Post: #1
Title: ما تهتمو للأيام ... ظروف بتعدي ...
Author: ناذر محمد الخليفة
Date: 05-06-2007, 10:03 PM
|
Post: #2
Title: Re: ما تهتمو للأيام ... ظروف بتعدي ...
Author: ناذر محمد الخليفة
Date: 05-06-2007, 10:14 PM
Parent: #1
ما تهتمو للأيام ظروف بتعدي
طبيعة الدنيا زي الموج تجيب وتودي ..
ما تهتمو أصلو الناس حياتا ظروف
بتتحكم تغير كل خط مالوف
مصير الزول حياتو يا ما فيها يشوف
وفي دنيانا بتلاقي الفرح والخوف ..
سبيل الزول عشان يفتح طريق يا دوب
يكون زادو البيشيلو معاهو شوق مشبوب
عشان يلقى إنتصارو يا زمن محبوب
يضوق المرة ويتوشح بصبر أيوب
جمال الدنيا في لهفة سرور وجمال
في فرح الخواطر الطيبة في الامال
في شروق الصباح في بسمة الاطفال
ومهما تظلم الايام ضياء الفال
|
Post: #3
Title: Re: ما تهتمو للأيام ... ظروف بتعدي ...
Author: الأمين عثمان صديق محمد
Date: 05-06-2007, 10:32 PM
Parent: #1
|
Post: #4
Title: Re: ما تهتمو للأيام ... ظروف بتعدي ...
Author: ناذر محمد الخليفة
Date: 05-06-2007, 10:46 PM
Parent: #1
الامين صديق ..
عليك الله طلع للشباب ديل لنك الحفظ للغنية دي عشان انا صوابعيني ووجعوني الليلة من طقطقة الكيبورد 
|
Post: #5
Title: Re: ما تهتمو للأيام ... ظروف بتعدي ...
Author: الأمين عثمان صديق محمد
Date: 05-06-2007, 11:01 PM
Parent: #4
| Quote: عليك الله طلع للشباب ديل لنك الحفظ للغنية دي عشان انا صوابعيني ووجعوني الليلة من طقطقة الكيبورد |
اول مرة اشوف لي واحد يطلب خدمة زي دي
طيب ما تديني الباسورد
تصدق وتامن
والله اول من من سمعتها طوالي رحت لاطشها ونزلتها في الجهاز وهسه بسمع فيها
طبيعة الدنيا زي الموج تجيب وتودي
اللنك جاهز
Save@ Pc
|
Post: #6
Title: Re: ما تهتمو للأيام ... ظروف بتعدي ...
Author: الطاهر ساتي
Date: 05-06-2007, 11:02 PM
Parent: #1
ياسلام عليك ياناذر ....
الاغنية دى وراها قصة جميلة .. سمعتها من شاعرا الرائع عوض جبريل منتصف التسعينات ..
قال في خريف ما تعرض بيتهم لدمار شبه شامل بفعل الامطار
قام الصباح لقى زوجتو حزينة وشايلة هم ..
مشى الشغل حزين .. و هناك قعد فوق حيطة وهو بيفكر في حال زوجتو المهمومة
وبدا يترنم : ماتهتمى للايام ظروف بتعدى
وبعد شوية بدا يكتبا بيت بيت في علبة سجاير ... لحدما وصل البيت انتهى منها
قام لحنا.. وغناها ترباس زى ماهى ..
لكن يوم دعوا ترباس لاحياء حفل للنزلاء بسجن ام درمان
وقام غير الكلام من لاتهتمى الى لاتهتموا ... واتسجلت على كدة
والله ياناذر لو سمعت القصة منو مباشرة وطريقة السرد تدمع عديييييييييييييل ...
والمدهش هو لا يبالي .... والدنيا عنده كان كوم تراب
على كل شكرا ليك ...........
|
Post: #7
Title: Re: ما تهتمو للأيام ... ظروف بتعدي ...
Author: وليد محمد المبارك
Date: 05-06-2007, 11:13 PM
Parent: #6
| Quote: وقام غير الكلام من لاتهتمى الى لاتهتموا ... واتسجلت على كدة |
تغيرت الكلمة من ما تهتمي الى ما تهتموا بطلب من وزير الثقافة حينها عمر الحاج موسى بعد ان راء تاثر السجناء بكلمات الاغنية وبكائهم وتذكر حالهم وطلب من ترباس ان يغيرها من لا تهتمي الى لا تهتموا حتى تكون اغنية عامة موجه الى الجميع
|
Post: #24
Title: Re: ما تهتمو للأيام ... ظروف بتعدي ...
Author: انعام حيمورة
Date: 05-07-2007, 09:14 AM
Parent: #6
| Quote: الاغنية دى وراها قصة |
| Quote: تعرض بيتهم لدمار شبه شامل |
|
Post: #8
Title: Re: ما تهتمو للأيام ... ظروف بتعدي ...
Author: الطاهر ساتي
Date: 05-06-2007, 11:30 PM
Parent: #1
صاح يا الوليد ...
وقصة الاغنية مع رحلة عوض الكاملة في دروب الشعر موثقة في الوان ياريت حبيبنا كمال عوض ينقلها هنا ....
وشكرا ليك يا الوليد
|
Post: #9
Title: Re: ما تهتمو للأيام ... ظروف بتعدي ...
Author: ناذر محمد الخليفة
Date: 05-07-2007, 05:59 AM
Parent: #8
تسلم كتير يا الامين ..
بس أوعك تحفظ الصورة برضو
|
Post: #10
Title: Re: ما تهتمو للأيام ... ظروف بتعدي ...
Author: ناذر محمد الخليفة
Date: 05-07-2007, 06:00 AM
Parent: #1
تسلمو كتير يا الطاهر ووليد على المعلومة ..
ويا ريت لو جانا أخونا كمال عوض ..
|
Post: #12
Title: Re: ما تهتمو للأيام ... ظروف بتعدي ...
Author: الخير محمد عوض
Date: 05-07-2007, 06:38 AM
Parent: #10
اسـعدني هـذا المـسـاء صـوتك يا سـيد شـباب اللطـف
واعـادتني (ظـروف الدنيا زي المـوج) لـزكريات البنفسـج
وقت ان كـان لنا ريش نعرف بـه التحـليق..شـكرا لك نـاذر
|
Post: #11
Title: Re: ما تهتمو للأيام ... ظروف بتعدي ...
Author: عمر الفاروق
Date: 05-07-2007, 06:29 AM
Parent: #1
يا اخوي لا كمال عوض لا كمال حامد انا برضو كنت من الشاهدين على بعض أعمال الراحل عوض جبريل..
ما قاله الأخ الطاهر ساتي صحيح وما قاله وليد صحيح ..
فعلاً كانت قصة القصيدة كما كتب الالطاهر الساتي وتم تغير الأغنية بعد ان تم التغني بها في حفل للسجناء وتم التغيير بعدها لأن السجناء بكوا في تلك الليلة من سماع الأغنية ..
الراحل عوض جبريل جمعتني به جلسات كثيرة وفي مرة من المرات أخرج لي من حقيبته كراس مكتوب من الخمسينيات يحوي معظم قصائده وحكى لي معظم قصصها ..
بالمناسبة أغنية مع السلامة مكتوبة في جنوبية ممرضة في السلاح الطبي..
|
Post: #13
Title: Re: ما تهتمو للأيام ... ظروف بتعدي ...
Author: عفاف أبو حريرة
Date: 05-07-2007, 06:49 AM
Parent: #11
ياناذر ازيك قلنا نمر نسلم عليك ياعريس
|
Post: #14
Title: Re: ما تهتمو للأيام ... ظروف بتعدي ...
Author: حسن الجيلى سعيد
Date: 05-07-2007, 06:51 AM
Parent: #1
صباح الخير على وطن يذخر بأمثالكم ,
كلكم إبداع ,والله ياناذر صوت وصورة
|
Post: #15
Title: Re: ما تهتمو للأيام ... ظروف بتعدي ...
Author: عبد اللطيف بكري أحمد
Date: 05-07-2007, 06:54 AM
Parent: #1
العزيز ناذر،،
بقن عليك (2) طقطقة عود وطقطقة كيبور،،
والحمد لله ال (2) تجيد إحداهن أكثر من الأخرى،،
تذكرني ببطل المصارعة ممدوح فرج: المصرين طبعا
بحبوه جداً وكل إتصال : (أزيكا أكابتن)، ممكن
نشوف مباراة لحضرتك؟؟ (قدن قدن) ،،
وتمر الحلقات ولا يقدم شيء عن مبارياته،،
المهم قبل أسبوع شفنا مباراة لحضرته وكانت
مرمطة في المصارعة ومفبركة وأخد فيها علقة
جامدة،،
أنا كمان من زمان نفسي أسمع حاجة من كابتن ناذر،،
فجاءت الفرصة في هذا الصباح الجميل،،
رائع والله الأداء والإختيار والصوت جميل ودافيء والعزف
مامحتاج كورسات كتيرة من صاحبك داك،،
يميل آداؤك ناحية الفن الراقي للفنانين : الهادي
حامد ، محمد ميرغني (كنت فاكر الشوق)، وإبراهيم حسين
وصالح الضي ، رمضان حسن وغيرهم (مجاهد عقد الجلاد)،،
أتحفنا بالإلبومات القديمة ، الجديد حق السوق مافي زول
سألك منو،، وقلل طقطقة الكيبورد وركز على التانية لتأتي
بالجديد ، وياريت تكلمنا شوية عن مسيرتك في هذا الجانب،،
وأقولها لك ثانية وصادقة: رائع والله ،،
و
very impressive
|
Post: #16
Title: Re: ما تهتمو للأيام ... ظروف بتعدي ...
Author: عماد محمود علي
Date: 05-07-2007, 07:20 AM
Parent: #15
صديقي الجميل ناذر ( العريس )
صباحك ورد ، ، ،،
قلنا نقعد نستمع لجلسة الاستماع دي ونسلم على الأصحاب ونشرب شاي كمان . شكراً ناذر .
|
Post: #17
Title: Re: ما تهتمو للأيام ... ظروف بتعدي ...
Author: ايوب عبدالرحيم
Date: 05-07-2007, 07:29 AM
Parent: #1
ناذر
عن جد سعدت بسماع صوتك
وطبعا دي اول مرة اسمع ليك فيها
وشكلها اخر مرة ؟؟؟ ( بهظر معاك )
وبعدين لاحظت عدة ملاحظات :
استمتعت حقا بالاغنية واداء العزف والصوت الهاديء
يوجد تشابه في الصوت مع هاشم ميرغني ولا يمكن العود هو الخلى صوتك يشبه صوت هاشم
عزف العود راقي وهادي وواثق ومتقن ( طبعا انا بعزف عود عشان كدة بميز كويس ffr .
صنفرة صغيرة :
الترمة الصغيرة الفي شبك العود صلحا بالفوتوشوب في الاغنية الجاية ؟؟؟؟؟؟؟؟
وزود لينا الاضاءة شوية ولا انت خايف الناس يسحروك في وجاهتك
|
Post: #18
Title: Re: ما تهتمو للأيام ... ظروف بتعدي ...
Author: امجد محمد الأمين
Date: 05-07-2007, 07:31 AM
Parent: #1
روعه يا انت يا اسمك مين ..
من الصباح مالكم علينا انحنا ما ناقصين احزان ...
هسي انحنا ما حالنا اصعب من المساجين ...
نحنا في سجن كبير ..
عشان كدا الأغنية لمسة حتات كتيرة فينا ...
التحية للاستاذناذر ..
و التحية لعوض جبريل وكل مبدعين بلادنا ...
|
Post: #19
Title: Re: ما تهتمو للأيام ... ظروف بتعدي ...
Author: abuguta
Date: 05-07-2007, 08:09 AM
Parent: #18
ناذر
وضيوفه الكرام,,,
الاغنية من اجمل اغانى ترباس,,,على حسب تذوقى
خرجت مرة مع الاحباب فى قرى ناغبور لمدة عشرة ايام فى الاجازة فوجدت طالب سودانى
فى تلك القرية,,,جسمه منحول وشكله مهزول,, انزويت معه فى ساحة المسجد وحكى لى ظروفه
مصاريفو مقطوعة ,,وفشل فى الكلية..فقلت له ما تهتم للايام ظروف بتعدى,,
اديتو الفيها النصيب,,وقلت ليه تعال لى فى ناغبور فتوطدت العلاقة بينا,,فوجد فى غرفتى
شريط ترباس ,,فاخذه معه,,,وكان يسمع هذه الاغنية ليل صباح,,
فحاليا هو فى المملكة مغترب,,,ف هاتفنى مرة وقال معاك اخوك لا تهتمو للايام
فقال لى لو لا اغنية ترباس هذه لكنت فى خبر كان,,,سكر وضياع دراسة
ولكن انا بشكرك انت اديتنى الشريط وطالبنى 50 روبية,,, الجديد بالذكر ان الخمسون
روبية تعادل 5 ريالات سعودى و25 جنية سودانى
كنا نفت العيش الناشف بشوربة العدس
ونردد هذه الاغنية
لا تهتمو للايام ظروف بتعدى
|
Post: #21
Title: Re: ما تهتمو للأيام ... ظروف بتعدي ...
Author: ناذر محمد الخليفة
Date: 05-07-2007, 08:30 AM
Parent: #1
سلامي وودي للجميع ..
ما أريد قوله أن الأغنية ليست بصوتي بل هي بصوت الفنان الشاب أمين الشاذلي وكنت قد أنزلت له عدة بوستات في هذا المنبر ..
ولكن أدائه الجميل للأغنية جعلني أدع صورتي معها لشدة إعجابي بهذا الصوت ..
والشكر لكم ..
|
Post: #22
Title: Re: ما تهتمو للأيام ... ظروف بتعدي ...
Author: ناذر محمد الخليفة
Date: 05-07-2007, 08:35 AM
Parent: #1
يمكنكم مراجعة هذا البوست :
|
Post: #23
Title: Re: ما تهتمو للأيام ... ظروف بتعدي ...
Author: عبد اللطيف بكري أحمد
Date: 05-07-2007, 09:11 AM
Parent: #1
Quote: ولكن أدائه الجميل للأغنية جعلني أدع صورتي معها لشدة إعجابي بهذا الصوت ..
والشكر لكم |
ناذر،،
عشان تطلع من المسألة دي لازم (تدع) صورتو مع أداءك في أغنية
وكدا نسامحك، وإلا حنقول ليك ياممدوح فرج : مباراة من بتوعك أكابتن،،
تحياتي ناذر الحبيب،،
|
Post: #25
Title: Re: ما تهتمو للأيام ... ظروف بتعدي ...
Author: رشا سالم
Date: 05-07-2007, 09:23 AM
Parent: #23
الايام مقدور عليها يا اخوي...
كعب خلق الله البتتبلي علي اللناس بالكذب!
|
Post: #26
Title: Re: ما تهتمو للأيام ... ظروف بتعدي ...
Author: Randa Hatim
Date: 05-07-2007, 09:35 AM
Parent: #25
وكعب ازدراء الناس وتجاهلهم والاستخفاف بعقولهم ....
يالله صاحب البوست دا موش هو ناذر نفسو الولع النار امس ولا واحد غيرو؟؟؟؟؟؟ انا جد مستغربه فى الناس البتتداخل مع ناذر الخليفه فى البوست دا وكأن شيئا لم يكن .. مع احترامى ليكم كلكم والله وانتو على راسى من فوق!!!!!! لكن الظلم ظلمات يوم القيامه ... ناذر ظلم ناس وعمم الظلم .. يبقى من العدل انو الناس تطالبو بالتوضيح ورفع الظلم ... على الاقل توضيح التهمه بالدليل القاطع... موش يجى ينزل فى بوستاتو عادي كانو ما عمل شئ وكانو ما مطالب بى شئ .... والله العظيم المفروض انو الناس تقاطع ناذر مقاطعه تامه من جميع اعضاء سودانيزاونلاين لغاية ما يطفى النار الولعا دى ..... المساله ما مسالة بورداب الخرطوم وحماية الامل العام ... المشكله انو ناذر هد بنيان من الثقه والامانه والصدق بدينا نبنى فيهو بعد ما اتهد بيناتنا من سنين .. جمل وكلمات رصاها بدون حساب هد بيها حاجات جميله.. يالله الناس كيف ح تتعامل تانى مع حملات الامل العام الجاية .. هل ح نتعامل تانى بنفس شفافية التعامل فى حملة غاده الهداها ناذر دى ... حقو نكون امينين مع نفسنا ... فى شرخ حصل وسببو ناذر الخليفة.
موش انت يا ناذر القلت فى البوست المحذوف انك ما شيطان اخرس !!!!! هسى رضيت تبقى شيطان مالك؟؟؟؟؟؟
ومازلنا هاهنا منتظرون ......
|
Post: #27
Title: Re: ما تهتمو للأيام ... ظروف بتعدي ...
Author: سيف الدين حسن العوض
Date: 05-07-2007, 09:35 AM
Parent: #25
الاخ ناذر
انا الاغنية دى بهديها للحكومة
وفجاة كده للمعارضة
خاصة المعارضة الاسفيرية
|
Post: #28
Title: Re: ما تهتمو للأيام ... ظروف بتعدي ...
Author: انعام عبد الحفيظ
Date: 05-07-2007, 09:41 AM
Parent: #27
Quote: من اللحظه دى يا ناذر الخليفه ولغاية ما تتكرم بتوضيح الموقف كاملا انا وعدد من البورداب ما ح يكون عندنا شغله فى المنبر دا غير رفع البوستين ديل وفتح بوستات جديده فى حالة الحذف ..
|
زي ما قالت راندا حاتم
وما حنهتم لى أي شئ مش للأيام بس
|
Post: #29
Title: Re: ما تهتمو للأيام ... ظروف بتعدي ...
Author: A.Razek Althalib
Date: 05-07-2007, 09:54 AM
Parent: #27
كتبت رشا سالم هنا: Re: السيد/ ناذر خليفة .. سحب البوست لا يعني التوقف عن سرد ما تبقي !!!!!
| Quote: يا جماعة الحاصل شنو؟؟؟؟؟؟؟؟ |
كانت ما عارفه..
والسبب بعضمة كي بورتيها:
| Quote: انا ماقريت البوست الانتو بتتكلموا عنه دا..! |
وجات متبلية ومتحزمة شايته ضفاري هنا:
| Quote: كعب خلق الله البتتبلي علي اللناس بالكذب! |
يا رشا سالم:
ما تتبلي على ناذر بحكاية شيلني وأشيلكـ وتقعدي تعتلي في البوستات ساكت..
البوست ده موضوعو:
ما تهتمو للأيام ظروف بتعدي
طبيعة الدنيا زي الموج تجيب وتودي ..
ولو عندكـ ما يفيد..
هنا أكتر من بوست بذات خصوص حذف الإدارة لبوست ناذر الخليفة المعنون بي:
ممكن توروني ما عزمتوني في إجتماع الليلة دا ليه ؟!!!
فلو عندكـ كلام دوغري تعالي قوليهو..
ما عندكـ إتكلي..
وهداآآآآكـ درب النادي الألماني..
وقع ليكـ..
|
Post: #31
Title: Re: ما تهتمو للأيام ... ظروف بتعدي ...
Author: رشا سالم
Date: 05-07-2007, 10:07 AM
Parent: #29
يا مستر عبد الرازق..
انا قاعدة في الرياض حقت السعودية دي..
لا عارفه النادي الالماني ولا عارفه غيره..
كل البعرفه ان المدعو نازرالخليفة كتب بوست بيعتزر فيهو بعضمة لسانه
عن اتهامات وجهها للاخوان المحترمين في حملة الامل
الخاصة بجمع تبرعات لعلاج الاخت غادة نوري...
وهو قال بيعتزر..
ونحنا قلنا ليهو ما في زول حيقبل اعتزارك لو ما وضحت قصدك
كان شنو بالكلام الانت قلته..
Quote: يا رشا سالم:
ما تتبلي على ناذر بحكاية شيلني وأشيلكـ وتقعدي تعتلي في البوستات ساكت.. |
عتالة البوستات والالفاظ دي انا ما قعد اتعامل بيها..
ولو ما كان الموضوع بيهمني ما كنت كتبت فيهو..
ولسه السؤال قايم للاخ نازر..
في البوست دا..
وفي اي بوست حيكتبه...
دليلك شنو علي الاتهامات الانت بتوجهها لناس قامت بعمل خيري جميل؟
وكل الشاركوا بقروشهم ودعواتهم وحزنهم علي الم غادة منتظرين الرد علي السؤال..
|
Post: #30
Title: Re: ما تهتمو للأيام ... ظروف بتعدي ...
Author: Osama Mirghani
Date: 05-07-2007, 09:56 AM
Parent: #1
صباحك خير يا ناذر
يا أخوانا خبراء الكمبيوتر اللي هنا....أنا ما قادر أنزل أو أسمع الأغاني من المنبر...والسبب كما يبدو Fire Wall لأني أكون في هذا الوقت في العمل وما عندي صبر حتي أرجع البيت.......عاوز حل....في التو واللحظة......أو ترسلوها لي بالإيميل [email protected]
و أكون شاكر لكم ......
و بالمناسبة يا ناذر صورة نانا باتيكر ما وصلتني
|
Post: #32
Title: Re: ما تهتمو للأيام ... ظروف بتعدي ...
Author: وليد محمد المبارك
Date: 05-07-2007, 10:09 AM
Parent: #30
ولسان حال ناذر يقول :
اريتوووو كان ضررررررربني كسر رقبتي
تاني تجي الحلة دي
|
Post: #33
Title: Re: ما تهتمو للأيام ... ظروف بتعدي ...
Author: A.Razek Althalib
Date: 05-07-2007, 10:44 AM
Parent: #32
| Quote: دليلك شنو علي الاتهامات الانت بتوجهها لناس قامت بعمل خيري جميل؟ |
آهه يا رشا..
فكيتي ناذر قلبتي هوبا على ود الطالب..
عليك الله بطلي حركات الإكروبات الملانة شبكـ وشربكات دي..
طلب ناذر الخليفة الدايرين تلفوهو كحبل إتهام تخنقو بيهو دليل برائة من تناصرين قبل ما الإدارة تدخل وتفطس ليهو بوستيهو.. كان واضح كما ورد في في بوست ناذر المحذوف..
بتاع: Re: ممكن توروني ما عزمتوني في إجتماع الليلة دا ليه ؟!!![/B]
Quote: كشف حساب مطلوب فورا .....
والنقص شنو ...؟؟!!!
وكم ؟!!
والعارفين منو ؟!!!
والإتسترو عليهو منو ؟!!
ولييه |
عرفتي الحصل ولا لسع..
أخوكـ كان متابع عن كثب ما دار في ..
وطالما إنت برة الدائرة فكل شاة معلقة من عرقوبها..
خليكي متابعة..
موضوع البوست ده هنا:
Quote:
سبيل الزول عشان يفتح طريق يا دوب
يكون زادو البيشيلو معاهو شوق مشبوب
عشان يلقى إنتصارو يا زمن محبوب
يضوق المرة ويتوشح بصبر أيوب |
وقع ليكـ..
|
Post: #34
Title: Re: ما تهتمو للأيام ... ظروف بتعدي ...
Author: رشا سالم
Date: 05-07-2007, 10:51 AM
Parent: #33
يا مستر عبد الرازق..
انا سؤالي كان موجه لنازر...
وانت ما عندك علاقة بسؤالي
| Quote: دليلك شنو علي الاتهامات الانت بتوجهها لناس قامت بعمل خيري جميل؟ |
الكاف هنا بترجع لنازر الخليفة ودا كان واضح من الصياغ..
Quote: آهه يا رشا..
فكيتي ناذر قلبتي هوبا على ود الطالب.. |
انا ما عندي موضوع معاك ولا سبب يخليني امسك فيك ولا افكك..
وهذا ما لزم توضيحه..
|
Post: #35
Title: Re: ما تهتمو للأيام ... ظروف بتعدي ...
Author: A.Razek Althalib
Date: 05-07-2007, 10:53 AM
Parent: #32
وليد محمد المبارك
مالها ما فيها جوافة نية..
ولا الرباطية قاعدين في الخيران ولا شنو بالظبط كده..
ما تخاف على ناذر على الرغم من إنو البحر بيآكل عوامو..
لكن خبرة ناذر الطويلة في مجاري السيول والأمطار مدياهو خبرة..
يا الشفت إنت ما سمعت بحكاية..
فرعون وموسى..
|
Post: #36
Title: Re: ما تهتمو للأيام ... ظروف بتعدي ...
Author: ناذر محمد الخليفة
Date: 05-07-2007, 11:45 PM
Parent: #1
سيف الدين ....
Quote: وفجاة كده للمعارضة
خاصة المعارضة الاسفيرية |
وأنا بهدي معاك نفس الشي ليهم !!
|
Post: #37
Title: Re: ما تهتمو للأيام ... ظروف بتعدي ...
Author: ناذر محمد الخليفة
Date: 05-07-2007, 11:48 PM
Parent: #1
يا رشا سالم يا دكتورة ...
من العرف إنو الناس ما تنقل خلافاتا من بوست لي بوست ......
رايكم فوق عيني وراسي بس يا ريت لو شطبتيهو من هنا ونقلتيهو للبوست المعني عشان لزوم منع الشوشرة ...
أبو رزقة ...
إنت برضو نفس الشي
|
Post: #38
Title: Re: ما تهتمو للأيام ... ظروف بتعدي ...
Author: ناذر محمد الخليفة
Date: 05-07-2007, 11:50 PM
Parent: #1
أوسامة ميرغني ..
| Quote: و بالمناسبة يا ناذر صورة نانا باتيكر ما وصلتني |
معليش الظاهر نسيت أو إنشغلت ..
بكرة إنشاء اله تلقا كوليكشن من صور نانا باتيكر في ماسنجرك الداخلي ...
|
|