البحث عن يوم الولادة ..

في يوم السبت الفاتح من يوليو 1989م اي صبيحة انقلاب الانقاذ الذي كان في يوم الجمعة والامة مجتمعة في 30 يونيو كنا جلوساً في نادي الاساتذة بجامعة الخرطوم «نطقس» ونستبطن كنه التغيير السياسي الذي اجتاح السلطة في البلاد وكانت جريدة القوات المسلحة هي الوحيدة الصادرة وكانت صفحاتها الداخلية مخصصة للسير الذاتية لاعضاء مجلس قيادة الثورة «ولا نقول انقلاباً»، فصاح احد الاساتذة اثناء تصفحه لذلك الموضوع قائلاً: «يا جماعة لا حول ولا قوة الناس ديل - الاشارة للعساكر- كلهم من مواليد (1/1) الشكية لي الله ما فيهم واحد ولدوه في الراهبات ولا في واحد ولدوه في الدايات، خلاص دخلنا العصر الخلوي» فانفجر الحضور ضاحكين وقال احدهم: «يعني جماعة نميري كانوا متقدمين على الجماعة ديل فلو استثنينا النميري الباقين كلهم اولاد خرطوم وعندهم شهادات ميلاد حقيقية» فرد عليه آخر بأن النميري نفسه عنده شهادة ميلاد لانه مولود في ود نوباوي.
هذه الرمية تتناسب مع هذا اليوم (1/1) حيث ان جيلنا والجيل السابق له «عساكر الانقاذ» والجيل الذي يلينا من الخلويين كلنا من جماعة داية الحبل وشهادة التسنين التي تسمى شهادة تقدير العمر وتاريخ الميلاد في 1/1، من جانبي بذلت مجهوداً كبيراً لمعرفة تاريخ مولدي بالتحديد «اصلو كانت عندي نية احتفال بعيد ميلادي كما يفعل الناس الراقيين» ولكنني للاسف وحتى هذه اللحظة لم اوفق بل ويئست من الموضوع نهائيا فقد سألت والدتي عما تذكره عن ميلادي فقالت لي انني ولدت في السنة التي حج فيها والدي حجته الثانية اذ تركها واضعة بي ولم «تربعن» اي لم تكمل الاربعين يوما وقد تركني مريضاً في حالة ميئوس منها لدرجة انه عندما حضر من الحج لم يخصني بأية هدية كما فعل مع بقية اطفال الاسرة الممتدة.. فسألت الوالد عن تاريخ حجته الثانية فقال لي انه كان في السنة التي بني فيها الديوان اذ جاء الى قريتنا في تلك السنة اسطى ماهر وبني عدة «ديوانات» بالطوب الاحمر فذهبت الى احد اعمامنا الذي كان قد ابتني ديوانه مع ديواننا فقال لي ان ذلك تم في السنة التي توفي فيها احد اجدادنا فذهبت الى احد ابناء ذلك الجد وسألته عن السنة التي توفي فيها والده فوجدته «تفتيحة» بعض الشئ وقال لي انه يتذكر تماما انه قد جاءهم في مأتم والده سياسيون من الحزب الاتحادي يتقدمهم المرحوم خضر حمد للفاتحة فكانت الايام ايام انتخابات فتأكدت ان الانتخابات المقصودة هي انتخابات العام 1953م فاستطعت معرفة السنة وحصرت الشهر تقريباً وهو شهر ابريل وطمعت في تحديد اليوم فطلبت من الوالدة ان تتذكر اي ايام الاسبوع فاحالتني لعدد من نساء دفعتها في الولادة اي اندادي ولكنني لم اوفق.. وفي النهاية قررت تدليع نفسي واعتبرت نفسي من مواليد برج الثور«حتة واحدة» وبالطبع كل هذه المعلومات ظنية لانني ُمصر على انني نديد للآنسة كوندي وطالما ان الحكاية ظن في ظن فقد قررت ان تكون ساعة ويوم مولدها هو يوم مولدي، اما اليوم فهو عيد ميلادي الرسمي فقررت الاحتفال به في هذه المساحة.. الرجاء عدم السؤال عن السنة التي مُنحت فيها شهادة تقدير العمر فالابتعاد عن الستين داهية «بتاعت» المعاش اصبحت فائدتنا الوحيدة من شهادة تقدير العمر.. عليه انصح جيلي من مواليد 1/1 ان يجتهدوا في معرفة تاريخ ميلادهم الحقيقي ويبقوه سراً وان يختاروا بمحض ارادتهم يوما لميلادهم كما فعلت ويتمسكوا بشهادة التسنين.
وكل عام والجميع بخير

يقال أن أكثر من 60 في المائة من السودانيين لا يمتلكون شهادات ميلاد لمعرفة أعمارهم الحقيقية باليوم والشهر والسنة ؟!!

الحنكوشات عندنا في الجامعة كانوا بيعملو عيد ميلاد كل تلاتة شهور يا ناذر ..
أها ديل ما تبع ال60%؟

سلامات يا عمر الفاروق ...

أي زول بيعمل عيد ميلادة أكتر من مرة في السنة أو ما بيعملو نهائي تأكد قطع شك إنو من مواليد (داية الحبل) !!

وانت شن عرفتك بى داية الحبل؟

انت زاتك ود بتين؟
يا شافع اقعد فى الواطة دى
حبوبتك ما قالت ليك زى كلامى دا؟

ناذر
كل سنه وانت طيب
وسلام ومحبة للمعاك فى الاوضة قاعدين

أخي ناذر عامك سعيد وبخيت ومبكر بمولود ذكر شهادتوا أصلية قول آمين

لكن مع الأحتفاظ بحبلك المربوط في شجرة الجميزة الجنب بيت الخليفة

تعرف أنا عندي شهادة ميلاد أصلية باليوم والشهر والسنة لكن جوازي مستخرج بميلاد 1/1/1958عشان الفيزاء سائق عام

،،،،أبوقصى،،،،

سلامات يا سلمى ...

Quote: وانت شن عرفتك بى داية الحبل؟ انت زاتك ود بتين؟ يا شافع اقعد فى الواطة دى حبوبتك ما قالت ليك زى كلامى دا؟ ناذر كل سنه وانت طيب وسلام ومحبة للمعاك فى الاوضة قاعدين

وكل سنة وإنتي طيبة ..

داية الحبل وولادة الجبل والشجر كلها قصص وحكاوي سمعناها من حبوباتنا وشفنا جذء منها في المسلسلات التاريخية العربية ..

النسألك سؤال يا سلمى ..

قبل فترة بسيطة بس إكتشفت إكتشاف ما عارف مغزاو شنو !!

الوالدة قالت لي إني من دون أخواني ما إتولدت في الأوكات المعلومة للولادة !! حيث ذكرت أنني مكثت في بطنها تسعة أشهر وسبع وعشرون يوماً وبعد ذلك جئت للدنيا !!

لم أصدق وظننت أنها تبالغ ولكنها أكدت لي هذه المعلومة وهي قطعا متأكدة منها ..

دا معناتو شنو ؟ ؟

اها يا ناذر كلام والدتك معناهو انه الشلاقة العليك دى ما ساكت
انت ما شايف روحك شليق قدر شنو؟
ومن البداية خاتى (راى )
ـ مانى مارق اها شنو ليكم
ولمن جيت مارق جيت الشلاااااااااقة ماشة بقدمين
دا معناتو
والله اعلم زى مابقول شيخنا عبد الله الطيب رحمه الله

الله يخليك ويديك الفى مرادك

سلامات أبو قصي ...

Quote: أخي ناذر عامك سعيد وبخيت ومبكر بمولود ذكر شهادتوا أصلية قول آمين

آميييييييين ..

وأهم حاجة الشهادة الاصلية

Quote: لكن مع الأحتفاظ بحبلك المربوط في شجرة الجميزة الجنب بيت الخليفة

الحبل داك فكيناهو من سنة 43 بعد ولادة حبوبتي مباشرة ..

Quote: تعرف أنا عندي شهادة ميلاد أصلية باليوم والشهر والسنة لكن جوازي مستخرج بميلاد 1/1/1958عشان الفيزاء سائق عام

زي ناس كدة بعد ما إتعصرو في موضوع الخدمة الإلزامية مشو طلعو شهادات تسنين لزوم تقدير العمر لتصغير الأعمار تهربا من الخدمة الوطنية ...

بس أنـــــــــــا كمندان سابقا بالشرطة يعني مدتين خدمة طويلا من عمر الزمان
يعني مقدم أستقالة مامرفود خدمة تعسفي ولا حاجة محتفظ بحقي لسه يمكن نحن نرجع من تااااااااااني !!

،،،،أبوقصى،،،،

انه بوست بعيد مهوى القرط

اهنيك

-

أبو قصي ....

Quote: يمكن نحن نرجع من تااااااااااني !!

ولمن ترجع حا يطلبو منك شهادة ميلاد أصلية برضو ؟

دكتور محمد حسن ...

Quote: انه بوست بعيد مهوى القرط اهنيك

تسلم يا حبيب وخليك متابع .

وبما أن النساء عموما لا يبحن بأعمارهن الحقيقية ، فربماكانوا أسعد الجميع قديما بعدم وجود شهادات ميلاد أصلية أو تقديرية لهن !! إذ يمكن حينها أن يصغرن أعمارهن ما شاء لهن التصغير دون أن يجدن من يغالطهن !!

صنفرة :

دا كان زماان .. هسي وييييين مع المستشفيات وتسجيل المواليد الجدد إلكترونياً ..

اخي ناذر .. تحية طيبة :

لم تذكر مصدر هذا المقال وكاتبه؟؟؟

ودا لنك قديم من المكتبة :

غدا 21/8 عيد ميلادي .. وهذه قصتي مع أعياد الميلاد !!!!

بهاء عيسى ...

Quote: لم تذكر مصدر هذا المقال وكاتبه؟؟؟

يعني معقول الصورة الأنا خاتيها مع المقال دا ما عرفت صاحبا ؟؟!!

طيب خلينا من الصورة ...

أسلوب الكتابة بتاع الزول دا بيغبى علي زول ؟!!

هسي من دون ما أقول ليك إسمو متأكد أي زول عرف الكاتب منو .. لو ما من الصورة من الإسلوب ..

أما لو إنت ما متابع نوريك وننورك ...

الكاتب يا سيدي هو عبد اللطيف البوني أشهر كتاب الاعمدة في الصحف السودانية ..

ولو لسع ما عرفتو أمشي القوقل وأكتب فيهو عبد اللطيف البوني ...

صنفرة :

طوالي القوقل حا يجيبك للبوست دا ومنها تكون كبرت اللفة وعرفت الكاتب !!

عذرا اخي ناذر ..
لم اقصد شيء انا اطلعت علي المقال في الراي العام-حاطب ليل-
وعدت للمنبر وجدت المقال .. ولكن من ادبيات الاقتباس ولوسطر
ان يسبقه اسم صاحب المقال .. حقوق الملكية الفكرية قالت كدة


ولك الود والتقدير .. والمعذرة مرة اخري

سلامات بهاء ..

Quote: .. ولكن من ادبيات الاقتباس ولوسطر ان يسبقه اسم صاحب المقال

وأنا عشان خاطر الملكية الفكرية دي خطيت صورتو عديييييييل كدة مش إسمو بس !!

مشكور للتصحيح ..

كيف يا سلمى ..

Quote: اها يا ناذر كلام والدتك معناهو انه الشلاقة العليك دى ما ساكت انت ما شايف روحك شليق قدر شنو؟ ومن البداية خاتى (راى ) ـ مانى مارق اها شنو ليكم ولمن جيت مارق جيت الشلاااااااااقة ماشة بقدمين دا معناتو

هي تراها الشغلة شلاقة

أنا كنت مفتكرا عبقرية ولا معدل ذكاء فوق البنفسجي وكدة

ود عمي الأرباب ناذر
السلام كيمان ليك وللمعاك .. وكل سنة وإنت طيب ..
عندنا قريبتنا مشت الدكتور وكان معاها واحد قريبنا حقاني حبتين ..
الدكتور سأله عمرك كم ياحاجة ؟
قالت ليه [ كان 40 كان 41 ] ..
نطه قريبنا الحقاني : قال للدكتور أنا عمري 46 وأربعين ولمن ولدوني الحاجة دي كانت بتلعب مع البنوت .. يعني بالحساب كدي يكون عمره فوق الـ 50 ..
قريبتنا قالت ليهــو : يخمس قيـــــــــــــودك
تحياتي ،
أخوك/ خالد الأرباب

ياخ أنا جيت جارية قايلة في حالة ولادة بالجد وانو ......!!

ليمو كويسة طيب ؟!!

الأرباب أخوي

كل عام وإنت بخير ...

Quote: عندنا قريبتنا مشت الدكتور وكان معاها واحد قريبنا حقاني حبتين .. الدكتور سأله عمرك كم ياحاجة ؟ قالت ليه [ كان 40 كان 41 ] .. نطه قريبنا الحقاني : قال للدكتور أنا عمري 46 وأربعين ولمن ولدوني الحاجة دي كانت بتلعب مع البنوت .. يعني بالحساب كدي يكون عمره فوق الـ 50 .. قريبتنا قالت ليهــو : يخمس قيـــــــــــــودك

نادية عثمان ...

Quote: ياخ أنا جيت جارية قايلة في حالة ولادة بالجد وانو ......!!

شمارك عينة لكن

يديك العافية ...

أخونا في الله وفي المنبر ناذر

مساء الخير بتوقيت هلسنكي،،

دكتور البوني من الكتاب الجيدين في الصحافة السودانية،
سواء كتب جاداً أم ساخراً، وهو صاحب عمود يومي محبذ لدى
السادة القراء، وهو هنا يتناول ظاهرة سودانية مشهورة كانت
موجودة في أزمان غابرة وهي ظاهرة الولادة بعيداً عن المستشفيات
وعلى أيدي دايات غير مؤهلات (دايات الحبل)، حيث نجد إن معظم
السودانيين الذين ليس لديهم شهادات ميلاد تمت ولادتهم على أيدي
دايات الحبل، الأمر الذي جعل عيد ميلاد أغلبية الشعب السوداني هو
الأول من يناير من كل سنة، لكنني محتار في مسألة أن عيوننا عسلية
دي، المدونة في أوراقنا الثبوتية، هل هناك لون عسلي؟ أم أنهم يقصدون
أن عيوننا تشبه العسلية؟ ولماذا اختاروا العسلية دون غيرها من بقية
المشروبات الروحية البلدية؟ وهل صفة العيون العسلية دي تنطبق حتى على
المولانات والشيوخ وأئمة المساجد؟، لأنني أرى أنه من غير اللائق أن نصف رجل
دين وقور بأن عيونه عسلية، وكذلك ليس من الدقة بأن نصف رجل عيونه حمراء
شرارة بأن عيونه عسلية، لأن في ذلك انتقاص من رجولته التي استمداها من كون
أن عيونه حمراء.
وبمناسبة الولادة دي أحكي ليك نكتة طريفة:
أخوي عندو صاحبو حلفاوي بيكره نميري كراهية عمياء والغريبة سمى ولدو
(نميري)، فمرة أخوى سمعو بيشتم في نميري فقال ليهو: يا اخي إنت راجل
دجال وبس، طيب لما إنت بتكره نميري سميت ولدك نميري ليه؟
رد عليهو الحلفاوي ببرود وقرفة شديدة: والله تعرف يا نور الدين الولد ده
من ولدوهو جيت عاينت في عيونو عرفتو بطلع (دين حجر) عشان كده سميتو نميري..

والوالدة يا ناذر ما عاوزة تقول ليك القالو الحلفاوي في ولدو
لكن المفروض تفهمها طايرة..

كيفك يا نصر الدين ..

Quote: دكتور البوني من الكتاب الجيدين في الصحافة السودانية، سواء كتب جاداً أم ساخراً، وهو صاحب عمود يومي محبذ لدى السادة القراء، وهو هنا يتناول ظاهرة سودانية مشهورة كانت موجودة في أزمان غابرة وهي ظاهرة الولادة بعيداً عن المستشفيات وعلى أيدي دايات غير مؤهلات (دايات الحبل)، حيث نجد إن معظم السودانيين الذين ليس لديهم شهادات ميلاد تمت ولادتهم على أيدي دايات الحبل، الأمر الذي جعل عيد ميلاد أغلبية الشعب السوداني هو الأول من يناير من كل سنة،

لاحظ يا نصر الدين ذكاء البوني في المقال دا ..

وكأنو داير يلفت نظر المسئولين للإلتفات لقضية مواليد (دايات الحبل) أو الإهتمام بالإحصاء للمواليد الذين ربما لا يزال بعضهم يأتون للدنيا في الأرياف البعيدة دون أن نجد من يتولى تسجيل هؤلاء لغرض ضمهم للإحصاء العام لمواطني السودان ..

مع ملاحظة قرب ميعاد الإحصاء السكاني ..!!

Quote: لكنني محتار في مسألة أن عيوننا عسلية دي، المدونة في أوراقنا الثبوتية، هل هناك لون عسلي؟ أم أنهم يقصدون أن عيوننا تشبه العسلية؟ ولماذا اختاروا العسلية دون غيرها من بقية المشروبات الروحية البلدية؟ وهل صفة العيون العسلية دي تنطبق حتى على المولانات والشيوخ وأئمة المساجد؟، لأنني أرى أنه من غير اللائق أن نصف رجل دين وقور بأن عيونه عسلية، وكذلك ليس من الدقة بأن نصف رجل عيونه حمراء شرارة بأن عيونه عسلية، لأن في ذلك انتقاص من رجولته التي استمداها من كون أن عيونه حمراء.

والله موضوع العيون العسلية دا محير حبتين

ياربي وصف العيون باللون دا حكرا على مضابط توصيفات السودان بس ولا برضو موجود في دول تانية ؟!!

Quote: وبمناسبة الولادة دي أحكي ليك نكتة طريفة: أخوي عندو صاحبو حلفاوي بيكره نميري كراهية عمياء والغريبة سمى ولدو (نميري)، فمرة أخوى سمعو بيشتم في نميري فقال ليهو: يا اخي إنت راجل دجال وبس، طيب لما إنت بتكره نميري سميت ولدك نميري ليه؟ رد عليهو الحلفاوي ببرود وقرفة شديدة: والله تعرف يا نور الدين الولد ده من ولدوهو جيت عاينت في عيونو عرفتو بطلع (دين حجر) عشان كده سميتو نميري..

Quote: والوالدة يا ناذر ما عاوزة تقول ليك القالو الحلفاوي في ولدو لكن المفروض تفهمها طايرة..

والله يا نصر الدين في حاجات كتيرة الزول بيفهما وهي طايرة لكن جنس كلام الوالدة البيخش في العضم دا الزوا أحسن ليو يعمل مجنون ورايح ويحكها حبتين