Post: #1
Title: كلام مثقفاتية !
Author: محمد حامد جمعه
Date: 07-05-2005, 04:49 AM
سلامات يا شباب ... كيف قيلتو ... عافية .. اها بقول شنو يا جماعة اخوكم بعد تفكير وكدا عاوز يتاهل ويخش عالم (المثقفاتية ) والادباء والشعراء وكدا ، طبعا لينا مدة كدة فى ناس مغيوظة مننا عشان الزول فى رايهم كوز عكليت ودمو بقرى وبيئة خالص وضلامى للطيش ، اها قلت الواحد يتهذب شوية ويعمل اصلاحات فى اطار مشروع الشرق الاوسط الكبير والسودان الجديد ويبقى مثقفاتى ، وامشى السوق العربى واشترى لى شنطة سوداء جلدية عندها علاقات طوال ازقلها فى ضهرى وتكون نازلة بالجنبة واحشيها ليك اربعة خمسة كتب واحد بتاع نقد وواحد بتاع فلسفة وكتاب رابع بتاع زول من ناس ال حداثة ومعاهو ديوانين تلاتة بتاعة الشعر والقصائد البتكون واقفة يد الحكم لمن يكون الفاول لعبة حرة غير مباشرة ، اها وامشى كمان من السوق اشترى لى طاقية خضراء زى بتاعة اهلنا القوم الصوفية ديك ولو لقيتها مافى اشوف لى واحدة ام شعر ديك زى بتاعة بوب مارلى ديك وكان عدمت ديل كلهم اشوف لى طاقية بيضاء سليقة اعطنها فى موية مغبشة عشان تعمل سيحان بالجنبات كدا !
بعد ما اعمل ديل امشى شارع الجمهورية اشوف لى شبط جامد ولو جيبى مصلح شوية امشى اشترى لى (دوغلاس ) او زى ما بيسموه الشباب (شلوت ) برباط تخين ولو لقيت معاه ب نطلون جنيز blue بيكون حلو خالص وطوالى من هناك امشى وامرق طوالى على المكتبة الاكاديمية ولا فرع مكتبة الجامعة الجنب مواصلات امدرمان داك واجى ملولح شنطتى واخش المكتبة واقعد اقرا العناوين وامسك الكتاب دا وافكو واقلب جاى وبعد ما اخد لى نص ساعة كدا اشتت ،، وين طوالى اشوف لى جريدة وافتح الصفحة الاخيرة اشوف منتدى الحتة الفلانية فيهو شنو بكره عشان امشى واكشف واشوف الحاصل والقى فرصة اشكرهم على اتاحة الفرصة واشبكهم ليك ( اعتقد وارى وزى عاوز اقول ) ..
اها طبعا لازم اقدم نفسى كشاعر واشبك العالم (الوجع ) (الثريات ) (الزمهرير ) وغايتو تنجر ليك كلام كدا كم سطر بى كم كلمة وتبقى عينك قوية وتشوف ليك زول تقنعو بشاعريتك وانك جضيم وحنكك سنين وفلتة وشاعر جهبذ وبتاع مشاعر وعواطف زى ما مرة كدا اتسلط على زول بتاع مشاعر وشعر وقال الا امشى معاه ليلة شعرية لقيت ليك الناس بسااااااااااااااط والدنيا سقط كلهم مربعين يديهم وقاعدين وفى وليد كدا طالع فى المنصة شابكنا ليك
الليل طال وانا لم انام ..
فى قلبى شوك وسهام وكثير من رؤى
فى نفسى شوق وحنين ... وانا
والليل طال لم تنسحب جيوشه
وجالس حتف انفى فى الظلام
حزين كطيف ضاع فى الفضاء
لم يودعنى !!!
والسطر الاخير كرروا خمسة مرات والناس تعاين ليه وتصفق مبسوطة وعاملين مستمتعين وفرحانين غايتو جنس دجل ووهمة كبيرة خلاص وتانى بعدو طلع واحد برضو قدانا بكلام كلو ( وجع ) و(خرافات ) وما عارف شنو وشعر كافى البلا لا فيهو وزن ولا كلمتين بيلفقو سوا .... اها فى النهاية قفلت معاى وقلت لى صحابى يا اخوى قوم نلحق فول ابو صليب وناخد لينا خشم خشمين وشمارة شمارتين مع ناس تجة طلق شعركم دا لا فى السماء لا فى الارض وناسك القاعدة دى رايحة ليها مجاملة بس لكن قلب ابوى وجدى نوار دا ما شعر .
دقائق ونواصل الابيات ...
|
Post: #2
Title: Re: كلام مثقفاتية !
Author: محمد حامد جمعه
Date: 07-05-2005, 05:02 AM
Parent: #1
اها بعد ما انتهى من حرفة وصناعة الشعر دى اقبل ليكم على القصص والرواية واجى اشوف لى ملف ثقافى ولا بورد ارص لى فيهو كمية سطور ( هممت الريح وانا اجر اقدامى فى ازقة الضجر ) و.......و............... اووك كرووك ... وتمشى معاك والغريبة حتى فى المنبر يقولو ليك دى تحفة ادبية ودى قصة ودى شنو ما عارف وتمشى تخش وتقرا وما تلقى اى وهمة ولا حكوة ولا قصة بس نضمى كدى مقعد لغاية ما تكملو الله علمان كان نقشت شى ولا فهمت حاجة !
|
Post: #3
Title: Re: كلام مثقفاتية !
Author: A.Razek Althalib
Date: 07-05-2005, 05:15 AM
Parent: #1
محمد حامد جمعة..
بختـــك..
جنس شعبيط..
ترى ياهو...
البيلقي هواهو بيضري عيشو...
ولا البيلقي عيشو..
بيضري هواهو...
والحكم ديل...
جمهور..
في كل وادي..
والشعراء...
ضقــــل القريض...
قالوا..
نضال..
جماعي.....
|
Post: #4
Title: Re: كلام مثقفاتية !
Author: dmoo3
Date: 07-05-2005, 05:22 AM
Parent: #3
هههههههههههههههههه
شنو يا محمد مالك ياود امي الحاصل شنو؟
و الله ليك وحشة
ما نلقاك الا هنا في البورد نورت والله
(ارق التحايا ليك يا بطل و لقدام دايما)
دموع
|
Post: #5
Title: Re: كلام مثقفاتية !
Author: محمد حامد جمعه
Date: 07-05-2005, 05:28 AM
Parent: #4
دموع :
اسوى شنو .. هسة شوفو الحاصل علينا من واحد اخونا هنا يلم فيك يشبك نضمى زى كلام الكيمياء لزول بيقرا مدرسة تجارية وما تقدر تفهم النضمى دا عربى ولا اغريقى رغم انو مكتوب بابجد هوز واها تسعل جاى جاى يقول ليك يا زول دا كلام ادباء ومثقفاتية اها قلنا نخش العوالم دى نشوف بيئة النص من الداخل
|
Post: #6
Title: Re: كلام مثقفاتية !
Author: Hatim Elhassan
Date: 07-05-2005, 05:44 AM
Parent: #1
احتمال بالطريقه دى تبقى مثقفاتى
متعووووده من زمان،تطلق الدقن و تعمل غرة صلاة و تردد ببلاهة جزاك الله خيرا يا شيخنا وغيرو من عدة شغل الاستعباط الحضارى
لكن بالطريقة دى عمرك لن تصير مثقف حقيقي
تقدير و احترام لمثقفينا و مثقفاتنا الحقيقيين/ات فى وجه تشويه صورتهم من قبلك وامثالك او من قبل من يعتقدوا ان الثقافه شبط و شنطه و طاقيه و كلمتين تلاته ملولوات
المحيرنى: نقول قدرت على ده كلو، ثقالتك والبسمه الصفراء ديل توديهم وين
ارحمونا من تخفف الدم والسغاله دى
|
Post: #7
Title: Re: كلام مثقفاتية !
Author: محمد حامد جمعه
Date: 07-05-2005, 05:53 AM
Parent: #6
احتمال بالطريقه دى تبقى مثقفاتى
قلنا حلو
لكن بالطريقة دى عمرك لن تصير مثقف حقيقي
برضو حلو
شفت شجن الجغرافية وبتاريح الضلالات ومازقية الموقف دا
|
Post: #8
Title: Re: كلام مثقفاتية !
Author: dmoo3
Date: 07-05-2005, 05:57 AM
Parent: #6
معليش يا حاتم ياخوي
حاحاول اخد موقف الحياد لكن من لا تعرفه تجهله
محمد حاول يعبر عن رايه في اتجاه معين بخفة دم بس دة ما معناتو انو حاول يعمل تورية للكلام
أو يقصد شي تاني
تريث اخي الكريم و تاكد من غايته في الموضوع
شكرا ليك
|
Post: #9
Title: Re: كلام مثقفاتية !
Author: dmoo3
Date: 07-05-2005, 05:57 AM
Parent: #6
معليش يا حاتم ياخوي
حاحاول اخد موقف الحياد لكن من لا تعرفه تجهله
محمد حاول يعبر عن رايه في اتجاه معين بخفة دم بس دة ما معناتو انو حاول يعمل تورية للكلام أو يقصد شي تاني
تريث اخي الكريم و تاكد من غايته في الموضوع
شكرا ليك
|
Post: #10
Title: Re: كلام مثقفاتية !
Author: محمد حامد جمعه
Date: 07-05-2005, 06:06 AM
Parent: #9
شكرا ... دموع
|
|