نعرف كم نحن حساسون تجاه اشياءنا الجميلة ، نعرف اننا تربينا على أغنيات مصطفى باحاسيسها الموغلة فى الرهافة ونعرف انا سوف (تقتلنا الرهافة) ولكن أيضا لنا القدرة فى الدفاع عن هذه الاحاسيس حتى الرمق ولا نلين ، أغنية نسمعها فى لحظة صفاء فنعرف كم كنا قساة و كم كنا قساة! وهكذا حالنا دائما لا نقدر قيمة بعضنا البعض الا حين يذهب بعيدا
لك حبى واعزازى وشكرا ثانية
*************** نورا محمد الحسن حميد **************
وكتين يضيع عرق الجباه الشُّم شمار فى مرقة .. آه .. يا نورة آه من دربك التوّر نفس خيل الصبر فتـّر خطاوى الشوق وراه .. يانورة .. آه ساعة الشموس الغُر تهضلم تلحق الصِّح .. فى المغارب يدفر الضو الكهارب تستر المدن السرابية .. الضبابية .. الكآبة حائط التيه .. والطشاشات .. فوق قفيِّك يا أمْ عوارض... يا أمْ عوارض .. مو دُعاشة ماها شبـُّورة وتقيف .. جايى ليك يا نورة غيمة تملا ماعونِك خريف يملا عينيكى ويفضـِّل يروى جوّاك العطاشة جاة ليك يا نورة غيمة تملا ماعونك خريف . ************** يا نفس فجر القصايد يا بلادى دا القطع قلب الروادى .. بى اللّواج الجاى .. وغادى ماهو صوتك .. لاها صورتك هى البترقش نادى فوق صدر الجرايد إنتى يا حُضن الصحارى شُفّع العرب الفتارى البفنـّوا الشايلا إيدمْ ويجروا كايسين القطارى لا سراب الصحرا .. موية ولا حُجار سلّوم .. موائد حالكم البصرخ وينادى ياوطن عز الشدائد ************* يا هُدى الناس الحيارى يا ندى الفجر الببلِّل نور عِوينات الفقارى جايى ليك .. آه جايى ليك جاى ليك يا نورة افة آفة .. للسوس البنقـِّر عود عِشيماً داخرو فيك أصلى لمـّن أدور أجيك .. بجيك .... لا بتعجّزنى المسافة ولا بقيف بيناتنا عارض لا الظروف تمسك فى إيدى ولا من الأيام .. مخافة يا نفس فجر القصايد يا بلادى ما ضِهِبْ فى بعدى عنـِّك أصلى متغرِّب عشانك راضى بى الجايينى .. منـِّك ما شكيت شُح اليالى .. وما بكيت نُحْ .. شِلتوا حالى رغم إنو الحال بيفضح إلاّ كٌتْ فى الحارة بصرُخ : يا وطن عِز الشدايد
يا وطن عِز الشدايد يا وطن عِز الشدايد يا وطن عِز الشدايد
العزيز قرنفل التحية التحية ليك يارائع الذوق ويامرهف الحس والتحية أيضاً للأخ شيبة والإنحناء للشاعر الفلتة محمد الحسن سالم حميد ولمصطفى سيدأحمد ألف رحمة ونور
يصمت الفكر ويقف القلم عن التعبير عن الاستاذ الراحل والمقيم مصطفى وقد اعجبني ذاك الاهداء الذي يملك صدق المشاعر و الفنان مصطفى ترك لنا الكثير من الابداع الني والذي نعتر به ولانني من عشاقه بكل سرور اقبل هذه الاهداء
شكرا كتير يا قرنفل وانت تدهشنا ..ماعارف اقول شنو الرائع ولا المبدع ولا الاستاذولا... اري ان كل هذه الالقاب ضئيله امام الانسان مصطفي سيد احمد .. دائما ما اراهن اصدقائي بان من يوم ما رحل مصطفي سيد احمد عن هذه الفانيه لم يسكت صوته ..فهو داما يصدح في بيوت السودانين اينما كانوا وفي سياراتهم ومحلاتهم التجاريه ..وانا الان استمع الي نورا وعلي يقين تام بان هنالك من يستمع الي عم عبدالرحيم ووضاحه والزمن الفلاني و....وعلي مدار 24 ساعه ..انا في السودان واخر في اليابان واخر في استراليا وامريكا و..... وتحياتي عبرك للزول السمح محمد الحسن سالم حميد ولي كل من يعشق مصطفي سيد احمد
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
sheba
وعد
ملكة سبأ
فيس بوك
تويتر
انستقرام
يوتيوب
بنتيريست