن الى صقيع المنافي ( الاختياري منها
والاجباري ) ؟؟؟؟؟؟؟؟؟؟..
رجائي ـ وكلي ثقة وأمل في ذلك ـ أن أراك هناك في هذاالرابط .. وأن يقف بك
الزمن ولو برهة عند ذلك الذي قالته لك العزيزة ( فطومة ) من داخل وطننا المختطف ..
كما أزعم بأننا نحتاجك هناك حقا :
رجاء خاص وعاجل وأخوي صادق الى الأخ بكري أبوبكر
لك التحية والتقدير ..
خضرعطاالمنان
|
Post: #49
Title: Re: د.الترابى يطالب باخراج فريق تغطية SMC من مؤتمره الصحفى !!
Author: خضر عطا المنان
Date: 07-04-2005, 09:53 AM
Parent: #47
الحبيب : محمد جمعة :
عفوا .. فلتعذرني أن قلت لك : دعك من كل هذا ياصديقي ..
فماذا يعني أن يطردكم تاجر الدين وبائع الاسلام في ( سوق الله أكبر )
ان كان هو من طرد الملايين من دفء الوطن الى صقيع المنافي ( الاختياري منها
والاجباري ) ؟؟؟؟؟؟؟؟؟؟..
رجائي ـ وكلي ثقة وأمل في ذلك ـ أن أراك هناك في هذاالرابط .. وأن يقف بك
الزمن ولو برهة عند ذلك الذي قالته لك العزيزة ( فطومة ) من داخل وطننا المختطف ..
كما أزعم بأننا نحتاجك هناك حقا :
رجاء خاص وعاجل وأخوي صادق الى الأخ بكري أبوبكر
لك التحية والتقدير ..
خضرعطاالمنان
|
Post: #50
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Imad El amin
Date: 07-04-2005, 12:52 PM
Parent: #49
| Quote: السوداني العام الناضج المستنير بمادة هامة من مظان الثقة والمصداقية ومن موقع وواقع الحدث، |
Quote: مهندس/ عبدالرحمن إبراهيم عبدالله
المدير العام للمركز السوداني للخدمات الصحافية |
سؤال علي الماشي كده
كلمة مظان عندك معاها غرام ....
البيان ده كاتبو انت بأسم المدير ..ولا اسم المدير اسمك الحركي ..ولا تكون مظان دي الموضة عندكم ..ولا كمان يكون مديركم عندو باش كتبة وهو بيمضي بس ...
|
Post: #51
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Bashasha
Date: 07-04-2005, 05:35 PM
Parent: #1
شفت كيف ياالامننجي احنا ديمقراطيين مؤمنين بحق التعبير ولو لي جلادينا؟
هاهو الاب الروحي لي مشروعكم "اللهطاوي"، يلفظكم، وهذه شهادة انك كمحرر في SMC، مشبوه بنفس القدر!
اهل الجبهة الكيزانية، ادري بشعاب كوادر امنها!!
الزمن ده كلو كنت ببحث عن قرينة تثبت علاقتك بي امن النظام، وهاهو مؤسس النظام وعرابه يتبرع بذلك.
|
Post: #52
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-06-2005, 02:15 AM
Parent: #51
ديمقراطيون ... لا .... !!
الطاهر ساتي – الوان 5-يوليو 2005م
كلهم يبكون .. فمن سرق الحرية .. والديمقراطية !!
الحبيب يبكي على الحرية .. ويضحك عليها عندما تبعده عن زعامة الحزب أو عن منصب رئيس الوزراء!! والشيخ يبكي على الديمقراطية .. ويسخر منها - على طريقته الخاصة – كلما تذكر - أو ذكره أحد – بالوضع السياسي ما قبل 30 يونيو !!
ومولانا يبكي على الحرية .. ويركلها كلما هددت زعامته في الحزب .. ومساحته على السجادة .. هذه الزعامة التي ترافقه .. بالديمقراطية الميرغنية – منذ المهد .. وحتى اللحد ...
والرفيق نقد يبكي على الديمقراطية .. ويطعنها بالخنجر .. ولو أدي ذلك لتفتيت الحزب إلى وراق .. وعدلان .. وآخرين طمعوا – ديمقراطياً- تحديث الحزب .. وتجديد قياداته..
كل القيادات التقليدية .. القديمة .. التي تلعب بالسودان وشعبه منذ استقلاله .. جميعهم يبكون على الديمقراطية والحرية .. بيد أنهم – جميعاً – يقصمون ظهر الديمقراطية .. والحرية .. والشورى إذا هددت ذواتهم .. ومناصبهم وزعاما تهم ..
كلهم شموليون أكثر من الشمولية .. وديكتاتوريون أكثر من الديكتاتورية .. وجميعهم يعرضون " الديمقراطية " في سوق السياسة يشترون بثمنها سلطة .. او زعامة .. وجميعهم يتخذون الحرية الزائفة سلماً نحو أمجادهم .. لا مجد الوطن ..
هذه قناعة راسخة في كل النفوس التي لم تصب بداء الولاء للطائفة .. أو الطريقة السياسية التي تختلف عن الطريقة الصوفية بتحريم الحلال .. وتحليل الحرام .. خاصة عندما يصبح زعيم الطريقة – السياسة – في وضع سياسي آيل للانهيار.
دعكم من هذا ..
نتحدث عن الديمقراطية .. او قميص عثمان الذي يرتديه السياسي عندما يعترى ويمزقه إرباً إذا جاء دور الارتداء لمن بعده في الصف..
وغضبة المركز السوداني للخدمات الإعلامية – وبيانها الحزين- لا تعني سوى إننا نشهد ديمقراطية من ونوع خاص جداً .. صنعت خصيصاً للمؤتمر الشعبي.
والنماذج كثيرة .. منذ 30 .. وإلى مقبل الأيام..
(صوت الأمة) التي سوف تصدر عن حزب الأمة صحيفة حرة ..
ولكن (الأنباء) التي تصدر عن المؤتمر الوطني صحيفة حكومية ..
ورأي الشعبي) التي تصدر عن (المؤتمر الشعبي) صحيفة ديمقراطية...
ولكن (المؤتمر) التي ستصدر عن الحزب الحاكم .. حكومية .. و ..
سؤال اخير .. ما الفرق بين من يتبع حزباً معارضاً ..ويتبع حاكماً .. أليس كلاهما (تابع) ..
وسؤال أخير .. ألا تستحي العقول حين تقول واصفة عقلاً واحداً ( هذا عقلي المفكر) ..
إذن الديمقراطية هي ان تفوض كل أمرك وعقلك .. لعقل مفكر..
|
Post: #53
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-06-2005, 02:39 AM
Parent: #52
بين نفس الشيخ ونفس الحزب ..
موسى يعقوب – صحيفة أخبار اليوم -5-7-2005م
فقدت الكثير بعدم حضوري المؤتمر الصحفي الأول من أمس للدكتور الترابي بعد خروجه من المعتقل وخروج حزبه من مصادرة نشاطه وذلك لأن الصحف عندنا غالباً ما (تلون) الأشياء او تخرجها على الطريقة التي تريد إلا أنني مع ذلك وقد فاتني البث المباشر للمؤتمر على قناة الجزيرة تابعته بالأمس في ست صحف لم أجد غير أن اتكي هنا على ثلاثة أمور للأهمية وهي:
- ما قال الشيخ للصحافة ذلك النهار في شأن احتمالات وحدة الحركة الإسلامية والمؤتمر الوطني.
- وابرز ما أكد عليه الحزب في بيانه الذي صدر بالتزامن مع المؤتمر الصحفي لأمينه العام.
- ثم بيان المركز السوداني للخدمات الصحفية (smc) الذي طرده الشيخ من مؤتمره الصحفي المذكور.
- في الموضوعين الأولين عجبت حقاً كيف يكون لحزب المؤتمر الشعبي بيان يوزع وينشر في الصحف في اليوم التالي وامينه العام يخاطب مؤتمراً صحفياً جامعاً تخاطب محتوياته الرأي العام هو الآخر وتنشر في نفس التوقيت .. اللهم إلا أن تكون في ذلك حكمة احسب أني قد لمستها ووقفت عليها .
لقد قال الدكتور الترابي في مؤتمر ه الصحفي:
- الخلافات والاختلافات بين الحركة الإسلامية صعبة التجسير ..
- والخلافات بين حزبه والمؤتمر الوطني ليست (سهلة) بل جوهرية حول الطهارة والحرية والشورى والدستور.
وقال بيان الحزب الذي بدأ أكثرا اعتدلاً وميلاً للمصالحة:
- نأمل صادقين أن يتجاوز الجميع مرارات الماضي
- ولا نحمل معنا ضغينة لأحد .. والاتفاق على الحد الأدنى يحفظ وحدة وطننا .. ولابد أن نوحد صفنا على مبادئ نتواثق عليها تتلخص في الحريات واللامركزية والحكم الرشيد.
- إن ثمة اختلافاً في نفس الشيخ في مؤتمره الصحفي ونفس الحزب في بيانه المنشور ولعل هذا هو السبب في جعل البيان يخرج متزامناً مع المؤتمر الصحفي لجسر الفجوة وتخفيف النبرة ر وأما ما حدث لـ smc على رؤوس الأشهاد فهو ما لا يعبر عن سماحة وشفافية وحرية في الوصول إلى المصادر والمعلومات طالما دعا لها الدكتور الشيخ ..
|
Post: #54
Title: Re: د.الترابى يطالب باخراج فريق تغطية SMC من مؤتمره الصحفى !!
Author: Al Sunda
Date: 07-06-2005, 03:23 AM
Parent: #53
| Quote: فقدت الكثير بعدم حضوري المؤتمر الصحفي الأول من أمس للدكتور الترابي |
الاستاذ /جمعه
بعيداً عن الرأي في طرد الصحافة من مؤتمر صحفي
لم يحضر الاستاذ يعقوب تخوفاً
من ذات المصير ..............
وتبقى عيبه ان يطرد الصحفي الاسلامي موسى يعقوب من القاعة التي يتحدث فيها زعيم اسلامي
فالرجل انحاز لصف السلطة والجاه من قولة تيت
وهذا شيء قد لا ينساه الدكتور
وكله جايز
تخريمه
ماهي علاقة الهندسة بالأمن
رئيس الجهاز المهندس ....
نائب رئيس الجهاز المهندس ......
مدير عام مركز المركز السوداني للخدمات الصحفية المهندس عبد الرحمن ....
|
Post: #55
Title: Re: د.الترابى يطالب باخراج فريق تغطية SMC من مؤتمره الصحفى !!
Author: محمد حامد جمعه
Date: 07-06-2005, 04:34 AM
Parent: #54
مدير عام مركز المركز السوداني للخدمات الصحفية المهندس عبد الرحمن ....
سلنى عن المهندس عبد الرحمن وسلنى عن علاقة الهندسة بالصحافة وثمة امثلة عديدة ودونك الاستاذ المهندس عثمان ميرغنى . واما بقية المهندسين .... علمى علمك
|
|
