عشه مبارك، تماضر، تراجي، منى خوجلي.. النبي خسيمكن

Post: #1
Title: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-03-2005, 10:07 AM

عشه مبارك، تماضر، تراجي، منى خوجلي.. النبي خسيمكن

الأبعاد الإنسانية في الشخصية المفردة الواحده شيء يجعلني كثيراً ما أقف أمام
المرآة وأتساءل أي الابعاد أمثّل في تلك اللحظة... فهم الذات شيء يجعل الأمور أكثر
سهولة... وعشان ما نتفلسف كتير ونبقى زي سقراط (زي ما بتقول إنت).. خليني أستنجد
بعمتي عشه بت فاطنه... وتماضر شيخ الدين، وتراجي مصطفى، ومنى خوجلي... وكل النساء
ذوي الأبعاد.. وأقول.... النبي خسيمكن كان ما أدوتني دروس في
الطبيخ...

انا جادّة جداً... ولا أريد أن أصبغ على الأمر صبغة
العربية الفصحى.. بس بالجد كده .. انا جاده... كل واحده فيكم تختار ليها ملاح..
ونبدا.. انا بعمله... وبجي اوريكم النتيجة.. الدعوة مفتوحه لكل من تجد أن سيرتها
الذاتية محتاجه إلى ترميم... (شحّاده وجايب معاي زملاي)

حقيقة.. استيقظت صباح يوم، وشعرت أني بحاجه لأن اجدد
هوايتي في المطبخ... وبذات المخصوص، الأكلات السودانية.. واللايوووووقه تحديداً...
نبدا بي شنو؟ القائمة التي أريدها تتألف من الآتي، والترتيب مهم...

ملاح الروب الأبيض،

ملاح النعيمية،

ملاح التقلية،

ملاح ام رقيقه،

ملاح الويكاب (ما يسمعني الجاح)،

ملاح اللوبيا...

يا جماعة... دي نداء مستغيث
الله ما يدخلكم في حته ضيقه

ملحوظة مهمة: دي رسالة رقم واحد في سلسلة من
الاستنجادات..... وعارفاكم ما بتقصروا...

ملحوظة تانيه مهمه... نسيتها

بنت الحسين

Post: #2
Title: Re: عشه مبارك، تماضر، تراجي، منى خوجلي.. النبي خسيمكن
Author: Osman M Salih
Date: 06-03-2005, 10:10 AM
Parent: #1

متى ينضج عقلك ?!

Post: #3
Title: Re: عشه مبارك، تماضر، تراجي، منى خوجلي.. النبي خسيمكن
Author: Tumadir
Date: 06-03-2005, 10:32 AM
Parent: #2

النبى عزيز

http://marktanner.com/sudan-recipes/

بالهنا والشفا

Post: #9
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 01:41 AM
Parent: #3

تماضر.. المواقع دي انا ممكن أديك منها عشره.. كلهن وحاتك خاتاهن في الfavorites وكل مره اعاين ليهن وامشي... لكن أصلي ما قدرته.. عندي عقده من الأكل السوداني... وحاتك اليوم ديك عملت لي steak with mushroom souce ... بس أكلته في المطعم وجيت عملته في البيت... قرّبوا ياكلوا معاه الصحانه.. لكن تجي تقولي لي ملاح الروب.. بقول الروب.. رغم اني مستعده افطر واتغدى واتعشى واستحمى ملاح روب أبيض....

انا بعتبر دي course descritption.. أنفخي بطنك وابدي لي بالطبق الأول.. مااااااا بحلك...

بنت الحسين

Post: #4
Title: Re: عشه مبارك، تماضر، تراجي، منى خوجلي.. النبي خسيمكن
Author: نادر
Date: 06-03-2005, 12:52 PM
Parent: #1

Quote: متى ينضج عقلك ?!

عندما تعود انت إلى رشدك ... وتجدأسلوباُ أرقى من الذي تفعله في هذا البورد الذي يضج بمئات البوستات التي يمكن أن تفيد منها بعيد عن تجريح الآخرين وتعكير الأجواء ... أهذه آخر صيحاتك بعد أن ملأت البورد بعباراتك المريضة تلك؟؟ أنت مريض نفسياً أنصحك أن تراجع وفي أقرب فرصة طبيب نفسي يعيد إليك صوابك ورشدك ويبعد عن الناس آذاك وطولة لسانك هذه ... أنا لن أجادلك كثيراً وإن عدت مرة أخرى لن أعلق على كلماتك يكفيك افتضاح أمرك في البوست وشفقة الناس عليك فلا وقت لدي لأهبه لجنونك وشطحاتك هذه ... إلزم حدودك وبادر بالاعتذار أو انصرف من هنا إلى غير رجعة ...
أعلم أنك أول شخص أحتد معه في هذا البورد منذ أن بدات المشاركة فيه عام 2002 ... وللأسف كنت قد شاركت في بعض بوستاتك بعبارات إطراء لأعمالك الإبداعية التي تتقيأ عليها الآن بأفعالك هذه ...

مريم لا تردي عليه وأتركيه وشأنه وواصلي مع زميلاتك ما أنت فيه ...

Post: #5
Title: Re: عشه مبارك، تماضر، تراجي، منى خوجلي.. النبي خسيمكن
Author: Kostawi
Date: 06-03-2005, 01:19 PM
Parent: #4

نادر
You don't need to say that
otherwise
ح نحرمك من أكلات ميري دي...

Ya
مريوم...العنصرة شنو الفي الصباح الواضح...
التكل ده مملكة محكورة وله شنو?

عمك

Post: #16
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 03:16 AM
Parent: #5

Quote: ح نحرمك من أكلات ميري دي...

حسي حيكون شال نفسه ويقول بركه الجات من عندك ياااارب .. ويكون فرح انه كتب الكتب.. ويدوّر ليك في الناس دي كلها يشاكلهم.. انت يا عمو كوستاوي قايل انت بحرمانه من اكلاتي عاقبته؟!

Quote: مريوم...العنصرة شنو الفي الصباح الواضح...
التكل ده مملكة محكورة وله شنو?

عندي مزاج مع الطبيخ ما تتصوره.. بس اتشدهته بي القراية والكومبيوتر... لكن.. عايدين عايدين.. بس جهّزوا سيارات الاسعاف..

بنت الحسين

Post: #10
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 01:45 AM
Parent: #4

نادر... تحياتي.. وسلاماتي.. وطلباتك أوامر.. ما تقلق

بنت الحسين

Post: #6
Title: Re: عشه مبارك، تماضر، تراجي، منى خوجلي.. النبي خسيمكن
Author: محمد الامين احمد
Date: 06-03-2005, 01:43 PM
Parent: #1

تحية طيبة للجميع

و كمان معاهو ده

يا كريم يا رب

ده الكلام ، مش اخونا النصرى بهناك عازمنا (لحم ضب)

و شكرا جزيلا لى زمن بفتش على دى

يا انا يا المطبخ

الصور طبعا من www.marktanner.com

شكرا

Post: #11
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 01:47 AM
Parent: #6

محمد الأمين.. والله ما قصّرته تب.. لكن ياخوي ده أكل عزّابه ساي.. فول وطعميه... الطعميه فيها شويه حرفنه.. لكن الفول ده ما داير ليه شي.. والله امس أكلنا انا والجاح حلات فول... مبااااااااالغه.. طبعا انا الفول ده.. ملح (وشمار) وزيت سمسم فقط لاغير... واهم شي طبعا الجبنه... تاني ما بتفاهم كله كله... بس الكلام اللايوق داك!

بنت الحسين

Post: #7
Title: Re: عشه مبارك، تماضر، تراجي، منى خوجلي.. النبي خسيمكن
Author: zola123
Date: 06-03-2005, 02:01 PM
Parent: #1

يا بت انتي حتعرسي ولا شنو؟

اعترفي!!!!!!

شغالة دموع و وقنا غايب وحجته معاه في بوست ود الامين
وهنا عايزة تتعلمي الطبيخ؟

على مين؟

Post: #8
Title: Re: عشه مبارك، تماضر، تراجي، منى خوجلي.. النبي خسيمكن
Author: Muna Khugali
Date: 06-03-2005, 03:57 PM
Parent: #7

طيب حـبيبتـي أخـتي الصـغري خـالص..
بمـاذا أبـدأ ??
عـمـل الطـعميـة:

كـبكـبي..تـوم..بصـل..قـرون شـطة خضـرة
تضعـي الكـبكبـي فـي مـوية كـتيرة لمـدة يـوم..وكـل ماتنقص المـوية تزيديهـا..
بعـد المـدة تقـطعـي البصـل أربعـات وتقشـري التـوم مـعـاه وكـذلك قـرون
الشـطة الخـضـرا..
تضـعـي كـميـة مـعقـولة مـن كـل المـقـادير فـي مـفرمـة الكـهربـاء وتفـرمـيـهـا..(راعـي مـاتكـون نـاكمـة شـديد ولا خشنة شـديد(
عـادة أنا أفـرم كمـية وأقسـمـهـا فـي أكـياس وأضـعها فـي الفـريـز..
أفضـل أن لا أفـرم الشـمـار معـهـاان كـانت كميـة لفـريـزر..
كـيف تعمليهـا??
تضـفي لعجـين الطـعميـة..ملح وشـطة حمـرا وكـزبرة..وبيكـنج بـودر..وبيضـة ان كـنتي تفضـلينهـا منفـوخـة كتير..كـذلك تضـيفـي خـضـار الشـمـار الأخـضـر المقـطـع نـاعـم ..
وتخـلطـي المقـادير كـويس مـع عـجـين الطـعميـة..
بعـد مـايسـخـن الزيت كـويس (لازم يكـون كـتير ومـابيفـور-زي زيت الذرة)
تـرمـي طـعميـة واحـدة في الأول لتجـربة السـخـانة والطـعـم..وتعـدلي علي ضـوء ذلك كـمـا تريـديـن ..
أمـا إذا كـانت الـطعميـة بالطـريقـة المصـرية..

فـإنكـي تسـتعيضـين عن الكـبكـبي بالفـول المـدروش والشـمـار بالبقـدونس والكـرات..
وعنـد التحـمـير تضيفيـن السمسـم عـلي الوجـة..
وعشـان خـاطـرك هـأسـاهم معـاك كـل مـاآلقـي فـرقـة زمـن فـي بـاقـي الأ شـياء التي طـلبتيهـا
لكـي حـبي..
مـني

Post: #13
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 02:00 AM
Parent: #8

هيع.. ده الشغل يا رايق... انا شفتي يا منى مشكلتي انه امي ست بيت ديلوكس الله يخليها لي... ... غايته ما حأرحل منها ولا بجاورها... تناولني الملاح بالحيطه .. شفتي تقوم يلا كل فتره كده تحش ليها بصل كتييييييير وتخته ليك في حلّة البريستو وتخليهو .. حبة زيت وموية .. وتقلبه شويه كده.. بعداك تقسمه ليك في حاجات صغيره صغير وتخته في الفريزير (وبحكي ليك قصة الحاجات الصغيره دي يوم من الايام.. ).... وتعمل الmeat balls .. وتقلبهم في الزيت شويه، والفريزير طوالي.. اها.. يلا عايزه تعمل دمعه جداد او لحمه.. تخت ده في ده.. وانتهينا.. دايره تعمل meat balls.. تقلّب ليها بصله في النار وترمي فيها اللحمه.. وانتهينا... والطعميه بتاعتها برضه زيّك كده.. يعني انا اصلي ما بحضر الprocess من اولها.. عشان كده كيشه في الحاجات دي.. فالحه ليك في الحاجات البشوفها في التلفزيون او البخترعها.. وحات الله انا بعمل سلطات من مافي وبتتأكل.. بس ما تسألوا فيها شنو.. بس اللايووووووووووووق...

الطعميه دي بديك النتيجة بتاعتها بعد يومين.. حأعملها.. والجاح ومروان اخوي الله يعينهم ...

هاك السلطه دي.. ظريفه وسريعه وحلوه شديد..

المقادير:
مكرونه... فطر... بازيلا ... ذره شاميه... ملح .. مايونيز..

اسلقي المكرونه... وقطعي الفطر .. واسلقي البازيلا والذره .. واخلطيهم مع بعض.. كبي فيهم المايونيز حسب الرغبه.. وحركيهم.. جميله الألوان مع المكرونه البيضا... بس خلي بالك من الوزن...

ياجماعة وينكم؟! انا شايفه عمتي عشه دي حايمه.. . مطبخي ده ما جاياه؟!

بنت الحسين

Post: #45
Title: Re: عشه مبارك، تماضر، تراجي، منى خوجلي.. النبي خسيمكن
Author: najua hussain
Date: 06-05-2005, 00:23 AM
Parent: #8

ومنكن نستفيد.
وينك يامنى؟

نجوى

Post: #12
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 01:51 AM
Parent: #7

زولة صاحبتي... عرفتها كلمتي ديك شرقتك .. عشان كده اتغاتت عليك وقلت ليك ما تعلقي .. ... يختي امي سافرت... وخلت لي ابوي واخوي... بعدين حسيت ليك كده انه انا شغاله أسخن في الملحات من التلاجه.. واشتري الكسره من السوق... تعرفي يا زولة.. انا بتكيّف جداً من المرا البتكون عامله الدور بتاعها كويس كست بيت، إضافة إلى دورها في المجتمع.. يعني المرا البتطبخ و(كنشها طاعم) .. وبتعرف تخيّط كورشيه... وترسم على القماش.. والأنيقه .. واهم شي، بيتها نظيف.. وفوق ده كله ناجحه في عملها، دي انا بعمل ليها تمثال.. وبسعى جاهده أكون زيها... بؤمن بإنه مكان المرأة البيت.. ودورها الطبيعي انها تعتني بيهو.. لكن برضه بؤمن انه عقلها وفكرها ومهاراتها لازم تطورها وتنميها عشان تكون مفيده للمجتمع.. بالك طوالي نط للعرس.. انت شكلك كده (باله راسك)... ولا شنو؟ ... اها، ما عندك لي طبخه أتعلمها؟

بنت الحسين

Post: #14
Title: Re: عشه مبارك، تماضر، تراجي، منى خوجلي.. النبي خسيمكن
Author: نادية عثمان
Date: 06-04-2005, 02:38 AM
Parent: #12

بتعرفى تسلقى بيض ؟!!!!!

انا بوريك الطريقة بس انتى خسمينى زى ناس تماضر !!!

Post: #18
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:12 AM
Parent: #14

عاد يا نادية سلق البيض داير خسيمه؟ غايته البيض ده انا خبره فيه.. ممكن أعلمك أكتر من وصفه.. بس اللايووووووق... ابكي ليكم؟

بنت الحسين

Post: #15
Title: Re: عشه مبارك، تماضر، تراجي، منى خوجلي.. النبي خسيمكن
Author: Ehab Eltayeb
Date: 06-04-2005, 02:55 AM
Parent: #1

بت الحسين : سلااام

شكر للموضوع ...بعدين انا لي يومين اجي اشوف الحاصل شنو ...

عشان القط لي وصفة بتاعت اي ملاح لايوووووووووووق و اطبقها ...

وبعدين ركزي لينا علي الروب دا باي حاجه ...و نسيتي ملاح الخدره -الملوخيه-

قالو الوصيه في الذمه:

بعد ما تتعلمي ...تقومي تديني المواصفات بالماسنجر ....

عشان ما ح افهم من شرح الكتابه من اول مره ..اوكان في سؤال...

وتكون الوقت حلتك نضجت... وبقيتي تفتيحه...

تحياتي وما تنسي تعزمينا...

Post: #17
Title: Re: عشه مبارك، تماضر، تراجي، منى خوجلي.. النبي خسيمكن
Author: عشة بت فاطنة
Date: 06-04-2005, 03:25 AM
Parent: #15

بت الحسين قتي ملاح الرووب بس انتي حبيبتي اخترتي اللون الصعب ! لو قاصدة البرتقالي عندك تماضر تظبط ملاح رووب برتقالي ما حصل ، اصلها معلماني ليهو من زمن الثورة ومن يومها واولادي اقولو لي ما ماما عايزين ملاح برتقالي ، اصلها كنشها طاعم بت الاية يا قول عم شيخ الدين ما تخليها . اما الابيض دا عايز صواتها أكثر من صواتّ البورد ومرة صواتة تصوط وتصوط لحدي ما الطبخة تعقد وتخليك تقولي الرووووووووووووووووووووووووووووووب .

Post: #21
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:23 AM
Parent: #17

عمتي... غايته ما بعرف .. مااااابحلك.. وريني العلمتك ليهو تماضر كله.. تماضر دي شكلها كده بقت senior .. كتبت ليها الموقع وفاتت.. انا عايزه تعليم حبه حبه.. خطوة خطوة... ملاح الروب (البرتقالي) النعيمية ده في رأيي أكل أهل الجنه لا تقولي لي مايونيز لا حايونيز... ده شي كده براااااااااه للبظبطه.. وامي يديها العافية تعمله رهيييييييب.. اها ملاح الروووووووووووب الأبيض أب بصلة طافحه ده بقى ملاح تاني... ده شبكتني فيه مرت عمّي الكبير .. ومن يومها أمي تعمله بي حلة البريستو الكبيره لي انا براي عشان مافي زول في البيت بحبه زيي.. مازن بدخل يدّه مرّه مرّه.. اها تعمل لي الحله الكبيره كان دايره تستحمي بيهو بتحميك... ومعاها كم قالب بتاع عصيده... وانا اسخّن واخت لي خيط بتاع سمنه فوقه.. وحبّة شطه.. واقع ليك فيهو أكل.. اسبوع ممكن آكله... صحي (بتوّر) علي المصران ... لكن ما بسيبه أصلي...

جودي علينا بملاح عليك الله.. الليله طابخه شنو؟

Post: #20
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:20 AM
Parent: #15

إيهاب الطيب كيفنك يا أخوي؟ والله غايته الخدره دي موضوعها ما اظنه صعب... مرّه كده عملتها والله من راسي، لكن طلعت سمحه خلاص (ولا أنا كنت جعانه).. حبوبتي ستنا الله يرحمها كان كنشها طاعم بشكل.. كنت انا صغيييييره أقعد ليها في الواطه .. وجنبها الكانون .. واقعد اسوط ليها الملاح (حتى كان ما داير سواطه)... واضوق ليها الاكل.. يمكن ده هو زاتو الخلاني أحب الطبيخ..

بعدين يابا.. مسنجر شنو كمان... انت يمكن اخير منّي في الطبيخ.. انا البوصيك أكتب ليك اسئلتي هنا.. بعدين غايته ناس رفاعه ديل مفروض يكونوا بعرفوا يطبخوا، رجال على نسوان... كدي جرّب طعمية منى دي وادعي ليها....

بنت الحسين

Post: #19
Title: Re: عشه مبارك، تماضر، تراجي، منى خوجلي.. النبي خسيمكن
Author: أحمد الشايقي
Date: 06-04-2005, 04:12 AM
Parent: #1

هــذا البوســت يشعر ب(الشـمــار)

وبالجــــوع

وخالــص تحيــاتي

Post: #22
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:26 AM
Parent: #19

أحمد الشايقي إزيك.. الجوع وعرفناه.. الشمار شنو؟ إلا كان الشمار الفي الفول.. ما تبقى لي زي زولة.. .. انا بس أمي مافيشه ونفسي في ملاح روب... بعدين أبوي كمان شويه وحيجيه شي من أكل الفول كل يوم.. رغم انه امي خاله لينا الفريزير مليان ملحات.. بحب الملاح الfresh.. ولا الموضوع يمكن يكون (الكنش) و(النَفَس)...

ما عندك طبخه تساهم بيها معانا...

بنت الحسين

Post: #23
Title: Re: عشه مبارك، تماضر، تراجي، منى خوجلي.. النبي خسيمكن
Author: أحمد الشايقي
Date: 06-04-2005, 04:35 AM
Parent: #1

مريم بنت الحسـين

أولاً الشـمار قوي الرائحة ود زولــة ما ببتكلم (ساكــت)

ثانيا

أكلتي أكلــة رهيـبــة.

اسـمـهــا

القـطــر قــام

المقادير:-

كل ما يتوفــر من (أشياء) قابلة للطبـخ

الطريقــة:-

قـطـعي كل شئ في (الحلـة) وضـعـيها على نار هادئـة, وبعـد ساعة ونصف بالبوتوجـاز , ارفعي غطاء الحلة (الريحة حتكون -- رائعــة)

بعد ثلث ساعة قدميها لضيوفك , إن شاء الله بورداب الرياض (ما يحضـروا)

خالص تحياتي

أحمـد الشـايقي

Post: #24
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:47 AM
Parent: #1

أحمد الشايقي.. كيفنك يا أخوي... شكلك جعان تب.. بس ما تتابع لي زولة دي.. بتتعب..

الجاح والجاحه لما كانوا عزّابه.. بقصد قبل ما انا اجي.. بدأوا ليهم اكله واستمروا فيها لحدي ما كبرنا.. اسمها الربش... يعني الجاحه الليله تعمل عدس... وبكره تعمل فاصوليا.. وبعد بكره تعمل رجله... اها .. بواقي الملحات دي تقوم تكب ده في ده ... وتعمل ليها رز.. وتقطع فيهو عيش.. وتحركهم كلهم في النار.. بعداك تقوم تقطع جننبهم الطماطم الماخمج.. وفيها حبة ليمون وملح وزيت سمسم... ما بتدي الجنبك...

جرّبها

بنت الحسين

Post: #25
Title: Re: عشه مبارك، تماضر، تراجي، منى خوجلي.. النبي خسيمكن
Author: أحمد الشايقي
Date: 06-04-2005, 04:50 AM
Parent: #1

Quote: يعني المرا البتطبخ و(كنشها طاعم) .. وبتعرف تخيّط كورشيه... وترسم على القماش.. والأنيقه .. واهم شي، بيتها نظيف.. وفوق ده كله ناجحه في عملها، دي انا بعمل ليها تمثال

Post: #36
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:33 PM
Parent: #25

أحمد الشايقي.. والدتي يديها العافية ويخليها مما اتخرجت من جامعة الخرطوم كلية الآداب قسم الجغرافيا، وحتى هذه اللحظة معيّنه بدوام كامل للعناية بنا.. وهي من عيّن نفسها.. وهبتنا كل حياتها ولا زالت تفعل... ولا أشك للحظة أن هنالك الكثير من الرائعات مثلها..

Post: #26
Title: Re: عشه مبارك، تماضر، تراجي، منى خوجلي.. النبي خسيمكن
Author: zola123
Date: 06-04-2005, 05:38 AM
Parent: #1

مريم, هووووي!
ما تغيري الموضوع وتدخليني في المرأة العاملة والكروشية
أنا حاسكت على كدة عشان تاخديها لي جميلة وما تفضحيني لما اجي اتجرس للناس زيك

Quote: انت شكلك كده (باله راسك)... ولا شنو؟

ناشف....ناشف......ناشييييييييييييييف, ما تعملي لي زي راوية

نجي للطبيخ
خلي الأكلات الفلكلورية دي لناس تماضر وعشة ماحنفتي وناس مالك في المدينة.
أنا باوريك حاجات خفيفة وظريفة انترناشونال, بس ما أظن بتنفع مع الجاح حقكم عشان بيكون بيؤمن بالمدرسة التقليدية في الطبيخ, يعني أي ملاح لازم يكون أحمر (بالطماطم). طبختي دي لونها أبيض!

دجاج بالفطر والكريما:
أهم ميزة ان الأكلة دي سريعة, يعني ممكن تنتهي في 20 دقيقة وتتعمل ليكي بعد تجي من الشغل.ولذيذة وأنا شخصيا لا أملها أبدا.
-جيبي صدور دجاج وقطعيها شرائح زي الشاورما, وومرات بتلقيها مقطعة جاهزة
-شوحيها في طوة كبيرة غريقة شوية مع شوية زيت لحد ما(مويتها تنشف وتصفر بس ) ما تحرقيها!
- قطعي بصل حلقات واضيفيه للطوة وقلبيه, يمكن تحتاجي تزيدي زيت عشان الجداد بكون استهلكه.
الحكمة في وضع البصل بعد الدجاج وليس العكس عشان الدجاج حياخد وقت أطول ويمكن البصل يتحرق لو ختيتيه بدري.
-لمن لون الحاجات يبقى ذهبي وقرب على البني قومي أضيفي شرائح المشروم, أفضل الطازج لاكن ممكن تختي بتاع العلب.
-المشروم حيطلع موية تقومي تضيفي في الوقت ده شرائح الفلفل الأخضر البارد وختي مكعب ماجي و4 فصوص ثوم أو اكثر حسب الذوق, وشوية ملح وفلفل أسود( لا تحتاجين لأي بهارات أخرى عشان ما يبوظ الطعم).
-وطي النار تحت الطوة وخلي الخليط 10 دقائق.
-أضيفي الكريما الجاهزة. نحن عندنا المراعي طازجة وبكتبوا عليها بالعربي قشطة وبالانجليزي cream
بتلقيها في السوبرماركتس الكبيرة في قسم الألبان والزبادي. بس انتبهي ما تجيبي زبادي
لو ما لقيتيها خالص استخدمي قشطة نستلة بتاعه الحلويات ما تخافي بتكون مسيخة.
حتحتاجي زي علبتين كريمة أو قشطة.
-كبي الكريمة فوق الخليط في الطوة وقلبي بملعقة خشبية بسرعة عشان ما تتكتل, وخليها دقيقتين( ما أكتر) وشيلي الطوة من النار وقدمي الطبخة.
-ملاحظة لو لقيتي الخليط سميك, أضيفي قليل من الحليب مع التحريك.

قدميها مع الأرز

وبالهنا والشفا

Post: #37
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:39 PM
Parent: #26

زوووووووووله.. بالغتي.. غايته جبتي وصفه في المليان، اصلي بحب الحاجات اللونها أبيض ... عايني، بعد بكره بعمل الأكله دي وبجي اديك رأيي... وخليني أديك وصفة الsouce دي للستيك.. سريعة ولزييييييييييييييييزه.. وفيها فطر برضه...

المقادير
فطر... ملعقة دقيقة.. مكعب ماجي... بصله مقطعه شرائح.. زيت أو زبده.. ممكن فلفله خضرا للنكهه...

قلبي البصل مساافه في الزيت او السمنه.. وضيفي عليه الفطر (طبعا يكون مقطّع) والفلفل... كبي شويه مويه عشان يكون عندك مرقه .. وختي مرقه ماجي (ممكن تستخدمي شوربة الستيك).. بعد ما يسخن شويه كده الخليط ختي ملعقه الدقيق وحرّكي عشان ما (يكرضم)... ملح وحبة فلفل أسود... وبعد كده عندك ال Souce جاهزة... قدميها مع الستيك .. ومعاهم mashed potato (اعملي ليها جبنة موزريلا وهي سخنه).. دي ختفتها ليك من apple bee's... وعلّقت ليك فيها...

Quote: ناشف....ناشف......ناشييييييييييييييف, ما تعملي لي زي راوية

انتي قولي خير، بتغسلي عدييييييل، موش بلبله بس

بنت الحسين

Post: #27
Title: Re: عشه مبارك، تماضر، تراجي، منى خوجلي.. النبي خسيمكن
Author: Adil Osman
Date: 06-04-2005, 05:42 AM
Parent: #1

الاخت مريم بنت الحسين. سلام وتقدير. استنجدتى بنساء، مشهود لهن بالابداع فى مجال الثقافة والسياسة والهم الوطنى العام. وكثيرون يعتقدون ان المرأة الناشطة فى الحقل العام ليست من العارفات بشوؤن المطبخ، والطعام، وغيره من الشوؤن البيتية! وهاهن قد دحضن هذا الزعم بالتعارض بين الخاص والعام، بين البيتى، والوطنى والشأن الانسانى العام.
ولقد لاحظت زولة123 بمرحها المعهود أن وراء الاكمة ما ورائها. عرس!
وهنا فى بريطانيا وغيرها، صار الطبيخ هواية محببة للرجال قبل النساء. واختفى، او كاد، التقسيم التاريخى للعمل البيتى باعتباره حكرآ على النساء. ومذمة للرجل!

وما دمنا نتحدث عن صناعة الطعام، والاكل السودانى المشهور، والعرس، تعالوا نشوف هذا الموقع الطريف:
http://web.odu.edu/webroot/instr/sci/plant.nsf/pages/henna

Post: #28
Title: Re: عشه مبارك، تماضر، تراجي، منى خوجلي.. النبي خسيمكن
Author: معتز تروتسكى
Date: 06-04-2005, 05:55 AM
Parent: #27

خالص التحايا
مريم (عيوشه)
اسمعى اكلتك الحتعمليها دى
اخير منها تجى بى قروش الكشف....
لووووووووووووووووووول

انتى بتنفعى معانا وبتكترى الزبائن
ربنا يخلك لينا...

تعرفى انا علاقتى بالمطبخ غريبه جدا
داير تعلم الطبيخ بس مانى زول اكل ممكن ساندوتش واحد خلا يقعدنى لليوم التانى..
لكن فى المشروبات دى اسكتى ساى..
كلو من الكُلى وبعد داك بقت عاده.
قايتو انا حاشف من البوست بتاعك ده بالدس..
كان لقيت فرقه بجيك

Post: #39
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:41 PM
Parent: #28

معتز... مرحب بيك... غايته الجاح ومروان متوكلين على ربهم.. الليله ربك رب الخير نجدهم بي اغاثه دولية.. لكن بكره ناويه ليهم...

خليك around.. الطبخات شكلها لزيز

بنت الحسين

Post: #38
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:40 PM
Parent: #27

عادل عثمان.. عجبك مطبخنا؟ طبعا انا قصدته أقول الأسماء دي تحديداً... عشان حسيتهم كده والله أعلم فطاحلة المطبخ السوداني... شكرا ليك على اللنك الظريف... وما قلت لينا، بتعرف تطبخ شنو؟

بنت الحسين

Post: #29
Title: Re: عشه مبارك، تماضر، تراجي، منى خوجلي.. النبي خسيمكن
Author: Osman M Salih
Date: 06-04-2005, 05:57 AM
Parent: #1

عبث

Post: #30
Title: Re: عشه مبارك، تماضر، تراجي، منى خوجلي.. النبي خسيمكن
Author: Tumadir
Date: 06-04-2005, 06:59 AM
Parent: #29

Quote: بت الحسين قتي ملاح الرووب بس انتي حبيبتي اخترتي اللون الصعب ! لو قاصدة البرتقالي عندك تماضر تظبط ملاح رووب برتقالي ما حصل ، اصلها معلماني ليهو من زمن الثورة ومن يومها واولادي اقولو لي ما ماما عايزين ملاح برتقالي ، اصلها كنشها طاعم بت الاية يا قول عم شيخ الدين ما تخليها . اما الابيض دا عايز صواتها أكثر من صواتّ البورد ومرة صواتة تصوط وتصوط لحدي ما الطبخة تعقد وتخليك تقولي الرووووووووووووووووووووووووووووووب .

عشة مبارك ...ما تذيعى اسرارنا

انا عملت فيها بتاعة رسيبي...وجبت ليها الويب سايت تجى تفضحينى؟؟

طيب يا مريم

اليك الطريقة مرة تانية

جيبى شوال بصل .........اكتلى البصلة genocide قتل جماعى

وانتظرى مجلس الامن شوفى يعمل ليك شنو؟؟

هههههههههه

انا يا عشة زارتنى مرة بيضا صاحبتى لمدة اسبوع ...

بنطلع الصباح كلنا والساعه خمسة بجى البيت واخش على المطبخ ....بعد ساعه التربيزة بتترص ....

المرة دى لى حسة مصرة انه انا افتح فصل اعلم الامهات كيف يعملوا وجبة صحية شهية فى اسرع وقت

بس المشكلة انى بألف الاكلات فى لحظتها ...وما بعرف اوصفها بس الفى التلاجة والدولاب والرف بطلع منه وجبة ...

بالاختصار ممكن اعمل ليك ملاح روب برتقالى بطريقة واشنطن "دى عملتها فى واشنطن وعلمتها للنسوان الهناك بقوا يقشروا بيها "المرة فيهم التجى تنكر"

تجيبى لحمة مفرومة وبصلتين كبار وكاس زبادى كبير وبرطمانية صوص بتاع اسباجيتى صغيرة

حمرى البصلة وختى عليها اللحمة والتوم والبهارات "فلفل هبهان وشوية قرفة"

لما تنجض اللحمة كبى الخلطة فى فود بروسيسور واخلطى لمدة 30 ثانية

مع الزبادى والصوص

رجعيها فى الحلة للنار ولايقيها بالدقيق او الويكة ...بعد ما يتماسك كبى شمار طازج ... وقدميه بالهنا والشفا.

لومافى لحمة اعمليها بالدكوة ودى ما بتحتاج نجاض يعنى بعد تحمير البصلة طوالى ختى البصلة والصوص والدكوة والزبادى فى الفود بروسيسور...يمكن التوم برضو لو ما دايرة تبشريه...

اخر مرة اورى اسرارى لى زول....

Post: #31
Title: Re: عشه مبارك، تماضر، تراجي، منى خوجلي.. النبي خسيمكن
Author: Alia awadelkareem
Date: 06-04-2005, 08:34 AM
Parent: #30

مريوم

ازيك

طبعا ضحكتيني لما لقيتك مستنجدة بعشة

لانة عشة بطبخ ليها راجلة ودا بيني وبينك عندها عداء جيني مع المطبخ

ودي خاصية بتمتعن بيها كل بنات المبارك الا من رحم ربي

يعني عمتك زين وكدة

وانا غايتو حا اقيل هنا

اجي كل الوصفات من النسوان المقعدات ديل عشان اقشر للخواجيات صاحباتي

وعشان اكل ذاتو لي روحي دي الجوع كتلني عديل باكل الالمان

محبتي لكل المشاركين والمشاركات

محبتي

Post: #32
Title: Re: عشه مبارك، تماضر، تراجي، منى خوجلي.. النبي خسيمكن
Author: smart_ana2001
Date: 06-04-2005, 10:32 AM
Parent: #31

مريم سلاماات
كنت عاوزه اكتب ليك ملاح النعيميه , بس لقيت تماضر (كتر خيرها) ما قصرت

Quote: .. انا بتكيّف جداً من المرا البتكون عامله الدور بتاعها كويس كست بيت، إضافة إلى دورها في المجتمع.. يعني المرا البتطبخ و(كنشها طاعم) .. وبتعرف تخيّط كورشيه... وترسم على القماش.. والأنيقه .. واهم شي، بيتها نظيف.. وفوق ده كله ناجحه في عملها، دي انا بعمل ليها تمثال.. وبسعى جاهده أكون زيها... بؤمن بإنه مكان المرأة البيت.. ودورها الطبيعي انها تعتني بيهو.. لكن برضه بؤمن انه عقلها وفكرها ومهاراتها لازم تطورها وتنميها عشان تكون مفيده للمجتمع

ده شنو الكلام ده ؟؟؟؟
لو ما عارفه انك البتكتبى الكلام ده , كان قلت راجل سودانى (ود قبائل)
قبل فتره ,واحد معرفتنا قال ان زوجتو كل المزكور اعلاه بالاضافه ل الاعتناء بتلاته اطفال من توصيل للمدراس للمزاكره و حل الواجبات. بس عندو مشكله , مع كل الفوق ده , عاوز فى عطله نهايه الاسبوع لما يكون مزاجو رايق و عاوز يعمل شويه زيارات او حتى بس طلوع من البيت عشان يفرقوا , قال عاز يلقى زوجتو مستعده و بمعنويات عاليه كمان
و بصراحه يا مريم القلتيه فوق (ناس رسم على القماش و كده ) ده براه فل تايم جوب, و النظافه و العنايه بالاطفال شغل براه, اما النجاح فى الشغل , فانتى ادرى
و النشاط الاجتماعى ده ممكن تحشريه مع اى واحد من الفوق ديل , بس معاهم كلهم . صعب شديد
معليش للطلوع من موضوع البوست

Post: #33
Title: Re: عشه مبارك، تماضر، تراجي، منى خوجلي.. النبي خسيمكن
Author: Muna Khugali
Date: 06-04-2005, 02:03 PM
Parent: #32

طـريقة عمـل مـلاح الروب (الأبيض)

زبـادي ثقـيـل-كبايتين

بصـلتين مـشقـوقـات علي أربعـة..وتوم صـحـيح منـضف وسـليم
تضـعـي البصـل والتـوم فـي الزبـادي..تغطـيهـم مـن بالليـل لغـاية الصـباح..
ثـم تضـعيـه عـلي نـار هـادية لفترة معقـولة حـتي يسـتوي لبـصـل قليلا فـي الزبـادي..تضـيفـي قـليل من المـلح والفلفل الأبيض..ثـم تخلطـي معلقـتين دقيق فـي خبة زبادي أو لبن ثم تضـيفيهـا الي الزبـادي وتقلبي الخليط بمـعلقة زي طـريقة الكـستر..وكـلة علي نـار هـادية حـتي ينـضـج المـلاح..
سـيحـي بـدة أوسمنة وضـعيهـا علي وش المـلاح!

مـني

Post: #42
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:53 PM
Parent: #33

منى خوجلي... عاد ما قصّرتي معاي تب وكت كتبتي لي ملاح الروب الأبيض.. بس كنت عايزه اسألك من العصيده البعملوها بالزبادي... حصل سمعتي بيها؟ شكلنا بعد بكره متغديين حاجات كتيره

Post: #35
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:32 PM
Parent: #32

سمارت (انت)... .. عزيزتي... انا شرحته ليكم صورة المرأة (البتكيفني).. لكن الصورة عشان تكتمل لازم نتكلم عن نصفها الآخر.. لأنها ما حتتمكن تكون سوبر ومن لو نصفها ما سوبر مان... الرجل يقع على عاتقه ظهوره زوجته بكل هذا التألّق... يعني بتوقع منّه مثلا .. لو استخدم كبّاية، يغسلها... ما بخسر شي لو سهّل مهمة الحفاظ على النظافة... بتخيل برضه انه ممكن يكون متعاون معاها في الامور كلها عشان هي تتألق بالمستوى ده... وتتفانى في ان تكون له مثالاً له للروعة,.. يعني ما يشوف فيها مشكلة لو ساعدها في النظافة.. قطّع السلطة استعداداً للغدا.. جهّز المائدة.. ما أشغال شاقه.. لكنها حاجات صغيره بتفرق كتير خالص... ما تخافي يا سمارت... .. انا ياني أنا... ما مسألة ظهور المرأة بصورة قشريه... جمال من الخارج فقط.. دي انا ما معاها... لكن بالمقابل عايزه أقول انه الداعيات لحقوق المرأة بترفعوا عن الدور الحقيقي والأساسي للمرأة في العناية بالبيت والأطفال... وبفتكروهو منقصه.. في حين انا بشوف انه فل تايم جوب... تعرفي يا سمات، الأستاذ محمود بقول انه المرأة مفروض تاخد (مرتّب) على عملها في البيت ومساعدتها للأولاد باعتباره عمل سامي مثله مثل الأعمال التي توجب خروجها إلى الخارج والعمل...

مابحلك ملاح النعيميه.. شوفي لينا ملاح تاني.. شكلك كده، (كنشك طاااعم)... نقول بسم الله؟

بنت الحسين

Post: #41
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:43 PM
Parent: #31

علياء عوض الكريم.. كُر كُر كُر.. عاد لكن شيلي شيلتك.. اوعك تجي مؤتمر ناس اشراقة، بترجاك عمتي دي.. ... سيده بمرورك.. ما عندك لينا طبخة؟

بنت الحسين

Post: #40
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-04-2005, 04:42 PM
Parent: #30

كده يا يمه.. والله العظيم نظرتي فيك ما خيّبت يا طمطم.. ما عرفتك لكن بتعملي النعيميه بسباجتي صوص.. بالجد حسيت بيك بتخترعي كده.. طبز طبز طبز.. وتعملي من الفسيخ شربات... انا عندي الحركة دي.. واحيانا في حاجات عجيبه بتحصل... بس خلي الطابق مستور... لكن ما علمتيني التقليه السودانية الاصلية بسووها كيف؟ ديك البتعملها حبوبة ستنا في التكل...

بنت الحسين

Post: #34
Title: Re: عشه مبارك، تماضر، تراجي، منى خوجلي.. النبي خسيمكن
Author: صلاح محمد صالح عثمان
Date: 06-04-2005, 02:27 PM
Parent: #1

الأخت/ مريم
أسمحى أن أسلم عبرك على الأخت عائشه المبارك وأرجع بها أيام الفرع فى نهاية السبعينات 0
لك الأخت عائشه التحاياعندما كانت تتلاقى رابطة طلاب رفاعة مع رابطة طلاب حلفاوالسكوت والمحس 0

صلاح محمد صالح

Post: #43
Title: Re: عشه مبارك، تماضر، تراجي، منى خوجلي.. النبي خسيمكن
Author: Muna Khugali
Date: 06-04-2005, 10:21 PM
Parent: #34

اللقمـةبالزبـادي..

كـباية زبـادي حـامـض وبرضـه ثقيـل
دقـيـق أو كـورن فـلور
الزبادي علي نـار هـادية..ثـم يضـاف الدقيق واعمـلي حـسـابك " مـايكـلكـع"
يضـاف قليـل مـن المـلح..
نعـرف بنـضج العصـيدة بعـدم تلصـقـهـا فـي المـفراكـة أو المعلقـة الخـشب
أوالمـضـرب الكـهـربـائـي!

أسـمعـي إنتي أمـك راجـعـة متين??

مـني

Post: #44
Title: Re: عشه مبارك، تماضر، تراجي، منى خوجلي.. النبي خسيمكن
Author: معتز تروتسكى
Date: 06-04-2005, 10:36 PM
Parent: #43

Quote: أسـمعـي إنتي أمـك راجـعـة متين??

الناس دى حتتعب معاك تعب قايتو ربك يدهم العافيه..

Post: #46
Title: Re: عشه مبارك، تماضر، تراجي، منى خوجلي.. النبي خسيمكن
Author: Alia awadelkareem
Date: 06-05-2005, 00:41 AM
Parent: #44

العزيزة مريوم

صباحك ود

يختي انا معودة علي معيطة من انا صغيرة

اها وعلي ذكر وصفات مني خوجلي مشكورة

قلت النعمل ملاح الروب الابيض

يلا دخلت المطبخ

قمت شفتة ليك كلة كبابي

قلت ياربي ياتو مقاس من الكبايات قاصداهو مني...؟

لما ما عرفت طلعت بيتزتي من الثلاجة ودخلتها الفرن وصميت خشمي يا قول حبوبة

فالحة مش...؟؟؟

محبتي

Post: #55
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-07-2005, 07:13 AM
Parent: #43

منى خوجلي.. عاد والله ما قصرتي معاي تب... لكن خربتيها بي متين جايه الحاجه .. غايته الحاجة أديها لحدي شهر تمانية.. لكن الخبر الحلو انه الحاج مسافر ليهم كمان ... يعني امريكا قد دنا عذابها..

أقري ردي البعدين حأكتبه... عملت لي غدا أول امس بس الله يستر الناس ما يكونوا مرضوا

بنت الحسين

Post: #47
Title: Re: عشه مبارك، تماضر، تراجي، منى خوجلي.. النبي خسيمكن
Author: Yasir Elsharif
Date: 06-05-2005, 02:17 AM
Parent: #1

شكرا يا مريم على هذا البوست..

وأكلة تماضر وزولا وسلطاتك وملاح الروب بتاع منى حاجة تمام..

هاك ملاح التقلية مني أنا خالتك إلهام..

تستخدمي بصل محمر جاهز أو بصل منشف ومسحون أو بصل طازج بالعدم..
في حالة استخدام البصل المحمر الجاهز تختي ثلاثة معالق بتاعة أكل ومعاها شوية زيت ومعاها لحمة مفرومة [ربع كيلو] أو شرموط 3 إلى 4 معالق.. في حالة اللحمة المفرومة تقلبيهم لغاية ما الموية بتاعتها تتبخر.. بعد داك أضيفي صلصة حوالي 3 معالق.. بعدين تكبي ليها حوالي لتر ماء.. وتكبي شوية ملح وكسبرة مسحونة واتركيه يغلي لمدة 10 دقايق.. بعد داك تضيفي الويكة حوالي معلقتين أو زيادة حسب نوع الويكة.. وأضيفي رشة بسيطة من القرفة المسحونة واتركيه يغلي في نار هادية لمدة 3 دقايق مع التحريك المستمر.. ملحوظة: يمكن أن تضيفي مع اللحمة شوية شوربة ماجي..

نرجع في حالة استخدام البصل المجفف ومسحون كبي الزيت أو زيت وسمن، وكبي فيهو البصل المسحون 3 معالق وحركيهو في نار هادية لغاية ما يصير لونه بني فاتح، ثم أضيفي نصف كوب ماء [100 ملليلتر] وبعد داك استخدمي نفس الخطوات ابتداء من إضافة اللحمة أو الشرموط..

وفي حالة استخدام البصل الطازج يفرم أو يقطع ناعم.. ثم يُشوّح في زيت، أو زيت وسمن، لغاية ما لونو يبقى ذهبي أو بني فاتح.. وتتبعي نفس الخطوات..

أما ملاح النعيمية فأنا هنا بحب أعملو بدون فول سوداني.. تعملي نفس الخطوات بتاعة ملاح التقلية بس بدل الموية [لتر ماء القبيل] ختي لبن رايب أو زبادي..
ملحوظة: بدل الصلصة أو معاها [مناصفة] يمكن إستعمال طماطم مخلوط مع وضع خصم كمية السائل من كمية الماء الذي تضيفينه.. بعدين أنا اجتهدت عشان أقول ليك الحاجات بالمقادير لأني عادة لا أستخدم مقادير زي حالة خالتك تماضر.. والتقدير متروك ليك ويجيئ مع التجربة..

بالنسبة لملاح الروب: لحد ما نفس خطوات منى خوجلي.. ولكني عادة أضيف فول سوداني أبيض [يعني ما مدمس] مقشور ومسحون للروب أو الزبادي ويصفى لو كان ما ناعم شديد.. وهناك من يضيفون قليلا من الويكة لملاح الروب لكن هذه تغير اللون..
إلهام

Post: #56
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-07-2005, 07:17 AM
Parent: #47

أستاذ صلاح ألف مرحب بيك... والدار دارك

تروتسكي... بطل تصطاد في المية العكره..

خالتو إلهام.. كيف حالك.. ما تتصوريني فرحته لياتو درجة بكتابتك.. طبعا في البداية افتركته عمو د.ياسر هو البكتب... وقلت أمشي أحكي للحاجه أصلها من زمان بتقول عن عمو د.ياسر انه كان بساعدها في البيت لما زار أبوي وامي في بريطانيا.. ويقعدوا هي والجاح يتكاووا ... أشكرك على الوصفه.. وحأجربها.. أصلي انا قاعده بس للتجارب الصيف ده كله.. ما ماشه ولا حته... والله يعينه القاعدين معاي..

Post: #48
Title: Re: عشه مبارك، تماضر، تراجي، منى خوجلي.. النبي خسيمكن
Author: Adil Osman
Date: 06-05-2005, 06:07 AM
Parent: #1

وهذا تقرير صحفى من (خليج تايمز) عن الاكلات السودانية، وتأثير ثقافات اخرى على المطبخ السودانى. اذ نجد اثر هندى، ويونانى، وتركى، وعربى، وبالطبع افريقى. وفيه صور جميلة. للبشر ولانواع الطعام. ولقد اعجب الكاتب ايما اعجاب بالاكل السودانى.
http://www.gulf-news.com/Articles/people-places.asp?ArticleID=106439

Post: #49
Title: Re: عشه مبارك، تماضر، تراجي، منى خوجلي.. النبي خسيمكن
Author: zola123
Date: 06-05-2005, 07:25 AM
Parent: #48

ِAdil Osman
يا اللللله ! كم كانت المفاجلاة جميلة عندما ضغطت على اللينك الذي وضعته.
عادت بي لأيام جميلة قضيتها في جمعية المرأة السودانية بأبوظبي و ذكريات هذا التحقيق الصحفي الجميل.الاستاذة حبيبة رئيسة الجمعية وحثها لي في يالهاتف على الاسراع بالحضور, عشان الصحفية الهندية وصلت. ثم لقاءنا في منزل الحبيبة الغالية الاستاذة فتحية عبد الجليل التي أعدت مائدة عامرة بما لذ وطاب من أطباق سودانية, أضفنا لها ما أحضرته كل منا معها. لأجد الجميلات الاستاذة فاطمةأو كما نسميها( اخلاص) والاستاذة الهام والعزيزة د. مشاعر. كانت الهام بابكر(الامدرمانية) زميلاتنا في البورد والجمعية في اجازة بالسودان حينها.

الصحفية الهندية كافيتا ما خلينا ليها حاجة, أصريناان تتذوق كل الأطباق ومع تهافت الحبيبات في الشرح ضعت أنا في زحمة الترجمة وما تنسي تقولي ليها كدة يا ايناس و...و...و...
بس فلاحتي كانت في وصيف الشطة
Quote: A significant addition to the Sudanese food table is the tiny plate of red sauce - a potent mix of red hot pepper, lemon juice and peanut butter. "It's a must at every meal. We love spices," says Dr Einas Elamin, another member of the cultural association

مريم
جايايكي...!

Post: #50
Title: Re: عشه مبارك، تماضر، تراجي، منى خوجلي.. النبي خسيمكن
Author: الملك
Date: 06-05-2005, 05:04 PM
Parent: #49

صديقتى

....
....

***ومة
شكلك قربتى جد

...
...

ما تنسى الشربوت بعدين

Post: #57
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-07-2005, 04:09 PM
Parent: #49

عادل عثمان.. ألف شكر على المقال الجميل.. ما وريتنا بتطبخ شنو؟

زولة صاحبتي.. عاد ما عرفتك... بقيتي مشهوره.. واسمك في الجرايد.. كده يا يمه حال السرور.. وبالانجليزي كمان.... عفيت منّك.. انا لسه منتظراك.. حأعمل اكلتك بكره وبديك النتيجة... يا عمك أحمد خلا لي البيت.. يا دعى ليك يا عليك

بنت الحسين

Post: #51
Title: Re: عشه مبارك، تماضر، تراجي، منى خوجلي.. النبي خسيمكن
Author: lana mahdi
Date: 06-06-2005, 00:50 AM
Parent: #1

خالتى الله مرقا
الله يكون في عون عمي و مازن و البقية

Post: #52
Title: Re: عشه مبارك، تماضر، تراجي، منى خوجلي.. النبي خسيمكن
Author: nadus2000
Date: 06-06-2005, 01:15 AM
Parent: #51

Quote: ملاح الروب الأبيض،

ملاح النعيمية،

ملاح التقلية،

ملاح ام رقيقه،

ملاح الويكاب (ما يسمعني الجاح)،

ملاح اللوبيا...

الصغيرونة مريومة

تحياتي
أخوك خبرة في الضواقة، وكم سنة كنت حقل تجارب، فأضع تحت أمرك كل هذا الرصيد الذاخر من الخبرة،
وحياتك بي شنيفة "وإستعدي لتسمعي مسيخ، كعب، ولما تصلي قمة إبداعك فجائزتك عبارة "Eatable".
والله أنا لما قريت الأسماء دي كنت فاكر الشغلانة فيها "تعليمة".

Post: #72
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-12-2005, 06:09 AM
Parent: #52

والله البصر المانافعه فيه النظاره.. والذاكره الما نافع فيها شي دي ما عارفين نقول عليها شنو... كل فكري اني كتبته رد.. لكن .. اكتشتفه اني ما كتبته شي ... ليك الاعتذار ابا عمرو...

قلت لي ذوّاق رباطابي كمان... انا عندي من عينتك دي في البيت، قبيلة... تعليقات اشكال ألوان.. والله مرات كتيره بفكر احرد ليهم الموضوع... اظرف شي، امس بتكلم مع الجاحه في السودان.. قالت لي ده شنو، فاضاحنا كده.. انا استغربته.. قلت ليها كيف؟ قالت لي، ما قالوا كاتبه انك ما بتعرفي تطبخي... قعدته اضحك.. وقلت ليها، مالك ما بتعرفيني... قالت لي عارفاااك عشان كده بقول ليك ما تكتبي عن نفسك كده... طبعا امي عندها قناعه اني طباخه .. ولما يكون عندها شية دايراها تطلع سمحه، بتوكلها لي... وكل ما يكون عندها رغبه تعمل شي (سوبر).. بتقول لي عوك... دحين قلتو شنو؟ اوقف بوستي ده بسبب الاوامر العليا؟؟

Quote: والله أنا لما قريت الأسماء دي كنت فاكر الشغلانة فيها "تعليمة".

لوووووووووووووووووووووووول... (وبدون تعليق )

بنت الحسين

Post: #60
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-10-2005, 07:27 AM
Parent: #51

لانا مهدي... صاحبتي شديد.. .. عمك أحمد حاجز.. وشايفه قبل كم يوم جنن ليك ناس الخطوط القطرية عشان يتأكد من الحجز بتاعه.. يا ربي ده من أكلي؟

بنت الحسين

Post: #53
Title: Re: عشه مبارك، تماضر، تراجي، منى خوجلي.. النبي خسيمكن
Author: نادر
Date: 06-07-2005, 03:04 AM
Parent: #1

أها يا مريم لغاية ما ترجعي للبوست ده نقلبو غذا روح، فكما يحتاج الجسد للغذاء تحتاج الروح غذاءً يبصرها ويقويهاويجمّل دروبها، هذه كلمات قرأتها فأعجبتني ...
جاء في حكم و قصص الصين القديمة أن ملكا أراد أن يكافئ أحد مواطنيه فقال له‏:‏ امتلك من الأرض كل المساحات التي تستطيع أن تقطعها سيرا علي قدميك‏..‏ فرح الرجل و شرع يزرع الأرض مسرعا و مهرولا في جنون‏..‏ سار مسافة طويلة فتعب و فكر أن يعود للملك ليمنحه المساحة التي قطعها‏..‏ و لكنه غير رأيه و قرر مواصلة السير ليحصل علي المزيد‏..‏ سار مسافات أطول و أطول و فكر في أن يعود للملك مكتفيا بما وصل إليه‏..‏ لكنه تردد مرة أخري و قرر مواصلة السير ليحصل علي المزيد و المزيد‏..‏ ظل الرجل يسير و يسير ولم يعد أبدا‏..‏ فقد ضل طريقه و ضاع في الحياة، و يقال إنه وقع صريعا من جراء الإنهاك الشديد‏..‏ لم يمتلك شيئا و لم يشعر بالاكتفاء و السعادة لأنه لم يعرف حد الكفاية (القناعة)‏.‏
النجاح الكافي صيحة أطلقها لوراناش و هوارد ستيفنسون‏..‏ يحذران فيها من النجاح الزائف المراوغ الذي يفترس عمر الإنسان فيظل متعطشا للمزيد دون أن يشعر بالارتواء‏..‏ من يستطيع أن يقول لا في الوقت المناسب و يقاوم الشهرة و الأضواء و الثروة و الجاه و السلطان‏؟
لا سقف للطموحات في هذه الدنيا‏..‏ فعليك أن تختار ما يكفيك منها ثم تقول نكتفي بهذا القدر‏..‏ و نواصل الإرسال بعد الفاصل‏..‏ بعد فاصل من التأمل يتم فيه إعادة ترتيب أولويات المخطط‏..‏
الطموح مصيدة‏..‏ تتصور إنك تصطاده‏..‏ فإذا بك أنت الصيد الثمين‏..‏ لا تصدق؟‏!..‏ إليك هذه القصة‏..
‏ ذهب صديقان يصطادان الأسماك فاصطاد أحدهما سمكة كبيرة فوضعها في حقيبته و نهض لينصرف‏..‏ فسأله الآخر‏:‏ إلي أين تذهب؟‏!..‏ فأجابه الصديق‏:‏ إلي البيت‏ لقد اصطدت سمكة كبيرة جدا تكفيني‏..‏ فرد الرجل‏:‏ انتظر لتصطاد المزيد من الأسماك الكبيرة مثلي‏..‏ فسأله صديقه‏:‏ و لماذا أفعل ذلك؟‏!..‏ فرد الرجل‏..‏ عندما تصطاد أكثر من سمكة يمكنك أن تبيعها‏..‏ فسأله صديقه‏:‏ و لماذا أفعل هذا؟‏..‏ قال له كي تحصل علي المزيد من المال‏..‏ فسأله صديقه‏:‏ و لماذا أفعل ذلك؟‏ فرد الرجل‏:‏ يمكنك أن تدخره وتزيد من رصيدك في البنك‏..‏ فسأله‏:‏ ولماذا أفعل ذلك؟ فرد الرجل‏:‏ لكي تصبح ثريا‏..‏ فسأله الصديق‏:‏ و ماذا سأفعل بالثراء؟‏!‏ فرد الرجل تستطيع في يوم من الأيام عندما تكبر أن تستمتع بوقتك مع أولادك و زوجتك‏..‏
فقال له الصديق العاقل‏ هذا هو بالضبط ما أفعله الآن و لا أريد تأجيله حتي أكبر و يضيع العمر‏..‏ رجل عاقل‏..‏ أليس كذلك‏!!‏
يقولون المستقبل من نصيب أصحاب الأسئلة الصعبة، و لكن الإنسان ـ كما يقول فنس بوسنت ـ أصبح في هذا العالم مثل النملة التي تركب علي ظهر الفيل‏..‏ تتجه شرقا بينما هو يتجه غربا‏..‏ فيصبح من المستحيل أن تصل إلى ما تريد‏..‏ لماذا؟ لأن عقل الإنسان الواعي يفكر بألفين فقط من الخلايا، أما عقله الباطن فيفكر بأربعة ملايين خلية‏.‏
وهكذا يعيش الإنسان معركتين‏..‏ معركة مع نفسه و مع العالم المتغير المتوحش‏..‏ و لا يستطيع أن يصل إلي سر السعادة أبدا‏.‏
يحكى أن أحد التجار أرسل ابنه لكي يتعلم سر السعادة لدى أحكم رجل في العالم‏..‏ مشي الفتى أربعين يوما حتي وصل إلى قصر جميل علي قمة جبل‏..‏ و فيه يسكن الحكيم الذي يسعي إليه‏..‏ و عندما وصل وجد في قصر الحكيم جمعا كبيرا من الناس‏..‏ انتظر الشاب ساعتين حين يحين دوره‏..‏ انصت الحكيم بانتباه إلي الشاب ثم قال له‏:‏ الوقت لا يتسع الآن و طلب منه أن يقوم بجولة داخل القصر و يعود لمقابلته بعد ساعتين‏..‏ و أضاف الحكيم و هو يقدم للفتى ملعقة صغيرة فيها نقطتين من الزيت‏:‏ امسك بهذه الملعقة في يدك طوال جولتك و حاذر أن ينسكب منها الزيت‏.‏
أخذ الفتى يصعد سلالم القصر و يهبط مثبتا عينيه علي الملعقة‏..‏ ثم رجع لمقابلة الحكيم الذي سأله‏:‏ هل رأيت السجاد الفارسي في غرفة الطعام؟‏..‏ الحديقة الجميلة؟‏..‏ و هل استوقفتك المجلدات الجميلة في مكتبتي؟‏..‏ ارتبك الفتى و اعترف له بأنه لم ير شيئا، فقد كان همه الأول ألا يسكب نقطتي الزيت من الملعقة‏..‏ فقال الحكيم‏:‏ ارجع وتعرف علي معالم القصر‏..‏ فلا يمكنك أن تعتمد علي شخص لا يعرف البيت الذي يسكن فيه‏..‏ عاد الفتى يتجول في القصر منتبها إلي الروائع الفنية المعلقة علي الجدران‏..‏ شاهد الحديقة و الزهور الجميلة‏..‏ و عندما رجع إلي الحكيم قص عليه بالتفصيل ما رأي‏..‏ فسأله الحكيم‏:‏ و لكن أين قطرتي الزيت اللتان عهدت بهما إليك؟‏..‏ نظر الفتى إلي الملعقة فلاحظ أنهما انسكبتا‏..‏ فقال له الحكيم‏:‏
تلك هي النصيحة التي أستطيع أن أسديها إليك سر السعادة هو أن تري روائع الدنيا و تستمتع بها دون أن تسكب أبدا قطرتي الزيت‏.‏
فهم الفتى مغزى القصة فالسعادة هي حاصل ضرب التوازن بين الأشياء، و قطرتا الزيت هما الستر والصحة‏..‏ فهما التوليفة الناجحة ضد التعاسة‏.‏
يقول إدوارد دي بونو أفضل تعريف للتعاسة هو انها تمثل الفجوة بين قدراتنا و توقعاتنا‏..‏
اننا نعيش في هذه الحياة بعقلية السنجاب‏..‏ فالسناجب تفتقر إلي القدرة علي التنظيم رغم نشاطها و حيويتها‏..‏ فهي تقضي عمرها في قطف و تخزين ثمار البندق بكميات أكبربكثير من قدر حاجتها.
(منقول بتصرف)

Post: #61
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-10-2005, 07:34 AM
Parent: #53

نادر.. غايته شايفاك قاصدني عديل كده .. تصدّق.. انا في فترة من فترات حياتي فقدت معنى الاستمتاع بالحياة تماماً... كنت جارية جري شديد ورا القراية والشهادات.. فجأة لقيت نفسي مليانه شهادات.. لكن الخبره وين؟ الشي ده خلاني في البداية (أدبرس) وبعد شويه .. تجيني حالة بتاعت لا مبالاة.. ومن ثم .. عملت تغيير كامل في الخطة.. واديت نفسي فرصه.. حسي لي سنه ونص بخطط بس ...

بنتفاهم في الموضوع ده بي مهله.. لكن.. نيتك واصله .. وعارفاك داير البوست يرجع بعد ما غتس في الصفحة التاسعه..

ما حكيت ليكم سبب الغياب؟ طبعا قبل كم يوم كده جانا ود خالتي ترانيزت مسافر ماليزيا.. ود خالتي ده والده اتوفى قبل اقل من شهر كده... وصوله كان فتح لبيت العزا والمواساة مره اخرى.. (فأظهرته ليهم شويه مهارات ناتجه من البوست ده).. لكن بس أسألوني من سلطه الاسود الباقي ما ليكم بيهو دعوة...

اها.. فضلت كم يوم بعالج في آثار الجريمه... .. حجوجي ما جايه قريب؟

Post: #54
Title: Re: عشه مبارك، تماضر، تراجي، منى خوجلي.. النبي خسيمكن
Author: bushra suleiman
Date: 06-07-2005, 05:44 AM
Parent: #1

سلام يامريم
انا غايتو بديكى وصفة العصيده بى الزبادى لانى عارفا كويس
كوره زبادى وتكبيهافى حله كبيرة وتختيها فى النار وتزيدى ليها شويه مويه.. وبعد داك تبدى تكبى فيها الدقيق شويه شويه مع الخلط المستمر لحدى ما الخلطه تصبح متماسكه وتنزليها من النار وتكبيها فى الطبق وتخليها تبرد تبقى متماسكه..ماتنسى تمسحى الطبق بشوية زيت لتسهيل افراغ العصيده من الطبق
انفع شيف يا جماعه

Post: #58
Title: Re: عشه مبارك، تماضر، تراجي، منى خوجلي.. النبي خسيمكن
Author: Muna Khugali
Date: 06-09-2005, 02:18 AM
Parent: #54

مـريـم إنت ويـن?
أوعـي تكـون "كـفالله الشـر" حصـلت ليك حـاجـة مـن التجـارب العـجـيبة دي!

مـني عـوض خـوجـلي

Post: #59
Title: Re: عشه مبارك، تماضر، تراجي، منى خوجلي.. النبي خسيمكن
Author: abuguta
Date: 06-09-2005, 02:48 AM
Parent: #58

بت الحسين بالصورة دى انتى بتسوقى فى نفسك
قايتو انا شايف الطلبات حتكتر..عليك سجيمان قال ام الخير ما بتعرف تطبخ
شفتى سوقك بعمر كيف...والله بوست جميل بجد كدا...اسى انا بفطر بلحمة مفرومة..
وبتذوق فى كنش تماضر

انا بعرف اعمل بيض فى المكوة...مرة ماشى الكلية والغاز قاطع..وقميصى غير مكوى
كويت القميص اها الجوعة حرقتنى..مشيت جبت بضتين..خليت المكوة سخنت..مسحتها بحبة زيت
وكسرت فيها البيض قلبتو على الجنب التانى...حشيتو فى الاسلايت ومشيت الكلية
وانا راكب فى الموتر..بقيت اضحك فى نفسى ..على الحركة القلبت فيها هوبااااااااااا
ها ها ها ها ...
ولقدام

Post: #64
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-10-2005, 07:44 AM
Parent: #59

Quote: بت الحسين بالصورة دى انتى بتسوقى فى نفسك
قايتو انا شايف الطلبات حتكتر..عليك سجيمان قال ام الخير ما بتعرف تطبخ

اسوّق لنفسي... ههع ... قال اسوق قال...

Quote: الحالة الاجتماعية: Engaged

انا شايفاك بتشوت فاولات كتير الايام دي.. .مالك معاي؟

انت وزولة غايته لافين شمين...

بجيكم صاده..

بنت الحسين

Post: #63
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-10-2005, 07:36 AM
Parent: #58

منى خوجلي.. تسأل منك العافية بت مُحمَد حسن .. ... انا بخير... بس شغاله نظافه شديده الليله... ظهري اتقسم النص... ياختي الشي ده أصله ما بكمل.. شي قش ومسح وطبيخ وغسيل عده... !

بنت الحسين

Post: #62
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-10-2005, 07:35 AM
Parent: #54

بشرى سليمان.. ماشاء الله والله.. لقيتك بتعرف.. (اب سنينه يضحك على اب سنينتين)... رأيك شنو أجرب وصفتك ولا وصفة منى خوجلي... غايته فكر كويس قبل تجاوبني عشان كان طلعت كعبه بقول ده انت..

شكرا ليك على المشاركة

بنت الحسين

Post: #65
Title: Re: عشه مبارك، تماضر، تراجي، منى خوجلي.. النبي خسيمكن
Author: bushra suleiman
Date: 06-10-2005, 11:09 AM
Parent: #1

جربى الاتنين مع بعض عشان كان طلعت كعبه نقول حقتك

Post: #68
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-11-2005, 03:29 AM
Parent: #65

بشرى.. تنط يا كبير.. لا خلاص.. انا اساسا ابوي ما بحب العصيده... لو عملتها ليهو بي كافيار ما حياكلها لي..

Post: #66
Title: Re: عشه مبارك، تماضر، تراجي، منى خوجلي.. النبي خسيمكن
Author: نادر
Date: 06-11-2005, 01:43 AM
Parent: #1

تعرفي يا مريم أنا برفع في البوست ده ليه ؟؟

لوووووول عايز وصفة العدس الصاح ... زمان كنت (مكجن) العدس ده وساميهو دفاع شعبي بس فجأة كده بدون مقدمات بقيت (بحبو حب شديد) ... العدس طبعا خشم بيوت بس عندنا زول غتيت كده بسويهو وأنا مافي في البيت قدر ما أسألو عن الوصفة يقول لي لو علمتها ليك حتستغنو مني في بيت العزابة ده وممكن تطردوني عشان ضيوفي كتار وإنتو زهجانين مني ...
يلا أدوني وصفة سحرية وبجيب قلمي وورقتي ...

Post: #69
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-11-2005, 03:39 AM
Parent: #66

نادر.. ما عرفتك لكن.. حسي ترفعه لي كل مره عشان العدس..اطلب ليك شي (سمح).. انا بالنسبة لي العدس ده أكل أهل الجنة.. اجمل أكله في الدنيا...انا برضه بحبه شديد... شوف يا سيدي...

المقادير
عدس أصفر.. (حلوه أصفر دي).. لكن جد في عدس أخضر، داك بستعملوهو في الكشري بتاع المصريين (حصل ضقته؟ داك خطر عديل كده، بشرحه ليك المره الجايه)
بصله كامله.. ثوم .. فلفل.. ملح.. مرقه ماجي (وفي بعض الروايات.. جزرة)...

الخطوات.. تقوم تغسل العدس (ما تخته بي وسخه)... انا عادة بخته في مصفى كبير.. وبكب فيه مويه.. بعداك.. تخته في حلة بريستو.. وتكب فيهو مويه.. وترمي بطلتك ديك فيهو.. والجزره (بعد ما تنظفها).. وتقفل الحلّة .. خليها تصفّر مرتين.. وبعداك اقفل عليها النار... (انا بستخدم cooker كهرباء، عشان كده بظبطها كده)... اها.. تخليها على نارها ديك فتره.. وتجي تفتح الحله بعد ما تبرد... أخلط العدس بي الخلاطه وصفيه بي المصفى .. عشان يطلع نظييييف.. اها.. يلا بعداك تقدر تملحه وتعمل ليهو فلفل..والماجي.. وآخر خطوة القدحه.. طبعا القدحه دي انا مدمناها عديل كده... اها.. كده امشي اطرد صاحبكم ده.. ..

بنت الحسين

Post: #67
Title: Re: عشه مبارك، تماضر، تراجي، منى خوجلي.. النبي خسيمكن
Author: Tragie Mustafa
Date: 06-11-2005, 02:41 AM
Parent: #1

العزيزه مريم

اولا انا اسفه ما رديت لك قبل الان

حقيقى الايام دى مشغوله ولا اقول مزروره افضل

قد احكى فى وقت اخر انه انا مزروره فى شنو.

لما شفت البوست اول مره ضحكت و قلت باين مريم دى

(كالمستجير من الرمضاء بالنار)

ما لاقيه الا تراجى تسألها فى الطبيخ!!!!!!!!!

اناحقيقى يا مريم ما بحب الطبيخ وقد اكون بطبخ

لكن ما بحبه ولا بحب سيرته بس بحب اكل هههههههههههههههههههههه.

لكن منى خوجلى طلعت رهيبه

وكمان تماضر بصصونا حاجات كثيره.

المهم يا ستى انا بعرف اعمل (الصياديه)

و(المخبازه) و ( المنسف) اذا عايزاهم قولى لى.

مره فى واحده قالت لى عامله فيها من دارفور وكيف ما بتعرفى العصيده!!!!!!!!!

قلت ليهاوعامله فيها سودانيه وما بعرف لا كسره لا قراصه لا لقيمات.......الخ)

هل هذا ينفى سودانيتى؟؟؟؟؟؟؟؟).

وزمان ما ضيع منى وليدات خالاتى الظراف الا عدم معرفتى بالعصيده!!!!

تراجى.

Post: #70
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-11-2005, 03:43 AM
Parent: #67

تراجي.. قلت لي ما بتحبي الطبيخ.. انا زاتي بعرف اعمل صيادية.. ومعاها سلطه طحينه.. تحلفي وتقسمي تقولي جايباها من المطعم.. وبعمل المقلوبة .. ومنسف وكبسه... بس للفائدة العامة.. أدينا وصفة الصيادية.. أكله جميله للبحبو السمك..

ومنتظره اعرف شمار الزرّه .. يا ربي زي زرتي دي كده؟؟؟

Post: #71
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-12-2005, 04:40 AM
Parent: #1

يا جماعه... ملاح الويكاب كيف؟ ما تقولوا للجاح..

غايته انا بعرف انه القصب بحرقوهو.. ورماده بقوموا يقطّروهو .. والراسب البفصل بكون ده ملح الويكاب wake up .. لكن كيف ببقى ملاح لايوووووووووق...

ورونا عشان ناكله بي عصيدة بشرى سليمان أو منى خوجلي

بنت الحسين

Post: #73
Title: Re: عشه مبارك، تماضر، تراجي، منى خوجلي.. النبي خسيمكن
Author: ABUKHALID
Date: 06-12-2005, 06:49 AM
Parent: #71

والله يامريم ده بوست لذيذ جدا
بس المهم في الموضوع نعرف الكمونية دي بسوها كيف
لانه تحت تحت عرفت لي واحد ببيع الكرشة وعايز استفيد من الوضع طبعا
المهم افيدونا بخصوص الكمونية وما عندكم مشكلة بعرف ارتق المصارين واعملها زي المسيرة بتاعت زمان ديك
شكرا علي الكلام الريحته سودانية وشمار

Post: #74
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-13-2005, 05:52 AM
Parent: #73

أبوخالد.. كيفنك؟ طبعا ما بنقدر نعيب ليك الكمونيه.. لكن آخر مرّه أمي عملت كمونيه في بيتنا كانت في بداية التسعينات في العقد الأخير من القرن الماضي.. ولأنها في البيت الوحيده البتاكلها، قررت (حرداً) ألا تعملها مرّه أخرى.. ولأني لما تعملها ممكن أصحى من النوم بي ريحتها وادخل الحمّام واطلع كل الفي معدتي... وما برضى أدخل ليها البيت كلو كلو.. ولأنه الجاح ومروان ومازن كمان ما بياكلوها.. ولأنها ما ادت محمود (ستة سنوات) الفرصة عشان يقرر.... فما عندي أي معلومات عن الأكله دي..

Quote: ارتق المصارين

ولا حأسألك الكلمة دي يعني شنو...

غايته الشي البتذكره، انه امي دي بتنضف الكمونيه لما تبقى colorless.. وبرضه ما بناكلها ليها...

دحين (يا امهات المروّة).. وروّا أخونا أبوخالد كيفن يسوي الكمونية..

بنت الحسين

Post: #75
Title: Re: عشه مبارك، تماضر، تراجي، منى خوجلي.. النبي خسيمكن
Author: نادر
Date: 06-13-2005, 07:19 AM
Parent: #1

برضو الكمونية دي
Quote: أكل أهل الجنة..
ومعاها الفسيخ تختاري براك أكل أهل الجنة؟؟

Post: #76
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-13-2005, 08:09 AM
Parent: #1

Quote: ومعاها الفسيخ تختاري براك أكل أهل الجنة؟؟

ابدعت فيها دي لكن... غايته الجنة عندناالأكل فيها "عدس"، وملاح "روب أبيض"... بتخارج معاك؟ الكمونية إلا من الجيران

Post: #77
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-14-2005, 02:09 AM
Parent: #1

زولة.. الليله غايته الله يسترنا معاك.. الذوّاقه حيكون مروان أخوي.. ده ما بختار الأكل بي هينة.. وما بعجبه شي بسهولة.. كده النشوف.. انا حأقدم الطبق (زي التقول اكل جد جد) مع شعيرية الشومن... دي شعيرية خفييييييييييييييييفة ... زي الشعر كده.. أكلة علمتنا ليها لوليتا الفلبيبنية الكانت شغاله في بيتنا قبل سنين لما كنا في الامارات.. علمتنا اكلة الشومن دي.. حاجة مبااااااااااااااااااااالغه.. بكتبها ليك كان ما دخلوني السجن الليلة بتهمت شروع في القتل...

Post: #78
Title: Re: عشه مبارك، تماضر، تراجي، منى خوجلي.. النبي خسيمكن
Author: محمد الامين احمد
Date: 06-14-2005, 12:31 PM
Parent: #1

Quote: الذوّاقه حيكون مروان أخوي.. ده ما بختار الأكل بي هينة.. وما بعجبه شي بسهولة.. كده النشوف.. انا حأقدم الطبق (زي التقول اكل جد جد) مع شعيرية الشومن... دي شعيرية خفييييييييييييييييفة ... زي الشعر كده..

يا جماعة فى زول/ه عندو/ها تلفون الزول ده عشان نحذروا

و اعتقد انو مروان بعد التجربة دى حيكون مؤهل جدا للاشتراك فى برنامج

Survivor

Post: #79
Title: Re: عشه مبارك، تماضر، تراجي، منى خوجلي.. النبي خسيمكن
Author: zola123
Date: 06-16-2005, 06:57 AM
Parent: #1

يا مريــــــــــــــم!!!!

الجداد طلع كيف؟
طمنيني عليكم
عشان ضميري ما يٍٍِِاًٌَُنبني

Post: #80
Title: Re: عشه مبارك، تماضر، تراجي، منى خوجلي.. النبي خسيمكن
Author: مريم بنت الحسين
Date: 06-16-2005, 07:25 AM
Parent: #1

والله بت حلال... حسسسسسي بغسل في عدتي اتذكرته اني ما كتبته ليك عن الجداد بي الصوص الأبيض (زي ما سمّاه مروان اخوي)... طلع رهيييييييييييييييييييييييييييييييييييييييييييييييييييييييب.... روعه عديل كده.. طبعا اثناء الطبخ عملت غلطه مطبعيه.. وكبيت ملح زائد شويه كده... لكن اختك بقت حريفه.. عالجته ليك الوضع.. وطلع في السليم.. حيكت ليك بملاح أم رقيقة العملته الليله؟؟ اسكتي ساااااااااااكت.. طلع عجب.. والله بابا بعد أكله مشى للجامعه كلم بيه جارنا وزميله في الشغل.. وجا قال لي رسلي ليهو منّو... يا بت بقيت خطيره عديل كده.. واسكتي ساي... قبل شويه، عندي باقي مُلاح أحمر، قلبته ليك هيلااااااااااهوب، نعيميه ما تدي الجنبك... يختي انا بقيت ما بتفات اصلي... هيع...

محمد الأمين.. وججججعو.. مروان عجبته الأكله.. ورسّل لي انا عند ناس كنت، رسل لي مسج بالموبايل انه الأكله طلعت خطره... والله ظريفه بشكل.. وسااااااااااااهله... عليك الله جربها .. ظريفه شديد خلاص...

بنت الحسين

Post: #81
Title: Re: عشه مبارك، تماضر، تراجي، منى خوجلي.. النبي خسيمكن
Author: saadeldin abdelrahman
Date: 06-16-2005, 07:32 AM
Parent: #1

يااااااااااه بوست حافل بالعضه ..ده انتو متعبين بشكل!

ذكرنى بالنص ساعه القبل فطور رمضان.

أنا ما بلهط حلل كوارعك...
بس بعاين بعيونييييييي

Post: #82
Title: Re: عشه مبارك، تماضر، تراجي، منى خوجلي.. النبي خسيمكن
Author: zola123
Date: 06-17-2005, 07:00 AM
Parent: #1

Quote: طلع رهيييييييييييييييييييييييييييييييييييييييييييييييييييييييب.... روعه عديل كده

حمد الله على السلامة,انا حسي ارتحت
صحتـــــــــــــــن وعافية

Quote: الجداد بي الصوص الأبيض (زي ما سمّاه مروان اخوي)...

قولي ليه اسمه غريب شوية
ما عندي حروف مجرية في الكيبورد فحقوم أكتبه بالعربي
اسم الأكلة: جومباش, تيفولوش تشيركا
يعني جداد بالمشروم والكريما

ولو بتعجبكم الأكلات ذات اللون أبيض باديكي وصفة شوربة المشروم والجزر