نـادي الأسـرة بالـخـرطـوم (3 ) !!!

يعتبر نادي الاسرة والذي يقع في قلب حي الخرطوم ثلاثة العريق واحداً من اهم المعالم التاريخية والسياحية بمنطقة الخرطوم الكبرى ، إذ انه بجانب ما يمتاز به من موقع ربط بين عدد من الاحياء والطرق الرئيسية ، يحتل مساحة شاسعة جدا من حيث المساحة قد تصل إلى 25 % من مجمل مساحة حي الخرطوم ثلاثة ..

جميع الطرق المسفلتة والمحيطة بالنادي لا تهدا أبداً من حيث حركة السيارات والناس إذ أن الشخص القادم من مناطق الكلاكلات او جنوب الخرطوم عموماً والقاصد أحياء الخرطوم شرق أو الخرطوم بحري ، لا بد عليه ان يخترق حي الخرطوم ثلاثة ويتخذ نادي الأسرة كدوار لمواصلة طريقه ..

منذ أن شبت اعيننا وتفتحت في هذه الحياة وجدنا أمامنا هذا النادي الضخم والذي به جميع المناشط الرياضية والثقافية والإجتماعية ، كانت الأسر في ذلك الزمان تتجمع في نادي الأسرة منذ الرابعة عصراً ولا تخرج منه إلا في العاشرة أو الحادية عشر ليلاً ، وكان الاباء والامهات مطمئنون جداً على ابنائهم وبناتهم حين يذهبون للنادي لقضاء أوقاتهم وللمتعة والنزهة البريئة ، حيث أن النادي في ذلك الزمان كانت به جميع المناشط وحتى النادرة منها والتي لا توجد في معظم النوادي المشابهة ، كانت توجد في نادي الأسرة مثل صالة ( الإسكواتش ) المبنية على طراز حديث ، بجانب ذلك كان النادي يحتضن صالتين لتنس الطاولة وصالة للبلياردو وصالة للشطرنج وملعبين كبيرين لكرة القدم وحلبتين للملاكمة والمصارعة وميادين لكرة السلة وكرة الطائرة والتنس الأرضي بجانب صالة للسينما وحوض للسباحة ومسرحين كبيرين تعرض فيهما مختلف المناشط والفعاليات الثقافية والادبية ..

كل ذلك كان متاحاً لسكان الحي في الزمن الجميل وكان نادي الخرطوم ثلاثة شعلة من النشاط وقبلة لمختلف سكان الأحياء الأخرى ، ويأبى النادي إلا ان يحتضن الجميع دون فرز أو تفرقة ..

ولكن ماذا حدث الان ؟! وأي لعنة اصابت هذا النادي العريق !!؟

لم يكن نادي الأسرة في فترة الديمقراطية الثالثة يخلو من النشاط السياسي حيث كانت تقام به مختلف الفعاليات الحزبية مثل الندوات والمحاضرات والليالي الجماهيرية وغيره ، ولعل الحزب الشيوعي السوداني كان له الفضل في تحريك تلك الفعاليات حيث كانوا هم الاكثرية والادق تنظيماً وقدرة على إدارة النشاطات المختلفة داخل النادي مما اهلهم كي يحوذوا على إحترام واصوات الجميع ..

وعندما حدث إنقلاب الإنقاذ لم ينس قادته أن جماهير الخرطوم ثلاثة والأحياء المجاورة صوتت لمرشح الحزب الشيوعي عز الدين علي عامر مما اهله للفوز بهذه الدائرة ، ولما كان أهل الحكم الجديد يكنون كراهية واضحة وأحقاد بينة على الحزب الشيوعي ، كان لا بد لهم من الإنتقام من الجماهير التي صوتت لمرشح الحزب وقدرت أن ذلك لا يتم إلا بحرمانهم ومصادرة ملتقى تجمعهم .. نادي الاسرة !!

فمنذ أوائل التسعينات حدثت هجمات شرسة من مختلف أجهزة الجكم على النادي بغرض تشريد رواده وكسر شوكته ، فتم تغيير إسمه في إحدى المرات وتقييد العضوية بأن جعلتها حكراً للأسر ، ثم أصبح في فترة أخرى داراً لأحد مكاتب وزارة الشئون الإجتماعية ، وفي فترات أُخر تقلب النادي وتنازعته شتى الجهات من مقر لمكاتب الامن إلى مقر لتدريب قوات الدفاع الشعبي إلى مركز لتدريب الكوادر القيادية في المؤتمر الوطني ، وفي تلكم الظروف نفرت الأسر منه تماماً وصار الشباب يقضون اوقاتهم امام البقالات وتحت اعمدة الإضاءة بالأحياء وفي صدورهم غضب مكتوم لشعورهم بالظلم والضيم والحرمان من متنفس عزيز عليهم ..

وقبل عدة سنوات حدث إجتياح مسعور لنادي الاسرة من قبل بعض المتنفذين في السلطة من تجار الفرص ، حيث لم يجدوا مكانا أفضل من هذا النادي كي يحولوه إلى بقرة حلوب لملء جيوبهم من أموال ليست لهم ، فتم تمزيق النادي إلى أشلاء متفرقة ، حيث أُقتُطع جذء منه وتم إيجاره لصالح كلية البيان كمنشئات وقاعات لها !! وجذء أخر تم منحه لـ إتحاد الفنون التشكيلية (إن صحت التسمية) وجذء أيضاً مُنح كمقر لمجلة (الخرطوم الجديدة) وجذء أكبر تستخدمه الان وزارة الشئون الإجتماعية بولاية الخرطوم مكتب رئيسي لوزيرها !!

الان نادي الاسرة بكامله تحول إلى مقر للخراب ، تنمعق فيه البوم وتتكاثر فيه الكلاب الضالة والغربان والقطط ، لا يؤمه أحد ولا يدخله إلا العاملين به او الموظفين في أجهزة الدولة به،، والاخطر من ذلك ......

قبل عدة اسابيع قامت الجهات المختصة بتسليم إنذارات إلى جميع المنازل المحيطة بالنادي تعطيهم مهلة معينة لإزالة فرندات الحصير التي بناها بعض من اصحاب المنازل على الشارع امام بيوتهم من اجل التوسعة او إستقبال الضيوف !! ولما استفسر الاهالي عن ذلك إتضح لهم ان نادي الاسرة بكامله قد تم بيعه لاحد المستثمرين الاجانب وهو في طريقه لإنشاء فندق ضخم ومنتجع سياحي بالنادي ومن اجل ذلك لا يريد تشوهاً في الشوارع المحيطة بالنادي كي تكون جاذبة للزبائن والسياح !!

أما أبناء وأهل الحي ممن يدركون اهمية النادي وعاصروا عهده الذهبي فقد اعيتهم الحيلة تماماً وليس بأيديهم شيئاً لفعله سوى الدعاء لله بأن يرد لهم ناديهم ولو بعد حين ، وحتى يأتي ذلك الحين فهم يركنون إلى إجترار الذكريات الجميلة التي عاشوها في جنبات وميادين هذا النادي الذي لا ينكر أي خرطومي فضله عليه وتكوينه لشخصيته سواء اكانت رياضية او ثقافية أو حتى إجتماعية مرموقة ..

صنفرة :

كنت أتمنى أن يكون بيننا الان الاخ خالد الحاج صاحب منتدى سودانيات لسماع بعضاً من ذكرياته حول النادي ، وقد كنت أراه في عهد نادي الاسرة الذهبي شعلة من النشاط والحيوية وهو يتحرك ويشرف على الكثير من الانشطة الثقافية والرياضية والإجتماعية التي كانت تقام فيه.. ولعله الان يجتر الكثير من ذكريات أيامه تلك !!

الصورة التالية توضح حجم النادي وموقعه بالنسية لحي الخرطوم ثلاثة :

الله ياناذر تلك ايامآ مضت وما ظنيتها راجعه تاني ايام الدورات الرمضانيه والمعارض لمت الناس بعد المغرب, علي البواب المريخابي علي السكين, قرشـي وتمارين نادي الخرطوم3 قبل الصعود للدرجه الاولي,الشيوعين وندواتهم التحت تحت,حفلات اهلنا الاثيوبين والاريترين العمرة والحج, بروفات العروض المسرحيه التي كانت تقام علي ارض حوض السباحه,صاله تنس الطاوله وناصر الخليفه ويونس وباقي الشباب,البلياردو, الاسكواتش,تعليم الخياطه,ميدان السله,الروضـه, وحيد بتاع الايسكريم,زيتونـه,العروبـه,السينما,السوق يااااااااااااااة ياناذر واصل وبرجع ليك بالاسماء والاماكن والذكريات الحلوة.
تحياتي للاسرة الكريمه والجميع بي 3

الأخ ناذر السلام عليكم
رمضان كريم
-------------------

Quote: قبل عدة اسابيع قامت الجهات المختصة بتسليم إنذارات إلى جميع المنازل المحيطة بالنادي تعطيهم مهلة معينة لإزالة فرندات الحصير التي بناها بعض من اصحاب المنازل على الشارع امام بيوتهم من اجل التوسعة او إستقبال الضيوف !!

طيب تخيل يا ناذر قرى في
ريف كسلا وأحياء فقيرة في تخوم المدينة
رواكيب وصرايف من القش وزرايب
من شوك الموسكيت للمعز والضأن .
وفجأة كدة من غير تسليم إنذارات و((لا بطيخ))
يتم جعلها أهدافا عسكرية بواسطة قيادات التجمع
والتحالف وياسر عرمان ووووو...إلى نهاية القائمة الإجرامية الطويلة.
فجأة كده تجيك الدانات وتنهال عليك القذائف من كل
جانب ويقتل من يقتل وينجو من ينجو؟؟
وتسقط الفتيات في أسر جيش الفاتحين؟؟؟
------------------------
بكرة أجيب ليك منظر من شقلة الفتيحاب
تقديري
------------------------------

صورة أخرى أكثر وضوحاً

(لا حظ حدود الحي وموقع النادي الوسطي تماماً والطرق الرئيسية التي تمر به او بالقرب منه) ..

المربع على أقصى اسفل اليمين هو حديقة القرشي وهي عبارة عن متنزه اخر بالحي أصابه الخراب ايضاًوقد أتحدث عنها في بوست منفصل ..

الحبيب ناذر لك التحية
لقد زكرتني بالايام الجميلة وفرقة السودانيين ....والحفلات والعدادات الماخمج...في هذة النادي العملاق
لك الشكر صديقي العزيز لنا الكثير من الزكريات الجميلة في هذة النادي العملاق .......................

يا نادر
سلام
و الله ذكرتنا أيام جميلة
الخرطوم الجديدة و حصص الرياضة
ودك الحصص
كانت لنا أيام

Quote: يا نادر سلام و الله ذكرتنا أيام جميلة الخرطوم الجديدة و حصص الرياضة ودك الحصص كانت لنا أيام

يا سلام يا ناذر ياخي مالك تقلب لينا في المواجع
الكلام القالوا القرضابي دا ياهو حالي في الخرطوم الجديدة

الأخ نازر
اشكرك فقد ارجعتنا الى بعض الزمن الجميل.
نادى الأسرة يانازر قبل ان يكون نادى الأسرة كان يسمى (ميدان عبدالمنعم) وبه كانت تقام ليالى المولد النبوى الشريف قبل انتقالها لميدان الليق وكانت تلعب فرق رابطة الخرطوم 3 .وكانت تتوسطه قهوة المرحوم عبده دهب حسنين وما ادراك من هوعبده دهب .
ومن هذا الميدان خرجت جنازة القرشى شهيد اكتوبر الأول ومن هذا الميدان انداحت ثورة اكتوبر حتى اسقطت دكتاتورية 17 نوفمير .
هل عرفت الآن لماذا يريد الأنقاذيون طمس معالم وتاريخ ذلك الميدان الأشهر فى السودان؟

واصل يانازر مع تحياتى .

الاخوه الكرام ،،
السلام عليكم ،،
حقيقة لدى مداخلة بسيطة بخصوص نادي الاسرة 00
فاذا تابعنا وضع وحالة النادي من فترة طويلة ، نجد ان الترديء والاهمال اصاب النادي بكل منشأته منذ السنوات الاخيرة من فترة حكم الرئيس (النميري) ، ففي عهده عاش النادي قمة مجده ونجاحه ، ورغم ان الكثير من نشطاته متعلقة بالنظام واحتفالاته ، إلا انه كان دائما يفتح ابوابه لكل الاطفال والجمعيات ورياض الاطفال والمدارس لتقيم به ما تشاء من نشاطات 00
فاذن الاهمال الذي لحق بالنادي ونشاطاته قد بدأ منذ اوائل الثمانينات وتتالى الاهمال خلال فترة الديمقراطية الثالثة ثم استمر التدهور حتى الان 00
وتحياتي ،،

ود الحاج سلامات ..

Quote: الله ياناذر تلك ايامآ مضت وما ظنيتها راجعه تاني ايام الدورات الرمضانيه والمعارض لمت الناس بعد المغرب, علي البواب المريخابي علي السكين

أظنك طبعاً قاصد علي حران المريخابي الكبير .. نحنا من ما قمنا ولحدي (ماقمنا من البلد) وجينا راجعين الزول دا ماشاء الله لسة في مكانو ، وهومعلم بارز جداً ومن الشخصيات الساهمت جداً في تاطير علاقة الأسر بالنادي ..

Quote: ,حفلات اهلنا الاثيوبين والاريترين

ذكرتني لمن الارتريين كانوا بيعملوا إحتفالات الثورة في مسرح النادي وبيختوا أعلامم العاملة زي أعلام نادي المريخ وكنا بنجي الحفلات دي مخصوص عشان لمن الحفلة تخلص نشيل الاعلام ونخش بيها الإستاد للتشجيع ..

Quote: وناصر الخليفه ويونس وباقي الشباب

ومحمد صلاح وايمن هاشم .. مالك ياخ !!

Quote: وحيد بتاع الايسكريم

دا المعلم الوحيد اللسة ما إتغير ولسة كعهدو الزمان بيستقبل المحبين والمجكسين .. والماعندهم موضوع يتلموا قدامو ويشاغلوا بنات الناس

الله يسلمك وتحيات الاسرة وسلامي لي حسن حجار .

ناذر سلامات

Quote: أظنك طبعاً قاصد علي حران المريخابي الكبير

ياهو زاتو عليك عاطر التحايا ليهو.
ياناذر في البال اسألــه عن نااااااااااس كتيرة,ودحجار والاسرة يبلغك السلام

الأستاذ نادر السوداني ..

Quote: لقد زكرتني بالايام الجميلة وفرقة السودانيين ....والحفلات والعدادات الماخمج...في هذة النادي العملاق لك الشكر صديقي العزيز لنا الكثير من الزكريات الجميلة في هذة النادي العملاق .......................

على ذكر الحفلات والبروفات ..

فترة من الفترات كان الفنان زيدان إبراهيم هو سيد الساحة بدون منازع وكان في الفترة ديك فناني المفضل (الفترة ديك ما هسي) !! وكان نفسي اشوفوا قدامي شوف العين وحصل إنو تم إعلان لي حفلة بي زيدان في النادي .. فرحت جداً وطبعا كنت صغير الزمن داك .. دبرت لي خمسة جنيهات قيمة التذكرة ومشيت النادي وأنا فرحان جداُ حا اشوف زيدان إبراهيم .

كانت الحفلات بتبدأ متأخرة وتنتهي قريب الصباح .. وزيدان اتاخر ما جا وانا نمت في الكرسي وزي الساعة إتناشر جا والدي يفتش لي ولقاني نايم صحاني وطلعني برة واداني علقة اصلو ما حصلت

عرفت ليه زيدان إبراهيم ما فناني المفضل هسي !!؟

وبمناسبة الحفلات .. بتذكر إنو الفنانة حنان بلو بلو كانت برضو قابضة الجو الايامات ديك وكان نفسي أشوفا(كنت زول شواف زمان) ، وما كان عندي حق التذكرة ، فقمنا انا ومعاي كم واحد كدة من الفرد تلبنا السلك ولمى فينا واحد من المنظميم أدانا جلدة أصلو ماحصلت لكن بعد الجلدة خلانا نخش الحفلة وهيجنا ونسينا ألم الجلد

القرضابي ..
إنت الظاهر عليك دفعة!!

Quote: الله ذكرتنا أيام جميلة الخرطوم الجديدة و حصص الرياضة ودك الحصص كانت لنا أيام

تتصور انا حظي خلاني أقرأ المتوسطة في عبد المنعم والثانوية في الجديدة وطبعاً المدرستين فاتحات على النادي ، حصص الرياضة كانت طوالي في النادي ولمن تقفل معانا ونكون زايغين من الحصص ما في حتة قدامنا إلا النادي .. نخش جوة ونقعد (نمعِطْ) في النجيلة لمن مواعيد الحصص تنتهي ..

طارق جبريل ..

Quote: يا سلام يا ناذر ياخي مالك تقلب لينا في المواجع الكلام القالوا القرضابي دا ياهو حالي في الخرطوم الجديدة

الجديدة مدرسة عريقة جداً وكل النشاطات كانت مرتبطة بالنادي .. كرة القدم والكديت والبروفات الموسيقية والمسرحية بتاعت جمعية المدرسة ..

بس إنت ما اظنك دفعة

قلقو سلامات ..

Quote: الأخ نازر اشكرك فقد ارجعتنا الى بعض الزمن الجميل. نادى الأسرة يانازر قبل ان يكون نادى الأسرة كان يسمى (ميدان عبدالمنعم) وبه كانت تقام ليالى المولد النبوى الشريف قبل انتقالها لميدان الليق وكانت تلعب فرق رابطة الخرطوم 3 .وكانت تتوسطه قهوة المرحوم عبده دهب حسنين وما ادراك من هوعبده دهب . ومن هذا الميدان خرجت جنازة القرشى شهيد اكتوبر الأول ومن هذا الميدان انداحت ثورة اكتوبر حتى اسقطت دكتاتورية 17 نوفمير .

كلامك طبعاً صحيح ودا لقيناهو تاريخ قدامنا ..

وبالمناسبة لحدي هسي في يافطة قديمة معلقة في سور النادي مكتوب عليها ميدان عبد المنعم ، وفي ناس كتار من اهلنا الكبار بيطلقوا على النادي ميدان عبد المنعم وليس نادي الاسرة ..

Quote: هل عرفت الآن لماذا يريد الأنقاذيون طمس معالم وتاريخ ذلك الميدان الأشهر فى السودان؟

لن تطمس معالم وتاريخ النادي طالما في تواصل اجيال وحملة للتاريخ والتوثيق ، والمصيبة إنو الان في محاولة لتغيير بنية النادي الكلية عبر بوابة الاستثمار ، ويقال ان الحركة الشعبية تعترض على بيع النادي وتريده مقراً لها ؟!!!

يعني في الحالتين النادي حا يضيع !! لكن تاريخو واثروا ودوروا في ثورة أكتوبر موجود !!

الاخ ابو عبيدة ..

Quote: الاخوه الكرام ،، السلام عليكم ،، حقيقة لدى مداخلة بسيطة بخصوص نادي الاسرة 00 فاذا تابعنا وضع وحالة النادي من فترة طويلة ، نجد ان الترديء والاهمال اصاب النادي بكل منشأته منذ السنوات الاخيرة من فترة حكم الرئيس (النميري) ، ففي عهده عاش النادي قمة مجده ونجاحه ، ورغم ان الكثير من نشطاته متعلقة بالنظام واحتفالاته ، إلا انه كان دائما يفتح ابوابه لكل الاطفال والجمعيات ورياض الاطفال والمدارس لتقيم به ما تشاء من نشاطات 00 فاذن الاهمال الذي لحق بالنادي ونشاطاته قد بدأ منذ اوائل الثمانينات وتتالى الاهمال خلال فترة الديمقراطية الثالثة ثم استمر التدهور حتى الان 00 وتحياتي ،،

قد أوافقك على ذلك إذ لم اكن معايشاً تلك الفترات .. ولكن الضربة القاصمة التي حدثت له في عهد الإنقاذ أصابته في مقتل ولا اعتقد انه ستقوم له قائمة بعد الآن ..

الامين حمد لله على السلامة ..




وحاتك با الامين نحن لمن كنا في المتوسطة وفي الجديدة ، نادي الاسرة دا كنا بنخت فيهو جنس كجاجيم لمن تعرف حاجة !! طبعاً في الأيامات ديك كان في عداوات بالكوم ومشاكل كتيرة في الإتحاد بتاع الثانوية الجديدة ، فاي زول كنت داير تصفي حسابك معاهو بتشرك ليهو في النادي .. تنزل معاهو في جولة كدة يا إدقيت يا دقوك يا ختيتا ليهو يا ختاها ليك وكمان لمن تمشي المدرسة بتلاقى الفضيحة جات قدامك

شكرا ناذر

بدأت تبحث فى تاريخ (3)
وده ميدان عبد المنعم اصلا
وده ميدان المولد


وشهد فى بداية مايو اكبر
تجمع سياسى لمايو
وفيه ظهرت بوادر الانقسام
وما بعدها يوليو 71

قد يكتب عنها من هو اقرب للحدث
ومن اقوى ذاكرة ... ومعلومات




ــــــــــــــــــــــــــــــ
ناذر
ابحث عنك .. ارجو اتصالك

ناذر مااااااااااااااااااااالك مقلب علينا المواجع
الخرطوم ثلاثة وما ادراك من الخرطوم ثلاثة...ونادي الاسرة...وفول عمك عبد الوهاب والكورة والحرفنة مع ناس احمد خوجلي ابوالجاز..... وحبسة (بابكر)... باكرتة..هود بشير..اباذر مرغني ..بية...والمرحوم فارس واب راس اخوان ولمن كانو بنادوني ودالشكيري...
والدافوري بين زاوية البرهانية وجامع شداد...ودافوري ميدان العروبة مع المنشاوية وعمر كاكو وكنه ودفعتي ياسين بشير واسامة طه ومايكل ومنولي كرياكو.
ومن المعالم اولاد كبروس
تعرف ياناذر الواحد ممكن اكتب للصباح عن ثلاثة وروعتي
محمد علي المشرف مختار

دكتور سلامات والتحيه ليك وعبرك لكل العقد الفريد (البرجوازين) زي ما كنا بنطلق عليكم احمد ابوالجاز, وحبسة (بابكر), باكرتة,هود بشير,اباذر مرغني صاحب الفلوكسوجين كانت ومازالت مكسرة فيني ضلعه ,بية,المرحوم فارس واب راس اخوان,عمر كاكوالرجل البشوش,كنه وايهاب,ياسين بشير دة مش جنابو,اسامة طه الرجل الفاضل رد الله غربته وعبدة طه اخوة, مايكل ومنولي كرياكو.
لكن يادكتور سؤال ظل في زهني من انا صغير حسب تصنيفكم لينا في الوقت داك ليه دائما بتجو الدوافير وانتو قاشرين?
تحياتي لك وللاسره
ودالحاج

الحبيب ود الحاج
تحياتي واشواقي ورمضان كريم

شفت الناس دي كانت لذيذه كيف...

Quote: لكن يادكتور سؤال ظل في زهني من انا صغير حسب تصنيفكم لينا في الوقت داك ليه دائما بتجو الدوافير وانتو قاشرين?

وينه القشرة في اب ريال كدارة فيها كم مسمار وخلاص
ياخي لو عندك تلفون لاسامة طه ولا عبده طة عليك بالماسنجر
معزتي
محمد علي المشرف مختار

الاخ الحبيـب الحــبوب،
نـــاذر،

تحية الود والاعزاز، ورمضان كـريـم.

الانـجليـز لـما فكروا يعمـلوا عاصمـة حضاريـة للسودان،فكروا يعملونها بالشكل الانجليزي، لذك إذا تمعنت بدقـة في الصورة الملونة لمدينة الخـرطوم وتوسـط ميدان عبدالمنعم ثـم تفرع الشـوارع الكبيرة من كل الانحـاء لتلتقي في الميدان، يكـون الشكل في النهايـة صــورة للعلم الأنـجليــزي!!!!.

كان الميدان محل ملتقي العاب الفرق الكبيرة لكرة القدم قبل بناء استاد الخرطوم زمن عبـود.

اشـهر جيـران للـميدان سـينما الوطنية الخرطوم جنـوب والتي إفتتـحت عام 1961، وكان اول يعرض في السينما يوم الافتتـاح فيلـم " عنتر وعبلــة "،ةالتذكرة كانت للطلاب بخـمسة قروش.

اشـهر جيران للـميدان ايضـآ، الطـريقة البـرهانيـة، والذكـر عندهم كل خمـيس....
وبعد الذكــر الفـتة!!!!،
" الـرز كـتيـر مـردوم،
والـمرقة فـوقة تعــوم،
ياشـربوت العيد مع....الشـــية،
ياحبك ســـهـر بـي!!!!!".

كان الميدان كل خمـيس فيـة علي الاقل اربعة حفلات اعراس.

سـنة 1972، قامت الدكتورة فاطمة عبد المـحمود وزيرة الشئون الاجتماعيـة بتحــويل الـميدان باكملة لنادي، اسمتة نادي الاســرة، ولكنة كان نادي لفئـة مـميزة من اســر وعوائل ضباط 25 مايو.

الحبيب بكري

Quote: اشـهر جيران للـميدان ايضـآ، الطـريقة البـرهانيـة، والذكـر عندهم كل خمـيس....

اظنك بتقصد بيت عمك محمد عثمان عبده البرهاني هو الفاتح علي ميدان نادي الاسرة وجنب جامع عبدالمنعم. اما الزاوية فهي جوار دكاكين الجاك والحولية بتاعت يوم الخميس وعربية عمك البرهاني المسكوفيتش بتجيبو كل يوم مع صلاة المغرب للزاوية.
محمد علي المشرف مختار

Quote: وحبسة (بابكر)... باكرتة هود بشير

حبسه دا من اخر الناس الودعتهم وانا طالع من السودان
والحبيب (قدورة ) عبد القادر بشير اخو هود
والله ناس زي العسل
مرة قدورة جاي من السعودية مع المريخ وكان وقتها الامير فيصل بن فهد الله يرحمه اتبرع بي مبلغ كبير للبعثة كلها حتى الصحفيين المرافقين اتبرع ليهم
وحبسه طبعا عندو الخبر من الجرايد والاذاعة وكلو
اها اول من لقى قدورة قال ليهو شايفك جاي من السعودية نااااااااير
قدورة عاين لي كدا وقال لي
ناير !!! ناير وللّ فبراير

Quote: اولاد كبروس

اووو الكبارسة
رقم كبير في نمرة 3
وما تنسى محمد الشايب (كازا ) والرشيد ابقرجه وصلاح بخيت (الاسيوطي )
القائمة طويلة طويلة

انا دستوري نازل في الخرطوم تلاتة

حبيبنا الامين
سلامي واشواقي
انا غايتو كان الله مده في العمر اول مشية للسودان بصل الناس دي كلها.
تذكر دورة رمضان في نادي الاسرة في ميدان الباسكت والعراضات الصغار !!!
سلامي

ود الحاج تسلم كتير ..

Quote: ياناذر في البال اسألــه عن نااااااااااس كتيرة,ودحجار والاسرة يبلغك السلام

ود حجار دا قول ليهو إنسل لا برة انا طولت ما شايفو !!

عصام اخبارك ..

Quote: وشهد فى بداية مايو اكبر تجمع سياسى لمايو وفيه ظهرت بوادر الانقسام وما بعدها يوليو 71

انا متذكر إنو نادي الاسرة كانت بتقام فيهو معظم إحتفالات مايو وكانت تقريباً زي مقر لي (طلائع مايو) أو حاجة بالشكل دا !!

بالمناسبة يا عصام .. الصالات الفي نص النادي بتاعت التنس والبلياردو والكافتيريا .. مصممة بالضبط عل شكل المطرقة والمفتاح شعار الحزب الشيوعي ، بس هسي عشان الصورة من بعيد ما ظاهرة كويس !!!

Quote: ناذر ابحث عنك .. ارجو اتصالك

حا إتصل بيك بعد شوية يا عصام ..

محمد علي المشرف مختار
كيف حالك
معليش نسيت اذكر اسمك في المداخلة الفوق
رمضان خلاص دخل العضم
حقك على

دكتور المشرف ..

Quote: الخرطوم ثلاثة وما ادراك من الخرطوم ثلاثة...ونادي الاسرة...وفول عمك عبد الوهاب والكورة والحرفنة مع ناس احمد خوجلي ابوالجاز

نسيت والله اذكر عائلة ابو الجاز ضمن الناس الاثروا نادي الاسرة من حيث العطاء الكروي والرياضي ، وطبعاً معاهم ناس هود وكل الجماعة الذكرتهم .. أما فول عبد الوهاب ، فلا زال يتميز بذات النكهة القديمة حتى الآن ..

Quote: ومن المعالم اولاد كبروس تعرف ياناذر الواحد ممكن اكتب للصباح عن ثلاثة

أولاد كبروس ناس عماد وشاذلي وسيف ..
أكتب يا راجل ودفق ذكرياتك كلها بس ما تنسى حاجة

!!!!!!!!!!!!!

Quote: لكن يادكتور سؤال ظل في زهني من انا صغير حسب تصنيفكم لينا في الوقت داك ليه دائما بتجو الدوافير وانتو قاشرين?

سؤال الحلقة

اي والله انا متذكر كنا بنجي وسخانين ومعولقين لكن ديل ما عارف سر قشرتم شنو

Quote: يا نادر سلام و الله ذكرتنا أيام جميلة الخرطوم الجديدة و حصص الرياضة ودك الحصص كانت لنا أيام

الله يا قرضابي من ايام
الخرطوم الجديدة بسحرها الاخاذ
امين نوري والبلك
وود العبيد (جني فيل)
ومحمد عطية والتكينة
اساتذة ننحني ليهم احتراما وتقديرا
ونادي الاسرة حيت الحفلات والهجيج
والاسابيع الثقافية
وعمار السنوسي وحيدر بورتسودان
ناذر لماذا تريدنا ان نذرف الدموع علي اشياء عزيزة غلي انفسنا

كيفك يا بكري ..

Quote: الانـجليـز لـما فكروا يعمـلوا عاصمـة حضاريـة للسودان،فكروا يعملونها بالشكل الانجليزي، لذك إذا تمعنت بدقـة في الصورة الملونة لمدينة الخـرطوم وتوسـط ميدان عبدالمنعم ثـم تفرع الشـوارع الكبيرة من كل الانحـاء لتلتقي في الميدان، يكـون الشكل في النهايـة صــورة للعلم الأنـجليــزي!!!!.

بالضبط دي معلومة كانت مثار جدل رغم حقيقتا وأنا والله لو ما قوقل إيرث ما كنت حا اعرف الحقيقة دي !! ودا شي واضح للزول البيعرف الخرطوم وشوارعا القديمة قبل التحديث وشق الطرق الجديدة ..

Quote: اشـهر جيـران للـميدان سـينما الوطنية الخرطوم جنـوب والتي إفتتـحت عام 1961، وكان اول يعرض في السينما يوم الافتتـاح فيلـم " عنتر وعبلــة "،ةالتذكرة كانت للطلاب بخـمسة قروش.

البركة في الجميع في السنما تم مساواتها بالارض قبل سنتين تقريبا ولسة ما عرفو الطريقة اليستثمروا بيها المساحة الكبيرة دي !!

Quote: البركة في الجميع في السنما تم مساواتها بالارض قبل سنتين تقريبا ولسة ما عرفو الطريقة اليستثمروا بيها المساحة الكبيرة دي !!

ياحليل السينما ولمن كنا بنشرك في مسطبة اولاد كبروس لاولاد السكة حديد وهم ماشين ولا جاين من السينما....

Quote: أكتب يا راجل ودفق ذكرياتك كلها بس ما تنسى حاجة

عليك الله ياناذر كتابني دي ما ارحم من كوبي بيست صحبك مصطفي

المشرف ..

Quote: تذكر دورة رمضان في نادي الاسرة في ميدان الباسكت والعراضات الصغار !!!

بالمناسبة في دورة بئيسة بدت قبل تلاتة يوم في نفس الملعب دا من فرق كتيرة جدا ، والشي الحا يفرحك إنو أمير أبو الجاز (فندك) لا عب فيها بس في أول مباراة عمل شكلة والحكم طردو وعينك ما تشوف إلا النور والكورة إتلغت

ما رجع بيك ذكريات لي ورا خمستاشر سنة لمن كان بيفرتك المباريات

خالد تاج السر ..

Quote: امين نوري والبلك وود العبيد (جني فيل) ومحمد عطية والتكينة

ودبوس بتاع الفيزياء
والمسيخ الدجال بتاع الكيمياء
وشمس الدين بتاع البلاغة ..

إنت يا زول دفعتي ولا شنو !!!

Quote: ناذر لماذا تريدنا ان نذرف الدموع علي اشياء عزيزة غلي انفسنا

الدنيا رمضان احسن الواحد يبكي شوية

Quote: ود حجار دا قول ليهو إنسل لا برة انا طولت ما شايفو !!

كان ليك الراجل يسعد بجوار من يحب ويصطفي الان looooooool التحاياوالتبريكات للعروس.

Quote: تلفون لاسامة طه ولا عبده طة

راجع الماسنجر دكتور

راجع ليكم بعد الافطار

!!!!!!!!!!!!

Quote: ياحليل السينما ولمن كنا بنشرك في مسطبة اولاد كبروس لاولاد السكة حديد وهم ماشين ولا جاين من السينما....

إنتو كنتو رباطة ولا شنو !!!

عشان كدة كان ابوي زمان بيحذرني أمشي السنما !!

ولمن اصر امشي بيقول لي خلاص سيب الساعة والنضارة والمحفظة في البيت

Quote: عليك الله ياناذر كتابني دي ما ارحم من كوبي بيست صحبك مصطفي

مالك داير تجرح صيامنا ياخ !!
ما كنا ماشين كويس !!
هسي يجيج ناطي يلصق ليك أصهار الله أو فتية الاعراب يطير لينا النادي من راسنا

تعرف يا ناذر بدون اي مجاملة
والله العظيم انت فاكهةهذا المنتدي
ومعك في هذا البوست الرائع
فهي رسالة عن نادي له اثر كبير في حياتنا

خالد ...

Quote: تعرف يا ناذر بدون اي مجاملة والله العظيم انت فاكهةهذا المنتدي ومعك في هذا البوست الرائع فهي رسالة عن نادي له اثر كبير في حياتنا

الله يبارك فيك وفعلاً نادي الاسرة حاجة ما بتتنسي ..

متذكر ناس عصابة الجوكر !!!!؟؟؟

يا أخوانا مسعولين من الخير !!!

مافي واحد جاب سيرة البيوت الورا مدرسة الجديدة القدام الطاحونة لييه !!!

ولا أاااااااااااااااا

اللهم إني صائم .. كدي النفطر ونجي نتكلم عنها شوية

قلت لي شنو يا الامين .. (منزل أحرار) الله يكسبك جرحت صيامنا ياخ

انتو ياناذر وخالد تاج السر تذكرو مدرسة الجديدة وما تجيبو سيرة المربي الفاضل الاستاذ المرحوم عبد الحميد مدني عليه رحمة الله ....

Quote: إنتو كنتو رباطة ولا شنو !!!

ربيط زمان معناها ندقهم ويدقونا لمن نقطع السكة حديد ماشين كلوزيوم

Quote: مافي واحد جاب سيرة البيوت الورا مدرسة الجديدة القدام الطاحونة لييه !!!

ياناذر زمان كان الشباب مالي وقتو كورة في النادي تمارين دافوري سباحة المساء النادي وتنس الطاولة البلياردو....يعني فراغ مافي عشان تفكر في الفارغة.....انا عايتو حدي كان حدي بيت عمك يوسف علي جبالي عليه رحمة الله واولاده ياسر..اسامة...مسيب.

دكتور المشرف ..

Quote: انتو ياناذر وخالد تاج السر تذكرو مدرسة الجديدة وما تجيبو سيرة المربي الفاضل الاستاذ المرحوم عبد الحميد مدني عليه رحمة الله ....

أنا صراحة ما عاصرت عبد الحميد مدني لكن سمعت عنو كتير وحتى كان بيتم جوة المدرسة تحديداً مقابل لي عبد الوهاب بتاع الفول ..

Quote: ربيط زمان معناها ندقهم ويدقونا لمن نقطع السكة حديد ماشين كلوزيوم

أااااااااا فهمت كلامك ...

دي الزمن دا بنسميها (مغارس)

دكتور المشرف ..

Quote: ياناذر زمان كان الشباب مالي وقتو كورة في النادي تمارين دافوري سباحة المساء النادي وتنس الطاولة البلياردو....يعني فراغ مافي عشان تفكر في الفارغة.....انا عايتو حدي كان حدي بيت عمك يوسف علي جبالي عليه رحمة الله واولاده ياسر..اسامة...مسيب.

ما قلنا حاجة يا راجل !!
بس القصد إنو التوثيق يكون شامل كامل للمنطقة

الناضر تروتسكي رسل ليكم المداخلة دي :

Quote: خالص التحايا ناذر والجميع.. ورمضان كريم.. كل ما سأقوله ربما قد يكون قد سبقوني فى سرده الآخرين لكن النقطة الفاصلة كل منا يروى الأحداث ويضفه عليها بعض وجهة نظره.. فمكان هو المكان وقد يختلف الزمان ويختلف السرد.. فما دام اتفقنا على المكان وهو يمثل كل منا جزء من ملامح حياته وذكرياته الحُلوة والمرة .. عنى أقول … الخرطوم كانت بيتي الكبير تجولت وقطنت في معظمها و لكن هناك كانت أماكن ستظل خالدة للعبق الذي يسكنها منها هو نادى الاسره.. يا ناذر نحن برضو جيرانكم ناس الخرطوم 2 وحى المطار يعنى حيطة بالحيطة عشان كده النادي ده ماحقكم براكم سامع.. بالاضافه إلى شراكة الخرطوم الثانوية الجديدة .. نادى الاسره كان مرتع للدورة المدرسية التي كانت والليالي والانشطه الثقافية ؛وحصة الرياضة والخلط ..وهلمجرا بس عايز اقول ليكم ماتنسو توثقوا لى كل (الايريا) · ومكتبة عبدالماجد اللحقوها امات طه · ((ميرى)) نسيتوها ولا خلاص كلكم عملتو نايمين..ناذر وريهم ((ميرى)) لو عاملين فيها ما عارفين.. · البيوت الوراء الجديدة واتجاه الحلاق الفى الكورنر وانتو ماشين جنوب غرب إلى حديقة القرشي.. · دي الحاجات المادايرين تجيبوها سيرتها يا ناذر لكنها كانت معالم في المنطقة وداخل النادي وصف ناذر على البقية بتكتمل اللوحة والناس ياهم على مدار التاريخ فى كمية ناس معاصرين من سنين خلت.. · يبقى بي كل العبق ده حرام كل فترة نشهد صرح يضم في داخلة تاريخ ذكريات يُكنس ويذهب به إلى مزبلة التاريخ ..يعنى الناس تانى إلا كل زول يبقى يحتفظ ليهو بي حجر ولا شيتا من اى صرح زى سور برلين المشي مع التاريخ... · لكن شتان مابن الاتنين سور برلين وحديقة الاسرة ؛ سور برلين بالرغم من احداثو السئية الذكر لكن استطاعو الألمان أن يحترمو لأنو تاريخ ونحن في وطن لا نسعى للجديد بل ناهيك أن نقوم بالمحافظة على تاريخنا ..والله شي مؤسف بعد شويه ما أظن يبقى شي والله يكون في العون... · يا دكتور المشرف ناس العمارات ديل بجو نادى الاسره ضهب مش ..(وش غامز) · الأمين عثمان صديق محمد الدرب التحت بتاع حي باريس ده بكتلك يا ولدى ؛ والكورة الماعندها ميدان إلا تحت الكبرى دى حالة صعبة ؛تعزمو الناس ماتش وتعوقهم لا موهيك . · عموما يا ناذر أنا دي مساههمتى بإيجاز أنت زول لا يوق "لووول"..وأنا ما كانت عندي نفس كتابة والكلام كتير عموما ارجو ان يكون الكلام ده مناسب.. · وبالله يا ناذر شغل الموسيقى الاجبارى ده وقفو ياخ خليي الناس بخياراتها ده شنو ده ياخ.. تروتسكى التحايا النواضر..

Quote: ما قلنا حاجة يا راجل !! بس القصد إنو التوثيق يكون شامل كامل للمنطقة

حبيبنا ناذر
اتفق معاك انو التوثيق يكون شامل بس كنت داير اقول انو النشاطات الاجتماعية والرياضية الكانت موجودة في نادي الاسرة كانت شاغلة الشباب وما جاور حديقة القرشي كان بجوها الناس من بره ثلاثة يعني الكان بلم ليه قرشات ما بمشي العشش كان بجي جنب حديقة القرشي لزوم القشرة وكده

الجميل معتز

Quote: يا ناذر نحن برضو جيرانكم ناس الخرطوم 2 وحى المطار يعنى حيطة بالحيطة عشان كده النادي ده ماحقكم براكم سامع..

ناس الخرطوم2 وناس حي المطار الناس الكانت مروقة وكان ناس كافوري يختو ليهم قزاز اللبن في الحيطة الكديسة ما كانت بتقربو

Quote: يا دكتور المشرف ناس العمارات ديل بجو نادى الاسره ضهب مش ..(وش غامز) الكانوا بجونا كانوا ناس الديم وحي الزهور وكانوا فاكنها في الجكس نحنا ساكنين العمارات

Quote: مافي واحد جاب سيرة البيوت الورا مدرسة الجديدة القدام الطاحونة لييه !!!

سته سنين الحي ده ماشي وجاي عبره مرورا من البيت لمدرسه الاتحاد الابتدائيه الحي شكل جزء اساسي من احياء 3 جزء من الحي كان مرتع لبيعات الهواء لحدي اوائل التسعينيات الحي يسكنه خيرة من سكان 3 امثال الاستاذة المربيه استاذة مكـــه وبه ال النفيدي وال مكي وكثرين
من الشباب اذكر يوسف ابرهام وشقيقه وعلي ما اظن انهم هاجرو لكنـدا,خالد,قاسم,اسعد واخوانـه,حسن وحسين بتاعين الاتحاد في مدرسه الجديدة ناذر ومعتز اظنكم تعرفهم

تروتسكي !!!!!!

Quote: ((ميرى)) نسيتوها ولا خلاص كلكم عملتو نايمين..ناذر وريهم ((ميرى)) لو عاملين فيها ما عارفين..

يا زول ميري دي منو وساكنة وين وبتعمل شنو !!!!!
تعال وريهم ليها إنت .. انا لا بعرفا لابطيخ !! ما عندي بيها علاقة !!
يا زول إنت وثق لكن كمان ما تشد(الوثاق) للدرجة دي

Quote: البيوت الوراء الجديدة واتجاه الحلاق الفى الكورنر وانتو ماشين جنوب غرب إلى حديقة القرشي..

دي أنساها خلاص .. معقولة ياخ زول يجي يحكي ليك ذكرياتو بي هناك
تسأل الله السلامة بتاع مصايب إنت يا معتز

Quote: دي الحاجات المادايرين تجيبوها سيرتها يا ناذر لكنها كانت معالم في المنطقة

البركة فيك إنت الجبت سيرتا !! نحن خلينا في سيرة وحيد بتاع الايسكريم !!

Quote: وبالله يا ناذر شغل الموسيقى الاجبارى ده وقفو ياخ خليي الناس بخياراتها ده شنو ده ياخ..

يا تروتو ..
دي موسيقة تصويرية ياخي ، وبدونا ما بتكتمل روعة المشاهد المن الذاكرة دي ، هسي لمن تمشي مسرحية بتقول ليهم وقفوا لي الخلفية الموسيقية ؟!!
أها في بوستاتي نفس الشي
لكن عشان خاطرك حا احاول أغيرا ليك بي وحدة تانية لو دي ما مريحاك ..

تسلم على المشاركة .

العزيز ناذر،

ياسلام عليك يا ناذر.. ذكرتنا بالأيام الجميلة ونادي الأسرة أو الأصح ميدان عبدالمنعم سابقا.
أذكر لما كنت صغير إحدى شقيقاتي كانت تسكن مع زوجها وباقي أفراد عائلتها في الخرطوم 3 بالقرب من
حديقة القرشي داخل سور منزل المرحوم الجاك من ناحية الناصية الشمالية الغربية للحديقة وأذكر كان هنالك
منزل ناس المرحوم الفنان الحويج وكنت أزور شقيقتي في فترة الأجازات المدرسية وتعرفت على الكثير
من أهل الحي والشباب لكن الفترة طالت ونسيت الأسماء.
قبل أن يتم بناء نادي الأسرة كنا في وقت العصرية نلعب كرة القدم في ميدان عبدالمنعم وفي المساء
نذهب الى حديقة القرشي للعب في (النجيلة). وكنا نحضر المولد في ميدان عبدالمنعم وتقام المناسبات
المختلفة ما أسعدها تلك الأيام. لكن منذ أن تم بناء نادي الأسرة لم أدخله كما لم يستطيع دخوله العديد
من أهل حي الخرطوم 3 نسبة لإحتكاره من قبل القوات المسلحة حيث إقتصر الإنتساب للنادي للضباط وأسرهم فقط.
ومدرسة الخرطوم الجديدة أو المدرسة الفرنسية سابقا درست بها مرحلة الثانوية العليا ولي ذكريات
جميلة جدا لن أنساها في تلك المنطقة.

Quote: أنا صراحة ما عاصرت عبد الحميد مدني لكن سمعت عنو كتير وحتى كان بيتم جوة المدرسة تحديداً مقابل لي عبد الوهاب بتاع الفول ..

الاستاذ المربي الجليل عبدالحميد مدني فعلا كان ساكن داخل المدرسة واولاده الاخوان العزيزين حاتم, لؤي وسامي.
له الرحمة والمغفرة.

Quote: ناذر مااااااااااااااااااااالك مقلب علينا المواجع الخرطوم ثلاثة وما ادراك من الخرطوم ثلاثة...ونادي الاسرة...وفول عمك عبد الوهاب والكورة والحرفنة مع ناس احمد خوجلي ابوالجاز..... وحبسة (بابكر)... باكرتة..هود بشير..اباذر مرغني ..بية...والمرحوم فارس واب راس اخوان ولمن كانو بنادوني ودالشكيري... والدافوري بين زاوية البرهانية وجامع شداد...ودافوري ميدان العروبة مع المنشاوية وعمر كاكو وكنه ودفعتي ياسين بشير واسامة طه ومايكل ومنولي كرياكو. ومن المعالم اولاد كبروس تعرف ياناذر الواحد ممكن اكتب للصباح عن ثلاثة وروعتي محمد علي المشرف مختار

بالمناسبة هل بشير الراستا بتاع المنقا لسة موجود
تعرفت على الاسماء اعلاه عنده.. فكنا نتوقف عند بشير
قبل دخول النادي في الثمانينات من القرن المنصرم
ومن النادي نصتحب علي حران و نعرج على وحيد الحلبي
بالقرب من قبرص (منطقة ال كبروس واولاد القوصي)
لاستاد الخرطوم لمشاهدة مبارايات الدرجة الاولى
طبعا علي حران كان لا يدخل اي مباراة الا للمريخ
وكان متعصبا لدرجة انه لايدخل مبارة تكون صعبة على المريخ
ولا مباريات مريخ-هلال
اما وحيد الحلبي فكان مدمن استاد الخرطوم يشاهد كل المباريات
المقامه تحت الاضاءة و يرجع للجلوس مع علي لرواية الاحداث
ولم نشاهد وحيد داخل النادي ابدا .. وهو غير وحيد ايسكريم

ود الحاج ..

Quote: سته سنين الحي ده ماشي وجاي عبره مرورا من البيت لمدرسه الاتحاد الابتدائيه الحي شكل جزء اساسي من احياء 3 جزء من الحي كان مرتع لبيعات الهواء لحدي اوائل التسعينيات الحي يسكنه خيرة من سكان 3 امثال الاستاذة المربيه استاذة مكـــه وبه ال النفيدي وال مكي وكثرين من الشباب اذكر يوسف ابرهام وشقيقه وعلي ما اظن انهم هاجرو لكنـدا,خالد,قاسم,اسعد واخوانـه,حسن وحسين بتاعين الاتحاد في مدرسه الجديدة ناذر ومعتز اظنكم تعرفهم

شكرا لتوثيق (الحتة دي) معتز قايلنا زايغين منها ولا حاجة

عزيز عيسى مرحب بيك ..

Quote: ومدرسة الخرطوم الجديدة أو المدرسة الفرنسية سابقا درست بها مرحلة الثانوية العليا ولي ذكريات جميلة جدا لن أنساها في تلك المنطقة.

أول مرة اعرف إنو مدرسة الجديدة كان إسمها المدرسة الفرنسية !!
ليه كان إسمها كدة يا عزيز ؟؟!!

وليد صفوت ..

Quote: بالمناسبة هل بشير الراستا بتاع المنقا لسة موجود تعرفت على الاسماء اعلاه عنده.. فكنا نتوقف عند بشير قبل دخول النادي في الثمانينات من القرن المنصرم ومن النادي نصتحب علي حران و نعرج على وحيد الحلبي بالقرب من قبرص (منطقة ال كبروس واولاد القوصي) لاستاد الخرطوم لمشاهدة مبارايات الدرجة الاولى طبعا علي حران كان لا يدخل اي مباراة الا للمريخ وكان متعصبا لدرجة انه لايدخل مبارة تكون صعبة على المريخ ولا مباريات مريخ-هلال اما وحيد الحلبي فكان مدمن استاد الخرطوم يشاهد كل المباريات المقامه تحت الاضاءة و يرجع للجلوس مع علي لرواية الاحداث ولم نشاهد وحيد داخل النادي ابدا .. وهو غير وحيد ايسكريم

إنت برضو خرطوم تلاتابي !!!
الناس دي كلها طلعت (من إندنا) !!

Quote: بالمناسبة هل بشير الراستا بتاع المنقا لسة موجود

بشير دا ما ادونا ليهو لكن كنا لمن نشتهي ناكل منقة بنتلب في جنينة الجامع المزروع فيها شجر منقة كتير وبنطلع فوق في الشدرة ونقعد ناكل لمن يجينا نًُفاخ أو يجي الغفير عمك الرشيد يسكنا !!

Quote: طبعا علي حران كان لا يدخل اي مباراة الا للمريخ وكان متعصبا لدرجة انه لايدخل مبارة تكون صعبة على المريخ ولا مباريات مريخ-هلال

علي حران الله يديهو العافية .. داير تدوروا بس جيب ليهو سيرة المريخ وممكن يضاربك عدييل كدة فيهو !!

بما إنو الناس طلعوا كتيرين من منطقة نمرة تلاتة ..
أقترح تكوين جمعية بإسم (رابطة مُحيطي نادي الاسرة)

وليد صفوت انت وليد صفوت بتاع كمبوني الخرطوم ولا واحد تاني

تعيدو بخير

نادي الاسرة ده انا بجيكم لي بالتفصيل وبحكي ليكم كيف تم طرد اولاد السكة حديد منو

اما مسالة الشريك لاولاد السكة حديد في مسطبة اولاد كبروس دي اشاعة بجيكم ليها بالتفصيل
وبشهادات اولاد كبروس من عرفات للشاذلي ,,,,,,,,,

ناذر طبعا الدكتن الانت بتجيب صورة ده في دكان اقدم من اسم بقالة منيرفا في الناحية الشمالية المؤدية للزاوية البرهانية والاسماعلية

لا يفتوني هنا ان احي المربي والكوتش حنفي

انا بجيكم قريب بس روق المنقة

أُمممممممممممممممممممممك ْ !!!!

قولوا واحد :

Quote: اما مسالة الشريك لاولاد السكة حديد في مسطبة اولاد كبروس دي اشاعة بجيكم ليها بالتفصيل وبشهادات اولاد كبروس من عرفات للشاذلي ,,,,,,,,,

يعني يا عمار المشرف دا كان فاكيها فينا وعامل فيها تفتيحة وفاكي الزراير وفي النهاية الشغلة طلعت إشاعة !!

وكمان شهادات ناس عرفات والشاذلي !!!
ضعت يا دكتور ، الله كان في عونك

Quote: ناذر طبعا الدكان الانت بتجيب صورة ده في دكان اقدم من اسم بقالة منيرفا في الناحية الشمالية المؤدية للزاوية البرهانية والاسماعلية

أي والله بقالة منيرفا قديمة خلاص الله يطراها بالخير ..

Quote: لا يفتوني هنا ان احي المربي والكوتش حنفي

حنفي ربيع قصدك ولا واحداً تاني !!؟

Quote: انا بجيكم قريب بس روق المنقة

روقناها تب .. إنت بس تعال

Quote: اما مسالة الشريك لاولاد السكة حديد في مسطبة اولاد كبروس دي اشاعة بجيكم ليها بالتفصيل وبشهادات اولاد كبروس من عرفات للشاذلي ,,,,,,,,,

عمار اشاعة شنو الا تكون فارق العمر....يعني ثلاثة المرة حكي عنها خالد الحاج دي انا ما بعرفي....طبعا عمنا خالد الحاج اكبر مننا كثير

Quote: وكمان شهادات ناس عرفات والشاذلي !!! ضعت يا دكتور ، الله كان في عونك

انا غايتو ياناذر بيتنا فاتح في بيت اولاد كبروس ما عندهم واحد اسموا عرفات....اها ياعمار شهادتك بقت مجروحة...وما تجي تخرخر وتقول والله ياجماعة ده الصيام

ياهو دا ....

شفت الحر قدام بيتكم عامل شنو يا ناذر !!!!

المدرسة الفرنسية !!!!

عبد الوهاب بتاع الفول !!!

وصورة من الجو !!!

تحية للاستاذ ناذر للموضوع الهام وتحية للعزيز الفنان الصديق عصام عبد الحفيظ ..
لاخوالي (القبانية) اثر كبير في حضارة المائة عام الاخيرة في الخرطوم وام درمان , اثر لا ينكره الا مكابر . ولعبد المنعم محمد يد طولى مع شروني وآل ابوالعلا في عمل الخير . عبد المنعم محمد ( ذلك المحسن حياه الغمام) ترك الكثير من املاكه في انحاء الخرطوم اوقافا للخير وهو الامر الذي لم (تجرؤ) الكثير من اسماء الحاكمين والاثرياء في بلدنا العزيز على عمله ...

المشرف ...

Quote: انا غايتو ياناذر بيتنا فاتح في بيت اولاد كبروس ما عندهم واحد اسموا عرفات....اها ياعمار شهادتك بقت مجروحة...وما تجي تخرخر وتقول والله ياجماعة ده الصيام

موضوعك دا حلو مع عمار انا ما عندي بيكم شغلة
غنتظرو خليهو اليجيك

يا سلااااااااااااااااام يا عصام ياخ !!

أنا أساساً صور قوقل إيرث الفوق ديك كنت عارفا عاملا زي المسلسل المكسيكي المدبلج ، ما ليها طعم ولا بتقضي غرض والحمد لله إنت جيت ..

كدي بعد إذنك حا اشرح للجماعة الطولوا من البلد الحاصل قدامم ..

الصورة دي يا شباب ...



دا الجذء الفاتح على مدرسة عبد المنعم المتوسطة مباشرةً ، يعني مواجه للمدرسة ويمين جامع عبد المنعم بي شوية !!

الحتة دي تحديداً أنا شهدت فيها تلاتة او أربعة إحتفالات للأخوة الأريتريين لانها كانت منطقة مُنَجَلَة كبيرة ، وإحتياطي لمن تكون مسارح النادي مليانة !!

هسي زي ما شايفين قدامكم بقت بي قدرة قادر مكتب وزير المجلس الاعلى للشباب والرياضة !! وانا مستغرب عاملين ليهو مكتب بعيد من مباني وزارتو لييه !! التقول الوزارة دي حا يديرا بالتبرعُم !!

أما دي :



فهي بوابة نادي الاسرة من الجهة الفاتحة على سوق الخرطوم 3 أو سوق عبد المنعم ..
أنا طبعاً إستعملت كلمة بوابة مُجازاً لانو زي ما شايفين البوابة مخلوعة ، وبي ورا طبعاً ظاهر جذء من ميدان الباسكت بول والتنس الأرضي !!

الصورة دي ذكرتني بي حاجة مهمة انا نسيتا جبيل :



طبعاً دا منظر لي شارع الزلط البيجي من القسم الجنوبي أو الاوسط على نادي الاسرة ، طبعاً تكونوا إتخيلتو طوالي إنو الجذء دا من النادي فيهو صالة الإسكواتش والحلبتين بتاعين الملاكمة والمصارعة مش كدة !!؟

الحصل إنو بعد وفاة المرحوم الفريق إبراهيم احمد عوض الكريم الدولة قررت تكريم إسمو بأنها تعمل ليهو (مسرح) يحمل إسمو ، فطوالي ما لقوا حتة إلا يكسروا صالة الإسكواتش والحلبتين ويتغولوا لي جوية شوية عشان يبنوا المسرح دا !!

ويا ريت المسرح لو إشتغل أو بيخدم حاجة للمنطقة !! إشتغل يوم الإفتتاح وبعد داك بقت تتعمل فيهو عروض مسرحية فاشلة من ناحية الحضور الجماهيري كل فترة والمسرح يقيف !!

د/ عباس مرحب بيك ..

Quote: تحية للاستاذ ناذر للموضوع الهام وتحية للعزيز الفنان الصديق عصام عبد الحفيظ .. لاخوالي (القبانية) اثر كبير في حضارة المائة عام الاخيرة في الخرطوم وام درمان , اثر لا ينكره الا مكابر . ولعبد المنعم محمد يد طولى مع شروني وآل ابوالعلا في عمل الخير . عبد المنعم محمد ( ذلك المحسن حياه الغمام) ترك الكثير من املاكه في انحاء الخرطوم اوقافا للخير وهو الامر الذي لم (تجرؤ) الكثير من اسماء الحاكمين والاثرياء في بلدنا العزيز على عمله ...

التحية ليك ولي اخوالك القبانية عائلة قباني الغنية عن التعريف وفعلاً هي اسهمت إسهامات كبيرة غير منكورة في الخرطوم ومنطقة الخرطوم تلاتة بالتحديد ..

شكراً للمساهمة ..

مدرسة الخرطوم الجديدة والناظر والمربي الفاضل عبد الحميد مدني
انحنا لم نحضر زمنه ولكم سمعنا عنه كتيرا
وايضا يحب ان لا ننسي عم عبد الوهاب بتاع الفول
فهو من الرموز التي يجب ان نؤرخ لها



لكن يا ناذر ما قلت لي البيت دة بيت ناس منو يتخيل لي بتاع ناس ناصر محمد الخليفة بتعرفو !!!!
هاهاهاها

ناذر

Quote: أول مرة اعرف إنو مدرسة الجديدة كان إسمها المدرسة الفرنسية !! ليه كان إسمها كدة يا عزيز ؟؟!!

والله يا ناذر كنت بسمع الناس بسموها المدرسة الفرنسية، لكن ما عندي فكرة مين
الذي أطلق عليها إسم المدرسة الفرنسية أو نوع المنهج الذي كان يدرس فيها.
إحتمال كانت مدعومة من قبل السفارة الفرنسية أو البعثات التبشرية.
وأذكر كان الطلبة يلبسون قمصان بيضاء وبناطلين سوداء مع الكرفات
وأشكالهم مختلفة أجانب أولاد دبلوماسيين وسودانيون من أولاد العوائل (المبوسطة).
لأنه كنا نشاهد سيارات فخمة مرسيدس معظمها عليها لوحات دبلوماسية
تنزل الطلبة وتعود وقت الظهيرة لتنقلهم من المدرسة.
لكن بالنسبة لشخصي إلتحقت بالمدرسة بعد أن تم تحويلها الى النظام السوداني
وتغيير أسمها الى الخرطوم الجديدة. أها قصرت معاك في المعلومة دي؟

أفسح المجال للناس القدام في المنطقة لكي يزودونا بما تجود به قريحتهم من معلومات عن
هذه المدرسة.

ما اود ان التركيز عليه , ان نادي الاسرة هو في الاصل وقف لا يجوز التصرف فيه بالبيع ربما بالاستثمار من الممكن ان يتم ذلك وقد حاولت جهات اكاديمية لها صلة جوار استقطاع جزء من النادي لصالحها وهي تعلم صعوبة الامر ولكنهم حاولوا ,
كان المرحوم عبد المنعم محمد اوقف المساحة الكبيرة هذه للاحتفال بالمولد الذي كان يتم في ميدان عباس , الامم المتحدة حاليا , وهو الامر الذي فعل مثله عبد المنعم محمد كثيرا وفي املاك مختلفة ولم يتجرأ بمثله زعماء سياسيون وملاك كبار كانوا يملكون نصف هذا البلد من جناين وجزر واراضي لا يحدها البصر . ويكفي الرجل ان خلدته الذاكرة الشعبية ونسيته الرسمية .

دكتور المشرف

وناذر مولع النيران

ناس كبروس يا دكتور بيتين في الخرطوم 3 عرفات كبروس واخوه ممدوح ديل اولاد عم ناس الشاذلي كبروس (الكان عندهم دكان العجلاتي جنب جزارة الشايب في سوق عبدالمنعم
كانو مولدين بالسعودية وفي السبعينات رجعوا السودان......وكان بيتهم جنب ناس الكوباني في الشارع البمشو بي اولاد السكة حديد لنادي الاسرة وسينما جنوب وهم يرددوا نشيدهم الثوري نمرة 3 خرة الفلاتة سكة حديد حلاوة العيد
اجيكم لقصة نادي الاسرة مع اولاد السكة حديد عندما بدلت مايو جلدها وارادة ان تمسح من ذاكرتنا ميدان عبدالمنعم وذكريات حديث الاربعاء وابتداء الصراع بين الشيوعين والعسكر جاءت بفكرة عمل نادي الاسرة لاصطياد الشباب لاتحاد شباب السودان وفعلا قامت بحشد شباب منطقة الخرطوم جنوب البتشمل السكة حديد والخرطوم ثلاثة والسجانة وعملت بيهم نفير تعمير النادي وتجمع شباب المنطقة وطبعا كان لاولاد السكة حديد القدح المعلى (فريق النجم الاحمر وفريق العاصفة (العاصفة كان ضمن رابطة الخرطوم غرب والنجم الاحمر رابطة الخرطوم جنوب الكان اسم ميدان الجيل الان فيه مبنى المركز الثقافي الامريكي) وبعد العمل الدؤب من ازالة التراب من الميدان (اذكرها كانت فرناقة سوداء) وتجهيز الارض طبعا مع الاستعانة بمصلحة الاشغال العامة وعندما اكتمل بناء النادي كانت مايو قد بدلت ثوبها ايضا متم ازاحة القومين الكان ثقلهم الاساسي في منطقة الخرطوم 3 ووتنكرها لاخر شعارتها قبل ان تلبس الجبة الاسلامية بعد الافتتاح تم تعين ادارة للنادي من الخرطوم3 والخرطوم2 ولابعاد اولاد السكة حديد والسجانة وناس الشوارع الموجود شرق نادي الاسرة وراء سينما جنوب قررت ادراة النادي الجديدة عمل رسوم اشتراك للاسر جنيه في الشهر (شوف الجنيه كان بساوي كم من راتب عمال السكة حديد وبتاعين الكارو) ومن هنا تم طردنا ومازال فرناقة قفف التراب تملئ حلوقنا من عمل السخرة هنالك .وكانت فرصنا الوحيد للتسلل لنادي الاسرة ايام الاعياد والاسواق الخيرية مرات كدة الدخول بكون مجانا او بنط بفوق السلك نلعب في الطوطحانيات ولم نهم بالانصراف نخرب لنا كم حاجة كدة ونكسر لينا كم كرسي وندق لينا كم واحد ونفرتق ...
الاخ ناذر
الكوتش حنفي المقصود هنا حنفي المكي ود شيخ الطريقة الاسماعلية المقابلة لزاوية البرهانية الان زاويتهم خلوة كبيرة فيها جامع وطلاب لحفظ القرآن

الدكتور المشرف ارجع ليك تاني والذكريات ذات شجون التحرش كان بتم بين عصابة الكضمي واولاد السكة حديد اما اولاد نمرة3 فاولاد السكة حديد كانوا حاقرين بيهم عديل واستاد الخرطوم ولا السوق العربي ده ما بقدروا يمشوا الا بجو بالمنطقة بحي باريس من هناك...
ولا يركبوا باص السجانة من محطة العداد من امام دكتور ادهم الله يرحم وناس فريق العروبة هم شهودي ....

نادر بجي ليك لاحياء نمرة3 ودكاكين واحد واحد والطاحونة الذكرتها برضو بجيها ليك كان اسم طاحونة عوض (بس ما تسالني من بيوت الاحرار)

وللي الوقت داك واشوقي لاولاد نمر 3 وذكرياتهم الحلوة خاصة اولاد كبروس والكوباني والتربي وناس نميري والناس الكانو معاي في مدرسة حي عبدالمنعم وعبدالمنعم المتوسطة (طبعا عبدالمنعم دي كانت معهد ديني وفي مايو تم تحويلها لمدرسة متوسطة) فجيرتهم لاتنسى

عمار ود القبائل

Quote: ناس كبروس يا دكتور بيتين في الخرطوم 3 عرفات كبروس واخوه ممدوح ديل اولاد عم ناس الشاذلي كبروس (الكان عندهم دكان العجلاتي جنب جزارة الشايب في سوق عبدالمنعم

نحنا كان بيتنا فاتح في بيت اولاد كبروس لو بتذكر عمك المرحوم ابراهيم الشكيري جدنا. اولاد عمك المرحوم نصر كبروس الاتولدوا في السعودية هم: محمد, مجدي, مرتضي وممدوح ومعاهم بتين. اولاد عمك المرحوم ابراهيم كبروس والعندهم دكان العجلات هم: شاذلي, حسين, سيف, عماد. والصغير نسيت اسمو واربعة بنات. عرفات ده اصلو ما عندهم.
فعلا ذكريات ميدان الجيل وفريق العروبة ناس نوري والفاتح ياسين وجون والقون عبد الرحيم كوباني وشوت البوز...واذكر فريق النجم الاحمر بتاع السكة حديد

Quote: الكوتش حنفي المقصود هنا حنفي المكي ود شيخ الطريقة الاسماعلية المقابلة لزاوية البرهانية الان زاويتهم خلوة كبيرة فيها جامع وطلاب لحفظ القرآن

كيف حنفي الكوتش في شارع بينتا وانت ماشي الي دكاكين الجاك...والمطبعة بتاعت عمك الحنفي عليه رحمة الله....كما قلت ذكريات لها شجون.

Quote: الدكتور المشرف ارجع ليك تاني والذكريات ذات شجون التحرش كان بتم بين عصابة الكضمي واولاد السكة حديد اما اولاد نمرة3 فاولاد السكة حديد كانوا حاقرين بيهم عديل واستاد الخرطوم ولا السوق العربي ده ما بقدروا يمشوا الا بجو بالمنطقة بحي باريس من هناك... ولا يركبوا باص السجانة من محطة العداد من امام دكتور ادهم الله يرحم وناس فريق العروبة هم شهودي ....

فعلا كان ده الحاصل بس برضوا كنا بنسدي دقتنا لمن تجو ماشين السينما ولا كمان تمشوا تشقو ميدان العروبة وبي فلفلة الي السينما وطبعا اولاد السكة حديد كانو شرامة بخمشو ليهم كم باسطة كدة من ناس فلفلة

ايام جميلة ايام القطار بسافر بمواعيد تظبت ساعتك عليه الله اجازي الكان سبب عولاقنا

معزتي لك واعمل حساب ناذر ما يولع النيران

Quote: إنت برضو خرطوم تلاتابي !!! الناس دي كلها طلعت (من إندنا) !!

لا وحياتك انا من مواليد امدرمان ودالبنا (بي ود درو)
وقضيت من ذكرياتي بالخرطوم في تلاتة اكثر واجمل اوقاتي
ولكن انتهينا انا واخوي دينق "حناكيش" العمارات

Quote: وليد صفوت انت وليد صفوت بتاع كمبوني الخرطوم ولا واحد تاني

يادكتور انا ياهو زاتو وليد صفوت بتاع كمبوني الخرطوم..
انا ودينق...

Quote: Quote: بالمناسبة هل بشير الراستا بتاع المنقا لسة موجود بشير دا ما ادونا ليهو لكن كنا لمن نشتهي ناكل منقة بنتلب في جنينة الجامع المزروع فيها شجر منقة كتير وبنطلع فوق في الشدرة ونقعد ناكل لمن يجينا نًُفاخ أو يجي الغفير عمك الرشيد يسكنا !!

بشير راستا كان عندو دكان عصير مقابل بوابة علي حران...
دكان له سلعة واحدة فقط... عصير منقا بالخلاط مع ملاحظة
عدم توفر اللاكواب فكان التعاطي من جك الخلاط مباشرة...

ودى تلاتة يا حـــــــــــــــلاتة
وجديقة القرشى ولى عودة ....

Quote: يادكتور انا ياهو زاتو وليد صفوت بتاع كمبوني الخرطوم.. انا ودينق...

طيب انا اخو هشام المشؤف مولانا...ما عارف انت دفعتو . دفعتكم ناس اسامة ومعاوية محمد الامين وليد مادبو ولا انا غلتان...

Quote: حبيبنا الامين سلامي واشواقي انا غايتو كان الله مده في العمر اول مشية للسودان بصل الناس دي كلها. تذكر دورة رمضان في نادي الاسرة في ميدان الباسكت والعراضات الصغار !!! سلامي

دكتور المشرف
كيف حالك
والله انا مشتاق ليهم كلهم
ودورة رمضان براها البتذكرها
والله بتذكر من ناس القوصي لحدي البوفيه الفي نادي الخرطوم 3 جار بيت ناس ابو الجاز
ياجماعة مافي زول يرسل تلفون حبسه

Quote: الكان عندهم دكان العجلاتي جنب جزارة الشايب في سوق عبدالمنعم

عمار عبدالله عبدالرحمن
اولا كيف حالك ورمضان كريم
طيب الكان البين دكان ناس كبروس وجزارة احمد الشايب دا منو؟
بالمناسبة احمد الشايب غير محمد الشايب ( كازا )
احمد الشايب الجزار من الفتيحاب ومحله اصلا حق ناس الاستاذ حسن بتاع منتدى الخرطوم جنوب حاليا ومعهد الالة الكاتبة سابقا الجمب حديقة القرشي
اما محمد الشايب كازا فهو اداري في نادي الخرطوم 3 واصلا من الكدرو وهو جار بقالة منيرفا الحيطة بالحيطة بتاعة ناس عماد وابو عماد دا كان راجل طيب ونضيف جدا وعفيف اظن توفى
اذكر مره سالته من سر اسم منيرفا حكى لي وضحك

Quote: والكوباني

مسئول من الخير صديق كوباني وين بالله

خالد ...

Quote: لكن يا ناذر ما قلت لي البيت دة بيت ناس منو يتخيل لي بتاع ناس ناصر محمد الخليفة بتعرفو !!!!

بالمناسبة يا خالد ..

الامورة دي :



دي بِتُو

عزيز ..

Quote: والله يا ناذر كنت بسمع الناس بسموها المدرسة الفرنسية، لكن ما عندي فكرة مين الذي أطلق عليها إسم المدرسة الفرنسية أو نوع المنهج الذي كان يدرس فيها. إحتمال كانت مدعومة من قبل السفارة الفرنسية أو البعثات التبشرية. وأذكر كان الطلبة يلبسون قمصان بيضاء وبناطلين سوداء مع الكرفات وأشكالهم مختلفة أجانب أولاد دبلوماسيين وسودانيون من أولاد العوائل (المبوسطة). لأنه كنا نشاهد سيارات فخمة مرسيدس معظمها عليها لوحات دبلوماسية تنزل الطلبة وتعود وقت الظهيرة لتنقلهم من المدرسة. لكن بالنسبة لشخصي إلتحقت بالمدرسة بعد أن تم تحويلها الى النظام السوداني وتغيير أسمها الى الخرطوم الجديدة. أها قصرت معاك في المعلومة دي؟

لا لا ما قصرت تب .. الله يديك العافية ..

Quote: أفسح المجال للناس القدام في المنطقة لكي يزودونا بما تجود به قريحتهم من معلومات عن هذه المدرسة

الناس القدام ما فاضين للمدرسة ، قريحتم كانت مشغولة بي عمل الكمائن والربيط في المصاطب لي ناس السكة حديد

دكتور عباس ..

Quote: وقد حاولت جهات اكاديمية لها صلة جوار استقطاع جزء من النادي لصالحها وهي تعلم صعوبة الامر ولكنهم حاولوا ,

لو قصدك ناس كلية البيان فهم في النهاية نجحوا في إيجار جذء كبير جداً من مساحة النادي لمدة كم سنة كدة جهة عاطف نميري لكن شراء ما قدروا ، وعلى كل حال عقدهم إنتهى وهسي رحلوا للمقرن حيث مباني الكلية الجديدة ..

Quote: ويكفي الرجل ان خلدته الذاكرة الشعبية ونسيته الرسمية .

أي والله .. لن ينس اهل الخرطوم المرحوم عبد المنعم محمد وفضائله عليهم ..

عمار ..

Quote: وفعلا قامت بحشد شباب منطقة الخرطوم جنوب البتشمل السكة حديد والخرطوم ثلاثة والسجانة وعملت بيهم نفير تعمير النادي وتجمع شباب المنطقة وطبعا كان لاولاد السكة حديد القدح المعلى (فريق النجم الاحمر وفريق العاصفة (العاصفة كان ضمن رابطة الخرطوم غرب والنجم الاحمر رابطة الخرطوم جنوب الكان اسم ميدان الجيل الان فيه مبنى المركز الثقافي الامريكي) وبعد العمل الدؤب من ازالة التراب من الميدان

Quote: وعندما اكتمل بناء النادي كانت مايو قد بدلت ثوبها ايضا متم ازاحة القومين الكان ثقلهم الاساسي في منطقة الخرطوم 3 ووتنكرها لاخر شعارتها قبل ان تلبس الجبة الاسلامية بعد الافتتاح تم تعين ادارة للنادي من الخرطوم3 والخرطوم2 ولابعاد اولاد السكة حديد والسجانة وناس الشوارع الموجود شرق نادي الاسرة وراء سينما جنوب قررت ادراة النادي الجديدة عمل رسوم اشتراك للاسر جنيه في الشهر (شوف الجنيه كان بساوي كم من راتب عمال السكة حديد وبتاعين الكارو) ومن هنا تم طردنا ومازال فرناقة قفف التراب تملئ حلوقنا من عمل السخرة هنالك

يعني الحكومة كانت مشغالكم سخرة زي الناس الحفروا قناة السويس عشان تبنوا لينا النادي وفي النهاية كرتوكم من الشغلة !!

يا حرااااام والله ناس المشرف ما ليهم حق يربطوا ليكم قدام ناس كبروس !!

بقت عليكم ميتة وخراب ديار مني ومنكم كنت احتل النادي وأطالب بي تقسيم الثروة والسلطة

Quote: وناس نميري

نميري لعاب الكورة أخو عادل ؟!!

وليد صفوت ..

Quote: ولكن انتهينا انا واخوي دينق "حناكيش" العمارات

الغريبة ما قاعد تجيب الكورة من الآوت زيو في البوستات

Quote: عصير منقا بالخلاط مع ملاحظة عدم توفر اللاكواب فكان التعاطي من جك الخلاط مباشرة...

دي غايتو بالغتو فيها على الاقل مفروض يصفيها ليكم من (التٍفٍلْ)

Quote: Quote: ولكن انتهينا انا واخوي دينق "حناكيش" العمارات الغريبة ما قاعد تجيب الكورة من الآوت زيو في البوستات

معليش يا ناذر.. دينق معذور... ما بيعرف يلعب كورة
ده ثقافتو باسكيت بولية...

Quote: Quote: عصير منقا بالخلاط مع ملاحظة عدم توفر اللاكواب فكان التعاطي من جك الخلاط مباشرة... دي غايتو بالغتو فيها على الاقل مفروض يصفيها ليكم من (التٍفٍلْ)

يسفي شنو ياناذر؟؟؟ ده مرة سقانا بالجك والخلاط لسة مدور....

يادكتور محمد... راجع المسنجر...

اما عرفات كبروس..
فاعتقد ان هناك خلط للشخصيات
فعرفات هو الاخ الاكبر لمدحت ومحمد يوسف
اولاد بقالة الجمهورية بسوق الخرطوم٢
وكانو اصدقاء لا يفترقون مع اولاد كبروس
عند عودتهم من السعودية وخاصة مع عماد
وكان ايضا يلازمهم بكري محجوب العائد من السعودية
لفترة قصيرة قبل الخلاف الشهير امام النادي
و مغادرته للشلة قبل الهجرة لبريطانيا

ياناذر

Quote: الناس القدام ما فاضين للمدرسة ، قريحتم كانت مشغولة بي عمل الكمائن والربيط في المصاطب لي ناس السكة حديد

دي مبالغة
ياخي نحنا منما قمنا ليقينا المدرسة مسمينا الخرطوم الجديدة ,,,,لكن خالد الحاج عجيييييز بيكون من الدفع الاوائل الدرست في الفرنسية

وليد راجع الماسنجر....بالمناسبة بروفايلك يجوع في رمضان...عليك الله ياناذر شوف الراجل ده موصف الاكلات الشهية دي كيف!!!!

ناذر
اولا التحية والتقدير
ورمضان كريم
اعتذر ليك بشدة الماسنجر ضارب ندي
النهار ده جاي خبير اجنبي لتعليمي الألوان بابسط الطرق وطريقتك اولها
النادي العريق 3 قدمت فيهو اول تجربة لي في دراما الطفال التلقائية وعملنا عرض حضره وزبر الثقافة وقتها ( بونا ملوال ) وتم تصوير العرض وتوثيقه بجريدة الأيام هذا النادي له الفضل في تطور الرياضة والفن والثقافة
كلنا معكم من اجل ان يستمر هذا الصرح ناديا يجمع الشباب والأسر ويوحد العوايل ويحمي النشء
من الضياع هذا هو الهدف الأساسي من وجوده وهو يقدم الخدمة للخرطوم كلها وليس 3 فقط
معك في دعوتك النبيلة
ولك المودة والمحبة[/purple]

وليد ..

Quote: معليش يا ناذر.. دينق معذور... ما بيعرف يلعب كورة ده ثقافتو باسكيت بولية...

وفي دي برضو بيجيب الكورة من الآوت

وحتى لو كانت ثقافتو بلي فريد برضوأنا متاكد بيكون بيجيب البلي من برة (اللين)

أبو كدوس دا ربنا يهديو ساي

Quote: يسفي شنو ياناذر؟؟؟ ده مرة سقانا بالجك والخلاط لسة مدورة....

إستغفر الله العظيم دا شنو الـ كنتو بتعملوا فيهو زمان !! شرطتو عينا قدام ناس الأحياء التانية

دكتور المشرف ..
إنت الظاهر رمضان فرق معاك بدري السنة دي

Quote: ,,,,لكن خالد الحاج عجيييييز بيكون من الدفع الاوائل الدرست في الفرنسية

خالد الحاج ما معانا هنا يا زول .. دا عزيز عيسى صاحب الكلام دا

رسالة من خالد الحاج .
أخي الحبيب ناصر محمد الخليفة
تحياتي لك وللأسرة الفاضلة

أحزنني الخبر بحق أنهم يا ناصر يقتلون حتى أحلامنا!!
أرجو أن يتحول الأمر من مجرد إحساس بالألم إلي تفاعل واحتجاج ندعو فيه إلي إيقاف عملية البيع لمجمع الأسرة
والمنطقة يا ناصر لا تحتاج إلي غابات أخري من الأسمنت يكفي ما صنعوه يا صديقي بحديقة القرشي وحديقة الحيوان و... و ...
هذا النادي هو الرئة المكان المعافي للأسر وللأطفال وللعجزة بالمنطقة وما جاورها فلا تتركوه يتسرب من بين أيديكم.





عريضة موجهة للسيد رئيس الجمهورية والسيد والي ولاية الخرطوم تدعو للتراجع عن فكرة بيع النادي:
نص العريضة :

Quote: السيد رئيس الجمهورية عمر أحمد البشير السيد والي ولاية الخرطوم تحية طيبة نحن الموقعون أدناه نلتمس إعادة النظر في عرض مجمع نادي الأسرة بالخرطوم 3 للبيع هذا الصرح العظيم يمثل الرئة والمتنفس للأسر والأبناء في منطقة الخرطوم 3 وما جاورها وهو مركز تعليمي تثقيفي رياضي هام ووجوده ليس ترف من مهام الولاية توفير الأماكن المعافاة للترويح عن المواطنين وليس هدمها وقيام غابة أخري من الأسمنت هو آخر ما تحتاجه المنطقة ندعو للتراجع عن فكرة البيع وتسليم مجمع الأسرة لوزارة الشئون الاجتماعية مع إزالة التعديات التي تمت عليه في سابق الأعوام ولكم الشكر

http://www.gopetition.com/online/9798.html
الرجاء الضغط علي الرابط وتوقيع العريضة تضامنا مع أهالي المنطقة:

كيفية التوقيع .

بالضغط علي الرابط.
ثم الضغط علي (Sign The Petition) أنظر الصورة (1) المربع الأحمر بالرقم (1)



يمكنك مشاهدة توقيعك وكذلك إرسال العريضة للأصدقاء والمعارف بالضغط علي (Signature List) و (Tell A Friend) أنظر الصورة (2) المربعات باللون الأحمر بالأرقام (2) و (3)[/size]




وهذا ما كتبته أنا عن الموضوع يا صديقي :

http://sudaniyat.net/vb/showthread.php?p=44397#post44397

رجاء من كل موقع ومتعاطف أن يضع الرابط الخاص بالعريضة في كل مداخلاته حتى في البوستات الأخري
الحقوق تنتزع ولا تستجدي.

محبتي لك ولكل الأحباب هنا

خالد الحاج

كيفك يا السني ..

Quote: النهار ده جاي خبير اجنبي لتعليمي الألوان بابسط الطرق وطريقتك اولها

والله بعد طريقتي المبسطة دي خبيرك الأجنبي دا إلا يجيب ليك معاهو كيبورد ملون باناسونيك 21 بوصة حتين تلفق معاك

Quote: النادي العريق 3 قدمت فيهو اول تجربة لي في دراما الطفال التلقائية وعملنا عرض حضره وزبر الثقافة وقتها ( بونا ملوال ) وتم تصوير العرض وتوثيقه بجريدة الأيام هذا النادي له الفضل في تطور الرياضة والفن والثقافة كلنا معكم من اجل ان يستمر هذا الصرح ناديا يجمع الشباب والأسر ويوحد العوايل ويحمي النشء من الضياع هذا هو الهدف الأساسي من وجوده وهو يقدم الخدمة للخرطوم كلها وليس 3 فقط معك في دعوتك النبيلة

يا سلااام يا السني على الإضافة ..
ودا برضو بيثبت إنو النادي كان رائد في الحركة المسرحية الكانت في البلد ..
يا خي والله مايو دي كانت روعة وحاسي إني داير اعمل لي بوست إسمو (عاشت مايو) بس شايف حسين ملاسي عندو بوست بي نفس الفكرة

شكراً جزيلاُ أخي الجيلي احمد ..

قرأت الموضوع الأن في سودانيات .. وحقيقة كنت متأكداً جداً أن الأخ خالد الحاج سيكتب عن ذكرياته في هذا النادي العريق ..

شكرأ لك أخي خالد .. وارجو من الجميع قراءة الموضوع في سودانيات كاملاً هنا :



وأرجو منكم ألا تنسوا التوقيع على العريضة ..
وإنشاء الله يفلح عملنا هذا في إنقاذ ما يمكن إنقاذه ..

منتظرين توثيق الشخصيات الفنية والثقافية العاشت في محيط نادي الأسرة وحي الخرطوم 3 ..
وطبعاً الأغاني الكثيرة الإتقالت في الحي .. والإنكتبت عن الحي ..

نعيد وضع رابط بوست الأخ خالد الحاج هنا للأهمية ..

فوق
الموضوع دة لازم يكون فوق

فوق
تم التوقيع بحمد الله.
شكرا ناذر...شكرا خالد الحاج
محمد علي المشرف مختار

شكراً خالد شكراً المشرف ..

إستمتعت والله معكم في هذه البوست ..

ونرجو ممن لم يوقع على عريضة الصديق خالد الحاج ان يسارع بالتوقيع ..

فووق

فوق

لما اجيكم

فوق
لمن يجي عمار

****

كيفك يا ناذر ..
من أول ما نزل البوست دا وأنا عايز أكتب فيهو ..
والكتابة ليها رافع زي القدم ..
ياخي النادي دا ليهو تاريخ عريق وياما شهد نشاط وتجمعات كبيرة ومكان ترفيه ومتنفس للكثيرين من أهل المنطقة وأهل الخرطوم عموم ..
وحزني ما طاله من إهمال طيلة الفترة الماضية ..
وتغول يد السلطة الحاصل الآن لبيعه لأحد المستثمرين وعمل مكانه فندق لشئ محزن سيتضرر منه الكثيرين ..
ولأبد من وقفة لكي لا تعبث به أياديهم والتي شوهت أي شئ جميل بداعي التطوير ولكن كل ذلك لفايدتهم الخاصة ..
شكراً على هذا البوست الجميل ..

أها الجو كيف معاك في رمضان ..
تحياتي لحسن محمود كثيراً وقول ليهو منتظرين الشريط ..

كن بخير يا صديقي ..

معتصم سلامات ..

وشكرا كتير للمشاركة في البوست ..

ونتمنى ان يتوقف بيع جميع متنفساتنا في الاحياء ..

Quote: أها الجو كيف معاك في رمضان .. تحياتي لحسن محمود كثيراً وقول ليهو منتظرين الشريط .. كن بخير يا صديقي ..

الجو حااااار والله .. ربنا يلطف بس ..
حسن محمود زول كسلان جدا رغم نصايحي ليهو لكن ناوي ألمو في الشاعر الكبير مدني النخلي بإذن الله .

كل سنة وانتو طيبين\

في مثل هذه الايام والعيد علي الابواب تكون الخرطوم ثلاثة مرتع خصب لنا (اولاد السكة حديد) فالحركة تكون نهارا مراسيل الي بقالة منيرفا لجلب اغراض العيد نهارا من بيض ودقيق فينو وبكانبودر وفي المساء تكون الحركة جماعية صوب الافران خاصة فرن عم عثمان المجاور لزاوية الطريقية الاسماعيلة حاملين صوان الخبيز معبقين بفرحة العيد ... ونبداء باللعب في ذلك الميدان ابتداء بين شدة وانتهاء بالرمة والحراس وطبعا اولاد نمرة 3 يتفرجو من جنب البيوت والبغرب مننا يا ويل وسهر ليل الا تشيل كرعينو ولا يحجزوا سواقين التاكسي الكانو بسكن في جوار الزاوية مقابل بيت ناس عمر الزين او يحلو مننا الحلاق طه ود البشاقرة ... وتكون المنطقة مستباح الي العاشرة مساء .. حيث تنتهي المراسم باكل الفتة دكان عم ميرغني الحاج سعيد مع لطشة البيبسي من دكان عم علي المجاور لمدرسة مصطفى حسن ( دكان عم ميرغني السرقة منو عيب لانو ما كان فيه لافتة الدين ممنوع والعتب مرفوع والرزق علي الله) ...
وعشان ما ينط لي دكتور المشرف في حلقي كنا نتحاشى اثنين من اولاد الخرطوم 3 حلمي عوض اخو الممثلة بلقيس عوض وعم الطريفي ضابط الصحة


ده لزوم رفع البوست لما اجيكم لنادي الاسرة والعيد والاسواق الخيرية............

الفنان ناذر طبعا ديل باعوا السكة حديد ذاته والان البلدوز شغال في بيوتنا طبعا لزوم تنظيف المكان للفندق المرتقب ..........

اخي ناذر شكرا على التوثيق الرائع لهذا النادي العملاق الذي كان يجمع كل المناشط الرياضيــــة والاجتماعية والخدمية ..
في فترة سابقة كانت تمارين كورة القدم هناك . ومعنا من الاصدقاء اولاد الخرطوم تلاتة .

طارق نمر .. ايمن نمر . فرزدق .. حذيفة .. ازهري حاج سعيد .. قربيب الكوتش حسن دقدق .. فريد.

السر حسين .. هاشم عثمان .. عمر حاج سعيد واخوه محمد .

التحية عبرك لهم جميعا وللصديق النسيب الشاعر صلاح حاج سعيد وكل افراد اسرته . والتحية لكل من يسكن الخرطم 3

تصدق يا ناذر كل وقتي كان في الخرطوم تلاتة رغم ذلك دستوري لم ينزل بها ولله الحمد..



ود الباوقة

عمار أخيراً جيت

Quote: في مثل هذه الايام والعيد علي الابواب تكون الخرطوم ثلاثة مرتع خصب لنا (اولاد السكة حديد) فالحركة تكون نهارا مراسيل الي بقالة منيرفا لجلب اغراض العيد نهارا من بيض ودقيق فينو وبكانبودر وفي المساء تكون الحركة جماعية صوب الافران خاصة فرن عم عثمان المجاور لزاوية الطريقية الاسماعيلة حاملين صوان الخبيز معبقين بفرحة العيد ... ونبداء باللعب في ذلك الميدان ابتداء بين شدة وانتهاء بالرمة والحراس وطبعا اولاد نمرة 3 يتفرجو من جنب البيوت والبغرب مننا يا ويل وسهر ليل الا تشيل كرعينو ولا يحجزوا سواقين التاكسي الكانو بسكن في جوار الزاوية مقابل بيت ناس عمر الزين او يحلو مننا الحلاق طه ود البشاقرة ... وتكون المنطقة مستباح الي العاشرة مساء .. حيث تنتهي المراسم باكل الفتة دكان عم ميرغني الحاج سعيد مع لطشة البيبسي من دكان عم علي المجاور لمدرسة مصطفى حسن ( دكان عم ميرغني السرقة منو عيب لانو ما كان فيه لافتة الدين ممنوع والعتب مرفوع والرزق علي الله) ... وعشان ما ينط لي دكتور المشرف في حلقي كنا نتحاشى اثنين من اولاد الخرطوم 3 حلمي عوض اخو الممثلة بلقيس عوض وعم الطريفي ضابط الصحة

والله الميدان دا أنحنا كنا قاعدين نمشي نلعب فيهو زمان لكن كنا لمن ا########## تمغرب بنخاف من اولاد الحلة لانهم كانوا بيفلقونا بالحجار وبيسيرونا زفة كاربة لحدي الجامع بتاع عبد المنعم

Quote: ده لزوم رفع البوست لما اجيكم لنادي الاسرة والعيد والاسواق الخيرية............

يا سلااام ياخ !!!!

ذكرتني بي الأسواق الخيرية وألعاب الروليت القالوا عليها قمار ديك والجوائز الكلها عصائر روزانا وطحنية سعيد ..

Quote: الفنان ناذر طبعا ديل باعوا السكة حديد ذاته والان البلدوز شغال في بيوتنا طبعا لزوم تنظيف المكان للفندق المرتقب ..........

شا يفم ماشين كويس في البنيان والتجهيزات ، وطبعا المشروع دا تابع لي ولاية الخرطوم وتحديدا إدارة المعاشات لو صحت التسمية ..

أحمد عبد الله !!!

Quote: (عدل بواسطة Ahmed Abdallah on 20-10-2006, 01:32 ص)

يا زول ما تبقى قدرها !! مالك سحبت المداخلة

ود الباوقة ..

Quote: طارق نمر .. ايمن نمر . فرزدق .. حذيفة .. ازهري حاج سعيد .. قربيب الكوتش حسن دقدق .. فريد. السر حسين .. هاشم عثمان .. عمر حاج سعيد واخوه محمد .

الكتراااااااابة .. الناس ديل دفعتك !!!

تراكا زول قديم خلاص .. إنت اظنك من قبل ما يسموهو ميدان عبد المنعم زااتو

Quote: تصدق يا ناذر كل وقتي كان في الخرطوم تلاتة رغم ذلك دستوري لم ينزل بها ولله الحمد..

ولا تتحسس يا راجل !! أنحنا اولاد تلاتة عارفين كمية الضهب البيجيها من برة وعارفين المغريات الفي تلاتة البتخليهم يتحاوموا فيها

سلامات ..
لا للتضييق على الناس وحرمانهم من أقل الحقوق

حبيبنا عمار والفنان الرائع ناذر
كل سنة وانتو طيبين

Quote: كل سنة وانتو طيبين\ في مثل هذه الايام والعيد علي الابواب تكون الخرطوم ثلاثة مرتع خصب لنا (اولاد السكة حديد) فالحركة تكون نهارا مراسيل الي بقالة منيرفا لجلب اغراض العيد نهارا من بيض ودقيق فينو وبكانبودر وفي المساء تكون الحركة جماعية صوب الافران خاصة فرن عم عثمان المجاور لزاوية الطريقية الاسماعيلة حاملين صوان الخبيز معبقين بفرحة العيد ... ونبداء باللعب في ذلك الميدان ابتداء بين شدة وانتهاء بالرمة والحراس وطبعا اولاد نمرة 3 يتفرجو من جنب البيوت والبغرب مننا يا ويل وسهر ليل الا تشيل كرعينو ولا يحجزوا سواقين التاكسي الكانو بسكن في جوار الزاوية مقابل بيت ناس عمر الزين او يحلو مننا الحلاق طه ود البشاقرة ... وتكون المنطقة مستباح الي العاشرة مساء .. حيث تنتهي المراسم باكل الفتة دكان عم ميرغني الحاج سعيد مع لطشة البيبسي من دكان عم علي المجاور لمدرسة مصطفى حسن ( دكان عم ميرغني السرقة منو عيب لانو ما كان فيه لافتة الدين ممنوع والعتب مرفوع والرزق علي الله) ... وعشان ما ينط لي دكتور المشرف في حلقي كنا نتحاشى اثنين من اولاد الخرطوم 3 حلمي عوض اخو الممثلة بلقيس عوض وعم الطريفي ضابط الصحة ده لزوم رفع البوست لما اجيكم لنادي الاسرة والعيد والاسواق الخيرية............ الفنان ناذر طبعا ديل باعوا السكة حديد ذاته والان البلدوز شغال في بيوتنا طبعا لزوم تنظيف المكان للفندق المرتقب ..........

رغم فرد العضلات رجعتنا الي اجمل ايام العمر....
تحياتي واحترامي لك
محمد علي المشرف مختار

حبيبنا عمار شايفك زعلتي معتز....ودي مداخلة منو

Quote: خالص التحايا شباب البوست.. ماعندى كتير لكن مداخلة العزيز عمار بتستفز الزول.. غايتو نحن ياعمار ماقعدين نتلاقى مع أولادكم كتير عشان يعملو فينا عمايل ناس تلاته ديل.. نحن ماسكين روحنا ومؤدبين ؛لكن بنتلاقى معاهم في "مجمع طلعت فريد" بعدين ياخ لو بتعرف ناس (باشمندس سامى موسى وهاشم باسوة) اولاد( الجزيرة ابا) ؛من اولاد السكه حديد.. ثم ثانية كفارة ليكم بيوتكم والله اصلو ماعملو فيكم حسنه لكن ده بكون حق الدق والازى اللحق باولاد 3 لوووول شكيتكم على الله اولاد السكه حديد.. والله كانت ايام سمحه ؛لكن جنس جرى ناس اولاد تلاته ده ما ادونا ليهو وعليك دينك ماتخليهم صفحه ينومو عليها خصوصا وانا زعلان من ناذر ده.. وحق دكتور المشرف ده اكبتو بى حزافيرو "عريهم وافضحهم " لزوم النضال وكده يافرده.. يلا ولى قدام تروتسكى نيابة عن اولاد الخرطوم 2 وحى المطار التحايا النواضر..

معزتي لك وله
محمد علي المشرف

المشرف
الخنساء
تروتسكي


كامل إحترامي لكم ..

سأعود ...

Quote: "مجمع طلعت فريد"

المحترم تروتسكي مجمع طلعت فريد بجيه ليك ..
خاصة ذكريات وليم اندرية وفريق السلة
و الدورة المدرسية ويا حليل مدرسة دار النعيم الثانوية بنات

كل سنة وانت طيبين

في اللحظة دي بتذكر زفة العيد بتاع الطريقة البرهانية
ودقات النوبة بترن في اضاني والبيارق مرفوعة وصت المدائح يجيب الطاشي وهم ماشين في الشارع الفاصل بين السكة حديد ونمر 3 امام بيوت ال الحجزي وال نميري الي صينية الكبري جنب بيت ناس القوصي
ودورانهم من هنالك لبيت الشيخ محمد عثمان عبده البرهاني جوار مسجد عبدالمنعم محمد

كل سنة وانتو طيبين

Quote: كل سنة وانت طيبين في اللحظة دي بتذكر زفة العيد بتاع الطريقة البرهانية ودقات النوبة بترن في اضاني والبيارق مرفوعة وصت المدائح يجيب الطاشي وهم ماشين في الشارع الفاصل بين السكة حديد ونمر 3 امام بيوت ال الحجزي وال نميري الي صينية الكبري جنب بيت ناس القوصي ودورانهم من هنالك لبيت الشيخ محمد عثمان عبده البرهاني جوار مسجد عبدالمنعم محمد كل سنة وانتو طيبين

كل سنة وكل اهل ثلاثة طيبين

Quote: و الدورة المدرسية ويا حليل مدرسة دار النعيم الثانوية بنات

عمار ياعفريت

كل سنة وانتو طيبين
محبتي واحترامي
محمد علي المشرف مختار الشكيري

كل عام وانتم بخير ..

التهنئة موصولة لجميع المشاركين في هذا البوست ..

\
\
يوميا بانتظركم هنا
up