بالطبع تتذكرون بوستي عن تجديد عقدي بالعمل وقد رفضـت التوقيع عليه لأنني وجدت الفقرة التالية : يمنح المذكور إجازة وضع قدرها { 45 } يوم 00 كمان قال شنو : براتب كامل وكما ذكرت لكم أن الموظف المختص بتعبئة العقود قد نسخ العقد من نسخة خاصة بالمستشفى حيث توجد الكثير من الممرضات والحمد لله بعد إنتهاء آلام الوضع وإكمال الأربعين يتوج كل ذلك بشركة الراجحي المصرفية عندما ذهبت لإستلام راتبي اليوم حيث تخرج ورقة عبارة عن ايصال من ماكينة الصرف الآلي تعطيك الورقة تفاصيل عن عملية السحب والرصيد المتبقي وفي ختام الورقة وجدت العبارة التالية : أختي الكريمة : الرضاعة الطبيعية تخفض بإذن الله الإصابة بسرطان الثدي !! قال نعتـز بقيمنا قال !!!
الرضاعة الطبيعية المقصودة يمكن هي عملية السحب الآلي هههههههههههه يا زول اذا ما اعطتك الدنيا ثديها فأرضع حتي الشبع لو ما عشان خاطرك يبقي حماية لها من سرطان الثدي
09-18-2004, 04:25 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22834
أخي ابوجهينة أكاد أجزم بأن معظم المغتربين بالسعودية لايملكون ما يسد رمقهم ناهيك عن توفير بعض المال في هذه الصرافة 00 نحن يا استاذي مازلنا بدون خطط وبدون أهداف محددة وقد اصبحنا مثل الرقشة لا هي موتر ولا هي حافلة وبالتالي سوف لن نلحق بركب الذين بالسودان وطالما كل واحد منا قد وظّف نفسه ليكون بقرة حلوب صفراء فاقع لونها تسر الناظرين فلن يحدث استقرار بسهولة وسوف يظل المغترب السوداني يعاني الكثير من الآلام والأوجاع والضغط والسكري وترهل الكرش وتآكل المفاصل 0ما هي الجريمة لو أن كل مغترب صاحب عائلة سمح له بإدخال سيارته وعفشه المتهالك مجاناً خاصة للذين امضوا أكثر من عشرة أعوام بالإغتراب ؟؟ اعرف آلاف من الأسر السودانية الذين ينوون العودة للوطن ولايملكون الا القليل وأتمنى أن يتم مساعدة هؤلاء ليستقروا بوطنهم فما قيمة رجل يبلغ من العمر أكثر من خمسين عاماً ولديه ابناء وبنات في مراحل المراهقة والزواج 00 ما قيمة ان يمكث بالغربة أكثر مما ممكثه 00 لماذا لاتدرس حالات مثل هؤلاء ويصدر قرار جمهوري قوي وإنساني وصريح يعالج لمثل هذه الظواهر 00 استقرار أغلب المغتربين بالسودان يحتاج الى قرار جريء وأعرف أنه لن يكلف وطني كثيراً بل يمنحه الإنسان والذي يجب أن يكون هدف الجميع 0 بل ومن ثم سيضخ هذا الإنسان خبرته في شرايين الوطن ليظل قلب الوطن نابضاً بالحيوية 0 اقسم بالله لو كنت في مركز القرار فإن أول قرار سوف أصدره هو إعفاء جميع المغتربين من الضرائب وكل المساهمات وكل الجمارك لمدة عامين من الآن والسماح لهم بإدخال كل ممتلكاتهم مجاناً للوطن وأكاد أجزم أن هذا القرار لو تم اتخاذه فلن يبق بالإغتراب غير الذين دفنوا في مواقع اغترابهم !!!!
09-19-2004, 00:30 AM
ابوحراز ابوحراز
تاريخ التسجيل: 06-27-2002
مجموع المشاركات: 5545
أخي نصار اصبحنا نرضع كثيراً من الأحلام عل ذلك يخفف عنا آلام الغربة وأحزانها وأشواكها وقد جفت اثداء الدنيا لما اصاب الدنيا من قحط وظلم ونتمنى أن يضخ العدل في أثدائها لتصبح دنيا كثيرة العطاء 0
09-18-2004, 08:22 AM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9878
أستاذنا عووضة كيف لي أن أبوّز وبضعاً من أسناني قد تآكل وربما هي في طريقها للسقوط لكنني ربما أبوز على الطريقة الأخرى والمتعلقة بمد القدوووووووم الى ما لانهاية في إشارة لإمتعاضنا عما يحدث من لامبالاة في الإجراءات الإدارية والخدمة المدنية بصورة عامة واذا ما قدر لك أن ذهبت السودان ستجد العجب في الدوائر الحكومية واللامبالاة الضاربة في الأطناب 00 وقد ذهبت مع صديقي لتسجيل قطعة ارض واستغرق ذلك اكثر من خمسة عشر يوماً كنا نروح ونأتي وندفع ونأخذ كل يوم مزيدٍ من الأوراق 00 ويا ويلك لو أتيت قرب الساعة الثانية عشر حيث المنطق العقيم والساذج جداً عندما يقولون اليك " الخزنة قفلت " لينتهي اليوم دون حصاد !!! ساعة للإفطار وساعة للصلاة ومثلها للنوافل وأخرى للحوامة بين المكاتب وساعة أخرى لإخفاقات الهلال والمريخ وساعة للمواصلات 0 سؤال بريء : هل بطاقة الخدمة الإلزامية تستخرج للنساء ؟؟ شاهدت ذلك في جهاز العاملين بالخارج وكنا مجموعة من الشوارب في انتظار أن يفتح فرع البنك لنسدد له 60 الف جنيه هي رسوم البطاقة وبعدها بقليل تطل إمرأة غاية في الروعة لتقف أول واحدة وهي تحمل ملفها 00 فقلت لها يابت العم المحل هذا مخصص للرجال ناس الله أكبر والخدمة الالزامية وقلت لها نحن هنا اتينا مبكراً ولن نسمح لك ؟؟ فقالت لي : أمسخ من المغتربين لم أر في حياتي نهائياً 00 شيء عجيب !! أها الموظف قال لي : أها نكاية فيك يا ابوحراز قام بدل يفتح الشباك قفل الشباك وفتح ليها الباب وقال ليها تعالي أدخلي وهااااااك ياونسة ؟؟ طبعاً لمن جاء دوري قام الموظف قال : أها أخير ليك كدا ؟؟ قلت ليهو عليك الله خذ قروشك دي قبل ما أدخل أعضيك ؟؟؟
09-19-2004, 00:35 AM
ابوحراز ابوحراز
تاريخ التسجيل: 06-27-2002
مجموع المشاركات: 5545
بلدي ياحبوب لكم التحية على المشاركة في البوست الذي كان الهدف منه الترويح عن النفس قليلاً وكذلك انتقاد لبعض مظاهر البيروقراطية في الوطن العربي عموماً بعيداً عن الإجهاض : أعجبني مسجد بطراز حديث داخل المستشفى وذهبت الى أماكن الوضوء حيث يوجد حوض به حنفيات { صنابير مياه } كان به اربعة مواسير تسع طبعاً لأربعة اشخاص 00 وجدت ثلاثة اشخاص قاعدين بالله انا مما فتحت ماسورتي الموية والنور قطعن من الجماعة الباقيين 0 الموية كلها جات عندي 00 ياجماعة ألا توجد طريقة بسيطة جداً من أجل أن تصب هذه الأربعة مواسير في وقت واحد ؟؟؟؟ ومشروع بسيط مثل هذا لماذا لايتم تجربته قبل استلامه من المقاول ؟؟ عندنا في القرية لو فتحت الماسورة قبل جارك خلاص الرماد كال حماد والله الا يجيب صفيحتو ويغرف منك ؟؟؟؟ والله العظيم حملت معي عكاز مضبب من أجل أن أقابل المعتوه الذي قام بوضع مواسير تحت طريق مدني الخرطوم بجوار مصنع جياد تحت كبري المشير الزبير عليه رحمة الله المؤدي للمدينة السكنية والله حتى اللحظة لو استطعت أن اصل لهذا الشخص فإنني سوف الفخه وليكن ما يكون 0 كل عربية تأتي في هذا الموقع فإنها تقفز حتى تلامس الجسر 0 بالله المعتوه دا لماذا لم يعمق الحـَفر جيداً ويضع المواسير بهدوء ليكون الأسفلت مع مستوى سطح الأرض ؟؟؟ كمان الطامة زادت طامتين بلوحة تركها مهندسو المرور وهي تقول ممنوووووووووووووووووع الوقوف ؟؟ يعني مفروض يكتبوا فيها ممنووووووع التدخين ؟؟ وترجمة اللوحة تعني عدم البطء والتوقف بجوار الجسر وعليك ايها السائق أن تقفز وليكن ما يكون !!!!
09-18-2004, 08:59 AM
waleedi399 waleedi399
تاريخ التسجيل: 08-20-2003
مجموع المشاركات: 2767
هاهاهاهاهاها والله يا ابو حراز الله يجازي شيطانك تعرف قصتك دي ذكرتني مستشفى بحري جنب مواقف الكدرو والحلفايا والدروشاب وكدا ... زمان ما عارف اذا اللوحة دي موجودة ولا لا في حائط مستشفى بحري الواحد كان يجي من ام درمان مروراً ببحري إلى الخرطوم عشان يشوف اللوحة دي مكتوب عليها "العافية في الرضاعة الكافية" طبعاً هسع بالمناسبة الاثنين بقن مفقودات لا في عافية ولا كمان في رضاعة خالص خلي كافية والسبب كلو المظاهر والمصيبة كلها بقت في الدش والديجيتال دا عارف الامهات زمان ولدها دا تقول ماسكاهو مقاولة تفضل ترضع فيه كان ما تم السنتين ما بتفكوا كان ما محتاج رضاعة ترضعواعلى الاقل عشان يسكت وما يصرخ يعمل ليها ازعاج هسع قال شنو الرضاعة بتضيع المظهر العام لجمال المرأة بتعمل على ترهل الصدر ودا كلو من الداهي المصيبة الاسمو الديجتال دا والله جاب لينا حاجات كدا ما سمعنا بيها ولا انزل الله بها من سلطان لمن شارعنا دا "تب" خرب والباقي خليه ساكت حدث ولا حرج دا اقرب مثل ... ولا خلاص مافي داعي نخليص الله يديك الصحة والعافية يا ابوحراز فشيت غلنا دا شويه من زمان عاوزين نتكلم بس ما لاقين سبب بالمناسبة: قبل ما تظهر الحكاية دي والرضاعة والسرطان وما شابه ذلك، كنا لما ندور نمشي الصراف بنقول "عاوزين نرضع الكرت" اللي هو كرت الصراف الالي صحيح رضاعة القروش اهم من لبن الام ذاتو...قال....كافية... قال وقال فصاحتك دي كلها قال!!!!
وليد
(عدل بواسطة waleedi399 on 09-18-2004, 09:01 AM) (عدل بواسطة waleedi399 on 09-18-2004, 09:04 AM)
09-19-2004, 00:39 AM
ابوحراز ابوحراز
تاريخ التسجيل: 06-27-2002
مجموع المشاركات: 5545
وليد العريس ياخوي شايف كلامك الأيام دي كتير جداً 00 مالك بقيت تهضرب مما العرس قرّب 00 قال رضاعة قال 00 الله يكون في عونك حاول كتّر من حليب النيدو كمان نسوان الزمن دا حليب البقر ذاتو عندهن فيهو رااااااااي 0 العروس الليلة بتزعل مني لو قرات الكلام دا ما تخليها تشوف النيدو دا 0 في إجازتي ذهبت لمستشفى أم درمان طبعا مجموعة كبيرة من النسوان كان عندهن إجهاض ماعارف اليوم داك اكلن شنو 00 انا جبت واحدة قريبتي 0 يازول يشيلوا منك الواحدة وتاني تفـتـش ليها ماتـلقاها 00 جات دكتورة جميلة جداً اها قلت ليها تعالي هنا ماشة ووووووووين 00 تجوا ماشين فينا سااااااااااي لا سلام ولا كلام 00 بالله الدكتورة نططت عينيها وخافت " قالت لي عاوز شنو " قلت ليها: عندنا واحدة جوة معاكم ما نجضت لسه ؟؟؟ بالله زولتك بعد ماكانت مبوزة قعدت تضحك وعزمتني ليك في الكافتيريا 00 تاريهو المستشفى فيهو كافتيريا تحت أظنها لأهل العوض والتانية دي انا ماشفتها عاملنها فووووووق والله حاجة جميلة جداً 00بالله العظيم عربي ساااااااي حايم فوق مافي 00 أها قالت لي أطلب 00 زولك عشان عربي وماعارف أي شيء شفت ليك بزيانووووووووس دا اول مرة 00 اها مفتكر القبة فيها فكي قلت ليها انا عاوز دا 00 كرطعت ليك منو { بقة } واحدة اها قمت قلت ليها : دا ديتوووووووووول وللا شنو ؟ بالله زولتك ضحكت بعد { شرقت } 0 مش زولتك عزمتني 00 في الآخر أنا دفعت القرووووووش 00 شوف ليك عوجة 0 قال دكاترة قال !!!
09-18-2004, 11:19 PM
almohndis almohndis
تاريخ التسجيل: 05-05-2002
مجموع المشاركات: 2663
ابو حراز اظنك بي جضومـــك الكبار ديل رضعت لقيت ثلاث سنين حرام ديل مى جضوم رضاعة سنتين قال الرضاعة الطبيعية قال تعرف واحد من اهك العوض كان بجيب لينا الشاى فى الشغل يقوم يقول الهمبريب الصاقت دى بجى من وين هو بجى من وين مازال السؤال قائم
09-19-2004, 02:30 AM
ابوحراز ابوحراز
تاريخ التسجيل: 06-27-2002
مجموع المشاركات: 5545
المهندس اغرب شيء إن الوالدة قالت لي إنك ما طلعت الا بعد 11 شهر والرضاعة أكثر من سنتين دا كلوا عشان التعويض قال والمشكلة اني لم اشرب بعد ذلك اي لبن ولا ايا من منتجاته الا بعد الإغتراب
09-19-2004, 00:02 AM
abas abas
تاريخ التسجيل: 07-27-2002
مجموع المشاركات: 6255
عباس قال عنز قال أنا من يوم الغنماية أكلت العراقي حقي تاني حاربت اللبن طبعاً أديتها ليك لفخة واحدة لحقتها أمات طه لكن انا برضو أحسن من قريبي جاء داخل البيت لقى الغنماية أكلت الدقيق قام قطع ليها إضنيها
09-19-2004, 03:26 AM
shammashi shammashi
تاريخ التسجيل: 03-10-2002
مجموع المشاركات: 2278
أبو حراز ابجضوم بمناسبة الرضاعة دي ذكرتني قصة حقيقة حصلت لجماعة أهلنا
عندنا واحد سمين وعندو جضوم زيك كدي مشي يخطب بنت خالتو (وهي سمحة شديد) قامت حبوبتهم قالت ليهم أنتو متراضعين فالقصة دي محرمة المهم الخطيب أصر وتمت الخطوبة
بعد جاء راجع من السودان قام خالو قال ليهو ياخي الموضوع دا غلط وما حنخليهو يتم قام الخطيب قال ليهو يا خي انا سألت أمي وقالت لي أننا متراضعين رضعتين بس قام خالو قال ليهو أسي عليك الله جضومك ديل جضوم رضعتين بس؟؟؟؟
09-19-2004, 03:51 AM
abas abas
تاريخ التسجيل: 07-27-2002
مجموع المشاركات: 6255
شماشي صاحبك دمه تقييييييييييل ياخي يعني الجماعة ديل ماعاوزين يدوه عديل لكن سيك سيك معلق فيك عندنا واحد كان عاوز بت عمه لكن صاحبكم متخلف والجماعة ماديرين يدوه أها جاهم والريالة والمخاتة سايلات يمين وشمال وقال عاوز البت تعرف نحن جيرانهم والله هم لو وافقوا يدوه نحن ما نوافق أها قالوا ليهو البت دا عاوزة تكمل الثانوي طوالي صاحبك قال بنتظرها قالوا ليهو عاوزنها تكمل الجامعة قام قال ليهم ما عندكم أي مشكلة 00 شوف ليك عكلته قالوا ليهو عاوزنها تحضر الماجستير قال ليهم وكمان الدكتوراة برضو بنتظرها قام عمه قال ليهو : يا زول هووووووووي : ماعاوزين نديك عديل كدا
عباس والله الدخول للمسنجر اصبح مشكلة يعني مما تدخل يا قابلك عباس وكمان شنو قال : قرجة وناس عبد العزيز خطاب فجأة يجي ناطي ليك المهندس واحد برضو اسمو مصعب كلما اعمل ليهو حظر الاقيه دخل بي جحر تاني ياخي أنا مالي ومال المشاكل ما منكم أي فايدة
بدر الدين شنا الزول الجايي من السودان جديد بيني وبينك ما أظنه يرضع بسهولة لأنو حا يكون هناك رضع اليابس والأخضر قال دسم قال انت ليه صوروك براك ناس بورداب الخرطوم ؟؟؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابوحراز
نصار
ابو جهينة
بلدى يا حبوب
عثمان عووضة
waleedi399
almohndis
abas
بدرالدين شنا
فيس بوك
تويتر
انستقرام
يوتيوب
بنتيريست