نــــور تاور زولــة عــادية جدا

مقدمة :

دخلت البورد هذه الأيام لأرى الخلافات من كل صوب , بقى الواحد يخاف وهو ماشي في أمانة الله يجيه واحد ببنية ولا كف !!
وبعيدا عن المناكفات ما ممكن الواحد يعبر عن حبه لناس بحبهم وبحترمهم !!؟؟

****


أول ما بدأت أتصفح سودانيز أون لاين وقبل تسجيلي قرأت لها
تتبعت ما تكتب بإهتمام بالغ
ومن بين كل لفتت إنتباهي بصدقها الواضح وشجاعة تحسد عليها


منذ أيام كنت أحكي لأحد الأصدقاء بأنني كلما تصفحت سودانيز أون لاين وصادف وجود صورة لأحد الأعضاء أو العضوات في الصفحة , تستوقفني والدتي من خلفي ( منو دي ؟؟ منو دا ؟؟ ديل منو ؟؟ )
فأضطر دائما للشرح دي فلانة ودا فلان

وكالعادة أقرأ لها دائما ما تكتبه , فتسألني والدتي منو دي ؟؟
يا ماما دي نووور , نور تاور

حتى باتت تعرفها مثلي , تسألني أحيانا بإهتمام بتكتب شنو بخليك دايما تقري فيو !!


نور يا ماما زولة ما ( عادية )
ماعادية تب , والمشكلة الشرح مرات بكون صعب

لكن لو في زيها 10 نسوان و10 رجال في السودان

لكان الحال بقى غير الحال

أريت كل نسوان بلدي زيها


وأريت بتي تبقى زيها



سأعود

أختي الغالية نهال كرار

Quote: نور يا ماما زولة ما ( عادية ) ماعادية تب , والمشكلة الشرح مرات بكون صعب لكن لو في زيها 10 نسوان و10 رجال في السودان لكان الحال بقى غير الحال أريت كل نسوان بلدي زيها وأريت بتي تبقى زيها

أوافقك 100% فهي تعرف تماماً الخط الفاصل بين المعارضة والوطنية ولا تتنازل عن أي منهما لمصالح ذاتية بأي ثمن كان

لها أمى أيات التجلة والإحترام

كمال

عزيزتنا نهال



صباحك خير


يا اختى دا شنو؟

شعرة جلدى(كلبت)!

انا متعودة على القهر..

والظلم..

والفهم الخاطئ..

والتجاهل..

بلعت كل شئ وبقيت يا قاعدة قدام الجهاز..

يا ماشه جتب الحيطة..

قدر ما احاول أهز خريطة السودان من راسى ولو للحظة..

القاها كبرت وحصل ليها(زوووم)..

وقلت يا بت استحملى..

قضيتك دى بيموتوا فيها الناس كل يوم..

زى الجراد...

يعنى شنو رصاصة طايشة..

ولا مصوبة حتى؟!

تقومى تفاجئينى بالكلام دا؟!

اتاريه الدنيا لسه بخير؟!

والف كتر خير فرانكلى كمان..

الست الوالدة قولى ليها نور (تغريك السلام)..

وبتقول ليك دعواتك ياحاجة..

لانه احنا بلاكم ما بنسوى شى..



ونهارك سعيد..

الاخت
نهال كرار
كل سنة وانت طيبة
ونور تاور
وكل نساء بلادى
مودتى وتقديرى

محمد عكاشة


نصير المرأة السودانية..

مودتنا وتقديرنا..

انتي برضوا زولة عادية جدا جدا .. والتحية ايضا للاخت نور تاور .

الأخت نهال..

هى فعلا كما تقولين ..

أنا أيضا أقرأ لها باهتمام .

آمنة مختار


يا اختى الشكروه قدامه نبزوه..

اخير اسكت..

وعشان برضو ما حااعرف اقول فيكى شعر..

انا غايتو ما عارف الحصل لنور تاور شنو وللا مشكلتها مع منو وعن شنو ووين صدقيني
ولا عارف العاجبك فيها شنو
لكن قلبي بقول لي انها انسانة عظيمة واخت اخوان بدرجة برنجي
ليه ؟
والله ماعارف بالضبط
بس امكن شوية مصادفات كدة ومشاركات مرات مرات كشفت لي عن قلبها وشجنها الرفيع ورأيها الثاقب والعميق ومودة الاخوات الطيبات ديلك البكوو ليك هدومك بفرح ويسوو ليك الشاي كل شوية بلا سبب ويقعدو يتونسو معاك في الديوان، ويفرحو بكلامك .. بمجرد كلامك وطلباتك ، وينصحوك بحاجات مفيدة جدا كانت غايبة عنك الزمن دا كله!
نور انت حاجة زي كدا .. تسمحي لي احبك ؟ وللا مافي داعي؟
________________
رب اشرح لي صدري

دكتورنا المحترم محمد عبدالقادر سبيل

تحياتى



ما حاصلة لى اى حاجة خاصة..

الموضوع هو السودان العريض..

اما عن الاخوة..

اقول ليك..

منحنى الله سبحانه وتعالى من الاهل والاشقاء..

ما اذا زحفت على بطنى الى مكة المكرمة كل عمرى..

لاشكر الله سبحانه وتعالى على نعمة انتمائى اليهم..

سوف لن اوفيه حقه..

ولو تكون واحد منهم..

برضو حنكوى ليك القميص..

ونعمل ليك الشاى..

ونقعد جنبك فى الديوان نحكى ليك عن تفاصيل التفاصيل..

تشرف كتير..

ود المايقوما


انا غايتو اسمحوا لى اقتحم البوست بتاع نهال..

واشكرك بالنيابة عن اصل الجندر..

داخل وخارج البورد..

الشهادة لله
اختي نهال و خالتي ( امك ) و نور و نساء اخريات هنا وبقلبي (مثل امي)
نساء ما عاديات ابدا..لكن شكلو خيبة بلدنا دي مننا نحن جمع المذكر السالم
والكلام ده لا تملق و لا حنك ولا جندرة..لكن النصيحة بس!

بخصوص اختي الحبيبة نور دي ما بقدر اضيف على كلام فرانكلي ده حاجة..
بس بقول انها عقلية ما عادية و مادة صباعا السبابي و بتقول للغافل يا زول هوي!
ماسكة جمر القضية بدون خلط اوراق او مجاملة او نفاق .. وفوق هذا وذاك عالية الهمة
لذا تجدنا والكلمات نتقاصر امام صرحها
ولذا تجدها غفارية في ارض منبرنا القاحلة هذه
مصيرنا نتعلم
و ان شاء الله يوم شكركن ما يجي.
اخوكن/ م

سعد الدين

نهارك سعيد

(الشهادة لله
اختي نهال و خالتي ( امك ) و نور و نساء اخريات هنا وبقلبي (مثل امي)
نساء ما عاديات ابدا..لكن شكلو خيبة بلدنا دي مننا نحن جمع المذكر السالم
والكلام ده لا تملق و لا حنك ولا جندرة..لكن النصيحة بس!)..

الله يهدى جمع المذكر السالم..

ويهدينا احنا كمان..

الجندر!

نور تاور عادية جدا

انا كنت قايلة ما عادية
طلعت لا بتعرف شئ عن جبال النوبة لا مهتمة بقضاياهم و لا ساهمت فى نقاش مشاكلهم و لا فى العمل على حلها

زولة عادية ساى ليه عاملين ليها راس و قعر

نور تاور

زولة ما عادية خالص


بس منو القال عادية جدا

سيف


العروس وصلت ولا لسه؟

انت حايم بى جاى ليه؟

مش المفروض انه شهر العسل بدا؟

وسلم لينا عليها..

واتوصى بيها كتير..

نور تاور...لها كل التقدير...

والاحترام...وجديرة بالاحترام...

وفعلا ما عادية...(صعبة المراس ياخي)...

عبدالكريم الامين

يا حليلك..



كل ما أتذكر الوسطاء يمتنعون اضحك..

واقول احنا السودانيين ديل..

كلنا صعبين المراس..

ودمنا حار..

والمصريين بيقولوا:أخوانا السودانيين مابيضحكوش ليه؟

والخليجيين عشان بيسلمواعلى بعض بالتقبيل على الخدين..

بيقولوا:السودان لا يبوسون؟

قال ليهم واحد سودانى:

السودان لا يبوسون!

عصام

نهارك سعيد

(زولة عادية ساى ليه عاملين ليها راس و قعر)..

وجهة نظر برضو..

ومحل تقدير واحترام..

الأستاذة نور تاور صحفية متميزة وناشطة في الدفاع عن الحقوق الأساسية للانسان في زمن اللاحقوق00كنت أتابع قلمها المتميز منذ بدايات عملها الصحفي في جريدة الصحافة في أواخر السبعينيات00وغابت عن الكتابة الراتبة بالصحف السودانية لظروف يعلمها الكل00ويبدو لي أن انشغالها بالشأن العام وقضايا الحريات والدفاع عن حقوق المهمشين قد حرم الصحافة من قلم صحفي متمكن00
سعدت حقيقة حين جمعني معها هذا المنبر الوطن00
لها المنى بنيل كل أحلامها التي هي احلامنا كلنا000

صباح الخير فتحى

شكرى واحترامى



(وغابت عن الكتابة الراتبة بالصحف السودانية)..


غبت عن الصحف السودانية لاننى ذهبت الى الكويت..

بعد مضايقات رجال الامن وفرض الحراسة على بيتى لمدة 24 ساعة..

حدث ذلك بعد المقالات التى نشرتها عن مصنعى سكر كنانة وعسلاية..

ثم طلبت ادارة المصنعين من جريدة الصحافة ان تنفى كل ما كتبت رغم التقارير التى قدمها

لنا المصنعين , زميلى الصحفى عبدالله يونس وانا..

ورغم الصور التى كانت توضح بجلاء ان المصنعين اصبحا مثل مدينة الاشباح..

ثم مضايقات الامن السودانى فى المعهد العالمى للصحافة فى برلين حينما ناقشت موضوع

الشماسة وكذلك فشل المصنعين المذكورين فى بلوغ القوى الانتاجية القصوى بسبب عشوائية

دراسة الجدوى والتأثير الاقتصادى والاجتماعى السلبى على العمال والموظفين..

فى الكويت كتبت فى جرائد الوطن والسياسة والانباء..

ايضا ضايقنا الامن السودانى وطلب سفير السودان فى الكويت اعادتنا ,الاخوان بابكر حسن

مكى (رحمه الله) وفتحى الضو محمد وأنا..

ورفضت السلطات الكويتية طلبه..

ثم تعمقت فى الغربة حتى مصر وكندا..

فى مصر كتبت فى جريدة الخرطوم..

وفى كندا سودانيزاونلاين..

يعنى ما وقفت دقيقة واحدة..

أولا وقبل كل شيئ

لا شيئ يدعوني للمجاملة أبدا , فأنا لا أعرف نور تاور معرفة شخصيا
فقط أقرأ ما تكتب بإهتمام

قضايا النوبة لم أقرأ عنها إلا لدى نور
والكثير من القضايا الأخرى , المصداقية في طرحها هي التي أكسبتها محبة الكثيرين وإعجابهم بها

أليس من حقها أن تعلم مدى حبنا لها ,
أم نكتفي بقراءة والإعجاب بصمت

Quote: انا متعودة على القهر.. والظلم.. والفهم الخاطئ.. والتجاهل.. بلعت كل شئ وبقيت يا قاعدة قدام الجهاز.. يا ماشه جتب الحيطة.. قدر ما احاول أهز خريطة السودان من راسى ولو للحظة.. القاها كبرت وحصل ليها(زوووم).. وقلت يا بت استحملى.. قضيتك دى بيموتوا فيها الناس كل يوم.. زى الجراد... يعنى شنو رصاصة طايشة.. ولا مصوبة حتى؟! تقومى تفاجئينى بالكلام دا؟! اتاريه الدنيا لسه بخير؟!

انت بالجد أنسانة بتستحقي الإحترام كله

ومن حقك علينا أننا نعترف بمدى إحترامنا ليك

وحبنا ليك

وفخرنا بيك

صباح الخير نهال



ويا ستى كل الشكر لا يكفى..

والسبب هو اعادة كثير من الثقة فى (الاخرين) الى دائرة الضوء..

بعد ان وصلت الى كل القناعات..

بأن أكتب ما أؤمن به..

بغض النظر عن اللغط الحاصل هنا وهناك..

وجدلية كتابات نور تاور..

الف شكر مرة اخرى على الوقت والجهد..

واللفته الشجاعة..

وارجو ان تسمحى لى بالرد على ضيوفك لان هناك بعض النقاط التى تحتاج منى الى توضيح..


ودمتى..

نور تاور
سلامات
الكتبتو انا فوق ده ما اسمو وجهة نظر, ده اسمو تبخيس و انكار لحقائق و انا قاصد كده
كل الناس عاديين و متساويين فى انسانيتهم, قد يتفوق بعض منا فى مجال ما لسبب ما او لاهتمامه بهذا المجال, ده شئ طبيعى .

ان اختلف معك فى عملك او فى ارائك وان احاورك حولها وانتقدها او ان تقومى انت بذلك تجاه ارائي كانسانين يعترف كل منهما بالاخر...دى ممكن تكون وجهة نظر

لكن ان اقول:

Quote: طلعت لا بتعرف شئ عن جبال النوبة لا مهتمة بقضاياهم و لا ساهمت فى نقاش مشاكلهم و لا فى العمل على حلها

ده اسمو تبخيس و انكار لواقع و عمل قمت انت به, هذه ليست مجرد وجهة نظر.


عملك و نشاطك بغض النظر الاختلاف و الاتفاق معلوم و لا ينكره الا جاهل او لئيم
اتمنى العاوز اقولو يكون وصل ليك
لك تقديري

عصام جبرالله

سلامات

(عملك و نشاطك بغض النظر الاختلاف و الاتفاق معلوم و لا ينكره الا جاهل او لئيم
اتمنى العاوز اقولو يكون وصل ليك)..


وصل مع الشكر...

أختي نهال كرار

سبقتيني

لهذه الشخصية العظيمة

عظيمة في معارضتها لفكرة او تأييدها لها.

نور تاور عرفتها فترة في بوست البيت السوداني

كانت صادقة واضحة لا تتاجر بقضية ولا تخاف في الحق لومة لائم

اعجني فيها انها لا تثور ولا تهاتر

واعجبني فيها خبرتها الواسعة في الحياة واستيعابها لتجاربها وتجارب الآخرين.

وباختصار هي سودانية كامل الدسم

تحياتي يا نهال كرار

وشكرا نور تاور التي اهدتنا هذه المساحة.

عارفة يانهال ؟!!

الاستاذة نور تاور دى فعلا شخصية محترمة جدا وانسانة يشهد الله انا من ساعة ماشفتها فى القاهرة حيث مكتب جريدتنا الخرطوم (زمان) وانا بحبها وبشوف فيها مثال للمراة السودانية الجسورة والصبورة والحقانية والموضوعية ووو واى حاجة حلوة ,,

لحدى مايوم كده فى موضوع اتفتح بخصوص خبر وااااااااااااااحد عملتو عن حادثة معينة فى القاهرة ..وقمت لقيت الاستاذة نور الانا بحبها وبحترمها جدا عشان موضوعيتها ..تقوم تصدمنى بشى لحدى الليلة ماقادرة اصدقو !!

الاستاذة نور ..تنسف عشرة سنوات من صحافتى وعملى فى القاهرة وتشكك فى حيادى بس عشان مرة زماااااااااان نزلت بوست دامع وباكى (وانا لحدى هسة باكية) على الانسان المرحوم عم احمد عبد الحليم سفير السودان بالقاهرة ..وتستشهد على عدم حيادى بحزنى على انسان ماشفت منو على المستوى الشخصى وخلى بالك من الشخصى دى يانهال ..ماشفت منو غير كل خير !!



نور تاور حبى وتقديرى واحترامى ليها ولجهدها ماقل ولاشئ ..بس لقيت انو دايرة اعمل مداخلة واقول ليها (بحبك يانور ) لكن لانى مامنافقة فى مشاعرى ماقدرت اقولها ليها من غير مااوريها انها قدر ايه احزنتى ايما حزن والله ..ماعشان شئ الا انى لم اتوقع من نور تاور بت النوبة الجميلة ..ان تظلم انسانة بسبب حزنها على ميت لم ترى منه شرا وليس بكثير عليه مجرد رثاء بعدما دثره الثرى !!

اااااااااااااااااااااااااااااااااااه

انا كده قلت الفى قلبى منك يانور لانى والله بحبك بالجد وماعايزة اكون شايلة فى قلبى حزنى منك لحدى مااموت !!

اقول قولى هذا

واتمنى من الله ان لايكون فى قلبك تجاهى شئ !

وكونى بخير

اما انتى يانهال الغالية ..فلاقينى فى الماسنجر عايزاك ضروووووووووووووووورى !

نور
نور على نور
تسلم البطن الجابتها
بت البلد
وست الناس
في السودان في الحياة العامة
فاطمة احمد ابراهيم
ونور تاور

ليه
لانهن الاثنين وطنيـــــــــــــــــــــــــــات


ابدا صادقات مع نفسهن والاخرين..

جديرات بالاحترام
يمثلن الاصالة والمعاصرة معا..

اول مرة احس بقضية وطنية واهتم بيها هي قضية جبال النوبة

ليه؟
لآن نور تاور جات هنا وفتحت لينا عقولنا على قضيتها بكل صدق
وعشان كدا
هي مناضلة حقيقية

يا نور
انا بحبك وبحترمك وبتمنى اكون ذيك.

نور الحبيبة

انا من جماهيرك وبلا تحفظ

الاخت نهال

انتو الواحد اصلو ما افكر فى حاجة تجو تبوظوها ليهو

قبل كام يوم رديت على الاخت نور انو انا حا افتح بوست
بى اسما بس ما كشفت عن الغرض حتى لا افسد عليها متعة الفضول
هسع جيت اشارك بى كلمة لقيت الناس كلها كملت الكلام فما عندى حاجة
اقولا غير امنياتى لها بى وافر السعادة والتوفيق واتمنى ان يتعلم
منها اصحاب القضايا النضالية اسس التفريق بين المعارضة
والمحاربة .

ودمتم

على الحسن



يا اخوى مجرد الدخول

هو بوست كامل..

السودانيين الله لا جاب يوم شكرهم..

حيدر حسن



وانا برضو من جماهيرك..

بيان ازيك

والله زمان..

يا ستى الله يقدرنا كلنا على (ما بلانا).

دى رحلة تهد الحيل..

وصدقينى انا ايمانى بالجندر لو ترجمناه لواقع.

السودان تتحل مشكلته زى(الترتيب).

ونرجع كلنا بدل الغربة ومرارتها..

نادية...

صباح الخير



أنا كنت عارفة انك زعلانة منى.

ولكننى انتظرت الفرصة المناسبة.

والتى وفرتها لنا نهال..

يا نادية انتى اخدتى النقد بحساسية عالية..

وبعدين لو ما بيهمنى قلمك ما كنت دخلت وعلقت من اساسه..

وقطعا ما عارفة الهجمة الشرسة العملتها على الناس الوزعت ايميلات ومسنجرات تطالب

بمقاطعة كتاباتك انتى وآخرين!

ولكن سعادة السفير احمدعبدالحليم الله يرحمه..

كان سفير السودان فى مصر..

ولا اقول اننا لا نحزن على موتانا..

ولكن الخاص والعام فى العمل العام ما بتفصلوا يا نادية..

ونقدى ليكى فى عزاء سعادة السفير..

ما معناه انك حكومة وأنقاذ ..الخ

بس انا توقعت منك ماهو أكثر فى مجزرة المهندسين..

واحتمال كانت ليك ظروفك..

لذلك تداخل العزاء فى سعادة السفير..

مع مشاعر الغضب فى مجزرة المهندسين..

البعتذر عنه يا نادية هو زعلك وماسببته لك من ضيق نفسى.

ولكن يا نادية فى العمل العام ابعدى من الزعل.

وشوفى الموضوع والظرف الحصل فيه الموقف..

لانه فى كل ركن من المسيرة (المعقدة)دى.

حتلاقى حجر(دغش).

نور اهون.

لاننى لم ولا اقصد الاساءة او التجريح لا سمح الله.

راى ووجهة نظر وبس..

ولكن يوجد من هم غير ذلك.

ناس متخصصين فى الاذية بغرض الاذية بس..

وعشان كدا يا نادية بقول ليك الحب متبادل..

وانا اصلى ما بعرف اكره.

وزعلى بينتهى بسرعة..

يعنى لو زعلتى منى.

تبقى ضيعتى وكتك ساكت..

صافية لبن؟

عزيزتنا القلب النابض

صباحك خير


وشكرا جزيلا على الوقت والكلمة الطيبة.

ويا ستى المسكوت عنه جهد الجميع..

بما فيهم انتى..

ولولاكم..

لقفلت (الكان) من بدرى ومشيت..

مع إنو الأيام دي كلمة
عادي و ما عادي دي
بتجيب لبش
لكن
قطعا نور ليست عاديه
و أضيف
نهال أيضا ليست عاديه
لك الود

ناصر

صباح الخير


وكله ما عادى..

بلدنا زاتها ما عادية!

قلت شنو فى دى؟

فعلا الأخت نور - يا نهال - تستحق الثناء والشكر والتقدير - وحتما ستفوز يوميا وشهريا وسنويا بلقب أفضل عضو بسودانيزأون لاين لو كان هناك استفتاء هكذا
للأمام نور تاور
الشفيع مصطفى
الدمام

العزيزة/ نهال كرار

يومك سعيد. معرفتي بالأخت نور تاور تعود إلى فترة طويلة. شقيقها الدكتور جلال تاور زميل دراسة في طقت الثانوية (كان من المميزين في العزف على آلة الأكورديون).أدعي أنني أعرف الأخت نور تاور إلى حد كبير. إلتقينا في العمل الصحفي لفترة قصيرة.. لها قلم جريء. نور تبحث دائما عن الجديد ذي العلاقة بالإنسان الأغبش صانع الحياة. تكتب كلامها على كيفها..المهم أنها تقول ما ترى أنه الحق، وليغضب من يغضب! ثم إننا التقينا أكثر من مرة في مؤتمرات خارج الوطن. وجدت نفس البنت نور .. السلام الحار وكلمة "فلان يا اخوي" الني ترددها بوتيرة حنون يقول بها أهلنا في أرياف السودان وفي كردفان بالذات.

ذات مرة -وكان النقاش محتدما في إحدى جلسات لمؤتمر من المؤتمرات في عاصمة أفريقية، فاجأت نور الجميع وعلى رأسهم أصدقاؤها في الحركة الشعبية لتحرير السودان حين قالت بالإنجليزية ظلت أبيي جزءا من مديرية تلودي سابقا-أي أن ابيي هي في الواقع جزء من جبال النوبة. وإذا أراد الإخوة من أبناء دينكا نقوك الإنضمام إلى الجنوب فما عليهم إلا أن يغادروها ‘ فهي جزء من مديرية الجبال وستظل !!) ضحك البعض وامتعض آخرون..وبعد سنوات هاهي ابيي تطل برأسها ‘ يتقاذفها سماسرة السياسة كمشكلة تستعصي على الحل.

أختي الغالية نور تاور، أحييك.. واعلمي أنني دائما فخور بأمثالك من نساء بلادي. ولك يا نهال كرار عاطر الود والتحية على هذا البوست الراقي.

استاذنا فضيلي

لم تترك لنا ما نقوله والاخت نهال

فنور هي حقا وصدقا نور عرفنا من خلالها معاناة اهلنا بجبال النوبة وتعرضت لابشع الاستهداف ممن يدعون حرصهم على ابناء النوبة قبل ان تستهدف من قبل اعداء ابناء النوبة وجزاريهم .

ولكنها ظلت صامده

عندما اشعر باختناق شديد لا اجد غيرها مفرجا بعد الله سبحانه وتعالى فامد يدي لا شعوريا .. الو الو نور ... كيفك يا بت العم ....... الخ


**** يا اختى دا شنو؟

شعرة جلدى(كلبت)!

انا متعودة على القهر..

والظلم..

والفهم الخاطئ..

والتجاهل..

*********************

لا عاش من يقهرك يا نور وتبت يدا كل ظالم

اما الفهم الخاطي فعلاجه يسير

واما التجاهل فالفاتك فوتو والفاتيك فوتيهو
والحمد لله انك ونحن نعرف قدرك


شكرا كثيرا نهال لهذه اللفتة البارعة


******


ولا استغرب ان جاء بعض الظلاميين وقال ان معظم محبي نور من الظلاميين
فلا تعبي بحديث الظلام فهو ظلام وانتي نور

ود العمدة



فى واحد فى الدنيا دى يمشى يخطب من غير ما يكلم بنات اهله؟

وبعدين منتظرة منك شرح وتفسير وتحليل..الخ

غطست الغطسة الياها؟

وبعدين زى ما قلت لفضيلى..

الاخوان مابينهم شكر..

وخليك من الكلام دا هسه وقول ليى هى منو؟

والعرس متين؟

وكل التفاصيل.

عشان انا عايزة اشترى فستان الفرح..

واجى اديك الشبال..

واما اذا ناوى تعرس فى بلدكم ديك.

شبال مافى..

صباحك خير فضيلى



لسه محتفظة بالصور الاخدناها فى المؤتمر اياه..

معانا الخاتم عدلان الله يرحمه..

ورغم مرور السنين.

ولكن ما أشبه الليلة بالبارحة..

فقط الفرق هو الكنا بنحلم بيه فى جامعة الخرطوم..

وحتى ما قبل نيفاشا..

كله مشى ادراج الرياح..

يا فضيلى انا عارفاك ملك..

وعارفة انك كنت شايل منى فى موضوع معين انا كتبته..

قضية عامة..

ولكن قضية السودان دى.

ومن مساوئها انها بتخليك تغلط فى الناس..

ويمكن تخسرهم كمان.

لانهم كلهم ما ملوك.

وما بيفرزوا بين الغضب للصالح العام.

والغضب الخاص..

انت اخوى.

والاخوان مافيش بينهم شكر.

عشان كدا خلينا فى ابيى الدايرين يشيلوها حمرة عين!

وبالله العظيم ما يقدروا..

نيفاشا ولا غير نيفاشا!

الشفيع


أنت يا اخوى داير تدخلنى الانتخابات ولا شنو؟

تقوم هسه تحصل التعبئة الانتخابية المضادة..

اخير لى كدى..

نكتب..

ونعبر..

ونمشى..

عزيزتي نهال

تحايا وسلام


نور تاور

انا من المتابعين لكتابتها حتى قبل ان اشترك في البورد

وبس بعاين بعيوني وهي بالطبع زولة ما عادية ابدا

يكفي انها من نساء بلادي الصامدات .................وكفى

شكرا نور تاور
لكل مافعلت هنا و هناكـ
تستحقين الشكر فعلا

خدر



الشكر لله وحده..

انت عامل كيف؟

أنعام..



تكرمى يا ستى..

أنا برضو بعاين بعيونى بس..

قلتى شنو؟

نور تاور
اول مرة أعرف انك زولة عاديةوكمان جدا

شمس الدين السنوسى

شمس الدين



غايتو كلما اتذكر بتك (الصعبة)دى أموت من الضحك..

وبينى وبينك انا مبسوطة جدا انه فى زول فى الدنيا دى..

حيطلع ليك الشيب فى راسك واحدة واحدة..

تحسبو لعب؟!

عرفتها عن بعد أيام الجامعه و عرفتها عن قرب من صديقي وشقيقي المرحوم الدكتور حسن محمد علي أبو البشر( عقارب). وأتابع باهتمام كل ماتكيب - باخلاص- عن قضايا الوطن. لها ولكل أصدقاي الكثر من جبال النوبه كل محبتي.

Quote: اعجني فيها انها لا تثور ولا تهاتر واعجبني فيها خبرتها الواسعة في الحياة واستيعابها لتجاربها وتجارب الآخرين

till i come back

اشراقة ازيك؟

واسرتك الكريمة؟

والامورة بنتك؟



أنا طبعا خجلانة منك ومدسوسة..

عشان ما قدرت احضر المؤتمر..

وزعلت من نفسى وظروف الشغل..

وزعلت اكتر عشان قدر ما شرحت ليهم دايرة امشى المؤتمر ليه..

ما فهمو كلامى زاتو..

الله يبارك فى نهال اللمتنا فيك..

وانشا الله ترجعى وتكتبى فى المنبر تانى وتعيدى ايامك المجيدة..

محتاجين ليك..

نور تاور
الكلام مرات بقيف فى الحلق.....
فقط أبقى كما أنت وهجاً
و شعاع
و أمل
و الشكر للفاضلة نهال كرار ؛؛؛

عبدالرحمن

مساء الخير


(الكلام مرات بقيف فى الحلق).....

وما أكتر الكلام البقيف فى الحلق يا عبدالرحمن..

دكتور عبدالله


مساء الخير..


نهال فتحت على باب ما كان لاحد ان يطرقه بهذا الهدوء..

وهى بصفاء نيتها..

جمعتنى بكل من احب واحترم..

فجرت فى نفسى هذه المشاعر الجميلة التى خفت ان تكون قد أندثرت بفعل عوامل التعرية فى

الغربة..

(وعرفتها عن قرب من صديقي وشقيقي المرحوم الدكتور حسن محمد علي أبو البشر) عقارب..


الله يرحم حسن ويحسن اليه..

دا ما كان جار..

ولا زميل جامعة..

ولا مجرد أخ..

فقد كان كل هؤلاء..

ما أحسست فى يوم من الايام أنه ليس احد اشقائى..

مازلت اذكرة بعد التخرج بفترة قصيرة حين جائنى فى مكان عملى وهو يكاد أن يطير من

الفرح..

وباسلوبه الديناميكى المتحرك دوما..

وقال انه قد قرر أن يخطب ويتزوج..

ضحكت كثيرا..

لاننا حينما تكلمنا عن امكانيات ذاك الزواج المادية..

خاصة وان البنت من بنات البحر..

يعنى التزامات مالية ضخمة وحاجات كتيرة..

كان رده..

عارفك فقرية..

يعنى كان لازم تبوظى لى الحلم بتاعى؟!

ذهبت الى كادقلى..

ثم وقبل ان اكمل السلام على اهلى..

ذهبت لبيت حسن..

وهم الحيطة بالحيطة..

بكيت الماضى والحاضر والاتى..

تلك كانت مواجهة حقيقية مع وهم الوجود..

حيث نكون هنا اليوم..

ثم لا نكون هنا فى الغد..

الله يرحمك ياعقارب وحسن اليك..

فجعنا فيه..

وفى مثل تلك العقلية الفذة..

وتلقائية الحب لكل من وما تحمله الارض فوق ظهرها..

كان يمكن ان يقلب موازين كتيرة جدا فى المنطقة..

سياسية ولا غيره..



أستغفر الله يارب..

نور تاور
امراة بقامة وطن
ذاكرة لا تخبو
كثيرا ما اري فيها صورة مندي
وهي تقاوم اعدائها في صبر و جلد
و في عزبمة لا تفتر
قد نختلف ولكن تبقي الحقيقة
ان كثير من عظماء التاريخ
يبداون حيثما انتهي عظماء قبلهم


لكي مودتي و شوقي

حافظ البشارى



نهال دى الا اعمل ليها تمثال بعد دا..

لانى يا راجل بفتش عليك لغاية ما وصلت الوداعيات..

وبس عايزة اعرف عامل شنو؟

والامورة بتك كيف؟

وبقو كم طفل؟

وانت لسه بتكتب ولا لا؟

لانه لو قلت بطلت الكتابة..

تكون جنيت علينا كتير..

رسل لى ايميل..

فى كلام كتير...

سلامات نور تاور
e-mail: [email protected]

الاخت الفاضلة

نهال

السلام عليكم ورحمة الله

يعلم الله يا نهال غلبى الكلام فى نور يشرفنى

ان اعرف امراة بقامة وتواضع نور ان الحديث

معها له شجون ووقع فى القلب والعقل

فاليحفظها الله من كل شر .

واكرر معك ما قلتى :

Quote: لكن لو في زيها 10 نسوان و10 رجال في السودان لكان الحال بقى غير الحال

انتصار

شكرا نهال كرار

فعلا نور تاور

مثال للسودانية الاصيلة

تمسك بيدها الجمر نصرة لقضيتها

ما كان ابوك دخيل

بت عز الرجال اهل الدروع والخيل

والله يا نهال كل بنات حواء في المنبر

فنانات وناضجات

والواحد زمن ما شاف نسوان بفهمو

من زمن الجامعة

Quote: يا فضيلى انا عارفاك ملك.. وعارفة انك كنت شايل منى فى موضوع معين انا كتبته.. قضية عامة..

أختي العزيزة / نور تاور

أقسم لك غير حانث أنني لا أحمل تجاهك إلا المودة ونبيل المشاعر. ولا أدري حتى اللحظة ما هو الموضوع الذي تعنين. تأكدي تماماأنني لم يحدث قط أن تحاملت أو غضبت منك لمجرد وجهة نظر تحملينها. أما إذا "نقلوا" إليك عني فاعلمي أنني ما زلت بخير، أرمي الأحباب مثلك بباقة ورد، وأعف أن أطعن خصمي في الظهر !

نعم..كان ذلك المؤتمر بالتحديد من أنجح المؤتمرات وأكثرها جدية. وأذكر كيف أن كثيرا من السودانيين والسودانيات الذين تنادوا إليه من الداخل ومن المنافي أقاموا من العلاقات المتينة بينهم ما جعل إجماعنا على معظم القضايا محل الخلاف طوع بناننا في البيان الختامي. نعم ، كلما نظرت إلى الصور تذكرت الراحلين: يوسف كوة والخاتم عدلان. تقبلهما الله قبولا حسنا بقدرما وهبا من عمرهما لهذه الأمة.

فضيلى يا اخوى


عساك طيب

مافى اى زول نقل لى حاجة..

وانت عارف مافى زول زاتو بيقدر ينقل لى حاجة..

انا بس براى بينى وبين نفسى اتحسست من حاجة..

وبصراحة كدا فرحت انه مافى شئ من اساسه..

الحمد لله..

(كلما نظرت إلى الصور تذكرت الراحلين: يوسف كوة والخاتم عدلان. تقبلهما الله قبولا حسنا بقدرما وهبا من عمرهما لهذه الأمة)..


شفت يا فضيلى الدنيا اللئيمة؟!

ما تختار الا الناس العديلين..

وتخلى لينا العوج..

الله يرحمهم ويحسن اليهم..

في البدء التحية و التقدير للعزيزة نهال كرار لأن ما قامت به يعد عملا من العملة النادرة في بلد مثل السودان... اذ جرت العادة ان يذكر الناس محاسن بعضهم البعض بعد ان يأخذ صاحب الأمانة امانته ... و المدهش حقا هو ان ابواب السباب مفتوحة علي مصراعيها ...الا باب الوفاء الذي طرقته العزيزة نهال كرار ... فلها منا مجددا التحية و التقدير ... كما اننا نتقدم بالشكر و التقدير لكل من خط/ت كلمة في حق العزيزة نور تاور ... لانها مدرسة في الحياة و في ممارسة العمل العام في السودان بصورة عامة و ليس حصريا في جبال النوبة... تعلمنا منها الكثير... و مازلنا نرجو منها الكثير... الله يديها العافية.

برير ود خالنا سمعين..



انت وين؟


نهال دى جمعت لى الحبايب كلهم فى حتة واحدة..

أجازيها بى شنو؟

خليل

مساء خير


(تمسك بيدها الجمر نصرة لقضيتها)..

بينى وبينك الجمرة دى نجضتنا خلاص..

وعدمتنا العافية..

وشوية كمان نقول الروب..

غاليتنا انتصار



ياختى فلقنا العالم بالمسكوت عنه..

لغاية ما سكتنا احنا زاتنا..

اخبارك؟

كله تمام؟

تحية طيبة للجميع

عذرا على التأخير

وسأعود

الآخوات نور و نهال

الله يديكم العافيه و يخلبكم للدفاع عن خقوق أهلنا الغبش

Quote: الله يرحم حسن ويحسن اليه.. دا ما كان جار.. ولا زميل جامعة.. ولا مجرد أخ.. فقد كان كل هؤلاء.. ما أحسست فى يوم من الايام أنه ليس احد اشقائى..

أختى نور والله لم اشعر لحظة واحده منذ ان عرفت حسن بانه ليس شقيقى

الله يرحمه

ولحين العودة

الاخت / نهال كرار

يسعد نهارك ,,,

************

UP

عشان خاطر أستاذتنا / نور تاور

لها خالص التحايا والتقدير ,,,

قلم شجاع وجري ...........

نحترمه كثيرا ,,,

-----------------------

نور تاور

زوله احترمها واقدرها جدا
وذلك لانها ذات لسان
صادق
عفيف
واقعى
فهى مسئوله
وكل ذلك خلال كتاباتها



وليت يتعلم منها الاخريات

صلاح الدين

مساء الخير



وربنا يديم علينا نعمة الاخ..

وسند الاخ..

واحترام الاخ..

فهذا غاية ما نتمناه..

....

نهال مشت سابت البوست ماعارفة ظروفها شنو..

وبيقت ماسكة الوردية كل ما أدخل المنبر..

والضيوف بقوا يتلفتوا يمين شمال...

ان شاالله خير..

عبدالناصر

مساء الخير



وتشكر كتير على الدخول والكلام الطيب..

والرجل السودانى حينما نجده اخا..

فقد وجدنا كنزا نادرا..

الأعزاء جميعا
الأخوة والأخوات والأساتذة

فرانكلي
محمد عكاشة
ودالمايقوما
آمنة مختار
محمد عبدالقادر سبيل
سعدالدين عبدالرحمن
عصام جبرالله
سيف مساعد
عبدالكريم الأمين
فتحي الصديق
القلب النابض
نادية عثمان
بيان
حيدر حسن ميرغني
علي الحسن
ناصر البطل
الشفيع ابراهيم
فضيلي الجماع
محمد حسن العمدة
انعام عبدالحفيظ
خدر
شمس الدين السنوسي
د. عبدالله صديق
اشراقة مصطفى
عبدالرحمن عزاز
حافظ البشاري
انتصار محمد صالح
خليل
برير اسماعيل يوسف
عبدالناصر الخطيب
صلاح الدين عبدالله

شكرا لمروركم الجميل وشهادتكم بحق الإنسانة الجميلة نور تاور
لكم كل التقدير والإحترام


شفتي يانور الناس دي بتحبك كيف

لك مودتي وإحترامي





تخريمة : يا نادية والله كل ما أخش الماسنجر ما ألقاك , رسلي لي الوقت البتكوني فيو قاعدة

Quote: نهال مشت سابت البوست ماعارفة ظروفها شنو.. وبيقت ماسكة الوردية كل ما أدخل المنبر.. والضيوف بقوا يتلفتوا يمين شمال... ان شاالله خير..

يا نور معليش أعفي لي , والله أنا خاشة هسي من الإنترنيت كافي المقاصد البيت


بعدين انتي ست البوست دا

ضيفيهم لمن أجيكم راجعه تاني

سلامي ليك وللجميع

نهال

مساء الخير



(يا نور معليش أعفي لي , والله أنا خاشة هسي من الإنترنيت كافي المقاصدالبيت)..


احنا برضو كدى..

من والى..

عافية منك..

نهال
نور تاور منبر قائم بذاته تخصص فى كشف الحقيقة وكنس الزيف
مدثرة بثياب الوطنية ومتشبعة بروح القومية
فلها الشكر على اندياحها
تحياتى

بلدى

يا حبوب



الكلام دا كبير خلاص..

والله يفرج عننا الغمة..

ويريحنا من المعافرة و دواس الحكومات..

الف شكر على المرور..

التحية للأخت العزيزة / نور تاور وللأخت نهال ،،

وتحايا للجميع ،،

نور تاور ، زولة عادية جداً ! ..
مع أنّها تعيش زمناً غيراعتيادي !! وهذه عبقرية .


نور تاور ، زولة عادية جداً !! مع أنّها تسعى حثيثاً لتجعل من
عزيزتنا " نيفاشا " ضـُــرّةً لها ..! ومعَ ذلك،
فالمنارة المُنَوِّرة "نور تاور " ، تستطيع ان
تُراهن على امتلاك مودّة أنصار وعُــزَّال "نيفاشا "
فاختلاف الرأي لا يُفســِد للودِّ قضيــة ..


"نور تاور " ، لا تقسـر أحداً على اتِّباع مذهبها في السياسة أوالحياة ،
ومع ذلك ،، فكثيرون من أهل هذا المنتدى، حِـراصٌ على التسليم بموضوعية
ومنطقية آرائها، وكذلك، صِـدْقِـيَّتها الإسلوبية التى تنتهجها في خِطابها ؛ وبالحري
فالناس يألفون لهذه المزايا ..
وإذن ، فهذه واحدة من مواهب الاخت " نور تاور " ..

"نور تاور" ، زولة مهمومة بقضايا الوطن ،
أمينة في طرح رؤاها ، مُخلصـةٌ -كما تبدو دائما- في ما تعتنقه من أفكار
وما تحمله من آراء ، حريصـةٌ على بث روح العدالة والإخاء والمساواة
والاحترام المتبادل تجاه المحاورين والمحاورات ؛

ومع ذلك ، تقولون عنها : " زولة عاديّة جداً " !! مع أنّ العادية ، إنْ هيَ إلآ :

كِفافاً ، لا لكِ ولا عليكِ ؟!! .. فسبحان الذي رفع مقام العاديّة الجِّـدَّنية! حينما

ارتبطتْ كصفةٍ تحوزها الأخت العزيزة " نور تاور " ..


مع امنياتي لها بدوام الصحة والعافية وتحقيق الطموحات ،،

العزيز محمد أبوجودة


مساءك خير..



قاعدة قدام الجهاز..

أجيبها يمين..

أجيبها شمال..

ما عرفت ارد على مداخلتك..

غلبتنى كله كله..

لانه جنس الكلام دا..

صعب على..

ولكن يكفينى الاحساس بما كتبت..

فهو شافى ومعافى من أوجاع البدن..

ووجع الحلق الملئ دائما وابدا بمرارات البلد..

التى تفننت حكوماتنا وتتفنن فى توفيرها لنا..

الله يرفع عنا هذه الغمة..

ويهدى حكوماتنا الغير رشيدة..

يا نهال
جميل منك

ويانور

زول عادى درجة بدرجة ( نحبك)

وأنا أتطلع لك وأرددها ..

الحبيه نهال

الزوله ده والله ربنا يحفظها ويخليها, شهتنى فى النساء السودانيات, كم مره فكرت اكتب بوست عنها لكن كانت بتخونى الكلمات, لو لدينا فقط عشره نساء من نوع نور تاور ده لما كان هذا حالنا ولكان للسودان شأن أخر

وانتى كمان زوله ماهيه يانهال ربنا يحفظك ويغطيكى ويخليكى لينا


ولكما الحب والموده والتقدير


وفى امان الله

لا اله الا الله

الحبيه نهال

الزوله ده والله ربنا يحفظها ويخليها, شهتنى فى النساء السودانيات, كم مره فكرت اكتب بوست عنها لكن كانت بتخونى الكلمات, لو لدينا فقط عشره نساء من نوع نور تاور ده لما كان هذا حالنا ولكان للسودان شأن أخر

وانتى كمان زوله ماهيه يانهال ربنا يحفظك ويغطيكى ويخليكى لينا


ولكما الحب والموده والتقدير


وفى امان الله

لا اله الا الله

الحبيه نهال

الزوله ده والله ربنا يحفظها ويخليها, شهتنى فى النساء السودانيات, كم مره فكرت اكتب بوست عنها لكن كانت بتخونى الكلمات, لو لدينا فقط عشره نساء من نوع نور تاور ده لما كان هذا حالنا ولكان للسودان شأن أخر

وانتى كمان زوله ماهيه يانهال ربنا يحفظك ويغطيكى ويخليكى لينا


ولكما الحب والموده والتقدير


وفى امان الله

لا اله الا الله

شفتي كيف يا نور الناس بتحبك....يا بختك....وماذا يملك الإنسان في هذه الفانية غير محبة الناس ....أرجو أن تقبلي محبتي أيضآ...بس حب ما إعتيادي...لإنسانة عادية....

محترمة، تشعرني هي وأمثالها ومثيلاتها، أن سنوات الإسلامويين بكل رعبها ودمويتها ونخاستها ونجاستها لم تلن عزم هذا الشعب العظيم، ولا جعلته ينكس رأسه خيبة.
لها التحية.
وطالما أن وطننا به أمثالها، فسـ"ننتصر"

نور تاور

Quote: تاريخ التسجيل: 16-08-2004 مجموع المشاركات: 3429

سنه ونصف تقريبا بالبورد

رصيد كبير ممن يحملون لكى وردا احتراما وتقديرا
وانا منهم

ولكن فى ذهنى سوال :ـ

نور تاور من هى غير ماتقوله بوستاتها ومداخلاتها ؟؟
واعود لنفسى واقول لها (عليك بما كتبت فقط )

فالف تحيه لها


كلام خارج النص :ـ

اطلب منك اعطاء دروس خصوصيه فى
الاخلاق
لمن لا اخلاق لهم

صلاح الدين اخوى



(نور تاور من هى غير ماتقوله بوستاتها ومداخلاتها) ؟؟


هى زاتها..

بدون اى زيادة أو نقصان..

وبدون أى تناقض أو أختلال فى هذه المعادلة..

وهى دى المشكلة..

يعنى الواحد (ورمان) ليله ونهاره..

والحكومات بتاعتنا ولا يهمها..

ولا بتعرفنا من اصله..

شفت المقسه؟!

العزيز خالد عويس



( تشعرني هي وأمثالها ومثيلاتها، أن سنوات الإسلامويين بكل رعبها ودمويتها ونخاستها ونجاستها لم تلن عزم هذا الشعب العظيم، ولا جعلته ينكس رأسه خيبة)...


عفيت منك تب..

عموم قبائل الجندر..

وشخصى..

أخوى راشد



والحب موصول..

ولو يعلم الناس اننى لا أملك غير محبتى المطلقة لهم..

تسلم كتير..

وخصوصا على الوردة السمحة دى...

بت الاصول


كيف حالك..



يا ستى البلد بخير...

ومليانه...

وحوا والدة..

لكين نقول شنو فى كل حاجة ماشة ضد البلد وناسها؟

ما شفت فى حياتى بلد عندها القدرة على قمع المواطن زى بلدنا دى..

الله يدينا خيرها..

ويهدى ولاة الامر منا..

ويرجعنا كلنا فى شهر واحد أو حتى سنة واحدة..

قولى آمين...

وتسلمى كتير..

الاخ العزيز معتصم الطاهر



كتر خيرك..

والله يجبر بخاطرك..

ونهال تغريك السلام..

والف شكر على الوقت الغالى والمرور والاهتمام..

نور تاور يا غاليه

شايفه البوست لي كم يوم بس كنت بعيده من كمبيوتري لي كم يوم.

وما في عربي هناك.

بجيك برواقه

عشان بتستاهلي

وما حأخلي الماعرفوك الا في البورد يكرموك

وانا النزلت في بيتك وشفت كرمك وطيبتك اتأخر.

لذا لي عوده بمهل والي الغد كوني بخير.

وزي ما شايفه الساعه 2:44 صباحا.

تصبحي على خير.

تراجي.

تراجى



ولا زمان..

الاولاد كيف؟

والبرد عاملين معاه شنو؟

يا تراجى الشكر ليك انتى ومحمد عثمان دريج الكرمتونى ودخلتوا بيتى..

وكمان الملائكة الاتنين عيالك الجبتيهم معاكى..

واقسم بالله يا تراجى..

انى سعيدة بالزيارة دى لغاية هسه..

وكلما أتذكر اليوم داك..

والجو العملتوه لى فى البيت انتو والعيال..

وأتلفت القى البيت تانى فاضى..

تجينى الغمة..

بس للاسف الشديد لمن جيتوا المرة التانية ما قدرت اجى معاكم..

لظروف استحال اجتيازها..

وبعدين ما تقولى كرم ولا غيره..

أوع تكتبى الكلام دا..

اولا انا ما عملت حاجة..

وتانيا احنا سودانيين..

وبعدين الجهاز بتاعك انا شايفاة كل يوم والتانى عنده مشكلة..

اسالى شمس الدين..

بقدر يحل ليكى مشكلة الجهاز..

لانه الحاجات دى عندهم فى تورنتو كتيرة..

نور تاور إمرأة من زمن الحب ..
تعرف متى تكتب ولمن تكتب ولماذا تكتب ..
في بعض الأحيان نفسها بيكون حاااااار ..
تدافع عن قضيتها بصورة عقلانية ولم أشعر يوماً من الأيام أنها من النوع المعارض الذي يتاجر بقضيته ..
ينتابني دوماً إحساس أن نور تاور يمكن أن تدفع لنصرة قضيتها ..
وأشعر أنها يمكن أن تخوض النار (النار الحقيقية ) من أجل أن ترى بني جلدتها في المقدمة ..
مشكلتها أنها لا تقبل في جبال النوبة أي كلام (حق شرعي) حتى ولو كان هذا الكلام صحيحاً ..
نور تستاهل أن نخلع لها القبعة ..
نور حالياً خارج قائمتي للعاديين والعاديات

تخريمة :
بس يا ناور لو تصغري صورتك دي شويييية كده عشان نقدر نقرا مساهماتك بي وضوح اكتر

عمر الفاروق

صباحك خير



كتر خيرك كتير..


(مشكلتها أنها لا تقبل في جبال النوبة أي كلام (حق شرعي) حتى ولو كان هذا الكلام صحيحاً)..



انت ما عارف انه احنا السودانيين نفسنا حار؟

وبلدنا حارة؟

وكل حاجة حارة؟

بس الله يهدينى و(ابرد) شوية..

اما موضوعى مع جبال النوبة يا عمر..

لما بكتب وأتذكر أهلى الكتولهم أو الماتوا واحد ورا التانى..

بالطريقة الفظيعة دى..

الدم يطلع فى راسى..

وكان لى مراد..

وكان بعرف أشيل بندقية..

أدخل السودان دا..

وافتش اى زول شارك فى الجريمة..

واكتل من طرف..

بس للاسف النملة ما بقدر اكتلها..

وبرضو حااسمع كلامك..

واهدأ شوية..


اما حكاية الصورة دى..

والله كرهتنى العيشة..

لانه حاولت اصغرها..

ما عرفت..

ومستنية يزونى زول شاطر فى الكمبيوتر عشان يحل لى المشكلة دى..

ماجانى ضيف/ة..

اصله احنا فى أوتاوا عيشة المقابر بعيد عنك وعن السامعين..

لكين بشوف لى واحد فنى يحلها..

ولا كان أنت بتعرف ..

أكتب لى الخطوات..

نهال كرار يا ما عاديه

نور تاور ايتها المبدعه مليون سلام

مودتي

أحمد العربى



ومليون الف مرحب..

يا اخو البنات..

ومقنع الكاشفات..

Quote: قضيتك دى بيموتوا فيها الناس كل يوم..

وهولاء يا نور هم الذين يعيشون في وجدان الناس والوطن إلى الأبد..إذ لم يمت من ضحى من أجل قضية أمن بعدالتها..
كلما طالعتني صورتك ..مرت أمامى صورة جبل البركل يقف شامخا رغم عوادي الزمن..وتوتيل ومرة في شموخمها وحنوهما بيانبيع عذبة متدفقة في عطاء لا يعرف الكلل..أحبك يانور..ولك من التقدير ما لا تقدرين على حصره ووزنه

الزاكي

الزاكى

صباح الخير



تصدق البوست بتاع نهال دا..

قدر ما برد قلبى..

وخلانى احس انه أتارى فى ناس بتعرفنى..

وكما بتحبنى..

برضو خلانى احس بمسئولية يمكن كانت فى العقل الباطن بس..

وهسه بقت فى النقعة..

وتخوف يا الزاكى..

نور تاور ده صورة صغيرة بس صغرناها ليك بي برنامج درجة الوضوح فيهو ما شديدة وإمكانياتو تعبانة(الرسام) ..
غايتو مشي بيها أمورك لحدي ما ننزل الأدوب في الجهاز

كتر خيرك يا عمر..

حليت لى مشكلة كبيرة..

وخاتينك للعوزة..

الما صورة..

وواثقين تماما..

حنلقاك..

سلام مربع
يا نهال
فقط أقول عن نور
في شخصك بحترم أشخاص ( مع كسر صاد شخصك)
توهجي كعادتك
و لنهال اجر التنويه ولجميع المتداخلين التحية و التقدير

جيت يا نور عشان احبك مع البحبوك

وارفع شانك....

واعلى مقامك

......

وبمناسبة يوم المرأة العالمى لك التحية والمحبة ..

ولنهال كرار .وكل عام وانتن بخير ورفعه ..وجمال..

.الف سلام ..

"والعفو والعافية" ........

الاستاذه نور تاور ...
اتابع مواضيعك ورودود فى سودانيز اون لاين ..ملاحظنى هى عفويتك .. بساطتك ..ووضوحك وقوتك كونى دائما كما انتى نقيه واضحه
محبتى

نور تاورقبل ان اكون عضوا في اون لاين
كنت من اكثر المتابعين لموضوعاتك
يعجبني فيك العقلانية والهدوء الذي يميزك
واعجبت ومعي كثيرين باجمل ما كتب في كل المنابر السودانية
المسكوت عنه في شئون البيت السوداني
هي تحفة يجب ان تدرس في كل الجامعات والكليات المتخصصة

Dear Nour Taour
I like your way also, you are very wise and fighter woman, realy I am continuously read your posts

msd



I truely appreciate

your visit

your follow up

your concern

and your compliment

please come again

الفاتح


سلام ومحبة...



المسكوت دا جاب لى وجع القلب..

وجاب لى الكلام..

ومقعدنى قدام الجهاز دا أربعة شهور..

وقدر ما اقول اقفل (الدكان) دا وامشى..

يجينى زبون..

قلت آتاريه احنا ممقوسين قدر دا؟!


والله يعدل الحال...

قول آمين يالفاتح..

تحية طيبة للجميع

الإخوة والأخوات والأساتذه الأعزاء

بلدي يا حبوب
محمد أبوجودة
معتصم الطاهر
العزيزة الحاجة بت الأحفاد
راشد الحاج
خالد عويس
صلاح الدين عبدالله
تراجي مصطفى
عمر الفاروق
أحمد العربي
nile 1 الزاكي
الفاتح محمد عثمان
msd

تحياتي لكم جميعا , وشكري لمروركم وشهادتكم بحق العزيزة نور

لكم كل التحية والتقدير


وللعزيزة نور الـ ماعادية
أقول لها كما يقول أديبنا عبدالحميد البرنس دائما
لك مافي قلب أمي لي من الدعاء

نهال المستنيرة الماعادية...


أكيد حتكوني (استعوقتيني ) على البوست ده!

عارفة الأخرني عنو شنو؟

إني عايزة أجيهو برواقة..

و أقرأ كل الإتقال عن نور..و أكتب فيها المااتكتب..!

لكن لما جيت غلبني..لأني لقيت نور دي أكبر من كل الكلمات..!

على الأقل الفي قاموسي!

و ما لقيت غير اني أتفق معاك..

إنو نور زولة عادية جداً..!!

لا جميلة مكملة الجمال..و لا متألقة مكملة النضال..!!

لا ممثلة ..لا كاتبة..لا شاعرة..بعظمة!!



زولة عادية..قاعدة في واطاة الله دي..

قاعدة جنبنا.. قريبة لينا..و حبيبة لينا

و كمان قاعدة أقرب مننا للغلابة و التعابى..

قاعدة ..ومقعدها دايماً قضيتها..

لا خلتا لا باعتا..

لا ملت منها..

و لا لما النيران وصلتا ما نفضت يدها منها..

نور ماسكة درب صاح..بتوطا جمر.. و بتزرع ورد..

عمرها ما انتظرت زول يصفق ليها..و لا فزعت لهتيفة!




نور أمل لناس كتيرين..أنا منهم..







نور دي نعمة..

و ما عرفتن نوري انتن..

قولن انتن شن عرفتن..!





تحياتي و محبتي..

نهال و نور...

سنااااااااااااااااء




يا حليك..

انت وين؟

فتشنا عليك ما خلينا حته..

وبعد كدا أتوهوشنا..

لكين الحمد لله..

بركة الجيتى..

وبعد الكلام القلتية دا..

مالقيت حاجة اقولها..

وتصورى دى آخر حاجة اقراها..

بعد ما خلاص قلت اقفل الدكان وامشى انوم..

تصبحى عى خير..

وأتغطى كويس..

وأتحصنى قبل ما تنومى..

وقبال دا كله..

سلمى لى على ست الحبايب الوالدة...

والسلام أمان..

وقولى ليهاتشيل لينا الفاتحة عشان رب العالمين يمرقنا من الغربة وسنينها..


ونشوف وشك بخير..

الأخت الكريمة نهال...لك ودي وإحترامي

نور تاور إنسانة صادقه ولا تخشى فى الحق لومة لائم...تحمل همومنا فى قلبها وتتمنى للجميع غد مشرق وحياة أفضل...حتى الذين تختلف معهم تتعامل معهم بتهذيب...
لها مني كل الحب والإحترام...

مع معزتي

العزيزة سحر عبدالرحمن


صباحك خير




(وتتمنى للجميع غد مشرق وحياة أفضل)...


وهو دا اساس الموضوع يا سحر..

الغد المشرق الجميل لعموم أهل السودان..

وقف الحرب وعدم ارتفاع البندقية فى بقعة فى السودان الى يوم الدين..

الهدء الامنى..

الانتعاش الاقتصادى..

وفرة التعليم..

ووفرة الدواء..

المساواة فى الحقوق والواجبات..

الغاء كافة اشكال القهر عن المرأة..

الاهتمام بالاطفال..

احترام المسنين ورعايتهم..

والعيش فى هدوء وسلام...

أنتى جبتى المظبوط فى سطرين..



الله يحفظك...

إنت عارفة يا نور..

المشاغل لا تأتي فرادى..

بتمر علي زنقات كده ربك وحده أعلم بيها...!

لكن أنا مبسوطة إنك قريت كلامي و مشيت نمت طوالي..

عارفة يا نور..قدر ما تتضايقي ..و تتألمي..

إتذكري انو في ناس زيي..

بيحبوك شديد مع انهم لسه ما لاقوك..

و بيشوفوك قدامهم قدوة..و هدى يمشوا في طريقه..

يمكن وقتها تحسي انك فعلاً بتنجزي..

و يمكن وقتها تعرفي انو تعبك و ضيقك و ألمك..عندو معنى و عندو ثمرة..

و ترتاحي!!



و سلامك حأوصله للوالدة في أقرب اتصال..

تصبحي على خير..

صباح الخير سناء



(المشاغل لا تأتي فرادى)..



يا اختى بنلف وندور فى الغربة دى زى المروحة المحلوجة..

وبلا ثمرة..

يشتغل الواحد/ة لمن يكسر رقبتو..

ويدفعيها ليهم ضرايب..

الضريبة التزوزيهم أنشا الله..

لما وصلت للعالم الاول يا سناء عشان اعيش..

ما زيارات قصيرة قصيرة وارجع..

أكتشفت انه برنامج اللجوء دا ماهو ظرف انسانى..

أو حقوق أنسان..

دا برنامج لئيم جدا...

القصد منه العمالة المتطورة والمتقدمة..

ولانه العمال الاتولدوا عندهم خلاص فتحوا وفهموا اللعبة..

وبقوا يناكفوهم..

وزى ماقبل كدا جابوا الصينيين فى أمريكا وكندا عشان يبنوا ليهم خطوط السكة حديد..

بخدمة تكاد تكون مجانية..

وجابوا الاتراك عشان يعمروا امانيا بعد الحرب العالمية التانية..

جابونااحنا عشان نقوم بالاعمال الاساسية..

يعنى مهما كان مؤهلك العلمى..

ما بتلقى عمل يناسب المؤهل دا الا فيما ندر..

وجابونا ليه؟!

ماجابونا...

جينا برانا..

ولكن كيف؟!

يعنى العالم الاول عنده مساهمات واضحة جدا فى تفريغ العالم التالت..

عشان احنا نجيهم..

وأتذكر فى القاهرة..

الطيارات تتلمى وتشيل وتفرغ فى العالم الاول..

وخاصة الجنوبيين البيودوهم امريكا...

وبعد كدا طلعت اتفاقية نيفاشا..

والتمهيد لفصل الجنوب..

وهسه أمريكا عايزة تبنى قاعدة عسكرية فى الجنوب..

عشان تحرس النفط!

شفتى الموضوع ماشى كيف ؟!

طبعا مستفيدين من خلافاتنا...

وعلى فكرة الحروب بتاعة العالم التالت دى معظمها بيقوم العالم الاول على تحريض الاطراف

المتنازعة...

لو قريتى لكاتبة امريكية اسمها Taylor Caldwell

كتابين بيكملوا بعض وهم..

Dynasty of Death

و..

The Eagles Gather

ديل بيوضحوا ليك كيف أمريكا بتتحكم فى العالم..

وكيف بتشعل الحروب لمصالحها الخاصة....

أحنا(الهبل)..

نشيل ونشتكى ليهم...

ونجرى ونلجأ عندهم..

عشان ناس الحكومة عندنا لا بيفتحوا ليهم كتاب..

ولا بيقروا(مخ) العالم الاول...

ولو تلاحظى فى العالم الاول..

أغلب الوظائف الدنيا بيقوموا بيها المهاجرين واللاجئين..

كان كسروا رقبتهم..

مافى حل..

يعنى مثلا تلقيهم بسووا الاتى:

توزيع الجرايد..

تنظيف المؤسسات الحكومية والبيوت من خلال شركات خاصة..

سواقة التاكسى..

طبخ وتوزيع البتزا..

العمل فى المطابخ التجارية الكبيرة والفنادق..

ال security عشان يحرسوهم..

عمال البناء والطرق..

البياعين فى المحلات التجارية..الخ

والخواجة هو البيقوم بالاعمال المرتبطة بالتخطيط والتحكم فى البلد..

شفت مرة فيلم أمريكى اسمه Zero Cost Labour

دا يا سناء لو شفتيه حتبكى..

دا بيوضح ليك بالضبط العمالة الجاية من برا..

منكفية على أى جهاز وشغالة ليل نهار..

بأجر رمزى..

هو فعلا zero

ولكن بالنسبة للعالم التالت..

وعشان فرق العملة..

بيعتبر ملايين..

شفتى شطارة الخواجات..

شفتى فضيحة حكوماتنا اللى لمن تسوى الغلط..

ماعارفة بتودى المواطنين لى ياتوا داهية؟!



فتك عافية يا سناء..

عندى فواتير ماشة ادفعها..

وراجعة للطاحونة تانى..


نهارك سعيد...

Quote: أكتشفت انه برنامج اللجوء دا ماهو ظرف انسانى.. أو حقوق أنسان.. دا برنامج لئيم جدا...

الفاضله نور
نحتاج ان نتنور منك اكثر بخصوص هذه النقطه ويا حبذا ببوست منفصل
مع تقديرى
وقد فتحت بوست بهذا المعنى

الاخ المحترم صلاح الدين

نهارك سعيد



كتبت بوست قبل كدا عن احوال السودانيين فى دول المهجر..

ركزت فيه على العالم الثالث...

وهو عبارة عن مشاهد يومية فى حياة السودانيين فى الخارج..

البوست بعنوان (صباح الخير ايها المرابضون خارج حدود الوطن)..

ما عارفة فى ياتو ارشيف..

لكين ممكن تفتشه و تطلع عليه..

لغاية ما الاقى وكت..

وأكتب بالتفصيل..

وشكرا على الاهتمام.

وان شاالله ماتكون واحد مننا..

اختي العزيزه نور
تحياتي
اتابع باهتمام ماتكتبين
تستحقي الثناء
كل عام وانت بخير
وكل نساء بلادي
بالف خير

الاخ المحترم اسامة سعيد

مساء خير



شكرا على وقتك الغالى..

ونرجو أن نكون عند حسن الظن..

العزيزتان سناء وسحر
تحياتي

وإعتذار شدييييد على التأخير في الرد


أعمل شنو بس للمشاغل الحامياني ( وش بائس )


لكم كل الشكر والتقدير والإحترام

مساء الخير نهال



اسم الله عليك من الوش البائس..

وربنا يوقفك فى جميع مساعيك...

لقيت اسمك..

ودخلت اقول مساء الخير..

وأكرر شكرى على البوست ووقتك ومتابعتك..

وكل عام وأنت بخير..

بمناسبة يوم المرأة العالمى!

تخيلى؟!

العزيزة نهال تحياتى

لقد اصبت والله فيما سطرت

نور تاور اكثر من زولة عادية ولكنها بهامات الرجال

معك اسطر لها احترامى وتقديرى .............

نهال ونور
تحياتي لكليكما وامنياتي
نعم انها امراه عظيمه
دافعت عن قضاياها بصدق وشرف
ناضلت وجادلت وخاصمت
لكنها كانت سمحه في خصامها
سمحه في جدالها سمحه في وطنيتها واعتدالها
رايتها لاول مره في القاهره
تتحدث عن الجبال حديث
المحب الصوفي العاشق
حديثها عن منطقه ضمن منظمومة الوطن الواحد
لم يخرجها غضبها وهي تري منطقتها مهمشه ومنسيه لتنادي بالانتقام او الانفصال
انها انسانه سودانيه نقيه صافيه كماء النيل
لك الود والحب يا نور تاور
انت تدافعي عن المظلومين والمهمشين
وفي قلبك الكبير هموم هذا الوطن العاق ابناءه
لك الحب في يوم المراه وانت تاسسين مدرسه للتحابب والتصافي وجمع الشمل
التحيه لك اينما كنتي
وشكر لك يا نهال
فقد اوفيت وانصفت من يستحق

الصادق عثمان

مساءك خير



(لك الحب في يوم المراه وانت تاسسين مدرسه للتحابب والتصافي وجمع الشمل)...


حينما أشعر بأن شخصا واحدا يفهم رسالتى..

اشعر بأن كل المعاناة تهون...

فى سبيل المليون مليل مربع..

الف شكر ياالصادق...

هشام امين



يا أخوى كتر خيرك..

وزارتنا البركة..

واول مناسبة تجمعنى بيك..

والبركة فى الغالية نهال..

دخولك الليله ليه فرحتين..

التانية يوم المرأة العالمى..

نجوب هنا بين اليسار واليمين ..
بين الروائي والقاص ..
بين الموسيقيين والرسامين ..
بين الصحفيين والنقاد واخرون اكثر القاً ..
نجوب هنا ادب الحوار بين اقصي ناصيتين ..
دون النزول إلي ما تنوء بحمله انفس القارئ والمجادل والمعقب ..
اما نور .. فهي كل اولــئك السودانين ذوي الشخصيه القديمه الحديثه.
الذين نعرفهم ، ونألفهم ،ويمشون في دمائنا في اقل من مسافه روحيه .
الذين تتناولهم افئدتنا بإشتهاء فاضح ، في هدوء يسكنون مسامنا
يأتون دونما موعد فيشعلون الارض محبه ، واخاء كما الحوش الكبير .
نعم فالحوش الكبير يسع الراكوبه .
وبعض الشتلات .
والعناقريب .
والمزيره ...

تحياتي نهال

عمار...




صباحك ولا مساءك ..

ولا وين ما تكون سماءك..خير..



(اما نور .. فهي كل اولــئك السودانين ذوي الشخصيه القديمه الحديثه)...




وحين انا لا اقول أحبك..

فمعناه انى احبك اكثر...

دا بالظبط أحساسى تجاه البنى آدم الاسمه سودانى/ة..

أما حب الوطن نفسه..

فذاك داء عضال..

ندعو الله مخلصين له الدين..

الا يشفينا منه...



كتر خيرك كتير فى الكلام والدخول والوكت..

وكله..

سلام

يا نور البوست دة فاتنى فى أيام غيابى
جيت أسلم عليك و على نهال التى لا أرها

سلام

نور بت الجبال عاقلة وهدية رضية

بت زى الدهب ماشفنا ليها اذية

مرهفة كالنسيم وساعة الشديدة قوية

أحب انا كلو عادى ونور تكون عادية !!

هيااااا نادية؟

الشعر دا بجيك كدى براااااه؟

ولا بجيك كيف؟

والله عجبتنى الابيات دى..

وخففت على القعدة الانا فيها...

وبعدين أتسحبتى من البارود والنار برااااحة..

وتانى ما جيتى..

برجعه بكرة وان شاالله نشوفك..

بتك كيف على فكرة؟!

وكل الحاجات كيف؟

نور الغالية

Quote: هيااااا نادية؟ الشعر دا بجيك كدى براااااه؟ ولا بجيك كيف؟ والله عجبتنى الابيات دى.. وخففت على القعدة الانا فيها...

الشعر ده بجى صادق وعفوى للناس البستحقوه ياغالية .. وسعيدة جدا انا بأن خففت كلماتى البسيطة عليكى عناء الغربة وشقاء البعد عن الوطن والاحباب

Quote: وبعدين أتسحبتى من البارود والنار برااااحة.. وتانى ما جيتى.. برجعه بكرة وان شاالله نشوفك..

لا والله ماانسحبتا بس قلت اجيك كل مايكون عندى المفيد لانه بوست رائع وتوثيقى مادايرين نعملوا ونسة خلينا نتونس عند نهولة بت كرار دى بى جاى ..سمح

Quote: بتك كيف على فكرة؟! وكل الحاجات كيف؟

ايمان كويسة وبتقول ليك انا كويسة ياخالتو نور وخلى بالك من البرد الشديد !!

وكل الحاجات تمام ونتمنى تجى زيارة للقاهرة طولتى منها يازولة !!

زول أبن زول

يا حليلك



يا أخوى المغنواتى دا منو؟

أنت بقيت فنان ولا شنو؟

كان بقيت فنان عشان نجى نشتغل ليك كورس!

أنت عارف أوتاوا..

وبياختها...

الشـــــكر لـ زول إبن زول ، فقد أتـــاح لي الفرصــــة لأري هذا البوســت فأنا مثله كثير الغيــاب

نهــال .. لقد أثبت ذكاءاً و شفافية و أنت تفتحين هذا البوســت، فكأنك رأيت ما يضمــره الناس - مثلك - من تقديــر لنـــور تــاور ، فقمت بكتابــة "شـــــهادة التقديــر" هذه علي عجل ثم وضعتهــا علي مدخل المنـبر .
و وقفت من علي البعد ترقبين بإســتمتاع: الداخل إلي المنبر يوقع عليها و الخــارج منه يوقـع عليهــا. الماري من جهة (اليسار) يوقع و القادم من جهة (اليمين) يوقع. الذي يتفق مع ما تكتبه نور يوقع و الذي يختلف معه أيضــاً يوقع. الخصمان يلتقيــان عند مدخل المنبر (فيحدر) هذا و (يحدر)، و خيرهما الذي يبدأ بالتوقيع.

أنتهـز هذه الفرصـــة لأقول لنهــال برافــــــو بالخط العريض. وقبل أن أوقــع علي شـــهادة التقديــر للأخت نور تـاور، أحيي نضـــال أهلنا في جبال النوبة و أترحم علي شهدائهم الأبرار .. و أحي كل القياديات من نساء بلادي

أخى العزيز خالد الايوبى



مساء الخير او صباحه..


(الشـــــكر لـ زول إبن زول ، فقد أتـــاح لي الفرصــــة لأري هذا البوســت فأنا مثله كثير الغيــاب

نهــال .. لقد أثبت ذكاءاً و شفافية و أنت تفتحين هذا البوســت، فكأنك رأيت ما يضمــره الناس - مثلك - من تقديــر لنـــور تــاور ، فقمت بكتابــة "شـــــهادة التقديــر" هذه علي عجل ثم وضعتهــا علي مدخل المنـبر .
و وقفت من علي البعد ترقبين بإســتمتاع: الداخل إلي المنبر يوقع عليها و الخــارج منه يوقـع عليهــا. الماري من جهة (اليسار) يوقع و القادم من جهة (اليمين) يوقع. الذي يتفق مع ما تكتبه نور يوقع و الذي يختلف معه أيضــاً يوقع. الخصمان يلتقيــان عند مدخل المنبر (فيحدر) هذا و (يحدر)، و خيرهما الذي يبدأ بالتوقيع...



خالد الايوبى

أحمد الله أن هناك من يفهم وجهة نظرى فى ضرورة التحاور مع كل من يريد الحوار..

الاتفاق بادب...

والاختلاف بأدب..

ثم اختلاف الرأى لا يفسد للود قضية!

جزاك الله الف خير

والاخت نهال من الشكر أجزله..

أن أتاحت لى هذه المساحة..

لاسمع حكم الاخرين فى أسلوب طرحى..

الأعزاء

هشام أمين
الصادق عثمان
عمار بيلي
زول بن زول
نادية عثمان
خالد الأيوبي


لكم الشكر والتقدير , فالعزيزة نور تستحق كل الإحترام والإشادة


ولكن يبدو بأن البعض يصر على تفسير إحترام الجميع لها بمختلف توجهاتهم , تفسير خاطئ
يسيئ لوطنية نور ونضالها

النضال في نظري نوعان

إما حمل السلاح , أو القلم لا ثالث لهما

وبما أننا في منبر للنقاش , فأكيد يجب أن يكون النضال هنا بالقلم


ولا يمكن أن تعتبر الكتابة نضال إلا إذا تسلحت بالمعرفة والتوثيق والعلم

لأنها ستكون أشد تأثيرا وقوة

أما الشتم والمهاترة فلا يعد نضالا , فهو لا يقدم ولا يخيف أحد

والحقيقة أن نور كانت ولازالت تفضح جرائم الإنقاذ بذكاء ومعرفة وعلم

وطرح جاد محترم

لو أنهم يعلمون قوة سلاحك يا نور لما تحدثوا !!

الغالية نهال...



لا يمكننى ايفاءك حقك من الشكر والتقدير..

أقل ما تنمحينه لى هو الوقت الغالى الذى يتسرب من بين أعمارنا ثانية ثانية..



(أقتباس)...

(النضال في نظري نوعان

إما حمل السلاح , أو القلم لا ثالث لهما)...


أضيف نوع ثالث من النضال لوسمحتى لى..

وهو المعركة اليومية الضارية لتوفير حلة الملاح وطرقة الكسرة فى السودان اليوم..

هذه دخلت فى طور الجهاد..

فيما أمتلات بطون البعض و تضخمت حساباتهم فى البنوك حتى فاضت..

ومايزالون يلهثون..

الأُخت الغاليّه : نهال كرار.
لك وللأُخت نُورْ تاورْ أسمي آياتْ المَحبَه.
المثلْ بِيّقولْ: "الله ما جابْ يّومْ شكركْ"
بالمُناسبه هذه المرأه حاجه تانيّه خالِص..
مُحيّط يصعبْ عليّنا الوقوف بشاطئه...
وجَبَل شاهِق تِنخَلِع الرقاب لِمُشاهدة ذروتِه...
مهما قُلنا عنها، لايُمكِنْ أن نوفيّها حقها كامِلاَ أبداَ..
إستأذنْ الأخُتْ نَدويّه وإستَعيّر مِنها ، هذه الكلمات المنظومه
كمُحاوله مِني ، تُعبِرْ عنما يجيّشْ بِه مَكنونْ صدرِي عِرفاناَ للهذه القامه:

Quote: نور بت الجبال عاقلة وهدية رضية بت زى الدهب ماشفنا ليها اذية مرهفة كالنسيم وساعة الشديدة قوية أحب انا كلو عادى ونور تكون عادية !!

أخى العزيز محمد آدم..



ناصرتنى حتى كدت أصدق أننى بهذا المقام..

ولكننى حينما أتذكر أشياء معينة فى السودان اليوم..

أشعر بأن أمة الامجاد والماضى التليد..

قد أصبحت ضحيتنا ونكبتنا فى ذات الوقت..

فأحس بالعجز التام..

.........

قدر لى أن أعمل صحفية فى جريدة الصحافة فى السودان ذات يوم.

منحتنى تلك الفرصة السفر الى أغلب مناطق السودان..

بمختلف وسائل السفر وحتى حبيب الاهالى فى الاقاليم...(الحمار)...



وأشد ما آلمنى ويولمنى فى لمحات سريعة جدا هو:



منظر النساء وهن مثل(بروة الصابونة).

أنتحلت أجسامهن من كثرة العناء والتعب.

و ليس لديهن مجرد القدرة على أستيعاب حجم المعاناة..

الاطفال بملابسهم الممزقة وعيونهم الشقية..

وضحكات تتعالى هنا وهناك..

غير مدركين للوضع الماساوى الذين يعيشونه..

والاخطر من كل ذاك , هو الخطر الذى يحدق بهم..


العجزة والمسنين الذين لم يكرموا فى هذا البلد الامين.

مرضى وجياع وجهلة.

وصابرون قانعون..

الشوارع (المعدومة).

المياه الملوثة.

الامراض الوبائية والمستوطنة ..الخ..

.............

رأيت بعينى والله على ما أقول شهيد يا محمد ....

نساء وأطفال فى سوق الجنينة منهمكات فى تنقية الذرة الذى تناثر من احد الجوالات فى لورى

كان محملا وهو فى طريقة الى دول الجوار لبيعه فى السوق السوداء..

حبابة حباية يا محمد آدم!

رايت فى مستشفى الجنينة فتاة فى السادسة عشر من عمرها...

جمالها أفريقى خرافى..

هرعت الى الدكتور وهى تلهث من معسكر الجزام فى أطراف مدينة الجنينة.

لان أعراض المرض اللعين كانت قد بدأت تظهر عليها..

ثم نساء فى متتصف العمر فوق المبانى يعملن مع الرجال فى بناء المنازل..

ثم ندرة المياة وهياكل المواشى العظمية متناثرة فى الطريق من الفاشر الى ملوط..


............

منطقة السد فى جنوب السودان حينما ذهبت فى وفد صحفى مع دكتور قاما حسن مدير مشروع جونقلى..

أمراض الدنيا والاخرة...(داك موضوع تانى!)..

........

ثم تفجرت الحرب الاهلية!

والباقى معروف..

عملنا شنو يا محمد آدم..

أنجزنا شنو؟

أهو قاعدين نوقع وندين ونشجب ونقول يالامم المتحدة الحقينا ويا المجتمع الدولى الحقنا...

وفى فترة الاستراحة نمسك فى بعض.

لغاية ما جبنا الاستعمار الحديث للسودان...

المرة دى جبناه أحنا بدعوات خاصة..

ومظاهرات ومذكرات...

والحاح كمان..

أها قلت شنو يا محمد يا أخوى؟!

أخى العزيز محمد آدم..



ناصرتنى حتى كدت أصدق أننى بهذا المقام..

ولكننى حينما أتذكر أشياء معينة فى السودان اليوم..

أشعر بأن أمة الامجاد والماضى التليد..

قد أصبحت ضحيتنا ونكبتنا فى ذات الوقت..

فأحس بالعجز التام..

.........

قدر لى أن أعمل صحفية فى جريدة الصحافة فى السودان ذات يوم.

منحتنى تلك الفرصة السفر الى أغلب مناطق السودان..

بمختلف وسائل السفر وحتى حبيب الاهالى فى الاقاليم...(الحمار)...



وأشد ما آلمنى ويولمنى فى لمحات سريعة جدا هو:



منظر النساء وهن مثل(بروة الصابونة).

أنتحلت أجسامهن من كثرة العناء والتعب.

و ليس لديهن مجرد القدرة على أستيعاب حجم المعاناة..

الاطفال بملابسهم الممزقة وعيونهم الشقية..

وضحكات تتعالى هنا وهناك..

غير مدركين للوضع الماساوى الذين يعيشونه..

والاخطر من كل ذاك , هو الخطر الذى يحدق بهم..


العجزة والمسنين الذين لم يكرموا فى هذا البلد الامين.

مرضى وجياع وجهلة.

وصابرون قانعون..

الشوارع (المعدومة).

المياه الملوثة.

الامراض الوبائية والمستوطنة ..الخ..

.............

رأيت بعينى والله على ما أقول شهيد يا محمد ....

نساء وأطفال فى سوق الجنينة منهمكات فى تنقية الذرة الذى تناثر من احد الجوالات فى لورى

كان محملا وهو فى طريقة الى دول الجوار لبيعه فى السوق السوداء..

حبابة حباية يا محمد آدم!

رايت فى مستشفى الجنينة فتاة فى السادسة عشر من عمرها...

جمالها أفريقى خرافى..

هرعت الى الدكتور وهى تلهث من معسكر الجزام فى أطراف مدينة الجنينة.

لان أعراض المرض اللعين كانت قد بدأت تظهر عليها..

ثم نساء فى متتصف العمر فوق المبانى يعملن مع الرجال فى بناء المنازل..

ثم ندرة المياة وهياكل المواشى العظمية متناثرة فى الطريق من الفاشر الى ملوط..


............

منطقة السد فى جنوب السودان حينما ذهبت فى وفد صحفى مع دكتور قاما حسن مدير مشروع جونقلى..

أمراض الدنيا والاخرة...(داك موضوع تانى!)..

........

ثم تفجرت الحرب الاهلية!

والباقى معروف..

عملنا شنو يا محمد آدم..

أنجزنا شنو؟

أهو قاعدين نوقع وندين ونشجب ونقول يالامم المتحدة الحقينا ويا المجتمع الدولى الحقنا...

وفى فترة الاستراحة نمسك فى بعض.

لغاية ما جبنا الاستعمار الحديث للسودان...

المرة دى جبناه أحنا بدعوات خاصة..

ومظاهرات ومذكرات...

والحاح كمان..

أها قلت شنو يا محمد يا أخوى؟!

الأخت نهال كرار

نحن نتابع ما تكتبه الأخت نور تاور بإهتمام شديد، تعجبني شجاعتها وموضوعيتها في تناول القضايا، حين تدافع عن المرأة أحس بأنها تدافع عن أمي وأختي وكل نساء بلادي، أقرأ العديد من مقالاتها في صمت دون تعليق كنت أبحث عن مثل هذه الفرصة لأقول لها أنت تكتبين بصدق ونحن نحس الصدق فيما تكتبين.

عادل عبدالرحمن إبراهيم

أنا هنا بصدد تحية خاصة وتعظيم سلام للأخت نهال كرار، على هذه الشفافية والقدرة في فرش بساط المحبة هذا للأخت نور تاور، التي أقول أنني تعرفت على حرفها في بداية التسعينات من القرن الماضي، من خلال مقالاتها المنشورة في جريدة الخرطوم، فقرأت صرامة وإنحياز دائم للسودان الوطن، وكم كانت سعادتي بالجلوس قربها في هذا المنتدى.
وتحيتي لنهال لعلمي (حسب ما تكتبه هنا)، قد تختلف في الرأي مع نور، ولكنها حتما تتفقان في الرؤى الممتدة عبر هذا النفق نحو بصيص من الأمل والضوء.

التحية لنهال وهي تجمع كل هؤلاء في بوست واحد، على شرف نور تاور، وشكرا لنور تاور التي إتفق حولها كل هذا الإختلاف........والآن فقط تأكد لي أننا ما زلنا سودانيين.

أنا سوداني إذن أنا أحب نور تاور.

الاخ المحترم nadus2000


تحياتى واحترامى..


(أنا هنا بصدد تحية خاصة وتعظيم سلام للأخت نهال كرار، على هذه الشفافية والقدرة في فرش بساط المحبة هذا للأخت نور تاور، التي أقول أنني تعرفت على حرفها في بداية التسعينات من القرن الماضي، من خلال مقالاتها المنشورة في جريدة الخرطوم، فقرأت صرامة وإنحياز دائم للسودان الوطن),,


غير تعب الكتابة يا نادوس ياأخوى..

المابيجى حاجة جنب الناس الماتت واللى لسه بتموت زى جراد(مصلحة النباتات)..

البلد أهى ابتدوا يقسموا فيها..

والباقى بيبيعوه أو يخلوه كدا من غير ما يقولوا حاجة..

(وادى حلفا..مثلث شلاتين وحلايب..) والبقية تأتى..

والمليون ميل مربع البنهاتى بيها دى..

بقت تنقص شوية شوية..

يعنى مهما عملنا..

محلك سر..

والبركة فى العساكر!

الاخ المحترم عادل عبدالرحمن..


تحياتى والف شكر على الوقت الغالى...




(حين تدافع عن المرأة أحس بأنها تدافع عن أمي وأختي وكل نساء بلادي)..




وهو دا المجننى ومطير البرج من مخى..

البلد دى من غير نسائها ما بتمشى خطوة واحدة..

وياريت تصدقونى..

الأعزاء

mohamed adam
adil rahman
nadus2000

لكم كل الشكر والتقدير , فنور تستحق الكثير





الأعزاء

mohamed adam
adil rahman
nadus2000

Quote: وتحيتي لنهال لعلمي (حسب ما تكتبه هنا)، قد تختلف في الرأي مع نور، ولكنها حتما تتفقان في الرؤى الممتدة عبر هذا النفق نحو بصيص من الأمل والضوء.

وصلت


لكم كل الشكر والتقدير , فالنور تستحق الكثير

نهال
UP
لمن اجيكى بى رواقه..
سلام يغشاكى انتى والخاله نور..

معتز


سلام يغشاك..

سعد الدين عبدالرحمن

سلام

وتبسمك فى وجه اخيك صدقة..

نور تاور وكفى

ود الديم


بركة الشفناك طيب..

ألاستاذة نور تاور
احترامي لك
محمد علي المشرف مختار

دكتور محمد على المشرف



تحية وأحترام

شرف لا يدانيه شرف أن أكون محل تقدير هذه الكوكبة الفريده..

شكرا دكتور...

نور تاور اكثر من عادية وانسانة سودانية اصيلة لها التحية.

مولانا هاشم نوريت


موش أنت الما قدرت أسلم عليك بالاحضان فى المظاهرة الخاصة بدارفور أمام البرلمان الكندى عشان

أنت من أنصار السنة؟

أنت الاصيل يا مولانا...

وكتر خيرك على الدخول..

نور تاور..نور تاور
إنجذبت إليها بالحب مرتان..أولاهما أنها تحمل إسم أغلى إنسانة في حياتي(الوالدة الحبيبة عليها رحمة الله) وأطال الله عمر نور تاور..والثانية لصدقها وشموخها وشجاعتها في قولة الحق..وهانذا أغرق في حبها حتي أذني مرة ثالثةإذ أحبها معي كل الناس..وبعدبن معاك يانور تاور؟؟؟خلى لينا حاجه نحب بيها غيرك....تحياتي

الزاكي

أخى الزاكى





فضلت التعقيب على مداخلتك الان وترك بقية بوستاتى معلقة حتى صباح الغد..

عشان جريت..

لمن تعبت..

وتانى جاريه..

لغاية ما رب العالمين يقول كفاية..

....

الوالدة الله يرحمها ويحسن اليها..

ويجعل مثواها الجنة..

أما أنا يا الزاكى يا أخوى..

قصتى قصة..

وآخرها لسه..

....

تجى حكومة..

وتمشى حكومة..

وكله عند العرب صابون..

ونحنا قلنا نشيل (الحاجة الصغيرونه المزعجة) الاسمها ضمير دى!

نرميها...

عشام نرتاح شوية..

ونوقف الجرى يومين تلاته..

لكين أبا يترمى..

ولا يموت...

حكمة الله عنده أكتر من سبعة أرواح..

أشتكى الجسد..

لمن قال كفى...

وبرضو مافيش فايدة..

قرر أنه (حضرتنا)..

تجرى..

ولمن تقول تقيف وتآخد نفس..

الضمير يقول ليك...

المرتاحة ليها شنو؟!

فى مليون حاجة وحاجة معلقة..

وفى حكومة أنيابها سايلة من دم الغلابة.

ما بتشبع كله كله..

قومى أجرى..

عسى ولعل..

عشان الحكومة دى كان مشت..

(بعد عمر طويل)..

تجى وآحدة تانية..

برضو بتحب دم الغلابا...

أكتر من الفاتت..

و(نتخلع)..

ونقوم نجرى...


...
فتك عافية ياالزاكى ..

أناجارية..

بجيكم بكرة الصباح..

كان رب العالمين أذن..

عشان أجى برضو أواصل الجرى!

أسفيريا المرة دى!

معاكم...

اجرى ونحنا نجرى وبكرة باقى قريب

يابت من بلدنا الغالى ديمة حبيب

فى بالك وطن غربتنا منو نصيب

تسلمى نور حبيبة المابتعرفى العيب !!





خارج النص :

نور بت عم تاور الراجل الطيب

ماتورينا نهاية الجرى ده شنو ياغالية ؟!!

Quote: اجرى ونحنا نجرى وبكرة باقى قريب يابت من بلدنا الغالى ديمة حبيب فى بالك وطن غربتنا منو نصيب تسلمى نور حبيبة المابتعرفى العيب !!

ماجرت طول العمر شان ناس الجبال
(نوب) فى القاهرة و مصايد الأهوال
بت بلد... حبينا فيها .. الكلام و المقال
نور.. عيونا .. وسيف الغبش و النضال

و معاك يا شاعراتنا نادية...
تحية لنور تاور...
نهال كرار..
و الجميع؛؛

يا بت النوبة العربية
يا بت العرب النوبية
يا بت السوداااان


ندرك تماما يا نور ما يدور لكننا نقرأ فقط و نتحفظ للعديد
من الاسباب اولها عدم توفر الوقت لبذله للمهاترين/ات الشتر و
علمنا بلياقتهم و الجلاطة و ما شابه ذلك
لكن بالرغم من ذلك يا نورنا

Quote: وهسه بقت فى النقعة.. وتخوف يا الزاكى

اففففو!
كان انتي خفتي من المسؤلية اللي راح يثبت منو
اوعي تكوني فاكرة روحك براك
بس ندعو معاك ربنا يدينا كلنا الصحة و بعض الوقت نبذله في/على عمق القضية
و الجوهر و ليس في من لا يستحق..
دمتي لنا نورا.