الى المجاهد عمر البشير قاهر الامريكان وطارد العدوان!!

الى المجاهد عمر البشير قاهر الامريكان وطارد العدوان!!

حلف الطلاق قدام الخلوق عمر العوير
وتحرم عليهو ودوية ست البنات
بلدنا مقبرة العدو
حتى لو كان يانكيا ختير
وحلف الطلاق بالتلاتة قدام الخلوق
لا ناتو لا امريكاست الفجور
تدخل بلدنا ونحن حراس الثغور
ولمن حصل العصر فنقس مشيرنا
وقال ممكن نشوف...ممكن يصير
ممكن تخشوا بس خلوها حبة حبة
ما بنختلف بس انتو باركوها الامور
مشير شنو وبشير شنو
انت يا عمر العوير
سفاح البلد رباطي البلد
وكمان رقوك لرتبة مشير
رقوك في زمن السجم
وات همك بس تصير
شاويشنا شاويش السجم
جزارنا معدوم الضمير
قدر الله قد جابك عديل
رئيسا اهبلا فاضي وعوير
لا طايوق لافهم لاخلقة لا اخلاق
بس قعونجة تحت الزير

والله يا عوقة لو طرت السما
وغسلوك بمطر السما
وصبوك من دهبا نقي
وسووك انسانا سوي
بل سووك كمان نبي

برضو عند شعبي الامير
انت احقر من حقير
مجرم حرب سفاح خبير
واولاد الهرمة المعاك
هم افة البلد الكبير
خرابة البلد الموكح بالسجم
نهابة الشعب الفقير
جلابة الدين الضلام
ماهو دين الله القدير
همباتة الرزق الحرام
عنقالة الكضب الختير
اولاد الحنوت اولاد الحرام
زبالة الزمن العفن
مومس الحال المرير

تف يا عفطة الزمن الكعب
وعوع من دقسة الحال الضهب
وتف لغفلة الناس الحيارى
عندما غابت الناس البصارى
وماتت الناس النوارة

فجاة قد جيت رئيس
تيسا خرتوك من دكة تيوس
وجيتنا في زفة تيوس
ناسا حتالاتا نجوس
همهم خم الفلوس
والكل يحلم بالعروس
عينة من بشرا رخيس
نهابة البلد التعيس
بالغدر والعمل الخسيس
وبقيت رئيس
وبقيت عريس
وانت القايد وانت الرئيس
خليك عريس
همك الليلة الرقيص
كل دلوكة داقة وقالو دقة للرئيس
ما ات وحدك الرئيس
وات وحدك العريس
والماتو في الغابات فطيس

مشير شنو وبشير شنو
والله لو طرت السما
برضو عند شعبي الامير انت احقر من حقير

والله ما شفنا زولا بترقى في زمن الهزيمة
وما شفنا زولا مهزوم ادوه قيمة
والبلد في زمانك والله قد صبحت وليمة
من سقط لقط دخلت جيوشا
جبتوها للبلد الغنيمة
وغردون جبتوه تاني بالعفانات القديمة
وفشودة جبتوها تاني بالخسارات والهزيمة
يا حليلك يا بلد امة قد كانت عظيمة
باعوك انصاف الرجال بالجبن والحالة الازيمة
باعوك برخس التراب اهدوك للاغراب وليمة
لانهم عشاق كراسي وما عندهم للشعب قيمة

مشير شنو وبشير شنو
والله لو طرت السما
انت عند شعبي الامير
انت احقر من حقير

مهازل يا بلد ستين مهازل
حت (رواندا ) العفينة
الغرقانة في بحر المشاكل
ونيجريا سمعة حروبها قد ملت المحافل
تهدي فينا وكنا تيجان المحافل
تهدي في بلدي المناضل
والذي كان حلال المشاكل
بلد قدر السما
وتاريخها مليان جمايل
سديناها عين الشمش
بسمح المكارم وحلو الشمايل
وشعبي السمح كان بسمحو صايل
وشعبي البطل بمجدو هايل

بلدي يا سجم ما جابت حوا غيرها
فيها ترهاقا ونمر والمهدي ربان المسيرة
فيها رابحة وفيها تاية ونحن منك يا مهيرة
صانوها بدم الكرامة والشرف قد كان ضريرة
قلعوها من خشم العدو بالعزة والروح الجسورة
ما سرقوها في قومة دغش ونهبوا خيرها
وما باعوها بالنص والتشاشة والفزرة والروح الكسيرة
صانوها بالسيف والكرامة والهمة والنفس الكبيرة
دي بلد شعبي المعظم براهو ليهو حق تقرير مصيرها
مصيرنا وحدة شعب واحد ودم واحد مابنرضى غيرها
شعب اصلي شعب يغلي وشعب جبار كسيرة
اسالوا السفاح حليفكم يوم ليلة النصر الشهيرة
ليلة مايو راحت (لعب ترتير جهال فوق الدميرة)
واب عاج امامكم شردلاسيادو مكسوفا عضيرة
وحق المظاليم ما بروح واطافي دنيا ازدادت شرورها
ودم الشهيد ما ببقى موية
طالما الاحرار هناك في راس المسيرة
واهلي الغبش في الحارة زي موج الدميرة
شايلنو ريدك يا بلد قدر الله ما خلق
واداهم العافية الوفيرة

مشير شنو وبشير شنو
والله لو طرت السما
برضو عند شعبي الامير
انت احقر من حقير

بلدا هاملة فاقدة وجيع
وجيعا شايف دم البلد السمحة قاعد اضيع
وخابر الناس الماكلة حقوقنا
وسكنو القصر العالي منيع
وسرقوا لبن الشافع اللسة رضيع
بلدا هاملة فاقدة وجيع
اقش الدمعة وافش غبينة الشعب المابي اطيع
بلدا هاملة فاقدة وجيع
دم الشفع لبن الشفع شربو الكوز الفاسد والله فظيع
هذا الكوز نهب الدنياوحجز الاخرة
هذا الفاسد هذا الكاسد ملك البيع
باعو البلد السمحة وابدوا نهما اصلي شنيع

مشير شنو وبشير شنو
والله لو طرت السما
انت عند شعبي الامير
انت احقر من حقير


الزول بترقى يوم نصرو
يوم اعمل مفاخر
وعزة الزول السمح عندما يعمل مآثر
وات شبعان هزايم مليان وداشر
والليلة قد بعت البلد لكل طماع وماكر
والتيوس الانت فيهم
جز دقونها جاي باكر
جاي من وجع الغبش
منهوبة الرزق يادوب تدافر
جاي من ذل المظاليم
هناك في جو الدفاتر
جاي من زعل المغابين
من زمن للحق تعافر
جاي من وجع المساجين هناك في ذل المهاجر
جاي من دم الشهيد كتلوه في زمن المساخر
جاي من مهتوكة عرض
مودرة وحيرانة ودايرالها ساتر
جاي من وجع الارض وهي دنسها العساكر
والتيوس الانت فيهم جز دقونها جاى باكر
ورقيص شنو وعرضة شنو ات يا سجم العساكر
والبلد مكندكة بالفقر والجوع قد طق البنادر
رقيص شنو وعرضة شنو ات يا سجم العساكر
والشعب قد سكن المقابر
والفاشر الحبيبة قادلة فيها اغراب من عساكر
طامعة في البلد الجنازة والشعب مسكين وصابر
وانت راقص ماك شايف ماك خابر
يا رئيسنا ويا عريسنا انت ياكبري الكباير

مشير شنو وبشير شنو
والله لو طرت السما
برضو عند شعبي الامير انت احقر من حقير

قال سلام وقال كلام فاروقنا جلاب الهزيمة
رئيسنا وعريسنا ورقاصنا معدوم العزيمة
في نيفاشا جابوك بارك شان توقع للهزيمة
وصدقت انك حمامة للحب والسلام
وماك داري انك كت متيس زي بهيمة
وفي دارفور عصروك تاني
وقلت (الروب يا الله للكوز والحكومة)
وفي شرقنا العصرة حصلت
وماك مصدق انو اوشيك الهوين
الليلة مليان بالعزيمة
وبعد ده كلو رقوك مشير رتبه ما عارف لزومها
لاحس لا شعور جاري في الدنيا ونعيمه
وكيف الله بنصر ملة الشر اللئيمة
وكيف الله بنصر صاحب اليد الاثيمة
بكرة شعبي المظفر يمسح اهاتو الاليمة
بالكفاح الاصلي فيهو
والشموخ الفيهو ديمة
وتاني ترجع ام در تغني
وتعانق الفاشر التميمة
وجوبا السمحة ترقص لوحدة البلد العظيمة
وكسلا بشوتالها شايلة
فطرة البلد السليمة
تطرد الهم من بلدنا
وترجع ايامنا الحميمة
لا مشيرا فينا يأمر
ولا بشيرا عندو قيمة
ولا دقونا فينا قادلة
بالاساطير القديمة
وتاني ما بننخم ليها
بعدما شفنا الجريمة
وشعبي شايل تارو جاهز
حقو برجع بالعزيمة
ونحن ما بنغفر ذنوب الباعو دينن
وباعوا بلدي الحرة الكريمة
والمسامح وحدو الله
وما بنسامح الولعوا نار الخصومة
والبجامل في حقو تاني
ابقي زولا واطي ديمة
والبجامل في عرضو مرة
مصيرو للذلة وجحيمها
بشير شنو ومشير شنو
والله لو طرت السما
برضو عند شعبي الامير
انت احقر من حقير
انت يا عمر البشير

صاحب القصيدة ورطك يا ابو الشباب انت نسيت نفسك انك وقعت مهزلة ابوجا ولا شنو
اقصد انضميت الي ابوجا

إبراهيم بقال,,,,,,,,,,

أنت أنشقيتو ولا شنو!!!!!!!!!!!
بعد الكلام الكتبتو دا يا مان!!

قد السلك يا اللخو قد السلك,!!

انت يابقال ياخوى قلبتى تانى ولاشنو
رجعتى لى ناس العدل والمساواة

بقال حبيبنا
قلنا نسلم عليك

و نشكرك على القصيدة

العم بقال
لك التحية

رئيسكم الراقص هذا قتل اهل دارفور

رئيسكم الحقير هذا شرد المائات من اهل السودان

رئيسكم هذا قتل اهل كجبار ...


سيدى اذا كنتم تضعون ايديكم مع رجل جبان كا الهر او كالكلب هذا فانتم ظلمة ...


تاكد باننا لن ننسئ قتلانا يا ابراهيم
ارجو ان تفكروا جيدا...

تسلم

عاصم
انا لا اعرف السياسية
لكن ظني انو الليلية رماك جمل

الاخ السمؤال
كيفك
ونهارك سعيد

Quote: عاصم انا لا اعرف السياسية لكن ظني انو الليلية رماك جمل

انت تقول كدة يا سمؤال ...
طبعا صحبك دحل الحكومة على شان كدة با سمؤال ...
كدة السياسة وقعت ليك ولا لسة ...

تسلم

انت ياعاصم
بقال دا موش كان زولكم يوم من الايام

الاخ ود عادل
لك التحية

Quote: انت ياعاصم بقال دا موش كان زولكم يوم من الايام

وسوف يظل من ابناء دارفور الذين يدافعون عن دارفور دوما وابدا


تسلم

والله يابقال أمرك عجيب
قبل أيام قاري ليك رساله في جريده تصف فيها الفاشر كأنها جنة الله في الأرض وتشيد بالحكومه كما لم يشد بها نافع علي نافع ..
والليله جايب قصيدتك الكسيحه دي
أثبت ليك على رأي بالله وخليك واضح خلينا نعرف نتعامل معاك
إنت شغال رزق اليوم باليوم وللا شنو ؟؟؟؟!!!!!

كل يوم تزداد قناعتي أكثر بان بفال
ليس الا أمنجي من أمنجية ألانقاذ ....